14. gulmacikitsitādhyāyaḥ

Adhikarana adhyAyopakramaH · Śloka

অস্মাদনন্তরং গুল্মচিকিত্সিতমারভ্যতে| সম্বন্ধশ্চাস্য প্রাযেণৈকযোগক্ষেমত্বম্, বাতকারণত্বাত্|

Adhikarana gulmacikitsAdhyAyaH vAtagulme baddhashakRudvAtAdau snigdhaM kRutvA svedaH vAtagulme svedasya Palam (2-3) · Śloka 3

অথাতো গুল্মচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| ) গুল্মং বদ্ধশকৃদ্বাতং বাতিকং তীব্রবেদনম্| রূক্ষশীতোদ্ভবং তৈলৈঃ সাধযেদ্বাতরোগিকৈঃ||১|| পানান্নান্বাসনাভ্যঙ্গৈঃ স্নিগ্ধস্য স্বেদমাচরেত্| আনাহবেদনাস্তম্ভবিবন্ধেষু বিশেষতঃ||২|| স্রোতসাং মার্দবং কৃত্বা জিত্বা মারুতমুল্বণম্| ভিত্বা বিবন্ধং স্নিগ্ধস্য স্বেদো গুল্মমপোহতি||৩||

স০-[বাতিকং গুল্মং তীব্ররুজং পুরীষবাতগ্রহং রূক্ষশীতোদ্ভূতং বাতচিকিত্সিতোক্তৈস্তৈলৈঃ সাধযেত্| পানান্নান্বাসনাভ্যঙ্গৈঃ স্নিগ্ধস্য গুল্মিনঃ স্বেদমাচরেত্|] পানশব্দেন স্নেহপানং বেদ্যম্, স্নিগ্ধস্যেতি বচনাত্| আনাহাদিষু বিশেষেণ স্বেদমাচরেত্| যস্মাত্স্বেদঃ স্নিগ্ধস্য পুংসঃ স্রোতোমৃদুত্বং বিধায মারুতমুল্বণং চ জিত্বা তথা বিবন্ধং ভিত্ত্বা গুল্মমপোহতি|

Adhikarana gulme snehapAnaM hitamUrdhvanABije gulme visheSheNa snehapAnam pakvAshayagate bastiH jaTharAshraye snehA bastiSca (4) · Śloka 4

স্নেহপানং হিতং গুল্মে বিশেষেণোর্ধ্বনাভিজে| পক্বাশযগতে বস্তিরুভযং জঠরাশ্রযে||৪||

স০-গুল্মে স্নেহপানং হিতম্| ঊর্ধ্বনাভিজে গুল্মে বিশেষেণ স্নেহপানং হিতম্| পক্বাশযগতে বস্তির্হিতঃ| জঠরাশ্রিত উভযং-স্নেহপানবস্ত্যাখ্যং, হিতম্|

Adhikarana vAtagulme dIptAgnyAdau bRuMhaNAnyannapAnAni snehAnirUhA anuvAsanASca (5-6) · Śloka 6

দীপ্তেঽগ্নৌ বাতিকে গুল্মে বিবন্ধেঽনিলবর্চসোঃ| বৃংহণান্যন্নপানানি স্নিগ্ধোষ্ণানি প্রদাপযেত্||৫|| পুনঃপুনঃ স্নেহপানং নিরূহাঃ সানুবাসনাঃ| প্রযোজ্যা বাতজে গুল্মে কফপিত্তানুরক্ষিণঃ||৬||

স০-বাতিকে গুল্মে বহ্নৌ সমিদ্ধে সতি বাতশকৃতোশ্চ বিবন্ধে সতি বৃংহণান্যন্নাদীনি স্নিগ্ধোষ্ণানি চ প্রযোজযেত্| তথা, পুনঃপুনঃ স্নেহপানং প্রদাপযেত্| নিরূহাশ্চ সহানুবাসনা বাতিকে গুল্মে কফপিত্তানুরক্ষিণো নরস্য প্রযোজ্যাঃ|

Adhikarana bastikarma paraM gulmaghnam tasya hetuH ato vAtapittakaPagulmeShu sAnuvAsanA nirUhAH (7-8) · Śloka 8

বস্তিকর্ম পরং বিদ্যাদ্গুল্মঘ্নং, তদ্ধি মারুতম্| স্বস্থানে প্রথমং জিত্বা সদ্যো গুল্মমপোহতি||৭|| তস্মাদভীক্ষ্ণশো গুল্মা নিরূহৈঃ সানুবাসনৈঃ| প্রযুজ্যমানৈঃ শাম্যন্তি বাতপিত্তকফাত্মকাঃ||৮||

স০-বস্তিকর্ম পরং-অতিশযেন, গুল্মঘ্নং বিদ্যাত্| যস্মাতত্-বস্তিকর্ম, স্বস্থানে-পক্বাশযাখ্যে, প্রথমং পবনং জিত্বা সদ্যঃ-শীঘ্রং, গুল্মং জযতি| যত এবং তস্মাত্কারণান্নিত্যং গুল্মা নিরূহৈঃ সানুবাসনৈঃ প্রযুজ্যমানৈঃ শাম্যন্তি বাতপিত্তকফোত্থাঃ|

Adhikarana vAtagulme shUlAnAhaharaM hi~ggvAdisarpiH (9-10) · Śloka 10

হিঙ্গুসৌবর্চলব্যোষবিডদিমদীপ্যকৈঃ| পুষ্করাজাজিধান্যাম্লবেতসক্ষারচিত্রকৈঃ||৯|| শঠীবচাগন্ধৈলাসুরসৈর্দধিসংযুতৈঃ| শূলানাহহরং সর্পিঃ সাধযেদ্বাতগুল্মিনাম্||১০||

স০-হিঙ্গ্বাদিভির্দধিযুক্তৈর্ঘৃতং সাধযেত্| তচ্চ পীতং বাতগুল্মবতাং শূলাদিজিত্| দ্রব্যেভ্যশ্চতুর্গণং ঘৃতম্, ঘৃতসমং দধি, ঘৃতাচ্চতুর্গুণং জলম্, ইত্যত্র পাকক্রমঃ|

Adhikarana vAtagulme udarAnAhAdau ca hapuShAdisarpiH (11-13) · Śloka 13

হপুষোষণপৃথ্বীকাপঞ্চকোলকদীপ্যকৈঃ| সাজাজীসৈন্ধবৈর্দধ্না দুগ্ধেন চ রসেন চ||১১|| দাডিমান্মূলকাত্কোলাত্পচেত্সর্পির্নিহন্তি তত্| বাতগুল্মোদরানাহপার্শ্বহৃত্কোষ্ঠবেদনাঃ||১২|| যোন্যর্শোগ্রহণীদোষকাসশ্বাসারুচিজ্বরান্| |১৩|

স০-হপুষাদিভির্ঘৃতাচ্চতুর্থাশৈর্দ্রব্যৈঃর্দধিদুগ্ধাভ্যাং দাডিমমূলকবদররসৈঃ সমৈঃ সর্পিঃ পচেত্| তচ্চ বাতগুল্মাদীন্ পরাকুর্যাত্|

Adhikarana vAtagulme dAdhikaM ghRutam (13-21) · Śloka 21

| দশমূলং বলাং কালাং সুষবীং দ্বৌ পুনর্নবৌ||১৩|| পৌষ্করৈরণ্ডরাস্নাশ্বগন্ধাভার্গ্যমৃতাশঠীঃ| পচেদ্গন্ধপলাশং চ দ্রোণেঽপাং দ্বিপলোন্মিতম্||১৪|| যবৈঃ কোলৈঃ কুলত্থৈশ্চ মাষৈশ্চ প্রাস্থিকৈঃ সহ| ক্বাথেঽস্মিন্দধিপাত্রে চ ঘৃতপ্রস্থং বিপাচযেত্||১৫|| স্বরসৈর্দাডিমাম্রাতমাতুলুঙ্গোদ্ভবৈর্যুতম্| তথা তুষাম্বুধান্যাম্লশুক্তৈঃ শ্লক্ষ্ণৈশ্চ কল্কিতৈঃ||১৬|| ভার্গীতুম্বুরুষড্গ্রন্থাগ্রন্থিরাস্নাগ্নিধান্যকৈঃ| যবানকযবান্যম্লবেতসাসিতজীরকৈঃ||১৭|| অজাজীহিঙ্গুহপুষাকারবীবৃষকোষকৈঃ| নিকুম্ভকুম্ভমূর্বেভপিপ্পলীবেল্লদাডিমৈঃ||১৮|| শ্বদংষ্ট্রাত্রপুসৈর্বারুবীজহিংস্রাশ্মভেদকৈঃ| মিসিদ্বিক্ষারসুরসসারিবানীলিনীফলৈঃ||১৯|| ত্রিকটুত্রিপটূপেতৈর্দাধিকং তহ্যপোহতি| রোগানাশুতরান্ পূর্বান্ কষ্টানপি চ শীলিতম্||২০|| অপস্মারগদোন্মাদমূত্রাঘাতানিলামযান্| |২১|

স০-দশমূলাদীন্ পৃথগ্ দ্বিপলপ্রমাণান্ যবাদিভিঃ প্রস্থপ্রমাণৈঃ সহ জলদ্রোণে পচেত্| কালা-নীলিনী| সুষবী-স্থূলজীরকঃ| গন্ধপলাশো-গন্ধপত্রম্| অস্মিন্ ক্বাথে সামান্যপরিভাষযা কৃতে দধিপাত্রে চ ঘৃতপ্রস্থং বিপাচযেত্| কিম্ভূতম্ ? দাডিমাদিজৈ স্বরসৈস্তথা তুষাম্ব্বাদিভিশ্চ সর্পিঃসমৈর্যুতম্| তথা ভার্গ্যাদিভিঃ কল্কীকৃতৈরুপেতম্| যবানকো-যবানীভেদঃ| কারবী-অজমোদা| বৃষকো-বাসকঃ| ঊষকঃ-কল্লরঃ| ইভপিপ্পলী-গজপিপ্পলী| অশ্মভেদঃ-পাষাণভেদঃ| তত্-এতত্, দাধিকং নাম ঘৃতং পূর্বোক্তানামযান্ দ্রাক্তারং হন্তি| অপস্মারাদীংশ্চ কৃচ্ছ্রানপ্যভ্যস্তং হন্তি| যদি চাত্র স্বরসালাভস্তদা তন্ত্রান্তরোক্তা কল্পনা কার্যা| তন্ত্রান্তরে চোক্তম্-"প্রস্থং গৃহীত্বা চূর্ণস্য তোযস্য প্রস্থমাবপেত্| অহোরাত্রস্থিতং পূতং তত্স্যাত্স্বরসবদ্গুণৈঃ||" মুনিরপ্যূচে (চ. চি. অ. ১ পাদঃ ২|১২)- "স্বরসানামলাভে ত্বযং বিধিঃ,-চূর্ণানামাঢকমাঢকমুদকস্যাহোরাত্রস্থিতং মৃদিতপূতমাবপেত্ তত্স্বরসবত্ প্রযোজ্যম্|" ইতি|

Adhikarana vAtagulme tryUShaNAdi ghRutam (21-22) · Śloka 22

| ত্র্যূষণত্রিফলাধান্যচবিকাবেল্লচিত্রকৈঃ||২১|| কল্কীকৃতৈর্ঘৃতং পক্বং সক্ষীরং বাতগুল্মনুত্| |২২|

স০-ত্র্যূষণাদিভিঃ কল্কীকৃতৈর্ঘৃতং সমানক্ষীরং চতুর্গুণজলপক্বং বাতগুল্মং নুদতি|

Adhikarana vAtagulme lashunAdighRutam (22-25) · Śloka 25

| তুলাং লশুনকন্দানাং পৃথক্পঞ্চপলাংশকম্||২২|| পঞ্চমূলং মহচ্চাম্বুভারার্ধে তদ্বিপাচযেত্| পাদশেষং তদর্ধেন দাডিমস্বরসং সুরাম্||২৩|| ধান্যাম্লং দধি চাদায পিষ্টাংশ্চার্ধপলাংশকান্| ত্র্যূষণত্রিফলাহিঙ্গুযবানীচব্যদীপ্যকান্||২৪|| সাম্লবেতসসিন্ধূত্থদেবদারূন্ পচেদ্ধৃতাত্| তৈঃ প্রস্থং তত্পরং সর্ববাতগুল্মবিকারজিত্||২৫||

স০-লশুনমূলতুলাং পলশতং মহত্ পঞ্চমূলং চ প্রত্যেকং পঞ্চপলদঘ্নম্| তদেতত্তোযাদৃশশতে পাদশেষং বিপাচযেত্| পাদশেষাদর্ধেন দাডিমস্বরসং সুরাং ধান্যাম্লং দধি চ গৃহীত্বা ত্র্যূষণাদীংশ্চ দ্বিকার্ষিকানাদায তৈর্ঘৃতাত্ প্রস্থং পচেত্| তত্-ঘৃতং, সর্ববাতগুল্মবিকারজিত্|

Adhikarana vAtagulme ShaTpalaM ghRutamapi (26-27) · Śloka 27

ষট্পলং বা পিবেত্ সর্পির্যদুক্তং রাজযক্ষ্মণি| প্রসন্নযা বা ক্ষীরার্থঃ সুরযা দাডিমেন বা||২৬|| ঘৃতে মারুতগুল্মঘ্নঃ কার্যো দধ্নঃ সরেণ বা| |২৭|

স০-রাজযক্ষ্মচিকিত্সিতে (শ্লো. ২২) যদুক্তং ষট্পলং ঘৃতং তদ্বা পিবেত্| রাজযক্ষ্মণীতি বিশেষণং স্পষ্টার্থম্| ঘৃতে ষট্পলাখ্যে ক্ষীরার্থঃ প্রসন্নযা বা কার্যঃ| অথবা সুরযা দাডিমেন বা| দধিসারেণ বা| এবং ক্ষীরং হিত্বা প্রসন্নাদ্যন্যতমেন সাধিতং ঘৃতং ষট্পলং বাতগুল্মজিত্স্যাত্|

Adhikarana vAtagulme vRuddhaM kaPamullikhet (27-28) · Śloka 28

| বাতগুল্মে কফো বৃদ্ধো হত্বাঽগ্নিমরুচিং যদি||২৭|| হৃল্লাসং গৌরবং তন্দ্রাং জনযেদুল্লিখেত্তু তম্| |২৮|

স০-বাতজে গুল্মে শ্লেষ্মা বৃদ্ধঃ সন্নগ্নিং হত্বা যদ্যরুচ্যাদীন্ জনযেত্তদা তং-কফং, উল্লিখেত্-উদ্বমেত্|

Adhikarana vAtagulme shUlAdiShu kvAthacUrNa vaTakAH (28-29) · Śloka 29

| শূলানাহবিবন্ধেষু জ্ঞাত্বা সস্নেহমাশযম্||২৮|| নির্যূহচূর্ণবটকাঃ প্রযোজ্যা ঘৃতভেষজৈঃ| |২৯|

স০-শূলাদিষু সত্সু সস্নেহমাশযং জ্ঞাত্বা ঘৃতোক্তৈরৌষধৈঃ (ঘৃতভেষজৈঃ)- অনন্তরোক্তানাং ঘৃতানামৌষধৈঃ, ক্বাথচূর্ণগুটিকা বা সহ প্রযোজ্যাঃ|

Adhikarana vAtagulme shUlA cUrNAnAmanupAnam (29-30) · Śloka 30

| কোলদাডিমঘর্মাম্বুতক্রমদ্যাম্লকাঞ্জিকৈঃ||২৯|| মণ্ডেন বা পিবেত্প্রাতশ্চূর্ণান্যন্নস্য বা পুরঃ| |৩০|

স০-কোলাদ্যম্বুভিস্তক্রাদিভির্বা প্রাতশ্চূর্ণানি-ঘৃতৌষধীনাং সম্বন্ধীনি, মণ্ডেন সহ পিবেত্| অথবা অন্নস্য-আহারস্য, পুরঃ-পূর্বং, পিবেত্|

Adhikarana vAtagulme kaPayukte vaTakAH (30-31) · Śloka 31

| চূর্ণানি মাতুলুঙ্গস্য ভাবিতান্যসকৃদ্রসে||৩০|| কুর্বীত কার্মুকতরান্ বটকান্ কফবাতযঃ| |৩১|

স০-চূর্ণানি মাতুলুঙ্গরসেন মুহুর্মুহুর্ভাবিতানি বটকান্ কর্মকরণসমর্থান্ কুর্বীত| কফবাতযোঃ-কফবাতিকে গুল্ম ইত্যর্থঃ|

Adhikarana vAtagulme hiDgvAdi cUrNaM hRucCUlakRucCragulmAdiharam (31-33) · Śloka 33

হিঙ্গুবচাবিজযাপশুগন্ধা- দাডিমদীপ্যকধান্যকপাঠাঃ| পুষ্করমূলশঠীহপুষাগ্নি- ক্ষারযুগত্রিপটুত্রিকটূনি||৩১|| সাজাজিচব্যং সহতিত্তিডীকং সবেতসাম্লং বিনিহন্তি চূর্ণম্| হৃত্পার্শ্ববস্তিত্রিকযোনিপাযু- শূলানি বায্বামকফোদ্ভবানি||৩২|| কৃচ্ছ্রান্ গুল্মান্ বাতবিণ্মূত্রসঙ্গং কণ্ঠে বন্ধং হৃদ্গ্রহং পাণ্ডুরোগম্| অন্নাশ্রদ্ধাপ্লীহদুর্নামহিধ্মা- বর্ধ্মাধ্মানশ্বাসকাসাগ্নিসাদান্||৩৩||

স০-হিঙ্গ্বাদিকমেতচ্চূর্ণং হৃচ্ছূলাদীন্নিহন্তি তথা কৃচ্ছ্রগুল্মাদীংশ্চ| দোধকোপজাতিশালিন্যঃ|

Adhikarana vAtagulme vaishvAnaraScUrNaH (34) · Śloka 34

লবণযবানীদীপ্যক- কণনাগরমুত্তরোত্তরং বৃদ্ধম্| সর্বসমাংশহরীতকী- চূর্ণং বৈশ্বানরঃ সাক্ষাত্||৩৪||

স০-লবণাদিকং ক্রমেণোত্তরং ভাগবৃদ্ধং সর্বসমভাগা হরিতকীতি চূর্ণমেতত্সাক্ষাদ্বৈশ্বানরঃ, দীপনগুণসামান্যাত্| আর্যাবৃতম্|

Adhikarana vAtagulme trikaTukAdi cUrNam (35) · Śloka 35

ত্রিকটুকমজমোদা সৈন্ধবং জীরকে দ্বে সমধরণধৃতানামষ্টমো হিঙ্গুভাগঃ| প্রথমকবলভোজ্যঃ সর্পিষা সংপ্রযুক্তো জনযতি জঠরাগ্নিং বাতগুল্মং নিহন্তি||৩৫||

স০-ত্রিকটুকাদীনাং সপ্তানাং সমধরণধৃতানাং-সমপ্রমাণস্থাপিতানাং, হিঙ্গুভাগোঽষ্টমো 'দেযঃ' ইত্যধ্যাহার্যম্| কেচিত্ত্বেবং ব্যাখ্যানযন্তি| ধরণশব্দেন পলস্য দশমো ভাগ উচ্যতে| ধরণে ধৃতা ধরণধৃতাঃ, সমাশ্চ তে ধরণধৃতাশ্চ, তেষাং সমধরণধৃতানাং ত্রিকটুকাদীনামষ্টমো হিঙ্গুভাগো দেযঃ| স চ প্রথমকবলে ভোজ্যো-ভক্ষণীযঃ| সর্পিষা সম্যক্ প্রযুক্তো-মিশ্রিতো, জঠরাগ্নিং জনযতি, বাতগুল্মং চ হন্তি| মালিনীবৃত্তম্|

Adhikarana vAtagulme shArdUlaScUrNaH (36) · Śloka 36

হিঙ্গূগ্রাবিডশুণ্ঠ্যজাজিবিজযাবাট্যাভিধানামযৈ- শ্চূর্ণঃ কুম্ভনিকুম্ভমূলসহিতৈর্ভাগোত্তরং বর্ধিতৈঃ| পীতঃ কোষ্ণজলেন কোষ্ঠজরুজো গুল্মোদরাদীনযং শার্দূলঃ প্রসভং প্রমথ্য হরতি ব্যাধীন্ মৃগৌঘানিব||৩৬||

স০-হিঙ্গূগ্রেত্যাদিভির্ভাগোত্তরমংশাধিকং বর্ধিতৈশ্চূর্ণঃ কোষ্ণজলেন পীতো জঠররুজাদীন্ পরাকরোতি| অযং শার্দূলাখ্যশ্চূর্ণো হঠাত্ প্রমথ্য ব্যাধীন্ মৃগৌঘানিব শার্দূলঃ-সিংহঃ| অপ্যত এব শ্লেষোপমাঽযমলঙ্কারঃ| তথা ভীমশব্দেন শার্দূলবিক্রীডিতং বৃত্তমুপলক্ষ্যতে| যথা শার্দূলশব্দেন ভীমসেন ইতি| শার্দূলবিক্রীডিতং বৃত্তম্|

Adhikarana vAtagulme sindhUtthAdicUrNam (37) · Śloka 37

সিন্ধূত্থপথ্যাকণদীপ্যকানাং চূর্ণানি তোযৈঃ পিবতাং কবোষ্ণৈঃ| প্রযাতি নাশং কফবাতজন্মা নারাচনির্ভিন্ন ইবামযৌঘঃ||৩৭||

স০-সিন্ধূত্থাদীনাং চূর্ণানি কোষ্ণৈস্তোযৈঃ পিবতাং কফবাতজো রোগসঙ্ঘো নাশং যাতি| ক ইব ? নারাচেন নির্ভিন্ন ইবেত্যুপমা| উপজাতিবৃত্তম্|

Adhikarana vAtagulme pUtIkAdiBasma (38) · Śloka 38

পূতিকপত্রগজচির্ভটচব্যবহ্নি- ব্যোষং চ সংস্তরচিতং লবণোপধানম্| দগ্ধ্বা বিচূর্ণ্য দধিমস্তুযুতং প্রযোজ্যং গুল্মোদরশ্বযথুপাণ্ডুগুদোদ্ভবেষু||৩৮||

স০-পূতিকাদিদ্রব্যং সংস্তরচিতং যথাক্রমনির্দিষ্টমুপর্যুপরিভাবেন সংস্তীর্ণং তথা লবণোপধনং লবণং সর্বোপর্যুপধানং দত্ত্বাঽনন্তরং দগ্ধ্বা সঞ্চূর্ণ্য ততো দধিমস্তুনা যুতং গুল্মাদিষু প্রযোজ্যম্| বসন্ততিলকাবৃত্তম্|

Adhikarana vAtagulme hi~ggvAdi (39-40) · Śloka 40

| হিঙ্গুত্রিগুণং সৈন্ধবমস্মাত্ত্রিগুণং চ তৈলমৈরণ্ডম্||৩৯|| তত্ত্রিগুণরসোনরসং গুল্মোদরবর্ধ্মশূলঘ্নম্| |৪০|

স০-সৈন্ধবং হিঙ্গুতস্ত্রিগুণম্| অস্মাচ্চ-সৈন্ধবাত্, ঐরণ্ডতৈলং ত্রিগুণম্| তস্মাচ্চ-ঐরণ্ডতৈলাত্, ত্রিগুণং রসোনস্য রসম্| তদেতদ্গুল্মাদিঘ্নম্| আর্যাবৃত্তম্|

Adhikarana vAtagulme mAtulu~ggarasAdi (40-41) · Śloka 41

| মাতুলুঙ্গরসো হিঙ্গু দাডিমং বিডসৈন্ধবম্||৪০|| সুরামণ্ডেন পাতব্যং বাতগুল্মরুজাপহম্| |৪১|

মাতুলুঙ্গরসাদিকং সুরামণ্ডেন পাতব্যং বাতগুল্মপীডাহরম্|

Adhikarana vAtagulme shuNThyAdicUrNam (41-42) · Śloka 42

| শুণ্ঠ্যাঃ কর্ষং গুডস্য দ্বৌ ধৌতাত্কৃষ্ণতিলাত্পলম্||৪১|| খাদন্নেকত্র সঞ্চূর্ণ্য কোষ্ণক্ষীরানুপো জযেত্| বাতহৃদ্রোগগুল্মার্শোযোনিশূলশকৃদ্গ্রহান্||৪২||

শুণ্ঠ্যাঃ কর্ষো গুডস্য দ্বৌ কর্ষৌ লুঞ্চিতকৃষ্ণতিলাত্পলমিত্যেকত্র মিশ্রযিত্বা খাদন্ কোষ্ণক্ষীরানুপঃ সন্ বাতহৃদ্রোগাদীন্ জযেত্|

Adhikarana vAtagulme sakaPe eraNDatailaM prasannayA,vAtagulme sapite eraNDatailaM payasA (43) · Śloka 43

পিবেদেরণ্ডতৈলং তু বাতগুল্মী প্রসন্নযা| শ্লেষ্মণ্যনুবলে বাযৌ, পিত্তে তু পযসা সহ||৪৩||

স০-বাতকফানুগে সত্যেরণ্ডতৈলং প্রসন্নযা সহসা গুল্মবান্ পিবেত্| পিত্তে ত্বনুগতে পযসা সহৈরণ্ডতৈলং পিবেত্|

Adhikarana vAtagulme sasantApe sasneho virekaH vAtagulme sasantApe raktamokShaH (44-45) · Śloka 45

বিবৃদ্ধং যদি বা পিত্তং সন্তাপং বাতগুল্মিনঃ| কুর্যাদ্বিরেচনীযোঽসৌ সস্নেহৈরানুলোমিকৈঃ||৪৪|| তাপানুবৃত্তাবেবং চ রক্তং তস্যাবসেচযেত্| |৪৫|

স০-বাতগুল্মিনঃ পিত্তং বিবৃদ্ধং যদি সন্তাপং কুর্যাত্, তদাঽসৌ-বাতগুল্মী, বিরেচনীযো-বিরেচনার্হঃ| কৈঃ ? আনুলোমিকৈর্দ্রব্যৈঃ স্নেহযুতৈঃ| এবং [চ]-বিরক্তস্যাপি, তাপানুবর্তনে সতি তস্য রক্তস্রাবং কুর্যাত্|

Adhikarana vAtagulme lashunakShIraM udAvartAdiharam (45-47) · Śloka 47

| সাধযেচ্ছুদ্ধশুষ্কস্য লশুনস্য চতুষ্পলম্||৪৫|| ক্ষীরোদকেঽষ্টগুণিতে ক্ষীরশেষং চ পাচযেত্| বাতগুল্মমুদাবর্তং গৃধ্রসীং বিষমজ্বরম্||৪৬|| হৃদ্রোগং বিদ্রধিং শোষং সাধযত্যাশু তত্পযঃ| |৪৭|

স০-ক্ষীরং চোদকং চ ক্ষীরোদকম্| তস্মিন্ লশুনাদষ্টগুণে শুদ্ধশুষ্কস্য লশুনস্য চতুষ্পলং সাধযেত্| ততঃ ক্ষীরশেষং বিপাচযেত্| তচ্চ ক্ষীরশেষং বাতগুল্মাদীন্য(ন)ভিভবতি|

Adhikarana vAtagulme tailAdimishraNam (47-48) · Śloka 48

| তৈলং প্রসন্না গোমূত্রমারনালং যবাগ্রজঃ||৪৭|| গুল্মং জঠরমানাহং পীতমেকত্র সাধযেত্| |৪৮|

স০-তৈলাদিকমেকত্র-মিলিতং, পীতং গুল্মাদীন্ হন্তি|

Adhikarana vAtagulme citrakAdikvAthaH (48-49) · Śloka 49

| চিত্রকগ্রন্থিকৈরণ্ডশুণ্ঠীক্বাথঃ পরং হিতঃ||৪৮|| শূলানাহবিবন্ধেশু সহিঙ্গুবিডসৈন্ধবঃ| |৪৯|

স০-চিত্রকাদিক্বাথো হিঙ্গ্বাদিযুতঃ পরং শূলাদিষু হিতঃ|

Adhikarana vAtagulme puShkarAdikvAthaH (49-50) · Śloka 50

| পুষ্করৈরণ্ডযোর্মূলং যবধন্বযবাসকম্||৪৯|| জলেন ক্বথিতং পীতং কোষ্ঠদাহরুজাপহম্| |৫০|

স০-পুষ্করৈরণ্ডমূলাদিকং জলেন ক্বথিতং পীতং কোষ্ঠদাহাদিজিত্|

Adhikarana vAtagulme vATyAdikvAthaH (50-51) · Śloka 51

| বাট্যাহ্বৈরণ্ডদর্ভাণাং মূলং দারু মহৌষধম্||৫০|| পীতং নিঃক্বাথ্য তোযেন কোষ্ঠপৃষ্ঠাংসশূলজিত্| |৫১|

স০-বাট্যাহ্বাদীনাং মূলং দেবদার্বাদি চ তোযক্বথিতং পীতং কোষ্ঠাদিশূলজিত্|

Adhikarana vAtagulme shilAjatu payasA (51-52) · Śloka 52

| শিলাজং পযসাঽনল্পপঞ্চমূলশ্রৃতেন বা||৫১|| বাতগুল্মী পিবেত্| |৫২|

স০-শিলাজতু বা মহত্পঞ্চমূলক্বথিতেন ক্ষীরেণ সহ বাতগুল্মী পিবেত্|

Adhikarana vAtagulme udAvarte vATyaBojanam (52) · Śloka 52

বাট্যমুদাবর্তে তু ভোজযেত্| স্নিগ্ধং পৈপ্পলিকৈর্যূষৈর্মূলকানাং রসেন বা||৫২||

স০-উদাবর্তে সতি বাট্যং স্নিগ্ধং-সস্নেহং, পিপ্পলীসংস্কৃতৈর্যূষৈঃ সহ ভোজযেত্| অথবা, মূলকরসেনাশ্নীযাত্|

Adhikarana vAtagulme baddhaviNmArUte yavAnnaM kulmAshA vA (53) · Śloka 53

বদ্ধবিণ্মারুতোঽশ্র্নীযাত্ক্ষীরেণোষ্ণেন যাবকম্| কুল্মাষান্ বা বহুস্নেহান্ ভক্ষযেল্লবণোত্তরান্||৫৩||

স০-বদ্ধবিণ্মারুত উষ্ণেন ক্ষীরেণ যাবকমশ্র্নীযাত্| অথবা, কুল্মাষান্ বহুস্নেহান্ লবণপ্রধানান্ ভক্ষযেত্|

Adhikarana vAtagulme samale nIlinyAdi ghRutam (54) · Śloka 54

নীলিনীত্রিবৃতাদন্তীপথ্যাকম্পিল্লকৈঃ সহ| সমলায ঘৃতং দেযং সবিডক্ষারনাগরম্||৫৪||

স০-নীলিন্যাদিভিঃ সহ সদোষায নরায বিডাদিযুতং ঘৃতং দেযম্|

Adhikarana vAtagulme kukkuTAdimAMsam (55-58) · Śloka 58

নীলিনীং ত্রিফলাং রাস্নাং বলাং কটুকরোহিণীম্| পচেদ্বিডঙ্গং ব্যাঘ্রীং চ পালিকানি জলাঢকে||৫৫|| রসেঽষ্টভাগশেষে তু ঘৃতপ্রস্থং বিপাচযেত্| দধ্নঃ প্রস্থেন সংযোজ্য সুধাক্ষীরপলেন চ||৫৬|| ততো ঘৃতপলং দদ্যাদ্যবাগূমণ্ডমিশ্রিতম্| জীর্ণে সম্যগ্বিরিক্তং চ ভোজযেদ্রসভোজনম্||৫৭|| গুল্মকুষ্ঠোদরব্যঙ্গশোফপাণ্ড্বামযজ্বরান্| শ্বিত্রং প্লীহানমুন্মাদং হন্ত্যেতন্নীলিনীঘৃতম্||৫৮||

স০-নীলিন্যাদীন্ পলিকান্ জলাঢকে পচেত্| অষ্টভাগশেষে চ রসে দধিপ্রস্থেন সুধাক্ষীরপলেন চ মিশ্রযিত্বা ঘৃতপ্রস্থং বিপাচযেত্| ততো ঘৃতপলং যবাগূমণ্ডমিশ্রিতং দদ্যাত্| জীর্ণে চ ঘৃতে সম্যগ্বিরিক্তং নরং রসযুতং ভোজনং ভোজযেত্| এতচ্চ নীলিনীঘৃতং গুল্মাদীন্ হন্তি|

Adhikarana vAtagulme shAlyannaM madirA ghRutam (59) · Śloka 59

কুক্কুটাশ্চ মযূরাশ্চ তিত্তিরিক্রৌঞ্চবর্তকাঃ| শালযো মদিরা সর্পির্বাতগুল্মচিকিত্সিতম্||৫৯||

স০-কুক্কুটাদযো বাতগুল্মে চিকিত্সিতং-উপক্রমঃ|

Adhikarana vAtagulme annapAnaM ca (60) · Śloka 60

মিতমুষ্ণং দ্রবং স্নিগ্ধং ভোজনং বাতগুল্মিনাম্| সমণ্ডা বারুণী পানং তপ্তং বা ধান্যকৈর্জলম্||৬০||

স০-বাতগুল্মিনাং চ ভোজনং মিতমুষ্ণং দ্রবং স্নিগ্ধং চ স্যাত্| বারুণী সমণ্ডা ধান্যকৈঃ শৃতং জলং বা পানং স্যাত্|

Adhikarana pittagulme snigdhoShNaje virekaH (61) · Śloka 61

স্নিগ্ধোষ্ণেনোদিতে গুল্মে পৈত্তিকে স্রংসনং হিতম্| |৬১|

স০-পৈত্তিকে গুল্মে স্নিগ্ধোষ্ণেনোত্থিতে সতি স্রংসনং হিতম্| তদেব বিরেচনমাহ-

Adhikarana pittagulme drAkShAdivirecanam (61-62) · Śloka 62

দ্রাক্ষাভযাগুডরসং কম্পিল্লং বা মধুদ্রুতম্||৬১|| কল্পোত্কং রক্তপিত্তোক্তং| |৬২|

স০-দ্রাক্ষাভযাগুডরসং স্রংসনং হিতম্| অথবা, মধুদ্রুতং কম্পিল্লং স্রংসনং হিতম্| কল্পোক্তং বিরেচনং-বিরেচনকল্পবিহিতং, (হৃ. ক. অ. ২) , অক্তপিত্তোক্তং-"ত্রিবৃতা ত্রিফলা" (হৃ. চি. অ. ২|১০) ইত্যাদিকং, হিতম্|

Adhikarana pittagulme rUkShoShNaje saMshamanam,pittarUkSho tiktAdighRutam pittarUkSho tRuNapa~jcamUlAdi kShIram (62-63) · Śloka 63

গুল্মে রূক্ষোষ্ণজে পুনঃ| পরং সংশমনং সর্পিস্তিক্তং বাসাঘৃতং শ্রৃতম্||৬২|| তৃণাখ্যপঞ্চাক্বাথে জীবনীযগণেন বা| শ্রৃতং তেনৈব বা ক্ষীরং ন্যগ্রোধাদিগণেন বা||৬৩||

স০-রূক্ষোষ্ণজে পৈত্তিকে গুল্মে সর্পিস্তিক্তং-কুষ্ঠচিকিত্সিতোক্তং (হৃ. চি. অ. ১৯|২) , তথা বাসাঘৃতং (হৃ. চি. অ. ২|৪২) সংশমনং শ্রেষ্ঠম্| তৃণাখ্যং পঞ্চকং-"দর্ভকাসেক্ষু" (হৃ. সূ. অ. ৬|১৭১) ইত্যাদি, তস্য ক্বাথে শ্রৃতং ঘৃতং হিতম্| অথবা, জীবনীযগণেন শ্রৃতং ঘৃতং হিতম্| তেনৈব-জীবনীযগণেন, শ্রৃতং ক্ষীরং হিতম্| ন্যগ্রোধাদিগণেন বা শ্রৃতং ক্ষীরং হিতম্|

Adhikarana pittagulme rUkShoShNaje Atyayike virek (64) · Śloka 64

তত্রাপি স্রংসনং যুঞ্জ্যাচ্ছীঘ্রমাত্যযিকে ভিষক্| |৬৪|

স০-তত্রাপি-ন কেবলং স্নিগ্ধোষ্ণজে রূক্ষোষ্ণজেঽপি পৈত্তিকে সামান্যতো বা সমুত্পন্নে গুল্মে, আত্যযিকে শীঘ্রং স্রংসনং যুঞ্জ্যাত্| কেন ? ইত্যাহ-

Adhikarana pittagulme rUkShoShNaje Atyayike virekadravyaghRutaM kShIraM vAhNaje (64) · Śloka 64

| বৈরেচনিকসিদ্ধেন সর্পিষা পযসাঽপি বা||৬৪||

স০-বিরেচনবিহিতদ্রব্যসিদ্ধেন সর্পিষা ক্ষীরেণ বা|

Adhikarana pittagulme AmalakAdighRutam (65-66) · Śloka 66

রসেনামলকেক্ষূণাং ঘৃতপ্রস্থং বিপাচযেত্| পথ্যাপাদং পিবেত্সর্পিস্তত্সিদ্ধং পিত্তগুল্মনুত্||৬৫|| পিবেদ্বা তৈল্বকং সর্পির্যচ্চোক্তং পিত্তবিদ্রধৌ| |৬৬|

স০-আমলকস্যেক্ষোশ্চ রসেন ঘৃতাচ্চতুর্গুণিতেনাঢকমানেন পথ্যাপাদং ঘৃতপ্রস্থং বিপাচযেত্| তচ্চ সিদ্ধং পিত্তগুল্মং হন্তি| তৈল্বকমথবা সর্পিঃ (হৃ. চি. অ. ২১|৩২) পিবেত্| যচ্চ পিত্তবিদ্রধাবুক্তং ঘৃতং (হৃ. চি. অ. ১৩|৪) তচ্চ পিবেত্|

Adhikarana pittagulme drAkShAdikalkaH (66-67) · Śloka 67

| দ্রাক্ষাং পযস্যাং মধুকং চন্দনং পদ্মকং মধু||৬৬|| পিবেত্তণ্ডুলতোযেন পিত্তগুল্মোপশান্তযে| |৬৭|

স০-দ্রাক্ষাদি তণ্ডুলজলেন সহ পিত্তগুল্মশান্তযে পিবেত্|

Adhikarana pittagulme trAyamANAkvAthaH (67-69) · Śloka 69

| দ্বিপলং ত্রাযমাণাযা জলদ্বিপ্রস্থসাধিতম্||৬৭|| অষ্টভাগস্থিতং পূতং কোষ্ণং ক্ষীরসমং পিবেত্| পিবেদুপরি তস্যোষ্ণং ক্ষীরমেব যথাবলম্||৬৮|| তেন নির্হৃতদোষস্য গুল্মঃ শাম্যতি পৈত্তিকঃ| |৬৯|

স০-ত্রাযন্ত্যা দ্বিপলং জলদ্বিপ্রস্থসাধিতমষ্টভাগাবশেষং পটেন পূতং ক্ষীরসমং পিবেত্| তস্যোপরি কোষ্ণং ক্ষীরমেব যথাশক্তি পিবেত্-নান্যত্কিঞ্চিত্| তেন-ক্ষীরেণ, অপহৃতদোষস্য গুল্মঃ পৈত্তিকঃ শাম্যতি|

Adhikarana pittagulme dAhe shItairghRutAdibhirabhya~ggalepasparshAdiShu raktaharaNamulme (69-70) · Śloka 70

| দাহেঽভ্যঙ্গো ঘৃতৈঃ শীতৈঃ সাজ্যৈর্লেপো হিমৌষধৈঃ||৬৯|| স্পর্শঃ সরোরুহাং পত্রৈঃ পাত্রৈশ্চ প্রচলজ্জলৈঃ| |৭০|

স০-পৈত্তিকে গুল্মে দাহে সতি ঘৃতৈঃ শীতৈঃ-শীতবীর্যসাধিতৈঃ স্পর্শতশ্চ শীতৈঃ, অভ্যঙ্গস্তথা লেপঃ শীতবীর্যৌষধৈঃ সঘৃতৈঃ স্যাত্| পদ্মপত্রৈঃ পাত্রৈশ্চ প্রচলজ্জলৈঃ স্পর্শঃ|

Adhikarana pittagulme raktasruteH phalamulme (70-72) · Śloka 72

| বিদাহপূর্বরূপেষু শূলে বহ্নেশ্চ মার্দবে||৭০|| বহুশোঽপহরেদ্রক্তং পিত্তগুল্মে বিশেষতঃ| ছিন্নমূলা বিদহ্যন্তে ন গুল্মা যান্তি চ ক্ষযম্||৭১|| রক্তং হি ব্যম্লতাং যাতি, তচ্চ নাস্তি ন চাস্তি রুক্| |৭২|

স০-বিদাহপূর্বরূপেষু গুল্মেষু তথা শূলে বহ্নিমান্দ্যে চ সতি বহূন্ বারান্ রক্তং হরেত্| পিত্তগুল্মে বিশেষেণাস্রং হরেত্| স০-ছিন্নমূলা গুল্মা ন বিদহ্যন্তে-ন পাকং যান্তি| চ-পুনঃ, ক্ষযং যান্তি| হি-যস্মাত্, রক্তমন্তঃস্থিতং ব্যম্লীভাবং যাতি| তচ্চ-রক্তং, নাস্তি ততস্তদুত্থা রুগপি নাস্তি|

Adhikarana pittagulme mlAnatve jA~ggalarasaH pitta sasheShArtau sarpiH (72-73) · Śloka 73

| হৃতদোষং পরিম্লানং জাঙ্গলৈস্তর্পিতং রসৈঃ||৭২|| সমাশ্বস্তং সশোষার্তিং সর্পিরভ্যাসযেত্পুনঃ| |৭৩|

স০-হৃতদোষং পরিম্লানং নরং জাঙ্গলমাংসরসৈস্তর্পিতং সমাশ্বস্তং সন্তং সশেষার্তিং সর্পিরভ্যাসযেত্|

Adhikarana pittagulme pAkonmukhe pittavidradhivat kriyA (73-74) · Śloka 74

| রক্তপিত্তাতিবৃদ্ধত্বাত্ক্রিযামনুপলভ্য বা||৭৩|| গুল্মে পাকোন্মুখে সর্বা পিত্তবিদ্রধিবত্ক্রিযা| |৭৪|

স০-রক্তপিত্তাতিবৃদ্ধত্বাদ্ধেতোঃ ক্রিযাং বাঽনুপলভ্য-অনাসাদ্য, গুল্মে পাকোন্মুখে সতি সর্বা পিত্তবিদ্রধিতুল্যা ক্রিযা স্যাত্|

Adhikarana pittagulme annaM pAnaM ca (74-75) · Śloka 75

| শালির্গব্যাজপযসী পটোলী জাঙ্গলং ঘৃতম্||৭৪|| ধাত্রী পরূষকং দ্রাক্ষা খর্জূরং দাডিমং সিতা| ভোজ্যং, পানেঽম্বু বলযা বৃহত্যাদ্যৈশ্চ সাধিতম্||৭৫||

স০-শাল্যাদি ভোজ্যম্| পানে বলযা সাধিতং জলং বৃহত্যাদিনা বা|

Adhikarana shleShmagulme pUrvaM vamanam shleShmAvamye upavAsaH shleShma tiktAdisaMsargyA hi~ggvAdiBiSca vanhisandhukShaNam (76-77) · Śloka 77

শ্লেষ্মজে বামযেত্পূর্বমবম্যমুপবাসযেত্| তিক্তোষ্ণকটুসংসর্গ্যা বহ্নিং সন্ধুক্ষযেত্ততঃ||৭৬|| হিঙ্গ্বাদিভিশ্চ দ্বিগুণক্ষারহিঙ্গ্বম্লবেতসৈঃ| |৭৭|

স০-শ্লেষ্মজে গুল্মে পূর্বং বামযেত্| অবমনাহ তু লঙ্ঘযেত্| কৃতোপবাসস্য তিক্তোষ্ণকটুদ্রব্যযুতযা সংসর্গ্যা বহ্নিং দীপযেত্| তথা হিঙ্গ্বাদিভিরগ্নিং সন্ধুক্ষযেত্| কিম্ভূতৈঃ ? দ্বিগুণানি ক্ষারহিঙ্গ্বম্লবেতসানি যেষু তৈঃ|

Adhikarana shleShmagulme nigUDhatvAdiyute svedanaM ghRutapAnaM ca (77-78) · Śloka 78

| নিগূঢং যদি বোন্নদ্ধং স্তিমিতং কঠিনং স্থিরম্||৭৭|| আনাহাদিযুতং গুল্মং সংস্বেদ্য বিনযেদনু| ঘৃতং সক্ষারকটুকং পাতব্যং কফগুল্মিনাম্||৭৮||

স০-নিগূঢাদিধর্মযুক্তং গুল্মং সংশোধ্য(সংস্বেদ্য) বিনযেত্-উপশমযেত্| পশ্চাত্ কফগুল্মিনাং ঘৃতং ক্ষারকটুকযুতং পাতব্যম্|

Adhikarana shleShmagulme dashamUlaghRutam (79) · Śloka 79

সব্যোষক্ষারলবণং সহিঙ্গুবিডদাডিমম্| কফগুল্মং জযত্যাশু দশমূলশ্ঘৃতং ঋতম্||৭৯||

স০-ব্যোষাদিযুতং দশমূলপক্বং সর্পিঃ কফগুল্মং শীঘ্রমেব হন্তি|

Adhikarana shleShmagulme bhallAtakaghRutam (80-83) · Śloka 83

ভল্লাতকানাং দ্বিপলং পঞ্চমূলং পলোন্মিতম্| অল্পং তোযাঢকে সাধ্যং পাদশেষেণ তেন চ||৮০|| তুল্যং ঘৃতং তুল্যপযো বিপচেদক্ষসম্মিতৈঃ| বিডঙ্গহিঙ্গুসিন্ধূত্থযাবশূকশঠীবিডৈঃ||৮১|| সদ্বীপিরাস্নাযষ্ট্যাহ্বষড্গ্রন্থাকণনাগরৈঃ| এতদ্ভল্লাতকঘৃতং কফগুল্মহরং পরম্||৮২|| প্লীহপাণ্ড্বামযশ্বাসগ্রহণীরোগকাসজিত্| |৮৩|

স০-ভল্লাতকানাং দ্বিপলং অল্পং-হ্রস্বং, পঞ্চমূলং পৃথক্ পলপ্রমাণং তোযাঢকে সাধনীযম্| পাদশেষেণ চ তেন ক্বাথেন সমং সর্পিস্তুল্যক্ষীরং বিডঙ্গাদিভিঃ কল্কীভূতৈঃ কার্ষিকৈর্বিপাচযেত্| এতচ্চ ভল্লাতকঘৃতং পরং-সুষ্ঠু, কফগুল্মহরং প্লীহাদিজিচ্চ|

Adhikarana shleShmagulme sarvadehe ca svedaH (83) · Śloka 83

| ততোঽস্য গুল্মে দেহে চ সমস্তে স্বেদমাচরেত্||৮৩||

স০-ততো-ঘৃতপানাদনন্তরং, গুল্মে দেহে চাস্য সমস্তে স্বেদমাচরেত্|

Adhikarana shleShmagulme snehasvedaphalam (84) · Śloka 84

সর্বত্র গুল্মে প্রথমং স্নেহস্বেদোপপাদিতে| যা ক্রিযা ক্রিযতে যাতি সা সিদ্ধিং ন বিরূক্ষিতে||৮৪||

স০-[সর্বত্র-] সর্বস্মিন্নষ্টবিধে চ, গুল্মে প্রথমং-আদৌ, স্নেহস্বেদাভ্যামুপপাদিতে সতি যা ক্রিযা ক্রিযতে সা সিদ্ধিং যাতি| যা তু বিরূক্ষিতে সতি ক্রিযা সা সিদ্ধিং ন যাতি|

Adhikarana shleShmagulme ghaTikAyojanam shleShma tato gulmavidAraNam shleShma tataH prapIDanaM mraMkShaNaM ca (85-87) · Śloka 87

স্নিগ্ধস্বিন্নশরীরস্য গুল্মে শৈথিল্যমাগতে| যথোক্তাং ঘটিকাং ন্যস্যেদ্গৃহীতেঽপনযেচ্চ তাম্||৮৫|| বস্ত্রান্তরং ততঃ কৃত্বা ছিন্দ্যাদ্গুল্মং প্রমাণবিত্| বিমার্গাজপদাদর্শৈর্যথালাভং প্রপীডযেত্||৮৬|| প্রমৃজ্যাদ্গুল্মমেবৈকং ন ত্বন্ত্রহৃদযং স্পৃশেত্| |৮৭|

স০-স্নিগ্ধস্বিন্নশরীরস্য গুল্মে শৈথিল্যং যাতে সতি যন্ত্রবিধ্যুদিতাং ঘটিকাং যোজযেত্| গৃহীতে চ গুল্মে তামপসারযেত্| অনন্তরং বস্ত্রব্যবহিতং গুল্মং কৃত্বা প্রমাণবিত্ বিমার্গাদিভির্যথালাভং ভিন্দ্যাত্-বিদারযেত্ সূচিকাদিনা| বিমার্গো-দারুমযঃ শস্ত্রকৃতির্বস্তুবিশেষশ্চর্মকারসম্বন্ধী| তথা, গুল্মমেব কেবলং প্রপীডযেত্ প্রমৃজ্যাচ্চ| ন পুনরন্ত্রং হৃদযং [চ] স্পৃশেত্|

Adhikarana shleShmagulme tato lepaH svedashca (87-88) · Śloka 88

| তিলৈরণ্ডাতসীবীজসর্ষপৈঃ পরিলিপ্য চ||৮৭|| শ্লেষ্মগুল্মমযস্পাত্রৈঃ সুখোষ্ণৈঃ স্বেদযেত্ততঃ| |৮৮|

স০-অথবা কফগুল্মং তিলাদিভিঃ পরিলিপ্যানন্তরং লোহভাজনৈঃ সুখোষ্ণৈঃ স্বেদযেত্| অযস্পাত্রৈরিতি "অতঃকৃকমি" ইত্যাদিনা সাদেশঃ|

Adhikarana shleShmagulme evaM sthAnAccalite virecanairbastibhishca shodhanam (88-89) · Śloka 89

| এবং চ বিসৃতং স্থানাত্ কফগুল্মং বিরেচনৈঃ||৮৮|| সস্নেহৈর্বস্তিভিশ্চৈনং শোধযেদ্দাশমূলিকৈঃ| |৮৯|

স০-এবং-অস্মিন্ প্রকারে কৃতে সতি, স্থানাচ্চলিতং কফগুল্মং স্নেহযুক্তৈর্বিরেচনৈর্বস্তিভিশ্চ দাশমূলিকৈঃ (হৃ. ক. অ. ৪|৪) শোধযেত্|

Adhikarana shleShmagulme miSrakaH sneha sraMsanaH (89-91) · Śloka 91

| পিপ্পল্যামলকদ্রাক্ষাশ্যামাদ্যৈঃ পালিকৈঃ পচেত্||৮৯|| এরণ্ডতৈলহবিষোঃ প্রস্থৌ পযসি ষড্গুণে| সিদ্ধোঽযং মিশ্রকঃ স্নেহো গুল্মিনাং স্রংসনং হিতম্||৯০|| বৃদ্ধিবিদ্রধিশূলেষু বাতব্যাধিষু চামৃতম্| |৯১|

স০-পিপ্পল্যাদিভিঃ পলোন্মিতৈরণ্ডতৈলসর্পিষোঃ প্রস্থৌ দ্বৌ ষড্গুণে ক্ষীরে পচেত্| অযং মিশ্রকাখ্যঃ স্নেহো গুল্মিনাং পরং স্রংসনং বৃদ্ধ্যাদিষু চামৃততুল্যম্|

Adhikarana shleShmagulme nIlinIghRutaM straMsanam shleShma sukumAraM ghRutaM straMsanam (91-92) · Śloka 92

| পিবেদ্বা নীলিনীসর্পির্মাত্রযা দ্বিপলীনযা||৯১|| তথৈব সুকুমারাখ্যং ঘৃতান্যৌদরিকাণি বা| |৯২|

স০-অথবা নীলিনীঘৃতং-প্রাগুক্তং (শ্লো. ৫৫) , স্রংসনং দ্বিপলমাত্রযা পিবেত্| তথৈব দ্বিপলমাত্রযা সুকুমারাখ্যং ঘৃতং-বিদ্রধ্যুক্তং (হৃ. চি. ১৩|৪১) , স্রংসনার্থং পিবেত্| উদরচিকিত্সিতোক্তানি বা ঘৃতানি পিবেত্|

Adhikarana shleShmagulme udaroktaghRutAni sraMsanam shleShma dantIharItakyaH straMsanam (92-97) · Śloka 97

| দ্রোণেঽম্ভসঃ পচেদ্দন্ত্যাঃ পলানাং পঞ্চবিংশতিম্||৯২|| চিত্রকস্য তথা পথ্যাস্তাবতীস্তদ্রসে স্রুতে| দ্বিপ্রস্থে সাধযেত্পূতে ক্ষিপেদ্দন্তীসমং গুডম্||৯৩|| তৈলাত্পলানি চত্বারি ত্রিবৃতাযাশ্চ চর্ণতঃ| কণাকর্ষৌ তথা শুণ্ঠ্যাঃ সিদ্ধে লেহে তু শীতলে||৯৪|| মধু তৈলসমং দদ্যাচ্চতুর্জাতাচ্চতুর্থিকাম্| অতো হরীতকীমেকাং সাবলেহপলামদন্||৯৫|| সুখং বিরিচ্যতে স্নিগ্ধো দোষপ্রস্থমনামযঃ| গুল্মহৃদ্রোগদুর্নামশোফানাহগরোদরান্||৯৬|| কুষ্ঠোত্ক্লেশারুচিপ্লীহগ্রহণীবিষমজ্বরান্| ঘ্নন্তি দন্তীহরীতক্যঃ পাণ্ডুতাং চ সকামলাম্||৯৭||

স০-জলদ্রোণে দন্তীপলানাং পঞ্চবিংশতিং, [তথা] চিত্রকস্য পলানাং পঞ্চবিংশতিং, [তথা] হরিতকীস্তাবতীঃ-পঞ্চবিংশতিং, পচেত্|তদ্রসে স্রুতে দ্বিপ্রস্থদঘ্নে পূতে পথ্যাসহিতে দন্তীতুল্যং গুডং ক্ষিপেত্| তৈলপলানি চত্বারি, ত্রিবৃত্পলানি চ চত্বারি| কণাযাঃ কর্ষৌ দ্বৌ শুণ্ট্যাশ্চ| সিদ্ধে চাস্মিন্ লেহে তু সুশীতে তৈলতুল্যং মাক্ষিকং দদ্যাত্| চতুর্জাতাত্ সমুদিতাচ্চতুর্থিকাং-পলাপরসংজ্ঞাং, দদ্যাত্| অতো-লেহাত্, পথ্যামেকাং সাবলেহপলযুতাং ভক্ষযেত্| স্নিগ্ধো নরঃ সুখং দোষপ্রস্থং বিরিচ্যতে নিরামযঃ| এতা দন্তীহরীতক্যঃ প্লীহা(গুল্মা)দীন্ ঘ্নন্তি|

Adhikarana shleShmagulme trivRutAcUrNam straMsanam (98) · Śloka 98

সুধাক্ষীরদ্রবং চূর্ণং ত্রিবৃতাযাঃ সুভাবিতম্| কার্ষিকং মধুসর্পির্ভ্যাং লীঢ্বা সাধু বিরিচ্যতে||৯৮||

স০-সুধাক্ষীরেণ দ্রবং ত্রিবৃতাযাশ্চূর্ণং প্রকৃতত্বাত্সুধাক্ষীরেণৈব সুভাবিতং কর্ষপ্রমাণং মধুসর্পির্ভ্যাং লীঢ্বা সম্যগ্বিরিচ্যতে|

Adhikarana shleShmagulme kuShThAdicUrNam sraMsanam (99) · Śloka 99

কুষ্ঠশ্যামাত্রিবৃদ্দন্তীবিজযাক্ষারগুগ্গুলূন্| গোমূত্রেণ পিবেদকং তেন গুগ্গুলুমেব বা||৯৯||

স০-কুষ্ঠাদীন্ গোমূত্রেণ পিবেত্| অথবা, তেন-গোমূত্রেণ, গুগ্গুলুমেকমেব পিবেত্|

Adhikarana shleShmagulme gugguluH sraMsanam shleShma kalpasidhyuktA nirUhAH (100) · Śloka 100

নিরূহান্ কল্পসিধ্দ্যুক্তান্ যোজযেদ্গুল্মনাশনান্| |১০০|

স০-কল্পসিধ্দ্যুক্তান্নিরূহান্ গুল্মনাশনান্ যোজযেত্|

Adhikarana shleShmagulme kRutamUlatvAdiyute kShArAriShTAgnikarmANi (100-102) · Śloka 102

| কৃতমূলং মহাবাস্তুং কঠিনং স্তিমিতং গুরুম্||১০০|| গূঢমাংসং জযেদ্গুল্মং ক্ষারারিষ্টাগ্নিকর্মভিঃ| একান্তরং দ্ব্য্ন্তরং বা বিশ্রময্যাথ বা ত্র্যহম্||১০১|| শরীরদোষবলযোর্বর্ধনক্ষপণোদ্যতঃ| |১০২|

স০-কৃতমূলাদিধর্মযুক্তং গুল্মং ক্ষারাদিভির্জযেত্| একান্তরং দ্ব্যন্তরং বা ত্র্যহং বা বিশ্রময্য শরীরদোষবলযোর্যথাক্রমং বর্ধনক্ষপণযোরুদ্যতঃ সন্|

Adhikarana shleShmagulme arshoshmarIgrahaNyuktAHkShArAH (102) · Śloka 102

| অর্শোশ্মরীগ্রহণ্যুক্তাঃ ক্ষারা যোজ্যাঃ কফোল্বণে||১০২||

স০-কফাধিকে গুল্মেঽর্শোশ্মরীগ্রহণীষূক্তা যে ক্ষারাস্তে যোজ্যাঃ|

Adhikarana shleShmagulme kShAraH CedanaBedanapAtanakRut (103-108) · Śloka 108

দেবদারুত্রিবৃদ্দন্তীকটুকাপঞ্চকোলকম্| স্বর্জিকাযাবশূকাখ্যৌ শ্রেষ্ঠাপাঠোপকুঞ্চকম্||১০৩|| কুষ্ঠং সর্পসুগন্ধাং চ দ্ব্যক্ষাংশং পটুপঞ্চকম্| পালিকং চূর্ণিতং তৈলবসাদধিঘৃতাপ্লুতম্||১০৪|| ঘতস্যান্তঃ পচেত্পক্বমগ্নিবর্ণে ঘটে চ তম্| ক্ষারং গৃহীত্বা ক্ষীরাজ্যতক্রমদ্যাদিভিঃ পিবেত্||১০৫|| গুল্মোদাবর্তবর্ধ্মার্শোজঠরগ্রহণীকৃমীন্| অপস্মারগরোন্মাদযোনিশুক্রামযাশ্মরীঃ||১০৬|| ক্ষারাগদোঽযং শমযেদ্বিষং চাখুভুজঙ্গজম্| শ্লেষ্মাণং মধুরং স্নিগ্ধং রসক্ষীরঘৃতাশিনঃ||১০৭|| ছিত্ত্বা ভিত্ত্বাঽঽশযাত্ ক্ষারঃ ক্ষরত্বাত্ক্ষারযত্যধঃ| |১০৮|

স০-দেবদার্বাদিসর্পসুগন্ধাপর্যন্তং দ্বিকার্ষিকং লবণপঞ্চকং পালিকমেতত্সমস্তং চূর্ণীকৃতং তৈলবসাদধিঘৃতৈরাপ্লুতং-আলোডিতং, ঘটস্য মধ্যেঽন্তর্ধূমং পচেত্| সর্পসুগন্ধা-নাকুলী| অগ্নিবর্ণে চ ঘটে সতি পক্বং তং ক্ষারং গৃহীত্বা যথাদোষং ক্ষীরাদিভিঃ পিবেত্| গুল্মাদীন্ জযেত্ অযং ক্ষারাগদ আখুজং ভুজঙ্গজং চ বিষং দ্রাক্ শমযেত্| স০-শ্লেষ্মাণং মধুরং স্নিগ্ধং মাংসরসাদ্যাশিনঃ ক্ষারঃ ক্ষা(ক্ষ)রত্বাদাশযং(যাত্) ছিত্ত্বা ভিত্ত্বাঽধস্তাত্ পাতযতি|

Adhikarana shleShmagulme mandAgnyAdiyute AsavAriShTayojanA (108-109) · Śloka 109

| মন্দেঽগ্নাবরুচৌ সাত্মযৈর্মদ্যৈঃ সস্নেহমশ্নতাম্||১০৮|| যোজযেদাসবারিষ্টান্নিগদান্ মার্গশুদ্ধযে| |১০৯|

মন্দেঽগ্নাবরুচৌ চ সত্যাং মদ্যৈঃ সাত্ম্যৈঃ সহস্নেহমাহারমশ্র্নতামাসবাদীন্ মার্গশুদ্ধযে যোজযেত্| অধুনাঽন্নপানমাহ-

Adhikarana shleShmagulme shAlyAdyannam shleShma vArUNyAdipAnam (109-112) · Śloka 112

| শালযঃ ষষ্টিকা জীর্ণাঃ কুলত্থা জাঙ্গলং ফলম্||১০৯|| চিরিবিল্বাগ্নিতর্কারীযবানীবরুণাঙ্কুরাঃ| শিগ্রুস্তরুণবিল্বানি বালং শুষ্কং চ মূলকম্||১১০|| বীজপূরকহিঙ্গ্বম্লবেতসক্ষারদাডিমম্| ব্যোষং তক্রং ঘৃতং তৈলং ভক্তং, পানং তু বারুণী||১১১|| ধান্যাম্লং মস্তু তক্রং চ যবানীবিডচূর্ণিতম্| পঞ্চমূলশ্রৃতং বারি জীর্ণং মার্দ্বীকমেব বা||১১২||

স০-শালয ইত্যাদি ভক্তান্তং ভক্তম্| পানং তু বারুণ্যাদি মার্দ্বীকান্তম্|

Adhikarana shleShmagulme surA jagalaSca (113) · Śloka 113

পিপ্পলীপিপ্পলীমূলচিত্রকাজাজিসৈন্ধবৈঃ| সুরা গুল্মং জযত্যাশু জগলশ্চ বিমিশ্রিতঃ||১১৩||

স০-পিপ্যল্যাদিভিঃ সহ সুরা শীঘ্রমেব গুল্মং জযতি| জগলশ্চ পিপ্পল্যাদিভির্বিমিশ্রিতো গুল্মং জযতি|

Adhikarana shleShmagulme vamanAdiBirashame dAhaH (114-115) · Śloka 115

বমনৈর্লঙ্ঘনৈঃ স্বেদৈঃ সর্পিঃপানৈর্বিরেচনৈঃ| বস্তিক্ষারাসবারিষ্টগুলিকাপথ্যভোজনৈঃ||১১৪|| শ্লৈষ্মিকো বদ্ধমূলত্বাদ্যদি গুল্মো ন শাম্যতি| তস্য দাহং হৃতে রক্তে কুর্যাদন্তে শরাদিভিঃ||১১৫||

স০-বমনাদিভিঃ প্রযুক্তৈঃ শ্লৈষ্মিকো গুল্মো বদ্ধমূলত্বাদ্যদি ন শাম্যতি, তস্য-গুল্মস্য, হৃতে রক্তেঽন্তে দাহং শরাদিভিঃ কুর্যাত্| অথ দাহবিধানং প্রস্তূযতে-

Adhikarana shleShmagulme dAhavidhAnam (116-118) · Śloka 118

অথ গুল্মং সপর্যন্তং বাসসাঽন্তরিতং ভিষক্| নাভিবস্ত্যন্ত্রহৃদযং রোমরাজীং চ বর্জযন্||১১৬|| নাতিগাঢং পরিমৃশেচ্ছরেণ জ্বলতাঽথবা| লোহেনারণিকোত্থেন দারুণা তৈন্দুকেন বা||১১৭|| ততোঽগ্নিবেগে শমিতে শীতৈর্ব্রণ ইব ক্রিযা| |১১৮|

স০-গুল্মং পর্যন্তৈঃ সহ বস্ত্রেণান্তরিতং-আচ্ছাদিতং, নাভ্যাদি বর্জযন্নাতিশযেন পরামৃশেদ্বৈদ্যঃ| শরেণ লোহেন বা জ্বলতা| কিম্ভূতেন ? আরণিকোত্থেন| অথবা, তৈন্দুকেন কাষ্ঠেন| অনন্তরমগ্নিবেগে শমিতে সতি শীতৈঃ প্রদেহাদিভির্ব্রণ ইব ক্রিযা স্যাত্|

Adhikarana shleShmagulme AmAnvaye la~gghanAdi dvidoShaje tridoShaje ca gulme mishraH kramaH (118-119) · Śloka 119

| আমান্বযে তু পেযাদ্যৈঃ সন্ধুষ্যাগ্নিং বিলঙ্ঘিতে||১১৮|| স্বং স্বং কুর্যাত্ক্রমং মিশ্রং মিশ্রদোষে চ কালবিত্| |১১৯|

আমান্বযে চ সতি বহ্নিং পেযাদ্যৈঃ সন্ধুক্ষ্য বিলঙ্ঘিতে সতি স্বং স্বং ক্রমং-যথাদোষং, কুর্যাত্| মিশ্রদোষে মিশ্রং ক্রমং কুর্যাত্| কালবিত্-বৈদ্যঃ|

Adhikarana raktagulme snehavirecanam (119-12) · Śloka 12

| গতপ্রসবকালাযৈ নার্যৈ গুল্মেঽস্রসম্ভবে||১১৯|| স্নিগ্ধস্বিন্নশরীরাযৈ দদ্যাত্স্নেহবিরেচনম্| ||১২||

স০-নার্যৈ অস্রসম্ভবে গুল্মে সতি স্নেহবিরেচনং দদ্যাত্| কিম্ভূতাযৈ ? গতঃ প্রসবকালো যস্যাস্তস্যৈ ইতি| এবং হি পুরাণত্বে সুখসাধ্যতা রক্তগুল্মস্য স্যাত্ সুনিশ্চিতত্বং চ| তথা স্নিগ্ধং স্বিন্নং শরীরং যস্যাস্তস্যৈ|

Adhikarana raktagulme tilakvAthaH (120-121) · Śloka 121

| তিলক্বাথো ঘৃতগুডব্যোষভার্গীরজোন্বিতঃ||১২০|| পানং রক্তভবে গুল্মে নষ্টে পুষ্পে চ যোষিতঃ| |১২১|

স০-রক্তোত্থে গুল্মে তিলক্বাথো ঘৃতাদিযুক্তঃ পানং যোষিতঃ| পুষ্পে চ নষ্টে পানং ভবেত্|

Adhikarana raktagulme BAr~ggyAdicUrNam (121-122) · Śloka 122

| ভার্ঙ্গীকৃষ্ণাকরঞ্জত্বগ্গ্রন্থিকামরদারুজম্||১২১|| চূর্ণং তিলানাং ক্বাথেন পীতং গুল্মরুজাপহম্| |১২২|

স০-ভার্ঙ্গ্যাদিজং চূর্ণং তিলক্বাথেন পীতং গুল্মরুজাহৃত্|

Adhikarana raktagulme palAshakShArasiddho yamakasnehaH (122-123) · Śloka 123

| পলাশক্ষারপাত্রে দ্বে দ্বে পাত্রে তৈলসর্পিষোঃ||১২২|| গুল্মশৈথিল্যজননীং পক্ত্বা মাত্রাং প্রযোজযেত্| |১২৩|

স০-পলাশক্ষারপাত্রে দ্বে তৈলসর্পিষোর্দ্বে পাত্রে পক্ত্বা গুল্মশৈথিল্যজননীং মাত্রাং প্রযোজযেত্| স্নেহাচ্চতুর্গুণং তোযমত্র ক্ষেপ্তব্যম্|

Adhikarana raktagulme evamaBidyamAne yonivirecanam (123) · Śloka 123

| ন প্রভিদ্যেত যদ্যেবং দদ্যাদ্যোনিবিরেচনম্||১২৩||

স০-এবং কৃতে সতি যদি ন প্রভিদ্যেত রক্তগুল্মস্তদা যোনিবিরেচনং দদ্যাত্| তদাহ-

Adhikarana raktagulme yonivirecanayogAH (124-127) · Śloka 127

ক্ষারেণ যুক্তং পললং সুধাক্ষীরেণ বা ততঃ| তাভ্যাং বা ভাবিতান্দদ্যাদ্যোনৌ কটুকমত্স্যকান্||১২৪|| বরাহমত্স্যপিত্তাভ্যাং নক্তকান্ বা সুভাবিতান্| কিণ্বং বা সগুডক্ষারং দদ্যাদ্যোনৌ বিশুদ্ধযে||১২৫|| রক্তপিত্তহরং ক্ষারং লেহযেন্মধুসর্পিষা| লশুনং মদিরাং তীক্ষ্ণাং মত্স্যাংশ্চাস্যৈ প্রযোজযেত্||১২৬|| বস্তিং সক্ষীরগোমূত্রং সক্ষারং দাশমূলিকম্| |১২৭|

স০-ক্ষারযুক্তং ভৃষ্টতিলচূর্ণং ততস্তস্যা যোনৌ দদ্যাত্| সুধাক্ষীরেণ বাঽন্বিতং পললং দদ্যাত্| তাভ্যাং-ক্ষারসুধাক্ষীরাভ্যাং, ভাবিতান্ কটুকমত্স্যকান্ যোনৌ দদ্যাত্| বরাহমত্স্যযোঃ পিত্তাভ্যাং কটুকমত্স্যকান্ সুভাবিতান্ নক্তকান্ বা সুভাবিতান্ যোনৌ দদ্যাত্| অথবা, কিণ্বং গুডক্ষারান্বিতং যোনিবিশুধ্দ্যর্থং যোনৌ দদ্যাত্| রক্তপিত্তহরং ক্ষারং মধুসর্পিষা লেহযেত্| লশুনং মদিরাং তীক্ষ্ণাং মত্স্যাংশ্চাস্যৈ প্রযোজযেত্| দাশমূলিকং বস্তিং-কল্পোক্তং (হৃ. ক. অ. ৪|৪) , ক্ষীরগোমূত্রসহিতং ক্ষারান্বিতমস্যৈ দদ্যাত্|

Adhikarana raktagulme apravRutte rakte gulmaBedanam (127) · Śloka 127

| অবর্তমানে রুধিরে হিতং গুল্মপ্রভেদনম্||১২৭||

স০-রক্তেঽপ্রবর্তমানে সতি গুল্মপ্রভেদনং হিতম্|

Adhikarana raktagulme pravRutte rakte upekShaNam rakta pravRutte mAMsarasApAnam rakta pravRutte tarUNIsurApAnam (128) · Śloka 128

যমকাভ্যক্তদেহাযাঃ প্রবৃত্তে সমুপেক্ষণম্| রসৌদনস্তথাঽঽহারঃ পানং চ তরুণী সুরা||১২৮||

স০-প্রবৃত্তে রক্তে সতি যমকাভ্যক্তগাত্রাযাঃ সমুপেক্ষণং-সম্যগুপেক্ষণং হিতম্| তথা, আহারো রসৌদনো হিতঃ| তরুণী সুরা চ পানম্|

Adhikarana raktagulme atipravRutte rakte rakta pittaharakriyA, rakta vAtau vAtaharA kriyA, rakta AnAhAdau udAvartabalAsaghnIkriyA (14) · Śloka 14

রুধিরেঽতিপ্রবৃত্তে তু রক্তপিত্তহরাঃ ক্রিযাঃ| কার্যা বাতরুগার্তাযাঃ সর্বা বাতহরাঃ পুনঃ||১২৯|| আনাহাদাবুদাবর্তবলাসঘ্নো যথাযথম্| ১২৯ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে গুল্মচিকিত্সিতং নাম চতুর্দশোঽধ্যাযঃ||১৪||

স০-রুধিরেঽতিপ্রবৃত্তে পুনা রক্তপিত্তহরাঃ ক্রিযাঃ কার্যাঃ| বাতরুগার্তাযাঃ পুনঃ সর্বা বাতহরাঃ ক্রিযাঃ কার্যাঃ| আনাহাদৌ সত্যুদাবর্তবলাসজিতঃ ক্রিযাঃ কার্যা ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে গুল্মচিকিত্সিতং নাম চতুর্দশোঽধ্যাযঃ সমাপ্তঃ|| ১৪||