9. dhamanīvyākaraṇaśārīram

Adhikarana 1 (1-2) · Śloka 2

অথাতো ধমনীব্যাকরণং শারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

সিরাব্যধবিধিশারীরানন্তরং সিরাধমনীস্রোতসাং সদৃশত্বাদ্ধমনীব্যাকরণারম্ভো যুজ্যত ইত্যাহ- অথেত্যাদি| ধ্মানাদনিলপূরণাদ্ধমন্যঃ, তাসাং ব্যাকরণং বিবরণং যস্মিন্ শারীর ইতি বিগ্রহঃ||১-২||

Adhikarana 2 (3) · Śloka 3

চতুর্বিংশতির্ধমন্যো নাভিপ্রভবা অভিহিতাঃ | তত্র কেচিদাহুঃ- সিরাধমনীস্রোতসামবিভাগঃ, সিরাবিকারা এব হি ধমন্যঃ স্রোতাংসি চেতি | তত্তু ন সম্যক্, অন্যা এব হি ধমন্যঃ স্রোতাংসি চ সিরাভ্যঃ; কস্মাত্? ব্যঞ্জনান্যত্বান্, মূলসন্নিযমাত্, কর্মবৈশেষ্যাত্, আগমাচ্চ; কেবলং তু পরস্পরসন্নিকর্ষাত্ সদৃশাগমকর্মত্বাত্ সৌক্ষ্ম্যাচ্চ বিভক্তকর্মণামপ্যবিভাগ ইব কর্মসু ভবতি ||৩||

তাস্বতীতাবেক্ষণং নির্দিশন্নাহ- চতুর্বিংশতিরিত্যাদি| অভিহিতা উক্তাঃ, ‘শোণিতবর্ণনীযে’ (সূ.১৪) ইতি শেষঃ তত্র ধমনীসিরাস্রোতঃস্বেকীযমতং স্বমতেন হেতুমতা নিরাকর্তুমাহ- তত্রেত্যাদি| অবিভাগোঽপৃথক্ত্বং, সরণাত্ সিরাঃ, তা এব ধ্মানাদ্ধমন্যঃ, স্রবণাত্ স্রোতাংসীতি | অপৃথক্ত্বে স্বযমেব হেতুমাহ- সিরাবিকারা ইত্যাদি| সিরাবিকারা ইতি সিরাণামেবাকারান্তরেণ পরিণামাঃ, পিষ্টবিকারক্ষীরবিকারবত্| পুনরপি তৈরুক্তং- “আকাশীযাবকাশানাং দেহে নামানি দেহিনাম্| সিরাঃ স্রোতাংসি মার্গাঃ খং ধমন্যো নাড্য আশযাঃ”- ইত্যাদি| পরমতোচ্ছেদমাহ- তত্তু ন সম্যগিত্যাদি| ব্যঞ্জনান্যত্বাত্ লক্ষণান্যত্বাত্; তত্র সিরাণাং বাতাদিবহানামরুণনীলশুক্ললোহিতবর্ণত্বং লক্ষণং, শব্দাদিবহধমনীনাং তু বর্ণানুক্তেঃ স্বধাতুসমবর্ণত্বম্, এবং স্রোতসামপি| তদুক্তং চরকে- “স্বধাতুমসবর্ণানি বৃত্তস্থূলান্যণূনি চ| স্রোতাংসি দীর্ঘাণ্যাকৃত্যা” (চ.বি.৫) ইত্যাদিকম্| মূলসন্নিযমো দ্বিতীযো ভেদো যথা- “তাসাং মূলসিরাশ্চত্বারিংশত্” ইত্যারভ্য যাবত্ “এবমেতানি সপ্তসিরাশতানি” (শা.৭); ধমনীনাং তু “চতুর্বিংশতির্ধমন্যঃ”; স্রোতসাং পুনর্দ্বাবিংশতিঃ স্রোতাংসি| কর্মবৈশেষ্যং বিশিষ্টকর্মকরত্বং, তচ্চ তৃতীযভেদকারণং; তদ্যথা- “কর্মণামপ্রতীঘাতং” (শা.৭) ইত্যাদিনোক্তং সিরাণাং কর্মবৈশেষ্যং, শব্দরূপরসগন্ধবহত্বাদিকং ধমনীনাং, প্রাণান্নবারিরসশোণিতমাংসমেদোবাহিত্বং স্রোতসাম্| আগমোঽত্রাযুর্বেদঃ, স চতুর্থো ভেদহেতুঃ; তদ্যথা- “সিরা ধমন্যো যোগবহানি স্রোতাংসি” (শা.৫) ইতি, তথা “মর্মসিরাস্নাযুধমনীঃ পরিহরন্” (সূ.৫) ইত্যাদিষু সিরাদীনাং যদি বিভক্তত্বং নাভবিষ্যত্তদা পৃথগ্বিবরণং নাকরিষ্যদিতি| ইদানীমেতেষাং সিরাধমনীস্রোতসাং পরস্পরভিন্নানামপি কর্মস্ববিভাগ ইব ভবতীতি দর্শযন্নাহ- কেবলমিত্যাদি| সন্নিকর্ষো নৈকট্যম্| অতিসন্নিকর্ষাদিহেতুচতুষ্টযেন কর্মস্বপৃথক্ত্বমিব ভবতি| কথং? যথাঽতিসন্নিকর্ষযুক্তীকৃতানাং তৃণানাং প্রত্যেকং ভিন্নজ্বলনক্রিযাণামভিন্নমিব জ্বলনং প্রতীযতে| সদৃশাগমত্বাদিতি আপ্তানাং বচনমাগমঃ, তস্য সদৃশত্বাত্| তথা হি- “আকাশীযাবকাশানাং দেহে নামানি দেহিনাম্| সিরাঃ স্রোতাংসি মার্গাঃ খং ধমন্য” ইত্যাপ্তোপদিষ্টেন সিরাদিসাদৃশ্যেন ন নির্ধার্য জ্ঞাযতে সিরাদিষু কস্যেদং তোযাদিবহনং কর্ম| সদৃশকর্মত্বাচ্চ যথা- সহ গাযতাং গাযকানাং ভিন্নগীতক্রিযাণামপ্যভিন্নগীতক্রিযাত্বপ্রতীতিঃ | সৌক্ষ্ম্যাদ্যথা- ঘটস্থিতমৃত্পরমাণূনাং প্রত্যেকমুদকাহরণং কুর্বতামেকক্রিযাকারিত্বপ্রতীতিঃ||৩||

Adhikarana 3 (4) · Śloka 4

তাসাং তু খলু নাভিপ্রভবাণাং ধমনীনামূর্ধ্বগা দশ, দশ চাধোগামিন্যঃ, চতস্রস্তির্যগ্গাঃ ||৪||

তাসামিত্যাদি||৪||

Adhikarana 4 (5) · Śloka 6

ঊর্ধ্বগাঃ শব্দস্পর্শরূপরসগন্ধপ্রশ্বাসোচ্ছ্বাসজৃম্ভিতক্ষুদ্ধসিতকথিতরুদিতাদীন্ বিশেষানভিবহন্ত্যঃ শরীরং ধারযন্তি | তাস্তু হৃদযমভিপ্রপন্নাস্ত্রিধা জাযন্তে, তাস্ত্রিংশত্ | তাসাং তু বাতপিত্তকফশোণিতরসান্ দ্বে দ্বে বহতস্তা দশ, শব্দরূপরসগন্ধানষ্টাভির্গৃহ্ণীতে, দ্বাভ্যাং ভাষতে, দ্বাভ্যাং ঘোষং করোতি, দ্বাভ্যাং স্বপিতি, দ্বাভ্যাং প্রতিবুধ্যতে, দ্বে চাশ্রুবাহিন্যৌ, দ্বে স্তন্যং স্ত্রিযা বহতঃ স্তনসংশ্রিতে, তে এব শুক্রং নরস্য স্তনাভ্যামভিবহতঃ, তাস্ত্বেতাস্ত্রিংশত্ সবিভাগা ব্যাখ্যাতাঃ | এতাভিরূর্ধ্বং নাভেরুদরপার্শ্বপৃষ্ঠোরঃস্কন্ধগ্রীবাবাহবো ধার্যন্তে যাপ্যন্তে চ ||৫|| ভবতি চাত্র- ঊর্ধ্বঙ্গমাস্তু কুর্বন্তি কর্মাণ্যেতানি সর্বশঃ |৬|

প্রশ্বাসোঽন্তঃপ্রবিশদ্বাযুঃ, উচ্ছ্বাস ঊর্ধ্বমুত্তিষ্ঠদ্বাযুঃ, জৃম্ভিতক্ষুদ্ধসিতকথিতানি ঘোষভাষযোর্বিশেষাঃ, রুদিতমশ্রুবাহিন্যোঃ কর্ম, আদিশব্দাদ্রূপাদিবাহিনীসম্বন্ধিনাং প্রেক্ষিতাদিকর্মবিশেষাণামবরোধঃ| তাস্ত্বিত্যাদি| শব্দাদীংশ্চতুরঃ প্রত্যেকং দ্বাভ্যাং দ্বাভ্যামিত্যষ্টাভী রজঃপ্রবর্তিতাত্মপ্রযত্নপ্রবোধমনোঽনুগতাভির্ধমনীভির্গৃহ্ণীতে| মনসশ্চাণুত্বাদেকত্বাচ্চ তাসাং যুগপত্প্রবৃত্তির্নাস্তীতি তাসাং যা ধমনী মনসাঽনুযুজ্যতে তযৈব রূপাদিষ্বন্যতমমাত্মা গৃহ্ণীতে, ন পুনর্যুগপদেব রূপাদিকং সর্বং সর্বাভিরিতি | স্পর্শগ্রহণং পুনরত্রৈবাধ্যাযে তির্যগ্গাণাং কর্ম বক্ষ্যতি| ভাষত ইতি তাল্বাদিস্থানব্যাপারনিষ্পাদিতাকারাদিবর্ণব্যক্তিযুক্তং শব্দং করোতি, ঘোষশ্চ তদ্বিপরীতোঽব্যক্তঃ শব্দঃ| দ্বাভ্যাং স্বপিতি তমোবিষযাভ্যাং, সত্ত্ববিষযাভ্যাং তু বুধ্যতে| এতাভিরূর্ধ্বং নাভেরুদরাদযো ধার্যন্তে, অঙ্গাদিভিঃ সহৈতাভিরুদরাদীনাং বন্ধনেন দৃঢীকৃতত্বাত্; বাতাদিবহনেন চৈতাভিরেব যাপ্যন্তে||৫||-

Adhikarana 5 (6-7) · Śloka 8

অধোগমাস্তু বক্ষ্যামি কর্ম চাসাং যথাযথম্ ||৬|| অধোগমাস্তু বাতমূত্রপুরীষশুক্রার্তবাদীন্যধো বহন্তি | তাস্তু পিত্তাশযমভিপ্রপন্নাস্তত্রস্থমেবান্নপানরসং বিপক্বমৌষ্ণ্যাদ্বিবেচযন্ত্যোঽভিবহন্ত্যঃ শরীরং তর্পযন্তি, অর্পযন্তি চোর্ধ্বগানাং তির্যগ্গাণাং চ, রসস্থানং চাভিপূরযন্তি, মূত্রপুরীষস্বেদাংশ্চ বিবেচযন্তি; আমপক্বাশযান্তরে চ ত্রিধা জাযন্তে, তাস্ত্রিংশত্; তাসাং তু বাতপিত্তকফশোণিতরসান্ দ্বে দ্বে বহতস্তা দশ, দ্বে অন্নবাহিন্যাবন্ত্রাশ্রিতে, তোযবহে দ্বে, মূত্রবস্তিমভিপ্রপন্নে মূত্রবহে দ্বে, শুক্রবহে দ্বে শুক্রপ্রাদুর্ভাবায, দ্বে বিসর্গায, তে এব রক্তমভিবহতো বিসৃজতশ্চ নারীণামার্তবসঞ্জ্ঞং, দ্বে বর্চোনিরসন্যৌ স্থূলান্ত্রপ্রতিবদ্ধে, অষ্টাবন্যাস্তির্যগ্গামিনীনাং ধমনীনাং স্বেদমর্পযন্তি; তাস্ত্বেতাস্ত্রিংশত্ সবিভাগা ব্যাখ্যাতাঃ | এতাভিরধোনাভেঃ পক্বাশযকটীমূত্রপুরীষগুদবস্তিমেঢ্রসক্থীনি ধার্যন্তে যাপ্যন্তে চ ||৭|| ভবতি চাত্র- অধোগমাস্তু কুর্বন্তি কর্মাণ্যেতানি সর্বশঃ |৮|

বাতাদ্যভিবহনমাসাং সামান্যং কর্ম| আর্তবাদীনীত্যাদিশব্দাদন্নতোযাদীনাং স্বীকারঃ| স্থানান্তরগতানাং তাসামেব কর্মাহ- তাস্ত্বিত্যাদি| অভিপ্রপন্না অভিমুখং প্রাপ্তাঃ| বিপক্বমৌষ্ণ্যাদিতি ‘অগ্নেঃ’ ইতি শেষঃ| বিবেচযন্ত্য ইতি যথা যথা বিপক্বমশনরসং তথা তথা পৃথক্ কুর্বন্ত্য ইত্যর্থঃ| অভিবহন্ত্য ইতি অভিতঃ সর্বতো বহন্ত্যঃ| তর্পযন্তি প্রীণযন্তি| কথং পুনঃ সকলমেব শরীরং তাস্তর্পযন্তীত্যাশঙ্ক্যাহ- অর্পযন্তীত্যাদি| কথমর্পযন্তীত্যত্র যুক্তিমাহ- রসস্থানং চাভিপূরযন্তীতি| অযমভিপ্রাযঃ- আমপক্বাশযে অধোনাভিরেবৈবমন্নরসো বর্তুলীকৃতো যথা রসস্থানস্য পূরণং ততশ্চোর্ধ্বগাভিস্তির্যগ্গাভিশ্চ তত্র তত্রোপনীযত ইতি সকলশরীরতর্পণমধোগতানামেব কর্ম; রসস্থানং চ হৃদযং, তত্পূরণং চ তন্নিষ্পাদিতরসপরম্পরযা ন পুনঃ সাক্ষাদেব, অধোগমত্বেনাসামূর্ধ্বগমনাভাবাদ্ধৃদযগমনমেব নাস্তীতি| তত্র মূত্রপুরীষস্বেদাংশ্চ বিবেচযন্তি পৃথক্ কুর্বন্তি, পক্বান্নরসাদিতি সম্বন্ধঃ| পিত্তাশযে কর্ম তাসাং নির্দিশ্যামপক্বাশযান্তরে নির্দিশন্নাহ- আমপক্বাশযান্তর ইত্যাদি| পচনং পক্বং ভাবে ক্তঃ, তস্যাশযঃ পক্বাশযঃ, এতেনামস্য পচ্যমানস্য যদন্তরং তত্রেত্যর্থঃ| দ্বে অন্নবাহিন্যাবন্ত্রাশ্রিতে নহি পিত্তাশযে রসমূত্রপুরীষভাবেন বিবিচ্যমানস্যাহারস্যান্নভাবোঽস্তি , নাপি তোযস্য তোযভাবনা; তেন তোযমত্র ভবিষ্যতো মূত্রস্য কারণভূতং পক্বাহারবিবেকজং দ্রবমযমুদকমিবোদকং , তদপি দ্বে এব বহতঃ; তদেবোদকং বস্তিবিবরপ্রাপ্তং মূত্রমিত্যুচ্যতে, তদ্বহে দ্বে মূত্রবস্তিসম্বদ্ধে| এবমন্নমত্র ভবিষ্যতঃ কিট্টস্য কারণভূতং পক্বাহারবিবেকজং ঘনমন্নমিবান্নং, তদপি দ্বে এব বহতঃ; তদেবোণ্ডু(ন্দু)কপ্রাপ্তং পুরীষমিত্যুচ্যতে||৬-৭||-

Adhikarana 6 (8-9) · Śloka 9

তির্যগ্গাঃ সম্প্রবক্ষ্যামি কর্ম চাসাং যথাযথম্ ||৮|| তির্যগ্গাণাং তু চতসৃণাং ধমনীনামেকৈকা শতধা সহস্রধা চোত্তরোত্তরং বিভজ্যন্তে, তাস্ত্বসঙ্খ্যেযাঃ, তাভিরিদং শরীরং গবাক্ষিতং বিবদ্ধমাততং চ, তাসাং মুখানি রোমকূপপ্রতিবদ্ধানি, যৈঃ স্বেদমভিবহন্তি রসং চাভিতর্পযন্ত্যন্তর্বহিশ্চ , তৈরেব চাভ্যঙ্গপরিষেকাবগাহালেপনবীর্যাণ্যন্তঃশরীরমভিপ্রতিপদ্যন্তে ত্বচি বিপক্বানি, তৈরেব চ স্পর্শং সুখমসুখং বা গৃহ্ণীতে, তাস্ত্বেতাশ্চতস্রো ধমন্যঃ সর্বাঙ্গগতাঃ সবিভাগা ব্যাখ্যাতাঃ ||৯||

বিভজ্যন্তে স্বযমেব বিভক্তা ভবন্তি| গবাক্ষিতং জালকৈরিব ব্যাপ্তম্| রসং চেত্যাদি| রসং রসধাতুম্| অন্তঃ অভ্যন্তরে| যৈর্মুখৈঃ সম্যক্পরিণতাহাররসবাহিভিঃ | সন্তর্পযন্তি সর্বতস্তর্পযন্তি| বহিশ্চ সন্তর্পযন্তি ‘ত্বচম্’ ইতি শেষঃ| তৈরেব চাভ্যঙ্গাদীনাং বীর্যাণি ত্বচি ভ্রাজকেনাগ্নিনা বিপক্বানি শরীরান্তঃ প্রবিশন্তি| তৈরেব মনোনুগতৈঃ সুখাসুখরূপং স্পর্শং কর্মাত্মা গৃহ্ণীতে| তাঃ সর্বাঙ্গগতাঃ স্পর্শগ্রহণাযাধিকৃতত্বাত্, তদ্গতং মনোঽপি সর্বাঙ্গস্রোতোগতমেব| তেনোর্ধ্বগানাং চানিযত এব দেশো ভবতি||৮-৯||

Adhikarana 7 (10) · Śloka 10

যথা স্বভাবতঃ খানি মৃণালেষু বিসেষু চ | ধমনীনাং তথা খানি রসো যৈরুপচীযতে ||১০||

যথেত্যাদি| খানি স্রোতাংসি| রসো যৈরুপচীযত ইতি রসঃ প্রধানভূতঃ, তেনান্যদভ্যঙ্গপরিষেকাদিবীর্যম্||১০||

Adhikarana 8 (11) · Śloka 11

পঞ্চাভিভূতাস্ত্বথ পঞ্চকৃত্বঃ পঞ্চেন্দ্রিযং পঞ্চসু ভাবযন্তি | পঞ্চেন্দ্রিযং পঞ্চসু ভাবযিত্বা পঞ্চত্বমাযান্তি বিনাশকালে ||১১||

ইদানীং শব্দাদিগ্রাহিণীনাং সর্গস্থিতিপ্রলযেষু প্রকৃতিভূতানামপ্রকৃতিভূতানাং চ ক্রিযোপদেশমাহ- পঞ্চাভিভূতা ইত্যাদি| অস্যার্থঃ- ভাবযন্তি যোজযন্তি, কাঃ? পঞ্চাভিভূতাঃ পঞ্চভ্যো ভূতেভ্যোঽভি সমন্তাদ্ভূতাঃ, শব্দস্পর্শরূপরসগন্ধৈর্বা পঞ্চভিরভিভূতা ব্যাপ্তাঃ, আকাশপবনদহনতোযভূমিভির্বা পঞ্চভিরভিভূতা ব্যাপ্তা ধমন্যঃ; কং? পঞ্চেন্দ্রিযং কর্মপুরুষং; কেষু? পঞ্চসু শ্রোত্রাদিষ্বিন্দ্রিযাধিষ্ঠানেষু; কথং? পঞ্চকৃত্বঃ পঞ্চবারান্, ভাবযন্তি যোজযন্তি; অথ আযান্তি আগচ্ছন্তি; কাঃ? ধমন্যঃ; কিং পঞ্চত্বং; কিং কৃত্বা? ভাবযিত্বা সংযোজ্য; কিং তত্? পঞ্চেন্দ্রিযম্ ইন্দ্রিযপঞ্চকং সূক্ষ্মরূপং; কেষু? পঞ্চস্বাকাশাদিষু মহাভূতেষু; এতেনৈতদুক্তং ভবতি- আকাশাদিপঞ্চভূতসমুত্পন্না ধমন্যঃ কর্মপুরুষমিন্দ্রিযাধিষ্ঠানেষু পঞ্চবারান্ ভাবযন্তি, ততশ্চেন্দ্রিযপঞ্চকমাকাশাদিষু ভূতেষু সংযোজ্য বিনাশকালে ধমন্যো বিনাশং যান্তি| অন্যে তু ‘পঞ্চাদিভূতান্যথ পঞ্চকৃত্বা’ ইতি পঠন্তি, ব্যাখ্যানযন্তি চ- আদিভূতান্যাকাশাদীনি পঞ্চমহাভূতানি, পঞ্চেন্দ্রিযং কর্মপুরুষং, পঞ্চসু চক্ষুরাদিষ্বিন্দ্রিযাধিষ্ঠানেষু যোজযন্তি; ততশ্চ পঞ্চেন্দ্রিযং কর্মপুরুষং পঞ্চসু চক্ষুরাদিষ্বিন্দ্রিযাধিষ্ঠানেষু, ভাবযিত্বা সংযোজ্য, তানি পঞ্চ আদিভূতানি, বিনাশকালে পঞ্চত্বমাযান্তি| অপরে তু ‘পঞ্চাভিভূতাস্ত্বথ পঞ্চধা বা’ ইতি পঠন্তি, ব্যাখ্যানযন্তি চ- ভাবযন্তি যোজযন্তি, কাঃ? পঞ্চাভিভূতা ধমন্যঃ; আযান্তি কিং? পঞ্চত্বং বিনাশং; ক্ব? বিনাশকালে; কিং কৃত্বা? ভাবযিত্বা সংযোজ্য; কিং তত্? পঞ্চেন্দ্রিযং বুদ্ধীন্দ্রিযপঞ্চকং কর্মেন্দ্রিযপঞ্চকং চ; কেষু? পঞ্চসু শব্দাদিষু বচনাদিষু চাত্মীযেষ্বর্থেষু ; কথং? পঞ্চধা পঞ্চভিঃ প্রকারৈঃ, তদনন্তা এব ধমন্যঃ; কিং? পঞ্চত্বং বিনাশং; ক্ব? বিনাশকালে; কিং কৃত্বা? ভাবযিত্বা সংযোজ্য; কং পঞ্চেন্দ্রিযং বুদ্ধীন্দ্রিযপঞ্চকং কর্মেন্দ্রিযপঞ্চকং চ; ক্ব? শব্দাদিষু স্বকীযেষ্বর্থেষু| অথবা পঞ্চানামাকাশপবনদহনতোযভূমীনাং পৃথগাভিমুখ্যেন ভূতাঃ সত্তারূপেণ ব্যবস্থিতা ধমন্যঃ, পঞ্চেন্দ্রিযং কর্মপুরুষং, যথাস্বং পঞ্চসু চক্ষুরাদিষ্বিন্দ্রিযাধিষ্ঠানেষু, ভাবযন্তি যোজযন্তি| গযী ত্বন্যথাঽঽপাতনিকাং বিধায ব্যাখ্যাতি; যথা- অত্র রূপাদিগ্রাহিণীনাং ধমনীনাং পঞ্চত্বাত্ পঞ্চভির্ধমনীভিঃ পঞ্চানামপি রূপাদীনাং যুগপদ্গ্রহণেন ভবিতব্যমিত্যাশঙ্ক্যাহ- পঞ্চাভিভূতা ইত্যাদি| অস্যাযমর্থঃ- পঞ্চসু রূপাদিষু, পঞ্চেন্দ্রিযং চক্ষুরাদিকং, পঞ্চ ধমন্যো ভাবযন্তি বেদযন্তি; স্বযং তাবত্ পঞ্চেন্দ্রিযাণি রূপাদিকং বিদন্তি, তানি চ পঞ্চ ধমন্যস্তেষু বেদযন্তি| কথং? পঞ্চকৃত্বঃ পঞ্চবারান্| ন চৈকবারমেব পঞ্চাপি ধমন্যঃ পঞ্চাপীন্দ্রিযাণি পঞ্চস্বপি রূপাদিষু বেদযন্তি, তত্ কুতঃ পুনরিতি হেতুগর্ভং বিশেষণমাহ- অভিভূতা অভিমুখং প্রাপ্তাঃ| কেন? ‘মনসা’ ইতি শেষঃ| কস্মাত্? কর্তৃমনঃপুরঃসরেন্দ্রিযার্থগ্রহণাত্; মন্তা হি শরীরে এক এব, মনোঽপ্যেকমেব, তেন মনসা যৈব শব্দাদিবহাসু ধমনীষ্বভিপ্রপন্না সৈব স্বধর্মং গ্রাহযতি মন্তারং নান্যেতি; যতো মনঃপুরঃসরৈবেন্দ্রিযপ্রবৃত্তিঃ| ইদানীং স্বস্থস্যৈব রূপাদিগ্রাহিণীত্বমাসাং ন পুনরতিদোষাভিপন্নস্য মরণেঽপীত্যাহ- পঞ্চত্বমিত্যাদি| বিশিষ্টনাশকালে পঞ্চত্বং যান্তি; ধমন্যঃ পাঞ্চভৌতিকা বিনাশকালে পৃথক্পৃথগ্ভূতভাবেনাবস্থানাত্ পঞ্চতাং গতা উচ্যন্তে| পঞ্চেন্দ্রিযং পঞ্চসু ভাবযিত্বেতি পুনরপ্যনুবাদস্তেষাং নিযতস্ববিষযগ্রাহিত্বদর্শনার্থঃ| গ্রন্থান্তরে “রসবহনং কুর্বন্তি ধমন্যঃ সততং তথা| শব্দাদিগ্রহণোচ্ছ্বাসনিঃশ্বাসবচনানি চ|| ভাবযন্তি পৃথক্ পশ্চাত্ প্রত্যযাঃ খলু পঞ্চসু| তত্সঙ্খ্যাকরণং যান্তি নাশকালে তু পঞ্চতাম্|| শরীরং হি গতে তস্মিঞ্ শূন্যাগারমচেতনম্| পঞ্চতত্ত্বাবশেষত্বাত্ পঞ্চতাং গতমুচ্যতে”- ইতি||১১||

Adhikarana 9 (12) · Śloka 12

অত ঊর্ধ্বং স্রোতসাং মূলবিদ্ধলক্ষণমুপদেক্ষ্যামঃ | তানি তু প্রাণান্নোদকরসরক্তমাংসমেদোমূত্রপুরীষশুক্রার্তববহানি, যেষ্বধিকারঃ; একেষাং বহূনি; এতেষাং বিশেষা বহবঃ | তত্র প্রাণবহে দ্বে, তযোর্মূলং হৃদযং রসবাহিন্যশ্চ ধমন্যঃ, তত্র বিদ্ধস্যাক্রোশনবিনমনমোহনভ্রমণবেপনানি মরণং বা ভবতি; অন্নবহে দ্বে, তযোর্মূলমামাশযোঽন্নবাহিন্যশ্চ ধমন্যঃ, তত্র বিদ্ধস্যাধ্মানং শূলোঽন্নদ্বেষশ্ছর্দিঃ পিপাসাঽঽন্ধ্যং মরণং চ; উদকবহে দ্বে, তযোর্মূলং তালু ক্লোম চ, তত্র বিদ্ধস্য পিপাসা সদ্যোমরণং চ; রসবহে দ্বে, তযোর্মূলং হৃদযং রসবাহিন্যশ্চ ধমন্যঃ, তত্র বিদ্ধস্য শোষঃপ্রাণবহবিদ্ধবচ্চ মরণং তল্লিঙ্গানি চ; রক্তবহে দ্বে, তযোর্মূলং যকৃত্প্লীহানৌ রক্তবাহিন্যশ্চ ধমন্যঃ , তত্র বিদ্ধস্য শ্যাবাঙ্গতা জ্বরো দাহঃ পাণ্ডুতা শোণিতাগমনং রক্তনেত্রতা চ; মাংসবহে দ্বে, তযোর্মূলং স্নাযুত্বচং রক্তবহাশ্চ ধমন্যঃ, তত্র বিদ্ধস্য শ্বযথুর্মাংসশোষঃ সিরাগ্রন্থযো মরণং চ; মেদোবহে দ্বে, তযোর্মূলং কটী বৃক্কৌ চ, তত্র বিদ্ধস্য স্বেদাগমনং স্নিগ্ধাঙ্গতা তালুশোষঃ স্থূলশোফতা পিপাসা চ; মূত্রবহে দ্বে, তযোর্মূলং বস্তির্মেঢ্রং চ, তত্র বিদ্ধস্যানদ্ধবস্তিতা মূত্রনিরোধঃ স্তব্ধমেঢ্রতা চ; পুরীষবহে দ্বে, তযোর্মূলং পক্বাশযো গুদং চ, তত্র বিদ্ধস্যানাহো দুর্গন্ধতা গ্রথিতান্ত্রতা চ; শুক্রবহে দ্বে, তযোর্মূলং স্তনৌ বৃষণৌ চ, তত্র বিদ্ধস্য ক্লীবতা চিরাত্ প্রসেকো রক্তশুক্রতা চ ; আর্তবহে দ্বে, তযোর্মূলং গর্ভাশয আর্তববাহিন্যশ্চ ধমন্যঃ, তত্র বিদ্ধাযা বন্ধ্যাত্বং মৈথুনাসহিষ্ণুত্বমার্তবনাশশ্চ; সেবনীচ্ছেদাদ্রুজাপ্রাদুর্ভাবঃ; বস্তিগুদবিদ্ধলক্ষণং প্রাগুক্তমিতি | স্রোতোবিদ্ধং তু প্রত্যাখ্যাযোপচরেত্, উদ্ধৃতশল্যং তু ক্ষতবিধানেনোপচরেত্ ||১২||

অত ঊর্ধ্বমিত্যাদি| মূলস্য স্থূলত্বেন তদ্বিদ্ধলক্ষণস্যৈব সাধ্যাসাধ্যপরিচ্ছেদকত্বাত্তদ্বিদ্ধলক্ষণব্যাখ্যানমেব প্রতিজ্ঞাতম্| স্বরূপং তু “স্বধাতুসমবর্ণানি বৃত্তস্থূলান্যণূনি চ| স্রোতাংসি দীর্ঘাণ্যাকৃত্যা প্রতানসদৃশানি চ” (চ.বি.৫) ইতি তন্ত্রান্তরাজ্জ্ঞেযম্| তান্যেব বিবৃণ্বন্নাহ- তানি ত্বিত্যাদি| প্রাণাদীনামার্তবান্তানামেকাদশানাং প্রত্যেকং বহনে দ্বে দ্বে স্রোতসী| অস্থিমজ্জস্বেদবাহিষু স্রোতঃসু সত্স্বপ্যনধিকারঃ; কথং? তত্রাস্থিবহানাং সকলানামেব মেদো মূলং, মজ্জবহানাং চ তেষাং সকলান্যেবাস্থীনি সকলশরীরগতানি, ন চ সকলশরীরগতবিদ্ধলক্ষণং সাধ্যাদিজ্ঞাননিশ্চাযকম্, এবং স্বেদবহানামপি কেবলং মেদো মূলমিতি পূর্বেণৈব সমানম্, অতঃ শল্যতন্ত্রে তেষাং মূলবিদ্ধলক্ষণানধিকারঃ| অমুমেবার্থং চেতসি কৃত্বাঽঽহ- যেষ্বধিকার ইতি| ‘শল্যতন্ত্রে’ ইতি শেষঃ, কাযচিকিত্সাযাং তু স্রোতোদুষ্টিলক্ষণং বাচ্যং, তেন সকলাঙ্গগতানামপি স্রোতসাং কাযচিকিত্সাযামধিকারঃ| শল্যতন্ত্রাধিকারিষু নিযতদেশস্থিতেষু বিদ্ধেষু বেদনাবিশেষস্য সাধ্যাদিজ্ঞাননিশ্চাযকত্বমিতি কাযচিকিত্সাধিকারিণাং স্রোতসাং কৃত্স্নশরীরগতত্বেন সূক্ষ্মাণামাশ্রিতস্য বেদনাবিশেষস্যাতিসূক্ষ্মত্বান্ন সাধ্যাদিজ্ঞাননিশ্চাযকত্বমিতি তেষামনধিকারঃ| পরমতমাহ- একেষাং বহূনীতি|- একেষামাচার্যাণাং মতে বহূনি স্রোতাংসি, ‘তান্যত্রানধিকৃতানি’ ইতি শেষঃ| এতেষাং বিশেষা বহব ইতি এতেষাং পূর্বোক্তানাং প্রাণাদিবহানাং স্বতন্ত্রে দ্বাবিংশতিসঙ্খ্যোপেতানাং স্রোতসাং, বিশেষা ভেদাঃ| তত্র প্রাণবহে ইত্যাদি| আক্রোশনমার্তস্বরৈ রোদনং, বিনমনং বিশেষেণ নমনম্| ত্বক্শব্দেন রসোঽত্র, তাত্স্থ্যাত্| শুক্রবহস্রোতঃসন্নিহিতসেবনীচ্ছেদনলক্ষণমশ্মরীচিকিত্সিতে বস্তিপ্রসঙ্গেনোক্তমত্রাসূত্রিতমপি| মূত্রপুরীষস্রোতোমূলবস্তিগুদবিদ্ধলক্ষণমতিদেশেন সুখপ্রতিপত্তযে নির্দিশন্নাহ- বস্তীত্যাদি| বস্তিবিদ্ধলক্ষণং ‘তত্র বিদ্ধস্যানদ্ধবস্তিতা’ ইত্যাদি; গুদবিদ্ধলক্ষণং চ ‘তত্র বিদ্ধস্যানাহ’ ইত্যাদি| ইদানীং চিকিত্সাসূত্রং নির্দিশন্নাহ- স্রোতোবিদ্ধমিত্যাদি| উপচরেদিতি ‘শল্যোদ্ধরণপ্রকারেণ’ ইতি শেষঃ| উদ্ধৃতশল্যমিতি অত্রাপি প্রত্যাখ্যাযেতি যোজনীযম্||১২||

Adhikarana 10 (13) · Śloka 13

ভবতি চাত্র- মূলাত্ খাদন্তরং দেহে প্রসৃতং ত্বভিবাহি যত্ | স্ত্রোতস্তদিতি বিজ্ঞেযং সিরাধমনিবর্জিতম্ ||১৩||

মূলাদিত্যাদি|- মূলাত্ খাদিতি হৃদযাদিচ্ছিদ্রাত্, প্রসৃতম্ অভিবহনশীলং, যদন্তরম্ অবকাশঃ, তত্ স্রোতো বিজ্ঞেযম্||১৩||

Adhikarana puShpikA · Śloka 9

ইতি সুশ্রুতসংহিতাযাং শারীরস্থানে ধমনীব্যাকরণশারীরং নাম নবমোঽধ্যাযঃ ||৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে নবমোঽধ্যাযঃ||৯||