Adhikarana 1 (1-2) · Śloka 2
అథాతో యోనివ్యాపత్ప్రతిషేధం వ్యాఖ్యాస్యామః ||1|| యథోవాచ భగవాన్ ధన్వంతరిః ||2||
अथातो योनिव्यापत्प्रतिषेधं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
గ్రహోత్పత్త్యధ్యాయానంతరం ‘తిర్యగ్యోనిం మానుషం చ’ ఇతి వచనేన యోనేర్నామసంకీర్తనాత్ కుమారజన్మవికారకారణత్వాచ్చ యోనేర్వ్యాపచ్చికిత్సితార్థం యోనివ్యాపత్ప్రతిషేధాధ్యాయారంభో యుజ్యత ఇత్యాహ- అథాత ఇత్యాది| యోనివ్యాపదో యోనిరోగాః, తేషాం ప్రతిషేధశ్చికిత్సితమితి||1-2||
Adhikarana 2 (3) · Śloka 4
ప్రవృద్ధలింగం పురుషం యాఽత్యర్థముపసేవతే | రూక్షదుర్బలబాలా యా తస్యా వాయుః ప్రకుప్యతి ||3|| స దుష్టో యోనిమాసాద్య యోనిరోగాయ కల్పతే |4|
प्रवृद्धलिङ्गं पुरुषं याऽत्यर्थमुपसेवते | रूक्षदुर्बलबाला या तस्या वायुः प्रकुप्यति ||३|| स दुष्टो योनिमासाद्य योनिरोगाय कल्पते |४|
🔊 Audio coming soon
ప్రవృద్ధేత్యాది| రూక్షదుర్బలబాలా యా స్త్రీ ప్రవృద్ధలింగమతిప్రలంబమేహనం పురుషమతిశయేన సేవతే| తస్యా వాయుః ప్రకోపమాపద్యతే, స వాయుః ప్రకుపితః సన్ పిత్తశ్లేష్మాణౌ కోపయతి, అథవా వాతః పిత్తశ్లేష్మాణౌ స్వహేతుభిః కుపితౌ గృహీత్వా యోనిరోగాయ కల్పతే సమర్థో భవతి||3||-
Adhikarana 3 (4-5) · Śloka 6
త్రయాణామపి దోషాణాం యథాస్వం లక్షణేన తు ||4|| వింశతిర్వ్యాపదో యోనేర్నిర్దిష్టా రోగసంగ్రహే | మిథ్యాచారేణ యాః స్త్రీణాం ప్రదుష్టేనార్తవేన చ ||5|| జాయంతే బీజదోషాచ్చ దైవాచ్చ శృణు తాః పృథక్ |6|
त्रयाणामपि दोषाणां यथास्वं लक्षणेन तु ||४|| विंशतिर्व्यापदो योनेर्निर्दिष्टा रोगसङ्ग्रहे | मिथ्याचारेण याः स्त्रीणां प्रदुष्टेनार्तवेन च ||५|| जायन्ते बीजदोषाच्च दैवाच्च शृणु ताः पृथक् |६|
🔊 Audio coming soon
తేషాం యోనిరోగాణాం సామాన్యజ్ఞానోపాయమాహ- త్రయాణామిత్యాది| యథాస్వం లక్షణేన యోనిరోగం జానీయాదిత్యర్థః||4-5||-
Adhikarana 4 (6-8) · Śloka 9
ఉదావర్తా తథా వంధ్యా విప్లుతా చ పరిప్లుతా ||6|| వాతలా చేతి వాతోత్థాః, పిత్తోత్థా రుధిరక్షరా | వామినీ స్రంసినీ చాపి పుత్రఘ్నీ పిత్తలా చ యా ||7|| అత్యానందా చ యా యోనిః కర్ణినీ చరణాద్వయం | శ్లేష్మలా చ కఫాజ్జ్ఞేయా, షండాఖ్యా ఫలినీ తథా ||8|| మహతీ సూచివక్త్రా చ సర్వజేతి త్రిదోషజా |9|
उदावर्ता तथा वन्ध्या विप्लुता च परिप्लुता ||६|| वातला चेति वातोत्थाः, पित्तोत्था रुधिरक्षरा | वामिनी स्रंसिनी चापि पुत्रघ्नी पित्तला च या ||७|| अत्यानन्दा च या योनिः कर्णिनी चरणाद्वयम् | श्लेष्मला च कफाज्ज्ञेया, षण्डाख्या फलिनी तथा ||८|| महती सूचिवक्त्रा च सर्वजेति त्रिदोषजा |९|
🔊 Audio coming soon
వాతజాః పంచ యోనివ్యాపద ఆహ- ఉదావర్తేత్యాది| ఉదావర్తా, వంధ్యా, విప్లుతా, పరిప్లుతా, వాతలా, ఇతి పంచ వాతోత్థాః| పిత్తజాః పంచాహ- రుధిరక్షరా, వామినీ, స్రంసినీ, పుత్రఘ్నీ, పిత్తలా, ఇతి పంచ పిత్తోత్థాః| కఫజాః పంచోచ్యంతే- అత్యానందా, కర్ణినీ, చరణాద్వయం, శ్లేష్మలా, ఇతి పంచ కఫోత్థాః| సన్నిపాతజాః పంచోచ్యంతే- షండీ, ఫలినీ, మహతీ, సూచివక్త్రా, సర్వజా, ఇతి పంచ సన్నిపాతజాః||6-8||-
Adhikarana 5 (9-11) · Śloka 11
సఫేనిలముదావర్తా రజః కృచ్ఛ్రేణ ముంచతి ||9|| వంధ్యాం నష్టార్తవాం విద్యాద్విప్లుతాం నిత్యవేదనాం | పరిప్లుతాయాం భవతి గ్రామ్యధర్మే రుజా భృశం ||10|| వాతలా కర్కశా స్తబ్ధా శూలనిస్తోదపీడితా | చతసృష్వపి చాద్యాసు భవంత్యనిలవేదనాః ||11||
सफेनिलमुदावर्ता रजः कृच्छ्रेण मुञ्चति ||९|| वन्ध्यां नष्टार्तवां विद्याद्विप्लुतां नित्यवेदनाम् | परिप्लुतायां भवति ग्राम्यधर्मे रुजा भृशम् ||१०|| वातला कर्कशा स्तब्धा शूलनिस्तोदपीडिता | चतसृष्वपि चाद्यासु भवन्त्यनिलवेदनाः ||११||
🔊 Audio coming soon
వాతజానాం యోనివ్యాపదాం పృథగ్లక్షణమాహ- సఫేనిలమిత్యాది| యా ఉదావర్తా యోనిః సా ఫేనిలం ఫేనసహితం రజ ఆర్తవం కృచ్ఛ్రేణ దుఃఖేన ముంచతి| విప్లుతా నిత్యం రుజావతీ, పరిప్లుతా పునర్వ్యవాయ ఏవ పీడావతీత్యనయోర్భేదః| వాతలేత్యాది| స్తబ్ధా తనటితేవ| శూలం వాతశూలం, నిస్తోదః సూచీభిరివ వ్యధనం| కిం వాతలాయామేవానిలవేదనా భవంతి ఉతాన్యాస్వపీత్యాహ- చతసృష్విత్యాది| ఆద్యాసు ఉదావర్తాదిష్వపీత్యర్థః||9-11||
Adhikarana 6 (12-14) · Śloka 14
సదాహం ప్రక్షరత్యస్రం యస్యాం సా లోహితక్షరా | సవాతముద్గిరేద్బీజం వామినీ రజసా యుతం ||12|| ప్రస్రంసినీ స్యందతే తు క్షోభితా దుఃప్రసూశ్చ యా | స్థితం స్థితం హంతి గర్భం పుత్రఘ్నీ రక్తసంస్రవాత్ ||13|| అత్యర్థం పిత్తలా యోనిర్దాహపాకజ్వరాన్వితా | చతసృష్వపి చాద్యాసు పిత్తలింగోచ్ఛ్రయో భవేత్ ||14||
सदाहं प्रक्षरत्यस्रं यस्यां सा लोहितक्षरा | सवातमुद्गिरेद्बीजं वामिनी रजसा युतम् ||१२|| प्रस्रंसिनी स्यन्दते तु क्षोभिता दुःप्रसूश्च या | स्थितं स्थितं हन्ति गर्भं पुत्रघ्नी रक्तसंस्रवात् ||१३|| अत्यर्थं पित्तला योनिर्दाहपाकज्वरान्विता | चतसृष्वपि चाद्यासु पित्तलिङ्गोच्छ्रयो भवेत् ||१४||
🔊 Audio coming soon
సదాహమిత్యాది| అస్రం ఆర్తవం, ‘సదాహం క్షీయతే రక్తం యస్యాం సా లోహితక్షయా’ ఇతి కేచిత్ పఠంతి| బీజం శుక్రం| ఉద్గిరేత్ వమేత్| రజసా యుతం ఆర్తవమిశ్రం| స్యందతే స్రవతి, క్షోభితా సంచాలితా, దుఃప్రసూః దుఃఖేన ప్రసూయతే యా ఏవంవిధా యోనిః సా ప్రస్రంసినీతి సంబంధః| దుఃప్రసూశ్చేత్యత్రాన్యే ‘దుఃప్రజాయనా’ ఇతి పఠంతి, దుష్టీభూతాపత్యమార్గేతి వ్యాఖ్యానయంతి| స్థితమిత్యాది| స్థితం స్థితం గర్భం హంతి నోత్పన్నమాత్రం| చతసృషు ఆద్యాసు లోహితక్షరాదిషు| పిత్తలింగోచ్ఛ్రయః ఓషచోషాదికా వేదనాః||12-14||
Adhikarana 7 (15-17) · Śloka 17
అత్యానందా న సంతోషం గ్రామ్యధర్మేణ గచ్ఛతి | కర్ణిన్యాం కర్ణికా యోనౌ శ్లేష్మాసృగ్భ్యం ప్రజాయతే ||15|| మైథునేఽచరణా పూర్వం పురుషాదతిరిచ్యతే | బహుశశ్చాతిచరణాదన్యా బీజం న విందతి ||16|| శ్లేష్మలా పిచ్ఛిలా యోనిః కండూయుక్తాఽతిశీతలా | చతసృష్వపి చాద్యాసు శ్లేష్మలింగోచ్ఛ్రితిర్భవేత్ ||17||
अत्यानन्दा न सन्तोषं ग्राम्यधर्मेण गच्छति | कर्णिन्यां कर्णिका योनौ श्लेष्मासृग्भ्यं प्रजायते ||१५|| मैथुनेऽचरणा पूर्वं पुरुषादतिरिच्यते | बहुशश्चातिचरणादन्या बीजं न विन्दति ||१६|| श्लेष्मला पिच्छिला योनिः कण्डूयुक्ताऽतिशीतला | चतसृष्वपि चाद्यासु श्लेष्मलिङ्गोच्छ्रितिर्भवेत् ||१७||
🔊 Audio coming soon
అత్యానందేత్యాది| గ్రామ్యధర్మేణ మైథునేన| కర్ణికా మాంసకందీ| మైథునేత్యాది| పూర్వా చరణీ అతిరిచ్యతే మైథునాచరణేఽధికా భవతి; అన్యే ‘మైథునేఽచరణా పూర్వం’ ఇతి పఠంతి, శేషం సమం| పురుషాత్ పూర్వమతిరిచ్యతే, అత్యర్థం కండూయత ఇత్యర్థః| బహుశో అతిచరణాత్ మైథునాత్, అన్యా అతిచరణా, బీజం గర్భాంకురజననం, న విందతి న ప్రాప్నోతి| ‘బహుశశ్చాతిచరణీ తయోర్బీజం న తిష్ఠతి’ ఇతి కేచిత్ పఠంతి, అతిచరణా బహుశో మైథునం వ్రజతి, తయోశ్చరణాతిచరణయోర్బీజం న తిష్ఠతి, స్థితిం న కరోతీత్యర్థః| శ్లేష్మలేత్యాది| ఆద్యాసు అత్యానందాదిషు శ్లేష్మలింగోచ్ఛ్రితిః పైచ్ఛిల్యకండ్వాదికాః||15-17||
Adhikarana 8 (18-20) · Śloka 20
అనార్తవస్తనా షండీ ఖరస్పర్శా చ మైథునే | అతికాయగృహీతాయాస్తరుణ్యాః ఫలినీ భవేత్ ||18|| వివృతాఽతిమహాయోనిః సూచీవక్త్రాఽతిసంవృతా | సర్వలింగసముత్థానా సర్వదోషప్రకోపజా ||19|| చతసృష్వపి చాద్యాసు సర్వలింగోచ్ఛ్రితిర్భవేత్ | పంచాసాధ్యా భవంతీమా యోనయః సర్వదోషజాః ||20||
अनार्तवस्तना षण्डी खरस्पर्शा च मैथुने | अतिकायगृहीतायास्तरुण्याः फलिनी भवेत् ||१८|| विवृताऽतिमहायोनिः सूचीवक्त्राऽतिसंवृता | सर्वलिङ्गसमुत्थाना सर्वदोषप्रकोपजा ||१९|| चतसृष्वपि चाद्यासु सर्वलिङ्गोच्छ्रितिर्भवेत् | पञ्चासाध्या भवन्तीमा योनयः सर्वदोषजाः ||२०||
🔊 Audio coming soon
సాన్నిపాతికాః పంచోచ్యంతే| వంధ్యాషండ్యోః సస్తనత్వనిస్తనత్వే విశేషతః| స్వరస్పర్శా చేతి చకారాన్మైథునద్వేషనిషేధః| అతికాయో బృహత్సాధనో నరస్తేన గృహీతాయా ఫలినీతి సంజ్ఞా, ‘అఫలినీ’ ఇత్యన్యే పఠంతి, తత్ర అతికాయగృహీతా యా తరుణీ సా అఫలినీ అప్రజా ఇతి వ్యాఖ్యా| అతివివృతా మహాయోనిరుచ్యతే| సూచీవక్త్రా అతిసంవృతా అత్యర్థసంకుచితముఖీ, సంకుచితముఖేత్యుచ్యతే| సర్వలింగా సర్వచిహ్నా, సర్వసముత్థానా సర్వకారణా, యా సా సర్వజా కథ్యతే| చతసృష్విత్యాది| చతసృష్వపి చాద్యాసు షండీప్రభృతిషు; సర్వలింగోచ్ఛ్రితిరితి రౌక్ష్యతోదాదికా వాతలింగోచ్ఛ్రితయః, చోషాదికాః పిత్తలింగోచ్ఛ్రితయః, స్నేహకండ్వాదికాః శ్లేష్మలింగోచ్ఛ్రితయశ్చ||18-20||
Adhikarana 9 (21) · Śloka 21
ప్రతిదోషం తు సాధ్యాసు స్నేహాదిక్రమ ఇష్యతే | దద్యాదుత్తరబస్తీంశ్చ విశేషేణ యథోదితాన్ ||21||
प्रतिदोषं तु साध्यासु स्नेहादिक्रम इष्यते | दद्यादुत्तरबस्तींश्च विशेषेण यथोदितान् ||२१||
🔊 Audio coming soon
ప్రతీత్యాది| సాధ్యాసు యోనివ్యాపత్సు ప్రతిదోషం యః స్నేహాదిక్రమః స ఇష్యత ఇత్యర్థః| ఏతేన యస్య దోషస్య యః ప్రత్యనీకః స్నేహస్తేన స్నేహేన సంస్నేహ్య సంస్వేద్య తతో వమనాదీన్ సాధ్యాస్వవచారయేదిత్యర్థః| యథోదితానితి వాతాదిభేదేనేత్యర్థః||21||
Adhikarana 10 (22-23) · Śloka 24
కర్కశాం శీతలాం స్తబ్ధామల్పస్పర్శాం చ మైథునే | కుంభీస్వేదైరుపచరేత్ సానూపౌదకసంయుతైః ||22|| మధురౌషధసంయుక్తాన్ వేశవారాంశ్చ యోనిషు | నిక్షిపేద్ధారయేచ్చాపి పిచుతైలమతంద్రితః ||23|| ధావనాని చ పథ్యాని కుర్వీతాపూరణాని చ |24|
कर्कशां शीतलां स्तब्धामल्पस्पर्शां च मैथुने | कुम्भीस्वेदैरुपचरेत् सानूपौदकसंयुतैः ||२२|| मधुरौषधसंयुक्तान् वेशवारांश्च योनिषु | निक्षिपेद्धारयेच्चापि पिचुतैलमतन्द्रितः ||२३|| धावनानि च पथ्यानि कुर्वीतापूरणानि च |२४|
🔊 Audio coming soon
కర్కశామిత్యాది| అల్పస్పర్శామితి అతివ్యవాయక్రుద్ధవాతజనితసుప్తిత్వాత్| ‘శీతలాం’ ఇత్యత్రాన్యే తు ‘తుములాం’ ఇతి పఠంతి, తత్ర శూలతోదవేదనాసంకులామితి వ్యాఖ్యా| కుంభీస్వేదైః ఆనూపౌదకమాంసవాతఘ్నద్రవ్యక్వాథపూర్ణాం కుంభీం కృత్వా భూమౌ నిఖన్య తదుపరి శయ్యాం సంస్థాప్యాగ్నిసంతప్తలౌహపాషాణగుడకాన్ క్వాథే నిక్షిప్య తదుత్థితైర్బాష్పస్వేదైర్యోనిప్రదేశమాత్రగామిభిరుపచరేత్; అన్యే తు కుంభీం వాతహరద్రవ్యానూపౌదకమాంసపూర్ణాం సజలాం కృత్వా ప్రవృత్తోష్మాణం గృహ్ణీయాదితి వ్యాఖ్యానయంతి| ఉపనాహవిశేషమాహ- మధురేత్యాది| మధురాణి కాకోల్యాదీని కల్కీకృతాని, తైర్యుక్తాన్ వేశవారాన్ కృతాన్నవర్గోక్తాన్ యోనిషు నిక్షిపేత్, పిచుతైలం పిచునా తులకేన తైలం వాతఘ్నద్రవ్యక్వాథసిద్ధం యోనిషు ధారయేత్| అతంద్రితో నిరంతరకారీత్యర్థః | పిచుతైలం బలాశృతమిత్యన్యే| ధావనాని ప్రక్షాలనాని| పథ్యాని వాతహరౌషధసిద్ధానీత్యర్థః||22-23||-
Adhikarana 11 (24) · Śloka 24
ఓషచోషాన్వితాసూక్తం కుర్యాచ్ఛీతం విధిం భిషక్ ||24||
ओषचोषान्वितासूक्तं कुर्याच्छीतं विधिं भिषक् ||२४||
🔊 Audio coming soon
శీతం విధిం రక్తపిత్తహరం||24||
Adhikarana 12 (25) · Śloka 25
దుర్గంధాం పిచ్ఛిలాం చాపి చూర్ణైః పంచకషాయజైః | పూరయేద్రాజవృక్షాదికషాయైశ్చాపి ధావనం ||25||
दुर्गन्धां पिच्छिलां चापि चूर्णैः पञ्चकषायजैः | पूरयेद्राजवृक्षादिकषायैश्चापि धावनम् ||२५||
🔊 Audio coming soon
దుర్గంధాం పిత్తేన, పిచ్ఛిలాం కఫేన| పంచ కషాయా న్యగ్రోధోదుంబరప్లక్షాశ్వత్థగర్దభాండాః| తచ్చూర్ణేన యోనిం పూరయేత్| రాజవృక్షాదిః ఆరగ్వధాదిః||25||
Adhikarana 13 (26) · Śloka 26
యోన్యాం తు పూయస్రావిణ్యాం శోధనద్రవ్యసంభృతైః | సగోమూత్రైః సలవణైః శోధనం హితమిష్యతే ||26||
योन्यां तु पूयस्राविण्यां शोधनद्रव्यसम्भृतैः | सगोमूत्रैः सलवणैः शोधनं हितमिष्यते ||२६||
🔊 Audio coming soon
శోధనద్రవ్యాణి మిశ్రకోక్తాని||26||
Adhikarana 14 (27-30) · Śloka 30
బృహతీఫలకల్కస్య ద్విహరిద్రాయుతస్య చ | కండూమతీమల్పస్పర్శాం పూరయేద్ధూపయేత్తథా ||27|| వర్తిం ప్రదద్యాత్ కర్ణిన్యాం శోధనద్రవ్యసంభృతాం | ప్రస్రంసినీం ఘృతాభ్యక్తాం క్షీరస్విన్నాం ప్రవేశయేత్ ||28|| పిధాయ వేశవారేణ తతో బంధం సమాచరేత్ | ప్రతిదోషం విదధ్యాచ్చ సురారిష్టాసవాన్ భిషక్ ||29|| ప్రాతః ప్రాతర్నిషేవేత రసోనాదుద్ధృతం రసం | క్షీరమాంసరసప్రాయమాహారం విదధీత చ ||30||
बृहतीफलकल्कस्य द्विहरिद्रायुतस्य च | कण्डूमतीमल्पस्पर्शां पूरयेद्धूपयेत्तथा ||२७|| वर्तिं प्रदद्यात् कर्णिन्यां शोधनद्रव्यसम्भृताम् | प्रस्रंसिनीं घृताभ्यक्तां क्षीरस्विन्नां प्रवेशयेत् ||२८|| पिधाय वेशवारेण ततो बन्धं समाचरेत् | प्रतिदोषं विदध्याच्च सुरारिष्टासवान् भिषक् ||२९|| प्रातः प्रातर्निषेवेत रसोनादुद्धृतं रसम् | क्षीरमांसरसप्रायमाहारं विदधीत च ||३०||
🔊 Audio coming soon
తథాశబ్దాద్ధూపనమపి బృహతీఫలాదిభిరేవ||27-30||
Adhikarana 15 (31-32) · Śloka 32
శుక్రార్తవాదయో దోషాః స్తనరోగాశ్చ కీర్తితాః | క్లైబ్యస్థానాని మూఢస్య గర్భస్య విధిరేవ చ ||31|| గర్భిణీప్రతిరోగేషు చికిత్సా చాప్యుదాహృతా | సర్వథా తాం ప్రయుంజీత యోనివ్యాపత్సు బుద్ధిమాన్ | అపప్రజాతారోగాంశ్చ చికిత్సేదుత్తరాద్భిషక్ ||32||
शुक्रार्तवादयो दोषाः स्तनरोगाश्च कीर्तिताः | क्लैब्यस्थानानि मूढस्य गर्भस्य विधिरेव च ||३१|| गर्भिणीप्रतिरोगेषु चिकित्सा चाप्युदाहृता | सर्वथा तां प्रयुञ्जीत योनिव्यापत्सु बुद्धिमान् | अपप्रजातारोगांश्च चिकित्सेदुत्तराद्भिषक् ||३२||
🔊 Audio coming soon
శుక్రేత్యాది| శుక్రార్తవాదయో దోషాః శుక్రశోణితశుద్ధిశారీరే సలక్షణచికిత్సితా ఉక్తాః; ఆదిశబ్దాద్ధాత్రీస్తన్యదోషాశ్చ| స్తనరోగా విసర్పనాడీస్తనరోగనిదానే, తచ్చికిత్సితే తచ్చికిత్సా ఉక్తా| క్లైబ్యస్థానాని క్లైబ్యకారణాని క్షీణబలీయవాజీకరణోదితాని| మూఢగర్భస్యేతి స్థానానీత్యత్రాపి సంబధ్యతే, తేన మూఢగర్భస్య స్థానాని కారణాని, విధిరేవ చ క్రియా చేత్యర్థః| ఏతద్ద్వయం మూఢగర్భనిదానే తచ్చికిత్సితే చోక్తం| గర్భిణీప్రతిరోగేష్వితి గర్భిణీప్రతిరోగేషు గర్భిణ్యా మాసానుమాసం ప్రతిరోగేషు రక్తస్రావాదిషు చికిత్సోక్తా| చికిత్సా చేతి చకారాద్గర్భిణ్యాః స్వస్థాయా అపి చికిత్సా ఉదాహృతా గర్భిణీవ్యాకరణశారీరే| కేచిత్ ‘గర్భిణీప్రతిరోగేషు’ ఇత్యత్ర ‘గర్భిణీప్రతిమాసేషు’ ఇతి పఠంతి| తాం చికిత్సాం యోనివ్యాపత్స్వపి సర్వథా ప్రయుంజీతేత్యర్థః| అపప్రజాతా అకాలప్రసూతా, తస్యా రోగాన్ జ్వరాదికాన్| తానుత్తరాదుత్తరతంత్రోక్తజ్వరాదిచికిత్సితాత్| రోగాంశ్చేతి చకార ఉత్తరతంత్రాదిత్యత్ర యోజనీయః| తేనాపప్రజాతారోగానుత్తరాదుత్తరతంత్రోక్తాచ్చికిత్సేత్, చకారాదపతానకాదీన్ సంహితోక్తేన విధినా చికిత్సేదిత్యర్థః| అన్యే తు ‘ఉత్తరాన్’ ఇతి పఠంతి, ఉత్తరకాలభావినోఽపతానకాదీన్ భిషక్ చికిత్సేత్, ‘స్వైశ్చికిత్సితైః’ ఇతి శేషః||31-32||
Adhikarana puShpikA · Śloka 2
ఇతి సుశ్రుతసంహితాయాముత్తరతంత్రాంతర్గతే కుమారతంత్రే యోనివ్యాపత్ప్రతిషేధో నామ(ద్వాదశోఽధ్యాయః, ఆదితోఽ)ష్టత్రింశత్తమోఽధ్యాయః ||38|| ఉత్తరతంత్రే ద్వితీయం కౌమారతంత్రం సమాప్తం ||2||
इति सुश्रुतसंहितायामुत्तरतन्त्रान्तर्गते कुमारतन्त्रे योनिव्यापत्प्रतिषेधो नाम(द्वादशोऽध्यायः, आदितोऽ)ष्टत्रिंशत्तमोऽध्यायः ||३८|| उत्तरतन्त्रे द्वितीयं कौमारतन्त्रं समाप्तम् ||२||
🔊 Audio coming soon
ఇతి శ్రీడల్హ(హ్ల)ణవిరచితాయాం నిబంధసంగ్రహాఖ్యాయాం సుశ్రుతవ్యాయాముత్తరతంత్రాంతర్గతే కౌమారభృత్యతంత్రే యోనివ్యాపత్ప్రతిషేధాధ్యాయోఽష్టత్రింశత్తమః||38||