Adhikarana 1 (1-2) · Śloka 2
অথাতো রক্তাভিষ্যন্দপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो रक्ताभिष्यन्दप्रतिषेधं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
বাতপিত্তকফকৃতানভিষ্যন্দান্ প্রতিপাদ্য পরিশিষ্টং রক্তাভিষ্যন্দপ্রতিষেধমাহ- অথাত ইত্যাদি||১-২||
Adhikarana 2 (3) · Śloka 3
মন্থং স্যন্দং সিরোত্পাতং সিরাহর্ষং চ রক্তজম্ | একেনৈব বিধানেন চিকিত্সেচ্চতুরো গদান্ ||৩||
मन्थं स्यन्दं सिरोत्पातं सिराहर्षं च रक्तजम् | एकेनैव विधानेन चिकित्सेच्चतुरो गदान् ||३||
🔊 Audio coming soon
মন্থমিত্যাদি| অত্র মন্থস্য প্রাগুপাদানং স্যন্দাদ্গরীযস্ত্বখ্যাপনার্থম্||৩||
Adhikarana 3 (4) · Śloka 4
ব্যাধ্যার্তাংশ্চতুরোঽপ্যেতান্ স্নিগ্ধান্কৌম্ভেন সর্পিষা | রসৈরুদারৈরথবা সিরামোক্ষেণ যোজযেত্ ||৪||
व्याध्यार्तांश्चतुरोऽप्येतान् स्निग्धान्कौम्भेन सर्पिषा | रसैरुदारैरथवा सिरामोक्षेण योजयेत् ||४||
🔊 Audio coming soon
তদেব বিধানমাহ- ব্যাধ্যার্তানিত্যাদি| ব্যাধিভিরার্তাঃ পীডিতা ব্যাধ্যার্তাঃ| কৌম্ভেন শতবর্ষস্থিতেনেত্যর্থঃ| রসৈরুদারৈরথবেতি মাংসরসৈরধিকস্নেহৈর্বা স্নিগ্ধানিত্যর্থঃ| দূষ্যহরণং প্রতিপাদযন্নাহ- সিরেত্যাদি||৪||
Adhikarana 4 (5) · Śloka 6
বিরিক্তানাং প্রকামং চ শিরাংস্যেষাং বিশোধযেত্ | বৈরেচনিকসিদ্ধেন সিতাযুক্তেন সর্পিষা ||৫|| (মজ্জ্ঞা বা তদ্বিমিশ্রেণ মেদসা তচ্ছৃতেন বা) |৬|
विरिक्तानां प्रकामं च शिरांस्येषां विशोधयेत् | वैरेचनिकसिद्धेन सितायुक्तेन सर्पिषा ||५|| (मज्ज्ञा वा तद्विमिश्रेण मेदसा तच्छृतेन वा) |६|
🔊 Audio coming soon
দূষ্যহরণং প্রতিপাদ্য দোষহরণং প্রতিপাদযন্নাহ- বিরিক্তানামিত্যাদি| শিরাংসীতি বহুবচনং প্রতিরোগাপেক্ষযা দূষ্যেঽপহৃতে বিরেচনেন দোষহরণং, ততঃ শিরোবিরেচনং; তদপি সর্পিষা নতু তৈলেন, ঘৃতস্য চক্ষুষ্যত্বাত্, রক্তাবিরুদ্ধত্বাচ্চ| তস্য সংস্কারমাহ- বৈরেচনিকসিদ্ধেনেতি; শিরোবিরেচনদ্রব্যসিদ্ধেন, কেচিত্ ত্রিবৃতাদিদ্রব্যসিদ্ধেনেত্যাহুঃ| কেচিদত্র ‘মজ্জ্ঞা বা তদ্বিপক্বেন’ ইত্যাদিপাঠং পঠন্তি, স চানার্ষঃ||৫||
Adhikarana 5 (6) · Śloka 6
ততঃ প্রদেহাঃ পরিষেচনানি নস্যানি ধূমাশ্চ যথাস্বমেব | আশ্চ্যোতনাভ্যঞ্জনতর্পণানি স্নিগ্ধাশ্চ কার্যাঃ পুটপাকযোগাঃ ||৬||
ततः प्रदेहाः परिषेचनानि नस्यानि धूमाश्च यथास्वमेव | आश्च्योतनाभ्यञ्जनतर्पणानि स्निग्धाश्च कार्याः पुटपाकयोगाः ||६||
🔊 Audio coming soon
অন্তঃশুদ্ধিকরং ক্রিযাক্রমমুক্ত্বা বহিঃশুদ্ধিকরং ক্রিযাক্রমসঙ্গ্রহমুদ্দিশন্নাহ- তত ইত্যাদি| ধূমাশ্চ যথাস্বমাত্মীযানতিক্রমেণ, রক্তস্য দূষ্যস্য কফানুবন্ধে কফহরদ্রব্যবর্তিকৃতাঃ, বাতানুবন্ধে তু স্নৈহিকাঃ; এবমন্যত্রাপি যথাস্বমিতি সম্বন্ধনীযম্| অভ্যঞ্জনম্ অঞ্জনং; তচ্চ প্রসাদনং রক্তপিত্তে, সব্রণশুক্রাদৌ তু রোপণং; অন্যে পুনরভ্যঞ্জনমেব শতধৌতঘৃতাদিনেচ্ছন্তি||৬||
Adhikarana 6 (7) · Śloka 7
নীলোত্পলোশীরকটঙ্কটেরীকালীযযষ্টীমধুমুস্তরোধ্রৈঃ | সপদ্মকৈর্ধৌতঘৃতপ্রদিগ্ধৈরক্ষ্ণোঃ প্রলেপং পরিতঃ প্রকুর্যাত্ ||৭||
नीलोत्पलोशीरकटङ्कटेरीकालीययष्टीमधुमुस्तरोध्रैः | सपद्मकैर्धौतघृतप्रदिग्धैरक्ष्णोः प्रलेपं परितः प्रकुर्यात् ||७||
🔊 Audio coming soon
ইদানীং প্রলেপদ্রব্যাণ্যাহ- নীলোত্পলেত্যাদি| কটঙ্কটেরী দারুহরিদ্রা| কালীযকং দারুহরিদ্রানুকারি প্রসিদ্ধম্| ধৌতঘৃতপ্রদিগ্ধৈঃ মিশ্রৈরিত্যর্থঃ||৭||
Adhikarana 7 (8-9) · Śloka 9
রুজাযাং চাপ্যতিভৃশং স্বেদাশ্চ মৃদবো হিতাঃ | অক্ষ্ণোঃ সমন্ততঃ কার্যং পাতনং চ জলৌকসাম্ ||৮|| ঘৃতস্য মহতী মাত্রা পীতা চার্তিং নিযচ্ছতি | পিত্তাভিষ্যন্দশমনো বিধিশ্চাপ্যুপপাদিতঃ ||৯||
रुजायां चाप्यतिभृशं स्वेदाश्च मृदवो हिताः | अक्ष्णोः समन्ततः कार्यं पातनं च जलौकसाम् ||८|| घृतस्य महती मात्रा पीता चार्तिं नियच्छति | पित्ताभिष्यन्दशमनो विधिश्चाप्युपपादितः ||९||
🔊 Audio coming soon
পরিষেচনাদ্যুদ্দিষ্টং যদনির্দিষ্টং তত্পিত্তাভিষ্যন্দনির্দিষ্টদ্রব্যৈরতিদিশন্ ক্রিযাক্রমেঽনির্দিষ্টং চ নির্দিশন্নাহ- রুজাযামিত্যাদি| রুজো হি ভবন্তি সিরাব্যধাদিকৃতবাতানুবন্ধাত্, বাতাবৃতাদ্রক্তাদ্বা; তত্র বাতজাযাং তীব্ররুজাযাং মৃদবঃ স্বেদাঃ, দূষ্যরক্তাবরোধাদ্বহুশোণিতজাযাং জলৌকঃপাতনং; বাতজাযামেবান্তরমৌষধং ঘৃতস্য মহত্যা মাত্রযা পানম্; অল্পশোণিতজাযাং পিত্তাভিষ্যন্দশমনো বিধিঃ| নিযচ্ছতি নিবারযতি||৮-৯||
Adhikarana 8 (10) · Śloka 10
কশেরুমধুকাভ্যাং বা চূর্ণমম্বরসংবৃতম্ | ন্যস্তমপ্স্বান্তরিক্ষাসু হিতমাশ্চ্যোতনং ভবেত্ ||১০||
कशेरुमधुकाभ्यां वा चूर्णमम्बरसंवृतम् | न्यस्तमप्स्वान्तरिक्षासु हितमाश्च्योतनं भवेत् ||१०||
🔊 Audio coming soon
আশ্চ্যোতনমাহ- কশের্বিত্যাদি| অম্বরসংবৃতং বস্ত্রবেষ্টিতং, ন্যস্তং ক্ষিপ্তং, আন্তরিক্ষোদকালাভে আকাশগুণভূযিষ্ঠং ভূমিস্থমুদকং গৃহ্যতে| কেচিত্ পরিষেকমপ্যনেনৈবেচ্ছন্তি||১০||
Adhikarana 9 (11-12) · Śloka 12
পাটল্যর্জুনশ্রীপর্ণীধাতকীধাত্রিবিল্বতঃ | পুষ্পাণ্যথ বৃহত্যোশ্চ বিম্বীলোটাচ্চ তুল্যশঃ ||১১|| সমঞ্জিষ্ঠানি মধুনা পিষ্টানীক্ষুরসেন বা | রক্তাভিষ্যন্দশান্ত্যর্থমেতদঞ্জনমিষ্যতে ||১২||
पाटल्यर्जुनश्रीपर्णीधातकीधात्रिबिल्वतः | पुष्पाण्यथ बृहत्योश्च बिम्बीलोटाच्च तुल्यशः ||११|| समञ्जिष्ठानि मधुना पिष्टानीक्षुरसेन वा | रक्ताभिष्यन्दशान्त्यर्थमेतदञ्जनमिष्यते ||१२||
🔊 Audio coming soon
রক্তাভিষ্যন্দেঽঞ্জনমাহ- পাটলীত্যাদি| শ্রীপর্ণী কাশ্মরী| ধাত্রী আমলকী, বিম্বীলোটো ভিল্লোটো হিমাদ্রিজো বৃক্ষঃ| বিরেচনাদিভির্বিশুদ্ধদোষস্য পুরুষস্য শেষদোষোপশান্ত্যর্থমঞ্জনং যোজ্যং, ন পুনরশুদ্ধদোষস্যেতি||১১-১২||
Adhikarana 10 (13-14) · Śloka 14
চন্দনং কুমুদং পত্রং শিলাজতু সকুঙ্কুমম্ | অযস্তাম্ররজস্তুত্থং নিম্বনির্যাসমঞ্জনম্ ||১৩|| ত্রপু কাংস্যমলং চাপি পিষ্ট্বা পুষ্পরসেন তু | বিপুলা যাঃ কৃতা বর্ত্যঃ পূজিতাশ্চাঞ্জনে সদা ||১৪||
चन्दनं कुमुदं पत्रं शिलाजतु सकुङ्कुमम् | अयस्ताम्ररजस्तुत्थं निम्बनिर्यासमञ्जनम् ||१३|| त्रपु कांस्यमलं चापि पिष्ट्वा पुष्परसेन तु | विपुला याः कृता वर्त्यः पूजिताश्चाञ्जने सदा ||१४||
🔊 Audio coming soon
চন্দনমিত্যাদি| পত্রং পত্রকম্| অঞ্জনং রসাঞ্জনম্| পুষ্পরসেনেতি মধুনেত্যর্থঃ| বিপুলা যাস্তা এব মন্থাদিষু চতুর্ষু লেখনাদিকর্মণি সামর্থ্যাত্ পূজিতা বর্তযঃ| তদুক্তং,- “হরেণুমাত্রা বর্তিঃ স্যাল্লেখনস্য প্রমাণতঃ| প্রসাদনস্য চাধ্যর্ধা দ্বিগুণা রোপণস্য তু”- ইতি||১৩-১৪||
Adhikarana 11 (15-16) · Śloka 17
স্যাদঞ্জনং ঘৃতং ক্ষৌদ্রং সিরোত্পাতস্য ভেষজম্ | তদ্বত্সৈন্ধবকাসীসং স্তন্যঘৃষ্টং চ পূজিতম্ ||১৫|| মধুনা শঙ্খনৈপালীতুত্থদার্ব্যঃ সসৈন্ধবাঃ | রসঃ শিরীষপুষ্পাচ্চ সুরামরিচমাক্ষিকৈঃ ||১৬|| যুক্তং তু মধুনা বাঽপি গৈরিকং হিতমঞ্জনে |১৭|
स्यादञ्जनं घृतं क्षौद्रं सिरोत्पातस्य भेषजम् | तद्वत्सैन्धवकासीसं स्तन्यघृष्टं च पूजितम् ||१५|| मधुना शङ्खनैपालीतुत्थदार्व्यः ससैन्धवाः | रसः शिरीषपुष्पाच्च सुरामरिचमाक्षिकैः ||१६|| युक्तं तु मधुना वाऽपि गैरिकं हितमञ्जने |१७|
🔊 Audio coming soon
মন্থাদীনাং চতুর্ণাং সামান্যচিকিত্সিতমুক্ত্বা সিরোত্পাতে বিশেষচিকিত্সিতমাহ- স্যাদঞ্জনমিত্যাদি| অঞ্জনং রসাঞ্জনং , ঘৃতং গব্যঘৃতম্| নেপালী মনঃশিলা| মরিচং প্রসিদ্ধং, কেচিত্ মরিচশব্দেন সিতমরিচং শোভাঞ্জনফলাপরপর্যাযং বদন্তি| গৈরিকং স্বর্ণগৈরিকম্| এতান্যঞ্জনান্যর্ধশ্লৌকিকান্যপ্যুক্তানি||১৫-১৬||-
Adhikarana 12 (17-18) · Śloka 18
সিরাহর্ষেঽঞ্জনং কুর্যাত্ ফাণিতং মধুসংযুতম্ ||১৭|| মধুনা তার্ক্ষ্যজং বাঽপি কাসীসং বা সসৈন্ধবম্ | বেত্রাম্লস্তন্যসংযুক্তং ফাণিতং চ সসৈন্ধবম্ ||১৮||
सिराहर्षेऽञ्जनं कुर्यात् फाणितं मधुसंयुतम् ||१७|| मधुना तार्क्ष्यजं वाऽपि कासीसं वा ससैन्धवम् | वेत्राम्लस्तन्यसंयुक्तं फाणितं च ससैन्धवम् ||१८||
🔊 Audio coming soon
সিরাহর্ষ ইত্যাদি| ফাণিতং মধুযুক্তমেকমঞ্জনমিতি; মধুযুক্তং তার্ক্ষ্যজং দ্বিতীযমঞ্জনং, তত্র তার্ক্ষ্যজং রসাঞ্জনং; কাসীসং সসৈন্ধবং মধুযুক্তং তৃতীযমঞ্জনং; বেত্রাম্লস্তন্যসংযুক্তং ফাণিতং চতুর্থমঞ্জনং; তত্র বেত্রাম্লম্ অম্লবেতসং, অন্যে তু বেত্রং বেত্রকরীরং, অম্লম্ অম্লবেতসম্, অম্লীকা বেতি ব্যাখ্যানযন্তি; যত্তু জেজ্জটাচার্যেণ দূষিতম্||১৭-১৮||
Adhikarana 13 (19-23) · Śloka 24
পৈত্তং বিধিমশেষেণ কুর্যাদর্জুনশান্তযে | ইক্ষুক্ষৌদ্রসিতাস্তন্যদার্বীমধুকসৈন্ধবৈঃ ||১৯|| সেকাঞ্জনং চাত্র হিতমম্লৈরাশ্চ্যোতনং তথা | সিতামধুককট্বঙ্গমস্তুক্ষৌদ্রাম্লসৈন্ধবৈঃ ||২০|| বীজপূরককোলাম্লদাডিমাম্লৈশ্চ যুক্তিতঃ | একশো বা দ্বিশো বাঽপি যোজিতং বা ত্রিভিস্ত্রিভিঃ ||২১|| স্ফটিকং বিদ্রুমং শঙ্খো মধুকং মধু চৈব হি | শঙ্খক্ষৌদ্রসিতাযুক্তঃ সামুদ্রঃ ফেন এব বা ||২২|| দ্বাবিমৌ বিহিতৌ যোগাবঞ্জনেঽর্জুননাশনৌ | সৈন্ধবক্ষৌদ্রকতকাঃ সক্ষৌদ্রং বা রসাঞ্জনম্ ||২৩|| কাসীসং মধুনা বাঽপি যোজ্যমত্রাঞ্জনে সদা |২৪|
पैत्तं विधिमशेषेण कुर्यादर्जुनशान्तये | इक्षुक्षौद्रसितास्तन्यदार्वीमधुकसैन्धवैः ||१९|| सेकाञ्जनं चात्र हितमम्लैराश्च्योतनं तथा | सितामधुककट्वङ्गमस्तुक्षौद्राम्लसैन्धवैः ||२०|| बीजपूरककोलाम्लदाडिमाम्लैश्च युक्तितः | एकशो वा द्विशो वाऽपि योजितं वा त्रिभिस्त्रिभिः ||२१|| स्फटिकं विद्रुमं शङ्खो मधुकं मधु चैव हि | शङ्खक्षौद्रसितायुक्तः सामुद्रः फेन एव वा ||२२|| द्वाविमौ विहितौ योगावञ्जनेऽर्जुननाशनौ | सैन्धवक्षौद्रकतकाः सक्षौद्रं वा रसाञ्जनम् ||२३|| कासीसं मधुना वाऽपि योज्यमत्राञ्जने सदा |२४|
🔊 Audio coming soon
রক্তার্জুনচিকিত্সামাহ- পৈত্তমিত্যাদি| পৈত্তং পিত্তাভিষ্যন্দোদিতম্| অত্র অর্জুনে| অম্লৈঃ ধান্যাম্লাদিভিঃ| তত্র ইক্ষুক্ষৌদ্রাদিভিঃ সেকাঞ্জনে কর্তব্যে, অম্লৈঃ পুনরাশ্চ্যোতনমেব কর্তব্যম্| অর্জুনেঽপরমপ্যাশ্চ্যোতনমাহ- সিতেত্যাদি| এতৈঃ সিতাদিভির্দাডিমাম্লপর্যন্তৈর্ব্যস্তৈঃ সমস্তৈর্বা যুক্তিতো দোষবলাপেক্ষযাঽঽশ্চ্যোতনং কার্যমিতি পিণ্ডার্থঃ| অর্জুনেঽঞ্জনমাহ- স্ফটিকমিত্যাদি| বিদৃমঃ প্রবালঃ| অর্জুনেঽপরমপ্যঞ্জনমাহ- সৈন্ধবেত্যাদি| সৈন্ধবক্ষৌদ্রকতকা ইত্যেকমঞ্জনং, সক্ষৌদ্রং বা রসাঞ্জনমিত্যপরং, কাসীসং মধুনা বাঽপীতি তৃতীযমঞ্জনম্| অত্র অর্জুনে||১৯-২৩||-
Adhikarana 14 (24-26) · Śloka 27
লোহচূর্ণানি সর্বাণি ধাতবো লবণানি চ ||২৪|| রত্নানি দন্তাঃ শৃঙ্গাণি গণশ্চাপ্যবসাদনঃ | কুক্কুটাণ্ডকপালানি লশুনং কটুকত্রযম্ ||২৫|| করঞ্জবীজমেলা চ লেখ্যাঞ্জনমিদং স্মৃতম্ | পুটপাকাবসানেন রক্তবিস্রাবণাদিনা ||২৬|| সম্পাদিতস্য বিধিনা কৃত্স্নেন স্যন্দঘাতিনা |২৭|
लोहचूर्णानि सर्वाणि धातवो लवणानि च ||२४|| रत्नानि दन्ताः शृङ्गाणि गणश्चाप्यवसादनः | कुक्कुटाण्डकपालानि लशुनं कटुकत्रयम् ||२५|| करञ्जबीजमेला च लेख्याञ्जनमिदं स्मृतम् | पुटपाकावसानेन रक्तविस्रावणादिना ||२६|| सम्पादितस्य विधिना कृत्स्नेन स्यन्दघातिना |२७|
🔊 Audio coming soon
লেখ্যাঞ্জনমাহ- লোহেত্যাদি| সর্বাণি সুবর্ণত্রপুসীসতাম্ররজতকৃষ্ণলোহাদিজাতানি| ধাতবো মনঃশিলাগৈরিকাদযঃ| লবণানি সৈন্ধবাদীনি পঞ্চ| রত্নানি বৈদূর্যমরকতপ্রভৃতীনি| দন্তা গবাদীনামশ্বাদীনাং চ| শৃঙ্গাণি গবাদীনামেব| অবসাদনো মিশ্রকোক্তঃ কাসীসাদিঃ| এতদনির্দিষ্টানামপি লেখ্যাঞ্জনসঞ্জ্ঞকং জ্ঞেযম্| অপরমপি লেখ্যাঞ্জনমাহ- কুক্কুটাণ্ডেত্যাদি| লেখ্যাঞ্জনং কীদৃগ্বিধস্যাতুরস্য প্রযোজ্যমিত্যাহ- পুটপাকাবসানেনেত্যাদি| রক্তবিস্রাবণাদিনা পুটপাকাবসানেন, স্যন্দঘাতিনা অভিষ্যন্দহননশীলেন, কৃত্স্নেন সকলেন বিধিনা, সম্পাদিতস্য সম্যগ্যোজিতস্য; স পুনর্বিধিঃ সিরাব্যধবিরেচনশিরোবিরেচনান্যন্তঃপরিমার্জনানি; তথা হি,- “ততঃ প্রদেহান্ পরিষেচনানি নস্যানি ধূমাশ্চ যথাস্বমেব| আশ্চ্যোতনাভ্যঞ্জনতর্পণানি তথৈব কার্যাঃ পুটপাকযোগাঃ”- ইতি; লেখ্যাঞ্জনং প্রযোজনীযমিতি পিণ্ডার্থঃ| ‘পুটপাকাবসাদেন’ ইতি কেচিত্ পঠন্তি, পুটপাক এবাবসাদোঽবধির্যস্য স তথা তেনেতি খ্যানযন্তি||২৪-২৬||-
Adhikarana 15 (27) · Śloka 27
অনেনাপহরেচ্ছুক্রমব্রণং কুশলো ভিষক্ ||২৭||
अनेनापहरेच्छुक्रमव्रणं कुशलो भिषक् ||२७||
🔊 Audio coming soon
ইমাং চিকিত্সামব্রণে শুক্রেঽপ্যতিদিশন্নাহ- অনেনেত্যাদি| অনেন লেখ্যাঞ্জনেন পূর্বোক্তেন রক্তবিস্রাবণাদ্যুপক্রমেণ সম্পাদিতস্যাতুরস্যাব্রণং শুক্রমপহরেদিতি বাক্যার্থঃ||২৭||
Adhikarana 16 (28-35) · Śloka 36
উত্তানমবগাঢং বা কর্কশং বাঽপি সব্রণম্ | শিরীষবীজমরিচপিপ্পলীসৈন্ধবৈরপি ||২৮|| শুক্রস্য ঘর্ষণং কার্যমথবা সৈন্ধবেন তু | কুর্যাত্তাম্ররজঃশঙ্খশিলামরিচসৈন্ধবৈঃ ||২৯|| অন্ত্যাদ্দ্বিগুণিতৈরেভিরঞ্জনং শুক্রনাশনম্ | কুর্যাদঞ্জনযোগৌ বা সম্যক্ শ্লোকার্ধিকাবিমৌ ||৩০|| শঙ্খকোলাস্থিকতকদ্রাক্ষামধুকমাক্ষিকৈঃ | ক্ষৌদ্রদন্তার্ণবমলশিরীষকুসুমৈরপি ||৩১|| ক্ষারাঞ্জনং বা বিতরেদ্বলাসগ্রথিতাপহম্ | মুদ্গান্ বা নিস্তুষান্ ভৃষ্টান্ শঙ্খক্ষৌদ্রসিতাযুতান্ ||৩২|| মধূকসারং মধুনা যোজযেচ্চাঞ্জনে সদা | বিভীতকাস্থিমজ্জা বা সক্ষৌদ্রঃ শুক্রনাশনঃ ||৩৩|| শঙ্খশুক্তিমধুদ্রাক্ষামধুকং কতকানি চ | দ্বিত্বগ্গতে সশূলে বা বাতঘ্নং তর্পণং হিতম্ ||৩৪|| বংশজারুষ্করৌ তালং নারিকেলং চ দাহযেত্ | বিস্রাব্য ক্ষারবচ্চূর্ণং ভাবযেত্করভাস্থিজম্ ||৩৫|| বহুশোঽঞ্জনমেতত্স্যাচ্ছুক্রবৈবর্ণ্যনাশনম্ |৩৬|
उत्तानमवगाढं वा कर्कशं वाऽपि सव्रणम् | शिरीषबीजमरिचपिप्पलीसैन्धवैरपि ||२८|| शुक्रस्य घर्षणं कार्यमथवा सैन्धवेन तु | कुर्यात्ताम्ररजःशङ्खशिलामरिचसैन्धवैः ||२९|| अन्त्याद्द्विगुणितैरेभिरञ्जनं शुक्रनाशनम् | कुर्यादञ्जनयोगौ वा सम्यक् श्लोकार्धिकाविमौ ||३०|| शङ्खकोलास्थिकतकद्राक्षामधुकमाक्षिकैः | क्षौद्रदन्तार्णवमलशिरीषकुसुमैरपि ||३१|| क्षाराञ्जनं वा वितरेद्बलासग्रथितापहम् | मुद्गान् वा निस्तुषान् भृष्टान् शङ्खक्षौद्रसितायुतान् ||३२|| मधूकसारं मधुना योजयेच्चाञ्जने सदा | बिभीतकास्थिमज्जा वा सक्षौद्रः शुक्रनाशनः ||३३|| शङ्खशुक्तिमधुद्राक्षामधुकं कतकानि च | द्वित्वग्गते सशूले वा वातघ्नं तर्पणं हितम् ||३४|| वंशजारुष्करौ तालं नारिकेलं च दाहयेत् | विस्राव्य क्षारवच्चूर्णं भावयेत्करभास्थिजम् ||३५|| बहुशोऽञ्जनमेतत्स्याच्छुक्रवैवर्ण्यनाशनम् |३६|
🔊 Audio coming soon
ইদানীমব্রণশুক্রচিকিত্সিতমভিধায সব্রণেঽপি পূর্বং চিকিত্সিতমুদ্দিশন্নাহ- উত্তানমিত্যাদি| সব্রণমপি শুক্রমুত্তানমেকপটলগতম্, অবগাঢং বা দ্বিত্র্যাদিপটলগতং, রক্তস্রাবণেত্যাদিনা পূর্বোক্তেন বিধিনোপপাদ্য, লেখযেদিতি সমুদাযার্থঃ| ননু সব্রণস্য সন্তর্পণসাধ্যত্বাত্ কথং সব্রণে লেখনমুপযুজ্যতে? সত্যং, কর্কশাবস্থাযাং পূর্বং লেখনং প্রযুজ্যতে পশ্চাত্ সন্তর্পণমিতি ন দোষঃ| ‘কর্কশং বাপি সব্রণং’ ইত্যত্র ‘কর্ষযেচ্চাপি সব্রণং’ ইতি কেচিত্ পঠন্তি| এতদবস্থে এব শুক্রে ঘর্ষণমাহ - শিরীষবীজেত্যাদি| শিলা মনঃশিলা| কুর্যাদিত্যাদি| কৌ তৌ শ্লোকার্ধিকৌ দ্বৌ যোগাবিত্যাহ- শঙ্খকোলাস্থীত্যাদি| কোলাস্থি বদরাস্থি, কতকং শশপুরীষানুকার্যম্বুপ্রসাদনং ফলং, মধুকং যষ্টীমধু, দন্তো গোদন্তঃ, অর্ণবমলং সমুদ্রফেনম্| ক্ষারাঞ্জনমিত্যাদি| ক্ষারাঞ্জনং ‘নীলান্ যবান্ গব্যপযোঽনুপীতান্’ ইত্যাদিনা শ্লেষ্মাভিষ্যন্দোক্তম্| মুদ্গানিত্যাদি| মুদ্গান্ শঙ্খক্ষৌদ্রসিতাযুতানিত্যেকো যোগঃ, মধূকসারং মধুনেতি দ্বিতীযো যোগঃ| বিভীতকেত্যাদি| বিভীতকাস্থিমজ্জা মধুনেত্যেকো যোগঃ; শঙ্খাদিকতকপর্যন্তং মধুনেতি দ্বিতীযো যোগঃ, মধুকং যষ্টীমধু| কেচিত্ শঙ্খশুক্তীত্যত্র শঙ্খাশ্মন্তেতি পঠন্তি| দ্বিত্বগ্গত ইত্যাদি| দ্বিত্বগ্গতে দ্বিপটলাশ্রিতে শুক্র ইত্যর্থঃ| কেচিদমুং পাঠং ন পঠন্তি, জেজ্জটেন পঠিতত্বাদস্মাভিঃ পঠিতঃ| বংশজেত্যাদি| বংশজো বংশকরীরঃ, বংশাঙ্কুর ইতি যাবত্| অরুষ্করাদীনাং পরিপক্বাস্থি, অন্যে জটামাহুঃ| এতেষাং বংশজাদীনাং তিলনালদীপিতানাং ভস্ম, তচ্চ করভাস্থিচূর্ণসমং প্রত্যহমাকৃষ্য, ষড্গুণোদকেনাষ্টগুণোদকেন বা নিষ্ক্বাথ্য, পাদশেষং বহুশো বিস্রাব্য, স্বস্থেন তেন সপ্তাহং করভাস্থিচূর্ণং ভাবযিত্বাঽঽতপে শোষযেত্, তচ্চূর্ণং পুনশ্চ চূর্ণিতং কৃত্বা, মধ্বাক্তেনাঙ্গুল্যগ্রেণ শলাকযা বা সঙ্গৃহ্য শুক্রদেশমাত্রং ঘর্ষযেত্, ততস্ত্রিফলোদকেনাক্ষি প্রক্ষালযেত্| শুক্রবৈবর্ণ্যনাশনমিতি শুক্রস্য বৈবর্ণ্যং বিনাশযতি ন তু শুক্রং, এতেন শুক্রস্য কৃষ্ণতামুত্পাদযতীত্যর্থঃ||২৮-৩৫||-
Adhikarana 17 (36-37) · Śloka 37
অজকাং পার্শ্বতো বিদ্ধ্বা সূচ্যা বিস্রাব্য চোদকম্ ||৩৬|| ব্রণং গোমাংসচূর্ণেন পূরযেত্ সর্পিষা সহ | বহুশোঽবলিখেচ্চাপি বর্ত্মাস্যোপগতং যদি ||৩৭||
अजकां पार्श्वतो विद्ध्वा सूच्या विस्राव्य चोदकम् ||३६|| व्रणं गोमांसचूर्णेन पूरयेत् सर्पिषा सह | बहुशोऽवलिखेच्चापि वर्त्मास्योपगतं यदि ||३७||
🔊 Audio coming soon
অসাধ্যশুক্রবৈবর্ণ্যনাশনপ্রসঙ্গেনাসাধ্যাজকাজাতস্য বৈকৃতনাশনার্থং চিকিত্সামাহ- অজকামিত্যাদি| কেচিদমুং পাঠং ন পঠন্তি, জেজ্জটপঠিতত্বাদস্মাভিঃ পঠিতঃ| অত্রাজকাযামবস্থাযাং লেখনমপি কর্মাতিদিশন্নাহ- বহুশোঽবলিখেদিত্যাদি| অস্য অজকাজাতস্য, বর্ত্ম তুণ্ডং , উপগতং যদ্যুচ্চতাং প্রাপ্তং, তদা তং বহুশোঽবলিখেত্||৩৬-৩৭||
Adhikarana 18 (38) · Śloka 39
সশোফশ্চাপ্যশোফশ্চ দ্বৌ পাকৌ যৌ প্রকীর্তিতৌ | স্নেহস্বেদোপপন্নস্য তত্র বিদ্ধ্বা সিরাং ভিষক্ ||৩৮|| সেকাশ্চ্যোতননস্যানি পুটপাকাংশ্চ কারযেত্ |৩৯|
सशोफश्चाप्यशोफश्च द्वौ पाकौ यौ प्रकीर्तितौ | स्नेहस्वेदोपपन्नस्य तत्र विद्ध्वा सिरां भिषक् ||३८|| सेकाश्च्योतननस्यानि पुटपाकांश्च कारयेत् |३९|
🔊 Audio coming soon
ইদানীং বাতপিত্তকফশোণিতানাং পৃথগভিষ্যন্দপ্রতিষেধমভিধায সান্নিপাতিকানামপ্যুপদেষ্টুমাহ- সশোফ ইত্যাদি| তত্রেতি তযোঃ পাকযোঃ| সিরাশ্চাত্র আপাঙ্গ্যা ঔপনাসিকা লালাঠ্যা বা| আশ্চ্যোতনম্ অক্ষিপূরণম্||৩৮||-
Adhikarana 19 (39-41) · Śloka 42
সর্বতশ্চাপি শুদ্ধস্য কর্তব্যমিদমঞ্জনম্ ||৩৯|| তাম্রপাত্রস্থিতং মাসং সর্পিঃ সৈন্ধবসংযুতম্ | মৈরেযং বাঽপি দধ্যেবং দধ্যুত্তরকমেব বা ||৪০|| ঘৃতং কাংস্যমলোপেতং স্তন্যং বাঽপি সসৈন্ধবম্ | মধূকসারং মধুনা তুল্যাংশং গৈরিকেণ বা ||৪১|| সর্পিঃসৈন্ধবতাম্রাণি যোষিত্স্তন্যযুতানি বা |৪২|
सर्वतश्चापि शुद्धस्य कर्तव्यमिदमञ्जनम् ||३९|| ताम्रपात्रस्थितं मासं सर्पिः सैन्धवसंयुतम् | मैरेयं वाऽपि दध्येवं दध्युत्तरकमेव वा ||४०|| घृतं कांस्यमलोपेतं स्तन्यं वाऽपि ससैन्धवम् | मधूकसारं मधुना तुल्यांशं गैरिकेण वा ||४१|| सर्पिःसैन्धवताम्राणि योषित्स्तन्ययुतानि वा |४२|
🔊 Audio coming soon
তযোরঞ্জনাবস্থামুদ্দিশন্নাহ- সর্বত ইত্যাদি| সর্বতশ্চাপি শুদ্ধস্যেতি অন্তঃপরিমার্জনবহিঃপরিমার্জনাভ্যাং শুদ্ধস্যেত্যর্থঃ| ইদং বক্ষ্যমাণম্| তদেবাঞ্জনমাহ- তাম্রপাত্রস্থিতমিত্যাদি| মৈরেযং সুরাসবযোরেকত্র সন্ধানং, দধি প্রসিদ্ধং, এবমিতি পূর্ববত্ তাম্রপাত্রস্থিতং সৈন্ধবচূর্ণযুক্তমিত্যর্থঃ, দধ্যুত্তরকং দধ্নঃ সরঃ| স্নেহাঞ্জনং রক্তাপকর্ষণাদিনা বিরূক্ষিতাক্ষস্য যোজ্যং; বাতোল্বণপাকস্য বা মৈরেযং দধি চ তাম্রপাত্রস্থিতং সৈন্ধবযুক্তং, পিত্তোল্বণে নাতিবিরূক্ষিতে দধ্যুত্তরকং চ, সশোফস্য চ রক্তাস্রাবাদিসম্পাদিতস্য ঘৃতং কাংস্যমলযুক্তঞ্জনং স্তন্যং বা সৈন্ধবযুক্তমঞ্জনং, মধূকসারং বা গৈরিকেণ তুল্যাংশং মধুনাঽঞ্জনং, ঘৃতাদীনি ত্রীণি স্তন্যেনাঞ্জনং, এতানি সাবশেষরক্তযোঃ পাকযোর্যোজ্যানি||৩৯-৪১||-
Adhikarana 20 (42) · Śloka 42
দাডিমারেবতাশমন্তকোলাম্লৈশ্চ সসৈন্ধবাম্ | রসক্রিযাং বা বিতরেত্সম্যক্পাকজিঘাংসযা ||৪২||
दाडिमारेवताशमन्तकोलाम्लैश्च ससैन्धवाम् | रसक्रियां वा वितरेत्सम्यक्पाकजिघांसया ||४२||
🔊 Audio coming soon
রসক্রিযামাহ- দাডিমেত্যাদি| আরেবতঃ কৃতমালকঃ; ‘ঐরাবত’ ইতি কেচিত্ পঠন্তি, তত্র ঐরাবতো নারঙ্গম্| সসৈন্ধবাম্ অল্পসৈন্ধবাং, ন সমসৈন্ধবামিত্যর্থঃ| রসক্রিযা ফাণিতাকৃতিঃ, তস্যাশ্চ কল্পনা পিত্তাভিষ্যন্দপ্রতিষেধে ব্যাখ্যাতা| ‘কোলাম্লৈশ্চ সসৈন্ধবাম্’ ইত্যত্র ‘কোলাম্লমধুসৈন্ধবৈঃ’ ইতি কেচিত্ পঠন্তি||৪২||
Adhikarana 21 (43) · Śloka 43
মাসং সৈন্ধবসংযুক্তং স্থিতং সর্পিষি নাগরম্ | আশ্চ্যোতনাঞ্জনং যোজ্যমবলাক্ষীরসংযুতম্ ||৪৩||
मासं सैन्धवसंयुक्तं स्थितं सर्पिषि नागरम् | आश्च्योतनाञ्जनं योज्यमबलाक्षीरसंयुतम् ||४३||
🔊 Audio coming soon
আশ্চ্যোতনমাহ- মাসমিত্যাদি| অবলাক্ষীরং স্ত্রীস্তন্যং, তচ্চ পেষণে বোদ্ধব্যম্| এতচ্চাশ্চ্যোতনং সশোফে পাকে কফোল্বণে||৪৩||
Adhikarana 22 (44) · Śloka 44
জাত্যাঃ পুষ্পং সৈন্ধবং শৃঙ্গবেরং কৃষ্ণাবীজং কীটশত্রোশ্চ সারম্ | এতত্ পিষ্টং নেত্রপাকেঽঞ্জনার্থং ক্ষৌদ্রোপেতং নির্বিশঙ্কং প্রযোজ্যম্ ||৪৪||
जात्याः पुष्पं सैन्धवं शृङ्गवेरं कृष्णाबीजं कीटशत्रोश्च सारम् | एतत् पिष्टं नेत्रपाकेऽञ्जनार्थं क्षौद्रोपेतं निर्विशङ्कं प्रयोज्यम् ||४४||
🔊 Audio coming soon
জাত্যা ইত্যাদি| কৃষ্ণাবীজং পিপ্পলীতণ্ডুলঃ| কীটশত্রুঃ বিডঙ্গঃ| নির্বিশঙ্কং প্রযোজ্যমিতি পাকযোরঞ্জনাবস্থাযাং দেযং তদঞ্জনমিতি তাত্পর্যার্থঃ||৪৪||
Adhikarana 23 (45) · Śloka 45
পূযালসে শোণিতমোক্ষণং চ হিতং তথৈবাপ্যুপনাহনং চ | কৃত্স্নো বিধিশ্চেক্ষণপাকঘাতী যথাবিধানং ভিষজা প্রযোজ্যঃ ||৪৫||
पूयालसे शोणितमोक्षणं च हितं तथैवाप्युपनाहनं च | कृत्स्नो विधिश्चेक्षणपाकघाती यथाविधानं भिषजा प्रयोज्यः ||४५||
🔊 Audio coming soon
পূযালসে সন্নিপাতজে ক্রিযামাহ- পূযালসে ইত্যাদি| শোণিতমোক্ষণং চ স্নেহস্বেদপূর্বকমেব| উপনাহনমিতি যথাদোষহরব্রণশোধনচক্ষুষ্যদ্রব্যকৃতঃ প্রলেপো বন্ধনং বা| কৃত্স্নো বিধিরিতি অন্তঃশুদ্ধিকরো বহিঃশুদ্ধিকরশ্চেত্যর্থঃ| যথাবিধানমিতি হিতানতিক্রমেণেত্যর্থঃ||৪৫||
Adhikarana 24 (46) · Śloka 46
কাসীসসিন্ধুপ্রভবার্দ্রকৈস্তু হিতং ভবেদঞ্জনমেব চাত্র | ক্ষৌদ্রান্বিতৈরেভিরথোপযুঞ্জ্যাদন্যত্তু তাম্রাযসচূর্ণযুক্তৈঃ ||৪৬||
कासीससिन्धुप्रभवार्द्रकैस्तु हितं भवेदञ्जनमेव चात्र | क्षौद्रान्वितैरेभिरथोपयुञ्ज्यादन्यत्तु ताम्रायसचूर्णयुक्तैः ||४६||
🔊 Audio coming soon
কাসীসাদিরসক্রিযাঞ্জনমাহ- কাসীসেত্যাদি| চকারাত্ পাকযোরুক্তমঞ্জনং সমুচ্চীযতে| অত্র পূযালসে| ক্ষৌদ্রান্বিতৈরিত্যাদি| এভিরেব কাসীসাদিভির্মধুনা পিষ্টৈস্তাম্রাযসচূর্ণযুক্তৈরন্যদঞ্জনমিতি পিণ্ডার্থঃ| ‘ক্ষৌদ্রান্বিতৈরেভিরথোপযুঞ্জ্যাত্’ ইত্যত্র ‘ক্ষৌদ্রান্বিতৈরেভিরবান্তরোক্তৈঃ’ ইতি কেচিত্ পঠন্তি||৪৬||
Adhikarana 25 (47) · Śloka 47
স্নেহাদিভিঃ সম্যগপাস্য দোষাংস্তৃপ্তিং বিধাযাথ যথাস্বমেব | প্রক্লিন্নবর্ত্মানমুপক্রমেত সেকাঞ্জনাশ্চ্যোতননস্যধূমৈঃ ||৪৭||
स्नेहादिभिः सम्यगपास्य दोषांस्तृप्तिं विधायाथ यथास्वमेव | प्रक्लिन्नवर्त्मानमुपक्रमेत सेकाञ्जनाश्च्योतननस्यधूमैः ||४७||
🔊 Audio coming soon
ইদানীং প্রক্লিন্নবর্ত্মনঃ পিল্লাখ্যস্য চিকিত্সামুদ্দিশন্নাহ- স্নেহাদিভিরিত্যাদি| স্নেহাদিভিরিতি স্নেহসিরাব্যধবিরেচনশিরোবিরেচনাস্থাপনৈঃ| অপাস্য নির্হৃত্য| তৃপ্তিঃ তর্পণম্| যথাস্বং যথাত্মীযম্||৪৭||
Adhikarana 26 (48) · Śloka 48
মুস্তাহরিদ্রামধুকপ্রিযঙ্গুসিদ্ধার্থরোধ্রোত্পলসারিবাভিঃ | ক্ষুণ্ণাভিরাশ্চ্যোতনমেব কার্যমত্রাঞ্জনং চাঞ্জনমাক্ষিকং স্যাত্ ||৪৮||
मुस्ताहरिद्रामधुकप्रियङ्गुसिद्धार्थरोध्रोत्पलसारिवाभिः | क्षुण्णाभिराश्च्योतनमेव कार्यमत्राञ्जनं चाञ्जनमाक्षिकं स्यात् ||४८||
🔊 Audio coming soon
সেকাশ্চ্যোতনযোর্দ্রব্যাণ্যাহ- মুস্তেত্যাদি| ক্ষুণ্ণাভিরিতি অন্তরীক্ষোদকে তদ্গুণে বাঽন্যস্মিন্ ন্যস্তাভিরিত্যর্থঃ | আশ্চ্যোতনমেব কার্যমিতি অত্রানুক্তোঽপি সেকঃ কার্যঃ| অন্যে এতৈরাশ্চ্যোতনমেকমেবেচ্ছন্তি| অত্রাঞ্জনমিত্যাদি| অত্রাক্লিন্নবর্ত্মনি রসাঞ্জনমাক্ষিকমঞ্জনং স্যাত্| ‘রোধ্রোত্পলসারিবাভিঃ’ ইত্যত্র কেচিত্ ‘লোধ্রাসিতসারিবাভিঃ’ ইতি পঠন্তি, অসিতসারিবা শ্যামালতা; অসিতং রসাঞ্জনমিত্যন্যে ব্যাখ্যানযন্তি||৪৮||
Adhikarana 27 (49) · Śloka 50
পত্রং ফলং চামলকস্য পক্ত্বা ক্রিযাং বিদধ্যাদথবাঽঞ্জনার্থে | বংশস্য মূলেন রসক্রিযাং বা বর্তীকৃতাং তাম্রকপালপক্বাম্ ||৪৯|| রসক্রিযাং বা ত্রিফলাবিপক্বাং পলাশপুষ্পৈঃ খরমঞ্জরের্বা |৫০|
पत्रं फलं चामलकस्य पक्त्वा क्रियां विदध्यादथवाऽञ्जनार्थे | वंशस्य मूलेन रसक्रियां वा वर्तीकृतां ताम्रकपालपक्वाम् ||४९|| रसक्रियां वा त्रिफलाविपक्वां पलाशपुष्पैः खरमञ्जरेर्वा |५०|
🔊 Audio coming soon
রসক্রিযাঞ্জনমাহ- পত্রমিত্যাদি| পক্ত্বেতি কষাযকল্পেন বিপাচ্যেত্যর্থঃ| ক্রিযাং রসাক্রিযাং, বংশস্য মূলরসেন বা রসক্রিযাং, তামেব বা রসক্রিযামতিশোষণেন বর্তীকৃতাম্| তাম্রকপালং তাম্রকটাহঃ| ত্রিফলাযা অন্যা রসক্রিযা, পলাশপুষ্পৈরন্যা, খরমঞ্জরেরপামার্গস্যান্যা রসক্রিযেতি||৪৯||-
Adhikarana 28 (50) · Śloka 51
পিষ্ট্বা ছগল্যাঃ পযসা মলং বা কাংসস্য দগ্ধ্বা সহ তান্তবেন ||৫০|| প্রত্যঞ্জনং তন্মরিচৈরুপেতং চূর্ণেন তাম্রস্য সহোপযোজ্যম্ |৫১|
पिष्ट्वा छगल्याः पयसा मलं वा कांसस्य दग्ध्वा सह तान्तवेन ||५०|| प्रत्यञ्जनं तन्मरिचैरुपेतं चूर्णेन ताम्रस्य सहोपयोज्यम् |५१|
🔊 Audio coming soon
ইদানীং তীক্ষ্ণাঞ্জনদুর্বলস্য নযনস্য প্রত্যাশ্বাসনার্থং প্রত্যঞ্জনমাহ- পিষ্ট্বেত্যাদি| কাংস্যস্য মলং কার্পাসবস্ত্রেণ সহ দগ্ধ্বা সিতমরিচতাম্রজোযুক্তং ছগলীদুগ্ধেন পিষ্ট্বা প্রত্যঞ্জনং যোজ্যমিতি পিণ্ডার্থঃ| পশ্চাত্ প্রশান্তদোষে যদঞ্জনং ক্রিযতে তত্ প্রত্যঞ্জনশব্দবাচ্যম্||৫০||-
Adhikarana 29 (51) · Śloka 52
সমুদ্রফেনং লবণোত্তমং চ শঙ্খোঽথ মুদ্গো মরিচং চ শুক্লম্ ||৫১|| চূর্ণাঞ্জনং জাড্যমথাপি কণ্ডূমক্লিন্নবর্ত্মান্যুপহন্তি শীঘ্রম্ |৫২|
समुद्रफेनं लवणोत्तमं च शङ्खोऽथ मुद्गो मरिचं च शुक्लम् ||५१|| चूर्णाञ्जनं जाड्यमथापि कण्डूमक्लिन्नवर्त्मान्युपहन्ति शीघ्रम् |५२|
🔊 Audio coming soon
চূর্ণাঞ্জনমাহ- সমুদ্রফেনমিত্যাদি| লবণোত্তমং সৈন্ধবম্||৫১||
Adhikarana 30 (52) · Śloka 52
প্রক্লিন্নবর্ত্মন্যপি চৈত এব যোগাঃ প্রযোজ্যাশ্চ সমীক্ষ্য দোষম্ ||৫২||
प्रक्लिन्नवर्त्मन्यपि चैत एव योगाः प्रयोज्याश्च समीक्ष्य दोषम् ||५२||
🔊 Audio coming soon
সর্বানপ্যক্লিন্নর্ত্মোক্তান্ প্রক্লিন্নবর্ত্মন্যতিদিশন্নাহ- প্রক্লিন্নেত্যাদি| এত এবেতি পূর্বোক্তাঃ| সমীক্ষ্য দোষমিতি প্রক্লিন্নবর্ত্মনঃ কফজত্বাদেষু মধ্যে যে কফহরা যোগাস্তে প্রযোজ্যা ইত্যর্থঃ||৫২||
Adhikarana 31 (53) · Śloka 53
সকজ্জলং তাম্রঘটে চ ঘৃষ্ঠং সর্পির্যুতং তুত্থকমঞ্জনং চ ||৫৩||
सकज्जलं ताम्रघटे च घृष्ठं सर्पिर्युतं तुत्थकमञ्जनं च ||५३||
🔊 Audio coming soon
প্রক্লিন্নবর্ত্মনঃ সামান্যচিকিত্সামুক্ত্বা বিশেষচিকিত্সামাহ- সকজ্জলমিত্যাদি| তুত্থকং কজ্জলতুল্যভাগং তাম্রপাত্রে ঘৃষ্টং সর্পির্যুতমঞ্জনমিতি||৫৩||
Adhikarana puShpikA · Śloka 12
ইতি সুশ্রুতসংহিতাযামুত্তরতন্ত্রান্তর্গতে শালাক্যতেন্ত্রে রক্তাভিষ্যন্দপ্রতিষেধো নাম দ্বাদশোঽধ্যাযঃ ||১২||
इति सुश्रुतसंहितायामुत्तरतन्त्रान्तर्गते शालाक्यतेन्त्रे रक्ताभिष्यन्दप्रतिषेधो नाम द्वादशोऽध्यायः ||१२||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে দ্বাদশোঽধ্যাযঃ সমাপ্তঃ||১২||