42. gulmapratiṣēdhādhyāyaḥ

Adhikarana 1 (1-2) · Śloka 2

অথাতো গুল্মপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

শোষপ্রতিষেধানন্তরং রিষ্টোক্তক্রমানুক্রমেণ গুল্মপ্রতিষেধারম্ভো যুজ্যত ইত্যাহ- অথাতো গুল্মপ্রতিষেধমিত্যাদি||১-২||

Adhikarana 2 (3) · Śloka 3

যথোক্তৈঃ কোপনৈর্দোষাঃ কুপিতাঃ কোষ্ঠমাগতাঃ | জনযন্তি নৃণাং গুল্মং স পঞ্চবিধ উচ্যতে ||৩||

তত্র নিদানানন্তরযীকত্বাত্ প্রতিষেধস্যাদৌ গুল্মানাং হেতুসম্প্রাপ্তিসঙ্খ্যা আহ- যথোক্তৈরিত্যাদি| যথোক্তৈঃ কোপনৈঃ ব্রণপ্রশ্নোক্তৈর্বলবদ্বিগ্রহাদিক্রোধাদিদিবাস্বপ্নাদিভিঃ| আমপক্বাগ্নিরক্তমূত্রাশযহৃদযোণ্ডুকফুপ্ফুসাশ্চ কোষ্ঠশব্দবাচ্যাঃ, তথা চোক্তম্- ‘স্থানান্যামাগ্নিপক্বানাং মূত্রস্য রুধিরস্য চ| হৃদুণ্ডুকঃ ফুপ্ফুসশ্চ কোষ্ঠ ইত্যভিধীযতে’ ইতি| গুল্মঃ পঞ্চবিধঃ পৃথগ্দোষৈঃ ত্রযঃ, সমস্তৈঃ একঃ, রক্তেন অপরঃ, এবং পঞ্চবিধঃ| এতচ্চ প্রাযোবচনং, দ্বন্দ্বজগুল্মানাং সদ্ভাবাত্| তথা চোক্তম্- “ব্যামিশ্রলিঙ্গানপরাংস্তু গুল্মাংস্ত্রীনাদিশেদ্ভেষজকল্পনার্থম্”- ইতি, তথা ব্রণপ্রশ্নোক্তপ্রসরতযা পঞ্চদশপ্রকারগুল্মসম্ভবাত্| যথোক্তৈঃ কোপনৈরিত্যাদির্হেতুঃ, দোষাঃ কুপিতা ইত্যাদিঃ সম্প্রাপ্তিঃ, স পঞ্চবিধ ইত্যেষা সঙ্খ্যা||৩||

Adhikarana 3 (4) · Śloka 4

হৃদ্বস্ত্যোরন্তরে গ্রন্থিঃ সঞ্চারী যদি বাঽচলঃ | চযাপচযবান্ বৃত্তঃ স গুল্ম ইতি কীর্তিতঃ ||৪||

গুল্মস্য রূপমাহ- হৃদ্বস্ত্যোরন্তরে গ্রন্থিরিত্যাদি| হৃদ্বস্ত্যোঃ হৃদযে চ বস্তৌ চ, বা তযোরেবান্তরে; তেন সর্বমুদরমাক্ষিপ্তম্| সঞ্চারী চলনশীলঃ, বাতাধিক্যাত্| অচল একস্থানশাযী, বাযোরল্পত্বাত্| চযাপচযবান্ কদাচিদুপচিতঃ কদাচিদপচিত ইতি, বিচিত্রক্রিযত্বাদ্বাযোঃ| বৃত্তো বর্তুলঃ| কেচিত্ ‘হৃন্নাভ্যোরন্তরে’ ইতি পঠন্তি; তে চ নাভিগ্রহণেনৈব সামীপ্যাদ্বস্তিং গৃহ্ণন্তি| ‘চযাপচযবান্’ ইত্যত্র ‘স্থিরোপচযবান্’ ইতি কেচিত্ পঠন্তি, স্থির উপচযো বৃদ্ধির্যস্য স ইতি চ ব্যাখ্যানযন্তি||৪||

Adhikarana 4 (5) · Śloka 5

পঞ্চ গুল্মাশ্রযা নৄণাং পার্শ্বে হৃন্নাভিবস্তযঃ |৫|

ইদানীং তত্রাপ্যুদরে পঞ্চগুল্মাশ্রযানাহ- পঞ্চ গুল্মাশ্রযা ইত্যাদি| সুবোধমেতত্| কার্তিককুণ্ডস্ত্বেনং পাঠং ‘স ব্যস্তৈর্জাযতে দোষৈঃ’ ইত্যাদিবাক্যাদনন্তরং পঠতি|৫|-

Adhikarana 5 (5) · Śloka 6

গুপিতানিলমূলত্বাদ্গূঢমূলোদযাদপি ||৫|| গুল্মবদ্বা বিশালত্বাদ্গুল্ম ইত্যভিধীযতে |৬|

অথ গুল্মনিরুক্তিমাহ- গুপিতানিলমূলত্বাদিত্যাদি | গুপিতানিলমূলত্বাত্ আকুলীকৃতবাযুমূলত্বাত্, এতেন সর্বগুল্মানাং বাযুঃ কারণম্| গূঢমূলোদযাদিতি গূঢমূলাঃ কন্দাদযঃ, তেষামিবোদযাদুত্পত্তেঃ; অন্যে তু গূঢমূলো গুপ্তকারণ উদযো যস্য স তথা তস্মাত্, মূলস্য বাযোর্গূঢত্বমাবৃতত্বমুচ্যতে তত্প্রকোপদ্বৈবিধ্যাত্; তথা চ- “বাযোর্ধাতুক্ষযাত্ কোপো মার্গস্যাবরণেন চ”- ইতি| গুল্মবত্ মনুষ্যাদিসংহতিবত্ | বিশালত্বাত্ বিস্তীর্ণত্বাত্| এতেনৈতদুক্তং ভবতি- যথা সংহতিবিশেষেণাবস্থিতা মনুষ্যবৃক্ষাদযো গুল্মব্যপদেশং ভজন্তে- মনুষ্যগুল্মো বৃক্ষগুল্ম ইতি, এবমত্রাপি দৃষ্টান্তত্রযং গুল্মস্য দোষত্রযোদ্ভবত্বপ্রদর্শনার্থম্| ‘গুপিতানিলমূলত্বাত্’ ইত্যত্র ‘কুপিতানিলমূলত্বাত্’ ইতি কেচিত্ পঠন্তি| তত্রাপি স এবার্থঃ| ‘গূঢমূলোদযাত্’ ইত্যত্রাপরে ‘গূঢগূল্মোদযাত্’ ইতি পঠন্তি, ব্যাখ্যানযন্তি চ- গূঢস্য লতাদিবৃতস্য গুল্মস্যেব বর্তুলবিটপস্যেব উদযাদুত্পত্তের্গুল্ম ইত্যর্থঃ||৫||-

Adhikarana 6 (6) · Śloka 7

স যস্মাদাত্মনি চযং গচ্ছত্যপ্স্বিব বুদ্বুদঃ ||৬|| অন্তঃ সরতি যস্মাচ্চ ন পাকমুপযাত্যতঃ |৭|

ইদানীং যথা ন পচ্যতে গুল্মস্তথাঽঽহ- স যস্মাদিত্যাদি| স গুল্মো যস্মাত্ কারণাদাত্মনি স্বাবযবে চযং নিচযং গচ্ছতি যাতি; অপ্স্বিব বুদ্বুদ উদ্গচ্ছতি উদ্গতিং যাতি, তথা গুল্মরূপোঽপি দোষঃ স্বাবযবে উদ্গচ্ছতি উদ্গতিং যাতি; অন্তঃ অভ্যন্তরে, সরতি ভ্রাম্যতি| এবম্ভূতঃ প্রাযেণ বাতিকো ভবতি, স চ ন পচ্যতে; ইতরে চ গুল্মা যদা রক্তাদিদূষ্যমধিষ্ঠায অবতিষ্ঠন্তে তদা কদাচিত্ পচ্যন্তে| তথা চোক্তম্- “রক্তপিত্তাতিবৃদ্ধত্বাত্ ক্রিযামনুপলভ্য বা| যদি গুল্মো বিদহ্যেত শস্ত্রং তত্র ভিষগ্জিতম্”- ইতি| অথৈবমন্তর্বিদ্রধের্গুল্মস্য চ শীঘ্রমন্দপাকিত্বেন ভেদঃ||৬||-

Adhikarana 7 (7) · Śloka 8

স ব্যস্তৈর্জাযতে দোষৈঃ সমস্তৈরপি চোচ্ছ্রিতৈঃ ||৭|| পুরুষাণাং তথা স্ত্রীণাং জ্ঞেযো রক্তেন চাপরঃ |৮|

ইদানীং ‘স পঞ্চবিধ উচ্যতে’ ইত্যস্যৈব বিবরণমাহ- স ব্যস্তৈর্জাযতে দোষৈরিত্যাদি| স গুল্মঃ, ব্যস্তৈঃ একৈকৈঃ; উচ্ছ্রিতৈঃ প্রকুপিতৈঃ, রক্তেন আর্তবরক্তেন; চকারাত্ ধাতুরক্তেনাপি গুল্মো জাযতে, স চ পুংসাং স্ত্রীণাং চ ভবতি; তস্য চ পৃথগুপাদানং ন কৃতং, পৈত্তিকগুল্মসমানলক্ষণতযা তত্রৈবাবরোধাত্||৭||-

Adhikarana 8 (8-9) · Śloka 9

সদনং মদন্তা বহ্নেরাটোপোঽন্ত্রবিকূজনম্ ||৮|| বিণ্মূত্রানিলসঙ্গশ্চ সৌহিত্যাসহতা তথা | দ্বেষোঽন্নে বাযুরূর্ধ্বং চ পূর্বরূপেষু গুল্মিনাম্ ||৯||

গুল্মপূর্বরূপাণ্যাহ- সদনমিত্যাদি| আটোপ উদরাপূরঃ| সঙ্গো নিরোধঃ| সৌহিত্যাসহতা তৃপ্ত্যক্ষমত্বম্| বাযুঃ ঊর্ধ্বং সন্ততোদ্গার ইত্যর্থঃ||৮-৯||

Adhikarana 9 (10) · Śloka 10

হৃত্কুক্ষিশূলং মুখকণ্ঠশোষো বাযোর্নিরোধো বিষমাগ্নিতা চ | তে তে বিকারাঃ পবনাত্মকাশ্চ ভবন্তি গুল্মেঽনিলসম্ভবে তু ||১০||

বাতগুল্মলক্ষণমাহ- হৃত্কুক্ষিশূলমিত্যাদি| বিষমাগ্নিতা চেতি চকারান্মুখবৈরস্যং গ্রাহ্যম্| তে তে বিকারাঃ স্তম্ভকম্পাদযঃ| কেচিদ্বাতগুল্মলক্ষণং ‘আধ্মানশূলে ভবতোঽতিমাত্রং’ ইত্যাদিনা পাঠেন পঠন্তি; স চাভাবান্ন লিখিতঃ||১০||

Adhikarana 10 (11) · Śloka 11

স্বেদজ্বরাহারবিদাহদাহাস্তৃষ্ণাঽঙ্গরাগঃ কটুবক্ত্রতা চ | পিত্তস্য লিঙ্গান্যখিলানি যানি পিত্তাত্মকে তানি ভবন্তি গুল্মে ||১১||

পিত্তগুল্মলক্ষণমাহ- স্বেদেত্যাদি| আহারবিদাহঃ ভুক্তমাত্রস্যাহারস্যাম্লিকাদিসদ্ভাবঃ| পিত্তস্য লিঙ্গানি ভ্রমমদমূর্চ্ছাদীনি| পিত্তগুল্মলক্ষণমপি কেচিদন্যপাঠেন পঠন্তি| যথা- ‘অম্লীভবত্যন্নমথো জ্বরশ্চ দাহঃ পিপাসা কটুবক্ত্রতা চ| পিত্তস্য লিঙ্গানি চ কীর্তিতানি ভবন্তি পিত্তপ্রভবে তু গুল্মে’ ইতি||১১||

Adhikarana 11 (12) · Śloka 12

স্তৈমিত্যমন্নেঽরুচিরঙ্গসাদশ্ছর্দিঃ প্রসেকো মধুরাস্যতা চ | কফস্য লিঙ্গানি চ যানি তানি ভবন্তি গুল্মে কফসম্ভবে তু ||১২||

কফগুল্মলক্ষণমাহ- স্তৈমিত্যমিত্যাদি| স্তৈমিত্যং স্তিমিততা| অন্নে অরুচিঃ অন্নানভিলাষঃ| প্রসেকো লালাস্রাবঃ| কফস্য লিঙ্গানি গৌরবশৈত্যাদীনি| কফগুল্মমপি কেচিত্ “অন্নে ন লিপ্সা গুরুগাত্রতা চ ছর্দিঃ প্রসেকো মধুরাস্যতা চ” ইত্যাদিপাঠেন পঠন্তি, সোঽপ্যভাবান্ন দর্শিতঃ||১২||

Adhikarana 12 (13) · Śloka 13

সর্বাত্মকঃ সর্ববিকারযুক্তঃ সোঽসাধ্য উক্তঃ, ... |১৩|

সন্নিপাতগুল্মলক্ষণমাহ- সর্বাত্মক ইত্যাদি| সর্ববিকারযুক্তঃ প্রত্যেকবাতাদিগুল্মোক্তলক্ষণসহিতঃ| ‘সর্বাত্মকে সর্বরুজোপপত্তিঃ’ ইতি কেচিত্ পঠন্তি, ব্যাখ্যানযন্তি চ- সর্বলিঙ্গোপপত্তিরিতি বক্তব্যে সর্বরুজোপপত্তিরিতি যত্কৃতং তন্মহারুজত্বপ্রতিপাদনার্থম্ | কেচিদত্র নিচযগুল্মং পুরীষলসিকারক্তজন্যং দক্ষিণপার্শ্বাশ্রিতং পঠন্তি| তস্য বিশেষ উচ্যতে,- “সিরাজালপরিচ্ছন্নো দাহরাগজ্বরান্বিতঃ| কূর্মবদ্রক্তপর্যন্তস্ত্রিদোষঃ স ন সিধ্যতি”- ইতি| কেচিচ্চ গুল্মাবস্থাবিশেষমুপস্তম্ভনামান্তরং পঠন্তি- “পযো হ্যম্লসমাযুক্তং দধিভাবং ব্রজেদ্যথা| যত্নহীনস্য গুল্মোঽপি তথোপস্তম্ভতাং ব্রজেত্|| অম্ভোবহে স্তম্ভযিত্বা স্রোতসী কোষ্ঠসংশ্রিতঃ| উদরে প্রতি সন্তিষ্ঠেদুপস্তম্ভং তু তং বিদুঃ”- ইতি|১৩|-

Adhikarana 13 (13-15) · Śloka 15

... ক্ষতজং প্রবক্ষ্যে | নবপ্রসূতাঽহিতভোজনা যা যা চামগর্ভং বিসৃজেদৃতৌ বা ||১৩|| বাযুর্হি তস্যাঃ পরিগৃহ্য রক্তং করোতি গুল্মং সরুজং সদাহম্ | পৈত্তস্য লিঙ্গেন সমানলিঙ্গং বিশেষণং চাপ্যপরং নিবোধ ||১৪|| ন স্পন্দতে নোদরমেতি বৃদ্ধিং ভবন্তি লিঙ্গানি চ গর্ভিণীনাম্ | তং গর্ভকালাতিগমে চিকিত্স্যমসৃগ্ভবং গুল্মমুশন্তি তজ্জ্ঞাঃ ||১৫||

আর্তবরক্তজগুল্মং হেত্বাদিভিরাহ- ক্ষতজমিত্যাদি| ক্ষতজশব্দেনার্তবরক্তমুচ্যতে , কারণে কার্যোপচারাত্| আমগর্ভ; ষণ্মাসং যাবত্| ঋতাবিত্যত্রাপি অহিতভোজনেতি সম্বধ্যতে| পৈত্তস্য পিত্তজগুল্মস্য| বিশেষণং বিশেষম্| নিবোধ জানীহি| ন স্পন্দতে ন চলতি, ‘অঙ্গৈঃ’ ইতি শেষঃ| অন্যে তু পরতো নিষেধস্যোভযত্র সম্বন্ধাত্ স্পন্দতে ইত্যেব বর্ণযন্তি; তেন পিণ্ডিতঃ স্পন্দত এবেত্যর্থঃ; তথা চোক্তম্- ‘যঃ স্পন্দতে পিণ্ডিত এব নাঙ্গৈঃ’ (চ. চি. অ.৫)- ইতি| গর্ভিণীনাং লিঙ্গানি শ্রমাদীনি সদনান্তান্যত্র ব্যাধিস্বভাবাদ্ভবন্তি| তং রক্তগুল্মম্| গর্ভকালাতিগমে প্রসূতিকালেঽতিক্রান্তে; প্রসূতিকালাদনন্তরং পিণ্ডীভূতে রক্তগুল্মে স্নেহাদিনোপস্কৃতদেহাযাঃ সুখসাধ্যত্বম্| উক্তং চ- “জ্বরে তুল্যর্তুদোষত্বং প্রমেহে তুল্যদূষ্যতা| রক্তগুল্মে পুরাণত্বং সুখসাধ্যস্য লক্ষণম্ ” ইতি| কেচিদেবং ব্যাখ্যানযন্তি- ‘মাসে ব্যতীতে দশমে চিকিত্স্যঃ’ ইতি বক্তব্যে ‘তং গর্ভকালাতিগমে চিকিত্স্যম্’ ইতি যত্কৃতং তদ্রক্তগুল্মে সম্যগুপচিতে প্রসূতিকালাদর্বাগপি চিকিত্সা করণীযেতি বোধযতি||১৩-১৫||

Adhikarana 14 (16) · Śloka 16

বাতগুল্মার্দিতং স্নিগ্ধং যুক্তং স্নেহবিরেচনৈঃ | উপাচরেদ্যথাকালং নিরূহৈঃ সানুবাসনৈঃ ||১৬||

অতঃ পরং চিকিত্সামাহ- বাতগুল্মার্দিতমিত্যাদি| স্নিগ্ধমবস্থাপেক্ষযা চতুর্ভিরপি স্নেহৈঃ| যথাকালমিতি ‘পক্ষাদ্বিরেকো বান্তস্য’ ইত্যাদিনোক্তস্য কালস্যানতিক্রমেণেত্যর্থঃ; ‘যথাকালং’ ইত্যত্র ‘যথাযোগং’ ইতি পঠিত্বা যথাবস্থমিতি ব্যাখ্যা নযন্তি||১৬||

Adhikarana 15 (17) · Śloka 17

পিত্তগুল্মার্দিতং স্নিগ্ধং কাকোল্যাদিঘৃতেন তু | বিরিক্তং মধুরৈর্যোগৈর্নিরূহৈঃ সমুপাচরেত্ ||১৭||

পিত্তগুল্মার্দিতমিত্যাদি| মধুরৈর্যোগৈঃ আরগ্বধাদিভিঃ ক্ষীরশর্করাদিভিশ্চ; অন্যে তু ‘ভিত্ত্বা দ্বিধেক্ষুম্’ ইত্যাদ্যুক্তৈর্মধুরৈর্যোগৈরিতি ব্যাখ্যানযন্তি| নিরূহৈঃ সমুপাচরেন্মধুরৈরেব||১৭||

Adhikarana 16 (18) · Śloka 18

শ্লেষ্মগুল্মার্দিতং স্নিগ্ধং পিপ্পল্যাদিঘৃতেন তু | তীক্ষ্ণৈর্বিরিক্তং তদ্রূপৈর্নিরূহৈঃ সমুপাচরেত্ ||১৮||

শ্লেষ্মগুল্মার্দিতমিত্যাদি| তীক্ষ্ণৈঃ দন্তীদ্রবন্তীপ্রভৃতীভিঃ| তদ্রূপৈর্নিরূহৈস্তীক্ষ্ণৈঃ ‘আরগ্বধাদিভিঃ ক্বাথঃ’ ইত্যাদিভিরিত্যর্থঃ| সর্বগুল্মেষু স্নেহস্বেদৌ প্রযোজ্যৌ, বাতারব্ধত্বাত্ ||১৮||

Adhikarana 17 (19) · Śloka 19

সন্নিপাতোত্থিতে গুল্মে ত্রিদোষঘ্নো বিধির্হিতঃ |১৯|

সন্নিপাতোত্থিতে গুল্মে ইত্যাদি| ননু, পূর্বং সান্নিপাতিকো গুল্মোঽসাধ্য উক্তঃ, তত্ কথং ত্রিদোষঘ্নো বিধির্হিত ইত্যুচ্যতে? সত্যং, যথা বিষমসন্নিপাতজো গুল্মোঽসাধ্যস্তথা সমসন্নিপাতজোঽভিনবো বলবতি পুরুষে কৃচ্ছ্রসাধ্যঃ, অতোঽত্র চিকিত্সিতমুক্তম্| তথা চোক্তং- “সন্নিপাতোত্থিতো গুল্মশ্চিরোত্থোঽসমদোষজঃ| বর্জনীযোঽন্যথা কৃচ্ছ্রসাধ্যো বলবতো মতঃ”- ইতি|১৯|-

Adhikarana 18 (19-21) · Śloka 21

পিত্তবদ্রক্তগুল্মিন্যা নার্যাঃ কার্যঃ ক্রিযাবিধিঃ ||১৯|| বিশেষমপরং চাস্যাঃ শৃণু রক্তবিভেদনম্ | পলাশক্ষারতোযেন সিদ্ধং সর্পিঃ প্রযোজযেত্ ||২০|| দদ্যাদুত্তরবস্তিং চ পিপ্পল্যাদিঘৃতেন তু | উষ্ণৈর্বা ভেদযেদ্ভিন্নে বিধিরাসৃগ্দরো হিতঃ ||২১||

পিত্তবদ্রক্তগুল্মিন্যা ইত্যাদি| পিত্তবত্ পিত্তগুল্মবত্| পিত্তগুল্মচিকিত্সযা প্রতিকৃতস্য রক্তগুল্মস্য বিশেষচিকিত্সামাহ- বিশেষমপরং চাস্যা ইত্যাদি| পলাশক্ষারতোযেন পলাশভস্মগালিতেন জলেন| কেচিত্তোযশব্দং ক্বাথে বর্ণযন্তি | স চ ক্ষারক্বাথঃ স্নেহোপযোগোক্তবিধিনা কার্যঃ| পিপ্পল্যাদিগণকল্কক্বাথাভ্যাং সাধিতঘৃতেন| উষ্ণৈরিতি পিপ্পল্যাদিপ্রভৃতিভিঃ| বিধিরাসৃগ্দর ইতি রক্তপিত্তোক্তো বিধিঃ; কুত এতত্? অসৃগ্দরে রক্তপিত্তবিধ্যতিদেশাত্; অসৃগ্দরবিধ্যতিদেশেন রক্তপিত্তবিধ্যতিদেশং কুর্বন্নেতজ্জ্ঞাপযতি- অধোগতরক্তপিত্তচিকিত্সিতমত্র কার্যমিতি||১৯-২১||

Adhikarana 19 (22) · Śloka 22

আনূপৌদকমজ্জানো বসা তৈলং ঘৃতং দধি | বিপক্বমেকতঃ শস্তং বাতগুল্মেঽনুবাসনম্ ||২২||

বাতগুল্মেঽনুবাসনমুদ্দিশন্নাহ- আনূপৌদকমজ্জান ইত্যাদি| আনূপা গজগবযাদযঃ, ঔদকা মত্স্যাদযঃ| বসাঽপি আনূপাদীনামেব| বিপক্বমেকত ইতি এতচ্চ স্নেহমেকীকৃত্য বিপক্বম্, অর্থাদ্বাতহরৈর্দ্রব্যৈরিতি বোদ্ধব্যম্||২২||

Adhikarana 20 (23) · Śloka 23

জাঙ্গলৈকশফানাং তু বসা সর্পিশ্চ পৈত্তিকে |২৩|

পৈত্তিকে গুল্মেঽনুবাসনমাহ- জাঙ্গলৈকশফানামিত্যাদি| অত্র জাঙ্গলশব্দেন জঙ্ঘালবিষ্কিরৌ প্রধানতযা গৃহ্যেতে| একশফা অশ্ববেশরাদযঃ| বসা সর্পিশ্চেতি অত্রাপি বিপক্বমিতি সম্বধ্যতে| তেনৈতদ্দ্বযং পিত্তহরৈর্দ্রব্যৈর্বিপক্বং পৈত্তিকে গুল্মেঽনুবাসনং যোজ্যমিতি|২৩|-

Adhikarana 21 (23) · Śloka 23

তৈলং জাঙ্গলমজ্জান এবং গুল্মে কফোত্থিতে ||২৩||

কফগুল্মেঽনুবাসনমাহ- তৈলং জাঙ্গলমজ্জান ইত্যাদি| এবমিতি কফহরদ্রব্যৈর্বিপক্বমনুবাসনং শস্তমিত্যর্থঃ||২৩||

Adhikarana 22 (24) · Śloka 24

ধাত্রীফলানাং স্বরসে ষডঙ্গং বিপচেদ্ঘৃতম্ | শর্করাসৈন্ধবোপেতং তদ্ধিতং বাতগুল্মিনে ||২৪||

বাতাদিজগুল্মেষ্বনুবাসনমভিধায বাতাপহঘৃতান্যাহ - ধাত্রীফলানামিত্যাদি| ধাত্রীফলানাং স্বরসে চতুর্গুণে; ষডঙ্গমিতি ষট্পলকং; তেনাত্র পঞ্চকোলযবক্ষারকল্কমিতি লভ্যতে| শর্করাসৈন্ধবোপেতমিতি শর্করাসৈন্ধবপ্রক্ষেপযুক্তং তদ্ঘৃতং বাতগুল্মিনে হিতমিত্যর্থঃ||২৪||

Adhikarana 23 (25-26) · Śloka 26

চিত্রকব্যোষসিন্ধূত্থপৃথ্বীকাচব্যদাডিমৈঃ | দীপ্যকগ্রন্থিকাজাজীহপুষাধান্যকৈঃ সমৈঃ ||২৫|| দধ্যারনালবদরমূলকস্বরসৈর্ঘৃতম্ | তত্পিবেদ্বাতগুল্মাগ্নিদৌর্বল্যাটোপশূলনুত্ ||২৬||

চিত্রকাদিঘৃতমাহ- চিত্রকব্যোষেত্যাদি| পৃথ্বীকা হিঙ্গুপত্রিকা, ‘কৃষ্ণজীরক’ ইত্যন্যে; দীপ্যকঃ অজমোদা, গ্রন্থিকং পিপ্পলীমূলম্| সমৈরিতি ‘কল্কীকৃতৈঃ’ ইত্যধ্যাহার্যম্| দধ্যাদীনি মূলকস্বরসান্তানি প্রত্যেকং ঘৃতাচ্চতুর্গুণানি||২৫-২৬||

Adhikarana 24 (27-28) · Śloka 28

হিঙ্গুসৌবর্চলাজাজীবিডদাডিমদীপ্যকৈঃ | পুষ্করব্যোষধান্যাম্লবেতসক্ষারচিত্রকৈঃ ||২৭|| শটীবচাজগন্ধৈলাসুরসৈশ্চ বিপাচিতম্ | শূলানাহহরং সর্পির্দধ্না চানিলগুল্মিনাম্ ||২৮||

হিঙ্গ্বাদ্যং ঘৃতমাহ- হিঙ্গুসৌবর্চলেত্যাদি| ধান্যং ধান্যকম্| অজগন্ধা বোবযিকা| সুরসঃ তুলসী| হিঙ্গ্বাদীনাং সুরসান্তানাং কল্কে দধ্না চতুর্গুণেন বিপাচিতং সর্পিঃ শূলাদিহরমিতি সম্বন্ধঃ||২৭-২৮||

Adhikarana 25 (29-30) · Śloka 30

বিডদাডিমসিন্ধূত্থহুতভুগ্ব্যোষজীরকৈঃ | হিঙ্গুসৌবর্চলক্ষাররুগ্বৃক্ষাম্লাম্লবেতসৈঃ ||২৯|| বীজপূররসোপেতং সর্পির্দধিচতুর্গুণম্ | সাধিতং দাধিকং নাম গুল্মহৃত্ প্লীহশূলজিত্ ||৩০||

দাধিকসঞ্জ্ঞং ঘৃতমাহ- বিডদাডিমসিন্ধূত্থেত্যাদি| হুতভুক্ চিত্রকঃ| ক্ষারো যবক্ষারঃ, রুক্ কুষ্ঠং, বৃক্ষাম্লং তিন্তিডীকম্| বীজপূরকরসোঽত্র চতুর্গুণঃ, দ্রবদ্রব্যত্বাত্||২৯-৩০||

Adhikarana 26 (31-33) · Śloka 33

রসোনস্বরসে সর্পিঃ পঞ্চমূলরসান্বিতম্ | সুরারনালদধ্যম্লমূলকস্বরসৈঃ সহ ||৩১|| ব্যোষদাডিমবৃক্ষাম্লযবানীচব্যসৈন্ধবৈঃ | হিঙ্গ্বম্লবেতসাজাজীদীপ্যকৈশ্চ সমাংশিকৈঃ ||৩২|| সিদ্ধং গুল্মগ্রহণ্যর্শঃশ্বাসোন্মাদক্ষযজ্বরান্ | কাসাপস্মারমন্দাগ্নিপ্লীহশূলানিলাঞ্জযেত্ ||৩৩||

রসোনাদিঘৃতমাহ- রসোনস্বরসো ইত্যাদি| পঞ্চমূলরসান্বিতমিতি বিল্বাদিপঞ্চমূলক্বাথান্বিতম্| আরনালং কাঞ্জিকং, দধ্যম্লং দধিমস্তু| দীপ্যকঃ অজমোদা| রসোনস্বরসাদিমূলকস্বরসান্তৈঃ ষড্ভির্দ্রবৈর্ঘৃতসমৈঃ, ব্যোষাদিদ্রব্যৈঃ কল্কিতৈঃ সর্পিশ্চতুর্থাংশৈঃ, সিদ্ধং সর্পির্গুল্মাদীন্ জযেদিতি সম্বন্ধঃ||৩১-৩৩||

Adhikarana 27 (34-35) · Śloka 35

দধি সৌবীরকং সর্পিঃ ক্বাথৌ মুদ্গকুলত্থজৌ | পঞ্চাঢকানি বিপচেদাবাপ্য দ্বিপলান্যথ ||৩৪|| সৌবর্চলং সর্জিকাং চ দেবদার্বথ সৈন্ধবম্ | বাতগুল্মাপহং সর্পিরেতদ্দীপনমেব চ ||৩৫||

দধি সৌবীরকমিত্যাদি| দধ্যাদীনি চত্বারি পৃথগাঢকপ্রমাণানি, সৌবর্চলাদীনি দ্বিপলান্যাবাপ্য সর্পিরাঢকং বিপচেত্, অযমত্র সিদ্ধঃ পাঠঃ, পারম্পর্যাবিচ্ছেদস্মরণাত্| বর্তমানপুস্তকেষু চাযং পঠ্যতে- কুলত্থমূলকক্বাথেত্যাদি||৩৪-৩৫||

Adhikarana 28 (36) · Śloka 37

তৃণমূলকষাযে তু জীবনীযৈঃ পচেদ্ঘৃতম্ | ন্যগ্রোধাদিগণে বাঽপি গণে বাঽপ্যুত্পলাদিকে ||৩৬|| রক্তপিত্তোত্থিতং ঘ্নন্তি ঘৃতান্যেতান্যসংশযম্ |৩৭|

পিত্তজরক্তজগুল্মযোর্ঘৃতান্যাহ- তৃণমূলকষাযে ইত্যাদি| অত্র তৃণমূলশব্দাত্তৃণপঞ্চমূলকষাযে ইতি বোদ্ধব্যম্| জীবনীযৈরিতি কাকোল্যাদিভিঃ কল্কীকৃতৈরিত্যর্থঃ| ন্যগ্রোধাদিগণে ক্বাথীকৃতে ইতি জ্ঞেযম্| বাঽপীত্বপিশব্দো জীবনীযৈঃ পচেদ্ঘৃতমিতি সমুচ্চিনোতি| এতমুত্পলাদাবপি গ্রাহ্যম্| রক্তপিত্তোত্থিতং ‘গুল্মং’ ইতি শেষঃ||৩৬||-

Adhikarana 29 (37-38) · Śloka 38

আরগ্বধাদৌ বিপচেদ্দীপনীযযুতং ঘৃতম্ ||৩৭|| ক্ষারবর্গে পচেচ্চান্যত্ পচেন্মূত্রগণেঽপরম্ | ঘ্নন্তি গুল্মং কফোদ্ভূতং ঘৃতান্যেতান্যসংশযম্ ||৩৮||

কফগুল্মে ঘৃতান্যাহ- আরগ্বধাদৌ বিপচেদিত্যাদি| আরগ্বধাদাবিতি ক্বাথীকৃতে| দীপনীযযুতমিতি পিপ্পল্যাদিকল্কযুতম্| একং ঘৃতম্| ক্ষারবর্গে ইতি মুষ্ককাদারভ্য যাবচ্চতস্রঃ কোশাতকীরিতি ক্ষারবর্গে, মুষ্ককাদিগণে ইত্যন্যে ব্যাখ্যানযন্তি| অত্রাপি দীপনীযযুতমিতি সম্বধ্যতে, তেন ক্ষারবর্গদ্রবে পিপ্পল্যাদিকল্কযুতং ঘৃতং পচেদিত্যর্থঃ; দ্বিতীযং ঘৃতমিত্যর্থঃ| পচেন্মূত্রগণেঽপরমিতি মূত্রগণে গোমূত্রাদিকেঽষ্টসঙ্খ্যাকেঽপরং তৃতীযং ঘৃতম্| অত্রাপি দীপনীযযুতমিতি সম্বধ্যতে| ‘মূত্রগণেঽপরম্’ ইত্যত্রান্যে ‘দীপনীযগণেঽপরম্’ ইতি পঠন্তি, তচ্চ টীকাকারা অনার্ষং বর্ণযন্তি| কেচিদিদং কফগুল্মচিকিত্সিতং বাতগুল্মচিকিত্সানন্তরং পঠিত্বা বাতাবরকং কফশান্তযে কফহন্তৄণ্যপি ঘৃতানি বাতগুল্মে শস্তানীতি ব্যাখ্যানযন্তি||৩৭-৩৮||

Adhikarana 30 (39) · Śloka 39

যথাদোষোচ্ছ্রযং চাপি চিকিত্সেত্সান্নিপাতিকম্ |৩৯|

এবং ঘৃতান্যভিধাযাধুনা সান্নিপাতিকে দোষোদ্রেকেণ ঘৃতচূর্ণাদিভিশ্চিকিত্সিতমাহ- যথেত্যাদি| যথাদোষোচ্ছ্রযং যো যো দোষ উচ্ছ্রিত উত্কটস্তচ্চিকিত্সযা চিকিত্সেদিত্যর্থঃ| ‘যথাদোষোচ্ছ্রযং’ ইত্যত্রান্যে ‘যথাদোষবলং’ ইতি পঠন্তি; তত্রাপ্যেকোঽর্থঃ|৩৯|-

Adhikarana 31 (39) · Śloka 40

চূর্ণং হিঙ্গ্বাদিকং বাঽপি ঘৃতং বা প্লীহনাশনম্ ||৩৯|| পিবেদ্গুল্মাপহং কালে সর্পিস্তৈল্বকমেব বা |৪০|

তচ্চ যথাদোষোচ্ছ্রযং চিকিত্সিতং বাতে জিতে সতি কার্যমিতি বাতহরবিধিমাহ- চূর্ণমিত্যাদি| চূর্ণং হিঙ্গ্বাদিকমিতি হিঙ্গুত্রিকটুকেত্যাদিনা বাতব্যাধ্যুক্তম্| ঘৃতং বা প্লীহনাশনমিতি ষট্পলকমিত্যর্থঃ| যদ্যপি ষট্পলং ঘৃতং তন্ত্রান্তরে কফগুল্মহরত্বেন দর্শিতং, তথাঽপ্যত্র বিলক্ষণৈকদ্রব্যত্বাদ্বাতগুল্মহরত্বম্| কালে উত্পন্নমাত্র এব ষট্পলকং ঘৃতং হিতং, কালে অবস্থাযামিত্যন্যে| সর্পিস্তৈল্বকমিতি তিল্বকঃ পট্টিকারোধ্রঃ, তেন সংস্কৃতং তৈল্বকং, বাতব্যাধ্যুক্তং বা||৩৯||-

Adhikarana 32 (40-44) · Śloka 44

তিলেক্ষুরকপালাশসার্ষপং যাবনালজম্ ||৪০|| ভস্ম মূলকজং চাপি গোজাবিখরহস্তিনাম্ | মূত্রেণ মহিষীণাং চ পালিকৈশ্চাবচূর্ণিতৈঃ ||৪১|| কুষ্ঠসৈন্ধবযষ্ট্যাহ্বনাগরকৃমিঘাতিভিঃ | সাজমোদৈশ্চ দশভিঃ সামুদ্রাচ্চ পলৈর্যুতম্ ||৪২|| অযঃপাত্রেঽগ্নিনাঽল্পেন পক্ত্বা লেহ্য(হ)মথোদ্ধরেত্ | তস্য মাত্রাং পিবেদ্দধ্না সুরযা সর্পিষাঽপি বা ||৪৩|| ধান্যাম্লেনোষ্ণতোযেন কৌলত্থেন রসেন বা | গুল্মান্ বাতবিকারাংশ্চ ক্ষারোঽযং হন্ত্যসংশযম্ ||৪৪||

পানীযং ক্ষারমাহ- তিলেত্যাদি| ইক্ষুরকঃ কোকিলাক্ষকঃ| নাগরকস্থানে কেচিত্ত্র্যূষণং পঠন্তি| কৃমিঘাতি বিডঙ্গম্| তিলাদীনাং মূলকান্তানাং ভস্ম গবাদিমূত্রগণেন চতুর্গুণেন ক্ষারকল্পেন পরিস্রাব্য কুষ্টাদিভিরজমোদান্তৈঃ পালিকেঃ সামুদ্রাত্ সমুদ্রলবণাদ্দশভিঃ পলৈশ্চূর্ণিতৈর্যুতং লৌহপাত্রে মৃদুনা চাগ্নিনা লেহ্যং পক্ত্বা উদ্ধরেদিতি সম্বন্ধঃ| অন্যে তু ব্যাখ্যানযন্তি- তিলাদিভস্মপলশতং গবাদিমূত্রেণ চতুর্গুণেন নিষ্ক্বাথ্য পাদভাগিকমবশেষ্য, তচ্চতুর্থাংশং কুষ্ঠাদিচূর্ণমাবাপ্য তাবত্ পচেদ্যাবল্লেহ্যং ভবতি| দধ্নেত্যাদ্যনেকাবলোডনদ্রব্যোপদেশো দোষকালাগ্ন্যপেক্ষযা| বাতবিকারান্ তূনীপ্রভৃতীন্||৪০-৪৪||

Adhikarana 33 (45) · Śloka 45

স্বর্জিকাকুষ্ঠসহিতঃ ক্ষারঃ কেতকিজোঽপি বা | তৈলেন শমযেত্ পীতো গুল্মং পবনসম্ভবম্ ||৪৫||

শ্লোকেন যোগদ্বযমাহ- স্বর্জিকেত্যাদি| ক্ষারো যবক্ষারঃ| তত্র স্বর্জিকাকুষ্ঠসহিতো যবক্ষারস্তৈলেনেত্যেকো যোগঃ; কেতকিজোঽপি বেত্যত্রাপি ক্ষার ইতি সম্বধ্যতে, তেন কেতকিজোঽপি বা ক্ষারস্তৈলেনেতি দ্বিতীযো যোগঃ| গৌডাস্তু কেতকিক্ষারঃ স্বর্জিকাকুষ্ঠসহিতস্তৈলেনেত্যেকমেব যোগং মন্যন্তে||৪৫||

Adhikarana 34 (46) · Śloka 46

পীতং সুখাম্বুনা বাঽপি স্বর্জিকাকুষ্ঠসৈন্ধবম্ |৪৬|

ক্ষারাবলেহমভিধায চূর্ণমাহ- পীতমিত্যাদি| সুখাম্বুনা ঈষদুষ্ণোদকেন| গুল্মং হন্তীত্যত্রাপি সম্বধ্যতে|৪৬|-

Adhikarana 35 (46-48) · Śloka 49

বৃশ্চীব(র)মুরুবূকং চ বর্ষাভূর্বৃহতীদ্বযম্ ||৪৬|| চিত্রকং চ জলদ্রোণে পক্ত্বা পাদাবশেষিতম্ | মাগধীচিত্রকক্ষৌদ্রলিপ্তে কুম্ভে নিধাপযেত্ ||৪৭|| মধুনঃ প্রস্থমাবাপ্য পথ্যাচূর্ণার্ধসংযুতম্ | বুসোষিতং দশাহং তু জীর্ণভক্তঃ পিবেন্নরঃ ||৪৮|| অরিষ্টোঽযং জযেদ্গুল্মমবিপাকমরোচকম্ |৪৯|

বৃশ্চীবাদ্যরিষ্টমাহ- বৃশ্চীবেত্যাদি বৃশ্চীবঃ শুক্লপুনর্নবা| উরুবূকঃ শুক্লৈরণ্ডঃ| বর্ষাভূঃ রক্তপুনর্নবা| বৃহতীদ্বযমিতি একা অণুফলা , দ্বিতীযা কণ্টকিনী স্থূলফলা| বৃশ্চীবাদীনাং চিত্রকান্তানামাঢকম্; অন্যে পলশতং মন্যন্তে, দ্রোণেঽম্ভসি পলশতমিত্যাদিপরিভাষিতত্বাত্| পাদাবশেষিতং চতুর্থাংশাবশিষ্টং ক্বাথং, মগধাদিপ্রমাণং যাবন্মাত্রেণ কুম্ভস্য সম্যগ্লেপনং ভবতি, পথ্যাচূর্ণার্ধসংযুক্তং হরীতকীচূর্ণাষ্টপলসংযুতম্| বুসোষিতং বুসমধ্যে স্থিতম্| জীর্ণভক্তঃ পরিণতাহারঃ লঘুকোষ্ঠ ইতি যাবত্| পিবেত্ প্রাতরেব||৪৬-৪৮||-

Adhikarana 36 (49-51) · Śloka 52

পাঠানিকুম্ভরজনীত্রিকটুত্রিফলাগ্নিকম্ ||৪৯|| লবণং বৃক্ষবীজং চ তুল্যং স্যাদনবো গুডঃ | পথ্যাভির্বা যুতং চূর্ণং গবাং মূত্রযুতং পচেত্ ||৫০|| গুটিকাস্তদ্ঘনীভূতং কৃত্বা খাদেদভুক্তবান্ | গুল্মপ্লীহাগ্নিসাদাংস্তা নাশযেযুরশেষতঃ ||৫১|| হৃদ্রোগং গ্রহণীদোষং পাণ্ডুরোগং চ দারুণম্ |৫২|

পাঠেত্যাদি| নিকুম্ভা দন্তী| অগ্নিকঃ চিত্রকঃ, ‘অগ্নিমন্থ’ ইত্যন্যে, ‘মোরট’ ইত্যপরে| বৃক্ষবীজম্ ইন্দ্রযবঃ| অনবং গুডং পুরাণং গুডম্| পাঠাদিচূর্ণং সমপুরাণগুডযুতং স্বাদেত্, অথবা তদেব চূর্ণং হরীতকীভিঃ সহ গোমূত্রেণ পচেত্, তং চ ঘনীভূতং গুটিকাঃ কৃত্বা প্রাতরেব খাদেত্| হরীতকীপ্রমাণং চূর্ণাচ্চতুর্থাংশং, গোমূত্রং তু চতুর্গুণম্||৪৯-৫১||-

Adhikarana 37 (52) · Śloka 53

সশূলে সোন্নতেঽস্পন্দে দাহপাকরুগন্বিতে ||৫২|| গুল্মে রক্তং জলৌকোভিঃ সিরামোক্ষেণ বা হরেত্ |৫৩|

ইদানীমবস্থাযাং গুল্মে রক্তমোক্ষণমাহ- সশূলে ইত্যাদি| অস্পন্দে অচলে| পাকরুগন্বিতে পাকবেদনাযুক্তে, জলৌকোভী রক্তং হরেত্ গুল্মস্থানে এব, সিরামোক্ষেণ তু বাহ্বোঃ, তন্ত্রান্তরোক্তত্বাত্| কেচিত্ ‘অলাবুপাতনং চাপি গুল্মে শস্তং কফাত্মকে’ ইতি পঠন্তি||৫২||-

Adhikarana 38 (53) · Śloka 54

সুখোষ্ণা জাঙ্গলরসাঃ সুস্নিগ্ধা ব্যক্তসৈন্ধবাঃ ||৫৩|| কটুত্রিকসমাযুক্তা হিতাঃ পানে তু গুল্মিনাম্ |৫৪|

গুল্মিনাং জাঙ্গলরস্য পানমাহ- সুখোষ্ণা ইত্যাদি| সুখোষ্ণা ঈষদুষ্ণাঃ| জাঙ্গলরসা জাঙ্ঘালবিষ্কিরমাংসরসাঃ সংস্কৃতাঃ| সুস্নিগ্ধাঃ সম্যক্ স্নেহসংস্কৃতাঃ| হিতা ইতি ‘যথাদোষং’ ইতি শেষঃ||৫৩||-

Adhikarana 39 (54) · Śloka 55

পেযা বাতহরৈঃ সিদ্ধাঃ কৌলত্থা সংস্কৃতা রসাঃ ||৫৪|| খলাঃ সপঞ্চমূলাশ্চ গুল্মিনাং ভোজনে হিতাঃ |৫৫|

ভোজনার্থমাহ- পেযেত্যাদি| বাতহরৈঃ ভদ্রদার্বাদিভিঃ| সংস্কৃতাঃ স্নেহাদিভিঃ| খলাঃ কপিত্থদাডিমতক্রশাকাদিসংস্কৃতাঃ ‘কচিলা’ ইতি প্রসিদ্ধাঃ| সপঞ্চমূলাঃ পঞ্চমূলসহিতাঃ, এতেন পঞ্চমূলসহিতৈঃ কপিত্থাদিভিঃ কৃতা ইত্যর্থঃ| ভোজনে হিতা যথাদোষমিত্যুপস্কারঃ||৫৪||-

Adhikarana 40 (55) · Śloka 55

বদ্ধবর্চোনিলানাং তু সার্দ্রকং ক্ষীরমিষ্যতে ||৫৫||

অবস্থাবশেন গুল্মে ভোজনবিশেষমাহ- বদ্ধেত্যাদি| বদ্ধবর্চোনিলানাং নিরুদ্ধপুরীষবাযূনাম্| সার্দ্রকম্ আর্দ্রকসহিতম্| ইষ্যতে ‘ভোজনে’ ইতি শেষঃ||৫৫||

Adhikarana 41 (56) · Śloka 56

কুম্ভীপিণ্ডেষ্টকাস্বেদান্ কারযেত্ কুশলো ভিষক্ |৫৬|

আন্তরোপচারমভিধাযাবস্থাযাং বাহ্যোপচারং স্বেদমাহ- কুম্ভীপিণ্ডেষ্টকাস্বেদানিত্যাদি| কুম্ভীপ্রভৃতিস্বেদাঃ স্বেদাধ্যাযে অভিহিতাঃ| নিপুণতযা স্বেদান্ কারযেত্|৫৬|-

Adhikarana 42 (56) · Śloka 57

গুল্মিনঃ সর্ব এবোক্তা দুর্বিরেচ্যতমা ভৃশম্ ||৫৬|| অতশ্চৈতাংস্তু সুস্বিন্নান্ স্রংসনেনোপপাদযেত্ |৫৭|

বাতশ্লেষ্মাত্মকে সশূলে কঠিনে চ গুল্মে গুল্মিনো বিরেকমাহ- গুল্মিন ইত্যাদি| সুখিন্নানিতি স্নেহো হি স্বেদেনৈবাক্ষিপ্তঃ, তেন সম্যক্ স্নিগ্ধস্বিন্নান্| স্রংসনেন বিরেকেণ| উপপাদযেত্ যোজযেত্||৫৬||-

Adhikarana 43 (57-58) · Śloka 59

বিম্লাপনাভ্যঞ্জনানি তথৈব দহনানি চ ||৫৭|| উপনাহাশ্চ কর্তব্যাঃ সুখোষ্ণাঃ সাল্বণাদযঃ | উদরোক্তানি সর্পীংষি মূত্রবর্তিক্রিযাস্তথা ||৫৮|| লবণানি চ যোজ্যানি যান্যুক্তান্যনিলামযে |৫৯|

কিং গুল্মে বিরেক এব কার্যং উতান্যদপীত্যাহ- বিম্লাপনাভ্যঞ্জনানীত্যাদি| বিম্লাপনম্ অঙ্গুল্যাদিনা গুল্মস্য মর্দনং, দহনং জাম্ববৌষ্ঠাদিনা| সাল্বণাদয ইত্যত্র আদিশব্দঃ প্রকারে; তেন সাল্বণপ্রকারা অন্যেঽপ্যুপনাহস্বেদাঃ পচ্যমানাভিমুখে গুল্মে কার্যাঃ| উদরোক্তানি সর্পীংষি ‘হরীতকীচূর্ণপ্রস্থং’ ইত্যাদিকানি| মূত্রবর্তিক্রিযাস্তথেতি উদরোক্তা ‘বমনশিরোবিরেচনদ্রব্যাণাং’ ইত্যাদিকাঃ| লবণানি পত্রলবণস্নেহলবণকল্যাণলবণানি| অনিলামযে বাতব্যাধৌ| কেচিত্ ‘সর্পীংষি’ ইত্যস্যাগ্রে ‘চূর্ণানি’ ইতি পঠিত্বা নারাচকাদয ইতি ব্যাখ্যানযন্তি||৫৭-৫৮||-

Adhikarana 44 (59) · Śloka 60

বাতবর্চোনিরোধে তু সামুদ্রার্দ্রকসর্ষপৈঃ ||৫৯|| কৃত্বা পাযৌ বিধাতব্যা বর্তযো মরিচোত্তরাঃ |৬০|

ইদানীং মূত্রবর্তিপ্রযোগাবস্থামপরবর্তিং চাহ- বাতেত্যাদি| সামুদ্রং সমুদ্রলবণং, সমুদ্রফেনমপরে| মরিচোত্তরা মরিচপ্রধানাঃ||৫৯||-

Adhikarana 45 (60) · Śloka 61

দন্তীচিত্রকমূলেষু তথা বাতহরেষু চ ||৬০|| কুর্যাদরিষ্টান্ সর্বাংশ্চ শ্লোকস্থানে যথেরিতান্ |৬১|

দন্তীচিত্রকমূলেষ্বিত্যাদি| বাতহরেষু বিদারিগন্ধাপ্রভৃতিষু| শ্লোকস্থানে যথেরিতানিতি যথা সূত্রস্থানে বিরেচনকল্পে আসবকরণমুক্তং, তেনৈব প্রকারেণাত্রাপি দন্ত্যাদিক্বাথেঽরিষ্টানাসবান্ কুর্যাত্| অন্যে তু ‘শ্লোকস্থানে’ ইত্যত্র দ্বিতীযং স্থানশব্দং লুপ্তং বর্ণযন্তি, লুপ্তস্থানশব্দেন গুল্মপ্রতিষেধং গৃহ্ণন্তি| তেনাত্রোক্তবৃশ্চীবাদ্যরিষ্টবদ্দন্ত্যাদিক্বাথে মধুপথ্যাচূর্ণপ্রক্ষেপেণারিষ্টকরণং, সূত্রস্থানোক্তপ্রকারেণ বাঽঽসবকরণম্||৬০||-

Adhikarana 46 (61) · Śloka 61

স্বাদেদ্বাঽপ্যঙ্কুরান্ ভৃষ্টান্ পূতীকনৃপবৃক্ষযোঃ ||৬১||

স্বাদেদিত্যাদি| অঙ্কুরান্ কোমলপল্লবান্| ভৃষ্টানিতি ‘স্নেহেন’ ইতি শেষঃ; অন্যে অগ্নিনা ভৃষ্টানিত্যাহুঃ, তন্মতে বাতকারিণোঽপ্যঙ্কুরা ব্যাধিপ্রত্যনীকত্বাদ্গুল্মে হিতাঃ| পূতীকঃ চিরবিল্বঃ, নৃপবৃক্ষো গিরিমালকঃ||৬১||

Adhikarana 47 (62) · Śloka 62

ঊর্ধ্ববাতং মনুষ্যং চ গুল্মিনং ন নিরূহযেত্ |৬২|

ইদানীং গুল্মে হিতস্যাপি নিরূহস্যাবস্থাযাং নিষেধমাহ- ঊর্ধ্ববাতমিত্যাদি| ঊর্ধ্ববাতম্ ঊর্ধ্ববাতযুক্তং গুল্মিনং মনুষ্যং ন নিরূহযেদিতি সম্বন্ধঃ| কেচিদিমং পাঠং ন পঠন্তি|৬২|-

Adhikarana 48 (62-63) · Śloka 63

পিবেত্ত্রিবৃন্নাগরং বা সগুডাং বা হরীতকীম্ ||৬২|| গুগ্গুলুং ত্রিবৃতাং দন্তীং দ্রবন্তীং সৈন্ধবং বচাম্ | মূত্রমদ্যপযোদ্রাক্ষারসৈর্বীক্ষ্য বলাবলম্ ||৬৩||

পিবেদিত্যাদি| পিবেদিতি বক্ষ্যমাণেন মূত্রমদ্যাদিদ্রবেণ; অন্যে পানীযেন পিবেদিত্যাহুঃ| ত্রিবৃন্নাগরমিত্যেকো যোগঃ, সগুডাং বা হরীতকীমিতি দ্বিতীযঃ| গুগ্গুলুমিত্যাদি| দ্রবন্তী চীরিতপত্রা দন্তীভেদঃ| পযঃ দুগ্ধং, দ্রক্ষারসঃ দ্রাক্ষাস্বরসঃ| বীক্ষ্য বলাবলমিতি ‘দোষাদীনাং’ ইতি বাক্যশেষঃ| অত্রাপি পিবেদিতি সম্বন্ধনীযম্||৬২-৬৩||

Adhikarana 49 (64) · Śloka 64

এবং পীলূনি ভৃষ্টানি পিবেত্ সলবণানি তু |৬৪|

এবমিত্যাদি| এবমিতি মূত্রাদিভিরিত্যর্থঃ| (ভৃষ্টানি স্নেহেন )|৬৪|-

Adhikarana 50 (64) · Śloka 65

পিপ্পলীপিপ্পলীমূলচব্যচিত্রকসৈন্ধবৈঃ ||৬৪|| যুক্তা হন্তি সুরা গুল্মং শীঘ্রং কালে প্রযোজিতা |৬৫|

পিপ্পলীত্যাদি| সুরা পৈষ্টী| হন্তীত্যত্র শীঘ্রমিতি সম্বধ্যতে| কালে আধ্মানাদিকাযামবস্থাযাম্||৬৪||-

Adhikarana 51 (65) · Śloka 66

বদ্ধবিণ্মারুতো গুল্মী ভুঞ্জীত পযসা যবান্ ||৬৫|| কুল্মাষান্ বা বহুস্নেহান্ ভক্ষযেল্লবণোত্তরান্ |৬৬|

বদ্ধেত্যাদি| পযসা দুগ্ধেন| যবান্ বাট্যাদিকৃতান্| কুল্মাষান্ যবপিষ্টমযান্ ভক্ষ্যান্| লবণোত্তরান্ সৈন্ধবপ্রধানান্||৬৫||-

Adhikarana 52 (66) · Śloka 67

অথাস্যোপদ্রবঃ শূলঃ কথঞ্চিদুপজাযতে ||৬৬|| শূলং নিখানিতমিবাসুখং যেন তু বেত্ত্যসৌ |৬৭|

ইদানীং গুল্মোপদ্রবমাহ- অথেত্যাদি| অস্য গুল্মস্য, উপদ্রবঃ পশ্চাত্কালভাবী কথঞ্চিত্ স্বহেতুভিরিত্যর্থঃ| শূল উপজাযতে| শূলং নিখানিতমিব কীলকং নিখানিতমিবেত্যর্থঃ||৬৬||-

Adhikarana 53 (67-68) · Śloka 69

তত্র বিণ্মূত্রসংরোধঃ কৃচ্ছ্রোচ্ছ্বাসঃ স্থিরাঙ্গতা ||৬৭|| তৃষ্ণা দাহো ভ্রমোঽন্নস্য বিদগ্ধপরিবৃদ্ধিতা | রোমহর্ষোঽরুচিশ্ছর্দির্ভুক্তবৃদ্ধির্জডাঙ্গতা ||৬৮|| বায্বাদিভির্যথাসঙ্খ্যং মিশ্রৈর্বা... |৬৯|

তস্যৈবোপদ্রবস্য দোষবিশেষেণ লিঙ্গং সঙ্খ্যাং চাহ- তত্রেত্যাদি| তত্রেত্যুপদ্রবে শূলে| স্থিরাঙ্গতা কঠিনাঙ্গতা| অন্নস্য বিদগ্ধপরিবৃদ্ধিতা অন্নস্য বিদাহে শূলস্য পরিবৃদ্ধির্ভবতীত্যর্থঃ| ভুক্তবৃদ্ধিরিতি ভুক্তস্য বৃদ্ধিঃ ভুক্তমাত্রে শূলস্য বৃদ্ধির্ভবতীত্যর্থঃ| জডাঙ্গতা অঙ্গানাং জডতা| মিশ্রৈরিতি দ্বন্দ্বৈঃ সান্নিপাতিকৈশ্চেত্যর্থঃ| বিণ্মূত্রসংরোধ ইত্যাদিকং বাতজশূললক্ষণং, তৃষ্ণাদাহ ইত্যাদিকং পিত্তজশূললক্ষণং, রোমহর্ষোঽরুচিরিত্যাদিকং শ্লেষ্মজশূললক্ষণং, দ্বিদোষলিঙ্গং দ্বন্দ্বৈঃ, সর্বলিঙ্গং সমস্তৈঃ||৬৭-৬৮||-

Adhikarana 54 (69-72) · Śloka 73

...বীক্ষ্য যোজযেত্ | পথ্যাত্রিলবণং ক্ষারং হিঙ্গুতুম্বুরুপৌষ্করম্ ||৬৯|| যবানীং চ হরিদ্রাং চ বিডঙ্গান্যম্লবেতসম্ | বিদারীত্রিফলাঽভীরুশৃঙ্গাটীগুডশর্করাঃ ||৭০|| কাশ্মরীফলযষ্ট্যাহ্বপরূষকহিমানি চ | ষড্গ্রন্থাতিবিষাদারুপথ্যামরিচবৃক্ষজান্ ||৭১|| কৃষ্ণামূলকচব্যং চ নাগরক্ষারচিত্রকান্ | উষ্ণাম্লকাঞ্জিকক্ষীরতোযৈঃ শ্লোকসমাপনান্ ||৭২|| যথাক্রমং বিমিশ্রাংশ্চ দ্বন্দ্বে সর্বাংশ্চ সর্বজে |৭৩|

অতঃ পরমুপদ্রবশূলস্য চিকিত্সিতমাহ- বীক্ষ্যেত্যাদি| বীক্ষ্যেতি বাতাদিভেদেন শূলমিত্যর্থঃ| ত্রিলবণং সৈন্ধবসৌবর্চলবিডানি| ক্ষারো যবক্ষারঃ| অভীরুঃ শতাবরী, শৃঙ্গাটী জলজং দ্রব্যং ত্রিকণ্টকফলং| গুডশর্করা গাঙ্গেটীফলম্ | হিমং চন্দনম্| ষড্গ্রন্থা বচা| বৃক্ষজ ইন্দ্রযবঃ| মূলকং পিপ্পলীমূলম্| উষ্ণশব্দোঽম্লকাঞ্জিকাদিভিঃ সম্বধ্যতে| শ্লোকসমাপনান্ ‘যোগান্’ ইতি শেষঃ| যথাক্রমমিতি পথ্যাদ্যম্লবেতসান্তমুষ্ণাম্লকাঞ্জিকেন বাতিকে, বিদার্যাদিহিমান্তুমুষ্ণক্ষীরেণ পৈত্তিকে, ষড্গ্রন্থাদিচিত্রকান্তমুষ্ণতোযেন শ্লৈষ্মিকে; বিমিশ্রং দ্বন্দ্বে ইতি পথ্যাদিবিদার্যাদী বাতপৈত্তিকে, পথ্যাদিষড্গ্রন্থাদী বাতশ্লৈষ্মিকে, বিদার্যাদিষড্গ্রন্থাদী পিত্তশ্লৈষ্মিকে, সর্বাংশ্চ পথ্যাদীন্ ত্রীন্ সন্নিপাতে||৬৯-৭২||-

Adhikarana 55 (73-74) · Śloka 75

তথৈব সেকাবগাহপ্রদেহাভ্যঙ্গভোজনম্ ||৭৩|| শিশিরোদকপূর্ণানাং ভাজনানাং চ ধারণম্ | বমনোন্মর্দনস্বেদলঙ্ঘনক্ষপণক্রিযাঃ ||৭৪|| স্নেহাদিশ্চ ক্রমঃ সর্বো বিশেষেণোপদিশ্যতে |৭৫|

কিমেতদেবোপদ্রবশূলে কার্যমুতান্যদপীত্যাহ- তথৈবেত্যাদি| তথৈবেতি যথাসঙ্খ্যমিত্যর্থঃ| তেন সেকাদিকং বাতিকে, শিশিরোদকাদিকং পৈত্তিকে, বমনাদিকং শ্লৈষ্মিকে| স্নেহাদিক্রমশ্চ যথাদোষং যথাবস্থং সর্বেষামেব, দ্বন্দ্বজে দ্বযং, সান্নিপাতিকে সমস্তম্| ক্ষপণক্রিযা অন্যা অপি কফক্ষযকরী||৭৩-৭৪||-

Adhikarana 56 (75) · Śloka 76

বল্লূরং মূলকং মত্স্যান্ শুষ্কশাকানি বৈদলম্ ||৭৫|| ন খাদেদালুকং গুল্মী মধুরাণি ফলানি চ |৭৬|

গুল্মোপদ্রবমভিধায গুল্মে বর্জ্যমাহ- বল্লূরং মূলকমিত্যাদি| বল্লূরং শুষ্কমাংসম্| বৈদলং মুদ্গবনমুদ্গাদিকম্| আলুকং পিণ্ডালুকাদিভেদেনানেকপ্রকারম্| মধুরাণি ফলানি ক্ষীরবৃক্ষফলানি চোচমোচাদীনি চ| চকারাদেবংবিধান্যন্যান্যপি বর্জ্যানি| অস্যাগ্রে কেচিত্ ‘লঘ্বন্নং দীপনং স্নিগ্ধমুষ্ণং বাতানুলোমনম্| বৃংহণং চ ভবেদ্যচ্চ তদ্ধিতং সর্বগুল্মিনাম্|| স্থানেঽবসেকো রক্তস্য বাহুমধ্যে সিরাব্যধঃ| স্বেদোঽনুলোমনং চৈব প্রশস্তং সর্বগুল্মিনাম্’ ইত্যাদিকং পঠন্তি; স চাভাবান্ন লিখিতঃ| (ইতি ডহ্লণেনান্যগ্রন্থদর্শনাদুক্তম্)||৭৫||-

Adhikarana 57 (76) · Śloka 77

বিনা গুল্মেন যচ্ছূলং গুল্মস্থানেষু জাযতে ||৭৬|| নিদানং তস্য বক্ষ্যামি রূপং চ সচিকিত্সিতম্ |৭৭|

গুল্মোপদ্রবং শূলমভিধাযেদানীং কেবলং শূলমাহ- বিনেত্যাদি| গুল্মস্থানেষু গুল্মপ্রতিষেধোক্তেষু| অন্যে ‘বিনা গুল্মেন’ ইত্যাদিশ্লোকং পরিত্যজ্য ‘অথাতঃ শূলপ্রতিষেধং ব্যাখ্যাস্যামঃ’ ইতি প্রতিজ্ঞাং পঠিত্বা বাতমূত্রপুরীষাণাং নিগ্রহাদিত্যাদিনা পৃথগেব শূলাধ্যাযং পঠন্তি; তে চ পূর্বপরিপাটীং ত্যজন্তি| অপরে বিনা গুল্মেনেত্যাদিকং সমস্তমপি অসৌ শ্রুতং ভণিত্বা পরিত্যজন্তি| অস্মাভিস্তু সর্বমতানুসারিভির্জেজ্জটাভিপ্রাযেণ পঠিতঃ||৭৬||-

Adhikarana 58 (77-80) · Śloka 80

বাতমূত্রপুরীষাণাং নিগ্রহাদতিভোজনাত্ ||৭৭|| অজীর্ণাধ্যশনাযাসবিরুদ্ধান্নোপসেবনাত্ | পানীযপানাত্ ক্ষুত্কালে বিরূঢানাং চ সেবনাত্ ||৭৮|| পিষ্টান্নশুষ্কমাংসানামুপযোগাত্তথৈব চ | এবংবিধানাং দ্রব্যাণামন্যেষাং চোপসেবনাত্ ||৭৯|| বাযুঃ প্রকুপিতঃ কোষ্ঠে শূলং সঞ্জনযেদ্ভৃশম্ | নিরুচ্ছ্বাসী ভবেত্তেন বেদনাপীডিতো নরঃ ||৮০||

শূলস্য হেতুং সম্প্রাপ্তিং চাহ- বাতমূত্রপুরীষাণামিত্যাদি| নিগ্রহাত্ বেগকালেঽবরোধাত্| অজীর্ণম্ আমবিদগ্ধাদিভেদভিন্নম্| অধ্যশনং সাজীর্ণভোজনম্| আযাসঃ শরীরাযাসজনকং কর্ম| বিরুদ্ধান্নং হিতাহিতীযোক্তম্| বিরূঢানাং বিগতরোহাণামঙ্কুরিতানাং বা| এবংবিধানাং দোষপ্রকোপণানাম্| কোষ্ঠে সর্বস্মিন্নুদরে| নিরুচ্ছ্বাসঃ নিরুদ্ধোচ্ছ্বাসঃ| তেন শূলেন| বাতমূত্রপুরীষাণাং নিগ্রহাদিত্যাদিরন্যেষাং চোপসেবনাদিত্যন্তো হেতুঃ, বাযুঃ প্রকুপিত ইত্যাদিশ্চ সম্প্রাপ্তিঃ||৭৭-৮০||

Adhikarana 59 (81) · Śloka 81

শঙ্কুস্ফোটনবত্তস্য যস্মাত্তীব্রাশ্চ বেদনাঃ | শূলাসক্তস্য লক্ষ্যন্তে তস্মাচ্ছূলমিহোচ্যতে ||৮১||

তত্ কস্মাচ্ছূলমুচ্যত ইত্যাহ- শঙ্ক্বিত্যাদি| শঙ্কুস্ফোটনবত্ কীলকাহননবত্তীব্রা বেদনাঃ, তস্য ব্যাধিতস্য, শূলাসক্তস্য শূলিনঃ; এতেনৈতদুক্তং ভবতি- যথা কস্যচিত্ কীলকাহননেন তীব্রা বেদনা লক্ষ্যতে তদ্বত্তস্য যস্মাদ্বেদনা লক্ষ্যতে তস্মাচ্ছূলমিহোচ্যতে||৮১||

Adhikarana 60 (82-83) · Śloka 83

নিরাহারস্য যস্যৈব তীব্রং শূলমুদীর্যতে | প্রস্তব্ধগাত্রো ভবতি কৃচ্ছ্রেণোচ্ছ্বসিতীব চ ||৮২|| বাতমূত্রপুরীষাণি কৃচ্ছ্রেণ কুরুতে নরঃ | এতৈর্লিঙ্গৈর্বিজানীযাচ্ছূলং বাতসমুদ্ভবম্ ||৮৩||

বাতশূললক্ষণমাহ- নিরাহারস্যেত্যাদি||৮২-৮৩||

Adhikarana 61 (84) · Śloka 85

তৃষ্ণা দাহো মদো মূর্চ্ছা তীব্রং শূলং তথৈব চ | শীতাভিকামো ভবতি শীতেনৈব প্রশাম্যতি ||৮৪|| এতৈর্লিঙ্গৈর্বিজানীযাচ্ছূলং পিত্তসমুদ্ভবম্ |৮৫|

পিত্তশূললক্ষণমাহ- তৃষ্ণেত্যাদি| শীতাভিকামঃ শীতাভিলাষঃ| প্রশাম্যতি ‘শূলং’ ইতি শেষঃ||৮৪||-

Adhikarana 62 (85-86) · Śloka 86

শূলেনোত্পীড্যমানস্য হৃল্লাস উপজাযতে ||৮৫|| অতীব পূর্ণকোষ্ঠত্বং তথৈব গুরুগাত্রতা | এতচ্ছ্লেষ্মসমুত্থস্য শূলস্যোক্তং নিদর্শনম্ ||৮৬||

কফশূললক্ষণমাহ- শূলেনেত্যাদি| হৃল্লাসঃ থূত্করণম্| নিদর্শনং লক্ষণম্||৮৫-৮৬||

Adhikarana 63 (87) · Śloka 88

সর্বাণি দৃষ্ট্বা রূপাণি নির্দিশেত্সান্নিপাতিকম্ | সন্নিপাতসমুত্থানমসাধ্যং তং বিনির্দিশেত্ ||৮৭|| শূলানাং লক্ষণং প্রোক্তং... |৮৮|

সান্নিপাতিকশূললক্ষণমাহ- সর্বাণীত্যাদি| ননু, কৈশ্চিত্ পূর্বাচার্যৈর্দোষভেদেন নিযতং স্থানং শূলস্যোক্তম্| তথাহি- “বাতাত্মকং বস্তিগতং বদন্তি, পিত্তাত্মকং চাপি বদন্তি নাভ্যাম্| হৃত্পার্শ্বকুক্ষৌ কফসন্নিবিষ্টং, সর্বেষু দেশেষু চ সন্নিপাতাত্”- ইতি; তত্ কথমত্র তথা নোক্তম্| সত্যং, কুপিতদোষাণাং স্বাশযে পরাশযে চ ব্যাধ্যুত্পাদকত্বান্ন নিযতং স্থানমস্তি, অতস্তথা নোক্তম্||৮৭||-

Adhikarana 64 (88) · Śloka 89

...চিকিত্সাং তু নিবোধ মে | আশুকারী হি পবনস্তস্মাত্তং ত্বরযা জযেত্ ||৮৮|| তস্য শূলাভিপন্নস্য স্বেদ এব সুখাবহঃ |৮৯|

চিকিত্সামিত্যাদি| নিবোধ জানীহি| মে মত্সকাশাত্| আশুকারীত্যাদি| আশুকারী শীঘ্রমত্যযকারিত্বাত্| হি যস্মাত্| তং বাতম্| তস্যেত্যাদি|- তস্য পুরুষস্য, শূলাভিপন্নস্য বাতিকশূলক্রান্তস্য; অন্যে তু তস্য বাতস্য যচ্ছূলং তেন আক্রান্তস্যেত্যাহুঃ||৮৮||-

Adhikarana 65 (89) · Śloka 89

পাযসৈঃ কৃশরাপিণ্ডৈঃ স্নিগ্ধৈর্বা পিশিতৈর্হিতঃ ||৮৯||

স চ স্বেদঃ কৈর্দ্রব্যৈঃ কার্য ইত্যাহ- পাযসৈরিত্যাদি| পাযসো দুগ্ধসিদ্ধাস্তণ্ডুলাঃ| কৃশরাপিণ্ডৈঃ তিলতণ্ডুলমাষকৃতযবাগূপিণ্ডৈঃ| হিত ইতি ‘স্বেদ’ ইতি শেষঃ||৮৯||

Adhikarana 66 (90-91) · Śloka 91

ত্রিবৃচ্ছাকেন বা স্নিগ্ধমুষ্ণং ভুঞ্জীত ভোজনম্ | চিরবিল্বাঙ্কুরান্ বাপি তৈলভৃষ্টাংস্তু ভক্ষযেত্ ||৯০|| বৈহঙ্গাংশ্চ রসান্ স্নিগ্ধান্ জাঙ্গলান্ শূলপীডিতঃ | যথালাভং নিষেবেত মাংসানি বিলশাযিনাম্ ||৯১||

ভোজনমাহ- ত্রিবৃচ্ছাকেনেত্যাদি| স্নিগ্ধাদিগুণং ভোজনং ত্রিবৃচ্ছাকেন সহ ভুঞ্জীতেতি পিণ্ডার্থঃ| চিরবিল্বাঙ্কুরানিত্যাদি| অঙ্কুরাঃ শুঙ্গাঃ| বৈহঙ্গাংশ্চেত্যাদি| জাঙ্গলান্ বৈহঙ্গান্, লাবাদিকৃতানিত্যর্থঃ| বিলেশযাঃ শ্বাবিচ্ছল্লকাদযঃ||৯০-৯১||

Adhikarana 67 (92) · Śloka 92

সুরা সৌবীরকং চুক্রং মস্তূদশ্বিত্তথা দধি | সকাললবণং পেযং শূলে বাতসমুদ্ভবে ||৯২||

সুরা সৌবীরকমিত্যাদি| সুরা পিষ্টভবা| সৌবীরকং কাঞ্জিকভেদঃ| চুক্রং শুক্তম্| মস্তু দধিমস্তু| উদশ্বিত্ অর্ধোদকং তক্রম্| তথেতি যথালাভমিত্যর্থঃ| কাললবণশব্দেন যদ্যপি নির্গন্ধসৌবর্চলমুচ্যতে, তথাঽপ্যত্র গন্ধবত্সৌবর্চলং গ্রাহ্যং, তন্ত্রান্তরোক্তত্বাত্||৯২||

Adhikarana 68 (93) · Śloka 93

কুলত্থযূষো যুক্তাম্লো লাবকীযূষসংস্কৃতঃ | সসৈন্ধবঃ সমরিচো বাতশূলবিনাশনঃ ||৯৩||

কুলত্থযূষ ইত্যাদি| যুক্তং মাত্রযোপহিতমম্লং দাডিমাদিকং যত্র স যুক্তাম্লঃ| লাবকীযূষসংস্কৃত ইতি লাবকেন কৃতো যূষো লাবকীযূষঃ, তেন সংস্কৃতঃ||৯৩||

Adhikarana 69 (94) · Śloka 95

বিডঙ্গশিগ্রুকম্পিল্লপথ্যাশ্যামাম্লবেতসান্ | সুরসামশ্বমূত্রীং চ সৌবর্চলযুতান্ পিবেত্ ||৯৪|| মদ্যেন বাতজং শূলং ক্ষিপ্রমেব প্রশাম্যতি |৯৫|

বিডঙ্গেত্যাদি| শিগ্রুঃ বিটপশাকং, শোভাঞ্জনমপরে| শ্যামা অরুণমূলা ত্রিবৃত্| সুরসা তুলসী| অশ্বমূত্রী শল্লকী||৯৪||-

Adhikarana 70 (95-99) · Śloka 100

পৃথ্বীকাজাজিচবিকাযবানীব্যোষচিত্রকাঃ ||৯৫|| পিপ্পল্যঃ পিপ্পলীমূলং সৈন্ধবং চেতি চূর্ণযেত্ | তানি চূর্ণানি পযসা পিবেত্ কাম্বলিকেন বা ||৯৬|| মধ্বাসবেন চুক্রেণ সুরাসৌবীরকেণ বা | অথবৈ(চৈ)তানি চূর্ণানি মাতুলুঙ্গরসেন বা ||৯৭|| তথা বদরযূষেণ ভাবিতানি পুনঃ পুনঃ | তানি হিঙ্গুপ্রগাঢানি সহ শর্করযা পিবেত্ ||৯৮|| সহ দাডিমসারেণ বর্তিঃ কার্যা ভিষগ্জিতা | সা বর্তির্বাতিকং শূলং ক্ষিপ্রমেব ব্যপোহতি ||৯৯|| গুডতৈলেন বা লীঢা পীতা মদ্যেন বা পুনঃ |১০০|

পৃথ্বীকেত্যাদি| পৃথ্বীকা হিঙ্গুপত্রিকা| অজাজী উত্তরাপথে জীরকবিশেষঃ| কাম্বলিকেন দধিমস্ত্বম্লসিদ্ধযূষেণ| চুক্রং শুক্তম্| সৌবীরকং বিরেচনদ্রব্যবিকল্পকথিতম্| পক্ষান্তরমাহ- অথবেত্যাদি| এতানি পূর্বোক্তানি চূর্ণানি, বীজপূরকরসেন বদরযূষেণ বা পুনঃ পুনর্ভাবিতানি হিঙ্গূত্কটানি শর্করযা সহ মাতুলুঙ্গরসেনৈব পিবেদিতি পিণ্ডার্থঃ| সহ দাডিমসারেণেত্যাদি|- তৈরেব চূর্ণৈর্দাডিমসারেণ সহ ভিষগ্জিতা বৈদ্যেন বর্তির্বা কার্যা| সা চ বর্তির্গুডতৈলেন লীঢা মদ্যেন বা পীতা সতী বাতিকং শূলং ক্ষিপ্রমেব হন্তীত্যর্থঃ||৯৫-৯৯||-

Adhikarana 71 (100) · Śloka 101

বুভুক্ষাপ্রভবে শূলে লঘু সন্তর্পণং হিতম্ ||১০০|| উষ্ণৈঃ ক্ষীরৈর্যবাগূভিঃ স্নিগ্ধৈর্মাংসরসৈস্তথা |১০১|

বুভুক্ষাপ্রভবে ইত্যাদি| লঘ্বিতি মাত্রযা স্বভাবেন চ| সন্তর্পণং ভোজনম্| উষ্ণৈরিতি ক্ষীরাদিভিঃ সম্বধ্যতে||১০০||-

Adhikarana 72 (101-102) · Śloka 103

বাতশূলে সমুত্পন্নে রূক্ষং স্নিগ্ধেন ভোজযেত্ ||১০১|| সুসংস্কৃতাঃ প্রদেযাঃ স্যুর্ঘৃতপূরা বিশেষতঃ | বারুণীং চ পিবেজ্জন্তুস্তথা সম্পদ্যতে সুখী ||১০২|| এতদ্বাতসমুত্থস্য শূলস্যোক্তং চিকিত্সিতম্ |১০৩|

বাতেত্যাদি| সুসংস্কৃতাঃ শুণ্ঠীমরিচাদিভিঃ| প্রদেযা দাতব্যাঃ| ঘৃতপূরা ঘৃতপূপা ইত্যর্থঃ| বারুণী সুরা| তথা তেন প্রকারেণ| সুখী সম্পদ্যতে সুখী ভবতীত্যর্থঃ| উপসংহারমাহ- এতদ্বাতসমুত্থস্যেত্যাদি||১০১-১০২||-

Adhikarana 73 (103-104) · Śloka 104

অথ পিত্তসমুত্থস্য ক্রিযাং বক্ষ্যাম্যতঃ পরম্ ||১০৩|| স সুখং ছর্দযিত্বা তু পীত্বা শীতোদকং নরঃ | শীতলানি চ সেবেত সর্বাণ্যুষ্ণানি বর্জযেত্ ||১০৪||

বাতশূলোপক্রমমভিধাযেদানীং পিত্তশূলচিকিত্সামাহ- অথেত্যাদি| অথেতি বাক্যালঙ্কারে, বাক্যোপক্রমে ইত্যন্যে| তদেষ চিকিত্সিতমাহ- স ইত্যাদি| স পিত্তশূলী নরঃ, শীতোদকং পীত্বা, সুখং যথা ভবতি তথা ছর্দযিত্বা, শীতলানি ভজেত, উষ্ণানি সর্বাণি বর্জযেদিতি পিণ্ডার্থঃ||১০৩-১০৪||

Adhikarana 74 (105) · Śloka 105

মণিরাজততাম্রাণি ভাজনানি চ সর্বশঃ | বারিপূর্ণানি তান্যস্য শূলস্যোপরি নিক্ষিপেত্ ||১০৫||

মণিরাজততাম্রাণীত্যাদি| রাজতং রূপ্যমযম্| সর্বশ আমুখাত্| অস্য পিত্তশূলিনঃ||১০৫||

Adhikarana 75 (106-107) · Śloka 107

গুডঃ শালির্যবাঃ ক্ষীরং সর্পিঃপানং বিরেচনম্ | জাঙ্গলানি চ মাংসানি ভেষজং পিত্তশূলিনাম্ ||১০৬|| রসান্ সেবেত পিত্তঘ্নান্ পিত্তলানি বিবর্জযেত্ | পালাশং ধান্বনং বাঽপি পিবেদ্যূষং সশর্করম্ ||১০৭||

গুডেত্যাদি| পিত্তঘ্নান্ রসান্ জাঙ্গলবর্গে যানি নির্দিষ্টানি পিত্তহরাণি মাংসানি তত্কৃতান্ রসানিত্যর্থঃ| পিত্তলানীত্যাদি| পিত্তলানি অন্নপানাদীনি| পালাশং যূষং মাংসাদমাংসরসমিত্যর্থঃ| ধান্বনং জাঙ্গলমাংসরসম্||১০৬-১০৭||

Adhikarana 76 (108) · Śloka 108

পরুষকাণি মৃদ্বীকাখর্জূরোদকজান্যপি | তত্ পিবেচ্ছর্করাযুক্তং পিত্তশূলনিবারণম্ ||১০৮||

পরূষকাণীত্যাদি| পরূষকাণি পরূষকফলানি| উদকজানি পদ্মানি||১০৮||

Adhikarana 77 (109) · Śloka 109

অশনে ভুক্তমাত্রে তু প্রকোপঃ শ্লৈষ্মিকস্য চ | বমনং কারযেত্তত্র পিপ্পলীবারিণা ভিষক্ ||১০৯||

শ্লৈষ্মিকশূলচিকিত্সামাহ- অশনে ইত্যাদি| অশনে ভোজনে| শ্লৈষ্মিকস্য শ্লেষ্মশূলস্য| তত্র শ্লেষ্মশূলে| পিপ্পলীবারিণা পিপ্পলীযুক্তপানীযেন, অন্যে বারিশব্দং ক্বাথে বর্তযন্তি, অপরে পিপ্পলীশব্দেন মদনফলবীজানি কথযন্তি||১০৯||

Adhikarana 78 (110) · Śloka 110

রূক্ষঃ স্বেদঃ প্রযোজ্যঃ স্যাদন্যাশ্চোষ্ণাঃ ক্রিযা হিতাঃ | পিপ্পলী শৃঙ্গবেরং চ শ্লেষ্মশূলে ভিষগ্জিতম্ ||১১০||

রূক্ষঃ স্বেদঃ প্রযোজ্য ইত্যাদি|- রূক্ষঃ স্বেদঃ স্নিগ্ধরহিতঃ করীষাদিকৃতঃ| পিপ্পলীশৃঙ্গবেরপ্রযোগশ্চূর্ণকল্কক্বাথাদিবিধিনা||১১০||

Adhikarana 79 (111) · Śloka 111

পাঠাং বচাং ত্রিকটুকং তথা কটুকরোহিণীম্ | চিত্রকস্য চ নির্যূহে পিবেদ্যূষং সহার্জকম্ ||১১১||

পাঠামিত্যাদি| পাঠাদীনি দ্রব্যাণি চূর্ণিতানি কল্কিতানি বা চিত্রকস্য নির্যূহে ক্বাথে পিবেদিত্যেকো যোগঃ| যূষং সহার্জকমিতি দ্বিতীযো যোগঃ| যূষং শূলহরশিম্বিধান্যযূষম্| অর্জকঃ কুঠেরকঃ||১১১||

Adhikarana 80 (112-115) · Śloka 115

এরণ্ডফলমূলানি মূলং গোক্ষুরকস্য চ | শালপর্ণীং পৃশ্নিপর্ণীং বৃহতীং কণ্টকারিকাম্ ||১১২|| দদ্যাচ্ছৃগালবিন্নাং চ সহদেবাং তথৈব চ | মহাসহাং ক্ষুদ্রসহাং মূলমিক্ষুরকস্য চ ||১১৩|| এতত্ সম্ভৃত্য সম্ভারং জলদ্রোণে বিপাচযেত্ | চতুর্ভাগাবশেষং তু যবক্ষারযুতং পিবেত্ ||১১৪|| বাতিকং পৈত্তিকং বাঽপি শ্লৈষ্মিকং সান্নিপাতিকম্ | প্রসহ্য নাশযেচ্ছূলং ছিন্নাভ্রমিব মারুতঃ ||১১৫||

এরণ্ডদ্বাদশকমাহ- এরণ্ডেত্যাদি| শৃগালবিন্না পৃশ্নিপর্ণীভেদঃ| মহাসহা মাষপর্ণী| ক্ষুদ্রসহা মুদ্গপর্ণী| ইক্ষুরকঃ কোকিলাক্ষকঃ| সম্ভৃত্য একীকৃত্য| এরণ্ডাদিদ্রব্যসম্ভারঃ চতুঃষষ্টিপলপ্রমিতঃ; তুলাপ্রমিত ইত্যন্যে| প্রসহ্য বলাত্কারেণ| পিবেদিত্যনেনাভ্যবহারেণাত্র সূচ্যতে; তেন তৃষ্ণাযাং পানমাচমনং বা তেন কার্যম্, অন্যথা দ্রোণচতুর্থাংশস্য সাধিতস্য জলস্যাপরক্বাথবত্ পলদ্বযপানে বৈযর্থ্যং স্যাত্| যদ্যপ্যযং যোগঃ সর্বশূলহরস্তথাপ্যত্যন্তকফশূলহরত্বাদত্রোক্তঃ| কেচিত্ ‘মূলং চেক্ষুরকস্য’ ইত্যত্র ‘দদ্যাচ্চৈবেক্ষুবালিকাম্’ ইতি পঠিত্বা খগ্গলীমিতি ব্যাখ্যানযন্তি||১১২-১১৫||

Adhikarana 81 (116) · Śloka 117

পিপ্পলী স্বর্জিকাক্ষারো যবাশ্চিত্রক এব চ | সেব্যং চৈতত্ সমানীয ভস্ম কুর্যাদ্বিচক্ষণঃ ||১১৬|| তদুষ্ণবারিণা পীতং শ্লেষ্মশূলে ভিষগ্জিতম্ |১১৭|

পিপ্পলীত্যাদি| সেব্যম্ উশীরং, তত্ ভস্ম||১১৬||-

Adhikarana 82 (117-119) · Śloka 119

রুণদ্ধি মারুতং শ্লেষ্মা কুক্ষিপার্শ্বব্যবস্থিতঃ ||১১৭|| স সংরুদ্ধঃ করোত্যাশু সাধ্মানং গুড্গুডাযনম্ | সূচীভিরিব নিস্তোদং কৃচ্ছ্রোচ্ছ্বাসী তদা নরঃ ||১১৮|| নান্নং বাঞ্ছতি নো নিদ্রামুপৈত্যর্তিনিপীডিতঃ | পার্শ্বশূলঃ স বিজ্ঞেযঃ কফানিলসমুদ্ভবঃ ||১১৯||

যদ্যপি চত্বারঃ শূলাঃ, তথাপি দোষধাতুমলসংসর্গাদাযতনবিশেষান্নিমিত্ততশ্চৈষাং বিকল্প ইতি কৃত্বা পার্শ্বাদিশূলমাহ- রুণদ্ধীত্যাদি| স বাযুঃ| আধ্মানম্ উদরাপূরঃ| গুড্গুডাযনমত্র অব্যক্তশব্দঃ| নো নিদ্রামুপৈতি ন নিদ্রাং প্রাপ্নোতীত্যর্থঃ||১১৭-১১৯||

Adhikarana 83 (120-122) · Śloka 123

তত্র পুষ্করমূলানি হিঙ্গু সৌবর্চলং বিডম্ | সৈন্ধবং তুম্বুরুং পথ্যাং চূর্ণং কৃত্বা তু পাযযেত্ ||১২০|| পার্শ্বহৃদ্বস্তিশূলেষু যবক্বাথেন সংযুতম্ | সর্পিঃ প্লীহোদরোক্তং বা ঘৃতং বা হিঙ্গুসংযুতম্ ||১২১|| বীজপূরকসারং বা পযসা সহ সাধিতম্ | এরণ্ডতৈলমথবা মদ্যমস্তুপযোরসৈঃ ||১২২|| ভোজযেচ্চাপি পযসা জাঙ্গলেন রসেন বা |১২৩|

পার্শ্বশূলে চিকিত্সিতমাহ- তত্রেত্যাদি| পুষ্করমূলাদীনি দ্রব্যাণি চূর্ণং কৃত্বা পার্শ্বাদিশূলেষু যবক্বাথেন সংযুতং পাযযেদিতি পিণ্ডার্থঃ| যদ্যপ্যযং যোগোঽপতন্ত্রকেঽপি পঠিতঃ, তথাঽপ্যত্রাম্লবেতসাভাবাত্ পুনঃ পঠিতঃ| সর্পিঃ প্লীহোদরোক্তমিত্যাদি প্লীহোদরোক্তং সর্পিঃ ষট্পলং, হিঙ্গুসংযুতং ঘৃতং বা অসিদ্ধমেব| পযসা ক্ষীরেণ, সাধিতং ক্বাথিতং, বীজপূরকসারং বীজপূরকফলবীজম্, অত্রাপি পাযযেদিতি সম্বধ্যতে| কেচিত্ ‘বীজপূরকসারং চ’ ইত্যত্র ‘পিবেদ্বীজকসারং চ’ ইতি পঠন্তি| এরণ্ডতৈলমিত্যাদি|- এরণ্ডতৈলং বা মদ্যাদিভির্যথাসাত্ম্যং যথাদোষং চ প্রাতরেব পিবেত্, জীর্ণে চ ক্ষীরেণ জাঙ্গলরসেন বা ভোজযেত্||১২০-১২২||-

Adhikarana 84 (123-125) · Śloka 125

প্রকুপ্যতি যদা কুক্ষৌ বহ্নিমাক্রম্য মারুতঃ ||১২৩|| তদাঽস্য ভোজনং ভুক্তং সোপস্তম্ভং ন পচ্যতে | উচ্ছ্বসিত্যামশকৃতা শূলেনাহন্যতে মুহুঃ ||১২৪|| নৈবাসনে ন শযনে তিষ্ঠন্ বা লভতে সুখম্ | কুক্ষিশূল ইতি খ্যাতো বাতাদামসমুদ্ভবঃ ||১২৫||

কুক্ষিশূলমাহ- প্রকুপ্যতীত্যাদি| আক্রম্য মন্দীকৃত্য| সোপস্তম্ভং স্তব্ধতান্বিতম্| উচ্ছ্বসিতি উচ্ছ্বাসং করোতি ‘পুরুষ’ ইতি শেষঃ| আমশকৃতা অপক্বপুরীষেণ| তিষ্ঠন্ ঊর্ধ্বীভবন্||১২৩-১২৫||

Adhikarana 85 (126) · Śloka 126

বমনং কারযেত্তত্র লঙ্ঘযেদ্বা যথাবলম্ | সংসর্গপাচনং কুর্যাদম্লৈর্দীপনসংযুতৈঃ ||১২৬||

কুক্ষিশূলে চিকিত্সামাহ- বমনং কারযেত্তত্রেত্যাদি| তত্র কুক্ষিশূলে| যথাবলং বলস্যানতিক্রমেণ| সংসর্গপাচনং পেযাদিক্রমপাচনম্| অম্লৈঃ দাডিমতক্রাদিভিঃ| দীপনসংযুতৈরিতি পঞ্চকোলযুতৈঃ||১২৬||

Adhikarana 86 (127) · Śloka 128

নাগরং দীপ্যকং চব্যং হিঙ্গু সৌবর্চলং বিডম্ | মাতুলুঙ্গস্য বীজানি তথা শ্যামোরুবূকযোঃ ||১২৭|| বৃহত্যাঃ কণ্টকার্যাশ্চ ক্বাথং শূলহরং পিবেত্ |১২৮|

ক্বাথমাহ- নাগরং দীপ্যকমিত্যাদি| নাগরাদিক্বাথং হিঙ্গুসৌর্বচলবিডপ্রক্ষেপং পিবেদিতি পিণ্ডার্থঃ| বীজানীতিশব্দো মাতুলুঙ্গাদিভিঃ কণ্টকারীপর্যন্তৈঃ সহ সম্বধ্যতে| শ্যামা বৃদ্ধদারকঃ| উরুবূকঃ রক্তৈরণ্ডঃ, শুক্লৈরণ্ডমপরে| বৃহতী অণুফলা স্থূলফলা বা||১২৭||-

Adhikarana 87 (128-129) · Śloka 129

বচা সৌবর্চলং হিঙ্গু কুষ্ঠং সাতিবিষাঽভযা ||১২৮|| কুটজস্য চ বীজানি সদ্যঃশূলহরাণি তু | বিরেচনে প্রযুঞ্জীত জ্ঞাত্বা দোষবলাবলম্ ||১২৯||

কুক্ষিশূলে বিরেচনমাহ- বচেত্যাদি| বচাদীনি কুটজবীজান্তানি সদ্যঃশূলহরাণি বিরেচনে দোষবলাবলং জ্ঞাত্বা প্রযুঞ্জীতেতি পিণ্ডার্থঃ| দোষবলাবলমিত্যত্রাদিশব্দো লুপ্তো দ্রষ্টব্যঃ, তেন প্রকৃত্যাদীনপি জ্ঞাত্বেত্যর্থঃ||১২৮-১২৯||

Adhikarana 88 (130) · Śloka 130

স্নেহবস্তীন্নিরূহাংশ্চ কুর্যাদ্দোষনিবর্হণান্ |১৩০|

কিং কুক্ষিশূলে বিরেচনমেব যুজ্যতে উতান্যদপীত্যাহ- স্নেহবস্তীনিত্যাদি|১৩০|-

Adhikarana 89 (130) · Śloka 131

উপনাহাঃ স্নেহসেকা ধান্যাম্লপরিষেচনম্ ||১৩০|| অবগাহাশ্চ শস্যন্তে যচ্চান্যদপি তদ্ধিতম্ |১৩১|

কুক্ষিশূলে উপনাহাদিস্বেদস্য প্রশস্তত্বমাহ- উপনাহা ইত্যাদি| উপনাহাঃ সাল্বণাপ্রকারাঃ| ধান্যাম্লং কাঞ্জিকম্| অবগাহো বাতহরদ্রবপূর্ণদ্রোণ্যাদিনিমজ্জনম্| যচ্চান্যদপীত্যাদি| তদ্ধিতং কুক্ষিশূলহিতং যদন্যদপি ভবতি তদস্য শস্যতে ইত্যর্থঃ||১৩০||

Adhikarana 90 (131-132) · Śloka 132

কফপিত্তাবরুদ্ধস্তু মারুতো রসমূর্চ্ছিতঃ ||১৩১|| হৃদিস্থঃ কুরুতে শূলমুচ্ছ্বাসারোধকং পরম্ | স হৃচ্ছূল ইতি খ্যাতো রসমারুতসম্ভবঃ ||১৩২||

হৃচ্ছূলমাহ- কফেত্যাদি| অবরুদ্ধো রুদ্ধঃ| রসমূর্চ্ছিতো রসসংযুতঃ| উচ্ছ্বাসারোধকং উচ্ছ্বাসস্য আসমন্তাদ্রোধকমিত্যর্থঃ| এতদ্ধৃচ্ছূলং যস্মাদ্ধৃদ্রোগবিলক্ষণং তস্মাদ্ধৃদ্রোগাদ্ভিন্নং, তথা সম্প্রাপ্তিভেদাচ্চ||১৩১-১৩২||

Adhikarana 91 (133) · Śloka 133

তত্রাপি কর্মাভিহিতং যদুক্তং হৃদ্বিকারিণাম্ |১৩৩|

হৃচ্ছূলে হৃদ্রোগোক্তাং ক্রিযামতিদিশন্নাহ- তত্রাপি কর্মাভিহিতমিত্যাদি| যদ্ধৃদ্বিকারিণাং হৃদ্রোগিণাং কর্মোক্তং তদত্রাপি হৃচ্ছূলেঽভিহিতমিতি পিণ্ডার্থঃ|১৩৩|-

Adhikarana 92 (133-134) · Śloka 134

সংরোধাত্ কুপিতো বাযুর্বস্তিমাবৃত্য তিষ্ঠতি ||১৩৩|| বস্তিবঙ্ক্ষণনাভীষু ততঃ শূলোঽস্য জাযতে | বিণ্মূত্রবাতসংরোধী বস্তিশূলঃ স মারুতাত্ ||১৩৪||

বস্তিশূলমাহ- সংরোধাদিত্যাদি| সংরোধাত্ মূত্রপুরীষাদীনামিত্যর্থঃ| বস্তিঃ মূত্রাধারঃ, বঙ্ক্ষণঃ গণ্ডকঃ||১৩৩-১৩৪||

Adhikarana 93 (135) · Śloka 135

নাভ্যাং বঙ্ক্ষণপার্শ্বেষু কুক্ষৌ মেঢ্রান্ত্রমর্দকঃ | মূত্রমাবৃত্য গৃহ্ণাতি মূত্রশূলঃ স মারুতাত্ ||১৩৫||

মূত্রশূলমাহ- নাভ্যামিত্যাদি| যদা মেঢ্রান্ত্রমর্দকো বাযুরাবৃত্য অবরুধ্য মূত্রং গৃহ্ণাতি , তদা নাভ্যাদিষু শূলো জাযতে| স চ মারুতাত্ মূত্রশূলো জ্ঞেযঃ||১৩৫||

Adhikarana 94 (136-139) · Śloka 139

বাযুঃ প্রকুপিতো যস্য রূক্ষাহারস্য দেহিনঃ | মলং রুণদ্ধি কোষ্ঠস্থং মন্দীকৃত্য তু পাবকম্ ||১৩৬|| শূলং সঞ্জনযংস্তীব্রং স্রোতাংস্যাবৃত্য তস্য হি | দক্ষিণং যদি বা বামং কুক্ষিমাদায জাযতে ||১৩৭|| সর্বত্র বর্ধতে ক্ষিপ্রং ভ্রমন্নথ সঘোষবান্ | পিপাসা বর্ধতে তীব্রা ভ্রমো মূর্চ্ছা চ জাযতে ||১৩৮|| উচ্চারিতো মূত্রিতশ্চ ন শান্তিমধিগচ্ছতি | বিট্শূলমেতজ্জানীযাদ্ভিষক্ পরমদারুণম্ ||১৩৯||

পুরীষশূলমাহ- বাযুরিত্যাদি| এবম্ভূতস্য দেহিনো বহ্নিং মন্দীকৃত্য স্রোতাংসি চাবৃত্য প্রকুপিতো বাযুস্তীব্রং শূলং সঞ্জনযন্ কোষ্ঠস্থং মলং রুণদ্ধি, তস্য চ দক্ষিণং বামং বা কুক্ষিং গৃহীত্বা শূলায জাযতে, স চ সর্বত্র ভ্রমন্ ঘোষবান্ শব্দযুক্তো বর্ধতে ইতি পিণ্ডার্থঃ| উচ্চারিতঃ সঞ্জাতপুরীষবেগঃ| নাধিগচ্ছতি ন প্রাপ্নোতি| পরমদারুণম্ অতিশযকষ্টকারি||১৩৬-১৩৯||

Adhikarana 95 (140-141) · Śloka 141

ক্ষিপ্রং দোষহরং কার্যং ভিষজা সাধু জানতা | স্বেদনং শমনং চৈব নিরূহাঃ স্নেহবস্তযঃ ||১৪০|| পূর্বোদ্দিষ্টান্ পাযযেত যোগান্ কোষ্ঠবিশোধনান্ | উদাবর্তহরাশ্চাস্য ক্রিযাঃ সর্বাঃ সুখাবহাঃ ||১৪১||

ইদানীং বস্তিশূলদীনাং সামান্যচিকিত্সামাহ- ক্ষিপ্রমিত্যাদি| দোষহরং শোধনম্| সাধু শোভনম্| শমনং সংশমনম্||১৪০-১৪১||

Adhikarana 96 (142-144) · Śloka 144

অতিমাত্রং যদা ভুক্তং পাবকে মৃদুতাং গতে | স্থিরীভূতং তু তত্কোষ্ঠে বাযুরাবৃত্য তিষ্ঠতি ||১৪২|| অবিপাকগতং হ্যন্নং শূলং তীব্রং করোত্যতি | মূর্চ্ছাঽঽধ্মানং বিদাহশ্চ হৃদুত্ক্লেশো বিলম্বিকা ||১৪৩|| বিরিচ্যতে ছর্দযতি কম্পতেঽথ বিমুহ্যতি | অবিপাকাদ্ভবেচ্ছূলস্ত্বন্নদোষসমুদ্ভবঃ ||১৪৪||

অতিমাত্রমিত্যাদি| অবিপাকগতম্ অবিপাকং প্রাপ্তম্||১৪২-১৪৪||

Adhikarana 97 (145) · Śloka 145

বমনং লঙ্ঘনং স্বেদঃ পাচনং ফলবর্তযঃ | ক্ষারাশ্চূর্ণানি গুটিকাঃ শস্যন্তে শূলনাশনাঃ ||১৪৫||

তস্য চিকিত্সিতমাহ- বমনমিত্যাদি||১৪৫||

Adhikarana 98 (146) · Śloka 146

গুল্মাবস্থাঃ ক্রিযাঃ কার্যা যথাবত্ সর্বশূলিনাম্ ||১৪৬||

ইদনীমুপসংহারমাহ- গুল্মাবস্থা ইত্যাদি| যথাবত্ যথাবস্থম্||১৪৬||

Adhikarana puShpikA · Śloka 42

ইতি সুশ্রুতসংহিতাযামুত্তরতন্ত্রান্তর্গতে কায চিকিত্সাতন্ত্রে গুল্মপ্রতিষেধো নাম (চতুর্থোঽধ্যাযঃ, আদিতঃ) দ্বিচত্বারিংশোঽধ্যাযঃ ||৪২||

ইতি শ্রীডল্হ(হ্ল)ণবিরচিতাযাং সুশ্রুতব্যাখ্যাযাং নিবন্ধসঙ্গ্রহাখ্যাযামুত্তরতন্ত্রে কাযচিকিত্সাযাং গুল্মপ্রতিষেধো নাম দ্বিচত্বারিংশত্তমোঽধ্যাযঃ||৪২||