Adhikarana 1 (1-2) · Śloka 2
অথাত আমপক্বৈষণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथात आमपक्वैषणीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| আমশব্দাত্ পচ্যমানোঽপ্যত্র বোদ্ধব্যঃ| আমশ্চ পচ্যমানশ্চ পক্বশ্চ তেষামেষণং বিজ্ঞানং তদ্বিদ্যতে যস্মিন্নধ্যাযে তং তথা||১-২||
Adhikarana 2 (3) · Śloka 3
শোফসমুত্থানা গ্রন্থিবিদ্রধ্যলজীপ্রভৃতযঃ প্রাযেণ ব্যাধযোঽভিহিতা অনেকাকৃতযঃ, তৈর্বিলক্ষণঃ পৃথুর্গ্রথিতঃ সমো বিষমো বা ত্বঙ্মাংসস্থাযী দোষসঙ্ঘাতঃ শরীরৈকদেশোত্থিতঃ শোফ ইত্যুচ্যতে ||৩||
शोफसमुत्थाना ग्रन्थिविद्रध्यलजीप्रभृतयः प्रायेण व्याधयोऽभिहिता अनेकाकृतयः, तैर्विलक्षणः पृथुर्ग्रथितः समो विषमो वा त्वङ्मांसस्थायी दोषसङ्घातः शरीरैकदेशोत्थितः शोफ इत्युच्यते ||३||
🔊 Audio coming soon
শোফসমুত্থানা ইত্যাদি| শোফসমুত্থানা ইতি শোথকারণাঃ, ‘শোফস্যেব সমুত্থানং যেষাম্’ ইত্যন্যে| প্রাযেণেতি বাহুল্যেন, কদাচিদ্ভিন্নসমুত্থানা অপি ভবন্তি| তৈর্বিলক্ষণ ইতি তেভ্যো গ্রন্থ্যাদিভ্যো ব্যাধিভ্যঃ পৃথগিত্যর্থঃ; ‘তৈর্গ্রন্থ্যাদিব্যাধিভিঃ কৃত্বা বিলক্ষণো নানাপ্রকারঃ’ ইত্যন্যে| পৃথুর্বিস্তীর্ণঃ| গ্রথিতো গ্রন্থিরিবোন্নতঃ, ‘জাতবহুগ্রন্থিঃ’ ইত্যন্যে| সমঃ সমসংস্থানঃ, বিষমো বেতি বিষমসংস্থানো বা, এতেন ব্রণশোফস্যাকৃতেরনিযম উক্তঃ| ত্বঙ্মাংসস্থাযীতি এতত্তু প্রাযেণ, কুতঃ? শেষব্রণবস্তুষ্বপি ব্রণশোফস্য সম্ভবাত্| দোষসঙ্ঘাত ইতি একস্য দ্বযোর্বহূনাং বা দোষাণাং সঙ্ঘাতো দোষসঙ্ঘাতঃ; সঙ্ঘাত উচ্ছ্রাযঃ| শরীরৈকদেশোত্থিত ইতি এতেন সর্বসরাদ্ভিন্নত্বং প্রতিপাদযতি||৩||
Adhikarana 3 (4) · Śloka 4
স ষড্বিধো বাতপিত্তকফশোণিতসন্নিপাতাগন্তুনিমিত্তঃ | তস্য দোষরূপব্যঞ্জনৈর্লক্ষণানি ব্যাখ্যাস্যামঃ | তত্র, বাতশোফঃ কৃষ্ণোঽরুণো বা পরুষো মৃদুরনবস্থিতাস্তোদাদযশ্চাত্র বেদনাবিশেষা ভবন্তি; পিত্তশোফঃ পীতো মৃদুঃ সরক্তো বা শীঘ্রানুসার্যোষাদযশ্চাত্র বেদনাবিশেষা ভবন্তি; শ্লেষ্মশ্বযথুঃ পাণ্ডুঃ কঠিনঃ স্নিগ্ধঃ শীতো স্নিগ্ধো মন্দানুসারী কণ্ড্বাদযশ্চাত্র বেদনাবিশেষা ভবন্তি; সর্ববর্ণবেদনঃ সন্নিপাতশ্বযথুঃ; পিত্তবচ্ছোণিতজোঽতিকৃষ্ণশ্চ; পিত্তরক্তলক্ষণ আগন্তুর্লোহিতাবভাসশ্চ ||৪||
स षड्विधो वातपित्तकफशोणितसन्निपातागन्तुनिमित्तः | तस्य दोषरूपव्यञ्जनैर्लक्षणानि व्याख्यास्यामः | तत्र, वातशोफः कृष्णोऽरुणो वा परुषो मृदुरनवस्थितास्तोदादयश्चात्र वेदनाविशेषा भवन्ति; पित्तशोफः पीतो मृदुः सरक्तो वा शीघ्रानुसार्योषादयश्चात्र वेदनाविशेषा भवन्ति; श्लेष्मश्वयथुः पाण्डुः कठिनः स्निग्धः शीतो स्निग्धो मन्दानुसारी कण्ड्वादयश्चात्र वेदनाविशेषा भवन्ति; सर्ववर्णवेदनः सन्निपातश्वयथुः; पित्तवच्छोणितजोऽतिकृष्णश्च; पित्तरक्तलक्षण आगन्तुर्लोहितावभासश्च ||४||
🔊 Audio coming soon
স ইত্যাদি| তস্য ব্রণশোফস্য| দোষরূপব্যঞ্জনৈরিতি বাতাদিরূপৈর্বাতাদিলক্ষণৈশ্চেত্যর্থঃ; ‘দোষরূপব্যঞ্জনৈঃ দোষাণাং বাতাদীনাং রূপাণ্যাকৃতযো ব্যজ্যন্ত এভিরিতি ব্যঞ্জনানি’ ইত্যন্যে| তত্রেত্যাদি| অনবস্থিতঃ চলঃ| তোদাদযশ্চেতি আদিশব্দাদ্ভেদনচ্ছেদনাদযঃ| পিত্তশোফ ইত্যাদি| ওষাদযশ্চেতি আদিশব্দাচ্চোষপরিদাহধূমাযনানি গৃহ্যন্তে| শ্লেষ্মশোফঃ পাণ্ডুরিত্যাদি| কণ্ড্বাদযশ্চেতি আদিশব্দাদ্গুরুত্বসুপ্তত্বাদযঃ| আগন্তুরিতি পতনপীডনাদিকৃতঃ||৪||
Adhikarana 4 (5) · Śloka 5
স যদা বাহ্যাভ্যন্তরৈঃ ক্রিযাবিশেষৈর্ন সম্ভাবিতঃ প্রশমযিতুং ক্রিযাবিপর্যযাদ্বহুত্বাদ্বা দোষাণাং তদা পাকাভিমুখো ভবতি | তস্যামস্য পচ্যমানস্য পক্বস্য চ লক্ষণমুচ্যমানমুপধারয- | তত্র, মন্দোষ্মতা ত্বক্সবর্ণতা শীতশোফতা স্থৈর্যং মন্দবেদনতাঽল্পশোফতা চামলক্ষণমুদ্দিষ্টং; সূচিভিরিব নিস্তুদ্যতে, দশ্যত ইব পিপীলিকাভিঃ, তাভিশ্চ সংসর্প্যত ইব, ছিদ্যত ইব শস্ত্রেণ, ভিদ্যত ইব শক্তিভিঃ, তাড্যত ইব দণ্ডেন, পীড্যত ইব পাণিনা, ঘট্যত ইব চাঙ্গুল্যা, দহ্যতে পচ্যত ইব চাগ্নিক্ষারাভ্যাম্, ওষচোষপরীদাহাশ্চ ভবন্তি, বৃশ্চিকবিদ্ধ ইব চ স্থানাসনশযনেষু ন শান্তিমুপৈতি, আধ্মাতবস্তিরিবাততশ্চ শোফো ভবতি , ত্বগ্বৈবর্ণ্যং শোফাভিবৃদ্ধির্জ্বরদাহপিপাসা ভক্তারুচিশ্চ পচ্যমানলিঙ্গং; বেদনোপশান্তিঃ পাণ্ডুতাঽল্পশোফতা বলীপ্রাদুর্ভাবস্ত্বক্পরিপুটনং নিম্নদর্শনমঙ্গুল্যাঽবপীডিতে প্রত্যুন্নমনং, বস্তাবিবোদকসঞ্চরণং পূযস্য প্রপীডযত্যেকমন্তমন্তে চাবপীডিতে, মুহুর্মুহুস্তোদঃ কণ্ডূরুন্নততা ব্যাধেরুপদ্রবশান্তির্ভক্তাভিকাঙ্ক্ষা চ পক্বলিঙ্গম্ | কফজেষু তু রোগেষু গম্ভীরগতিত্বাদভিঘাতজেষু বা কেষুচিদসমস্তং পক্বলক্ষণং দৃষ্ট্বা পক্বমপক্বমিতি মন্যমানো ভিষঙ্মোহমুপৈতি; তত্র হি ত্বক্সবর্ণতা শীতশোফতা স্থৈর্যমল্পরুজতাঽশ্মবচ্চ ঘনতা, ন মোহমুপেযাদিতি ||৫||
स यदा बाह्याभ्यन्तरैः क्रियाविशेषैर्न सम्भावितः प्रशमयितुं क्रियाविपर्ययाद्बहुत्वाद्वा दोषाणां तदा पाकाभिमुखो भवति | तस्यामस्य पच्यमानस्य पक्वस्य च लक्षणमुच्यमानमुपधारय- | तत्र, मन्दोष्मता त्वक्सवर्णता शीतशोफता स्थैर्यं मन्दवेदनताऽल्पशोफता चामलक्षणमुद्दिष्टं; सूचिभिरिव निस्तुद्यते, दश्यत इव पिपीलिकाभिः, ताभिश्च संसर्प्यत इव, छिद्यत इव शस्त्रेण, भिद्यत इव शक्तिभिः, ताड्यत इव दण्डेन, पीड्यत इव पाणिना, घट्यत इव चाङ्गुल्या, दह्यते पच्यत इव चाग्निक्षाराभ्याम्, ओषचोषपरीदाहाश्च भवन्ति, वृश्चिकविद्ध इव च स्थानासनशयनेषु न शान्तिमुपैति, आध्मातबस्तिरिवाततश्च शोफो भवति , त्वग्वैवर्ण्यं शोफाभिवृद्धिर्ज्वरदाहपिपासा भक्तारुचिश्च पच्यमानलिङ्गं; वेदनोपशान्तिः पाण्डुताऽल्पशोफता वलीप्रादुर्भावस्त्वक्परिपुटनं निम्नदर्शनमङ्गुल्याऽवपीडिते प्रत्युन्नमनं, बस्ताविवोदकसञ्चरणं पूयस्य प्रपीडयत्येकमन्तमन्ते चावपीडिते, मुहुर्मुहुस्तोदः कण्डूरुन्नतता व्याधेरुपद्रवशान्तिर्भक्ताभिकाङ्क्षा च पक्वलिङ्गम् | कफजेषु तु रोगेषु गम्भीरगतित्वादभिघातजेषु वा केषुचिदसमस्तं पक्वलक्षणं दृष्ट्वा पक्वमपक्वमिति मन्यमानो भिषङ्मोहमुपैति; तत्र हि त्वक्सवर्णता शीतशोफता स्थैर्यमल्परुजताऽश्मवच्च घनता, न मोहमुपेयादिति ||५||
🔊 Audio coming soon
স যদেত্যাদি| বাহ্যাভ্যন্তরৈরিতি বাহ্যা আলেপনাদযঃ, আভ্যন্তরাঃ ক্বাথপানবমনবিরেচনাদযঃ, তৈঃ প্রশমযিতুং ন সম্ভাবিতো ন পারিতঃ, ‘ন প্রাপ্তঃ’ ইত্যন্যে| ক্রিযাবিপর্যযাদিতি অতর্পণাদীনামন্যথাভাবাত্| হেত্বন্তরমাহ- বহুত্বাদ্বা দোষাণামিতি|- ন হি বহুদোষা বিকারাঃ শোণিতাবসেকাদিভিরেব প্রশমং যান্তি; যদুক্তম্- “আলেপনস্রাবণশোধনৈশ্চ সম্যক্প্রযুক্তৈর্যদি নোপশাম্যেত্”- ইতি| তত্রেত্যাদি| স্থৈর্যং কাঠিন্যম্| সূচীভিরিবেত্যাদি| নিস্তুদ্যতে ভৃশং ব্যথ্যতে, নিঃশব্দোঽত্র ভৃশার্থে| তাভিঃ পিপীলিকাভিঃ| ছিদ্যত ইব দ্বিধা ক্রিযত ইব| ভিদ্যতে বিদার্যত ইব| শক্তিরাযুধবিশেষঃ| তাড্যতে আহন্যত ইব| দণ্ডো লগুডঃ| ঘট্যতে চাল্যত ইব| দহ্যতে পচ্যত ইব চ ক্ষারাগ্নিভ্যামিতি যথাসঙ্খ্যং ব্যাখ্যেযং, তেন দহ্যতে ভস্মসাত্ ক্রিযত ইবাগ্নিনা, পচ্যতে অঙ্গারতাপৈরুপতপ্যত ইব ক্ষারেণ| ওষ একদেশিকো দাহঃ, চোষঃ চূষ্যত ইব বেদনাবিশেষঃ| পরি সমন্তাদ্দাহঃ পরিদাহঃ| আততঃ ত্বক্সঙ্কোচরহিতঃ| বেদনোপশান্তিরিত্যাদি| ত্বক্পরিপুটনং ত্বচ উচ্চটনম্| প্রত্যুন্নমনম্ আভিমুখ্যেনোর্ধ্বং নমনম্| বস্তাবিবেত্যাদি| যথা বস্তাবুদকসঞ্চরণং ভবতি তদ্বদ্বৈদ্যে একমন্তমবযবং প্রপীডযতি সতি পূযস্য সঞ্চরণং শোফে ভবতীত্যর্থঃ| মুহুর্মুহুস্তোদো বাতবেদনা; কণ্ডূঃ শ্লেষ্মবেদনা; পক্বশোথে বিদাহাপগমেন পিত্তাভাবাত্তল্লিঙ্গাভাবঃ| উন্নততা ব্যাধেঃ উন্নতশোফঃ| উপদ্রবা ওষপরিদাহাদযঃ| কফজেষ্বিত্যাদি| কফজেষু রোগেষ্বিতি রোগোঽত্র শোফঃ| তত্র বিষযে কফজেষ্বতিগম্ভীরগতিত্বাত্, অভিঘাতজেষু বা কেষুচিদ্দূরানুপ্রবিষ্টশল্যাদিহেতুত্বাত্| তত্র হি ত্বক্সবর্ণতেত্যাদি| তত্রেতি কফজেঽভিঘাতজে চ শোফে| ত্বক্সবর্ণতা ন তু ত্বগ্বৈবর্ণ্যং, গম্ভীরগতিত্বাদন্তঃপাকঃ, বহিঃ পুনস্ত্বক্সাবর্ণ্যমেব| শীতশোফতা বহিঃ, অন্তঃ পুনরুষ্ণত্বং, গম্ভীরগতিত্বাত্ কফারব্ধত্বাচ্চ| অল্পরুজতা কফারব্ধত্বাত্| অশ্মবদ্ঘনতা শিলাবত্ কাঠিন্যং, কফারব্ধত্বাদবহিঃপাকত্বাচ্চেতি| ন মোহমুপেযাদিতি ন তত্র মোহং গচ্ছেত্, এভিঃ পক্বলক্ষণৈঃ পক্বমেব জানীযাদিত্যর্থঃ| ‘ন মোহমুপেযাদ্যতস্তং রক্তপাকমাচক্ষতে বৃদ্ধাঃ’ ইত্যন্যে||৫||
Adhikarana 5 (6) · Śloka 6
ভবন্তি চাত্র- আমং বিপচ্যমানং চ সম্যক্ পক্বং চ যো ভিষক্ | জানীযাত্ স ভবেদ্বৈদ্যঃ শেষাস্তস্করবৃত্তযঃ ||৬||
भवन्ति चात्र- आमं विपच्यमानं च सम्यक् पक्वं च यो भिषक् | जानीयात् स भवेद्वैद्यः शेषास्तस्करवृत्तयः ||६||
🔊 Audio coming soon
আমাদিলক্ষণজ্ঞানে গুণমজ্ঞানে দোষং চ দর্শযন্নাহ- আমমিত্যাদি| শেষা অন্যে আমাদিজ্ঞানবর্জিতাঃ| তস্করাশ্চৌরাঃ, তেষামিব বৃত্তির্যেষাং, প্রাণধনাপহারিত্বাত্||৬||
Adhikarana 6 (7-8) · Śloka 8
বাতাদৃতে নাস্তি রুজা ন পাকঃ পিত্তাদৃতে নাস্তি কফাচ্চ পূযঃ | তস্মাত্ সমস্তান্ পরিপাককালে পচন্তি শোফাংস্ত্রয এব দোষাঃ ||৭|| কালান্তরেণাভ্যুদিতং তু পিত্তং কৃত্বা বশে বাতকফৌ প্রসহ্য | পচত্যতঃ শোণিতমেব পাকো মতোঽপরেষাং বিদুষাং দ্বিতীযঃ ||৮||
वातादृते नास्ति रुजा न पाकः पित्तादृते नास्ति कफाच्च पूयः | तस्मात् समस्तान् परिपाककाले पचन्ति शोफांस्त्रय एव दोषाः ||७|| कालान्तरेणाभ्युदितं तु पित्तं कृत्वा वशे वातकफौ प्रसह्य | पचत्यतः शोणितमेव पाको मतोऽपरेषां विदुषां द्वितीयः ||८||
🔊 Audio coming soon
একদোষারব্ধা অপি পাককালে সর্বদোষাশ্লিষ্টা ভবন্তীত্যাহ- বাতাদিত্যাদি| ঋতেশব্দঃ কফাচ্চেত্যত্রাপি সম্বধ্যতে| ‘ত্রিভিরেব শোণিতচতুর্থৈঃ শরীরমিদং ধার্যতে’ (সূ. অ. ২১) ইতি দ্বিতীযং দর্শনং দর্শযন্নাহ- কালান্তরেণেত্যাদি| কালান্তরেণেতি অন্তরশব্দোঽত্রাবধিবাচী, প্রকোপপ্রসরস্থানসংশ্রযকালাবধিনা| অভ্যুদিতং তু পিত্তমিতি সমন্ততো ভাবেন পুনরুদ্গতং পিত্তং, কৃত্বা বশে বাতকফৌ বাতশ্লেষ্মাণৌ হীনৌ কৃত্বা, প্রসহ্য বলাত্কারেণ বশে কৃত্বা, ‘ক্রোডীকৃত্য’ ইত্যন্যে| মতঃ সম্মতঃ||৭-৮||
Adhikarana 7 (9) · Śloka 9
তত্র, আমচ্ছেদে মাংসসিরাস্নাযুসন্ধ্যস্থিব্যাপাদনমতিমাত্রং শোণিতাতিপ্রবৃত্তির্বেদনাপ্রাদুর্ভাবোঽবদরণমনেকোপদ্রবদর্শনং ক্ষতবিদ্রধির্বা ভবতি | স যদা ভযমোহাভ্যাং পক্বমপ্যপক্বমিতি মন্যমানশ্চিরমুপেক্ষতে ব্যাধিং বৈদ্যস্তদা গম্ভীরানুগতো দ্বারমলভমানঃ পূযঃ স্বমাশ্রযমবদার্যোত্সঙ্গং মহান্তমবকাশং কৃত্বা নাডীং জনযিত্বা কৃচ্ছ্রসাধ্যো ভবত্যসাধ্যো বেতি ||৯||
तत्र, आमच्छेदे मांससिरास्नायुसन्ध्यस्थिव्यापादनमतिमात्रं शोणितातिप्रवृत्तिर्वेदनाप्रादुर्भावोऽवदरणमनेकोपद्रवदर्शनं क्षतविद्रधिर्वा भवति | स यदा भयमोहाभ्यां पक्वमप्यपक्वमिति मन्यमानश्चिरमुपेक्षते व्याधिं वैद्यस्तदा गम्भीरानुगतो द्वारमलभमानः पूयः स्वमाश्रयमवदार्योत्सङ्गं महान्तमवकाशं कृत्वा नाडीं जनयित्वा कृच्छ्रसाध्यो भवत्यसाध्यो वेति ||९||
🔊 Audio coming soon
আমং ন ছিন্দ্যাত্ পক্বং নোপেক্ষেতেতি দর্শযন্নাহ- তত্রেত্যাদি | আমচ্ছেদে ইতি আমশব্দাত্ পচ্যমানস্যাপি গ্রহণাত্তত্রাপ্যেতে দোষাঃ| ব্যাপাদনং হিংসনম্| অবদরণং বিদরণম্| ক্ষতবিদ্রধিঃ ‘তৈস্তৈর্ভাবৈরভিহতে ক্ষতে বা’ (নি. অ. ৯) ইত্যাদিবিদ্রধিনিদানোক্তঃ| স যদেত্যাদি| মোহঃ অজ্ঞানম্| চিরং প্রভূতকালম্| গম্ভীরানুগতঃ দূরানুপ্রবিষ্টঃ| উত্সঙ্গ ইবোত্সঙ্গঃ, ব্রণাশযে হি চিরকালং পূযাবস্থানেনাবদারিতমন্তঃপ্রদেশান্তরং নিম্নমুত্সঙ্গতুল্যত্বাত্ ‘উত্সঙ্গ’ ইত্যুচ্যতে; ‘উত্ ঊর্ধ্বং পূযস্য সঙ্গ উত্সঙ্গঃ’ ইত্যন্যে| অবকাশম্ অন্তরালম্||৯||
Adhikarana 8 (10) · Śloka 10
ভবতি চাত্র- যশ্ছিনত্ত্যামমজ্ঞানাদ্যশ্চ পক্বমুপেক্ষতে | শ্বপচাবিব মন্তব্যৌ তাবনিশ্চিতকারিণৌ ||১০||
भवति चात्र- यश्छिनत्त्याममज्ञानाद्यश्च पक्वमुपेक्षते | श्वपचाविव मन्तव्यौ तावनिश्चितकारिणौ ||१०||
🔊 Audio coming soon
অস্যৈবার্থস্য নিন্দার্থবাদপরং শ্লোকমাহ- যশ্ছিনত্ত্যামমিত্যাদি| পক্বং শোফং শস্ত্রকর্মার্হম্| শ্বপচাবিব চণ্ডালাবিব| মন্তব্যৌ জ্ঞাতব্যৌ| তৌ দ্বৌ| অনিশ্চিতকারিণৌ আমচ্ছেদনপক্বোপেক্ষণাত্; অনে তু ‘তৌ নরৌ শ্বপচতুল্যাবাতুরব্যাপাদনাত্| তদ্ব্যাপাদনং তৌ কুতো বিধত ইত্যাহ- অনিশ্চিতকারিণৌ যতোঽসমীক্ষ্য বিধাযিনৌ বৈদ্যৌ’||১০||
Adhikarana 9 (11-13) · Śloka 13
প্রাক্ শস্ত্রকর্মণশ্চেষ্টং ভোজযেদাতুরং ভিষক্ | মদ্যপং পাযযেন্মদ্যং তীক্ষ্ণং যো বেদনাঽসহঃ ||১১|| ন মূর্চ্ছত্যন্নসংযোগান্মত্তঃ শস্ত্রং ন বুধ্যতে | তস্মাদবশ্যং ভোক্তব্যং রোগেষূক্তেষু কর্মণি ||১২|| প্রাণো হ্যাভ্যন্তরো নৄণাং বাহ্যপ্রাণগুণান্বিতঃ | ধারযত্যবিরোধেন শরীরং পাঞ্চভৌতিকম্ ||১৩||
प्राक् शस्त्रकर्मणश्चेष्टं भोजयेदातुरं भिषक् | मद्यपं पाययेन्मद्यं तीक्ष्णं यो वेदनाऽसहः ||११|| न मूर्च्छत्यन्नसंयोगान्मत्तः शस्त्रं न बुध्यते | तस्मादवश्यं भोक्तव्यं रोगेषूक्तेषु कर्मणि ||१२|| प्राणो ह्याभ्यन्तरो नॄणां बाह्यप्राणगुणान्वितः | धारयत्यविरोधेन शरीरं पाञ्चभौतिकम् ||१३||
🔊 Audio coming soon
পক্বে শোফে শস্ত্রকর্মার্হে পূর্বকর্মাহ- প্রাগিত্যাদি| ইষ্টং হিতং হিতকারি; অন্যে ত্বিষ্টমভিপ্রেতমপথ্যমপি তদ্বলাধানার্থং ভোজযেত্| যো বেদনাং ন সহতে তং তীক্ষ্ণং মদ্যং পাযযেত্ পরং মদ্যপম্| অস্যৈব চ ফলমাহ- ন মূর্চ্ছত্যন্নসংযোগাদিত্যাদি| শস্ত্রং ন বুধ্যতে শস্ত্রবেদনাং ন জানাতীত্যর্থঃ| রোগেষূক্তেষ্বিতি মূঢগর্ভোদরার্শোশ্মর্যাদিবর্জিতেষু, কর্মণি শস্ত্রপ্রযোগে প্রাপ্তে, অবশ্যং ধ্রুবং ভোক্তব্যম্| কস্মাদুক্তেষু রোগেষু ভোজযেদিত্যাহ- প্রাণ ইত্যাদি|- প্রাণো হ্যাভ্যতর ইতি অত্রাভ্যন্তরঃ প্রাণো বলং, তচ্চৌজোজনিতং ভারহরণাদিশক্তিলক্ষণম্| বাহ্যপ্রাণগুণান্বিত ইতি বাহ্যপ্রাণোঽত্র বাহ্যং বলমুপচযলক্ষণং পাঞ্চভৌতিকাহারজনিতং, গুণাঃ শরীরদার্ঢ্যাদিকাঃ, তৈরন্বিতঃ সংযুক্তঃ সন্নাভ্যন্তরঃ প্রাণঃ শক্তিলক্ষণঃ শরীরং ধারযতীত্যর্থঃ| অন্যে ত্বন্যথা ব্যাখ্যানযন্তি- প্রাণো হ্যাভ্যন্তর ইতি; ‘সম্পন্নো যবঃ’ ইতিবজ্জাতিবিবক্ষযেহৈকবচনং, তেনাত্রাগ্নিঃ সোমো বাযুঃ সত্ত্বং রজস্তমঃ পঞ্চেন্দ্রিযাণি ভূতাত্মেত্যাভ্যন্তরাঃ প্রাণাঃ, বাহ্যপ্রাণা আগ্নেযসৌম্যবাযব্যদ্রব্যাণি দিবসো বাযূ রাত্রিঃ শব্দস্পর্শরূপরসগন্ধাশ্চেতি, তেষাং গুণাঃ, তৈরন্বিতোঽনুগতঃ সন্নাভ্যন্তরঃ প্রাণঃ শরীরং ধারযতীত্যর্থঃ| তত্র বাহ্যপ্রাণস্যগ্নের্গুণৈঃ কট্বম্ললবণাদিভিরনুগতঃ সন্নন্তরগ্নিঃ শরীরং ধারযতীত্যাদিনা বাহ্যপ্রাণগুণানুগতত্বেনাভ্যন্তরপ্রাণস্য শরীরধারকত্বং দর্শযন্তি, অস্মাভিস্তু বিস্তরভযান্ন দর্শিতম্| লক্ষ্মণটিপ্পণকারস্তু- আভ্যন্তরঃ প্রাণোঽগ্নীষোমাদিঃ, যেন প্রাণী জীবতি, বাহ্যপ্রাণোঽন্নং, তদ্গুণাঃ প্রীণনাদযঃ, তৈরন্বিতঃ সন্নাভ্যান্তরঃ প্রাণঃ শরীরং ধারযতীত্যর্থঃ||১১-১৩||
Adhikarana 10 (14) · Śloka 14
অল্পো মহান্ বা ক্রিযযা বিনা যঃ সমুচ্ছ্রিতঃ পাকমুপৈতি শোফঃ | বিশালমূলো বিষমং বিদগ্ধঃ স কৃচ্ছ্রতাং যাত্যবগাঢদোষঃ ||১৪||
अल्पो महान् वा क्रियया विना यः समुच्छ्रितः पाकमुपैति शोफः | विशालमूलो विषमं विदग्धः स कृच्छ्रतां यात्यवगाढदोषः ||१४||
🔊 Audio coming soon
মহতি শোফেঽল্পে বাঽপ্রতিক্রিযমাণে সতি বহুং দোষমাহ,- অল্প ইত্যাদি| বিষমং বিদগ্ধ ইতি বিষমবিদাহো বিষমপাক ইত্যর্থঃ| অবগাঢদোষ ইতি আভ্যন্তরপূয ইত্যর্থঃ| ‘যো হ্যুত্থিতোঽল্পো যদি বা মহান্ বা ক্রিযাং বিনা পাকমুপৈতি শোথঃ’ ইতি কেচিত্ পঠন্তি||১৪||
Adhikarana 11 (15) · Śloka 15
আলেপবিস্রাবণাশোধনৈস্তু সম্যক্ প্রযুক্তৈর্যদি নোপশাম্যেত্ | পচ্যেত শীঘ্রং সমমল্পমূলঃ স পিণ্ডিতশ্চোপরি চোন্নতঃ স্যাত্ ||১৫||
आलेपविस्रावणाशोधनैस्तु सम्यक् प्रयुक्तैर्यदि नोपशाम्येत् | पच्येत शीघ्रं सममल्पमूलः स पिण्डितश्चोपरि चोन्नतः स्यात् ||१५||
🔊 Audio coming soon
শোফানামালেপনাদিক্রিযাসমূহাবচারণেঽপি পক্বানামুপক্রমসাফল্যং দর্শযন্নাহ,- আলেপনেত্যাদি| পচ্যেত শীঘ্রং সমমিতি এতেন সমপাকত্বমুক্তং, স শোফঃ, পিণ্ডিতো বর্তুলীভবতি ||১৫||
Adhikarana 12 (16) · Śloka 16
কক্ষং সমাসাদ্য যথৈব বহ্নির্বায্বীরিতঃ সন্দহতি প্রসহ্য | তথৈব পূযোঽপ্যবিনিঃসৃতো হি মাংসং সিরাঃ স্নাযু চ খাদতীহ ||১৬||
कक्षं समासाद्य यथैव वह्निर्वाय्वीरितः सन्दहति प्रसह्य | तथैव पूयोऽप्यविनिःसृतो हि मांसं सिराः स्नायु च खादतीह ||१६||
🔊 Audio coming soon
পক্বস্যাপ্যুপেক্ষণে শোফস্য প্রাগুক্তমেব দোষং দৃষ্টান্তেন দর্শযন্নাহ- কক্ষমিত্যাদি| কক্ষস্তৃণাদিবহুলঃ প্রদেশঃ| ইহেতি পক্বশোফে||১৬||
Adhikarana 13 (17-18) · Śloka 18
আদৌ বিম্লাপনং কুর্যাদ্দ্বিতীযমবসেচনম্ | তৃতীযমুপনাহং তু চতুর্থীং পাটনক্রিযাম্ ||১৭|| পঞ্চমং শোধনং কুর্যাত্ ষষ্ঠং রোপণমিষ্যতে | এতে ক্রমা ব্রণস্যোক্তাঃ সপ্তমং বৈকৃতাপহম্ ||১৮||
आदौ विम्लापनं कुर्याद्द्वितीयमवसेचनम् | तृतीयमुपनाहं तु चतुर्थीं पाटनक्रियाम् ||१७|| पञ्चमं शोधनं कुर्यात् षष्ठं रोपणमिष्यते | एते क्रमा व्रणस्योक्ताः सप्तमं वैकृतापहम् ||१८||
🔊 Audio coming soon
ব্রণস্য ষষ্টেরুপক্রমাণাং সূত্রস্থানে সূত্রণার্থং বিম্লাপনাদীনুপক্রমান্নির্দিশন্নাহ- আদাবিত্যাদি| আদৌ বিম্লাপনমঙ্গুল্যাদিমর্দনেন শোফবিলযনম্| অবসেচনং জলৌকাদিভী রক্তবিস্রাবণম্| উপনাহো বন্ধনং পাচনায| বৈকৃতাপহমিতি সবর্ণকরণরোমসঞ্জননাদি| অন্যে ত্বন্যথাঽঽপাতনিকাং গৃহ্ণন্ত্যন্যথৈব চ ব্যাখ্যানযন্তি- তত্র ব্রণস্য ষষ্টেরুপক্রমাণাং সুখবোধার্থং লক্ষণান্তরেণ সপ্তত্বং দর্শযন্নাহ,- আদাবিত্যাদি| বিম্লাপনশব্দোঽত্র বহিঃপ্রমার্জনে শোফবিলযনকরে লেপপরিষেকাভ্যঙ্গস্বেদাদৌ বর্ততে, ন তু মন্দবেদনস্য স্নিগ্ধস্বিন্নস্য শোফস্য দ্বিব্রণীযপঠিতবেণুনালাঙ্গুষ্ঠাদিমর্দনে| অবসেচনং বিস্রাবণম্, অবসেচনশব্দোঽপ্যত্র বমনবিরেকশোণিতবিস্রাবণাদ্যন্তর্বহিঃপ্রমার্জনে বর্ততে, ন তু কেবল এব বিস্রাবণে| এবং শেষেষ্বপ্যুপক্রমেষূপক্রমান্তরাণি সমানেষু সমানান্যন্তর্ভাব্যানি||১৭-১৮||
Adhikarana puShpikA · Śloka 17
ইতি সুশ্রুতসংহিতাযাং সূত্রস্থানে আমপক্বৈষণীযো নাম সপ্তদশোঽধ্যাযঃ ||১৭||
इति सुश्रुतसंहितायां सूत्रस्थाने आमपक्वैषणीयो नाम सप्तदशोऽध्यायः ||१७||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাব্যাখ্যাং সুশ্রুতব্যাখ্যাযাং সূত্রস্থানে সপ্তদশোঽধ্যাযঃ||১৭||