Adhikarana 1 (1-2) · Śloka 2
athātō nivr̥ttasantāpīyaṁ rasāyanaṁ vyākhyāsyāmaḥ ||1|| yathōvāca bhagavān dhanvantariḥ ||2||
अथातो निवृत्तसन्तापीयं रसायनं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
nivr̥ttasantāpaśabdamadhikr̥tya kr̥taṁ rasāyanaṁ nivr̥ttasantāpīyam| tadadhikr̥tya kr̥tō grantha itīyapratyayaḥ||1-2||
Adhikarana 2 (3) · Śloka 3
yathā nivr̥ttasantāpā mōdantē divi dēvatāḥ | tathauṣadhīrimāḥ prāpya mōdantē bhuvi mānavāḥ ||3||
यथा निवृत्तसन्तापा मोदन्ते दिवि देवताः | तथौषधीरिमाः प्राप्य मोदन्ते भुवि मानवाः ||३||
🔊 Audio coming soon
mahauṣadhirasāyanasyōpādēyatvārthaṁ sāmānyaphalairauṣadhipraśaṁsāmuddiśannāha- yathētyādi| nivr̥ttavyādhitvēna śārīramānasikaduḥkharahitāḥ, mōdantē hr̥ṣyantiḥ, ētēna manaḥsukhaṁ darśayati| divi svargē||3||
Adhikarana 3 (4) · Śloka 4
atha khalu sapta puruṣā rasāyanaṁ nōpayuñjīran; tadyathā- anātmavānalasō daridraḥ pramādī vyasanī pāpakr̥d bhēṣajāpamānī cēti | saptabhirēva kāraṇairna sampadyatē; tadyathā- ajñānādanārambhādasthiracittatvāddāridryādanāyattatvādadharmādauṣadhālābhāccēti ||4||
अथ खलु सप्त पुरुषा रसायनं नोपयुञ्जीरन्; तद्यथा- अनात्मवानलसो दरिद्रः प्रमादी व्यसनी पापकृद् भेषजापमानी चेति | सप्तभिरेव कारणैर्न सम्पद्यते; तद्यथा- अज्ञानादनारम्भादस्थिरचित्तत्वाद्दारिद्र्यादनायत्तत्वादधर्मादौषधालाभाच्चेति ||४||
🔊 Audio coming soon
anātmavān apraśastātmā mithyācārapravr̥ttō mūḍhabuddhiḥ| pramādī pramādaśīlō'navahitacitta ityarthaḥ| vyasanāni dyūtamadyavēśyādīni santyasyāsau vyasanī| sapta kāraṇāni ca santi anātmavadādīnāṁ saptānāṁ puṁsāmajñānādikāraṇaiḥ saptabhirēva yathāyathaṁ rasāyanaṁ na prayuñjyāt| tatrānātmanō'jñānāt, daridrasyālasasyānārambhānavasthitacittatvānna pravr̥ttiḥ, ēvaṁ pramādivyasanipāpakr̥dādīnāmapyapravr̥ttiranumēyēti||4||
Adhikarana 4 (5) · Śloka 5
athauṣadhīrvyākhyāsyāmaḥ- tatrājagarī, śvētakāpōtī, kr̥ṣṇakāpōtī, gōnasī, vārāhī, kanyā, chatrā, aticchatrā, karēṇuḥ, ajā, cakrakā, ādityaparṇī, brahmasuvarcalā, śrāvaṇī, mahāśrāvaṇī, gōlōmī, ajalōmī, mahāvēgavatī, cētyaṣṭādaśa sōmasamavīryā mahauṣadhayō vyākhyātāḥ | tāsāṁ sōmavat kriyāśīḥstutayaḥ śāstrē'bhihitāḥ | tāsāmāgārē'bhihutānāṁ yāḥ kṣīravatyastāsāṁ kṣīrakuḍavaṁ sakr̥dēvōpayuñjīta , yāstvakṣīrā mūlavatyastāsāṁ pradēśinīpramāṇāni trīṇi kāṇḍāni pramāṇamupayōgē, śvētakāpōtī samūlapatrā bhakṣayitavyā, gōnasyajagarīkr̥ṣṇakāpōtīnāṁ sanakhamuṣṭiṁ khaṇḍaśaḥ kalpayitvā kṣīrēṇa vipācya parisrāvyābhighāritamabhihutaṁ ca sakr̥dēvōpayuñjīta, cakrakāyāḥ payaḥ sakr̥dēva, brahmasuvarcalā saptarātramupayōktavyā bhakṣyakalpēna, śēṣāṇāṁ pañca pañca palāni kṣīrāḍhakakvathitāni prasthē'vaśiṣṭē'vatārya parisrāvya sakr̥dēvōpayuñjīta | sōmavadāhāravihārau vyākhyātau, kēvalaṁ navanītamabhyaṅgārthē, śēṣaṁ sōmavadānirgamāditi ||5||
अथौषधीर्व्याख्यास्यामः- तत्राजगरी, श्वेतकापोती, कृष्णकापोती, गोनसी, वाराही, कन्या, छत्रा, अतिच्छत्रा, करेणुः, अजा, चक्रका, आदित्यपर्णी, ब्रह्मसुवर्चला, श्रावणी, महाश्रावणी, गोलोमी, अजलोमी, महावेगवती, चेत्यष्टादश सोमसमवीर्या महौषधयो व्याख्याताः | तासां सोमवत् क्रियाशीःस्तुतयः शास्त्रेऽभिहिताः | तासामागारेऽभिहुतानां याः क्षीरवत्यस्तासां क्षीरकुडवं सकृदेवोपयुञ्जीत , यास्त्वक्षीरा मूलवत्यस्तासां प्रदेशिनीप्रमाणानि त्रीणि काण्डानि प्रमाणमुपयोगे, श्वेतकापोती समूलपत्रा भक्षयितव्या, गोनस्यजगरीकृष्णकापोतीनां सनखमुष्टिं खण्डशः कल्पयित्वा क्षीरेण विपाच्य परिस्राव्याभिघारितमभिहुतं च सकृदेवोपयुञ्जीत, चक्रकायाः पयः सकृदेव, ब्रह्मसुवर्चला सप्तरात्रमुपयोक्तव्या भक्ष्यकल्पेन, शेषाणां पञ्च पञ्च पलानि क्षीराढकक्वथितानि प्रस्थेऽवशिष्टेऽवतार्य परिस्राव्य सकृदेवोपयुञ्जीत | सोमवदाहारविहारौ व्याख्यातौ, केवलं नवनीतमभ्यङ्गार्थे, शेषं सोमवदानिर्गमादिति ||५||
🔊 Audio coming soon
sōmavaditi adhvaravidhivarjamanyatsarvaṁ sōmavat kriyāvidhānam| āśīrmaṅgalapāṭhādiḥ, stutiḥ phalavādaḥ; gayī tu kriyā karaṇaṁ vidhānaṁ, āśīḥ phalaṁ, tasya stutayaḥ sōmasyaiva; śāstrē āgamē abhihitāḥ| ētēna tanmatē sōmasyēvādhvaravidhirapi prāpyatē| abhihutānāṁ kr̥tahōmānām| kṣīrakuḍavamaṣṭau palāni, mahatī mātrā| pradēśinīpramāṇāni āyāmavistārābhyām| kṣīrēṇa vipācyēti “dravyādaṣṭaguṇaṁ kṣīraṁ kṣīrāttōyaṁ caturguṇam| kṣīrāvaśēṣaḥ kartavyaḥ kṣīrapākē tvayaṁ vidhiḥ” anēna vidhinā| abhighāritamabhihutamiti pūrvamabhighāritaṁ paścādabhihutaṁ; abhighāritam īṣaddhr̥tāktam| tatra cakrakāyāḥ payaḥ sakr̥dēva| gayī tu ‘tatra cakrakāyāḥ pāyasam’ iti paṭhati, vyākhyānayati ca- tatra cakrakāyāḥ palakalkaṁ dviguṇitataṇḍulaṁ kṣīrēṇa sādhyaṁ, sakr̥dēvōpayuñjīta| bhakṣyakalpēnēti apūpādividhānēna| ānirgamāditi gūḍhāgāraṁ kr̥tvā tatrāvāsaparyantamityarthaḥ||5||
Adhikarana 5 (6-8) · Śloka 8
bhavanti cātra- yuvānaṁ siṁhavikrāntaṁ kāntaṁ śrutanigādinam | kuryurētāḥ kramēṇaiva dvisahasrāyuṣaṁ naram ||6|| aṅgadī kuṇḍalī maulī divyasrakcandanāmbaraḥ | caratyamōghasaṅkalpō nabhasyambudadurgamē ||7|| vrajanti pakṣiṇō yēna jalalambāśca tōyadāḥ | gatiḥ sauṣadhisiddhasya sōmasiddhē gatiḥ parā ||8||
भवन्ति चात्र- युवानं सिंहविक्रान्तं कान्तं श्रुतनिगादिनम् | कुर्युरेताः क्रमेणैव द्विसहस्रायुषं नरम् ||६|| अङ्गदी कुण्डली मौली दिव्यस्रक्चन्दनाम्बरः | चरत्यमोघसङ्कल्पो नभस्यम्बुददुर्गमे ||७|| व्रजन्ति पक्षिणो येन जललम्बाश्च तोयदाः | गतिः सौषधिसिद्धस्य सोमसिद्धे गतिः परा ||८||
🔊 Audio coming soon
ataḥ paraṁ phalaśrutimāha- yuvānamityādi| vikrāntaṁ vikramayuktam| kāntaṁ manōjñam| kramēṇaivēti śāstravihitasakalakramēṇa| aṅgadī kēyūrayuktaḥ, kuṇḍalī kuṇḍalayuktaḥ, maulī mukuṭadhārī, srak mālā, ambaraṁ vastram, amōghasaṅkalpaḥ saphalakāmitaḥ| nabhasi ākāśē| ambudadurgamē mēghairduḥkhasañcārē| sōmasiddhē gatiḥ parēti sōmasiddhē puruṣē punarēvamutkr̥ṣṭaṁ gamanaṁ bhavatītyarthaḥ||6-8||
Adhikarana 6 (9-25) · Śloka 25
atha vakṣyāmi vijñānamauṣadhīnāṁ pr̥thak pr̥thak | maṇḍalaiḥ kapilaiścitraiḥ sarpābhā pañcaparṇinī ||9|| pañcāratnipramāṇā ca vijñēyā'jagarī budhaiḥ | niṣpatrā kanakābhāsā mūlē dvyaṅgulasammitā ||10|| sarpākārā lōhitāntā śvētakāpōtirucyatē | dviparṇinīṁ mūlabhavāmaruṇāṁ kr̥ṣṇamaṇḍalām ||11|| dvyaratnimātrāṁ jānīyādgōnasīṁ gōnasākr̥tim | sakṣīrāṁ rōmaśāṁ mr̥dvīṁ rasēnēkṣurasōpamām ||12|| ēvaṁrūparasāṁ cāpi kr̥ṣṇakāpōtimādiśēt | kr̥ṣṇasarpasvarūpēṇa vārāhī kandasambhavā ||13|| ēkapatrā mahāvīryā bhinnāñjanasamaprabhā | chatrāticchatrakē vidyādrakṣōghnē kandasambhavē ||14|| jarāmr̥tyunivāriṇyau śvētakāpōtisaṁsthitē | kāntairdvādaśabhiḥ patrairmayūrāṅgaruhōpamaiḥ ||15|| kandajā kāñcanakṣīrī kanyā nāma mahauṣadhī | karēṇuḥ subahukṣīrā kandēna gajarūpiṇī ||16|| hastikarṇapalāśasya tulyaparṇā dviparṇinī | ajāstanābhakandā tu sakṣīrā kṣuparūpiṇī ||17|| ajā mahauṣadhī jñēyā śaṅkhakundēndupāṇḍurā | śvētāṁ vicitrakusumāṁ kākādanyā samāṁ kṣupām ||18|| cakrakāmōṣadhīṁ vidyājjarāmr̥tyunivāriṇīm | mūlinī pañcabhiḥ patraiḥ suraktāṁśukakōmalaiḥ ||19|| ādityaparṇinī jñēyā sadā''dityānuvartinī | kanakābhā jalāntēṣu sarvataḥ parisarpati ||20|| sakṣīrā padminīprakhyā dēvī brahmasuvarcalā | aratnimātrakṣupakā patraidrvyaṅgulasammitaiḥ ||21|| puṣpairnīlōtpalākāraiḥ phalaiścāñjanasannibhaiḥ | śrāvaṇī mahatī jñēyā kanakābhā payasvinī ||22|| śrāvaṇī pāṇḍurābhāsā mahāśrāvaṇilakṣaṇā | gōlōmī cājalōmī ca rōmaśē kandasambhavē ||23|| haṁsapādīva vicchinnaiḥ patrairmūlasamudbhavaiḥ | athavā śaṅkhapuṣpyā ca samānā sarvarūpataḥ ||24|| vēgēna mahatā''viṣṭā sarpanirmōkasannibhā | ēṣā vēgavatī nāma jāyatē hyambudakṣayē ||25||
अथ वक्ष्यामि विज्ञानमौषधीनां पृथक् पृथक् | मण्डलैः कपिलैश्चित्रैः सर्पाभा पञ्चपर्णिनी ||९|| पञ्चारत्निप्रमाणा च विज्ञेयाऽजगरी बुधैः | निष्पत्रा कनकाभासा मूले द्व्यङ्गुलसम्मिता ||१०|| सर्पाकारा लोहितान्ता श्वेतकापोतिरुच्यते | द्विपर्णिनीं मूलभवामरुणां कृष्णमण्डलाम् ||११|| द्व्यरत्निमात्रां जानीयाद्गोनसीं गोनसाकृतिम् | सक्षीरां रोमशां मृद्वीं रसेनेक्षुरसोपमाम् ||१२|| एवंरूपरसां चापि कृष्णकापोतिमादिशेत् | कृष्णसर्पस्वरूपेण वाराही कन्दसम्भवा ||१३|| एकपत्रा महावीर्या भिन्नाञ्जनसमप्रभा | छत्रातिच्छत्रके विद्याद्रक्षोघ्ने कन्दसम्भवे ||१४|| जरामृत्युनिवारिण्यौ श्वेतकापोतिसंस्थिते | कान्तैर्द्वादशभिः पत्रैर्मयूराङ्गरुहोपमैः ||१५|| कन्दजा काञ्चनक्षीरी कन्या नाम महौषधी | करेणुः सुबहुक्षीरा कन्देन गजरूपिणी ||१६|| हस्तिकर्णपलाशस्य तुल्यपर्णा द्विपर्णिनी | अजास्तनाभकन्दा तु सक्षीरा क्षुपरूपिणी ||१७|| अजा महौषधी ज्ञेया शङ्खकुन्देन्दुपाण्डुरा | श्वेतां विचित्रकुसुमां काकादन्या समां क्षुपाम् ||१८|| चक्रकामोषधीं विद्याज्जरामृत्युनिवारिणीम् | मूलिनी पञ्चभिः पत्रैः सुरक्तांशुककोमलैः ||१९|| आदित्यपर्णिनी ज्ञेया सदाऽऽदित्यानुवर्तिनी | कनकाभा जलान्तेषु सर्वतः परिसर्पति ||२०|| सक्षीरा पद्मिनीप्रख्या देवी ब्रह्मसुवर्चला | अरत्निमात्रक्षुपका पत्रैद्र्व्यङ्गुलसम्मितैः ||२१|| पुष्पैर्नीलोत्पलाकारैः फलैश्चाञ्जनसन्निभैः | श्रावणी महती ज्ञेया कनकाभा पयस्विनी ||२२|| श्रावणी पाण्डुराभासा महाश्रावणिलक्षणा | गोलोमी चाजलोमी च रोमशे कन्दसम्भवे ||२३|| हंसपादीव विच्छिन्नैः पत्रैर्मूलसमुद्भवैः | अथवा शङ्खपुष्प्या च समाना सर्वरूपतः ||२४|| वेगेन महताऽऽविष्टा सर्पनिर्मोकसन्निभा | एषा वेगवती नाम जायते ह्यम्बुदक्षये ||२५||
🔊 Audio coming soon
vistr̥takaniṣṭhāṅgulimuṣṭikahastaḥ aratniḥ| śvētakāpōtisaṁsthitē iti śvētakāpōtikākr̥tītyarthaḥ| rakṣōghnē iti svabhāvēna rakṣasāṁ pradhvaṁsakarē| kāñcanavarṇaṁ kṣīraṁ yasyāḥ sā kāñcanakṣīrī| kṣuparūpiṇī viṭaparūpiṇī, baddhamuṣṭikaraḥ aratniḥ| nivātē'pi svabhāvavēgēnāviṣṭā| ambudakṣayē śaradi||9-25||
Adhikarana 7 (26-28) · Śloka 29
saptādau sarparūpiṇyō hyauṣadhyō yāḥ prakīrtitāḥ | tāsāmuddharaṇaṁ kāryaṁ mantrēṇānēna sarvadā ||26|| mahēndrarāmakr̥ṣṇānāṁ brāhmaṇānāṁ gavāmapi | tapasā tējasā vā'pi praśāmyadhvaṁ śivāya vai ||27|| mantrēṇānēna matimān sarvā ēvābhimantrayēt | aśraddadhānairalasaiḥ kr̥taghnaiḥ pāpakarmabhiḥ ||28|| naivāsādayituṁ śakyāḥ sōmāḥ sōmasamāstathā |29|
सप्तादौ सर्परूपिण्यो ह्यौषध्यो याः प्रकीर्तिताः | तासामुद्धरणं कार्यं मन्त्रेणानेन सर्वदा ||२६|| महेन्द्ररामकृष्णानां ब्राह्मणानां गवामपि | तपसा तेजसा वाऽपि प्रशाम्यध्वं शिवाय वै ||२७|| मन्त्रेणानेन मतिमान् सर्वा एवाभिमन्त्रयेत् | अश्रद्दधानैरलसैः कृतघ्नैः पापकर्मभिः ||२८|| नैवासादयितुं शक्याः सोमाः सोमसमास्तथा |२९|
🔊 Audio coming soon
anēna mantrēṇōddharaṇamutpāṭanamauṣadhaparirakṣārthamabhimataphalaprāptyarthaṁ ca| mantramāha- mahēndrētyādi| praśāmyadhvam upaśamaṁ kuruta; kimarthaṁ? śivāya kalyāṇāya| vai niścitam| naivāsādayituṁ naiva prāptum||26-28||-
Adhikarana 8 (29) · Śloka 30
pītāvaśēṣamamr̥taṁ dēvairbrahmapurōgamaiḥ ||29|| nihitaṁ sōmavīryāsu sōmē cāpyōṣadhīpatau |30|
पीतावशेषममृतं देवैर्ब्रह्मपुरोगमैः ||२९|| निहितं सोमवीर्यासु सोमे चाप्योषधीपतौ |३०|
🔊 Audio coming soon
paurāṇikīṁ śrutiṁ darśayannāha- pītētyādi| nihitaṁ dhr̥tam| sōmavīryāsu auṣadhiṣu| sōmē candramasi||29||-
Adhikarana 9 (30-40) · Śloka 40
dēvasundē hradavarē tathā sindhau mahānadē ||30|| dr̥śyatē ca jalāntēṣu mēdhyā brahmasuvarcalā | ādityaparṇinī jñēyā tathaiva himasaṅkṣayē ||31|| dr̥śyatē'jagarī nityaṁ gōnasī cāmbudāgamē | kāśmīrēṣu sarō divyaṁ nāmnā kṣudrakamānasam ||32|| karēṇustatra kanyā ca chatrāticchatrakē tathā | gōlōmī cājalōmī ca mahatī śrāvaṇī tathā ||33|| vasantē kr̥ṣṇasarpākhyā gōnasī ca pradr̥śyatē | kauśikīṁ saritaṁ tīrtvā sañjayantyāstu pūrvataḥ ||34|| kṣitipradēśō valmīkairācitō yōjanatrayam | vijñēyā tatra kāpōtī śvētā valmīkamūrdhasu ||35|| malayē nalasētau ca vēgavatyauṣadhī dhruvā | kārtikyāṁ paurṇamāsyāṁ ca bhakṣayēttāmupōṣitaḥ ||36|| sōmavaccātra vartēta phalaṁ tāvacca kīrtitam | sarvā vicēyāstvōṣadhyaḥ sōmāścāpyarbudē girau ||37|| sa śr̥ṅgairdēvacaritairambudānīkabhēdibhiḥ | vyāptastīrthaiśca vikhyātaiḥ siddharṣisurasēvitaiḥ ||38|| guhābhirbhīmarūpābhiḥ siṁhōnnāditakukṣibhiḥ | gajālōḍitatōyābhirāpagābhiḥ samantataḥ | vividhairdhātubhiścitraiḥ sarvatraivōpaśōbhitaḥ ||39|| nadīṣu śailēṣu saraḥsu cāpi puṇyēṣvaraṇyēṣu tathā''śramēṣu | sarvatra sarvāḥ parimārgitavyāḥ sarvatra bhūmirhi vasūni dhattē ||40||
देवसुन्दे ह्रदवरे तथा सिन्धौ महानदे ||३०|| दृश्यते च जलान्तेषु मेध्या ब्रह्मसुवर्चला | आदित्यपर्णिनी ज्ञेया तथैव हिमसङ्क्षये ||३१|| दृश्यतेऽजगरी नित्यं गोनसी चाम्बुदागमे | काश्मीरेषु सरो दिव्यं नाम्ना क्षुद्रकमानसम् ||३२|| करेणुस्तत्र कन्या च छत्रातिच्छत्रके तथा | गोलोमी चाजलोमी च महती श्रावणी तथा ||३३|| वसन्ते कृष्णसर्पाख्या गोनसी च प्रदृश्यते | कौशिकीं सरितं तीर्त्वा सञ्जयन्त्यास्तु पूर्वतः ||३४|| क्षितिप्रदेशो वल्मीकैराचितो योजनत्रयम् | विज्ञेया तत्र कापोती श्वेता वल्मीकमूर्धसु ||३५|| मलये नलसेतौ च वेगवत्यौषधी ध्रुवा | कार्तिक्यां पौर्णमास्यां च भक्षयेत्तामुपोषितः ||३६|| सोमवच्चात्र वर्तेत फलं तावच्च कीर्तितम् | सर्वा विचेयास्त्वोषध्यः सोमाश्चाप्यर्बुदे गिरौ ||३७|| स शृङ्गैर्देवचरितैरम्बुदानीकभेदिभिः | व्याप्तस्तीर्थैश्च विख्यातैः सिद्धर्षिसुरसेवितैः ||३८|| गुहाभिर्भीमरूपाभिः सिंहोन्नादितकुक्षिभिः | गजालोडिततोयाभिरापगाभिः समन्ततः | विविधैर्धातुभिश्चित्रैः सर्वत्रैवोपशोभितः ||३९|| नदीषु शैलेषु सरःसु चापि पुण्येष्वरण्येषु तथाऽऽश्रमेषु | सर्वत्र सर्वाः परिमार्गितव्याः सर्वत्र भूमिर्हि वसूनि धत्ते ||४०||
🔊 Audio coming soon
dēśamāha- dēvasundē ityādi| hradē jalāśayaviśēṣē| mahānada iti lōkē prasiddhaḥ| himasaṅkṣayē vasantē| ambudāgamē varṣāsu| kr̥ṣṇasarpākhyā vārāhī| vijñēyā anusaraṇīyāḥ| kutaḥ punaratra girau sarvā ēvānusaraṇīyā ityāha- sa ityādi| yatō giriruktaviśēṣaṇaḥ | ambudānīkaṁ mēghaghaṭā| dhātubhiḥ gairikādibhiḥ| punaḥ kiṁviśiṣṭō giriḥ? guhābhiruktaviśēṣaṇābhirvyāptaḥ, siṁhōnnāditakukṣibhiḥ siṁhairunnāditāḥ kukṣayō yāsāṁ tāstābhiḥ, punarāpagābhirnadībhiruktaviśēṣaṇābhirupalakṣitaḥ| hi yasmādarthē| yasmāt kāraṇāt sarvatra sarvadēśēṣu, bhūmiriyaṁ ratnāni dhārayatītyarthaḥ||30-40||
Adhikarana puShpikA · Śloka 30
iti suśrutasaṁhitāyāṁ cikitsāsthānē nivr̥ttasantāpīyaṁ rasāyanaṁ nāma triṁśō'dhyāyaḥ ||30||
इति सुश्रुतसंहितायां चिकित्सास्थाने निवृत्तसन्तापीयं रसायनं नाम त्रिंशोऽध्यायः ||३०||
🔊 Audio coming soon
iti śrīḍalha(hla)ṇaviracitāyāṁ nibandhasaṅgrahākhyāyāṁ suśrutavyākhyāyāṁ cikitsāsthānē triṁśattamō'dhyāyaḥ||30||