9. atīsāracikitsitādhyāyaḥ

Adhikarana adhyAyopakramaH · Śloka

অস্মাদনন্তরমতিসারচিকিত্সিতং প্রারভ্যতে, অর্শোতিসারযোঃ পরস্পরং নিদানভূতত্বেন চিকিত্সাসামান্যাত্| অত এবাহ-

Adhikarana atIsAracikitsitAdhyAyaH AmAtIsAre pUrvaM la~gghanam (2-1) · Śloka 1

অথাতোঽতীসারচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| ) অতীসারো হি ভূযিষ্ঠং ভবত্যামাশযান্বযঃ| হত্বাঽগ্নিং বাতজেঽপ্যস্মাত্প্রাক্ তস্মিংল্লঙ্ঘনং হিতম্||১||

স০-হি-যস্মাত্, বাহুল্যেনাগ্নিং হত্বা-মন্দীকৃত্য, আমাশযান্বযো ভবত্যতীসারঃ| অস্মাত্কারণাদস্মিন্-অতীসারাখ্যেব্যাধৌ, বাতজেঽপি পূর্বং লঙ্ঘনং হিতম্| আমাশযোঽন্বযোজন্মভূরুত্পত্তিঃ যস্য স আমাশযান্বযঃ| অপিশব্দাত্ক্বচিত্কফাদিজে সুতরাং লঙ্ঘনং হিতমিতি দ্যোতযতি| লঙ্ঘনশব্দেন চোপবাস এবেহ গৃহ্যতে, শোধনাদীনাং লঙ্ঘনানামবস্থাবশাদুচ্যমানত্বাত্| ভূযিষ্টগ্রহণেন ক্বচিদ্ভযজাদাবতীসারে ব্যভিচারঃ, নাসাবামাশযান্বযঃ| প্রাগ্গ্রহণেন নোত্তরকালে লঙ্হ্ঘনং হিতম্| তদা হি রোগস্বভাবাদ্ধাত্বপচযোঽবশ্যংভাবী| লঙ্ঘনমপি ধাত্বপচযহেতুঃ, অতস্তত্রাযুক্তম্|

Adhikarana AmAtIsAre vamanam (2) · Śloka 2

শূলানাহপ্রসেকার্তং বামযেদতিসারিণম্| |২|

স০-শূলাদিভিরার্তমতীসারিণং বামযেত্, ন তত্র প্রাগ্ লঙ্ঘনং হিতম্| বমনং চৈতত্সামান্যং পিত্তজাদিষ্বপ্যেবংরূপেষু চিকিত্সিতং বোধ্যম্, ন কেবলং বাতজে|

Adhikarana AmAtIsAre upekShaNam (2-3) · Śloka 3

| দোষাঃ সন্নিচিতা যে চ বিদগ্ধাহারমুর্চ্ছিতাঃ||২|| অতীসারায কল্পন্তে তেষূপেক্ষৈব ভেষজম্| ভৃশোত্ক্লেশপ্রবৃত্তেষু স্বযমেব চলাত্মসু||৩||

স০-যে চ দোষাঃ সন্নিচিতাঃ-অতিশযেন বৃদ্ধিং গতাঃ, তথা বিদগ্ধেনপক্বাপক্বরূপেণ, আহারেণ মূর্চ্ছিতাঃ-একতাং প্রাপ্তাঃ, অতীসারায কল্পন্তেসম্পদ্যন্তে| তেষু তথোত্ক্লেশনং-উত্ক্লেশাখ্যবিকারকরণং প্রত্যুন্মুখতাবীজস্যাঙ্কুরোত্পত্তাবুচ্ছূনাবস্থেব, অতিশযেনোস্ক্লেশো ভৃশোত্ক্লেশস্তেন প্রবৃত্তাঃ-অতীসারকরণং প্রতি সমুদ্যতাস্তেষু, তথা স্বযমেব-যত্নং বিনা, চলাত্মসু-চলস্বভাবেষু, তেষু-তথাভূতেষু, উপেক্ষাপথ্যাশিত্বেন সম্যক্ প্রবর্তনমেব ভেষজম্, ন তু পাচনাদিকমিত্যর্থঃ| সঙ্গ্রহণৌষধং কুটজত্বগাদিকং ব্যাধিপ্রতিপক্ষভূতং কস্মাদত্র ন প্রযুজ্যতে ? অপি চাগ্ন্যসঙ্গ্রহে পঠিষ্যতি (হৃ. উ. অ. ৪০/৪৯)- "কুটজোঽতীসারে" ইতি| তস্মাদত্র সঙ্গ্রাহৌষধং দাতুমুচিতমিতি যো মন্যতে তং প্রত্যাহ-

Adhikarana AmAtIsAre pUrvaM na sa~ggrahaNam (4) · Śloka 4

ন তু সঙ্গ্রহণং যোজ্যং পূর্বমামাতিসারিণি| |৪|

স০-সঙ্গ্রহণং ভেষজং পূর্বমামাতিসারিণি পুরুষে ন যোজ্যম্| তুশব্দোঽবধারণার্থঃ| অত্র পূর্বগ্রহণং পশ্চাদীষদামাতিসারিণিদীযমানং যুজ্যত এবেতি দ্যোতযতি| সামে দোষেঽতীসারকারিণি প্রথমমপি ভেদনমৌষধং দাতুং(দত্তং) বিশিষ্টাযামবস্থাযাং সমানকার্যমপি কদাচিদতীসারিণো গুণায সম্পদ্যতে নাতীসারপ্রতিপক্ষভূতমপি চ সঙ্গ্রহণমৌষধমিতি কৃত্বা|

Adhikarana vibaddhadoShe prANadA (4-5) · Śloka 5

| অপি চাধ্মানগুরুতাশূলস্তৈমিত্যকারিণি||৪|| প্রাণদা প্রাণদা দোষে বিবদ্ধে সম্প্রবর্তিনী| |৫|

স০-বিবদ্ধে-অল্পাল্পং কৃত্বা প্রবর্তমানে, দোষেঽত এব বিবন্ধত্বাদাধ্মানাদিকারিণি তথাভূতেঽস্মিন্দোষেঽসঙ্গ্রহণমপথ্যমপি প্রাণদা-হরীতকী, প্রাণান্ দদাতীতি-প্রাণদা, ভবতীতি| এবং বহুদোষাণামতীসারিণাং প্রাযেণৈষ উপক্রমো বোধ্যঃ|

Adhikarana madhyadoShe BUtIkAdi kvAthaH, bilvAdi kvAthaH, biDAdi kvAthaH, SuNThyAdi kvAthaH (5-7) · Śloka 7

মধ্যদোষাল্পদোষযোস্ত্বাহ | পিবেত্প্রক্বথিতাস্তোযে মধ্যদোষো বিশোষযন্||৫|| ভূতীকপিপ্পলীশুণ্ঠীবচাধান্যহরীতকীঃ| অথবা বিল্বঘনকামুস্তনাগরবালকম্||৬|| বিডপাঠাবচাপথ্যাকৃমিজিন্নাগরাণি বা| শুণ্ঠীঘনবচামাদ্রীবিল্ববত্সকহিঙ্গু বা||৭||

স০- মধ্যদোষোঽতীসারী ভূতীকাদীঃ পিবেত্| কিম্ভূতাস্তাঃ ? তোযে প্রক্বথিতাঃ| ননু, ক্বথিতা ইত্যেতাবদেবাস্তু, কিং প্রশব্দেন ? ব্রূমঃ| প্রকর্ষেণ ক্বথিতাঃ প্রমথ্যারূপেণ শৃতাঃ প্রক্বথিতা ইত্যস্যার্থস্য প্রতিপাদনার্থং প্রশব্দোকারি| প্রমথ্যাযাশ্চ তন্ত্রান্তরে লক্ষণমুক্তম্| তথা- "শৃতঃ কষাযো নির্যূহঃ ক্বাথো যূষোঽকৃতশ্চ সঃ| কৃতযূষঃ প্রমথ্যা চ দ্রব্যাত্কল্কীকৃতাচ্ছৃতঃ||" ইতি| তদেবং দ্রব্যং কল্কীকৃত্য পিষ্ট্বা যত্ক্রিযতে স কৃতযূষো ভণ্যতে| স এব চ প্রমথ্যাশব্দবাচ্যঃ| তস্মান্মধ্যদোষোঽতীসারী ভূতীকাদীনি পিষ্ট্বা প্রকর্ষেণ ক্বাথযিত্বা প্রমথ্যারূপেণ পিবেদিত্যবতিষ্ঠতে| মুনিনাঽপ্যুক্তম্ (চ. চি. অ. ১৯/২২)- "প্রমথ্যাং মধ্যদোষেভ্যো দদ্যাদ্দীপনপাচনীম্|" ইতি| কিং কুর্বন্ পিবেত্ ? বিশোষযন্,- লঙ্ঘযন্, প্রকৃতত্বাদাত্মানমেব| অথবা, বিল্বধনিকাদীনি পিবেত্| অথবা, বিডাদীনি শুণ্ঠ্যাদীনি বা পিবেত্|

Adhikarana alpadoShe upavAsaH (8) · Śloka 8

শস্যতে ত্বলপদোষাণামুপবাসোঽতিসারিণাম্| |৮|

স০-অল্পদোষাণামতিসারিণামুপবাসঃ শস্যতে| তুশব্দোঽবধারণার্থঃ| অত্রোপবাস এবাল্পদোষাণাং শস্যতে ন বহুদোষমধ্যদোষোক্তোঽপর উপক্রমঃ, স ন তথা তেষাং শস্যত ইতি| সর্বমতীসারিণং দোষদেশাদ্যনুরোধেন কদাচিলঙ্ঘযেত্|

Adhikarana atIsAre pAnArthaM jalam (8-9) · Śloka 9

| বচাপ্রতিবিষাভ্যাং বা মুস্তাপপর্টকেন বা||৮|| হ্নীবেরনাগরাভ্যাং বা বিপক্বং পাযযেজ্জলম্| |৯|

স০-তৃষি সঞ্জাতাযাং দোষদেশাদ্যনুরোধেন কদাচিদ্বচাপ্রতিবিষাভ্যাং বিপক্বং জলং পাযযেত্ কদাচিন্মুস্তাপর্পটকেন কদাচিদ্বালকনাগরাভ্যাম্| পাযযেদিত্যত্র কর্ত্রভিপ্রাযে ক্রিযাফলে পরস্মৈপদম্, অন্যথা "ন পাদম্য" ইত্যাদিনা পরস্মৈপদনিষেধঃ স্যাত্|

Adhikarana atIsAre annam (9-10) · Śloka 10

| যুক্তেঽন্নকালে ক্ষুত্ক্ষামং লঘ্বন্নপ্রতি ভোজযেত্||৯|| তথা স শীঘ্রং প্রাপ্নোতি রুচিমগ্নিবলং বলম্| |১০|

স০-যুক্তে-যোগ্যে, অন্নকালে ক্ষুত্ক্ষামমতিসারিণং লঘ্বন্নপ্রতিভোজযেত্, নাপরব্যাধ্যার্তমিব লঙ্ঘনোচিতং সম্যগ্লঙ্ঘনাদনন্তরমেব ভোজযেত্| অপি তু সম্যগ্লঙ্ঘিতলক্ষণোত্পন্নমপ্যতীসারিণং কিঞ্চিত্কালপ্রতীক্ষণং কৃত্বা ভোজযেদিতি ক্ষামশব্দেন দ্যোতযতি| অল্পং লঘ্বন্নং লঘ্বন্নপ্রতি, "সুপ্প্রতিনা মাত্রার্থে" ইতি সমাসোঽব্যযীভাবঃ| এবং ক্রিযমাণে সঃ-অতিসারী, দ্রাগেব রুচিং প্রাপ্নোতি, তথা বহ্নিবলং দেহবলম্ [চ]|

Adhikarana atIsAre takrAdikam (10-11) · Śloka 11

এবং চ ভুঞ্জানস্য পানমুপদিশ্যতে | তক্রেণাবন্তিসোমেন যবাগ্বা তর্পণেন বা||১০|| সুরযা মধুনা বাঽথ যথাসাত্ম্যমুপাচরেত্| |১১|

স০-কদাচিত্তক্রেণ কদাচিত্কাঞ্জিকেন কদাচিত্পেযযা কদাচিত্তর্পণেন কদাচিত্সুরযা| কদাচিন্মার্দ্বীকেণেতি যথাসাত্ম্যমুপাচরেত্|

Adhikarana atIsAre Bojyam (11-13) · Śloka 13

| ভোজ্যানি কল্পযেদূর্ধ্বং গ্রাহিদীপনপাচনৈঃ||১১|| বালবিল্বশঠীধান্যহিঙ্গুবৃক্ষাম্লদাডিমৈঃ| পলাশহপুষাজাজীযবানীবিডসৈন্ধবৈঃ||১২|| লঘুনা পঞ্চমূলেন পঞ্চকোলেন পাঠযা| |১৩|

স০-অস্মাত্ক্রমাদূর্ধ্বং-অনন্তরং, ভোজ্যানি-ভোক্তব্যানি,কল্পযেদতীসারিণে| গ্রাহিদীপনপাচনৈরেব সঙ্গ্রহণানি দীপনানি পাচনানি চ যানি দ্রব্যাণি তানি সর্বাণ্যতীসারিণে পথ্যানীতি| এবং সঙ্ক্ষেপেণ সামান্যেন চিকিত্সিতমুক্তম্| তদেব দিঙ্মাত্রং দর্শযতি-বালেত্যাদি| বলবিল্বাদিভির্ভোজ্যানি কল্পযেত্|

Adhikarana kaPapittAdhike peyA (13-14) · Śloka 14

| শালিপর্ণীবলাবিল্বৈঃ পৃশ্নিপর্ণ্যা চ সাধিতা||১৩|| দাডিমাম্লা হিতা পেযা কফপিত্তে সমুল্বণে| |১৪|

স০-শালিপর্ণ্যাদিভিঃ সাধিতা দাডিমাম্লা পেযা কফপিত্তাধিকে হিতা|

Adhikarana vAtAdhike peyA (14) · Śloka 14

| অভযাপিপ্পলীমূলবিল্বৈর্বাতানুলোমনী||১৪||

স০-অভযাদিভিঃ পেযা বাতানুলোমনী|

Adhikarana doShabahule virekaH (15-16) · Śloka 16

বিবদ্ধং দোষবহুলো দীপ্তাগ্নির্যোঽতিসার্যতে| কৃষ্ণাবিডঙ্গত্রিফলাকষাযৈস্তং বিরেচযেত্||১৫|| পেযাং যুঞ্জযাদ্বিরিক্তস্য বাতঘ্নৈর্দীপনৈঃ কৃতাম্| |১৬|

স০-যো বহুদোষো বিবদ্ধং-অল্পাল্পং কৃত্বা, অতিসার্যতে স কৃষ্ণাদিকষাযৈর্বিরেচযেত্| বিরিক্তস্য চ তস্য সতঃ পেযাং বাতঘ্নৈর্দীপনৈশ্চ দ্রব্যৈঃ কৃতাং যুঞ্জ্যাত্|

Adhikarana doShabahule peyA (16-22) · Śloka 22

| আমে পরিণতে যস্তু দীপ্তেঽগ্নাবুপবেশ্যতে||১৬|| সফেনপিচ্ছং সরুজং সবিবন্ধং পুনঃ পুনঃ| অল্পাল্পমল্পশমলং নির্বিড্বা সপ্রবাহিকম্||১৭|| দধিতৈলঘৃতক্ষীরৈঃ স শুণ্ঠীং সগুডাং পিবেত্| স্বিন্নানি গুডতৈলেন ভক্ষযেদ্বদরাণি বা||১৮|| গাঢবিড্বিহিতৈঃ শাকৈর্বহুস্নেহৈস্তথা রসৈঃ| ক্ষুধিতং ভোজযেদেনং দধিদাডিমসাধিতৈঃ||১৯|| শাল্যোদনং তিলৈর্মাষৈর্মুদ্গৈর্বা সাধু সাধিতম্| শঠ্যা মূলকপোতাযাঃ পাঠাযাঃ স্বস্তিকস্য বা||২০|| সূষাযবানীকর্কারুক্ষীরিণীচির্ভটস্য বা| উপোদকাযা জীবন্ত্যা বাকুচ্যা বাস্তুকস্য বা||২১|| সুবর্চলাযাশ্চুঞ্চোর্বা লোণীকাযা রসৈরপি| কূর্মবর্তকলোপাকশিখিতিত্তিরিকৌক্কুটৈঃ||২২||

স০-যঃ-অতীসারী, আমে পরিণতে দীপ্তেঽগ্নৌ সত্যুপবেশ্যতে সফেনপিচ্ছং তথা সরুজং তথা সবিবন্ধং পুনঃ পুনস্তথাঽল্পমল্পং তথাঽল্পপুরীষং নির্বিড্বা-পুরীষরহিতম্, তথা সপ্রবাহিকংমিস্তানিকাসহিতম্| "স্রুতে রক্তে পুরীষে চ বাযুনা বিড্বিবর্জিতম্| প্রবাহিতেতি বিখ্যাতং যত্ ফেনাভং প্রবর্ততে||" ইতি প্রবাহিকালক্ষণম্| য এবংবিধোঽতীসারী স দধিতৈলঘৃতক্ষীরৈঃ সমুদিতৈঃ শুণ্ঠীং সগুডাং পিবেত্| অথবা, স্বিন্নানি বদরাণি গুডতৈলেনাশ্নীযাত্| এবং দোষাদিবশাচ্ছুণ্ঠীং পাযযিত্বা কদাচিত্ পূর্বোক্তানি বদরাণি ভক্ষযিত্বাঽনন্তরং ক্ষুধিতং-অতিসঞ্জাতবুভুক্ষং, এনং-অতীসারিণং, গাঢবিড্বিহিতৈঃ-বাস্তুকাদিভিঃ, শাকৈস্তথা মাংসরসৈর্বহুস্নেহৈর্দধিদাডিমসংস্কৃতৈঃ শাল্যোদনং ভোজযেত্| অথবা তিলৈর্মাষৈর্মুদ্গৈর্বা সাধু-শোভনং কৃত্বা, সাধিতং শাল্যোদনং ভোজযেত্| মূলকপোতা-লৌমূলকং পোতিকাসংজ্ঞং দেশান্তরে প্রসিদ্ধং কুরুক্ষেত্রাদৌ দেশে| অত্র ভাষ্যং কিযত্ ত্যক্তম্|

Adhikarana pakvadoShe sapravAhike auShadham, annam, yavAgUH (23-24) · Śloka 24

বিল্বমুস্তাক্ষিভৈষজ্যধাকীপুষ্পনাগরৈঃ| পক্বাতীসারজিত্তক্রে যবাগূর্দাধিকী তথা||২৩|| কপিত্থকচ্ছুরাফঞ্জীযূথিকাবটশোলুজৈঃ| দাডিমীশণকার্পাসীশাল্মলীনাং চ পল্লবৈঃ||২৪||

স০-বিল্বাদিভিস্তক্রে সিদ্ধা যবাগূঃ পক্বাতীসারজিত্| দাধিকীতি| কপিত্থাদিজৈঃ পল্লবৈর্দাডিমাদীনাং চ পল্লবৈর্দধ্নি সিদ্ধা দাধিকী যবাগূঃ| তথা-পক্বাতীসারজিত্|

Adhikarana pakvadoShe sapravAhike khalaH (25) · Śloka 25

কল্কো বিল্বশলাটূনাং তিলকল্কশ্চ তত্সমঃ| দধ্নঃ সরোঽম্লঃ সস্নেহঃ খলো হন্তি প্রবাহিকাম্||২৫||

স০-তথা বিল্বশলাটূনাং-স্তোককালজাতানাং লঘূনাং বিল্বানাং, কল্কঃ| তথা তিলকল্কস্তত্সমো-বিল্বশলাটুসমঃ| তথা দধ্নঃ সরোঽম্লো-ন মধুরঃ, সস্নেহো-দেশাদ্যনুরোধাদ্ধৃতাদিনা স্নেহেন যথাযথং যুক্তঃ| অযং খলঃ সিদ্ধঃ প্রবাহিকাং হন্তি|

Adhikarana pakvadoShe sapravAhike aparAjitaH khalaH (26-28) · Śloka 28

মরিচং ধনিকাঽজাজী তিত্তিডীকং শঠী বিডম্| দাডিমং ধাতকী পাঠা ত্রিফলা পঞ্চকোলকম্||২৬|| যাবশূকং কপিত্থাম্রজম্বূমধ্যং সদীপ্যকম্| পিষ্টৈঃ ষঙ্গুণবিল্বৈস্তৈর্দধ্নি মুদ্গরসে গুডে||২৭|| স্নেহে চ যমকে সিদ্ধঃ খলোঽযমপরাজিতঃ| দীপনঃ পাচনো গ্রাহী রুচ্যো বিম্বিশিনাশনঃ||২৮||

স০-মরিচাদিভিঃ পিষ্টৈঃ ষড্গুণং বিল্বং-বিল্বমজ্জা, যেষাং মরিচাদীনাং তৈঃ সিদ্ধঃ| তথা পরিপক্বশ্চ দধ্নি তথা মুদ্গরসে গুডে তথা যমকে চ স্নেহে| খলোঽযমপরাজিতো নাম দীপনাদিগুণঃ| বিম্বিশিনাশনঃ-প্রবাহিকাঘ্নঃ|

Adhikarana purIShakShaye yUShAH, annam, khalaH, vya~jjanam, saktavaH, mAShAH, mAMsarasaH (29-35) · Śloka 35

কোলানাং বালবিল্বানাং কল্কৈঃ শালিযবস্য চ| মুদ্গমাষতিলানাং চ ধান্যযূষং প্রকল্পযেত্||২৯|| একধ্যং যমকে ভৃষ্টং দধিদাডিমসারিকম্| বর্চঃক্ষযে শুষ্কমুখং শাল্যন্নং তেন ভোজযেত্||৩০|| দধ্নঃ সরং বা যমকে ভৃষ্টং সগুডনাগরম্| সুরাং বা যমকে ভৃষ্টাং ব্যঞ্জনার্থং প্রযোজযেত্||৩১|| ফলাম্লং যমকে ভৃষ্টং যূষং গৃঞ্জনকস্য বা| ভৃষ্টান্বা যমকে সক্তুন্ স্বাদেহ্যোষাবচূর্ণিতান্||৩২|| মাষান্ সুসিদ্ধাংস্তদ্বদ্বা ঋতমণ্ডোপসেবনান্| রসং সুসিদ্ধপূতং বা ছাগমেষান্তরাধিজম্||৩৩|| পচেদ্দাডিমসারাম্লং সধান্যস্নেহনাগরম্| রক্তশাল্যোদনং তেন ভুঞ্জানঃ প্রপিবংশ্চ তম্||৩৪|| বর্চঃক্ষযকৃতৈরাশু বিকারৈঃ পরিমুচ্যতে| |৩৫|

স০-কোলাদীনাং কল্কৈঃ শালের্যবস্য চ কল্কৈর্মুদ্গাদীনাং চকল্কৈরেকধ্যং-ব্যতিমিশ্রং, ধান্যযূষং প্রকল্পযেত্| কিম্ভূতম্ ? যমকে ভৃষ্টং তথা দধিদাডিমসারিকম্| বর্চঃক্ষযে-পুরীষক্ষযে সতি, শুষ্কমুখং-মুখশোষোপদ্রবান্বিতমতীসারিণং, তেন-যূষেণ, শাল্যন্নং ভোজযেত্| শালিগ্রহণেন রক্তশাল্যাদিনাং গ্রহণম্| অথবা, দধ্নঃ সরং যমকে পক্বং গুডনাগরসহিতং ব্যঞ্জনার্থং প্রকল্পযেত্| অথবা, যমকে ভৃষ্টাং সুরাং ব্যঞ্জনার্থং প্রকল্পযেত্| অথবা গৃঞ্জনকস্য-হরিতকবিশেষস্য, যূষং ফলৈঃ-দাডিমাদিভিরম্লৈঃ, অম্লং-অম্লীকৃতং, ব্যঞ্জনার্থং প্রকল্পযেত্| যমকে স্নেহদ্বযে, বা সক্তূন্ ভৃষ্টন্ ব্যোষাবচূর্ণিতান্ ভক্ষযেত্| তথৈব মাষান্ সুস্বিন্নান্ ঘৃতমণ্ডোপসেবনান্ খাদেত্| অথবা, ছাগমেষযোরন্তরাধিজং রসং সুসিদ্ধপূতং শোভনং কৃত্বা পূর্বং সিদ্ধং পশ্চাত্পূতং-নির্মলীকৃতং, তথা দাডিমসারেণাম্লং ধান্যকস্নেহশুণ্ঠীযুতং ব্যঞ্জনার্থং পচেত্| তেন রসেন রক্তশাল্যন্নং ভুঞ্জানস্তমেবমাংসরসং প্রপিবন্ বর্চঃক্ষযকৃতৈর্বিকারৈঃ-"পুরীষে বাযুরন্ত্রাণি" (হৃ. সূ. অ. ১১/২১) ইত্যাদিভিঃ সুত্রস্থানোদিতৈঃ, মুচ্যতে| প্রবাহিকা বর্চঃক্ষযে সতি স্যাত্| তস্মাত্তযাঽপি মুচ্যতে|

Adhikarana vAte pratihate bAlabilvAdilehaH (35-36) · Śloka 36

| বালবিল্বং গুডং তৈলং পিপ্পলীং বিশ্বভেষজম্||৩৫|| লিহ্যাদ্বাতে প্রতিহতে সশূলঃ সপ্রবাহিকঃ| |৩৬|

সং-বাতে প্রতিহতে প্রবাহিকাশূলবান্ বালবিল্বাদিকং লিহ্যাত্|

Adhikarana vAte shAbaratvagAdi (36-37) · Śloka 37

| বল্কলং শাবরং পুষ্পং ধাতক্যাবদরীদলম্||৩৬|| পিবেদ্দধিসরক্ষৌদ্রকপিত্থস্বরসাপ্লুতম্| |৩৭|

স০-রোধ্রত্বক্ ধাতকীপুষ্পং বদরীপত্রমেতত্ দধিসরাদিভিরাপ্লুতং-আলোডিতং, পিবেত্|

Adhikarana vibaddhavAtAdau kShIrasauhityam, dhAroShNaM kShIram, eraNDashRutaM kShIram, bAlabilvaSRutaM kShIram (37-39) · Śloka 39

| বিবদ্ধবাতবর্চাস্তু বহুশূলপ্রবাহিকঃ||৩৭|| সরক্তপিচ্ছস্তৃষ্ণার্তঃ ক্ষীরসৌহিত্যমর্হতি| যমকস্যোপরি ক্ষীরং ধারোষ্ণং বা প্রযোজযেত্||৩৮|| শৃতমেরণ্ডমূলেন বালবিল্বেন বা পুনঃ| |৩৯|

স০-বিবদ্ধে বাতবর্চসী যস্য, তথা প্রভুতে শূলপ্রবাহিকে যস্য, তথা সহরক্তেন পিচ্ছযা চ যো বর্ততে, তথা তৃষ্ণযাঽঽর্তঃ, এবংবিধো নরঃ ক্ষীরসৌহিত্যং-দুগ্ধতৃপ্তিং, অর্হতি| অথবা, যমকং পীত্বাঽনু ধারোষ্ণং ক্ষীরং প্রযোজযেত্| এরণ্ডমূলেন বা শৃতং বালবিল্বেন বা শৃতং ক্ষীরং প্রযোজযেত্|

Adhikarana Ame savedane mustA kShIram (39-40) · Śloka 40

| পযস্যুত্ক্বাথ্য মুস্তানাং বিংশতিং ত্রিগুণেঽম্ভসি||৩৯|| ক্ষীরাবশিষ্টং তত্পীতং হন্যাদামং সবেদনম্| |৪০|

স০-ক্ষীরে ত্রিগুণেঽম্ভসি মুস্তাবিংশতিং প্রক্বাথ্য ক্ষীরাবশিষ্টং পীতমামং সরুজং হন্যাত্| অত্র চ বিংশতিভির্মুস্তৈঃ প্রাযেণ পলং ভবতি| সামান্যকল্পনযা চ মুস্তাপলং ষোডশভির্দ্রবপলৈরুত্ক্বাথ্য চত্বারি পলানি চতুর্ভাগাবশেষতযা কার্যাণি| তদেবং ক্ষীরপলানি চত্বারি পানীযপলানি দ্বাদশ মুস্তাবিংশতিং দত্বা ক্ষীরাবশিষ্টং পেযমিত্যযমত্র ক্বাথক্রমো বেদ্যঃ|

Adhikarana cirakAlapravAhikAyAM pippalIcUrNaM marIcacUrNaM ca (40-41) · Śloka 41

| পিপ্পল্যাঃ পিবতঃ সূক্ষ্মং রজো মরিচজন্ম বা||৪০|| চিরকালানুষক্তাঽপি নশ্যত্যাশু প্রবাহিকা| |৪১|

স০-পিপ্পল্যাঃ সূক্ষ্মং চূর্ণং জলেন পিবতো মরিচস্য বা সূক্ষ্মং চূর্ণং জলেন পিবতো বহুকালানুষক্তাঽপি প্রবাহিকা নশ্যতি|

Adhikarana nirAmashUlAdau sakShAraM ghRutam (41-42) · Śloka 42

| নিরামরূপং শূলার্তং লঙ্ঘনাদ্যৈশ্চ কর্ষিতম্||৪১|| রূক্ষকোষ্ঠমপেক্ষ্যাগ্নিং সক্ষারং পাযযেদ্ ঘৃতম্| |৪২|

স০-নিরামরূপং তথা শূলেন পীডিতং লঙ্ঘনাদ্যৈঃ কর্ষিতং তথা রূক্ষকোষ্ঠং বহ্নিমপেক্ষ্য ক্ষারসহিতং ঘৃতং পাযযেত্|

Adhikarana nirAmashUlAdau dadhyAditailam (42-43) · Śloka 43

| সিদ্ধং দধিসুরামণ্ডে দশমূলস্য চাম্ভসি||৪২|| সিন্ধূত্থপঞ্চকোলাভ্যাং তৈলং সদ্যোর্তিনাশনম্| |৪৩|

স০-দধিসুরামণ্ডে দশমূলক্বাথে চ সৈন্ধবপঞ্চকোলকল্কেন তৈলং সিদ্ধং সদ্যো রুজাপহম্|

Adhikarana nirAmashUlAdau shuNThyAditailam (43-44) · Śloka 44

| ষড্ভিঃ শুণ্ঠ্যাঃ পলৈর্দ্বাভ্যাং দ্বাভ্যাং গ্রন্থ্যগ্নিসৈন্ধবাত্||৪৩|| তৈলপ্রস্থং পচেদ্দধ্না নিঃসারকরুজাপহম্| |৪৪|

স০-শুণ্ঠীপলৈঃ ষড্ভিঃ পিপ্পলীমূলপলদ্বযেন চিত্রকপলদ্বযেন সৈন্ধবপলদ্বযেন চ তৈলপ্রস্থং দধ্না পচেত্| তন্নিঃসারকরুজাপহম্|

Adhikarana nirAmashUlAdau mAMsadugdhAjyam (44-45) · Śloka 45

| একতো মাংসদুগ্ধাজ্যং পুরীষগ্রহশূলজিত্||৪৪|| পানানুবাসনাভ্যঙ্গপ্রযুক্তং তৈলমেকতঃ| তদ্ধি বাতজিতামগ্র্যং শূলং চ বিগুণোঽনিলঃ||৪৫||

স০-একতঃ-একস্মিন্ পুরীষগ্রহশূলজিত্ত্বপক্ষে, মাংসদুগ্ধাজ্যং ত্রযমেতত্ প্রযুক্তং পুরীষগ্রহশূলজিত্| একতঃ-একস্মিন্ শূলজিত্ত্বপক্ষে, পানানুবাসনাভ্যঙ্গৈঃ প্রযুক্তং তৈলং পুরীষগ্রহশূলজিত্ 'সম্পদ্যতে' ইতি বাক্যশেষঃ| কথমেবম্ ? ইত্যাহ-তদ্ধীত্যাদি| তত্-তৈলং, যস্মাত্সর্বেষাং বাতজিতামগ্ন্যং-প্রধানম্| শূলং চ বিগুণোঽনিলঃ-প্রকুপিতঃ পবনো, নাপরঃ কশ্চিত্| শূলানিলযোঃ কার্যকারণভাবাহ্যতিরেকে সত্যপি শূলস্য বাতকার্যস্য বাতপ্রকোপে সত্যবিনাভাবিত্বং সূচযিতুং শূলং চ বিগুণোঽনিল ইত্যেবমুক্তম্| কুপিতশ্চেদ্বাযুরুত্পন্নমেব শূলমিত্যর্থঃ|

Adhikarana nirAmashUlAdau pAnAdiprayuktaM tailaM shreShTham, shreShThatve kAraNam (46-47) · Śloka 47

বাযোর্বৈগুণ্যে কোপে ধাতুক্ষয এবাত্র হেতুঃ| অত এবাহ ধাত্বন্তরোপমর্দেদ্ধশ্চলো ব্যাপী স্বধামগঃ| তৈলং মন্দানলস্যাপি যুক্ত্যা শর্মকরং পরম্||৪৬|| বায্বাশযে সতৈলে হি বিম্বিসী নাবতিষ্ঠতে| |৪৭|

স০-বাযুমপেক্ষ্যান্যে পিত্তশ্লেষ্মাদযো-ধাত্বন্তরাঃ, তেষামুপমর্দঃ-অন্যথাভাবঃ, তেন ইদ্ধঃ-উদ্ধতঃ, চলো-বায্বাখ্যঃ, স ব্যাপী-সকলশরীরব্যাপনশীলোঽপি, স্বধামগঃ-পক্বাশযস্থঃ, তত্রাধিক্যেন তস্য বৃত্তেঃ, অস্যামবস্থাযামস্যাতীসারিণস্তৈলং মন্দানলস্যাপি যুক্ত্যা-যোগবিশেষেণ, পরং-অতিশযেন, শর্মকরম্, রোগস্য দুঃখহেতোঃ শমনাত্| অপিশব্দাত্কিমুদীপ্তাগ্নেরতীসারিণো ন সুখকরং ভবতি ? অত্রৈব হেতুমাহ-বায্বাশযে-পক্বাশযাখ্যে, সতৈলে বিম্বিসী-প্রবাহিকা, নাবতিষ্ঠতেস্থিতিং ন প্রাপ্নোতি|

Adhikarana shreShThatve kAraNantarAni (47) · Śloka 47

ক্ষীণে মলে স্বাযতনচ্যুতেষু দোষান্তরেষ্বীরণ একবীরে| কো নিষ্টনন্প্রাণিতি কোষ্ঠশূলী নান্তর্বহিস্তৈলপরো যদি স্যাত্||৪৭||

স০-মলে-পুরীষাখ্যে, ক্ষীণে তথা দোষান্তরেষু-বাতবিবর্জিতেষু পিত্তকফাদিষু, আযতনচ্যুতেষু-স্বাধারভ্রষ্টেষু, ব্যক্ত্যপেক্ষযা বহুবচনম্, ঈরণে-বাযৌ, একবীরে-একনাযকে, শেষদোষাণাং স্বস্থানভ্রষ্টত্বাত্কোঽতীসারী নিষ্টনন্-প্রবাহিকাং কুর্বন্, প্রাণিতি ?-ন কশ্চিজ্জীবতি| যদি নান্তর্বহিঃ-উভযত্র, পানানুবাসনাভ্যঙ্গৈঃ, তৈলপরঃ-অতিশযেন তৈলসৈবী, ন স্যাত্| আক্রন্দনপূর্বং সশূলমুপবেশনং-নিষ্ঠনন্নুচ্যতে| ইন্দ্রবজ্রাবৃত্তম্|

Adhikarana gudashUlaBraMshayorGRutam (48-49) · Śloka 49

| গুদরুগ্ভ্রংশযোর্যুঞ্জ্যাত্সক্ষীরং সাধিতং হবিঃ||৪৮|| রসে কোলাম্লচাঙ্গের্যোর্দধ্নি পিষ্টে চ নাগরে| |৪৯|

স০-গুদরুজি গুদভ্রংশে চ ঘৃতং সক্ষীরং কোলাদিরসে দধ্নি নাগরে চ কল্কিতে পক্বং যুঞ্জ্যাত্| অত্র চ ক্ষীরং সর্পিঃপ্রমাণং ঘৃতাত্কোলাদিরসাদিকং চতুর্গুণং শুণ্ঠীতশ্চতুর্গুণং ঘৃতমিতি পাকক্রমঃ|

Adhikarana gudashUlaBraMshayoranyadghRutam (49-50) · Śloka 50

তৈরেব চাম্লৈঃ সংযোজ্য সিদ্ধং সুশ্লক্ষ্ণকল্কিতৈঃ||৪৯|| ধান্যোষণবিডাজাজীপঞ্চকোলকদাডিমৈঃ| |৫০|

স০-তৈরেব- পূর্বোক্তৈঃ কোলাদিভিরম্লৈঃ, সংযোজ্য সূক্ষ্মরজীকৃতৈশ্চ ধান্যকাদিভিঃ সিদ্ধং ঘৃতং পূর্বগুণম্|

Adhikarana gudashUlaBraMshayorsnehabastiH (50-51) · Śloka 51

| যোজযেত্স্নেহবস্তিং বা দশমূলেন সাধিতম্||৫০|| শঠীশতাহ্বাকুষ্ঠৈর্বা বচযা চিত্রকেণ বা| |৫১|

স০-গুদশূলী চ দশমূলেন সাধিতং হবিঃ-ঘৃতং, স্নেহবস্তিং বা যোজযেত্| শঠ্যাদিভির্বা সাধিতং বচযা বা সাধিতং চিত্রকেণ বা সাধিতং যোজযেত্| তচ্চ পূর্বগুণম্|

Adhikarana pravAhaNAdau anuvAsanam (51-52) · Śloka 52

| প্রবাহণে গুদভ্রংশে মূত্রাঘাতে কটিগ্রহে||৫১|| মধুরাম্লৈঃ শৃতং তৈলং ঘৃতং বাঽপ্যনুবাসনম্| |৫২|

স০-প্রবাহণাদিষু মধুরাম্লৈঃ শৃতং তৈলং ঘৃতং বাঽনুবাসনং যোজযেত্|

Adhikarana gudaBraMSe~antaHpraveSaH goH PaNAbandhaH (52-53) · Śloka 53

| প্রবেশযেহ্গুদং ধ্বস্তমভ্যক্তং স্বেদিতং মৃদু||৫২|| কুর্যাচ্চ গোঃফণাবন্ধং মধ্যচ্ছিদ্রেণ চর্মণা| |৫৩|

স০-গুদং ধ্বস্তং সধভ্যক্তং স্বেদিতং চ মৃদু কৃত্বাঽন্তঃ প্রবেশযেত্| গোঃফণাবন্ধং চর্মণা মধ্যচ্ছিদ্রবতা কুর্যাত্|

Adhikarana gudaBraMSe pa~jcamUlAditailam (53-54) · Śloka 54

| পঞ্চমূলস্য মহতঃ ক্বাথং ক্ষীরে বিপাচযেত্||৫৩|| উন্দুরং চান্ত্ররহিতং তেন বাতঘ্নকল্কবত্| তৈলং পচেদ্গুদভ্রংশং পানাভ্যঙ্গেন তজ্জযেত্||৫৪||

স০-মহতঃ পঞ্চমূলস্য-বিল্বাদেঃ ক্বাথং তৈলসমং কৃত্বা ক্ষীরে বিপাচযেত্| উন্দুরুং চান্ত্ররহিতং তস্মিন্নেব ক্ষীরে বিপাচযেত্| তেনৈব ক্ষীরেণ্ তৈরেণ তৈলং পচেত্| কিম্ভূতম্? বাতঘ্নকল্কবত্| বাতঘ্নানাং-রাস্নৈরণ্ডাদীনাং কল্কঃ, স যস্যাস্তি বাতঘ্নকল্কবত্| উন্দুরোরত্র রাস্নাদ্যঘ্রুতানুসারেণ প্রমাণং নিরুপ্য কার্যম্| তত্রৈবং পঠ্যতে (চরকে চি.অ.১৮/৪২)-"তুলার্ধং চাজমাংসস্য" ইতি| এবং মাযুরাদিষ্বপি ঘৃতেষু (হৃ.উ.অ.২৪/৪৭) মযূরাদীনাং প্রমাণং চিন্ত্যম্| তেন তৈলং পচেদিতি বচনাচ্চ ক্ষীরং তৈলাচ্চতুর্গুণং কার্যম্| অত্র দ্রবস্যাপরস্যাভাবাত্তৈলাচ্চ দ্রবং চতুর্গুণং কার্যমিতি পাকক্রমঃ| তস্মান্নান্যস্নেহবদত্র ক্ষীরং গ্রাহ্যম্| অন্যত্র হ্যেবমধীতম্-"দ্রব্যাচ্চতুর্গুণঃ স্নেহঃ স্নেহাত্ক্বাথশ্চতুর্গুণঃ| ক্ষীরং স্নেহসমং" ইতি| বহুক্ষীরত্বেন বাতকার্যস্য গুদভ্রংশাখ্যস্য শীঘ্রং শমং করোতি, ইতি চতুর্গুণমেবাত্র ক্ষীরং ন্যায্যম্|

Adhikarana pittAtisAre sAme la~gghanam (55) · Śloka 55

পৈত্তে তু সামে তীক্ষ্ণোষ্ণবর্জ্যং প্রাগিব লঙ্ঘনম্| |৫৫|

স০-পৈত্তে ত্বতীসারে সামে প্রাগিব-যথা বাতাতীসারে পূর্বং লঙ্ঘনং শরীরলাঘবং কর্তুং যত্কর্ম দ্রব্যং বা নির্দিষ্টং তত্সর্বং, তীক্ষ্ণোষ্ণবর্জ্যং 'অস্মিন্ কার্যম্' ইতি শেষঃ|

Adhikarana pittAtisAre sAme pAnIyam, annam (55-56) · Śloka 56

| তৃড্বান্ পিবেত্ ষডঙ্গাম্বু সভূনিম্বং সসারিবম্||৫৫|| পেযাদি ক্ষুধিতস্যান্নমগ্নিসন্ধুক্ষণং হিতম্| বৃহত্যাদিগণাভীরুদ্বিবলাশূর্পপর্ণিভিঃ||৫৬||

স০-স পিত্তাতীসারী তৃড্বান্ ষডঙ্গাম্বু-জ্বরচিকিত্সিতোক্তং (হৃ. চি. অ. ১/১৫), ভূনিম্বসারিবাভ্যাং সহিতং পিবেত্, অর্ধমষ্টাঙ্গজলং তেন পেযমিত্যবতিষ্ঠতে| ক্ষুধিতস্য-অতিশযেন বুভুক্ষিতস্য, পেযাদ্যন্নমগ্নিসন্ধুক্ষণং হিতম্| [ কিম্ভূতম্? ] বৃহত্যাদিনা গণেনাভীরুণা তথা বলাদ্বযেন শূর্পপর্ণীদ্বযেন চ সাধিতম্|

Adhikarana pittAtisAre sAme kuTajAdicUrNam, pAThAdicUrNam, ativiShAbilvAdikvAthaH, ativiShAmUrvAdikvAthaH, ativiShAshuNThyAdikvAthaH (57-59) · Śloka 59

পাযযেদনুবন্ধে তু সক্ষৌদ্রং তণ্ডুলাম্ভসা| কটুজস্য ফলং পিষ্টং সবল্কং সঘুণপ্রিযম্||৫৭|| পাঠাবত্সকবীজত্বগ্দার্বীগ্রন্থিকশুণ্ঠি বা| ক্বাথং বাঽতিবিষাবিল্ববত্সকোদীচ্যমুস্তজম্||৫৮|| অথবাঽতিবিষামূর্বানিশেন্দ্রযবতার্ক্ষ্যজম্| সমধ্বতিবিষাশুণ্ঠীমুস্তেন্দ্রযবকট্ফলম্||৫৯||

স০-এবং লঙ্ঘনপেযাদিকে কৃতেঽপ্যনুবন্ধেঽতীসারস্য সতি, তমতীসারিণং কুটজস্য ফলং-শক্রযবাখ্যং, পিষ্টং সবল্কং-প্রকৃত্ত্বাত্তস্যৈব কুটজস্য ত্বচা যুক্তং, তথা সঘুণপ্রিযং তথা সক্ষৌদ্রং তণ্ডুলাম্ভসা পাযযেত্| অথবা, পাঠাদিপিষ্টং তণ্ডুলাম্ভসা সক্ষৌদ্রং তমতীসারিণং পাযযেত্| অথবা, ক্বাথমতিবিষাদিজং তং পাযযেত্| অথবা, অতিবিষামূর্বাদিজং পাযযেত্| তার্ক্ষ্যং-রসাঞ্জনম্| সমধ্বিত্যাদি| সমাক্ষিকমতিবিষাদিকং ক্বাথীকৃতং বা পাযযেত্|

Adhikarana pittAtisAre sAme vatsakabIjakvAthaH, mustAkvAthaH, shAlmalIvRuntakvAthaH (60-61) · Śloka 61

পলং বত্সকবীজস্য শ্রপযিত্বা রসং পিবেত্| যো রসাশী জযেচ্ছীঘ্রং স পৈত্তং জঠরামযম্||৬০|| মুস্তাকষাযমেবং বা পিবেন্মধুসমাযুতম্| সক্ষৌদ্রং শাল্মলীবৃন্তকষাযং বা হিমাহ্বযম্||৬১||

স০-বত্সকবীজস্য বা পলং জলেন ক্বাথযিত্বা তদ্রসং যো মাংসরসাশী সন্ পিবেত্ স পিত্তজমতীসারং জযেত্| এবং প্রাগ্বত্, মুস্তাকষাযং-মুস্তানাং পলং শ্রপযিত্বা, মধুসমাযুতং রসাশী সন্ ক্বাথং পিবেত্ স পৈত্তং জঠরামযং জযেত্| শাল্মলীবৃন্তকষাযং বা হিমাহ্বযং-শীতকষাযং, সক্ষৌদ্রং বা পিবেত্|

Adhikarana pittAtisAre sAme kirAtatiktakAdicUrNam, kaTa~gkaTeryAdi cUrNam, tilAdicUrNam, nAgarAdicUrNam (62-64) · Śloka 64

কিরাততিক্তকং মুস্তং বত্সকং সরসাঞ্জনম্| কটঙ্কটেরী হ্রীবেরং বিল্বমধ্যং দুরালভা||৬২|| তিলা মোচরসং রোধ্নং সমঙ্গা কমলোত্পলম্| নাগরং ধাতকীপুষ্পং দাডিমস্য ত্বগুত্পলম্||৬৩|| অর্ধশ্লোকৈঃ স্মৃতা যোগাঃ সক্ষৌদ্রাস্তণ্ডুলাম্বুনা| |৬৪|

স০-কিরাততিক্তাদযশ্চত্বারো যোগা অর্ধশ্লোকৈঃ স্মৃতাঃ সমাক্ষিকাস্তণ্ডুলজলেন যোজ্যাঃ|

Adhikarana pittAtisAre pakve nishAdikvAthaH (64) · Śloka 64

| নিশেন্দ্রযবরোধ্নৈলাক্বাথঃ পক্বাতিসারজিত্||৬৪||

স০-নিশাদিক্বাথঃ পক্বাতীসারজিত্|

Adhikarana pittAtisAre pakve rodhrAdigaNakvAthaH, ambaShThAdigaNakvAthaH, priya~ggvAdigaNakvAthaH (65) · Śloka 65

রোধ্রাম্বষ্ঠাপ্রিযঙ্গ্বাদিগণাংস্তদ্বত্ পৃথক্ পিবেত্| |৬৫|

স০-রোধ্রাদীন্ গণান্ পৃথক্ [তদ্বত্-] সমাক্ষিকাংস্তথৈব তণ্ডুলাম্ভসা, পিবেত্|

Adhikarana pittAtisAre pakve peyAvilepI khalAH (65-66) · Śloka 66

| কট্বঙ্গবল্কযষ্ট্যাহ্বফলিনীদাডিমঙ্কুরৈঃ||৬৫|| পেযাবিলেপীখলকান্ কুর্যাত্সদধিদাডিমান্| তদ্বদ্দধিত্থবিল্বাম্রজম্বুমধ্যৈঃ প্রকল্পযেত্||৬৬||

স০-কট্বঙ্গত্বগাদিভিঃ পেযাদীন্ সদধিদাডিমান্ কুর্যাত্| তথৈব দধিত্থাদিভিঃ পেযাদীন্ সদধিদাডিমান্ কল্পযেত্| দধিত্থঃ-কপিত্থঃ|

Adhikarana pittAtisAre pakve ajApayaH, virecanam (67) · Śloka 67

অজাপযঃ প্রযোক্তব্যং নিরামে, তেন চেচ্ছমঃ| দোষাধিক্যান্ন জাযেত বলিনং তং বিরেচযেত্||৬৭||

স০-অজাপযঃ পথ্যং নিরামে স্মৃতম্| তেন-অজাক্ষীরেণ, যদি দোষাধিক্যাদ্ধেতোঃ শমো ন ভবেত্ তদা তং বলবন্তং বিরেচযেত্-ন দুর্বলম্|

Adhikarana pittAtisAre pakve virekArtham palAshaPalakvAthaH (68-69) · Śloka 69

ব্যত্যাসেন শকৃদ্রক্তমুপবেশ্যেত যোঽপি বা| পলাশফলনির্যূহং যুক্তং বা পযসা পিবেত্||৬৮|| ততোঽনু কোষ্ণং পাতব্যং ক্ষীরমেব যথাবলম্| প্রবাহিতে তেন মলে প্রশাম্যত্যুদরমযঃ||৬৯||

স০-ব্যত্যাসঃ-পরস্পরক্ষেপণম্, শকৃদ্রক্তং ক্ষিপতি রক্তং শকৃত্ক্ষিপত্যেবং ব্যত্যাসঃ, তেন য উপবেশ্যেত স পলাশফলক্বাথং কেবলং পিবেদথবা পযসা যুক্তম্| ততঃ-তত্কষাযং পীত্বাঽনন্তরং, কোষ্ণং ক্ষীরমেব যথা-বলং-বলানতিক্রমেণ, পেযম্| তেনক্ষীরেণ, মলে প্রবাহিতে-নিঃসারিতে সতি, অতীসারঃ শাম্যতি|

Adhikarana pittAtisAre pakve trAyamANAkvAthaH (70) · Śloka 70

পলাশবত্প্রযোজ্যা বা ত্রাযমাণা বিশোধনী| |৭০|

স০-পলাশং যথা তথা ত্রাযমাণা বিশোধনায প্রযোজ্যা|

Adhikarana pittAtisAre pakve anuvAsanam (70-71) · Śloka 71

| সংসর্গ্যাং ক্রিযমাণাযাং শূলং যদ্যনুবর্ততে||৭০|| স্রুতদোষস্য তং শীঘ্রং যথাবহ্ন্যনুবাসযেত্| |৭১|

স০-স্রুতদোষস্য-অপচিতমলস্যাতীসারিণঃ, সংসর্গ্যাং ক্রিযমাণাযাং-পেযাদিকে ক্রমে বিধীযমানে, যদি শূলমনুবর্ততেনির্বৃত্তিং ন যাতি, তং-আতুরং, আশু যথাবহ্নি-অগ্ন্যনতিক্রমেণ, অনুবাসযেত্|

Adhikarana pittAtisAre pakve anuvAsanaghRutam (71-72) · Śloka 72

| শতপুষ্পাবরীভ্যাং চ বিল্বেন মধুকেন চ||৭১|| তৈলপাদং পযোযুক্তং পক্বমন্বাসনং ঘৃতম্| |৭২|

স০-শতপুষ্পাদিভিস্তৈলপাদং ক্ষীরযুতং ঘৃতং পক্বমনুবাসনং স্যাত্|

Adhikarana pittAtisAre pakve picCAbastiH (72) · Śloka 72

| অশান্তাবিত্যতীসারে পিচ্ছাবস্তিঃ পরং হিতঃ||৭২||

স০-ইতি-অনেন প্রকারেণ কৃতেন, অতীসারস্যাশান্তৌ সত্যাং পরং-অনন্তরং, পিচ্ছাবস্তিঃ-বক্ষ্যমাণো, হিতঃ| অল্পযা মাত্রযা নিরুহাখ্যো বস্তিঃ-পিচ্ছাবস্তিঃ|

Adhikarana pittAtisAre pakve picCAbastyarthaM dravyaM vidhistatPalaM ca (73-76) · Śloka 76

পরিবেষ্ট্য কুশৈরাদ্রৈরার্দ্রবৃন্তানি শাল্মলেঃ| কৃষ্ণমৃত্তিকযাঽঽলিপ্য স্বেদযেদ্গোমযাগ্নিনা||৭৩|| মৃচ্ছোষে তানি সঙ্ক্ষুদ্য তত্পিণ্ডং মুষ্টিসম্মিতম্| মর্দযেত্পযসঃ প্রস্থে পূতেনাস্থাপযেত্ততঃ||৭৪|| নতযষ্ট্যাহ্বকল্কাজ্যক্ষৌদ্রতৈলবতাঽনু চ| স্নাতো ভুঞ্জীত পযসা জাঙ্গলেন রসেন বা||৭৫|| পিত্তাতিসারজ্বরশোফগুল্ম সমীরণাস্রগ্রহণীবিকারান্| জযত্যযং শীঘ্রমতিপ্রবৃত্তিং বিরেচনাস্থাপনযোশ্চ বস্তিঃ||৭৬||

স০-আর্দ্রৈঃ-অশুষ্কৈর্দর্ভৈঃ, শাল্মলেরার্দ্রবৃন্তানি-কুসুমবন্ধনানি, পরিবেষ্ট্য ততঃ কৃষ্ণমৃত্তিকযাঽঽলিপ্য গোমযাগ্নিনা স্বেদযেত্| মৃচ্ছোষে সতি তানি সঙ্ক্ষুদ্য-সঞ্চূর্ণ্য, তং পিণ্ডং মুষ্টিসম্মিতং-পলপ্রমাণং, পযসঃ প্রস্থে মর্দযেত্| তেন চ পূতেনানন্তরং নতাদিমতাঽঽস্থাপযেত্| নতং-তগরম্| পুটপাকানাং চ সর্বেষামযমেব বিধিঃ| আস্থাপিতশ্চ পশ্চাত্| স্নাতঃ পযসা ভুঞ্জীত, সাত্ম্যাদিবশাজ্জাঙ্গলরসেন বা| অযং-বস্তিঃ প্রযুক্তং, পিত্তাতীসারাদীন্ বিরেচনাস্থাপনযোশ্চাতিপ্রবৃত্তিং-দোষাণামতিযোগং, জযতি| এতদুক্তং ভবতি,-বহুদোষস্য যা প্রবৃত্তির্বিরেচনবিষযে আস্থাপনবিষযে বা তাং চ প্রযুক্তাঽযং জযতি| উপজাতিঃ|

Adhikarana pittAtisAre pakve kuTajaPANitam (77) · Śloka 77

ফাণিতং কুটজোত্থং চ সর্বাতীসারনাশনম্| বত্সকাদিসমাযুক্তং সাম্বষ্ঠাদি সমাক্ষিকম্||৭৭||

স০-কুটজোত্থং চ ফাণিতং বত্সকাদিযুক্তমম্বষ্ঠাদিসহিতং মাক্ষীকযুক্তং সর্বাতীসারঃ-আমাতীসারঃ পক্বাতীসারশ্চ, তস্য নাশনং স্যাত্|

Adhikarana pittAtisAre cirotthitAdau puTapAkAH (78) · Śloka 78

নীরুঙ্নিরামং দীপ্তাগ্নেরপি সাস্রং চিরোত্থিতম্| নানাবর্ণমতীসারং পুটপাকৈরুপাচরেত্||৭৮||

স০-নীরুক্ চাসৌ নিরামশ্চ নীরুঙ্নিরামস্তমতীসারং, অপি সাস্রং-অপিশব্দাত্কিমুত নিরস্রম্?, তং তথাভূতং চোরোত্থিতং, তথা নানাবর্ণং-অনেকবর্ণং, দীপ্তাগ্নেঃ পুটপাকৈরুপাচরেত্|

Adhikarana pittAtisAre dIrghavRuntapuTapAkaH (79-80) · Śloka 80

ত্বক্পিণ্ডাদ্দীর্ঘবৃন্তস্য শ্রীপর্ণীপত্রসংবৃতাত্| মৃল্লিপ্তাদগ্নিনা স্বিন্নাদ্রসং নিষ্পীডিতং হিমম্||৭৯|| অতীসারী পিবেদ্যুক্তং মধুনা সিতযাঽথবা| |৮০|

স০-ত্বচঃ পিণ্ডস্ত্বক্পিণ্ডঃ, দীর্ঘবৃন্তস্য ত্বক্পিণ্ডঃ, তস্মাত্, কাশ্মর্যপত্রসঞ্ছাদিতাত্ মৃল্লিপ্তাত্ সামান্যোক্তাবপি কৃষ্ণমৃত্তিকযা লিপ্তাদিতি বেদ্যম্| প্রাগুক্তং হি (শ্লো.৭৩)-"কৃষ্ণমৃত্তিকযাঽঽলিপ্য" ইতি| অনন্তরমগ্নিনা স্বিন্নাদ্রসং নিষ্পীডিতং শীতং কৃত্বাঽতীসারী মধুনা যুক্তমথবা সিতযা যুক্তং পিবেত্| দীর্ঘবৃন্তঃ-শ্যোনাকঃ|

Adhikarana pittAtisAre kShIridrumapuTapAkAH, kaTva~ggayogaH (80-81) · Śloka 81

| এবং ক্ষীরিদ্রুমত্বগ্ভিস্তত্প্ররোহৈশ্চ কল্পযেত্||৮০|| কট্বঙ্গত্বগ্ঘৃতযুতা স্বেদিতা সলিলোষ্মণা| সক্ষৌদ্রা হন্ত্যতীসারং বলবন্তমপি দ্রুতম্||৮১||

স০-এবং-অনেন প্রকারেণ, ক্ষীরিদ্রুমাণাং ত্বগ্ভিস্তত্প্ররোহৈঃ-কোমলৈর্বিগতমূলৈশ্চ, কল্পযেত্| প্ররোহাঃ-অঙ্কুরা ইত্যন্যে| শ্যোনাকত্বক্ ঘ্রুতযুতা তথোষ্ণসলিলোষ্মণা স্বেদিতা মাক্ষিকযুক্তাঽতীসারং বলবন্তমপি শীঘ্রং হন্তি|

Adhikarana raktAtisare nidAnalakShaNe, padmotpalAdishRutaM CAgapayaH, pAne Bojane gudasecane ca (82-84) · Śloka 84

পিত্তাতিসারী সেবেত পিত্তলান্যেব যঃ পুনঃ| রক্তাতিসারং কুরুতে তস্য পিত্তং সতৃড্জ্বরম্||৮২|| দারুণং গুদপাকং চ তত্র ছাগং পযো হিতম্| পদ্মোত্পলসমঙ্গাভিঃ শৃতং মোচরসেন চ||৮৩|| সারিবাযষ্টিরোধ্রৈর্বা প্রসবৈর্বা বটাদিজৈঃ| সক্ষৌদ্রশর্করং পানে ভোজনে গুদসেচনে||৮৪||

স০-পিত্তাতীসারী পিত্তলান্যেবান্নপানানি যঃ সেবতে, তস্য পিত্তং কর্তৃ রক্তাতীসারং কুরুতে| কিম্ভূতম্? তৃষ্ণাজ্বরযুতম্| তথা দারুণং গুদপাকং করোতি| তত্র-এবংবিধেঽতীসারে, ছাগং ক্ষীরং পদ্মাদিভির্মোচরসেন চ শৃতং হিতম্| অথবা, সারিবাদিভিঃ শৃতং ছাগং ক্ষীরং হিতম্ অথবা, বটাদিজৈঃ পল্লবৈঃ শৃতং ক্ষৌদ্রশর্করান্বিতং পানে ভোজনে গুদসেকে চ ছাগং পযো হিতম্|

Adhikarana raktAtisAre pAnAdau rasayUShAdayo~anamlAH, kAshmaryaPalayUShaH (85) · Śloka 85

তদ্বদ্রসাদযোঽনম্লাঃ সাজ্যাঃ পানান্নযোর্হিতাঃ| কাশ্মর্যফলযূষশ্চ কিঞ্চিদম্লঃ সশর্করঃ||৮৫||

স০-তথৈব রসযূষাদযোঽনম্লাঃ সঘৃতাঃ পানান্নযোর্হিতাঃ| কাশ্মর্যফলযূষশ্চ কিঞ্চিদম্লঃ সশর্করো হিতঃ|

Adhikarana raktAtisAre peyA, navanItaM prAgBaktam (86-87) · Śloka 87

পযস্যর্ধোদকে ছাগে হ্রীবেরোত্পলনাগরৈঃ| পেযা রক্তাতিসারঘ্নী পৃশ্নিপর্ণীরসান্বিতা||৮৬|| প্রাগ্ভক্তং নবনীতং বা লিহ্যান্মধুসিতাযুতম্| |৮৭|

স০-ছাগে পযস্যর্ধোদকে বালকোত্পলনাগরৈঃ পৃশ্নিপর্ণীক্বাথেন চ যুক্তা পেযা রক্তাতীসারং হন্তি| অথবা নবনীতং প্রাগ্ভক্তং মধুশর্করান্বিতং লিহ্যাত্|

Adhikarana raktAtisAre AjaM mArgaM vA raktam, kShIrodbhavaM ghRutam (87-88) · Śloka 88

| বলিন্যস্রেঽস্রমেবাজং মার্গং বা ঘৃতভর্জিতম্||৮৭|| ক্ষীরানুপানং ক্ষীরাশী ত্র্যহং ক্ষীরোদ্ভবং ঘৃতম্| কপিঞ্জলরসাশী বা লিহন্নারোগ্যমশ্রুতে||৮৮||

স০-প্রবৃদ্ধে রক্তে ছাগং রক্তমথবা মার্গং-মৃগসম্বন্ধি রক্তং, ঘৃতভর্জিতং ভুঞ্জীত, এবকারান্ন ত্বপরং কিঞ্চিদজস্য মৃগস্য চেতি গম্যতে| উভযমপি ক্ষীরানুপানং ক্ষীরাশী চ সন্ ভুঞ্জীত| অথবা, ক্ষীরোদ্ভবং ঘৃতং ত্র্যহং লিহন্ কপিঞ্জলরসাশনো নর আরোগ্যং প্রাপ্নোতি|

Adhikarana raktAtisAre shatAvarIkalkaH (89) · Śloka 89

পীত্বা শতাবরীকল্কং ক্ষীরেণ ক্ষীরভোজনঃ| রক্তাতিসারং হন্ত্যাশু তযা বা সাধিতং ঘৃতম্||৮৯||

স০-শতাবরীকল্কং ক্ষীরেণ পীত্বা ক্ষীরাশী সন্ রক্তাতীসারং দ্রাগেব পরাকরোতি| অথবা, তযা-শতাবর্যা, পক্বং ঘৃতং রক্তাতীসারং হন্তি|

Adhikarana raktAtisAre lAkShAdisiddhaM ghRutam (90-91) · Śloka 91

লাক্ষানাগরবৈদেহীকটুকাদার্বিবল্কলৈঃ| সর্পিঃ সেন্দ্রযবৈঃ সিদ্ধং পেযামণ্ডাবচারিতম্||৯০|| অতীসারং জযেচ্ছীঘ্রং ত্রিদোষমপি দারুণম্| |৯১|

স০-লাক্ষাদিভিঃ সিদ্ধং ঘ্রুতং পেযামণ্ডেনাবচারিতং শীঘ্রং ত্রিদোষমপ্যতীসারং ঘোরং জযতি| অপিশব্দাদ্রক্তাতীসারমপি|

Adhikarana raktAtisAre kRuShNamRudAdikam, priya~ggukalkaH (91-92) · Śloka 92

| কৃষ্ণমৃচ্ছঙ্খযষ্ট্যাহ্বক্ষৌদ্রাসৃক্তণ্ডুলোদকম্||৯১|| জযত্যস্রং প্রিযঙ্গুশ্চ তণ্ডুলাম্বুমধুপ্লুতা| |৯২|

স০-কৃষ্ণমৃদাদিকং তণ্ডুলজলালোডিতং রক্তং জযতি| তথা, তণ্ডুলাম্বুমধুযুক্তা প্রিযঙ্গূ রক্তং জযতি|

Adhikarana raktAtisAre kRuShNatilakalkaH (92-93) · Śloka 93

| কল্কস্তিলানাং কৃষ্ণানাং শর্করাপাঞ্চভাগিকঃ||৯২|| ওজেন পযসা পীতঃ সদ্যো রক্তং নিযচ্ছতি| |৯৩|

স০-পঞ্চমো ভাগঃ পঞ্চভাগঃ, স যস্যাস্তি স পাঞ্চভাগিকঃ| কোঽসৌ? কৃষ্ণাতিলানাং কল্কঃ, শর্করাযাঃ পাঞ্চভাগিকঃ কৃষ্ণতিলানাং কল্কঃ ছগলীক্ষীরেণ পীতঃ সন্ সদ্যো রক্তং নিযচ্ছতি|

Adhikarana raktAtisAre candanakalkaH (93-94) · Śloka 94

| পীত্বা সশর্করাক্ষৌদ্রং চন্দনং তণ্ডুলাম্বুনা||৯৩|| দাহতৃষ্ণাপ্রমোহেভ্যো রক্তস্রাবাচ্চ মুচ্যতে| |৯৪|

স০-তণ্ডুলজলেন চন্দনং শর্করামাক্ষিকান্বিতং পীত্বা দাহাদিভ্যো মুচ্যতে| মুচ্যত ইতি কর্মকর্তরি তঙ্|

Adhikarana raktAtisAre gudadAhapAkayoH seka lepAH (94) · Śloka 94

| গুদস্য দাহে পাকে বা সেকলেপা হিতা হিমাঃ||৯৪||

স০-গুদস্য দাহে পাকে চ সতি সেকলেপা হিমা হিতাঃ|

Adhikarana raktAtisAre sashUlaraktAdau picCAbastiH (95-96) · Śloka 96

অল্পাল্পং বহুশো রক্তং সশূলমুপবেশ্যতে| যদা বিবদ্ধো বাযুশ্চ কৃচ্ছ্রাচ্চরতি বা ন বা||৯৫|| পিচ্ছাবস্তিং তদা তস্য পূর্বোক্তমুপকল্পযেত্| |৯৬|

স০-অল্পমল্পং পুনঃ পুনঃ শূলেন সহ যশ্চ বহুশো রক্তমুপবেশ্যতে| বাযুশ্চ যদ বিবদ্ধো-নানুলোমগঃ, অত এব কৃচ্ছ্রেণ চরতি ন বা চরতি তদা তস্য-পুরুষস্য, পূর্বোক্তং-"ত্বক্পিণ্ডাত্" (শ্লো.৭৯) ইত্যাদিকং পিচ্ছাবস্তিমুপকল্পযেত্|

Adhikarana raktAtisAre shiMshipAdikvAthasya picCAbastiH (96-98) · Śloka 98

| পল্লবান্ জর্জরীকৃত্য শিংশিপাকোবিদারযোঃ||৯৬|| পচেদ্যবাংশ্চ স ক্বাথো ঘৃতক্ষীরসমন্বিতঃ| পিচ্ছাস্রুতৌ গুদভ্রংশে প্রবাহণরুজাসু চ||৯৭|| পিচ্ছাবস্তিঃ প্রযোক্তব্যঃ ক্ষতক্ষীণবলাবহঃ| |৯৮|

স০-শিংশিপাকোবিদারযোঃ পল্লবান্ জর্জরীকৃত্য যবাংশ্চ পচেত্| স ক্বাথো ঘৃতক্ষীরসংযুক্তঃ পিচ্ছাস্রুত্যাদিষু পিচ্ছাবস্তিঃ প্রযোক্তব্যঃ| স চ ক্ষতক্ষীণানাং বলপ্রদঃ|

Adhikarana raktAtisAre anuvAsanArthaM ghRutam (98) · Śloka 98

| প্রপৌণ্ডরীকসিদ্ধেন সর্পিষা চানুবাসনম্||৯৮||

স০-প্রপৌণ্ডরীকপক্বেন ঘৃতেনানুবাসনং চ প্রযোক্তব্যম্|

Adhikarana raktAtisAre shatAvarIghRutalehaH (99) · Śloka 99

রক্তং বিট্সহিতং পূর্বং পশ্চাদ্বা যোঽতিসার্যতে| শতাবরীঘৃতং তস্য লেহার্থমুপকল্পযেত্||৯৯||

স০-রক্তং বিশা সহিতমথবা পূর্বং পশ্চাদ্বা যোঽতিসার্যতে তস্য লেহার্থং শতাবরীঘৃতকল্পযেত্|

Adhikarana raktAtisAre navanItasharkarAmadhuyogaH (100) · Śloka 100

শর্করার্ধাংশকং লীঢং নবনীতং নবোদ্ধৃতম্| ক্ষৌদ্রপাদং জযেচ্ছীঘ্রং তং বিকারং হিতাশিনঃ||১০০||

স০-নবনীতং নবং শর্করাযা আর্ধভাগেন যুক্তং মাক্ষিকচতুর্থপ্রমাণং মাক্ষিকস্য চতুর্থভগেনান্বিতং লীঢং তং-পূর্বোক্তং, বিকারং হিতাহারস্য জযেত্|

Adhikarana raktAtisAre nyagrodhAdighRutam (101-102) · Śloka 102

ন্যগ্রোধোদুম্বরাশ্বত্থশুঙ্গানাপোথ্য বাসযেত্| অহোরাত্রং জলে তপ্তে ঘৃতং তেনাম্ভসা পচেত্||১০১|| তদর্ধশর্করাযুক্তং লেহযেত্ক্ষৌদ্রপাদিকম্| অধো বা যদি বাঽযূর্ধ্বং যস্য রক্তং প্রবর্ততে||১০২||

স০-অধো বা ঊর্ধ্বং বা যস্য রক্তং প্রবর্ততে, স ন্যগ্রোধাদীনাং শুঙ্গান্ আপোথ্য-জর্জরীকৃত্য, তপ্তে জলেঽহোরাত্রং বাসযেত্| তেনাম্বুনা ঘৃতং পচেত্| তচ্চ-ঘৃতং, শর্করাযা অর্ধভাগেন যুক্তং মাক্ষিকচতুর্থাশকং লেহযেত্| পূর্বগুণম্|

Adhikarana shleShmAtisAre vAtoktaM pAcanam, bilvAdikvAthaH, vacAdikvAthaH, pippalImUlAdikvAthaH (103-105) · Śloka 105

শ্লেষ্মাতিসারে বাতোক্তং বিশেষাদামপাচনম্| কর্তব্যমনুবন্ধেঽস্য পিবেত্পক্ত্বাঽগ্নিদীপনম্||১০৩|| বিল্বকর্কটিকামুস্তপ্রাণদাবিশ্বভেষজম্| বচাবিডঙ্গভূতীকধানকামরদারু বা||১০৪|| অথবা পিপ্পলীমূলপিপ্পলীদ্বযচিত্রকম্| |১০৫|

স০-শ্লেষ্মতীসারে বাতাতীসারোক্তং যদামপাচনং তদ্বিশেষাত্তত্র কর্তব্যম্, ন তথা বাতাতীসারোক্তোঽন্য উপক্রমঃ কার্য ইতি বিশেষশব্দস্যার্থঃ| অস্য-অতীসারস্য, অনুবন্ধে-চিকিত্সাযাং সম্যক্ কৃতাযামপ্যশমে সতি, বিল্বকর্কটিকাদিকং পকত্বা পানমগ্নিদীপনং পিবেত্| অথবা, বচাদীনি পিবেত্| অথবা, পিপ্পলীমূলাদিকং পক্ত্বাঽগ্নিদীপনং পিবেত্|

Adhikarana shleShmAtisAre pAThAdikvAthaScUrNaM vA (105-106) · Śloka 106

| পাঠাগ্নিবত্সকগ্রন্থিতিক্তাশুণ্ঠীবচাভযাঃ||১০৫|| ক্বথিতা যদি বা পিষ্টাঃ শ্লেষ্মাতীসারভেষজম্| |১০৬|

স০-এতে পাঠাদযঃ ক্বথিতাঃ পাচনন্যাযেন, চূর্ণিতা বা শ্লেষ্মাতীসারভেষজমিতি| অত্রাপি বক্ষ্যমাণং সিংহাবলোকনন্যাযেন' কোষ্ণবারিণা ইত্যেতত্সম্বধ্যতে|

Adhikarana shleShmAtisAre sauvarcalAdi cUrNam (106-107) · Śloka 107

| সৌবর্চলবচাব্যোষহিঙ্গুপ্রতিবিষাভযাঃ||১০৬|| পিবেচ্ছ্লেষ্মাতিসারার্তশ্চূর্ণিতাঃ কোষ্ণবারিণা| |১০৭|

স০-সৌবর্চলাদীংশ্চূর্ণিতান্ কোষ্ণজলেন শ্লেষ্মতীসারার্তঃ পিবেত্|

Adhikarana shleShmAtisAre kapitthAdilehaH, kaTPalalehaH (107-108) · Śloka 108

| মধ্যং লীঢ্বা কপিত্থস্য সব্যোষক্ষৌদ্রশর্করম্||১০৭|| কট্ফলং মধুযুক্তং বা মুচ্যতে জঠরামযাত্| |১০৮|

স০-কপিত্থস্য মধ্যং সব্যোষমাক্ষিকশর্করং লীঢ্বা, অথবা কট্ফলং মাক্ষিকান্বিতং লীঢ্বা, জঠররোগান্মুচ্যতে|

Adhikarana shleShmAtisAre kaNAlehaH, takrapAnam, bAlabilvAni (108-109) · Śloka 109

| কণাং মধুযুতাং লীঢ্বা তক্রং পীত্বা সচিত্রকম্||১০৮|| ভুক্ত্বা বা বালবিল্বানি ব্যপোহত্যুদরামযম্| |১০৯|

স০-কণাং মাক্ষিকান্বিতাং লীঢ্বা তক্রং চ সচিত্রিকং পীত্বা বালবিল্বানি বা ভুক্ত্বা জঠররোগং ব্যপোহতি| "উপসর্গাদস্যত্যূহ্যোর্বা বচনম্ (র্বেতি বাচ্যম্)" ইতি বাঽতঙ্|

Adhikarana shleShmAtisAre pAThAdicUrNam (109-110) · Śloka 110

| পাঠামোচরসাম্ভোদধাতকীবিল্বনাগরম্||১০৯|| সুকৃচ্ছ্রমপ্যতীসারং গুডতক্রেণ নাশযেত্| |১১০|

স০-পাঠাদি গুডতক্রেণ পীত্বাঽতীসারং সুকৃচ্ছ্রমপি নাশযেত্| শ্লেষ্মাতীসারে প্রকৃতেঽতীসারগ্রহণমন্যস্যাপি নিরামস্য তন্নাশনমিতি দ্যোতনার্থম্|

Adhikarana shleShmAtisAre kapitthAShTakam (110-113) · Śloka 113

| যবানীপিপ্পলীমূলচাতুর্জাতকনাগরৈঃ||১১০|| মরীচাগ্নিজলাজাজীধান্যসৌবর্চলৈঃ *সমৈঃ| *বৃষাম্লধাতকীকৃষ্ণাবিল্বদাডিমদীপ্যকৈঃ||১১১|| ত্রিগুণৈঃ ষড্গুণসিতৈঃ *কপিত্থাষ্টগুণৈঃ কৃতঃ| চূর্ণোঽতীসারগ্রহণীক্ষযগুল্মগলামযান্||১১২|| কাসশ্বাসাগ্নিসাদার্শঃপীনসারোচকান্ জযেত্| |১১৩|

স০-যবান্যাদিভির্দ্রব্যৈঃ সমৈর্বৃক্ষাম্লাদিভিস্ত্রিগুণৈর্মূলদ্রব্যাপেক্ষযা| কিম্ভূতৈরেতৈঃ ? ষড্গুণা সিতা যেষাং বৃক্ষাম্লাদীনাং ত এবং তৈঃ| ষড্গুণসিতৈশ্চূর্ণঃ কৃত ইতি যোজ্যম্| এবং শর্করাভাগানাং শতমষ্টাধিকং ভবতি| ক্ব(কৈঃ) কৃতশ্চূর্ণঃ ? মূলদ্রব্যাপেক্ষযাঽষ্টাগুণৈঃ কপিত্থৈঃ কপিত্থৈঃ| কেচিত্ত্বেবং পঠন্তি-'ষড্গুণসিতে কপিত্থেঽষ্টগুণে' ইতি| তত্র চেদং ব্যাখ্যানম্-মূলদ্রব্যাপেক্ষযা কপিত্থেঽষ্টগুণে| তথা চ কিম্ভুতে ? ষড্গুণসিতা যস্মাত্তথা তস্মিন্, এবং শর্করাভাগা অষ্টচত্বারিংশত্স্যুরিতি| অযং চূর্ণোঽতীসারাদিন্ জযেত্|

Adhikarana shleShmAtisAre dADimAShTakam (113-115) · Śloka 115

| কর্ষোন্মিতা তবক্ষীরী চাতুর্জাতং দ্বিকার্ষিকম্||১১৩|| যবানীধান্যকাজাজীগ্রন্থিব্যোষং পলাংশকম্| পলানি দাডিমাদষ্টৌ সিতাযাশ্চৈকতঃ কৃতঃ||১১৪|| গুণৈঃ কপিত্থাষ্টকবচ্চূর্ণোঽযং দাডিমাষ্টকঃ| ভোজ্যো বাতাতিসারোক্তৈর্যথাবস্থং খলাদিভিঃ||১১৫||

স০-তুগাক্ষীরী চতুর্জাতং চ কর্ষোন্মিতং-কর্ষপ্রমাণম্| যবানী চ ধান্যকং চাজাজী চ যবানীচান্যকাজাজি দ্বিকার্ষিকম্| গ্রন্থিশ্চ ব্যোষং চ তত্পলাংশকং-পলভাগিকম্| পলানি দাডিমাদষ্টৌ, চশব্দাত্সিতাযা অপ্যষ্টৌ পলানি| এবমযমেকতঃ-একস্মিন্, কৃতশ্চূর্ণো দাডিমাষ্টকঃ-এতত্সংজ্ঞঃ| তেন চতুর্জাতকমেকমেবাস্য সমুদাযাদ্যথোক্ত এক এব ভাগঃ| ব্যোষমপ্যেকমেবাস্যাপি সমুদাযাদ্যথোক্ত এক এব ভাগঃ| এবং দ্রব্য সমুদাযস্যৈকত্বে কল্পনাঽপ্যত্রাপ্যাচার্যস্যাভিমতৈব| যথা (হৃ. চি. অ. ১৯/৪৩)-"ত্রিকটূত্তমাতিলরুষ্করাজ্যমাক্ষিকসিতোপলাবিহিতা| গুলিকা রসাযনং কুষ্ঠজিচ্চ বৃষ্যা চ সপ্তসমা||" ইতি| সপ্তচেতি তুগাক্ষীর্যেকা, চতুর্জাতং দ্বিতীযম্, যবানী তৃতীযা, ধান্যকং চতুর্থম্, অজাজী পঞ্চমী, পিপ্পলী-মূলং ষষ্থম্, ব্যোষং সপ্তমম্, দাডিমমষ্টমমিতি| অন্যে ত্বেবং ব্যাচক্ষতে,-পলমিতি প্রকৃতম্| দাডিমমষ্টকং-অষ্টপলপ্রমাণং, যস্মিন্ চূর্ণে স দাডিমাষ্টক ইতি| যথা চাক্ষিরোগে (হৃ.উ.অ. ১৬/৫)-"সিতমরিচভাগমেকং চতুর্মনোহ্বং" ইত্যত্র| তচ্চর্ণং বাতাতীসারোক্তৈরবস্থাবশাত্ খলপেযাদিভিঃ সহ ভোজনীযম্|

Adhikarana shleShmAtisAre khalaH (116) · Śloka 116

সবিডঙ্গঃ সমরিচঃ সকপিত্থঃ সনাগরঃ| চাঙ্গেরীতক্রকোলাম্লঃ খলঃ শ্লেষ্মাতিসারজিত্||১১৬||

স০-খলঃ শ্লেষ্মাতীসারজিত্| কিম্ভূতঃ ? বিডঙ্গাদিযুতঃ চাঙ্গেরীতক্রকোলৈরম্লঃ|

Adhikarana shleShmAtisAre kShINekaPe amlAdighRutam (117) · Śloka 117

ক্ষীণে শ্লেষ্মণি পূর্বোক্তমম্লং লাক্ষাদি ষট্পলম্| পুরাণং বা ঘৃতং দদ্যাদ্যবাগূমণ্ডমিশ্রিতম্||১১৭||

স০-ক্ষীণে শ্লেষ্মণি পূর্বোক্তমম্লং ঘৃতং-"গুদরুগ্ভ্রংশযোর্যুঞ্জযাত্ সক্ষীরং সাধিতং হবিঃ|" (শ্লো.৪৮) ইত্যাদি, তথা লাক্ষাদি-"লাক্ষানাগরবৈদেহী" (শ্লো. ৯০) ইত্যাদি, ষট্পলং-যক্ষ্মোক্তম্ (হৃ. চি. অ. ৫/২২), পুরাণং বা ঘৃতং যবাগূমণ্ডমিশ্রিতং, দদ্যাত্|

Adhikarana kaPavAtAdhike picCAbastiH (118-119) · Śloka 119

বাতশ্লেষ্মবিবন্ধে বা স্রবত্যতি কফেঽপি বা| শূলে প্রবাহিকাযাং বা পিচ্ছাবস্তিঃ প্রশস্যতে||১১৮|| বচাবিল্বকণাকুষ্ঠশতাহ্বলবণান্বিতঃ| |১১৯|

স০-বাতকফবিবন্ধে, বাঽতিশযেন কফে স্রবতি, তথা শূলে সতি, প্রবাহিকাযাং বা সত্যাং, পিচ্ছাবস্তিঃ-পূর্বোক্ত এব "পল্লবান্ জর্জরীকৃত্য" (শ্লো. ৯৬) ইত্যাদিকো, বচাদিভির্যুক্তঃ প্রশস্যতে|

Adhikarana kaPavAtAdhike anuvAsanam (119-120) · Śloka 120

| বিল্বতৈলেন তৈলেন বচাদ্যৈঃ সাধিতেন বা||১১৯|| বহুশঃ কফবাতার্তে কোষ্ণেনান্বাসনং হিতম্| |১২০|

স০-বিল্বমজ্জভ্য উত্পন্নং তৈলং বিল্বতৈলম্| তেন বচাদ্যৈঃ পক্বেন, অথবা তৈলেন-তিলতৈলেন বচাদ্যৈঃ সাধিতেন, উভযেনাপ্যুষ্ণেন বহুশোঽনুবাসনং কফবাতার্তে হিতম্|

Adhikarana kShINakaPAdau vAyoH prabalatvam, prabalo vAyuH SIghraM cikitsyaH, tridoShANAM cikitsAkramaH (120-122) · Śloka 122

| ক্ষীণে কফে গুদে দীর্ঘকালাতীসারদুর্বলে||১২০|| অনিলঃ প্রবলোঽবশ্যং স্বস্থানস্থঃ প্রজাযতে| স বলী সহসা হন্যাত্তস্মাত্তং ত্বরযা জযেত্||১২১|| বাযোরনন্তরং পিত্তং পিত্তস্যানন্তরং কফম্| জযেত্পূর্বং ত্রযাণাং বা ভবেদ্যো বলবত্তমঃ||১২২||

স০-কফে ক্ষীণে গুদে চ দীর্ঘকালো যোঽতীসারস্তেন দুর্বলে-বলহীনে সতি, অনিলঃ স্বস্থানস্থিতঃ-পাযুস্থিতঃ, অবশ্যং প্রবলো জাযতে| সঃ-বাযুঃ, বলবান্ সহসা-জটিত্যেব, ব্যাপাদযেত্| তস্মাত্তং-বাযুং, শীঘ্রং জযেত্| তং বাযুং জিত্বাঽনন্তরং পিত্তং জযেত্| পিত্তস্যানন্তরং কফং জযেত্| অথবা, ত্রযাণাং মধ্যে যো বলবত্তমো দোষস্তমেব পূর্বং জযেত্|

Adhikarana BayashokAtIsArayoScikitsA (123) · Śloka 123

ভীশোকাভ্যামপি চলঃ শীঘ্ড়ং কুপ্যত্যতস্তযোঃ| কার্যা ক্রিযা বাতহরা হর্ষণাশ্বাসনানি চ||১২৩||

স০-ভযশোকাভ্যামপ্যনিলো যস্মাত্ কুপ্যতি, অতস্তযোঃ-ভযশোকাতীসারযোঃ, বাতহর ক্রিযা কার্যা| ন কেবলং বাতহরা, হর্ষণাশ্বাসনানি চ কার্যাণি, ভযশোকনিবৃত্তযে|

Adhikarana atIsAramuktalakShaNam (9) · Śloka 9

যস্যোচ্চারাদ্বিনা মূত্রং পবনো বা প্রবর্ততে| দীপ্তাগ্নের্লঘুকোষ্ঠস্য শান্তস্তস্যোদরামযঃ||১২৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা যামষ্টাঙ্গহৃদযসংহিতাযাং চতুর্থে চিকিত্সিত- স্থানেঽতীসারচিকিত্সিতং নাম্ নবমোঽধ্যাযঃ||৯||

স০-যস্য-অতীসারিণঃ পুরুষস্য, উচ্চারাত্-মলপ্রবৃত্তেঃ, বিনা মূত্রমথবা বাতঃ প্রবর্ততে দীপ্তাগ্নের্লৌকোষ্ঠস্য সতঃ, তস্য জঠররোগঃ শান্ত ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং চতুর্থে চিকিত্সিত স্থানেঽতীসারচিকিত্সিতং নাম নবমো ঽধ্যাযঃ সমাপ্তঃ|| ৯||