6. r̥tucaryādhyāyaḥ

Adhikarana 1 (1-2) · Śloka 2

অথাত ঋতুচর্যমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| ঋতবো দ্বিমাসিকাঃ শিশিরাদযো হেমন্তান্তাঃ ষট্, বর্ষাদযঃ প্রাবৃডন্তা বা; তেষু চর্যা চরণং বর্তনং; তদধিকৃত্য কৃতোঽধ্যাযঃ ঋতুচর্যঃ, তং ব্যাখ্যাস্যামঃ| ঋতুচর্যমিতি কেচিদন্যথা ব্যাখ্যানযন্তি- চরধাতোর্গতিভক্ষণার্থস্য চর্যমিতি রূপং, তেন, আহারো বিহারশ্চ চর্যশব্দেনোচ্যতে| অন্যে তু ‘অথাত ঋতুচর্যানামাধ্যাযম্’ ইতি পঠন্তি, ব্যাখ্যানযন্তি চ- চর্যা শাস্ত্রনিযমিত আচারঃ, ঋতুষু ঋতূনাং বা চর্যা ঋতুচর্যা, ঋতুচর্যার্থোঽধ্যাযঃ ঋতুচর্যা; যথা প্রদীপার্থা মল্লিকা প্রদীপ ইতি; নামশব্দঃ সঞ্জ্ঞাযাম্| ঋতুচর্যাং নাম স্বস্থবৃত্তেঽপি বক্ষ্যতি||১-২||

Adhikarana 2 (3) · Śloka 3

কালো হি নাম (ভগবান্ ) স্বযম্ভুরনাদিমধ্যনিধনঃ | অত্র রসব্যাপত্সম্পত্তী জীবিতমরণে চ মনুষ্যাণামাযত্তে | স সূক্ষ্মামপি কলাং ন লীযত ইতি কালঃ, সঙ্কলযতি কালযতি বা ভূতানীতি কালঃ ||৩||

তত্র যদঙ্গভূতা ঋতবস্তমেব প্রথমং স্বগুণকর্মনিরুক্তিভির্দর্শযন্নাহ- কালো হি নামেত্যাদি| হি উপদর্শনে, নামশব্দঃ প্রসিদ্ধৌ, কাল ইতি প্রসিদ্ধ উপদর্শ্যতে| স্বযম্ভূরিতি ন কেনাপ্যুত্পাদ্যতে| অনাদিমধ্যেত্যাদি- আদিঃ উত্পত্তিঃ, আদ্যন্তযোরন্তরা মধ্যং, নিধনং বিনাশঃ, এতৈর্বর্জিতঃ| স্বধর্মেণ কালমুক্ত্বা কর্মণা চিকিত্সোপযোগিতাং নিদর্শযন্নাহ- অত্র রসব্যাপদিত্যাদি|- অত্র কালে| রসস্য মধুরাদেঃ, রসশব্দেনাত্র রসবদ্দ্রব্যমুচ্যতেঽভেদোপচারাদিত্যন্যে; ব্যাপদ্ বিপন্নতা, সম্পত্তিঃ সম্পন্নতা, আযত্তে অধীনে| জীবিতমরণে চেতি চকারোঽত্রশব্দমিহানুবর্তযতি, তেন জীবিতমরণে অত্র কালে আযত্তে; জীবিতস্যোত্পত্ত্যধীনত্বাদিতি সামর্থ্যাদুত্পত্তিরপি কালাধীনৈব| কথমেকস্মাত্ কালদ্রব্যাত্ সম্পদ্ব্যাপত্তী জীবিতমরণে চ পরস্পরবিরুদ্ধে স্যাতাং? ন হ্যেকস্মাদগ্নেঃ শীতোষ্ণৌ, একস্মাদ্বা প্রদীপাত্ প্রকাশতমসী, ইতি| সত্যং, কালশব্দেনাত্র কালত্বোপাধিঃ শীতাদিভেদভিন্নঃ শিশিরাদিরভিধীযতে, তস্য চ সম্যঙ্মিথ্যাভ্যাং যোগাভ্যামন্যোন্যবিরুদ্ধযোরপি কার্যযোঃ সম্ভব ইত্যদোষঃ| কালস্য নিরুক্তিং কুর্বন্নাহ- স সূক্ষ্মামিত্যাদি|- সঃ কালঃ, সূক্ষ্মামপি স্তোকামপি, কলাং ভাগং, ন লীযতে গতিমত্ত্বাত্ শ্লিষ্টো ন ভবতি; অন্যে তু ‘ন লীযতে’ ইত্যত্র ‘কলীযতে’ ইতি পঠন্তি ব্যাখ্যানযন্তি চ- কলীযতে সঙ্খ্যাযতে ইতি কালঃ| নিরুক্তিপক্ষান্তরমাহ- সঙ্কলযতীত্যাদি|- সঙ্কলযতি সংহরণাদেকরাশীকরোতি ভূতানীতি বা কালঃ, সঙ্কলযতি সুখদুঃখাভ্যাং ভূতানি যোজযতীতি বা কালঃ, কালযতি সঙ্ক্ষিপতীতি বা কালঃ, অথবা কালযতি মৃত্যুসমীপং নযতীতি বা কালঃ; অন্যে তু ‘কালযতি’ ইত্যত্র ‘কলযতি’ ইতি পঠন্তি, ‘কলযতি সঙ্খ্যাতীতি বা কাল’ ইতি চ ব্যাখ্যানযন্তি||৩||

Adhikarana 3 (4) · Śloka 4

তস্য সংবত্সরাত্মনো ভগবানাদিত্যো গতিবিশেষেণাক্ষিনিমেষকাষ্ঠাকলামুহূর্তাহোরাত্রপক্ষমাসর্ত্বযনসংবত্সরযুগপ্রবিভাগং করোতি ||৪||

তস্য সংবত্সরেত্যাদি| তস্য কালস্য| কিংবিশিষ্টস্য? সংবত্সরাত্মনঃ সংবত্সরস্বরূপস্য; সংবত্সরাত্মনঃ সংবত্সরশরীরস্যেত্যন্যে| ভগবানাদিত্য ইত্যুপলক্ষণং; তেন চন্দ্রোঽপি গৃহ্যতে, নিশাকরণত্বাদিহেতুত্বাত্; অথবা রবিরেব ভগবান্ মাহাত্ম্যবান্ স্বরশ্মিভিঃ শীতোষ্ণবর্ষাঃ কুরুতে, কালবিভাগং চ গতিবিশেষেণাত্মীযেনোদযাস্তগমনলক্ষণেন| ননু, সংবত্সরাত্মন ইতি কিমুক্তং? যেন, ঋত্বাবৃত্তির্দিবসাবৃত্তির্বা কালঃ, তেন ঋত্বাত্মনো দিনাত্মনো বেতি বক্তব্যং; নৈতদস্তি, ন হ্যেকস্মিনৃতৌ দিনে বা ঋত্বন্তরাণাং দিনান্তরাণাং বা সর্বেষাং ধর্মাবরোধঃ কুতঃ? শীতোষ্ণবৃষ্টিভেদেন তেষামত্যন্তভিন্নত্বাত্; সংবত্সরে পুনরেকস্মিন্নেব সর্বেষাং ভূতভবদ্ভবিষ্যতাং দিবসানামৃতূনাং সংবত্সরান্তরাণাং চ ধর্মোঽবরুধ্যত ইতি যথোক্তমেব ন্যায্যম্||৪||

Adhikarana 4 (5) · Śloka 5

তত্র লঘ্বক্ষরোচ্চারণমাত্রোঽক্ষিনিমেষঃ, পঞ্চদশাঽক্ষিনিমেষাঃ কাষ্ঠা, ত্রিংশত্কাষ্ঠাঃ কলা, বিংশতিকলো মুহূর্তঃ কলাদশভাগশ্চ, ত্রিংশন্মুহূর্তমহোরাত্রং, পঞ্চদশাহোরাত্রাণি পক্ষঃ, স চ দ্বিবিধঃ- শুক্লঃ কৃষ্ণশ্চ, তৌ মাসঃ ||৫||

ইদানীং সংবত্সরাংশান্ নিমেষাদীন্ বিবরিতুমাহ- তত্র লঘ্বক্ষরেত্যাদি| তত্র তেষু মধ্যে| লঘ্বক্ষরমকারাদি, তস্যোচ্চারণং কণ্ঠতাল্বাদিব্যাপারেণোদীরণং, তত্প্রমাণো নিমেষঃ| ননু, লঘ্বক্ষরোচ্চারণাদিনা নিমেষাদযো বিভজ্যন্ত, তত্ কথং ভগবানাদিত্যো গতিবিশেষেণ নিমেষাদীনাং বিভাগং করোতীত্যুক্তং? নৈষ দোষঃ, যতো জ্যৌতিষিকা নিমেষাদিপ্রবিভাগেন শঙ্কুচ্ছাযামাগমোক্তামর্কগত্যাপি প্রমাণযন্তি; সা পুনঃ সর্বজনপ্রসিদ্ধেতি ন নির্দিষ্টা| কলাদশভাগশ্চেতি কলাযা দশমো ভাগস্ত্রিস্রঃকাষ্ঠাঃ| ‘ত্রিংশত্কলো মুহূর্ত’ ইতি পাঠো নিবন্ধৈর্বিস্তরেণ দূষিতঃ| ‘শুক্লঃ কৃষ্ণশ্চ’ ইতি পক্ষক্রমোঽমাবাস্যাবধিং মাসং জ্ঞাপযতি; অন্যে তু ‘কৃষ্ণঃ শুক্লশ্চ’ ইতি পঠন্তি||৫||

Adhikarana 5 (6) · Śloka 6

তত্র মাঘাদযো দ্বাদশ মাসাঃ, দ্বিমাসিকমৃতুং কৃত্বা ষডৃতবো ভবন্তি; তে শিশিরবসন্তগ্রীষ্মবর্ষাশরদ্ধেমন্তাঃ | তেষাং তপস্তপস্যৌ শিশিরঃ, মধুমাধবৌ বসন্তঃ, শুচিশুক্রৌ গ্রীষ্মঃ, নভোনভস্যৌ বর্ষাঃ, ইষোর্জৌ শরত্, সহঃসহস্যৌ হেমন্ত ইতি ||৬||

তত্র মাঘাদয ইত্যাদি| তত্র তেষামৃতূনাং মধ্যে| তপাঃ মাঘঃ, তপস্যঃ ফাল্গুনঃ| মধুঃ চৈত্রঃ, মাধবঃ বৈশাখঃ| শুচিঃ জ্যেষ্ঠঃ, শুক্রঃ আষাঢঃ; অন্যে তু শুক্রো জ্যেষ্ঠঃ, শুচিরাষাঢ ইতি মন্যন্তে| নভাঃ শ্রাবণঃ, নভস্যঃ ভাদ্রপদঃ| ইষঃ আশ্বিনঃ, ঊর্জঃ কার্তিকঃ| সহাঃ মার্গশীর্ষঃ, সহস্যঃ পৌষঃ| শিশিরাদিরযমৃতুবিভাগো রসবলমধিকৃত্যোক্তঃ| চরকেঽপি তস্যাশিতীযে (চ. সূ. অ. ৬) রসবলনিষ্পত্ত্যর্থং শিশিরাদিবিভাগো দর্শিতঃ| অন্যে ত্বন্যথা ব্যাখ্যানযন্তি- তত্রেতি গঙ্গাযা উত্তরে দেশে শিশিরাদ্যৃতুবিভাগো বোদ্ধব্যঃ ইতি; অযমর্থো গযদাসাচার্যেণ বহুধা দূষিতঃ||৬||

Adhikarana 6 (7) · Śloka 7

ত এতে শীতোষ্ণবর্ষলক্ষণাশ্চন্দ্রাদিত্যযোঃ কালবিভাগকরত্বাদযনে দ্বে ভবতো দক্ষিণমুত্তরং চ | তযোর্দক্ষিণং বর্ষাশরদ্ধেমন্তাঃ; তেষু ভগবানাপ্যাযতে সোমঃ, অম্ললবণমধুরাশ্চ রসা বলবন্তো ভবন্তি, উত্তরোত্তরং চ সর্বপ্রাণিনাং বলমভিবর্ধতে | উত্তরং চ শিশিরবসন্তগ্রীষ্মাঃ, তেষু ভগবানাপ্যাযতেঽর্কঃ, তিক্তকষাযকটুকাশ্চ রসা বলবন্তো ভবন্তি, উত্তরোত্তরং চ সর্বপ্রাণিনাং বলমুপহীযতে ||৭||

ত এতে শীতোষ্ণবর্ষেত্যাদি| ত এতে ষডৃতবঃ, শীতোষ্ণবর্ষলক্ষণৈর্লক্ষিতাঃ| অত্র শীতং বাতকৃতম্, ঔষ্ণ্যমাদিত্যকৃতং, বর্ষশ্চন্দ্রকৃতঃ; শীতবর্ষৌ চন্দ্রকৃতাবিত্যন্যে| এতৈশ্চ ষডৃতুভির্দ্বে অযনে ভবতঃ| কুত ইত্যাহ- চন্দ্রাদিত্যযোঃ কালবিভাগকরত্বাত্| কে তে দ্বে অযনে ইতি পৃষ্ট আহ- দক্ষিণমুত্তরং চ| অত্র দক্ষিণমযনং চন্দ্রকালং বিভাগযতি, উত্তরমযনমাদিত্যকালমিতি| তযোর্দক্ষিণমিত্যাদি|- তযোর্দক্ষিণোত্তরাযণযোর্মধ্যে বর্ষাশরদ্ধেমন্তা দক্ষিণাযনং; তেষু বর্ষাদিষূত্তরোত্তরং ভগবান্ সোম আপ্যাযতে অধিকবলো ভবতি, ন কেবলং সোম এব বলবান্ ভবতি রসাশ্চাম্লাদযো বর্ষাদিষু যথাসঙ্খ্যমুত্তরোত্তরং বলবন্তো ভবন্তি; উত্তরোত্তরং চেতি চকারো ব্যতিক্রমেণ সম্বন্ধনীযঃ, তেন সর্বপ্রাণিনাং চোত্তরোত্তরং বলমভিবর্ধতে ইত্যর্থঃ| উত্তরমিত্যাদি|- শিশিরবসন্তগ্রীষ্মা উত্তরাযণং, তেষু শিশিরাদিষূত্তরোত্তরং ভগবানর্ক আপ্যাযতে অধিকবলো ভবতি; তিক্তাদযো রসাশ্চ শিশিরাদিষু যথাসঙ্খ্যমুত্তরোত্তরং চ বলবন্তো ভবন্তি| বলমপহীযতে বলহানির্ভবতি| ‘তে শিশিরবসন্তগ্রীষ্মবর্ষাশরদ্ধেমন্তাঃ’ ইতি সূত্রে যদ্যপি প্রাগুত্তরাযণং পঠিতং, তথাঽপি ভাষ্যে যত্ প্রথমং দক্ষিণাযনস্য ব্যাখ্যানং তদুত্তরাযণতোঽপি দক্ষিণাযনস্য বৈশিষ্ট্যং প্রতিপাদযতি; কুতঃ? বিসর্গত্বাত্ প্রাণিনাং বলকরত্বাচ্চেতি||৭||

Adhikarana 7 (8) · Śloka 8

ভবতি চাত্র- শীতাংশুঃ ক্লেদযত্যুর্বীং বিবস্বান্ শোষযত্যপি | তাবুভাবপি সংশ্রিত্য বাযুঃ পালযতি প্রজাঃ ||৮||

অমুমেবার্থমুপসংহরন্নাহ- ভবতি চাত্রেত্যাদি| শীতাংশুঃ চন্দ্রঃ| ক্লেদযতি আর্দ্রীকরোতি| উর্বীং ভূমিম্| বিবস্বান্ আদিত্যঃ শোষযতি| তাবুভাবাপীতি তৌ চন্দ্রসূর্যৌ| সংশ্রিত্য আশ্রিত্য, বাযুঃ প্রজাঃ পালযতি রক্ষতি| চন্দ্রমাশ্রিত্যাপ্যাযনং জগতঃ করোতি, সূর্যমাশ্রিত্য শোষণং; ততো যথাকালং রসাভিনির্বৃত্তিঃ, তেন প্রজা বর্ধযতীতি পিণ্ডার্থঃ||৮||

Adhikarana 8 (9) · Śloka 9

অথ খল্বযনে দ্বে যুগপত্ সংবত্সরো ভবতি | তে তু পঞ্চ যুগমিতি সঞ্জ্ঞাং লভন্তে | স এষ নিমেষাদির্যুগপর্যন্তঃ কালশ্চক্রবত্ পরিবর্তমানঃ কালচক্রমিত্যুচ্যত ইত্যেকে ||৯||

পরিশিষ্টং পূর্বসূত্রাদ্ব্যখ্যাতুমাহ- অথ খল্বযনে ইত্যাদি| যুগপদেককালমযনদ্বযং সংবত্সরঃ, ন পৃথগ্ দক্ষিণাযনমুত্তরাযণং বা| ননু, ‘মাঘাদযো দ্বাদশমাসাঃ সংবত্সরঃ’ ইত্যুক্তম্, তত্ কিং পুনরভিধানেন? উচ্যতে, পূর্বোদিতে হি মাঘাদযো দ্বাদশমাসা ব্যস্তা অক্রমপঠিতাশ্চ সংবত্সর ইত্যাশঙ্কা স্যাত্, ‘অথখল্বযনে দ্বে’ ইত্যাদিনির্দেশে ক্রিযমাণে যেন ক্রমেণ ষডৃতুবিভাগেঽযনদ্বযমুক্তং তেনৈব চেদযনদ্বযং যুগপত্ স্যাত্তদা সংবত্সর ইতি ব্যস্তানামক্রমপঠিতানাং চ মাঘাদীনাং সংবত্সরত্বং নিরস্তমিতি| ইদানীং যুগপ্রবিভাগং দর্শযন্নাহ- তে ত্বিত্যাদি| তে পুনঃ পঞ্চ সংবত্সরাঃ যুগমিতি সঞ্জ্ঞাং প্রাপ্নুবন্তি| ইযং চ যুগস্য পারিভাষিকী সঞ্জ্ঞা, পরমার্থতস্তু কৃতাদযশ্চত্বারো যুগবিশেষাঃ| স এষ ইত্যাদি স এষঃ কালঃ||৯||

Adhikarana 9 (10) · Śloka 10

ইহ তু বর্ষাশরদ্ধেমন্তবসন্তগ্রীষ্মপ্রাবৃষঃ ষডৃতবো ভবন্তি, দোষোপচযপ্রকোপোপশমনিমিত্তং; তে তু ভাদ্রপদাদ্যেন দ্বিমাসিকেন ব্যাখ্যাতাঃ; তদ্যথা- ভাদ্রপদাশ্বযুজৌ বর্ষাঃ, কার্তিকমার্গশীর্ষৌ শরত্, পৌষমাঘৌ হেমন্তঃ, ফাল্গুনচৈত্রৌ বসন্তঃ, বৈশাখজ্যেষ্ঠৌ গ্রীষ্মঃ; আষাঢশ্রাবণৌ প্রাবৃডিতি ||১০||

সংশোধনাশ্রযং দর্শনং দর্শযন্নাহ- ইহেত্যাদি| ইহ অস্মিন্নধ্যাযে, তুশব্দঃ পুনরর্থঃ| অস্মিন্নধ্যাযে পুনঃ কিমর্থং বর্ষাদযঃ ঋতব ইত্যাহ- দোষোপচযাদ্যর্থম্| ননু, ইদং দর্শনং ব্যাধিহেতুবাতাদিসঞ্চযাদ্যর্থত্বাত্ প্রাক্ কর্তুং যুজ্যতে| নৈবং, তত্র বাতাদিহেতূনাং রসানাং নিষ্পত্তেস্তদেব দর্শনং প্রাক্ কৃতং, অথবা ‘হেমন্তে শিশিরে চৈব বসন্তে চাপি মোক্ষযেত্’- (সূ. অ. ৫) ইত্যাদিশ্লোকে শিশিরাদীনামাদৌ নির্দিষ্টত্বাত্| ননু, প্রাবৃড্বর্ষযোঃ কো ভেদঃ? উচ্যতে, প্রথমঃ প্রবৃষ্টেঃ কালঃ প্রাবৃড্, তস্যানুবন্ধো বর্ষাঃ| সঞ্চযাত্ প্রকোপো বলবান্, তস্য চিকিত্সিতং সংশোধনমিত্যত্র বর্ষাদযো ঋতব উক্তাঃ, তথা চরকেঽপি রোগভিষগ্জিতীযে বিমানে সংশোধনমধিকৃত্য বর্ষাদযোঽভিহিতাঃ| যদ্যপি দোষসঞ্চযাদিনিমিত্তং বর্ষাদযঃ কথিতাঃ, তথাঽপি সঞ্চযাদিষু সংশোধনং কার্যমিত্যস্য প্রাধান্যং; শিশিরাদযস্তু রসং বলং চাধিকৃত্যোক্তাঃ, বর্ষাদযস্তু সংশোধনমধিকৃত্য সঞ্চযাদ্যর্থমিতি তাত্পর্যার্থঃ| অন্যে ত্বন্যথা ব্যাখ্যানযন্তি- গঙ্গাযা দক্ষিণে দেশে বর্ষাদ্যৃতুবিভাগো জ্ঞাতব্য ইতি; অযমপি গযদাসাচার্যেণ দূষিতঃ||১০||

Adhikarana 10 (11) · Śloka 11

তত্র, বর্ষাস্বোষধযস্তরুণ্যোঽল্পবীর্যা আপশ্চাপ্রশান্তাঃ ক্ষিতিমলপ্রাযাঃ, তা উপযুজ্যমানা নভসি মেঘাবততে জলপ্রক্লিন্নাযাং ভূমৌ ক্লিন্নদেহানাং প্রাণিনাং শীতবাতবিষ্টম্ভিতাগ্নীনাং বিদহ্যন্তে, বিদাহাত্ পিত্তসঞ্চযমাপাদযন্তি; স সঞ্চযঃ শরদি প্রবিরলমেঘে বিযত্যুপশুষ্যতি পঙ্কেঽর্ককিরণপ্রবিলাযিতঃ পৈত্তিকান্ ব্যাধীঞ্জনযতি | তা এবৌষধযঃ কালপরিণামাত্ পরিণতবীর্যা বলবত্যো হেমন্তে ভবন্ত্যাপশ্চ প্রশান্তাঃ স্নিগ্ধা অত্যর্থং গুর্ব্যাশ্চ, তা উপযুজ্যমানা মন্দকিরণত্বাদ্ভানোঃ সতুষারপবনোপস্তম্ভিতদেহানাং দেহিনামবিদগ্ধাঃ স্নেহাচ্ছৈত্যাদ্গৌরবাদুপলেপাচ্চ শ্লেষ্মসঞ্চযমাপাদযন্তি; স সঞ্চযো বসন্তেঽর্করশ্মিপ্রবিলাযিত ঈষত্স্তব্ধদেহানাং দেহিনাং শ্লৈষ্মিকান্ ব্যাধীঞ্জনযতি | তা এবৌষধযো নিদাঘে নিঃসারা রূক্ষা অতিমাত্রং লঘ্ব্যো ভবন্ত্যাপশ্চ, তা উপযুজ্যমানাঃ সূর্যপ্রতাপোপশোষিতদেহানাং দেহিনাং রৌক্ষ্যাল্লঘুত্বাচ্চ বাযোঃ সঞ্চযমাপাদযন্তি; স সঞ্চযঃ প্রাবৃষি চাত্যর্থং জলোপক্লিন্নাযাং ভূমৌ ক্লিন্নদেহানাং দেহিনাং শীতবাতবর্ষেরিতো বাতিকান্ ব্যাধীঞ্জনযতি | এবমেষ দোষাণাং সঞ্চযপ্রকোপহেতুরুক্তঃ ||১১||

পিত্তাদীনাং সঞ্চযপ্রকোপৌ বর্ষাদিষু যথা সহেতুকৌ ভবতস্তথা নির্দিশন্নাহ- তত্র বর্ষাস্বিত্যাদি| তত্র তেষু ঋতুষু মধ্যে, ওষধযো গোধূমচণকশাল্যাদযঃ, তরুণ্যঃ অভিনবাঃ, অল্পবীর্যা অল্পশক্তযঃ, ‘ভবন্তি’ ইত্যধ্যাহারঃ; অন্যে তু বীর্যশব্দং শীতোষ্ণাখ্যবীর্যবাচিনং মন্যন্তে| ননু, বর্ষাসু গোধূমাদযঃ পুরাতনা এব ভবন্তি, কথমভিনবা ইত্যুচ্যন্তে? নৈষ দোষঃ, গোধূমচণকশাল্যাদযোঽন্তঃসূক্ষ্মজলপ্রবেশান্ম্রদিমানমুপগতাঃ কিঞ্চিত্তিরস্কৃতশক্তযঃ প্ররোহধর্মিণ্যঃ প্রোচ্ছূনতামুপগতা অনবা অপি তরুণ্য ইত্যুচ্যন্তে, শাকাদযস্তু নূতনা এব প্রযুজ্যন্তে| আপশ্চাপ্রশান্তা অপরিণতাঃ, নবত্বাত্; অপ্রসন্নাঃ কলুষা ইত্যন্যে; ক্ষিতিমলপ্রাযাঃ পৃথিব্যাস্তৃণপর্ণোত্করশবকোথাদিমলবহুলাঃ, অত্রাপি ‘ভবন্তি’ ইত্যধ্যাহারঃ| তা উপযুজ্যমানা ইত্যাদি| বিদহ্যন্তে অম্লপাকমুপযান্তি| কাস্তাঃ? পূর্বোক্তা ওষধয আপশ্চ| কিং ক্রিযমাণাঃ? উপযুজ্যমানাঃ| কেষামম্লপাকমুপযান্তি? দেহিনাং; কিংবিশিষ্টানাং? শীতবাতবিষ্টম্ভিতাগ্নীনাং; শীতেন কুপিতো বাতঃ শীতবাতঃ (শারীরঃ ), তেন মন্দবেগীকৃতাগ্নীনাং; ন পুনর্বাহ্যেন শীতবাতেন; যতস্তেন বহির্লোমকূপরোধেনোষ্মণোঽনির্গমাদন্তরগ্নের্বলমেধতে| পুনঃ কিম্ভূতানাং দেহিনাং? ক্লিন্নদেহানাং আর্দ্রীভূতশরীরাণাম্| কস্যাং সত্যাং? ভূমৌ| কিংবিশিষ্টাযাং? জলপ্রক্লিন্নাযাং; পানীযেন সুষ্ঠু স্তিমিতাযাম্| ক্ব সতি? নভসি, আকাশে| কিংবিশিষ্টে? মেঘাবততে, মেঘব্যাপ্তে| বিদাহাত্ অম্লপাকাত্| পিত্তসঞ্চযমিতি সংহতিরূপা বৃদ্ধিঃ সঞ্চযঃ; স্বস্থানবৃদ্ধিরিত্যন্যে| সঞ্চীযমানমপি পিত্তমৃতুশৈত্যাত্তস্মিন্ কালে ন কুপ্যতি| স সঞ্চয ইত্যাদি| স এব পিত্তস্য বর্ষাকালোপচিতঃ সঞ্চযঃ, শরদ্যল্পমেঘে আকাশে সূর্যরশ্মিভিঃ প্রবিলাযিতঃ সন্ পিত্তোদ্ভবান্ ব্যাধীনুত্পাদযতি| তা এবেত্যাদি তা এবৌষধযঃ পূর্বোক্তাঃ| কালপরিণামাত্ কালপরিপাকাত্| পরিণতবীর্যাঃ সঞ্জাতশক্তিকাঃ| বলবত্যো দেহোপচযহেতবঃ, অন্যথা পরিণতবীর্যবলবতোরেকার্থত্বাত্ পুনরুক্তিঃ স্যাত্| আপশ্চ প্রশান্তাঃ স্বচ্ছাঃ; ক্ষিতিমলাপগমাদিত্যন্যে| তা ইতি পূর্বোক্তা ওষধয আপশ্চ| উপযুজ্যমানাঃ খাদ্যমানাঃ পীযমানাশ্চ| সতুষারপবনোপস্তম্ভিতদেহানামিতি সতুষারপবনেন হিমার্দ্রবাতেনোপস্তম্ভিতান্যাপ্যাযিতানি দেহানি শরীরাণি যেষাং তে তথোক্তাঃ| তা ওষধয আপশ্চ কিংবিশিষ্টাঃ? অবিদগ্ধাঃ, মধুরপাকমুপগতাঃ| ঋত্বাদিস্বভাবাত্ কফস্য সঞ্চীযমানস্য হিমানীবশাত্তদানীং স্ত্যানতৈব ভবতি ন প্রকোপঃ| স সঞ্চয ইত্যাদি| অর্করশ্মিপ্রবিলাযিত ইতি স্ত্যানঘৃতবদ্বিলযনমাত্রং বসন্তে ভবতি, ন তূপশোষণাখ্যঃ প্রশমঃ, কস্মাত্? অর্কস্য নাতিতীক্ষ্ণত্বাচ্ছ্লেষ্মপ্রাচুর্যাচ্চ| শ্লৈষ্মিকান্ ব্যাধীন্ অন্নদ্বেষহৃদযোত্ক্লেদাদীন্| তা এবৌষধয ইত্যাদি| নিদাঘে গ্রীষ্মে| নিঃসারাঃ নির্গতসারাঃ , সারোঽত্র গৌরবম্| রূক্ষাঃ নিঃস্নেহাঃ| ন কেবলমোষধয এবংবিধা ভবন্তি আপশ্চ ভবন্তীত্যর্থঃ| তা উপযুজ্যমানা ইত্যাদি|- তা অনন্তরনির্দিষ্টা ঔষধযো রৌক্ষ্যলঘুত্বাভ্যাং হেতুভ্যাং সূর্যপ্রতাপোপশোষিতদেহানাং দেহিনাং নৄণাং বাতসঞ্চযমাপাদযন্তীতি পিণ্ডার্থঃ| যদ্যপি শীতস্য বাযোরুষ্ণে গ্রীষ্মে সঞ্চযো ন যুজ্যতে , তথাঽপি বাতগুণেষু সর্বেষু রৌক্ষ্যং প্রধানং, তেনৌষধীনামত্যর্থরৌক্ষ্যেণ রূক্ষস্য বাযোর্গ্রীষ্মে সঞ্চযঃ স্যাদিত্যদোষঃ | স সঞ্চযঃ প্রাবৃষীত্যাদি| স বাতসঞ্চযঃ শীতবাতবর্ষেরিতো বাতিকান্ ব্যাধীন্ কোষ্ঠতোদসঞ্চরণাদীন্ জনযতি| ক্ব কালে? প্রাবৃষি; কেষাং বাতিকান্ ব্যাধীন্ জনযতি? দেহিনাং; কিংবিশিষ্টানাং? ক্লিন্নদেহানাং; কস্যাং সত্যাং? ভূমাবত্যর্থং জলোপক্লিন্নাযাম্| এবমেষ ইত্যাদি| এবমনেন প্রকারেণ, এষ ইতি কালস্বভাবকৃতৌষধিতারুণ্যাদির্যাবচ্ছীতবাতবর্ষেরিতো বাতিকান্ ব্যাধীঞ্জনযতীতি দোষাণাং যৌ সঞ্চযপ্রকোপৌ তযোরযং হেতুরুক্তঃ| ননু, দোষোপচযপ্রকোপোপশমনিমিত্তমিতি ত্রযাণাং চযাদীনাং প্রতিজ্ঞাতত্বাত্ কথং সঞ্চযপ্রকোপৌ ব্যাখ্যাযোপসংহারঃ? নৈষ দোষঃ, প্রকোপে হি সংশোধনং কার্যং; তত্র যদি যথাপ্রতিজ্ঞং ত্রীন্ প্রশমসহিতান্ ব্যাখ্যাতি তদা প্রশমান্তরিতঃ প্রকোপোপক্রমবিধিঃ স্যাত্; তস্মাত্ সঞ্চযপ্রকোপাবেব তাবত্ পৃথগাখ্যাতি||১১||

Adhikarana 11 (12) · Śloka 12

তত্র বর্ষাহেমন্তগ্রীষ্মেষু সঞ্চিতানাং দোষাণাং শরদ্বসন্তপ্রাবৃট্সু চ প্রকুপিতানাং নির্হরণং কর্তব্যম্ ||১২||

প্রকোপে যথাবসরং সংশোধনবিধেরাসঞ্জনার্থং তমেব বিধিং বক্তুমাহ- তত্র বর্ষেত্যাদি| বর্ষাদিষু যে সঞ্চিতা দোষাস্ত এব যদা শরদাদিষু প্রকুপিতা ভবন্তি তদা নির্হরণং কর্তব্যম্| নির্হরণমাকর্ষণং বমনাদিনা| প্রকুপিতানামিতি প্রশব্দো বহুদোষাণামেব সংশোধনমিতি দর্শযতি; মধ্যদোষেষু পাচনাদি, অল্পদোষেষু পুনর্লঙ্ঘনপিপাসানিগ্রহাদি যথর্তুবিধিসমাচারশ্চেতি চকারো দর্শযতি| ননু, বর্ষাদিষু শরদাদিষু চযপ্রকোপযোরনন্তরমেবোক্তত্বাত্ কিমর্থমত্র বর্ষাহেমন্তগ্রীষ্মেষ্বিত্যাদিপাঠঃ? প্রকুপিতানাং নির্হরণং কর্তব্যমিত্যেব বক্তুং যুক্তম্| সত্যং, শরদাদিষ্বেব প্রকুপিতানাং নির্হরণং যথা স্যাদন্যত্র মাভূদিতি নিযমার্থং পুনঃ শরদাদিগ্রহণং; যদি পুনঃ শরদাদিগ্রহণং ন ক্রিযেত, তদা গ্রীষ্মাদিষু হেতুবাহুল্যাত্ প্রকুপিতেষু দোষেষু বমনাদযো বিধীযেরন্; ন চৈতদিষ্যতে, গ্রীষ্মাদিষু হি বমনাদযো বিধীযমানা ব্যাপদং মরণং বোত্পাদযন্তি| প্রাবৃট্সু চেতি চকারঃ সংশোধনসাধ্যেষ্বতিপাতিষু রোগেষু গ্রীষ্মাদিষ্বপি সংশোধনং কর্তব্যমিতি জ্ঞাপযতি| বর্ষাদিষু সঞ্চযস্য পূর্বমেবোক্তত্বাত্ পুনর্বর্ষাদিগ্রহণং যথাস্বমৃতুবিহিত আহারাচারাখ্যঃ স্বস্থবৃত্তোদিতো বিধিঃ কর্তব্য ইতি সূচযতি| শরদাদীনামৃতূনাং দ্বিতীযমাসে সংশোধনং কর্তব্যম্; তত্র পিত্তসংশোধনং মার্গশীর্ষে, কফনির্হরণং চৈত্রে, বাতস্য শ্রাবণে, এবং হি সাধারণঃ কালঃ, ত্রিমাসান্তরিতাশ্চ দোষা ভবন্তি| তথা চাহ- “গ্রীষ্মাদিসঞ্চিতান্ দোষান্ ত্রিমাসান্তরিতান্ হরেত্”- ইতি||১২||

Adhikarana 12 (13) · Śloka 13

তত্র পৈত্তিকানাং ব্যাধীনামুপশমো হেমন্তে, শ্লৈষ্মিকাণাং নিদাঘে, বাতিকানাং শরদি , স্বভাবত এব; ত এতে সঞ্চযপ্রকোপোপশমা ব্যাখ্যাতাঃ ||১৩||

উপশমং ব্যাখ্যাতুকাম আহ- তত্র পৈত্তিকানামিত্যাদি| স্বভাবতঃ স্বলক্ষণতঃ, স্বলক্ষণং পুনরেষাং শীতোষ্ণবর্ষাদি| ননু, যদি কালস্বভাবাদেব দোষাণামুপশমস্তর্হি শাস্ত্রবৈযর্থ্যং স্যাত্; ন চ বৈযর্থ্যং দৃশ্যতে, তদুক্তবিধানাদপ্যুপশমদর্শনাত্| সত্যমেতত্, দোষাণাং স্বভাববিনাশিত্বেঽপি চযাদিবিসদৃশসন্তানোত্পত্তৌ শাস্ত্রং হেতুতযা ব্যাপ্রিযমাণং নানর্থকং; বিনাশকারণাভাবেঽপি হি ঘটাদীনাং বিসদৃশকপাললক্ষণোত্পাদে মুদ্গরাদিহেত্বন্তরসাফল্যমস্তি||১৩||

Adhikarana 13 (14) · Śloka 14

তত্র, পূর্বাহ্ণে বসন্তস্য লিঙ্গং, মধ্যাহ্নে গ্রীষ্মস্য, অপরাহ্ণে প্রাবৃষঃ , প্রদোষে বার্ষিকং, শারদমর্ধরাত্রে, প্রত্যুষসি হৈমন্তমুপলক্ষযেত্; এবমহোরাত্রমপি বর্ষমিব শীতোষ্ণবর্ষলক্ষণং দোষোপচযপ্রকোপোপশমৈর্জানীযাত্ ||১৪||

সাংবত্সরিকং বিধিং দিনেঽপ্যতিদেষ্টুমাহ- তত্র পূর্বাহ্ণ ইত্যাদি| তত্রেতি অহোরাত্রে| শারদমর্ধরাত্র ইতি ভূগোলাধঃস্থিতসূর্যত্বাদর্ধরাত্রে শারদং লিঙ্গমাতপাভাবেঽপি গোলকগণিতবিদো জ্যোতির্বিদো মন্যন্তে; ভিষজস্তু কালস্বভাবাদাহারবশাচ্চেতি| অহোরাত্রমপি বর্ষমিবেত্যাদি|- শীতোষ্ণবর্ষৈর্যে দোষোপচযপ্রকোপোপশমাস্তৈরহোরাত্রমপি বর্ষমিব জানীযাদিতি সম্বন্ধঃ| এতেনাহোরাত্রিকে সঞ্চযাদাবনাগতাবাধোক্তদন্তধাবনাদিপ্রতীকারৈর্নির্হরণং কর্তব্যমিত্যুক্তম্| ননু, প্রতিদিনং দোষাণাং সঞ্চযপ্রকোপপ্রশমেষু সত্সু কথমার্তবাঃ সঞ্চযাদযো ভবন্তি, দিবসৈরেবর্তূনামারব্ধত্বাত্, আহ্নিকচযকোপযোঃ প্রত্যহমেব প্রতীতত্বাত্| সত্যম্, আহ্নিকৌ চযপ্রকোপাবহোরাত্রমাশ্রিত্য সোমসূর্যানিলানামুষ্ণাদিগুণমাত্রোত্পন্নত্বাদল্পকারণৌ, অল্পেনৈবানাগতাবাধবিধানেন শান্তিমুপযাতঃ; ঋতুভবৌ তু চযপ্রকোপৌ মার্গান্তরগতসোমসূর্যানিলকৃতৈর্দ্রব্যরসগুণবীর্যবিপাকপ্রভাবৈর্নিরন্তরোপচিতত্বাদহোরাত্রমাত্রাশ্রিতার্কাদিগুণাদত্যন্তভিন্নৈরারভ্যমাণৌ মহাকারণকৌ মহতৈব সংশোধনাদিবিধিনা শান্তিং গচ্ছতঃ||১৪||

Adhikarana 14 (15) · Śloka 15

তত্র, অব্যাপন্নেষু ঋতুষ্বব্যাপন্না ওষধযো ভবন্ত্যাপশ্চ; তা উপযুজ্যমানাঃ প্রাণাযুর্বলবীর্যৌজস্কর্যো ভবন্তি ||১৫||

সোঽযং দোষচযাদিরব্যাপন্নেষু ঋতুষু ভবতীতি দর্শযন্নাহ- তত্রাব্যাপন্নেষ্বিত্যাদি| প্রাণা অগ্নীষোমাদযঃ, আযুঃ শরীরেন্দ্রিযসত্ত্বাত্মমনসাং সংযোগঃ, বলমুত্সাহোপচযলক্ষণং, বীর্যং শক্তিঃ, ওজঃ হৃদযাশ্রিতং সপ্তধাতুস্নেহঃ||১৫||

Adhikarana 15 (16) · Śloka 16

তেষাং পুনর্ব্যাপদোঽদৃষ্টকারিতাঃ, শীতোষ্ণবাতবর্ষাণি খলু বিপরীতান্যোষধীর্ব্যাপাদযন্ত্যপশ্চ ||১৬||

কুতঃ পুনঃ ঋতূনাং ব্যাপদ ইত্যাহ- তেষাং পুনরিত্যাদি| তেষাং ঋতূনাম্| ব্যাপদঃ শীতোষ্ণবাতবর্ষাণামেব বৈপরীত্যম্| অদৃষ্টেন সর্বজনসামান্যেনাধর্মেণ, কারিতাঃ কর্তুং প্রযোজিতাঃ| শীতোষ্ণেত্যাদি| বিপরীতানি হীনমিথ্যাতিযুক্তানি| ওষধীরপশ্চ ব্যাপাদযন্তি বিরুদ্ধতাং প্রাপযন্তি| অন্যে তু শীতোষ্ণবাতবর্ষাণীত্যাদিপাঠমন্যথা কৃত্বাঽঽপাতনিকাপূর্বং পঠন্তি| তদ্যথা- অধর্মস্তাবদ্ ব্যাপদাং সম্ভবে প্রযোজকঃ কর্তা; কঃ পুনঃ স্বতন্ত্রঃ কর্তা? ইত্যাহ- শীতোষ্ণবর্ষাণাং বৈপরীত্যমোষধীর্ব্যাপাদযত্যপশ্চ||১৬||

Adhikarana 16 (17) · Śloka 17

তাসামুপযোগাদ্বিবিধরোগপ্রাদুর্ভাবো মরকো বা ভবেদিতি ||১৭||

ব্যাপন্নানামোষধীনামপাং চোপযোগাদ্দোষং বক্তুমাহ- তাসামুপযোগাদিত্যাদি||১৭||

Adhikarana 17 (18) · Śloka 18

তত্র, অব্যাপন্নানামোষধীনামপাং চোপযোগঃ ||১৮||

ঋতুব্যাপদাং চিকিত্সাসূত্রং দর্শযন্নাহ- তত্রাব্যাপন্নানামিত্যাদি| অব্যাপন্নশব্দ উভযত্র সম্বধ্যতে; তেন, অব্যাপন্নাঃ পুরাণা ওষধযঃ, আপশ্চাব্যাপন্নাঃ ক্বথিতাঃ| অন্যে তু ‘তত্রাব্যাপন্নানামোষধীনামপাং চোপযোগ’ ইত্যত্র ‘তত্র পুরাণাভিরোষধিভিরনুপহতবীর্যাভিঃ ক্রিযাঃ কার্যাঃ’ ইত্যাদিপাঠং পঠন্তি; স চাত্যর্থমপ্রসিদ্ধ ইতি ন লিখিতঃ||১৮||

Adhikarana 18 (19) · Śloka 19

কদাচিদব্যাপন্নেষ্বপি ঋতুষু কৃত্যাভিশাপরক্ষঃক্রোধাধর্মৈরুপধ্বস্যন্তে জনপদাঃ, বিষৌষধিপুষ্পগন্ধেন বা বাযুনোপনীতেনাক্রম্যতে যো দেশস্তত্র দোষপ্রকৃত্যবিশেষেণ কাসশ্বাসবমথুপ্রতিশ্যাযশিরোরুগ্জ্বরৈরুপতপ্যন্তে, গ্রহনক্ষত্রচরিতৈর্বা, গৃহদারশযনাসনযানবাহনমণিরত্নোপকরণগর্হিতলক্ষণনিমিত্তপ্রাদুর্ভাবৈর্বা ||১৯||

ঋতুব্যাপদ্ভ্যোঽন্যৈরপি হেতুভির্ব্যাধিসম্ভবং দর্শযন্নাহ- কদাচিদিত্যাদি| কদাচিন্ন সর্বকালম্| কৃত্যা কুপিতমন্ত্রিণোঽভিচারকর্মজনিতো রাক্ষসীবিশেষঃ, অন্যে তু সর্বরাষ্ট্রচ্ছেদ্যভিচারঃ, অভিচারস্ত্বেকপুরুষব্যাপাদক এব; অভিশাপো গুরুসিদ্ধাদীনামাক্রোশঃ; রক্ষাংসি হিংসাবিহারাণি হেতিপ্রহেতিকুলজাতানি, তেষাং ক্রধো রক্ষঃক্রোধঃ; অধর্মঃ কাযবাঙ্মনসাং দুশ্চরিতম্| উপধ্বস্যন্তে উপদূযন্তে| জনপদা লোকাঃ| বিষৌষধিপুষ্পগন্ধেনেত্যাদি | বিষাণামোষধীনাং চ যানি পুষ্পাণি তেষাং গন্ধেন| কিংবিশিষ্টেন? বাযুনোপনীতেন বাযুনা সমীপমানীতেন; তেন যে শ্বাসকাসাদযস্তৈরুপতপ্যন্তে জনপদাঃ| ওষধযঃ সুবিলিন্দবৃক্ষাদযঃ| অন্যে তু কাসশ্বাসেত্যাদিপাঠমন্যথা পঠন্তি- ‘কাসশ্বাসপ্রতিশ্যাযগন্ধাজ্ঞানভ্রমশিরোরুগ্জ্বরমসূরিকাদিভিরুপতপ্যন্তে’ ইতি, ব্যাখ্যানযন্তি চ- তত্র নাসারন্ধ্রানুগতেন বাযুনা কাসশ্বাসপ্রতিশ্যাযগন্ধাজ্ঞানভ্রমশিরোরুজঃ, ত্বগিন্দ্রিযগতেন জ্বরমসূরিকাদযঃ| গ্রহনক্ষত্রচরিতৈর্বেতি গ্রহাণাং শনৈশ্চরাদীনাং গর্হিতস্থানস্থিতানাং প্রচারো গ্রহচরিতং; নক্ষত্রাণি অশ্বিন্যাদীনি, তেষাং চরিতমুল্কাপাতাদিভির্জন্মনক্ষত্রাভিহননম্| গৃহদারেত্যাদি গৃহাদীনাং যানি গর্হিতানি নিন্দিতানি লক্ষণানি চিহ্নানি তন্নিমিত্তং প্রাদুর্ভাব উত্পত্তির্যেষাং ব্যাধীনাং তৈর্বা উপতপ্যন্তে জনপদাঃ, দারা ভার্যাঃ, শযনং খট্বা, আসনং পীঠং, যানং দোলারথাদি, বাহনং হস্ত্যশ্বাদি, মণিঃ স্ফটিকাদিঃ; গৃহাদযো মণিপর্যন্তাস্ত এব রত্নানীতি সমাসঃ, অন্যথা মণিরত্নযোরেকার্থত্বাত্ পুনরুক্ততা স্যাত্; অন্যে তু মণযঃ সর্পাদীনাং প্রশস্তাবযববিশেষাঃ, রত্নানি মাণিক্যাদীনি, উপকরণানি ঘটপিঠরশূর্পাদীনি; অথবা গৃহাদীন্যেবোপকরণানি| অন্যে তু গৃহদারেত্যাদিগদ্যে গৃহদারশব্দৌ নিমিত্তশব্দং চ পরিত্যজ্য ‘শযনাসনযানবাহনমণিরত্নোপকরণগর্হিতলক্ষণপ্রাদুর্ভাবৈর্বা’ ইতি পঠন্তি||১৯||

Adhikarana 19 (20) · Śloka 20

তত্র, স্থানপরিত্যাগশান্তিকর্মপ্রাযশ্চিত্তমঙ্গলজপহোমোপহারেজ্যাঞ্জলিনমস্কারতপোনিযম- দযাদানদীক্ষাভ্যুপগমদেবতাব্রাহ্মণগুরুপরৈর্ভবিতব্যম্, এবং সাধু ভবতি ||২০||

ইদানীমৃতুব্যাপদাদিকৃতানাং রোগাণাং সামান্যেন চিকিত্সাং দর্শযন্নাহ- তত্র স্থানেত্যাদি| ঋতুকোপস্যাধর্মকারিত্বাত্তত্র দৈবব্যপাশ্রযং ভেষজম্| শান্তিরিন্দ্রিযবিজযঃ, অথবা বেদোক্তমন্ত্রৈর্যজনাদিকং; প্রাযশ্চিত্তং প্রাক্তনকর্মোপশমার্থং স্মার্তবচনেন চান্দ্রাযণাদি, অথবা “প্রাযো নাম তপঃ প্রোক্তং চিত্তং নিশ্চয উচ্যতে| তপোনিশ্চিযসংযুক্তং প্রাযশ্চিত্তমিতি স্মৃতম্”- ইতি; মঙ্গলং প্রশস্তৌষধমণিধারণাদি; জপ ওঙ্কারপূর্বকমৃগ্যজুঃসামাবর্তনং; হোমো লক্ষকোটিপ্রযুতোপলক্ষিতঃ; উপহারঃ দেবাদিষু গবাশ্বপ্রভৃতীনামুপা(ন)যনম্, অন্যে উপহারো দেবতানাং সপশুর্বলিঃ; ইজ্যা যাগঃ; অঞ্জলিঃ ভক্ত্যা করসম্পুটবিধানং; নমস্কারো দেবদ্বিজগুরুভ্যঃ কাযবাঙ্মানসঃ প্রণামঃ; তপঃ তাপনালক্ষণমুপবাসাদি; নিযমঃ শাস্ত্রোদিতো বিধির্মৌনাদিঃ, দযা প্রাণিষু কৃপা; দানং যথাবিভবং বিত্তবিসর্গঃ; দীক্ষা গুরুতো মন্ত্রাদিগ্রহণং; অভ্যুপগমঃ গুরুবাক্যাদীনামঙ্গীকারঃ; পরশব্দঃ স্থানপরিত্যাগাদিভিঃ প্রত্যেকং সম্বধ্যতে| এবং সাধু ভবতি এবং কুশলং ভবতীত্যর্থঃ||২০||

Adhikarana 20 (21) · Śloka 21

অত ঊর্ধ্বমব্যাপন্নানামৃতূনাং লক্ষণান্যুপদেক্ষ্যামঃ ||২১||

অত ঊর্ধ্বমিত্যাদি| অব্যাপন্নাঃ প্রসন্নাঃ||২১||

Adhikarana 21 (22-23) · Śloka 23

বাযুর্বাত্যুত্তরঃ শীতো রজোধূমাকুলা দিশঃ | ছন্নস্তুষারৈঃ সবিতা হিমানদ্ধা জলাশযাঃ ||২২|| দর্পিতা ধ্বাঙ্ক্ষখঙ্গাহ্বমহিষোরভ্রকুঞ্জরাঃ | রোধ্রপ্রিযঙ্গুপুন্নাগাঃ পুষ্পিতা হিমসাহ্বযে ||২৩||

ঋতুপ্রকোপে হি পূর্বং শান্ত্যাদিকমুক্তম্, অধুনা প্রসন্নর্তুলক্ষণান্যাহ- বাযুর্বাত্যুত্তর ইত্যাদি| তত্র ষডৃতুষু মধ্যে, হেমন্তে উত্তরদিশো জাতত্বাদুত্তরো বাযুর্বাতি বহতি| রজঃ ধূলিঃ; আকুলা ব্যাপ্তাঃ| হিমানদ্ধা হিমসম্বদ্ধাঃ| দর্পিতা হর্ষিতাঃ| ধ্বাঙ্ক্ষঃ কাকঃ, খঙ্গঃ গণ্ডকঃ, উরভ্রো মেষঃ| পুন্নাগ ইতি নাগকেশরম্ | হিমসাহ্বযে হেমন্তে||২২-২৩||

Adhikarana 22 (24) · Śloka 24

শিশিরে শীতমধিকং বাতবৃষ্ট্যাকুলা দিশঃ | শেষং হেমন্তবত্ সর্বং বিজ্ঞেযং লক্ষণং বুধৈঃ ||২৪||

প্রসন্নশিশিরর্তুলক্ষণমাহ- শিশির ইত্যাদি| বাতবৃষ্ট্যেতি বাতেন মিশ্রিতা বৃষ্টির্বাতবৃষ্টিঃ||২৪||

Adhikarana 23 (25-28) · Śloka 28

সিদ্ধবিদ্যাধরবধূচরণালক্তকাঙ্কিতে | মলযে চন্দনলতাপরিষ্বঙ্গাধিবাসিতে ||২৫|| বাতি কামিজনানন্দজননোঽনঙ্গদীপনঃ | দম্পত্যোর্মানভিদুরো বসন্তে দক্ষিণোঽনিলঃ ||২৬|| দিশো বসন্তে বিমলাঃ কাননৈরুপশোভিতাঃ | কিংশুকাম্ভোজবকুলচূতাশোকাদিপুষ্পিতৈঃ ||২৭|| কোকিলাষট্পদগণৈরুপগীতা মনোহরাঃ | দক্ষিণানিলসংবীতাঃ সুমুখাঃ পল্লবোজ্জ্বলাঃ ||২৮||

অধুনা বসন্তলক্ষণমাহ- সিদ্ধেত্যাদি| বসন্তে দক্ষিণদিশো জাতত্বান্মলযপর্বতস্থিতচন্দনসুরভির্দক্ষিণো বাযুর্বাতি| অন্যদপি বসন্তলক্ষণমাহ- দিশো বসন্ত ইত্যাদি| বসন্তে দিশো বিমলা রজোধূমাদিবর্জিতত্বান্নির্মলা ভবন্তি| দিশ এব চ কিংশুকাদিবৃক্ষপুষ্পিতৈঃ কাননৈরুপশোভিতা ভূষিতা ভবন্তি| তা এব দিশঃ কোকিলাষট্পদগণৌরুপগীতা মধুরধ্বনিযুক্তা ভবন্তি| দক্ষিণানিলসংবীতা দক্ষিণবাতেনাবৃতা দিশ ইত্যর্থঃ| সুমুখাঃ শোভনাবকাশাঃ| পল্লবোজ্জবলাঃ পল্লবৈঃ কৃত্বা শৃঙ্গারিতাঃ||২৫-২৮||

Adhikarana 24 (29-30) · Śloka 30

গ্রীষ্মে তীক্ষ্ণাংশুরাদিত্যো মারুতো নৈরৃতোঽসুখঃ | ভূস্তপ্তা সরিতস্তন্ব্যো দিশঃ প্রজ্বলিতা ইব ||২৯|| ভ্রান্তচক্রাহ্বযুগলাঃ পযঃপানাকুলা মৃগাঃ | ধ্বস্তবীরুত্তৃণলতা বিপর্ণাঙ্কিতপাদপাঃ ||৩০||

অব্যাপন্নগ্রীষ্মর্তুলক্ষণমাহ- গ্রীষ্ম ইত্যাদি| অসুখ ইতি গ্রীষ্মে হি নৈরৃতো বাযুরসুখপ্রদো ভবতি| তন্ব্যঃ অল্পপ্রবাহাঃ| ভ্রান্তচক্রাহ্বযুগলা ইতি জলাশযান্বেষিতযা ভ্রান্তচক্রবাকযুগলা দিশো ভবন্তি| পযঃপানাকুলা ইতি উদকপানায ব্যগ্রা মৃগা ভবন্তি| ধ্বস্তবীরুত্তৃণলতা ইতি বীরুধঃ বিটপাঃ, তৃণানি প্রসিদ্ধানি, লতা বল্লী, এতে বীরুদাদযো ধ্বস্তা অধঃপতিতা ভবন্তি| বিপর্ণাঙ্কিতপাদপা ইতি বিপর্ণৈর্বিগলিতপত্রৈঃ, অঙ্কিতাশ্চিহ্নিতাঃ, পাদপা বৃক্ষা ভবন্তি||২৯-৩০||

Adhikarana 25 (31-32) · Śloka 32

প্রাবৃষ্যম্বরমানদ্ধং পশ্চিমানিলকর্ষিতৈঃ | অম্বুদৈর্বিদ্যুদুদ্দ্যোতপ্রস্রুতৈস্তুমুলস্বনৈঃ ||৩১|| কোমলশ্যামশষ্পাঢ্যা শক্রগোপোজ্জ্বলা মহী | কদম্বনীপকুটজসর্জকেতকভূষিতা ||৩২||

অব্যাপন্নপ্রাবৃডৃতুলক্ষণমাহ- প্রাবৃষীত্যাদি| পশ্চিমানিলকর্ষিতৈরম্বুদৈরম্বরমাকাশং প্রাবৃষি আনদ্ধমাচ্ছাদিতং ভবতি| কথম্ভূতৈরম্বুদৈরিত্যাহ- বিদ্যুদুদ্দ্যোতেত্যাদি|- বিদ্যুদুদ্দ্যোতেন সহ প্রস্রুতৈঃ ক্ষরিতৈঃ, তুমুলস্বনৈঃ প্রচণ্ডগর্জিতৈঃ| মহী চ প্রাবৃষি কথম্ভূতা ভবতীত্যাহ- কোমলেত্যাদি|- শষ্পং বালতৃণম্, আঢ্যা সমৃদ্ধা| শক্রগোপঃ ইন্দ্রবধূঃ, অন্যে জ্যোতিরিঙ্গণমাহুঃ| নীপো ধূলীকদম্বঃ||৩১-৩২||

Adhikarana 26 (33-34) · Śloka 34

তত্র বর্ষাসু নদ্যোঽম্ভশ্ছন্নোখাততটদ্রুমাঃ | বাপ্যঃ প্রোত্ফুল্লকুমুদনীলোত্পলবিরাজিতাঃ ||৩৩|| ভূরব্যক্তস্থলশ্বভ্রা বহুশস্যোপশোভিতা | নাতিগর্জত্স্রবন্মেঘনিরুদ্ধার্কগ্রহং নভঃ ||৩৪||

অব্যাপন্নবর্ষালক্ষণমাহ- তত্র বর্ষাস্বিত্যাদি|- বর্ষাসু অম্ভসা পানীযেন ছন্না উত্খাততটদ্রুমাশ্চ নদ্যো ভবন্তি| সোপানসহিতাঃ কূপবিশেষাঃ বাপ্যঃ| ভূরব্যক্তস্থলশ্বভ্রেতি ভূমিশ্চ অদৃশ্যস্থলগর্তা ভবতি| নাতিগর্জদিত্যাদি অতিগর্জিতবর্জিতং পর্জন্যো যোঽসৌ মেঘস্তেন নিরুদ্ধার্কগ্রহং নভো ভবতি||৩৩-৩৪||

Adhikarana 27 (35-36) · Śloka 36

বভ্রুরুষ্ণঃ শরদ্যর্কঃ শ্বেতাভ্রবিমলং নভঃ | তথা সরাংস্যম্বুরুহৈর্ভান্তি হংসাংসঘট্টিতৈঃ ||৩৫|| পঙ্কশুষ্কদ্রুমাকীর্ণা নিম্নোন্নতসমেষু ভূঃ | বাণসপ্তাহ্ববন্ধূককাশাসনবিরাজিতা ||৩৬||

শরল্লক্ষণমাহ- বভ্রুরিত্যাদি|- বভ্রুঃ কপিলপিঙ্গলঃ| শ্বেতাভ্রবিমলং নভ ইতি নভ আকাশং, শ্বেতাভ্রং বিমলং চ ভবতি| হংসাংসঘট্টিতৈরিতি হংসস্কন্ধচালিতৈঃ| পঙ্কশুষ্কদ্রুমাকীর্ণা নিম্নোন্নতসমেষু ভূরিতি নিম্নাদিষু প্রদেশেষু যথাসঙ্খ্যং পঙ্কাদিকীর্ণা ভবতি; দ্রুমাশ্চ বল্মীককারিণ্যঃ সূক্ষ্মাঃ পিপীলিকাঃ| বাণেত্যাদি বাণঃ সহচরঃ, সপ্তাহ্বঃ সপ্তপর্ণঃ, বন্ধূকঃ বন্ধুজীবকঃ, ‘বাদুলী’ ইতি লোকে| “মত্স্যাম্লভোজিনঃ প্রাচ্যা নিত্যং চানূপসেবিনঃ| শ্লীপদং গলগণ্ডাশ্চ প্রাযস্তেষু ভবন্তি হি|| নিম্নতোযগতান্ মত্স্যান্ ভক্ষযন্তি সমুদ্রজান্| প্রাযশঃ কুষ্ঠিনস্তেন মনুষ্যা দক্ষিণাপথে|| তৈলাম্লভোজিনো নিত্যং গোধূমবিদলাশিনঃ| ভূযিষ্ঠমর্শসাস্তেন খঞ্জাশ্চাবন্তিজা নরাঃ|| মাংসকামাঃ সুরাকামাঃ স্ত্রীকামাঃ সাহসে রতাঃ| মাগধাস্তেন ভূযিষ্ঠং দৃশ্যন্তে রাজযক্ষ্মিণঃ|| তীক্ষ্ণান্যন্নানি সেবন্তে বাহ্লীকাস্তু বিশেষতঃ| অভিষ্যন্দীনি মাংসানি তথা ধান্যোদকানি চ|| প্রকৃত্যা চাপ্যভিষ্যণ্ণাঃ সেবন্তে মানবাঃ সদা| তেন বাহ্লীকদেশেষু প্রাযো ব্যাধির্বলাসকঃ|| নানাদেশস্বভাবা যে নানাহারাস্তথৈব চ| নানাচারা নৈকসত্ত্বা ধর্মিণোঽধর্মিণস্তথা| তেষাং সাত্ম্যং চ সত্ত্বং চ ঋতুকালং চ লক্ষযেত্| ভৈষজ্যং তু ততঃ কুর্যাদ্দেহং বিজ্ঞায দেহিনাম্|| যস্য দেশস্য যত্সাত্ম্যং যচ্চাস্য চরিতং ভবেত্| তেন ভেষজসংযুক্তং ভৈষজ্যমুপকল্পযেত্|| আরোগ্যং তেন বর্ণৌজো বলং বীর্যং চ জাযতে| বর্জনাদৃতুসাত্ম্যানাং কৃশো নিত্যং সুদুর্বলঃ|| নিত্যং রোগাভিভূতশ্চ পুমান্ সাত্ম্যবিবর্জনাত্|| তস্মাত্ সাত্ম্যং নিষেবেত হ্যসাত্ম্যং পরিবর্জযেত্|| সাত্ম্যসেবী জিতক্রোধো নিত্যং চাপি জিতেন্দ্রিযঃ|| জীর্ণভোজী মিতস্বপ্নঃ সুখং জীবত্যনামযঃ|| ঋতবঃ প্রাগ্বিনির্দিষ্টা বলযোগস্বভাবতঃ| তেষু গর্ভা নিষিক্তাস্তু তথারূপাস্তথাযুষঃ| তান্ বিজ্ঞায ততো বুদ্ধ্যা প্রশস্তান্নিন্দিতানপি|| ততোঽস্যাহারসংযুক্তং ভেষজং চাবচারযেত্| ততোঽস্যারোগতা দেহে বলং বীর্যং চ বর্ধতে” ইতি||৩৫-৩৬||

Adhikarana 28 (37) · Śloka 37

স্বগুণৈরতিযুক্তেষু বিপরীতেষু বা পুনঃ | বিষমেষ্বপি বা দোষাঃ কুপ্যন্ত্যৃতুষু দেহিনাম্ ||৩৭||

ইদানীমধ্যাযপরিসমাপ্তৌ ব্যাপত্সঙ্গ্রহশ্লোকঃ- স্বগুণৈরিত্যাদি| স্বগুণৈরতিযুক্তেষ্বিতি স্বগুণা ঋতূনামনন্তরোক্তাঃ, তৈরতিযুক্তেষু অতিশযযুক্তেষু ঋতুষু, দোষা দেহিনাং কুপ্যন্তীতি সর্বত্র সম্বন্ধনীযম্; অথবা ঋতূনাং স্বগুণাঃ শীতোষ্ণবর্ষাণি, তৈরতিযুক্তেষু| বিপরীতেষ্বিতি মন্দশীতাদিযুক্তেষু, অন্যে তু শীতে উষ্ণম্, উষ্ণে শীতং, বর্ষাস্ববৃষ্টিরিতি ঋতুবৈপরীত্যমাহুঃ| বিষমেষ্বপীতি বৈষম্যং পুনঃ ঋতূনাং বর্ষালিঙ্গং শরদি, শরলিঙ্গং হেমন্তে, অন্যর্তুলিঙ্গমন্যস্মিন্; এবমনুলোমবিলোমাভ্যাং শেষমৃতুবৈষম্যমুদাহার্যম্; অন্যে তু, ঋতূনাং যথোক্তলিঙ্গানামেকস্মিন্নৃতৌ সর্বেষাং লিঙ্গানাং ভাবোঽভাবশ্চেতি বৈষম্যমাহুঃ| এতেন স্বগুণাতিযোগাদৃতূনাং ষড্ ব্যাপত্তযঃ, বিপরীতেষু ষড্, বিষমেষু চ ষডেব; ইতি ঋতূনামষ্টাদশ ব্যাপত্তয উক্তাঃ||৩৭||

Adhikarana 29 (38) · Śloka 38

হরেদ্বসন্তে শ্লেষ্মাণং পিত্তং শরদি নির্হরেত্ | বর্ষাসু শমযেদ্বাযুং প্রাগ্বিকারসমুচ্ছ্রযাত্ ||৩৮||

হরেদ্বসন্তে শ্লেষ্মাণমিত্যাদি সুগমম্||৩৮||

Adhikarana puShpikA · Śloka 6

ইতি সুশ্রুতসংহিতাযাং সূত্রস্থানে ঋতুচর্যা নাম ষষ্ঠোঽধ্যাযঃ ||৬||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে ঋতুচর্যাধ্যাযঃ ষষ্ঠঃ||৬||