9. vātābhiṣyandapratiṣēdhādhyāyaḥ

Adhikarana 1 (1-2) · Śloka 2

অথাতো বাতাভিষ্যন্দপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

চিকিত্সিতপ্রবিভাগীযানন্তরং সর্বেষাং নযনামযানামভিষ্যন্দমূলত্বাত্, তত্রাপি পিত্তাদীনাং বাতস্যৈবাবরণত্বেন নিদানভূতত্বাদাদৌ বাতাভিষ্যন্দপ্রতিষেধো যুক্ত ইত্যত আহ- অথাত ইত্যাদি| অত্রাদিশব্দো লুপ্তো দ্রষ্টব্যঃ, তেন বাতাভিষ্যন্দাদিপ্রতিষেধং ব্যাখ্যাস্যাম ইত্যর্থঃ; প্রতিষেধঃ চিকিত্সিতং; এবং পিত্তাভিষ্যন্দপ্রতিষেধাদিষ্বাদিশব্দো দ্রষ্টব্যঃ||১-২||

Adhikarana 2 (3-4) · Śloka 5

পুরাণসর্পিষা স্নিগ্ধৌ স্যন্দাধীমন্থপীডিতৌ | স্বেদযিত্বা যথান্যাযং সিরামোক্ষেণ যোজযেত্ ||৩|| সম্পাদযেদ্বস্তিভিস্তু সম্যক্ স্নেহবিরেচিতৌ | তর্পণৈঃ পুটপাকৈশ্চ ধূমৈরাশ্চ্যোতনৈস্তথা ||৪|| নস্যস্নেহপরীষেকৈঃ শিরোবস্তিভিরেব চ |৫|

তত্র সিরাব্যধসাধ্যেষু পঞ্চদশস্বভিষ্যন্দাধিমন্থৌ পঠিতৌ, সিরাব্যধসাধ্যানাং চাক্ষিরোগাণাং শোণিতমূলত্বান্মূলোচ্ছেদার্থং পূর্বং দূষ্যনির্হরণং দর্শযন্নাহ- পুরাণেত্যাদি| পুরাণং সর্পিঃ সংবত্সরোষিতং ঘৃতম্; অন্যে দশবর্ষস্থিতং ঘৃতং পুরাণং কথযন্তি| যথান্যাযং যথাশাস্ত্রমিত্যর্থঃ| তেন দৃষ্টেঃ সমীপমুত্তমাঙ্গমল্পং স্বেদযেত্, দৃষ্টিরস্বেদ্যা| যথান্যাযমিতি পদং স্নেহপানসিরামোক্ষাভ্যাং সহ যোজযেত্| তেন স্নেহোপযৌগিকোক্তো বিধিঃ ‘প্রাক্ পাচিতামদোষায’ ইত্যাদিকোঽবধারণীযঃ| তেনাত্রাপি দোষব্যাধিনিরামতাযামেব সর্পিঃপানাদযো বিধেযাঃ| তথা চ তন্ত্রান্তরং,- “স্বেদঃ প্রলেপস্তিক্তান্নং ধূমো দিনচতুষ্টযম্| লঙ্ঘনং চাক্ষিরোগাণামামানাং পাচনানি ষট্|| অঞ্জনং সর্পিষঃ পানং কষাযং গুরুভোজনম্| নেত্ররোগেষু সামেষু স্নানং চ পরিবর্জযেত্”- ইতি| বিদেহেঽপি,- “প্রাগেবাক্ষ্যামযে ভক্তং ত্রিরাত্রমগুরু স্মৃতম্| উপবাসস্ত্র্যহং বা স্যান্নক্তং বাঽপ্যশনং হিতম্|| ততশ্চতুর্থে দিবসে ব্যাধৌ সঞ্জাতলক্ষণে| যথোক্তাস্তু ক্রিযাঃ কার্যা নস্যসেকাঞ্জনাদিকাঃ”- ইতি| সিরামোক্ষেণেত্যত্র সিরা উপনাসিকা লালাট্যা বা আপাঙ্গ্যা বা| দূষ্যহরণং প্রতিপাদ্য দোষচিকিত্সিতমাহ- সম্পাদযেদিত্যাদি| সম্পাদযেত্ যোজযেত্| বস্তিভিঃ স্নেহবস্তিভির্নিরূহৈর্বা| সম্যগিতি হীনমিথ্যাতিযোগরহিতৈঃ| স্নেহবিরেচিতাবিতি স্নেহবিরেচনং তু পিত্তস্যানুগতে পিত্তাসৃগনুগতে বা বাযৌ বলবতো বহুদোষস্য চেতি| দুর্বলস্যাল্পদোষস্য চ পুরুষস্য স্বস্থানগতো মলাবৃতঃ স্বতন্ত্রো বা বস্তিভিরেবাবজেতব্যঃ| বস্তিরপি মলাবৃতে বাতে নৈরূহিকঃ, ধাতুক্ষযজে স্নৈহিকঃ| সম্যক্শব্দো বস্ত্যাদিষু শিরোবস্ত্যন্তেষু সম্বধ্যতে| তর্পণাদিবিধানং ক্রিযাকল্পে ভবিষ্যতি| তত্র সেকঃ সুখোষ্ণঃ, আশ্চ্যোতনং চ শীতমেব||৩-৪||-

Adhikarana 3 (5-6) · Śloka 7

বাতঘ্নানূপজলজমাংসাম্লক্বাথসেচনৈঃ ||৫|| স্নেহৈশ্চতুর্ভিরুষ্ণৈশ্চ তত্পীতাম্বরধারণৈঃ | পযোভির্বেসবারৈশ্চ সাল্বণৈঃ পাযসৈস্তথা ||৬|| ভিষক্ সম্পাদযেদেতাবুপনাহৈশ্চ পূজিতৈঃ |৭|

পূর্বং স্বেদযিত্বেত্যুক্তং, তত্র দ্রবাদিস্বেদানুপপাদযন্নাহ- বাতঘ্নেত্যাদি| বাতঘ্নানি ভদ্রদার্বাদীনি| উষ্ণৈঃ সুখোষ্ণৈঃ| উষ্ণৈরিতি পদং বাতঘ্নাদিভিঃ সম্বধ্যতে| তত্পীতাম্বরধারণৈরিতি চতুঃস্নেহমিতবস্ত্রধারণৈরিত্যর্থঃ| সাল্বণৈরিতি সাল্বণস্যৈকত্বাত্ কথং বহুবচনং? সত্যং, যৌগিকৈরন্যৈরপি দ্রব্যৈঃ স্বেদঃ কার্য ইতি বোধনার্থং বহুবচনং, স্বেদযিত্বা সিরামোক্ষেণ যোজযেদিত্যুক্তম্||৫-৬||-

Adhikarana 4 (7) · Śloka 8

গ্রাম্যানূপৌদকরসৈঃ স্নিগ্ধৈঃ ফলরসান্বিতৈঃ ||৭|| সুসংস্কৃতৈঃ পযোভিশ্চ তযোরাহার ইষ্যতে |৮|

ন চাভুক্তবতঃ শস্ত্রকর্ম কুর্যাদিত্যাশঙ্ক্যাহারমাহ- গ্রাম্যেত্যাদি| ফলরসান্বিতৈরিতি দাডিমামলকরসসংযুক্তৈঃ| সুসংস্কৃতৈঃ পযোভিরিতি শতাবরীশৃঙ্গবেরপ্রভৃতিদ্রব্যসংস্কৃতৈরিত্যর্থঃ| তযোঃ স্যন্দাধিমন্থযোঃ||৭||-

Adhikarana 5 (8-9) · Śloka 10

তথা চোপরি ভক্তস্য সর্পিঃপানং(নে)প্রশস্যতে ||৮|| ত্রিফলাক্বাথসংসিদ্ধং কেবলং জীর্ণমেব বা | সিদ্ধং বাতহরৈঃ ক্ষীরং প্রথমেন গণেন বা ||৯|| স্নেহাস্তৈলাদ্বিনা সিদ্ধা বাতঘ্নৈস্তর্পণে হিতাঃ |১০|

পুরাণসর্পিষা স্নিগ্ধাবিত্যুক্তং তস্য চ ঘৃতস্যাবচারণকালং নিযমযন্নাহ- তথেত্যাদি| কেবলম্ অসংস্কৃতম্| বাতহরৈঃ ভদ্রদার্বাদিভিঃ| জেজ্জটাচার্যস্তু কাকোল্যাদিভির্বাতহরৈরিত্যাহ| উপরি পানং পিবেদিতি শেষঃ| প্রথমেন গণেন বিদারিগন্ধাদিনা| গযদাসাচার্যস্তু সর্বত্রাপি ঘৃতং মন্যতে| তথা চ তদ্ব্যাখ্যানম্- “ত্রিফলাঘৃতং ব্যাধিপ্রত্যনীকং, বাতহরদেবদার্বাদিসিদ্ধং তু দোষপ্রত্যনীকং, বাতস্যৈব পিত্তানুবন্ধে সতি বিদারিগন্ধাদিসিদ্ধং”; ঈদৃশে চ ব্যাখ্যানে ‘সিদ্ধং বাতহরৈর্বাঽপি প্রথমেন গণেন বা’ ইতি পাঠঃ||৮-৯||-

Adhikarana 6 (10) · Śloka 11

স্নৈহিকঃ পুটপাকশ্চ ধূমো নস্যং চ তদ্বিধম্ ||১০|| নস্যাদিষু স্থিরাক্ষীরমধুরৈস্তৈলমিষ্যতে |১১|

পূর্বং তর্পণৈরিত্যুক্তং, তত্র তর্পণদ্রব্যাণ্যাহ- স্নৈহিক ইত্যাদি| স্নৈহিকঃ পুটপাকঃ ক্রিযাকল্পে বক্ষ্যমাণঃ| তদ্বিধং স্নৈহিকমিত্যর্থঃ||১০||-

Adhikarana 7 (11) · Śloka 12

এরণ্ডপল্লবে মূলে ত্বচি বাঽঽজং পযঃ শৃতম্ ||১১|| কণ্টকার্যাশ্চ মূলেষু সুখোষ্ণং সেচনে হিতম্ |১২|

আন্তরমুপক্রমমভিধায বাহ্যমাহ- এরণ্ডেত্যাদি| সেচনে ইত্যত্র চকারো লুপ্তো দ্রষ্টব্যঃ; তেন ন কেবলং সেকে আশ্চ্যোতনে চেত্যর্থঃ| তত্র সেকে সুখোষ্ণং, আশ্চ্যোতনে চ শীতমেবেত্যর্থঃ||১১||-

Adhikarana 8 (12) · Śloka 13

সৈন্ধবোদীচ্যযষ্ট্যাহ্বপিপ্পলীভিঃ শৃতং পযঃ ||১২|| হিতমর্ধোদকং সেকে তথাঽঽশ্চ্যোতনমেব চ |১৩|

সৈন্ধবেত্যাদি| অর্ধোদকমিতি অর্ধমুদকং যস্মিন্ ক্ষীরে তত্ ক্ষীরং সেকে হিতং তথা আশ্চ্যোতনে চ; ন পুনঃ পানাদৌ| সৈন্ধবাদিপ্রমাণং তু ক্ষীরাদষ্টমাংশমেব||১২||-

Adhikarana 9 (13) · Śloka 14

হীবেরবক্রমঞ্জিষ্ঠোদুম্বরত্বক্ষু সাধিতম্ ||১৩|| সাম্ভশ্ছাগং পযো বাঽপি শূলাশ্চ্যোতনমুত্তমম্ |১৪|

হ্রীবেরেত্যাদি| হ্রীবেরং বালকম্| বক্রং তগরম্| সাম্ভ ইতি চতুর্গুণোদকং, অর্ধোদকমিতি কেচিত্| আশ্চ্যোতনম্ অক্ষিপূরণম্||১৩||-

Adhikarana 10 (14) · Śloka 15

মধুকং রজনীং পথ্যাং দেবদারুং চ পেষযেত্ ||১৪|| আজেন পযসা শ্রেষ্ঠমভিষ্যন্দে তদঞ্জনম্ |১৫|

মধুকমিত্যাদি| কেচিদমুং পাঠং ন পঠন্তি||১৪||-

Adhikarana 11 (15) · Śloka 16

গৈরিকং সৈন্ধবং কৃষ্ণাং নাগরং চ যথোত্তরম্ ||১৫|| দ্বিগুণং পিষ্টমদ্ভিস্তু গুটিকাঞ্জনমিষ্যতে |১৬|

গৈরিকমিত্যাদি| যথোত্তরং দ্বিগুণমিতি গৈরিকাদ্দ্বিগুণং সৈন্ধবং, সৈন্ধবাদ্দ্বিগুণা কৃষ্ণা, ততোঽপি দ্বিগুণং নাগরম্| গুটিকাঞ্জনমিষ্যতে ইতি স্নৈহিকপুটপাকাদিজনিতকফানুবন্ধস্য গুটিকাঞ্জনম্| কেচিদত্রাপ্যাজেন পযসেতি সম্বধ্নন্তি; তেনাজপযসা পিষ্টমদ্ভির্বা| ‘নাগরং চ যথোত্তরং’ ইত্যত্র ‘গোদন্তং চ যথোত্তরং’ ইতি পঠন্তি; স চ পাঠো জেজ্জটাচার্যেণ দূষিতঃ||১৫||-

Adhikarana 12 (16) · Śloka 16

স্নেহাঞ্জনং হিতং চাত্র বক্ষ্যতে তদ্যথাবিধি ||১৬||

স্নেহেত্যাদি| যথাবিধীতি বিধিমনতিক্রম্য , এতেনাপতর্পণসিরাব্যধকুপিতবাতেঽভিষ্যন্দে স্নেহাঞ্জনং হিতমিত্যর্থঃ| অত্রৈকে ‘তাম্রপাত্রস্থিতং মাসং সর্পিঃসৈন্ধবসংযুতং’ ইতি স্নেহাঞ্জনমাহুঃ| অন্যে তু ‘বসা চানূপজলজা সৈন্ধবেন সমাযুতা’ ইত্যাদিনা বক্ষ্যমাণং স্নেহাঞ্জনং কথযন্তি||১৬||

Adhikarana 13 (17) · Śloka 17

রোগো যশ্চান্যতোবাতো যশ্চ মারুতপর্যযঃ | অনেনৈব বিধানেন ভিষক্ তাবপি সাধযেত্ ||১৭||

বাতাভিষ্যন্দক্রিযামন্যস্মিন্নপি বাতজেঽক্ষিরোগেঽতিদিশন্নাহ- রোগ ইত্যাদি||১৭||

Adhikarana 14 (18-19) · Śloka 20

পূর্বভক্তং হিতং সর্পিঃ ক্ষীরং বাঽপ্যথ ভোজনে | বৃক্ষাদন্যাং কপিত্থে চ পঞ্চমূলে মহত্যপি ||১৮|| সক্ষীরং কর্কটরসে সিদ্ধং চাত্র ঘৃতং পিবেত্ | সিদ্ধং বা হিতমত্রাহুঃ পত্তূরার্তগলগ্নিকৈঃ ||১৯|| সক্ষীরং মেষশৃঙ্গ্যা বা সর্পির্বীরতরেণ বা |২০|

অন্যতোবাতমারুতপর্যযযোঃ সামান্যাং চিকিত্সামভিধায বিশেষচিকিত্সামাহ- পূর্বভক্তমিত্যাদি| তদেব ঘৃতমাহ- বৃক্ষাদন্যামিত্যাদি| বৃক্ষাদনী বন্দাকঃ, বৃক্ষকলম্বুকেত্যন্যে| বৃক্ষাদন্যাদীনাং সপ্তদ্রব্যাণামত্র কষাযঃ| অগর্ভং ঘৃতমিদম্| সিদ্ধমিত্যাদি| পত্তূরঃ সিতিবারঃ, ‘সিরিবালী’ ইতি লোকে প্রসিদ্ধা| আর্তগলঃ কণ্টকফলো জলমুক্তদেশজঃ, ‘ককুভ’ ইত্যন্যে| অগ্নিকঃ অজমোদা| পত্তূরাদীনাং কষাযে ক্ষীরে চ সাধিতং সর্পিঃ মেষশৃঙ্গীক্বাথে বা সক্ষীরে সাধিতম্| বীরতরঃ শরঃ বেল্লন্তরো বা, তস্য ক্বাথে বা সক্ষীরে সাধিতং সর্পিরন্যতোবাতমারুতপর্যযযোর্হিতম্| ইদমপি ঘৃতত্রযমগর্ভম্||১৮-১৯||-

Adhikarana 15 (20-24) · Śloka 24

সৈন্ধবং দারু শুণ্ঠী চ মাতুলুঙ্গরসো ঘৃতম্ ||২০|| স্তন্যোদকাভ্যাং কর্তব্যং শুষ্কপাকে তদঞ্জনম্ | পূজিতং সর্পিষশ্চাত্র পানমক্ষ্ণোশ্চ তর্পণম্ ||২১|| ঘৃতেন জীবনীযেন নস্যং তৈলেন চাণুনা | পরিষেকে হিতং চাত্র পযঃ শীতং সসৈন্ধবম্ ||২২|| রজনীদারুসিদ্ধং বা সৈন্ধবেন সমাযুতম্ | সর্পির্যুতং স্তন্যঘৃষ্টমঞ্জনং বা মহৌষধম্ ||২৩|| বসা বাঽঽনূপজলজা সৈন্ধবেন সমাযুতা | নাগরোন্মিশ্রিতা কিঞ্চিচ্ছুষ্কপাকে তদঞ্জনম্ ||২৪||

সৈন্ধবমিত্যাদি| সৈন্ধবাদিদ্রব্যত্রযাণাং কল্কেন মাতুলুঙ্গাদিদ্রব্যচতুষ্কেণ রসক্রিযাং নিষ্পাদ্য শুষ্কপাকেঽঞ্জনং কার্যং; যতো রসক্রিযাঞ্জনমিদম্| পূজিতমিত্যাদি| সর্পিষো ‘জীবনীযসিদ্ধস্য’ ইতি শেষঃ| অত্র শুষ্কপাকে নস্যং জীবনীযেন ঘৃতেনৈব; অণুনা তৈলেন বা নস্যং পূজিতম্| অণুতৈলং তু শালাক্যতন্ত্রোক্তং, ন পুনর্বাতব্যাধ্যুদিতম্| পরিষেকে ইত্যাদি| শীতমিতি শৃতশীতমিত্যর্থঃ| সসৈন্ধবমিতি সশব্দ ঈষদর্থঃ| রজনীদারুসিদ্ধং বেত্যত্র ক্ষীরমিতি সম্বধ্যতে| সৈন্ধবেন সমাযুতম্ অল্পসৈন্ধবযুক্তমিত্যর্থঃ| সর্পিরিত্যাদি|- মহৌষধং বা ঘৃতস্ত্রীস্তন্যযুক্তং পাষাণঘৃষ্টমিত্যর্থঃ, অঞ্জনং বা| বসেত্যাদি|- আনূপজলজা বা বসা স্তোকসৈন্ধবযুক্তা কিঞ্চিচ্ছুণ্ঠীযুক্তা পাষাণঘৃষ্টা সতী শুষ্কপাকেঽঞ্জনমিতি সম্বন্ধঃ||২০-২৪||

Adhikarana 16 (25) · Śloka 25

পবনপ্রভবা রোগা যে কেচিদ্দৃষ্টিনাশনাঃ | বীজেনানেন মতিমান্ তেষু কর্ম প্রযোজযেত্ ||২৫||

ইদানীং বাতজেষু তিমিরকাচাদিষ্বেষৈব ক্রিযা কর্তব্যেতি দর্শযন্নাহ- পবনেত্যাদি| দৃষ্টিনাশনাঃ তিমিরকাচাদযঃ| বীজেন বীজভূতেন| অনেন বাতাভিষ্যন্দোক্তকর্মণা| মতিমান্ ঊহাপোহবিত্||২৫||

Adhikarana puShpikA · Śloka 9

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে বাতাভিষ্যন্দপ্রতিষেধো নাম নবমোঽধ্যাযঃ ||৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে নবমোঽধ্যাযঃ||৯||