Adhikarana 1 (1-2) · Śloka 2
অথাতঃ কৃষ্ণগতরোগবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातः कृष्णगतरोगविज्ञानीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
শুক্লগতরোগবিজ্ঞানীযানন্তরং প্রত্যাসত্ত্যা কৃষ্ণমণ্ডলগতা রোগাঃ প্রতিপাদ্যা ইত্যাত আহ- অথাত ইত্যাদি||১-২||
Adhikarana 2 (3) · Śloka 3
যত্ সব্রণং শুক্র(ক্ল)মথাব্রণং বা পাকাত্যযশ্চাপ্যজকা তথৈব | চত্বার এতেঽভিহিতা বিকারাঃ কৃষ্ণাশ্রযাঃ সঙ্গ্রহতঃ পুরস্তাত্ ||৩||
यत् सव्रणं शुक्र(क्ल)मथाव्रणं वा पाकात्ययश्चाप्यजका तथैव | चत्वार एतेऽभिहिता विकाराः कृष्णाश्रयाः सङ्ग्रहतः पुरस्तात् ||३||
🔊 Audio coming soon
তানেব কৃষ্ণগতরোগান্নামভিঃ প্রাহ- যদিত্যাদি| সঙ্খ্যেযনির্দেশাদেব চতুঃসঙ্খ্যাযাং লব্ধাযাং চতুঃসঙ্খ্যাকরণং তন্ত্রান্তরোদ্দিষ্টাতিরিক্তসঙ্খ্যানিরাসার্থম্| সঙ্গ্রহতঃ সম্যগুপাদানতঃ||৩||
Adhikarana 3 (4) · Śloka 4
নিমগ্নরূপং হি ভবেত্তু কৃষ্ণে সূচ্যেব বিদ্ধং প্রতিভাতি যদ্বৈ | স্রাবং স্রবেদুষ্ণমতীব রুক্ চ তত্ সব্রণং শুক্র(ক্ল)মুদাহরন্তি ||৪||
निमग्नरूपं हि भवेत्तु कृष्णे सूच्येव विद्धं प्रतिभाति यद्वै | स्रावं स्रवेदुष्णमतीव रुक् च तत् सव्रणं शुक्र(क्ल)मुदाहरन्ति ||४||
🔊 Audio coming soon
তানেব লক্ষণৈর্নির্দিশন্নাহ- নিমগ্নেত্যাদি| নিমগ্নরূপম্ অন্তঃপ্রবিষ্টরূপম্, ঈষদ্দৃশ্যরূপমিত্যর্থঃ| সূচ্যেব বিদ্ধমিত্যনেন বর্তুলত্বং দর্শিতং, রক্তস্যাগ্নেযত্বাদুষ্ণাশ্রুতা অত্যর্থং চ পীডা ভবতি| অব্রণশুক্লে মন্দরুগশ্রুতা বক্ষ্যতে, তস্মাদস্মিন্ সক্ষতে শুক্রে ক্ষতযোগান্নেত্রস্য সুকুমারত্বাচ্চাতীব বেদনা যুক্তা| অত্র বিদেহঃ- “রক্তরাজীনিভং কৃষ্ণে বিদ্রুমাভং প্রলক্ষ্যতে| সূচ্যগ্রেণৈব তচ্ছুক্রমুষ্ণাশ্রুস্রাবি সব্রণম্”- ইতি| সব্রণং সক্ষতমিত্যর্থঃ| রক্তজমিদমসাধ্যং চ||৪||
Adhikarana 4 (5) · Śloka 5
দৃষ্টেঃ সমীপে ন ভবেত্তু যচ্চ ন চাবগাঢং ন চ সংস্রবেদ্ধি | অবেদনাবন্ন চ যুগ্মশুক্রং তত্সিদ্ধিমাপ্নোতি কদাচিদেব ||৫||
दृष्टेः समीपे न भवेत्तु यच्च न चावगाढं न च संस्रवेद्धि | अवेदनावन्न च युग्मशुक्रं तत्सिद्धिमाप्नोति कदाचिदेव ||५||
🔊 Audio coming soon
ইদানীং তস্যৈবাবস্থাদ্বারেণ কাদাচিক্তং সাধ্যত্বং দর্শযন্নাহ- দৃষ্টেরিত্যাদি| সংস্রবেদ্ধীত্যত্র সংশব্দোঽতিশযার্থঃ| অবেদনাবত্ মন্দবেদনম্||৫||
Adhikarana 5 (6-7) · Śloka 7
বিচ্ছিন্নমধ্যং পিশিতাবৃতং বা চলং সিরাসক্তমদৃষ্টিকৃচ্চ | দ্বিত্বগ্গতং লোহিতমন্ততশ্চ চিরোত্থিতং চাপি বিবর্জনীযম্ ||৬|| উষ্ণাশ্রুপাতঃ পিডকা চ কৃষ্ণে যস্মিন্ ভবেন্মুদ্গনিভং চ শুক্রম্ | তদপ্যসাধ্যং প্রবদন্তি কেচিদন্যচ্চ যত্তিত্তিরিপক্ষতুল্যম্ ||৭||
विच्छिन्नमध्यं पिशितावृतं वा चलं सिरासक्तमदृष्टिकृच्च | द्वित्वग्गतं लोहितमन्ततश्च चिरोत्थितं चापि विवर्जनीयम् ||६|| उष्णाश्रुपातः पिडका च कृष्णे यस्मिन् भवेन्मुद्गनिभं च शुक्रम् | तदप्यसाध्यं प्रवदन्ति केचिदन्यच्च यत्तित्तिरिपक्षतुल्यम् ||७||
🔊 Audio coming soon
তস্যৈব কদাচিত্সাধ্যস্য লক্ষণং প্রতিপাদ্যাসাধ্যস্য লক্ষণং প্রতিপাদযন্নাহ- বিচ্ছিন্নেত্যাদি| বিচ্ছিন্নমধ্যমিতি বিদীর্ণমাংসত্বান্মধ্যে সচ্ছিদ্রমিব| পক্ষান্তরমাহ- পিশিতাবৃতং বেতি, আচ্ছিন্নমধ্যমেবোন্নতমাংসেন বেষ্টিতং বা| চলং সিরাসক্তমিতি যতঃ সিরাসক্তমত এব চলং, সিরা হি স্বভাবত এব চলাঃ; তদাশ্রিতং শুক্রমপি চলমেব; অন্যে তু চলং চলদিব ন তু সাক্ষাচ্চলমেব| অদৃষ্টিকৃত্ দর্শনরোধকৃত্| দ্বিত্বাগ্গতং দ্বিপটলাশ্রিতম্| লোহিতমন্ততশ্চেতি প্রান্তেষু লোহিতমিত্যর্থঃ| ইদানীং দ্বিপটলাশ্রিতস্য লক্ষণং দর্শযন্নাহ- উষ্ণেত্যাদি| কস্মিংশ্চিত্ পুস্তকে ‘পিডকা চ পীতা’ ইতি পাঠঃ, স ন সঙ্গচ্ছতে | তথা চ বিদেহঃ- “চোষোষ্ণস্রাবদাহাস্তু কৃষ্ণে চ পিডিকোদ্গমঃ| ব্যক্তমুদ্গফলাকারং শুক্রং দ্বিত্বগ্গতং ভবেত্” ইতি| একীযমতমাহ- তদিত্যাদি| যচ্চান্যচ্ছুক্রং তিত্তিরিপক্ষতুল্যং তদপ্যসাধ্যং কেচিদ্বদন্তীতি সম্বন্ধঃ| এতত্ পরমতমপ্যপ্রতিষিদ্ধত্বাদনুমতমেব||৬-৭||
Adhikarana 6 (8) · Śloka 8
সিতং যদা ভাত্যসিতপ্রদেশে স্যন্দাত্মকং নাতিরুগশ্রুযুক্তম্ | বিহাযসীবাচ্ছঘনানুকারি তদব্রণং সাধ্যতমং বদন্তি ||৮||
सितं यदा भात्यसितप्रदेशे स्यन्दात्मकं नातिरुगश्रुयुक्तम् | विहायसीवाच्छघनानुकारि तदव्रणं साध्यतमं वदन्ति ||८||
🔊 Audio coming soon
ইদানীং সব্রণং শুক্রং প্রতিপাদ্যাব্রণং প্রতিপাদযন্নাহ- সিতমিত্যাদি| স্যন্দাত্মকম্ অভিষ্যন্দকারণং বিহাযসীব আকাশ ইব, অচ্ছঘনানুকারি প্রতনুমেঘখণ্ডানুকারীত্যর্থঃ| রক্তজমিদং সাধ্যং চ||৮||
Adhikarana 7 (9) · Śloka 9
গম্ভীরজাতং বহলং চ শুক্রং চিরোত্থিতং চাপি বদন্তি কৃচ্ছ্রম্ |৯|
गम्भीरजातं बहलं च शुक्रं चिरोत्थितं चापि वदन्ति कृच्छ्रम् |९|
🔊 Audio coming soon
অস্যৈবাব্রণস্য শুক্রস্যাবস্থাভেদেন কৃচ্ছ্রতাং দর্শযন্নাহ- গম্ভীরেত্যাদি| এবম্ভূতমব্রণমপি শুক্রং কৃচ্ছ্রং বদন্তীতি সম্বন্ধঃ| গম্ভীরজাতং দ্বিপটলাশ্রিতমিত্যর্থঃ| জেজ্জটাচার্যস্তু সব্রণাব্রণশুক্রস্য লক্ষণং সাধ্যাসাধ্যত্বং চ বিপরীতক্রমেণ পঠতি, মযা তু পঞ্জিকাকারাভিপ্রাযেণানেনৈব ক্রমেণ পঠিতম্|৯|-
Adhikarana 8 (9) · Śloka 10
সঞ্চ্ছাদ্যতে শ্বেতনিভেন সর্বং দোষেণ যস্যাসিতমণ্ডলং তু ||৯|| তমক্ষিপাকাত্যযমক্ষিকোপসমুত্থিতং তীব্ররুজং বদন্তি |১০|
सञ्च्छाद्यते श्वेतनिभेन सर्वं दोषेण यस्यासितमण्डलं तु ||९|| तमक्षिपाकात्ययमक्षिकोपसमुत्थितं तीव्ररुजं वदन्ति |१०|
🔊 Audio coming soon
ইদানীং পাকাত্যযমাহ- সঞ্চ্ছাদ্যত ইত্যাদি| অক্ষিকোপাত্ সমুত্থিতং স্যন্দাদুত্পন্নমিত্যর্থঃ| এষ ত্রিদোষজোঽসাধ্যশ্চ||৯||-
Adhikarana 9 (10) · Śloka 10
অজাপুরীষপ্রতিমো রুজাবান্ সলোহিতো লোহিতপিচ্ছিলাশ্রুঃ | বিদার্য কৃষ্ণং প্রচযোঽভ্যুপৈতি তং চাজকাজাতমিতি ব্যবস্যেত্ ||১০||
अजापुरीषप्रतिमो रुजावान् सलोहितो लोहितपिच्छिलाश्रुः | विदार्य कृष्णं प्रचयोऽभ्युपैति तं चाजकाजातमिति व्यवस्येत् ||१०||
🔊 Audio coming soon
অজেত্যাদি| অজাপুরীষপ্রতিম ইতি বিশুষ্কচ্ছগলীপুরীষতুল্যঃ| সলোহিত ঈষল্লোহিতঃ| লোহিতপিচ্ছিলাশ্রুরিতি লোহিতং পিচ্ছিলং চাশ্রু যস্য সঃ| প্রচযঃ সামর্থ্যান্মেদসঃ| এষ শ্লেষ্মজোঽসাধ্যশ্চ||১০||
Adhikarana puShpikA · Śloka 5
ইতি সুশ্রুতসংহিতাযামুত্তরতন্ত্রে কৃষ্ণগতরোগবিজ্ঞানীযো নাম পঞ্চমোঽধ্যাযঃ ||৫||
इति सुश्रुतसंहितायामुत्तरतन्त्रे कृष्णगतरोगविज्ञानीयो नाम पञ्चमोऽध्यायः ||५||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে পঞ্চমোঽধ্যাযঃ||৫||