45. dravadravyavidhyadhyāyaḥ

Adhikarana 1 (1-2) · Śloka 2

অথাতো দ্রবদ্রব্যবিধিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

পানীযমান্তরীক্ষমনির্দেশ্যরসমমৃতং জীবনং তর্পণং ধারণমাশ্বাসজননং শ্রমক্লমপিপাসামদমূর্চ্ছাতন্দ্রানিদ্রাদাহপ্রশমনমেকান্ততঃ পথ্যতমং চ ||৩||

Adhikarana 3 (4) · Śloka 4

তদেবাবনিপতিতমন্যতমং রসমুপলভতে স্থানবিশেষান্নদীনদসরস্তডাগবাপীকূপচুণ্টীপ্রস্রবণোদ্ভিদবিকিরকেদারপল্বলাদি ষু স্থানেষ্ববস্থিতমিতি ||৪||

Adhikarana 4 (5) · Śloka 5

তত্র, ‘লোহিতকপিলপাণ্ডুনীলপীতশুক্লেষ্ববনিপ্রদেশেষু মধুরাম্ললবণকটুতিক্তকষাযাণি যথাসঙ্খ্যমুদকানি সম্ভবন্তি’ ইত্যেকে ভাষন্তে ||৫||

Adhikarana 5 (6) · Śloka 6

তত্তু ন সম্যক্; পৃথিব্যাদীনামন্যোন্যানুপ্রবেশকৃতঃ সলিলরসো ভবত্যুত্কর্ষাপকর্ষেণ | তত্র, স্বলক্ষণভূযিষ্ঠাযাং ভূমাবম্লং লবণং চ; অম্বুগুণভূযিষ্ঠাযাং মধুরং; তেজোগুণভূযিষ্ঠাযাং কটুকং তিক্তং চ; বাযুগুণভূযিষ্ঠাযাং কষাযম্; আকাশগুণভূযিষ্ঠাযামব্যক্তরসম্, অব্যক্তং হ্যাকাশমিত্যতঃ; তত্ প্রধানমব্যক্তরসত্বাত্, তত্পেযমান্তরীক্ষালাভে ||৬||

Adhikarana 6 (7) · Śloka 7

তত্রান্তরীক্ষং চতুর্বিধম্ | তদ্যথা- ধারং, কারং, তৌষারং, হৈমমিতি | তেষাং ধারং প্রধানং, লঘুত্বাত্; তত্ পুনর্দ্বিবিধং- গাঙ্গং, সামুদ্রং চেতি | তত্র গাঙ্গমাশ্বযুজে মাসি প্রাযশো বর্ষতি | তযোর্দ্বযোরপি পরীক্ষণং কুর্বীত- শাল্যোদনপিণ্ডমকুথিতমবিদগ্ধং রজতভাজনোপহিতং বর্ষতি দেবে বহিষ্কুর্বীত, স যদি মুহূর্তং স্থিতস্তাদৃশ এব ভবতি তদা গাঙ্গং পততীত্যবগন্তব্যং; বর্ণান্যত্বে সিক্থপ্রক্লেদে চ সামুদ্রমিতি বিদ্যাত্, তন্নোপাদেযম্ | সামুদ্রমপ্যাশ্বযুজে মাসি গৃহীতং গাঙ্গবদ্ভবতি | গাঙ্গং পুনঃ প্রধানং, তদুপাদদীতাশ্বযুজে মাসি | শুচিশুক্লবিততপটৈকদেশচ্যুতমথবা হর্ম্যতলপরিভ্রষ্টমন্যৈর্বা শুচিভির্ভাজনৈর্গৃহীতং সৌবর্ণে রাজতে মৃন্মযে বা পাত্রে নিদধ্যাত্ | তত্ সর্বকালমুপযুঞ্জীত, তস্যালাভে ভৌমম্ | তচ্চাকাশগুণবহুলম্ | তত্ পুনঃ সপ্তবিধম্ | তদ্যথা- কৌপং, নাদেযং, সারসং, তাডাগং, প্রাস্রবণম্, ঔদ্ভিদং, চৌণ্ট্যমিতি ||৭||

Adhikarana 7 (8) · Śloka 8

তত্র বর্ষাস্বান্তরিক্ষমৌদ্ভিদং বা সেবেত, মহাগুণত্বাত্; শরদি সর্বং, প্রসন্নত্বাত্; হেমন্তে সারসং তাডাগং বা; বসন্তে কৌপং প্রাস্রবণং বা; গ্রীষ্মেঽপ্যেবং; প্রাবৃষি চৌণ্ট্যমনভিবৃষ্টং সর্বং চেতি ||৮||

Adhikarana 8 (9-10) · Śloka 10

কীটমূত্রপুরীষাণ্ডশবকোথপ্রদূষিতম্ | তৃণপর্ণোত্করযুতং কলুষং বিষসংযুতম্ ||৯|| যোঽবগাহেত বর্ষাসু পিবেদ্বাঽপি নবং জলম্ | স বাহ্যাভ্যন্তরান্ রোগান্ প্রাপ্নুযাত্ ক্ষিপ্রমেব তু ||১০||

Adhikarana 9 (11) · Śloka 11

তত্র যত্ পঙ্কশৈবলহঠতৃণপদ্মপত্রপ্রভৃতিভিরবচ্ছন্নং রবিশশিকিরণানিলৈর্নাভিজুষ্টং গন্ধবর্ণরসোপসৃষ্টং তদ্ব্যাপন্নমিতি বিদ্যাত্ | তস্য স্পর্শরূপরসগন্ধবীর্যবিপাকদোষাঃ ষট্ সম্ভবন্তি | তত্র, খরতা পৈচ্ছিল্যমৌষ্ণ্যং দন্তগ্রাহিতা চ স্পর্শদোষঃ, পঙ্কসিকতাশৈবালবহুবর্ণতা রূপদোষঃ; ব্যক্তরসতা রসদোষঃ; অনিষ্টগন্ধতা গন্ধদোষঃ; যদুপযুক্তং তৃষ্ণাগৌরবশূলকফপ্রসেকানাপাদযতি স বির্যদোষঃ; যদুপযুক্তং চিরাদ্বিপচ্যতে বিষ্টম্ভযতি বা স বিপাকদোষ ইতি | ত এতে আন্তরিক্ষে ন সন্তি ||১১||

Adhikarana 10 (12) · Śloka 12

ব্যাপন্নস্য চাগ্নিক্বথনং সূর্যাতপপ্রতাপনং তপ্তাযঃপিণ্ডসিকতালোষ্ট্রাণাং বা নির্বাপণং প্রসাদনং চ কর্তব্যং, নাগচম্পকোত্পলপাটলাপুষ্পপ্রভৃতিভিশ্চাধিবাসনমিতি ||১২||

Adhikarana 11 (13) · Śloka 13

সৌবর্ণে রাজতে তাম্রে কাংস্যে মণিমযেঽপি বা | পুষ্পাবতংসং ভৌমে বা সুগন্ধি সলিলং পিবেত্ ||১৩||

Adhikarana 12 (14-16) · Śloka 16

ব্যাপন্নং বর্জযেন্নিত্যং তোযং যচ্চাপ্যনার্তবম্ | দোষসঞ্জননং হ্যেতন্নাদদীতাহিতং তু তত্ ||১৪|| ব্যাপন্নমুদকং যস্তু পিবতীহাপ্রসাদিতম্ | শ্বযথুং পাণ্ডুরোগং চ ত্বগ্দোষমবিপাকতাম্ ||১৫|| শ্বাসকাসপ্রতিশ্যাযশূলগুল্মোদরাণি চ | অন্যান্বা বিষমান্রোগান্প্রাপ্নুযাদচিরেণ সঃ ||১৬||

Adhikarana 13 (17) · Śloka 17

তত্র সপ্ত কলুষস্য প্রসাদনানি ভবন্তি | তদ্যথা- কতকগোমেদকবিসগ্রন্থিশৈবালমূলবস্ত্রাণি মুক্তামণিশ্চেতি ||১৭||

Adhikarana 14 (18) · Śloka 18

পঞ্চ নিক্ষেপণানি ভবন্তি | তদ্যথা- ফলকং, ত্র্যষ্টকং, মুঞ্জবলয, উদকমঞ্চিকা, শিক্যং চেতি ||১৮||

Adhikarana 15 (19) · Śloka 19

সপ্ত শীতীকরণানি ভবন্তি; তদ্যথা- প্রবাতস্থাপনম্, উদকপ্রক্ষেপণং, যষ্টিকাভ্রামণং, ব্যজনং, বস্ত্রোদ্ধরণং, বালুকাপ্রক্ষেপণং, শিক্যাবলম্বনং চেতি ||১৯||

Adhikarana 16 (20) · Śloka 20

নির্গন্ধমব্যক্তরসং তৃষ্ণাঘ্নং শুচি শীতলম্ | অচ্ছং লঘু চ হৃদ্যং চ তোযং গুণবদুচ্যতে ||২০||

Adhikarana 17 (21) · Śloka 21

তত্র নদ্যঃ পশ্চিমাভিমুখাঃ পথ্যাঃ, লঘূদকত্বাত্; পূর্বাভিমুখাস্তু ন প্রশস্যন্তে, গুরূদকত্বাত্; দক্ষিণাভিমুখা নাতিদোষলাঃ, সাধারণত্বাত্ | তত্র সহ্যপ্রভবাঃকুষ্ঠং জনযন্তি, বিন্ধ্যপ্রভবাঃ কুষ্ঠং পাণ্ডুরোগং চ, মলযপ্রভবাঃ কৃমীন্, মহেন্দ্রপ্রভবাঃ শ্লীপদোদরাণি, হিমবত্প্রভবা হৃদ্রোগশ্বযথুশিরোরোগশ্লীপদগলগণ্ডান্, প্রাচ্যাবন্ত্যা অপরাবন্ত্যাশ্চার্শাংস্যুপজনযন্তি, পারিযাত্রপ্রভবাঃ পথ্যা বলারোগ্যকর্য ইতি ||২১||

Adhikarana 18 (22) · Śloka 22

নদ্যঃ শীঘ্রবহা লঘ্ব্যঃ প্রোক্তা যাশ্চামলোদকাঃ | গুর্ব্যঃ শৈবালসঞ্ছন্নাঃ কলুষা মন্দগাশ্চ যাঃ ||২২||

Adhikarana 19 (23) · Śloka 23

প্রাযেণ নদ্যো মরুষু সতিক্তা লবণান্বিতাঃ | লঘ্ব্যঃ সমধুরাশ্চৈব পৌরুষেযা বলে হিতাঃ ||২৩||

Adhikarana 20 (24) · Śloka 24

তত্র সর্বেষামেব ভৌমানাং গ্রহণং প্রত্যূষসি, তত্র হ্যমলত্বং শৈত্যং চাধিকং ভবতি, স এব চাপাং পরো গুণ ইতি ||২৪||

Adhikarana 21 (25) · Śloka 25

দিবার্ককিরণৈর্জুষ্টং নিশাযামিন্দুরশ্মিভিঃ | অরূক্ষমনভিষ্যন্দি তত্তুল্যং গগনাম্বুনা ||২৫||

Adhikarana 22 (26) · Śloka 26

গগনাম্বু ত্রিদোষঘ্নং গৃহীতং যত্ সুভাজনে | বল্যং রসাযনং মেধ্যং পাত্রাপেক্ষি ততঃ পরম্ ||২৬||

Adhikarana 23 (27) · Śloka 27

রক্ষোঘ্নং শীতলং হ্লাদি জ্বরদাহবিষাপহম্ | চন্দ্রকান্তোদ্ভবং বারি পিত্তঘ্নং বিমলং স্মৃতম্ ||২৭||

Adhikarana 24 (28) · Śloka 29

মূর্চ্ছাপিত্তোষ্ণদাহেষু বিষে রক্তে মদাত্যযে | ভ্রমক্লমপরীতেষু তমকে বমথৌ তথা ||২৮|| ঊর্ধ্বগে রক্তপিত্তে চ শীতমম্ভঃ প্রশস্যতে |২৯|

Adhikarana 25 (29-30) · Śloka 30

পার্শ্বশূলে প্রতিশ্যাযে বাতরোগে গলগ্রহে ||২৯|| আধ্মানে স্তিমিতে কোষ্ঠে সদ্যঃশুদ্ধে নবজ্বরে | হিক্কাযাং স্নেহপীতে চ শীতাম্বু পরিবর্জযেত্ ||৩০||

Adhikarana 26 (31-36) · Śloka 37

নাদেযং বাতলং রূক্ষং দীপনং লঘু লেখনম্ | তদভিষ্যন্দি মধুরং সান্দ্রং গুরু কফাবহম্ ||৩১|| তৃষ্ণাঘ্নং সারসং বল্যং কষাযং মধুরং লঘু | তাডাগং বাতলং স্বাদু কষাযং কটুপাকি চ ||৩২|| বাতশ্লেষ্মহরং বাপ্যং সক্ষারং কটু পিত্তলম্ | সক্ষারং পিত্তলং কৌপং শ্লেষ্মঘ্নং দীপনং লঘু ||৩৩|| চৌণ্ট্যমগ্নিকরং রূক্ষং মধুরং কফকৃন্ন চ | কফঘ্নং দীপনং হৃদ্যং লঘু প্রস্রবণোদ্ভবম্ ||৩৪|| মধুরং পিত্তশমনমবিদাহ্যৌদ্ভিদং স্মৃতম্ | বৈকিরং কটু সক্ষারং শ্লেষ্মঘ্নং লঘু দীপনম্ ||৩৫|| কৈদারং মধুরং প্রোক্তং বিপাকে গুরু দোষলম্ | তদ্বত্পাল্বলমুদ্দিষ্টং বিশেষাদ্দোষলং তু তত্ ||৩৬|| সামুদ্রমুদকং বিস্রং লবণং সর্বদোষকৃত্ |৩৭|

Adhikarana 27 (37-38) · Śloka 39

অনেকদোষমানূপং বার্যভিষ্যন্দি গর্হিতম্ ||৩৭|| এভির্দোষৈরসংযুক্তং নিরবদ্যং তু জাঙ্গলম্ | পাকেঽবিদাহি তৃষ্ণাঘ্নং প্রশস্তং প্রীতিবর্ধনম্ ||৩৮|| দীপনং স্বাদু শীতং চ তোযং সাধারণং লঘু |৩৯|

Adhikarana 28 (39) · Śloka 40

কফমেদোঽনিলামঘ্নং দীপনং বস্তিশোধনম্ ||৩৯|| শ্বাসকাসজ্বরহরং পথ্যমুষ্ণোদকং সদা |৪০|

Adhikarana 29 (40) · Śloka 41

যত্ ক্বাথ্যমানং নির্বেগং নিষ্ফেনং নির্মলং লঘু ||৪০|| চতুর্ভাগাবশেষং তু তত্তোযং গুণবত্ স্মৃতম্ |৪১|

Adhikarana 30 (41) · Śloka 42

ন চ পর্যুষিতং দেযং কদাচিদ্বারি জানতা ||৪১|| অম্লীভূতং কফোত্ক্লেদি ন হিতং তত্ পিপাসবে |৪২|

Adhikarana 31 (42) · Śloka 43

মদ্যপানাত্সমুদ্ভূতে রোগে পিত্তোত্থিতে তথা ||৪২|| সন্নিপাতসমুত্থে চ শৃতশীতং প্রশস্যতে |৪৩|

Adhikarana 32 (43) · Śloka 44

স্নিগ্ধং স্বাদু হিমং হৃদ্যং দীপনং বস্তিশোধনম্ ||৪৩|| বৃষ্যং পিত্তপিপাসাঘ্নং নালিকেরোদকং গুরু |৪৪|

Adhikarana 33 (44) · Śloka 45

দাহাতীসারপিত্তাসৃঙ্মূর্চ্ছামদ্যবিষার্তিষু ||৪৪|| শৃতশীতং জলং শস্তং তৃষ্ণাচ্ছর্দিভ্রমেষু চ |৪৫|

Adhikarana 34 (45-46) · Śloka 46

অরোচকে প্রতিশ্যাযে প্রসেকে শ্বযথৌ ক্ষযে ||৪৫|| মন্দেঽগ্নাবুদরে কুষ্ঠে জ্বরে নেত্রামযে তথা | ব্রণে চ মধুমেহে চ পানীযং মন্দমাচরেত্ ||৪৬|| ইতি জলবর্গঃ |

Adhikarana 35 (47) · Śloka 47

অথ ক্ষীরবর্গঃ | গব্যমাজং তথা চৌষ্ট্রমাবিকং মাহিষং চ যত্ | অশ্বাযাশ্চৈব নার্যাশ্চ করেণূনাং চ যত্পযঃ ||৪৭||

Adhikarana 36 (48) · Śloka 48

তত্ত্বনেকৌষধিরসপ্রসাদং প্রাণদং গুরু | মধুরং পিচ্ছিলং শীতং স্নিগ্ধং শ্লক্ষ্ণং সরং মৃদু | সর্বপ্রাণভৃতাং তস্মাত্ সাত্ম্যং ক্ষীরমিহোচ্যতে ||৪৮||

Adhikarana 37 (49) · Śloka 49

তত্র সর্বমেব ক্ষীরং প্রাণিনামপ্রতিষিদ্ধং জাতিসাত্ম্যাত্, বাতপিত্তশোণিতমানসেষ্বপি বিকারেষ্ববিরুদ্ধং, জীর্ণজ্বরকাসশ্বাসশোষক্ষযগুল্মোন্মাদোদরমূর্চ্ছাভ্রমমদদাহপিপাসাহৃদ্বস্তিদোষ- পাণ্ডুরোগগ্রহণীদোষার্শঃশূলোদাবর্তাতিসারপ্রবাহিকাযোনিরোগগর্ভাস্রাবরক্তপিত্তশ্রমক্লমহরং, পাপ্মাপহং বল্যং বৃষ্যং বাজীকরণং রসাযনং মেধ্যং বযঃস্থাপনমাযুষ্যং জীবনং বৃংহণং সন্ধানং বমনবিরেচনাস্থাপনং তুল্যগুণত্বাচ্চৌজসো বর্ধনং বালবৃদ্ধক্ষতক্ষীণানাং ক্ষুদ্ব্যবাযব্যাযামকর্শিতানাং চ পথ্যতমম্ ||৪৯||

Adhikarana 38 (50) · Śloka 51

অল্পাভিষ্যন্দি গোক্ষীরং স্নিগ্ধং গুরু রসাযনম্ | রক্তপিত্তহরং শীতং মধুরং রসপাকযোঃ ||৫০|| জীবনীযং তথা বাতপিত্তঘ্নং পরমং স্মৃতম্ |৫১|

Adhikarana 39 (51-52) · Śloka 53

গব্যতুল্যগুণং ত্বাজং বিশেষাচ্ছোষিণাং হিতম্ ||৫১|| দীপনং লঘু সঙ্গ্রাহি শ্বাসকাসাস্রপিত্তনুত্ | অজানামল্পকাযত্বাত্ কটুতিক্তনিষেবণাত্ ||৫২|| নাত্যম্বুপানাদ্ব্যাযামাত্ সর্বব্যাধিহরং পযঃ |৫৩|

Adhikarana 40 (53) · Śloka 54

রূক্ষোষ্ণং লবণং কিঞ্চিদৌষ্ট্রং স্বাদুরসং লঘু ||৫৩|| শোফগুল্মোদরার্শোঘ্নং কৃমিকুষ্ঠবিষাপহম্ |৫৪|

Adhikarana 41 (54) · Śloka 55

আবিকং মধুরং স্নিগ্ধং গুরু পিত্তকফাবহম্ ||৫৪|| পথ্যং কেবলবাতেষু কাসে চানিলসম্ভবে |৫৫|

Adhikarana 42 (55) · Śloka 56

মহাভিষ্যন্দি মধুরং মাহিষং বহ্নিনাশনম্ ||৫৫|| নিদ্রাকরং শীততরং গব্যাত্ স্নিগ্ধতরং গুরু |৫৬|

Adhikarana 43 (56) · Śloka 57

উষ্ণমৈকশফং বল্যং শাখাবাতহরং পযঃ ||৫৬|| মধুরাম্লরসং রূক্ষং লবণানুরসং লঘু |৫৭|

Adhikarana 44 (57) · Śloka 58

নার্যাস্তু মধুরং স্তন্যং কষাযানুরসং হিমম্ ||৫৭|| নস্যাশ্চ্যোতনযোঃ পথ্যং জীবনং লঘু দীপনম্ |৫৮|

Adhikarana 45 (58) · Śloka 59

হস্তিন্যা মধুরং বৃষ্যং কষাযানুরসং গুরু ||৫৮|| স্নিগ্ধং স্থৈর্যকরং শীতং চক্ষুষ্যং বলবর্ধনম্ |৫৯|

Adhikarana 46 (59) · Śloka 60

প্রাযঃ প্রাভাতিকং ক্ষীরং গুরু বিষ্টম্ভি শীতলম্ ||৫৯|| রাত্র্যাঃ সোমগুণত্বাচ্চ ব্যাযামাভাবতস্তথা |৬০|

Adhikarana 47 (60) · Śloka 61

দিবাকরাভিতপ্তানাং ব্যাযামানিলসেবনাত্ ||৬০|| শ্রমঘ্নং বাতনুচ্চৈব চক্ষুষ্যং চাপরাহ্ণিকম্ |৬১|

Adhikarana 48 (61) · Śloka 61

পযোঽভিষ্যন্দি গুর্বামং প্রাযশঃ পরিকীর্তিতম্ ||৬১||

Adhikarana 49 (62) · Śloka 62

তদেবোক্তং লঘুতরমনভিষ্যন্দি বৈ শৃতম্ |৬২|

Adhikarana 50 (62) · Śloka 62

বর্জযিত্বা স্ত্রিযাঃ স্তন্যমামমেব হি তদ্ধিতম্ ||৬২||

Adhikarana 51 (63) · Śloka 63

ধারোষ্ণং গুণবত্ ক্ষীরং বিপরীতমতোঽন্যথা |৬৩|

Adhikarana 52 (63) · Śloka 63

তদেবাতিশৃতং শীতং গুরু বৃংহণমুচ্যতে ||৬৩||

Adhikarana 53 (64) · Śloka 64

অনিষ্টগন্ধমম্লং চ বিবর্ণং বিরসং চ যত্ | বর্জ্যং সলবণং ক্ষীরং যচ্চ বিগ্রথিতং ভবেত্ ||৬৪|| ইতি ক্ষীরবর্গঃ |

Adhikarana 54 (65) · Śloka 65

অথ দধিবর্গঃ | দধি তু মধুরমম্লমত্যম্লং চেতি; তত্কষাযানুরসং স্নিগ্ধমুষ্ণং পীনসবিষমজ্বরাতিসারারোচকমূত্রকৃচ্ছ্রকার্শ্যাপহং বৃষ্যং প্রাণকরং মঙ্গল্যং চ ||৬৫||

Adhikarana 55 (66) · Śloka 66

মহাভিষ্যন্দি মধুরং কফমেদোবিবর্ধনম্ | কফপিত্তকৃদম্লং স্যাদত্যম্লং রক্তদূষণম্ ||৬৬||

Adhikarana 56 (67) · Śloka 67

বিদাহি সৃষ্টবিণ্মূত্রং মন্দজাতং ত্রিদোষকৃত্ |৬৭|

Adhikarana 57 (67) · Śloka 68

স্নিগ্ধং বিপাকে মধুরং দীপনং বলবর্ধনম্ ||৬৭|| বাতাপহং পবিত্রং চ দধি গব্যং রুচিপ্রদম্ |৬৮|

Adhikarana 58 (68) · Śloka 69

দধ্যাজং কফপিত্তঘ্নং লঘু বাতক্ষযাপহম্ ||৬৮|| দুর্নামশ্বাসকাসেষু হিতমগ্নেশ্চ দীপনম্ |৬৯|

Adhikarana 59 (69) · Śloka 70

বিপাকে মধুরং বৃষ্যং বাতপিত্তপ্রসাদনম্ ||৬৯|| বলাসবর্ধনং স্নিগ্ধং বিশেষাদ্দধি মাহিষম্ |৭০|

Adhikarana 60 (70) · Śloka 71

বিপাকে কটু সক্ষারং গুরু ভেদ্যৌষ্ট্রিকং দধি ||৭০|| বাতমর্শাংসি কুষ্ঠানি কৃমীন্ হন্ত্যুদরাণি চ |৭১|

Adhikarana 61 (71) · Śloka 72

কোপনং কফবাতানাং দুর্নাম্নাং চাবিকং দধি ||৭১|| রসে পাকে চ মধুরমত্যভিষ্যন্দি দোষলম্ |৭২|

Adhikarana 62 (72) · Śloka 73

দীপনীযমচক্ষুষ্যং বাডবং দধি বাতলম্ ||৭২|| রূক্ষমুষ্ণং কষাযং চ কফমূত্রাপহং চ তত্ |৭৩|

Adhikarana 63 (73) · Śloka 74

স্নিগ্ধং বিপাকে মধুরং বল্যং সন্তর্পণং গুরু ||৭৩|| চক্ষুষ্যমগ্র্যং দোষঘ্নং দধি নার্যা গুণোত্তরম্ |৭৪|

Adhikarana 64 (74) · Śloka 75

লঘু পাকে বলাসঘ্নং বীর্যোষ্ণং পক্তিনাশনম্ ||৭৪|| কষাযানুরসং নাগ্যা দধি বর্চোবিবর্ধনম্ |৭৫|

Adhikarana 65 (75) · Śloka 76

দধীন্যুক্তানি যানীহ গব্যাদীনি পৃথক্ পৃথক্ ||৭৫|| বিজ্ঞেযমেবং সর্বেষু গব্যমেব গুণোত্তরম্ |৭৬|

Adhikarana 66 (76) · Śloka 77

বাতঘ্নং কফকৃত্ স্নিগ্ধং বৃংহণং নাতিপিত্তকৃত্ ||৭৬|| কুর্যাদ্ভক্তাভিলাষং চ দধি যত্ সুপরিস্রুতম্ |৭৭|

Adhikarana 67 (77) · Śloka 78

শৃতাত্ ক্ষীরাত্তু যজ্জাতং গুণবদ্দধি তত্ স্মৃতম্ ||৭৭|| বাতপিত্তহরং রুচ্যং ধাত্বগ্নিবলবর্ধনম্ |৭৮|

Adhikarana 68 (78) · Śloka 79

দধ্নঃ সরো গুরুর্বৃষ্যো বিজ্ঞেযোঽনিলনাশনঃ ||৭৮|| বহ্নের্বিধমনশ্চাপি কফশুক্রবিবর্ধনঃ |৭৯|

Adhikarana 69 (79) · Śloka 80

দধি ত্বসারং রূক্ষং চ গ্রাহি বিষ্টম্ভি বাতলম্ ||৭৯|| দীপনীযং লঘুতরং সকষাযং রুচিপ্রদম্ |৮০|

Adhikarana 70 (80) · Śloka 81

শরদ্গ্রীষ্মবসন্তেষু প্রাযশো দধি গর্হিতম্ ||৮০|| হেমন্তে শিশিরে চৈব বর্ষাসু দধি শস্যতে |৮১|

Adhikarana 71 (81-83) · Śloka 83

তৃষ্ণাক্লমহরং মস্তু লঘু স্রোতোবিশোধনম্ ||৮১|| অম্লং কষাযং মধুরমবৃষ্যং কফবাতনুত্ | প্রহ্লাদনং প্রীণনং চ ভিনত্ত্যাশু মলং চ তত্ | বলমাবহতে ক্ষিপ্রং ভক্তচ্ছন্দং করোতি চ ||৮২|| স্বাদ্বম্লমত্যম্লকমন্দজাতং তথা শৃতক্ষীরভবং সরশ্চ | অসারমেবং দধি সপ্তধাঽস্মিন্ বর্গে স্মৃতা মস্তুগুণাস্তথৈব ||৮৩|| ইতি দধিবর্গঃ |

Adhikarana 72 (84) · Śloka 84

অথ তক্রবর্গঃ | তক্রং তু মধুরমম্লং কষাযানুরসমুষ্ণবীর্যং লঘুরূক্ষমগ্নিদীপনং গরশোফাতিসারগ্রহণীপাণ্ডুরোগার্শঃপ্লীহগুল্মারোচকবিষমজ্বরতৃষ্ণাচ্ছর্দিপ্রসেকশূলভেদঃশ্লেষ্মানিলহরং মধুরবিপাকং হৃদ্যং মূত্রকৃচ্ছ্রস্নেহব্যাপত্প্রশমনমবৃষ্যং চ ||৮৪||

Adhikarana 73 (85) · Śloka 85

মন্থনাদিপৃথগ্ভূতস্নেহমর্ধোদকং চ যত্ | নাতিসান্দ্রদ্রবং তক্রং স্বাদ্বম্লং তুবরং রসে | যত্তু সস্নেহমজলং মথিতং ঘোলমুচ্যতে ||৮৫||

Adhikarana 74 (86) · Śloka 86

নৈব তক্রং ক্ষতে দদ্যান্নোষ্ণকালে ন দুর্বলে | ন মূর্চ্ছাভ্রমদাহেষু ন রোগে রক্তপৈত্তিকে ||৮৬||

Adhikarana 75 (87) · Śloka 87

শীতকালেঽগ্নিমান্দ্যে চ কফোত্থেষ্বামযেষু চ | মার্গাবরোধে দুষ্টে চ বাযৌ তক্রং প্রশস্যতে ||৮৭||

Adhikarana 76 (88) · Śloka 88

তত্ পুনর্মধুরং শ্লেষ্মপ্রকোপণং পিত্তপ্রশমনং চ; অম্লং বাতঘ্নং পিত্তকরং চ ||৮৮||

Adhikarana 77 (89) · Śloka 89

বাতেঽম্লং সৈন্ধবোপেতং, স্বাদু পিত্তে সশর্করম্ | পিবেত্তক্রং কফে চাপি ব্যোষক্ষারসমন্বিতম্ ||৮৯||

Adhikarana 78 (90) · Śloka 90

গ্রাহিণী বাতলা রূক্ষা দুর্জরা তক্রকূর্চিকা |৯০|

Adhikarana 79 (90) · Śloka 90

তক্রাল্লঘুতরো মণ্ডঃ কূর্চিকাদধিতক্রজঃ ||৯০||

Adhikarana 80 (91) · Śloka 91

গুরুঃ কিলাটোঽনিলহা পুংস্ত্বনিদ্রাপ্রদঃ স্মৃতঃ |৯১|

Adhikarana 81 (91) · Śloka 91

মধুরৌ বৃংহণৌ বৃষ্যৌ তদ্বত্পীযূষমোরটৌ ||৯১||

Adhikarana 82 (92) · Śloka 92

নবনীতং পুনঃ সদ্যস্কং লঘু সুকুমারং মধুরং কষাযমীষদম্লং শীতলং মেধ্যং দীপনং হৃদ্যং সঙ্গ্রাহি পিত্তানিলহরং বৃষ্যমবিদাহি ক্ষযকাসব্রণশোষার্শোঽর্দিতাপহং, চিরোত্থিতং গুরু কফমেদোবিবর্ধনং বলকরং বৃংহণং শোষঘ্নং বিশেষেণ বালানাং প্রশস্যতে ||৯২||

Adhikarana 83 (93) · Śloka 93

ক্ষীরোত্থং পুনর্নবনীতমুত্কৃষ্টস্নেহমাধুর্যমতিশীতং সৌকুমার্যকরং চক্ষুষ্যং সঙ্গ্রাহি রক্তপিত্তনেত্ররোগহরং প্রসাদনং চ ||৯৩||

Adhikarana 84 (94) · Śloka 94

সন্তানিকা পুনর্বাতঘ্নী তর্পণী বৃষ্যা বল্যা স্নিগ্ধা রুচ্যা মধুরা মধুরবিপাকা রক্তপিত্তপ্রসাদনী গুর্বী চ ||৯৪||

Adhikarana 85 (95) · Śloka 95

বিকল্প এষ দধ্যাদিঃ শ্রেষ্ঠো গব্যোঽভিবর্ণিতঃ | বিকল্পানবশিষ্টাংস্তু ক্ষীরবীর্যাত্সমাদিশেত্ ||৯৫|| ইতি তক্রবর্গঃ |

Adhikarana 86 (96) · Śloka 96

অথ ঘৃতম্ | ঘৃতং তু মধুরং সৌম্যং মৃদু শীতবীর্যমনভিষ্যন্দি স্নেহনমুদাবর্তোন্মাদাপস্মারশূলজ্বরানাহবাতপিত্তপ্রশমনমগ্নিদীপনং স্মৃতিমতিমেধাকান্তিস্বরলাবণ্যসৌকুমার্যৌজস্তেজোবলকরমাযুষ্যং বৃষ্যং মেধ্যং বযঃস্থাপনং গুরু চক্ষুষ্যং শ্লেষ্মাভিবর্ধনং পাপ্মালক্ষ্মীপ্রশমনং বিষহরং রক্ষোঘ্নং চ ||৯৬||

Adhikarana 87 (97) · Śloka 97

বিপাকে মধুরং শীতং বাতপিত্তবিষাপহম্ | চক্ষুষ্যমগ্র্যং বল্যং চ গব্যং সর্পির্গুণোত্তরম্ ||৯৭||

Adhikarana 88 (98) · Śloka 98

আজং ঘৃতং দীপনীযং চক্ষুষ্যং বলবর্ধনম্ | কাসে শ্বাসে ক্ষযে চাপি পথ্যং পাকে চ তল্লঘু ||৯৮||

Adhikarana 89 (99) · Śloka 99

মধুরং রক্তপিত্তঘ্নং গুরু পাকে কফাবহম্ | বাতপিত্তপ্রশমনং সুশীতং মাহিষং ঘৃতম্ ||৯৯||

Adhikarana 90 (100) · Śloka 100

ঔষ্ট্রং কটু ঘৃতং পাকে শোফক্রিমিবিষাপহম্ | দীপনং কফবাতঘ্নং কুষ্ঠগুল্মোদরাপহম্ ||১০০||

Adhikarana 91 (101) · Śloka 101

পাকে লঘ্বাবিকং সর্পির্ন চ পিত্তপ্রকোপণম্ | কফেঽনিলে যোনিদোষে শোষে কম্পে চ তদ্ধিতম্ ||১০১||

Adhikarana 92 (102) · Śloka 102

পাকে লঘূষ্ণবীর্যং চ কষাযং কফনাশনম্ | দীপনং বদ্ধমূত্রং চ বিদ্যাদৈকশফং ঘৃতম্ ||১০২||

Adhikarana 93 (103) · Śloka 103

চক্ষুষ্যমগ্র্যং স্ত্রীণাং তু সর্পিঃ স্যাদমৃতোপমম্ | বৃদ্ধিং করোতি দেহাগ্ন্যোর্লঘুপাকং বিষাপহম্ ||১০৩||

Adhikarana 94 (104) · Śloka 104

কষাযং বদ্ধবিণ্মূত্রং তিক্তমগ্নিকরং লঘু | হন্তি কারেণবং সর্পিঃ কফকুষ্ঠবিষক্রিমীন্ ||১০৪||

Adhikarana 95 (105) · Śloka 105

ক্ষীরঘৃতং পুনঃ সঙ্গ্রাহি রক্তপিত্তভ্রমমূর্চ্ছাপ্রশমনং নেত্ররোগহিতং চ ||১০৫||

Adhikarana 96 (106) · Śloka 106

সর্পির্মণ্ডস্তু মধুরঃ সরো যোনিশ্রোত্রাক্ষিশিরসাং শূলঘ্নো বস্তিনস্যাক্ষিপূরণেষূপদিশ্যতে ||১০৬||

Adhikarana 97 (107-111) · Śloka 111

সর্পিঃ পুরাণং সরং কটুবিপাকং ত্রিদোষাপহং মূর্চ্ছামদোন্মাদোদরজ্বরগরশোষাপস্মারযোনিশ্রোত্রাক্ষিশির শূলঘ্নং দীপনং বস্তিনস্যপূরণেষূপদিশ্যতে ||১০৭|| ভবতি চাত্র- পুরাণং তিমিরশ্বাসপীনসজ্বরকাসনুত্ | মূর্চ্ছাকুষ্ঠবিষোন্মাদগ্রহাপস্মারনাশনম্ ||১০৮|| (একাদশশতং চৈব বত্সরানুষিতং ঘৃতম্ | রক্ষোঘ্নং কুম্ভসর্পিঃ স্যাত্ পরতস্তু মহাঘৃতম্ ||১০৯|| পেযং মহাঘৃতং ভূতৈঃ কফঘ্নং পবনাধিকৈঃ | বল্যং পবিত্রং মেধ্যং চ বিশেষাত্তিমিরাপহম্ ||১১০|| সর্বভূতহরং চৈব ঘৃতমেতত্ প্রশস্যতে) ||১১১|| ইতি ঘৃতবর্গঃ |

Adhikarana 98 (112-113) · Śloka 113

অথ তৈলানি | তৈলং ত্বাগ্নেযমুষ্ণং তীক্ষ্ণং মধুরং মধুরবিপাকং বৃংহণং প্রীণনং ব্যবাযি সূক্ষ্মং বিশদং গুরু সরং বিকাসি বৃষ্যং ত্বক্প্রসাদনং মেধামার্দবমাংসস্থৈর্যবর্ণবলকরং চক্ষুষ্যং বদ্ধমূত্রং লেখনং তিক্তকষাযানুরসং পাচনমনিলবলাসক্ষযকরং ক্রিমিঘ্নমশিতপিত্তজননং যোনিশিরঃকর্ণশূলপ্রশমনং গর্ভাশযশোধনং চ, তথা ছিন্নভিন্নবিদ্ধোত্পিষ্টচ্যুতমথিতক্ষতপিচ্চিতভগ্নস্ফুটিতক্ষারাগ্নিদগ্ধবিশ্লিষ্টদারিতা ভিহতদুর্ভগ্নমৃগব্যালবিদষ্টপ্রভৃতিষু চ পরিষেকাভ্যঙ্গাবগাহাদিষু তিলতৈলং প্রশস্যতে ||১১২|| তদ্বস্তিষু চ পানেষু নস্যে কর্ণাক্ষিপূরণে | অন্নপানবিধৌ চাপি প্রযোজ্যং বাতশান্তযে ||১১৩||

Adhikarana 99 (114) · Śloka 114

এরণ্ডতৈলং মধুরমুষ্ণং তীক্ষ্ণং দীপনং কটু কষাযানুরসং সূক্ষ্মং স্রোতোবিশোধনং ত্বচ্যং বৃষ্যং মধুরবিপাকং বযঃস্থাপনং যোনিশুক্রবিশোধনমারোগ্যমেধাকান্তিস্মৃতিবলকরং বাতকফহরমধোভাগদোষহরং চ ||১১৪||

Adhikarana 100 (115) · Śloka 115

নিম্বাতসীকুসুম্ভমূলকজীমূতকবৃক্ষককৃতবেধনার্ককম্পিল্লকহস্তিকর্ণপৃথ্বীকাপীলু- করঞ্জেঙ্গুদীশিগ্রুসর্ষপসুবর্চলাবিডঙ্গজ্যোতিষ্মতীফলতৈলানি তীক্ষ্ণানি লঘূন্যুষ্ণবীর্যাণি কটূনি কটুবিপাকানি সরাণ্যনিলকফকৃমিকুষ্ঠপ্রমেহশিরোরোগাপহরাণি চেতি ||১১৫||

Adhikarana 101 (116-119) · Śloka 119

বাতঘ্নং মধুরং তেষু ক্ষৌমং তৈলং বলাপহম্ | কটুপাকমচক্ষুষ্যং স্নিগ্ধোষ্ণং গুরুপিত্তলম্ ||১১৬|| কৃমিঘ্নং সার্ষপং তৈলং কণ্ডূকুষ্ঠাপহং লঘু | কফমেদোনিলহরং লেখনং কটু দীপনম্ ||১১৭|| কৃমিঘ্নমিঙ্গুদীতৈলমীষত্তিক্তং তথা লঘু | কুষ্ঠামযকৃমিহরং দৃষ্টিশুক্রবলাপহম্ ||১১৮|| বিপাকে কটুকং তৈলং কৌসুম্ভং সর্বদোষকৃত্ | রক্তপিত্তকরং তীক্ষ্ণমচক্ষুষ্যং বিদাহি চ ||১১৯||

Adhikarana 102 (120) · Śloka 120

কিরাততিক্তকাতিমুক্তকবিভীতকনালিকেরকোলাক্ষোডজীবন্তীপ্রিযালকর্বুদার- সূর্যবল্লীত্রপুসৈর্বারুককর্কারুকূষ্মাণ্ডপ্রভৃতীনাং তৈলানি মধুরাণি মধুরবিপাকানি বাতপিত্তপ্রশমনানি শীতবীর্যাণ্যভিষ্যন্দীনি সৃষ্টমূত্রাণ্যগ্নিসাদনানি চেতি ||১২০||

Adhikarana 103 (121) · Śloka 121

মধূককাশ্মর্যপলাশতৈলানি মধুরকষাযাণি কফপিত্তপ্রশমনানি ||১২১||

Adhikarana 104 (122) · Śloka 122

তুবরকভল্লাতকতৈলে উষ্ণে মধুরকষাযে তিক্তানুরসে বাতকফকুষ্ঠমেদোমেহকৃমিপ্রশমনে উভযতোভাগদোষহরে চ ||১২২||

Adhikarana 105 (123) · Śloka 123

সরলদেবদারুশিংশপাগুরুগণ্ডীরসারস্নেহাস্তিক্তকটুকষাযা দুষ্টব্রণশোধনাঃ কৃমিকফকুষ্ঠানিলহরাশ্চ ||১২৩||

Adhikarana 106 (124) · Śloka 124

তুম্বীকোশাম্রদন্তীদ্রবন্তীশ্যামাসপ্তলানীলিকাকম্পিল্লকশঙ্খিনীস্নেহাস্তিক্তকটুকষাযা অধোভাগদোষহরাঃ কৃমিকফকুষ্ঠানিলহরা দুষ্টব্রণশোধনাশ্চ ||১২৪||

Adhikarana 107 (125) · Śloka 125

যবতিক্তাতৈলং সর্বদোষপ্রশমনমীষত্তিক্তমগ্নিদীপনং লেখনং মেধ্যং পথ্যং চ ||১২৫||

Adhikarana 108 (126) · Śloka 126

একৈষিকাতৈলং মধুরমতিশীতং পিত্তহরমনিলপ্রকোপণং শ্লেষ্মাভিবর্ধনং চ ||১২৬||

Adhikarana 109 (127) · Śloka 127

সহকারতৈলমীষত্তিক্তমতিসুগন্ধি বাতকফহরং রূক্ষং মধুরকষাযং রসবন্নাতিপিত্তকরং চ ||১২৭||

Adhikarana 110 (128) · Śloka 128

ফলোদ্ভবানি তৈলানি যান্যুক্তানীহ কানিচিত্ | গুণান্ কর্ম চ বিজ্ঞায ফলানীব বিনির্দিশেত্ ||১২৮||

Adhikarana 111 (129) · Śloka 129

যাবন্তঃ স্থাবরাঃ স্নেহাঃ সমাসাত্পরিকীর্তিতাঃ | সর্বে তৈলগুণা জ্ঞেযাঃ সর্বে চানিলনাশনাঃ ||১২৯||

Adhikarana 112 (130) · Śloka 130

সর্বেভ্যস্ত্বিহ তৈলেভ্যস্তিলতৈলং বিশিষ্যতে | নিষ্পত্তেস্তদ্গুণত্বাচ্চ তৈলত্বমিতরেষ্বপি ||১৩০||

Adhikarana 113 (131) · Śloka 131

গ্রাম্যানূপৌদকানাং চ বসামেদোমজ্জানো গুরূষ্ণমধুরা বাতঘ্নাঃ, জাঙ্গলৈকশফক্রব্যাদাদীনাং লঘুশীতকষাযা রক্তপিত্তঘ্নাঃ, প্রতুদবিষ্কিরাণাং শ্লেষ্মঘ্নাঃ | তত্র ঘৃততৈলবসামেদোমজ্জানো যথোত্তরং গুরুবিপাকা বাতহরাশ্চ ||১৩১|| ইতি তৈলবর্গঃ |

Adhikarana 114 (132) · Śloka 132

অথ মধুবর্গঃ | মধু তু মধুরং কষাযানুরসং রূক্ষং শীতমগ্নিদীপনং বর্ণ্যং স্বর্যং লঘু সুকুমারং লেখনং হৃদ্যং বাজীকরণং সন্ধানং শোধনং রোপণং(সঙ্গ্রাহি ) চক্ষুষ্যং প্রসাদনং সূক্ষ্মমার্গানুসারি পিত্তশ্লেষ্মমেদোমেহহিক্কাশ্বাসকাসাতিসারচ্ছর্দিতৃষ্ণাকৃমিবিষপ্রশমনং হ্লাদি ত্রিদোষপ্রশমনং চ; তত্তু লঘুত্বাত্ কফঘ্নং, পৈচ্ছিল্যান্মাধুর্যাত্ কষাযভাবাচ্চ বাতপিত্তঘ্নম্ ||১৩২||

Adhikarana 115 (133) · Śloka 133

পৌত্তিকং ভ্রামরং ক্ষৌদ্রং মাক্ষিকং ছাত্রমেব চ | আর্ঘ্যমৌদ্দালকং দালমিত্যষ্টৌ মধুজাতযঃ ||১৩৩||

Adhikarana 116 (134-139) · Śloka 140

বিশেষাত্পৌত্তিকং তেষু রূক্ষোষ্ণং সবিষান্বযাত্ | বাতাসৃক্পিত্তকৃচ্ছেদি বিদাহি মদকৃন্মধু ||১৩৪|| পৈচ্ছিল্যাত্ স্বাদুভূযস্ত্বাদ্ভ্রামরং গুরুসঞ্জ্ঞিতম্ | ক্ষৌদ্রং বিশেষতো জ্ঞেযং শীতলং লঘু লেখনম্ ||১৩৫|| তস্মাল্লঘুতরং রূক্ষং মাক্ষিকং প্রবরং স্মৃতম্ | শ্বাসাদিষু চ রোগেষু প্রশস্তং তদ্বিশেষতঃ ||১৩৬|| স্বাদুপাকং গুরু হিমং পিচ্ছিলং রক্তপিত্তজিত্ | শ্বিত্রমেহকৃমিঘ্নং চ বিদ্যাচ্ছাত্রং গুণোত্তরম্ ||১৩৭|| আর্ঘ্যং মধ্বতিচক্ষুষ্যং কফপিত্তহরং পরম্ | কষাযং কটু পাকে চ বল্যং তিক্তমবাতকৃত্ ||১৩৮|| ঔদ্দালকং রুচিকরং স্বর্যং কুষ্ঠবিষাপহম্ | কষাযমম্লমুষ্ণং চ পিত্তকৃত্ কটুপাকি চ ||১৩৯|| ছর্দিমেহপ্রশমনং মধু রূক্ষং দলোদ্ভবম্ |১৪০|

Adhikarana 117 (140) · Śloka 141

বৃংহণীযং মধু নবং নাতিশ্লেষ্মহরং সমম্ ||১৪০|| মেদঃস্থৌল্যাপহং গ্রাহি পুরাণমতিলেখনম্ |১৪১|

Adhikarana 118 (141) · Śloka 141

দোষত্রযহরং পক্বমামমম্লং ত্রিদোষকৃত্ ||১৪১||

Adhikarana 119 (142) · Śloka 142

তদ্যুক্তং বিবিধৈর্যোগৈর্নিহন্যাদামযান্ বহূন্ | নানাদ্রব্যাত্মকত্বাচ্চ যোগবাহি পরং মধু ||১৪২||

Adhikarana 120 (143-145) · Śloka 145

তত্তু নানাদ্রব্যরসগুণবীর্যবিপাকবিরুদ্ধানাং পুষ্পরসানাং মক্ষিকাসম্ভবত্বাচ্চানুষ্ণোপচারম্ ||১৪৩|| উষ্ণৈর্বিরুধ্যতে সর্বং বিষান্বযতযা মধু | উষ্ণার্তমুষ্ণৈরুষ্ণে বা তন্নিহন্তি যথা বিষম্ ||১৪৪|| তত্সৌকুমার্যাচ্চ তথৈব শৈত্যান্নানৌষধীনাং রসসম্ভবাচ্চ | উষ্ণৈর্বিরুধ্যেত বিশেষতশ্চ তথাঽন্তরীক্ষেণ জলেন চাপি ||১৪৫||

Adhikarana 121 (146) · Śloka 146

উষ্ণেন মধু সংযুক্তং বমনেষ্ববচারিতম্ | অপাকাদনবস্থানান্ন বিরুধ্যেত পূর্ববত্ ||১৪৬||

Adhikarana 122 (147) · Śloka 147

মধ্বামাত্পরতস্ত্বন্যদামং কষ্টং ন বিদ্যতে | বিরুদ্ধোপক্রমত্বাত্তত্ সর্বং হন্তি যথা বিষম্ ||১৪৭|| ইতি মধুবর্গঃ |

Adhikarana 123 (148-149) · Śloka 150

অথেক্ষুবর্গঃ | ইক্ষবো মধুরা মধুরবিপাকা গুরবঃ শীতাঃ স্নিগ্ধা বল্যা বৃষ্যা মূত্রলা রক্তপিত্তপ্রশমনাঃ কৃমিকফকরাশ্চেতি | তে চানেকবিধাঃ | তদ্যথা- ||১৪৮|| পৌণ্ড্রকো ভীরুকশ্চৈব বংশকঃ শ্বেতপোরকঃ | কান্তারস্তাপসেক্ষুশ্চ কাষ্ঠেক্ষুঃ সূচিপত্রকঃ ||১৪৯|| নৈপালো দীর্ঘপত্রশ্চ নীলপোরোঽথ কোশকৃত্ | ইত্যেতা জাতযঃ স্থৌল্যাদ্, ... |১৫০|

Adhikarana 124 (150-154) · Śloka 155

... গুণান্ বক্ষ্যাম্যতঃ পরম্ ||১৫০|| সুশীতো মধুরঃ স্নিগ্ধো বৃংহণঃ শ্লেষ্মলঃ সরঃ | অবিদাহী গুরুর্বৃষ্যঃ পৌণ্ড্রকো ভীরুকস্তথা ||১৫১|| আভ্যাং তুল্যগুণঃ কিঞ্চিত্সক্ষারো বংশকো মতঃ | বংশবচ্ছ্বেতপোরস্তু কিঞ্চিদুষ্ণঃ স বাতহা ||১৫২|| কান্তারতাপসাবিক্ষূ বংশকানুগতৌ মতৌ | এবঙ্গুণস্তু কাষ্ঠেক্ষুঃ স তু বাতপ্রকোপণঃ ||১৫৩|| সূচীপত্রো নীলপোরৌ নৈপালো দীর্ঘপত্রকঃ | বাতলাঃ কফপিত্তঘ্নাঃ সকষাযা বিদাহিনঃ ||১৫৪|| কোশকারো গুরুঃ শীতো রক্তপিত্তক্ষযাপহঃ |১৫৫|

Adhikarana 125 (155) · Śloka 156

অতীব মধুরো মূলে মধ্যে মধুর এব তু ||১৫৫|| অগ্রেষ্বক্ষিষু বিজ্ঞেয ইক্ষূণাং লবণো রসঃ ||১৫৬||

Adhikarana 126 (157) · Śloka 157

অবিদাহী কফকরো বাতপিত্তনিবারণঃ | বক্ত্রপ্রহ্লাদনো বৃষ্যো দন্তনিষ্পীডিতো রসঃ ||১৫৭||

Adhikarana 127 (158) · Śloka 158

গুরুর্বিদাহী বিষ্টম্ভী যান্ত্রিকস্তু প্রকীর্তিতঃ |১৫৮|

Adhikarana 128 (158) · Śloka 158

পক্বো গুরুঃ সরঃ স্নিগ্ধঃ সতীক্ষ্ণঃ কফবাতনুত্ ||১৫৮||

Adhikarana 129 (159) · Śloka 159

ফাণিতং গুরু মধুরমভিষ্যন্দি বৃংহণমবৃষ্যং ত্রিদোষকৃচ্চ ||১৫৯||

Adhikarana 130 (160) · Śloka 160

গুডঃ সক্ষারমধুরো নাতিশীতঃ স্নিগ্ধো মূত্ররক্তশোধনো নাতিপিত্তজিদ্বাতঘ্নো মেদঃকৃমিকফকরো বল্যো বৃষ্যশ্চ ||১৬০||

Adhikarana 131 (161) · Śloka 161

পিত্তঘ্নো মধুরঃ শুদ্ধো বাতঘ্নোঽসৃক্প্রসাদনঃ |১৬১|

Adhikarana 132 (161) · Śloka 161

সপুরাণোঽধিকগুণো গুডঃ পথ্যতমঃ স্মৃতঃ ||১৬১||

Adhikarana 133 (162) · Śloka 162

মত্স্যণ্ডিকাখণ্ডশর্করা বিমলজাতা উত্তরোত্তরং শীতাঃ স্নিগ্ধাঃ গুরুতরা মধুরতরা বৃষ্যা রক্তপিত্তপ্রশমনাস্তৃষ্ণাপ্রশমনাশ্চ ||১৬২||

Adhikarana 134 (163) · Śloka 163

যথা যথৈষাং বৈমল্যং মধুরত্বং তথা তথা | স্নেহগৌরবশৈত্যানি সরত্বং চ তথা তথা ||১৬৩||

Adhikarana 135 (164) · Śloka 164

যো যো মত্স্যণ্ডিকাখণ্ডশর্করাণাং স্বকো গুণঃ | তেন তেনৈব নির্দেশ্যস্তেষাং বিস্রাবণো গুণঃ ||১৬৪||

Adhikarana 136 (165) · Śloka 165

সারস্থিতা সুবিমলা নিঃক্ষারা চ যথা যথা | তথা গুণবতী সর্বা বিজ্ঞেযা শর্করা বুধৈঃ ||১৬৫||

Adhikarana 137 (166) · Śloka 166

মধুশর্করা পুনশ্ছর্দ্যতীসারহরী রূক্ষা ছেদনী প্রসাদনী কষাযমধুরা মধুরবিপাকা চ ||১৬৬||

Adhikarana 138 (167) · Śloka 167

যবাসশর্করা মধুরকষাযা তিক্তানুরসা শ্লেষ্মহরী সরা চেতি ||১৬৭||

Adhikarana 139 (168) · Śloka 168

যাবত্যঃ শর্করাঃ প্রোক্তাঃ সর্বা দাহপ্রণাশনাঃ | রক্তপিত্তপ্রশমনাশ্ছর্দিমূর্চ্ছাতৃষাপহাঃ ||১৬৮||

Adhikarana 140 (169) · Śloka 169

রূক্ষং মধূকপুষ্পোত্থং ফাণিতং বাতপিত্তকৃত্ | কফঘ্নং মধুরং পাকে কষাযং বস্তিদূষণম্ ||১৬৯|| ইতীক্ষুবর্গঃ |

Adhikarana 141 (170) · Śloka 171

অথ মদ্যবর্গঃ | সর্বং পিত্তকরং মদ্যমম্লং রোচনদীপনম্ | ভেদনং কফবাতঘ্নং হৃদ্যং বস্তিবিশোধনম্ ||১৭০|| পাকে লঘু বিদাহ্যুষ্ণং তীক্ষ্ণমিন্দ্রিযবোধনম্ | বিকাসি সৃষ্টবিণ্মূত্রং... |১৭১|

Adhikarana 142 (171-173) · Śloka 173

... শৃণু তস্য বিশেষণম্ ||১৭১|| মার্দ্বীকমবিদাহিত্বান্মধুরান্বযতস্তথা | রক্তপিত্তেঽপি সততং বুধৈর্ন প্রতিষিধ্যতে ||১৭২|| মধুরং তদ্ধি রূক্ষং চ কষাযানুরসং লঘু | লঘুপাকি সরং শোষবিষমজ্বরনাশনম্ ||১৭৩||

Adhikarana 143 (174) · Śloka 175

মার্দ্বীকাল্পান্তরং কিঞ্চিত্ খার্জূরং বাতকোপনম্ | তদেব বিশদং রুচ্যং কফঘ্নং কর্শনং লঘু ||১৭৪|| কষাযমধুরং হৃদ্যং সুগন্ধীন্দ্রিযবোধনম্ |১৭৫|

Adhikarana 144 (175) · Śloka 176

কাসার্শোগ্রহণীদোষমূত্রাঘাতানিলাপহা ||১৭৫|| স্তন্যরক্তক্ষযহিতা সুরা বৃংহণদীপনী |১৭৬|

Adhikarana 145 (176) · Śloka 177

কাসার্শোগ্রহণীশ্বাসপ্রতিশ্যাযবিনাশনী ||১৭৬|| শ্বেতা মূত্রকফস্তন্যরক্তমাংসকরী সুরা |১৭৭|

Adhikarana 146 (177) · Śloka 178

ছর্দ্যরোচকহৃত্কুক্ষিতোদশূলপ্রমর্দনী ||১৭৭|| প্রসন্না কফবাতার্শোবিবন্ধানাহনাশনী |১৭৮|

Adhikarana 147 (178) · Śloka 179

পিত্তলাঽল্পকফা রূক্ষা যবৈর্বাতপ্রকোপণী |১৭৮| বিষ্টম্ভিনী সুরা গুর্বী... ||১৭৯||

Adhikarana 148 (178) · Śloka 178

... শ্লেষ্মলং তু মধূলকম্ ||১৭৮||

Adhikarana 149 (179) · Śloka 179

রূক্ষা নাতিকফা বৃষ্যা পাচনী চাক্ষিকী স্মৃতা ||১৭৯||

Adhikarana 150 (180) · Śloka 180

ত্রিদোষো ভেদ্যবৃষ্যশ্চ কোহলো বদনপ্রিযঃ |১৮০|

Adhikarana 151 (180) · Śloka 181

গ্রাহ্যুষ্ণো জগলঃ পক্তা রূক্ষস্তৃট্কফশোফকৃত্ ||১৮০|| হৃদ্যঃ প্রবাহিকাটোপদুর্নামানিলশোষহৃত্ |১৮১|

Adhikarana 152 (181) · Śloka 182

বক্কসো হৃতসারত্বাদ্বিষ্টম্ভী বাতকোপনঃ ||১৮১|| দীপনঃ সৃষ্টবিণ্মূত্রো বিশদোঽল্পমদো গুরুঃ |১৮২|

Adhikarana 153 (182) · Śloka 182

কষাযো মধুরঃ শীধুর্গৌডঃ পাচনদীপনঃ ||১৮২||

Adhikarana 154 (183) · Śloka 183

শার্করো মধুরো রুচ্যো দীপনো বস্তিশোধনঃ | বাতঘ্নো মধুরঃ পাকে হৃদ্য ইন্দ্রিযবোধনঃ ||১৮৩||

Adhikarana 155 (184) · Śloka 184

তদ্বত্ পক্বরসঃ শীধুর্বলবর্ণকরঃ সরঃ | শোফঘ্নো দীপনো হৃদ্যো রুচ্যঃ শ্লেষ্মার্শসাং হিতঃ ||১৮৪||

Adhikarana 156 (185) · Śloka 185

কর্শনঃ শীতরসিকঃ শ্বযথূদরনাশনঃ | বর্ণকৃজ্জরণঃ স্বর্যো বিবন্ধঘ্নোঽর্শসাং হিতঃ ||১৮৫||

Adhikarana 157 (186) · Śloka 186

আক্ষিকঃ পাণ্ডুরোগঘ্নো ব্রণ্যঃ সঙ্গ্রাহকো লঘুঃ | কষাযমধুরঃ সীধুঃ পিত্তঘ্নোঽসৃক্প্রসাদনঃ ||১৮৬||

Adhikarana 158 (187) · Śloka 187

জাম্ববো বদ্ধনিস্যন্দস্তুবরো বাতকোপনঃ |১৮৭|

Adhikarana 159 (187) · Śloka 188

তীক্ষ্ণঃ সুরাসবো হৃদ্যো মূত্রলঃ কফবাতনুত্ ||১৮৭|| মুখপ্রিযঃ স্থিরমদো বিজ্ঞেযোঽনিলনাশনঃ |১৮৮|

Adhikarana 160 (188) · Śloka 189

লঘুর্মধ্বাসবশ্ছেদী মেহকুষ্ঠবিষাপহঃ ||১৮৮|| তিক্তঃ কষাযঃ শোফঘ্নস্তীক্ষ্ণঃ স্বাদুরবাতকৃত্ |১৮৯|

Adhikarana 161 (189) · Śloka 190

তীক্ষ্ণঃ কষাযো মদকৃদ্দুর্নামকফগুল্মহৃত্ ||১৮৯|| কৃমিমেদোনিলহরো মৈরেযো মধুরো গুরুঃ |১৯০|

Adhikarana 162 (190) · Śloka 190

বল্যঃ পিত্তহরো বর্ণ্যো হৃদ্যশ্চেক্ষুরসাসবঃ ||১৯০||

Adhikarana 163 (191) · Śloka 191

শীধুর্মধূকপুষ্পোত্থো বিহাহ্যগ্নিবলপ্রদঃ | রূক্ষঃ কষাযঃ কফহৃদ্বাতপিত্তপ্রকোপণঃ ||১৯১||

Adhikarana 164 (192) · Śloka 192

নির্দিশেদ্রসতশ্চান্যান্ কন্দমূলফলাসবান্ |১৯২|

Adhikarana 165 (192) · Śloka 193

নবং মদ্যমভিষ্যন্দি গুরু বাতাদিকোপনম্ ||১৯২|| অনিষ্টগন্ধি বিরসমহৃদ্যং চ বিদাহি চ |১৯৩|

Adhikarana 166 (193) · Śloka 194

সুগন্ধি দীপনং হৃদ্যং রোচিষ্ণু কৃমিনাশনম্ ||১৯৩|| স্ফুটস্রোতস্করং জীর্ণং লঘু বাতকফাপহম্ |১৯৪|

Adhikarana 167 (194-195) · Śloka 196

অরিষ্টো দ্রব্যসংযোগসংস্কারাদধিকো গুণৈঃ ||১৯৪|| বহুদোষহরশ্চৈব দোষাণাং শমনশ্চ সঃ | দীপনঃ কফবাতঘ্নঃ সরঃ পিত্তাবিরোধনঃ ||১৯৫|| শূলাধ্মানোদরপ্লীহজ্বরাজীর্ণার্শসাং হিতঃ |১৯৬|

Adhikarana 168 (196) · Śloka 196

পিপ্পল্যাদিকৃতো গুল্মকফরোগহরঃ স্মৃতঃ ||১৯৬||

Adhikarana 169 (197) · Śloka 197

চিকিত্সিতেষু বক্ষ্যন্তেঽরিষ্টা রোগহরাঃ পৃথক্ |১৯৭|

Adhikarana 170 (197) · Śloka 198

অরিষ্টাসবশীধূনাং গুণান্ কর্মাণি চাদিশেত্ ||১৯৭|| বুদ্ধ্যা যথাস্বং সংস্কারমবেক্ষ্য কুশলো ভিষক্ |১৯৮|

Adhikarana 171 (198-202) · Śloka 203

সান্দ্রং বিদাহি দুর্গন্ধং বিরসং কৃমিলং গুরু ||১৯৮|| অহৃদ্যং তরুণং তীক্ষ্ণমুষ্ণং দুর্ভাজনস্থিতম্ | অল্পৌষধং পর্যুষিতমত্যচ্ছং পিচ্ছিলং চ যত্ ||১৯৯|| তদ্বর্জ্যং সর্বথা মদ্যং কিঞ্চিচ্ছেষং তু যদ্ভবেত্ | তত্র যত্ স্তোকসম্ভারং তরুণং পিচ্ছিলং গুরু ||২০০|| কফপ্রকোপি তন্মদ্যং দুর্জরং চ বিশেষতঃ | পিত্তপ্রকোপি বহলং তীক্ষ্ণমুষ্ণং বিদাহি চ ||২০১|| অহৃদ্যং পেলবং পূতি কৃমিলং বিরসং চ যত্ | তথা পর্যুষিতং চাপি বিদ্যাদনিলকোপনম্ ||২০২|| সর্বদোষৈরুপেতং তু সর্বদোষপ্রকোপণম্ |২০৩|

Adhikarana 172 (203) · Śloka 204

চিরস্থিতং জাতরসং দীপনং কফবাতজিত্ ||২০৩|| রুচ্যং প্রসন্নং সুরভি মদ্যং সেব্যং মদাবহম্ |২০৪|

Adhikarana 173 (204-205) · Śloka 205

তস্যানেকপ্রকারস্য মদ্যস্য রসবীর্যতঃ ||২০৪|| সৌক্ষ্ম্যাদৌষ্ণ্যাচ্চ তৈক্ষ্ণ্যাচ্চ বিকাসিত্বাচ্চ বহ্নিনা সমেত্য হৃদযং প্রাপ্য ধমনীরূর্ধ্বমাগতম্ | বিচাল্যেন্দ্রিযচেতাংসি বীর্যং মদযতেঽচিরাত্ ||২০৫||

Adhikarana 174 (206) · Śloka 206

চিরেণ শ্লৈষ্মিকে পুংসি পানতো জাযতে মদঃ | অচিরাদ্বাতিকে দৃষ্টঃ, পৈত্তিকে শীঘ্রমেব চ ||২০৬||

Adhikarana 175 (207-209) · Śloka 209

সাত্ত্বিকে শৌচদাক্ষিণ্যহর্ষমণ্ডনলালসঃ | গীতাধ্যযনসৌভাগ্যসুরতোত্সাহকৃন্মদঃ ||২০৭|| রাজসে দুঃখশীলত্বমাত্মত্যাগং সসাহসম্ | কলহং সানুবন্ধং তু করোতি পুরুষে মদঃ ||২০৮|| অশৌচনিদ্রামাত্সর্যাগম্যাগমনলোলতাঃ | অসত্যভাষণং চাপি কুর্যাদ্ধি তামসে মদঃ ||২০৯||

Adhikarana 176 (210) · Śloka 211

রক্তপিত্তকরং শুক্তং ছেদনং ভুক্তপাচনম্ | বৈস্বর্যং জরণং শ্লেষ্মপাণ্ডুক্রিমিহরং লঘু ||২১০|| তীক্ষ্ণোষ্ণং মূত্রলং হৃদ্যং কফঘ্নং কটুপাকি চ |২১১|

Adhikarana 177 (211) · Śloka 211

তদ্বত্তদাসুতং সর্বং রোচনং চ বিশেষতঃ ||২১১||

Adhikarana 178 (212) · Śloka 212

গৌডানি রসশুক্তানি মধুশুক্তানি যানি চ | যথাপূর্বং গুরুতরাণ্যভিষ্যন্দকরাণি চ ||২১২||

Adhikarana 179 (213) · Śloka 213

তুষাম্বু দীপনং হৃদ্যং হৃত্পাণ্ডুকৃমিরোগনুত্ | গ্রহণ্যর্শোবিকারঘ্নং ভেদি সৌবীরকং তথা ||২১৩||

Adhikarana 180 (214-216) · Śloka 216

ধান্যাম্লং ধান্যযোনিত্বাজ্জীবনং দাহনাশনম্ | স্পর্শাত্ পানাত্তু পবনকফতৃষ্ণাহরং লঘু ||২১৪|| তৈক্ষ্ণ্যাচ্চ নির্হরেদাশু কফং গণ্ডূষধারণাত্ | মুখবৈরস্যদৌর্গন্ধ্যমলশোষক্লমাপহম্ ||২১৫|| দীপনং জরণং ভেদি হিতমাস্থাপনেষু চ | সমুদ্রমাশ্রিতানাং চ জনানাং সাত্ম্যমুচ্যতে ||২১৬|| ইতি মধ্যবর্গঃ |

Adhikarana 181 (217-219) · Śloka 219

অথ মূত্রাণি | মূত্রাণি গোমহিষ্যজাবিগজহযখরোষ্ট্রাণাং তীক্ষ্ণান্যুষ্ণানি কটূনি তিক্তানি লবণানুরসানি লঘূনি শোধনানি কফবাতকৃমিমেদোবিষগুল্মার্শদরকুষ্ঠশোফারোচকপাণ্ডুরোগহরাণি হৃদ্যানি দীপনানি চ সামান্যতঃ ||২১৭|| ভবতশ্চাত্র- তত্ সর্বং কটু তীক্ষ্ণোষ্ণং লবণানুরসং লঘু | শোধনং কফবাতঘ্নং কৃমিমেদোবিষাপহম্ ||২১৮|| অর্শোজঠরগুল্মঘ্নং শোফারোচকনাশনম্ | পাণ্ডুরোগহরং ভেদি হৃদ্যং দীপনপাচনম্ ||২১৯||

Adhikarana 182 (220-221) · Śloka 221

গোমূত্রং কটু তীক্ষ্ণোষ্ণং সক্ষারত্বান্ন বাতলম্ | লঘ্বগ্নিদীপনং মেধ্যং পিত্তলং কফবাতনুত্ ||২২০|| শূলগুল্মোদরানাহবিরেকাস্থাপনাদিষু | মূত্রপ্রযোগসাধ্যেষু গব্যং মূত্রং প্রযোজযেত্ ||২২১||

Adhikarana 183 (222) · Śloka 222

দুর্নামোদরশূলেষু কুষ্ঠমেহাবিশুদ্ধিষু | আনাহশোফগুল্মেষু পাণ্ডুরোগে চ মাহিষম্ ||২২২||

Adhikarana 184 (223) · Śloka 223

কাসশ্বাসাপহং শোফকামলাপাণ্ডুরোগনুত্ | কটুতিক্তান্বিতং ছাগমীষন্মারুতকোপনম্ ||২২৩||

Adhikarana 185 (224) · Śloka 224

কাসপ্লীহোদরশ্বাসশোষবর্চোগ্রহে হিতম্ | সক্ষারং তিক্তকটুকমুষ্ণং বাতঘ্নমাবিকম্ ||২২৪||

Adhikarana 186 (225) · Śloka 225

দীপনং কটু তীক্ষ্ণোষ্ণং বাতচেতোবিকারনুত্ | আশ্বং কফহরং মূত্রং কৃমিদদ্রুষু শস্যতে ||২২৫||

Adhikarana 187 (226) · Śloka 226

সতিক্তং লবণং ভেদি বাতঘ্নং পিত্তকোপনম্ | তীক্ষ্ণং ক্ষারে কিলাসে চ নাগং মূত্রং প্রযোজযেত্ ||২২৬||

Adhikarana 188 (227) · Śloka 227

গরচেতোবিকারঘ্নং তীক্ষ্ণং গ্রহণিরোগনুত্ | দীপনং গার্দভং মূত্রং কৃমিবাতকফাপহম্ ||২২৭||

Adhikarana 189 (228) · Śloka 228

শোফকুষ্ঠোদরোন্মাদমারুতক্রিমিনাশনম্ | অর্শোঘ্নং কারভং মূত্রং... |২২৮|

Adhikarana 190 (228) · Śloka 228

... মানুষং চ বিষাপহম্ ||২২৮||

Adhikarana 191 (229) · Śloka 229

দ্রবদ্রব্যাণি সর্বাণি সমাসাত্ কীর্তিতানি তু | কালদেশবিভাগজ্ঞো নৃপতের্দাতুমর্হতি ||২২৯||

Adhikarana puShpikA · Śloka 45

ইতি সুশ্রুতসংহিতাযাং সূত্রস্থানে দ্রবদ্রব্যবিজ্ঞানীযো নাম পঞ্চচত্বারিংশোঽধ্যাযঃ ||৪৫||