57. arōcakapratiṣēdhādhyāyaḥ

Adhikarana 1 (1-2) · Śloka 2

অথাতোঽরোচকপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

বিসূচিকাপ্রতিষেধানন্তরং রসদোষজত্বসাম্যাদগ্নিমান্দ্যহেতুত্বসাম্যাচ্চারোচকপ্রতিষেধারম্ভঃ- অথাত ইত্যাদি| অত্র আদিশব্দো লুপ্তো দ্রষ্টব্যঃ; তেনাবিপাকস্যাপি গ্রহণম্||১-২||

Adhikarana 2 (3) · Śloka 3

দোষৈঃ পৃথক্ সহ চ চিত্তবিপর্যযাচ্চ ভক্তাযনেষু হৃদি চাবততে প্রগাঢম্ | নান্নে রুচির্ভবতি তং ভিষজো বিকারং ভক্তোপঘাতমিহ পঞ্চবিধং বদন্তি ||৩||

সম্প্রাপ্তিদ্বারেণ সঙ্খ্যামাহ- দোষৈরিত্যাদি| দোষৈঃ পৃথগিতি ত্রযঃ, সহ চেতি সমস্তৈঃ একঃ, চিত্তবিপর্যযাত্ কামশোকভযাদিভির্বিলুপ্তচিত্তত্বাত্, চিত্তবিপর্যযাত্তু একঃ; কেচিত্ ‘চিত্তবিপর্যযাত্' ইত্যত্র ‘শোকসমুচ্ছ্রযাত্’ ইতি পঠন্তি, তন্মতে কামাদিজানামসঙ্গ্রহঃ| ভক্তাযনেষু অন্নবহেষু স্রোতঃসু| ভক্তাযনমিতি জিহ্বোপলক্ষণং, সমানতন্ত্রদর্শনাত্| তথা চ- “পৃথগ্দোষৈঃ সমস্তৈশ্চ জিহ্বাহৃদযসংসৃতৈঃ| জাযতেঽরুচিরাহারে দ্বিষ্টৈরন্যৈশ্চ মানসৈঃ”- ইতি| অবততে ইতি ভক্তাযনেষ্বিত্যত্রাপি বচনবিপরিণামাত্ সম্বন্ধনীযম্| অবততে ব্যাপ্তে| ভক্তোপঘাতম্ অরোচকং; অরোচকাভক্তচ্ছন্দান্নদ্বেষাঃ পর্যাযা বোদ্ধব্যাঃ; কৈশ্চিদেষাং পরস্পরং ভেদোঽঙ্গীক্রিযতে| তথা চ বৃদ্ধভোজঃ- “প্রক্ষিপ্তং তু মুখে চান্নং জন্তোর্ন স্বদতে মুহুঃ| অরোচকঃ স বিজ্ঞেযো, ভক্তদ্বেষমতঃ শৃণু|| চিন্তযিত্বা তু মনসা দৃষ্ট্বা শ্রুত্বাঽপি ভোজনম্| দ্বেষমাযাতি যজ্জন্তুর্ভক্তদ্বেষঃ স উচ্যতে|| যস্য নান্নে ভবেচ্ছ্রদ্ধা সোঽভক্তচ্ছন্দ উচ্যতে”- ইত্যাদি| ইহ অস্মিন্ শাস্ত্রে| সঙ্খ্যেযনির্দেশাদেব সঙ্খ্যাযাং সিদ্ধাযাং পঞ্চবিধমিতি সঙ্খ্যাকরণং নিযমার্থং; তেন কামাদিজা অরোচকাঃ পৃথঙ্ন গণনীযাঃ||৩||

Adhikarana 3 (4) · Śloka 4

হৃচ্ছূলপীডনযুতং বিরসাননত্বং বাতাত্মকে ভবতি লিঙ্গমরোচকে তু |৪|

বাতিকারোচকলক্ষণমাহ- হৃচ্ছূলপীডনযুতমিত্যাদি| হৃচ্ছূলপীডনযুতমিতি বিরসাননত্বমিত্যেতস্য বিশেষণম্| অপরে তু হৃত্ হৃদযং শূলপীডনাভ্যাং যুক্তং ভবতীতি ব্যাখ্যানযন্তি| অরোচকানাং প্রাগ্রূপানভিধানং রূপাণামেবাব্যক্তানাং প্রাগ্রূপত্বাত্|৪|-

Adhikarana 4 (4) · Śloka 4

হৃদ্দাহচোষবহুতা মুখতিক্ততা চ মূর্চ্ছা সতৃড্ ভবতি পিত্তকৃতে তথৈব ||৪||

পিত্তজারোচকলক্ষণমাহ- হৃদ্দাহচোষেত্যাদি| হৃদ্দাহচোষবহুতেতি হৃদি হৃদযে দাহচোষযোর্বাহুল্যমিত্যর্থঃ| চোষ আচূষ্যত ইব বেদনা| অন্যে ‘হৃদ্দাহচোষবহুলং’ ইতি পঠিত্বা হৃদযং দাহচোষবহুলং ভবতীতি ব্যাখ্যানযন্তি||৪||

Adhikarana 5 (5) · Śloka 5

কণ্ডূগুরুত্বকফসংস্রবসাদতন্দ্রাঃ শ্লেষ্মাত্মকে মধুরমাস্যমরোচকে তু |৫|

কফজারোচকলক্ষণমাহ- কণ্ডূগুরুত্বেত্যাদি| কফসংস্রবঃ শ্লেষ্মস্রুতিঃ, সাদঃ অঙ্গগ্লানিঃ, আস্যং মুখম্| কেচিত্ ‘সাদতন্দ্রা’ ইত্যত্র ‘কণ্ঠসাদা’ ইতি পঠিত্বা অভ্যবহরণাদ্যশক্তিরিতি ব্যাখ্যানযন্তি|৫|-

Adhikarana 6 (5) · Śloka 5

সর্বাত্মকে পবনপিত্তকফা বহূনি রূপাণ্যথাস্য হৃদযে সমুদীরযন্তি ||৫||

সান্নিপাতিকারোচকলক্ষণমাহ- সর্বাত্মক ইত্যাদি| সর্বাত্মকে সান্নিপাতিকারোচকে পবনাদযো দোষা বহূনি রূপাণ্যস্য হৃদযে সমুদীরযন্তি কুর্বন্তীতি পিণ্ডার্থঃ| যদ্যপি সান্নিপাতিকে হৃদ্রোগে সর্বজারোচকে চ বাহুল্যেন সমান্যেব লিঙ্গানি ভবন্তি, তথাঽপি সম্প্রাপ্তিভেদাত্ কিঞ্চিল্লক্ষণভেদাচ্চ তযোর্ভেদঃ| সান্নিপাতিকারোচকোঽসাধ্যঃ, “সর্বাত্মকং চাপি বিবর্জযেত” ইতি সমানতন্ত্রোক্তত্বাত্||৫||

Adhikarana 7 (6) · Śloka 6

সংরাগশোকভযবিপ্লুতচেতসস্তু চিন্তাকৃতো ভবতি সোঽশুচিদর্শনাচ্চ |৬|

অবিশিষ্টং পচ্চমমরোচকমাহ- সংরাগশোকেত্যাদি| সংরাগঃ কামঃ| বিপ্লুতচেতসঃ বিকৃতচিত্তস্য| স অরোচকঃ| অশুচিদর্শনাত্ অমেধ্যবস্তুদর্শনাত্ বীভত্সাদিদর্শনাদিত্যর্থঃ| চিন্তাকৃতস্যারোচকস্য ভিন্নলক্ষণনির্দেশাত্ শেষেষু যথাদোষং লক্ষণানি জ্ঞাতব্যানি, কামাদিভিঃ সর্বৈর্বাতাদিপ্রকোপাত্| তথা চ “কামশোকভযাদ্বাযুঃ ক্রোধাত্ পিত্তং চ কুপ্যতি| শ্লেষ্মা তু হর্ষণাত্”- ইতি| অন্যে তু চিন্তাকৃতারোচকস্য বাতাদিভেদেন লক্ষণানি পঠন্তি; তদ্যথা- “বাতাত্মকে বিরসমাস্যমরোচকে তু, পিত্তেন তিক্তকটুকং, মধুরং কফেন| সর্বৈরুপেতমথ সর্বজমেব বিদ্যাদ্দৈন্যং ভৃশং ভবতি শোকসমুদ্ভবে তু”- ইতি| অন্যং পাঠো ন পঠনীযঃ, অনার্ষত্বাত্|৬|-

Adhikarana 8 (6) · Śloka 7

বাতে বচাম্বুবমনং কৃতবান্ পিবেচ্চ স্নেহৈঃ সুরাভিরথবোষ্ণজলেন চূর্ণম্ ||৬|| কৃষ্ণাবিডঙ্গযবভস্মহরেণুভার্গীরাস্নৈলহিঙ্গুলবণোত্তমনাগরাণাম্ |৭|

ইদানীং বাতিকারোচকচিকিত্সামাহ- বাত ইত্যাদি| বাতে বাতজে অরোচকে, কারণে কার্যোপচারাত্| বচাম্বুবমনং কৃতবানিতি বচাক্বাথেন কৃতবমনো নরঃ| কেচিত্ এলশব্দেন এলবালুকং মন্যন্তে, পদেঽপি পদৈকদেশপ্রবৃত্তেঃ| ‘এলজলেন’ ইত্যত্র ‘উষ্ণজলেন’ ইতি পাঠান্তরম্| লবণোত্তমং সৈন্ধবম্| ইদং চূর্ণং বমনৈঃ শুদ্ধাশযস্য দেযম্| কার্তিককুণ্ডোঽমুং পাঠমন্যথা পঠতি, স চাভাবান্ন লিখিতঃ||৬||-

Adhikarana 9 (7) · Śloka 7

পিত্তে গুডাম্বুমধুরৈর্বমনং প্রশস্তং স্নেহঃ সসৈন্ধবসিতামধুসর্পিরিষ্টঃ ||৭||

পিত্তজারোচকচিকিত্সামাহ- পিত্তে ইত্যাদি| পিত্তে পিত্তজারোচকে, উপচারাত্| মধুরং কাকোল্যাদি| অত্রাপি পূর্ববদবচারণম্||৭||

Adhikarana 10 (8) · Śloka 8

নিম্বাম্বুবামিতবতঃ কফজেঽনুপানং রাজদ্রুমাম্বু মধুনা তু সদীপ্যকং স্যাত্ |৮|

কফারোচকচিকিত্সামাহ- নিম্বাম্বুবামিতবত ইত্যাদি| নিম্বাম্বু নিম্বক্বাথঃ, নিম্বাম্বুনা বামিতবতঃ পুংসঃ গিরিমালকক্বাথঃ সমধুঃ সাজমোদশ্চানুপানং স্যাত্; ‘কৃতভোজনস্য’ ইতি শেষঃ; সমানতন্ত্রদর্শনাত্| কেচিদ্দীপ্যকশব্দেন যবানীমাহুঃ|৮|-

Adhikarana 11 (8) · Śloka 8

চূর্ণং যদুক্তমথবাঽনিলজে তদেব... |৮|

কফজারোচকেঽতিদেশেন চিকিত্সামাহ- চূর্ণমিত্যাদি| চূর্ণং যদুক্তমিতি ‘কৃষ্ণাবিডঙ্গযবভস্ম’ ইত্যাদিকম্| তচ্চূর্ণং কফজে বাতানুবন্ধে সতি দেযম্|৮|-

Adhikarana 12 (8) · Śloka 8

...সর্বৈশ্চ সর্বকৃতমেবমুপক্রমেত ||৮||

সান্নিপাতিকারোচকচিকিত্সামাহ- সর্বৈরিত্যাদি| সর্বৈরিতিবাতাদিজারোচকহরৈঃ পূর্বোক্তৈরেব| সর্বকৃতং সান্নিপাতিকমরোচকম্| এবমিতি পূর্ববত্, বমনাদি কারযিত্বেতি যাবত্| উপক্রমেত ‘প্রত্যাখ্যায’ ইতি শেষঃ, অসাধ্যত্বাত্তস্য||৮||

Adhikarana 13 (9-11) · Śloka 11

দ্রাক্ষাপটোলবিডবেত্রকরীরনিম্বমূর্বাভযাক্ষবদরামলকেন্দ্রবৃক্ষৈঃ | বীজৈঃ করঞ্জনৃপবৃক্ষভবৈশ্চ পিষ্টৈর্লেহং পচেত্ সুরভিমূত্রযুতং যথাবত্ ||৯|| মুস্তাং বচাং ত্রিকটুকং রজনীদ্বযং চ ভার্গীং চ কুষ্ঠমথ নির্দহনীং চ পিষ্ট্বা | মূত্রেঽবিজে দ্বিরদমূত্রযুতে পচেদ্বা পাঠাং তুগামতিবিষাং রজনীং চ মুখ্যাম্ ||১০|| মণ্ডূকিমর্কমমৃতাং চ সলাঙ্গলাখ্যাং মূত্রে পচেত্তু মহিষস্য বিধানবিদ্বা | এতান্ন সন্তি চতুরো লিহতস্তু লেহান্ গুল্মারুচিশ্বসনকণ্ঠহৃদামযাশ্চ ||১১||

ইদানীং চতুর্ণামপ্যরোচকানাং যথাসঙ্খ্যেন চতুরো লেহানাহ- দ্রাক্ষাপটোলেত্যাদি| দ্রাক্ষাদিঃ সুরভিমূত্রযুতং যথাবদিত্যন্ত একো লেহঃ| মুস্তাদিঃ মূত্রেঽবিজে ইতিপর্যন্তো দ্বিতীযঃ| দ্বিরদমূত্রাদী রজনীং চ মুখ্যামিত্যন্তঃ তৃতীযঃ| মণ্ডূকীত্যাদিঃ চতুর্থঃ| করীরো গূঢপত্রো মরুদেশেঽতিপ্রসিদ্ধঃ কণ্টকিবৃক্ষঃ; মূর্বা চোরস্নাযুঃ; অভযা হরীতকী, কেচিদভযং মন্যন্তে, তন্মতে উশীরং, অক্ষং বিভীতকং; ইন্দ্রবৃক্ষঃ কুটজঃ; নৃপবৃক্ষঃ গিরিমালকঃ| সুরভিমূত্রযুতং কল্কচতুর্গুণগোমূত্রযুতং, “মূত্রেণ চতুর্গুণেন” ইত্যাদিকাশ্যপীযসংবাদাত্| যথাবদিতি লেহং পচেদিত্যত্র যোজ্যং, তেন যথাবল্লেহং পচেত্ ; কোঽর্থঃ? যাবল্লেহপাকলক্ষণং তন্তুমুদ্রাদি জাযতে তাবত্ পচেদিত্যর্থঃ| নির্দহনী চিত্রকঃ, অজমোদা ইত্যন্যে| অবিজে মেষোত্থে| অসাবপি পূর্ববল্লেহবত্ পক্তব্যঃ| দ্বিরদমূত্রং হস্তিমূত্রম্| তুগা বংশরোচনানুকারি পার্থিবং দ্রব্যমাহুঃ| রজনীং চ মুখ্যাং পিণ্ডহরিদ্রাম্| অযমপি পূর্ববিধিনৈব পক্তব্যঃ| মণ্ডূকী ব্রাহ্মী, অমৃতা গুডূচী, লাঙ্গলী কলিকারিকা| অসাবপি পূর্ববত্ পক্তব্যঃ| “এতান্ন সন্তি চতুরোঽভ্যসতশ্চ” ইতি কেচিত্ পঠন্তি| “এতান্ বদন্তি ভিষজশ্চতুরশ্চ লেহান্ গুল্মারুচিশ্বসনকণ্ঠহৃদামযেষু” ইত্যপরে পঠন্তি||৯-১১||

Adhikarana 14 (12) · Śloka 12

সাত্ম্যান্ স্বদেশরচিতান্ বিবিধাংশ্চ ভক্ষ্যান্ পানানি মূলফলষাডবরাগযোগান্ | অদ্যাদ্রসাংশ্চ বিবিধান্ বিবিধৈঃ প্রকারৈর্ভুঞ্জীত চাপি লঘুরূক্ষমনঃসুখানি ||১২||

সাত্ম্যানিত্যাদি| সাত্ম্যান্ সুখকরান্| “সাত্ম্যান্ স্বদেশরচিতান্ বিবিধৈঃ প্রকারৈর্ভুঞ্জীত বাঽপি লঘুরূক্ষমনাঃ সুখেন” ইত্যন্যে পঠন্তি| স্বদেশরচিতান্ বিবিধাংশ্চ ভক্ষ্যানিতি যস্মিন্ দেশে যে ভক্ষ্যা বাহুল্যেনোপযুজ্যন্তে তানিত্যর্থঃ| পানানীত্যত্রাপি বিবিধানীতি যোজ্যং, তেন যথারুচি ফলানি শর্করান্বিতানি কর্পূরচতুর্জাতকসুগন্ধীনি গৃহ্যন্তে| মূলং পিপ্পলীমূলাদি| ফলং দাডিমাদি| ষাডবা রসালাদ্যাঃ| রাগাঃ কপিত্থরাগাদযঃ| কেচিত্ “সিতারুচকসিন্ধূত্থৈঃ সবৃক্ষাম্লপরূষকৈঃ| জম্বূফলরসৈর্যুক্তো রাগো রাজিকযা কৃতঃ|| মধুরাম্লকটূনাং তু সংস্কারাঃ ষাডবা মতাঃ” ইত্যাহুঃ; অপরে তু ষাডবশব্দেন যবানীষাডবমাহুঃ, তন্ত্রান্তরসংবাদাত্ ; রাগশব্দেন চ রাগষাডবং মত্বা দ্রাক্ষাদাডিমাদ্যন্বিতং মুদ্গযূষমিতি চ ব্যাখ্যানযন্তি| রসান্ বিবিধান্ মাংসরসান্ মধুরাদিরসান্ বা| লঘুরূক্ষভোজনং শ্লেষ্মস্থানগতত্বাদরোচকস্য| মনঃসুখং মনোনুকূলম্| কেচিত্ সাত্ম্যানিতি সাত্ম্যদেশরোগর্তুপ্রকৃত্যাদীন্যবেক্ষ্য ভক্ষ্যাদি কুর্যাদিতি মন্যন্তে||১২||

Adhikarana 15 (13) · Śloka 13

আস্থাপনং বিধিবদত্র বিরেচনং চ কুর্যান্মৃদূনি শিরসশ্চ বিরেচনানি |১৩|

নিষিদ্ধস্যাপি নিরূহস্যারোচকে প্রযোগমাহ- আস্থাপনমিত্যাদি| আস্থাপনং নিরূহঃ| বিধিবত্ যথাবিধি| অত্র অরোচকে| যদ্যপি ‘তত্রোন্মাদভযশোক’ ইত্যাদিনাঽরোচকে আস্থাপননিষেধঃ; তথাঽপি বমনাদিক্রমোত্তরকালং বাতানুবন্ধে সতি দেযং, ন ত্বাদৌ|১৩|-

Adhikarana 16 (13) · Śloka 14

ত্রীণ্যূষণানি রজনীত্রিফলাযুতানি চূর্ণীকৃতানি যবশূকবিমিশ্রিতানি ||১৩|| ক্ষৌদ্রাযুতানি বিতরেন্মুখবোধনার্থ ... |১৪|

ত্রীণ্যূষণানীত্যাদি| ত্রীণ্যূষণানীতি ত্রিকটুকম্| যবশূকোযবক্ষারঃ| বিতরেত্ দদ্যাত্| মুখবোধনার্থমিতি মুখবোধে সত্যরোচকহানিরিত্যর্থঃ| অবলেহপ্রযোগ এষঃ||১৩||-

Adhikarana 17 (14) · Śloka 15

... মন্যানি তিক্তকটুকানি চ ভেষজানি | মুস্তাদিরাজতরুবর্গদশাঙ্গসিদ্ধৈঃ ক্বাথৈর্জযেন্মধুযুতৈর্বিবিধৈশ্চ লেহৈঃ ||১৪|| মূত্রাসবৈর্গুডকৃতৈশ্চ তথা ত্বরিষ্টৈঃ ক্ষারাসবৈশ্চ মধুমাধবতুল্যগন্ধৈঃ |১৫|

অনুক্তসঙ্গ্রহার্থমাহ- অন্যানীত্যাদি| মুস্তাদিঃ মুস্তাকুষ্ঠহরিদ্রেত্যাদিঃ, রাজতরুবর্গঃ আরগ্বধমদনগোপঘোণ্টেত্যাদিঃ, দশাঙ্গং দশমূলম্| জযেত্ ‘অরোচকং’ ইতি শেষঃ| মধুযুতা লেহা মুস্তাদ্যাদিকৃতা এব গ্রাহ্যাঃ| কেচিত্ ‘বিবিধৈশ্চ যোগৈঃ’ ইতি পঠিত্বা বাতশ্লেষ্মহরৈরিতি ব্যাখ্যানযন্তি| মূত্রাসবৈরিত্যাদি মূত্রেণ আসূযন্ত ইতি মূত্রাসবাঃ| তৈশ্চ কিম্ভূতৈঃ? গুডকৃতৈঃ কুষ্ঠচিকিত্সিতোক্তবিধিনা গুডমধ্বাদিকৃতৈরিত্যর্থঃ| অরিষ্টৈঃ অভযারিষ্টাদিভিঃ| ক্ষারাসবৈরিতি মধ্বাদিভিঃ পলাশক্ষারপানীযেন সহ নিষ্পাদিতৈর্মহাকুষ্ঠাভিহিতৈঃ| মধুমাধবতুল্যগন্ধৈরিতি মধু ক্ষৌদ্রং, মাধবং মধুকৃতং মদ্যং, তযোস্তুল্যগন্ধৈরিত্যর্থঃ||১৪||-

Adhikarana 18 (15) · Śloka 15

স্যাদেষ এব কফবাতহতে বিধিশ্চ শান্তিং গতে হুতভুজি প্রশমায তস্য ||১৫||

পূর্বোক্তমেব বিধিমবিপাকেঽতিদিশন্নাহ- স্যাদেষ ইত্যাদি| এষ এব বিধিরনন্তরোক্ত এব| যদত্র কফবাতযোরুপাদানং ন পিত্তনিমিত্তস্য তত্ পিত্তাদবিপাকো ন ভবতীতি দর্শযতি| শান্তিং গতে হুতভুজি অবিপাকে ইত্যর্থঃ, কারণে কার্যোপচারাত্; উপচারেণ যদত্রাবিপাকগ্রহণং কৃতং, ন সাক্ষাত্তদপ্যগ্নিমান্দ্যমবিপাকস্য কারণমিতি সূচযতি| শান্তিং গতে মন্দতাং প্রাপ্তে, হুতভুজি জাঠরাগ্নৌ| তস্যেত্যত্র চকারো লুপ্তো দ্রষ্টব্যঃ, তেন তস্য চ প্রশমনায; কোঽর্থঃ? অরোচকস্যাপি | কার্তিক ঈদৃশং ব্যাখ্যানং ন মন্যতে, তস্যাবিপাকস্যৈব প্রশমাযেতি প্রতিপাদযতি| যে চাগ্নিমান্দ্য এবৈনং বিধিমিচ্ছন্তি ন ত্বরোচকাবিপাকে, তন্মতেঽস্মিন্নধ্যাযেঽবিপাকো ন বক্তব্যঃ||১৫||

Adhikarana 19 (16-17) · Śloka 17

ইচ্ছাভিঘাতভযশোকহতেঽন্তরগ্নৌ ভাবান্ ভবায বিতরেত্ খলু শক্যরূপান্ | অর্থেষু চাপ্যপচিতেষু পুনর্ভবায পৌরাণিকৈঃ শ্রুতিশতৈরনুমানযেত্তম্ ||১৬|| দৈন্যং গতে মনসি বোধনমত্র শস্তং যদ্যত্ প্রিযং তদুপসেব্যমরোচকে তু ||১৭||

ইদানীং পঞ্চমারোচকচিকিত্সামাহ- ইচ্ছাভিঘাতেত্যাদি| ইচ্ছাভিঘাতো বাঞ্ছিতস্যাপ্রাপ্তিঃ| ভাবান্ পদার্থান্| ভবায অর্থবশাত্ রুচ্যুত্পাদনায| বিতরেত্ দদ্যাত্| কীদৃশান্ ভাবান্? শক্যরূপান্ প্রাপ্যানিত্যর্থঃ| যে তাবত্ প্রাপ্যা ভাবাস্তান্ ইচ্ছাবিঘাতাদ্যরোচকে বিতরেত্| যে পুনরপ্রাপ্যাস্তদ্বিষযে কিং কুর্যাদিত্যাহ- অর্থেষ্বিত্যাদি| অর্থেষু পদার্থেষু, অপচিতেষু নষ্টেষু অপ্রাপ্তেষ্বিত্যর্থঃ পুনরিতি অপচিতেষ্বিত্যত্র যোজ্যম্| ভবায রুচ্যুত্পাদনাযেত্যর্থঃ| পৌরাণিকৈঃ শ্রুতিশতৈরনুমানযেদিতি নলরামাদ্যুপাখ্যানৈরন্যৈশ্চ তথাবিধৈরনুমানযেত্ প্রবোধযেদিত্যর্থঃ| কেচিত্ পৌরাণিকৈঃ শ্রুতিপথৈরিতি পঠন্তি; পৌরাণিকৈঃ পুরাণোক্তৈঃ, শ্রুতিপথৈঃ বাক্যৈঃ, শ্রুতিঃ শ্রবণং সৈব পন্থা মার্গো যেষাং তানি তথোক্তানীতি ব্যাখ্যানযন্তি| দৈন্যং গতে মনসি ক্লিষ্টচেতসীত্যর্থঃ| বোধনম্ আশ্বাসনৈর্হিতোপদেশৈশ্চ| কেচিদমুং পাঠং ন পঠন্তি||১৬-১৭||

Adhikarana puShpikA · Śloka 57

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রেঽরোচকপ্রতিষেধো নাম (একোনবিংশোঽধ্যাযঃ, আদিতঃ) সপ্তপঞ্চাশত্তমোঽধ্যাযঃ ||৫৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রেঽরোচকপ্রতিষেধো নাম সপ্তপঞ্চাশত্তমোঽধ্যাযঃ||৫৭||