55. udāvartapratiṣēdhādhyāyaḥ

Adhikarana 1 (1-2) · Śloka 2

অথাত উদাবর্তপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

কৃমিপ্রতিষেধানন্তরং কৃমিচিকিত্সিতস্য কটুতিক্তকষাযাদেরুদাবর্তহেতুত্বাদুদাবর্তপ্রতিষেধারম্ভো যুক্ত ইত্যত আহ- অথাত ইত্যাদি| উত্ ঊর্ধ্বং বাতবিণ্মূত্রাদীনাং আবর্তো ভ্রমণং যস্মিন্ রোগে স উদাবর্তঃ; অন্যে পুরীষং বাযুনা বর্তুলীকৃতমুদাবর্তং মন্যন্তে, লোকপ্রসিদ্ধত্বাত্||১-২||

Adhikarana 2 (3) · Śloka 3

অধশ্চোর্ধ্বং চ ভাবানাং প্রবৃত্তানাং স্বভাবতঃ | ন বেগান্ ধারযেত্ প্রাজ্ঞো বাতাদীনাং জিজীবিষুঃ ||৩||

বেগধারণস্যৈকান্তেনোদাবর্তহেতুত্বাদ্বেগধারণনিষেধমাহ- অধশ্চোর্ধ্ব চেত্যাদি| অধোভাবা মূত্রাদযঃ ঊর্ধ্বভাবা উদ্গারাদযঃ, তেষাং ভাবানাং বাতাদীনাং বেগান্ ন ধারযেত্| কিম্ভূতানাং? স্বভাবতঃ প্রবৃত্তানাং, প্রকৃত্যৈব স্বাশযচ্যুতানামিত্যর্থঃ| এতেনৈতেঽপ্রবৃত্তা বলান্নোদীরণীযা ইতি সূচযতি| জিজীবিষুঃ জীবিতুমিচ্ছুঃ পুরুষঃ| কেচিত্ ‘প্রাজ্ঞঃ’ ইত্যত্র ‘প্রাপ্তান্’ ইতি পঠন্তি| তে চ ব্যাখ্যানযন্তি- বেগগ্রহণেনৈব প্রাপ্তানিতি প্রাপ্তং যস্মাদপ্রাপ্তো বেগো ন ভবতি, অতঃ প্রাপ্তগ্রহণমধিকং , তেনাধিকেন প্রাপ্তগ্রহণেন কেষাঞ্চিত্ প্রাপ্তা অপি বেগা ধারণীযা ইত্যর্থাধিক্যমাবেদযতি; তথা চ তন্ত্রান্তরে- “ইমাংস্তু ধারযেদ্বেগান্ হিতৈষী প্রেত্য চেহ চ| লোভের্ষ্যাদ্বেষমাত্সর্যরাগাদীনাং যতেন্দ্রিযঃ ”- ইতি| তচ্চ ব্যাখ্যানং ন যুক্তং, যস্মাদ্বিশেষাভিধানাদেব লোভাদীনাং বেগধারণং সিদ্ধং; তস্মাত্ প্রাপ্তান্ উন্মুখীভূতানিতি ব্যাখ্যানং যুক্তম্| অন্যে তু বাতাদীনাং প্রাপ্তান্ যুক্তান্ বেগান্ ন ধারযেত্, ন তু সাহসাদিবেগান্ ন ধারযেদিতি ব্যাখ্যানযন্তি||৩||

Adhikarana 3 (4) · Śloka 4

বাতবিণ্মূত্রজৃম্ভাশ্রুক্ষবোদ্গারবমীন্দ্রিযৈঃ | ব্যাহন্যমানৈরুদিতৈরুদাবর্তো নিরুচ্যতে ||৪||

উদাবর্তস্য নিরুক্তিদ্বারা কারণান্যাহ- বাতবিণ্মূত্রেত্যাদি| অশ্রু নেত্রোদকং, ক্ষবঃ ছিক্কা; ইন্দ্রিযমত্র শুক্রমভিপ্রেতং, ‘শুক্রাশ্মরী তত্স্রবণং ভবেদ্বা’ ইত্যাদিবক্ষ্যমাণবচনাত্; অভিধানে চেন্দ্রিযশব্দঃ শুক্রে দৃষ্টঃ; তথাচ তদ্বচঃ- “শ্রোত্রবাগাদি সত্ত্বং চ শুক্রং চেন্দ্রিযমুচ্যতে”- ইতি| ব্যাহন্যমানৈঃ অবরুধ্যমানৈঃ| উদিতৈরিতি ঊর্ধ্বগতৈঃ||৪||

Adhikarana 4 (5) · Śloka 5

ক্ষুত্তৃষ্ণাশ্বাসনিদ্রাণামুদাবর্তো বিধারণাত্ |৫|

অন্যেষামপি বিধারণাদুদাবর্তসম্ভবমাহ- ক্ষুত্তৃষ্ণেত্যাদি| বাতবিণ্মূত্রাদিকাত্ ক্ষুত্তৃষ্ণাদীনাং ভিন্নপাঠো বাতাদীনাং সন্নিহিতকারণত্বং তথা ক্ষুদাদীনাং বিপ্রকৃষ্টকারণত্বং সূচযতি; অথবা অনেন ভিন্নপাঠেন বক্ষ্যমাণং হেতুমাহারাশ্রিতং সূচযতি| যথা- “বাযুঃ কোষ্ঠানুগো রূক্ষৈঃ কষাযকটুতিক্তকৈঃ” ইত্যাদি| যে ক্ষুদাদীনাং ভিন্নপাঠং ন পঠন্তি; তন্মতে ঈদৃশঃ পাঠঃ,- ‘বাতবিণ্মূত্রজৃম্ভাশ্রুক্ষবোদ্গারবমীন্দ্রিযৈঃ| ক্ষুত্তৃষ্ণাশ্বাসনিদ্রাণাং ধৃত্যোদাবর্তসম্ভবঃ’ ইতি| ধৃত্যা ধারণেনেত্যর্থঃ| ননু, অধোবেগরোধাদপানপ্রকোপাদুদাবর্তসম্ভবো যুক্তঃ, অশ্রুজৃম্ভাদিবেগধারণাত্ কথং তস্যোত্পত্তিঃ ? সত্যং, অশ্রুজৃম্ভাদিবেগরোধাত্ কোষ্ঠগতো বাযুর্যদা ভবতি তদাঽপানপ্রকোপাদুদাবর্তসম্ভবঃ|৫|-

Adhikarana 5 (5) · Śloka 5

তস্যাভিধাস্যে ব্যাসেন লক্ষণং চ চিকিত্সিতম্ ||৫||

তস্যাভিধাস্যে ইত্যাদি| তস্য উদাবর্তস্য| অভিধাস্যে কথযিষ্যামি| ব্যাসেন বিস্তরেণ||৫||

Adhikarana 6 (6) · Śloka 6

ত্রযোদশবিধশ্চাসৌ ভিন্ন এতৈস্তু কারণৈঃ |৬|

তস্য সঙ্খ্যামাহ- ত্রযোদশবিধ ইত্যাদি| ভিন্নো ভেদং গতঃ| এতৈঃ কারণৈঃ পূর্বোক্তৈর্বাতবিণ্মূত্রাদিভিঃ|৬|-

Adhikarana 7 (6) · Śloka 6

অপথ্যভোজনাচ্চাপি বক্ষ্যতে চ তথাঽপরঃ ||৬||

বাতাদিবেগরোধাত্ত্রযোদশোদাবর্তানভিধাযেদানীং কারণভেদাদপরমপ্যাহ- অপথ্যেত্যাদি| অপরো বাতাদ্যবরোধজেভ্যোঽন্যঃ||৬||

Adhikarana 8 (7) · Śloka 8

আধ্মানশূলৌ হৃদযোপরোধং শিরোরুজং শ্বাসমতীব হিক্কাম্ | কাসপ্রতিশ্যাযগলগ্রহাংশ্চ বলাসপিত্তপ্রসরং চ ঘোরম্ ||৭|| কুর্যাদপানোঽভিহতঃ স্বমার্গে হন্যাত্ পুরীষং মুখতঃ ক্ষিপেদ্বা |৮|

বাতজোদাবর্তলক্ষণমাহ- আধ্মানশূলাবিত্যাদি| হৃদযোপরোধং হৃদযাবরণম্| বলাসপিত্তপ্রসরং শ্লেষ্মপিত্তপ্রসরণম্| অভিহতঃ অবরুদ্ধঃ| স্বমার্গে গুদে| হন্যাত্ পুরীষং পুরীষক্ষযং কুর্যাত্ ক্ষিপেদ্বেত্যত্রাপি পুরীষমিতি সম্বন্ধনীযম্| গলগ্রহাংশ্চেতি চকারাত্ ক্রিম্যাদীনাং সমানতন্ত্রনির্দিষ্টানাং গ্রহণম্| অপানাবরোধেন প্রাণাদীনামপি প্রকোপাত্ শিরোরুক্কাসাদিসম্ভবো যুক্তঃ||৭||

Adhikarana 9 (8) · Śloka 9

আটোপশূলৌ পরিকর্তনং চ সঙ্গঃ পুরীষস্য তথোর্ধ্ববাতঃ ||৮|| পুরীষমাস্যাদপি বা নিরেতি পুরীষবেগেঽভিহতে নরস্য |৯|

পুরীষজোদাবর্তলক্ষণমাহ- আটোপশূলাবিত্যাদি| আটোপ উদরাপূরঃ| পরিকর্তনং গুদমেঢ্রবস্ত্যাদিষু কৃন্তনমিব বেদনা| ঊর্ধ্ববাতো বহূদ্গারতা| আস্যাত্ মুখাত্| নিরেতি নির্গচ্ছতি| পরিকর্তনং চেতি চকারাত্ পিণ্ডিকোদ্বেষ্টনাদযঃ||৮||-

Adhikarana 10 (9-10) · Śloka 10

মূত্রস্য বেগেঽভিহতে নরস্তু কৃচ্ছ্রেণ মূত্রং কুরুতেঽল্পমল্পম্ ||৯|| মেঢ্রে গুদে বঙ্ক্ষণবস্তিমুষ্কনাভিপ্রদেশেষ্বথবাঽপি মূর্ধ্নি | আনদ্ধবস্তিশ্চ ভবন্তি তীব্রাঃ শূলাশ্চ শূলৈরিব ভিন্নমূর্তেঃ ||১০||

মূত্রোদাবর্তলক্ষণমাহ- মূত্রস্যেত্যাদি| বঙ্ক্ষণম্ উদরোরুসন্ধিঃ| মুষ্কৌ অণ্ডৌ| মূর্ধ্নি উত্তমাঙ্গে| আনদ্ধবস্তিঃ আধ্মাতমূত্রাধারঃ| ‘আনদ্ধবস্তেঃ’ ইতি কেচিত্ পঠন্তি, তে চ আনদ্ধবস্তের্মূর্ধ্নি শূলা ভবন্তীতি যোজযন্তি| তন্ন, সমানতন্ত্রবিরোধাত্| ভিন্নমূর্তেঃ ভিন্নশরীরস্য ||৯-১০||

Adhikarana 11 (11) · Śloka 11

মন্যাগলস্তম্ভশিরোবিকারা জৃম্ভোপঘাতাত্ পবনাত্মকাঃ স্যুঃ | শ্রোত্রাননঘ্রাণবিলোচনোত্থা ভবন্তি তীব্রাশ্চ তথা বিকারাঃ ||১১||

জৃম্ভোদাবর্তলক্ষণমাহ- মন্যেত্যাদি| স্তম্ভশব্দো মন্যাগলাভ্যাং প্রত্যেকং সম্বধ্যতে| গলস্তম্ভো গলগ্রহঃ| শিরোবিকারাঃ সূর্যাবর্তাদযঃ| পবনাত্মকাঃ কম্পসুপ্ত্যাদযঃ, চকারাত্ অরুচিবিভ্রমাদযশ্চ||১১||

Adhikarana 12 (12) · Śloka 12

আনন্দজং শোকসমুদ্ভবং বা নেত্রোদকং প্রাপ্তমমুঞ্চতো হি | শিরোগুরুত্বং নযনামযাশ্চ ভবন্তি তীব্রাঃ সহ পীনসেন ||১২||

অশ্রুজোদাবর্তলক্ষণমাহ- আনন্দজমিত্যাদি| নেত্রোদকম্ অশ্রু, প্রাপ্তং প্রবৃত্ত্যুন্মুখম্| পীনসোঽত্র প্রতিশ্যাযঃ, সমানতন্ত্রদর্শনাত্| চকারাত্ প্রতিশ্যাযাদযঃ||১২||

Adhikarana 13 (13) · Śloka 13

ভবন্তি গাঢং ক্ষবথোর্বিঘাতাচ্ছিরোক্ষিনাসাশ্রবণেষু রোগাঃ | কণ্ঠাস্যপূর্ণত্বমতীব তোদঃ কূজশ্চ বাযোরুত বাঽপ্রবৃত্তিঃ ||১৩||

ছিক্কাজোদাবর্তলক্ষণমাহ- ভবন্তীত্যাদি| ক্ষবথোর্বিঘাতাত্ ছিক্কাবরোধাত্| কণ্ঠাস্যপূর্ণত্বমিতি কণ্ঠমুখে বাযুনা পূর্ণে ইব ভবতঃ| অতীব তোদঃ অতীব ব্যথা, কণ্ঠমুখযোরেব| কেচিত্ ‘কণ্ঠস্য’ ইতি পঠন্তি, তন্মতে কণ্ঠস্যৈব পূর্ণত্বং তোদশ্চ| কূজঃ অব্যক্তবচনম্| বাযোরপ্রবৃত্তিঃ উচ্ছ্বাসাবরোধঃ| উত বা অথবেত্যর্থঃ| চকারাত্ মন্যাস্তম্ভাদযঃ||১৩||

Adhikarana 14 (14) · Śloka 14

উদ্গারবেগেঽভিহতে ভবন্তি ঘোরা বিকারাঃ পবনপ্রসূতাঃ |১৪|

উদ্গারজোদাবর্তলক্ষণমাহ- উদ্গারবেগ ইত্যাদি| ঘোরাঃ কষ্টতরাঃ| "ঘোরাঃ" ইত্যত্র "জন্তোঃ" ইতি কেচিত্ পঠন্তি| পবনপ্রসূতাঃ কম্পহিক্কাহৃদ্বিবন্ধাদযঃ|১৪|-

Adhikarana 15 (14) · Śloka 14

ছর্দের্বিঘাতেন ভবেচ্চ কুষ্ঠং যেনৈব দোষেণ বিদগ্ধমন্নম্ ||১৪||

ছর্দিজোদাবর্তলক্ষণমাহ- ছর্দের্বিঘাতেনেত্যাদি| কুষ্ঠগ্রহণমত্র শীতপিত্তকোপাদ্যুপলক্ষণার্থম্| যেনৈব দোষেণ বিদগ্ধমন্নমিতি যেনৈব বাতাদ্যন্যতমেন দোষেণ বিদগ্ধং দুষ্টমন্নং ভবেত্তদ্দোষাধিকমেব কুষ্ঠং স্যাদিত্যর্থঃ| চকারাত্ অরোচকাদযঃ||১৪||

Adhikarana 16 (15) · Śloka 15

মূত্রাশযে পাযুনি মুষ্কযোশ্চ শোফো রুজো মূত্রবিনিগ্রহশ্চ | শুক্রাশ্মরী তত্স্রবণং ভবেদ্বা তে তে বিকারা বিহতে তু শুক্রে ||১৫||

শুক্রজোদাবর্তলক্ষণমাহ- মূত্রাশয ইত্যাদি| মূত্রাশযে বস্তৌ, পাযুনি গুদে, শোফঃ শ্বযথুঃ; রুজোঽপি মূত্রাশযাদিষ্বেব ভবন্তি| মূত্রবিনিগ্রহো মূত্রাপ্রবৃত্তিঃ| তত্স্রবণং শুক্রস্রবণং, সমানতন্ত্রপ্রত্যযাত্| তে তে বিকারা ইতি হৃত্পীডাঙ্গমর্দাদযঃ শুক্রবেগবিঘাতজাঃ সমানতন্ত্রোক্তাঃ||১৫||

Adhikarana 17 (16) · Śloka 16

তন্দ্রাঙ্গমর্দারুচিবিভ্রমাঃ স্যুঃ ক্ষুধোঽভিঘাতাত্ কৃশতা চ দৃষ্টেঃ |১৬|

ক্ষুজ্জোদাবর্তলক্ষণমাহ- তন্দ্রেত্যাদি| তন্দ্রা বৈকারিকী নিদ্রা; অঙ্গমর্দঃ অঙ্গোদ্বেষ্টনমিব বেদনা, স্ফুটনিকেত্যন্যে; বিভ্রমঃ অত্যর্থং চক্রারূঢস্যেব ভ্রমণম্| কৃশতা চ দৃষ্টেঃ দৃঙ্মান্দ্যম্ চকারাত্ দৌর্বল্যাদযস্তন্ত্রান্তরোক্তা গ্রাহ্যাঃ|১৬|-

Adhikarana 18 (16) · Śloka 16

কণ্ঠাস্যশোষঃ শ্রবণাবরোধস্তৃষ্ণাভিঘাতদ্ধৃদযে ব্যথা চ ||১৬||

তৃষ্ণাজোদাবর্তলক্ষণমাহ- কণ্ঠাস্যশোষ ইত্যাদি| শ্রবণাবরোধো বাধির্যম্| চকারাত্ শ্রমস্বেদাদযঃ সমানতন্ত্রোক্তাঃ||১৬||

Adhikarana 19 (17) · Śloka 17

শ্রান্তস্য নিঃশ্বাসবিনিগ্রহেণ হৃদ্রোগমোহাবথবাঽপি গুল্মঃ |১৭|

উচ্ছ্বাসজোদাবর্তলক্ষণমাহ- শ্রান্তস্যেত্যাদি| শ্রান্তস্য দ্রুতগমনাদিনা খিন্নস্য| শ্রান্তস্যেত্যনেনাশ্রান্তস্য শ্বাসধারণাদপি পীডা ন ভবতীতি সূচ্যতে| মোহো বৈচিত্ত্যম্|১৭|-

Adhikarana 20 (17) · Śloka 17

জৃম্ভাঽঙ্গমর্দোঽঙ্গশিরোক্ষিজাড্যং নিদ্রাভিঘাতাদথবাঽপি তন্দ্রা ||১৭||

নিদ্রাজোদাবর্তলক্ষণমাহ- জৃম্ভেত্যাদি| জাড্যশব্দোঽঙ্গাদিভিঃ সম্বধ্যতে; জাড্যম্ অপাটবং, গৌরবমিতি তাত্পর্যার্থঃ||১৭||

Adhikarana 21 (18) · Śloka 18

তৃষ্ণার্দিতং পরিক্লিষ্টং ক্ষীণং শূলৈরভিদ্রুতম্ | শকৃদ্বমন্তং মতিমানুদাবর্তিনমুত্সৃজেত্ ||১৮||

পরিত্যাজ্যোদাবর্তলক্ষণমাহ- তৃষ্ণার্দিতমিত্যাদি| পরিক্লিষ্টম্ অত্যর্থমবসন্নং, ক্রিযারহিতমিতি যাবত্; অন্যে সমন্ততো ভাবেন ক্লেশমুপগতং পরিক্লিষ্টং মন্যন্তে| অভিদ্রুতং পীডিতম্| উত্সৃজেত্ পরিত্যজেত্||১৮||

Adhikarana 22 (19) · Śloka 20

সর্বেষ্বেতেষু বিধিবদুদাবর্তেষু কৃত্স্নশঃ | বাযোঃ ক্রিযা বিধাতব্যাঃ স্বমার্গপ্রতিপত্তযে ||১৯|| সামান্যতঃ পৃথক্ত্বেন ক্রিযাং ভূযো নিবোধ মে |২০|

সর্বদোদাবর্তেষু বাযোঃ সদ্ভাবাত্ সামান্যেন বাতহরীং ক্রিযামাহ- সর্বেষ্বেতেষ্বিত্যাদি| বিধিবত্ যথাবিধি| কৃত্স্নশঃ সামস্ত্যেন| ক্রিযাঃ স্নেহস্বেদাদিকাঃ| স্বমার্গপ্রতিপত্তযে বাযোরাত্মমার্গপ্রবর্তনায| সামান্যতঃ সামান্যেন| ‘সর্বেষু’ ইত্যত্র ‘নবসু’ ইতি পঠিত্বা বাতজোদাবর্তাদিষু নবসঙ্খ্যেষু বাযোঃ ক্রিযা বিধাতব্যেতি ব্যাখ্যানযন্তি; তন্ন, বুভুক্ষোদ্ভবাদিষ্বপি চতুর্ষূদাবর্তেষু বাযোঃ সদ্ভাবাদ্বাতহরী ক্রিযা ক্রিযত ইতি| পৃথক্ত্বেন ক্রিযামিত্যাদি| পৃথক্ত্বেন প্রত্যেকম্||১৯||

Adhikarana 23 (20) · Śloka 20

আস্থাপনং মারুতজে স্নিগ্ধস্বিন্নে বিশিষ্যতে ||২০||

আস্থাপনমিত্যাদি| আস্থাপনং নিরূহঃ, তচ্চানুলোমিকবাতহরদ্রব্যকৃতম্| স্নিগ্ধস্বিন্নে ‘আতুরে’ ইতি শেষঃ| বিশিষ্যতে বিশিষ্টং ভবতি, বিশেষেণ ক্রিযত ইতি তাত্পর্যার্থঃ||২০||

Adhikarana 24 (21) · Śloka 21

পুরীষজে তু কর্তব্যো বিধিরানাহিকো ভবেত্ |২১|

পুরীষজ ইত্যাদি| আনাহিকো বিধিঃ ফলবর্ত্যাদিকো বাতব্যাধ্যুক্তো বিসূচ্যাং বক্ষ্যমাণো বা| তুশব্দাত্ অনুক্তমন্যদপি পরীষানুলোমনং কর্তব্যম্|২১|-

Adhikarana 25 (21-25) · Śloka 26

সৌবর্চলাঢ্যাং মদিরাং মূত্রে ত্বভিহতে পিবেত্ ||২১|| এলাং বাঽপ্যথ মদ্যেন ক্ষীরং বাঽপি পিবেন্নরং | ধাত্রীফলানাং স্বরসং সজলং বা পিবেত্ত্র্যহম্ ||২২|| রসমশ্বপুরীষস্য গর্দভস্যাথবা পিবেত্ | মাংসোপদংশং মধু বা পিবেদ্বা সীধু গৌডিকম্ ||২৩|| ভদ্রদারু ঘনং মূর্বা হরিদ্রা মধুকং তথা | কোলপ্রমাণানি পিবেদান্তরিক্ষেণ বারিণা ||২৪|| দুঃস্পর্শাস্বরসং বাঽপি কষাযং কুঙ্কুমস্য চ | এর্বারুবীজং তোযেন পিবেদ্বাঽলবণীকৃতম্ ||২৫|| পঞ্চমূলীশৃতং ক্ষীরং দ্রাক্ষারসমথাপি বা |২৬|

সৌবর্চলাঢ্যামিত্যাদি| সৌবর্চলাঢ্যাং সৌবর্চলোত্কটাম্| মদিরাং মদ্যম্| তুশব্দাত্ সর্পিষোঽবপীডনাদিকং সমানতন্ত্রোক্তং গ্রাহ্যম্| কিং মদিরামেব পিবেদথবাঽন্যদপীত্যাহ- এলামিত্যাদি| ধাত্রীফলানাং স্বরসং সজলং বেতি ন কেবলং দুগ্ধং পিবেদামলকরসং সোদকং পিবেদিত্যর্থঃ| ‘গর্দভস্য’ ইত্যত্রাপি ‘পুরীষরসম্’ ইতি সম্বধ্যতে| মাংসোপদংশং মাংসভক্ষণসহিতং, মধু মদ্যম্| তচ্চ দ্রাক্ষোদ্ভবং, সমানতন্ত্রদর্শনাত্| তথা চ তদ্বচঃ,- “দ্রাক্ষোদ্ভবং চাপি পিবেন্মদ্যং মাংসোপদংশকম্”- ইতি| গৌডিকং সীধু গুডকৃতং সস্যকম্; অত্রাপি মাংসোপদংশমিতি সম্বধ্যতে| ভদ্রদার্বিত্যাদি| ভদ্রদারু দেবদারু| ঘনং মুস্তা| মূর্বা চোরস্নাযুঃ| মধুকং যষ্টীমধু| কোলপ্রমাণানি অর্ধকর্ষপ্রমাণানি| দুঃস্পর্শা দুরালভা| এর্বারুঃ গ্রীষ্মকর্কটিকা| অলবণীকৃতম্ ঈষত্সৈন্ধবযুক্তম্| পঞ্চমূলী লঘুপঞ্চমূলং, সমানতন্ত্রসংবাদাত্; তথা চোক্তম্- “লঘুনা পঞ্চমূলেন শৃতং ক্ষীরং পিবেন্নরঃ”- ইতি||২১-২৫||-

Adhikarana 26 (26-27) · Śloka 27

যোগাংশ্চ বিতরেদত্র পূর্বোক্তানশ্মরীভিদঃ ||২৬|| মূত্রকৃচ্ছ্রক্রমং চাপি কুর্যান্নিরবশেষতঃ | ভূযো বক্ষ্যামি যোগান্ যান্ মূত্রাঘাতোপশান্তযে ||২৭||

ইদানীং মূত্রজোদাবর্তে অশ্মরীমূত্রকৃচ্ছ্রমূত্রাঘাতচিকিত্সিতান্যতিদিশন্নাহ- যোগাংশ্চ বিতরেদিত্যাদি| বিতরেত্ দদ্যাত্| অত্র মূত্রজোদাবর্তে| পূর্বোক্তান্ ‘কুশঃ কাশঃ শরঃ’ ইত্যাদিনাঽশ্মরীচিকিত্সিতোক্তান্| ভূযঃ অতিশযেন| ‘বক্ষ্যামি যান্ যোগান্' ইত্যত্রাপি ‘তান্ কুর্যাত্’ ইতি সম্বধ্যতে||২৬-২৭||

Adhikarana 27 (28) · Śloka 28

স্নৈহৈঃ স্বেদৈরুদাবর্তং জৃম্ভাজং সমুপাচরেত্ |২৮|

জৃম্ভণজোদাবর্তচিকিত্সিতমাহ- স্নেহৈরিত্যাদি| স্নেহৈঃ স্বেদৈরিতি পদদ্বযেঽপি বহুবচনাচ্চতুর্ভিঃ স্নেহৈশ্চতুর্ভিশ্চ স্বেদৈরিত্যর্থঃ|২৮|-

Adhikarana 28 (28) · Śloka 28

অশ্রুমোক্ষোঽশ্রুজে কার্যঃ স্নিগ্ধস্বিন্নস্য দেহিনঃ ||২৮||

অশ্রুজোদাবর্তচিকিত্সামাহ- অশ্রুমোক্ষ ইত্যাদি| অশ্রুমোক্ষঃ অশ্রুনিঃসারণম্| অত্র লুপ্তচকারনির্দেশাত্তীক্ষ্ণভঞ্জনাদিকং বক্ষ্যমাণমত্রাপি সম্বন্ধনীযম্||২৮||

Adhikarana 29 (29) · Śloka 29

তীক্ষ্ণাঞ্জনাবপীডাভ্যাং তীক্ষ্ণগন্ধোপশিঙ্ঘনৈঃ | বর্তিপ্রযোগৈরথবা ক্ষবসক্তিং প্রবর্তযেত্ ||২৯|| (তীক্ষ্ণৌষধপ্রধমনৈরথবাঽঽদিত্যরশ্মিভিঃ||) |

ক্ষবজোদাবর্তচিকিত্সিতমাহ- তীক্ষ্ণাঞ্জনাবপীডাভ্যামিত্যাদি| তীক্ষ্ণশব্দোঽঞ্জনাবপীডাভ্যাং সহ সম্বধ্যতে| অবপীডো নস্যভেদঃ| তীক্ষ্ণগন্ধোপশিঙ্ঘনৈঃ মরিচাদিচূর্ণাবঘ্রাণৈঃ| বর্তিপ্রযোগা ধূমবর্তিপ্রযোগাঃ| অত্র লুপ্তাদিশব্দাত্ অর্করশ্মিবিলোকনাদযো গৃহ্যন্তে| তথা চ- “তীক্ষ্ণধূমাঞ্জনাঘ্রাণনাবনার্কবিলোকনৈঃ| প্রবর্তযেত্ ক্ষুতিং সক্তাম্”- ইত্যাদি| ক্ষবসক্তিং ছিক্কাযা অপ্রবর্তনম্| কেচিত্তীক্ষ্ণাঞ্জনাবপীডাভ্যামিতি পদমশ্রুজোদাবর্ত এব মন্যন্তে ন ক্ষবজে, অনৌপযিকত্বাত্তন্ত্রান্তরবিরোধাচ্চ||২৯||-

Adhikarana 30 (30) · Śloka 31

উদ্গারজে ক্রমোপেতং স্নৈহিকং ধূমমাচরেত্ ||৩০|| সুরাং সৌবর্চলবতীং বীজপূররসান্বিতাম্ |৩১|

উদ্গারজে ক্রমোপেতমিত্যাদি| ক্রমোপেতং ধূমনস্যকবলগ্রহচিকিত্সিতোক্তক্রমসংযুক্তম্| কিমুদ্গারজে স্নৈহিকং ধূমমেবাচরেদুতান্যদপীত্যাহ- সুরামিত্যাদি||৩০||-

Adhikarana 31 (31) · Śloka 32

ছর্দ্যাঘাতং যথাদোষং সম্যক্ স্নেহাদিভির্জযেত্ ||৩১|| সক্ষারলবণোপেতমভ্যঙ্গং চাত্র দাপযেত্ |৩২|

ছর্দ্যাঘাতমিত্যাদি| ছর্দ্যাঘাতং ছর্দ্যাঘাতজমুদাবর্তং, কারণেকার্যোপচারাত্| যথাদোষং দোষস্যানতিক্রমেণ| আদিশব্দাত্ বমনাদযঃ| সক্ষারলবণোপেতম্ ঈষদ্যবক্ষারসৈন্ধবসংযুক্তং; যদ্যপি তন্ত্রান্তরে তৈলাভ্যঙ্গ উক্তস্তথাঽপ্যত্র বৃদ্ধসম্প্রদাযাদ্ধৃতাভ্যঙ্গঃ কার্যঃ| চকারাত্ ব্যাযামোপবাসাদযো গৃহ্যন্তে| 'বম্যাঘাতং' ইতি কেচিত্ পঠন্তি||৩১||

Adhikarana 32 (32-33) · Śloka 33

বস্তিশুদ্ধিকরাবাপং চতুর্গুণজলং পযঃ ||৩২|| আবারিনাশাত্ ক্বথিতং পীতবন্তং প্রকামতঃ | রমযেযুঃ প্রিযা নার্যঃ শুক্রোদাবর্তিনং নরম্ ||৩৩||

বস্তিশুদ্ধিকরাবাপমিত্যাদি| বস্তিশুদ্ধিকরাবাপং কূষ্মাণ্ডকতৃণপঞ্চমূলাদিপ্রক্ষেপম্| প্রক্ষেপদ্রব্যপ্রমাণং ক্ষীরাষ্টাংশেন| পযঃ ক্ষীরম্| প্রকামতঃ স্বেচ্ছযা নার্যঃ শুক্রোদাবর্তিনং নরং রমযেযুঃ ভজেযুঃ| যদত্র রমণে স্ত্রীণাং কর্ত্রীত্বেনাভিধানং তত্ শুক্রোদাবর্তিনো হর্ষাধিক্যসঞ্জননার্থম্| প্রিযা মনোনুকূলাঃ| লুপ্তচকারাত্ তাম্রচূডাদযস্তন্ত্রান্তরোক্তা গ্রাহ্যাঃ||৩২-৩৩||

Adhikarana 33 (34) · Śloka 34

ক্ষুদ্বিঘাতে হিতং স্নিগ্ধমুষ্ণমল্পং চ ভোজনম্ |৩৪|

ক্ষুদ্বিঘাতে হিতমিত্যাদি| চকারাত্ লঘ্বপি|৩৪|-

Adhikarana 34 (34) · Śloka 34

তৃষ্ণাঘাতে পিবেন্মন্থং যবাগূং বাঽপি শীতলাম্ ||৩৪||

তৃষ্ণাঘাতে পিবেন্মন্থমিত্যাদি| মন্থঃ সঘৃতশীতলজলপ্লুতাঃ সক্তবঃ| যবাগূরত্র পেযা| অপিশব্দাত্ শীতলজলাবগাহপানাদিকং গ্রাহ্যম্||৩৪||

Adhikarana 35 (35) · Śloka 35

ভোজ্যো রসেন বিশ্রান্তঃ শ্রমশ্বাসাতুরো নরঃ |৩৫|

ভোজ্যো রসেনেত্যাদি| ভোজ্যো ভোজযিতব্যঃ রসেন মাংসরসেন|৩৫|-

Adhikarana 36 (35) · Śloka 35

নিদ্রাঘাতে পিবেত্ ক্ষীরং স্বপ্যাচ্চেষ্টকথা নরঃ ||৩৫||

নিদ্রাঘাতে পিবেত্ ক্ষীরমিত্যাদি| ক্ষীরং গোক্ষীরং ন মাহিষং, প্রধানকল্পনাশ্রযণাত্ সমানতন্ত্রদর্শনাচ্চ| তথা চ তন্ত্রান্তরম্,- “নিদ্রাঘাতে পিবেত্ ক্ষীরং গোস্তনাদথবা নরঃ”- ইতি| ইষ্টকথা অনুকূলকথাঃ , ‘শৃণুযাত্’ ইতি শেষঃ| ‘ইষ্টকথারতঃ’ ইতি পাঠান্তরম্| স্বপ্যাত্ নিদ্রাং গচ্ছেত্||৩৫||

Adhikarana 37 (36) · Śloka 36

আধ্মানাদ্যেষু রোগেষু যথাস্বং প্রযতেত হি | যচ্চ যত্র ভবেত্প্রাপ্তং তচ্চ তস্মিন্ প্রযোজযেত্ ||৩৬||

উদাবর্তচিকিত্সিতমভিধাযেদানীং তদুপদ্রবচিকিত্সিতমাহ- আধ্মানাদ্যেষু রোগেষ্বিত্যাদি| আধ্মানাদ্যেষু বেগাবরোধজাতেষু| আদিশব্দাত্ শূলপরিকর্তিকাপুরীষসঙ্গাদীনাং গ্রহণম্| যথাস্বং যস্যাধ্মানাদের্যদাত্মীযমৌষধং বাতব্যাধ্যাদিচিকিত্সিতোক্তং তেন প্রযতেত প্রযত্নং কুর্বীত| অন্যদপ্যুচিতং চিকিত্সিতমাধ্মানাদিষু কার্যমিত্যাহ- যচ্চেত্যাদি| যদৌষধং যস্মিন্ আধ্মানাদৌ প্রাপ্তং যুক্তম্||৩৬||

Adhikarana 38 (37-40) · Śloka 41

বাযুঃ কোষ্ঠানুগো রূক্ষৈঃ কষাযকটুতিক্তকৈঃ | ভোজনৈঃ কুপিতঃ সদ্য উদাবর্তং করোতি হি ||৩৭|| বাতমূত্রপুরীষাসৃক্কফমেদোবহানি বৈ | স্রোতাংস্যুদাবর্তযতি পুরীষং চাতিবর্তযেত্ ||৩৮|| ততো হৃদ্বস্তিশূলার্তো গৌরবারুচিপীডিতঃ | বাতমূত্রপুরীষাণি কৃচ্ছ্রেণ কুরুতে নরঃ ||৩৯|| শ্বাসকাসপ্রতিশ্যাযদাহমোহবমিজ্বরান্ | তৃষ্ণাহিক্কাশিরোরোগমনঃশ্রবণবিভ্রমান্ ||৪০|| লভতে চ বহূনন্যান্ বিকারান্ বাতকোপজান্ |৪১|

‘অপথ্যভোজনাচ্চাপি বক্ষ্যতে চ তথাঽপরঃ’ ইতি যদুক্তং তস্যাবসরঃ- বাযুরিত্যাদি| কোষ্ঠানুগো বাযুরত্র অপানঃ, সমানতন্ত্রদর্শনাত্| তস্য লক্ষণমাহ- বাতেত্যাদি| উদাবর্তযতি ঊর্ধ্বামাবর্তযতি, অধোবহানি স্রোতাংস্যূর্ধ্ববহানি করোতীত্যর্থঃ| পুরীষং চাতিবর্তযেদিতি, উষ্ট্রাদিপুরীষবত্ কঠিনং কুর্যাদিত্যর্থঃ| ততঃ তস্মাদ্ধেতোঃ| বিভ্রমো ব্যাপদ্বিশেষঃ| অন্যান্ আধ্মানপ্রত্যাধ্মানাদীন্||৩৭-৪০||-

Adhikarana 39 (41) · Śloka 42

তং তৈললবণাভ্যক্তং স্নিগ্ধং স্বিন্নং নিরূহযেত্ ||৪১|| দোষতো ভিন্নবর্চস্কং ভুক্তং চাপ্যনুবাসযেত্ |৪২|

তস্য চিকিত্সিতমাহ- তং তৈলেত্যাদি| তম্ উদাবর্তিনম্| দোষত ইত্যাদি| ভিন্নবর্চস্কং নিরূহভিন্নপুরীষং পুরুষং দোষমপেক্ষ্য ভুক্তবন্তমনুবাসযেদিতি সম্বন্ধঃ| কেচিদত্রানুবাসনং নিরুহাতিযোগব্যাপত্প্রশমনার্থং মন্যন্তে; তন্ন, সমানতন্ত্রবিরোধাত্; তথা চ,- “উদাবর্তে ত্বপথ্যোত্থে সুনিরূঢং ততো ভিষক্| যথাদোষং ভুক্তবন্তমাশু চৈবানুবাসযেত্”- ইতি| কেচিত্ ‘ভিন্নবর্চস্কং’ ইত্যত্র ‘ভিন্নবর্চাংসি’ ইতি পঠিত্বা অনুলোমনীযানি ভুক্তবন্তমিতি ব্যাখ্যানযন্তি||৪১||-

Adhikarana 40 (42) · Śloka 43

ন চেচ্ছান্তিং ব্রজত্যেবমুদাবর্তঃ সুদারুণঃ ||৪২|| অথৈনং বহুশঃ স্বিন্নং যুঞ্জ্যাত্ স্নেহবিরেচনৈঃ |৪৩|

নিরূহানুবাসনাভ্যামপ্যপ্রশাম্যত্যুদাবর্তে চিকিত্সিতমাহ- ন চেচ্ছান্তিমিত্যাদি| এবং পূর্বোক্তবিধিনা| এনম্ উদাবর্তিনম্| স্বিন্নং স্নিগ্ধস্বিন্নম্, আদিলোপাত্| স্নেহবিরেচনৈরেরণ্ডতৈলাদিভিঃ||৪২||-

Adhikarana 41 (43-44) · Śloka 44

পাযযেত ত্রিবৃত্পীলুযবানীরম্লপাচনৈঃ ||৪৩|| হিঙ্গুকুষ্ঠবচাস্বর্জিবিডঙ্গং বা দ্বিরুত্তরম্ | যোগাবেতাবুদাবর্তং শূলং চানিলজং হতঃ ||৪৪||

অপথ্যজোদাবর্তে যোগদ্বযমাহ- পাযযেতেত্যাদি| পীলুঃ উষ্ট্রপ্রিযো গুডফলঃ, ভাদানকে ‘পীলু’ ইতি প্রসিদ্ধঃ| অম্লপাচনৈঃ অম্লং কাঞ্জিকং, পাচনানি চিত্রকাদীনি, তৈঃ সহ পাযযেদিত্যর্থঃ| ত্রিবৃদাদিঃ একো যোগঃ, হিঙ্গ্বাদিস্তু দ্বিতীযঃ| স্বর্জী স্বর্জিকাক্ষারঃ| দ্বিরুত্তরমিতি আদ্যাচ্চ দ্রব্যাদুত্তরোত্তরং দ্রব্যং দ্বিগুণং গ্রাহ্যম্| দ্বিরুত্তরমিতি পদং ন পূর্বযোগে সম্বন্ধনীযং, ‘দ্বিরুত্তরা হিঙ্গুবচা সকুষ্ঠা’ ইত্যাদিনা তন্ত্রান্তরে দর্শিতত্বাত্| যবানীরিত্যত্র যবাগূমিতি কেচিত্ পঠন্তি| অপরে ‘অম্লপাচনৈঃ’ ইত্যত্র 'অম্লপানকৈঃ' ইতি পঠিত্বা অম্লদ্রবৈরিতি ব্যাখ্যানযন্তি||৪৩-৪৪||

Adhikarana 42 (45) · Śloka 46

দেবদার্বগ্নিকৌ কুষ্ঠং শুণ্ঠীং পথ্যাং পলঙ্কষাম্ | পৌষ্করাণি চ মূলানি তোযস্যর্ধাঢকে পচেত্ ||৪৫|| পাদাবশিষ্টং তত্ পীতমুদাবর্তমপোহতি |৪৬|

দেবদার্বগ্নিকাবিত্যাদি| অগ্নিকঃ অজমোদা| পথ্যা হরীতকী| পলঙ্কষা গুগ্গুলুঃ| অর্ধাঢকং দ্বাত্রিংশত্পলানি, পাদাবশিষ্টম্ অষ্টপলপ্রমিতং, বৃদ্ধবৈদ্যব্যবহারাত্তন্ত্রান্তরদর্শনাচ্চ| তথা চ তন্ত্রান্তরে উক্তম্,- "কুষ্ঠং পলঙ্কষাং পথ্যাং শুণ্ঠীং দার্বগ্নিপুষ্করম্| দ্বাত্রিংশতা তোযপলৈঃ পক্ত্বা পাদাবশেষিতম্| পাযযেত্"- ইত্যাদি| যদ্যপি ‘ক্বাথস্যাঞ্জলিরিষ্যতে’ ইতি পরিভাষা বিদ্যতে, তথাঽপি মানানুক্তৌ পরিভাষাশ্রযণং ন পুনরুক্তে মানে| কেচিদর্ধাঢকং চতুঃষষ্টিপলানি মন্যন্তে, তে চ ষোডশপলোন্মিতং ক্বাথং পাযযন্তি; অপরে ক্বাথবাহুল্যাত্ ক্রমশঃ ক্বাথপানমিচ্ছন্তি ন পুনরেকস্মিন্নেব দিবসে; তন্ন, সমানতন্ত্রবিরোধাত্||৪৫||-

Adhikarana 43 (46-47) · Śloka 47

মূলকং শুষ্কমার্দ্রং চ বর্ষাভূঃ পঞ্চমূলকম্ ||৪৬|| আরেবতফলং চাপ্সু পক্ত্বা তেন ঘৃতং পচেত্ | তত্ পীযমানং শাস্ত্যুগ্রমুদাবর্তমশেষতঃ ||৪৭||

উদাবর্তে পানার্থং ঘৃতমাহ- মূলকমিত্যাদি| শুষ্কমিতি মূলার্দ্রকযোর্বিশেষণম্| বর্ষাভূঃ পুনর্নবা| পঞ্চমূলকং বিল্বাদিপঞ্চমূলম্| আরেবতফলং গিরিমালকফলম্| পক্ত্বেতি ক্বাথপাকপরিভাষযা| তেন ক্বাথেন| শাস্তি হন্তীত্যর্থঃ||৪৬-৪৭||

Adhikarana 44 (48) · Śloka 48

বচামতিবিষাং কুষ্ঠং যবক্ষারং হরীতকীম্ | কৃষ্ণাং নির্দহনীং চাপি পিবেদুষ্ণেন বারিণা ||৪৮||

বচামতিবিষামিত্যাদি| নির্দহনী অগ্নিমন্থঃ, গণিকারিকেত্যন্যে||৪৮||

Adhikarana 45 (49) · Śloka 50

ইক্ষ্বাকুমূলং মদনং বিশল্যাতিবিষে বচাম্ | কুষ্ঠং কিণ্বাগ্নিকৌ চৈব পিবেত্তুল্যানি পূর্ববত্ ||৪৯|| মূত্রেণ দেবদার্বগ্নিত্রিফলাবৃহতীঃ পিবেত্ |৫০|

ইক্ষ্বাকুমূলমিত্যাদি| ইক্ষ্বাকুঃ কটুতুম্বী| বিশল্যা কাষ্ঠপাটলা, ইন্দ্রবারুণীত্যন্যে| কিণ্বং সুরাবীজং; অগ্নিকঃ অজমোদা| পূর্ববদিতি উষ্ণোদকেনেত্যর্থঃ| মূত্রেণ গোমূত্রেণ| অগ্নিঃ চিত্রকঃ||৪৯||

Adhikarana 46 (50) · Śloka 51

যবপ্রস্থং ফলৈঃ সার্ধং কণ্টকার্যা জলাঢকে ||৫০|| পক্ত্বাঽর্ধপ্রস্থশেষং তু পিবেদ্ধিঙ্গুসমন্বিতম্ |৫১|

যবপ্রস্থমিত্যাদি| কণ্টকারীফলযবযোঃ সমুদিতেন সমভাগেন প্রস্থং ষোডশপলানি| জলাঢকং তোযস্য চতুঃষষ্টিপলানি, বৃদ্ধবৈদ্যব্যবহারাদত্র তোযদ্বৈগুণ্যপরিভাষা নাদ্রিযতে| অর্ধপ্রস্থশেষম্ অষ্টৌ পলানি| অত্র ক্বাথস্যাষ্টৌ পলানি বহুত্বাত্ কথং পাতব্যানীতি নাশঙ্কনীযং, "ঋষযস্ত্বেব জানন্তি দ্র্ব্যসংযোগজং ফলম্"- ইত্যুক্তেঃ| যে তু পূর্বোক্তদেবদার্বাদিপানবদত্রাপি তোযস্য মানাধিক্যমিচ্ছন্তি, তে কণ্টকারিফলান্যপি প্রস্থপ্রমিতানি গৃহ্ণন্তি| কেচিত্ ‘যবপ্রস্থং পলে দ্বে চ কণ্টকার্যা’ ইতি পঠন্তি||৫০||-

Adhikarana 47 (51) · Śloka 52

মদনালাবুবীজানি পিপ্পলীং সনিদিগ্ধিকাম্ ||৫১|| সঞ্চূর্ণ্য প্রধমেন্নাড্যা বিশত্যেতদ্যথা গুদম্ |৫২|

মদনালাবুবীজানীত্যাদি| মদনং মদনফলং, তস্য বীজানি বৈতরণসংবাদাত্| তথা চ তদ্বচঃ,- "মদনালাবুনোর্বীজং কণ্টকারীকণান্বিতম্"- ইত্যাদি| নিদিগ্ধিকা কণ্টকারী| এতানি সঞ্চূর্ণ্য নাড্যা প্রধমেত্ মুখাদিবাযুনা কৃত্বা গুদে প্রেরযেত্||৫১||-

Adhikarana 48 (52-53) · Śloka 53

চূর্ণং নিকুম্ভকম্পিল্লশ্যামেক্ষ্বাক্বগ্নিকোদ্ভবম্ ||৫২|| কৃতবেধনমাগধ্যোর্লবণানাং চ সাধযেত্ | গবাং মূত্রেণ তা বর্তীঃ কারযেত্তু গুদানুগাঃ | সদ্যঃ শর্মকরাবেতৌ যোগাবমৃতসম্মতৌ ||৫৩||

চূর্ণমিত্যাদি| নিকুম্ভো দন্তীবৃক্ষঃ, কম্পিল্লঃ রোচনিকা, শ্যামা অরুণমূলা ত্রিবৃত্, ইক্ষ্বাকুঃ কটুতুম্বী, অগ্নিকঃ অজমোদা, কৃতবেধনং কোশাতকীভেদঃ, মাগধী পিপ্পলী, লবণানি সৈন্ধবাদীনি, গুদানুগা গুদপ্রবেশযোগ্যপ্রমাণা| শর্মকরৌ সুখকরৌ| এতৌ যোগাবিতি মদনাদিচূর্ণপ্রধমনযোগবর্তিযোগৌ| অমৃতসম্মিতৌ অমৃততুল্যৌ, জীবনীযাত্মকত্বাত্| বর্তিকল্পনাং কথযতি- নিকুম্ভাদীনাং চূর্ণং গোমূত্রেণ পক্ত্বা ঘনে শীতীভূতে চ সতি বর্তীঃ কারযেত্||৫২-৫৩||

Adhikarana puShpikA · Śloka 55

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতেন্ত্রে উদাবর্তপ্রতিষেধো নাম (সপ্তদশোঽধ্যাযঃ, আদিতঃ) পঞ্চপঞ্চাশত্তমোঽধ্যাযঃ ||৫৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে উদাবর্তপ্রতিষেধো নাম পঞ্চপঞ্চাশত্তমোঽধ্যাযঃ||৫৫||