Adhikarana 1 (1-2) · Śloka 2
অথাতোঽর্শসাং নিদানং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
View original
अथातोऽर्शसां निदानं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথেত্যাদি| নিদানং হেতুলক্ষণনির্দেশঃ||১-২||
2. arśōnidānam
Adhikarana 2 (3) · Śloka 3
ষডর্শাংসি ভবন্তি বাতপিত্তকফশোণিতসন্নিপাতৈঃ সহজানি চেতি ||৩||
View original
षडर्शांसि भवन्ति वातपित्तकफशोणितसन्निपातैः सहजानि चेति ||३||
🔊 Audio coming soon
ষডর্শাংসীত্যাদি| ননু, বাতপিত্তকফশোণিতসন্নিপাতৈঃ সহজানি চেত্যনেনৈব ষট্সঙ্খ্যাযা লব্ধত্বাত্ কথং ষডিতি সঙ্খ্যানির্দেশঃ? উচ্যতে- দ্বিদোষজনিতার্শোগণনাপরিহারার্থম্| যদ্যপি শোণিতাধিষ্ঠানা বাতাদযো রক্তার্শসামারম্ভকাঃ, তথাঽপ্যুপচারাত্ ‘শোণিতজানি’ ইত্যুচ্যন্তে; যথা- ঘৃতাধিষ্ঠানেনাগ্নিনা দগ্ধো ‘ঘৃতদগ্ধ’ ইত্যুচ্যতে||৩||
Adhikarana 3 (4) · Śloka 4
তত্রানাত্মবতাং যথোক্তৈঃ প্রকোপণৈর্বিরুদ্ধাধ্যশনস্ত্রীপ্রসঙ্গোত্কটুকাসনপৃষ্ঠযানবেগবিধারণাদিভির্বিশেষৈঃ প্রকুপিতা দোষা একশো দ্বিশঃ সমস্তাঃ শোণিতসহিতা বা যথোক্তং প্রসৃতাঃ প্রধানধমনীরনুপ্রপদ্যাধো গত্বা গুদমাগম্য প্রদূষ্য গুদবলীর্মাংসপ্ররোহাঞ্জনযন্তি বিশেষতো মন্দাগ্নেঃ, তথা তৃণকাষ্ঠোপললোষ্ঠবস্ত্রাদিভিঃ শীতোদকসংস্পর্শনাদ্বা কন্দাঃ পরিবৃদ্ধিমাসাদযন্তি, তান্যর্শাংসীত্যাচক্ষতে ||৪||
View original
तत्रानात्मवतां यथोक्तैः प्रकोपणैर्विरुद्धाध्यशनस्त्रीप्रसङ्गोत्कटुकासनपृष्ठयानवेगविधारणादिभिर्विशेषैः प्रकुपिता दोषा एकशो द्विशः समस्ताः शोणितसहिता वा यथोक्तं प्रसृताः प्रधानधमनीरनुप्रपद्याधो गत्वा गुदमागम्य प्रदूष्य गुदवलीर्मांसप्ररोहाञ्जनयन्ति विशेषतो मन्दाग्नेः, तथा तृणकाष्ठोपललोष्ठवस्त्रादिभिः शीतोदकसंस्पर्शनाद्वा कन्दाः परिवृद्धिमासादयन्ति, तान्यर्शांसीत्याचक्षते ||४||
🔊 Audio coming soon
অর্শসাং হেতূন্ সম্প্রাপ্তি চ দর্শযন্নাহ- তত্রেত্যাদি| প্রকুপিতা দোষা মাংসপ্ররোহাঞ্জনযন্তীতি সম্বন্ধঃ| অনাত্মবতাম্ অজিতেন্দ্রিযাণাম্| যথোক্তৈঃ প্রকোপণৈর্বলবদ্বিগ্রহাদিক্রোধশোকাদিদিবাস্বপ্নাদিভিঃ| বিরুদ্ধং বহুধা হিতাহিতীযোক্তম্| স্ত্রীপ্রসঙ্গ ইত্যত্র প্রশব্দেনাত্যন্তসক্তিঃ প্রতিপাদ্যতে| ‘গুদপার্ষ্ণীসমাযোগঃ প্রাহুরুত্কটুকাসনম্’, ‘উকুডু’ ইতি লোকে| অশ্বাদীনাং পৃষ্ঠেন গমনং পৃষ্ঠযানম্| বেগবিধারণশব্দেন বাতবিণ্মূত্রাদীনাং বেগধারণম্| বিরুদ্ধাশনশব্দেন গুরুশীতাভিষ্যন্দিবিদাহ্যসাত্ম্যপ্রমিতাশনাদীনি গৃহ্যন্তে| বিশেষৈর্ভেদৈঃ| তেষাং নিদানমভিধায সম্প্রাপ্তিমাহ- যথোক্তমিত্যাদি| প্রসৃতা ইতি ‘কিণ্বোদকপিষ্টসমবায ইবোদ্রিক্তানাং প্রসরো ভবতি’ (সূ. ২১) ইত্যাদিক্রমেণ প্রসৃতাঃ| প্রধানধমনীঃ পুরীষবাহিনীঃ| অনু পশ্চাত্, প্রপদ্য প্রাপ্য| গুদবলীরিতি বলিস্ত্বক্সঙ্কোচঃ| মন্দাগ্নের্বিশেষতোঽতিশযেন মাংসপ্ররোহাঞ্জনযন্তীতি সম্বন্ধঃ| তথা তৃণেত্যাদি| পরিবৃদ্ধিমাসাদযন্তি প্রাপ্নুবন্তীত্যর্থঃ| আচক্ষত ইতি ‘পূর্বাচার্যা’ ইত্যধ্যাহারঃ||৪||
Adhikarana 4 (5-6) · Śloka 6
তত্র স্থূলান্ত্রপ্রতিবদ্ধমর্ধপঞ্চাঙ্গুলং গুদমাহুঃ, তস্মিন্ বলযস্তিস্রোঽধ্যর্ধাঙ্গুলান্তরসম্ভূতাঃ প্রবাহণী বিসর্জনী সংবরণী চেতি চতুরঙ্গুলাযতাঃ ; সর্বাস্তির্যগেকাঙ্গলোচ্ছ্রিতাঃ ||৫|| শঙ্খাবর্তনিভাশ্চাপি উপর্যুপরি সংস্থিতাঃ | গজতালুনিভাশ্চাপি বর্ণতঃ সম্প্রকীর্ত্তিতাঃ | রোমান্তেভ্যো যবাধ্যর্ধো গুদৌষ্ঠঃ পরিকীর্তিতঃ ||৬||
View original
तत्र स्थूलान्त्रप्रतिबद्धमर्धपञ्चाङ्गुलं गुदमाहुः, तस्मिन् वलयस्तिस्रोऽध्यर्धाङ्गुलान्तरसम्भूताः प्रवाहणी विसर्जनी संवरणी चेति चतुरङ्गुलायताः ; सर्वास्तिर्यगेकाङ्गलोच्छ्रिताः ||५|| शङ्खावर्तनिभाश्चापि उपर्युपरि संस्थिताः | गजतालुनिभाश्चापि वर्णतः सम्प्रकीर्त्तिताः | रोमान्तेभ्यो यवाध्यर्धो गुदौष्ठः परिकीर्तितः ||६||
🔊 Audio coming soon
ইদানীং গুদং গুদবলীশ্চ বিবৃণ্বন্নাহ- তত্রেত্যাদি| স্থূলান্ত্রং কট্যন্ত্রং ‘গুদান্ত্রং’ ইতি প্রসিদ্ধম্| অর্ধপঞ্চাঙ্গুলমিতি অর্ধপঞ্চমমঙ্কুলং যস্মিন্ তত্তথা, এতেন সার্ধচতুরঙ্গুলপ্রমাণং গুদমিত্যর্থঃ| অধ্যর্ধাঙ্গুলান্তরসম্ভূতা ইতি সার্ধৈকাঙ্গুলান্তরসঞ্জাতাঃ| তত্রোপরিতনং বলিদ্বযং শঙ্খাবর্ত্তনিভং প্রত্যেকমন্তরেণ সহ সার্ধৈকাঙ্গুলং, প্রথমা তু বলিরন্তরেণ বিনৈকাঙ্গুলোচ্ছ্রাযা, অর্ধাঙ্গুলস্তু গুদৌষ্ঠ ঈদৃশং বোদ্ধব্যম্| অত এব ‘প্রথমা তু গুদৌষ্ঠাদঙ্গুলমাত্রে’ ইত্যগ্রে বক্ষ্যতি| তাসাং নামান্যাহ- প্রবাহণীত্যাদি| প্রবাহযতীতি প্রবাহণী, বিসৃজতীতি বিসর্জনী, সংবৃণোতীতি সংবরণী| গুদৌষ্ঠপ্রমাণমাহ- রোমান্তেভ্য ইত্যাদি| রোমান্তেভ্যো রোমপ্রান্তেভ্যো রোমমালিকাযাঃ, যবাধ্যর্ধঃ সার্ধো যবঃ, অর্ধাঙ্গুলপ্রমাণ ইত্যর্থঃ, অঙ্গুলস্য ত্রিযবপ্রমাণত্বাত্||৫-৬||
Adhikarana 5 (7) · Śloka 7
প্রথমা তু গুদৌষ্ঠাদঙ্গুলমাত্রে ||৭||
View original
प्रथमा तु गुदौष्ठादङ्गुलमात्रे ||७||
🔊 Audio coming soon
প্রথমা বলির্গুদৌষ্ঠাত্ কিযদ্দূরে ভবতীত্যাহ- প্রথমেত্যাদি| প্রথমা ‘বলিঃ’ ইতি শেষঃ||৭||
Adhikarana 6 (8) · Śloka 8
তেষাং তু ভবিষ্যতাং পূর্বরূপাণি- অন্নেঽশ্রদ্ধা কৃচ্ছ্রাত্ পক্তিরম্লীকা পরিদাহো বিষ্টম্ভঃ পিপাসা সক্থিসদনমাটোপঃ কার্শ্যমুদ্গারবাহুল্যমক্ষ্ণোঃ শ্বযথুরন্ত্রকূজনং গুদপরিকর্তনমাশঙ্কা পাণ্ডুরোগগ্রহণীদোষশোষাণাং কাসশ্বাসৌ বলহানির্ভ্রমস্তন্দ্রা নিদ্রেন্দ্রিযদৌর্বল্যং চ ||৮||
View original
तेषां तु भविष्यतां पूर्वरूपाणि- अन्नेऽश्रद्धा कृच्छ्रात् पक्तिरम्लीका परिदाहो विष्टम्भः पिपासा सक्थिसदनमाटोपः कार्श्यमुद्गारबाहुल्यमक्ष्णोः श्वयथुरन्त्रकूजनं गुदपरिकर्तनमाशङ्का पाण्डुरोगग्रहणीदोषशोषाणां कासश्वासौ बलहानिर्भ्रमस्तन्द्रा निद्रेन्द्रियदौर्बल्यं च ||८||
🔊 Audio coming soon
তেষামিত্যাদি| ভবিষ্যতাং ভবিতুকামানাম্| অম্লীকা অম্লোদ্গারঃ| সক্থিসদনম্ ঊরুগ্লানিঃ, স্ফুটনমিবেত্যেকে| আটোপ আধ্মানম্| পাণ্ডুরোগাদীনামাশঙ্কা বিকল্পঃ| কাসশ্বাসৌ ভ্রমস্তন্দ্রা নিদ্রেন্দ্রিযদৌর্বল্যং চ ‘জাযতে’ ইতি শেষঃ||৮||
Adhikarana 7 (9) · Śloka 9
জাতেষ্বেতান্যেব লক্ষণানি প্রব্যক্ততরাণি ভবন্তি ||৯||
View original
जातेष्वेतान्येव लक्षणानि प्रव्यक्ततराणि भवन्ति ||९||
🔊 Audio coming soon
তেষাং সামান্যরূপমাহ- জাতেষ্বিত্যাদি| এতানি পূর্বোক্তানি||৯||
Adhikarana 8 (10) · Śloka 10
তত্র মারুতাত্ পরিশুষ্কারুণবিবর্ণানি বিষমমধ্যানি কদম্বপুষ্পতুণ্ডিকেরীনাডীমুকুলসূচীমুখাকৃতীনি চ ভবন্তি; তৈরুপদ্রুতঃ সশূলং সংহতমুপবেশ্যতে কটীপৃষ্ঠপার্শ্বমেঢ্রগুদনাভিপ্রদেশেষু চাস্য বেদনা ভবন্তি, গুল্মাষ্ঠীলাপ্লীহোদরাণি চাস্য তন্নিমিত্তান্যেব ভবন্তি, কৃষ্ণত্বঙ্নখনযনদশনবদনমূত্রপুরীষশ্চ পুরুষো ভবতি ||১০||
View original
तत्र मारुतात् परिशुष्कारुणविवर्णानि विषममध्यानि कदम्बपुष्पतुण्डिकेरीनाडीमुकुलसूचीमुखाकृतीनि च भवन्ति; तैरुपद्रुतः सशूलं संहतमुपवेश्यते कटीपृष्ठपार्श्वमेढ्रगुदनाभिप्रदेशेषु चास्य वेदना भवन्ति, गुल्माष्ठीलाप्लीहोदराणि चास्य तन्निमित्तान्येव भवन्ति, कृष्णत्वङ्नखनयनदशनवदनमूत्रपुरीषश्च पुरुषो भवति ||१०||
🔊 Audio coming soon
বিশিষ্টং রূপমাহ- তত্রেত্যাদি| পরিশুষ্কাণি অনাস্রাবীণি| অরুণানি ঈষদ্রক্তানি| বিবর্ণানি বিবিধবর্ণানি| বিষমমধ্যানি নিম্নোন্নতমধ্যানি, কেচিদত্র ‘বিষমধ্যামানি’ ইতি পঠন্তি, ব্যাখ্যানযন্তি চ- বিষমাণি নিম্নোন্নতত্বেন, ধ্যামানি দগ্ধেষ্টিকাদিবস্তুবর্ণানি| তুণ্ডিকেরী বনকার্পাসিকা, তত্পুষ্পাকৃতীনি| অন্যে ত্বত্র “তুণ্ডিকেরীনাডীমুকুলসূচীমুখসদৃশানি ভবন্তি” ইতি পঠন্তি, ব্যাখ্যানযন্তি চ- তুণ্ডিকেরী বিম্বী, তস্যা নাডী নালিকা; মুকুলং পুষ্পমুকুলং; সূচীসীবনদ্রব্যম্; এষাং মুখসদৃশানি ভবন্তি| উপদ্রুতঃ অভিভূতঃ| সংহতং ঘনম্| উপবেশ্যতে বিট্সর্গং কার্যতে| গুল্মাদীনি চাস্য তন্নিমিত্তানীত্যুপদ্রবকথনম্||১০||
Adhikarana 9 (11) · Śloka 11
পিত্তান্নীলাগ্রাণি তনূনি বিসর্পীণি পীতাবভাসানি যকৃত্প্রকাশানি শুকজিহ্বাসংস্থানানি যবমধ্যানি জলৌকোবক্রসদৃশানি প্রক্লিন্নানি চ ভবন্তি; তৈরুপদ্রুতঃ সদাহং সরুধিরমতিসার্যতে, জ্বরদাহপিপাসামূর্চ্ছাশ্চাস্যোপদ্রবা ভবন্তি, পীতত্বঙ্নখনযনদশনবদনমূত্রপুরীষশ্চ পুরুষো ভবতি ||১১||
View original
पित्तान्नीलाग्राणि तनूनि विसर्पीणि पीतावभासानि यकृत्प्रकाशानि शुकजिह्वासंस्थानानि यवमध्यानि जलौकोवक्रसदृशानि प्रक्लिन्नानि च भवन्ति; तैरुपद्रुतः सदाहं सरुधिरमतिसार्यते, ज्वरदाहपिपासामूर्च्छाश्चास्योपद्रवा भवन्ति, पीतत्वङ्नखनयनदशनवदनमूत्रपुरीषश्च पुरुषो भवति ||११||
🔊 Audio coming soon
পিত্তাদিত্যাদি| বিসর্পীণি প্রসরণশীলানি| সংস্থানমাকারঃ| যবমধ্যানীতি পীনমধ্যানি মূলাগ্রযোস্তনূনি| প্রক্লিন্নানি ক্লেদস্রাবীণি||১১||
Adhikarana 10 (12) · Śloka 12
শ্লেষ্মজানি শ্বেতানি মহামূলানি স্থিরাণি বৃত্তানি স্নিগ্ধানি পাণ্ডূনি করীরপনসাস্থিগোস্তনাকারাণি, ন ভিদ্যন্তে ন স্রবন্তি কণ্ডূবহুলানি চ ভবন্তি; তৈরুপদ্রুতঃ সশ্লেষ্মাণমনল্পং মাংসধাবনপ্রকাশমতিসার্যতে, শোফশীতজ্বরারোচকাবিপাকশিরোগৌরবাণি চাস্য তন্নিমিত্তান্যেব ভবন্তি, শুক্লত্বঙ্নখনযনদশনবদনমূত্রপুরীষশ্চ পুরুষো ভবতি ||১২||
View original
श्लेष्मजानि श्वेतानि महामूलानि स्थिराणि वृत्तानि स्निग्धानि पाण्डूनि करीरपनसास्थिगोस्तनाकाराणि, न भिद्यन्ते न स्रवन्ति कण्डूबहुलानि च भवन्ति; तैरुपद्रुतः सश्लेष्माणमनल्पं मांसधावनप्रकाशमतिसार्यते, शोफशीतज्वरारोचकाविपाकशिरोगौरवाणि चास्य तन्निमित्तान्येव भवन्ति, शुक्लत्वङ्नखनयनदशनवदनमूत्रपुरीषश्च पुरुषो भवति ||१२||
🔊 Audio coming soon
শ্লেষ্মজানীত্যাদি| স্থিরাণি কঠিনানি| পাণ্ডূনি ধূসরাণি| করীরো মরুদেশাতিপ্রবৃদ্ধো বৃক্ষবিশেষঃ, পনসো বহিঃ- কণ্টকিফলঃ ‘কটহল’ ইতি লোকে, তস্য ফলসদৃশানি| অনল্পং বহু| শীতজ্বরঃ শীতপ্রধানজ্বরঃ||১২||
Adhikarana 11 (13) · Śloka 13
রক্তজানি ন্যগ্রোধপ্ররোহবিদ্রুমকাকণন্তিকাফলসদৃশানি পিত্তলক্ষণানি চ, যদাঽবগাঢপুরীষপ্রপীডিতানি ভবন্তি তদাঽত্যর্থং দুষ্টমনল্পমসৃক্ সহসা বিসৃজন্তি, তস্য চাতিপ্রবৃত্তৌ শোণিতাতিযোগোপদ্রবা ভবন্তি ||১৩||
View original
रक्तजानि न्यग्रोधप्ररोहविद्रुमकाकणन्तिकाफलसदृशानि पित्तलक्षणानि च, यदाऽवगाढपुरीषप्रपीडितानि भवन्ति तदाऽत्यर्थं दुष्टमनल्पमसृक् सहसा विसृजन्ति, तस्य चातिप्रवृत्तौ शोणितातियोगोपद्रवा भवन्ति ||१३||
🔊 Audio coming soon
রক্তজানীত্যাদি| ন্যগ্রোধপ্ররোহো বটপ্ররোহঃ, বিদ্রুমঃ প্রবালঃ, কাকণন্তিকা গুঞ্জা চিরিহিণ্টিকা’ ইতি লোকে, কাকাদনীত্যপরে| চকারেণানুবন্ধভূতবাতকফরূপমনুক্তমপি সমুচ্চীযতে| শোণিতাতিযোগোপদ্রবা আক্ষেপকাদযঃ||১৩||
Adhikarana 12 (14) · Śloka 14
সন্নিপাতজানি সর্বদোষলক্ষণযুক্তানি ||১৪||
View original
सन्निपातजानि सर्वदोषलक्षणयुक्तानि ||१४||
🔊 Audio coming soon
সর্বদোষলক্ষণযুক্তানীতি “সর্বেষাং চার্শংসাং যানি লক্ষণানি” ইতি জেজ্ঝটঃ; গযদাসস্তু ‘সন্নিপাতজানি সর্বলক্ষণানি’ ইতি পঠতি, ব্যখ্যানযতি চ- “সর্বেষাং বাতাদীনাং লক্ষণানি স্বভাবকর্মভূতানি যেষু তানি তথা” ইতি||১৪||
Adhikarana 13 (15) · Śloka 15
সহজানি দুষ্টশোণিতশুক্রনিমিত্তানি, তেষাং দোষত এব প্রসাধনং কর্ত্তব্যম্, বিশেষতশ্চৈতানি দুর্দর্শনানি পরুষাণি পাংসূনি দারুণান্যন্তর্মুখানি; তৈরুপদ্রুতঃ কৃশোঽল্পভুক্ সিরাসন্ততগাত্রোঽল্পপ্রজঃ ক্ষীণরেতাঃ ক্ষামস্বরঃ ক্রোধনোঽল্পাগ্নিপ্রাণঃ পরমলসশ্চ, তথা ঘ্রাণশিরোঽক্ষিনাসাশ্রবণরোগী, সততমন্ত্রকূজাটোপহৃদযোপলেপারোচকপ্রভৃতিভিঃ পীড্যতে ||১৫||
View original
सहजानि दुष्टशोणितशुक्रनिमित्तानि, तेषां दोषत एव प्रसाधनं कर्त्तव्यम्, विशेषतश्चैतानि दुर्दर्शनानि परुषाणि पांसूनि दारुणान्यन्तर्मुखानि; तैरुपद्रुतः कृशोऽल्पभुक् सिरासन्ततगात्रोऽल्पप्रजः क्षीणरेताः क्षामस्वरः क्रोधनोऽल्पाग्निप्राणः परमलसश्च, तथा घ्राणशिरोऽक्षिनासाश्रवणरोगी, सततमन्त्रकूजाटोपहृदयोपलेपारोचकप्रभृतिभिः पीड्यते ||१५||
🔊 Audio coming soon
শরীরেণ সহ জাতানামর্শসাং দোষেভ্যো ভিন্নং হেতুং দর্শযন্নাহ- সহজানীত্যাদি| দুষ্টশোণিতশুক্রনিমিত্তানীতি গর্ভগুদারম্ভকমাত্রং বীজং দুষ্টং ন সর্বং, সর্বদুষ্টত্বে হি প্রজোত্পত্তিরেব ন স্যাত্| ‘তেষাং দোষত এব প্রসাধনং কর্তব্যমিতি যেন দোষেণ যস্য শুক্রশোণিতং দূষিতং ভবেত্তস্য দোষস্য লক্ষণবর্ণবেদনাকৃতিভিঃ প্রসাধনং বিজ্ঞানম্’ ইত্যেকে; অন্যে তু ‘দোষত ইতি দোষলিঙ্গং সমীক্ষ্য প্রসাধনং চিকিত্সা’ ইত্যাহুঃ| দুর্দর্শনানি দুঃখেন দৃশ্যন্তে, অন্তর্বিদ্রধিবদিত্যর্থঃ| পাংসূনি ধূসরাণি| দারুণানি অতিদুঃখকরাণি||১৫||
Adhikarana 14 (16) · Śloka 16
ভবতি চাত্র- বাহ্যমধ্যবলিস্থানাং প্রতিকুর্যাদ্ভিষগ্বরঃ | অন্তর্বলিসমুত্থানাং প্রত্যাখ্যাযাচরেত্ ক্রিযাম্ ||১৬||
View original
भवति चात्र- बाह्यमध्यवलिस्थानां प्रतिकुर्याद्भिषग्वरः | अन्तर्वलिसमुत्थानां प्रत्याख्यायाचरेत् क्रियाम् ||१६||
🔊 Audio coming soon
স্থানাশ্রযং সাধ্যাদিত্বং দর্শযন্নাহ- ভবতি চাত্রেত্যাদি| অন্তর্বলিঃ অভ্যন্তরবলিঃ| প্রত্যাখ্যায অসাধ্যান্যেতান্যর্শাংসীতি নিরাকৃত্য||১৬||
Adhikarana 15 (17) · Śloka 17
প্রকুপিতাস্তু দোষা মেঢ্রমভিপ্রপন্না মাংসশোণিতে প্রদূষ্য কণ্ডূং জনযন্তি, ততঃ কণ্ডূযনাত্ ক্ষতং সমুপজাযতে, তস্মিংশ্চ ক্ষতে দুষ্টমাংসজাঃ প্ররোহাঃ পিচ্ছিলরুধিরস্রাবিণো জাযন্তে কূর্চকিনোঽভ্যন্তরমুপরিষ্টাদ্বা, তে তু শেফো বিনাশযন্ত্যুপঘ্নন্তি চ পুংস্ত্বং; যোনিমভিপ্রপন্নাঃ সুকুমারান্ দুর্গন্ধান্ পিচ্ছিলরুধিরস্রাবিণশ্ছত্রাকারান্ করীরাঞ্জনযন্তি, তে তু যোনিমুপঘ্নন্ত্যার্তবং চ; নাভিমভিপ্রপন্নাঃ সুকুমারান্ দুর্গন্ধান্ পিচ্ছিলান্ গণ্ডূপদমুখসদৃশান্ করীরাঞ্জনযন্তি; ত এবোর্ধ্বমাগতাঃ শ্রোত্রাক্ষিঘ্রাণবদনেষ্বর্শাংস্যুপনির্বর্তযন্তি; তত্র কর্ণজেষু বাধির্যং শূলং পূতিকর্ণতা চ, নেত্রজেষু বর্ত্মাবরোধো বেদনা স্রাবো দর্শননাশশ্চ, ঘ্রাণজেষু প্রতিশ্যাযোঽতিমাত্রং ক্ষবথুঃ কৃচ্ছ্রোচ্ছ্বাসতা পূতিনস্যং সানুনাসিকবাক্যত্বং শিরোদুঃখং চ; বক্রজেষু কণ্ঠৌষ্ঠতালূনামন্যতমস্মিংস্তৈর্গদ্গদবাক্যতা রসাজ্ঞানং মুখরোগাশ্চ ভবন্তি ||১৭||
View original
प्रकुपितास्तु दोषा मेढ्रमभिप्रपन्ना मांसशोणिते प्रदूष्य कण्डूं जनयन्ति, ततः कण्डूयनात् क्षतं समुपजायते, तस्मिंश्च क्षते दुष्टमांसजाः प्ररोहाः पिच्छिलरुधिरस्राविणो जायन्ते कूर्चकिनोऽभ्यन्तरमुपरिष्टाद्वा, ते तु शेफो विनाशयन्त्युपघ्नन्ति च पुंस्त्वं; योनिमभिप्रपन्नाः सुकुमारान् दुर्गन्धान् पिच्छिलरुधिरस्राविणश्छत्राकारान् करीराञ्जनयन्ति, ते तु योनिमुपघ्नन्त्यार्तवं च; नाभिमभिप्रपन्नाः सुकुमारान् दुर्गन्धान् पिच्छिलान् गण्डूपदमुखसदृशान् करीराञ्जनयन्ति; त एवोर्ध्वमागताः श्रोत्राक्षिघ्राणवदनेष्वर्शांस्युपनिर्वर्तयन्ति; तत्र कर्णजेषु बाधिर्यं शूलं पूतिकर्णता च, नेत्रजेषु वर्त्मावरोधो वेदना स्रावो दर्शननाशश्च, घ्राणजेषु प्रतिश्यायोऽतिमात्रं क्षवथुः कृच्छ्रोच्छ्वासता पूतिनस्यं सानुनासिकवाक्यत्वं शिरोदुःखं च; वक्रजेषु कण्ठौष्ठतालूनामन्यतमस्मिंस्तैर्गद्गदवाक्यता रसाज्ञानं मुखरोगाश्च भवन्ति ||१७||
🔊 Audio coming soon
মেঢ্রাদিষ্বর্শাংস্যাহ- প্রকুপিতাস্ত্বিত্যাদি| অভিপ্রপন্না আশ্রিতাঃ| কূর্চকিনঃ সূক্ষ্মদীর্ঘাঙ্কুরসন্তানিনঃ| অভ্যন্তরমিতি মণৌ| উপরিষ্টাদিতি বাহ্যচর্মণি| পুংস্ত্বং শুক্রং পুংশ্চিহ্নং চ| যোনিমভিপ্রপন্না ইত্যাদি অভিপ্রপন্না দোষা ইতি সম্বন্ধঃ| করীরান্ অঙ্কুরান্| নাভিমভিপ্রপন্না ইত্যাদি দোষা ইত্যত্রাপি সম্বধ্যতে| ত এব দোষা ইত্যর্থঃ| উপনির্বর্তযন্তি জনযন্তীত্যর্থঃ| তত্রেত্যাদি| বর্ত্মাবরোধ ইতি বর্ত্ম অক্ষিপুটঃ| ঘ্রাণজেষ্বিত্যাদি| ক্ষবথুঃ ছিক্কা| বক্রজেষ্বিত্যাদি| অন্যতমস্মিন্ একতমস্মিন্ স্থানে ‘উত্পন্নেষ্বর্শঃসু ’ ইতি শেষঃ||১৭||
Adhikarana 16 (18) · Śloka 18
ব্যানস্তু প্রকুপিতঃ শ্লেষ্মাণং পরিগৃহ্য বহিঃস্থিরাণি কীলবদর্শাংসি নির্বর্তযতি, তানি চর্মকীলান্যর্শাংসীত্যাচক্ষতে ||১৮||
View original
व्यानस्तु प्रकुपितः श्लेष्माणं परिगृह्य बहिःस्थिराणि कीलवदर्शांसि निर्वर्तयति, तानि चर्मकीलान्यर्शांसीत्याचक्षते ||१८||
🔊 Audio coming soon
ত্বগধিষ্ঠানমেব চর্মকীলাখ্যমর্শো দর্শযন্নাহ- ব্যানস্ত্বিত্যাদি| বহিঃ গুদৌষ্ঠাদ্বহিঃ; অন্যে তু ‘বহিঃশব্দেনান্যত্রাপি’ ইতি কথযন্তি| কীলবত্ শঙ্কুতুল্যানীত্যর্থঃ||১৮||
Adhikarana 17 (19-20) · Śloka 20
ভবন্তি চাত্র- তেষু কীলেষু নিস্তোদো মারুতেনোপজাযতে | শ্লেষ্মণা তু সবর্ণত্বং গ্রন্থিত্বং চ বিনির্দিশেত্ ||১৯|| পিত্তশোণিতজং রৌক্ষ্যং কৃষ্ণত্বং শ্লক্ষ্ণতা তথা | সমুদীর্ণখরত্বং চর্মকীলস্য লক্ষণম্ ||২০||
View original
भवन्ति चात्र- तेषु कीलेषु निस्तोदो मारुतेनोपजायते | श्लेष्मणा तु सवर्णत्वं ग्रन्थित्वं च विनिर्दिशेत् ||१९|| पित्तशोणितजं रौक्ष्यं कृष्णत्वं श्लक्ष्णता तथा | समुदीर्णखरत्वं चर्मकीलस्य लक्षणम् ||२०||
🔊 Audio coming soon
তেষাং চর্মকীলানাং দোষলিঙ্গমাহ- ভবন্তি চাত্রেত্যাদি| সবর্ণত্বমিতি শ্লেষ্মণঃ সমানবর্ণতেত্যর্থঃ| গ্রন্থিত্বং গ্রন্থিভাবঃ| পিত্তেত্যাদি| তেষু চর্মকীলেষু| রৌক্ষ্যমিত্যাদি পিত্তশোণিতজং বিনির্দিশেত্| সমুদীর্ণখরত্বম্ অতীব কঠিনত্বম্| চর্মকীলস্য লক্ষণমিতি এতদ্বাতাদিদোষভেদতশ্চর্মকীলস্য লক্ষণমুক্তম্| কেচিচ্চর্মকীলানাং দোষলিঙ্গং ন পঠন্তি||১৯-২০||
Adhikarana 18 (21) · Śloka 21
অর্শসাং লক্ষণং ব্যাসাদুক্তং সামান্যতস্তু যত্ | তত্সর্বং প্রাগ্বিনির্দিষ্টাত্সাধযেদ্ভিষজাং বরঃ ||২১||
View original
अर्शसां लक्षणं व्यासादुक्तं सामान्यतस्तु यत् | तत्सर्वं प्राग्विनिर्दिष्टात्साधयेद्भिषजां वरः ||२१||
🔊 Audio coming soon
ইদানীং সর্বেষামেব মেঢ্রাদিজানাং বাতাদিলক্ষণমতিদেশেন নির্দিশন্নাহ- অর্শসামিত্যাদি| অর্শসাং মেঢ্রাদিজানাং বাতাদিদোষলক্ষণং বিনা যত্ সঙ্ক্ষেপতো লক্ষণমুক্তং তত্ সর্বং সাধযেত্ জানীযাত্ চিকিত্সেদ্বা| কথমিত্যাহ- প্রাগ্বিনির্দিষ্টাদিতি; “প্রাক্ পূর্বং ব্যাসেন প্রত্যেকং বাতাদিজার্শোলক্ষণমুক্তং বীক্ষ্যেত্যর্থঃ” ইতি গযদাসাচার্যঃ; অন্যে তু “সঙ্ক্ষেপতঃ ষোঢা, ব্যাসতো বিস্তরেণ, প্রাগ্বিনির্দিষ্টাত্ পঞ্চদশধা প্রসরাত্ সাধযেত্” ইতি মন্যন্তে||২১||
Adhikarana 19 (22) · Śloka 22
অর্শঃসু দৃশ্যতে রূপং যদা দোষদ্বযস্য তু | সংসর্গং তং বিজানীযাত্ সংসর্গঃ স চ ষড্বিধঃ ||২২||
View original
अर्शःसु दृश्यते रूपं यदा दोषद्वयस्य तु | संसर्गं तं विजानीयात् संसर्गः स च षड्विधः ||२२||
🔊 Audio coming soon
ইদানীং ষড্বিধেষ্বেবার্শঃস্বত ঊর্ধ্বং সংসর্গমৌষধকল্পনার্থং দর্শযন্নাহ- অর্শঃস্বিত্যাদি| সংসর্গঃ স চ ষড্বিধ ইতি বাতপিত্তে, বাতশ্লেষ্মাণৌ, পিত্তশ্লেষ্মাণৌ, বাতশোণিতে, পিত্তশোণিতে শ্লেষ্মশোণিতে, এবং সংসর্গঃ ষড্বিধঃ| স চ সূত্রস্থানোক্তব্রণবেদনালক্ষণাদবগন্তব্যঃ ||২২||
Adhikarana 20 (23-24) · Śloka 24
ত্রিদোষাণ্যল্পলিঙ্গানি যাপ্যানি তু বিনির্দিশেত্ | দ্বন্দ্বজানি দ্বিতীযাযাং বলৌ যান্যাশ্রিতানি চ ||২৩|| কৃচ্ছ্রসাধ্যানি তান্যাহুঃ পরিসংবত্সরাণি চ | সন্নিপাতসমুত্থানি সহজানি তু বর্জযেত্ ||২৪||
View original
त्रिदोषाण्यल्पलिङ्गानि याप्यानि तु विनिर्दिशेत् | द्वन्द्वजानि द्वितीयायां वलौ यान्याश्रितानि च ||२३|| कृच्छ्रसाध्यानि तान्याहुः परिसंवत्सराणि च | सन्निपातसमुत्थानि सहजानि तु वर्जयेत् ||२४||
🔊 Audio coming soon
ইদানীং যাপ্যকৃচ্ছ্রসাধ্যাসাধ্যান্যর্শাংসি দর্শযন্নাহ- ত্রিদোষাণীত্যাদি| দ্বন্দ্বজানি দ্বিদোষোত্থানি, তান্যপি যাপ্যানীত্যর্থঃ| পরিসংবত্সরাণীতি পরিতঃ সংবত্সরমভিব্যাপ্য স্থিতানি কৃচ্ছ্রসাধ্যানীত্যর্থঃ| কেচিত্ ‘সন্নিপাতসমুত্থানি’ ইত্যাদৌ কৃত্বা পঠন্তি; স চ পাঠঃ সমগ্রোঽদর্শনান্ন লিখিতঃ||২৩-২৪||
Adhikarana 21 (25-26) · Śloka 26
সর্বাঃ স্যুর্বলযো যেষাং দুর্নামভিরুপদ্রুতাঃ | তৈস্তু প্রতিহতো বাযুরপানঃ সন্নিবর্ততে ||২৫|| ততো ব্যানেন সঙ্গম্য জ্যোতির্মৃদ্নাতি দেহিনাম্ ||২৬||
View original
सर्वाः स्युर्वलयो येषां दुर्नामभिरुपद्रुताः | तैस्तु प्रतिहतो वायुरपानः सन्निवर्तते ||२५|| ततो व्यानेन सङ्गम्य ज्योतिर्मृद्नाति देहिनाम् ||२६||
🔊 Audio coming soon
সর্ববলিব্যাপিনামর্শসাং পঞ্চাত্মকস্যাপ্যগ্নের্মহানর্থকরত্বং দর্শযন্নাহ- সর্বা ইত্যাদি| যেষাং দেহিনাম্| দুর্নামভিঃ অর্শোভিঃ| তৈস্তু অর্শোভিরিত্যর্থঃ| অপানো বাযুরিতি সম্বন্ধঃ| সন্নিবর্ততে স্থিতিং বধ্নাতি ন নিঃসরতীত্যর্থঃ| সঙ্গম্য মিলিত্বা| জ্যোতিঃ পঞ্চাত্মকমগ্নিং, মৃদ্নাতি মন্দীকরোতি| অযং চোপদ্রবঃ, প্রাযেণ সহজেষ্বর্শঃসু জ্ঞেযঃ||২৫-২৬||
Adhikarana puShpikA · Śloka 2
ইতি সুশ্রুতসংহিতাযাং নিদানস্থানেঽর্শোনিদানং নাম দ্বিতীযোঽধ্যাযঃ ||২||
View original
इति सुश्रुतसंहितायां निदानस्थानेऽर्शोनिदानं नाम द्वितीयोऽध्यायः ||२||
🔊 Audio coming soon
ইতি শ্রীডল্হণাচার্যবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে দ্বিতীযোঽধ্যাযঃ||২||