Adhikarana 1 (1-2) · Śloka 2
অথাতো দ্রবদ্রব্যবিধিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो द्रवद्रव्यविधिमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| দ্রবদ্রব্যাণি পানীযক্ষীরাদীনি, তেষাং বিধির্বিধানং ভেদ ইত্যর্থঃ||১-২||
Adhikarana 2 (3) · Śloka 3
পানীযমান্তরীক্ষমনির্দেশ্যরসমমৃতং জীবনং তর্পণং ধারণমাশ্বাসজননং শ্রমক্লমপিপাসামদমূর্চ্ছাতন্দ্রানিদ্রাদাহপ্রশমনমেকান্ততঃ পথ্যতমং চ ||৩||
पानीयमान्तरीक्षमनिर्देश्यरसममृतं जीवनं तर्पणं धारणमाश्वासजननं श्रमक्लमपिपासामदमूर्च्छातन्द्रानिद्रादाहप्रशमनमेकान्ततः पथ्यतमं च ||३||
🔊 Audio coming soon
পানীযমিত্যাদি| অন্তরীক্ষাদাগতমান্তরীক্ষং, ন পুনস্তত্র ভবং; কুতঃ? মেঘজত্বাত্; তত্র জাতং চেত্যেকে| অনির্দেশরসম্ অব্যক্তরসমপ্রকটরসমিত্যর্থঃ, অত্যল্পরসত্বাত্; ন পুনস্তস্য রসো নাস্তি| অমৃতমিতি অমৃতমিবেত্যর্থঃ, অমৃতত্বং পুনরস্য দোষপ্রকোপস্যাকরণাত্; ‘অমৃতং ব্রহ্মরূপম্’ ইত্যন্যে| জীবনং প্রাণধারণং, ‘সৌম্যধাতুবৃদ্ধিকরম্’ ইতি কেচিত্, ‘ওজোবৃদ্ধিকরম্’ ইত্যন্যে| তর্পণং তৃপ্তিজনকম্| ধারণমিতি শস্ত্রপাতাদিব্যথাসু মূর্চ্ছতাং শরীরং দধাতীতি ধারণম্| আশ্বাসজননমিতি মার্গাদিশুষ্কদেহানাং প্রাণজননম্| শ্রমেত্যাদি প্রশমনশব্দঃ শ্রমাদিভিঃ সহ প্রত্যেকমভিসম্বধ্যতে, শ্রমাদীনাং প্রশমনমিত্যর্থঃ; বহ্বাযাসকৃতং কষ্টং শ্রমঃ; অল্পাযাসকৃতঃ শ্রম এব ক্লমঃ; মদঃ পূগফলেনেব মত্ততা, স চ বিষমদ্যশোণিতোত্থো বিকারঃ; তন্দ্রানিদ্রযোঃ কফবাতকৃতযোরপি প্রশমনং স্পর্শেন, যা তু স্বাভাবিকী নিদ্রা তাং করোত্যেব পীতং সত্; তন্দ্রা নিদ্রাভেদঃ, নিদ্রা প্রসিদ্ধৈব| একান্ততঃ পথ্যতমমিতি একান্ততোঽতিশযেনেত্যর্থঃ, তর্হি তমপ্প্রত্যযঃ কথং? উচ্যতে- স্বার্থিকত্বাত্; এতেনাতিশযেন পথ্যমিত্যর্থঃ; ‘অন্যেষামাকাশগুণভূযিষ্ঠভূমিসলিলানাং পথ্যানাং প্রকৃষ্টং পথ্যং পথ্যতমম্; একান্তগ্রহণেন সর্বকালদেশপুরুষব্যাধিষু প্রযোগোঽস্য দ্যোত্যতে’ ইত্যেকে; ‘তমপ্প্রত্যযেন স্বস্থস্যাতিশযেন হিতমিত্যভিহিতম্’ ইত্যপরে||৩||
Adhikarana 3 (4) · Śloka 4
তদেবাবনিপতিতমন্যতমং রসমুপলভতে স্থানবিশেষান্নদীনদসরস্তডাগবাপীকূপচুণ্টীপ্রস্রবণোদ্ভিদবিকিরকেদারপল্বলাদি ষু স্থানেষ্ববস্থিতমিতি ||৪||
तदेवावनिपतितमन्यतमं रसमुपलभते स्थानविशेषान्नदीनदसरस्तडागवापीकूपचुण्टीप्रस्रवणोद्भिदविकिरकेदारपल्वलादि षु स्थानेष्ववस्थितमिति ||४||
🔊 Audio coming soon
তস্যানির্দেশ্যরসস্যাপি নির্দেশ্যরসত্বে কারণং নির্দিশন্নাহ- তদিত্যাদি| তদেবাবনিপতিতমান্তরিক্ষং জলং ভূমিপ্রাপ্তম্| অন্যতমং মধুরাদিষ্বেকতমম্| উপলভতে প্রাপ্নোতীত্যর্থঃ| স্থানবিশেষাত্ দেশভেদাদিত্যর্থঃ| কে পুনস্তে স্থানবিশেষা ইত্যাহ- নদীত্যাদি| নদ্যো গঙ্গাদ্যাঃ; নদাঃ সিন্ধুশোণাদযঃ; সরো দিব্যখ্যাতং পুরুষব্যাপারং বিনা; পুরুষব্যাপারকৃতস্তডাগঃ, ‘তলাব’ ইতি লোকে, কেচিদ্বিপর্যযেণার্থমাহুঃ; বাপী ইষ্টকাদিভির্বদ্ধা সসোপানতীর্থা ‘পুষ্করিণী’ ইতি লোকে; কূপো মৃত্তিকেষ্টকাদিভির্বদ্ধোঽসোপানঃ; চুণ্টী অববদ্ধকূপঃ, অন্যে ‘ভুআ গিরিপল্বলং বা’ ইত্যাহুঃ, ভুআ নদ্যাঃ সমীপে তত্কালকৃতা লঘুকূপিকা, পল্বলমখাতগর্ত ইতি; প্রস্রবণমুচ্চপ্রদেশাত্ প্রস্রবজ্জলস্থানং পর্বতাশ্রিতম্; উদ্ভিদং পুনর্নিম্নপ্রদেশাদূর্ধ্বোত্তিষ্ঠজ্জলস্থানং; বিকিরং বালুকাদি বিকীর্য গৃহ্যমাণোদকস্থানং; কেদারঃ প্রসিদ্ধঃ; পল্বলমানূপদেশজং তৃণাদিচ্ছন্নং সরঃ| আদিগ্রহণাত্ হ্রদসমুদ্রাদিগ্রহণম্||৪||
Adhikarana 4 (5) · Śloka 5
তত্র, ‘লোহিতকপিলপাণ্ডুনীলপীতশুক্লেষ্ববনিপ্রদেশেষু মধুরাম্ললবণকটুতিক্তকষাযাণি যথাসঙ্খ্যমুদকানি সম্ভবন্তি’ ইত্যেকে ভাষন্তে ||৫||
तत्र, ‘लोहितकपिलपाण्डुनीलपीतशुक्लेष्ववनिप्रदेशेषु मधुराम्ललवणकटुतिक्तकषायाणि यथासङ्ख्यमुदकानि सम्भवन्ति’ इत्येके भाषन्ते ||५||
🔊 Audio coming soon
পরমতমাহ- তত্রেত্যাদি||৫||
Adhikarana 5 (6) · Śloka 6
তত্তু ন সম্যক্; পৃথিব্যাদীনামন্যোন্যানুপ্রবেশকৃতঃ সলিলরসো ভবত্যুত্কর্ষাপকর্ষেণ | তত্র, স্বলক্ষণভূযিষ্ঠাযাং ভূমাবম্লং লবণং চ; অম্বুগুণভূযিষ্ঠাযাং মধুরং; তেজোগুণভূযিষ্ঠাযাং কটুকং তিক্তং চ; বাযুগুণভূযিষ্ঠাযাং কষাযম্; আকাশগুণভূযিষ্ঠাযামব্যক্তরসম্, অব্যক্তং হ্যাকাশমিত্যতঃ; তত্ প্রধানমব্যক্তরসত্বাত্, তত্পেযমান্তরীক্ষালাভে ||৬||
तत्तु न सम्यक्; पृथिव्यादीनामन्योन्यानुप्रवेशकृतः सलिलरसो भवत्युत्कर्षापकर्षेण | तत्र, स्वलक्षणभूयिष्ठायां भूमावम्लं लवणं च; अम्बुगुणभूयिष्ठायां मधुरं; तेजोगुणभूयिष्ठायां कटुकं तिक्तं च; वायुगुणभूयिष्ठायां कषायम्; आकाशगुणभूयिष्ठायामव्यक्तरसम्, अव्यक्तं ह्याकाशमित्यतः; तत् प्रधानमव्यक्तरसत्वात्, तत्पेयमान्तरीक्षालाभे ||६||
🔊 Audio coming soon
তন্নিরাকৃত্য স্বমতমাহ- তত্ত্বিত্যাদি| কৃত ইতি জনিতঃ| উত্কর্ষাপকর্ষেণেতি বৃদ্ধিহ্রাসাভ্যাম্| স্বলক্ষণভূযিষ্ঠাযাং পৃথিব্যামাত্মগুণবহুলাযাম্ | ‘তত্র পৃথিব্যম্বুগুণবাহুল্যান্মধুর’ ইত্যাদিনা রসবিজ্ঞানীয উক্তস্য সামান্যবিধেরুত্সর্গাখ্যস্য ‘তত্র স্বলক্ষণভূযিষ্ঠাযাং ভূমাবম্লম্’ ইত্যাদিকো বিশেষবিধিরপবাদাখ্যোঽত্র প্রোক্তঃ| অন্যে তু ভূতদ্বযগুণসংযোগং রসবিশেষহেতুমাহুঃ| তথাহি- ‘তত্র স্বলক্ষণোদকভূযিষ্ঠাযাং ভূমৌ মধুরং, পৃথিব্যনিলভূযিষ্ঠাযামম্লং, জলাগ্নিগুণভূযিষ্ঠাযাং লবণং, বায্বগ্নিগুণভূযিষ্ঠাযাং কটুকং, পৃথিব্যনিলগুণভূযিষ্ঠাযাং কষাযম্, আকাশগুণভূযিষ্ঠাযামব্যক্তরসম্’ ইতি||৬||
Adhikarana 6 (7) · Śloka 7
তত্রান্তরীক্ষং চতুর্বিধম্ | তদ্যথা- ধারং, কারং, তৌষারং, হৈমমিতি | তেষাং ধারং প্রধানং, লঘুত্বাত্; তত্ পুনর্দ্বিবিধং- গাঙ্গং, সামুদ্রং চেতি | তত্র গাঙ্গমাশ্বযুজে মাসি প্রাযশো বর্ষতি | তযোর্দ্বযোরপি পরীক্ষণং কুর্বীত- শাল্যোদনপিণ্ডমকুথিতমবিদগ্ধং রজতভাজনোপহিতং বর্ষতি দেবে বহিষ্কুর্বীত, স যদি মুহূর্তং স্থিতস্তাদৃশ এব ভবতি তদা গাঙ্গং পততীত্যবগন্তব্যং; বর্ণান্যত্বে সিক্থপ্রক্লেদে চ সামুদ্রমিতি বিদ্যাত্, তন্নোপাদেযম্ | সামুদ্রমপ্যাশ্বযুজে মাসি গৃহীতং গাঙ্গবদ্ভবতি | গাঙ্গং পুনঃ প্রধানং, তদুপাদদীতাশ্বযুজে মাসি | শুচিশুক্লবিততপটৈকদেশচ্যুতমথবা হর্ম্যতলপরিভ্রষ্টমন্যৈর্বা শুচিভির্ভাজনৈর্গৃহীতং সৌবর্ণে রাজতে মৃন্মযে বা পাত্রে নিদধ্যাত্ | তত্ সর্বকালমুপযুঞ্জীত, তস্যালাভে ভৌমম্ | তচ্চাকাশগুণবহুলম্ | তত্ পুনঃ সপ্তবিধম্ | তদ্যথা- কৌপং, নাদেযং, সারসং, তাডাগং, প্রাস্রবণম্, ঔদ্ভিদং, চৌণ্ট্যমিতি ||৭||
तत्रान्तरीक्षं चतुर्विधम् | तद्यथा- धारं, कारं, तौषारं, हैममिति | तेषां धारं प्रधानं, लघुत्वात्; तत् पुनर्द्विविधं- गाङ्गं, सामुद्रं चेति | तत्र गाङ्गमाश्वयुजे मासि प्रायशो वर्षति | तयोर्द्वयोरपि परीक्षणं कुर्वीत- शाल्योदनपिण्डमकुथितमविदग्धं रजतभाजनोपहितं वर्षति देवे बहिष्कुर्वीत, स यदि मुहूर्तं स्थितस्तादृश एव भवति तदा गाङ्गं पततीत्यवगन्तव्यं; वर्णान्यत्वे सिक्थप्रक्लेदे च सामुद्रमिति विद्यात्, तन्नोपादेयम् | सामुद्रमप्याश्वयुजे मासि गृहीतं गाङ्गवद्भवति | गाङ्गं पुनः प्रधानं, तदुपाददीताश्वयुजे मासि | शुचिशुक्लविततपटैकदेशच्युतमथवा हर्म्यतलपरिभ्रष्टमन्यैर्वा शुचिभिर्भाजनैर्गृहीतं सौवर्णे राजते मृन्मये वा पात्रे निदध्यात् | तत् सर्वकालमुपयुञ्जीत, तस्यालाभे भौमम् | तच्चाकाशगुणबहुलम् | तत् पुनः सप्तविधम् | तद्यथा- कौपं, नादेयं, सारसं, ताडागं, प्रास्रवणम्, औद्भिदं, चौण्ट्यमिति ||७||
🔊 Audio coming soon
তত্রেত্যাদি| ধারাভিঃ পততীতি ধারম্| করা বর্ষোপলাঃ, তেষাং তোযং কারম্| তৌষারম্ অবশ্যাযজং নিশাজলম্| তদেব সংহতাবযবত্বেন স্ফটিকশিলাশকলসদৃশাবযবং হিমং, তদ্ভবং হৈমম্| তদিত্যাদি| গাঙ্গমাকাশাধিষ্ঠানং, সামুদ্রং পুনরবন্যধিষ্ঠানম্| তত্রেত্যাদি| এতেন ‘গাঙ্গমাশ্বযুজ এব গ্রহীতব্যং ন ভাদ্রপদে মাসি’ ইত্যুক্তং ভবতি| তযোরিতি তযোর্গাঙ্গসামুদ্রযোরিত্যর্থঃ| কথং পরীক্ষণমিত্যাহ- শাল্যোদনেত্যাদি| অবিদগ্ধম্ অবিবর্ণম্| রূপ্যমযে ভাজনেঽম্লরসে সামুদ্রতোযং বিনা শাল্যন্নং ন কোথমেতি| দিনস্য রাত্রেশ্চ পঞ্চদশো ভাগো মুহূর্তঃ| অবগন্তব্যং জ্ঞাতব্যমিত্যর্থঃ| বর্ণান্যত্বে ইত্যাদি| প্রক্লেদঃ কোথঃ| তন্নোপাদেযমিতি দোষলত্বাত্| সামুদ্রমিত্যাদি| এতেন সামুদ্রস্যানুপাদেযস্যাপি কদাচিদেবোপাদেযতা দর্শিতা| আন্তরিক্ষস্য গ্রহণোপাযং দর্শযন্নাহ- শুচীত্যাদি| শুচিরনুপহতঃ| হর্ম্যতলপরিভ্রষ্টমিতি ধবলগৃহোপরিভূমিকাযাঃ সকাশাদধঃ পতদ্গৃহীতম্| তদিত্যাদি কৌপমিত্যাদিকং সর্বং প্রাগেব ব্যাখ্যাতম্||৭||
Adhikarana 7 (8) · Śloka 8
তত্র বর্ষাস্বান্তরিক্ষমৌদ্ভিদং বা সেবেত, মহাগুণত্বাত্; শরদি সর্বং, প্রসন্নত্বাত্; হেমন্তে সারসং তাডাগং বা; বসন্তে কৌপং প্রাস্রবণং বা; গ্রীষ্মেঽপ্যেবং; প্রাবৃষি চৌণ্ট্যমনভিবৃষ্টং সর্বং চেতি ||৮||
तत्र वर्षास्वान्तरिक्षमौद्भिदं वा सेवेत, महागुणत्वात्; शरदि सर्वं, प्रसन्नत्वात्; हेमन्ते सारसं ताडागं वा; वसन्ते कौपं प्रास्रवणं वा; ग्रीष्मेऽप्येवं; प्रावृषि चौण्ट्यमनभिवृष्टं सर्वं चेति ||८||
🔊 Audio coming soon
তত্রেত্যাদি| অত্র বর্ষাশব্দো বর্ষান্তে আশ্বযুজে বর্ততে ন তু ভাদ্রপদে, তত্রান্তরিক্ষজলস্য নিষিদ্ধত্বাত্; তদুক্তং- “বলাহকাদ্যাঃ সমদাঃ কীটা লূতাশ্চ খেচরাঃ| তদ্বিষোত্সর্গসংসর্গাদগ্রাহ্যং তত্তদা জলম্” ইতি| তর্হি ভাদ্রপদে কিং পাতব্যম্? অত্রোচ্যতে- ভাদ্রপদে মাস্যাকাশগুণভূযিষ্ঠভূম্যাশ্রিতমান্তরিক্ষবদ্ভবতীতি তত্পযঃ পেযমিতি| অন্যে পুনস্তপ্তশীতমম্ভো ভাদ্রপদে পাযযন্তি, পূর্বস্থাপিতং মাহেন্দ্রং বা; অন্যে তু ‘বর্ষাস্বান্তরিক্ষমৌদ্ভিদং কৌপং বা’ ইতি পঠন্তি, তচ্চ কৌপং বিদাহপরিহারার্থং সক্ষৌদ্রং পেযমিতি ব্যাখ্যানযন্তি| শরদি সর্বং ‘পাতব্যম্’ ইতি শেষঃ| প্রসন্নত্বাদিতি প্রসন্নত্বং নির্দোষত্বমগস্ত্যোদযাত্| প্রাবৃষি চৌণ্ট্যমনবমনভিবৃষ্টং সর্বং চেতি অনবং পুরাতনং, তচ্চ সারসং তাডাগং বা; অনভিবৃষ্টমনাভসং, তচ্চ কৌপম্| পরং যত্র ন বৃষ্টো দেবস্তদা সর্বমেব পাতব্যং যদি বা সংস্কৃতং ভবেত্ ক্বথনাদিভিঃ; সর্বত্রৈবাভিনবস্য জলস্য প্রবিষ্টত্বাত্| অন্যে তু ‘অনবম্’ ইত্যস্য স্থানে ‘অনভিনবম্’ ইতি পঠন্তি; অত্রাপি স এবার্থঃ||৮||
Adhikarana 8 (9-10) · Śloka 10
কীটমূত্রপুরীষাণ্ডশবকোথপ্রদূষিতম্ | তৃণপর্ণোত্করযুতং কলুষং বিষসংযুতম্ ||৯|| যোঽবগাহেত বর্ষাসু পিবেদ্বাঽপি নবং জলম্ | স বাহ্যাভ্যন্তরান্ রোগান্ প্রাপ্নুযাত্ ক্ষিপ্রমেব তু ||১০||
कीटमूत्रपुरीषाण्डशवकोथप्रदूषितम् | तृणपर्णोत्करयुतं कलुषं विषसंयुतम् ||९|| योऽवगाहेत वर्षासु पिबेद्वाऽपि नवं जलम् | स बाह्याभ्यन्तरान् रोगान् प्राप्नुयात् क्षिप्रमेव तु ||१०||
🔊 Audio coming soon
ইদানীং নবস্য সলিলস্য বাহ্যাভ্যন্তরপ্রযোগে বাহ্যাভ্যন্তরানেব চ রোগান্নির্দিশন্নাহ- কীটেত্যাদি| কীটাদিভিঃ সহ কোথশব্দঃ প্রত্যেকমভিসম্বধ্যতে, কোথঃ শটিতত্বং; কীটাঃ সবিষা বৃশ্চিকাদযঃ, শবো মৃতপ্রাণিশরীরং, প্রদূষিতং বিকৃতীকৃতম্| তৃণপর্ণোত্করযুতমিতি তৃণপর্ণানামুত্করঃ সমূহস্তেন যুতম্| কলুষং মলিনম্| বিষসংযুতমিতি স্থাবরজঙ্গমবিষযুক্তমিত্যর্থঃ| বর্ষাস্বিতি আশ্বযুজং বিহাযাষাঢশ্রাবণভাদ্রপদা গৃহ্যন্তে| বর্ষাশব্দোঽযং প্রাবৃষি বর্ষাসু চ বর্ততে| তদাহ- “বর্ষাসু চতুরো মাসান্ মাত্রাবদুদকং পিবেত্” ইতি| বাহ্যাভ্যন্তরান্ রোগানিতি বাহ্যাঃ কুষ্ঠাদযঃ, আভ্যন্তরাস্তূদরাদযঃ; তে চ যথাসঙ্খ্যমবগাহপানাভ্যাং জ্ঞেযাঃ||৯-১০||
Adhikarana 9 (11) · Śloka 11
তত্র যত্ পঙ্কশৈবলহঠতৃণপদ্মপত্রপ্রভৃতিভিরবচ্ছন্নং রবিশশিকিরণানিলৈর্নাভিজুষ্টং গন্ধবর্ণরসোপসৃষ্টং তদ্ব্যাপন্নমিতি বিদ্যাত্ | তস্য স্পর্শরূপরসগন্ধবীর্যবিপাকদোষাঃ ষট্ সম্ভবন্তি | তত্র, খরতা পৈচ্ছিল্যমৌষ্ণ্যং দন্তগ্রাহিতা চ স্পর্শদোষঃ, পঙ্কসিকতাশৈবালবহুবর্ণতা রূপদোষঃ; ব্যক্তরসতা রসদোষঃ; অনিষ্টগন্ধতা গন্ধদোষঃ; যদুপযুক্তং তৃষ্ণাগৌরবশূলকফপ্রসেকানাপাদযতি স বির্যদোষঃ; যদুপযুক্তং চিরাদ্বিপচ্যতে বিষ্টম্ভযতি বা স বিপাকদোষ ইতি | ত এতে আন্তরিক্ষে ন সন্তি ||১১||
तत्र यत् पङ्कशैवलहठतृणपद्मपत्रप्रभृतिभिरवच्छन्नं रविशशिकिरणानिलैर्नाभिजुष्टं गन्धवर्णरसोपसृष्टं तद्व्यापन्नमिति विद्यात् | तस्य स्पर्शरूपरसगन्धवीर्यविपाकदोषाः षट् सम्भवन्ति | तत्र, खरता पैच्छिल्यमौष्ण्यं दन्तग्राहिता च स्पर्शदोषः, पङ्कसिकताशैवालबहुवर्णता रूपदोषः; व्यक्तरसता रसदोषः; अनिष्टगन्धता गन्धदोषः; यदुपयुक्तं तृष्णागौरवशूलकफप्रसेकानापादयति स विर्यदोषः; यदुपयुक्तं चिराद्विपच्यते विष्टम्भयति वा स विपाकदोष इति | त एते आन्तरिक्षे न सन्ति ||११||
🔊 Audio coming soon
ব্যাপন্নলক্ষণমাহ- তত্রেত্যাদি| পড্কঃ কর্দমঃ; শৈবালং শৈবলং; হঠঃ জলকুম্ভিকা, ‘অভূমিলগ্নমূলস্তৃণবিশেষঃ’ ইত্যেকে| অবচ্ছন্নম্ আচ্ছাদিতম্| নাভিজুষ্টং ন স্পৃষ্টম্| উপসৃষ্টং সংযুতম্| ব্যাপন্নং দোষাক্রান্তম্| তানেব ষড্দোষান্নির্দিশন্নাহ- তত্রেত্যাদি| ঔষ্ণ্যং ভূবাষ্পজনিতং, ন পুনরগ্ন্যাতপকৃতম্| দন্তগ্রাহিতা অতিশীততাঽভিপ্রেতা| পঙ্কেত্যাদি সিকতা বালুকা| অনিষ্টগন্ধতা বিস্রাদিগন্ধতা| ব্যক্তরসতা রসনেন্দ্রিযগ্রাহ্যমধুরাদিরসতা| যদুপযুক্তমিত্যাদি কফপ্রসেকঃ শ্লেষ্মস্রবণম্| বীর্যং চাচিন্ত্যক্রিযাহেতুঃ| যদুপযুক্তমিত্যাদি বিষ্টম্ভো গুড্গুডাশব্দঃ| ত এতে ইতি এতে পূর্বোক্তাঃ ষড্দোষাঃ| আন্তরিক্ষে ইত্যস্যোপলক্ষণত্বাদাকাশগুণভূযিষ্ঠেঽপি ন সম্ভবন্তি||১১||
Adhikarana 10 (12) · Śloka 12
ব্যাপন্নস্য চাগ্নিক্বথনং সূর্যাতপপ্রতাপনং তপ্তাযঃপিণ্ডসিকতালোষ্ট্রাণাং বা নির্বাপণং প্রসাদনং চ কর্তব্যং, নাগচম্পকোত্পলপাটলাপুষ্পপ্রভৃতিভিশ্চাধিবাসনমিতি ||১২||
व्यापन्नस्य चाग्निक्वथनं सूर्यातपप्रतापनं तप्तायःपिण्डसिकतालोष्ट्राणां वा निर्वापणं प्रसादनं च कर्तव्यं, नागचम्पकोत्पलपाटलापुष्पप्रभृतिभिश्चाधिवासनमिति ||१२||
🔊 Audio coming soon
ব্যাপন্নানাং প্রসন্নতোপাযং দর্শযন্নাহ- ব্যাপন্নানামিত্যাদি| অগ্নিক্বথনং মহাদোষদুষ্টস্য, সূর্যাতপপ্রতাপনমল্পদোষে, তপ্তাযঃপিণ্ডাদিনির্বাপণং মধ্যদোষে| লোষ্ট্রঃ কঠিনো মৃন্মযঃ| নির্বাপণং জলে নিঃক্ষেপণমিত্যর্থঃ| প্রসাদনং চ কর্তব্যমিতি অগ্নিক্বথনাদিস্বরূপং প্রসাদনং নান্যত্| গন্ধাপনযনে উপাযমাহ- নাগেত্যাদি| নাগো নাগকেশরঃ, চম্পকো রাজচম্পকঃ, উত্পলং সৌগন্ধিকং; প্রভৃতিগ্রহণাত্ কেতকীমল্লিকাদিপুষ্পাণি||১২||
Adhikarana 11 (13) · Śloka 13
সৌবর্ণে রাজতে তাম্রে কাংস্যে মণিমযেঽপি বা | পুষ্পাবতংসং ভৌমে বা সুগন্ধি সলিলং পিবেত্ ||১৩||
सौवर्णे राजते ताम्रे कांस्ये मणिमयेऽपि वा | पुष्पावतंसं भौमे वा सुगन्धि सलिलं पिबेत् ||१३||
🔊 Audio coming soon
তদুদকং গুণবদপি কিম্মযপাত্রস্থং পেযমিত্যাহ- সৌবর্ণে ইত্যাদি| পুষ্পাবতংসং পুষ্পসুগন্ধীকৃতম্||১৩||
Adhikarana 12 (14-16) · Śloka 16
ব্যাপন্নং বর্জযেন্নিত্যং তোযং যচ্চাপ্যনার্তবম্ | দোষসঞ্জননং হ্যেতন্নাদদীতাহিতং তু তত্ ||১৪|| ব্যাপন্নমুদকং যস্তু পিবতীহাপ্রসাদিতম্ | শ্বযথুং পাণ্ডুরোগং চ ত্বগ্দোষমবিপাকতাম্ ||১৫|| শ্বাসকাসপ্রতিশ্যাযশূলগুল্মোদরাণি চ | অন্যান্বা বিষমান্রোগান্প্রাপ্নুযাদচিরেণ সঃ ||১৬||
व्यापन्नं वर्जयेन्नित्यं तोयं यच्चाप्यनार्तवम् | दोषसञ्जननं ह्येतन्नाददीताहितं तु तत् ||१४|| व्यापन्नमुदकं यस्तु पिबतीहाप्रसादितम् | श्वयथुं पाण्डुरोगं च त्वग्दोषमविपाकताम् ||१५|| श्वासकासप्रतिश्यायशूलगुल्मोदराणि च | अन्यान्वा विषमान्रोगान्प्राप्नुयादचिरेण सः ||१६||
🔊 Audio coming soon
ব্যাপন্নাদিবর্জনমাহ- ব্যাপন্নমিত্যাদি| অনার্তবমিতি ঋতুবিশেষানুপযোগ্যম্, অনৃতুবৃষ্টমিতি কেচিত্| অপ্রসাধিতমিতি ক্বথনাদ্যসংস্কৃতম্||১৪-১৬||
Adhikarana 13 (17) · Śloka 17
তত্র সপ্ত কলুষস্য প্রসাদনানি ভবন্তি | তদ্যথা- কতকগোমেদকবিসগ্রন্থিশৈবালমূলবস্ত্রাণি মুক্তামণিশ্চেতি ||১৭||
तत्र सप्त कलुषस्य प्रसादनानि भवन्ति | तद्यथा- कतकगोमेदकबिसग्रन्थिशैवालमूलवस्त्राणि मुक्तामणिश्चेति ||१७||
🔊 Audio coming soon
তত্রেত্যাদি| কতকং শশকপুরীষপ্রতিমং ফলং; গোমেদকঃ পুষ্পরাগাভো মণিঃ, মত্কোলমিতি কেচিত্; বিসগ্রন্থিঃ পদ্মমূলং; শৈবালমূলং প্রসিদ্ধম্; মুক্তা মৌক্তিকং; মণিঃ স্ফটিকাদিঃ| এতেন রূপদোষাপযনোপাযো দর্শিতঃ| অন্যে তু বিসগ্রন্থীত্যস্যাগ্রে ‘পর্ণীমূলং’ ইতি পঠন্তি; তত্র পর্ণী পানীযপৃষ্ঠজা, তস্যা মূলং জটা||১৭||
Adhikarana 14 (18) · Śloka 18
পঞ্চ নিক্ষেপণানি ভবন্তি | তদ্যথা- ফলকং, ত্র্যষ্টকং, মুঞ্জবলয, উদকমঞ্চিকা, শিক্যং চেতি ||১৮||
पञ्च निक्षेपणानि भवन्ति | तद्यथा- फलकं, त्र्यष्टकं, मुञ्जवलय, उदकमञ्चिका, शिक्यं चेति ||१८||
🔊 Audio coming soon
পঞ্চেত্যাদি| নিক্ষেপণং যত্র জলং নিক্ষিপ্যতে স্থাপ্যতে, তেন ভূম্যাদিস্পর্শাভাবাদ্দোষান্তরানুদযঃ| ফলকং শাল্মলীকাষ্ঠাদিবিরচিতং, ত্র্যষ্টকম্ অষ্টাস্রদণ্ডত্রযসংযোগঃ, মুঞ্জবলযো মুঞ্জাদিবিরচিতো বলযাকারঃ, উদকমঞ্চিকা আকাশান্তরালে নিরন্তরনিহিতবেত্রবেণ্বাদিবিরচিতা বেত্রগৃহাদ্যভিধানা, শিক্যং মুঞ্জাদিবিরচিতং প্রসিদ্ধম্||১৮||
Adhikarana 15 (19) · Śloka 19
সপ্ত শীতীকরণানি ভবন্তি; তদ্যথা- প্রবাতস্থাপনম্, উদকপ্রক্ষেপণং, যষ্টিকাভ্রামণং, ব্যজনং, বস্ত্রোদ্ধরণং, বালুকাপ্রক্ষেপণং, শিক্যাবলম্বনং চেতি ||১৯||
सप्त शीतीकरणानि भवन्ति; तद्यथा- प्रवातस्थापनम्, उदकप्रक्षेपणं, यष्टिकाभ्रामणं, व्यजनं, वस्त्रोद्धरणं, वालुकाप्रक्षेपणं, शिक्यावलम्बनं चेति ||१९||
🔊 Audio coming soon
সপ্তেত্যাদি| উদকপ্রক্ষেপণমিতি সলিলপূর্ণে ভাজনে বস্ত্রাদিপীডিতে আকণ্ঠমপরশীতসলিলনিক্ষেপঃ| যষ্টিকাভ্রামণং যন্ত্রযষ্ট্যাদিভ্রামণম্| ব্যজনমিতি ব্যজনাদিনা বাতলীকরণম্| বস্ত্রোদ্ধরণং বস্ত্রেণ গালনম্| বালুকাপ্রক্ষেপণম্ উদকপাত্রস্য বালুকামধ্যে নিক্ষেপণম্| শিক্যাবলম্বনং প্রসিদ্ধম্||১৯||
Adhikarana 16 (20) · Śloka 20
নির্গন্ধমব্যক্তরসং তৃষ্ণাঘ্নং শুচি শীতলম্ | অচ্ছং লঘু চ হৃদ্যং চ তোযং গুণবদুচ্যতে ||২০||
निर्गन्धमव्यक्तरसं तृष्णाघ्नं शुचि शीतलम् | अच्छं लघु च हृद्यं च तोयं गुणवदुच्यते ||२०||
🔊 Audio coming soon
কীদৃশং পুনরুপাদেযং ভৌমমিত্যাহ- নির্গন্ধমিত্যাদি| শুচি অনুপহতম্| লঘু চেতি চকারঃ সমস্তগুণবত্ত্বেঽত্যন্তগুণকারি, অল্পগুণবত্ত্বে ত্বল্পগুণকারীতি তারতম্যসূচকঃ| হৃদ্যং চেত্যত্র তু ক্বথিতজলস্য হৃদযাপ্রিযত্বেঽপ্যুপগ্রহণার্থম| গুণবত্ প্রশস্তগুণোপেতম্||২০||
Adhikarana 17 (21) · Śloka 21
তত্র নদ্যঃ পশ্চিমাভিমুখাঃ পথ্যাঃ, লঘূদকত্বাত্; পূর্বাভিমুখাস্তু ন প্রশস্যন্তে, গুরূদকত্বাত্; দক্ষিণাভিমুখা নাতিদোষলাঃ, সাধারণত্বাত্ | তত্র সহ্যপ্রভবাঃকুষ্ঠং জনযন্তি, বিন্ধ্যপ্রভবাঃ কুষ্ঠং পাণ্ডুরোগং চ, মলযপ্রভবাঃ কৃমীন্, মহেন্দ্রপ্রভবাঃ শ্লীপদোদরাণি, হিমবত্প্রভবা হৃদ্রোগশ্বযথুশিরোরোগশ্লীপদগলগণ্ডান্, প্রাচ্যাবন্ত্যা অপরাবন্ত্যাশ্চার্শাংস্যুপজনযন্তি, পারিযাত্রপ্রভবাঃ পথ্যা বলারোগ্যকর্য ইতি ||২১||
तत्र नद्यः पश्चिमाभिमुखाः पथ्याः, लघूदकत्वात्; पूर्वाभिमुखास्तु न प्रशस्यन्ते, गुरूदकत्वात्; दक्षिणाभिमुखा नातिदोषलाः, साधारणत्वात् | तत्र सह्यप्रभवाःकुष्ठं जनयन्ति, विन्ध्यप्रभवाः कुष्ठं पाण्डुरोगं च, मलयप्रभवाः कृमीन्, महेन्द्रप्रभवाः श्लीपदोदराणि, हिमवत्प्रभवा हृद्रोगश्वयथुशिरोरोगश्लीपदगलगण्डान्, प्राच्यावन्त्या अपरावन्त्याश्चार्शांस्युपजनयन्ति, पारियात्रप्रभवाः पथ्या बलारोग्यकर्य इति ||२१||
🔊 Audio coming soon
ইদানীং জাঙ্গলপশ্চিমদেশস্থানূপপূর্বদেশস্থসাধারণমধ্যদেশস্থানাং নদীনাং গুণান্নির্দিশন্নাহ- তত্র নদ্য ইত্যাদি| পশ্চিমাভিমুখা জাঙ্গলপশ্চিমদেশস্থাঃ পশ্চিমসমুদ্রগাঃ, পূর্বাভিমুখাঃ আনূপদেশস্থাঃ পূর্বসমুদ্রগাঃ, দক্ষিণাভিমুখাঃ মধ্যদেশস্থাঃ| শৈলাদিভেদেন গুণান্নির্দিশন্নাহ- তত্রেত্যাদি| মলযপ্রভবা ইতি মলযপ্রভবা হি নদ্যো দ্বিবিধা ভবন্তি- পাষাণসিকতাবাহিন্যঃ, অপাষাণসিকতাবাহিন্যশ্চ; তত্র পাষাণসিকতাবাহিন্যঃ পথ্যাঃ, অপাষাণসিকতাবাহিন্যঃ কৃমীন্ জনযন্তি| হিমবত্প্রভবা ইতি তা অপি দ্বিবিধাঃ- হিমবদুপরিভাগপ্রভবাঃ পথ্যাঃ, অধোভাগপ্রভবাস্তু হৃদ্রোগাদিহেতবঃ| বিশিষ্টদেশাশ্রিতপর্বতপ্রভবাণাং নদীনাং সলিলগুণং দর্শযন্নাহ- প্রাচ্যেত্যদি| অবন্তী উজ্জযিনী তযোপলক্ষিতো দেশস্তস্য পূর্বস্যাং জাতাঃ প্রাচ্যাবন্ত্যাঃ, পশ্চিমস্যাং জাতা অপরাবন্ত্যাঃ শৈলাঃ, তেষু যা নদ্যঃ; এতেন বিশিষ্টদেশাশ্রিতপর্বতপ্রভবাণাং নদীনাং সলিলগুণ উক্তঃ| ‘উজ্জযিন্যুপলক্ষিতে দেশে যাঃ প্রাচীং পশ্চিমাং চাভিমুখং যান্তি তাঃ প্রাচ্যাবন্ত্যা অপরাবন্ত্যাশ্চ, ন তু উজ্জযিনীপ্রভবেষু পর্বতেষু’ ইত্যন্যে| অযমর্থো গযদাসেন দূষিতঃ| পারিযাত্রেত্যাদি পারিযাত্রঃ পর্বতভেদঃ, তত্র প্রভবা নদ্যো দ্বিবিধাঃ- তডাগজা দরীজাশ্চ; তত্র তডাগজাঃ পথ্যাঃ, দরীজা দোষলাঃ||২১||
Adhikarana 18 (22) · Śloka 22
নদ্যঃ শীঘ্রবহা লঘ্ব্যঃ প্রোক্তা যাশ্চামলোদকাঃ | গুর্ব্যঃ শৈবালসঞ্ছন্নাঃ কলুষা মন্দগাশ্চ যাঃ ||২২||
नद्यः शीघ्रवहा लघ्व्यः प्रोक्ता याश्चामलोदकाः | गुर्व्यः शैवालसञ्छन्नाः कलुषा मन्दगाश्च याः ||२२||
🔊 Audio coming soon
নদীনাং ধন্বানূপসাধারণশৈলাশ্রযাণাং সর্বাসামেব শেষীভূতং বিশেষং দর্শযন্নাহ- নদ্য ইত্যাদি||২২||
Adhikarana 19 (23) · Śloka 23
প্রাযেণ নদ্যো মরুষু সতিক্তা লবণান্বিতাঃ | লঘ্ব্যঃ সমধুরাশ্চৈব পৌরুষেযা বলে হিতাঃ ||২৩||
प्रायेण नद्यो मरुषु सतिक्ता लवणान्विताः | लघ्व्यः समधुराश्चैव पौरुषेया बले हिताः ||२३||
🔊 Audio coming soon
ইদানীং বিশিষ্টদেশপ্রভবাণাং নদীনাং গুণবিশেষং দর্শযন্নাহ- প্রাযেণেত্যাদি| মরুষু প্রসিদ্ধেষু মরুদেশেষু, নতু জাঙ্গলশব্দাভিহিতেষু| পৌরুষেযা বৃষ্যা ইত্যর্থঃ| অন্যে তু ‘ঈষত্কষাযা মধুরা লঘুপাকা বলে হিতাঃ’ ইতি পঠন্তি||২৩||
Adhikarana 20 (24) · Śloka 24
তত্র সর্বেষামেব ভৌমানাং গ্রহণং প্রত্যূষসি, তত্র হ্যমলত্বং শৈত্যং চাধিকং ভবতি, স এব চাপাং পরো গুণ ইতি ||২৪||
तत्र सर्वेषामेव भौमानां ग्रहणं प्रत्यूषसि, तत्र ह्यमलत्वं शैत्यं चाधिकं भवति, स एव चापां परो गुण इति ||२४||
🔊 Audio coming soon
ভৌমানাং দিনাপেক্ষং গ্রহণকালং নিযমযন্নাহ- তত্রেত্যাদি| প্রত্যূষসি প্রভাতে| স এব চাপাং পরো গুণ ইতি স চ শৈত্যামলত্বলক্ষণোঽপাং পরমো গুণ ইত্যর্থঃ| অন্যে তু ‘শৈত্যং চাপাং পরো গুণঃ’ ইতি পঠন্তি| তত্র চকারোঽমলসূচনার্থঃ||২৪||
Adhikarana 21 (25) · Śloka 25
দিবার্ককিরণৈর্জুষ্টং নিশাযামিন্দুরশ্মিভিঃ | অরূক্ষমনভিষ্যন্দি তত্তুল্যং গগনাম্বুনা ||২৫||
दिवार्ककिरणैर्जुष्टं निशायामिन्दुरश्मिभिः | अरूक्षमनभिष्यन्दि तत्तुल्यं गगनाम्बुना ||२५||
🔊 Audio coming soon
তত্র ভৌমানামর্কসোমকরসংস্কারজগুণেনান্তরিক্ষতুল্যত্বং তদলাভে উপাদানাযাহ- দিবেত্যাদি| অর্কগ্রহণে সিদ্ধে দিবাগ্রহণং সমস্তদিনপ্রাপ্ত্যর্থং, কিরণগ্রহণং দুর্দিনব্যুদাসার্থম্| দিবানিশীতিবচনাত্ সরোঽপি চন্দ্রার্ককরসম্বদ্ধং সত্যপ্যর্কে চন্দ্রসম্বন্ধাদরূক্ষং, সত্যপি চন্দ্রেঽর্কসম্বন্ধাদনভিষ্যন্দি| দোষান্ ব্যাধীন্ ঝটিতি যদভিষ্যন্দতে উত্পাদযতি তদভিষ্যন্দি, বিপর্যযেণানভিষ্যন্দি| নিশাগ্রহণং সমস্তরাত্রিপ্রাপ্ত্যর্থম্| যদ্যপি পৌর্ণমাস্যামেব সকলরাত্রৌ চন্দ্রসম্বন্ধো নান্যাসু, তথাঽপি একযাঽপি পৌর্ণমাস্যা রাত্র্যাঽতিশাযী সংস্কারঃ কৃতোঽন্যাস্বপ্যনুবর্ততে| এতেনাতিশীতোষ্ণস্নিগ্ধরূক্ষং নিন্দিতমিত্যুক্তং ভবতি||২৫||
Adhikarana 22 (26) · Śloka 26
গগনাম্বু ত্রিদোষঘ্নং গৃহীতং যত্ সুভাজনে | বল্যং রসাযনং মেধ্যং পাত্রাপেক্ষি ততঃ পরম্ ||২৬||
गगनाम्बु त्रिदोषघ्नं गृहीतं यत् सुभाजने | बल्यं रसायनं मेध्यं पात्रापेक्षि ततः परम् ||२६||
🔊 Audio coming soon
কিঙ্গুণং পুনর্গগনাম্বু যেনৈতত্তুল্যমুচ্যত ইত্যাহ- গগনাম্ব্বিত্যাদি| বল্যমুপচযৌজঃশক্তিকরত্বাত্| বিশিষ্টরসাদ্যুত্পাদনাদ্রসাযনং স্বস্থাতুরোপযোগি| মেধ্যং পবিত্রম্| পাত্রাপেক্ষি ততঃ পরমিতি অতিশ্রেষ্ঠভাজনে গৃহীতমধিকং গুণং করোতীত্যর্থঃ| অন্যে তু মেধ্যস্থানে শীতমিতি পঠন্তি| পূর্বং দোষশমনাদি নোক্তমধুনা অগস্ত্যোদযদর্শনবিশেষপ্রভাবাদুক্তম্||২৬||
Adhikarana 23 (27) · Śloka 27
রক্ষোঘ্নং শীতলং হ্লাদি জ্বরদাহবিষাপহম্ | চন্দ্রকান্তোদ্ভবং বারি পিত্তঘ্নং বিমলং স্মৃতম্ ||২৭||
रक्षोघ्नं शीतलं ह्लादि ज्वरदाहविषापहम् | चन्द्रकान्तोद्भवं वारि पित्तघ्नं विमलं स्मृतम् ||२७||
🔊 Audio coming soon
চন্দ্রকান্তমণিপ্রভবজলস্য গুণমাহ- রক্ষোঘ্নমিতাদি| রক্ষোঘ্নং রাক্ষসভযহরম্| হ্লাদি সুখাবহম্| চন্দ্রকান্তোদ্ভবমিতি চন্দ্রকান্তমণিপ্রভবম্| ইদং তু চন্দ্রকিরণানুপ্রবেশান্নাভসং, মণিপ্রাদুর্ভূতত্বাদ্ভৌমমিত্যুভযাত্মকম্||২৭||
Adhikarana 24 (28) · Śloka 29
মূর্চ্ছাপিত্তোষ্ণদাহেষু বিষে রক্তে মদাত্যযে | ভ্রমক্লমপরীতেষু তমকে বমথৌ তথা ||২৮|| ঊর্ধ্বগে রক্তপিত্তে চ শীতমম্ভঃ প্রশস্যতে |২৯|
मूर्च्छापित्तोष्णदाहेषु विषे रक्ते मदात्यये | भ्रमक्लमपरीतेषु तमके वमथौ तथा ||२८|| ऊर्ध्वगे रक्तपित्ते च शीतमम्भः प्रशस्यते |२९|
🔊 Audio coming soon
শীতোষ্ণবিষযমাহ- মূর্চ্ছেত্যাদি| পিত্তোষ্ণদাহেষ্বিতি উষ্ণে শরদি গ্রীষ্মে চ| মদাত্যযে মদ্যবিকারে| ভ্রমশ্চক্রারূঢস্যেব| পরীতেষু যুক্তেষু| তমকঃ শ্বাসো মোহো বা| বমথৌ ছর্দিরোগে||২৮||-
Adhikarana 25 (29-30) · Śloka 30
পার্শ্বশূলে প্রতিশ্যাযে বাতরোগে গলগ্রহে ||২৯|| আধ্মানে স্তিমিতে কোষ্ঠে সদ্যঃশুদ্ধে নবজ্বরে | হিক্কাযাং স্নেহপীতে চ শীতাম্বু পরিবর্জযেত্ ||৩০||
पार्श्वशूले प्रतिश्याये वातरोगे गलग्रहे ||२९|| आध्माने स्तिमिते कोष्ठे सद्यःशुद्धे नवज्वरे | हिक्कायां स्नेहपीते च शीताम्बु परिवर्जयेत् ||३०||
🔊 Audio coming soon
পার্শ্বেত্যাদি| স্তিমিতে কোষ্ঠে আমকোষ্ঠে ইত্যর্থঃ| সদ্যঃশুদ্ধে ইতি যস্মিন্ দিনে শোধনং কৃতং তত্রেত্যেকে, অপরে তু সপ্তাহমিত্যাহুঃ| যদ্যপ্যৌষ্ণ্যং স্পর্শদোষ উক্তস্তথাঽপ্যবস্থাযাং ব্যবহারার্থত্বেনোপাদেযম্; অন্যে তু পূর্বমৌষ্ণ্যং ভূবাষ্পজনিতমেব দোষত্বেনোক্তম্, ইদং ত্বগ্ন্যাতপকৃতমিতি সমাদধতি||২৯-৩০||
Adhikarana 26 (31-36) · Śloka 37
নাদেযং বাতলং রূক্ষং দীপনং লঘু লেখনম্ | তদভিষ্যন্দি মধুরং সান্দ্রং গুরু কফাবহম্ ||৩১|| তৃষ্ণাঘ্নং সারসং বল্যং কষাযং মধুরং লঘু | তাডাগং বাতলং স্বাদু কষাযং কটুপাকি চ ||৩২|| বাতশ্লেষ্মহরং বাপ্যং সক্ষারং কটু পিত্তলম্ | সক্ষারং পিত্তলং কৌপং শ্লেষ্মঘ্নং দীপনং লঘু ||৩৩|| চৌণ্ট্যমগ্নিকরং রূক্ষং মধুরং কফকৃন্ন চ | কফঘ্নং দীপনং হৃদ্যং লঘু প্রস্রবণোদ্ভবম্ ||৩৪|| মধুরং পিত্তশমনমবিদাহ্যৌদ্ভিদং স্মৃতম্ | বৈকিরং কটু সক্ষারং শ্লেষ্মঘ্নং লঘু দীপনম্ ||৩৫|| কৈদারং মধুরং প্রোক্তং বিপাকে গুরু দোষলম্ | তদ্বত্পাল্বলমুদ্দিষ্টং বিশেষাদ্দোষলং তু তত্ ||৩৬|| সামুদ্রমুদকং বিস্রং লবণং সর্বদোষকৃত্ |৩৭|
नादेयं वातलं रूक्षं दीपनं लघु लेखनम् | तदभिष्यन्दि मधुरं सान्द्रं गुरु कफावहम् ||३१|| तृष्णाघ्नं सारसं बल्यं कषायं मधुरं लघु | ताडागं वातलं स्वादु कषायं कटुपाकि च ||३२|| वातश्लेष्महरं वाप्यं सक्षारं कटु पित्तलम् | सक्षारं पित्तलं कौपं श्लेष्मघ्नं दीपनं लघु ||३३|| चौण्ट्यमग्निकरं रूक्षं मधुरं कफकृन्न च | कफघ्नं दीपनं हृद्यं लघु प्रस्रवणोद्भवम् ||३४|| मधुरं पित्तशमनमविदाह्यौद्भिदं स्मृतम् | वैकिरं कटु सक्षारं श्लेष्मघ्नं लघु दीपनम् ||३५|| कैदारं मधुरं प्रोक्तं विपाके गुरु दोषलम् | तद्वत्पाल्वलमुद्दिष्टं विशेषाद्दोषलं तु तत् ||३६|| सामुद्रमुदकं विस्रं लवणं सर्वदोषकृत् |३७|
🔊 Audio coming soon
সমস্তনদীনাং শেষগুণমাহ- নাদেযমিত্যাদি| দ্বিবিধং কৌপং সক্ষারমব্যক্তরসং চ; যত্ সক্ষারং তত্ পিত্তলং, ইতরন্ন পিত্তলম্||৩১-৩৬||-
Adhikarana 27 (37-38) · Śloka 39
অনেকদোষমানূপং বার্যভিষ্যন্দি গর্হিতম্ ||৩৭|| এভির্দোষৈরসংযুক্তং নিরবদ্যং তু জাঙ্গলম্ | পাকেঽবিদাহি তৃষ্ণাঘ্নং প্রশস্তং প্রীতিবর্ধনম্ ||৩৮|| দীপনং স্বাদু শীতং চ তোযং সাধারণং লঘু |৩৯|
अनेकदोषमानूपं वार्यभिष्यन्दि गर्हितम् ||३७|| एभिर्दोषैरसंयुक्तं निरवद्यं तु जाङ्गलम् | पाकेऽविदाहि तृष्णाघ्नं प्रशस्तं प्रीतिवर्धनम् ||३८|| दीपनं स्वादु शीतं च तोयं साधारणं लघु |३९|
🔊 Audio coming soon
আনূপধন্বসাধারণগুণৈর্নির্দিশন্নাহ- অনেকেত্যাদি| অত্র স্পর্শরূপরসগন্ধবীর্যবিপাকাঃ প্রাগুক্তা দোষা জ্ঞেযাঃ| এভিরিতি এভিঃ পূর্বোক্তৈঃ স্পর্শাদিভিরিত্যর্থঃ| অবিদাহি অদাহকারীত্যর্থঃ||৩৭-৩৮||-
Adhikarana 28 (39) · Śloka 40
কফমেদোঽনিলামঘ্নং দীপনং বস্তিশোধনম্ ||৩৯|| শ্বাসকাসজ্বরহরং পথ্যমুষ্ণোদকং সদা |৪০|
कफमेदोऽनिलामघ्नं दीपनं बस्तिशोधनम् ||३९|| श्वासकासज्वरहरं पथ्यमुष्णोदकं सदा |४०|
🔊 Audio coming soon
উষ্ণোদকগুণমাহ- কফেত্যাদি| পথ্যং হিতম্| উষ্ণোদকমর্ধাবশিষ্টমুদকম্||৩৯||-
Adhikarana 29 (40) · Śloka 41
যত্ ক্বাথ্যমানং নির্বেগং নিষ্ফেনং নির্মলং লঘু ||৪০|| চতুর্ভাগাবশেষং তু তত্তোযং গুণবত্ স্মৃতম্ |৪১|
यत् क्वाथ्यमानं निर्वेगं निष्फेनं निर्मलं लघु ||४०|| चतुर्भागावशेषं तु तत्तोयं गुणवत् स्मृतम् |४१|
🔊 Audio coming soon
উষ্ণোদকভেদমাহ- যদিত্যাদি| নির্বেগং নিশ্চলম্||৪০||-
Adhikarana 30 (41) · Śloka 42
ন চ পর্যুষিতং দেযং কদাচিদ্বারি জানতা ||৪১|| অম্লীভূতং কফোত্ক্লেদি ন হিতং তত্ পিপাসবে |৪২|
न च पर्युषितं देयं कदाचिद्वारि जानता ||४१|| अम्लीभूतं कफोत्क्लेदि न हितं तत् पिपासवे |४२|
🔊 Audio coming soon
পর্যুষিতমুষ্ণোদকং ন দাতব্যমিত্যাহ- ন চেত্যাদি| পর্যুষিতং রাত্র্যুষিতম্||৪১||-
Adhikarana 31 (42) · Śloka 43
মদ্যপানাত্সমুদ্ভূতে রোগে পিত্তোত্থিতে তথা ||৪২|| সন্নিপাতসমুত্থে চ শৃতশীতং প্রশস্যতে |৪৩|
मद्यपानात्समुद्भूते रोगे पित्तोत्थिते तथा ||४२|| सन्निपातसमुत्थे च शृतशीतं प्रशस्यते |४३|
🔊 Audio coming soon
শৃতশীতবিষযমাহ- মদ্যপানাদিত্যাদি| পূর্বং মদাত্যযে শীতম্, অত্র তু মদাত্যযসমুদ্ভূতে রোগে শৃতশীতং; মদাত্যযে মদাত্যযসমুদ্ভূতে রোগে চোভযস্মিন্নপি শৃতশীতং প্রযোক্তব্যমিত্যর্থঃ||৪২||-
Adhikarana 32 (43) · Śloka 44
স্নিগ্ধং স্বাদু হিমং হৃদ্যং দীপনং বস্তিশোধনম্ ||৪৩|| বৃষ্যং পিত্তপিপাসাঘ্নং নালিকেরোদকং গুরু |৪৪|
स्निग्धं स्वादु हिमं हृद्यं दीपनं बस्तिशोधनम् ||४३|| वृष्यं पित्तपिपासाघ्नं नालिकेरोदकं गुरु |४४|
🔊 Audio coming soon
উদকপ্রসঙ্গেন নারিকেলফলসলিলস্যাপি গুণং নিদর্শযন্নাহ- স্নিগ্ধমিত্যাদি| নারিকেলোদকমীষত্পক্বার্দ্রনারিকেলফলান্তর্বর্তি সলিলমিত্যর্থঃ| জেজ্ঝটস্তু ‘লঘু’ ইতি পঠতি, লঘুত্বং চ শীঘ্রপরিণামিত্বমিচ্ছতি||৪৩||-
Adhikarana 33 (44) · Śloka 45
দাহাতীসারপিত্তাসৃঙ্মূর্চ্ছামদ্যবিষার্তিষু ||৪৪|| শৃতশীতং জলং শস্তং তৃষ্ণাচ্ছর্দিভ্রমেষু চ |৪৫|
दाहातीसारपित्तासृङ्मूर्च्छामद्यविषार्तिषु ||४४|| शृतशीतं जलं शस्तं तृष्णाच्छर्दिभ्रमेषु च |४५|
🔊 Audio coming soon
অধুনা শৃতশীতস্য শেষবিষযমাহ- দাহেত্যাদি||৪৪||-
Adhikarana 34 (45-46) · Śloka 46
অরোচকে প্রতিশ্যাযে প্রসেকে শ্বযথৌ ক্ষযে ||৪৫|| মন্দেঽগ্নাবুদরে কুষ্ঠে জ্বরে নেত্রামযে তথা | ব্রণে চ মধুমেহে চ পানীযং মন্দমাচরেত্ ||৪৬|| ইতি জলবর্গঃ |
अरोचके प्रतिश्याये प्रसेके श्वयथौ क्षये ||४५|| मन्देऽग्नावुदरे कुष्ठे ज्वरे नेत्रामये तथा | व्रणे च मधुमेहे च पानीयं मन्दमाचरेत् ||४६|| इति जलवर्गः |
🔊 Audio coming soon
কেষু রোগেষু জলং মন্দং পেযমিত্যাহ- অরোচকে ইত্যাদি| যাবত্ প্রতিষেধযিতুমশক্যং তাবদাচরেদিতি মন্দার্থঃ| অযং পানীযবর্গো নিবন্ধকারৈর্বিপরীতক্রমেণ পঠিতঃ| অস্মাভিস্তু যথৈব গুরুভিঃ কথিতস্তথৈব ক্রমেণ ব্যাখ্যাতঃ| ইতি পানীযবর্গঃ||৪৫-৪৬||
Adhikarana 35 (47) · Śloka 47
অথ ক্ষীরবর্গঃ | গব্যমাজং তথা চৌষ্ট্রমাবিকং মাহিষং চ যত্ | অশ্বাযাশ্চৈব নার্যাশ্চ করেণূনাং চ যত্পযঃ ||৪৭||
अथ क्षीरवर्गः | गव्यमाजं तथा चौष्ट्रमाविकं माहिषं च यत् | अश्वायाश्चैव नार्याश्च करेणूनां च यत्पयः ||४७||
🔊 Audio coming soon
ইদানীং ক্ষীরস্যাষ্টবিধাং যোনিমাহ- গব্যমিত্যাদি| করেণুর্হস্তিনী| অশ্বাযাশ্চ নার্যাশ্চ করেণূনাং চেতি চকারত্রযমনুক্তসমানজাতীযক্ষীরাণাং সমুচ্চযার্থং, তেনাশ্বতরীখরীমৃগীখঙ্গিনীক্ষীরাণামপি গ্রহণম্| তত্ পুনর্ভূযসা নোপযুজ্যত ইতি ন কৃতং সাক্ষাত্তদ্গ্রহণম্||৪৭||
Adhikarana 36 (48) · Śloka 48
তত্ত্বনেকৌষধিরসপ্রসাদং প্রাণদং গুরু | মধুরং পিচ্ছিলং শীতং স্নিগ্ধং শ্লক্ষ্ণং সরং মৃদু | সর্বপ্রাণভৃতাং তস্মাত্ সাত্ম্যং ক্ষীরমিহোচ্যতে ||৪৮||
तत्त्वनेकौषधिरसप्रसादं प्राणदं गुरु | मधुरं पिच्छिलं शीतं स्निग्धं श्लक्ष्णं सरं मृदु | सर्वप्राणभृतां तस्मात् सात्म्यं क्षीरमिहोच्यते ||४८||
🔊 Audio coming soon
সর্বেষামেব ক্ষীরাণাং দশবিধং গুণং নির্দিশন্নাহ- তত্ত্বিত্যাদি| তত্ত্বনেকৌষধিরসপ্রসাদমিতি তুশব্দঃ পুনরর্থে, ওষধিশব্দেন সর্বদ্রব্যাণি ন তু ফলপাকাবসানাঃ, রসঃ সারঃ কিট্টভাব(গ)রহিত ওজঃশুক্রাদিবত্, এতেন শুক্লত্বং দ্যোত্যতে| প্রাণদমগ্নিসোমাদিধারণাদুপচযাদিকরণাদ্বা| পিচ্ছিলং বিশদবিপরীতম্| শ্লক্ষ্ণং খরবিপরীতম্| এবমিদং ক্ষীরং দশগুণযুক্তং ভবতি| জেজ্ঝটস্তু “তত্ত্বনেকৌষধিরসপ্রসাদঃ ক্ষীরতাং গতঃ| সর্বপ্রাণভৃতাং তস্মাত্ সাত্ম্যং ক্ষীরমিহোচ্যতে” ইতি পঠতি, ব্যারব্যানযতি চ- ক্ষীরতাং গতঃ ক্ষীরত্বং প্রাপ্তঃ| প্রাণভৃতাং প্রাণিনাং জরাযুজানাম্| সাত্ম্যং নাম সুস্বং যত্ করোতি তদুচ্যতে||৪৮||
Adhikarana 37 (49) · Śloka 49
তত্র সর্বমেব ক্ষীরং প্রাণিনামপ্রতিষিদ্ধং জাতিসাত্ম্যাত্, বাতপিত্তশোণিতমানসেষ্বপি বিকারেষ্ববিরুদ্ধং, জীর্ণজ্বরকাসশ্বাসশোষক্ষযগুল্মোন্মাদোদরমূর্চ্ছাভ্রমমদদাহপিপাসাহৃদ্বস্তিদোষ- পাণ্ডুরোগগ্রহণীদোষার্শঃশূলোদাবর্তাতিসারপ্রবাহিকাযোনিরোগগর্ভাস্রাবরক্তপিত্তশ্রমক্লমহরং, পাপ্মাপহং বল্যং বৃষ্যং বাজীকরণং রসাযনং মেধ্যং বযঃস্থাপনমাযুষ্যং জীবনং বৃংহণং সন্ধানং বমনবিরেচনাস্থাপনং তুল্যগুণত্বাচ্চৌজসো বর্ধনং বালবৃদ্ধক্ষতক্ষীণানাং ক্ষুদ্ব্যবাযব্যাযামকর্শিতানাং চ পথ্যতমম্ ||৪৯||
तत्र सर्वमेव क्षीरं प्राणिनामप्रतिषिद्धं जातिसात्म्यात्, वातपित्तशोणितमानसेष्वपि विकारेष्वविरुद्धं, जीर्णज्वरकासश्वासशोषक्षयगुल्मोन्मादोदरमूर्च्छाभ्रममददाहपिपासाहृद्बस्तिदोष- पाण्डुरोगग्रहणीदोषार्शःशूलोदावर्तातिसारप्रवाहिकायोनिरोगगर्भास्रावरक्तपित्तश्रमक्लमहरं, पाप्मापहं बल्यं वृष्यं वाजीकरणं रसायनं मेध्यं वयःस्थापनमायुष्यं जीवनं बृंहणं सन्धानं वमनविरेचनास्थापनं तुल्यगुणत्वाच्चौजसो वर्धनं बालवृद्धक्षतक्षीणानां क्षुद्व्यवायव्यायामकर्शितानां च पथ्यतमम् ||४९||
🔊 Audio coming soon
সর্বেষামেব সমানগুণানাং ক্ষীরাণাং সমানকর্ম নির্দেষ্টুমাহ- তত্রেত্যাদি| সর্বম্ অষ্টবিধমপাত্যর্থঃ| প্রাণিনাং জরাযুজানাম্| জাতিসাত্ম্যাত্ মনুষ্যাদিজাতিসুখকরত্বাত্| মানসেষু বিকারেষু রজস্তমঃসংসর্গজেষু| জীর্ণজ্বরেত্যাদি জীর্ণশব্দমেকে জ্বরেণ সহ সম্বধ্নন্তি, অন্যে তু ক্লমান্তৈর্জ্বরাদিভিঃ সহ, জীর্ণত্বেনৈতেষু প্রাযেণ বাতপিত্তানুবন্ধো ভবতীত্যাহুঃ| হরশব্দো জ্বরাদিভিঃ ক্লমান্তৈঃ সর্বৈঃ সহ প্রত্যেকমভিসম্বধ্যতে| কাসেতি কাসোঽত্র কফকাসং ত্যক্ত্বা, শোষোঽত্র মুখকণ্ঠতালূনাং, ক্ষযো রাজযক্ষ্মা, গুল্মোদরযোর্বাতপৈত্তিকযোঃ, মূর্চ্ছাভ্রমমদপিপাসাসু কফামরহিতাসু, হৃদযদোষাণাং বাতপিত্তপ্রাযাণাং, পাণ্ডুরোগে বাতপিত্তপ্রাযে, গ্রহণীপ্রদোষে জীর্ণাবস্থাযাম্, অর্শস্সু রক্তপিত্তপ্রবলেষু, অতিসারে বাতপিত্তশোণিতপ্রাযে পক্বাবস্থাযাং, প্রবাহিকাযাং বাতপিত্তপ্রবলাযাং, গর্ভস্রাবে আমান্বযাদিনা; রক্তপিত্তে কফপ্রধানে, অগ্নিমান্দ্যে চ ন দেযম্| বল্যং মাংসোপচযকরম্, অন্যে ওজসো বর্ধনমিতি; তন্মতে ‘ওজসো বর্ধনম্’ ইতি পাঠোঽগ্রে ন ভবতি| বৃষ্যং শুক্রজনকং, বাজীকরণং শুক্রপ্রবর্তনম্, এতেন জনকপ্রবর্তকমিত্যুক্তম্| রসাযনং সততোপযোগাত্| মেধ্যং মেধাজনকং পবিত্রং বা| পাপ্মাপহং পাপোপশমনং বিশেষতো গব্যম্| বযঃস্থাপনং জরযা বিনা| আযুষ্যং আযুষে হিতম্| সন্ধানং ভগ্নস্য| বমনবিরেচনাস্থাপনমিতি বমনং বমনদ্রব্যসংযোগি; বিরেচনং সরত্বান্মৃদুকোষ্ঠস্য, ‘রেচনদ্রব্যসংযোগাদ্বিরেচনম্’ ইত্যন্যে; আস্থাপনম্ আস্থাপনদ্রব্যসংযোগি, আস্থাপনং নিরূহণমিত্যনর্থান্তরম্| তুল্যগুণত্বাচ্চৌজসো বর্ধনমিতি যাবন্ত এবৌজসো গুণাস্তাবন্ত এব ক্ষীরস্যাপি, তেন তৈস্তৈরেবাত্মগুণৈস্তেষাং সমানানামোজসো গুণানামভিবর্ধনম্| জেজ্ঝটস্তু ‘গব্যং তু শীতং স্নিগ্ধং মধুরমবিদাহী’ ইতি পঠতি, শেষং তু সমং; তন্মতে গোক্ষীরস্যৈব গুণাঃ||৪৯||
Adhikarana 38 (50) · Śloka 51
অল্পাভিষ্যন্দি গোক্ষীরং স্নিগ্ধং গুরু রসাযনম্ | রক্তপিত্তহরং শীতং মধুরং রসপাকযোঃ ||৫০|| জীবনীযং তথা বাতপিত্তঘ্নং পরমং স্মৃতম্ |৫১|
अल्पाभिष्यन्दि गोक्षीरं स्निग्धं गुरु रसायनम् | रक्तपित्तहरं शीतं मधुरं रसपाकयोः ||५०|| जीवनीयं तथा वातपित्तघ्नं परमं स्मृतम् |५१|
🔊 Audio coming soon
সামান্যেন ক্ষীরস্য গুণমভিধায গব্যস্যৈব বিশিষ্টং গুণকর্ম নির্দিশন্নাহ- গোক্ষীরমিত্যাদি| দোষধাতুমলস্রোতসাং মন্দক্লেদপ্রাপ্তিজনকমল্পাভিষ্যন্দি||৫০||-
Adhikarana 39 (51-52) · Śloka 53
গব্যতুল্যগুণং ত্বাজং বিশেষাচ্ছোষিণাং হিতম্ ||৫১|| দীপনং লঘু সঙ্গ্রাহি শ্বাসকাসাস্রপিত্তনুত্ | অজানামল্পকাযত্বাত্ কটুতিক্তনিষেবণাত্ ||৫২|| নাত্যম্বুপানাদ্ব্যাযামাত্ সর্বব্যাধিহরং পযঃ |৫৩|
गव्यतुल्यगुणं त्वाजं विशेषाच्छोषिणां हितम् ||५१|| दीपनं लघु सङ्ग्राहि श्वासकासास्रपित्तनुत् | अजानामल्पकायत्वात् कटुतिक्तनिषेवणात् ||५२|| नात्यम्बुपानाद्व्यायामात् सर्वव्याधिहरं पयः |५३|
🔊 Audio coming soon
অজাক্ষীরগুণমাহ- গব্যতুল্যগুণমিত্যাদি| গুণশব্দস্তত্কার্যে ফলে বর্ততে| অত্রাল্পকাযত্বাদযঃ স্বরূপবিশেষেণ ন ক্ষীরপথ্যত্বে হেতবঃ, তেষামল্পকাযত্বাদীনামব্যাদিষ্বপি সম্ভবাত্; অতো দ্বযমেব ক্ষীরপথ্যাপথ্যবিভাগে হেতুর্জাতিবিশেষো ভ্রমণাদিবিশেষশ্চ| সর্বব্যাধিহরং সর্বদোষহরম্||৫১-৫২||-
Adhikarana 40 (53) · Śloka 54
রূক্ষোষ্ণং লবণং কিঞ্চিদৌষ্ট্রং স্বাদুরসং লঘু ||৫৩|| শোফগুল্মোদরার্শোঘ্নং কৃমিকুষ্ঠবিষাপহম্ |৫৪|
रूक्षोष्णं लवणं किञ्चिदौष्ट्रं स्वादुरसं लघु ||५३|| शोफगुल्मोदरार्शोघ्नं कृमिकुष्ठविषापहम् |५४|
🔊 Audio coming soon
ইদানীমৌষ্ট্রক্ষীরগুণমাহ- রূক্ষেত্যাদি||৫৩||-
Adhikarana 41 (54) · Śloka 55
আবিকং মধুরং স্নিগ্ধং গুরু পিত্তকফাবহম্ ||৫৪|| পথ্যং কেবলবাতেষু কাসে চানিলসম্ভবে |৫৫|
आविकं मधुरं स्निग्धं गुरु पित्तकफावहम् ||५४|| पथ्यं केवलवातेषु कासे चानिलसम्भवे |५५|
🔊 Audio coming soon
আবিকক্ষীরগুণমাহ- আবিকমিত্যাদি| কফাবহং কফকরম্| কেবলবাতেষ্বিতি কেবলেষ্বনাবৃতেষু, অসংযুক্তেষ্বপীত্যর্থঃ| অন্যে ত্বেবং পঠন্তি- “আবিকং মধুরং স্নিগ্ধমুষ্ণং পিত্তকফাবহম্| গুরু শুদ্ধেঽনিলে পথ্যং সেকশ্চানিলশোণিতে”- ইতি| শুদ্ধেঽনিলে অনাবৃতে, অনিলশোণিতে রক্তাবৃতে বাতে, সেকঃ পরিষেকঃ||৫৪||-
Adhikarana 42 (55) · Śloka 56
মহাভিষ্যন্দি মধুরং মাহিষং বহ্নিনাশনম্ ||৫৫|| নিদ্রাকরং শীততরং গব্যাত্ স্নিগ্ধতরং গুরু |৫৬|
महाभिष्यन्दि मधुरं माहिषं वह्निनाशनम् ||५५|| निद्राकरं शीततरं गव्यात् स्निग्धतरं गुरु |५६|
🔊 Audio coming soon
মহিষীক্ষীরমাহ- মহাভিষ্যন্দীত্যাদি| দোষধাতুমলস্রোতসামতিশযক্লেদপ্রাপ্তিজনকং মহাভিষ্যন্দি| গব্যাত্ স্নিগ্ধতরং গোক্ষীরাত্ স্নিগ্ধতরমিত্যর্থঃ||৫৫||-
Adhikarana 43 (56) · Śloka 57
উষ্ণমৈকশফং বল্যং শাখাবাতহরং পযঃ ||৫৬|| মধুরাম্লরসং রূক্ষং লবণানুরসং লঘু |৫৭|
उष्णमैकशफं बल्यं शाखावातहरं पयः ||५६|| मधुराम्लरसं रूक्षं लवणानुरसं लघु |५७|
🔊 Audio coming soon
অশ্বাদিক্ষীরমাহ- উষ্ণমিত্যাদি| একশফা অশ্বাদযঃ, শফঃ খুরঃ| ‘শাখা বাহুজঙ্ঘে, তদ্বাতহরম্’ ইত্যেকে; ‘শাখা রক্তাদযো ধাতবঃ’ ইত্যন্যে| ‘কাঞ্জিকস্যেব প্রভাবাদাধারপ্রভাবাচ্চ শাখাযাং হন্তি, কোষ্ঠে করোতী’ ইত্যামনন্তি||৫৬||-
Adhikarana 44 (57) · Śloka 58
নার্যাস্তু মধুরং স্তন্যং কষাযানুরসং হিমম্ ||৫৭|| নস্যাশ্চ্যোতনযোঃ পথ্যং জীবনং লঘু দীপনম্ |৫৮|
नार्यास्तु मधुरं स्तन्यं कषायानुरसं हिमम् ||५७|| नस्याश्च्योतनयोः पथ्यं जीवनं लघु दीपनम् |५८|
🔊 Audio coming soon
মানুষং ক্ষীরমাহ- নার্যাস্ত্বিত্যাদি| আশ্চ্যোতনমক্ষিপূরণম্||৫৭||-
Adhikarana 45 (58) · Śloka 59
হস্তিন্যা মধুরং বৃষ্যং কষাযানুরসং গুরু ||৫৮|| স্নিগ্ধং স্থৈর্যকরং শীতং চক্ষুষ্যং বলবর্ধনম্ |৫৯|
हस्तिन्या मधुरं वृष्यं कषायानुरसं गुरु ||५८|| स्निग्धं स्थैर्यकरं शीतं चक्षुष्यं बलवर्धनम् |५९|
🔊 Audio coming soon
হস্তিনীক্ষীরমাহ- হস্তিন্যা ইত্যাদি| স্থৈর্যকরং শরীরদার্ঢ্যকরম্, অন্যে ‘তারুণ্স্থাপকম্’ ইত্যাহুঃ||৫৮||-
Adhikarana 46 (59) · Śloka 60
প্রাযঃ প্রাভাতিকং ক্ষীরং গুরু বিষ্টম্ভি শীতলম্ ||৫৯|| রাত্র্যাঃ সোমগুণত্বাচ্চ ব্যাযামাভাবতস্তথা |৬০|
प्रायः प्राभातिकं क्षीरं गुरु विष्टम्भि शीतलम् ||५९|| रात्र्याः सोमगुणत्वाच्च व्यायामाभावतस्तथा |६०|
🔊 Audio coming soon
প্রাভাতিকং ক্ষীরমাহ- প্রায ইত্যাদি| বিষ্টম্ভো গুডগুডাশব্দঃ||৫৯||-
Adhikarana 47 (60) · Śloka 61
দিবাকরাভিতপ্তানাং ব্যাযামানিলসেবনাত্ ||৬০|| শ্রমঘ্নং বাতনুচ্চৈব চক্ষুষ্যং চাপরাহ্ণিকম্ |৬১|
दिवाकराभितप्तानां व्यायामानिलसेवनात् ||६०|| श्रमघ्नं वातनुच्चैव चक्षुष्यं चापराह्णिकम् |६१|
🔊 Audio coming soon
আপরাহ্ণিকক্ষীরমাহ- দিবাকরেত্যাদি| অপরাহ্ণো দিনান্তভাগঃ| বৃদ্ধানুমতৌ পাঠাবিমৌ||৬০||-
Adhikarana 48 (61) · Śloka 61
পযোঽভিষ্যন্দি গুর্বামং প্রাযশঃ পরিকীর্তিতম্ ||৬১||
पयोऽभिष्यन्दि गुर्वामं प्रायशः परिकीर्तितम् ||६१||
🔊 Audio coming soon
আমক্ষীরমাহ- পয ইত্যাদি||৬১||
Adhikarana 49 (62) · Śloka 62
তদেবোক্তং লঘুতরমনভিষ্যন্দি বৈ শৃতম্ |৬২|
तदेवोक्तं लघुतरमनभिष्यन्दि वै शृतम् |६२|
🔊 Audio coming soon
পক্বস্য গুণমাহ- তদিত্যাদি| শৃতং পক্বম্, আবর্তিতমিত্যর্থঃ| অনভিষ্যন্দি কিঞ্চিদভিষ্যন্দীত্যর্থঃ|৬২|
Adhikarana 50 (62) · Śloka 62
বর্জযিত্বা স্ত্রিযাঃ স্তন্যমামমেব হি তদ্ধিতম্ ||৬২||
वर्जयित्वा स्त्रियाः स्तन्यमाममेव हि तद्धितम् ||६२||
🔊 Audio coming soon
স্ত্রীক্ষীরে পাকনিষেধমাহ- বর্জযিত্বেত্যাদি| স্ত্রিযাঃ স্তন্যং বর্জযিত্বাঽন্যদুগ্ধানি শৃতান্যেব হিতানি ভবন্তীত্যর্থঃ| তত্ স্ত্রীভবং স্তন্যমামমক্বথিতমেব হিতম্||৬২||
Adhikarana 51 (63) · Śloka 63
ধারোষ্ণং গুণবত্ ক্ষীরং বিপরীতমতোঽন্যথা |৬৩|
धारोष्णं गुणवत् क्षीरं विपरीतमतोऽन्यथा |६३|
🔊 Audio coming soon
তেষাং সর্বক্ষীরাণামেব দোহনকালধারাপাতোষ্ণানাং গুণবিশেষং নির্দিশন্নাহ- ধারোষ্ণমিত্যাদি| গুণবত্ গুণান্বিতং, বিপরীতমগুণবত্, অতোঽন্যথেতি ধারোষ্ণং যন্ন ভবতি|৬৩|
Adhikarana 52 (63) · Śloka 63
তদেবাতিশৃতং শীতং গুরু বৃংহণমুচ্যতে ||৬৩||
तदेवातिशृतं शीतं गुरु बृंहणमुच्यते ||६३||
🔊 Audio coming soon
অতিপক্বমাহ- তদিত্যাদি| বৃংহণং দেহবৃদ্ধিকরম্||৬৩||
Adhikarana 53 (64) · Śloka 64
অনিষ্টগন্ধমম্লং চ বিবর্ণং বিরসং চ যত্ | বর্জ্যং সলবণং ক্ষীরং যচ্চ বিগ্রথিতং ভবেত্ ||৬৪|| ইতি ক্ষীরবর্গঃ |
अनिष्टगन्धमम्लं च विवर्णं विरसं च यत् | वर्ज्यं सलवणं क्षीरं यच्च विग्रथितं भवेत् ||६४|| इति क्षीरवर्गः |
🔊 Audio coming soon
কীদৃশং ক্ষীরং বর্জ্যমিত্যাহ- অনিষ্টেত্যাদি| বিবর্ণং শুক্লাদ্বর্ণান্তরমাপন্নম্| বিরসং মধুরাদন্যরসম্| বিগ্রথিতমম্লাদিদ্রব্যসংযোগেন বিগ্রথিতাবযবং, যল্লোকে বিনষ্টমিতি প্রসিদ্ধম্||৬৪||
Adhikarana 54 (65) · Śloka 65
অথ দধিবর্গঃ | দধি তু মধুরমম্লমত্যম্লং চেতি; তত্কষাযানুরসং স্নিগ্ধমুষ্ণং পীনসবিষমজ্বরাতিসারারোচকমূত্রকৃচ্ছ্রকার্শ্যাপহং বৃষ্যং প্রাণকরং মঙ্গল্যং চ ||৬৫||
अथ दधिवर्गः | दधि तु मधुरमम्लमत्यम्लं चेति; तत्कषायानुरसं स्निग्धमुष्णं पीनसविषमज्वरातिसारारोचकमूत्रकृच्छ्रकार्श्यापहं वृष्यं प्राणकरं मङ्गल्यं च ||६५||
🔊 Audio coming soon
অথ দধিভেদানাহ- দধীত্যাদি| এতেন ত্রিপ্রকারং দধ্যুক্তম্| সামান্যদধিগুণমাহ- তদিত্যাদি| উষ্ণমুষ্ণবীর্যম্| বৃষ্যং শুক্রকরম্| মঙ্গল্যং মঙ্গলহেতুঃ| অন্যে ত্বেবং পঠন্তি- ‘দধি তু মধুরং সৃষ্টমূত্রপুরীষং গুর্বম্লমভিষ্যন্দি শ্লেষ্মপিত্তশোফবর্ধনং কার্শ্যাপহং রোচনং মঙ্গল্যং চ, তদেব চোদ্ধৃতসারং গ্রাহ্যনভিষ্যন্দি চ, সসরং কফমেদঃশুক্রকৃত্, ত্রিদোষকৃন্মন্দজাতম্’ ইতি||৬৫||
Adhikarana 55 (66) · Śloka 66
মহাভিষ্যন্দি মধুরং কফমেদোবিবর্ধনম্ | কফপিত্তকৃদম্লং স্যাদত্যম্লং রক্তদূষণম্ ||৬৬||
महाभिष्यन्दि मधुरं कफमेदोविवर्धनम् | कफपित्तकृदम्लं स्यादत्यम्लं रक्तदूषणम् ||६६||
🔊 Audio coming soon
অথ ত্রিপ্রকারস্যাপি দধ্নো গুণমাহ- মহেত্যাদি| মহাভিষ্যন্দীতি পূর্ববদ্ব্যাখ্যেযম্||৬৬||
Adhikarana 56 (67) · Śloka 67
বিদাহি সৃষ্টবিণ্মূত্রং মন্দজাতং ত্রিদোষকৃত্ |৬৭|
विदाहि सृष्टविण्मूत्रं मन्दजातं त्रिदोषकृत् |६७|
🔊 Audio coming soon
মন্দজাতগুণমাহ- বিদাহীত্যাদি| ত্রিদোষকৃদিতি দোষান্ বাতপিত্তশ্লেষ্মাণঃ করোতীতি দোষকৃদিতি সিদ্ধে ত্রিগ্রহণমেতজ্জ্ঞাপযতি যন্মন্দজাতং দধি ত্রীনপি দোষান্ যৌগপদ্যেন তুল্যবলস্বেন চ কোপযতি, ন পুনঃ পরিপাঠ্যা হীনাধিকভাবেন বা|৬৭|
Adhikarana 57 (67) · Śloka 68
স্নিগ্ধং বিপাকে মধুরং দীপনং বলবর্ধনম্ ||৬৭|| বাতাপহং পবিত্রং চ দধি গব্যং রুচিপ্রদম্ |৬৮|
स्निग्धं विपाके मधुरं दीपनं बलवर्धनम् ||६७|| वातापहं पवित्रं च दधि गव्यं रुचिप्रदम् |६८|
🔊 Audio coming soon
গোদধ্যাহ- স্নিগ্ধমিত্যাদি||৬৭||-
Adhikarana 58 (68) · Śloka 69
দধ্যাজং কফপিত্তঘ্নং লঘু বাতক্ষযাপহম্ ||৬৮|| দুর্নামশ্বাসকাসেষু হিতমগ্নেশ্চ দীপনম্ |৬৯|
दध्याजं कफपित्तघ्नं लघु वातक्षयापहम् ||६८|| दुर्नामश्वासकासेषु हितमग्नेश्च दीपनम् |६९|
🔊 Audio coming soon
অজাদধ্যাহ- দধ্যাজমিত্যাদি||৬৮||-
Adhikarana 59 (69) · Śloka 70
বিপাকে মধুরং বৃষ্যং বাতপিত্তপ্রসাদনম্ ||৬৯|| বলাসবর্ধনং স্নিগ্ধং বিশেষাদ্দধি মাহিষম্ |৭০|
विपाके मधुरं वृष्यं वातपित्तप्रसादनम् ||६९|| बलासवर्धनं स्निग्धं विशेषाद्दधि माहिषम् |७०|
🔊 Audio coming soon
মহিষীদধ্যাহ- বিপাকে ইত্যাদি| বলাসঃ শ্লেষ্মা| স্নিগ্ধপদবলাসবর্ধনপদাভ্যাং সহ ‘বিশেষাত্’ ইতি সম্বধ্যতে||৬৯||-
Adhikarana 60 (70) · Śloka 71
বিপাকে কটু সক্ষারং গুরু ভেদ্যৌষ্ট্রিকং দধি ||৭০|| বাতমর্শাংসি কুষ্ঠানি কৃমীন্ হন্ত্যুদরাণি চ |৭১|
विपाके कटु सक्षारं गुरु भेद्यौष्ट्रिकं दधि ||७०|| वातमर्शांसि कुष्ठानि कृमीन् हन्त्युदराणि च |७१|
🔊 Audio coming soon
উষ্ট্রীদধ্যাহ- বিপাকে ইত্যাদি| সক্ষারমীষত্ক্ষারম্||৭০||-
Adhikarana 61 (71) · Śloka 72
কোপনং কফবাতানাং দুর্নাম্নাং চাবিকং দধি ||৭১|| রসে পাকে চ মধুরমত্যভিষ্যন্দি দোষলম্ |৭২|
कोपनं कफवातानां दुर्नाम्नां चाविकं दधि ||७१|| रसे पाके च मधुरमत्यभिष्यन्दि दोषलम् |७२|
🔊 Audio coming soon
মেষীদধ্যাহ- কোপনমিত্যাদি| দুর্নামানি অর্শাংসি| দোষলমপথ্যত্বেন বিকারকারি||৭১||-
Adhikarana 62 (72) · Śloka 73
দীপনীযমচক্ষুষ্যং বাডবং দধি বাতলম্ ||৭২|| রূক্ষমুষ্ণং কষাযং চ কফমূত্রাপহং চ তত্ |৭৩|
दीपनीयमचक्षुष्यं वाडवं दधि वातलम् ||७२|| रूक्षमुष्णं कषायं च कफमूत्रापहं च तत् |७३|
🔊 Audio coming soon
অশ্বাদধ্যাহ- দীপনীযমিত্যাদি| বাডবমাশ্বম্||৭২||-
Adhikarana 63 (73) · Śloka 74
স্নিগ্ধং বিপাকে মধুরং বল্যং সন্তর্পণং গুরু ||৭৩|| চক্ষুষ্যমগ্র্যং দোষঘ্নং দধি নার্যা গুণোত্তরম্ |৭৪|
स्निग्धं विपाके मधुरं बल्यं सन्तर्पणं गुरु ||७३|| चक्षुष्यमग्र्यं दोषघ्नं दधि नार्या गुणोत्तरम् |७४|
🔊 Audio coming soon
মানুষীদধ্যাহ- স্নিগ্ধমিত্যাদি| চক্ষুষ্যমগ্র্যং শ্রেষ্ঠং চক্ষুষ্যমিত্যর্থঃ| গুণোত্তরং গুণোত্কৃষ্টম্||৭৩||-
Adhikarana 64 (74) · Śloka 75
লঘু পাকে বলাসঘ্নং বীর্যোষ্ণং পক্তিনাশনম্ ||৭৪|| কষাযানুরসং নাগ্যা দধি বর্চোবিবর্ধনম্ |৭৫|
लघु पाके बलासघ्नं वीर्योष्णं पक्तिनाशनम् ||७४|| कषायानुरसं नाग्या दधि वर्चोविवर्धनम् |७५|
🔊 Audio coming soon
হস্তিনীদধ্যাহ- লঘ্বিত্যাদি||৭৪||-
Adhikarana 65 (75) · Śloka 76
দধীন্যুক্তানি যানীহ গব্যাদীনি পৃথক্ পৃথক্ ||৭৫|| বিজ্ঞেযমেবং সর্বেষু গব্যমেব গুণোত্তরম্ |৭৬|
दधीन्युक्तानि यानीह गव्यादीनि पृथक् पृथक् ||७५|| विज्ञेयमेवं सर्वेषु गव्यमेव गुणोत्तरम् |७६|
🔊 Audio coming soon
সর্বেষাং গোদধি শ্রেষ্ঠমিত্যাহ- দধীনীত্যাদি| এবমেতেন প্রকারেণ, এবাবধারণে||৭৫||-
Adhikarana 66 (76) · Śloka 77
বাতঘ্নং কফকৃত্ স্নিগ্ধং বৃংহণং নাতিপিত্তকৃত্ ||৭৬|| কুর্যাদ্ভক্তাভিলাষং চ দধি যত্ সুপরিস্রুতম্ |৭৭|
वातघ्नं कफकृत् स्निग्धं बृंहणं नातिपित्तकृत् ||७६|| कुर्याद्भक्ताभिलाषं च दधि यत् सुपरिस्रुतम् |७७|
🔊 Audio coming soon
বস্ত্রাদিগালিতদধিগুণমাহ- বাতঘ্নমিত্যাদি| সুপরিস্রুতং সুষ্ঠু গালিতং বস্ত্রাদিভিঃ||৭৬||-
Adhikarana 67 (77) · Śloka 78
শৃতাত্ ক্ষীরাত্তু যজ্জাতং গুণবদ্দধি তত্ স্মৃতম্ ||৭৭|| বাতপিত্তহরং রুচ্যং ধাত্বগ্নিবলবর্ধনম্ |৭৮|
शृतात् क्षीरात्तु यज्जातं गुणवद्दधि तत् स्मृतम् ||७७|| वातपित्तहरं रुच्यं धात्वग्निबलवर्धनम् |७८|
🔊 Audio coming soon
ক্বথিতক্ষীরজাতস্য দধ্নো গুণমাহ- শৃতাদিত্যাদি||৭৭||-
Adhikarana 68 (78) · Śloka 79
দধ্নঃ সরো গুরুর্বৃষ্যো বিজ্ঞেযোঽনিলনাশনঃ ||৭৮|| বহ্নের্বিধমনশ্চাপি কফশুক্রবিবর্ধনঃ |৭৯|
दध्नः सरो गुरुर्वृष्यो विज्ञेयोऽनिलनाशनः ||७८|| वह्नेर्विधमनश्चापि कफशुक्रविवर्धनः |७९|
🔊 Audio coming soon
দধ্যবযববিশেষাণাং গুণবিশেষং দর্শযন্নাহ- দধ্ন ইত্যাদি| সরঃ দধ্ন উপরিতনো ভাগঃ স্নেহবহুলঃ ‘তর’ ইতি প্রসিদ্ধঃ| বহ্নের্বিধমনঃ অগ্নিনাশনঃ| বৃষ্যঃ শুক্রবর্ধন ইতি চোভযমতিবৃদ্ধিকরত্বপ্রাপ্তযে; এতেন জনকপ্রবর্তকমুক্তম্||৭৮||-
Adhikarana 69 (79) · Śloka 80
দধি ত্বসারং রূক্ষং চ গ্রাহি বিষ্টম্ভি বাতলম্ ||৭৯|| দীপনীযং লঘুতরং সকষাযং রুচিপ্রদম্ |৮০|
दधि त्वसारं रूक्षं च ग्राहि विष्टम्भि वातलम् ||७९|| दीपनीयं लघुतरं सकषायं रुचिप्रदम् |८०|
🔊 Audio coming soon
উদ্ধৃতস্নেহস্য দধ্নো গুণমাহ- দধীত্যাদি| অসারং সাররহিতম্| বিষ্টম্ভীতি সবাততোদশূলা মলস্যাপ্রবৃত্তির্বিষ্টম্ভঃ; অন্যে ‘বিষ্টম্ভো গুডগুডাশব্দঃ’ ইতি প্রাহুঃ||৭৯||-
Adhikarana 70 (80) · Śloka 81
শরদ্গ্রীষ্মবসন্তেষু প্রাযশো দধি গর্হিতম্ ||৮০|| হেমন্তে শিশিরে চৈব বর্ষাসু দধি শস্যতে |৮১|
शरद्ग्रीष्मवसन्तेषु प्रायशो दधि गर्हितम् ||८०|| हेमन्ते शिशिरे चैव वर्षासु दधि शस्यते |८१|
🔊 Audio coming soon
ঋতুভেদেন হেযোপাদেযতামাহ- শরদিত্যাদি||৮০||-
Adhikarana 71 (81-83) · Śloka 83
তৃষ্ণাক্লমহরং মস্তু লঘু স্রোতোবিশোধনম্ ||৮১|| অম্লং কষাযং মধুরমবৃষ্যং কফবাতনুত্ | প্রহ্লাদনং প্রীণনং চ ভিনত্ত্যাশু মলং চ তত্ | বলমাবহতে ক্ষিপ্রং ভক্তচ্ছন্দং করোতি চ ||৮২|| স্বাদ্বম্লমত্যম্লকমন্দজাতং তথা শৃতক্ষীরভবং সরশ্চ | অসারমেবং দধি সপ্তধাঽস্মিন্ বর্গে স্মৃতা মস্তুগুণাস্তথৈব ||৮৩|| ইতি দধিবর্গঃ |
तृष्णाक्लमहरं मस्तु लघु स्रोतोविशोधनम् ||८१|| अम्लं कषायं मधुरमवृष्यं कफवातनुत् | प्रह्लादनं प्रीणनं च भिनत्त्याशु मलं च तत् | बलमावहते क्षिप्रं भक्तच्छन्दं करोति च ||८२|| स्वाद्वम्लमत्यम्लकमन्दजातं तथा शृतक्षीरभवं सरश्च | असारमेवं दधि सप्तधाऽस्मिन् वर्गे स्मृता मस्तुगुणास्तथैव ||८३|| इति दधिवर्गः |
🔊 Audio coming soon
মস্তুগুণমাহ- তৃষ্ণেত্যাদি| মস্তু অধোদধি জলমিশ্রং; তচ্চ সপ্তবিধং দধিভেদাত্; অন্যে তু দধিতক্রজভেদেন মস্তু দ্বিবিধমিচ্ছন্তি| মলং মূত্রপুরীষম্| ভক্তচ্ছন্দং ভোজনাভিলাষম্||৮১-৮৩||
Adhikarana 72 (84) · Śloka 84
অথ তক্রবর্গঃ | তক্রং তু মধুরমম্লং কষাযানুরসমুষ্ণবীর্যং লঘুরূক্ষমগ্নিদীপনং গরশোফাতিসারগ্রহণীপাণ্ডুরোগার্শঃপ্লীহগুল্মারোচকবিষমজ্বরতৃষ্ণাচ্ছর্দিপ্রসেকশূলভেদঃশ্লেষ্মানিলহরং মধুরবিপাকং হৃদ্যং মূত্রকৃচ্ছ্রস্নেহব্যাপত্প্রশমনমবৃষ্যং চ ||৮৪||
अथ तक्रवर्गः | तक्रं तु मधुरमम्लं कषायानुरसमुष्णवीर्यं लघुरूक्षमग्निदीपनं गरशोफातिसारग्रहणीपाण्डुरोगार्शःप्लीहगुल्मारोचकविषमज्वरतृष्णाच्छर्दिप्रसेकशूलभेदःश्लेष्मानिलहरं मधुरविपाकं हृद्यं मूत्रकृच्छ्रस्नेहव्यापत्प्रशमनमवृष्यं च ||८४||
🔊 Audio coming soon
অথ তক্রগুণানাহ- তক্রমিত্যাদি| গরং কৃত্রিমং বিষং, সদাভাবিনং বর্জযিত্বাঽন্যে বিষমজ্বরাঃ, প্রসেকো লালাস্রাবঃ| স্নেহব্যাপত্ স্নেহাতিযোগাযোগসমুত্থো বিকারঃ| অবৃষ্যম্ অশুক্রলম্| তচ্চ তন্ত্রান্তরে ত্রিবিধং- “রূক্ষমর্ধোদ্ধৃতস্নেহং যতশ্চানুদ্ধৃতং ঘৃতম্| তক্রং দোষাগ্নিবলবিত্ত্রিবিধং তত্ প্রযোজযেত্” (চ. চি. অ. ১৪)- ইতি| তন্ত্রান্তরে সর্বেষামেবৈতেষাং পৃথগ্গুণোপবর্ণনং কৃতম্||৮৪||
Adhikarana 73 (85) · Śloka 85
মন্থনাদিপৃথগ্ভূতস্নেহমর্ধোদকং চ যত্ | নাতিসান্দ্রদ্রবং তক্রং স্বাদ্বম্লং তুবরং রসে | যত্তু সস্নেহমজলং মথিতং ঘোলমুচ্যতে ||৮৫||
मन्थनादिपृथग्भूतस्नेहमर्धोदकं च यत् | नातिसान्द्रद्रवं तक्रं स्वाद्वम्लं तुवरं रसे | यत्तु सस्नेहमजलं मथितं घोलमुच्यते ||८५||
🔊 Audio coming soon
অথ কীদৃক্ তক্রং যস্যাযং গুণনির্দেশঃ কৃতঃ? উচ্যতে- মন্থনাদীত্যাদি| ঘোলমাহ- যত্ত্বিত্যাদি| তত্তু দধিগুণমেব| সস্নেহং সজলমুদশ্বিত্; তদ্গুণাস্তু মতান্তরাদ্বোদ্ধব্যাঃ||৮৫||
Adhikarana 74 (86) · Śloka 86
নৈব তক্রং ক্ষতে দদ্যান্নোষ্ণকালে ন দুর্বলে | ন মূর্চ্ছাভ্রমদাহেষু ন রোগে রক্তপৈত্তিকে ||৮৬||
नैव तक्रं क्षते दद्यान्नोष्णकाले न दुर्बले | न मूर्च्छाभ्रमदाहेषु न रोगे रक्तपैत्तिके ||८६||
🔊 Audio coming soon
তস্য তক্রস্য নিষেধবিষযমাহ- নৈবেত্যাদি| উষ্ণকালে শরদ্গ্রীষ্মযোঃ||৮৬||
Adhikarana 75 (87) · Śloka 87
শীতকালেঽগ্নিমান্দ্যে চ কফোত্থেষ্বামযেষু চ | মার্গাবরোধে দুষ্টে চ বাযৌ তক্রং প্রশস্যতে ||৮৭||
शीतकालेऽग्निमान्द्ये च कफोत्थेष्वामयेषु च | मार्गावरोधे दुष्टे च वायौ तक्रं प्रशस्यते ||८७||
🔊 Audio coming soon
কেষু প্রশস্তমিত্যাহ- শীতকাল ইত্যাদি| মার্গাবরোধে স্রোতঃশোধকত্বাত্| দুষ্টে চ বাযৌ বিকৃতে বাতে; স চ প্রাযঃ কোষ্ঠস্থো জ্ঞেযঃ||৮৭||
Adhikarana 76 (88) · Śloka 88
তত্ পুনর্মধুরং শ্লেষ্মপ্রকোপণং পিত্তপ্রশমনং চ; অম্লং বাতঘ্নং পিত্তকরং চ ||৮৮||
तत् पुनर्मधुरं श्लेष्मप्रकोपणं पित्तप्रशमनं च; अम्लं वातघ्नं पित्तकरं च ||८८||
🔊 Audio coming soon
তক্রস্য রসবিশেষেণ গুণবিশেষমাহ- তদিত্যাদি||৮৮||
Adhikarana 77 (89) · Śloka 89
বাতেঽম্লং সৈন্ধবোপেতং, স্বাদু পিত্তে সশর্করম্ | পিবেত্তক্রং কফে চাপি ব্যোষক্ষারসমন্বিতম্ ||৮৯||
वातेऽम्लं सैन्धवोपेतं, स्वादु पित्ते सशर्करम् | पिबेत्तक्रं कफे चापि व्योषक्षारसमन्वितम् ||८९||
🔊 Audio coming soon
সংযোগবিশেষেণ ত্রিদোষহরত্বমাহ- বাতে ইত্যাদি||৮৯||
Adhikarana 78 (90) · Śloka 90
গ্রাহিণী বাতলা রূক্ষা দুর্জরা তক্রকূর্চিকা |৯০|
ग्राहिणी वातला रूक्षा दुर्जरा तक्रकूर्चिका |९०|
🔊 Audio coming soon
তস্য হেত্বন্তরৈর্বিগ্রথিতস্য ঘনীভূতাবযবস্য স্বগুণান্ নির্দিশন্নাহ- গ্রাহিণীত্যাদি| বিনষ্টং তক্রং ঘনাবযবং তক্রকূর্চিকা|৯০|
Adhikarana 79 (90) · Śloka 90
তক্রাল্লঘুতরো মণ্ডঃ কূর্চিকাদধিতক্রজঃ ||৯০||
तक्राल्लघुतरो मण्डः कूर्चिकादधितक्रजः ||९०||
🔊 Audio coming soon
ইদানীং তক্রাদ্দধিমস্তুনস্তথা তক্রমস্তুনোঽপি বিশেষং গুণেষু দর্শযন্নাহ- তক্রাদিত্যাদি| মণ্ডো মস্তুকঃ; কূর্চিকাভূতং যদ্দধি তক্রং চ তাভ্যাং জাতো যো মণ্ডঃ স তক্রাল্লঘুতরঃ, প্রাকৃতদধিজাতং পুনর্মস্তু লাঘবাত্তক্রসমমেব| অন্যে ত্বেবং পঠন্তি, ‘দধিকূর্চিকতক্রজঃ’ ইতি| তক্র প্রাকৃতদধিজঃ, কূর্চিকীভূতদধিজঃ, কূর্চিকীভূততক্রজ ইতি মস্তুত্রযসঙ্গ্রহঃ| ‘তক্রতুল্যো দধিমণ্ডো বিষ্টম্ভারুচিনাশন’ ইতি চ ক্বচিত্ পঠ্যতে| প্রাকৃতমস্তু চ গ্রীষ্মাদিবিদাহেন সুজাতস্য দধ্নোঽচ্ছো ভাগ উচ্যতে||৯০||
Adhikarana 80 (91) · Śloka 91
গুরুঃ কিলাটোঽনিলহা পুংস্ত্বনিদ্রাপ্রদঃ স্মৃতঃ |৯১|
गुरुः किलाटोऽनिलहा पुंस्त्वनिद्राप्रदः स्मृतः |९१|
🔊 Audio coming soon
তক্রকূর্চিকাপ্রস্তাবে ক্ষীরকূর্চিকামাহ- গুরুরিত্যাদি| কূর্চিকীভূতক্ষীরস্য ঘনভাগঃ কিলাটঃ; যং লোকাঃ ক্ষীরাংশুমিত্যাহুঃ, সূদাস্তু ‘কিলাটী’ ইতি| পুংস্ত্বং শুক্রম্|৯১|
Adhikarana 81 (91) · Śloka 91
মধুরৌ বৃংহণৌ বৃষ্যৌ তদ্বত্পীযূষমোরটৌ ||৯১||
मधुरौ बृंहणौ वृष्यौ तद्वत्पीयूषमोरटौ ||९१||
🔊 Audio coming soon
পীযূষমোরটাবাহ- মধুরাবিত্যাদি| তদ্বদিতি কিলাটতুল্যৌ| পীযূষঃ সদ্যঃপ্রসূতাযা গোঃ ক্ষীরং সপ্তাহং যাবত্, তদেব সপ্তাহাত্ পরতো যাবত্ প্রসন্নতাং ন গচ্ছতি তাবত্ ‘মোরট’ ইত্যুচ্যতে| জেজ্জটস্তু ‘বিনষ্টক্ষীরভবং মস্তু মোরটম্’ ইত্যাহ||৯১||
Adhikarana 82 (92) · Śloka 92
নবনীতং পুনঃ সদ্যস্কং লঘু সুকুমারং মধুরং কষাযমীষদম্লং শীতলং মেধ্যং দীপনং হৃদ্যং সঙ্গ্রাহি পিত্তানিলহরং বৃষ্যমবিদাহি ক্ষযকাসব্রণশোষার্শোঽর্দিতাপহং, চিরোত্থিতং গুরু কফমেদোবিবর্ধনং বলকরং বৃংহণং শোষঘ্নং বিশেষেণ বালানাং প্রশস্যতে ||৯২||
नवनीतं पुनः सद्यस्कं लघु सुकुमारं मधुरं कषायमीषदम्लं शीतलं मेध्यं दीपनं हृद्यं सङ्ग्राहि पित्तानिलहरं वृष्यमविदाहि क्षयकासव्रणशोषार्शोऽर्दितापहं, चिरोत्थितं गुरु कफमेदोविवर्धनं बलकरं बृंहणं शोषघ्नं विशेषेण बालानां प्रशस्यते ||९२||
🔊 Audio coming soon
সদ্যস্কং নবনীতমাহ- নবনীতমিত্যাদি| সদ্যস্কং সদ্যোভবম্| সুকুমারং দেহসৌকুমার্যকরম্| সঙ্গ্রাহি প্রভাবাত্তক্রাবযবসম্বন্ধাচ্চ, অত এবাম্লম্| চিরোত্থিতস্য নবনীতস্য গুণমাহ- গুর্বিত্যাদি| বলকরমোজস্করম্| বৃংহণং দেহোপচযকরম্| বিশেষেণাতিশযেনেত্যর্থঃ||৯২||
Adhikarana 83 (93) · Śloka 93
ক্ষীরোত্থং পুনর্নবনীতমুত্কৃষ্টস্নেহমাধুর্যমতিশীতং সৌকুমার্যকরং চক্ষুষ্যং সঙ্গ্রাহি রক্তপিত্তনেত্ররোগহরং প্রসাদনং চ ||৯৩||
क्षीरोत्थं पुनर्नवनीतमुत्कृष्टस्नेहमाधुर्यमतिशीतं सौकुमार्यकरं चक्षुष्यं सङ्ग्राहि रक्तपित्तनेत्ररोगहरं प्रसादनं च ||९३||
🔊 Audio coming soon
ক্ষীরমথনোত্থিতস্য নবনীতস্য গুণমাহ- ক্ষীরোত্থমিত্যাদি| দধ্যুত্থিতনবনীতাপেক্ষযা উত্কৃষ্টে স্নেহমাধুর্যে যস্মিন্ তত্তথা| অতিশীতমপি তদপেক্ষযৈব| প্রসাদনং চেতি রক্তপিত্তনেত্ররোগযোঃ| প্রসাদনস্থানে ‘বর্ণপ্রসাদনীযম্’ ইতি কেচিত্ পঠন্তি||৯৩||
Adhikarana 84 (94) · Śloka 94
সন্তানিকা পুনর্বাতঘ্নী তর্পণী বৃষ্যা বল্যা স্নিগ্ধা রুচ্যা মধুরা মধুরবিপাকা রক্তপিত্তপ্রসাদনী গুর্বী চ ||৯৪||
सन्तानिका पुनर्वातघ्नी तर्पणी वृष्या बल्या स्निग्धा रुच्या मधुरा मधुरविपाका रक्तपित्तप्रसादनी गुर्वी च ||९४||
🔊 Audio coming soon
ক্ষীরোত্থনবনীতপ্রসঙ্গেন ক্ষীরোত্থসন্তানিকামাহ- সন্তানিকেত্যাদি| সন্তানিকা ক্ষীরস্যোপরি স্ত্যানো ভাগঃ ক্ষীরসর ইত্যর্থঃ| তর্পণী তৃপ্তিজনিকা||৯৪||
Adhikarana 85 (95) · Śloka 95
বিকল্প এষ দধ্যাদিঃ শ্রেষ্ঠো গব্যোঽভিবর্ণিতঃ | বিকল্পানবশিষ্টাংস্তু ক্ষীরবীর্যাত্সমাদিশেত্ ||৯৫|| ইতি তক্রবর্গঃ |
विकल्प एष दध्यादिः श्रेष्ठो गव्योऽभिवर्णितः | विकल्पानवशिष्टांस्तु क्षीरवीर्यात्समादिशेत् ||९५|| इति तक्रवर्गः |
🔊 Audio coming soon
ননু চাষ্টানাং ক্ষীরাণাং নির্দিষ্টত্বাদিহ তক্রমস্তুতক্রকূর্চিকাকিলাটপীযূষমোরটনবনীতসন্তানিকাদযঃ কস্য ক্ষীরস্যোক্তা ইত্যাহ- বিকল্প ইত্যাদি| বিকল্পো ভেদঃ প্রকারঃ| দধি আদির্যস্য স দধ্যাদিঃ| গব্য ইতি গোরেব| অভিবর্ণিতঃ কথিতঃ| ন পুনরজাবিপ্রভৃতীনাং, যতঃ শ্রেষ্ঠঃ সর্বেভ্যঃ প্রধানম্| তত্ কিমজাদীনাং দধ্যাদি ন সম্ভবতীত্যাহ- বিকল্পানিত্যাদি| অবশিষ্টান্ উর্বরিতান্| ক্ষীরবীর্যাদিতি ক্ষীরবীর্যং ক্ষীরগুণ ইত্যর্থঃ| যথাঽজাদীনাং ক্ষীরগুণস্তদনুগুণস্তত্তক্রাদিগুণো বাচ্য ইত্যর্থঃ||৯৫||
Adhikarana 86 (96) · Śloka 96
অথ ঘৃতম্ | ঘৃতং তু মধুরং সৌম্যং মৃদু শীতবীর্যমনভিষ্যন্দি স্নেহনমুদাবর্তোন্মাদাপস্মারশূলজ্বরানাহবাতপিত্তপ্রশমনমগ্নিদীপনং স্মৃতিমতিমেধাকান্তিস্বরলাবণ্যসৌকুমার্যৌজস্তেজোবলকরমাযুষ্যং বৃষ্যং মেধ্যং বযঃস্থাপনং গুরু চক্ষুষ্যং শ্লেষ্মাভিবর্ধনং পাপ্মালক্ষ্মীপ্রশমনং বিষহরং রক্ষোঘ্নং চ ||৯৬||
अथ घृतम् | घृतं तु मधुरं सौम्यं मृदु शीतवीर्यमनभिष्यन्दि स्नेहनमुदावर्तोन्मादापस्मारशूलज्वरानाहवातपित्तप्रशमनमग्निदीपनं स्मृतिमतिमेधाकान्तिस्वरलावण्यसौकुमार्यौजस्तेजोबलकरमायुष्यं वृष्यं मेध्यं वयःस्थापनं गुरु चक्षुष्यं श्लेष्माभिवर्धनं पाप्मालक्ष्मीप्रशमनं विषहरं रक्षोघ्नं च ||९६||
🔊 Audio coming soon
অথ ঘৃতমাহ- ঘৃতং ত্বিত্যাদি| এতে সামান্যঘৃতস্য গুণাঃ, অন্যে তু গব্যস্যৈবেতি গুণশ্রেষ্ঠত্বাদিত্যাহুঃ| সৌম্যত্বমুষ্ণেঽপি যথাঽবিক্ষীরে, অত এব শীতবীর্যমিত্যুক্তম্| অনভিষ্যন্দীতি অত্রেষদর্থে নঞ্; তেন, অল্পাভিষ্যন্দীত্যর্থঃ; এতেন দোষধাতুমলস্রোতসাং মন্দক্লেদপ্রাপ্তিজননম্| স্নেহনং স্নিগ্ধত্বাপাদকম্| উদাবর্তাদিপ্রশমনং নিরামাণামেব নতু সামানাম্| জ্বরস্য জীর্ণস্য প্রশমনং শান্তিকরমিত্যর্থঃ| স্মৃত্যাদিভির্বলান্তৈঃ সহ করশব্দঃ প্রত্যেকমভিসম্বধ্যতে| স্মৃতিঃ অতীতস্মরণম্; অনাগতজ্ঞানং মতিঃ; মেধা গ্রন্থধারণশক্তিঃ; কান্তিঃ শোভা; লাবণ্যং রূপাতিশযঃ; সৌকুমার্যং মার্দবমঙ্গানাম্; ওজো হৃদি স্থিতং ধাতুধাম; তেজঃ পরাক্রমঃ, অন্যে প্রভামাহুঃ, সা চ মহাপঞ্জিকাযাং নিষিদ্ধা; বলমুপচযঃ| মেধ্যং পবিত্রম্| বযঃস্থাপনমিতি যাবদেবাযুঃ প্রমিতং তাবদেবাযুঃ স্থাপযত্যনাবাধম্| পাপাদীনি হন্তি প্রভাবাত্| রক্ষোঘ্নং রাক্ষসভযহরম্| ‘ত্রিদোষাপকর্ষণম্’ ইতি কেচিত্ পঠন্তি, স তু নাতিপ্রসিদ্ধঃ পাঠঃ| তত্রাপি বাতপিত্তসম্বদ্ধস্যৈব কফস্য হন্তৃত্বং, নতু কেবলস্য||৯৬||
Adhikarana 87 (97) · Śloka 97
বিপাকে মধুরং শীতং বাতপিত্তবিষাপহম্ | চক্ষুষ্যমগ্র্যং বল্যং চ গব্যং সর্পির্গুণোত্তরম্ ||৯৭||
विपाके मधुरं शीतं वातपित्तविषापहम् | चक्षुष्यमग्र्यं बल्यं च गव्यं सर्पिर्गुणोत्तरम् ||९७||
🔊 Audio coming soon
সামান্যেন ঘৃতগুণমভিধায গব্যঘৃতস্য বিশেষগুণমাহ- বিপাকে ইত্যাদি| চক্ষুষ্যমগ্র্যমিতি সর্বচক্ষুষ্যশ্রেষ্ঠমিত্যর্থঃ| গুণোত্তরং গুণোত্কৃষ্টম্||৯৭||
Adhikarana 88 (98) · Śloka 98
আজং ঘৃতং দীপনীযং চক্ষুষ্যং বলবর্ধনম্ | কাসে শ্বাসে ক্ষযে চাপি পথ্যং পাকে চ তল্লঘু ||৯৮||
आजं घृतं दीपनीयं चक्षुष्यं बलवर्धनम् | कासे श्वासे क्षये चापि पथ्यं पाके च तल्लघु ||९८||
🔊 Audio coming soon
আজং ঘৃতমাহ- আজমিত্যাদি||৯৮||
Adhikarana 89 (99) · Śloka 99
মধুরং রক্তপিত্তঘ্নং গুরু পাকে কফাবহম্ | বাতপিত্তপ্রশমনং সুশীতং মাহিষং ঘৃতম্ ||৯৯||
मधुरं रक्तपित्तघ्नं गुरु पाके कफावहम् | वातपित्तप्रशमनं सुशीतं माहिषं घृतम् ||९९||
🔊 Audio coming soon
মাহিষঘৃতমাহ- মধুরমিত্যাদি||৯৯||
Adhikarana 90 (100) · Śloka 100
ঔষ্ট্রং কটু ঘৃতং পাকে শোফক্রিমিবিষাপহম্ | দীপনং কফবাতঘ্নং কুষ্ঠগুল্মোদরাপহম্ ||১০০||
औष्ट्रं कटु घृतं पाके शोफक्रिमिविषापहम् | दीपनं कफवातघ्नं कुष्ठगुल्मोदरापहम् ||१००||
🔊 Audio coming soon
ঔষ্ট্রঘৃতমাহ- ঔষ্ট্রমিত্যাদি||১০০||
Adhikarana 91 (101) · Śloka 101
পাকে লঘ্বাবিকং সর্পির্ন চ পিত্তপ্রকোপণম্ | কফেঽনিলে যোনিদোষে শোষে কম্পে চ তদ্ধিতম্ ||১০১||
पाके लघ्वाविकं सर्पिर्न च पित्तप्रकोपणम् | कफेऽनिले योनिदोषे शोषे कम्पे च तद्धितम् ||१०१||
🔊 Audio coming soon
আবিকঘৃতমাহ- পাকে ইত্যাদি||১০১||
Adhikarana 92 (102) · Śloka 102
পাকে লঘূষ্ণবীর্যং চ কষাযং কফনাশনম্ | দীপনং বদ্ধমূত্রং চ বিদ্যাদৈকশফং ঘৃতম্ ||১০২||
पाके लघूष्णवीर्यं च कषायं कफनाशनम् | दीपनं बद्धमूत्रं च विद्यादैकशफं घृतम् ||१०२||
🔊 Audio coming soon
আশ্বঘৃতমাহ- পাকে ইত্যাদি| ঐকশফং ঘৃতমশ্বাযা ঘৃতমিত্যর্থঃ||১০২||
Adhikarana 93 (103) · Śloka 103
চক্ষুষ্যমগ্র্যং স্ত্রীণাং তু সর্পিঃ স্যাদমৃতোপমম্ | বৃদ্ধিং করোতি দেহাগ্ন্যোর্লঘুপাকং বিষাপহম্ ||১০৩||
चक्षुष्यमग्र्यं स्त्रीणां तु सर्पिः स्यादमृतोपमम् | वृद्धिं करोति देहाग्न्योर्लघुपाकं विषापहम् ||१०३||
🔊 Audio coming soon
মানুষীঘৃতমাহ- চক্ষুষ্যমিত্যাদি| চক্ষুষ্যমগ্র্যং সর্বচক্ষুষ্যশ্রেষ্ঠম্||১০৩||
Adhikarana 94 (104) · Śloka 104
কষাযং বদ্ধবিণ্মূত্রং তিক্তমগ্নিকরং লঘু | হন্তি কারেণবং সর্পিঃ কফকুষ্ঠবিষক্রিমীন্ ||১০৪||
कषायं बद्धविण्मूत्रं तिक्तमग्निकरं लघु | हन्ति कारेणवं सर्पिः कफकुष्ठविषक्रिमीन् ||१०४||
🔊 Audio coming soon
হাস্তিনঘৃতমাহ- কষাযমিত্যাদি| কারেণবং হাস্তিনম্||১০৪||
Adhikarana 95 (105) · Śloka 105
ক্ষীরঘৃতং পুনঃ সঙ্গ্রাহি রক্তপিত্তভ্রমমূর্চ্ছাপ্রশমনং নেত্ররোগহিতং চ ||১০৫||
क्षीरघृतं पुनः सङ्ग्राहि रक्तपित्तभ्रममूर्च्छाप्रशमनं नेत्ररोगहितं च ||१०५||
🔊 Audio coming soon
ক্ষীরোত্থঘৃতগুণমাহ- ক্ষীরঘৃতমিত্যাদি| ক্ষীরমথনাত্ সমুদ্ভূতনবনীতোত্থিতং ঘৃতং ক্ষীরঘৃতম্| সঙ্গ্রাহি প্রভাবাত্| ভ্রমঃ চক্রারূঢস্যেব| মূর্চ্ছা চেতনাচ্যুতিঃ||১০৫||
Adhikarana 96 (106) · Śloka 106
সর্পির্মণ্ডস্তু মধুরঃ সরো যোনিশ্রোত্রাক্ষিশিরসাং শূলঘ্নো বস্তিনস্যাক্ষিপূরণেষূপদিশ্যতে ||১০৬||
सर्पिर्मण्डस्तु मधुरः सरो योनिश्रोत्राक्षिशिरसां शूलघ्नो बस्तिनस्याक्षिपूरणेषूपदिश्यते ||१०६||
🔊 Audio coming soon
ঘৃতমণ্ডস্য গুণমাহ- সর্পির্মণ্ডস্ত্বিত্যাদি| বিলীনঘৃতস্য ঘনীভূত উপরিতনো ভাগো মণ্ডঃ||১০৬||
Adhikarana 97 (107-111) · Śloka 111
সর্পিঃ পুরাণং সরং কটুবিপাকং ত্রিদোষাপহং মূর্চ্ছামদোন্মাদোদরজ্বরগরশোষাপস্মারযোনিশ্রোত্রাক্ষিশির শূলঘ্নং দীপনং বস্তিনস্যপূরণেষূপদিশ্যতে ||১০৭|| ভবতি চাত্র- পুরাণং তিমিরশ্বাসপীনসজ্বরকাসনুত্ | মূর্চ্ছাকুষ্ঠবিষোন্মাদগ্রহাপস্মারনাশনম্ ||১০৮|| (একাদশশতং চৈব বত্সরানুষিতং ঘৃতম্ | রক্ষোঘ্নং কুম্ভসর্পিঃ স্যাত্ পরতস্তু মহাঘৃতম্ ||১০৯|| পেযং মহাঘৃতং ভূতৈঃ কফঘ্নং পবনাধিকৈঃ | বল্যং পবিত্রং মেধ্যং চ বিশেষাত্তিমিরাপহম্ ||১১০|| সর্বভূতহরং চৈব ঘৃতমেতত্ প্রশস্যতে) ||১১১|| ইতি ঘৃতবর্গঃ |
सर्पिः पुराणं सरं कटुविपाकं त्रिदोषापहं मूर्च्छामदोन्मादोदरज्वरगरशोषापस्मारयोनिश्रोत्राक्षिशिर शूलघ्नं दीपनं बस्तिनस्यपूरणेषूपदिश्यते ||१०७|| भवति चात्र- पुराणं तिमिरश्वासपीनसज्वरकासनुत् | मूर्च्छाकुष्ठविषोन्मादग्रहापस्मारनाशनम् ||१०८|| (एकादशशतं चैव वत्सरानुषितं घृतम् | रक्षोघ्नं कुम्भसर्पिः स्यात् परतस्तु महाघृतम् ||१०९|| पेयं महाघृतं भूतैः कफघ्नं पवनाधिकैः | बल्यं पवित्रं मेध्यं च विशेषात्तिमिरापहम् ||११०|| सर्वभूतहरं चैव घृतमेतत् प्रशस्यते) ||१११|| इति घृतवर्गः |
🔊 Audio coming soon
পুরাণঘৃতগুণমাহ- সর্পিরিত্যাদি| পুরাণং দশবর্ষস্থিতম্| বিষরুধিরমদ্যজা মদাস্ত্রযঃ, গরঃ সংযোগবিষম্| পূরণেঽক্ষিপূরণে| একাদশশতমিতি একাদশোত্তরং শতমিত্যর্থঃ| ভূতৈঃ প্রাণিভিঃ| আচার্যস্তু ‘কৌম্ভং তু শতবত্সরম্’ ইত্যাহ| অযং পাঠো নিবন্ধেষু ন দৃশ্যতে, অস্মাভিস্তু বহুবৈদ্যপঠিতত্বাত্ পঠিতঃ||১০৭-১১১||
Adhikarana 98 (112-113) · Śloka 113
অথ তৈলানি | তৈলং ত্বাগ্নেযমুষ্ণং তীক্ষ্ণং মধুরং মধুরবিপাকং বৃংহণং প্রীণনং ব্যবাযি সূক্ষ্মং বিশদং গুরু সরং বিকাসি বৃষ্যং ত্বক্প্রসাদনং মেধামার্দবমাংসস্থৈর্যবর্ণবলকরং চক্ষুষ্যং বদ্ধমূত্রং লেখনং তিক্তকষাযানুরসং পাচনমনিলবলাসক্ষযকরং ক্রিমিঘ্নমশিতপিত্তজননং যোনিশিরঃকর্ণশূলপ্রশমনং গর্ভাশযশোধনং চ, তথা ছিন্নভিন্নবিদ্ধোত্পিষ্টচ্যুতমথিতক্ষতপিচ্চিতভগ্নস্ফুটিতক্ষারাগ্নিদগ্ধবিশ্লিষ্টদারিতা ভিহতদুর্ভগ্নমৃগব্যালবিদষ্টপ্রভৃতিষু চ পরিষেকাভ্যঙ্গাবগাহাদিষু তিলতৈলং প্রশস্যতে ||১১২|| তদ্বস্তিষু চ পানেষু নস্যে কর্ণাক্ষিপূরণে | অন্নপানবিধৌ চাপি প্রযোজ্যং বাতশান্তযে ||১১৩||
अथ तैलानि | तैलं त्वाग्नेयमुष्णं तीक्ष्णं मधुरं मधुरविपाकं बृंहणं प्रीणनं व्यवायि सूक्ष्मं विशदं गुरु सरं विकासि वृष्यं त्वक्प्रसादनं मेधामार्दवमांसस्थैर्यवर्णबलकरं चक्षुष्यं बद्धमूत्रं लेखनं तिक्तकषायानुरसं पाचनमनिलबलासक्षयकरं क्रिमिघ्नमशितपित्तजननं योनिशिरःकर्णशूलप्रशमनं गर्भाशयशोधनं च, तथा छिन्नभिन्नविद्धोत्पिष्टच्युतमथितक्षतपिच्चितभग्नस्फुटितक्षाराग्निदग्धविश्लिष्टदारिता भिहतदुर्भग्नमृगव्यालविदष्टप्रभृतिषु च परिषेकाभ्यङ्गावगाहादिषु तिलतैलं प्रशस्यते ||११२|| तद्बस्तिषु च पानेषु नस्ये कर्णाक्षिपूरणे | अन्नपानविधौ चापि प्रयोज्यं वातशान्तये ||११३||
🔊 Audio coming soon
জঙ্গমস্নেহোত্তমং ঘৃতং নির্দিশ্য স্থাবরস্নেহোত্তমং তৈলং গুণকর্মভ্যাং নির্দিশন্নাহ- তৈলমিত্যাদি| তিলেষু ভবং তৈলং তিলতৈলম্| আগ্নেযমুষ্ণমিতি প্রভা আগ্নেযী ন চোষ্ণা, ক্ষার উষ্ণঃ সৌম্যশ্চ, মত্স্যা উষ্ণা ন ত্বাগ্নেযাঃ, অত এবাগ্নেযমুষ্ণমিত্যুভযমুক্তম্| বৃংহণং ধাতুপুষ্টিকরত্বেন শরীরদার্ঢ্যাবহত্বাত্; ন চ লেখনত্বমপ্যস্য বিরুদ্ধং, মেদোহরত্বাত্| ন খলু তৈলং মেদোঘ্নমপি মাংসং ন করোতি, প্রতিনিযতশক্তিত্বাদ্দ্রব্যাণাম্| প্রীণনং তৃপ্তিজনকম্| ব্যবাযি অপরিণতমেব ব্যাপ্য দেহং পচ্যতে| সূক্ষ্মং সূক্ষ্মস্রোতোনুসারি| বিশদং নির্মলম্| বিকাসি সন্ধিবন্ধবিমোচকম্| বৃষ্যং শুক্রলম্, অন্যে তু ধাতুপোষণকরণাদ্বৃষ্যং, সদ্যঃ পুনরবৃষ্যমেব| যদুক্তং জাতূকর্ণেন- ‘অশুক্রার্থে তৈললবণম্’ ইতি| ত্বক্প্রসাদনমভ্যঙ্গে ভোজনে চ| বর্ণো গৌরাদিঃ| বলকরমুত্সাহকরম্| চক্ষুষ্যং পরিণামে, ন তু পূরণেন| লেখনং মেদোহরম্| অনিলবলাসক্ষযকরমিতি মিলিতবাতবলাসযোঃ ক্ষযকরং, ন কেবলস্য বাতস্য ন চ কেবলস্য শ্লেষ্মণঃ; অথবা ক্ষযো মার্গঃ, অনিলবলাসস্রোতঃশোধনমিত্যর্থঃ| অশিতপিত্তজননম্ জল্পতনূকরণপিত্তযোর্জনকং, শিতং হি তনূকরণং, নঞীষদর্থে, তেনাল্পতনূকরণমিতি লভ্যতে; কেচিদশিতমিতি পৃথক্ পঠন্তি, তচ্চ মহাপঞ্জিকাযাং দূষিতম্| ছিন্নং দ্বিধাভূতং, ভিন্নং বিদারিতং, বিদ্ধং সূচ্যাদিভিঃ, উত্পিষ্টং চূর্ণিতং, চ্যুতং স্থানাদধোগতং, মথিতং বিলোডিতং, ক্ষতমুরঃক্ষতাদি, পিঞ্চিতং চিপ্পটীভূতং ‘চির্পিতং’ ইতি লোকে, ভগ্নং সন্ধিমুক্তাদিভেদং, স্ফুটিতং বহুধা খণ্ডীভূতং, বিশ্লিষ্টং সন্ধিবিশ্লেষমাত্রযুক্তং, দারিতং স্ফাটি(ডি)তমিত্যর্থঃ, অভিহতং লগুডাদিভিঃ, দুর্ভগ্নং চূর্ণিতাতিপাতিতং মজ্জানুগতাদিকং কৃচ্ছ্রসাধ্যং দুষ্টং ভগ্নং, মৃগব্যালবিদষ্টং দুষ্টমৃগভক্ষিতম্| পরিষেকঃ অঙ্গোপরি তৈলধারাদিনিপাতঃ, অভ্যঙ্গঃ প্রসিদ্ধঃ, অবগাহোঽপক্রীডনম্ | অন্নপানবিধাবিতি বিধৌ সংস্করণে||১১২-১১৩||
Adhikarana 99 (114) · Śloka 114
এরণ্ডতৈলং মধুরমুষ্ণং তীক্ষ্ণং দীপনং কটু কষাযানুরসং সূক্ষ্মং স্রোতোবিশোধনং ত্বচ্যং বৃষ্যং মধুরবিপাকং বযঃস্থাপনং যোনিশুক্রবিশোধনমারোগ্যমেধাকান্তিস্মৃতিবলকরং বাতকফহরমধোভাগদোষহরং চ ||১১৪||
एरण्डतैलं मधुरमुष्णं तीक्ष्णं दीपनं कटु कषायानुरसं सूक्ष्मं स्रोतोविशोधनं त्वच्यं वृष्यं मधुरविपाकं वयःस्थापनं योनिशुक्रविशोधनमारोग्यमेधाकान्तिस्मृतिबलकरं वातकफहरमधोभागदोषहरं च ||११४||
🔊 Audio coming soon
এরণ্ডতৈলস্য গুণকর্মাণ্যাহ- এরণ্ডতৈলমিত্যাদি| অধোভাগদোষহরং বিরেচনেন দোষহরমিত্যর্থঃ||১১৪||
Adhikarana 100 (115) · Śloka 115
নিম্বাতসীকুসুম্ভমূলকজীমূতকবৃক্ষককৃতবেধনার্ককম্পিল্লকহস্তিকর্ণপৃথ্বীকাপীলু- করঞ্জেঙ্গুদীশিগ্রুসর্ষপসুবর্চলাবিডঙ্গজ্যোতিষ্মতীফলতৈলানি তীক্ষ্ণানি লঘূন্যুষ্ণবীর্যাণি কটূনি কটুবিপাকানি সরাণ্যনিলকফকৃমিকুষ্ঠপ্রমেহশিরোরোগাপহরাণি চেতি ||১১৫||
निम्बातसीकुसुम्भमूलकजीमूतकवृक्षककृतवेधनार्ककम्पिल्लकहस्तिकर्णपृथ्वीकापीलु- करञ्जेङ्गुदीशिग्रुसर्षपसुवर्चलाविडङ्गज्योतिष्मतीफलतैलानि तीक्ष्णानि लघून्युष्णवीर्याणि कटूनि कटुविपाकानि सराण्यनिलकफकृमिकुष्ठप्रमेहशिरोरोगापहराणि चेति ||११५||
🔊 Audio coming soon
নিম্বাদিফলস্নেহগুণানাহ- নিম্বেত্যাদি| জীমূতকো দেবদালী, বৃক্ষকঃ কুটজঃ, কৃতবেধনঃ কোশাতকী, অর্কঃ প্রসিদ্ধঃ, কম্পিল্লকো রেচনিকঃ, হস্তিকর্ণো মহাপর্ণো ‘ভূপলাশ’ ইত্যুচ্যতে, অন্যে রক্তৈরণ্ডমাহুঃ, পৃথ্বীকা কৃষ্ণজীরকঃ, পীলুঃ প্রসিদ্ধঃ, করঞ্জো বৃক্ষকরঞ্জঃ, ইঙ্গুদী কণ্টকী(ক)বৃক্ষঃ প্রসিদ্ধঃ, অন্যে পুত্রজীবকমাহুঃ, শিগ্রুঃ শোভাঞ্জনফলং, সুবর্চলা সূর্যাবর্তঃ, বিডঙ্গঃ কৃমিহা, জ্যোতীষ্মতি কাকমর্দনিকা| নিম্বতৈলং তন্ত্রান্তরে পলিতহরমুক্তম্, ইহাপি সামান্যেন শিরোরোগাপহরত্বেন পলিতহরত্বমুচ্যতে||১১৫||
Adhikarana 101 (116-119) · Śloka 119
বাতঘ্নং মধুরং তেষু ক্ষৌমং তৈলং বলাপহম্ | কটুপাকমচক্ষুষ্যং স্নিগ্ধোষ্ণং গুরুপিত্তলম্ ||১১৬|| কৃমিঘ্নং সার্ষপং তৈলং কণ্ডূকুষ্ঠাপহং লঘু | কফমেদোনিলহরং লেখনং কটু দীপনম্ ||১১৭|| কৃমিঘ্নমিঙ্গুদীতৈলমীষত্তিক্তং তথা লঘু | কুষ্ঠামযকৃমিহরং দৃষ্টিশুক্রবলাপহম্ ||১১৮|| বিপাকে কটুকং তৈলং কৌসুম্ভং সর্বদোষকৃত্ | রক্তপিত্তকরং তীক্ষ্ণমচক্ষুষ্যং বিদাহি চ ||১১৯||
वातघ्नं मधुरं तेषु क्षौमं तैलं बलापहम् | कटुपाकमचक्षुष्यं स्निग्धोष्णं गुरुपित्तलम् ||११६|| कृमिघ्नं सार्षपं तैलं कण्डूकुष्ठापहं लघु | कफमेदोनिलहरं लेखनं कटु दीपनम् ||११७|| कृमिघ्नमिङ्गुदीतैलमीषत्तिक्तं तथा लघु | कुष्ठामयकृमिहरं दृष्टिशुक्रबलापहम् ||११८|| विपाके कटुकं तैलं कौसुम्भं सर्वदोषकृत् | रक्तपित्तकरं तीक्ष्णमचक्षुष्यं विदाहि च ||११९||
🔊 Audio coming soon
এষু কেষাঞ্চিত্ সামান্যগুণাদ্বিশেষং নির্দিশন্নাহ- বাতঘ্নমিত্যাদি| ক্ষৌমমিতি অতসীভবম্||১১৬-১১৯||
Adhikarana 102 (120) · Śloka 120
কিরাততিক্তকাতিমুক্তকবিভীতকনালিকেরকোলাক্ষোডজীবন্তীপ্রিযালকর্বুদার- সূর্যবল্লীত্রপুসৈর্বারুককর্কারুকূষ্মাণ্ডপ্রভৃতীনাং তৈলানি মধুরাণি মধুরবিপাকানি বাতপিত্তপ্রশমনানি শীতবীর্যাণ্যভিষ্যন্দীনি সৃষ্টমূত্রাণ্যগ্নিসাদনানি চেতি ||১২০||
किराततिक्तकातिमुक्तकबिभीतकनालिकेरकोलाक्षोडजीवन्तीप्रियालकर्बुदार- सूर्यवल्लीत्रपुसैर्वारुककर्कारुकूष्माण्डप्रभृतीनां तैलानि मधुराणि मधुरविपाकानि वातपित्तप्रशमनानि शीतवीर्याण्यभिष्यन्दीनि सृष्टमूत्राण्यग्निसादनानि चेति ||१२०||
🔊 Audio coming soon
কটূন্যভিধায মধুরাণি নির্দিশন্নাহ- কিরাতেত্যাদি| অতিমুক্তক আবান্তকঃ, কোলো বদরমজ্জা, অক্ষোড উত্তরাপথে প্রসিদ্ধঃ, জীবন্তী স্বর্ণজীবন্তীফলং, প্রিযালঃ প্রসিদ্ধো মধুরাম্লফলঃ, কর্বুদারঃ কাঞ্চনারঃ; সূর্যবল্লী অর্কপুষ্পী, ‘সূর্যাবর্তভেদঃ’ ইত্যন্যে, সুবর্চলাযাঃ পূর্বমেব পঠিতত্বাত্; ত্রপুসং কর্কটীফলং ‘ত্রিষুডী’ ইতি লোকে, এর্বারুর্গ্রীষ্মকর্কটিকা, কর্কারু বাডবং ত্রপুসম্| প্রভৃতিগ্রহণাত্ কালিঙ্গাদীনাং গ্রহণম্| অগ্নিসাদনানি অগ্নিমান্দ্যকরাণি| কিরাততিক্তকাদীনাং তিক্তানামপি মধুরাণি তৈলানি প্রত্যক্ষদৃষ্টত্বাত্||১২০||
Adhikarana 103 (121) · Śloka 121
মধূককাশ্মর্যপলাশতৈলানি মধুরকষাযাণি কফপিত্তপ্রশমনানি ||১২১||
मधूककाश्मर्यपलाशतैलानि मधुरकषायाणि कफपित्तप्रशमनानि ||१२१||
🔊 Audio coming soon
মধূকাদীনাং তৈলান্যাহ- মধূকেত্যাদি| পলাশঃ কিংশুকঃ||১২১||
Adhikarana 104 (122) · Śloka 122
তুবরকভল্লাতকতৈলে উষ্ণে মধুরকষাযে তিক্তানুরসে বাতকফকুষ্ঠমেদোমেহকৃমিপ্রশমনে উভযতোভাগদোষহরে চ ||১২২||
तुवरकभल्लातकतैले उष्णे मधुरकषाये तिक्तानुरसे वातकफकुष्ठमेदोमेहकृमिप्रशमने उभयतोभागदोषहरे च ||१२२||
🔊 Audio coming soon
তুবরকাদিতৈলমাহ- তুবরকেত্যাদি| তুবরকং পশ্চিমার্ণবতীরজাতমাহুঃ| তদুক্তং- “পত্রৈস্তু কেশরাকারৈঃ কপিত্থসদৃশৈঃ ফলৈঃ| বৃক্ষস্তুবরকো নাম পশ্চিমার্ণবতীরজঃ”- ইতি| উভযতোভাগদোষহরে চেতি বমনেন বিরেচনেন চেত্যর্থঃ||১২২||
Adhikarana 105 (123) · Śloka 123
সরলদেবদারুশিংশপাগুরুগণ্ডীরসারস্নেহাস্তিক্তকটুকষাযা দুষ্টব্রণশোধনাঃ কৃমিকফকুষ্ঠানিলহরাশ্চ ||১২৩||
सरलदेवदारुशिंशपागुरुगण्डीरसारस्नेहास्तिक्तकटुकषाया दुष्टव्रणशोधनाः कृमिकफकुष्ठानिलहराश्च ||१२३||
🔊 Audio coming soon
সারস্নেহানাহ- সরলেত্যাদি| সরলাদযঃ প্রসিদ্ধাঃ| গণ্ডীরঃ সারপ্রধানস্তরুবিশেষঃ| সারস্ত্বন্তর্গতঃ প্রধানভূতোঽবযববিশেষঃ||১২৩||
Adhikarana 106 (124) · Śloka 124
তুম্বীকোশাম্রদন্তীদ্রবন্তীশ্যামাসপ্তলানীলিকাকম্পিল্লকশঙ্খিনীস্নেহাস্তিক্তকটুকষাযা অধোভাগদোষহরাঃ কৃমিকফকুষ্ঠানিলহরা দুষ্টব্রণশোধনাশ্চ ||১২৪||
तुम्बीकोशाम्रदन्तीद्रवन्तीश्यामासप्तलानीलिकाकम्पिल्लकशङ्खिनीस्नेहास्तिक्तकटुकषाया अधोभागदोषहराः कृमिकफकुष्ठानिलहरा दुष्टव्रणशोधनाश्च ||१२४||
🔊 Audio coming soon
তুম্ব্যাদীনাং স্নেহমাহ- তুম্বীত্যাদি| তুম্বী তিক্তালাবুঃ, কোশাম্রঃ ‘কোশম্ব’ ইতি প্রসিদ্ধঃ, দন্তী দন্তিনী, দ্রবন্তী শম্বরী, শ্যামা বৃদ্ধদারুকঃ, সপ্তলা সাতলেতি প্রসিদ্ধা, নীলিনী শ্রীফলিকা, কম্পিল্লকঃ প্রসিদ্ধঃ, শঙ্খিনী শ্বেতশ্রীফলিকা, অন্যে যবতিক্তাভেদমাহুঃ| অধোভাগদোষহরা ইতি বিরেচনেন দোষহরা ইত্যর্থঃ||১২৪||
Adhikarana 107 (125) · Śloka 125
যবতিক্তাতৈলং সর্বদোষপ্রশমনমীষত্তিক্তমগ্নিদীপনং লেখনং মেধ্যং পথ্যং চ ||১২৫||
यवतिक्तातैलं सर्वदोषप्रशमनमीषत्तिक्तमग्निदीपनं लेखनं मेध्यं पथ्यं च ||१२५||
🔊 Audio coming soon
যবতিক্তাতৈলমাহ- যবতিক্তাতৈলমিত্যাদি| যবতিক্তা যবক্ষেত্রেষু জাযতে তিক্তসপ্তাষ্টপত্রা ‘যবেন্তিকা’ ইতি প্রসিদ্ধা||১২৫||
Adhikarana 108 (126) · Śloka 126
একৈষিকাতৈলং মধুরমতিশীতং পিত্তহরমনিলপ্রকোপণং শ্লেষ্মাভিবর্ধনং চ ||১২৬||
एकैषिकातैलं मधुरमतिशीतं पित्तहरमनिलप्रकोपणं श्लेष्माभिवर्धनं च ||१२६||
🔊 Audio coming soon
একৈষিকাতৈলমাহ- একৈষিকাতৈলমিত্যাদি| একৈষিকা অবিদ্ধকরণী ‘পাঠা’ ইতি লোকে, ত্রিবৃদিতি জেজ্ঝটঃ||১২৬||
Adhikarana 109 (127) · Śloka 127
সহকারতৈলমীষত্তিক্তমতিসুগন্ধি বাতকফহরং রূক্ষং মধুরকষাযং রসবন্নাতিপিত্তকরং চ ||১২৭||
सहकारतैलमीषत्तिक्तमतिसुगन्धि वातकफहरं रूक्षं मधुरकषायं रसवन्नातिपित्तकरं च ||१२७||
🔊 Audio coming soon
আম্রতৈলমাহ- সহকারতৈলমিত্যাদি| সহকারতৈলমাম্রতৈলম্| তচ্চ ‘আম্রস্য তরুণফলবৃন্তভঙ্গমাত্রত এব জাতম্’ ইতি গযী, ‘তত্ফলমজ্জস্নেহঃ’ ইত্যন্যে||১২৭||
Adhikarana 110 (128) · Śloka 128
ফলোদ্ভবানি তৈলানি যান্যুক্তানীহ কানিচিত্ | গুণান্ কর্ম চ বিজ্ঞায ফলানীব বিনির্দিশেত্ ||১২৮||
फलोद्भवानि तैलानि यान्युक्तानीह कानिचित् | गुणान् कर्म च विज्ञाय फलानीव विनिर्दिशेत् ||१२८||
🔊 Audio coming soon
ফলানামানন্ত্যাত্ ফলগুণাতিদেশং তৈলেঽপ্যাহ- ফলোদ্ভবানীত্যাদি| ইহ জগতি| ফলানীবেতি ফলসদৃশগুণাঃ কর্মাণি চেত্যর্থঃ; অথবা ইহ তৈলবর্গে যানি কানিচিত্ ফলোদ্ভবানি তৈলান্যুক্তানি তানি তাবদুক্তগুণকর্মভ্যামেব জ্ঞেযানি, শেষাণি তু ফলতৈলানি ফলস্য গুণান্ কর্ম চ বিজ্ঞায ফলানীব বিনির্দিশেদিত্যর্থঃ| কেচিত্তু ‘যান্যুক্তানীহ কানিচিত্’ ইত্যস্য স্থানে ‘যানীত্যুক্তানি কানিচিত্’ ইতি পঠন্তি, শেষং চ সমম্| তচ্চ সুবোধম্||১২৮||
Adhikarana 111 (129) · Śloka 129
যাবন্তঃ স্থাবরাঃ স্নেহাঃ সমাসাত্পরিকীর্তিতাঃ | সর্বে তৈলগুণা জ্ঞেযাঃ সর্বে চানিলনাশনাঃ ||১২৯||
यावन्तः स्थावराः स्नेहाः समासात्परिकीर्तिताः | सर्वे तैलगुणा ज्ञेयाः सर्वे चानिलनाशनाः ||१२९||
🔊 Audio coming soon
সর্বেষাং স্থাবরাণাং স্নেহানাং তিলতৈলগুণত্বমাহ- যাবন্ত ইত্যাদি| সর্বে তৈলগুণা জ্ঞেযা ইতি এতেন তিলতৈলে যে কেচিদ্ধর্মাঃ যানি চ কানিচিত্ কর্মাণি তান্যপরেষ্বপি তৈলেষু বর্তন্ত ইত্যুক্তং, ন তু সর্বে তিলতৈলধর্মাঃ সর্বাণি তিলতৈলকর্মাণি; অন্যে তু গুণশব্দেন সর্বসাধারণীং স্নিগ্ধতামাহুঃ||১২৯||
Adhikarana 112 (130) · Śloka 130
সর্বেভ্যস্ত্বিহ তৈলেভ্যস্তিলতৈলং বিশিষ্যতে | নিষ্পত্তেস্তদ্গুণত্বাচ্চ তৈলত্বমিতরেষ্বপি ||১৩০||
सर्वेभ्यस्त्विह तैलेभ्यस्तिलतैलं विशिष्यते | निष्पत्तेस्तद्गुणत्वाच्च तैलत्वमितरेष्वपि ||१३०||
🔊 Audio coming soon
তিলতৈলপ্রাধান্যকথনদ্বারেণেতরেষাং তৈলানামপি তৈলত্বমাহ- সর্বেভ্যস্ত্বিত্যাদি| নিষ্পত্তেরিতি যথা তৈলং তিলানাং নিষ্পদ্যতে তথৈবৈরণ্ডাদিতৈলমপীতি নিষ্পত্তিসাম্যাদিত্যর্থঃ| তদ্গুণত্বাচ্চেতি কৈশ্চিত্তিলতৈলকর্মভিঃ কৈশ্চিত্তিলতৈলধর্মৈশ্চ সমানত্বাত্||১৩০||
Adhikarana 113 (131) · Śloka 131
গ্রাম্যানূপৌদকানাং চ বসামেদোমজ্জানো গুরূষ্ণমধুরা বাতঘ্নাঃ, জাঙ্গলৈকশফক্রব্যাদাদীনাং লঘুশীতকষাযা রক্তপিত্তঘ্নাঃ, প্রতুদবিষ্কিরাণাং শ্লেষ্মঘ্নাঃ | তত্র ঘৃততৈলবসামেদোমজ্জানো যথোত্তরং গুরুবিপাকা বাতহরাশ্চ ||১৩১|| ইতি তৈলবর্গঃ |
ग्राम्यानूपौदकानां च वसामेदोमज्जानो गुरूष्णमधुरा वातघ्नाः, जाङ्गलैकशफक्रव्यादादीनां लघुशीतकषाया रक्तपित्तघ्नाः, प्रतुदविष्किराणां श्लेष्मघ्नाः | तत्र घृततैलवसामेदोमज्जानो यथोत्तरं गुरुविपाका वातहराश्च ||१३१|| इति तैलवर्गः |
🔊 Audio coming soon
স্নেহসমানত্বাদ্বসাদিগুণকর্মাহ- গ্রাম্যেত্যাদি| গ্রাম্যা গবোষ্ট্রবস্তাদযঃ, আনূপা মহিষাদযঃ, ঔদকা মত্স্যাদযঃ| জাঙ্গলেত্যাদি জাঙ্গলা এণাদযঃ, একশফা অশ্বাদযঃ, ক্রব্যাদা ব্যাঘ্রাদযঃ| প্রতুদেত্যাদি প্রতুদাঃ কপোতপারাবতাদযঃ, বিষ্কিরা লাবাদযঃ||১৩১||
Adhikarana 114 (132) · Śloka 132
অথ মধুবর্গঃ | মধু তু মধুরং কষাযানুরসং রূক্ষং শীতমগ্নিদীপনং বর্ণ্যং স্বর্যং লঘু সুকুমারং লেখনং হৃদ্যং বাজীকরণং সন্ধানং শোধনং রোপণং(সঙ্গ্রাহি ) চক্ষুষ্যং প্রসাদনং সূক্ষ্মমার্গানুসারি পিত্তশ্লেষ্মমেদোমেহহিক্কাশ্বাসকাসাতিসারচ্ছর্দিতৃষ্ণাকৃমিবিষপ্রশমনং হ্লাদি ত্রিদোষপ্রশমনং চ; তত্তু লঘুত্বাত্ কফঘ্নং, পৈচ্ছিল্যান্মাধুর্যাত্ কষাযভাবাচ্চ বাতপিত্তঘ্নম্ ||১৩২||
अथ मधुवर्गः | मधु तु मधुरं कषायानुरसं रूक्षं शीतमग्निदीपनं वर्ण्यं स्वर्यं लघु सुकुमारं लेखनं हृद्यं वाजीकरणं सन्धानं शोधनं रोपणं(सङ्ग्राहि ) चक्षुष्यं प्रसादनं सूक्ष्ममार्गानुसारि पित्तश्लेष्ममेदोमेहहिक्काश्वासकासातिसारच्छर्दितृष्णाकृमिविषप्रशमनं ह्लादि त्रिदोषप्रशमनं च; तत्तु लघुत्वात् कफघ्नं, पैच्छिल्यान्माधुर्यात् कषायभावाच्च वातपित्तघ्नम् ||१३२||
🔊 Audio coming soon
ইদানীং মধ্বাহ, তস্য সামান্যং স্বগুণং নির্দিশন্নাহ- মধ্বিত্যাদি| রূক্ষদীপনলঘুত্বাদিগুণযুক্তং পুরাণং, নবমেতদ্বিপরীতমিতি| সুকুমারং সৌকুমার্যকরম্| লেখনং পত্তলীকরণম্| হৃদ্যং হৃদযপ্রিযং হিতং চ| বাজীকরণং শুক্রলম্| সন্ধানং ভগ্নস্য| শোধনং দুষ্টব্রণস্য| রোপণং শুদ্ধব্রণস্য| চক্ষুষ্যং চক্ষুষে হিতম্| প্রসাদনং চক্ষুষোর্দেহস্য চ| হ্লাদি সুখকারি| ত্রিদোষশমনমিতি যদ্যপি শৈত্যরৌক্ষ্যলাঘবৈর্বাতকারিত্বং মধুরত্বাদিনা চ কফকারিত্বং তথাঽপি দ্রব্যগুণোভযপ্রভাবাত্ত্রিদোষঘ্নত্বম্||১৩২||
Adhikarana 115 (133) · Śloka 133
পৌত্তিকং ভ্রামরং ক্ষৌদ্রং মাক্ষিকং ছাত্রমেব চ | আর্ঘ্যমৌদ্দালকং দালমিত্যষ্টৌ মধুজাতযঃ ||১৩৩||
पौत्तिकं भ्रामरं क्षौद्रं माक्षिकं छात्रमेव च | आर्घ्यमौद्दालकं दालमित्यष्टौ मधुजातयः ||१३३||
🔊 Audio coming soon
তদ্ভেদানাহ- পৌত্তিকমিত্যাদি| পিঙ্গলা মহত্যো মক্ষিকাঃ পুত্তিকাঃ, তদ্ভবং পৌত্তিকম্; অন্যে ‘মশকোপমা মক্ষিকাঃ কৃষ্ণবর্ণাঃ পুত্তিকাঃ’ ইতি বদন্তি| ভ্রমরাঃ প্রসিদ্ধাঃ, তদ্ভবং ভ্রামরম্| মক্ষিকাঃ পিঙ্গলা এব স্বল্পাঃ ক্ষুদ্রাঃ, তদ্ভবং ক্ষৌদ্রম্| পিঙ্গলবর্ণা মহত্যো মক্ষিকাস্তদ্ভবং মাক্ষিকম্; অন্যে ‘অত্যল্পা মক্ষিকাঃ’ ইত্যাহুঃ| পীতকপিঙ্গলা ‘বগ’ ইতি লোকে যত্ কুর্বন্তি ছত্রকাকারং হৈমবতে বনে মালববনে চ তচ্ছাত্রম্| “মধূকবৃক্ষপুষ্পেভ্যো জরত্কার্বাশ্রমোদ্ভবাঃ| স্রবন্ত্যার্ধ্যং মধু প্রাহুঃ শ্বেতকং মালবে জনাঃ|| তীক্ষ্ণতুণ্ডাস্তু যাঃ পীতবর্ণাঃ ষট্পদসন্নিভাঃ| অর্ঘা নাম চ তদ্ভূতমার্ঘ্যমিত্যপরে জগুঃ”- ইতি| উষ্ণেন সহার্ঘ্যং ন বিরুধ্যতে| যদুক্তং- “মধূন্যুষ্ণৈর্বিরুধ্যন্তেঽন্যত্রার্ঘ্যাত্”- ইতি| উদ্দালকাঃ কপিলকীটাঃ স্বল্পাঃ প্রাযশো বল্মীকেষ্বন্তর্মধু চিন্বন্তি, তদ্ভবমৌদ্দালকম্| দালমিতি দলং পত্রং, তদুপরিস্থিতং দালম্; অন্যে তু কপিলা এব স্বল্পতরা মক্ষিকাঃ প্রাযেণ বৃক্ষকোটরোদ্ভবা ‘দলা’ ইত্যুচ্যন্তে, তদ্ভবং দালমিতি||১৩৩||
Adhikarana 116 (134-139) · Śloka 140
বিশেষাত্পৌত্তিকং তেষু রূক্ষোষ্ণং সবিষান্বযাত্ | বাতাসৃক্পিত্তকৃচ্ছেদি বিদাহি মদকৃন্মধু ||১৩৪|| পৈচ্ছিল্যাত্ স্বাদুভূযস্ত্বাদ্ভ্রামরং গুরুসঞ্জ্ঞিতম্ | ক্ষৌদ্রং বিশেষতো জ্ঞেযং শীতলং লঘু লেখনম্ ||১৩৫|| তস্মাল্লঘুতরং রূক্ষং মাক্ষিকং প্রবরং স্মৃতম্ | শ্বাসাদিষু চ রোগেষু প্রশস্তং তদ্বিশেষতঃ ||১৩৬|| স্বাদুপাকং গুরু হিমং পিচ্ছিলং রক্তপিত্তজিত্ | শ্বিত্রমেহকৃমিঘ্নং চ বিদ্যাচ্ছাত্রং গুণোত্তরম্ ||১৩৭|| আর্ঘ্যং মধ্বতিচক্ষুষ্যং কফপিত্তহরং পরম্ | কষাযং কটু পাকে চ বল্যং তিক্তমবাতকৃত্ ||১৩৮|| ঔদ্দালকং রুচিকরং স্বর্যং কুষ্ঠবিষাপহম্ | কষাযমম্লমুষ্ণং চ পিত্তকৃত্ কটুপাকি চ ||১৩৯|| ছর্দিমেহপ্রশমনং মধু রূক্ষং দলোদ্ভবম্ |১৪০|
विशेषात्पौत्तिकं तेषु रूक्षोष्णं सविषान्वयात् | वातासृक्पित्तकृच्छेदि विदाहि मदकृन्मधु ||१३४|| पैच्छिल्यात् स्वादुभूयस्त्वाद्भ्रामरं गुरुसञ्ज्ञितम् | क्षौद्रं विशेषतो ज्ञेयं शीतलं लघु लेखनम् ||१३५|| तस्माल्लघुतरं रूक्षं माक्षिकं प्रवरं स्मृतम् | श्वासादिषु च रोगेषु प्रशस्तं तद्विशेषतः ||१३६|| स्वादुपाकं गुरु हिमं पिच्छिलं रक्तपित्तजित् | श्वित्रमेहकृमिघ्नं च विद्याच्छात्रं गुणोत्तरम् ||१३७|| आर्घ्यं मध्वतिचक्षुष्यं कफपित्तहरं परम् | कषायं कटु पाके च बल्यं तिक्तमवातकृत् ||१३८|| औद्दालकं रुचिकरं स्वर्यं कुष्ठविषापहम् | कषायमम्लमुष्णं च पित्तकृत् कटुपाकि च ||१३९|| छर्दिमेहप्रशमनं मधु रूक्षं दलोद्भवम् |१४०|
🔊 Audio coming soon
তেষাং প্রত্যেকং গুণমাহ- বিশেষাদিত্যাদি| সবিষান্বযাদিতি সবিষপুষ্পাহারমক্ষিকাসম্ভত্বাত্| ছেদি মেদোগ্রন্থ্যাদীনাম্| মদকৃদিতি বিষান্বযত্বাদেব বিষমদকৃত্||১৩৪-১৩৯||-
Adhikarana 117 (140) · Śloka 141
বৃংহণীযং মধু নবং নাতিশ্লেষ্মহরং সমম্ ||১৪০|| মেদঃস্থৌল্যাপহং গ্রাহি পুরাণমতিলেখনম্ |১৪১|
बृंहणीयं मधु नवं नातिश्लेष्महरं समम् ||१४०|| मेदःस्थौल्यापहं ग्राहि पुराणमतिलेखनम् |१४१|
🔊 Audio coming soon
নবপুরাণযোর্গুণমাহ- বৃংহণীযমিত্যাদি| আশযাচ্চ্যাবিতস্যাল্পকালস্থাপিতত্বেন নবত্বম্, এতদ্বিপর্যযেণ পুরাণত্বম্||১৪০||-
Adhikarana 118 (141) · Śloka 141
দোষত্রযহরং পক্বমামমম্লং ত্রিদোষকৃত্ ||১৪১||
दोषत्रयहरं पक्वमाममम्लं त्रिदोषकृत् ||१४१||
🔊 Audio coming soon
পক্বামযোর্গুণমাহ- দোষত্রযহরমিত্যাদি| পক্বত্বমগ্নিসংযোগাত্, ঘনীভাবাদিত্যেকে; ‘অগ্নিসংযোগনিষেধান্নিন্দিতমেতত্, তস্মান্মধুনঃ কালবিশেষস্থিত্যা পরিণামাত্ পক্বত্বমামত্বং চ জ্ঞেযম্’ ইত্যন্যে||১৪১||
Adhikarana 119 (142) · Śloka 142
তদ্যুক্তং বিবিধৈর্যোগৈর্নিহন্যাদামযান্ বহূন্ | নানাদ্রব্যাত্মকত্বাচ্চ যোগবাহি পরং মধু ||১৪২||
तद्युक्तं विविधैर्योगैर्निहन्यादामयान् बहून् | नानाद्रव्यात्मकत्वाच्च योगवाहि परं मधु ||१४२||
🔊 Audio coming soon
অনেককর্মকারিণীং যোগবাহিতাং দর্শযন্নাহ- তদ্যুক্তমিত্যাদি| যোগৈরিতি ঔষধসমূহৈরিত্যর্থঃ| যাদৃগ্দ্রব্যেণ সংযোজ্যন্তে তাদৃক্ কর্ম কুর্বন্তীতি যোগবাহিত্বং, তেষাং মধ্যে পরমুত্কৃষ্টং মধ্বিত্যর্থঃ||১৪২||
Adhikarana 120 (143-145) · Śloka 145
তত্তু নানাদ্রব্যরসগুণবীর্যবিপাকবিরুদ্ধানাং পুষ্পরসানাং মক্ষিকাসম্ভবত্বাচ্চানুষ্ণোপচারম্ ||১৪৩|| উষ্ণৈর্বিরুধ্যতে সর্বং বিষান্বযতযা মধু | উষ্ণার্তমুষ্ণৈরুষ্ণে বা তন্নিহন্তি যথা বিষম্ ||১৪৪|| তত্সৌকুমার্যাচ্চ তথৈব শৈত্যান্নানৌষধীনাং রসসম্ভবাচ্চ | উষ্ণৈর্বিরুধ্যেত বিশেষতশ্চ তথাঽন্তরীক্ষেণ জলেন চাপি ||১৪৫||
तत्तु नानाद्रव्यरसगुणवीर्यविपाकविरुद्धानां पुष्परसानां मक्षिकासम्भवत्वाच्चानुष्णोपचारम् ||१४३|| उष्णैर्विरुध्यते सर्वं विषान्वयतया मधु | उष्णार्तमुष्णैरुष्णे वा तन्निहन्ति यथा विषम् ||१४४|| तत्सौकुमार्याच्च तथैव शैत्यान्नानौषधीनां रससम्भवाच्च | उष्णैर्विरुध्येत विशेषतश्च तथाऽन्तरीक्षेण जलेन चापि ||१४५||
🔊 Audio coming soon
ইদানীমুক্তাযামপি হিতাহিতীযে প্রক্রমাগতাযামনুষ্ণোপচারতাযাং হেতুং দর্শযন্নাহ- তত্ত্বিত্যাদি| তন্মধু অনুষ্ণোপচারং ভবতীতি সম্বন্ধঃ| কস্মাদিত্যাহ- পুষ্পরসানাং মক্ষিকাসম্ভবত্বাত্, কিম্ভূতানাং নানাদ্রব্যরসগুণবীর্যবিপাকবিরুদ্ধানাং; ‘পুষ্পরসবিষমক্ষিকাসম্ভবত্বাত্’ ইত্যন্যে পঠন্তি; পুষ্পরসবিষসঞ্চারিণ্যো মক্ষিকাঃ পুষ্পরসবিষমক্ষিকাঃ| ‘অনুষ্ণোপচারং যোগবাহি চ’ ইতি কেচিদ্দ্বযং পঠন্তি; তন্ন, পূর্বমুক্তত্বাদ্যোগবাহিতাযাঃ| (মক্ষিকা হি পুষ্পরসসঞ্চারিণ্যস্তত্সম্ভবং মধ্বপি বীর্যেণোষ্ণং ভবতি, তস্মান্মধূষ্ণদ্রব্যেণ নোপচর্যতে যুজ্যতে, উষ্ণেন সহ বিরুদ্ধত্বাদ্ বিষবদিতি ভাবঃ|) উষ্ণেন সহ বিরোধে হেতুমাহ- উষ্ণৈরিত্যাদি| উষ্ণৈরিতি উষ্ণস্পর্শৈঃ, ন তূষ্ণবীর্যৈঃ| বিষান্বযতযা বিষাহারমক্ষিকাপ্রসবতযা| উষ্ণার্তং ঘর্মপীডিতম্| উষ্ণৈর্দ্রব্যৈঃ সহ| উষ্ণে দেশে কালে বা| উক্তমেব সুখবোধনার্থমাহ- তদিত্যাদি| সুকুমারং হ্যুষ্ণেন বিরুধ্যতে; যথা নবনীতস্ত্যানঘৃতজলকুসুমানি| শীতস্যাপি স্বভাবতঃ শীতেনাপি কেনচিদ্বিরোধমাহ- তথাঽন্তরীক্ষেণ জলেন চাপি; খজলেন স্বভাবতঃ; অপিশব্দাদার্ঘ্যমুষ্ণেন সহ ন বিরুধ্যতে||১৪৩-১৪৫||
Adhikarana 121 (146) · Śloka 146
উষ্ণেন মধু সংযুক্তং বমনেষ্ববচারিতম্ | অপাকাদনবস্থানান্ন বিরুধ্যেত পূর্ববত্ ||১৪৬||
उष्णेन मधु संयुक्तं वमनेष्ववचारितम् | अपाकादनवस्थानान्न विरुध्येत पूर्ववत् ||१४६||
🔊 Audio coming soon
বমনবিষযে উষ্ণেনাপ্যবিরোধমাহ- উষ্ণেনেত্যাদি| যদ্যপি বমনে উষ্ণস্য মধুনা বিরোধো নোক্তঃ, তথাঽপি বৃদ্ধা ন প্রযুঞ্জতে বমনস্যাধোগতিভযাত্||১৪৬||
Adhikarana 122 (147) · Śloka 147
মধ্বামাত্পরতস্ত্বন্যদামং কষ্টং ন বিদ্যতে | বিরুদ্ধোপক্রমত্বাত্তত্ সর্বং হন্তি যথা বিষম্ ||১৪৭|| ইতি মধুবর্গঃ |
मध्वामात्परतस्त्वन्यदामं कष्टं न विद्यते | विरुद्धोपक्रमत्वात्तत् सर्वं हन्ति यथा विषम् ||१४७|| इति मधुवर्गः |
🔊 Audio coming soon
অন্যেভ্যোঽজীর্ণেভ্যঃ সকাশান্মধ্বজীর্ণং কষ্টাবহমিত্যাহ- মধ্বিত্যাদি| মধ্বামং মধ্বজীর্ণম্| পরত ঊর্ধ্বম্| আমস্য স্বেদোষ্ণোদকাদয উপক্রমাঃ, তে চোষ্ণত্বান্মধুনো বিরুদ্ধাঃ| সর্বং প্রাণিনম্||১৪৭||
Adhikarana 123 (148-149) · Śloka 150
অথেক্ষুবর্গঃ | ইক্ষবো মধুরা মধুরবিপাকা গুরবঃ শীতাঃ স্নিগ্ধা বল্যা বৃষ্যা মূত্রলা রক্তপিত্তপ্রশমনাঃ কৃমিকফকরাশ্চেতি | তে চানেকবিধাঃ | তদ্যথা- ||১৪৮|| পৌণ্ড্রকো ভীরুকশ্চৈব বংশকঃ শ্বেতপোরকঃ | কান্তারস্তাপসেক্ষুশ্চ কাষ্ঠেক্ষুঃ সূচিপত্রকঃ ||১৪৯|| নৈপালো দীর্ঘপত্রশ্চ নীলপোরোঽথ কোশকৃত্ | ইত্যেতা জাতযঃ স্থৌল্যাদ্, ... |১৫০|
अथेक्षुवर्गः | इक्षवो मधुरा मधुरविपाका गुरवः शीताः स्निग्धा बल्या वृष्या मूत्रला रक्तपित्तप्रशमनाः कृमिकफकराश्चेति | ते चानेकविधाः | तद्यथा- ||१४८|| पौण्ड्रको भीरुकश्चैव वंशकः श्वेतपोरकः | कान्तारस्तापसेक्षुश्च काष्ठेक्षुः सूचिपत्रकः ||१४९|| नैपालो दीर्घपत्रश्च नीलपोरोऽथ कोशकृत् | इत्येता जातयः स्थौल्याद्, ... |१५०|
🔊 Audio coming soon
অথেক্ষূণাং সামান্যং গুণমাহ- ইক্ষব ইত্যাদি| ইতিশব্দঃ প্রকারবাচী, তেন ভোরদশতপত্রপাণ্ডুকবেত্রকোদ্রবকচণিপ্রভৃতযো বহ্বযো জাতযো গৃহ্যন্তে| স্থৌল্যাদিতি স্থৌল্যাত্ সামান্যাদেব দ্বাদশজাতযো ভবন্তীত্যর্থঃ||১৪৮-১৪৯||-
Adhikarana 124 (150-154) · Śloka 155
... গুণান্ বক্ষ্যাম্যতঃ পরম্ ||১৫০|| সুশীতো মধুরঃ স্নিগ্ধো বৃংহণঃ শ্লেষ্মলঃ সরঃ | অবিদাহী গুরুর্বৃষ্যঃ পৌণ্ড্রকো ভীরুকস্তথা ||১৫১|| আভ্যাং তুল্যগুণঃ কিঞ্চিত্সক্ষারো বংশকো মতঃ | বংশবচ্ছ্বেতপোরস্তু কিঞ্চিদুষ্ণঃ স বাতহা ||১৫২|| কান্তারতাপসাবিক্ষূ বংশকানুগতৌ মতৌ | এবঙ্গুণস্তু কাষ্ঠেক্ষুঃ স তু বাতপ্রকোপণঃ ||১৫৩|| সূচীপত্রো নীলপোরৌ নৈপালো দীর্ঘপত্রকঃ | বাতলাঃ কফপিত্তঘ্নাঃ সকষাযা বিদাহিনঃ ||১৫৪|| কোশকারো গুরুঃ শীতো রক্তপিত্তক্ষযাপহঃ |১৫৫|
... गुणान् वक्ष्याम्यतः परम् ||१५०|| सुशीतो मधुरः स्निग्धो बृंहणः श्लेष्मलः सरः | अविदाही गुरुर्वृष्यः पौण्ड्रको भीरुकस्तथा ||१५१|| आभ्यां तुल्यगुणः किञ्चित्सक्षारो वंशको मतः | वंशवच्छ्वेतपोरस्तु किञ्चिदुष्णः स वातहा ||१५२|| कान्तारतापसाविक्षू वंशकानुगतौ मतौ | एवङ्गुणस्तु काष्ठेक्षुः स तु वातप्रकोपणः ||१५३|| सूचीपत्रो नीलपोरौ नैपालो दीर्घपत्रकः | वातलाः कफपित्तघ्नाः सकषाया विदाहिनः ||१५४|| कोशकारो गुरुः शीतो रक्तपित्तक्षयापहः |१५५|
🔊 Audio coming soon
গুণানিত্যাদি||১৫০-১৫৪||-
Adhikarana 125 (155) · Śloka 156
অতীব মধুরো মূলে মধ্যে মধুর এব তু ||১৫৫|| অগ্রেষ্বক্ষিষু বিজ্ঞেয ইক্ষূণাং লবণো রসঃ ||১৫৬||
अतीव मधुरो मूले मध्ये मधुर एव तु ||१५५|| अग्रेष्वक्षिषु विज्ञेय इक्षूणां लवणो रसः ||१५६||
🔊 Audio coming soon
তেষামবযববিশেষেণ গুণবিশেষমাহ- অতীবেত্যাদি| অগ্রেষ্বক্ষিষু বিজ্ঞেয ইতি ইক্ষূণামক্ষীণি পর্বসন্ধিষু প্ররোহজননসমর্থা অঙ্কুরাঃ| অন্যে ‘ত্বক্ষু চ’ ইতি পঠন্তি, ত্বক্ষু বল্কলেষু||১৫৫||-
Adhikarana 126 (157) · Śloka 157
অবিদাহী কফকরো বাতপিত্তনিবারণঃ | বক্ত্রপ্রহ্লাদনো বৃষ্যো দন্তনিষ্পীডিতো রসঃ ||১৫৭||
अविदाही कफकरो वातपित्तनिवारणः | वक्त्रप्रह्लादनो वृष्यो दन्तनिष्पीडितो रसः ||१५७||
🔊 Audio coming soon
দন্তনিষ্পীডিতেক্ষুরসস্য গুণমাহ- অবিদাহীত্যাদি|- বৃহল্লঘুপঞ্জিকযোঃ; জেজ্ঝটস্তু- “কফকৃচ্চাবিদাহী চ রক্তপিত্তনিবর্হণঃ| শর্করাসমবীর্যস্তু দন্তনিষ্পীডিতো রসঃ”- ইতি পঠতি| শর্করাসমবীর্য ইত্যত্র বীর্যশব্দঃ শক্তযভিধাযকঃ, নতু শীতাদিবীর্যবাচকঃ| কস্মাদবিদাহী? উচ্যতে- বহিরস্থাযিত্বেন বাতাতপাদ্যনুপহতত্বাত্||১৫৭||
Adhikarana 127 (158) · Śloka 158
গুরুর্বিদাহী বিষ্টম্ভী যান্ত্রিকস্তু প্রকীর্তিতঃ |১৫৮|
गुरुर्विदाही विष्टम्भी यान्त्रिकस्तु प्रकीर्तितः |१५८|
🔊 Audio coming soon
যন্ত্রপীডিতেক্ষুরসস্য গুণমাহ- গুরুরিত্যাদি| যন্ত্রপীডিতস্য বহিশ্চিরস্থিত্যা বাতাতপাদিসংযোগে ত্বগাদিভিঃ সহ পীডনাচ্চ গুরুত্বাদযো ভবন্তি| গুরুত্বং চিরপাকিত্বম্| বিদাহীতি “দ্রব্যস্বভাবাদয গৌরবাদ্বা চিরেণ পাকং জঠরাগ্নিযোগাত্| পিত্তপ্রকোপং বিদহত্ করোতি তদন্নপানং কথিতং বিদাহি”- ইতি| বিষ্টম্ভো গুডগুডাশব্দঃ, অন্যে তু সবাততোদশূলা মলস্যাপ্রবৃত্তির্বিষ্টম্ভঃ|১৫৮|
Adhikarana 128 (158) · Śloka 158
পক্বো গুরুঃ সরঃ স্নিগ্ধঃ সতীক্ষ্ণঃ কফবাতনুত্ ||১৫৮||
पक्वो गुरुः सरः स्निग्धः सतीक्ष्णः कफवातनुत् ||१५८||
🔊 Audio coming soon
তস্যাগ্নিপক্বস্য গুণমাহ- পক্ব ইত্যাদি||১৫৮||
Adhikarana 129 (159) · Śloka 159
ফাণিতং গুরু মধুরমভিষ্যন্দি বৃংহণমবৃষ্যং ত্রিদোষকৃচ্চ ||১৫৯||
फाणितं गुरु मधुरमभिष्यन्दि बृंहणमवृष्यं त्रिदोषकृच्च ||१५९||
🔊 Audio coming soon
ফাণিতস্য গুণমাহ- ফাণিতমিত্যাদি| ফাণিতং ক্ষুদ্রগুডঃ ‘কাকবী’ ইতি লোকে| অস্য ত্রিদোষকরত্বং প্রভাবাত্||১৫৯||
Adhikarana 130 (160) · Śloka 160
গুডঃ সক্ষারমধুরো নাতিশীতঃ স্নিগ্ধো মূত্ররক্তশোধনো নাতিপিত্তজিদ্বাতঘ্নো মেদঃকৃমিকফকরো বল্যো বৃষ্যশ্চ ||১৬০||
गुडः सक्षारमधुरो नातिशीतः स्निग्धो मूत्ररक्तशोधनो नातिपित्तजिद्वातघ्नो मेदःकृमिकफकरो बल्यो वृष्यश्च ||१६०||
🔊 Audio coming soon
তস্যৈব পাকাদতিঘনভাবং গতস্য গুডসঞ্জ্ঞা, তমাহ- গুড ইত্যাদি| সক্ষার ঈষত্ক্ষারঃ| এতেঽনির্মলগুডগুণাঃ||১৬০||
Adhikarana 131 (161) · Śloka 161
পিত্তঘ্নো মধুরঃ শুদ্ধো বাতঘ্নোঽসৃক্প্রসাদনঃ |১৬১|
पित्तघ्नो मधुरः शुद्धो वातघ्नोऽसृक्प्रसादनः |१६१|
🔊 Audio coming soon
নির্মলগুডস্য গুণমাহ- পিত্তঘ্ন ইত্যাদি| শুদ্ধো নির্মলো ধবল ইত্যর্থঃ|১৬১|
Adhikarana 132 (161) · Śloka 161
সপুরাণোঽধিকগুণো গুডঃ পথ্যতমঃ স্মৃতঃ ||১৬১||
सपुराणोऽधिकगुणो गुडः पथ्यतमः स्मृतः ||१६१||
🔊 Audio coming soon
পুরাণস্য গুডস্য গুণমাহ- সেত্যাদি| সপুরাণ ঈষত্পুরাণঃ||১৬১||
Adhikarana 133 (162) · Śloka 162
মত্স্যণ্ডিকাখণ্ডশর্করা বিমলজাতা উত্তরোত্তরং শীতাঃ স্নিগ্ধাঃ গুরুতরা মধুরতরা বৃষ্যা রক্তপিত্তপ্রশমনাস্তৃষ্ণাপ্রশমনাশ্চ ||১৬২||
मत्स्यण्डिकाखण्डशर्करा विमलजाता उत्तरोत्तरं शीताः स्निग्धाः गुरुतरा मधुरतरा वृष्या रक्तपित्तप्रशमनास्तृष्णाप्रशमनाश्च ||१६२||
🔊 Audio coming soon
তস্য গুডস্য সংস্কারবিশেষেণ নামান্তরং গুণান্তরং চাহ- মত্স্যণ্ডিকেত্যাদি| মত্স্যণ্ডিকা দ্রবখণ্ডঃ ‘খণ্ডদ্রব’ ইতি লোকে; খণ্ডঃ প্রসিদ্ধঃ; শর্করা সিতোপলা ‘তবরাজ’ ইতি লোকে| গুডান্মত্স্যণ্ডিকা ততঃ খণ্ডস্ততঃ শর্করেতি বৈমল্যোত্কর্ষে শৈত্যাদিপ্রকর্ষ ইত্যর্থঃ||১৬২||
Adhikarana 134 (163) · Śloka 163
যথা যথৈষাং বৈমল্যং মধুরত্বং তথা তথা | স্নেহগৌরবশৈত্যানি সরত্বং চ তথা তথা ||১৬৩||
यथा यथैषां वैमल्यं मधुरत्वं तथा तथा | स्नेहगौरवशैत्यानि सरत्वं च तथा तथा ||१६३||
🔊 Audio coming soon
পূর্বোক্তমেব স্পষ্টযতি- যথেত্যাদি| এষামিক্ষুবিকারাণাম্| গৌরবং বাতপিত্তহারিত্বং, গৌরবং মধুরবিপাকিত্বমিত্যন্যে| অন্যে তু ‘স্নেহলাঘবশৈত্যানি’ ইতি পঠন্তি||১৬৩||
Adhikarana 135 (164) · Śloka 164
যো যো মত্স্যণ্ডিকাখণ্ডশর্করাণাং স্বকো গুণঃ | তেন তেনৈব নির্দেশ্যস্তেষাং বিস্রাবণো গুণঃ ||১৬৪||
यो यो मत्स्यण्डिकाखण्डशर्कराणां स्वको गुणः | तेन तेनैव निर्देश्यस्तेषां विस्रावणो गुणः ||१६४||
🔊 Audio coming soon
মত্স্যণ্ডিকাদীনাং করণেঽপনীযমানস্য মলস্য গুণমাহ- যো য ইত্যাদি| স্বকো গুণঃ শীতাদিরিত্যর্থঃ| তেন তেনৈব স্বকীযেন স্বকীযেনৈব গুণেন| কো নির্দেশ্য ইত্যাহ- তেষাং বিস্রাবণো গুণ ইতি; নির্দেশ্যঃ কথনীযঃ| গুণঃ সমলক্ষারোঽবযববিশেষঃ| কথং সমলক্ষারো গুণঃ কথ্যতে? উচ্যতে- যো যত্সম্বন্ধী ভবতি স তু তদ্গুণ এব , তত্সম্ভূতত্বাত্||১৬৪||
Adhikarana 136 (165) · Śloka 165
সারস্থিতা সুবিমলা নিঃক্ষারা চ যথা যথা | তথা গুণবতী সর্বা বিজ্ঞেযা শর্করা বুধৈঃ ||১৬৫||
सारस्थिता सुविमला निःक्षारा च यथा यथा | तथा गुणवती सर्वा विज्ञेया शर्करा बुधैः ||१६५||
🔊 Audio coming soon
শর্করাযা উত্কর্ষমাহ- সারেত্যাদি||১৬৫||
Adhikarana 137 (166) · Śloka 166
মধুশর্করা পুনশ্ছর্দ্যতীসারহরী রূক্ষা ছেদনী প্রসাদনী কষাযমধুরা মধুরবিপাকা চ ||১৬৬||
मधुशर्करा पुनश्छर्द्यतीसारहरी रूक्षा छेदनी प्रसादनी कषायमधुरा मधुरविपाका च ||१६६||
🔊 Audio coming soon
মধুশর্করাগুণমাহ- মধুশর্করেত্যাদি| পাকাত্ কালান্তরশোষণাদ্বা ঘনীভূতাবযবং মধু শর্করাতুল্যত্বাত্ ‘মধুশর্করা’ ইত্যুচ্যতে| ছেদনী কফাদীনাং পিণ্ডীভূতানাং ভেদকারিণী||১৬৬||
Adhikarana 138 (167) · Śloka 167
যবাসশর্করা মধুরকষাযা তিক্তানুরসা শ্লেষ্মহরী সরা চেতি ||১৬৭||
यवासशर्करा मधुरकषाया तिक्तानुरसा श्लेष्महरी सरा चेति ||१६७||
🔊 Audio coming soon
যবাসশর্করাগুণমাহ- যবাসশর্করেত্যাদি| যবাসক্বাথপাকঘনীভাবাচ্ছর্করা কৃতা যবাসশর্করা||১৬৭||
Adhikarana 139 (168) · Śloka 168
যাবত্যঃ শর্করাঃ প্রোক্তাঃ সর্বা দাহপ্রণাশনাঃ | রক্তপিত্তপ্রশমনাশ্ছর্দিমূর্চ্ছাতৃষাপহাঃ ||১৬৮||
यावत्यः शर्कराः प्रोक्ताः सर्वा दाहप्रणाशनाः | रक्तपित्तप्रशमनाश्छर्दिमूर्च्छातृषापहाः ||१६८||
🔊 Audio coming soon
অবশিষ্টশর্করাগুণমাহ- যাবত্য ইত্যাদি||১৬৮||
Adhikarana 140 (169) · Śloka 169
রূক্ষং মধূকপুষ্পোত্থং ফাণিতং বাতপিত্তকৃত্ | কফঘ্নং মধুরং পাকে কষাযং বস্তিদূষণম্ ||১৬৯|| ইতীক্ষুবর্গঃ |
रूक्षं मधूकपुष्पोत्थं फाणितं वातपित्तकृत् | कफघ्नं मधुरं पाके कषायं बस्तिदूषणम् ||१६९|| इतीक्षुवर्गः |
🔊 Audio coming soon
মধূকপুষ্পোত্থফাণিতস্য গুণমাহ- রূক্ষমিত্যাদি| বস্তিদূষণমিতি মূত্রাশযে বাতাদিপ্রকোপকারি||১৬৯||
Adhikarana 141 (170) · Śloka 171
অথ মদ্যবর্গঃ | সর্বং পিত্তকরং মদ্যমম্লং রোচনদীপনম্ | ভেদনং কফবাতঘ্নং হৃদ্যং বস্তিবিশোধনম্ ||১৭০|| পাকে লঘু বিদাহ্যুষ্ণং তীক্ষ্ণমিন্দ্রিযবোধনম্ | বিকাসি সৃষ্টবিণ্মূত্রং... |১৭১|
अथ मद्यवर्गः | सर्वं पित्तकरं मद्यमम्लं रोचनदीपनम् | भेदनं कफवातघ्नं हृद्यं बस्तिविशोधनम् ||१७०|| पाके लघु विदाह्युष्णं तीक्ष्णमिन्द्रियबोधनम् | विकासि सृष्टविण्मूत्रं... |१७१|
🔊 Audio coming soon
অথ মদ্যানি গুণকর্মভ্যাং নির্দিশন্নাহ- সর্বমিত্যাদি| সর্বং পৈষ্টিকং মার্দ্বীকং গৌডং চ ত্রিবিধং হি মদ্যম্| অম্লমিতি লবণবর্জ্যং পঞ্চরসত্বেঽপ্যম্লস্যোত্কটত্বাদম্লকার্যকারিত্বাচ্চাম্লমিত্যুক্তম্| ইন্দ্রিযবোধনম্ ইন্দ্রিযপাটবকরম্| বিকাসি সন্ধিবন্ধবিমোচকম্| সৃষ্টবিণ্মূত্রং বিষ্ঠামূত্রপ্রবর্তকম্| এতে সর্বমদ্যগুণাঃ||১৭০||-
Adhikarana 142 (171-173) · Śloka 173
... শৃণু তস্য বিশেষণম্ ||১৭১|| মার্দ্বীকমবিদাহিত্বান্মধুরান্বযতস্তথা | রক্তপিত্তেঽপি সততং বুধৈর্ন প্রতিষিধ্যতে ||১৭২|| মধুরং তদ্ধি রূক্ষং চ কষাযানুরসং লঘু | লঘুপাকি সরং শোষবিষমজ্বরনাশনম্ ||১৭৩||
... शृणु तस्य विशेषणम् ||१७१|| मार्द्वीकमविदाहित्वान्मधुरान्वयतस्तथा | रक्तपित्तेऽपि सततं बुधैर्न प्रतिषिध्यते ||१७२|| मधुरं तद्धि रूक्षं च कषायानुरसं लघु | लघुपाकि सरं शोषविषमज्वरनाशनम् ||१७३||
🔊 Audio coming soon
মার্দ্বীকমাহ- মার্দ্বীকমিত্যাদি| মার্দ্বীকমবিদাহিত্বাদিতি মার্দ্বীকং দ্রাক্ষোদ্ভবম্| মধুরান্বযতো মধুরদ্রব্যপ্রভবত্বাত্||১৭১-১৭৩||
Adhikarana 143 (174) · Śloka 175
মার্দ্বীকাল্পান্তরং কিঞ্চিত্ খার্জূরং বাতকোপনম্ | তদেব বিশদং রুচ্যং কফঘ্নং কর্শনং লঘু ||১৭৪|| কষাযমধুরং হৃদ্যং সুগন্ধীন্দ্রিযবোধনম্ |১৭৫|
मार्द्वीकाल्पान्तरं किञ्चित् खार्जूरं वातकोपनम् | तदेव विशदं रुच्यं कफघ्नं कर्शनं लघु ||१७४|| कषायमधुरं हृद्यं सुगन्धीन्द्रियबोधनम् |१७५|
🔊 Audio coming soon
খার্জূরমাহ- মার্দ্বীকেত্যাদি| অল্পান্তরং স্তোকভেদম্| কর্শনং কার্শ্যকরম্||১৭৪||-
Adhikarana 144 (175) · Śloka 176
কাসার্শোগ্রহণীদোষমূত্রাঘাতানিলাপহা ||১৭৫|| স্তন্যরক্তক্ষযহিতা সুরা বৃংহণদীপনী |১৭৬|
कासार्शोग्रहणीदोषमूत्राघातानिलापहा ||१७५|| स्तन्यरक्तक्षयहिता सुरा बृंहणदीपनी |१७६|
🔊 Audio coming soon
সুরাগুণমাহ- কাসার্শ ইত্যাদি| সুরা লোহিতবর্ণা পিষ্টকিণ্বকল্কেন কিঞ্চিত্কলুষা| এতে সর্বসুরাগুণাঃ||১৭৫||-
Adhikarana 145 (176) · Śloka 177
কাসার্শোগ্রহণীশ্বাসপ্রতিশ্যাযবিনাশনী ||১৭৬|| শ্বেতা মূত্রকফস্তন্যরক্তমাংসকরী সুরা |১৭৭|
कासार्शोग्रहणीश्वासप्रतिश्यायविनाशनी ||१७६|| श्वेता मूत्रकफस्तन्यरक्तमांसकरी सुरा |१७७|
🔊 Audio coming soon
শ্বেতসুরাগুণমাহ- কাসার্শ ইত্যাদি| শ্বেতসুরা শ্বেতপুনর্নবাদিমূলশালিপিষ্টককিণ্বপ্রভবা ‘কতোলী’ ইত প্রসিদ্ধা||১৭৬||-
Adhikarana 146 (177) · Śloka 178
ছর্দ্যরোচকহৃত্কুক্ষিতোদশূলপ্রমর্দনী ||১৭৭|| প্রসন্না কফবাতার্শোবিবন্ধানাহনাশনী |১৭৮|
छर्द्यरोचकहृत्कुक्षितोदशूलप्रमर्दनी ||१७७|| प्रसन्ना कफवातार्शोविबन्धानाहनाशनी |१७८|
🔊 Audio coming soon
প্রসন্নাগুণমাহ- ছর্দীত্যাদি| তোদঃ পীডা, শূলং দ্বাদশপ্রকারমুক্তলক্ষণম্| প্রসন্না সুরাযা মণ্ড উপর্যচ্ছো ভাগঃ| বিবন্ধো বাতাদীনামপ্রবৃত্তিঃ| আনাহ উদরাপূরঃ||১৭৭||-
Adhikarana 147 (178) · Śloka 179
পিত্তলাঽল্পকফা রূক্ষা যবৈর্বাতপ্রকোপণী |১৭৮| বিষ্টম্ভিনী সুরা গুর্বী... ||১৭৯||
पित्तलाऽल्पकफा रूक्षा यवैर्वातप्रकोपणी |१७८| विष्टम्भिनी सुरा गुर्वी... ||१७९||
🔊 Audio coming soon
পিষ্টসুরাং কথযিত্বা কুধান্যসুরামাহ- পিত্তলেত্যাদি| যবৈরিতি বহুবচনাদ্যবযবিকাতিযবা গৃহ্যন্তে| সবাততোদশূলা মলস্যাপ্রবৃত্তির্বিষ্টম্ভঃ, অন্যে গুডগুডাশব্দমাহুঃ| যবকিণ্বেন সুরেযম্||১৭৮||-
Adhikarana 148 (178) · Śloka 178
... শ্লেষ্মলং তু মধূলকম্ ||১৭৮||
... श्लेष्मलं तु मधूलकम् ||१७८||
🔊 Audio coming soon
মধূলকমাহ- শ্লেষ্মলং তু মধূলকমিতি| মধূলকঃ স্বল্পগোধূমো মধ্যদেশে ‘পীশীকা’ ইতি খ্যাতাঃ, মর্কটহস্ততৃণং বা, তত্ফলকিণ্বং মধূলকম্; ‘অসঞ্জাতমদ্যং মধূকপুষ্পোত্থম্’ ইতি জেজ্ঝটঃ||১৭৮||
Adhikarana 149 (179) · Śloka 179
রূক্ষা নাতিকফা বৃষ্যা পাচনী চাক্ষিকী স্মৃতা ||১৭৯||
रूक्षा नातिकफा वृष्या पाचनी चाक्षिकी स्मृता ||१७९||
🔊 Audio coming soon
আক্ষিকীং সুরামাহ- রূক্ষেত্যদি| অক্ষস্য বিভীতকস্য বল্কলৈঃ সহ কৃতা আক্ষিকী; ‘বল্কিকী’ ইতি কেচিত্, অত্রাপি স এবার্থঃ||১৭৯||
Adhikarana 150 (180) · Śloka 180
ত্রিদোষো ভেদ্যবৃষ্যশ্চ কোহলো বদনপ্রিযঃ |১৮০|
त्रिदोषो भेद्यवृष्यश्च कोहलो वदनप्रियः |१८०|
🔊 Audio coming soon
কোহলগুণমাহ- ত্রিদোষ ইত্যাদি| যবসক্তুকৃতঃ কোহলঃ ‘কৌহলিকা’ ইতি লোকে, অন্যে পুনর্ভক্তসুরামাহুঃ, যামেব পৌণ্ড্রাঃ ‘কাঞ্চনালী’ ইত্যাহুঃ|১৮০| -
Adhikarana 151 (180) · Śloka 181
গ্রাহ্যুষ্ণো জগলঃ পক্তা রূক্ষস্তৃট্কফশোফকৃত্ ||১৮০|| হৃদ্যঃ প্রবাহিকাটোপদুর্নামানিলশোষহৃত্ |১৮১|
ग्राह्युष्णो जगलः पक्ता रूक्षस्तृट्कफशोफकृत् ||१८०|| हृद्यः प्रवाहिकाटोपदुर्नामानिलशोषहृत् |१८१|
🔊 Audio coming soon
জগলগুণমাহ- গ্রাহীত্যাদি| জগলোঽধঃ কিট্টং মদ্যস্য যো বহিস্ত্যজ্যতে| অন্যে ‘কিণ্বভক্তসুরা জগলমিত্যুচ্যতে’| শোফহা লেপেন| শোষঃ ক্ষযঃ||১৮০||-
Adhikarana 152 (181) · Śloka 182
বক্কসো হৃতসারত্বাদ্বিষ্টম্ভী বাতকোপনঃ ||১৮১|| দীপনঃ সৃষ্টবিণ্মূত্রো বিশদোঽল্পমদো গুরুঃ |১৮২|
बक्कसो हृतसारत्वाद्विष्टम्भी वातकोपनः ||१८१|| दीपनः सृष्टविण्मूत्रो विशदोऽल्पमदो गुरुः |१८२|
🔊 Audio coming soon
বক্কসগুণমাহ- বক্কস ইত্যাদি| বক্কসো জগল এবাদ্রবঃ কিণ্বৌষধমাত্রম্||১৮১||-
Adhikarana 153 (182) · Śloka 182
কষাযো মধুরঃ শীধুর্গৌডঃ পাচনদীপনঃ ||১৮২||
कषायो मधुरः शीधुर्गौडः पाचनदीपनः ||१८२||
🔊 Audio coming soon
গুডশীধুমাহ- কষায ইত্যাদি| শীধুঃ সস্যক ইক্ষুরসেন ক্বথিতেন ধাতক্যাদিবদ্ধপাশঃ কালান্তরেণ নিষ্পন্নঃ কিঞ্চিদ্গুডঘৃতাবাপঃ সস্যকবাচ্যঃ||১৮২||
Adhikarana 154 (183) · Śloka 183
শার্করো মধুরো রুচ্যো দীপনো বস্তিশোধনঃ | বাতঘ্নো মধুরঃ পাকে হৃদ্য ইন্দ্রিযবোধনঃ ||১৮৩||
शार्करो मधुरो रुच्यो दीपनो बस्तिशोधनः | वातघ्नो मधुरः पाके हृद्य इन्द्रियबोधनः ||१८३||
🔊 Audio coming soon
শার্করশীধুমাহ- শার্কর ইত্যাদি| গুডশর্করযা খণ্ডশর্করযা বা ক্রিযত ইতি শার্করশীধুঃ| ইন্দ্রিযবোধনঃ ইন্দ্রিযপাটবজনকঃ||১৮৩||
Adhikarana 155 (184) · Śloka 184
তদ্বত্ পক্বরসঃ শীধুর্বলবর্ণকরঃ সরঃ | শোফঘ্নো দীপনো হৃদ্যো রুচ্যঃ শ্লেষ্মার্শসাং হিতঃ ||১৮৪||
तद्वत् पक्वरसः शीधुर्बलवर्णकरः सरः | शोफघ्नो दीपनो हृद्यो रुच्यः श्लेष्मार्शसां हितः ||१८४||
🔊 Audio coming soon
পক্বরসশীধুমাহ- তদ্বদিত্যাদি| তদ্বত্ শার্করবত্| পক্বরসঃ পক্বেনেক্ষুরসাদিনা কৃতঃ||১৮৪||
Adhikarana 156 (185) · Śloka 185
কর্শনঃ শীতরসিকঃ শ্বযথূদরনাশনঃ | বর্ণকৃজ্জরণঃ স্বর্যো বিবন্ধঘ্নোঽর্শসাং হিতঃ ||১৮৫||
कर्शनः शीतरसिकः श्वयथूदरनाशनः | वर्णकृज्जरणः स्वर्यो विबन्धघ्नोऽर्शसां हितः ||१८५||
🔊 Audio coming soon
অপক্বরসশীধুগুণমাহ- কর্শন ইত্যাদি| শীতরসিকস্ত্বপক্বরসকৃতঃ| জরণোঽন্নাদিপরিণামকারী||১৮৫||
Adhikarana 157 (186) · Śloka 186
আক্ষিকঃ পাণ্ডুরোগঘ্নো ব্রণ্যঃ সঙ্গ্রাহকো লঘুঃ | কষাযমধুরঃ সীধুঃ পিত্তঘ্নোঽসৃক্প্রসাদনঃ ||১৮৬||
आक्षिकः पाण्डुरोगघ्नो व्रण्यः सङ्ग्राहको लघुः | कषायमधुरः सीधुः पित्तघ्नोऽसृक्प्रसादनः ||१८६||
🔊 Audio coming soon
আক্ষিকশীধুমাহ- আক্ষিক ইত্যাদি| বিভীতকক্বাথগুডকৃতো ধাতকীকুসুমাদিকৃতসংস্কারঃ শীধরাক্ষিকঃ| দ্রব্যপ্রভাবাদপরমদ্যাপেক্ষযা প্রাযশঃ পাণ্ডুরোগে ব্রণে চাবিরুদ্ধাঃ; গ্রাহিত্বমপ্যেবং বাচ্যম্||১৮৬||
Adhikarana 158 (187) · Śloka 187
জাম্ববো বদ্ধনিস্যন্দস্তুবরো বাতকোপনঃ |১৮৭|
जाम्बवो बद्धनिस्यन्दस्तुवरो वातकोपनः |१८७|
🔊 Audio coming soon
জাম্ববশীধুমাহ- জাম্বব ইত্যাদি| জম্বূফলরসতুম্বরুক্বাথগুডধাতক্যাদিকৃতসংস্কারো জাম্ববঃ শীধুরুক্তঃ| বদ্ধনিস্যন্দো বদ্ধমূত্রঃ| তুবরঃ কষাযঃ|১৮৭|
Adhikarana 159 (187) · Śloka 188
তীক্ষ্ণঃ সুরাসবো হৃদ্যো মূত্রলঃ কফবাতনুত্ ||১৮৭|| মুখপ্রিযঃ স্থিরমদো বিজ্ঞেযোঽনিলনাশনঃ |১৮৮|
तीक्ष्णः सुरासवो हृद्यो मूत्रलः कफवातनुत् ||१८७|| मुखप्रियः स्थिरमदो विज्ञेयोऽनिलनाशनः |१८८|
🔊 Audio coming soon
আসবমাহ- তীক্ষ্ণ ইত্যাদি| সুরাসবঃ সুরযা সূযতে তোযকার্যং ক্রিযতে যস্মিন্ সঃ সুরাসবঃ| সঃ স্থিরমদশ্চিরকালমত্ততাকারী||১৮৭||-
Adhikarana 160 (188) · Śloka 189
লঘুর্মধ্বাসবশ্ছেদী মেহকুষ্ঠবিষাপহঃ ||১৮৮|| তিক্তঃ কষাযঃ শোফঘ্নস্তীক্ষ্ণঃ স্বাদুরবাতকৃত্ |১৮৯|
लघुर्मध्वासवश्छेदी मेहकुष्ठविषापहः ||१८८|| तिक्तः कषायः शोफघ्नस्तीक्ष्णः स्वादुरवातकृत् |१८९|
🔊 Audio coming soon
মধ্বাসবমাহ- লঘুরিত্যাদি| মধ্বাসবো মধুগুডাভ্যাং সন্ধানম্||১৮৮||-
Adhikarana 161 (189) · Śloka 190
তীক্ষ্ণঃ কষাযো মদকৃদ্দুর্নামকফগুল্মহৃত্ ||১৮৯|| কৃমিমেদোনিলহরো মৈরেযো মধুরো গুরুঃ |১৯০|
तीक्ष्णः कषायो मदकृद्दुर्नामकफगुल्महृत् ||१८९|| कृमिमेदोनिलहरो मैरेयो मधुरो गुरुः |१९०|
🔊 Audio coming soon
মৈরেযসঞ্জ্ঞকত্রিযোনিমাসবমাহ- তীক্ষ্ণ ইত্যাদি| তত্র মৈরেযো নাম সুরাসবযোঃ প্রত্যেকনিষ্পাদিতযোরেকীকৃত্য পুনঃ সন্ধানান্মৈরেযঃ| সুরা পৈষ্টী, আসবশ্চ গুডযোনিঃ, মধু চ দেযমিতি ত্রিযোনিত্বম্| যদি বা পৈষ্টী মধ্বাসবো গুডশ্চেতি সন্ধানাত্ত্রিযোনিত্বেন মৈরেযো দ্বিবিধো ভবতি||১৮৯||-
Adhikarana 162 (190) · Śloka 190
বল্যঃ পিত্তহরো বর্ণ্যো হৃদ্যশ্চেক্ষুরসাসবঃ ||১৯০||
बल्यः पित्तहरो वर्ण्यो हृद्यश्चेक्षुरसासवः ||१९०||
🔊 Audio coming soon
ইক্ষুরসাসবমাহ- বল্য ইত্যাদি| ‘মৃদ্বীকেক্ষুরসাসবঃ’ ইতি দ্বযমন্যে পঠন্তি| মার্দ্বীকং মদ্যমুক্তম্, অযং ত্বাসবঃ||১৯০||
Adhikarana 163 (191) · Śloka 191
শীধুর্মধূকপুষ্পোত্থো বিহাহ্যগ্নিবলপ্রদঃ | রূক্ষঃ কষাযঃ কফহৃদ্বাতপিত্তপ্রকোপণঃ ||১৯১||
शीधुर्मधूकपुष्पोत्थो विहाह्यग्निबलप्रदः | रूक्षः कषायः कफहृद्वातपित्तप्रकोपणः ||१९१||
🔊 Audio coming soon
পুষ্পযোনিং শীধুমাহ- শীধুরিত্যাদি| অত্র মধূকপুষ্পোত্থে কেচিদ্গুডং নেচ্ছন্তি, শীধুত্বাদ্গুডমিচ্ছন্ত্যন্যে||১৯১||
Adhikarana 164 (192) · Śloka 192
নির্দিশেদ্রসতশ্চান্যান্ কন্দমূলফলাসবান্ |১৯২|
निर्दिशेद्रसतश्चान्यान् कन्दमूलफलासवान् |१९२|
🔊 Audio coming soon
অনুক্তসঙ্গ্রহাযাহ- নির্দিশেদিত্যাদি| কন্দাদ্যুপলক্ষণং, তেন কাণ্ডত্বগাসবা অপি গৃহ্যন্তে|১৯২|
Adhikarana 165 (192) · Śloka 193
নবং মদ্যমভিষ্যন্দি গুরু বাতাদিকোপনম্ ||১৯২|| অনিষ্টগন্ধি বিরসমহৃদ্যং চ বিদাহি চ |১৯৩|
नवं मद्यमभिष्यन्दि गुरु वातादिकोपनम् ||१९२|| अनिष्टगन्धि विरसमहृद्यं च विदाहि च |१९३|
🔊 Audio coming soon
নবমদ্যস্য দোষমাহ- নবমিত্যাদি| নবত্বমজাতরসপ্রসাদত্বেন, অন্যে তু ‘অনতীতসংবত্সরং নবম্’ ইত্যাহুঃ||১৯২||-
Adhikarana 166 (193) · Śloka 194
সুগন্ধি দীপনং হৃদ্যং রোচিষ্ণু কৃমিনাশনম্ ||১৯৩|| স্ফুটস্রোতস্করং জীর্ণং লঘু বাতকফাপহম্ |১৯৪|
सुगन्धि दीपनं हृद्यं रोचिष्णु कृमिनाशनम् ||१९३|| स्फुटस्रोतस्करं जीर्णं लघु वातकफापहम् |१९४|
🔊 Audio coming soon
জীর্ণস্য গুণমাহ- সুগন্ধীত্যাদি| রোচিষ্ণু সাধু রোচতে, তৃপ্তস্যাপি রুচিকরম্| পুরাণত্বং জাতরসপ্রসাদনত্বেন গন্ধাদিসম্পত্ত্যা; ‘অতীতসংবত্সরং জীর্ণম্’ ইত্যন্যে বদন্তি||১৯৩||-
Adhikarana 167 (194-195) · Śloka 196
অরিষ্টো দ্রব্যসংযোগসংস্কারাদধিকো গুণৈঃ ||১৯৪|| বহুদোষহরশ্চৈব দোষাণাং শমনশ্চ সঃ | দীপনঃ কফবাতঘ্নঃ সরঃ পিত্তাবিরোধনঃ ||১৯৫|| শূলাধ্মানোদরপ্লীহজ্বরাজীর্ণার্শসাং হিতঃ |১৯৬|
अरिष्टो द्रव्यसंयोगसंस्कारादधिको गुणैः ||१९४|| बहुदोषहरश्चैव दोषाणां शमनश्च सः | दीपनः कफवातघ्नः सरः पित्ताविरोधनः ||१९५|| शूलाध्मानोदरप्लीहज्वराजीर्णार्शसां हितः |१९६|
🔊 Audio coming soon
আসবপ্রসঙ্গেন তত্সদৃশারিষ্টগুণমাহ- অরিষ্ট ইত্যাদি| দ্রব্যসংযোগঃ অভযাচিত্রকাদিসংযোগঃ| সংস্কারাচ্চ মদ্যাদধিককর্মতা| বহুদোষহরশ্চৈবেতি দোষশব্দো ব্যাধিবাচী| দোষাণাং শমন ইত্যস্য ভাষ্যং- কফবাতঘ্ন ইতি| পিত্তাবিরোধন ইতি নঞীষদর্থে, তেনেষত্ পিত্তং হন্তীতি মন্যতে| বহুব্যাধিহর ইত্যেতস্য তু ভাষ্যং- শূলাধ্মানোদরাদীনাং হিত ইতি; শূলাদিকে হিত ইত্যর্থঃ, অন্যে ‘কফবাতঘ্নত্বং বিশেষতঃ’ ইত্যাহুঃ||১৯৪-১৯৫||-
Adhikarana 168 (196) · Śloka 196
পিপ্পল্যাদিকৃতো গুল্মকফরোগহরঃ স্মৃতঃ ||১৯৬||
पिप्पल्यादिकृतो गुल्मकफरोगहरः स्मृतः ||१९६||
🔊 Audio coming soon
পিপ্পল্যাদ্যরিষ্টমাহ- পিপ্পল্যাদীত্যাদি||১৯৬||
Adhikarana 169 (197) · Śloka 197
চিকিত্সিতেষু বক্ষ্যন্তেঽরিষ্টা রোগহরাঃ পৃথক্ |১৯৭|
चिकित्सितेषु वक्ष्यन्तेऽरिष्टा रोगहराः पृथक् |१९७|
🔊 Audio coming soon
শেষারিষ্টানাং স্থানমাহ- চিকিত্সিতেষ্বিত্যাদি|১৯৭|
Adhikarana 170 (197) · Śloka 198
অরিষ্টাসবশীধূনাং গুণান্ কর্মাণি চাদিশেত্ ||১৯৭|| বুদ্ধ্যা যথাস্বং সংস্কারমবেক্ষ্য কুশলো ভিষক্ |১৯৮|
अरिष्टासवशीधूनां गुणान् कर्माणि चादिशेत् ||१९७|| बुद्ध्या यथास्वं संस्कारमवेक्ष्य कुशलो भिषक् |१९८|
🔊 Audio coming soon
অনুক্তসঙ্গ্রহমাহ- অরিষ্টাসবেত্যাদি| শীধুশব্দেনাত্র মদ্যমাহুঃ| দ্রব্যপ্রধানমরিষ্টং, দ্রবপ্রধান আসবঃ, উভযপ্রধানং মদ্যম্| বুদ্ধ্যা অবেক্ষ্য জ্ঞাত্বা, যথাস্বমিতি যদ্যস্য রোগাদ্যপেক্ষযা হিতং দ্রব্যসংস্কারাদি এতেনারিষ্টাদি বিধীযতে , অতস্তদনুরূপং গুণকর্ম বাচ্যমিত্যর্থঃ||১৯৭||-
Adhikarana 171 (198-202) · Śloka 203
সান্দ্রং বিদাহি দুর্গন্ধং বিরসং কৃমিলং গুরু ||১৯৮|| অহৃদ্যং তরুণং তীক্ষ্ণমুষ্ণং দুর্ভাজনস্থিতম্ | অল্পৌষধং পর্যুষিতমত্যচ্ছং পিচ্ছিলং চ যত্ ||১৯৯|| তদ্বর্জ্যং সর্বথা মদ্যং কিঞ্চিচ্ছেষং তু যদ্ভবেত্ | তত্র যত্ স্তোকসম্ভারং তরুণং পিচ্ছিলং গুরু ||২০০|| কফপ্রকোপি তন্মদ্যং দুর্জরং চ বিশেষতঃ | পিত্তপ্রকোপি বহলং তীক্ষ্ণমুষ্ণং বিদাহি চ ||২০১|| অহৃদ্যং পেলবং পূতি কৃমিলং বিরসং চ যত্ | তথা পর্যুষিতং চাপি বিদ্যাদনিলকোপনম্ ||২০২|| সর্বদোষৈরুপেতং তু সর্বদোষপ্রকোপণম্ |২০৩|
सान्द्रं विदाहि दुर्गन्धं विरसं कृमिलं गुरु ||१९८|| अहृद्यं तरुणं तीक्ष्णमुष्णं दुर्भाजनस्थितम् | अल्पौषधं पर्युषितमत्यच्छं पिच्छिलं च यत् ||१९९|| तद्वर्ज्यं सर्वथा मद्यं किञ्चिच्छेषं तु यद्भवेत् | तत्र यत् स्तोकसम्भारं तरुणं पिच्छिलं गुरु ||२००|| कफप्रकोपि तन्मद्यं दुर्जरं च विशेषतः | पित्तप्रकोपि बहलं तीक्ष्णमुष्णं विदाहि च ||२०१|| अहृद्यं पेलवं पूति कृमिलं विरसं च यत् | तथा पर्युषितं चापि विद्यादनिलकोपनम् ||२०२|| सर्वदोषैरुपेतं तु सर्वदोषप्रकोपणम् |२०३|
🔊 Audio coming soon
মদ্যদোষানাহ- সান্দ্রমিত্যাদি| সান্দ্রং ঘনম্| বিদাহোঽস্যাস্তীতি বিদাহি “জঠরাগ্নিসংযোগাদ্যঃ পাকমগচ্ছন্ মধ্যমাযামেব পাকাবস্থাযাং বিদহ্যমানঃ পিত্তং কুর্বংশ্চিরকালমবতিষ্ঠতে ন শীঘ্রং জরাং যাতি গুরুত্বাদ্বস্তুস্বভাবাদ্বা স বিদাহযুক্তো ভাবো ভণ্যতে” ইত্যাগমিকাঃ; অন্যে ‘বিদাহি বিবিধসন্তাপকারি’ ইত্যাহুঃ| দুর্গন্ধং কুত্সিতগন্ধম্| বিরসং বিরুদ্ধরসমনিষ্টরসমিত্যর্থঃ| কৃমিলং কৃমিযুক্তম্| গুরু চিরপাকি| অহৃদ্যম্ অপ্রিযম্| তরুণং নবম্| তীক্ষ্ণং মুখে দুঃখোত্পাদকম্| উষ্ণং স্পর্শতঃ| দুর্ভাজনস্থিতং কুত্সিতপাত্রস্থম্| অল্পৌষধং স্তোকধাতক্যাদিকম্| পর্যুষিতং সন্ধানভাণ্ডাদন্যস্মিন্ ভাণ্ডে রাত্র্যুষিতম্| অত্যচ্ছম্ অতিতনু| পিচ্ছিলং শ্লেষ্মস্পর্শবত্| সর্বথা সর্বৈঃ প্রকারৈঃ| স্তোকসম্ভারাদিদোষফলমাহ- তত্রেত্যাদি| স্তোকসম্ভারম্ অল্পৌষধম্| পেলবম্ অচ্ছম্, অন্যে তরুণমাহুঃ| সর্বদোষৈরিতি সর্বদোষৈঃ সান্দ্রাদিভিঃ||১৯৮-২০২||-
Adhikarana 172 (203) · Śloka 204
চিরস্থিতং জাতরসং দীপনং কফবাতজিত্ ||২০৩|| রুচ্যং প্রসন্নং সুরভি মদ্যং সেব্যং মদাবহম্ |২০৪|
चिरस्थितं जातरसं दीपनं कफवातजित् ||२०३|| रुच्यं प्रसन्नं सुरभि मद्यं सेव्यं मदावहम् |२०४|
🔊 Audio coming soon
দোষানভিধাযেদানীং মদ্যস্য গুণানাহ- চিরস্থিতমিত্যাদি| প্রসন্নং নির্মলম্| সুরভি সুগন্ধি| মদাবহং হর্ষকারি| পূর্বদোষান্বিতং বর্জ্যম্; এতদ্গুণান্বিতং সেব্যম্||২০৩||-
Adhikarana 173 (204-205) · Śloka 205
তস্যানেকপ্রকারস্য মদ্যস্য রসবীর্যতঃ ||২০৪|| সৌক্ষ্ম্যাদৌষ্ণ্যাচ্চ তৈক্ষ্ণ্যাচ্চ বিকাসিত্বাচ্চ বহ্নিনা সমেত্য হৃদযং প্রাপ্য ধমনীরূর্ধ্বমাগতম্ | বিচাল্যেন্দ্রিযচেতাংসি বীর্যং মদযতেঽচিরাত্ ||২০৫||
तस्यानेकप्रकारस्य मद्यस्य रसवीर्यतः ||२०४|| सौक्ष्म्यादौष्ण्याच्च तैक्ष्ण्याच्च विकासित्वाच्च वह्निना समेत्य हृदयं प्राप्य धमनीरूर्ध्वमागतम् | विचाल्येन्द्रियचेतांसि वीर्यं मदयतेऽचिरात् ||२०५||
🔊 Audio coming soon
ইদানীং যথা মদ্যং মদযতি তদাহ- তস্যেত্যাদি| তস্য এবংবিধস্য মদ্যস্য, বীর্যং শক্তিঃ, হৃদযং প্রাপ্যাচিরেণ মদযতি হর্ষযতীতি সম্বন্ধঃ| অনেকপ্রকারত্বং মৃদ্বীকাদিযোনিভেদেন, তথা রসবীর্যতশ্চ; রসা লবণবর্জ্যাঃ, বীর্যমুষ্ণরূক্ষাদি| কথং মদযতীত্যাহ- বিচাল্যেন্দ্রিযচেতাংসীতি; বিচাল্য ক্ষোভযিত্বা , ইন্দ্রিযাণি চক্ষুরাদীনি, চেতো মনঃ| কিংবিশিষ্টং বীর্যং? ধমনীরূর্ধ্বমাগতমিতি| কথং পুনরস্য ধমনীভিরূর্ধ্বগমনং ভবতীত্যাহ- বহ্নিনা সমেত্য মিলিত্বা, স্বভাবেনৈব বহ্নেরূর্ধ্বগামিত্বাত্| কথং পুনস্তন্মদ্যবীর্যং সূক্ষ্মাণীন্দ্রিযচেতাংসি মদযতীত্যাহ- সৌক্ষ্ম্যাদিতি| ঊর্ধ্বগামিত্বে দ্বিতীযং হেতুমাহ- ঔষ্ণ্যাদিতি| আগ্নেযদ্রব্যস্য স্বভাবেনৈবোর্ধ্বগামিত্বাত্| কুতঃ পুনরচিরেণ মদ্যবীর্যং মদযতীত্যাহ- তৈক্ষ্ণ্যাদিতি| তীক্ষ্ণং হি দ্রব্যমচিরকারি ভবতি| মদ্যবীর্যস্যাচিরকারিত্বেঽপরমপি হেতুমাহ- বিকাসিত্বাদিতি|- বিকাসি সন্ধিবন্ধবিমোচনকারি| চকারেণানুক্তমপি লাঘবমূর্ধ্বগমনে হেতুঃ সমুচ্চীযতে||২০৪-২০৫||-
Adhikarana 174 (206) · Śloka 206
চিরেণ শ্লৈষ্মিকে পুংসি পানতো জাযতে মদঃ | অচিরাদ্বাতিকে দৃষ্টঃ, পৈত্তিকে শীঘ্রমেব চ ||২০৬||
चिरेण श्लैष्मिके पुंसि पानतो जायते मदः | अचिराद्वातिके दृष्टः, पैत्तिके शीघ्रमेव च ||२०६||
🔊 Audio coming soon
শারীরদোষেণ মদভেদমাহ- চিরেণেত্যাদি| শ্লৈষ্মিকে শ্লেষ্মপ্রকৃতিকে| বাতিকে বাতপ্রকৃতিকে| পৈত্তিকে পিত্তপ্রকৃতিকে| শীঘ্রমেব চেতি চকারাত্তীক্ষ্ণশ্চ||২০৬||
Adhikarana 175 (207-209) · Śloka 209
সাত্ত্বিকে শৌচদাক্ষিণ্যহর্ষমণ্ডনলালসঃ | গীতাধ্যযনসৌভাগ্যসুরতোত্সাহকৃন্মদঃ ||২০৭|| রাজসে দুঃখশীলত্বমাত্মত্যাগং সসাহসম্ | কলহং সানুবন্ধং তু করোতি পুরুষে মদঃ ||২০৮|| অশৌচনিদ্রামাত্সর্যাগম্যাগমনলোলতাঃ | অসত্যভাষণং চাপি কুর্যাদ্ধি তামসে মদঃ ||২০৯||
सात्त्विके शौचदाक्षिण्यहर्षमण्डनलालसः | गीताध्ययनसौभाग्यसुरतोत्साहकृन्मदः ||२०७|| राजसे दुःखशीलत्वमात्मत्यागं ससाहसम् | कलहं सानुबन्धं तु करोति पुरुषे मदः ||२०८|| अशौचनिद्रामात्सर्यागम्यागमनलोलताः | असत्यभाषणं चापि कुर्याद्धि तामसे मदः ||२०९||
🔊 Audio coming soon
মানসদোষেণ মদভেদমাহ- সাত্ত্বিক ইত্যাদি| সাত্ত্বিকে সত্ত্বপ্রকৃতিকে| দাক্ষিণ্যং পরাপেক্ষিণী প্রকৃতিঃ| লালসঃ অভিলাষুকঃ| সুরতোত্সাহো মৈথুনোদ্যমঃ| রাজসে রজঃপ্রকৃতিকে| দুঃখশীলত্বং দুঃখসেবিত্বম্| আত্মত্যাগং সসাহসং দেহনাশকারি সাহসম্| অনুবন্ধং নিরন্তরম্| মদ্যকার্যো মদো মত্ততেত্যর্থঃ| অশৌচেত্যাদি| তামসে তামসপ্রকৃতিকে| মাত্সর্যং পরাসহিষ্ণুতা, লোলতা অভিলাষঃ||২০৭-২০৯||
Adhikarana 176 (210) · Śloka 211
রক্তপিত্তকরং শুক্তং ছেদনং ভুক্তপাচনম্ | বৈস্বর্যং জরণং শ্লেষ্মপাণ্ডুক্রিমিহরং লঘু ||২১০|| তীক্ষ্ণোষ্ণং মূত্রলং হৃদ্যং কফঘ্নং কটুপাকি চ |২১১|
रक्तपित्तकरं शुक्तं छेदनं भुक्तपाचनम् | वैस्वर्यं जरणं श्लेष्मपाण्डुक्रिमिहरं लघु ||२१०|| तीक्ष्णोष्णं मूत्रलं हृद्यं कफघ्नं कटुपाकि च |२११|
🔊 Audio coming soon
শুক্তাদিকর্মাণি দর্শযন্নাহ- রক্তপিত্তকরমিত্যাদি| শুক্তং চুক্রমুচ্যতে; যদুক্তং- “যন্মস্ত্বাদি শুচৌ ভাণ্ডে সগুডক্ষৌদ্রকাঞ্জিকম্| ধান্যরাশৌ ত্রিরাত্রস্থং শুক্তং চুক্রং তদুচ্যতে” ইতি; তচ্চেক্ষুরসমধূকপুষ্পপীলুপ্রভৃতিভিঃ কষাযব্যতিরেকেণাসূযতে, কন্দাদ্যাসুতমপি শুক্তমাহুরন্যে| ছেদনং কফগ্রন্থ্যাদীনাম্| বৈস্বর্যং বিস্বরত্বোত্পাদকম্| জরণমামস্য| শ্লেষ্মপাণ্ডুঃ শ্লেষ্মোত্কটঃ পাণ্ডুরোগ ইত্যর্থঃ||২১০||-
Adhikarana 177 (211) · Śloka 211
তদ্বত্তদাসুতং সর্বং রোচনং চ বিশেষতঃ ||২১১||
तद्वत्तदासुतं सर्वं रोचनं च विशेषतः ||२११||
🔊 Audio coming soon
শুক্তসন্ধিতানাং কন্দাদীনামপি শুক্তগুণমাহ- তদ্বদিত্যাদি| তদ্বত্ শুক্তবত্| তদাসুতং শুক্তসন্ধিতং কন্দাদিকম্||২১১||
Adhikarana 178 (212) · Śloka 212
গৌডানি রসশুক্তানি মধুশুক্তানি যানি চ | যথাপূর্বং গুরুতরাণ্যভিষ্যন্দকরাণি চ ||২১২||
गौडानि रसशुक्तानि मधुशुक्तानि यानि च | यथापूर्वं गुरुतराण्यभिष्यन्दकराणि च ||२१२||
🔊 Audio coming soon
শুক্তস্য যোনিভেদেন গুণমাহ- গৌডানীত্যাদি| গৌডানি গুডোদ্ভবানি; “গুডাম্বুনা সতৈলেন সন্ধানং কাঞ্জিকং তু যত্| কন্দশাকফলৈর্যুক্তং গুডশুক্তং তদুচ্যতে”- ইতি| রসশুক্তানি ইক্ষুরসাদিকৃতানি| গুডশুক্তবদিক্ষুরসশুক্তং সন্ধেযম্| মধুশুক্তং তু “জম্বীরস্য ফলরসং পিপ্পলীমূলসংযুতম্| মধুভাণ্ডে বিনিক্ষিপ্য ধান্যরাশৌ নিধাপযেত্|| ত্র্যহেণ তজ্জাতরসং মধুশুক্তমুদাহৃতম্|”- ইতি| (মধুভাণ্ডে ইতি মধুপূর্ণপ্রাযে ভাণ্ডে ইত্যর্থঃ; অথবা মধূনি কৃত্বা ভাণ্ডে নিক্ষিপ্যেতি যোজ্যম্|) মদ্যশুক্তমিতি পাঠান্তরং; তত্র মদ্যশুক্তলক্ষণমুচ্যতে- “সর্বং মদ্যং পঞ্চরসং কালান্তরবশাদ্যদা| ত্যক্ত্বাঽন্যরসমম্লত্বং যাতি শুক্তং তদুচ্যতে” ইতি| চকারেণ ধান্যযোনিশুক্তমপ্যস্তীতি সমুচ্চীযতে| যথাপূর্বং যো যঃ পূর্বঃ; মদ্যশুক্তাপেক্ষযা রসশুক্তং গুরু, তদপেক্ষযা গৌডমিত্যর্থঃ| দোষধাতুমলস্রোতসাং ক্লেদপ্রাপ্তিজননমভিষ্যন্দি||২১২||
Adhikarana 179 (213) · Śloka 213
তুষাম্বু দীপনং হৃদ্যং হৃত্পাণ্ডুকৃমিরোগনুত্ | গ্রহণ্যর্শোবিকারঘ্নং ভেদি সৌবীরকং তথা ||২১৩||
तुषाम्बु दीपनं हृद्यं हृत्पाण्डुकृमिरोगनुत् | ग्रहण्यर्शोविकारघ्नं भेदि सौवीरकं तथा ||२१३||
🔊 Audio coming soon
তুষাম্বুসৌবীরকযোর্গুণমাহ- তুষাম্ব্বিত্যাদি| কাঞ্জিকভেদাবেতৌ| তুষাম্বুসৌবীরকে বিরেচনাধ্যাযোক্তে অপি সন্ধানসামান্যাদধিকগুণকর্মদর্শনাযেহোক্তে||২১৩||
Adhikarana 180 (214-216) · Śloka 216
ধান্যাম্লং ধান্যযোনিত্বাজ্জীবনং দাহনাশনম্ | স্পর্শাত্ পানাত্তু পবনকফতৃষ্ণাহরং লঘু ||২১৪|| তৈক্ষ্ণ্যাচ্চ নির্হরেদাশু কফং গণ্ডূষধারণাত্ | মুখবৈরস্যদৌর্গন্ধ্যমলশোষক্লমাপহম্ ||২১৫|| দীপনং জরণং ভেদি হিতমাস্থাপনেষু চ | সমুদ্রমাশ্রিতানাং চ জনানাং সাত্ম্যমুচ্যতে ||২১৬|| ইতি মধ্যবর্গঃ |
धान्याम्लं धान्ययोनित्वाज्जीवनं दाहनाशनम् | स्पर्शात् पानात्तु पवनकफतृष्णाहरं लघु ||२१४|| तैक्ष्ण्याच्च निर्हरेदाशु कफं गण्डूषधारणात् | मुखवैरस्यदौर्गन्ध्यमलशोषक्लमापहम् ||२१५|| दीपनं जरणं भेदि हितमास्थापनेषु च | समुद्रमाश्रितानां च जनानां सात्म्यमुच्यते ||२१६|| इति मध्यवर्गः |
🔊 Audio coming soon
ধান্যাম্লমাহ- ধান্যাম্লমিত্যাদি| ধান্যাম্লং কাঞ্জিকং শালিজূর্ণাহ্বকোদ্রবাদিকৃতং মদ্যম্| জীবনং প্রাণধারণং শাল্যা দিকৃতত্বাত্| দাহনাশনং স্পর্শাত্| পানাত্তু পবনকফতৃষ্ণাহরমিতি পানাত্ সবাযুং কফং, তযোস্তৃষ্ণাং চ হরতীত্যর্থঃ| শোষো মুখস্য| জরণং পাচনম্| আস্থাপনেষু নিরূহেষু||২১৪-২১৬||
Adhikarana 181 (217-219) · Śloka 219
অথ মূত্রাণি | মূত্রাণি গোমহিষ্যজাবিগজহযখরোষ্ট্রাণাং তীক্ষ্ণান্যুষ্ণানি কটূনি তিক্তানি লবণানুরসানি লঘূনি শোধনানি কফবাতকৃমিমেদোবিষগুল্মার্শদরকুষ্ঠশোফারোচকপাণ্ডুরোগহরাণি হৃদ্যানি দীপনানি চ সামান্যতঃ ||২১৭|| ভবতশ্চাত্র- তত্ সর্বং কটু তীক্ষ্ণোষ্ণং লবণানুরসং লঘু | শোধনং কফবাতঘ্নং কৃমিমেদোবিষাপহম্ ||২১৮|| অর্শোজঠরগুল্মঘ্নং শোফারোচকনাশনম্ | পাণ্ডুরোগহরং ভেদি হৃদ্যং দীপনপাচনম্ ||২১৯||
अथ मूत्राणि | मूत्राणि गोमहिष्यजाविगजहयखरोष्ट्राणां तीक्ष्णान्युष्णानि कटूनि तिक्तानि लवणानुरसानि लघूनि शोधनानि कफवातकृमिमेदोविषगुल्मार्शदरकुष्ठशोफारोचकपाण्डुरोगहराणि हृद्यानि दीपनानि च सामान्यतः ||२१७|| भवतश्चात्र- तत् सर्वं कटु तीक्ष्णोष्णं लवणानुरसं लघु | शोधनं कफवातघ्नं कृमिमेदोविषापहम् ||२१८|| अर्शोजठरगुल्मघ्नं शोफारोचकनाशनम् | पाण्डुरोगहरं भेदि हृद्यं दीपनपाचनम् ||२१९||
🔊 Audio coming soon
অথ মূত্রাণ্যুচ্যন্তে- মূত্রাণীত্যাদি| অষ্টানামপি মূত্রাণাং সামান্যগুণমাহ- তীক্ষ্ণানীত্যাদি| শোধনানি মলশুদ্ধিকরাণি| তত্ সর্বমিত্যাদি| পদ্যোক্তত্বান্ন দ্বিরুক্তম্||২১৭-২১৯||
Adhikarana 182 (220-221) · Śloka 221
গোমূত্রং কটু তীক্ষ্ণোষ্ণং সক্ষারত্বান্ন বাতলম্ | লঘ্বগ্নিদীপনং মেধ্যং পিত্তলং কফবাতনুত্ ||২২০|| শূলগুল্মোদরানাহবিরেকাস্থাপনাদিষু | মূত্রপ্রযোগসাধ্যেষু গব্যং মূত্রং প্রযোজযেত্ ||২২১||
गोमूत्रं कटु तीक्ष्णोष्णं सक्षारत्वान्न वातलम् | लघ्वग्निदीपनं मेध्यं पित्तलं कफवातनुत् ||२२०|| शूलगुल्मोदरानाहविरेकास्थापनादिषु | मूत्रप्रयोगसाध्येषु गव्यं मूत्रं प्रयोजयेत् ||२२१||
🔊 Audio coming soon
গোমূত্রগুণমাহ- গোমূত্রমিত্যাদি| গোমূত্রং গোরেব ন তু বৃষভস্য, মহিষীসাহচর্যাত্, ন হি তত্র মহিষেতি পাঠঃ; অথবা বৃদ্ধব্যবহারাদিত্যেকে; আচার্যাস্তু গোমহিষ্যজাবীনাং স্ত্রীণাং, গজহযখরোষ্ট্রমানুষাণাং পুনঃ পুংসাম্, অনুক্তব্যক্তিকে তু মূত্রপাঠে উভযোরপি মূত্রাণি গ্রাহ্যাণি, যত্র তু ব্যক্তযা স্ত্রীপুরুষনির্দেশস্তত্র তস্যৈবেতি নির্ণীতবন্তঃ||২২০-২২১||
Adhikarana 183 (222) · Śloka 222
দুর্নামোদরশূলেষু কুষ্ঠমেহাবিশুদ্ধিষু | আনাহশোফগুল্মেষু পাণ্ডুরোগে চ মাহিষম্ ||২২২||
दुर्नामोदरशूलेषु कुष्ठमेहाविशुद्धिषु | आनाहशोफगुल्मेषु पाण्डुरोगे च माहिषम् ||२२२||
🔊 Audio coming soon
মাহিষমূত্রমাহ- দুর্নামেত্যাদি| অবিশুদ্ধির্বমনাদীনাম্||২২২||
Adhikarana 184 (223) · Śloka 223
কাসশ্বাসাপহং শোফকামলাপাণ্ডুরোগনুত্ | কটুতিক্তান্বিতং ছাগমীষন্মারুতকোপনম্ ||২২৩||
कासश्वासापहं शोफकामलापाण्डुरोगनुत् | कटुतिक्तान्वितं छागमीषन्मारुतकोपनम् ||२२३||
🔊 Audio coming soon
ছাগমূত্রমাহ- কাসশ্বাসাপহমিত্যাদি||২২৩||
Adhikarana 185 (224) · Śloka 224
কাসপ্লীহোদরশ্বাসশোষবর্চোগ্রহে হিতম্ | সক্ষারং তিক্তকটুকমুষ্ণং বাতঘ্নমাবিকম্ ||২২৪||
कासप्लीहोदरश्वासशोषवर्चोग्रहे हितम् | सक्षारं तिक्तकटुकमुष्णं वातघ्नमाविकम् ||२२४||
🔊 Audio coming soon
মৈষমূত্রমাহ- কাসেত্যাদি||২২৪||
Adhikarana 186 (225) · Śloka 225
দীপনং কটু তীক্ষ্ণোষ্ণং বাতচেতোবিকারনুত্ | আশ্বং কফহরং মূত্রং কৃমিদদ্রুষু শস্যতে ||২২৫||
दीपनं कटु तीक्ष्णोष्णं वातचेतोविकारनुत् | आश्वं कफहरं मूत्रं कृमिदद्रुषु शस्यते ||२२५||
🔊 Audio coming soon
আশ্বমূত্রমাহ- দীপনমিত্যাদি| চেতোবিকার উন্মাদাদযঃ||২২৫||
Adhikarana 187 (226) · Śloka 226
সতিক্তং লবণং ভেদি বাতঘ্নং পিত্তকোপনম্ | তীক্ষ্ণং ক্ষারে কিলাসে চ নাগং মূত্রং প্রযোজযেত্ ||২২৬||
सतिक्तं लवणं भेदि वातघ्नं पित्तकोपनम् | तीक्ष्णं क्षारे किलासे च नागं मूत्रं प्रयोजयेत् ||२२६||
🔊 Audio coming soon
গজমূত্রমাহ- সতিক্তমিত্যাদি| কিলাসং পাণ্ডুরং কুষ্ঠম্||২২৬||
Adhikarana 188 (227) · Śloka 227
গরচেতোবিকারঘ্নং তীক্ষ্ণং গ্রহণিরোগনুত্ | দীপনং গার্দভং মূত্রং কৃমিবাতকফাপহম্ ||২২৭||
गरचेतोविकारघ्नं तीक्ष्णं ग्रहणिरोगनुत् | दीपनं गार्दभं मूत्रं कृमिवातकफापहम् ||२२७||
🔊 Audio coming soon
গর্দভমূত্রমাহ- গরচেত ইত্যাদি| গরঃ কৃত্রিমং বিষম্||২২৭||
Adhikarana 189 (228) · Śloka 228
শোফকুষ্ঠোদরোন্মাদমারুতক্রিমিনাশনম্ | অর্শোঘ্নং কারভং মূত্রং... |২২৮|
शोफकुष्ठोदरोन्मादमारुतक्रिमिनाशनम् | अर्शोघ्नं कारभं मूत्रं... |२२८|
🔊 Audio coming soon
কারভমূত্রমাহ- শোফেত্যাদি| কারভম্ ঔষ্ট্রম্|২২৮|
Adhikarana 190 (228) · Śloka 228
... মানুষং চ বিষাপহম্ ||২২৮||
... मानुषं च विषापहम् ||२२८||
🔊 Audio coming soon
মানুষমূত্রমাহ- মানুষমিত্যাদি| কারভং মানুষং চ মূত্রং বিষাপহমিত্যর্থঃ| মানুষমষ্টানাং মূত্রাণাং মধ্যেঽনুদ্দিষ্টমপি ‘তত্ সর্বম্’ ইত্যনেনৈব পূর্বোক্তেন সূচিতত্বাদ্বিবৃতম্||২২৮||
Adhikarana 191 (229) · Śloka 229
দ্রবদ্রব্যাণি সর্বাণি সমাসাত্ কীর্তিতানি তু | কালদেশবিভাগজ্ঞো নৃপতের্দাতুমর্হতি ||২২৯||
द्रवद्रव्याणि सर्वाणि समासात् कीर्तितानि तु | कालदेशविभागज्ञो नृपतेर्दातुमर्हति ||२२९||
🔊 Audio coming soon
উক্তানুক্তদ্রবাণামূহার্থমাহ- দ্রবদ্রব্যাণীত্যাদি| দেশকালবিভাগজ্ঞ ইতি ‘বৈদ্য’ ইতি শেষঃ||২২৯||
Adhikarana puShpikA · Śloka 45
ইতি সুশ্রুতসংহিতাযাং সূত্রস্থানে দ্রবদ্রব্যবিজ্ঞানীযো নাম পঞ্চচত্বারিংশোঽধ্যাযঃ ||৪৫||
इति सुश्रुतसंहितायां सूत्रस्थाने द्रवद्रव्यविज्ञानीयो नाम पञ्चचत्वारिंशोऽध्यायः ||४५||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে পঞ্চচত্বারিংশত্তমোঽধ্যাযঃ||৪৫||