44. virēcanadravyavikalpavijñānīyādhyāyaḥ

Adhikarana 1 (1-2) · Śloka 2

অথাতো বিরেচনদ্রব্যবিকল্পবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাতো বিরেচনদ্রব্যেত্যাদি| বিকল্পো ভেদঃ||১-২||

Adhikarana 2 (3-4) · Śloka 4

অরুণাভং ত্রিবৃন্মূলং শ্রেষ্ঠং মূলবিরেচনে | প্রধানং তিল্বকস্ত্বক্ষু ফলেষ্বপি হরীতকী ||৩|| তৈলেষ্বেরণ্ডজং তৈলং স্বরসে কারবেল্লিকা | সুধাপযঃ পযঃসূক্তমিতি প্রাধান্যসঙ্গ্রহঃ | তেষাং বিধানং বক্ষ্যামি যথাবদনুপূর্বশঃ ||৪||

অরুণাভমিত্যাদি| অরুণাভমীষল্লোহিতম্| ত্রিবৃত্ ‘নিশোথ’ ইতি লোকে| মূলবিরেচনে মূলবিরেচনানাং মধ্যে| তিল্বকঃ স্বল্পরোধ্রঃ| ত্বক্ক্ষ্বিতি ত্বগ্বিরেচনানাং মধ্যে তিল্বকত্বক্ প্রধানমিত্যর্থঃ| সুধা ‘সেহুণ্ড’ ইতি লোকে| পযঃসূক্তমিতি পযঃসু ক্ষীরবিরেচনানাং মধ্যে সুধাপযঃ প্রধানমুক্তমিতি সম্বন্ধঃ| ফলেষ্বপি হরীতকী অস্যাগ্রে ‘তৈলেষ্বেরণ্ডজং তৈলং স্বরসে কারবেল্লিকা’ ইতি জেজ্জটাচার্যঃ পঠতি, তন্নেচ্ছতি গযী| বিধানমিতি বিধানং প্রযোগকরণম্| এষাং ত্রিবৃদাদীনাম্| যথাবত্ সত্যম্| অনুপূর্বশঃ অনুক্রমেণেত্যর্থঃ||৩-৪||

Adhikarana 3 (5) · Śloka 5

বৈরেচনদ্রব্যরসানুপীতং মূলং মহত্ত্রৈবৃতমস্তদোষম্ | চূর্ণীকৃতং সৈন্ধবনাগরাঢ্যমম্লৈঃ পিবেন্মারুতরোগজুষ্টঃ ||৫||

বৈরেচনেত্যাদি| বৈরেচনদ্রব্যরসানুপীতং ত্রিবৃদাদিদ্রব্যরসানুভাবিতম্| অস্তদোষং কৃম্যাদিদোষরহিতম্| আঢ্যমধিকম্| অম্লৈঃ শুক্তসৌবীরতুষোদকধান্যাম্লমদ্যমস্তুভিঃ| ‘বৈরেচনস্বরসক্বাথপীতাং গাঢমূলাং ত্রিবৃতাং কালপুষ্টাম্| চূর্ণীকৃতাং নাগরসৈন্ধবাঢ্যাং পিবেদম্লৈরনিলব্যাধিজুষ্টঃ’ ইতি ক্বচিত্ পাঠঃ||৫||

Adhikarana 4 (6) · Śloka 6

ইক্ষোর্বিকারৈর্মধুরৈ রসৈস্তত্ পৈত্তে গদে ক্ষীরযুতং পিবেচ্চ |৬|

ইক্ষোরিত্যাদি| ইক্ষোর্বিকারৈঃ খণ্ডাদিভিঃ; ন পুনর্গুডেন, উষ্ণবীর্যত্বাত্তস্য; ন চ ফাণিতেন, ত্রিদোষকরত্বাত্তস্য; নাপীক্ষুরসেন, বিদাহিত্বাত্তস্যেতি| মধুরৈ রসৈঃ কাকোল্যাদিক্বাথৈঃ| তদিতি ত্রিবৃন্মূলম্| ‘স্বাদুক্বাথৈশ্চাপি নোষ্ণৈর্বিকারে পৈত্তে দ্রাক্ষাক্ষীরযুক্তাং পিবেদ্বা’ ইতি কেচিত্ পঠন্তি|৬|-

Adhikarana 5 (6) · Śloka 6

গুডূচ্যরিষ্টত্রিফলারসেন সব্যোষমূত্রং কফজে পিবেত্তত্ ||৬||

গুডূচীত্যাদি| অরিষ্টো নিম্বঃ| রসোঽত্র ক্বাথঃ| তত্ ত্রিবৃন্মূলম্| অন্যে তু ‘ক্ষৌদ্রারিষ্টত্রিফলাক্বাথযুক্তা মূত্রৈঃ পেযা কফজে ব্যোষগাঢা’ ইতি পঠন্তি| তত্র ত্রিবৃতেতি সম্বন্ধনীযম্| অন্যে তু দ্রাক্ষারসেনেত্যাদি পঠন্তি, তত্র পিত্তমপি দ্রষ্টব্যং; তেন পিত্তাধিকে শ্লেষ্মণি দ্রাক্ষারসেন, কফাধিকে মূত্রৈরিতি; অযং তু পাঠোঽভাবাত্ সমগ্রো ন লিখিতঃ||৬||

Adhikarana 6 (7-8) · Śloka 8

ত্রিবর্ণকত্র্যূষণযুক্তমেতদ্গুডেন লিহ্যাদনবেন চূর্ণম্ | প্রস্থে চ তন্মূলরসস্য দত্বা তন্মূলকল্কং কুডবপ্রমাণম্ ||৭|| কর্ষোন্মিতে সৈন্ধবনাগরে চ বিপাচ্য কল্কীকৃতমেতদদ্যাত্ | তত্কল্কভাগঃ সমহৌষধার্ধঃ সসৈন্ধবো মূত্রযুতশ্চ পেযঃ ||৮||

বাতশ্লেষ্মপ্রযোগমাহ- ত্রিবর্ণকেত্যাদি| ত্রিবর্ণং ত্রিজাতকম্| এতত্ ত্রিবৃন্মূলম্| তত্র ত্রিবর্ণত্রিকটুকগুডানামেকো ভাগঃ, অপরাস্তু ত্রিবৃতাযাঃ, তস্যাঃ প্রধানত্বাত্| বাতশ্লেষ্মবিষযমপরমপি প্রযোগমাহ- প্রস্থে চেত্যাদি| প্রস্থো দ্বাত্রিংশত্পলানি, দ্রবদ্রব্যত্বাত্| তন্মূলরসস্য ত্রিবৃন্মূলক্বাথস্য, তন্মূলং ত্রিবৃন্মূলম্| কুডবশ্চত্বারি পলানি| কর্ষোন্মিত ইতি প্রত্যেকং কর্ষপ্রমাণে| বিপাচ্য কল্কীকৃতমেতদিতি এতত্ সর্বং তাবত্ পক্তব্যং যাবত্ কল্কাবশেষং ভবতি| অদ্যাত্ ভক্ষযেত্| অন্যে ত্বেবং পঠন্তি- ‘ক্বাথপ্রস্থে কুডবং তস্য দদ্যাদ্যুক্ত্যা দদ্যান্নাগরং সৈন্ধবং চ| পচেত্ সর্বং যাবদেতদ্ঘনং স্যাল্লেহীভূতং তত্ প্রযোজ্যং ততস্তু” ইতি| অন্যে তু ‘কুডবং ঘৃতস্য দদ্যাত্’ ইতি পঠন্তি| তত্র কুডবোঽষ্টৌ পলানি, সৈন্ধবনাগরে চ প্রত্যেকং পলিকে| তন্মতে ঘৃতমেতদ্বিরেচনং, তচ্চ বাতপিত্তে, ‘বাতাধিককফে’ ইত্যন্যে| বাতশ্লেষ্মবিষযমেব যোগান্তরমাহ- তদিত্যাদি| তত্কল্কঃ ত্রিবৃত্কল্কঃ| সমহৌষধার্ধঃ শুণ্ঠ্যাঃ পলার্ধযুক্তঃ| সসৈন্ধব ইতি সৈন্ধবমপি ত্রিবৃদর্ধম্| অন্যে তু পঠন্তি- ‘ত্রিবৃত্কল্কো নাগরভাগযুক্তঃ সসৈন্ধবো মূত্রযুতঃ প্রদেযঃ’- ইতি||৭-৮||

Adhikarana 7 (9-11) · Śloka 11

সমাস্ত্রিবৃন্নাগরকাভযাঃ স্যুর্ভাগার্ধকং পূগফলং সুপক্বম্ | বিডঙ্গসারো মরিচং সদারু যোগঃ সসিন্ধূদ্ভবমূত্রযুক্তঃ ||৯|| (বিরেচনদ্রব্যভবং তু চূর্ণং রসেন তেষাং ভিষজা বিমৃদ্য | তন্মূলসিদ্ধেন চ সর্পিষাঽঽক্তং সেব্যং তদাজ্যে গুটিকীকৃতং চ ||১০|| গুডে চ পাকাভিমুখে নিধায চূর্ণীকৃতং সম্যগিদং বিপাচ্য | শীতং ত্রিজাতাক্তমথো বিমৃদ্য যোগানুরূপা গুটিকাঃ প্রযোজ্যাঃ) ||১১||

সর্ববিষযান্ যোগানাহ- সমা ইত্যাদি| ভাগার্ধকমিতি আদিদ্রব্যাপেক্ষযা পূগাদিকং প্রত্যেকমর্ধভাগিকং গ্রাহ্যম্| বিডঙ্গসারো বিডঙ্গবীজানি| সিন্ধূদ্ভবং সৈন্ধবং, তদপ্যর্ধভাগেন গ্রাহ্যম্| সসৈন্ধবমূত্রযুক্তো যোগঃ পেয ইতি সম্বন্ধঃ| ‘সমে ত্রিবৃন্নাগরকে’ ইতি কেচিত্ পঠন্তি| অত্র কেচিত্পঠন্তি- বিরেচনেত্যাদি| বিরেচনদ্রব্যভবং চূর্ণং যদৃচ্ছযা গ্রাহ্যম্| রসেন তেষাং বিমৃদ্যেতি তেষাং বিরেচনদ্রব্যাণাং রসেন ভাবনা কার্যেত্যর্থঃ, যাবতা চূর্ণমার্দ্রীভবতি তাবদ্রসো দেযঃ| ভিষজা বৈদ্যেন যোগানুরূপা বটকাঃ প্রযোজ্যা ইতি সম্বন্ধঃ| তন্মূলসিদ্ধেন চ সর্পিষাঽঽক্তমিতি বিরেচনদ্রব্যজটাপক্বেন ঘৃতেন পুনরপি ভাবনা কার্যেত্যর্থঃ; যাবতা স্নৈগ্ধ্যমুত্পদ্যতে তাবন্মাত্রং ঘৃতং দেযমিত্যর্থঃ| সেব্যং সেবনীযম্| তদাজ্যে তস্মিন্নেব ঘৃতে| গুটিকীকৃতং গুটিকারূপং কৃতম্| নিধায নিক্ষিপ্য| গুডোঽত্র দ্বিগুণো দেযঃ| ত্রিজাতকমত্র যাবতা সৌগন্ধ্যং ভবতি||৯-১১||

Adhikarana 8 (12-13) · Śloka 13

বৈরেকীযদ্রব্যচূর্ণস্য ভাগং সিদ্ধং সার্ধং ক্বাথভাগৈশ্চতুর্ভিঃ | আমৃদ্নীযাত্ সর্পিষা তচ্ছৃতেন তত্ক্বাথোষ্মস্বেদিতং সামিতং চ ||১২|| পাকপ্রাপ্তে ফাণিতে চূর্ণিতং তত্ ক্ষিপ্তং পক্বং চাবতার্য প্রযত্নাত্ | শীতীভূতা মোদকা হৃদ্যগন্ধাঃ কার্যাস্ত্বেতে ভক্ষ্যকল্পাঃ সমাসাত্ ||১৩||

মোদকভক্ষ্যান্নির্দিশন্নাহ- বৈরেকীযেত্যাদি| বৈরেকীযদ্রব্যাণাং ত্রিবৃচ্ছ্যামাদীনাং গ্রহণম্| ক্বাথভাগৈরিতি বিরেচনদ্রব্যক্বাথভাগৈশ্চতুর্ভির্মন্দেঽগ্নৌ ঘৃতেন বিরেচনদ্রব্যসিদ্ধেন, সামিতাভাগং গোধূমচূর্ণং তুল্যভাগং প্রক্ষিপ্য মর্দযিত্বা পিষ্টপাচনিকাযাং ধৃত্বা ঊষ্মণা স্বেদযিত্বাঽন্যস্মিন্ ফাণিতে পাকপ্রাপ্তে প্রক্ষিপ্য মোদকাঃ কার্যাঃ||১২-১৩||

Adhikarana 9 (14) · Śloka 14

রসেন তেষাং পরিভাব্য মুদ্গান্ যূষঃ সসিন্ধূদ্ভবসর্পিরিষ্টঃ | বৈরেচনেঽন্যৈরপি বৈদলৈঃ স্যাদেবং বিদধ্যাদ্বমনৌষধৈশ্চ ||১৪||

যূষকল্পং নির্দিশন্নাহ- রসেনেত্যাদি| তেষামিতি তেষাং বিরেচনদ্রব্যাণাম্| অন্যে ত্বেবং পঠন্তি- ‘মুদ্গানাং বা তদ্রসে ভাবিতানাং যূষঃ কল্প্যঃ সঘৃতঃ সৈন্ধবাঢ্যঃ’ ইতি| তদ্রসে প্রধানকল্পনযা ত্রিবৃতারসে| বৈরেচনে ইতি বিরেচনদ্রব্যভাবিতৈরন্যৈরপি বৈদলৈর্মসূরাদিভির্যূষঃ স্যাত্ ভবেদিত্যর্থঃ| এবমিত্যাদি| এষ এব বমনীযাদিযূষাণাং কর্মমার্গঃ||১৪||

Adhikarana 10 (15) · Śloka 15

ভিত্ত্বা দ্বিধেক্ষুং পরিলিপ্য কল্কৈস্ত্রিভণ্ডিজাতৈঃ প্রতিবধ্য রজ্জ্বা | পক্বং চ সম্যক্ পুটপাকযুক্ত্যা খাদেত্তু তং পিত্তগদী সুশীতম্ ||১৫||

পুটপাকক্রমবিরেচনং নির্দিশন্নাহ- ভিত্ত্বেত্যাদি| ভিত্ত্বা বিদার্য| ত্রিভণ্ডী শুক্লা ত্রিবৃত্| পুটপাকযুক্ত্যা পুটপাকক্রমেণ শালাক্যোক্তক্রিযাকল্পনির্দিষ্টপুটপাকবিধিনা; তেন কাশ্মর্যাদিপত্রাচ্ছাদনকুশপরিবেষ্টনং মৃদাবলেপনং নির্ধূমাঙ্গারান্তরুপস্বেদনাদি সর্বমতিদেশেন লভ্যতে| অন্যে ত্বেবং পঠন্তি- “ইক্ষু দ্বিধাং পাটযিত্বাঽবলিখ্য ত্রিবৃত্কল্কৈঃ প্রতিসন্ধায চাপি| পক্বং সম্যক্ পুটপাকক্রমেণ খাদেচ্ছীতং পিত্তরোগাভিভূতঃ” ইতি; ব্যাখ্যানযন্তি চ- ত্রিবৃত্কল্কৈরিতি বহুবচনাত্ত্রিবৃদাদিকল্কৈরিত্যাদিশব্দো লুপ্তনির্দিষ্টো দ্রষ্টব্যঃ, তেনান্যেষাং বৈরেচনিকানামযমেব পুটপাকবিধিরিতি দ্যোতযতি||১৫||

Adhikarana 11 (16-22) · Śloka 22

সিতাজগন্ধাত্বক্ক্ষীরীবিদারীত্রিবৃতঃ সমাঃ | লিহ্যান্মধুঘৃতাভ্যাং তু তৃড্দাহজ্বরশান্তযে ||১৬|| শর্করাক্ষৌদ্রসংযুক্তং ত্রিবৃচ্চূর্ণাবচূর্ণিতম্ | রেচনং সুকুমারাণাং ত্বক্পত্রমরিচাংশকম্ ||১৭|| পচেল্লেহং সিতাক্ষৌদ্রপলার্ধকুডবান্বিতম্ | ত্রিবৃচ্চূর্ণযুতং শীতং পিত্তঘ্নং তদ্বিরেচনম্ ||১৮|| ত্রিবৃচ্ছ্যামাক্ষারশুণ্ঠীপিপ্পলীর্মধুনাঽঽপ্নুযাত্ | সর্বশ্লেষ্মবিকারাণাং শ্রেষ্ঠমেতদ্বিরেচনম্ ||১৯|| বীজাঢ্যপথ্যাকাশ্মর্যধাত্রীদাডিমকোলজান্ | তৈলভৃষ্টান্ রসানম্লফলৈরাবাপ্য সাধযেত্ ||২০|| ঘনীভূতং ত্রিসৌগন্ধ্যত্রিবৃত্ক্ষৌদ্রসমন্বিতম্ | লেহ্যমেতত্কফপ্রাযৈঃ সুকুমারৈর্বিরেচনম্ ||২১|| নীলীতুল্যং ত্বগেলং চ তৈস্ত্রিবৃত্সসিতোপলা | চূর্ণং সন্তর্পণং ক্ষৌদ্রফলাম্লং সন্নিপাতনুত্ ||২২||

ইদানীং বৈরেচনলেহানাহ- সিতেত্যাদি| সিতা শর্করা; অজগন্ধা জবানিকা, ‘বোথ-ইকা’ ইত্যন্যে; ত্বক্ক্ষীরী বংশলোচনা; বিদারী বিডালী (বিরালী); ত্রিবৃত্ ‘নিশোত্র’ ইতি লোকে| শর্করেত্যাদি| মরিচাংশকমিতি অংশশ্চতুর্থো ভাগঃ| পচেদিত্যাদি| সিতা শর্করা তস্যাঃ পলং, ক্ষৌদ্রং মধু, তস্যার্ধকুডবশ্চত্বারি পলানি; ত্রিবৃত্ লেহস্য চতুর্থাংশেন| অত্র মধুনোঽগ্নিসংযোগো ন বিরুধ্যতে, অনবস্থানাত্ প্রযোগাভাবাচ্চ| ত্রিবৃদিত্যাদি| শ্যামা বৃদ্ধদারুকঃ, ক্ষারো যবক্ষারঃ, আপ্নুযাত্ লিহ্যাত্| বীজাঢ্যেত্যাদি বীজাঢ্যান্ সুপক্বান্ পথ্যাদীন্ সহৈব বীজৈঃ সাধযেত্; তান্ রসান্ পথ্যাধাত্রীদাডিমকোলজানেরণ্ডতৈলভৃষ্টান্, পুনরম্লফলৈর্বীজপূরাদিভিঃ সহ আবাপ্য প্রক্ষিপ্য সাধযেত্; পথ্যাদীনাং যদৃচ্ছযা মাত্রা, জলে তু ষোডশগুণে তেষাং ক্বাথঃ কর্তব্যঃ, এরণ্ডতৈলমাত্রা তু যাবতা তস্য ভর্জনং সম্ভবতি, অম্লফলং তু ক্বাথস্য চতুর্থাংশেন, ত্রিসৌগন্ধ্যমাত্রা তু যাবতা সৌগন্ধ্যং ভবতি, ত্রিবৃত্ ক্ষৌদ্রং তু প্রত্যেকং লেহস্য চতুর্থাংশেন| কফপ্রাযৈর্ভূযিষ্ঠকফৈঃ পুরুষৈঃ সেব্যম্| নীলীতুল্যমিতি নীলীফলতুল্যং ত্বগেলং, নীলী শ্রীফলিকা| তৈর্নীল্যাদিভিঃ সহ তুল্যা ত্রিবৃত্| সসিতোপলা শর্করাযুক্তা| সন্তর্পণং প্রীণনম্| কেচিত্ ‘সতর্পণম্’ ইতি পঠন্তি, ব্যাখ্যাযন্তি চ- তর্পণাঃ শক্তবঃ, তৈঃ সহ যুক্তম্| ক্ষৌদ্রফলাম্লং মধুবীজপূরাম্লরসেন সহ চূর্ণং দেযম্| সন্নিপাতনুত্ প্রশান্তে সন্নিপাতেঽনুবন্ধপরিরক্ষণার্থমিত্যর্থঃ||১৬-২২||

Adhikarana 12 (23) · Śloka 23

ত্রিবৃচ্ছ্যামাসিতাকৃষ্ণাত্রিফলামাক্ষিকৈঃ সমৈঃ | মোদকাঃ সন্নিপাতোর্ধ্বরক্তপিত্তজ্বরাপহাঃ ||২৩||

বৈরেচনিকমোদকমাহ- ত্রিবৃদিত্যাদি| শ্যামা বৃদ্ধদারুকঃ| ত্রিফলাযাঃ প্রত্যেকং ভাগাঃ সমাঃ| যদ্যপ্যত্র ভাগশ্রুতির্নাস্তি তথাঽপি সিতামাক্ষিকে পক্ত্বা গুটিকাঃ কার্যাঃ, সিতামাক্ষিকে সমস্তদ্রব্যেভ্যো দ্বিগুণে গ্রাহ্যে||২৩||

Adhikarana 13 (24-25) · Śloka 26

ত্রিবৃদ্ভাগাস্ত্রযঃ প্রোক্তাস্ত্রিফলা তত্সমা তথা | ক্ষারকৃষ্ণাবিডঙ্গানি সঞ্চূর্ণ্য মধুসর্পিষা ||২৪|| লিহ্যাদ্গুডেন গুটিকাঃ কৃত্বা বাঽপ্যথ ভক্ষযেত্ | কফবাতকৃতান্ গুল্মান্ প্লীহোদরহলীমকান্ ||২৫|| হন্ত্যন্যানপি চাপ্যেতন্নিরপাযং বিরেচনম্ |২৬|

লেহগুটিকযোঃ প্রযোগমাহ- ত্রিবৃদিত্যাদি| ত্রিফলাযা অপি ত্রযো ভাগাঃ, ক্ষারকৃষ্ণাবিডঙ্গানামপি ত্রযো ভাগা গ্রাহ্যাঃ| নিরপাযং ব্যাপদ্রহিতম্||২৪-২৫||-

Adhikarana 14 (26-27) · Śloka 27

চূর্ণং শ্যামা ত্রিবৃন্নীলী কট্বী মুস্তা দুরালভা ||২৬|| চব্যেন্দ্রবীজং ত্রিফলা সর্পির্মাংসরসাম্বুভিঃ | পীতং বিরেচনং তদ্ধি রূক্ষাণামপি শস্যতে ||২৭||

চূর্ণমাহ- চূর্ণমিত্যাদি| নীলী নীলিনী, শ্রীফলিকেতি লোকে| কট্বী কটুরোহিণী| রূক্ষাণাং সর্পিষা মাংসরসেন চ, স্নিগ্ধানাং পুনরপিশব্দসমুচ্চিতানামম্বুনা পানীযেন সহ যোগো দেযঃ||২৬-২৭||

Adhikarana 15 (28-30) · Śloka 30

বৈরেচনিকনিঃক্বাথভাগাঃ শীতাস্ত্রযো মতাঃ | দ্বৌ ফাণিতস্য তচ্চাপি পুনরগ্নাবধিশ্রযেত্ ||২৮|| তত্ সাধুসিদ্ধং বিজ্ঞায শীতং কৃত্বা নিধাপযেত্ | কলসে কৃতসংস্কারে বিভজ্যর্তূ হিমাহিমৌ ||২৯|| মাসাদূর্ধ্বং জাতরসং মধুগন্ধং বরাসবম্ | পিবেদসাবেব বিধিঃ ক্ষারমূত্রাসবেষ্বপি ||৩০||

বৈরেচনিকং গৌডমাসবং নির্দিশন্নাহ- বৈরেচনিকেত্যাদি| বৈরেচনিকং দ্রব্যং সেহুণ্ডবর্জিতং গ্রাহ্যম্, একৈব ত্রিবৃদিত্যেকে| শীতা ইত্যনেন বৈরেচনিকক্বাথে উষ্ণে ফাণিতং ন যোজযেদিত্যুক্তং ভবতি| দ্বৌ ফাণিতস্যেতি ফাণিতং কাকবী ; এতেন পঞ্চ ভাগাঃ ক্বথনীযা ইত্যর্থঃ| সাধুসিদ্ধমিতি অর্ধাবশিষ্টম্| পুনঃ শীতগ্রহণেনোষ্ণং ন সন্ধাতব্যমিত্যুক্তম্| ত্রিবৃদধিকারে বৈরেচনিকক্বাথভাগা ইতি সামান্যশব্দপ্রযোগাদপরবৈরেচনিকানামপ্যেবমেবাসব ইতি বোধযতি| নিধাপযেত্ ক্ব? ইত্যাহ- কলসে| কথম্ভূতে? কৃতসংস্কারে; অন্তঃক্ষালিতশুষ্কস্য মধুপিপ্পলীলেপোঽগুরুধূপনং চেতি সংস্কারঃ| বিভজ্যর্তূ হিমাহিমাবিতি হিমে মাসং ধান্যরাশৌ স্থাপ্যম্, অহিমে পুনরুষ্ণে পক্ষমিতি| জাতরসমুত্পন্নরসং বরাসবং পিবেদিতি সম্বন্ধঃ| জাতরসস্য লক্ষণমাহ- মধুগন্ধমিতি| অসাবেব বিধিঃ ক্ষারমূত্রাসবেষ্বিতি অযমেব বিধিশ্চিকিত্সিতাদৌ বক্ষ্যমাণক্ষারোদকাসবাদিষু গুডমধুযোনিষ্বন্যেষু চ হিমাহিমকালস্থাপনস্য পাকপ্রাপ্তিলক্ষণস্য চেতি||২৮-৩০||

Adhikarana 16 (31-34) · Śloka 34

বৈরেচনিকমূলানাং ক্বাথে মাষান্ সুভাবিতান্ | সুধৌতাংস্তত্কষাযেণ শালীনাং চাপি তণ্ডুলান্ ||৩১|| অবক্ষুদ্যৈকতঃ পিণ্ডান্ কৃত্বা শুষ্কান্ সুচূর্ণিতান্ | শালিতণ্ডুলচূর্ণং চ তত্কষাযোষ্মসাধিতম্ ||৩২|| তস্য পিষ্টস্য ভাগাংস্ত্রীন্ কিণ্বভাগবিমিশ্রিতান্ | মণ্ডোদকার্থে ক্বাথং চ দদ্যাত্তত্সর্বমেকতঃ ||৩৩|| নিদধ্যাত্কলসে তাং তু সুরাং জাতরসাং পিবেত্ | এষ এব সুরাকল্পো বমনেষ্বপি কীর্তিতঃ ||৩৪||

পৈষ্টীং সুরাং বৈরেচনীং দর্শযন্নাহ- বৈরেচনিকেত্যাদি| ত্রিবৃদাদিক্বাথেন মাষবিদলানি বিভাবযেদিত্যর্থঃ| তত্কষাযেণেত্যাদি তেনৈব বৈরেচনিকক্বাথেন| অবক্ষুদ্যৈকতঃ একীকৃত্য কুট্টযিত্বেত্যর্থঃ| পিণ্ডান্ কৃত্বেতি কিণ্বনিমিত্তং পিণ্ডং কৃত্বেত্যর্থঃ| তত্কষাযোষ্মসাধিতমিতি ত্রিবৃদাদিক্বাথোষ্মস্বেদিতম্| তস্য পিষ্টস্যেত্যাদি পিষ্টপাচনিকাযাং শীতলীকৃত্য তস্য পিষ্টস্য ভাগাংস্ত্রীন্ পূর্বকিণ্বভাগেনৈকেন মিশ্রিতান্ কৃত্বেত্যর্থঃ| ক্বাথং দদ্যাদিতি ত্রিবৃদাদেঃ| তস্য প্রমাণং তু আসুতীবলা এব জানন্তি| এতস্যৈব যোগস্যান্যত্রাপ্যতিদেশং নির্দিশন্নাহ- এষ এবেত্যাদি| এষ এব সর্বপিষ্টসুরাণাং বিধিঃ; তথা বামনীযেষু মদনফলাদিষ্বপীত্যর্থঃ||৩১-৩৪||

Adhikarana 17 (35-39) · Śloka 40

মূলানি ত্রিবৃদাদীনাং প্রথমস্য গণস্য চ | মহতঃ পঞ্চমূলস্য মূর্বাশার্ঙ্গষ্টযোরপি ||৩৫|| সুধাং হৈমবতীং চৈব ত্রিফলাতিবিষে বচাম্ | সংহৃত্যৈতানি ভাগৌ দ্বৌ কারযেদেকমেতযোঃ ||৩৬|| কুর্যান্নিঃক্বাথমেকস্মিন্নেকস্মিংশ্চূর্ণমেব তু | ক্ষুণ্ণাংস্তস্মিংস্তু নিঃক্বাথে ভাবযেদ্বহুশো যবান্ ||৩৭|| শুষ্কাণাং মৃদুভৃষ্টানাং তেষাং ভাগাস্ত্রযো মতাঃ | চতুর্থং ভাগমাবাপ্য চূর্ণানামত্র কীর্তিতম্ ||৩৮|| প্রক্ষিপ্য কলসে সম্যক্ ততস্তং তদনন্তরম্ | তেষামেব কষাযেণ শীতলেন সুযোজিতম্ ||৩৯|| পূর্ববত্ সন্নিদধ্যাত্তু জ্ঞেযং সৌবীরকং হি তত্ |৪০|

সৌবীরকবৈরেচনমম্লসন্ধানং নির্দিশন্নাহ- মূলানীত্যাদি| ত্রিবৃদাদীনাং সংশোধনসংশমনীযোক্তানাং গ্রহণম্| প্রথমো গণো বিদারিগন্ধাদিঃ| মূর্বা চোরস্নাযুঃ; শার্ঙ্গষ্টা বিটপকরঞ্জঃ, চিরপোটিকেত্যন্যে, অপরে তু কাকজঙ্ঘামাহুঃ| সুধা সেহুণ্ডঃ| হৈমবতী শ্বেতবচা| এতানি সর্বাণ্যপি ত্রিবৃদাদীনি সংহৃত্য একীকৃত্য দ্বৌ ভাগৌ কারযেত্| ততশ্চৈতযোর্দ্বযোর্ভাগযোর্মধ্য একস্মিন্ ভাগ একং নিঃক্বাথং কুর্যাত্, একস্মিংস্তুভাগে চূর্ণং কুর্যাত্| ক্ষুণ্ণান্ কুট্টিতান্| পূর্বোক্তে নিঃক্বাথে ভাবযেত্ সপ্তাহং যাবত্| তেষাং যবানাম্| অবাপ্য নিক্ষিপ্য| চূর্ণানাং পূর্বোক্তোর্বরিতত্রিবৃদাদিদ্রব্যৈকভাগচূর্ণানাম্| অত্র অস্মিঞ্ শাস্ত্রে| কীর্তিতং কথিতম্| সৌবীরকং হিতং জ্ঞেযমিতি সম্বন্ধঃ| ততস্তস্মাচ্চূর্ণভাগনিক্ষেপণাদনন্তরং কলসে প্রক্ষিপ্য, তত্ সৌবীরকং তদনন্তরং তেষামেব ত্রিবৃদাদীনামন্যতমস্য কষাযেণ ক্বাথেন শীতলেন সুযোজিতং পূর্ববত্ সন্নিদধ্যাদিতি সম্বন্ধঃ| সৌবীরকং সৌবীরকসঞ্জ্ঞম্||৩৫-৩৯||

Adhikarana 18 (40-44) · Śloka 45

পূর্বোক্তং বর্গমাহৃত্য দ্বিধা কৃত্বৈকমেতযোঃ ||৪০|| ভাগং সঙ্ক্ষুদ্য সংসৃজ্য যবৈঃ স্থাল্যামধিশ্রযেত্ | অজশৃঙ্গ্যাঃ কষাযেণ তমভ্যাসিচ্য সাধযেত্ ||৪১|| সুসিদ্ধাংশ্চাবতার্যৈতানৌষধিভ্যো বিবেচযেত্ | বিমৃদ্য সতুষান্ সম্যক্ ততস্তান্ পূর্ববন্মিতান্ ||৪২|| পূর্বোক্তৌষধভাগস্য চূর্ণং দত্ত্বা তু পূর্ববত্ | তেনৈব সহ যূষেণ কলসে পূর্ববত্ ক্ষিপেত্ ||৪৩|| জ্ঞাত্বা জাতরসং চাপি তত্তুষোদকমাদিশেত্ | তুষাম্বুসৌবীরকযোর্বিধিরেষ প্রকীর্তিতঃ ||৪৪|| ষড্রাত্রাত্ সপ্তরাত্রাদ্বা তে চ পেযে প্রকীর্তিতে |৪৫|

তুষোদককল্পং নির্দিশন্নাহ- পূর্বোক্তমিত্যাদি| ত্রিবৃদাদিমূলং বিদারিগন্ধাদিস্তথা মহত্ পঞ্চমূলং মূর্বা শার্ঙ্গষ্টা চেতি পূর্বোক্তো বর্গঃ| দ্বিধা কৃত্বা দ্বৌ ভাগৌ কৃত্বেত্যর্থঃ| এতযোর্ভাগযোর্মধ্যে একং ভাগং সঙ্ক্ষুদ্য কুট্টযিত্বা সতুষৈর্যবৈঃ সহ সংসৃজ্য সম্বদ্ধীকৃত্য, স্থাল্যামধিশ্রযেত্ নিক্ষিপেত্| যবানামেকো ভাগঃ| অজশৃঙ্গী কর্কটশৃঙ্গী, ‘বিষাণিকা’ ইত্যপরে| তং পূর্বোক্তং সযবং ভাগং, সাধযেত্ রন্ধযেত্| সুসিদ্ধান্ সুস্বিন্নান্, এতান্ যবান্, ঔষধেভ্যো বিবেচযেত্ পৃথক্ কুর্যাত্| তান্ যবান্| পূর্ববন্মিতান্ ভাগদ্বযপরিমিতান্, ‘পূর্বোক্তৌষধভাগস্যোদ্ধ(র্ব)রিতস্য’ ইতি শেষঃ| পূর্ববত্ চতুর্থভাগপ্রমাণমিত্যর্থঃ | তেনৈব সহ যূষেণেতি প্রোক্তস্বিন্নৌষধবর্গযবাজশৃঙ্গীকষাযেণোদ্ধৃতৌষধযবেন; স পুনরৌষধসংসর্গেণ ঘনত্বাদ্যূষ ইব জাতঃ| জাতরসং ব্যক্তাম্লম্| তযোঃ সৌবীরকতুষোদকযোর্ব্যক্তাম্লত্বে কালাবধিং দর্শযন্নাহ- ষড্রাত্রাত্ সপ্তরাত্রাদ্বা; ষড্রাত্রসপ্তরাত্রবিকল্পোঽপ্যুষ্ণশীতকালাপেক্ষঃ| তে চেতি সৌবীরকতুষোদকে||৪০-৪৪||-

Adhikarana 19 (45) · Śloka 45

বৈরেচনেষু সর্ব্যেষু ত্রিবৃন্মূলবিধিঃ স্মৃতঃ ||৪৫||

ত্রিবৃদ্বিধানং সপ্রপঞ্চমুদ্দিশ্য ত্রিবৃদ্বিধানপ্রকারাতিদেশেনাবশিষ্টবৈরেচনমূলানি নির্দেষ্টুমাহ- বৈরেচনেষ্বিত্যাদি| বৈরেচনেষু সর্বেষ্বিতি অবশিষ্টেষু শ্যামাদন্তীদ্রবন্তীসপ্তলাদিষু| ত্রিবৃন্মূলবিধিঃ স্মৃত ইতি যাদৃশস্ত্রিবৃন্মূলে বিধিরুক্তস্তাদৃশস্তেষ্বপি জ্ঞেয ইত্যর্থঃ| তদ্যথা- শ্যামামূলং শ্যামাস্বরসভাবিতং বা চূর্ণিতং সৈন্ধবনাগরযুক্তমম্লৈরনিলব্যাধৌ, মধুরক্বাথসহিতং শর্করাদিভিস্তুল্যভাগং গোক্ষীরযুক্তং পিত্তে, ইত্যাদির্যাবত্ সৌবীরকতুষোদকবিধিঃ; এবং প্রতিশেষবৈরেচনিকমেবেহোদাহার্যম্| বিষযোঽপি তেষাং বৈরেচনিকমূলকল্পানাং প্রতিত্রিবৃত্কল্পবিষয এবেতি||৪৫||

Adhikarana 20 (46) · Śloka 47

দন্তীদ্রবন্ত্যোর্মূলানি বিশেষান্মৃত্কুশান্তরে | পিপ্পলীক্ষৌদ্রযুক্তানি স্বিন্নান্যুদ্ধৃত্য শোষযেত্ ||৪৬|| ততস্ত্রিবৃদ্বিধানেন যোজযেচ্ছ্লেষ্মপিত্তযোঃ |৪৭|

সামান্যাতিদেশং নির্দিশ্য দন্তীদ্রবন্ত্যোর্বিশিষ্টং কল্পনমাহ- দন্তীত্যাদি| দন্তীদ্রবন্ত্যোর্মূলান্যুদ্ধৃত্য শোষযেদিতি সম্বন্ধঃ| কিংবিশিষ্টানি? স্বিন্নানি, কস্মাত্? বিশেষাদতিশযেন| ক্বেত্যাহ- মৃত্কুশান্তরে; মৃত্তিকাদর্ভমধ্যে পুটপাকবিধানেনেত্যর্থঃ| পিপ্পলীক্ষৌদ্রযুক্তানি স্বিন্নানীতি সম্বন্ধঃ| দন্তী প্রসিদ্ধা, দ্রবন্তী চীরিতপত্রা ‘সংবরী’ ইতি লোকে||৪৬||-

Adhikarana 21 (47-48) · Śloka 49

তযোঃ কল্ককষাযাভ্যাং চক্রতৈলং বিপাচযেত্ ||৪৭|| সর্পিশ্চ পক্বং বীসর্পকক্ষাদাহালজীর্জযেত্ | মেহগুল্মানিলশ্লেষ্মবিবন্ধাংস্তৈলমেব চ ||৪৮|| চতুঃস্নেহং শকৃচ্ছুক্রবাতসংরোধজা রুজঃ |৪৯|

তযোরিত্যাদি| তযোর্দন্তীদ্রবন্ত্যোঃ| কল্ককষাযমাত্রাযাং পরিভাষা স্মরণীযা; তামাশ্রিত্য কল্পনোচ্যতে- তৈলপলানি দ্বাত্রিংশত্, দন্তীদ্রবন্তীকল্কপলান্যষ্টৌ, দন্তীদ্রবন্তীক্বাথস্য পলানি শতমেকমষ্টাবিংশত্যধিকং, তাবত্ ক্বাথ্যং যাবত্তৈলপাকলক্ষণম্| দন্তীদ্রবন্তীক্বাথস্যাযং বিধিঃ- পানীযপলানি পঞ্চশতানি দ্বাদশাধিকানি, দন্তীদ্রবন্তীপলানি শতমেকং, ক্বাথশেষমেকশতমষ্টাবিংশত্যধিকম্; ইতি ক্বাথকল্পনা| অন্যত্রাপ্যনুক্ততৈলাদিমানে ইযমেব কল্পনা জ্ঞেযা| চক্রতৈলমিতি চক্রপীডিতং তিলতৈলং, হস্তাদিযন্ত্রপীডননিষেধার্থং; চক্রে হ্যভৃষ্টা এব তিলাদযঃ পীড্যন্তে, তে পুনর্গুণবত্তরা ভবন্তি; যন্ত্রেণ ভর্জনরূক্ষিতানাং তিলানাং স্নেহগুরুত্বাদযো গুণা হীযন্ত ইতি| সর্পিশ্চেতি তাভ্যাং দন্তীদ্রবন্তীমূলকল্ককষাযাভ্যাং প্রত্যেকং পক্বং সিদ্ধং সর্পির্বিসর্পাদীঞ্জযেত্| পুনর্দন্ত্যাঃ কল্কো দ্রবন্ত্যাস্তু কষায ইতি বোদ্ধব্যম্| তৈলমেব চেতি চক্রতৈলং পুগর্মেহগুল্মাদীঞ্জযেত্| চতুঃস্নেহমিতি ঘৃততৈলবসামজ্জানশ্চত্বারঃ স্নেহাঃ| শকৃত্ পুরীষম্| চতুঃস্নেহং দন্তীদ্রবন্তীমূলসাধিতং বাতসংরোধজা রুজো জযেদিতি সম্বন্ধঃ| অত্র দ্রবস্যানুক্তত্বাচ্চতুর্গুণং জলং দেযম্||৪৭-৪৮||-

Adhikarana 22 (49-51) · Śloka 51

দন্তীদ্রবন্তীমরিচকনকাহ্বযবাসকৈঃ ||৪৯|| বিশ্বভেষজমৃদ্বীকাচিত্রকৈর্মূত্রভাবিতম্ | সপ্তাহং সর্পিষা চূর্ণং যোজ্যমেতদ্বিরেচনম্ ||৫০|| জীর্ণে সন্তর্পণং ক্ষৌদ্রং পিত্তশ্লেষ্মরুজাপহম্ | অজীর্ণপার্শ্বরুক্পাণ্ডুপ্লীহোদরনিবর্হণম্ ||৫১||

দন্তীত্যাদি| দন্তী সম্বরী; কনকাহ্বযং কঙ্গুষ্ঠং, ‘নাগকেসরম্’ ইত্যন্যে; যবাসো দুরালভা; বিশ্বভেষজং শুণ্ঠী| সপ্তাহং মূত্রভাবিতমিতি সম্বন্ধঃ| সর্পিষেতি অস্য চূর্ণস্য ঘৃতেন বা লেহঃ কার্য ইত্যর্থঃ| অস্যৈব প্রযোগস্য যৌগিকমনুসঙ্গ্রহমাহ- জীর্ণে ইত্যাদি| জীর্ণে তস্মিন্নৌষধে, সন্তর্পণং ক্ষৌদ্রমিতি লাজশক্তুসহিতং মধু দেযম্||৪৯-৫১||

Adhikarana 23 (52-53) · Śloka 54

গুডস্যাষ্টপলে পথ্যা বিংশতিঃ স্যুঃ পলং পলম্ | দন্তীচিত্রকযোঃ কর্ষৌ পিপ্পলীত্রিবৃতোর্দশ ||৫২|| কৃত্বৈতান্মোদকানেকং দশমে দশমেঽহনি | ততঃ খাদেদুষ্ণতোযসেবী নির্যন্ত্রণাস্ত্বিমে ||৫৩|| দোষঘ্না গ্রহণীপাণ্ডুরোগার্শঃকুষ্ঠনাশনাঃ |৫৪|

মোদকস্য প্রযোগমাহ- গুডস্যেত্যাদি| অষ্টৌ পলানি গুডস্য, বিংশতির্হরীতকীফলানি, দন্তীমূলচূর্ণপলং, চিত্রকমূলচূর্ণপলং চ, পিপ্পলীকর্ষঃ, ত্রিবৃত্কর্ষশ্চ| অত্র তু সপ্তগুঞ্জাফলপরিমিতমাষকপ্রমাণেন পলাদিমানং গ্রাহ্যম্| দশ কৃত্বৈতান্মোদকানিত্যাদি দশ মোদকান্ কৃত্বা, একং মোদকং দশমে দশমেঽহনি খাদেদিতি সম্বন্ধঃ| নির্যন্ত্রণা বাতাতপাদিনিষেধরহিতাঃ| ইমে মোদকাঃ||৫২-৫৩||-

Adhikarana 24 (54-59) · Śloka 59

ব্যোষং ত্রিজাতকং মুস্তা বিডঙ্গামলকে তথা ||৫৪|| নবৈতানি সমাংশানি ত্রিবৃদষ্টগুণানি বৈ | শ্লক্ষ্ণচূর্ণীকৃতানীহ দন্তীভাগদ্বযং তথা ||৫৫|| (সর্বাণি চূর্ণিতানীহ গালিতানি বিমিশ্রযেত্ ) | ষড্ভিশ্চ শর্করাভাগৈরীষত্সৈন্ধবমাক্ষিকৈঃ ||৫৬|| পিণ্ডিতং ভক্ষযিত্বা তু ততঃ শীতাম্বু পাযযেত্ | বস্তিরুক্তৃড্জ্বরচ্ছর্দিশোষপাণ্ডুভ্রমাপহম্ ||৫৭|| নির্যন্ত্রণমিদং সর্ববিষঘ্নং তু বিরেচনম্ | ত্রিবৃদষ্টকসঞ্জ্ঞোঽযং প্রশস্তঃ পিত্তরোগিণাম্ ||৫৮|| ভক্ষ্যঃ ক্ষীরানুপানো বা পিত্তশ্লেষ্মাতুরৈর্নরৈঃ | ভক্ষ্যরূপসধর্মত্বাদাঢ্যেষ্বেব বিধীযতে ||৫৯||

ব্যোষাদিশীতবিরেচনং দর্শযন্নাহ- ব্যোষমিত্যাদি| ব্যোষাদীনি প্রসিদ্ধানি| ত্রিবৃদষ্টগুণানীতি ত্রিবৃদষ্টগুণা যেষু তানি তথা| ঈষত্সৈন্ধবমাক্ষিকৈরিতি ঈষচ্ছব্দশ্চতুর্থাংশবাচকঃ| ভক্ষ্যো ভক্ষণীযঃ| ভক্ষ্যরূপসধর্মত্বাত্ ভক্ষ্যরূপতুল্যাদিত্যর্থঃ‘বাতশ্লেষ্মাতুরৈর্নরৈঃ’ ইতি কেচিত্ পঠন্তি||৫৪-৫৯||

Adhikarana 25 (60-61) · Śloka 62

তিল্বকস্য ত্বচং বাহ্যামন্তর্বল্কবিবর্জিতাম্ | চূর্ণযিত্বা তু দ্বৌ ভাগৌ তত্কষাযেণ গালযেত্ ||৬০|| তৃতীযং ভাবিতং তেন ভাগং শুষ্কং তু ভাবিতম্ | দশমূলীকষাযেণ ত্রিবৃদ্বত্সম্প্রযোজযেত্ ||৬১|| বিধানং ত্বক্ষু নির্দিষ্টং ... |৬২|

ত্বক্প্রধানকস্য তিল্বকস্য প্রযোগং নির্দিদিক্ষুঃ প্রথমং তস্য সংস্কারমেব সর্বপ্রযোগবিষযমাহ- তিল্বকস্যেত্যাদি| অন্তর্বল্কবিবর্জিতামিতি অভ্যন্তরকঠিনত্বগ্বিবর্জিতাম্| ভাগাবিতি দ্বৌ ভাগাবিত্যর্থঃ| তত্কষাযেণ তিল্বককষাযেণ| গালযেত্ ক্ষারকল্পেন, গালনং পুনরিহৈকবিংশতিবারান্ পারম্পর্যাত্| তৃতীযং ভাবিতং তেন ভাগমিতি অপরং চূর্ণস্য স্থাপিতং তৃতীযং ভাগং তেনৈব তিল্বককষাযজলেন চূর্ণভাগদ্বযগালনলব্ধগুণাতিশযেন ভাবিতমিত্যর্থঃ| শুষ্কং তু ভাবিতং দশমূলকষাযেণেতি তৃতীযং ভাগং শুষ্কং পুনঃ সন্তং দশমূলীকষাযেণ ভাবিতং ত্রিবৃদ্বত্ সম্প্রযোজযেদিতি সম্বন্ধঃ||৬০-৬১||-

Adhikarana 26 (62-69) · Śloka 69

... ফলানামথ বক্ষ্যতে | হরীতক্যাঃ ফলং ত্বস্থিবিমুক্তং দোষবর্জিতম্ ||৬২|| যোজ্যং ত্রিবৃদ্বিধানেন সর্বব্যাধিনিবর্হণম্ | রসাযনং পরং মেধ্যং দুষ্টান্তর্ব্রণশোধনম্ ||৬৩|| হরীতকী বিডঙ্গানি সৈন্ধবং নাগরং ত্রিবৃত্ | মরিচানি চ তত্সর্বং গোমুত্রেণ বিরেচনম্ ||৬৪|| হরীতকী ভদ্রদারু কুষ্ঠং পূগফলং তথা | সৈন্ধবং শৃঙ্গবেরং চ গোমূত্রেণ বিরেচনম্ ||৬৫|| নীলিনীফলচূর্ণং তু নাগরাভযযোস্তথা | লিহ্যাদ্গুডেন সলিলং পশ্চাদুষ্ণং পিবেন্নরঃ ||৬৬|| পিপ্পল্যাদিকষাযেণ পিবেত্পিষ্টাং হরীতকীম্ | সৈন্ধবোপহিতাং সদ্য এষ যোগো বিরেচযেত্ ||৬৭|| হরীতকী ভক্ষ্যমাণা নাগরেণ গুডেন বা | সৈন্ধবোপহিতা বাঽপি সাতত্যেনাগ্নিদীপনী ||৬৮|| বাতানুলোমনী বৃষ্যা চেন্দ্রিযাণাং প্রসাদনী | সন্তর্পণকৃতান্ রোগান্ প্রাযো হন্তি হরীতকী ||৬৯||

ফলপ্রধানহরীতকীকল্পেনাশেষবৈরেচনিকফলকল্পং নির্দিশন্নাহ- হরীতক্যা ইত্যাদি| ব্যাধিশব্দোঽযং দোষেষু ব্যাধিষু চ বর্ততে| সর্বেষাং হরীতকীযোগানাং সামান্যং ফলং দর্শযন্নাহ- রসাযনমিত্যাদি| সুখোপযোজ্যান্ যোগান্ সর্বর্তুকান্ সার্বধাতুকাংশ্চাহ- হরীততকীত্যাদি| মাত্রাপ্রমাণং মধ্যেষু কোষ্ঠবযোবলেষু চূর্ণকর্ষঃ, উত্তমাধমযোর্বুদ্ধ্যা বিকল্পনীযঃ| নীলিনী শ্রীফলিকা| সাতত্যেন নিরন্তরোপযোগেন| সন্ন্তর্পণকৃতা রোগাস্তৃপ্ত্যাদযঃ, তানুষ্ণত্বাদ্দীপনত্বাচ্চ শমযতীতি| অত্র নাগরগুডসৈন্ধবাদীনাং ভিন্নকার্যাণাং দোষদেহধাতুবলকালবযোঽবস্থান্তরবিকারাপেক্ষযা ব্যবস্থিতবিকল্পঃ||৬২-৬৯||

Adhikarana 27 (70) · Śloka 71

শীতমামলকং রূক্ষং পিত্তমেদঃকফাপহম্ | বিভীতকমনুষ্ণং তু কফপিত্তনিবর্হণম্ ||৭০|| ত্রীণ্যপ্যম্লকষাযাণি সতিক্তমধুরাণি চ |৭১|

হরীতকীনির্দেশাদামলকবিভীতকযোরপি গুণনির্দেশমাহ- শীতমিত্যাদি| সতিক্তমধুরাণি চেতি প্রত্যেকং হরীতক্যাদীনামুক্তা শক্তির্গুণতঃ সংযোগতঃ প্রভাবতশ্চ||৭০||-

Adhikarana 28 (71) · Śloka 72

ত্রিফলা সর্বরোগঘ্নী ত্রিভাগঘৃতমূর্চ্ছিতা ||৭১|| বযসঃ স্থাপনং চাপি কুর্যাত্ সন্ততসেবিতা |৭২|

ইদানীং ত্রিফলাযাঃ প্রযোগমাহ- ত্রিফলেত্যাদি| রোগশব্দোঽত্র ত্রিদোষবচনো ব্যাধিবচনো বা| মূর্চ্ছিতা সংযুক্তা||৭১||-

Adhikarana 29 (72) · Śloka 73

হরীতকীবিধানেন ফলান্যেবং প্রযোজযেত্ ||৭২|| বিরেচনানি সর্বাণি... |৭৩|

হরীতকীত্যাদি||৭২||-

Adhikarana 30 (73-75) · Śloka 76

... বিশেষাচ্চতুরঙ্গুলাত্ | ফলং কালে সমুদ্ধৃত্য সিকতাযাং নিধাপযেত্ ||৭৩|| সপ্তাহমাতপে শুষ্কমতো মজ্জানমুদ্ধরেত্ | তৈলং গ্রাহ্যং জলে পক্ত্বা তিলবদ্বা প্রপীড্য চ ||৭৪|| তস্যোপযোগো বালানাং যাবদ্বর্ষাণি দ্বাদশ | লিহ্যাদেরণ্ডতৈলেন কুষ্ঠত্রিকটুকান্বিতম্ ||৭৫|| সুখোদকং চানুপিবেদেষ যোগো বিরেচযেত্ |৭৬|

চতুরঙ্গুলাত্ কিরমালকাত্, সমুদ্ধৃত্য ‘ফলম্’ ইতি শেষঃ| সিকতাযাং বালুকাযাং, নিধাপযেত্ নিক্ষিপেত্, সপ্তাহমিতি সম্বন্ধঃ| অতঃ অস্মাচ্চতুরঙ্গুলফলাত্| লিহ্যাদিত্যাদি| এষ যোগো বাতকফপ্রশমনঃ||৭৩-৭৫||-

Adhikarana 31 (76-77) · Śloka 78

এরণ্ডতৈলং ত্রিফলাক্বাথেন ত্রিগুণেন তু ||৭৬|| যুক্তং পীতং তথা ক্ষীররসাভ্যাং তু বিরেচযেত্ | বালবৃদ্ধক্ষতক্ষীণসুকুমারেষু যোজিতম্ ||৭৭|| ফলানাং বিধিরুদ্দিষ্টঃ .... |৭৮|

এরণ্ডতৈলমিত্যাদি| ত্রিগুণেন ত্রিফলাক্বাথেন যুক্তং তথা ক্ষীররসাভ্যাং যুক্তমিতি সম্বন্ধঃ| রসো মাংসরসঃ| বালাদিষু যোজিতমেরণ্ডতৈলং বিরেচযেদিতি সম্বন্ধঃ||৭৬-৭৭||-

Adhikarana 32 (78-79) · Śloka 80

... ক্ষীরাণাং শৃণু সুশ্রুত! | বিরেচনানাং তীক্ষ্ণানাং পযঃ সৌধং পরং মতম্ ||৭৮|| অজ্ঞপ্রযুক্তং তদ্ধন্তি বিষবত্ কর্মবিভ্রমাত্ | বিজানতা প্রযুক্তং তু মহান্তমপি সঞ্চযম্ ||৭৯|| ভিনত্ত্যাশ্বেব দোষাণাং রোগান্ হন্তি চ দুস্তরান্ |৮০|

ক্ষীরাণামিত্যাদি| সৌধং সেহুণ্ডভবম্| কর্মবিভ্রমাত্ কর্মাবিজ্ঞানাত্| দোষাণাং সঞ্চযমিতি সম্বন্ধঃ| আশ্বেব শীঘ্রমেব||৭৮-৭৯||-

Adhikarana 33 (80-83) · Śloka 84

মহত্যাঃ পঞ্চমূল্যাস্তু বৃহত্যোশ্চৈকশঃ পৃথক্ ||৮০|| কষাযৈঃ সমভাগং তু তদঙ্গারেষু শোষিতম্ | অম্লাদিভিঃ পূর্ববত্তু প্রযোজ্যং কোলসম্মিতম্ ||৮১|| মহাবৃক্ষপযঃ পীতৈর্যবাগূস্তণ্ডুলৈঃ কৃতা | পীতা বিরেচযত্যাশু গুডেনোত্কারিকা কৃতা ||৮২|| লেহো বা সাধিতঃ সম্যক্ স্নুহীক্ষীরপযোঘৃতৈঃ | ভাবিতাস্তু স্নুহীক্ষীরে পিপ্পল্যো লবণান্বিতাঃ ||৮৩|| চূর্ণং কাম্পিল্লকং বাঽপি তত্পীতং গুটিকীকৃতম্ |৮৪|

মহত্যা ইত্যাদি| মহতী পঞ্চমূলী বিল্বাদিকা| বৃহত্যোরিতি স্থূলবৃহতী লঘুবৃহতী চেতি দ্বে বৃহত্যৌ| একশ ইত্যাদি| একীকৃত্যাঙ্গারেষু বিশোষযেত্, ন জ্বলদগ্নৌ পাকখরতাভযাত্| তত্ সেহুণ্ডদুগ্ধং পৃথক্ কষাযৈঃ সমভাগং গ্রাহ্যম্| এতেন পঞ্চমূলীবৃহতীকষাযাণাং সপ্তভাগাঃ, অষ্টমস্তু সেহুণ্ডদুগ্ধস্য| অম্লাদিভিঃ কাঞ্জিকমস্তুসুরাদিভিঃ| পূর্ববত্ ত্রিবৃদ্বত্| কোলসম্মিতং কর্ষপ্রমাণম্| মহাবৃক্ষেত্যাদি| মহাবৃক্ষঃ সেহুণ্ডঃ| পীতৈর্ভাবিতৈঃ| গুডে চেত্যাদি| গুডে চ কৃতোত্কারিকা বিরেচযতীতি সম্বন্ধঃ| উত্কারিকা লপ্সিকা| তস্যাঃ কল্পনা- গোধূমান্ স্নুহীক্ষীরেণ ভাবযিত্বা, চূর্ণীকৃত্য, ঘৃতক্ষীরাদিভিঃ সংযাববদুত্কারিকা পচনীযা গুডেন| লেহ ইত্যাদি| লেহস্য কল্পনা কথ্যতে- স্নুহীক্ষীরভাবিতস্য গোধূমচূর্ণস্য লেহঃ সাধ্যঃ| অন্যে তু ‘স্নুহীক্ষীরসিতাঘৃতৈঃ’ ইতি পঠন্তি| তন্মতে পযোঽপ্যুত্কারিকাযামিবানুক্তমপি লেহে দেযম্| লেহো ‘বিরেচযতি’ ইত্যত্রাপ্যনুবর্ততে| ভাবিতা ইত্যাদি ‘বিরেচযন্তি’ ইত্যত্রাপ্যনুবর্ততে| চূর্ণমিত্যাদি| তত্পীতং স্নুহীক্ষীরভাবিতম্| অত্রাপি ‘বিরেচযতি’ ইত্যনুবর্ততে||৮০-৮৩||-

Adhikarana 34 (84-85) · Śloka 86

সপ্তলা শঙ্খিনী দন্তী ত্রিবৃদারগ্বধং গবাম্ ||৮৪|| মূত্রেণাপ্লাব্য সপ্তাহং স্নুহীক্ষীরে ততঃ পরম্ | কীর্ণং তেনৈব চূর্ণেন মাল্যং বসনমেব চ ||৮৫|| আঘ্রাযাবৃত্য বা সম্যঙ্মৃদুকোষ্ঠো বিরিচ্যতে |৮৬|

সপ্তলেত্যাদি| সপ্তলা সেহুণ্ডভেদঃ| শঙ্খিনী যবতিক্তা, তস্যাঃ ফলং মূলং চ বিরেচকম্, অন্যে ‘শঙ্খিনী যবতিক্তাভেদঃ’ ইত্যাহুঃ; অপরে তু শ্বেতবুধ্নামাহুঃ| দন্তী দন্তিনী| আরগ্বধঃ কিরমালকঃ| আপ্লাব্য ভাবযিত্বা| কীর্ণমবচূর্ণিতং, তেনৈব সপ্তলাদিচূর্ণেন, মাল্যং পুষ্পম্, আঘ্রায শিঙ্ঘিত্বা; তেনৈব বা চূর্ণেন কীর্ণং ভাবিতং বসনং বস্ত্রমাবৃত্য পরিধায; মৃদুকোষ্ঠো বিরিচ্যতে নান্য ইত্যর্থঃ||৮৪-৮৫||-

Adhikarana 35 (86-89) · Śloka 89

ক্ষীরত্বক্ফলমূলানাং বিধানৈঃ পরিকীর্তিতৈঃ | অবেক্ষ্য সম্যগ্রোগাদীন্ যথাবদুপযোজযেত্ ||৮৬|| ত্রিবৃচ্ছাণা মিতাস্তিস্রস্তিস্রশ্চ ত্রিফলাত্বচঃ | বিডঙ্গপিপ্পলীক্ষারশাণাস্তিস্রশ্চ চূর্ণিতাঃ ||৮৭|| লিহ্যাত্ সর্পির্মধুভ্যাং চ মোদকং বা গুডেন বা | ভক্ষযেন্নিষ্পরীহারমেতচ্ছ্রেষ্ঠং বিরেচনম্ ||৮৮|| গুল্মং প্লীহোদরং কাসং হলীমকমরোচকম্ | কফবাতকৃতাংশ্চান্যান্ ব্যাধীনেতদ্ব্যপোহতি ||৮৯||

ক্ষীরত্বগিত্যাদি| শাণঃ কর্ষচতুর্থো ভাগঃ||৮৬-৮৯||

Adhikarana 36 (90) · Śloka 90

ঘৃতেষু তৈলেষু পযঃসু চাপি মদ্যেষু মূত্রেষু তথা রসেষু | ভক্ষ্যান্নলেহ্যেষু চ তেষু তেষু বিরেচনান্যগ্রমতির্বিদধ্যাত্ ||৯০||

অনুক্তান্নপানেষু প্রযোগকল্পান্নির্দিশন্নাহ- ঘৃতেষ্বিত্যাদি| ভক্ষ্যং মোদকশষ্কুল্যাদি| অন্নং ভক্তাদি| অগ্র্যমতিঃ প্রধানবুদ্ধিঃ||৯০||

Adhikarana 37 (91) · Śloka 91

ক্ষীরং রসঃ কল্কমথো কষাযঃ শৃতশ্চ শীতশ্চ তথৈব চূর্ণম্ | কল্পাঃ ষডেতে খলু ভেষজানাং যথোত্তরং তে লঘবঃ প্রদিষ্টাঃ ||৯১||

ক্ষীরমিত্যাদি| “যন্ত্রাদিপীডিতদ্রব্যরসঃ স্বরস উচ্যতে| যঃ পিণ্ডশ্চার্দ্রপিষ্টানাং স কল্কঃ পরিকীর্তিতঃ|| বহ্নৌ তু ক্বথিতং দ্রব্যং শৃতমাহুশ্চিকিত্সকাঃ| উপোষিতং নিশাযাং তু তোযস্থং শীতমুচ্যতে|| চূর্ণমুষ্ণেন সম্পৃক্তং তত্ ফাণ্টমভিধীযতে| অভিভূযাম্বুনোষ্ণেন ক্ষণাত্ পূতমিতীতরে” ইতি| ফাণ্টলক্ষণং তু প্রসঙ্গাদুক্তম্| কষাযো দ্বিবিধঃ- শৃতকষাযঃ, শীতকষাযশ্চ| তে তু ষট্কল্পা ভবন্তি| কল্পা বিধযঃ| অন্যে ত্বেবং পঠন্তি “চূর্ণং কষাযঃ শিশিরঃ শৃতশ্চ তথা চ কল্কঃ স্বরসস্তথৈব| পঞ্চৈব কল্পাঃ খলু ভেষজানাং যথোত্তরং তে গুরবঃ প্রদিষ্টাঃ” ইতি| তে তু স্বরস এব ক্ষীরমন্তর্ভাবযন্তি, ফাণ্টং শীতকষাযেঽন্তর্ভাবযন্তি||৯১||

Adhikarana puShpikA · Śloka 44

ইতি সুশ্রুতসংহিতাযাং সূত্রস্থানে বিরেচনদ্রব্যবিকল্পবিজ্ঞানীযো নাম চতুশ্চত্বারিংশোঽধ্যাযঃ ||৪৪||

ইতি শ্রীডল্হ(হ্ণ)ণবিরচিতাযাং নিবন্ধসঙ্গ্রহাখ্যাযাং সুশ্রুতটীকাযাং সূত্রস্থানে চতুশ্চত্বারিংশত্তমোঽধ্যাযঃ||৪৪||