Adhikarana 1 (1-2) · Śloka 2
athātaḥ śakunīpratiṣēdhaṁ vyākhyāsyāmaḥ ||1|| yathōvāca bhagavān dhanvantariḥ ||2||
अथातः शकुनीप्रतिषेधं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
skandāpasmārapratiṣēdhānantaraṁ śakunīpratiṣēdhārambhaḥ, skandādigrahapratipādakasūtrē'syā ēvānantarōktatvādityāha- athāta ityādi||1-2||
Adhikarana 2 (3) · Śloka 3
śakunyabhiparītasya kāryō vaidyēna jānatā | vētasāmrakapitthānāṁ niṣkvāthaḥ pariṣēcanē ||3||
शकुन्यभिपरीतस्य कार्यो वैद्येन जानता | वेतसाम्रकपित्थानां निष्क्वाथः परिषेचने ||३||
🔊 Audio coming soon
śakunītyādi| abhiparītasya vyāptasya, ‘bālasya’ iti śēṣaḥ| jānatā buddhimatā| niṣkvāthaḥ pariṣēcanē kārya iti sambandhaḥ||3||
Adhikarana 3 (4) · Śloka 4
kaṣāyamadhuraustailaṁ kāryamabhyañjanē śiśōḥ |4|
कषायमधुरौस्तैलं कार्यमभ्यञ्जने शिशोः |४|
🔊 Audio coming soon
kaṣāyētyādi| kaṣāyā vaṭādayaḥ, madhurāṇi kākōlyādīni; tatra vaṭādīnāṁ kaṣāyaḥ, kākōlyādīnāṁ ca kalkaḥ, tābhyāṁ tailaṁ sādhyaṁ; pratyēkaṁ vaṭādīnāṁ kākōlyādīnāṁ ca kalkakaṣāyau kalpanīyāvityanyē|4|-
Adhikarana 4 (4) · Śloka 5
madhukōśīrahrībērasārivōtpalapadmakaiḥ ||4|| rōdhrapriyaṅgumañjiṣṭhāgairikaiḥ pradihēcchiśum |5|
मधुकोशीरह्रीबेरसारिवोत्पलपद्मकैः ||४|| रोध्रप्रियङ्गुमञ्जिष्ठागैरिकैः प्रदिहेच्छिशुम् |५|
🔊 Audio coming soon
madhukētyādi| utpalaṁ nīlōtpalam| pradihēt limpēt||4||-
Adhikarana 5 (5) · Śloka 5
vraṇēṣūktāni cūrṇāni pathyāni vividhāni ca ||5||
व्रणेषूक्तानि चूर्णानि पथ्यानि विविधानि च ||५||
🔊 Audio coming soon
vraṇēṣvityādi| vraṇēṣu śakunījuṣṭabālakavraṇēṣu| uktāni cūrṇāni dvivraṇīyādhyāyē kīrtitāni miśrakōktāni ca śōdhanarōpaṇāni| pathyāni vraṇitōpāsanīyōktāni śālimudgadāḍimasaindhavayavapaṭōlādīni; anyē tu pathyānīti cūrṇānītyasya viśēṣaṇaṁ kurvanti, tatra śakunījuṣṭabālakavraṇānāṁ sadāhapākaraktasrāvaharāṇi cūrṇāni prayōktavyānīti sambandhanīyam||5||
Adhikarana 6 (6) · Śloka 6
skandagrahē dhūpanāni tānīhāpi prayōjayēt |6|
स्कन्दग्रहे धूपनानि तानीहापि प्रयोजयेत् |६|
🔊 Audio coming soon
skandētyādi| dhūpanāni sarṣapā ityādīni skandagrahōktāni, tānīhāpi śakunyamapi prayōjayēt|6|-
Adhikarana 7 (6) · Śloka 7
śatāvarīmr̥gairvārunāgadantīnidigdhikāḥ ||6|| lakṣmaṇāṁ sahadēvāṁ ca br̥hatīṁ cāpi dhārayēt |7|
शतावरीमृगैर्वारुनागदन्तीनिदिग्धिकाः ||६|| लक्ष्मणां सहदेवां च बृहतीं चापि धारयेत् |७|
🔊 Audio coming soon
śatāvarītyādi| mr̥gairvāruḥ indravāruṇī, nāgadantī dantinī, sahadēvā pītapuṣpā balā, br̥hatī sthūlaphalā||6||-
Adhikarana 8 (7) · Śloka 8
tilataṇḍulakaṁ mālyaṁ haritālaṁ manaḥśilā ||7|| balirēṣa karañjēṣu nivēdyō niyatātmanā |8|
तिलतण्डुलकं माल्यं हरितालं मनःशिला ||७|| बलिरेष करञ्जेषु निवेद्यो नियतात्मना |८|
🔊 Audio coming soon
tilētyādi| ēṣa tilataṇḍulakamityādikō baliḥ| karañjēṣu naktamālēṣu| niyatātmanā saṁyatēndriyēṇa ‘karañjēṣu’ ityatrānyē ‘nikuñjēṣu’ iti paṭhanti, nikuñjēṣu vanēṣu||7||-
Adhikarana 9 (8) · Śloka 8
niṣkuṭē ca prayōktavyaṁ snānamasya yathāvidhi ||8||
निष्कुटे च प्रयोक्तव्यं स्नानमस्य यथाविधि ||८||
🔊 Audio coming soon
niṣkuṭē ityādi| niṣkuṭē gr̥hōpavanē, anyē niṣkuṭaṁ vanagahanamāhuḥ| yathāvidhīti skandagrahōktō vidhiḥ; tēna śāliyavaracitamaṇḍalē gāyatryabhimantratēna jalēna snānamiti labhyatē||8||
Adhikarana 10 (9) · Śloka 9
skandāpasmāraśamanaṁ ghr̥taṁ cāpīha pūjitam |9|
स्कन्दापस्मारशमनं घृतं चापीह पूजितम् |९|
🔊 Audio coming soon
skandētyādi| ghr̥taṁ dēvadāruṇi rāsnāyāmityādikaṁ, cakārō'tra sōmavallayādīnāmapi dhāraṇaṁ samuccinōti| jējjaṭastu skandagrahē dhūpanānītyādikadhūpanapāṭhāntē idaṁ ghr̥taṁ paṭhati|9|-
Adhikarana 11 (9) · Śloka 9
kuryācca vividhāṁ pūjāṁ śakunyāḥ kusumaiḥ śubhaiḥ ||9||
कुर्याच्च विविधां पूजां शकुन्याः कुसुमैः शुभैः ||९||
🔊 Audio coming soon
kuryādityādi| kusumaiḥ śubhairiti jātīpuṣpanīlōtpalādibhiḥ||9||
Adhikarana 12 (10-11) · Śloka 11
antarīkṣacarā dēvī sarvālaṅkārabhūṣitā | ayōmukhī tīkṣṇatuṇḍā śakunī tē prasīdatu ||10|| durdarśanā mahākāyā piṅgākṣī bhairavasvarā | lambōdarī śaṅkukarṇī śakunī tē prasīdatu ||11||
अन्तरीक्षचरा देवी सर्वालङ्कारभूषिता | अयोमुखी तीक्ष्णतुण्डा शकुनी ते प्रसीदतु ||१०|| दुर्दर्शना महाकाया पिङ्गाक्षी भैरवस्वरा | लम्बोदरी शङ्कुकर्णी शकुनी ते प्रसीदतु ||११||
🔊 Audio coming soon
bālakarakṣāmāha- antarīkṣētyādi||10-11||
Adhikarana puShpikA · Śloka 30
iti suśrutasaṁhitāyāmuttaratantrāntargatē kumāratantrē śakunīpratiṣēdhō nāma (caturthō'dhyāyaḥ, āditaḥ) triṁśō'dhyāyaḥ ||30||
इति सुश्रुतसंहितायामुत्तरतन्त्रान्तर्गते कुमारतन्त्रे शकुनीप्रतिषेधो नाम (चतुर्थोऽध्यायः, आदितः) त्रिंशोऽध्यायः ||३०||
🔊 Audio coming soon
iti śrīḍalha(hla)ṇaviracitāyāṁ nibandhasaṅgrahākhyāyāṁ suśrutavyākhyāyāmuttaratantrāntargatē kaumārabhr̥tyatantrē śakunīpratiṣēdhō nāma triṁśattamō'dhyāyaḥ||30||