Adhikarana 1 (1-2) · Śloka 2
অথাতো গর্ভাবক্রান্তিং শারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो गर्भावक्रान्तिं शारीरं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
শুদ্ধশুক্রার্তবসম্ভবত্বাদ্গর্ভস্য শুক্রশোণিতশুদ্ধ্যনন্তরং গর্ভাবক্রমণং যুজ্যত ইত্যাহ- অথেত্যাদি| অত্র হি শুক্রশোণিতং গর্ভাশযস্থমাত্মপ্রকৃতিবিকারসম্মূর্চ্ছিতং গর্ভ ইত্যুচ্যতে, তস্যাবক্রান্তিরুপগমনমবতরণমিতি যাবদ্ গর্ভাবক্রান্তিঃ, সাঽস্মিন্নস্তীতি পূর্ববচ্ছপ্রত্যযলুকৌ||১-২||
Adhikarana 2 (3) · Śloka 3
সৌম্যং শুক্রমার্তবমাগ্নেযমিতরেষামপ্যত্র ভূতানাং সান্নিধ্যমস্ত্যণুনা বিশেষেণ, পরস্পরোপকারাত্ (পরস্পরানুগ্রহাত্,) পরস্পরানুপ্রবেশাচ্চ ||৩||
सौम्यं शुक्रमार्तवमाग्नेयमितरेषामप्यत्र भूतानां सान्निध्यमस्त्यणुना विशेषेण, परस्परोपकारात् (परस्परानुग्रहात्,) परस्परानुप्रवेशाच्च ||३||
🔊 Audio coming soon
গর্ভস্য শুক্রার্তবমূলত্বাচ্ছুক্রার্তবযোঃ স্বরূপমাহ- সৌম্যমিত্যাদি| সৌম্যং সোমগুণভূযিষ্ঠম্| আগ্নেযমগ্নিগুণভূযিষ্ঠম্| ননু, সর্বং পাঞ্চভৌতিকং তত্ কথং ভূতদ্বযেনারম্ভ ইত্যাহ- ইতরেষামিত্যাদি| ইতরেষাং পৃথিবীবায্বাকাশানাম্, অণুনা বিশেষেণ সূক্ষ্মপ্রকারেণ, সান্নিধ্যমাশ্রিতত্বমস্তি| কুত ইত্যাহ- পরস্পরোপকারাদিত্যাদি| ভূজলানলানিলাকাশানাং ধারণসংহননপরিণামব্যূহাবকাশদানৈঃ পরস্পরমুপকারস্তস্মাত্; যথা- পার্থিবদ্রব্যে পৃথিব্যাখ্যং ভূতং বলবদেকং শেষাণি সলিলাদীনি চত্বারি দুর্বলান্যাশ্রযদানেনানুগৃহ্ণাতি, দ্রব্যান্তরে তু সলিলাদিভিরপি চতুর্ভির্বলবদ্ভির্দুর্বলং পৃথিবীভূতমনুগৃহ্যতে, এবংবিধাত্ পরস্পরানুগ্রহাচ্চ| পরস্পরানুপ্রবেশশ্চ ‘অন্যোন্যানুপ্রবিষ্টানি সর্বাণ্যেতানি নির্দিশেত্’ (শা.১) ইত্যনেন প্রাগেব প্রতিপাদিতস্তস্মাত্||৩||
Adhikarana 3 (4) · Śloka 4
তত্র স্ত্রীপুংসযোঃ সংযোগে তেজঃ শরীরাদ্বাযুরুদীরযতি, ততস্তেজোনিলসন্নিপাতাচ্ছুক্রং চ্যুতং যোনিমভিপ্রতিপদ্যতে সংসৃজ্যতে চার্তবেন, ততোঽগ্নীষোমসংযোগাত্ সংসৃজ্যমানো গর্ভাশযমনুপ্রতিপদ্যতে ক্ষেত্রজ্ঞো বেদযিতা স্প্রষ্টা ঘ্রাতা দ্রষ্টা শ্রোতা রসযিতা পুরুষঃ স্রষ্টা গন্তা সাক্ষী ধাতা বক্তা যঃ কোঽসাবিত্যেবমাদিভিঃ পর্যাযবাচকৈর্নামভিরভিধীযতে দৈবসংযোগাদক্ষযোঽব্যযোঽচিন্ত্যো ভূতাত্মনা সহান্বক্ষং সত্ত্বরজস্তমোভির্দৈবাসুরৈরপরৈশ্চ ভাবৈর্বাযুনাঽভিপ্রের্যমাণো গর্ভাশযমনুপ্রবিশ্যাবতিষ্ঠতে ||৪||
तत्र स्त्रीपुंसयोः संयोगे तेजः शरीराद्वायुरुदीरयति, ततस्तेजोनिलसन्निपाताच्छुक्रं च्युतं योनिमभिप्रतिपद्यते संसृज्यते चार्तवेन, ततोऽग्नीषोमसंयोगात् संसृज्यमानो गर्भाशयमनुप्रतिपद्यते क्षेत्रज्ञो वेदयिता स्प्रष्टा घ्राता द्रष्टा श्रोता रसयिता पुरुषः स्रष्टा गन्ता साक्षी धाता वक्ता यः कोऽसावित्येवमादिभिः पर्यायवाचकैर्नामभिरभिधीयते दैवसंयोगादक्षयोऽव्ययोऽचिन्त्यो भूतात्मना सहान्वक्षं सत्त्वरजस्तमोभिर्दैवासुरैरपरैश्च भावैर्वायुनाऽभिप्रेर्यमाणो गर्भाशयमनुप्रविश्यावतिष्ठते ||४||
🔊 Audio coming soon
ইদানীং শুক্রার্তবযোঃ স্বরূপমভিধায গর্ভাবতরণক্রিযামাহ- তত্রেত্যাদি| তত্রেতি বাক্যোপক্রমে| সংযোগে বিশিষ্টস্পর্শেচ্ছাসমারব্ধপ্রযোগে| তেজঃ স্ত্রীপুরুষেন্দ্রিযদ্বযসঙ্ঘর্ষজ ঊষ্মা; তং বাযুরুদীরযতি উত্কটং করোতি| ততস্তদনন্তরং তেজোঽনিলসন্নিপাতাচ্ছুক্রং চ্যুতমিতি সুরতলক্ষণব্যাযামজোষ্মবিদ্রুতমনিলাচ্চ্যুতমিত্যর্থঃ| যোনিমভিপ্রতিপদ্যত ইতি যোনিমভিতঃ সর্বতঃ প্রতিপদ্যতে, তেন যোনেস্তৃতীযাবর্তাবস্থিতগর্ভশয্যাং প্রতিপদ্যত ইত্যর্থঃ| তত্র প্রাগুক্তপ্রকারবিসর্পিতেনার্তবেন চ সংসৃজ্যতে| তস্য শুক্রার্তবস্য পঞ্চাত্মকস্য ষষ্ঠচেতনাধাতুসংযোগেনৈব গর্ভত্বমিতি তত্সংযোগং দর্শযন্নাহ- তত ইত্যাদি| ততস্তস্মাদগ্নীষোমসংযোগাত্| অন্বক্ষং তত্ক্ষণমেব ন ক্ষণান্তরে| ক্ষেত্রজ্ঞঃ পঞ্চমহাভূতশরীরক্ষেত্রবিত্ কর্মপুরুষঃ, গর্ভাশযং গর্ভশয্যাম্ , অনুপ্রতিপদ্যতে প্রাপ্নোতি| কেন সহ? ভূতাত্মনা ভৌতিকশরীরেণ সূক্ষ্মেণ লিঙ্গশরীরেণেত্যর্থঃ| কীদৃশঃ? সংসৃজ্যমানঃ| কৈঃ? সত্ত্বরজস্তমোভিঃ প্রাকৃতৈর্গুণৈঃ| পুনঃ কিংবিশিষ্টঃ? দেবাসুরৈরপরৈশ্চ ভাবৈর্বাযুনাঽভিপ্রের্যমাণঃ, ভাবঃ সত্ত্বং মন ইত্যর্থঃ; তেন দেবাদীনাং সপ্তানাং সপ্তভিঃ সাত্ত্বিকৈর্ভাবৈঃ, অসুরাদীনাং ষণ্ণাং ষড্ভী রাজসৈর্ভাবৈঃ, অপরৈশ্চ পশ্বাদিজৈস্ত্রিভিস্তামসৈর্ভাবৈঃ| সত্ত্বস্য চ মনঃপর্যাযস্য প্রেরকত্বং তন্ত্রান্তরে প্রতিপাদিতম্| তদুক্তং চরকে- “অস্তি খলু সত্ত্বমৌপপাদুকং যজ্জীবস্পৃক্ শরীরেণাভিসম্বধ্নাতি” (চ.শা.৩) ইতি| ননু, কঃ ক্ষেত্রজ্ঞো য এবংবিধঃ সন্ গর্ভাশযমনুপ্রতিপদ্যত ইত্যাহ- যঃ কোঽসাবিত্যেবমাদিভিঃ পর্যাযবাচকৈর্নামভিরভিধীযতে ‘মহর্ষিভিঃ’ ইতি শেষঃ| ‘যঃ কঃ’ ইতি সর্বনামপদদ্বযং তস্য দুর্বোধত্বজ্ঞাপনার্থম্| অসাবিতি সর্বনামপদং তস্য সর্বগতত্বং সদ্গুরূপদিষ্টত্বং চ জ্ঞাপযতি| ইত্যেবমাদিভিঃ কৈর্নামভিরিত্যাহ- বেদযিতেত্যাদি| বেদযিতা মনসো জ্ঞাপযিতা| ইন্দ্রিযাণাং চ পঞ্চানামযমেব জ্ঞাপক ইতি দর্শযন্নাহ- স্প্রষ্টেত্যাদি| স্প্রষ্টা স্পর্শনেন্দ্রিযস্য স্পর্শবোধহেতুত্বাত্| এবং ঘ্রাতেত্যাদিষ্বপি যোজ্যম্| অস্য কর্মপুরুষস্যানাধারাং স্থিতিং নিরাকুর্বন্নাহ- পুরুষ ইতি; পুরি ভৌতিকে শরীরে বসতীতি পুরুষঃ| তস্য সুকৃতিফলভোক্তৃত্বং দর্শযন্নাহ- স্রষ্টেত্যাদি; স্রষ্টা চেতনাযোগেন, তস্যৈব কর্তৃত্বাত্| তদুক্তং চরকে,- “চেতনাবান্ যতশ্চাত্মা ততঃ কর্তা নিরুচ্যতে” (চ.শা.১)- ইতি| গন্তা সংসরণশীলঃ| তথা সাক্ষী জ্ঞত্বাত্| ধাতা শরীরাদিসংযোগধারণহেতুত্বাত্| বক্তা বদত্যযমেব, এতেন কর্মেন্দ্রিযাণামপি বচনাদানবিহরণোত্সর্গানন্দেষ্বপ্যযমেব হেতুঃ| যদি বেদযিতেত্যাদি স্বরূপোপেতঃ পরমর্ষিভিরভিধীযতে তত্ কথং ক্লেশকারিণি গর্ভাশযে তিষ্ঠতীত্যাশঙ্ক্যাহ- দৈবসংযোগাদিতি; দৈবস্য প্রাক্তনজন্মকর্মণো ধর্মাধর্মাভিধানস্য সম্বন্ধাত্| অক্ষযোঽব্যযোঽচিন্ত্যোঽপি গর্ভাশযমনুপ্রবিশ্যাবতিষ্ঠতে গর্ভাশযে কর্মবশাদ্গর্ভভাবেনাবস্থিতিং করোতি||৪||
Adhikarana 4 (5) · Śloka 5
তত্র শুক্রবাহুল্যাত্ পুমান্, আর্তববাহুল্যাত্ স্ত্রী, সাম্যাদুভযোর্নপুংসকমিতি ||৫||
तत्र शुक्रबाहुल्यात् पुमान्, आर्तवबाहुल्यात् स्त्री, साम्यादुभयोर्नपुंसकमिति ||५||
🔊 Audio coming soon
কথমবিশিষ্টকারণাদ্বিশিষ্টকার্যোত্পাদ ইত্যাহ- তত্রেত্যাদি| ননু, ‘শুক্রবাহুল্যাত্ পুমান্’ ইতি কস্মাদুক্তং? যত আর্তবস্যৈব বাহুল্যম্; উক্তং হি- ‘আর্তবং হি চতুরঞ্জলিপ্রমাণং, শুক্রং তু প্রসৃতিমাত্রম্’- ইতি, নৈবং, যাবন্মাত্রমার্তবং গর্ভাশযাবস্থিতং মলরহিতং গর্ভজননং তাবদেব গ্রাহ্যম্; অথবা স্বপ্রমাণাপেক্ষযা শুক্রশোণিতযোর্বাহুল্যমল্পত্বং চাভিপ্রেতম্| শুক্রং তু কদাচিদত্যন্তহর্ষবশাদ্বহু স্রবতি কদাচিদ্বৈমনস্যাদল্পমিতি| অন্যে ত্বাচার্যা এবং ব্রুবন্তি- শুক্রার্তবযোর্ন্যূনাধিকসমত্বং বীর্যেণ ভবতি| যদ্যেবং তর্হি প্রাগুক্তং পুত্রীযকরণং নিরর্থকং? নৈতদস্তি, কিন্তু শ্রেযসা কর্মণা বিনা নৈব রূপাদিসঙ্গমিনো ভবন্তি পুত্রাঃ; উক্তং হি,- “এবং জাতা রূপবন্তঃ সত্ত্ববন্তশ্চিরাযুষঃ| ভবন্ত্যৃণস্য মোক্তারঃ সত্পুত্রাঃ পুত্রিণে হিতাঃ” (শা.২) ইতি; তস্মাত্ পুত্রীযকরণং সার্থকমেব||৫||
Adhikarana 5 (6) · Śloka 6
ঋতুস্তু দ্বাদশরাত্রং ভবতি দৃষ্টার্তবঃ; অদৃষ্টার্তবাঽপ্যস্তীত্যেকে ভাষন্তে ||৬||
ऋतुस्तु द्वादशरात्रं भवति दृष्टार्तवः; अदृष्टार्तवाऽप्यस्तीत्येके भाषन्ते ||६||
🔊 Audio coming soon
স্ত্রীপুংসযোঃ সংযোগো যস্মিন্ কালেঽপত্যফলপ্রদো ভবতি তং কালবিশেষমাহ- ঋতুরিত্যাদি| দৃষ্টমার্তবং যস্মিন্ কালে স দৃষ্টার্তবঃ কালঃ ঋতুঃ, স চ দ্বাদশরাত্রং ভবতি| দ্বাদশরাত্রমিতি ষোডশদিনেষু মধ্যে আদ্যং দিনত্রযমন্তিমং চ ষোডশং যোনিসঙ্কোচদিনং ন গণনীযম্| একীযমতমাহ- অদৃষ্টেত্যাদি||৬||
Adhikarana 6 (7-8) · Śloka 8
ভবন্তি চাত্র- পীনপ্রসন্নবদনাং প্রক্লিন্নাত্মমুখদ্বিজাম্ | নরকামাং প্রিযকথাং স্রস্তকুক্ষ্যক্ষিমূর্ধজাম্ ||৭|| স্ফুরদ্ভুজকুচশ্রোণিনাভ্যূরুজঘনস্ফিচাম্ | হর্ষৌত্সুক্যপরাং চাপি বিদ্যাদৃতুমতীমিতি ||৮||
भवन्ति चात्र- पीनप्रसन्नवदनां प्रक्लिन्नात्ममुखद्विजाम् | नरकामां प्रियकथां स्रस्तकुक्ष्यक्षिमूर्धजाम् ||७|| स्फुरद्भुजकुचश्रोणिनाभ्यूरुजघनस्फिचाम् | हर्षौत्सुक्यपरां चापि विद्यादृतुमतीमिति ||८||
🔊 Audio coming soon
অদৃষ্টার্তবাযা ঋতুমত্যা লক্ষণমাহ- পীনেত্যাদি| প্রক্লিন্না প্রকর্ষেণ আর্দ্রতামাপন্না আত্মাদযো যস্যাঃ; আত্মা দেহঃ; দেহত্বেঽপ্যত্যন্তক্লেদজ্ঞাপনায মুখস্য পুনরুক্তিঃ; দ্বিজশব্দেন দ্বিজসমীপবর্তিনো দন্তবেষ্টকা অভিপ্রেতাঃ, দ্বিজানাং প্রক্লেদাসম্ভবাত্| হর্ষৌত্সুক্যং রতৌ সাতিশযোঽভিলাষঃ||৭-৮||
Adhikarana 7 (9) · Śloka 9
নিযতং দিবসেঽতীতে সঙ্কুচত্যম্বুজং যথা | ঋতৌ ব্যতীতে নার্যাস্তু যোনিঃ সংব্রিযতে তথা ||৯||
नियतं दिवसेऽतीते सङ्कुचत्यम्बुजं यथा | ऋतौ व्यतीते नार्यास्तु योनिः संव्रियते तथा ||९||
🔊 Audio coming soon
যোনিসঙ্কোচেন বীজস্য গর্ভাশযাপ্রাপ্তিং দর্শযন্নাহ- নিযতমিত্যাদি| যোনির্গর্ভাশযঃ, সংব্রিযতে সঙ্কোচং যাতি| অত এব বীজং ন প্রতীচ্ছতি ||৯||
Adhikarana 8 (10) · Śloka 10
মাসেনোপচিতং কালে ধমনীভ্যাং তদার্তবম্ | ঈষত্কৃষ্ণং বিবর্ণং চ বাযুর্যোনিমুখং নযেত্ ||১০||
मासेनोपचितं काले धमनीभ्यां तदार्तवम् | ईषत्कृष्णं विवर्णं च वायुर्योनिमुखं नयेत् ||१०||
🔊 Audio coming soon
মাসেনেত্যাদি| কালে দ্বাদশবর্ষাদৌ ষষ্টেশ্চার্বাক্, অন্যে পঞ্চাশদ্বর্ষাণি যাবত্||১০||
Adhikarana 9 (11) · Śloka 11
তদ্বর্ষাদ্দ্বাদশাত্ কালে বর্তমানমসৃক্ পুনঃ | জরাপক্বশরীরাণাং যাতি পঞ্চাশতঃ ক্ষযম্ ||১১||
तद्वर्षाद्द्वादशात् काले वर्तमानमसृक् पुनः | जरापक्वशरीराणां याति पञ्चाशतः क्षयम् ||११||
🔊 Audio coming soon
তমেব কালং নির্দিশন্নাহ- তদিত্যাদি| তদার্তবং দ্বাদশবর্ষাদূর্ধ্বং বর্ধমানশরীরধাতূনাং যোষিতাং কালে মাসি মাসি প্রবর্তমানং, তাসামেব পঞ্চাশত ঊর্ধ্বং জরাপচীযমানশরীরধাতূনাং ক্ষযং যাতি, ‘শনৈঃ’ ইতি শেষঃ||১১||
Adhikarana 10 (12) · Śloka 12
যুগ্মেষু তু পুমান্ প্রোক্তো দিবসেষ্বন্যথাঽবলা | পুষ্পকালে শুচিস্তস্মাদপত্যার্থো স্ত্রিযং ব্রজেত্ ||১২||
युग्मेषु तु पुमान् प्रोक्तो दिवसेष्वन्यथाऽबला | पुष्पकाले शुचिस्तस्मादपत्यार्थो स्त्रियं व्रजेत् ||१२||
🔊 Audio coming soon
তস্মিন্নৃতুকালেঽপি সমবিষমদিবসযোঃ পুংস্ত্রিযোর্জন্ম দর্শযন্নাহ- যুগ্মেষ্বিত্যাদি| যুগ্মেষ্বিতি সমেষু দিবসেষু| অন্যথেতি বিষমেষু দিবসেষু| শুচিঃ কাযশুচিঃ| ননু, প্রাগুক্তং শুক্রবাহুল্যাত্ পুমানার্তববাহুল্যাত্ স্ত্রীতি কিমযং বিকল্প উত সমুচ্চয ইতি? সমুচ্চযোঽযং, তদুক্তং বিদেহ- “যুগ্মেষু তু দিনেষ্বাসাং ভবত্যল্পতরং রজঃ| সংযোগং তত্র যা গচ্ছেত্ সা পুমাংসং প্রসূযতে|| অযুগ্মেষু দিনেষ্বাসাং ভবেদ্বহুতরং রজঃ| সংযোগং তত্র যা গচ্ছেত্ সা তু কন্যাং প্রসূযতে”- ইতি| তথা ভোজেঽপি- “অযুগ্মে স্ত্রী পুমান্ যুগ্মে সন্ধ্যযোস্তু নপুংসকম্| শুক্রাধিকত্বাত্ পুরুষঃ প্রমদা রজসোঽধিকাত্|| শুক্রশোণিতযোঃ সাম্যাত্তৃতীযা প্রকৃতির্ভবেত্”- ইতি||১২||
Adhikarana 11 (13) · Śloka 13
তত্র সদ্যোগৃহীতগর্ভাযা লিঙ্গানি- শ্রমো গ্লানিঃ পিপাসা সক্থিসদনং শুক্রশোণিতযোরববন্ধঃ স্ফুরণং চ যোনেঃ ||১৩||
तत्र सद्योगृहीतगर्भाया लिङ्गानि- श्रमो ग्लानिः पिपासा सक्थिसदनं शुक्रशोणितयोरवबन्धः स्फुरणं च योनेः ||१३||
🔊 Audio coming soon
পরিহার্যপরিহারার্থং সদ্যোগৃহীতগর্ভলক্ষণং নির্দিশন্নাহ- তত্র সদ্যোগৃহীতেত্যাদি| শ্রমঃ খেদঃ| গ্লানিঃ ক্লমঃ| সক্থিসদনমূরুগ্লানিঃ| অববন্ধোঽপ্রবৃত্তিঃ| স্ফুরণং কম্পনম্||১৩||
Adhikarana 12 (14-15) · Śloka 15
স্তনযোঃ কৃষ্ণমুখতা রোমরাজ্যুদ্গমস্তথা | অক্ষিপক্ষ্মাণি চাপ্যস্যাঃ সম্মীল্যন্তে বিশেষতঃ ||১৪|| অকামতশ্ছর্দযতি গন্ধাদুদ্বিজতে শুভাত্ | প্রসেকঃ সদনং চাপি গর্ভিণ্যা লিঙ্গমুচ্যতে ||১৫||
स्तनयोः कृष्णमुखता रोमराज्युद्गमस्तथा | अक्षिपक्ष्माणि चाप्यस्याः सम्मील्यन्ते विशेषतः ||१४|| अकामतश्छर्दयति गन्धादुद्विजते शुभात् | प्रसेकः सदनं चापि गर्भिण्या लिङ्गमुच्यते ||१५||
🔊 Audio coming soon
উত্তরকালীনং গৃহীতগর্ভাযা লক্ষণমাহ- স্তনযোরিত্যাদি| প্রসেকঃ থূত্করণম্||১৪-১৫||
Adhikarana 13 (16-17) · Śloka 17
তদা প্রভৃতি ব্যবাযং ব্যাযামমতিতর্পণমতিকর্শনং দিবাস্বপ্নং রাত্রিজাগরণং শোকং যানারোহণং ভযমুত্কুটুকাসনং চৈকান্ততঃ স্নেহাদিক্রিযাং শোণিতমোক্ষণং চাকালে বেগবিধারণং চ ন সেবেত ||১৬|| দোষাভিঘাতৈর্গর্ভিণ্যা যো যো ভাগঃ প্রপীড্যতে | স স ভাগঃ শিশোস্তস্য গর্ভস্থস্য প্রপীড্যতে ||১৭||
तदा प्रभृति व्यवायं व्यायाममतितर्पणमतिकर्शनं दिवास्वप्नं रात्रिजागरणं शोकं यानारोहणं भयमुत्कुटुकासनं चैकान्ततः स्नेहादिक्रियां शोणितमोक्षणं चाकाले वेगविधारणं च न सेवेत ||१६|| दोषाभिघातैर्गर्भिण्या यो यो भागः प्रपीड्यते | स स भागः शिशोस्तस्य गर्भस्थस्य प्रपीड्यते ||१७||
🔊 Audio coming soon
তদেত্যাদি| অকালশব্দ এতজ্জ্ঞাপযতি- কালেঽষ্টমে মাসি গর্ভিণ্যা অপি স্নেহাদিক্রিযান্তর্গতে আস্থাপনানুবাসনে দেযে||১৬-১৭||
Adhikarana 14 (18) · Śloka 18
তত্র প্রথমে মাসি কললং জাযতে; দ্বিতীযে শীতোষ্মানিলৈরভিপ্রপচ্যমানানাং মহাভূতানাং সঙ্ঘাতো ঘনঃ সঞ্জাযতে, যদি পিণ্ডঃ পুমান্, স্ত্রী চেত্ পেশী, নপুংসকং চেদর্বুদমিতি; তৃতীযে হস্তপাদশিরসাং পঞ্চপিণ্ডকা নির্বর্তন্তেঽঙ্গপ্রত্যঙ্গবিভাগশ্চ সূক্ষ্মো ভবতি; চতুর্থে সর্বাঙ্গপ্রত্যঙ্গবিভাগঃ প্রব্যক্তো ভবতি, গর্ভহৃদযপ্রব্যক্তিভাবাচ্চেতনাধাতুরভিব্যক্তো ভবতি, কস্মাত্? তত্স্থানত্বাত্ | তস্মাদ্গর্ভশ্চতুর্থে মাস্যভিপ্রাযমিন্দ্রিযার্থেষু করোতি, দ্বিহৃদযাং চ নারীং দৌহৃদিনীমাচক্ষতে | দৌহৃদবিমাননাত্ কুব্জং কুণিং খঞ্জং জডং বামনং বিকৃতাক্ষমনক্ষং বা নারী সুতং জনযতি, তস্মাত্ সা যদ্যদিচ্ছেত্তত্তস্যৈ দাপযেত্, লব্ধদৌহৃদা হি বীর্যবন্তং চিরাযুষং চ পুত্রং জনযতি ||১৮||
तत्र प्रथमे मासि कललं जायते; द्वितीये शीतोष्मानिलैरभिप्रपच्यमानानां महाभूतानां सङ्घातो घनः सञ्जायते, यदि पिण्डः पुमान्, स्त्री चेत् पेशी, नपुंसकं चेदर्बुदमिति; तृतीये हस्तपादशिरसां पञ्चपिण्डका निर्वर्तन्तेऽङ्गप्रत्यङ्गविभागश्च सूक्ष्मो भवति; चतुर्थे सर्वाङ्गप्रत्यङ्गविभागः प्रव्यक्तो भवति, गर्भहृदयप्रव्यक्तिभावाच्चेतनाधातुरभिव्यक्तो भवति, कस्मात्? तत्स्थानत्वात् | तस्माद्गर्भश्चतुर्थे मास्यभिप्रायमिन्द्रियार्थेषु करोति, द्विहृदयां च नारीं दौहृदिनीमाचक्षते | दौहृदविमाननात् कुब्जं कुणिं खञ्जं जडं वामनं विकृताक्षमनक्षं वा नारी सुतं जनयति, तस्मात् सा यद्यदिच्छेत्तत्तस्यै दापयेत्, लब्धदौहृदा हि वीर्यवन्तं चिरायुषं च पुत्रं जनयति ||१८||
🔊 Audio coming soon
তত্রেত্যাদি| কললং সিঙ্ঘাণপ্রখ্যম্| দ্বিতীয ইত্যাদি| শীতঃ শ্লেষ্মা, ঊষ্মা পিত্তং, কফানিলযোরপ্যুষ্মসম্ভবাত্ পরিণামহেতুত্বম্| তদুক্তং চরকে,- “ভৌমাপ্যাগ্নেযবাযব্যাঃ পঞ্চোষ্মাণঃ সনাভসাঃ” (চ.চি.১৫)- ইতি| ঘনঃ কঠিনঃ| যদীত্যাদি| পিণ্ডো বর্তুলাকৃতিঃ, পেশী দীর্ঘাকৃতিঃ, অর্বুদং বর্তুলফলার্ধমিতি| গযী তু ভোজদর্শনাত্ পিণ্ডাদীনামন্যথাঽঽকারং পঠতি| যথা- “চতুরস্রা ভবেত্ পেশী, বৃত্তঃ পিণ্ডো ঘনঃ স্মৃতঃ| শাল্মলীমুকুলাকারমর্বুদং পরিচক্ষতে”- ইতি| তৃতীযে ইত্যাদি| শাখাশ্চতস্রো মূর্ধোরঃপৃষ্ঠোদরাণ্যঙ্গানি চিবুকনাসৌষ্ঠশ্রবণাঙ্গুলিপার্ষ্ণিপ্রভৃতীনি প্রত্যঙ্গানি| চতুর্থে ইত্যাদি| তত্স্থানত্বাত্ হৃদযস্থানত্বাত্| ইন্দ্রিযার্থাঃ শব্দস্পর্শরূপরসগন্ধাঃ| দ্বিহৃদযামিতি দ্বিতীযং হৃদযং যস্যাঃ সা দ্বিহৃদযা, তাম্| দৌহৃদেত্যাদি| কুণিং বিকৃতহস্তম্| তত্র কুব্জাদিষ্ববযবসমুদাযেন্দ্রিযাধিষ্ঠানজো দোষো দৌহৃদবিমাননজনিতো যথাশাস্ত্রমূহ্যঃ||১৮||
Adhikarana 15 (19-21) · Śloka 21
ভবন্তি চাত্র- ইন্দ্রিযার্থাংস্তু যান্ যান্ সা ভোক্তুমিচ্ছতি গর্ভিণী গর্ভাবাধভযাত্তাংস্তান্ ভিষগাহৃত্য দাপযেত্ ||১৯|| সা প্রাপ্তদৌহৃদা পুত্রং জনযেত গুণান্বিতম্ | অলব্ধদৌহৃদা গর্ভে লভেতাত্মনি বা ভযম্ ||২০|| যেষু যেষ্বিন্দ্রিযার্থেষু দৌহৃদে বৈ বিমাননা | প্রজাযেত সুতস্যার্তিস্তস্মিংস্তস্মিংস্তথেন্দ্রিযে ||২১||
भवन्ति चात्र- इन्द्रियार्थांस्तु यान् यान् सा भोक्तुमिच्छति गर्भिणी गर्भाबाधभयात्तांस्तान् भिषगाहृत्य दापयेत् ||१९|| सा प्राप्तदौहृदा पुत्रं जनयेत गुणान्वितम् | अलब्धदौहृदा गर्भे लभेतात्मनि वा भयम् ||२०|| येषु येष्विन्द्रियार्थेषु दौहृदे वै विमानना | प्रजायेत सुतस्यार्तिस्तस्मिंस्तस्मिंस्तथेन्द्रिये ||२१||
🔊 Audio coming soon
গদ্যোক্তমেবার্থং পদ্যৈরাহ- ভবন্তীত্যাদি| ভোক্তুমিত্যস্যোপলক্ষণত্বাদ্দ্রষ্টুং শ্রোতুমিত্যাদিকমপি বোদ্ধব্যম্| সা প্রাপ্তেত্যাদি| অলব্ধদৌর্হৃদা অপ্রাপ্তাভিলষিতপদার্থা, গর্ভে গর্ভবিষযে, ভযং লভেত; আত্মনি বা আত্মবিষযে বা ভযং লভেত প্রাপ্নুযাত্| যেষ্বিত্যাদি যেষু যেষ্বিন্দ্রিযার্থেষু শব্দাদিষু, দৌর্হৃদে শ্রদ্ধাযাং, বিমাননা খণ্ডিতত্বং, তস্মিংস্তস্মিংস্তদিন্দ্রিযে তস্য তস্যেন্দ্রিযার্থস্য গ্রাহকে ইন্দ্রিযে, সুতস্যার্তিঃ পীডা প্রজাযতে||১৯-২১||
Adhikarana 16 (22-28) · Śloka 28
রাজসন্দর্শনে যস্যা দৌর্হৃদং জাযতে স্ত্রিযাঃ | অর্থবন্তং মহাভাগং কুমারং সা প্রসূযতে ||২২|| দুকূলপট্টকৌশেযভূষণাদিষু দৌহৃদাত্ | অলঙ্কারৈষিণং পুত্রং ললিতং সা প্রসূযতে ||২৩|| আশ্রমে সংযতাত্মানং ধর্মশীলং প্রসূযতে | দেবতাপ্রতিমাযাং তু প্রসূতে পার্ষদোপমম্ | দর্শনে ব্যালজাতীনাং হিংসাশীলং প্রসূযতে ||২৪|| গোধামাংসাশনে পুত্রং সুষুপ্সুং ধারণাত্মকম্ | গবাং মাংসে তু বলিনং সর্বক্লেশসহং তথা ||২৫|| মাহিষে দৌর্হৃদাচ্ছূরং রক্তাক্ষং লোমসংযুতম্ | বরাহমাংসাত্ স্বপ্নালুং শূরং সঞ্জনযেত্ সুতম্ ||২৬|| মার্গাদ্বিক্রান্তজঙ্ঘালং সদা বনচরং সুতম্ | সৃমরাদ্বিগ্নমনসং নিত্যভীতং চ তৈত্তিরাত্ ||২৭|| অতোঽনুক্তেষু যা নারী সমভিধ্যাতি দৌর্হৃদম্ | শরীরাচারশীলৈঃ সা সমানং জনযিষ্যতি ||২৮||
राजसन्दर्शने यस्या दौर्हृदं जायते स्त्रियाः | अर्थवन्तं महाभागं कुमारं सा प्रसूयते ||२२|| दुकूलपट्टकौशेयभूषणादिषु दौहृदात् | अलङ्कारैषिणं पुत्रं ललितं सा प्रसूयते ||२३|| आश्रमे संयतात्मानं धर्मशीलं प्रसूयते | देवताप्रतिमायां तु प्रसूते पार्षदोपमम् | दर्शने व्यालजातीनां हिंसाशीलं प्रसूयते ||२४|| गोधामांसाशने पुत्रं सुषुप्सुं धारणात्मकम् | गवां मांसे तु बलिनं सर्वक्लेशसहं तथा ||२५|| माहिषे दौर्हृदाच्छूरं रक्ताक्षं लोमसंयुतम् | वराहमांसात् स्वप्नालुं शूरं सञ्जनयेत् सुतम् ||२६|| मार्गाद्विक्रान्तजङ्घालं सदा वनचरं सुतम् | सृमराद्विग्नमनसं नित्यभीतं च तैत्तिरात् ||२७|| अतोऽनुक्तेषु या नारी समभिध्याति दौर्हृदम् | शरीराचारशीलैः सा समानं जनयिष्यति ||२८||
🔊 Audio coming soon
ইদানীং দৌর্হৃদবিশেষৈর্গুণবিশেষাক্রান্তানামপত্যানামুত্পত্তিং সূচযন্নাহ- রাজসন্দর্শনে ইত্যাদি| মহাভাগং মহাপুণ্যবন্তম্| দুকূলেত্যাদি| দুকূলপট্টঃ পট্টবস্ত্রং, কৌশেযং ত্রসরতন্তুজাতম্ | ভূষণানি মুক্তাহারপ্রভৃতীনি| ললিতং শৃঙ্গারচেষ্টাযুক্তম্| ‘দুকূলে পট্টকৌশেযে ভূষণাদিষু’ ইতি কেচিত্ পঠন্তি; তত্র দুকূলং সূক্ষ্মং বস্ত্রং, পট্টং পট্টবস্ত্রম্| আশ্রমে ইত্যাদি| যস্যা আশ্রমে তপস্বিনামধিষ্ঠানে শ্রদ্ধা ভবেত্ সা এবম্ভূতং জনযেদিতি পিণ্ডার্থঃ| সংযতাত্মানং সংযতেন্দ্রিযম্| দেবতাপ্রতিমাযামিত্যাদি| পার্ষদোপমমিতি পার্ষদেষু সভাপুরুষেষূপমা যস্য স তথা তম্| দর্শনে ইত্যাদি| ব্যালা ব্যাঘ্রাদযো হিংস্রাঃ পশবঃ| গোধেত্যাদি| সুষুপ্সুং স্বপ্তুমিচ্ছুম্| ধারণাত্মকং হৃদযগৃহীতবস্তূনামমোচকম্| বরাহমাংসাদিতি ‘অভিলষিতাত্’ ইতি শেষঃ| মার্গাদিত্যাদি মার্গাত্ মৃগমাংসাত্| বিক্রান্তমুদ্যোগিনং, জঙ্ঘালং বেগবন্তম্| সৃমরাদিত্যাদি সৃমরো মহাশূকরঃ, অন্যে মহাশ্বাকারশ্চমরানূকঃ| ‘নিত্যভীতং চ তৈত্তিরাত্’ ইত্যত্র ‘নিত্যং শীলং চ তৈত্তিরাত্’ ইত্যপরে, শীলং শীলবন্তম্| অনুক্তদৌর্হৃদসঙ্গ্রহার্থং শ্লোকমাহ- অতোঽনুক্তেষ্বিত্যাদি| যাদৃশেষু দৌর্হৃদং শ্রদ্ধাং সমভিধ্যাতি চেতসি করোতি, তেন সমানমিত্যর্থঃ||২২-২৮||
Adhikarana 17 (29) · Śloka 29
কর্মণা চোদিতং জন্তোর্ভবিতব্যং পুনর্ভবেত্ | যথা তথা দৈবযোগাদ্দৌর্হৃদং জনযেদ্ধৃদি ||২৯||
कर्मणा चोदितं जन्तोर्भवितव्यं पुनर्भवेत् | यथा तथा दैवयोगाद्दौर्हृदं जनयेद्धृदि ||२९||
🔊 Audio coming soon
কর্মণেত্যাদি| দৈবযোগাদ্দৌর্হৃদং হৃদি তথা জনযেত্, যথা পুনর্জন্তোঃ কর্মণা চোদিতং প্রেরিতং ভবিতব্যং ভবেত্||২৯||
Adhikarana 18 (30) · Śloka 30
পঞ্চমে মনঃ প্রতিবুদ্ধতরং ভবতি, ষষ্ঠে বুদ্ধিঃ, সপ্তমে সর্বাঙ্গপ্রত্যঙ্গবিভাগঃ প্রব্যক্ততরঃ; অষ্টমেঽস্থিরীভবত্যোজঃ , তত্র জাতশ্চেন্ন জীবেন্নিরোজস্ত্বান্নৈরৃতভাগত্বাচ্চ , ততো বলিং মাংসৌদনমস্মৈ দাপযেত্; নবমদশমৈকাদশদ্বাদশানামন্যতমস্মিঞ্জাযতে, অতোঽন্যথা বিকারী ভবতি ||৩০||
पञ्चमे मनः प्रतिबुद्धतरं भवति, षष्ठे बुद्धिः, सप्तमे सर्वाङ्गप्रत्यङ्गविभागः प्रव्यक्ततरः; अष्टमेऽस्थिरीभवत्योजः , तत्र जातश्चेन्न जीवेन्निरोजस्त्वान्नैरृतभागत्वाच्च , ततो बलिं मांसौदनमस्मै दापयेत्; नवमदशमैकादशद्वादशानामन्यतमस्मिञ्जायते, अतोऽन्यथा विकारी भवति ||३०||
🔊 Audio coming soon
পঞ্চমে ইত্যাদি| প্রতিবুদ্ধতরং জাগর্তীত্যর্থঃ| অষ্টমে ইত্যাদি| ওজোঽশেষধাতুধাম হৃদি স্থিতম্| নৈঋতভাগত্বাত্ রক্ষসামংশত্বাত্, “নৈঋতায ভাগশ্চ বালেষু রুদ্রেণ দত্ত” ইতি কুমারতন্ত্রে প্রতিপাদিতম্| ততস্তস্মাত্ কারণাদষ্টমে মাস্যস্মৈ নৈঋতায বলিং দাপযেত্||৩০||
Adhikarana 19 (31-32) · Śloka 32
মাতুস্তু খলু রসবহাযাং নাড্যাং গর্ভনাভিনাডীপ্রতিবদ্ধা, সাঽস্য মাতুরাহাররসবীর্যমভিবহতি | তেনোপস্নেহেনাস্যাভিবৃদ্ধির্ভবতি | অসঞ্জাতাঙ্গপ্রত্যঙ্গপ্রবিভাগমানিষেকাত্ প্রভৃতি সর্বশরীরাবযবানুসারিণীনাং রসবহানাং তির্যগ্গতানাং ধমনীনামুপস্নেহো জীবযতি ||৩১|| গর্ভস্য খলু সম্ভবতঃ পূর্বং শিরঃ সম্ভবতীত্যাহ শৌনকঃ, শিরোমূলত্বাত্ প্রধানেন্দ্রিযাণাং ; হৃদযমিতি কৃতবীর্যো, বুদ্ধের্মনসশ্চ স্থানত্বাত্; নাভিরিতি পারাশর্যঃ, ততো হি বর্ধতে দেহো দেহিনঃ; পাণিপাদমিতি মার্কণ্ডেযঃ, তন্মূলত্বাচ্চেষ্টাযা গর্ভস্য; মধ্যশরীরমিতি সুভূতির্গৌতমঃ, তন্নিবদ্ধত্বাত্ সর্বগাত্রসম্ভবস্য | তত্তু ন সম্যক্, সর্বাণ্যঙ্গপ্রত্যঙ্গানি যুগপত্ সম্ভবন্তীত্যাহ ধন্বন্তরিঃ, গর্ভস্য সূক্ষ্মত্বান্নোপলভ্যন্তে বংশাঙ্কুরবচ্চূতফলবচ্চ; তদ্যথা- চূতফলে পরিপক্বে কেশরমাংসাস্থিমজ্জানঃ পৃথক্ পৃথগ্দৃশ্যন্তে কালপ্রকর্ষাত্, তান্যেব তরুণে নোপলভ্যন্তে সূক্ষ্মত্বাত্; তেষাং সূক্ষ্মাণাং কেশরাদীনাং কালঃ প্রব্যক্ততাং করোতি; এতেনৈব বংশাঙ্কুরোঽপি ব্যাখ্যাতঃ | এবং গর্ভস্য তারুণ্যে সর্বেষ্বঙ্গপ্রত্যঙ্গেষু সত্স্বপি সৌক্ষ্ম্যাদনুপলব্ধিঃ, তান্যেব কালপ্রকর্ষাত্ প্রব্যক্তানি ভবন্তি ||৩২||
मातुस्तु खलु रसवहायां नाड्यां गर्भनाभिनाडीप्रतिबद्धा, साऽस्य मातुराहाररसवीर्यमभिवहति | तेनोपस्नेहेनास्याभिवृद्धिर्भवति | असञ्जाताङ्गप्रत्यङ्गप्रविभागमानिषेकात् प्रभृति सर्वशरीरावयवानुसारिणीनां रसवहानां तिर्यग्गतानां धमनीनामुपस्नेहो जीवयति ||३१|| गर्भस्य खलु सम्भवतः पूर्वं शिरः सम्भवतीत्याह शौनकः, शिरोमूलत्वात् प्रधानेन्द्रियाणां ; हृदयमिति कृतवीर्यो, बुद्धेर्मनसश्च स्थानत्वात्; नाभिरिति पाराशर्यः, ततो हि वर्धते देहो देहिनः; पाणिपादमिति मार्कण्डेयः, तन्मूलत्वाच्चेष्टाया गर्भस्य; मध्यशरीरमिति सुभूतिर्गौतमः, तन्निबद्धत्वात् सर्वगात्रसम्भवस्य | तत्तु न सम्यक्, सर्वाण्यङ्गप्रत्यङ्गानि युगपत् सम्भवन्तीत्याह धन्वन्तरिः, गर्भस्य सूक्ष्मत्वान्नोपलभ्यन्ते वंशाङ्कुरवच्चूतफलवच्च; तद्यथा- चूतफले परिपक्वे केशरमांसास्थिमज्जानः पृथक् पृथग्दृश्यन्ते कालप्रकर्षात्, तान्येव तरुणे नोपलभ्यन्ते सूक्ष्मत्वात्; तेषां सूक्ष्माणां केशरादीनां कालः प्रव्यक्ततां करोति; एतेनैव वंशाङ्कुरोऽपि व्याख्यातः | एवं गर्भस्य तारुण्ये सर्वेष्वङ्गप्रत्यङ्गेषु सत्स्वपि सौक्ष्म्यादनुपलब्धिः, तान्येव कालप्रकर्षात् प्रव्यक्तानि भवन्ति ||३२||
🔊 Audio coming soon
নিরাহারস্যাপি গর্ভস্য বর্তনে হেতুং নির্দিশন্নাহ- মাতুরিত্যাদি| মাতুর্গর্ভিণ্যা রসবহাযাং নাড্যাং গর্ভনাভিনাডী যা প্রতিবদ্ধা সাঽস্য গর্ভস্য মাতৃভুক্তমাহাররসবীর্যমভিবহতি প্রাপযতীত্যর্থঃ| নন্বঙ্গপ্রত্যঙ্গপ্রব্যক্তীভাবে গর্ভনাভিনাডী মাতুরাহাররসবীর্যমভিবহতি, অঙ্গপ্রত্যঙ্গপ্রব্যক্তীভাবাত্তু পূর্বং কথং গর্ভপুষ্টিঃ স্যাদিত্যাহ- অসঞ্জাতাঙ্গপ্রত্যঙ্গবিভাগমিত্যাদি| আনিষেকাত্ প্রভৃতীতি আ সমন্ততো ভাবেন নিষেচনমানিষেকো যোনৌ শুক্রস্য নিষেচনং, তত্প্রভৃতি গর্ভাধানং মর্যাদীকৃত্যেত্যর্থঃ; ধমনীনামুপস্নেহো জীবযতি; যথা- পূর্ণসরঃসলিলোপস্নেহস্তীরজাততরুকদম্বকং জীবযতি তদ্বত্ প্রাণধারণং করোতি| তথাচ ভোজঃ- “গর্ভো রুণদ্ধি স্রোতাংসি রসরক্তবহানি বৈ| রক্তাজ্জরাযুর্ভবতি নাডী চৈব রসাত্মিকা|| সা নাডী গর্ভমাপ্নোতি তযা গর্ভস্য বর্তনম্| যদ্যদশ্নাতি মাতাঽস্য ভোজনং হি চতুর্বিধম্|| তস্মাদন্নাদ্রসীভূতং বীর্যং ত্রেধা প্রবর্ততে| ভাগঃ শরীরং পুষ্ণাতি স্তন্যং ভাগেন বর্ধতে|| গর্ভঃ পুষ্যতি ভাগেন বর্ধতে চ যথাক্রমম্| গর্ভং কুল্যেব কেদারং নাডী প্রীণাতি তর্পিতা-” ইতি||৩১-৩২||
Adhikarana 20 (33) · Śloka 33
তত্র গর্ভস্য পিতৃজমাতৃজরসজাত্মজসত্ত্বজসাত্ম্যজানি শরীরলক্ষণানি ব্যাখ্যাস্যামঃ | গর্ভস্য কেশশ্মশ্রুলোমাস্থিনখদন্তসিরাস্নাযুধমনীরেতঃপ্রভৃতীনি স্থিরাণি পিতৃজানি, মাংসশোণিতমেদোমজ্জহৃন্নাভিযকৃত্প্লীহান্ত্রগুদপ্রভৃতীনি মৃদূনি মাতৃজানি, শরীরোপচযো বলং বর্ণঃ স্থিতির্হানিশ্চ রসজানি, ইন্দ্রিযাণি জ্ঞানং বিজ্ঞানমাযুঃ সুখদুঃখাদিকং চাত্মজানি, সত্ত্বজান্যুত্তরত্র বক্ষ্যামঃ, বীর্যমারোগ্যং বলবর্ণৌ মেধা চ সাত্ম্যজানি ||৩৩||
तत्र गर्भस्य पितृजमातृजरसजात्मजसत्त्वजसात्म्यजानि शरीरलक्षणानि व्याख्यास्यामः | गर्भस्य केशश्मश्रुलोमास्थिनखदन्तसिरास्नायुधमनीरेतःप्रभृतीनि स्थिराणि पितृजानि, मांसशोणितमेदोमज्जहृन्नाभियकृत्प्लीहान्त्रगुदप्रभृतीनि मृदूनि मातृजानि, शरीरोपचयो बलं वर्णः स्थितिर्हानिश्च रसजानि, इन्द्रियाणि ज्ञानं विज्ञानमायुः सुखदुःखादिकं चात्मजानि, सत्त्वजान्युत्तरत्र वक्ष्यामः, वीर्यमारोग्यं बलवर्णौ मेधा च सात्म्यजानि ||३३||
🔊 Audio coming soon
তত্রেত্যাদি| লক্ষ্যন্তে ইতি লক্ষণানি, কর্মণি ল্যুট্প্রত্যযঃ, তেন লক্ষণীযানি জ্ঞাতব্যানীত্যর্থঃ| তান্যেব জ্ঞাতব্যানি পিতৃপ্রভৃতিভ্যঃ কারণেভ্যঃ প্রত্যেকং নির্দিশন্নাহ- গর্ভস্যেত্যাদি| আত্মজানীতি আত্মসন্নিধানজাতানি , ন ত্বাত্মনো জাতানি, আত্মনো নির্বিকারস্য বিকারজনকত্বাভাবাত্ প্রকৃতিভাবানুপপত্তেঃ; স্বাভাবিকপ্রকৃতিভাবে চ মোক্ষানুপপত্তিঃ, তস্য হি তত্স্বভাবত্বে ভাবস্যাপরিত্যাজ্যত্বাদিতি| আদিশব্দান্নানাযোনিজন্মাদিকং চ| সত্ত্বেত্যাদি| উত্তরত্র গর্ভব্যাকরণে||৩৩||
Adhikarana 21 (34) · Śloka 34
তত্র যস্যা দক্ষিণে স্তনে প্রাক্ পযোদর্শনং ভবতি দক্ষিণকুক্ষিমহত্ত্বং চ পূর্বং চ দক্ষিণং সক্থ্যুত্কর্ষতি বাহুল্যাচ্চ পুন্নামধেযেষু দ্রব্যেষু দৌর্হৃদমভিধ্যাযতি স্বপ্নেষু চোপলভতে পদ্মোত্পলকুমুদাম্রাতকাদীনি পুন্নামান্যেব প্রসন্নমুখবর্ণা চ ভবতি তাং ব্রূযাত্ পুত্রমিযং জনযিষ্যতীতি, তদ্বিপর্যযে কন্যাং, যস্যাঃ পার্শ্বদ্বযমবনতং পুরস্তান্নির্গতমুদরং প্রাগভিহিতং চ লক্ষণং চ তস্যা নপুংসকমিতি বিদ্যাত্, যস্যা মধ্যে নিম্নং দ্রোণীভূতমুদরং সা যুগ্মং প্রসূযত ইতি ||৩৪||
तत्र यस्या दक्षिणे स्तने प्राक् पयोदर्शनं भवति दक्षिणकुक्षिमहत्त्वं च पूर्वं च दक्षिणं सक्थ्युत्कर्षति बाहुल्याच्च पुन्नामधेयेषु द्रव्येषु दौर्हृदमभिध्यायति स्वप्नेषु चोपलभते पद्मोत्पलकुमुदाम्रातकादीनि पुन्नामान्येव प्रसन्नमुखवर्णा च भवति तां ब्रूयात् पुत्रमियं जनयिष्यतीति, तद्विपर्यये कन्यां, यस्याः पार्श्वद्वयमवनतं पुरस्तान्निर्गतमुदरं प्रागभिहितं च लक्षणं च तस्या नपुंसकमिति विद्यात्, यस्या मध्ये निम्नं द्रोणीभूतमुदरं सा युग्मं प्रसूयत इति ||३४||
🔊 Audio coming soon
গর্ভস্যাপ্রত্যক্ষস্যাপি স্তন্যদর্শনাদিলক্ষণেন স্ত্রীপুন্নপুংসকলক্ষণানি নির্দিশন্নাহ- তত্রেত্যাদি| প্রসন্নমুখবর্ণা চেত্যত্র চকারাদূর্ধ্বরোমরাজিত্বাদীনি গ্রাহ্যাণি| প্রাগভিহিতং চ লক্ষণমিতি স্ত্রীলক্ষণং পুরুষলক্ষণং চ প্রতিপাদিতং তদ্দ্বযমপি চ ভবতি| যস্যা ইত্যাদি| দ্রোণীভূতং দ্রোণীসদৃশং, দ্রোণী জলক্ষেপণী| অন্যত্রাপ্যুক্তং- “রোমরাজী ভবেন্নিম্না যস্যাঃ সা সূযতে যমৌ”- ইতি||৩৪||
Adhikarana 22 (35) · Śloka 35
ভবন্তি চাত্র- দেবতাব্রাহ্মণপরাঃ শৌচাচারহিতে রতাঃ | মহাগুণান্ প্রসূযন্তে বিপরীতাস্তু নির্গুণান্ ||৩৫||
भवन्ति चात्र- देवताब्राह्मणपराः शौचाचारहिते रताः | महागुणान् प्रसूयन्ते विपरीतास्तु निर्गुणान् ||३५||
🔊 Audio coming soon
কাযবাক্চিত্তগুণবদ্গর্ভপ্রসবজ্ঞানং দর্শযন্নাহ- দেবতেত্যাদি||৩৫||
Adhikarana 23 (36) · Śloka 36
অঙ্গপ্রত্যঙ্গনির্বৃত্তিঃ স্বভাবাদেব জাযতে | অঙ্গপ্রত্যঙ্গনির্বৃত্তৌ যে ভবন্তি গুণাগুণাঃ | তে তে গর্ভস্য বিজ্ঞেযা ধর্মাধর্মনিমিত্তজাঃ ||৩৬||
अङ्गप्रत्यङ्गनिर्वृत्तिः स्वभावादेव जायते | अङ्गप्रत्यङ्गनिर्वृत्तौ ये भवन्ति गुणागुणाः | ते ते गर्भस्य विज्ञेया धर्माधर्मनिमित्तजाः ||३६||
🔊 Audio coming soon
‘স্বভাবমীশ্বরং’ (শা.১) ইত্যাদিশ্লোকেন যা স্বভাবাদঙ্গপ্রত্যঙ্গনির্বৃত্তিঃ সূচিতা তাং প্রতিপাদ্য তন্নির্বৃত্তৌ প্রাক্তনশ্লোকাভিহিতগুণাগুণোপপত্তিং ধর্মাধর্মহেতুতযা নির্দিশন্নাহ- অঙ্গপ্রত্যঙ্গেত্যাদি||৩৬||
Adhikarana puShpikA · Śloka 3
ইতি সুশ্রুতসংহিতাযাং শারীরস্থানে গর্ভাবক্রান্তিশারীরং নাম তৃতীযোঽধ্যাযঃ ||৩||
इति सुश्रुतसंहितायां शारीरस्थाने गर्भावक्रान्तिशारीरं नाम तृतीयोऽध्यायः ||३||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে তৃতীযোঽধ্যাযঃ||৩||