23. nāsāgatarōgapratiṣēdhādhyāyaḥ

Adhikarana 1 (1-2) · Śloka 2

অথাতো নাসাগতরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3) · Śloka 3

পূর্বোদ্দিষ্টে পূতিনস্যে চ জন্তোঃ স্নেহস্বেদৌ ছর্দনং স্রংসনং চ | যুক্তং ভক্তং তীক্ষ্ণমল্পং লঘু স্যাদুষ্ণং তোযং ধূমপানং চ কালে ||৩||

অপীনসপূতিনস্যযোশ্চিকিত্সামাহ- পূর্বোদ্দিষ্টে ইত্যাদি| পূর্বোদ্দিষ্টে অপীনসে ইত্যর্থঃ| ছর্দনং বমনং, স্রংসনং বিরেকঃ| কৃতশুদ্ধেরন্তঃসংসর্গং নিযমযন্নাহ- যুক্তমিত্যাদি| তোযস্য পানং নিযমযন্নাহ- উষ্ণং তোযমিত্যাদি| কালে ধূমপানকালে||৩||

Adhikarana 3 (4) · Śloka 4

হিঙ্গু ব্যোষং বত্সকাখ্যং শিবাটী লাক্ষা বীজং সৌরভং কট্ফলং চ | উগ্রা কুষ্ঠং তীক্ষ্ণগন্ধা বিডঙ্গং শ্রেষ্ঠং নিত্যং চাবপীডে করঞ্জম্ ||৪||

তযোরেবাবপীডমুদ্দিশন্নাহ- হিঙ্গু ব্যোষমিত্যাদি| ব্যোষং ত্রিকটুকম্| শিবাটী শ্বেতপুনর্নবা, শেফালিকেত্যন্যে| উগ্রা বচা, তীক্ষ্ণগন্ধা শোভাঞ্জনকঃ| অবপীড্য দীযত ইত্যাবপীডঃ| কেচিদমুমেব পাঠমন্যথা পঠন্তি, স চাদর্শনান্ন লিখিতঃ||৪||

Adhikarana 4 (5) · Śloka 5

এতৈর্দ্রব্যৈঃ সার্ষপং মূত্রযুক্তং তৈলং ধীমান্নস্যহেতোঃ পচেত |৫|

অপীনসপূতিনস্যযোরেতৈরেবাবপীডনদ্রব্যৈর্নস্যার্থং তৈলসাধনমাহ- এতৈর্দ্রব্যৈরিত্যাদি| কেচিত্ ‘অস্মিন্ তৈলে যুক্তিতঃ সম্পচেত মঞ্জিষ্ঠাং বৈ স্রোতসি ম্রক্ষণার্থং, ইতি পঠন্তি, স চাচার্যৈরনার্ষীকৃতঃ|৫|-

Adhikarana 5 (5) · Śloka 6

নাসাপাকে পিত্তহৃত্সংবিধানং কার্যং সর্বং বাহ্মমাভ্যন্তরং চ ||৫|| হৃত্বা রক্তং ক্ষীরবৃক্ষত্বচশ্চ সাজ্যাঃ সেকা যোজনীযাশ্চ লেপাঃ |৬|

নাসাপাকে ভেষজমাহ- নাসাপাকে ইত্যাদি| বাহ্মং লেপাভ্যঙ্গপরিষেকাদি, আভ্যন্তরং পুনরাহারস্নেহপানবিরেচনাদি| সাজ্যাঃ সঘৃতাঃ||৫||-

Adhikarana 6 (6) · Śloka 6

বক্ষ্যাম্যূর্ধ্বং রক্তপিত্তোপশান্তিং... |৬|

রক্তপিত্তস্যানাগতাবেক্ষণেন সঙ্ক্ষেপার্থং চিকিত্সিতমাহ- বক্ষ্যাম্যূর্ধ্বমিত্যাদি| ঊর্ধ্বং রক্তপিত্তপ্রতিষেধে| উপশান্তিং চিকিত্সিতং ‘নাসাপ্রবৃত্তে জলমাশু দেযং সশর্করং নাসিকযা পযো বা’ ইত্যাদিকম্|৬|-

Adhikarana 7 (6) · Śloka 6

... নাডীবত্স্যাত্ পূযরক্তে চিকিত্সা ||৬||

পূযরক্তস্য বিধানমাহ- নাডীবদিত্যাদি| পূযরক্তে নাডীবত্ নাডীতুল্যা চিকিত্সা, যা বিসর্পনাডীস্তনরোগচিকিত্সিতে ব্যাখ্যাতা||৬||

Adhikarana 8 (7) · Śloka 7

বান্তে সম্যক্ চাবপীডং বদন্তি তীক্ষ্ণং ঘূমং শোধনং চাত্র নস্যম্ |৭|

পূযরক্তে সামান্যাং চিকিত্সামভিধায বিশেষচিকিত্সামাহ- বান্তে ইত্যাদি| অত্র পূযরক্তে; অন্যে তু ‘অত্রেতি নাসাপাকে’ ইতি ব্যাখ্যানযন্তি| কেচিত্ ‘বান্তে সম্যক্’ ইত্যাদিকং ক্ষবথৌ ভ্রংশথৌ চ যোজযন্তি|৭|-

Adhikarana 9 (7) · Śloka 8

ক্ষেপ্যং নস্যং মূর্ধবৈরেচনীযৈর্নাড্যা চূর্ণং ক্ষবথৌ ভ্রংশথৌ চ ||৭|| কুর্যাত্ স্বেদান্ মূর্ধ্নি বাতামযঘ্নান্ স্নিগ্ধান্ ধূমান্ যদ্যদন্যদ্বিতং চ |৮|

ক্ষবথৌ ভ্রংশথৌ চ চিকিত্সামাহ- ক্ষেপ্যমিত্যাদি| নস্যমিতি প্রধমনমিত্যর্থঃ, পঞ্চবিধত্বান্নস্যস্য| মূর্ধবৈরেচনীযৈঃ শিরোবিরেচনদ্রব্যৈঃ| প্রধমনেন ক্ষীণে কফে বাতে চ বৃদ্ধে সতি অনিলঘ্নান্ স্নিগ্ধানিত্যর্থঃ| অন্যদিতি শিরোবস্তিমস্তিষ্কাদিকম্||৭||-

Adhikarana 10 (8) · Śloka 8

দীপ্তে রোগে পৈত্তিকং সংবিধানং কুর্যাত্ সর্বং স্বাদু যচ্ছীতলং চ ||৮||

দীপ্তরোগস্য চিকিত্সামাহ- দীপ্তে ইত্যাদি| সংবিধানং কর্মেত্যর্থঃ, সর্বং বাহ্মাভ্যন্তরম্||৮||

Adhikarana 11 (9) · Śloka 9

নাসানাহে স্নেহপানং প্রধানং স্নিগ্ধা ধূমা মূর্ধবস্তিশ্চ নিত্যম্ | বলাতৈলং সর্বথৈবোপযোজ্যং বাতব্যাধাবন্যদুক্তং চ যদ্যত্ ||৯||

নাসানাহচিকিত্সামাহ- নাসানাহে স্নেহপানমিত্যাদি| স্নেহপানম্ উত্তরভক্তকম্| মূর্ধবস্তিশ্চেতি চকারাত্ সাল্বণোপনাহাদযো গৃহ্যন্তে| সর্বথৈবেতি পানাভ্যঙ্গানুবাসনশিরোবস্তিমস্তিষ্কাদিভিঃ সর্বৈরেব প্রকারৈঃ| অন্যত্ অণুতৈলাদিকম্||৯||

Adhikarana 12 (10) · Śloka 10

নাসাস্রাবে ঘ্রাণতশ্চূর্ণমুক্তং নাড্যা দেযং যোঽবপীডশ্চ তীক্ষ্ণঃ | তীক্ষ্ণং ধূমং দেবদার্বগ্নিকাভ্যাং মাংসং বাঽঽজং যুক্তমত্রাদিশন্তি ||১০||

নাসাস্রাবচিকিত্সামাহ- নাসস্রাবে ইত্যাদি| উক্তং চূর্ণং শিরোবিরেচনদ্রব্যকৃতম্| তীক্ষ্ণোঽবপীডো ‘হিঙ্গু ব্যোষং বত্সকাখ্যং’ ইত্যাদিনা ইহৈবাধ্যাযে প্রোক্তঃ| অগ্নিকঃ চিত্রকঃ, অজমোদামন্যে| আজং মাংসং ‘ভোজনে’ ইতি শেষঃ||১০||

Adhikarana 13 (11) · Śloka 11

নাসাশোষে ক্ষীরসর্পিঃ প্রধানং সিদ্ধং তৈলং চাণুকল্পেন নস্যম্ | সর্পিঃপানং ভোজনং জাঙ্গলৈশ্চ স্নেহঃ স্বেদঃ স্নৈহিকশ্চাপি ধূমঃ ||১১||

নাসাশোষে চিকিত্সামাহ- নাসাশোষে ক্ষীরসর্পিরিত্যাদি| ক্ষীরসর্পিঃ আদিত উক্তম্| প্রধানং শ্রেষ্ঠম্| নস্যে নস্যবিষযে| অণুকল্পেন অণুতৈলবিধানেন বাতব্যাধ্যুক্তেন| সর্পিঃপানম্ অন্তর্ভক্তকম্| জাঙ্গলৈঃ এণাদিমাংসৈঃ, স্নেহঃ স্বেদ ইত্যর্থঃ| স্নৈহিকো ধূমো মধূচ্ছিষ্টাদিভিঃ||১১||

Adhikarana 14 (12) · Śloka 12

শেষান্ রোগান্ ঘ্রাণজান্ সন্নিযচ্ছেদুক্তং তেষাং যদ্যথা সংবিধানম্ ||১২||

অর্শঃপ্রভৃতীনাং চিকিত্সামাহ- শেষানিত্যাদি| শেষান্ রোগানর্শঃশোফাদীন্, সন্নিযচ্ছেত্ চিকিত্সেত্| উক্তং সংবিধানং স্বে স্বে চিকিত্সিতে||১২||

Adhikarana puShpikA · Śloka 23

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে নাসাগতরোগপ্রতিষেধো নাম ত্রযোবিংশোঽধ্যাযঃ ||২৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে ত্রযোবিংশোঽধ্যাযঃ||২৩||