Adhikarana 1 (1-3) · Śloka 3
athāta udarāṇāṁ cikitsitaṁ vyākhyāsyāmaḥ ||1||
yathōvāca bhagavān dhanvantariḥ ||2||
aṣṭāvudarāṇi pūrvamuddiṣṭāni |
tēṣvasādhyaṁ baddhagudaṁ parisrāvi ca; avaśiṣṭāni kr̥cchrasādhyāni; sarvāṇyēva pratyākhyāyōpakramēta |
tēṣvādyaścaturvargō bhēṣajasādhyaḥ, uttaraḥ śastrasādhyaḥ, kālaprakarṣāt sarvāṇyēva śastrasādhyāni varjayitavyāni vā ||3||
View original
अथात उदराणां चिकित्सितं व्याख्यास्यामः ||१||
यथोवाच भगवान् धन्वन्तरिः ||२||
अष्टावुदराणि पूर्वमुद्दिष्टानि |
तेष्वसाध्यं बद्धगुदं परिस्रावि च; अवशिष्टानि कृच्छ्रसाध्यानि; सर्वाण्येव प्रत्याख्यायोपक्रमेत |
तेष्वाद्यश्चतुर्वर्गो भेषजसाध्यः, उत्तरः शस्त्रसाध्यः, कालप्रकर्षात् सर्वाण्येव शस्त्रसाध्यानि वर्जयितव्यानि वा ||३||
nidānasthānē kathitē'pyaṣṭatvē'tra punaraṣṭasaṅkhyākhyāpanaṁ plīhōdarayakr̥ddālyudarayōścikitsitaikatvaprakhyāpanāya | avaśiṣṭāni kr̥cchrasādhyānīti tēṣvapi yathōttaraṁ kr̥cchrataratvaṁ jñēyam| tathāca- “vātāt pittāt kaphāt plīhnaḥ sannipātāttathōdakāt| paraṁ paraṁ kr̥cchrataramudaraṁ bhiṣagādiśēt” (ca. ci. 13) iti| sarvāṇyēvēti ṣaḍiti kēcit, ṣaṭsvēva kr̥cchratvapratipādanāt; baddhagudaparisrāvibhyāṁ sahāṣṭāvapītyanyē, tayōrapi cikitsitōktēḥ, sarvagrahaṇācca| tēṣvityādi| ādyaścaturvargaḥ vātapittakaphadūṣīviṣanimittāni catvāryudarāṇi; uttarastu plīhōdarabaddhagudacchidrōdakōdarāṇi| kālaprakarṣāditi bhēṣajasādhyakālātikramāt śastrasādhyakālātikramācca sarvāṇyēvauṣadhasādhyānyapi śastrasādhyāni syuḥ, śastrasādhyāni varjayitavyānīti varjanārhāṇi vētyarthaḥ||1-3||
Adhikarana 2 (4) · Śloka 4
udarī tu gurvabhiṣyandirūkṣavidāhisnigdhapiśitapariṣēkāvagāhān pariharēt; śāliṣaṣṭikayavagōdhūmanīvārān nityamaśnīyāt ||4||
View original
उदरी तु गुर्वभिष्यन्दिरूक्षविदाहिस्निग्धपिशितपरिषेकावगाहान् परिहरेत्; शालिषष्टिकयवगोधूमनीवारान् नित्यमश्नीयात् ||४||
udarītyādi| dōṣadhātumalasrōtasāṁ klēdaprāptijananamabhiṣyandi| vidāhi kāñjikādi| snigdhaṁ piśitaṁ mēduramāṁsam| nīvāra ulikādhānyam||4||
Adhikarana 3 (5) · Śloka 5
tatra vātōdariṇaṁ vidārigandhādisiddhēna sarpiṣāsnēhayitvā, tilvakavipakvēnānulōmya, citrāphalatailapragāḍhēna vidārigandhādikaṣāyēṇāsthāpayēdanuvāsayēcca, sālvaṇēna cōpanāhayēdudaraṁ, bhōjayēccainaṁ vidārigandhādisiddhēna kṣīrēṇa jāṅgalarasēna ca, svēdayēccābhīkṣṇam ||5||
View original
तत्र वातोदरिणं विदारिगन्धादिसिद्धेन सर्पिषास्नेहयित्वा, तिल्वकविपक्वेनानुलोम्य, चित्राफलतैलप्रगाढेन विदारिगन्धादिकषायेणास्थापयेदनुवासयेच्च, साल्वणेन चोपनाहयेदुदरं, भोजयेच्चैनं विदारिगन्धादिसिद्धेन क्षीरेण जाङ्गलरसेन च, स्वेदयेच्चाभीक्ष्णम् ||५||
tatrētyādi| tilvakaḥ paṭṭikārōdhraḥ| anulōmya virēcya| citrāphalatailaṁ dantīphalatailam| āsthāpayēt nirūhayēt, anuvāsayēcca citrāphalatailēnaiva| sālvaṇēnōpanāhayēt badhnīyāt| svēdayēccābhīkṣṇamiti ēvamagrētanē kaphārabdhē'pi svēdō vidhēyaḥ, natu pittārabdhē; sa ca svēda ājalaprāptēḥ , ata ūrdhvaṁ sarvēṣāmasvēdyatvam| kathamatrōdariṇaḥ snēhasvēdāsthāpanānuvāsanāni suśrutācāryaḥ prāha? agrē ‘asnēhyā asvēdyā nānuvāsyā nāsthāpyā’ iti paṭhitatvāt; ētanna, yataśchidrōdakōdariṇōrēva tatra niṣēdhaḥ, anyēṣu yathāvasthaṁ snēhādayaḥ prayōjyā iti||5||
Adhikarana 4 (6) · Śloka 6
pittōdariṇaṁ tu madhuragaṇavipakvēna sarpiṣā snēhayitvā, śyāmātriphalātrivr̥dvipakvēnānulōmya, śarkarāmadhughr̥tapragāḍhēna nyagrōdhādikaṣāyēṇāsthāpayēdanuvāsayēcca, pāyasēnōpanāhayēdudaraṁ, bhōjayēccainaṁ vidārigandhādisiddhēna payasā ||6||
View original
पित्तोदरिणं तु मधुरगणविपक्वेन सर्पिषा स्नेहयित्वा, श्यामात्रिफलात्रिवृद्विपक्वेनानुलोम्य, शर्करामधुघृतप्रगाढेन न्यग्रोधादिकषायेणास्थापयेदनुवासयेच्च, पायसेनोपनाहयेदुदरं, भोजयेच्चैनं विदारिगन्धादिसिद्धेन पयसा ||६||
pittōdariṇamityādi| madhuragaṇaḥ kākōlyādīni| śyāmā vr̥ddhadārakaḥ| kṣīrasiddhāstaṇḍulāḥ pāyasaḥ||6||
Adhikarana 5 (7) · Śloka 7
ślēṣmōdariṇaṁ tu pippalyādikaṣāyasiddhēna sarpiṣōpasnēhya, snuhīkṣīravipakvēnānulōmya, trikaṭukamūtrakṣāratailapragāḍhēna muṣkakādikaṣāyēṇāsthāpayēdanuvāsayēcca, śaṇātasīdhātakīkiṇvasarṣapamūlakabījakalkaiścōpanāhayēdudaraṁ, bhōjayēccainaṁ trikaṭukapragāḍhēna kulatthayūṣēṇa pāyasēna vā, svēdayēccābhīkṣṇam ||7||
View original
श्लेष्मोदरिणं तु पिप्पल्यादिकषायसिद्धेन सर्पिषोपस्नेह्य, स्नुहीक्षीरविपक्वेनानुलोम्य, त्रिकटुकमूत्रक्षारतैलप्रगाढेन मुष्ककादिकषायेणास्थापयेदनुवासयेच्च, शणातसीधातकीकिण्वसर्षपमूलकबीजकल्कैश्चोपनाहयेदुदरं, भोजयेच्चैनं त्रिकटुकप्रगाढेन कुलत्थयूषेण पायसेन वा, स्वेदयेच्चाभीक्ष्णम् ||७||
ślēṣmōdariṇamityādi| muṣkakapalāśadhāvanyādirmuṣkakādiḥ| āsthāpanavargasiddhēna tailēnānuvāsanam| kiṇvaṁ surābījam||7||
Adhikarana 6 (8) · Śloka 8
dūṣyōdariṇaṁ tu pratyākhyāya saptalāśaṅkhinīsvarasasiddhēna sarpiṣā viracayēnmāsamardhamāsaṁ vā, mahāvr̥kṣakṣīrasurāgōmūtrasiddhēna vā; śuddhakōṣṭhaṁ tu madyēnāśvamārakaguñjākākādanīmūlakalkaṁ pāyayēt; ikṣukāṇḍāni vā kr̥ṣṇasarpēṇa daṁśayitvā bhakṣayēdvallīphalāni vā, mūlajaṁ kandajaṁ vā viṣamāsēvayēt, tēnāgadō bhavatyanyaṁ vā bhāvamāpadyatē ||8||
View original
दूष्योदरिणं तु प्रत्याख्याय सप्तलाशङ्खिनीस्वरससिद्धेन सर्पिषा विरचयेन्मासमर्धमासं वा, महावृक्षक्षीरसुरागोमूत्रसिद्धेन वा; शुद्धकोष्ठं तु मद्येनाश्वमारकगुञ्जाकाकादनीमूलकल्कं पाययेत्; इक्षुकाण्डानि वा कृष्णसर्पेण दंशयित्वा भक्षयेद्वल्लीफलानि वा, मूलजं कन्दजं वा विषमासेवयेत्, तेनागदो भवत्यन्यं वा भावमापद्यते ||८||
sānnipātikacikitsitamupadiśannāha- dūṣyōdariṇamityādi| śaṅkhinī yavatiktābhēdaḥ| sānnipātikōdarē snēhādi yaduktaṁ tadvātādyudarōditabhēṣajagaṇaiḥ sarvaṁ sādhanīyam| yadāha carakaḥ- “sannipātōdarē sarvā yathōktāḥ kārayēt kriyāḥ” (ca. ci. 13) iti| laghuvāgbhaṭē'pi “sannipātōdarē kuryānnātikṣīṇabalānalē| dōṣōdrēkānurōdhēna pratyākhyāya kriyāmimām” (vā. ci. 15) iti| śaṅkhinī yavatiktābhēdaḥ| mahāvr̥kṣētyādi| virēcayēditi śēṣaḥ| mahāvr̥kṣaḥ sēhuṇḍaḥ| mahāvr̥kṣakṣīramātrā kalkapramāṇā| śuddhētyādi| guñjā cirihiṇṭikā| kākādanī vāyasatindukā| ikṣukāṇḍānītyādi| yathā madātyayē madyapānam, agnidagdhē'gnisvēdaḥ, atīsārē svinnapathyayā viṭpravartanaṁ, chardyāṁ vamanaṁ, sarpaviṣē viṣabhakṣaṇaṁ, tadvadviṣādyutpannōdarē'pi kr̥ṣṇasarpadaṣṭēkṣukāṇḍabhakṣaṇaṁ viṣabhakṣaṇaṁ vā| vallīphalāni karkaṭīprabhr̥tīni| anyaṁ vā bhāvamāpadyatē maraṇaṁ prāpnōti| karmēdaṁ dāruṇam, akriyāyāṁ dhruvaṁ maraṇaṁ, kriyāyāṁ saṁśayē satyēvaṁ kuryāt, tatrāpīśvarānujñātēnaiva kāryam||8||
Adhikarana 7 (9) · Śloka 9
bhavati cātra- kupitānilamūlatvāt sañcitatvānmalasya ca |
sarvōdarēṣu śaṁsanti bahuśastvanulōmanam ||9||
View original
भवति चात्र- कुपितानिलमूलत्वात् सञ्चितत्वान्मलस्य च |
सर्वोदरेषु शंसन्ति बहुशस्त्वनुलोमनम् ||९||
kupitētyādi| sarvōdarāṇyēva malavr̥ddhyā vartantē, tasmāt saṁśōdhanaṁ śastaṁ, tacca bahuśō'nalpaśaḥ ||9||
Adhikarana (10) · Śloka 10
ata ūrdhvaṁ sāmānyayōgān vakṣyāmaḥ |
tadyathā- ēraṇḍatailamaharaharmāsaṁ dvau vā kēvalaṁ mūtrayuktaṁ kṣīrayuktaṁ vā sēvētōdakavarjī, māhiṣaṁ vā mūtraṁ kṣīrēṇa nirāhāraḥsaptarātram, uṣṭrīkṣīrāhārō vā'nnavārivarjī pakṣaṁ, pippalīṁ vā māsaṁ pūrvōktēna vidhānēnāsēvēta, saindhavājamōdāyuktaṁ vā nikumbhatailam, ārdraśr̥ṅgavērarasapātraśatasiddhaṁ vā vātaśūlē'vacāryaṁ, śr̥ṅgavērarasavipakvaṁ kṣīramāsēvēta, cavyaśr̥ṅgavērakalkaṁ vā payasā saraladēvadārucitrakamēva vā, muraṅgīśālaparṇīśyāmāpunarnavākalkaṁ vā, jyōtiṣkaphalatailaṁ vā kṣīrēṇa svarjikāhiṅgumiśraṁ pibēt, guḍadvitīyāṁ vā harītakīṁ bhakṣayēt, snuhīkṣīrabhāvitānāṁ vā pippalīnāṁ sahasraṁ kālēna, pathyākr̥ṣṇācūrṇaṁ vā snuhīkṣīrabhāvitamutkārikāṁ pakvāṁ dāpayēt; harītakīcūrṇaṁ prasthamāḍhakē ghr̥tasyāvāpyāṅgārēṣvabhivilāpya khajēnābhimathyānuguptaṁ kr̥tvā'rdhamāsaṁ yavapallē vāsayēt, tataścōddhr̥tya parisrāvya harītakīkvāthāmladadhīnyāvāpya vipacēt, tadyathāyōgaṁ māsamardhamāsaṁ vā pāyayēt; gavyē payasi mahāvr̥kṣakṣīramāvāpya vipacēt, vipakvaṁ cāvatārya śītībhūtaṁ manthānēnābhimathya navanītamādāya bhūyō mahāvr̥kṣakṣīrēṇaiva vipacēt, tadyathāyōgaṁ māsaṁ māsārdhaṁ vā pāyayēt; cavyacitrakadantyativiṣākuṣṭhasārivātriphalājamōdaharidrāśaṅkhinītrivr̥ttrikaṭukānāmardhakārṣikā bhāgā, rājavr̥kṣaphalamajjñāmaṣṭau karṣāḥ, mahāvr̥kṣakṣīrapalē dvē, gavāṁ kṣīramūtrayōraṣṭāvaṣṭau palāni, ētat sarvaṁ ghr̥taprasthē samāvāpya vipacēt, tadyathāyōgaṁ māsamardhamāsaṁ vā pāyayēt; ētāni tilvakaghr̥tacaturthāni sarpīṁṣyudaragulmavidradhyaṣṭhīlānāhakuṣṭhōnmādāpasmārēṣūpayōjyāni virēcanārthaṁ; mūtrāsavāriṣṭasurāścābhīkṣṇaṁ mahāvr̥kṣakṣīrasambhr̥tāḥ sēvēta; virēcanadravyakaṣāyaṁ vā śr̥ṅgavēradēvadārupragāḍham ||10||
View original
अत ऊर्ध्वं सामान्ययोगान् वक्ष्यामः |
तद्यथा- एरण्डतैलमहरहर्मासं द्वौ वा केवलं मूत्रयुक्तं क्षीरयुक्तं वा सेवेतोदकवर्जी, माहिषं वा मूत्रं क्षीरेण निराहारःसप्तरात्रम्, उष्ट्रीक्षीराहारो वाऽन्नवारिवर्जी पक्षं, पिप्पलीं वा मासं पूर्वोक्तेन विधानेनासेवेत, सैन्धवाजमोदायुक्तं वा निकुम्भतैलम्, आर्द्रशृङ्गवेररसपात्रशतसिद्धं वा वातशूलेऽवचार्यं, शृङ्गवेररसविपक्वं क्षीरमासेवेत, चव्यशृङ्गवेरकल्कं वा पयसा सरलदेवदारुचित्रकमेव वा, मुरङ्गीशालपर्णीश्यामापुनर्नवाकल्कं वा, ज्योतिष्कफलतैलं वा क्षीरेण स्वर्जिकाहिङ्गुमिश्रं पिबेत्, गुडद्वितीयां वा हरीतकीं भक्षयेत्, स्नुहीक्षीरभावितानां वा पिप्पलीनां सहस्रं कालेन, पथ्याकृष्णाचूर्णं वा स्नुहीक्षीरभावितमुत्कारिकां पक्वां दापयेत्; हरीतकीचूर्णं प्रस्थमाढके घृतस्यावाप्याङ्गारेष्वभिविलाप्य खजेनाभिमथ्यानुगुप्तं कृत्वाऽर्धमासं यवपल्ले वासयेत्, ततश्चोद्धृत्य परिस्राव्य हरीतकीक्वाथाम्लदधीन्यावाप्य विपचेत्, तद्यथायोगं मासमर्धमासं वा पाययेत्; गव्ये पयसि महावृक्षक्षीरमावाप्य विपचेत्, विपक्वं चावतार्य शीतीभूतं मन्थानेनाभिमथ्य नवनीतमादाय भूयो महावृक्षक्षीरेणैव विपचेत्, तद्यथायोगं मासं मासार्धं वा पाययेत्; चव्यचित्रकदन्त्यतिविषाकुष्ठसारिवात्रिफलाजमोदहरिद्राशङ्खिनीत्रिवृत्त्रिकटुकानामर्धकार्षिका भागा, राजवृक्षफलमज्ज्ञामष्टौ कर्षाः, महावृक्षक्षीरपले द्वे, गवां क्षीरमूत्रयोरष्टावष्टौ पलानि, एतत् सर्वं घृतप्रस्थे समावाप्य विपचेत्, तद्यथायोगं मासमर्धमासं वा पाययेत्; एतानि तिल्वकघृतचतुर्थानि सर्पींष्युदरगुल्मविद्रध्यष्ठीलानाहकुष्ठोन्मादापस्मारेषूपयोज्यानि विरेचनार्थं; मूत्रासवारिष्टसुराश्चाभीक्ष्णं महावृक्षक्षीरसम्भृताः सेवेत; विरेचनद्रव्यकषायं वा शृङ्गवेरदेवदारुप्रगाढम् ||१०||
ata ityādi| saptāhaṁ māhiṣaṁ mūtraṁ kṣīrēṇa kr̥tōdakānnakāryaḥ, kēcidatra māhiṣamēva kṣīramāhuḥ, aparē punarmāhiṣasyāgnimāndyādikaraṇādgavyamēvāhuḥ| gūḍhapadabhaṅgaṭippaṇē īdr̥śaṁ vyākhyātaṁ- māhiṣaṁ mūtraṁ kṣīrēṇa gavyēna pibēt; pramādavyākhyānamidaṁ, yasmājjējjaṭācāryādīnāmanumataṁ na bhavati| uṣṭrītyādi| kēcidatra kṣīraṁ trikaṭukasaṁyuktamāhuḥ, tantrāntaraprāmāṇyāt| pippalīmityādi| pūrvōktēna vātaśōṇitōktēna| saindhavājamōdāprakṣēpayuktaṁ vā dantītailaṁ; tadēva tailamārdraśr̥ṅgavērarasāḍhakaśatapakvaṁ vātaśūlē vātarujyavacāryam; anyē tu tilatailamēva sādhayanti, tantrāntaraprāmāṇyāt; ārdraśr̥ṅgavēramārdrakaṁ, tadrasaṁ caturguṇam| vipakvaṁ kṣīrāvaśiṣṭaṁ pakvam| cavyētyādi| payasā caturguṇēnaiva| saraladēvadārucitrakamēva payasētyarthaḥ; saralā trivr̥t| muraṅgyādayō vā tathaiva ca; muraṅgī śōbhāñjanakaḥ| śyāmā vr̥ddhadārukaḥ| jyōtiṣkaḥ kākamardanikā| hiṅgumāṣakasvarjikākṣāramāṣakacatuṣṭayasaṁyuktaṁ ‘māsamardhamāsaṁ vā’ iti śēṣaḥ| snuhītyādi| atra triḥsaptakr̥tvō bhāvanā| snuhī sēhuṇḍaḥ, sa ca bahukaṇṭakaḥ śrēṣṭhaḥ| kālēnēti yāvatā kālēna śaknuyādbhakṣayituṁ, pippalīsahasramēkadvitricatuṣṭayatvēna virēkārtham| pathyētyādi| utkārikāṁ lapsikām| harītakītyādi| khajaḥ manthānam| harītakīkvāthakāñjikadadhīni pratyēkaṁ ghr̥tacaturguṇāni| gavya ityādi|- gavyē payasīti āḍhakapramāṇē, mahāvr̥kṣakṣīraṁ prasthaṁ, mahāvr̥kṣaḥ sēhuṇḍaḥ, tajjaṁ ca navanītaṁ mahāvr̥kṣakṣīrapādaṁ, dravānuktau jalamatra caturguṇam| cavyētyādi| triphalātrikaṭukadravyāṇāṁ pratyēkamardhakārṣikā bhāgāḥ, na hi triphalā trikaṭukaṁ vā dravyamēkamiti| kēciddravasyālpatvājjalamapi caturguṇamityāhuḥ| ēṣāṁ viṣayamāha- ētānītyādi| tilvakaghr̥taṁ vātavyādhyuktaṁ caturthaṁ yēṣāṁ tāni tilvakaghr̥tacaturthāni| mūtrētyādi|- mūtradravēṇāsavādayō'nukalpēna mahāvr̥kṣakṣīraprasthaprakṣēpēṇa samyakkr̥tāḥ| virēcanadravyakaṣāyamityādi|- trivr̥dādikaṣāyaṁ vā śuṇṭhīdēvadārucūrṇakarṣaprakṣēpāḍhyam||10||
Adhikarana 9 (11) · Śloka 11
vamanavirēcanaśirōvirēcanadravyāṇāṁ pālikā bhāgāḥ pippalyādivacādiharidrādiparipaṭhitānāṁ ca dravyāṇāṁ ślakṣṇapiṣṭānāṁ yathōktānāṁ ca lavaṇānāṁ tatsarvaṁ mūtragaṇē prakṣipya mahāvr̥kṣakṣīraprasthaṁ ca mr̥dvagninā'vaghaṭṭayan vipacēdapradagdhakalkaṁ, tatsādhusiddhamavatārya śītībhūtamakṣamātrā guṭikā vartayēt, tāsāmēkāṁ dvē tisrō vā guṭikā balāpēkṣayā māsāṁstrīṁścaturō vā sēvēta, ēṣā''nāhaṁvartikriyā viśēṣēṇa mahāvyādhiṣūpayujyatē (viśēṣēṇa) kōṣṭhajāṁśca kr̥mīnapahanti kāsaśvāsakr̥mikuṣṭhapratiśyāyārōcakāvipākōdāvartāṁśca nāśayati ||11||
View original
वमनविरेचनशिरोविरेचनद्रव्याणां पालिका भागाः पिप्पल्यादिवचादिहरिद्रादिपरिपठितानां च द्रव्याणां श्लक्ष्णपिष्टानां यथोक्तानां च लवणानां तत्सर्वं मूत्रगणे प्रक्षिप्य महावृक्षक्षीरप्रस्थं च मृद्वग्निनाऽवघट्टयन् विपचेदप्रदग्धकल्कं, तत्साधुसिद्धमवतार्य शीतीभूतमक्षमात्रा गुटिका वर्तयेत्, तासामेकां द्वे तिस्रो वा गुटिका बलापेक्षया मासांस्त्रींश्चतुरो वा सेवेत, एषाऽऽनाहंवर्तिक्रिया विशेषेण महाव्याधिषूपयुज्यते (विशेषेण) कोष्ठजांश्च कृमीनपहन्ति कासश्वासकृमिकुष्ठप्रतिश्यायारोचकाविपाकोदावर्तांश्च नाशयति ||११||
idānīmanaladīpanīṁ gupitānilasaṁvalitamalānulōmanīmābhyantarīṁ mūtravartiṁ nirdiśannāha- vamanētyādi| saṁśōdhanasaṁśamanīyādhyāyōditāni vamanavirēcanaśirōvirēcanadravyāṇi madanaphalāditrivr̥dādiviḍaṅgādīni, dravyasaṅgrahaṇīyādhyāyē pippalyādivacādiharidrādayō nirdiṣṭāḥ, lavaṇānyannapānādhyāyē paripaṭhitāni saindhavādīni, mūtragaṇō gōmūtrādirdravadravyapaṭhitaḥ; tēṣāṁ yathālābhaṁ pālikā bhāgāḥ| yathālābhamēva gavādīnāṁ mūtrēṇa vyastasamastēna piṣṭvā caturguṇairaṣṭaguṇairvā vipācyam| aṅguṣṭhapramāṇā vartayaḥ kartavyāḥ| tāḥ punaradhamamadhyamōttamapuruṣādibalāpēkṣayā ēkadvitrisaṅkhyōpalakṣitā bhakṣayitavyāḥ| tatra ca gavādimūtramēvānupānam| tāsāmabhyāsē kālāvadhirmāsāstrayaścatvārō vā; phalaṁ tu mēhādimahāvyādhiharaṇaṁ kōṣṭhakr̥miharaṇaṁ ca||11||
Adhikarana 10 (12) · Śloka 12
madanaphalamajjakuṭajajīmūtakēkṣvākudhāmārgavatrivr̥ttrikaṭukasarṣapalavaṇāni mahāvr̥kṣakṣīramūtrayōranyatarēṇa piṣṭvā'ṅguṣṭhamātrāṁ vārtiṁ kr̥tvōdariṇa ānāhē tailalavaṇābhyaktagudasyaikāṁ dvē tisrō vā pāyau nidadhyāt, ēṣā''nāhavartikriyā vātamūtrapurīṣōdāvartādhmānānāhēṣu vidhēyā ||12||
View original
मदनफलमज्जकुटजजीमूतकेक्ष्वाकुधामार्गवत्रिवृत्त्रिकटुकसर्षपलवणानि महावृक्षक्षीरमूत्रयोरन्यतरेण पिष्ट्वाऽङ्गुष्ठमात्रां वार्तिं कृत्वोदरिण आनाहे तैललवणाभ्यक्तगुदस्यैकां द्वे तिस्रो वा पायौ निदध्यात्, एषाऽऽनाहवर्तिक्रिया वातमूत्रपुरीषोदावर्ताध्मानानाहेषु विधेया ||१२||
abhyantaravartiprasaṅgēna phalavartiṁ nirdiśannāha- madanaphalētyādi| jīmūtakō dēvadālī, ikṣvākuḥ kaṭutumbī, dhāmārgavō mahākōśātakī| ‘vipācya’ ityanuvartanīyam| pākē tu mūtramēvānuvartanīyam| pāyau gudē| na kēvalaṁ udarānāhē vātamūtrapurīṣōdāvartādhmānānāhēṣu vidhēyēti| ‘kṣāramūtrayōranyatarēṇa’ ityanyē paṭhanti; tatra kṣāraḥ kṣārōdakaṁ pēṣaṇavacanāt ||12||
Adhikarana 11 (13) · Śloka 13
plīhōdariṇaḥ snigdhasvinnasya dadhnā bhuktavatō vāmabāhau kūrparābhyantarataḥ sirāṁ vidhyēt, vimardayēcca pāṇinā plīhānaṁ rudhirasyandanārthaṁ; tataḥ saṁśuddhadēhaṁ samudraśuktikākṣāraṁ payasā pāyayēta, hiṅgusauvarcikē vā kṣīrēṇa, srutēna palāśakṣārēṇa vā yavakṣāraṁ, kiṁśukakṣārōdakēna vā bahuśaḥ srutēna yavakṣāraṁ, pārijātakēkṣurakāpāmārgakṣāraṁ vā, tailasaṁsr̥ṣṭaṁ śōbhāñjanakayūṣaṁ pippalīsaindhavacitrakayuktaṁ, pūtikarañjakṣāraṁ vā'mlasrutaṁ viḍlavaṇapippalīpragāḍham ||13||
View original
प्लीहोदरिणः स्निग्धस्विन्नस्य दध्ना भुक्तवतो वामबाहौ कूर्पराभ्यन्तरतः सिरां विध्येत्, विमर्दयेच्च पाणिना प्लीहानं रुधिरस्यन्दनार्थं; ततः संशुद्धदेहं समुद्रशुक्तिकाक्षारं पयसा पाययेत, हिङ्गुसौवर्चिके वा क्षीरेण, स्रुतेन पलाशक्षारेण वा यवक्षारं, किंशुकक्षारोदकेन वा बहुशः स्रुतेन यवक्षारं, पारिजातकेक्षुरकापामार्गक्षारं वा, तैलसंसृष्टं शोभाञ्जनकयूषं पिप्पलीसैन्धवचित्रकयुक्तं, पूतिकरञ्जक्षारं वाऽम्लस्रुतं विड्लवणपिप्पलीप्रगाढम् ||१३||
plīhētyādi| dadhibhōjanaṁ raktōtklēśāya tadaharēva, kaphavyādhau vamanē kartavyē prāk kaphōtklēśakaradravyōpayōgavat| kūrparaṁ bhujamadhyam| rudhirasyandanārthaṁ raktasrāvaṇārthaṁ; sirāvyadhavidhyuktō'pi sirāvyadhaḥ punarihōktaḥ, prakaraṇavaśāt; atō na punaruktadōṣamāvahati| tata ityādi| saṁśuddhadēhaṁ vamanavirēcanābhyām| pārijātaḥ prasiddhaḥ| ikṣurakaḥ kōkilākṣakaḥ| pāribhadrakēkṣurakēti kēcit paṭhanti| śōbhāñjanētyādi| amlaṁ kāñjikam| pūtikarañjaścirabilvaḥ, kaṇṭakīkarañja ityanyē| kalpanāmāha- kaṇṭakīkarañjakṣāramardhapalamātraṁ ṣaḍguṇāmlakāñjikēna bahuśaḥ parisrutaṁ pippalīviḍlavaṇacūrṇākṣaprakṣēpam| viḍasthānē saindhavamiti kēcit paṭhanti||13||
Adhikarana 12 (14) · Śloka 14
pippalīpippalīmūlacavyacitrakaśr̥ṅgavērayavakṣārasaindhavānāṁ pālikā bhāgāḥ, ghr̥taprasthaṁ tattulyaṁ ca kṣīraṁ tadaikadhyaṁ vipācayēt, ētat ṣaṭpalakaṁ nāma sarpiḥ plīhāgnisaṅgagulmōdarōdāvartaśvayathupāṇḍurōgakāsaśvāsapratiśyāyōrdhvavātaviṣamajvarānapahanti |
mandāgnirvā hiṅgvādikaṁ cūrṇamupayuñjīta ||14||
View original
पिप्पलीपिप्पलीमूलचव्यचित्रकशृङ्गवेरयवक्षारसैन्धवानां पालिका भागाः, घृतप्रस्थं तत्तुल्यं च क्षीरं तदैकध्यं विपाचयेत्, एतत् षट्पलकं नाम सर्पिः प्लीहाग्निसङ्गगुल्मोदरोदावर्तश्वयथुपाण्डुरोगकासश्वासप्रतिश्यायोर्ध्ववातविषमज्वरानपहन्ति |
मन्दाग्निर्वा हिङ्ग्वादिकं चूर्णमुपयुञ्जीत ||१४||
pippalītyādi| kēcidatra bhiṣajaścaturguṇaṁ pānīyamādadatē; tanna, jējjaṭēna niṣiddhatvāt| asmin yōgē ‘kōlakulatthapūtīkarōhītakakvāthaṁ dviguṇamāvāpya’ iti kēcit paṭhanti; tanna, sō'pi jējjaṭēna niṣiddhatvāt||14||
Adhikarana 13 (15-16) · Śloka 16
yakr̥ddālyē'pyēṣa ēva kriyāvibhāgaḥ |
viśēṣatastu dakṣiṇabāhau sirāvyadhaḥ ||15||
maṇibandhaṁ sakr̥nnāmya vāmāṅguṣṭhasamīritām |
dahēt sirāṁ śarēṇāśu plīhnō vaidyaḥ praśāntayē ||16||
View original
यकृद्दाल्येऽप्येष एव क्रियाविभागः |
विशेषतस्तु दक्षिणबाहौ सिराव्यधः ||१५||
मणिबन्धं सकृन्नाम्य वामाङ्गुष्ठसमीरिताम् |
दहेत् सिरां शरेणाशु प्लीह्नो वैद्यः प्रशान्तये ||१६||
yakr̥ddālya ityādi| maṇibandhaḥ pāṇimūlaṁ, sakr̥t kiñcinnāmayitvā vāmāṅguṣṭhaṁ prati samyagīritāṁ gatāṁ sirāṁ, śaraḥ prasiddhaḥ, tamagnivarṇaṁ kr̥tvā dahēt||15-16||
Adhikarana 14 (17) · Śloka 17
baddhagudē parisrāviṇi ca snigdhasvinnasyābhyaktasyādhō nābhērvāmataścaturaṅgulamapahāya rōmarājyā udaraṁ pāṭayitvā caturaṅgulapramāṇamantrāṇi niṣkr̥ṣya nirīkṣya baddhagudasyāntrapratirōdhakaramaśmānaṁ bālaṁ vā'pōhya malajātaṁ vā tatō madhusarpirbhyāmabhyajyāntrāṇi yathāsthānaṁ sthāpayitvā bāhyaṁ vraṇamudarasya sīvyēt |
parisrāviṇyapyēvamēva śalyamuddhr̥tyāntrasrāvān saṁśōdhya , tacchidramāntraṁ samādhāya kālapipīlikābhirdaṁśayēt, daṣṭē ca tāsāṁ kāyānapaharēnna śirāṁsi, tataḥ pūrvavat sīvyēt, sandhānaṁ ca yathōktaṁ kārayēt, yaṣṭīmadhukamiśrayā ca kr̥ṣṇamr̥dā'valipya bandhēnōpacarēt, tatō nivātamāgāraṁ pravēśyācārikamupadiśēt, vāsayēccainaṁ tailadrōṇyāṁ sarpirdrōṇyāṁ vā payōvr̥ttimiti ||17||
View original
बद्धगुदे परिस्राविणि च स्निग्धस्विन्नस्याभ्यक्तस्याधो नाभेर्वामतश्चतुरङ्गुलमपहाय रोमराज्या उदरं पाटयित्वा चतुरङ्गुलप्रमाणमन्त्राणि निष्कृष्य निरीक्ष्य बद्धगुदस्यान्त्रप्रतिरोधकरमश्मानं बालं वाऽपोह्य मलजातं वा ततो मधुसर्पिर्भ्यामभ्यज्यान्त्राणि यथास्थानं स्थापयित्वा बाह्यं व्रणमुदरस्य सीव्येत् |
परिस्राविण्यप्येवमेव शल्यमुद्धृत्यान्त्रस्रावान् संशोध्य , तच्छिद्रमान्त्रं समाधाय कालपिपीलिकाभिर्दंशयेत्, दष्टे च तासां कायानपहरेन्न शिरांसि, ततः पूर्ववत् सीव्येत्, सन्धानं च यथोक्तं कारयेत्, यष्टीमधुकमिश्रया च कृष्णमृदाऽवलिप्य बन्धेनोपचरेत्, ततो निवातमागारं प्रवेश्याचारिकमुपदिशेत्, वासयेच्चैनं तैलद्रोण्यां सर्पिर्द्रोण्यां वा पयोवृत्तिमिति ||१७||
tatō baddhagudaparisrāviṇōrupakramaprāptāṁ cikitsāmupadiśannāha- baddhaguda ityādi| svinnasyēti dravasvēdēna| nābhērvāmata ityādi|- vāmabhāgē nābhēradhastāccaturaṅgulamapahāya rōmarājyāścaturaṅgulapramāṇastiryagēva chēdaḥ; tatra lōmni tiryagavasthitē'nulōmagaṁ ca śastrapātanamuktam| antrapratirōdhakaramaśmānaṁ bālaṁ vā'pōhya malajātaṁ vēti tatra malarōdhakāraṇamābhyantaramaśmakēśatr̥ṇādi, bāhyaṁ tu viṣamavihārābhighātēnāntrāvayavānāṁ parasparasammūrcchanaṁ, na tatrāntracchēdanamiti parisrāvyudarādviśēṣaḥ| ata ēva parisrāviṇyēva pr̥thagantrasandhānaṁ viśēṣēṇa vakṣyati| tatrābhyantarē'śmādāvatyantābādhakarē śalyanimittamēvāntracchēdaṁ kr̥tvā'śmādiśalyamapaharēt| antracchidraṁ tu vakṣyamāṇanyāyēnānusandhāya sarpirmadhvaktaṁ niṣkr̥ṣṭamantramaṅguṣṭhāṅguliśalākādibhiryathāsthānaṁ sthāpayēt| mūrcchitamantraṁ tu vīkṣya pāṇinā bandhāvamōkṣēṇānulōmayēt| bāhyavraṇaṁ raktāsēcanādividhimapēkṣya samyak sīvyēt| tailasarpirdrōṇīvāsanamudarasya vraṇitvēnādhmānaklēśanivr̥ttyartham| payasā kēvalēna vr̥ttiriti yāvat| gudapicchāsranivr̥ttyā samyagantrasya sandhānadr̥ḍhībhāvaniścayaḥ, anyathā khalvāhārēṇa tatkiṭṭēna vā pipīlikāmukhadaṁśasandhānaṁ mr̥du vighaṭēta samyak sandhāvapi, tasmādanukramēṇaiva payōjāṅgalamāṁsarasabhōjanēna tribhāgārdhabhāgavāriṇā ca prākr̥tabhōjanaprāptiḥ | sāṁśayikaṁ caitat karma, tasmādāpr̥cchyēśvaraṁ pratyākhyāyācarēt||17||
Adhikarana 15 (18) · Śloka 18
dakōdariṇastu vātaharatailābhyaktasyōṣṇōdakasvinnasya sthitasyāptaiḥ suparigr̥hītasyākakṣāt parivēṣṭitasyādhōnābhērvāmataścaturaṅgulamapahāya rōmarājyā vrīhimukhēnāṅguṣṭhōdarapramāṇamavagāḍhaṁ vidhyēt, tatra trapvādīnāmanyatamasya nāḍīṁ dvidvārāṁ pakṣanāḍīṁ vā saṁyōjya dōṣōdakamavasiñcēt, tatō nāḍīmapahr̥tya tailalavaṇēnābhyajya vraṇaṁ bandhēnōpacarēt, na caikasminnēva divasē sarvaṁ dōṣōdakamapaharēt, sahasā hyapahr̥tē tr̥ṣṇājvarāṅgamardātīsāraśvāsakāsapādadāhā utpadyērannāpūryatē vā bhr̥śataramudaramasañjātaprāṇasya, tasmāttatīyacaturthapañcamaṣaṣṭhāṣṭamadaśamadvādaśaṣōḍaśarātrāṇāmanyatamamantarīkr̥tya dōṣōdakamalpālpamavasiñcēt; niḥsr̥tē ca dōṣē gāḍhataramāvikakauśēyacarmaṇāmanyatamēna parivēṣṭayēdudaraṁ, tathā nādhmāpayati vāyuḥ; ṣaṇmāsāṁśca payasā bhōjayējjāṅgalarasēna vā, tatastrīnmāsānardhōdakēna payasā phalāmlēna jāṅgalarasēna vā, avaśiṣṭaṁ māsatrayamannaṁ laghu hitaṁ vā sēvēta, ēvaṁ saṁvatsarēṇāgadō bhavati ||18||
View original
दकोदरिणस्तु वातहरतैलाभ्यक्तस्योष्णोदकस्विन्नस्य स्थितस्याप्तैः सुपरिगृहीतस्याकक्षात् परिवेष्टितस्याधोनाभेर्वामतश्चतुरङ्गुलमपहाय रोमराज्या व्रीहिमुखेनाङ्गुष्ठोदरप्रमाणमवगाढं विध्येत्, तत्र त्रप्वादीनामन्यतमस्य नाडीं द्विद्वारां पक्षनाडीं वा संयोज्य दोषोदकमवसिञ्चेत्, ततो नाडीमपहृत्य तैललवणेनाभ्यज्य व्रणं बन्धेनोपचरेत्, न चैकस्मिन्नेव दिवसे सर्वं दोषोदकमपहरेत्, सहसा ह्यपहृते तृष्णाज्वराङ्गमर्दातीसारश्वासकासपाददाहा उत्पद्येरन्नापूर्यते वा भृशतरमुदरमसञ्जातप्राणस्य, तस्मात्ततीयचतुर्थपञ्चमषष्ठाष्टमदशमद्वादशषोडशरात्राणामन्यतममन्तरीकृत्य दोषोदकमल्पाल्पमवसिञ्चेत्; निःसृते च दोषे गाढतरमाविककौशेयचर्मणामन्यतमेन परिवेष्टयेदुदरं, तथा नाध्मापयति वायुः; षण्मासांश्च पयसा भोजयेज्जाङ्गलरसेन वा, ततस्त्रीन्मासानर्धोदकेन पयसा फलाम्लेन जाङ्गलरसेन वा, अवशिष्टं मासत्रयमन्नं लघु हितं वा सेवेत, एवं संवत्सरेणागदो भवति ||१८||
ṣaṇmāsānityādi| māsān ṣaḍyāvallaghu hitamannaṁ payasā kṣīrēṇa bhōjayēt| kṣīrēṇaivōdakakāryaṁ kārayēt, kaphavātādhikatvaṁ ca vīkṣya jāṅgalarasēna bhōjayēt, rasēnaivōdakakāryaṁ, tata ūrdhvaṁ trīnmāsān ardhōdakēna payasā dōṣāpēkṣayā jāṅgalarasēna vā laghu hitamannaṁ bhōjayēt, tābhyāmēvōdakakāryaṁ kārayēt| avaśiṣṭaṁ ca māsatrayaṁ laghu hitamannaṁ bhōjayēt| udakēnaivōdakakāryam| carakamatānusāriṇā vāgbhaṭēna kṣīrēṇaiva ṣaṇmāsān vr̥ttirabhihitā, nānnapānīyābhyāṁ; tathā ca- “syāt kṣīravr̥ttiḥ ṣaṇmāsāṁstrīn pēyāṁ payasā pibēt| trīṁścānyān payasaivādyāt phalāmlēna rasēna vā|| alpaśaḥ snēhalavaṇaṁ jīrṇaśyāmākakōdravam” (vā. ci. 15) iti||18||
Adhikarana 16 (19) · Śloka 19
bhavati cātra- āsthāpanē caiva virēcanē ca pānē tathā''hāravidhikriyāsu |
sarvōdaribhyaḥ kuśalaiḥ prayōjyaṁ kṣīraṁ śr̥taṁ jāṅgalajō rasō vā ||19||
View original
भवति चात्र- आस्थापने चैव विरेचने च पाने तथाऽऽहारविधिक्रियासु |
सर्वोदरिभ्यः कुशलैः प्रयोज्यं क्षीरं शृतं जाङ्गलजो रसो वा ||१९||
kr̥takarmaṇō jalaniṣēdhaṁ tadabhāvē cōktaṁ dravaṁ nirdiśannāha- bhavatītyādi| cakāradvayakaraṇēnōdarapāṭanādāvanuktē'pīti samuccīyatē||19||
Adhikarana puShpikA · Śloka 14
iti suśrutasaṁhitāyāṁ cikitsāsthānē udaracikitsitaṁ nāma caturdaśō'dhyāyaḥ ||14||
View original
इति सुश्रुतसंहितायां चिकित्सास्थाने उदरचिकित्सितं नाम चतुर्दशोऽध्यायः ||१४||
iti śrīḍalha(hla)ṇaviracitāyāṁ nibandhasaṅgrahākhyāyāṁ suśrutavyākhyāyāṁ cikitsāsthānē caturdaśō'dhyāyaḥ||14||