1. jvaracikitsitādhyāyaḥ

Adhikarana adhyAyopakramaH · Śloka

শ্রীগণেশায নমঃ| শ্রীসরস্বত্যৈ নমঃ| শ্রীগুরুভ্যো নমঃ| অথেদানীং চিকিত্সিতস্থানস্যারম্ভঃ| তস্য চাযং সম্বন্ধঃ| রোগপরীক্ষা নিদানস্থানে গদিতা| সাম্প্রতং চিকিত্সা বক্তুং যুক্তা| তথা চ মুনিঃ (চ. সূ. অ.২০/২০)- "রোগমাদৌ পরীক্ষেত ততোঽনন্তরমোষধম্|" ইতি| তস্মাচ্চিকিত্সিতস্থানারম্ভো ন্যায্যঃ| তত্র যথোদ্দেশো ব্যাধীনাং নিদানস্থানে, তেনৈব ক্রমেণাস্য স্থানস্য বিরচনা যুক্তেতি জ্বরচিকিত্সিতমেব বিবক্ষুরাহ-

Adhikarana jvaracikitsitAdhyAyaH (2) · Śloka 2

অথাতো জ্বরচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

স০-ইতি হ স্মাহুরাত্রেযাদযো মহর্ষয ইত্যনেনাগমশরণত্বমাত্মনঃ প্রতিপাদযতি|

Adhikarana jvarasaMprAptiHla~gghanakAraNam la~gghanAvasthA (1-2) · Śloka 2

আমাশযস্থো হত্বাঽগ্নিং সামো মার্গান্ পিধায যত্| বিদধাতি জ্বরং দোষস্তস্মাত্কুর্বীত লঙ্ঘনম্||১|| প্রাগূপেষু জ্বরাদৌ বা, বলং যত্নেন পালযন্| বলাধিষ্ঠানমারোগ্যমারোগ্যার্থঃ ক্রিযাক্রমঃ||২||

স০-আমাশযস্থো দোষো বহ্নিং হত্বা| সহামেন বর্তত ইতি সামঃ| তথ, মার্গান্ পিধায-স্ত্রোতাংসি স্থগযিত্বা, যত্যস্মাদ্ধেতোঃ, জ্বরং বিদধাতি, তস্মাত্কারণাল্লঙনং কুর্বীত| লঙ্ঘনমত্রোপবাসঃ| তথা চোক্তম্| "লঙ্ঘনস্যাবিশেষোক্তাবুপবাসং প্রকল্পযেত্|" ইতি| অত এবাযমপি বক্ষ্যতি (শ্লো. ১০)- "তস্মাদাদোষপচনাজ্জ্বরিতানুপবাসযেত্|" ইতি| কদা লঙ্ঘনং কুর্বীত ? ইত্যাহ-প্রাগূপেষু-পূর্বলক্ষণেষূত্পন্নমাত্রেষ্বেব, জ্বরাদৌ বা-উত্পন্নমাত্রে জ্বরে সতি| কিং কুর্বন্ লঙ্ঘনং কুর্বীত ? ইত্যাহ-বলং যত্নেন পালযন্,- প্রাণাংস্তাত্পর্যেণ রক্ষন্, তদবিরোধেনেত্যর্থঃ| ননু, কুত এবং বিধীযতে ? ইত্যাহ-বলাধিষ্ঠানমিত্যাদি| যস্মাদারোগ্যং-স্বাস্থ্যং, বলাধিষ্ঠানম্| বলমধিষ্ঠানং-আশ্রযো, যস্য তদেবম্| তথা, ক্রিযাক্রম আরোগ্যার্থঃ-স্বাস্থ্যপ্রযোজনঃ|ঘ্

Adhikarana la~gghanaPalam (3) · Śloka 3

লঙ্ঘনৈঃ ক্ষপিতে দোষে দীপ্তেঽগ্নৌ লাঘবে সতি| স্বাস্থ্যং ক্ষুত্তৃড্ রুচিঃ পক্তির্বলমোজশ্চ জাযতে||৩||

স০-লঙ্ঘনৈঃ-উপবাসৈঃ, দোষে-পূর্বোক্তে, ক্ষপিতে-ক্ষযং নীতে, তথাঽগ্নৌ দীপ্তে-সমিদ্ধে সতি, তথা লাঘবেঽঙ্গানাং সতি, স্বাস্থ্যাদি জাযতে| স্বাস্থ্যং-যথাপ্রকৃতিত্বম্| রুচিঃ-অন্নাভিলাষঃ| পক্তিঃ-পাক আমস্য| বলং-উত্সাহঃ| ওজঃ-পরং ধাতুতেজঃ| ক্ষপিধাতুরনুক্তো~পি ধাতুগণে শিষ্টপ্রযোগতবশাদঙ্গীকৃতঃ| লঙ্ঘনৈরিতি জাতৌ বহুবচনম্(?)| তেন কদাচিদেকেনৈব লঙ্ঘনেন কদাচিদনেকৈর্দোষক্ষযো জাযত ইতি জ্ঞেযম্|

Adhikarana jvaravisheShe vamanam (4-5) · Śloka 5

তত্রোত্কৃষ্টে সমুত্ক্লিষ্টে কফপ্রাযে চলে মলে| সহৃল্লাসপ্রসেকান্নদ্বেষকাসবিষূচিকে||৪|| সদ্যোভুক্তস্য সঞ্জাতে জ্বরে সামে বিশেষতঃ| বমনং বমনার্হস্য শস্তং|৫|

স০-তত্র-তস্মিন্মলে, উত্কৃষ্টে-স্বজন্মগুণকর্মলক্ষণতোঽধিকে| তথা, কফপ্রাযে-কফবহুলে বাতাখ্যে পিত্তাখ্যে বেতি সামর্থ্যাদ্গম্যতে| সমুত্ক্লিষ্টে-স্বস্থানাচ্চলিতে বহিরেনির্যাতে| তথা, চলে-শিথিলে, উত্ক্লিষ্টেঽপি হি কদাচিত্ স্থানাবষ্টম্ভাদচলঃ স্যাত্| এতদেব কফোত্ক্লিষ্টাদিকং দর্শযতি-সহৃল্লাসেস্যাদি| হৃল্লাসাদীনাং দ্বন্দ্বঃ| সহ তৈর্বর্ততে যস্তস্মিন্| হৃল্লাসঃ-উদ্বমনমিবানুভবঃ| উদ্বমনং-হৃদযস্য| প্রসেকঃ-পানীযস্যেব নিষ্ঠীবনম্| সদ্যোভুক্তস্যেত্যাদি| ঈদৃশো মলে সতি সদ্যঃ কৃতাহারস্য জ্বরে সঞ্জাতে বিশেষেণ সামে জ্বরে বমনার্হস্য বমনং শস্তম্| বমনার্হাঃ-বমনবিরেচনবিধৌ প্রোক্তাঃ|

Adhikarana anyathAvamane doShaH (5-6) · Śloka 6

| কুর্যাত্তদন্যথা||৫|| শ্বাসাতীসারসম্মোহহৃদ্গোগবিষমজ্বরান্| |৬|

স০-অন্যথা-উক্তবিধিবিপর্যযেণ, তত্-বমনং কৃতং, শ্বাসাদীন্ কুর্যাত্| তথা,-অনুত্ক্লিষ্টঃ কফপ্রধানঃ স্থিরো হৃল্লাসাদিরহিতো-বিপরীতঃ|

Adhikarana vamanayogAH (6-8) · Śloka 8

| পিপ্প্পলীভির্যুতান্ গালান্ কলিঙ্গৈর্মধুকেন বা||৬|| উষ্ণাম্ভসা সমধুনা পিবেত্সলবণেন বা| পটোলনিম্বকর্কোটবেত্রপত্রোদকেন বা||৭|| তর্পণেন রসেনেক্ষোর্মদ্যৈঃ কল্পোদিতানি ব| বমনানি প্রযুঞ্জীত বলকালবিভাগবিত্||৮||

স০-গালো-মদনফলম্, অস্য নিরপাযত্বাচ্ছ্রেষ্ঠত্বাচ্চপিপ্প্পল্যাদিদ্রব্যেভ্যোঽনেন সহোপযোগিভ্যো বহূপযোগিতযা প্রধাববিভক্ত্যা প্রাগুপন্যাসঃ| অন্যথা "কল্পযেত্সদৃশান্ ভাগান্ প্রমাণং যত্র নোদিতম্|" (হৃ. ক. অ. ৬/২৪) ইতি মদনফলেন পিপ্পল্যাদীনাং চ তুল্যং প্রমাণং প্রাপ্নুযাত্| পিপ্পলীভির্যুতান্ গালানথবা শক্রযবৈর্যুতানথবা মধুযষ্টিকযা বা যুতানথবোষ্ণাম্বুনা মাক্ষিকযুতেন বা সহ পিবেত্| অথবা পটোলাদীনাং পত্রোদকেন বা সহ পিবেত্| অথবা তর্পণাদিভিঃ পিবেত্| অথবা কল্পোদিতানি-বমনকল্পোক্তানি বমনানিযোগ্যানি প্রযুঞ্জীত| বলকালবিভাগবিদিতি অস্যাং দেহবলাবস্থাযাং তথা ব্যাধিবলাবস্থাযাং চেদং বমনং দাতুং যোগ্যমিতি যো বিভাগং বেত্তি স বলকালবিভাগবিত্|

Adhikarana annavarjanam (9) · Śloka 9

কৃতেঽকৃতে বা বমনে জ্বরী কুর্যাদ্বিশোষণম্| দোষাণাং সমুদীর্ণানাং পাচনায শমায চ||৯||

স০-বমনে যোগ্যো যো জ্বরী স কৃতে বমনে, অপরস্তু বমনেঽযোগ্যঃ সোঽকৃতে বমনে, বিশোষণং-উপবাসলক্ষণং, কুর্যাত্| এবং কৃতবমনোঽকৃতবমনো বা জ্বরী সর্বথা লঙ্ঘনং কুর্যাত্| কিমর্থম্ ? ইত্যাহ-দোষাণাং-বাতাদীনাং, সমুদীর্ণানাং-সমন্তাত্সমুত্থানাং, পাচনায-পক্ত্যর্থং, শমায-শান্ত্যর্থং চ| নিরমাণাং পুনঃ সমুদীর্ণানং শান্ত্যর্থমেব|

Adhikarana annavarjane yuktiH (10) · Śloka 10

দোষেণ ভস্মনেবাগ্নৌ ছন্নেঽন্নং ন বিপচ্যতে| তস্মাদাদোষপচনাজ্জ্বরিতানুপবাসযেত্||১০||

স০-দোষেণ-আমাখ্যেন বাতাদিনা বা সহৈকলোলীভূতেন, অগ্নৌ ছন্নে-চ্ছাদিতে, অন্নমামাশযস্থং ন বিপচ্যতে ভস্মনেব| যথা বাহ্যোঽগ্নৌ স্থগিতে তোযতণ্ডুলাদিকং স্থালীস্থং ন বিপচ্যতে, তথৈবামাশযস্থমন্নমামেন ছন্নেঽগৌ ন বিপচ্যতে| যতশ্চৈবং তস্মাদ্ধেতোরামদোষস্য-পূর্বোক্তস্য, পচনং-পাকমবধিং কৃত্বা, জ্বরিতান্নরানুপবাসযেত্|

Adhikarana udakavarjanam uShNAmbudoShAH shItAmbudoShAH (11-13) · Śloka 13

তৃষ্ণগল্পাল্পমুষ্ণম্বু পিবেদ্বাতকফজ্বরে| তত্কফং বিলযং নীত্বা তৃষ্ণামাশু নিবর্তযেত্||১১|| উদীর্য চাগ্নিং স্ত্রোতাংসি মৃদূকৃত্য বিশোধযেত্| লীনপিত্তানিলস্বেদশকৃন্মূত্রানুলোমনম্||১২|| নিদ্রাজাড্যারুচিহরং প্রাণানামবলম্বনম্| বিপরীতমতঃ শীতং দোষসঙ্ঘাতবর্দ্ধনম্||১৩||

স০-[ তৃষ্ণক্- ] তৃষ্ণাবান্নরঃ, অল্পাল্পং-স্তোকং স্তোকং, বাতকফজ্বরে উষ্ণাম্বু পিবেত্| তৃষ্ণগিতি " স্বপিতৃষোর্নজিঙ্" ইতি নজিঙ্| অল্পাল্পমিতি "প্রকারে গুণবচনস্য" ইতি দ্বিত্বম্| তত্-উষ্ণাম্বু পীতং, কফং-বাতস্ত্যানং, বিলযং নীত্বা-বিলীনবিগ্রহতামাপাদ্য, তৃষ্ণামাশু নিবর্তযেত্, তর্পণ স্বভাবত্বাত্| তথা, অগ্নিমুদীর্য-সমিদ্ধং কৃত্বা, স্রোতাংসি বিশোধযেত্| কিং কৃত্বা ? মৃদূকৃত্য,-তেষাং স্রোতসাং মার্দবমুত্পাদ্য| তথা, লীনানি-অপ্রবৃত্তস্বরূপাণি ছ, তানি পিত্তানিলস্বেদশকৃন্মূত্রাণি চ, তেষামনুলোমনং-প্রবর্তনম্| তথা, প্রাণানাং-জীবিতাখ্যানাং, অবলম্বনম্| তদুষ্ণং জলমাশ্রিত্য তথা প্রাণাঃ প্রবর্তন্ত ইত্যর্থঃ| অনেন চোষ্ণাম্বুকর্মকথনব্যাজেন বাতকফজ্বরস্বরূপমপি কিঞ্চিত্ প্রকাশযতি| যথা,-বাতশোষিতেন কফেন স্ত্যানীভূতেনাত্র তৃষ্ণা জাযতে, তথাঽধিকমগ্নিমান্দ্যম্, স্রোতসামশুদ্ধত্বম্, তথা লীনানি পিত্তাদীন্যত্র স্যুঃ, ইতি|

Adhikarana javaravisheShe uShNAmbuniShedhaH (14-15) · Śloka 15

উষ্ণমেবংগুণত্বেঽপি যুঞ্জ্যান্নৈকান্তপিত্তলে| উদ্রিক্তপিত্তে দবথুদাহমোহাতিসারিণি||১৪|| বিষমদ্যোত্থিতে গ্রীষ্মে ক্ষতক্ষীণেঽস্রপিত্তিনি| |১৫|

স০-এবংগুণমপ্যুষ্ণাম্বু একান্তপিত্তলে-কেবলপিত্তলে জ্বরিণি, বা, ন যুঞ্জ্যাদিতি| তথা, উদ্রিক্তং-অধিকং, পিত্তং যস্মিংস্তস্মিংশ্চ ন যুঞ্জ্যাত্| তথ, তদুষ্ণাম্বু দবথ্বাদিমতি নরে ন যুঞ্জ্যাত্| চক্ষুরাদিভ্যো যস্তীব্র ঊষ্মা প্রবর্ততে স দবথুঃ| সর্বাঙ্গীণস্তীব্র ঊষ্মা-দাহঃ| মোহো-ভ্রমঃ| তথা, বিষমদ্যাভ্যামুত্থিতে-জাতে জ্বরে| তথা, গ্রীষ্মকালে| তথা, ক্ষতশ্চ ক্ষীণশ্চ ক্ষতক্ষীণঃ, ক্ষতঃ-উরঃক্ষতঃ, ক্ষীণো-ধাত্বপচযবান্, তস্মিংস্তথাভূতে নরে ন যুঞ্জ্যাত্| তথা,অস্রপিত্তনি-রক্তপিত্তবতি [ নরে, ন যুঞ্জযাত্ ]|

Adhikarana niShiddhoShNodakAnAM ShaDa~ggAdishrutaM shItodakam (15-16) · Śloka 16

| ঘনচন্দনশুণ্ঠ্যম্বুপর্পটোশীরসাধিতম্||১৫|| শীতং তেভ্যো হিতং তোযং পাচনং তৃড্জ্বরাপহম্| |১৬|

স০-তেভ্যঃ-উদ্রিক্তপিত্তাদিভ্যঃ পিপাসিতেভ্যো,ঘনাদিসাধিতং শীতং তোযং হিতম্| পানীযসাধনে চ তন্ত্রান্তরে বিধিরুক্তো যথা-"কর্ষং গৃহীত্বা দ্রব্যস্য তোযস্য প্রস্থমাবপেত্| অর্ধাবশেষং তদ্ভাহ্যং তোযপানে ত্বযং বিধিঃ||" ইতি|

Adhikarana jvare pittavirUddhaniShedhaH (16-17) · Śloka 17

| ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা||১৬|| তস্মাত্পিত্তবিরুদ্ধানি ত্যজেত্ পিত্তাধিকেঽধিকম্| |১৭|

স০-পিত্তং বিনা ঊষ্মা ন বিদ্যতে, জ্বরশ্চোষ্মণা বিনা নাস্তি, সন্তাপলক্ষণত্বাত্ জ্বরস্য| যতশ্চৈবং তস্মাদ্যানি পিত্তস্য বিরুদ্ধান্যাহারবিহারাদীনি তানি সর্বস্মিন্ জ্বরে ত্যজেত্| পিত্তাধিকে পুনরধিকং কৃত্বা-অতিশযেন, ত্যজেত্| পিত্তাধিক ইত্যত্রাধিকগ্রহণেনেদং প্রতিপাদযতি,-সর্বো জ্বরস্ত্রিদোষজো ভূযসা তু ব্যপদেশ ইতি|

Adhikarana jvare snAnAdiniShedhaH (17) · Śloka 17

| স্নানাভ্যঙ্গপ্রদেহাংশ্চ পরিশেষং চ লঙ্ঘনম্||১৭||

স০-ন কেবলং জ্বরে পিত্তবিরুদ্ধানি ত্যজেত্| যাবত্ স্নানাদীংশ্চ ত্যজেত্| স্নানাদীনাং পিত্তহরত্বাশঙ্কযা সেব্যত্বে প্রাপ্তেঽচিন্ত্যপ্রভাবত্বাত্ জ্বরে বিরুদ্ধানীতি তত্সেবনং নিষেধতি| প্রদেহঃ চন্দনাদ্যনুলেপঃ| পরিশেষং চ লঙ্ঘনং ত্যজেত্, যল্লঙ্ঘনমুপযুক্তমুপবাসলক্ষণং ততো যদন্যত্তত্ পরিশেষম্,-শুধ্দ্যাদ্যেকাদশপ্রকারং চ, তত্ত্যজেত্| উপবাসলক্ষণং তু লঙ্ঘনং নবজ্বরে কর্তব্যমেব|

Adhikarana niShedhe yuktiH (18-19) · Śloka 19

অজীর্ণ ইব শূলঘ্নং সামে তীব্ররুজি জ্বরে| ন পিবেদৌষধং তদ্ধি ভূয এবামমাবহেত্||১৮|| আমাভিভূতকোষ্ঠস্য ক্ষীরং বিষমহেরিব| |১৯|

স০-যথাঽজীর্ণে সামে তীব্ররুজ্যপি শূলঘ্নমৌষধং ন পিবেত্, প্রত্যবাযভযাত্| তথৈব সামে জ্বরে দারুণপীডাবতি তদানীমামপক্ত্যর্থ মুস্তাপর্পটকাদ্যৌষধং ক্বাথাদিকল্পনাকল্পিতং ন পিবেত্| হি-যস্মাত্, তত্-ঔষধং পীতং, অস্যামবস্থাযামামাভিভূত কোষ্ঠস্য প্রযুক্তং ভূয এবামমাবহেত্| অত্র চ সাম ইত্যুক্তে বহ্বাম ইতি গম্যতে| অল্পে হ্যজীর্ণে ভেষজমনুজ্ঞাতমেব| তথা চোবাচ তন্ত্রকারঃ (হৃ.সূ.অ.৮/১৯)-"জীর্ণাশনে তু ভৈষজ্যং যুঞ্জ্যাত্স্তব্ধগুরুদরে| দোষশেষস্য পাকার্থমগ্নেঃ সন্ধুক্ষণায চ||" ইতি| তস্মাত্সামো বহ্বাম ইতি বোধ্যম্| অথাত্র দৃষ্টান্তমাহক্ষীরং বিষমহেরিব| যথা ক্ষীরং বিষঘ্নমপ্যভিহিতমহীনাং তদেব বিষং কুর্যাত্|

Adhikarana jvaravisheShe svedaH svedaguNAH (19-20) · Śloka 20

| সোদর্দপীনসশ্বাসে জঙ্ঘাপর্বাস্থিশূলিনি||১৯|| বাতশ্লেষ্মাত্মকে স্বেদঃ প্রশস্তঃ, স প্রবর্তযেত্| স্বেদমূত্রশকৃদ্বাতান্ কুর্যাদগ্নেশ্চ পাটবম্||২০||

স০-উদর্দাদযঃ প্রাগুক্তাঃ| উদর্দশ্চ পীনসশ্চ শ্বাসশ্চ তৈঃ সহ বর্ততে যো জ্বরস্তস্মিন্| তথা, জঙ্ঘে, চ পর্বাণি চাস্থীনি ছ, তত্র শূলং, তদ্বিদ্যতে যস্য তস্মিংশ্চ| তথা, বাতশ্লেষ্মাত্মকে বাতকফোদ্ভবে স্বেদঃ প্রশস্তো-হিতঃ| স আচরিতঃ স্বেদাদীন্ প্রবর্তযেত্| অগ্নেশ্চ পাটবং-দীপ্ততরত্বং, বিদধ্যাত্|

Adhikarana snehoktAcAravidhipAlanam (21) · Śloka 21

স্নেহোক্তমাচারবিধিং সর্বশশ্চানুপলযেত্| |২১|

স০-তথা, স্নেহোক্তং-স্নেহবিধ্যধ্যাযে কথিতং,চাচারবিধিং চ সর্বশোঽনুপালযেত্, কুর্যাদিত্যর্থঃ|

Adhikarana la~gghanAdInAM prayogakAlaH (21-22) · Śloka 22

| লঙ্ঘনং স্বেদনং কালো যবাগ্বস্তিক্তকো রসঃ||২১|| মলানাং পাচনানি স্যুর্যথাবস্থং ক্রমেণ বা| |২২|

স-মলানাং-সামানাং বাতাদীনাং পৃথক্স্থিতানাং সংসর্গস্থিতানাং সন্নিপাতস্থিতানাং চ, সমর্থ্যাল্লঙ্ঘনাদযস্তিক্তরসাবসানাঃ পাচনানি স্যুঃ| যথাবস্থং-অবস্থানতিক্রমেণ| কস্যাঞ্চিজ্জ্বরাবস্থাযাং লঙ্ঘনং-উপবাসলক্ষণং, মলানাং পাচনং স্যাত্| কস্যাঞ্চিত্ স্বেদনং স্যাত্| [কস্যাঞ্চিত্ ] কালঃ ষডহাখ্যঃ| কস্যাঞ্চিদ্যবাগ্বঃ-পেযাঃ| কস্যাঞ্চিত্তিক্তকো রসঃ-তিক্তরসাগ্জ্রাতদ্রব্যোপযোগঃ| এবমবস্থাবশাত্ লঙ্ঘনাদযস্তিক্তরসান্তা মলানামেকৈকশঃ পাচনানি স্যুঃ| অথবা ক্রমেণৈব পাচনানি স্যুঃ, যথা-লঙ্ঘনং স্বেদনং চ কৃত্বা ষডহাদূর্ধ্বং যবাগ্বস্তিক্তকো রসঃ পাচনান্যবিপক্বানাং মলানাং তরুণে জ্বরে স্যুঃ| তত্র "আমাশযস্থঃ" (শ্লো.১) ইত্যাদিনা গ্রন্থেন নির্দিষ্টা লঙ্ঘনযোগ্যাবস্থা, "সোদর্দপীনস" (শ্লো. ১৯) ইত্যাদিনা চ স্বেদনযোগ্যাবস্থা, "ইত্যযং ষডহো নেযঃ" (শ্লো. ৩৮) ইত্যাদিনা চ নির্দিষ্টা কালযোগ্যাবস্থা, "যুক্তং লঙ্ঘিতলিঙ্গৈস্তুতং" (শ্লো. ২৪) ইত্যাদিনা পেযাযোগ্যাবস্থা, "উদ্রিক্তপিত্তে" (শ্লো. ১৪) ইত্যাদিনা চ তিক্তরসোপযোগযোগ্যাবস্থা, ইতি যথাবস্থং দ্রষ্টব্যম্| ক্রমস্তু যথা,-বাতশ্লেষ্মকে সামে জ্বরে প্রথমং লঙ্ঘনং কুর্বন্নেব স্বেদনং দ্বিত্রাদিদিনলক্ষণং চ কালং লঙ্ঘিতলক্ষণযুক্তস্য যবাগ্বাদিপেযাদ্যন্নভুক্তস্যানন্তরং মুস্তাপর্পটকাদিতিক্তরসোপযোগঃ, ইতি ক্রমার্থঃ| অস্যবিশিষ্টবিষযেঽপবাদমাহ-

Adhikarana jvaraviSheSe la~gghananiShedhaH (22-23) · Śloka 23

| শুদ্ধবাতক্ষযাগন্তুজীর্ণজ্বরিষু লঙ্ঘনম্||২২|| নেষ্যতে| |২৩|

স০-শুদ্ধেন বাতেন-আমদোষাদ্যদুষ্টেন, যো জ্বরঃ স শুদ্ধবাতজ্বরঃ| ক্ষযেণ-ধাত্বপচযাদিলক্ষণেন, যো জ্বরঃ স ক্ষযজ্বরঃ| যশ্চ ভূতবিষবায্বগ্নিসম্প্রহারাদিসমুদ্ভবঃ স আগন্তুজ্বরঃ| তথা, অতরুণো জ্বরঃ স জীর্ণজ্বরঃ| তে বিদ্যন্তে যেষাং ত এবংভূতাঃ| তেষু লঙ্ঘনং নেষ্যতে| তেষু তর্হি কিং কার্যম্ ? ইত্যাহ-

Adhikarana tatra bRuMhaNarUpaM shamanam (23) · Śloka 23

তেষু হি হিতং শমনং যন্ন কর্শনম্| |২৩|

স০-হি-যস্মাত্, তেষু-শুদ্ধবাতাদিজ্বরেষু, শমনং হিতম্| শমনস্য সন্তর্পণাপতর্পণরূপেণ দ্বৈবিধ্যাত্ কিং তচ্ছমনং তেভ্যো হিতম্ ? ইত্যাহ-যন্ন কর্শনম্, বৃংহণমিত্যর্থঃ| যদ্যেবং তত্স্পষ্টমেব বৃংহণমিত্যেতদেব কস্মান্ন কৃতম্ ? কিং শমনং যন্ন কর্শনমিতি পদদ্বযোপাদানেন ? ব্রূমঃ| অর্থান্তরদ্যোতনার্থমেতদুক্তম্| তথা চাযমর্থো বিশিষ্ট উভযযোরুপাদানেন প্রকাশ্যতে| যথা-ন সর্বসর্বিকযা যদ্বৃংহণং শমনং তত্তেভ্যো হিতম্| কিন্তর্হি ? কিঞ্চিদ্বৃহণং শমনং তত্তেভ্যো হিতমিতি|

Adhikarana ala~gghitalakShaNam (23-24) · Śloka 24

| তত্র সামজ্বরাকৃত্যা জানীযাদবিশোষিতম্||২৩|| দ্বিবিধোপক্রমজ্ঞানমবেক্ষেত চ লঙ্ঘনে| |২৪|

স০-[ তত্র- ] তেষু জ্বরেষু, মধ্যে, সামজ্বরস্যাকৃত্যা লক্ষণেন "জ্বরোপদ্রবতীক্ষ্ণত্বং" (হৃ. নি. অ. ২/৫৪) ইত্যাদিনা, অবিশোষিতং-অলঙ্ঘিতং, বিদ্যাত্| লঙ্ঘনে-লঙ্ঘনলক্ষণাপেক্ষযা, দ্বিবিধোপক্রমজ্ঞানং-দ্বিবিধোপক্রমণীযাধ্যাযোক্তলক্ষণং, চবেক্ষেত| তল্লক্ষণং-চ-"বিমলন্দ্রিযতা সর্গো মলানাং" (হৃ.সূ.অ.১৪/১৭) ইত্যাদি| "অতিকার্শ্য" (হৃ,সূ.অ. ১৪/২৯) ইত্যাদিভিরতি লঙ্ঘিতং চ|

Adhikarana peyopacAraH peyopacAraPalam (24-26) · Śloka 26

| যুক্তং লঙ্ঘিতলিঙ্গৈস্তু তং পেযাভিরুপাচরেত্||২৪|| যথাস্বৌষধসিদ্ধাভির্মণ্ডপূর্বাভিরাদিতঃ| ষডহং বা মৃদুত্বং বা জ্বরো যাবদবাপ্নুযাত্||২৫|| তস্যাগ্নির্দীপ্যতে তাভিঃ সমিদ্ভিরিব পাবকঃ| |২৬|

স০-লঙ্ঘিতলিঙ্গৈঃ-বিশোষিতলক্ষণৈঃ, যুক্তং জ্বরিতং নরং জ্ঞাত্বা তং পেযাভিরুপাচরেত্| কিম্ভূতাভিঃ ? যথাস্বৌষধসিদ্ধাভিঃ| যদ্যত্স্বং যথাস্বমিতি বীপ্সাযামব্যযীভাবঃ| যথাস্বং চ তদৌষধং চ যথাস্বৌষধম্| বাতাদেঃ পৃথগ্রূপস্য সংসৃষ্টস্য সন্নিপতিতস্য যদ্যস্য যোগ্যমৌষধং তেন সিদ্ধাভিঃ-বক্ষ্যমাণৈঃ পেযাদিদ্রব্যৈর্যথাযথং যোগ্যৈঃ কৃতাভিরিত্যর্থঃ| কিম্ভূতাভিঃ ? মণ্ডঃ পূর্বঃ-প্রধানঃ, অচ্ছতযা যাভ্যস্তাভিরিতি সমাসঃ| এবং মণ্ডাত্ কিঞ্চিদ্ধনাঃ পেযাঃ কার্যা ইত্যর্থোঽবতিষ্ঠতে| ন তু মণ্ডঃ পূর্বঃ-প্রথমোঽভ্যবহারো, যাসাং তা মণ্ডপূর্বা ইতি ব্যাখ্যেযম্| এবং হি ব্যাখ্যাযমানে সর্বাসাং পেযানাং মণ্ডপূর্বাণাং জ্বরেঽভ্যবহারঃ প্রাপ্নোতি| ততশ্চ (শ্লো.২৭)-"সৃষ্টবিড্বহুপিত্তো বা সশুণ্ঠীমাক্ষিকাং হিমাং পেযাং পিবেত্|" তামপি মণ্ডপূর্বা পিবেত্, ন কেবলামিতি| এতশ্চ ক্রিযমাণং বিরুদ্ধং স্যাত্| তথা ক্বথিতামলকেঽত্যর্থং পিত্তশমনে ক্ব মণ্ডঃ ? তথা ক্ব বহুপিত্তো জ্বরী বা মণ্ডঃ "শৃতঃ পিপ্পলীশুণ্ঠীভ্যাং যুক্তো লাজাম্বুদাডিমৈঃ|" (চ.সূ.অ. ২৭/২৫৬) ইত্যেবংস্বরূপঃ ? পেযাযাশ্চ জ্বরঘ্নত্বমুক্তম্| তথা ক্ষুধিতে সম্যগ্লঙ্ঘিতং জ্ঞাত্বা মণ্ডাত্ কিঞ্চিদ্ধনাভিঃ পেযাভিরসাবুপাচরণীযঃ| তস্য-জ্বরিণঃ, তাভিঃ-পেযাভিঃ, অগ্নির্দীপ্যতে-সমিধ্যতে, সমিদ্ভিঃ-"এধৈঃ, যথা বাহ্যঃ পাবকঃ| মুনিনা চোক্তম্ (চ.চি.অ.৩/১৪৯)-"তাশ্চ ভেষজসংযোগাল্লঘুত্বাচ্চাগ্নিদীপনাঃ| চোক্তম্ (চ.চি.অ.৩/১৪৯)-"তাশ্চ ভেষজসংযোগাল্লঘুত্বাচ্চাগ্নিদীপনাঃ| বাতমূত্রপুরীষাণাং দোষাণাং চানুলোমনাঃ| স্বেদনায দ্রবোষ্ণত্বাদ্দ্রবত্বাত্তৃট্প্রশান্তযে| আহারভাবাত্ প্রাণায সরত্বাল্লাঘবায চ|| জ্বরধ্যো জ্বরসাত্ম্যত্বাত্তস্মাত্পেযাভিরাদিতঃ| জ্বরানুপাচরেদ্ধীমান্" ইতি| খরনাদেনাপ্যুক্তম্-"পিবেদ্চ্চাং সসিক্থাং বা স্বাং স্বাং পেযা নবজ্বরে|" ইতি| কিযন্তং কালং জ্বরিণং পেযাভিরুপরেত্ ? ইত্যাহ-ষডহমিত্যাদি| পেযাভির্জ্বরিণং ষডহং যাবদুপাচরেত্| ষণ্ণামহ্নাং সমাহারঃ, "তদ্ধিতার্থোত্তরপদ" ইত্যাদিনা সমাসঃ, "রাজাহঃসখিভ্যষ্টচ্" ইতি টচ্, ন সঙ্খ্যাদেঃ সমাহারে" ইত্যহ্নাদেশো যদি শান্তো জ্বরস্তদা দোষদূষ্যাদ্যপেক্ষযা ভক্তযূষাদিভিরুপাচরেদিতি বাশাব্দেন গমযতি| মৃদুত্বং বেতি| অথবা ষডহেঽতী তেঽপি যাবজ্জ্বরো মার্দবং গচ্ছতি তাবত্পেযাভিরুপাচরেত্| ননু, তর্হি কিং ষডহং বেত্যনেন ? অত্র কেচিদেবমাহুঃ| ষডহাদর্বাক্প্রাযেণ মৃদুতাযামপি জাতাযাং ষডহং যাবত্ জ্বরিণং পেযাভিরুপাচরেদিতি দ্যোতনার্থং ষডহং বেতি কৃতম্| অপরে তু কাল এব বাহুল্যেন জ্বরমার্দবস্যেতি জ্ঞাপনার্থমিদং কৃতমিতি মন্যন্তে| জ্বরমার্দবে তু জাতে পাচনাদিযোগঃ কার্যঃ| তথা চ বক্ষ্যতি (শ্লো.৩৯)- "ততঃ পক্বেষু দোষেষু লঙ্ঘনাদ্যৈঃ প্রশস্যতে| কষাযঃ" ইতি| অথ তা এব পেযা বক্তুমুপক্রমতে

Adhikarana lAjapeyA prathamaM yojyA amlArthinaH peyA (26-27) · Śloka 27

| প্রাগ্লাজপেযাং সুজরাং সশুণ্ঠীধান্যপিপ্পলীম্||২৬|| সসৈন্ধবাং, তথাঽম্লার্থী তাং পিবেত্সহদাডিমাম্| |২৭|

স০-প্রাক্-পূর্বং সর্বাভ্যঃ পেযাভ্যো, লাজপেযাং পিবেত্, ন তু যবাদিপ্রকৃতিজাং পেযাম্| কীদৃশীম্ ? সুজরাম্, অল্পজত্বাদ্যাচ্ছীঘ্রং জরাং যাতি তাম্| তথা, সশুণ্ঠীধান্যপিপ্পলীংশুণ্ঠ্যাদিভিঃ শৃতামিতি বোধ্যম্| অত এব সসৈন্ধবামিতি পৃথগ্ নির্দিষ্টম্| অন্যথা সশুণ্ঠীধান্যপিপ্পলীসৈন্ধবামিতি নির্দেশং কুর্যাত্| মুনিরপ্যাহ (চ. চি. অ. ৩/১৭৭)- "লাজপেযাং চ সুজরাং পিপ্পলীনাগরৈঃ শৃতাম্" ইত্যাদি| সসৈন্ধবামিত্যত্র সশব্দস্যেষত্পর্যাযত্বাত্ অল্পসৈন্ধবামিতিবোধ্যম্| তথা, অম্লার্থী-যো জ্বর্যম্ল প্রার্থযতে সঃ, তাং-পূর্বোক্তাং পেযাং, সহদাডিমাং পিবেত্| পূর্বস্যাঃ পেযাযাঃ সদাডিমত্বমেবাস্যা বিশেষঃ| "বোপসর্জনস্য" ইতি সহশব্দস্য সভাবঃ|

Adhikarana shithilamalapittottarayo peyA (27) · Śloka 27

| সৃষ্টবিড্ বহুপিত্তো বা সশুণ্ঠীমাক্ষিকাং হিমাম্||২৭||

স০-পিবেদিত্যনুবর্ততে| সৃষ্টবিট্-ভিন্নবর্চা জ্বরী, বহুপিত্তো বা সশুণ্ঠীমাক্ষিকাং হিমাং পেযাং পিবেত্, নোষ্ণাং নান্যথা যো জ্বরী| ধান্যপিপ্পল্যাবত্রাপাস্যে, শুণ্ঠীগ্রহণাত্| অত্র চ শুণ্ঠ্যা দ্রব্যেভ্যোঽসংযোগান্মধুরপাকত্বাদগ্নিমান্দ্যোত্সারণোপক্ষীণশক্তিত্বাদ্ যুক্তঃ পিত্তে প্রযোগঃ| এবমন্যত্রাপি শুণ্ঠ্যাঃ প্রযোগে চিন্ত্যম্| সৈন্ধবং তু তাবন্মাত্রং সর্বত্রাবিরুদ্ধমেব|

Adhikarana bastyAdishUlinaH (28) · Śloka 28

বস্তিপার্শ্বশিরঃশূলী ব্যাঘ্রীগোক্ষুরসাধিতাম্| |২৮|

স০-বস্ত্যাদিশূলী ব্যাঘ্রীগোক্ষুরসাধিতাং পেযাং পিবেত্|

Adhikarana jvarAtisAriNaH peyA (28-29) · Śloka 29

| পৃশ্নিপর্ণীবলাবিল্বনাগরোত্পলধান্যকৈঃ||২৮|| সিদ্ধাং জ্বরাতিসার্যম্লাং পেযাং দীপনপাচনীম্| |২৯|

সং-পৃশ্নিপর্ণ্যাদিসাধিতাং পেযাং দীপনপাচনীং জ্বরাতি সারবান্ অম্লাং পিবেত্| দীপনী চাসৌ পাচনী চেতি পুংবত্কর্মধারযেতি পুংবদ্ভাবঃ| অত্রাম্লগ্রহণং ন কর্তব্যম্| যতঃ সর্বত্রপেযাপ্রসঙ্গেঽম্লার্থী যো জ্বরী স সদাডিমাং পেযাং পিবেদিত্যুক্তম্| তস্মাত্কিমনেন ? ব্রূমঃ| অম্লাভিলাষী ভবতু বা মা ভবতু| তথাঽপ্যম্লামেব জ্বরাতিসারী পিবেদিত্যস্যার্থস্য দ্যোতনার্থমম্লামিত্যুক্তম্|

Adhikarana hidhmAdiyuktasya peyA (29) · Śloka 29

| হ্রস্বেন পঞ্চমূলেন হিক্কারুক্শ্বাসকাসবান্||২৯||

স০-পিবেত্সিদ্ধামিত্যত্রানুবর্ততে| হ্রস্বেন-বৃহত্যাদিনা, পঞ্চমূলেন সিদ্ধাং পেযাং হিধ্মাদিবান্ পিবেত্|

Adhikarana kaPArtasya peyA (30-31) · Śloka 31

পঞ্চমূলেন মহতা কফার্তো যবসাধিতম্| বিবদ্ধবর্ছাঃ সযবাং পিপ্পল্যামলকৈঃ কৃতাম্||৩০|| যবাগূং সর্পিষা ভৃষ্টাং মলদোষানুলোমনীম্| |৩১|

স-কফার্তো নরো বিল্বাদিনা-মহতা, পঞ্চমূলেন সহ যবসাধিতাং পিবেত্| তণ্ডুলা এবাত্র প্রকৃতিত্বেন যোজ্যাঃ| যবাস্তুক্বাথ এব| বিবদ্ধং-বিষ্টব্ধং, বর্চঃ-পুরীষং, যস্য-নরস্য, স নরঃ সযবাং-যবপ্রধানাং পিবেত্| কিম্ভূতাম্ ? পিপ্পল্যামলকৈঃ কৃতাম্| তথা, সর্পিষা ভৃষ্টাং-সম্যগাজ্যেন সংস্কৃতাম্| তথা, মলঃ-পুরীষাদিঃ, দোষো-বাতাদিঃ, তেষামনুলোমনীং-স্বমার্গপ্রবর্তিনীম্|

Adhikarana vibaddhashUlayuktasya peyA (31-32) · Śloka 32

| চবিকাপিপ্পলীমূলদ্রাক্ষামলকনাগরৈঃ||৩১|| কোষ্ঠে বিবদ্ধে সরুজি| |৩২|

স০-কোষ্ঠে বিবদ্ধে-বিবদ্ধদোষাধিষ্ঠানে, তথা সরুজি চবিকাদিভিঃ সাধিতাং পেযাং পিবেত্|

Adhikarana parikartinaH peyA (32) · Śloka 32

পিবেত্তু পরিকর্তিনি| কোলবৃক্ষাম্লকলশীধাবনীশ্রীফলৈঃ কৃতাম্||৩২||

স০-তুঃ পুনরর্থে| পরিকর্তনং-পরিকর্তিকা ছেদনমিবানুভবঃ, স যস্যাস্তি স পরিকর্তী কোষ্ঠঃ, তস্মিন্পরিকর্তিনি তু কোষ্ঠে, কোলাদিভিঃ সাধিতাং পেযাং পিবেত্| শ্রীফলং-বিল্বফলম্|

Adhikarana asvedanidrAtRuShNArtasya peyA (33-34) · Śloka 34

অস্বেদনিদ্রস্তৃষ্ণার্তঃ সিতামলকনাগরৈঃ| সিতাবদরমৃদ্বীকাসারিবামুস্তচন্দনৈঃ||৩৩|| তৃষ্ণাছ্ছর্দিপরীদাহজ্বরঘ্নীং ক্ষৌদ্রসংযুতাম্| |৩৪|

স০-অস্বেদনিদ্রো নরস্তৃষ্ণার্তশ্চ সিতাদিভিঃ সাধিতাং পেযাং পিবেত্|

Adhikarana peyauShadhairevarasayUShAdikAnapi kuryAt (34) · Śloka 34

| কুর্যাত্পেযৌষধৈরেব রসযূষাদিকানপি||৩৪||

সং-পেযোদ্দিষ্টৈরেবৌষধৈর্মাংসরসাদযোঽপি যথোপযোগং কর্তব্যাঃ| [ তথা চ সঙ্গ্রহেঽধ্যগীষ্ট-(চি. অ. ১)-"কুর্যাত্ পেযৌষধরেব রসযূষাদিকানপি|" ] রসোঽত্র মাংসরসঃ| যূষাঃ-মুদ্গাদিসম্বন্ধিনঃ ক্বাথাঃ| আদিগ্রহণাত্ পানিযমস্তুতক্রব্যঞ্জনাদযো গৃহ্যন্তে| পেযাদিষু চ দ্রব্যপরিমাণাদিকং পূর্বোক্তং সূপশাস্ত্রাদিভ্যো বাঽবগন্তব্যম্| তথা চ তন্ত্রান্তরে-"পেযাযূষরসাদ্যেষু রসালাপানকাদিষু| দ্রব্যমাত্রাং প্রযুঞ্জীত লোকসিদ্ধাং যথার্হতঃ||" ইতি|| যস্য পুংসো যত্পরিমাণৈর্দ্রব্যৈর্মাত্রা যোগ্যা তস্য তত্পরিমাণৈর্দ্রব্যৈরেব পেযাদযঃ কার্যা ইত্যর্থঃ| অন্যে ত্বেবং মন্যন্তে,-পেযাযূষরসাদ্যেষু দ্রব্যপরিমাণমল্পমেব কল্পযিতব্যম্| পানার্থে চ যদ্দ্রব্যৈঃ সধিতং তোযমুক্তং তদল্পপরিমাণদ্রব্যৈরেব সধনীযম্| অল্পপরিমাণেনৈব দ্রব্যেণ তত্তোযং সম্যক্ পাচ্যতে| তথা চ খারণাদিরপাঠীত্-"বহুদ্রব্যো ঘনঃ ক্বাথঃ স্বচ্ছমল্পৌষধং জলম্|" ইতি| শ্রপণক্রিযাসামান্যেঽপ্যস্যোভযস্য পৃথক্সংজ্ঞাবিনির্দেশো দ্রব্যপরিমাণভেদাদযং ক্বাথ ইদং জলমিতি| জ্বরিণাং চ প্রথমং যথাঽচ পেযা দেযাস্তথা যূষরসা অপ্যচ্ছা এব দেযাঃ, অগ্নিমান্দ্যভযাত্| ক্বাথোঽপ্যত এব বহুপরিমাণদ্রব্যসাধ্যত্বাদ্ধনতযা তিক্তরসদ্রব্যকৃতোঽপি প্রথমং জ্বরে নিষিদ্ধঃ| কিং সর্বত্র জ্বরে সর্বাঃ সর্বদা সর্বস্মিন্দেশে পেযা দেযা ন ? ইত্যাশঙ্ক্যাহ-

Adhikarana jvaravisheShe peyAniShedhaH (35-36) · Śloka 36

মদ্যোদ্ভবে মদ্যনিত্যে পিত্তস্থানগতে কফে| গ্রীষ্মে তযোর্বাঽধিকযোস্তৃট্ছর্দির্দাহপীডিতে||৩৫|| ঊর্ধ্বং প্রবৃত্তে রক্তে চ পেযাং নেচ্ছন্তি| |৩৬|

স০-মদ্যোদ্ভব ইত্যাদিষ্বর্থেষু পেযাং নেচ্ছন্তি, মুনয ইতি শেষঃ| মদ্যেনোদ্ভবো যস্য তস্মিন্ মদ্যোদ্ভবে জ্বরে, তথা মদ্যনিত্যে পুরুষে, তথা কফে পিত্তস্থানগতে সতি, তথা গ্রীষ্মকালে, তথা তযোর্বাঽধিকযোঃ, তযোরিতি পিত্তকফৌ পরামৃশ্যেতে, পিত্তকফযোশ্চাধিকযোঃ, পিত্তস্থানগতে কফ ইত্যস্তযোরেব প্রকৃতত্বাত্, তথা তৃট্ছর্দির্দাহৈঃ সমুদিতৈঃ পীডিতে পুরুষে যো জ্বরস্তস্মিংশ্চ, প্রত্যেকং তু তৃডার্তেঽনুজ্ঞাতৈব, আস্বেদনিদ্রস্তৃষ্ণাত্র্ত ইত্যুক্তেঃ, দাহার্তেঽপি সৃষ্টবিড্বহুপিত্তো বেত্যাহ, তথা যস্যোর্ধ্বং প্রবৃত্তে রক্তে জ্বরস্তস্মিংশ্চ পেযাং নেচ্ছন্তি| তেষু তর্হি কিং কার্যম্ ? ইত্যাহ-

Adhikarana niShiddhapeyasya tarpaNam (36-37) · Śloka 37

তেষু তু| জ্বরাপহৈঃ ফলরসৈরদ্ভির্বা লাজতর্পণান্||৩৬|| পিবেত্সশর্করাক্ষৌদ্রান্| |৩৭|

স০-তেষু পুনর্বিষযভূতেষু লাজতর্পণান্-লাজসক্তূন্, পিবেত্,-পেযাবসরে ন তু যবসক্তূন্ পিবেত্| জ্বরাপহৈঃ ফলরসৈঃদ্রাক্ষাদীনাং জ্বরঘ্নানাং ফলানাং রসৈঃ-স্বরসৈঃ, অথবা তদ্রসৈঃক্বাথৈঃ| অথবা, অদ্ভিঃ-জলৈঃ, ক্বথিতশীতলৈরিত্যর্থাদ্গম্যতে| কিম্ভূতান্ লাজতর্পণান্ ? সশর্করাক্ষৌদ্রান্|

Adhikarana tato yUShaudananarasaudanau (37-38) · Śloka 38

ততো জীর্ণে তু তর্পণে| যবাগ্বাং বৌদনং ক্ষুদ্বানশ্নীযাদ্ভৃষ্টতণ্ডুলম্||৩৭|| দকলাবণিকৈর্যূষৈ রসৈর্বা মুদ্গলাবজৈঃ| |৩৮|

স০-ততঃ-তর্পণপানাদনন্তরং, জীর্ণে তর্পণে, যবাগ্বাং বেতি যবাগূপানার্হে নরে যবাগ্বাং জীর্ণাযাং, ক্ষুদ্বান্ পুরুষো-জাতবুভুক্ষঃ সন্, দ্বিতীযেঽন্নকাল ওদনমশ্নীযাত্-ভুঞ্জীত| কিম্ভূতম্ ? ভৃষ্টাস্তণ্ডুলা যস্মিন্| কিং কেবলমোদনং ভুঞ্জীত ? নেত্যাহ-দকেত্যাদি| দকলাবণিকৈঃ-কুলত্থাদীনাং সম্বন্ধিভির্যূষঃ-ক্বাথৈঃ, ওদনমদ্যাত্| অথবা, অবস্থাবশাত্ মুদ্গলাবজৈরোদনমদ্যাত্| মুদ্গলাবজরসৈরিতি বক্তব্যে রসৈরিতি পৃথঙ্নির্দেশো লাবজরসানাং প্রাধান্যজ্ঞাপনার্থম্| তথা লাবজরসাঃ সংস্কার্যাঃ সংস্কারকাশ্চ মুদ্গাঃ, অত এব বহুমাত্রাণাং লাবানামল্পানাং চ মুদ্গানামত্রোপযোগঃ কার্য ইত্যবতিষ্ঠতে| "নাতিমাং সাস্তনুরসা দকলাবণিকাঃ স্মৃতাঃ|" ইতি কেচিদাহুঃ| অন্যেত্বাচক্ষতে,-"অল্পমাংসপটুস্নেহা দকলাবণিকাঃ স্মৃতাঃ|" ইতি|

Adhikarana maNDAdyupacArasyopasaMhAraH (38) · Śloka 38

| ইত্যযং ষডহো নেযো বলং দোষং চ রক্ষতা||৩৮||

স০-ইতি-পূর্বোক্তেন প্রকারেণ, প্রথমো জ্বরস্য ষডহো নেযঃ অতিবাহ্যঃ, নান্যো জ্বরস্য সম্বন্ধী, ইত্যযমিতি নির্দেশাল্লভ্যতে- কিং কুর্বতা ভিষজা ষডহো নেযঃ ? বলং রক্ষতা, তথা দোষং তত্কালে সামং বাতাদ্যন্যতমং পৃথক্ সংসৃষ্টং সন্নিপতিতং বা তজ্জ্বরকারণং রক্ষতা,-তত্র তদ্রক্ষাং কুর্বতা, যথাঽসৌ দোষঃ কৃচ্ছ্রসাধ্যতামসাধ্যতাং বা ন যাতি| অত্র চ যদি কিল বলরক্ষার্থং সন্তর্পণং ক্রিযতে তদা সন্তর্পণস্যামবৃদ্ধিহেতুত্বাত্ সামো দোষো বর্ধেত, অথামদোষক্ষপণার্থমপতর্পণং কুর্বীত তদা বলহানিঃ স্যাত্, তস্মান্মধ্যমযা বৃত্ত্যাঽবহিতেন বৈদ্যেনোভযং রক্ষতোপক্রমঃ কার্যঃ, নাত্রাবহেলা কার্যেত্যর্থঃ|

Adhikarana tataH kaShAyaH (39) · Śloka 39

ততঃ পক্বেষু দোষেষু লঙ্ঘনাদ্যৈঃ প্রশস্যতে| কষাযো দোষশেষস্য পাচনঃ শমনোঽথবা||৩৯||

স০-লঙ্ঘনাদ্যৈঃ-তিক্তসাবসানৈস্তত্কালোচিতৈর্জ্বরকারিসামমলপক্তৄহেতুভিঃ, পক্বেষু দোষেষু ততঃ-ষডহাদূর্ধ্বং, কষাযঃ প্রশস্যতে| মুস্তাপর্পটকাদিঃ পাচনঃ, প্রাধান্যেন পাচনসংজ্ঞযা বিহিতত্বাত্| তথা বক্ষ্যমাণঃ কলিঙ্গকাদিরর্ঘশ্লোকসমাপনঃ (শ্লো. ৪৮) পঞ্চপ্রকারঃ শমনঃ প্রশস্যতে, প্রাধান্যেন শমনসংজ্ঞযা বিহিতত্বাত্| তথা ছাধ্যেষ্যতে তন্ত্রকৃত্ (শ্লো. ৫১) "পঞ্চৈতে সন্ততাদীনাং পঞ্চানাং শমনা মতাঃ|" ইতি| তদেতদুভযং-পাচনশব্দশ্রুত্যাক্ষিপ্তো মুস্তাপপর্টকাদিঃ শমনশ্রুত্যাক্ষিপ্তঃ কলিঙ্গকাদিঃ, কষাযঃ-ক্বাথঃ, প্রশস্যতে| কস্য পাচনঃ ? ইত্যাহ-দোষশেষস্য| অত এব পক্বেষু দোষেষু লঙ্ঘনাদ্যৈরিত্যল্পপক্বেষু পক্বপ্রাযেষ্বীষদামেষু দোষেষ্বিতি বোধ্যম্| অন্যথা পক্বস্য পাচনমযুক্তমিব স্যাত্, পিষ্টপেষণন্যাযেনানর্থকত্বাত্| তথা চাপক্বং যদ্বস্তুজাতং তদগ্নিঃ পছতি, পহন্তমগ্নিঃ পাচনঃ পাচযাত| এবং চ পাক্যাভাবাত্ কিমগ্নিঃ পচতু ? কিং বা কষাযঃ পাচযতু ? ইত্যনুপপন্নমিবৈতত্স্যাত্| যদা পুনর্মুস্তাপর্পটকাদিঃ কলিঙ্গাদিরন্যো বা কশ্চিত্ কষাযস্তিক্তাদ্যন্যতমো বাতাদিদোষজ্বরশান্ত্যর্থং প্রযুজ্যতে তদা পাচনো ভবন্নপি শমনসংজ্ঞঃ, ন পাচনসংজ্ঞঃ| ননু, প্রথম এব দিনে তিক্তরসকষাযমনুজজ্ঞে তন্ত্রকৃত্| তথা চোবাছ (শ্লো. ১৫)- "ঘনচন্দনশুণ্ঠ্যম্বুপর্পটোশীরসাধিতম্| শীতং তেভ্যো হিতং তোযং পাচনং তৃড্জ্বরাপহম্||" ইতি| তত্কথমেতত্ ? অত্রোচ্যতে| জ্বরিণঃ প্রসক্ততৃষোঽবশ্যং পানং কিঞ্চিদ্বিতরণীযম্| ন চ (পানে) মদ্যেক্ষুরসদধিমস্ত্বারনালক্ষীরাদীনামত্র যোগ্যত্বেঽপি জ্বরস্যৈবং বিধানি নিষদ্ধানি তন্ত্রকৃদ্ভিঃ, শিশিরজলমপ্যামদোষস্রোতঃসংরোধাগ্নিসাদাদীনাবহেত্ জ্বরং গাঢতরং কুর্যাত্| তস্মাত্ পানার্থে তিক্তসাধিতমুক্তমম্ব্বনুমেনে| দ্রব্যাণি চাত্র স্বল্পমাত্রযৈব যোজ্যা নীত্যনন্তরমেব প্রত্যপাদি| কিঞ্চ জ্বরিতস্তৃষতো জলং বহৌষধং পাতুমপি ন ক্ষমেত| কিঞ্চ কতিপযান্যেব ঘনাদীনি জলসংস্কারেণ পাতুমনুমতানি, ন সকলান্যপি তিক্তান্যনুমতানি| কিংতর্হি ? বিশিষ্টপ্রভাবং দর্শযন্তি ঘনাদীন্যেব| বিশিষ্টপ্রভাবত্বং চান্যত্রাপি দ্রব্যাণাং দৃষ্টম্| যথা-শমীফলং মধুরমপি কেশঘ্নম্, তথাঽম্লমপ্যামলকং পিত্তকফঘ্নম্, সৈন্ধবং লবণমপি চক্ষুষ্যম্, ইত্যাদ্যন্যদপ্যূহ্যম্| তস্মাত্ ঘনাদীনাং পানীযসংস্কারোপযোগো নবজ্বরেঽপি হিতঃ|

Adhikarana doShavisheShe kaShAyavisheShaH (40) · Śloka 40

তিক্তঃ পিত্তে বিশেষেণ প্রযোজ্যঃ, কটুকঃ কফে| |৪০|

স০-কষায ইতি বর্ততে| জ্বরস্য প্রকৃতত্বাত্ পিত্তে-পিত্তজ্বরে, তিক্তকষাযকল্পনাপ্রকারঃ প্রযোজ্যঃ| তিক্তঃ পিত্তে বিশেষেণেত্যতো বিশেষনির্দেশাদন্যদোষোত্থেঽপি জ্বরে তিক্তরসাধিষ্ঠিতো দ্রব্যকষাযো যথাবস্থং প্রযোজ্যঃ, ন কেবলং পিত্তজ্বরাখ্যে, ব্যাধিদোষঘ্নত্বাত্| তথা তিক্তো রসো নিসর্গত এব জ্বরঘ্নঃ শাস্ত্রেঽস্মিন্পঠিতঃ| যথা (হৃ. সূ. অ. ১০/১৪)- "তিক্তঃ স্বযমরোচিষ্ণুররুচিং কৃমিতৃড্বিষম্| কূষ্ঠমূর্চ্ছাজ্বরোত্ক্লেদদাহপিত্তকফান্ জযেত্||" ইতি| মুনিরপ্যবোচত্ (ছ. সূ. অ. ২৬৪৩)- "তিক্তো রসঃ স্বযমরোছিষ্ণুররোছকঘ্নো বিষঘ্নঃ ক্রিমিঘ্নো মূর্চ্ছাদাহপ্রশমনস্তৃষ্ণাপ্রশমনস্ত্বঙ্মাংসযোঃ স্থিরীকরণো জ্বরঘ্নঃ" ইত্যাদি| তস্মাদ্রসেষু যথা তিক্তরসস্য জ্বরঘ্নত্বং তথা নান্যেষাং রসানামিত্যবেহি| গুডূছ্যাদেশ্চ দ্রব্যস্য তিক্তরসত্বাদেব জ্বরঘ্নত্বস্য প্রতিপাদিতত্বাত্ পুনর্যজ্জ্বরঘ্নত্বমুক্তং তছ্ছক্ত্যুত্কর্ষাযেতি বোধ্যম্| গুডূছ্যাশ্চ মুনি(?)গুণানাহ| যথা (সঙ্গ্রহে অ. ১২)- "তিক্তাঽমৃতা ত্রিদোষঘ্নী গ্রাহিণ্যুষ্ণা রসাযনী| দীপনী জ্বর তৃড্দাহকামলাবাতরগ্ক্তনুত্||" ইতি| এবমন্যেষামপি দ্রব্যাণামাধেযসামর্থ্যাদ্যুত্কর্ষসিদ্ধমপি যত্ পুনরুছ্যতে, তত্তেষাং তস্য কর্মণঃ শক্ত্যুত্কর্ষার্থং বোধ্যম্| কটুক ইত্যাদি| কটুকরসাধিষ্ঠিতো জ্বরঘ্নদ্রব্যবিশেষজঃ ক্বাথঃ কফে-কফজ্বরে প্রযোজ্যঃ, ন তু যঃ কশ্ছিত্কটুকদ্রব্যকষাযঃ, সর্বস্য জ্বরঘ্নত্বানুপপত্তেঃ| যস্মাদ্দ্রব্যপ্রভাবাদ্বিশিষ্টমেব কটুরসাধিষ্ঠিতং কিমপি যদ্ দ্রব্যং তজ্জবরঘ্নমিতি মন্তব্যম্| এতদেব তস্মাছ্ছাযং গ্রন্থকৃত্ "কফে কটুকো যোজ্যঃ" ইতি জগাদ|

Adhikarana kaShAyakaShAyasya niShedhaH niShedhAtikrame doShaH (40-41) · Śloka 41

| পিত্তশ্লেষ্মহরত্বেঽপি কষাযঃ স ন শস্যতে||৪০|| নবজ্বরে, মলস্তম্ভাত্কষাযো বিষমজ্বরম্| কুরুতেঽরুচিহৃল্লাসহিধ্মাধ্মানাদিকানপি||৪১||

স০-কষাযঃ-কষাযরসাধিষ্ঠিতদ্রব্যজঃ কষাযঃ, স পিত্তশ্লেষ্মহরত্বেঽপি নবজ্বরে,-তরুণজ্বরে, ন শস্যতে| কুতঃ ? ইত্যাহ-মলেত্যাদি| কষাযো হ্যত্র যোজিতো মলস্তম্ভাত্কারণাত্ বিষমজ্বরং-সততাদিকং, কুরুতে| কষাযস্তম্ভিতা হি মলাঃ কোষ্ঠমপ্রতিপন্নত্বাত্ সম্যক্পাকমযান্তঃ সন্ধিস্তোতোলীনাঃ কষাযপানবিহিতবেগা অশক্তত্বাদ্বিষমমেব জ্বরং কুর্বন্তি| যদি হি তেষাং কষাযদানেন শক্তিহানির্ন কৃতা স্যাত্ তদা সন্ততমেব জ্বরং কুর্যুঃ| তস্মাত্ স্বল্পত্বাত্ সততাদিকং বিষমজ্বরং কর্তুমেষাং যুক্তম্| ননু, পিত্তশ্লেষ্মহরত্বেপীত্যনর্থম্| যতঃ "কষাযঃ পিত্তকফহা" (হৃ.সূ.অ.১০১২০) ইতি পূর্বমুক্তম্| অস্ত্যেবৈতত্| অর্থবিশেষজ্ঞাপনার্থং তু পুনরুক্তম্| নবজ্বরে-একদোষজে সন্নিপাতজে বাতকফজে বাতপিত্তজে, কেবলং কষাযো ন শস্তোঽপি তু পিত্তশ্লেষ্মজ্বরেঽপি ন শস্তঃ, তস্মাত্ পিত্তকফজেঽপি জ্বরে নাযং যোজ্য ইত্যর্থঃ| তথা, কষাযোঽযং যোজিতো ন কেবলং বিষমজ্বরং করোতি, যাবদরুচ্যাদীশ্চ করোতি| অত্রাপি মলস্তম্ভাদিতি সম্বধ্যতে| তেন যদ্যপ্যাদিশব্দেনানিযতরুপাণামনেকানাব্যাধীনাং গ্রহণং প্রাপ্তম্, তথাঽপি মলস্তম্ভাদ্যে ব্যাধয উত্পদ্যন্তেঽরুচ্যাদিরূপাস্তেষামেবেহ গ্রহণার্থমেবং সম্বন্ধঃ কৃতঃ| তথা, বিষমজ্বরারুচিহৃল্লাসহিধ্মাধ্মানাদিকানপীত্যেকবিভক্ত্যৈব নির্দেশঃ কর্তুং ব্যবচ্ছদ্য পৃথঙ্ক্নির্দেশো যঃ কৃতস্তেনেদং দ্যোত্যতে,-কষাযঃ প্রযোজিতোঽবশ্যমেব বিষমজ্বরং কুরুতে, অরুচ্যাদীন্ পুনর্নাবশ্যং কুরুতে, ইতি| তদেবং কষাযো রসবিশেষো মলস্তম্ভাদেব নবজ্বরে নিষিধ্যতে, ন তু কল্পনাবশাত্| তথা চ মুনিঃ (চ. চি. অ. ৩১১৬০)- "যঃ কষাযঃ কষাযস্তু স বর্জ্যস্তরুণে জ্বরে| ন তু কল্পনমুদ্দিশ্য কষাযঃ প্রতিষিধ্যতে||" ইতি|

Adhikarana uktauShadhakAlasya matAntareNa nirAkaraNam (42) · Śloka 42

সপ্তাহাদৌষধং কেচিদাহুরন্যে দশাহতঃ| কেচিল্লঘ্বন্নভুক্তস্য যোজ্যমামোল্বণে ন তু||৪২||

স০-সপ্তাহাদনন্তরমষ্টমেঽহ্নযৌষধং-জ্বরঘ্নং যথাযোগ্যং শৃতাদিকল্পনযা কল্পিতং, যোজ্যমিতি কিচিদেবাচার্যা আহুঃ| অন্যে তু দশাহাদূর্ধ্বমৌষধং-মুস্তাপর্পটকাদিকং, যোজ্যমাহুঃ| কেচিদাচার্যা লঘ্বন্নভুক্তস্য নরস্যৌষধং যোজ্যমিত্যাহুঃ| লঘ্বন্নশব্দেন পেযাদিকং ভণ্যতে, ওদনতস্তস্য লঘুত্বোক্তেঃ| লঘ্বন্নং ভুক্তং যেনাসৌ লঘ্বন্নভুক্তঃ| আহিতাগ্ন্যাদিত্বান্নিষ্ঠান্তস্য পরনিপাতঃ| "পরমতমপ্রতিষিদ্ধমনুমতমেব" ইতি সর্বমেতত্ প্রমাণম্, অবস্থাবশেন প্রযোগার্হত্বাত্| আমোল্বণে তু ন-আমাধিকজ্বরিণি পুরুষে পুনরৌষধং জ্বরঘ্নং মুস্তাপর্পটকাদিকং ষডহাদূর্ধ্বং সপ্তাহাত্ দশাহাদ্বা ন যোজ্যম্| কিমিতি চেত্ ? আহ-

Adhikarana svasiddhAnte yuktiH (43-44) · Śloka 44

তীব্রজ্বরপরীতস্য দোষবেগোদযে যতঃ| দোষেঽথবাঽতিনিচিতে তন্দ্রাস্তৈমিত্যকারিণি||৪৩|| অপচ্যমানং ভৈষজ্যং ভূযো জ্বলযতি জ্বরম্| |৪৪|

স০-তীব্রজ্বরেণ পরীতস্য জ্বরিণঃ পুংসো দোষবেগোদযে দোষস্য-আমাদ্যাখ্যস্যোল্বণস্য, বেগো-মুস্তাপর্পটকাদিনোত্ক্লেশাত্, দোষবেগঃ, তস্যোদযঃ-প্রাদুর্ভাবো, দোষবেগোদযঃ| অথবা, উল্বণামস্য বাতাদের্দোষস্য বেগোদযঃ, তস্মিন্ দোষবেগোদযে সতি| অথবা তথৈব দোষে-আমাখ্যে, অতিনিচিতে-অতিশযেন সঞ্চযং প্রাপ্তে, বাতাদৌ ব দোষ উল্বণে| অত এব তন্দ্রাস্তৈমিত্যেঽবশ্যং করোতি তস্মিন্ তন্দ্রাস্তৈমিত্যকারিণি| যতো-যস্মাত্, তদানীমামচ্ছন্নপাবকেনাপছ্যমানং ভৈষজ্যং-ঔষধং মুস্তাপর্পটকাদিশৃতাদিকল্পনাকল্পিতং, তদৌষধং প্রযুক্তং ভূযঃ-পুনরপি, জ্বরং জ্বলযতি-উত্তেজযতি ন শমযতি| তস্মাদামোল্বণে জ্বরে ন ষডহাদূর্ধ্বং নাপি সপ্তাহান্ন চ দশাহাদূর্ধ্বং ভৈষজ্যং যোজ্যম্| কদা তর্হি যোজ্যম্ ? ইত্যাহ-

Adhikarana auShadhayogyA jvarAvasthA (44-45) · Śloka 45

| মৃদুর্জ্বরো লঘুর্দেহশ্চলিতাশ্চ মলা যদা||৪৪|| অচিরজ্বরিতস্যাপি ভেষজং যোজযেত্তদা| |৪৫|

স০-মৃদুর্জ্বরঃ-উপদ্রবমৃদুতযা| লঘুঃ-পটুঃ দেহঃ| চলিতা মলাঃ-মূত্রপুরীষাদযঃ| মৃদুর্জ্বর ইত্যাদিলক্ষণাবস্থা যদা ভবতি তদাঽস্যামবস্থাযামচিরজ্বরিতস্যাপি-অনিতিক্রান্তষডহস্যাপি, ভৈষজ্যং যোজ্যম্| অপিশব্দাত্ কিং পুনঃ ষডহেঽপ্যতীতে জ্বরিতস্যৈবংলক্ষণাযামবস্থাযমুত্পন্নাযাং তদৌষধং চ ন যোজ্যম্ ? ইত্যেবং ব্যাধ্যবস্থা কালতো গরীযসীত্যুক্তং ভবতি| অথ তদৌষধমাহ-ঘ্

Adhikarana auShadham (45-46) · Śloka 46

| মুস্তযা পর্পটং যুক্তং শুণ্ঠ্যা দুঃস্পর্শযাঽপি বা||৪৫|| পাক্যং শীতকষাযং বা পাঠোশীরং সবালকম্| পিবেত্তদ্ব্চ্ছভূনিম্বগুডূচীমুস্তনাগরম্||৪৬||

সং-মুস্তযা সহ পর্পটং যুক্তমথবা শুণ্ঠ্যা ধন্বযাসেন যুক্তং পাক্যং-শৃতং, শীতকষাযং-শীতকল্পনাকল্পিতং, বা কৃত্বা পিবেদিতি বক্ষ্যমাণেন সম্বন্ধঃ| পাঠা চোশীরং চ পাঠোশীরং বালকেন সহ শৃতং শীতং বা পিবেত্| স্বরসকল্কফাণ্টাখ্যকল্পনাভ্যঃ শৃতশীতাখ্যকল্পনাদ্বযকল্পিতস্যাস্য তথা সামর্থ্যস্য দৃষ্টত্বাদেতত্কল্পনাযুগলমুপন্যস্তবান্| বা সমুচ্ছযে ভিন্নক্রমে| তদ্বদিত্যাদি| ন কেবলং মুস্তাপর্পটকং পিবেত্, তথা পাঠোশীরং সবালকং পিবেত্, যাবদ্ভূনিম্বগুডূচীমুস্তনাগরমপি পিবেদিতি|

Adhikarana uktauShadhAnAM viShayaM viBAgaM PalaM ca (47) · Śloka 47

যথাযোগমিমে যোজ্যাঃ কষাযা দোষপাচনাঃ| জ্বরারোচকতৃষ্ণাস্যবৈরস্যাপক্তিনাশনাঃ||৪৭||

সং-ইমে-পূর্বোক্তা মুস্তাপর্পটকাদযঃ কষাযাঃ, যথাযোগংযোগানতিক্রমেণ, যো যঃ কষাযো যস্মিন্ জ্বরে দাতুং যুক্তঃ স তত্র যোজ্য ইতি যথাযোগং যোজ্যাঃ| কিংক্রিযা এতে স্যুঃ ? ইত্যাহ-দোষপাচনাঃ, দোষস্য-আমাখ্যস্য পক্বপ্রাযস্য, পাচনাঃ| তন্ত্রান্তরে চোক্তম্-"প্রযুক্তং পাচযেদামং যতত্পাচন মুচ্যতে| পিত্তাদিজিন্নিরামস্য যত্স্যাত্তচমনং মতম্||" ইতি| অত্র মুস্তাপর্পটস্য পূর্বমুপন্যাসো জ্বরনাশনেভ্যোঽন্যেভ্যোঽস্য মুস্তাপর্পটস্য প্রাধান্যপ্রদর্শনার্থঃ| তথা চাচার্যোঽগ্ন্যাণাং মধ্যে "মুস্তাপর্পটক জ্বরে" (হৃ. উ. অ. ৪০/৪৮) ইতি নির্দেক্ষ্যতে| তস্মান্মুস্তাপর্পটস্যৈব জ্বরনাশনে জ্যাযস্ত্বমিত্যবেহি, ব্যাধিপ্রতিপক্ষত্বাত্|

Adhikarana santatAdInAM viShamajvarAnAM shamanAH pa~jca kaShAyAH (48-51) · Śloka 51

| কলিঙ্গকাঃ পটোলস্য পত্রং কটুকরোহিণী||৪৮|| পটোলং সারিবা মুস্তা পাঠা কটুকরোহিণী| পটোলনিম্বত্রিফলামৃদ্বীকামুস্তবত্সকাঃ||৪৯|| কিরাততিক্তমমৃতা চন্দনং বিশ্বভেষজম্| ধাত্রীমুস্তামৃতাক্ষৌদ্রমর্ধশ্লোকসমাপনাণ্||৫০|| পঞ্চতে সন্ততাদীনাং পঞ্চানাং শমনা মতাঃ| |৫১|

স০-কলিঙ্গকাদযোঽর্ধশোকৈঃ সমাপনং যেষাং তেঽর্ধশ্লোকসমাপনাঃ পঞ্চৈতে পঞ্চানাং সন্ততাদীনাং যথাসঙ্খ্যং শমনা মতাঃ মুনীনামিতি শেষঃ|

Adhikarana vAtajvarasya auShadham (51-52) · Śloka 52

| দুরালভামৃতামুস্তানাগরং বাতজে জ্বরে||৫১|| অথবা পিপ্পলীমূলগুডূচীবিশ্বভেষজম্| কনীযঃ পঞ্চমূলং চ|৫২|

স০-দুরালভাদি পাচনং বাতজে জ্বরে, অথবা পিপ্পল্যাদিকং বাতজে জ্বরে, কনীযো-বৃহত্যাদিকং, পঞ্চমূলং চ বাতজে জ্বরে, ইতি যোজ্যম্|

Adhikarana pittajvarasya auShadham (52-53) · Śloka 53

| পিত্তে শক্রযবাঘনম্||৫২|| কটুকা চেতি সক্ষৌদ্রং মুস্তাপর্পটকং তথা| সধন্বযাসভূনিম্বং|৫৩|

স০-পিত্তে-পিত্তজেজ্বরে, শক্রযবাদযঃ সমাক্ষিকা মতাঃ| পিত্তজেঽপি মুস্তাপর্পটকং ধন্বযাসকিরাততিক্তাভ্যাং সহিত হিতম্|

Adhikarana kaPajvarasya auShadham (53-54) · Śloka 54

| বত্সকাদ্যো গণঃ কফে||৫৩|| অথবা বৃষগাঙ্গেযীশৃঙ্গবেরদুরালভাঃ| |৫৪|

স০-"বত্সকমূর্বীভার্ঙ্গী" (হৃ. সূ. অ. ১৫/৩৩) ইত্যাদিঃ কফে মতঃ| অথবা বৃষাদিঃ| গাঙ্গেযী-মুস্তা|

Adhikarana sashUlavibindhasya kaPavAta jvarasya auShadham vAtapittajvarasya auShadham pittajvarasya auShadham kaPajvarasya auShadham sashUlavibandhasya kaPavAta jvarasya auShadham (54-55) · Śloka 55

| রুগ্বিবন্ধানিলশ্লেষ্মযুক্তে দীপনপাচনম্||৫৪|| অভযাপিপ্পলীমূলশম্যাককটুকাঘনম্| |৫৫|

স০-রুগ্বিবন্ধাদিযুক্তে জ্বরেঽভযাদিঘনাবসানং দীপনপাচনম্|

Adhikarana vAtapittajvarasya auShadham (55-58) · Śloka 58

| দ্রাক্ষামধূকমধুকতোধ্রাকাশ্মর্যসারিবাঃ||৫৫|| মুস্তামলকহ্রীবেরপদ্মকেসরপদ্মকম্| মৃণালচন্দনোশীরনীলোত্পলপরূষকম্||৫৬|| ফাণ্টো হিমো বা দ্রাক্ষাদির্জাতীকুসুমবাসিতঃ| যুক্তো মধুসিতালাজৈর্জযত্যনিলপিত্তজম্||৫৭|| জ্বরং মদাত্যযং ছর্দিং মূর্চ্ছাং দাহং শ্রমং ভ্রমম্| ঊর্ধ্বগং রক্তপিত্তং চ পিপাসাং কামলামপি||৫৮||

স০-দ্রাক্ষাদিরযং গণঃ ফাণ্টঃ-"সদ্যোঽভিষুতপূতঃ" (হৃ. ক. অ. ৬/১১) ইত্যেবংলক্ষণঃ, তথা হিমঃ-শীতো বা, "রাত্রিংদ্রবে স্থিতঃ" (হৃ. ক. অ. ৬/১০) ইত্যেবংলক্ষণঃ| তথা জাতীকুসুমৈঃ সুগন্ধীকৃতো মধুসিতালাজৈর্যুক্তো বাতপিত্তজং জ্বরং জযতি, মদাত্যযাদিংশ্চ|

Adhikarana vAtapittajvarasya anyat auShadham (59) · Śloka 59

পাচযেত্কটুকাং পিষ্ট্বা কর্পরেঽভিনবে শুচৌ| নিষ্পীডিতো ঘৃতযুতস্তদ্গসো জ্বরদাহজিত্||৫৯||

স০-কটুকাং পানীযেন পিষ্ট্বা কর্পরে-মৃদ্ভৃষ্টখণ্ডে, অভিনবে তথা শুচৌ পাচযেত্| তস্যা রসো নিষ্পীডিতঃ সর্পির্যুক্তো জ্বরদাহৌ জযতি|

Adhikarana kaPavAtajvarasya auShadham (60) · Śloka 60

কফবাতে বচাতিক্তাপাঠারগ্বধবত্সকাঃ| পিপ্পলীচূর্ণযুক্তো বা ক্বাথশ্চ্ছিন্নোদ্ভবোদ্ভবঃ||৬০||

সং-বাতশ্লেষ্মণি কষাযকল্পনযা কল্পিতা বচাদযো মতাঃ| অথবা, গুডূচীসম্ভবঃ ক্বাথঃ পিপ্পলীচূর্ণযুতো মতঃ|

Adhikarana kaPavAta anyat auShadham (61-63) · Śloka 63

ব্যাঘ্রীশুণ্ঠ্যমৃতাক্বাথঃ পিপ্পলীচূর্ণসংযুতঃ| বাতশ্লেষ্মজ্বরশ্বাসকাসপীনসশূলজিত্||৬১|| পথ্যাকুস্তুম্বরীমুস্তাশুণ্ঠীকট্তৃণপর্পটম্| সকট্ফলবচাভার্ঙ্গীদেবাহ্বং মধুহিঙ্গুমত্||৬২|| কফবাতজ্বরষ্ঠীবকুক্ষিহৃত্পার্শ্ববেদনাঃ| কণ্ঠামযাস্যশ্বযথুকাসশ্বাসান্নিযচ্ছতি||৬৩||

স০-ব্যাঘ্র্যাদিক্বাথঃ কণাচূর্ণসংযুক্তো বাতশ্লেষ্মজ্বরাদিজিত্| স০-পথ্যাদি পাচনং সিদ্ধচূর্ণং মধুহিঙ্গুভ্যাং সংযুতং কফবাতজ্বরাদীন্ পরাকরোতি|

Adhikarana pittakaPajvarasya auShadham pittakaPa anyat auShadham (64-65) · Śloka 65

আরগ্বধাদিঃ সক্ষৌদ্গঃ কফপিত্তজ্বরং জযেত্| তথা তিক্তাবৃষোশীরত্রাযন্তীত্রিফলামৃতাঃ||৬৪|| পটোলাতিবিষানিম্বমূর্বাধন্বযবাসকাঃ| |৬৫|

স০-"আরগ্বধেন্দ্রযবাদিভিঃ" (হৃ. সূ. অ. ১৫/১৭) মাক্ষিকসহিতঃ কফপিত্তজ্বরং জযতি| তথা তিক্তাদযঃ কফপিত্তজ্বরং ঘ্নন্তি|

Adhikarana sannipAtajvarasya auShadham (65-66) · Śloka 66

| সন্নিপাতজ্বরে ব্যাঘ্রীদেবদারুনিশাঘনম্||৬৫|| পটোলপত্রনিম্বত্বক্ত্রিফলাকটুকাযুতম্| |৬৬|

স০-সন্নিপাতজ্বরে ব্যাঘ্র্যাদিকটুকান্তং পাচনম্|

Adhikarana vAtashleShmottarasya auShadham (66-67) · Śloka 67

| নাগরং পৌষ্করং মূলং গুডূচী কণ্টকারিকা||৬৬|| সকাসশ্বাসপার্শ্বার্তৌ বাতশ্লেষ্মোত্তরে জ্বরে| |৬৭|

স০-নাগরাদিপাচনং বাতশ্লেষ্মাধিকে জ্বরে কাসাদীন্নিহন্তি|

Adhikarana sarvajvarasya auShadham (67-69) · Śloka 69

| মধূকপুষ্পমৃদ্বীকাত্রাযমাণাপরূষকম্||৬৭|| সোশীরতিক্তাত্রিফলাকাশ্মর্যং কল্পযেদ্ধিমম্| কষাযং তং পিবন্ কালে জ্বরান্ সর্বানপোহতি||৬৮|| জাত্যামলকমুস্তানি তদ্বদ্ধন্বযবাসকম্| |৬৯|

স০-মধূকপুষ্পাদিকং কালে-শাস্ত্রোক্তে, শীতকষাযং পিবন্ জ্বরান্ সর্বান্-একদোষদ্বিদোষজান্, অপোহতি| "উপসর্গাদস্যত্যূহ্যোর্বেতি বাচ্যম্" ইতি পরস্মৈপদম্| জাতিপল্লবা আমলকানি মুস্তং ধন্বযাসকং তদ্বত্-পূর্ববচ্ছিতকষাযং কল্পযিত্বা পিবন্ সর্বান্ জ্বরান্ হন্তি| ধন্বযবাসকং চেতি চশব্দোঽত্র লুপ্তো দ্রষ্টব্যঃ| তদেতৈশ্চতুর্ভির্দ্রব্যৈরেতত্ পাচনম্| কেচিত্তু ধন্বযবাসকং পৃথগেবেচ্ছন্তি| তস্মাদেতত্কৃতোঽপি কষাযঃ পূর্ববদ্বোধ্যঃ|

Adhikarana baddhaviTkasya auShadham (69) · Śloka 69

| বদ্ধবিট্ কটুকাদ্রাক্ষাত্রাযন্তীত্রিফলাগুডম্||৬৯||

স০-তথা চ বদ্ধবিট্ পুরুষঃ কটুকাদিকং কষাযং পিবেদিতি বর্ততে, ন তু হিমমিতি| শীতস্য মলস্তম্ভহেতুত্বাদস্য চৌষধস্য শোধনরূপত্বাত্| গুডা-সুধা, গুড ইত্যন্যে|

Adhikarana peyAdyamannam auShadham (70) · Śloka 70

জীর্ণৌষধোঽন্নং পেযাদ্যমাচরেত্| |৭০|

স০-জীর্ণং-পরিণতং, ঔষধং যস্য স জীর্ণৌষধঃ সন্, পেযাদ্যমেব পূর্বোক্তমন্নং ভুঞ্জীত| অদ্যত ইত্যন্নম্, ইতি কৃত্বা পেযাদেরপ্যন্নত্বম্| আদিশব্দেন যূষাদিপরিগ্রহঃ|

Adhikarana shleShmajvare peyAniShedhaHpeyAniShedhe yuktiH (70) · Śloka 70

শ্লেষ্মবান্ন তু| পেযা কফং বর্ধযতি পঙ্কং পাংসুষু বৃষ্টিবত্||৭০||

স০-শ্লেষ্মবান্ন তু-জীর্ণৌষধোঽপি শ্লেষ্মবান্নরঃ পেযাদিকং না শ্নীযাত্| কিম্ ? ইত্যাহ-পেযেত্যাদি| যতঃ পেযা কফং বর্ধযতি--বিলীনরুপস্য কফস্য স্ত্যানভাবতামুত্পাদযন্তী সংস্থানবিশেষমুপর্যুপরিভাবতযোপচযমুত্পাদযতি, ন তু সা কফং সাক্ষাদ্বর্ধযতি, ইতি বর্ধযতেরর্থঃ, অনেকার্থত্বাদ্ধাতূনামিতি, এষচার্থোঽনুরূপতন্ত্রকারদৃষ্টান্তদর্শনাদবগম্যতে| তথা চাহপঙ্কং পাংসুষু বৃষ্টিবদিতি| যথা,-পাংসুষু বৃষ্টিঃ পতিতা ন তু পঙ্কং বর্ধযতি-শিথিলরূপতাং পাংসূনামপাস্য নিবিডরূপতামিব তেষামুত্পাদযতি| ন পাংসূন্ বৃষ্টির্বর্ধযতি-আধিক্যং নযতি, ন বর্ধযতেঽত্রা(ত্যেত্য)র্থঃ| তন্ত্রকারস্যার্থ এবং বিবক্ষিতো ভবিষ্যত্ তদানীমত্রৈবং স্পষ্টমেব দৃষ্টন্তমদর্শযিষ্যত্| যথা-"পেযা কফং বর্ধযতি যথা বৃষ্টির্নদীজলম্|" ইতি| তচ্চ তন্ত্রকারোঽমুনৈবানুসারেণাহ-

Adhikarana peyasthAne yUShaH (71-72) · Śloka 72

শ্লেষ্মাভিষ্যণ্ণদেহানামতঃ প্রাগপি যোজযেত্| যূষান্ কুলত্থচণককলাযাদিকৃতান্ লঘূন্||৭১|| রূক্ষাংস্তিক্তরসোপেতান্ হৃদ্যান্ রুচিকরান্ পটূন্| |৭২|

স০-আভিষ্যণ্ণ ইতি, অভিপূর্বাত্স্যন্দেঃ স্রবণার্থো ব্যুত্পাদিতঃ| শ্লেষ্মণা-স্রুতিরূপেণৈব, অভিষ্যণ্ণঃ-ক্লিন্ন ইব, দেহো যেষাং তে শ্লেষ্মাভিষ্যণ্ণদেহাঃ, তেষাম্, অতো জ্বরিণাং প্রাগপি প্রথমপথ্যাবসরেঽপি, যূষান্ যোজযেত্| কিমুত শ্লেষ্মবতঃ পুংসো জীর্ণৌষধস্য যূষান্ন যোজযেত্ ? ইত্যপিশব্দস্যর্থঃ| কিম্ভূতান্ ? কুলত্থাদিকৃতান্| তথা, লঘূন্| ননু, কুলত্থাদীনাং লঘুত্বাত্তত্কৃতা যূষা লঘব এব ভবিষ্যন্তি| তত্কিং লঘূনিত্যনেন ? অত্রোচ্যতে| শম্বীধান্যানাং মধ্যে গুরবোঽপি রাজমাষমাষাদযঃ সন্তি, তন্নিবৃত্ত্যর্থমেতত্| অপি চ, লঘূনিত্যনেন যূষপ্রকৃতিদ্রব্যৈরল্পপরিমাণৈঃ কৃতানিতি দ্যোতযতি| যতোঽল্পপরিমাণৈঃ কুলত্থাদিভিঃ কৃতা লঘুতরাঃ স্যুঃ, তস্মাল্লঘূনিতি যুক্তম্| তথা, রূক্ষান্-ঘৃতভর্জনকাদিরহিতান্| তথা, তিক্তরসযুক্তান্| তথা, হৃদ্যান্-ইষ্টরসগন্ধবর্ণস্পর্শযুক্তত্বাচ্চেতস আহ্লাদকরান্| তথা, রুচিকরান্-জ্বরিণোঽন্যস্য বা রোচিষ্ণূন্| তথা, পটূন্-সলবণান্|

Adhikarana pathyayogyaM dhAnyam (72-73) · Śloka 73

| রক্তাদ্যাঃ শালযো জীর্ণাঃ ষষ্টিকাশ্চ জ্বরে হিতাঃ||৭২|| শ্লেষ্মোত্তরে বীততুষাস্তথা বাটীকৃতা যবাঃ| |৭৩|

স০-রক্তাদ্যাঃ-"রক্তো মহান্ সকলমঃ" (হৃ.সূ.অ.৬/৯) ইত্যাদযঃ| তথা, ষষ্টিকা ব্রীহ্যাদযোঽপি, জীর্ণাঃ-পুরাণাঃ, হিতাঃ-পথ্যাঃ| শ্লেষ্মোত্তরে-প্রভূতশ্লেষমণি জ্বরে, বীততুষাঃ-অপনীতত্বচো, যবাশ্চ পথ্যাঃ| কীদৃশাঃ ? বাটীকৃতাঃ-ভৃষ্টবিদলীকৃতা ইত্যর্থঃ|

Adhikarana odanavidhiH (73-74) · Śloka 74

| ওদনস্তৈঃ স্রুতো দ্বিস্ত্রিঃ প্রযোক্তব্যো যথাযথম্||৭৩|| দোষদূষ্যাদিবলতো জ্বরঘ্নক্বাথসাধিতঃ| |৭৪|

স০-ওদনস্তৈঃ-রক্তাশাল্যাদিভিঃ পূর্বোক্তৈশ্চ, কৃতো জ্বরিণো যথাযথং যো যস্য দানে যোগ্যঃ স তস্য প্রযোক্তব্যঃ| কিম্ভূতঃ ? দ্বিস্ত্রিঃ স্রুতো-দ্বৌ বারৌ ত্রীন্ বারান্ বা জলং দত্ত্বা ধাতঃ| কথং প্রযোজ্যঃ ? দোষদূষ্যাদিবলেন| জ্বরঘ্নৈঃ-জ্বরাপহৈর্দ্রব্যৈঃ, ক্বাথং কৃত্বা, তেন ক্বাথেন সাধিতঃ| দোষস্য-বাতাদের্বলং তথা দূষ্যস্য রসাদের্বলমপেক্ষ্য, আদিগ্রহণাদ্দেশকালবযঃ সত্ত্বসাত্ম্যশরীরাহারবলং গৃহ্যতে| একাহাদিকানাং জ্বরিণামকৃতপেযানামেব কুলত্থমুদ্গচণকাদিযূষা উক্তাঃ| সম্প্রতি সামান্যেন জ্বরিণাং কৃতপেযানাং যূষাদীনাহ-

Adhikarana yUShadravyANi (74) · Śloka 74

| মুদ্গাদ্যৈর্লঘুভির্যূষাঃ কুলত্থৈশ্চ জ্বরাপহাঃ||৭৪||

স০-মুদ্গাদ্যৈঃ-শিম্বীধান্যৈঃ, লঘুভিঃ কৃতা যূষাস্তথা কুলত্থৈঃ কৃতা যূষা জ্বরঘ্নাঃ| মুদ্গাদ্যৈরিত্যাদিঃ প্রকারে| তেন সুজরা মুদ্গচণককুলত্থমকুষ্টমসূরাদযো গৃহ্যন্তে| মুদ্গশব্দস্যাদৌ নির্দেশ ইদং বোধযতি,-যূষসাধ্যে ব্যাধৌ বাহুল্যেন মুদ্গযূষঃ কার্যঃ, মুদ্গানাং পথ্যতমত্বাত্| তথা চোবাচ মুনিঃ (ছ.সূ.অ.২৫/৩৮)- "মুদ্গঃ শিম্বীধান্যানাং পথ্যত্বে শ্রেষ্ঠতমঃ|" ইতি| ননু, মুদ্গাদ্যৈরিত্যাদিশব্দেনৈব কুলত্থা গৃহিতা এব, কিং পৃথঙ্নির্দেশেন ? ব্রূমহে| কুলত্থযূষস্য জ্বরবিষযে বিরলঃ প্রযোগঃ কার্য ইতি সূছযিতুং পৃথক্কৃতো নির্দেশ ইতি| তথা ছ কুলত্থা এবংগুণাঃ (হৃ.সূ.অ.৬/১৯)- "উষ্ণাঃ কুলত্থাঃ পাকেঽম্লাঃ শুক্রাশ্মশ্বাসপীনসান্| কাসার্শঃ কফবাতাংশ্চ ঘ্নান্তি পিত্তাস্রদাঃ পরম্|| ইতি| এবমুষ্ণত্বাদম্লবিপাকিত্বাদতিপিত্তাস্রকারিত্বাত্ কুলত্থানাং যূষো বহুদ্রব্যপরিমাণো বহুমাত্রোপযুক্তো জ্বরস্য ন শান্তযে সম্পদ্যতে, প্রত্যুত বৃদ্ধযে স্যাদিতি সম্ভাব্যতে, পিত্তবিরুদ্ধত্বাত্| তস্মাদল্পপরিমাণদ্রব্যসাধিতোঽল্পমাত্রযা কুলত্থযূষঃ শ্লেষ্মাদ্যুপশমকৃদ্যাবন্মাত্রঃ স্যাত্তাবানেব প্রযোজ্যত ইতি স্থিতম্|

Adhikarana khaladravyANi rasadravyANi yUShAdInamupakaraNadravyANi (75-77) · Śloka 77

কারবেল্লককর্কোটবালমূলকপর্পটৈঃ| বার্তাকনিম্বকুসুমপটোলফলপল্লবৈঃ||৭৫|| অত্যন্তলঘুভির্মাংসৈর্জাঙ্গলৈশ্চ হিতা রসাঃ| ব্যাঘ্রীপরূষতর্কারীদ্গাক্ষামলকদাডিমৈঃ||৭৬|| সংস্কৃতাঃ পিপ্পলীশুণ্ঠীধান্যজীরকসৈন্ধবৈঃ| সিতামধুভ্যাং প্রাযেণ সংযুতা বা কৃতাকৃতাঃ||৭৭||

স০-কারবেল্লকাদিভী রসা জ্বরে হিতাঃ| মুনিস্তু কারবেল্লকাদীনাং শাকত্বমেবেচ্ছতি (চ.চি.অ.৩১১৮৭)| খরণাদেঽপ্যুক্তম্-"পটোলং সফলং নিম্বং কর্কোটককঠিল্লকম্| শাকং পর্পটকং চ স্যাত্" ইতি| তথা জাঙ্গলৈঃ-জাঙ্গলদেশপ্রাণিজৈস্তদভাবাত্তত্তুল্যৈরন্যদেশপ্রাণিজৈরপি, মংসৈর্হিতা রসা ব্যাঘ্র্যাদিভিঃ সংস্কৃতাস্তথা পিপ্পল্যাদিভিঃ সংযুতা ইতি বক্ষ্যমাণেন সম্বন্ধঃ| সংস্কারমাত্রযোগভাজঃ পিপ্পল্যাদযোঽত্র যোজ্য ইত্যর্থঃ| প্রাযেণ কেচিদেব সিতামধুভ্যাং যুক্তা অবস্থাবশাত্, ন তু সর্ব এব| কিম্ভূতা রসা যূষাশ্চৈবংবিধাঃ কার্যাঃ ? কৃতাকৃতাঃ| পানকদাডিমাজাজীশুণ্ঠ্যাদ্যৈরপি সংস্কৃতা যূষা রসাশ্চ-কৃতাঃ| বিপরীতাস্ত্বতঃ-অকৃতাঃ|

Adhikarana vya~jjanavidhiH (78) · Śloka 78

অনম্লতক্রসিদ্ধানি রুচ্যানি ব্যঞ্জনানি চ| অচ্ছান্যনলসম্পন্নানি|৭৮|

স০-অনম্লেন তক্রেণ সিদ্ধানি| তথা, রুচ্যানি-অভ্যবহর্তুমভিলষিতানি| তথা, অচ্ছানি-তনূনি ন ঘনানি| তথা, অনলসম্পন্নানি-বহ্নিপক্বানি| কেচিদ্ধি তক্রমপক্বমেবাচ্ছীকৃত্য সংস্কৃত্য চ শুণ্ঠীজীরকাদিনাঽভ্যবহরন্তি তন্নিষেধাযৈতদুক্তম্| এবংবিধানি ব্যঞ্জনানি-তেমনানি রসকষাযাণী, ওদনেন সহাভ্যবহর্তব্যানি|

Adhikarana anupAnAni (78-79) · Śloka 79

| অনুপানেঽপি যোজযেত্||৭৮|| তানি ক্বথিতশীতং চ বাতি মদ্যং চ সাত্ম্যতঃ| |৭৯|

স০-অনুপানেঽপি-আতুরস্য পশ্চাত্পানেঽপি, তানি যোজযেত্| তথা ক্বথিতশীতং চ বারি মদ্যং চ, সাত্ম্যতঃ-সাত্ম্যবশাত্, অনুপানেঽপি যোজযেত্|

Adhikarana annagrahaNakAlaH (79-80) · Śloka 80

| সজ্বরং জ্বরমুক্তং বা দিনান্তে ভোজযেল্লঘু||৭৯|| শ্লেষ্মক্ষযবিবৃদ্ধোষ্মা বলবাননলস্তদা| |৮০|

স০-সজ্বরং নরং দিনান্তে ভোজযেত্,-অথবা জ্বরমুক্তং-অচিরকালজ্বরত্যক্তম্| কিম্ভুতং ভোজনং ভোজযেত্ ? লঘু,-মাত্রযা স্বভাবাত্ (চ) উভযথা যল্লঘু| কিমিত্যেতস্মিন্ কালে লঘু ভোজযেত্ ? ইত্যাহ-শ্লেষ্মেত্যাদি| তদা-তস্মিন্দিনান্তাখ্যে কালে, শ্লেষ্মক্ষযো যস্তেন বিবৃদ্ধ ঊষ্মা-স্বস্বভবো, যস্যানলস্য জাঠরাগ্রেরসৌ শ্লেষ্মক্ষযবিবৃদ্ধোষ্মাঽনলঃ| অত এব বলবান্ তদা পক্তুং শক্তঃ|

Adhikarana dinAntarasyApavAdaH (80) · Śloka 80

| যথোচিতেঽথবা কালে দেশসাত্ম্যানুরোধতঃ||৮০||

স০-অথবা যথোচিতে কালে সজ্বরং জ্বরমুক্তং বাঽঽতুরং ভোজযেত্| যস্য যস্য য উচিতঃ-সাত্ম্যঃ, আহারকালস্তস্মিন্ ভোজযেত্| যথোচিতে হি কালে প্রাযঃ ক্ষুদুপগমো জাযতে| কথং ভোজযেত্ ? ইত্যাহ-দেশেত্যাদি| দেশসাত্ম্যবশাত্ তং ভোজযেত্, নৈবমেব| ননু, এবং যস্য পূর্বাহ্ণে কালে ভোজনমুচিতং তদা তস্য ভোজনে দীযমানে কো গুণঃ স্যাত্ ? ইত্যাহ-

Adhikarana apavAdApavAdaH (81) · Śloka 81

প্রাগল্পবহ্নির্ভুঞ্জানো ন হ্যজীর্ণেন পীড্যতে| |৮১|

স০-যস্মাদল্পবহ্নিঃ-মন্দাগ্নিঃ, পূর্বাহ্ণে ভুঞ্জানোঽজীর্ণেন ন পিড্যতে-ন বাধ্যতে| অধুনা সর্পিঃপানকালং নিরূপযতি-

Adhikarana ghRutadAnakAlaH akAle tat viShopamam (81-83) · Śloka 83

| কষাযপানপথ্যান্নৈর্দশাহ ইতি লঙ্ঘিতে||৮১|| সর্পির্দদ্যাত্কফে মন্দে বাতপিত্তোত্তরে জ্বরে| পক্বেষু দোষেষ্বমৃতং তদ্বিষোপমমন্যথা||৮২|| দশাহে স্যাদতীতেঽপি জ্বরোপদ্রববৃদ্ধিকৃত্| লঙ্ঘনাদিক্রমং তত্র কুর্যাদাকফসঙ্ক্ষ্যাত্||৮৩||

স০-কষাযস্য-মুস্তাপর্পটকাদেঃ, পানং কষাযপানম্, তেন| তথা, পথ্যান্নৈঃ-পেযাযূষাদিভিঃ, দশাহ ইতি-অনেন প্রকারেণ, লঙ্ঘিতে-অতিক্রান্তে| তথেতি প্রাযেণ ক্ষীণঃ কফঃ সম্ভাব্যতেঽতো দশাহে লঙ্ঘিত ইত্যুক্তম্| আমজ্বরসংজ্ঞানিবৃত্তিস্তু ষডহাদূর্ধ্বং সপ্তমেঽহ্ন্যষ্টমে বাঽহনি জ্বরস্য জাযতে| তথা চ মুনিঃ (চ. চি. অ. ৩/২৭২)- "সপ্তাহেন হি পছ্\যন্তে সপ্তধাতুগতা মলাঃ| নিরামশ্চাপ্যতঃ প্রোক্তো জ্বরঃ প্রাযোঽষ্টমেঽহনি||" ইতি| তস্মাত্ কষাযপানপথ্যান্নৈরিত্যাদিতো দশাহে লঙ্ঘিতে কফে মন্দে-ক্ষীণপ্রাযে, সর্পিদদ্যাত্| কিম্ভূতে জ্বরে ? বাতপিত্তোত্তরে,- বাতপিত্তাধিকে| অস্যামবস্থাযাং পক্বেষু-নিরামেষু বাতাদিদোষেষু, সর্পির্দদ্যাত্| পক্বেষু সর্পির্দত্তমমৃতং-মহাগুণমিত্যর্থঃ| অন্যথা পুনঃ অপক্বেষু দোষেষু কফোত্তরে, তত্সর্পির্দত্তং বিষোপমং-বিষতুল্যং, দশাহেঽতিক্রান্তেঽপি স্যাত্| অতোঽস্যামবস্থাযাং সর্পির্দত্তং জ্বরস্য তদুপদ্রবাণাং চ বৃদ্ধিং করোতি, তস্মাদস্যামবস্থাযাং সর্পিঃপানমযুক্তম্| তত্র-কফোত্তরে জ্বরে সতি, লঙ্ঘনাদিক্রমং কুর্যাত্| কিযন্তং কালম্ ? আকফসঙ্ক্ষ্যাত্,- যাবত্কফস্য-জ্বরকারিণোঽধিকস্য, সঙ্ক্ষ্যঃ-সম্যক্ ক্ষযঃ, ন ধাতুক্ষযোঽপি যাবত্| যতঃ কফজ্বরেঽপি বিডঙ্গাদিসর্পির্বক্ষ্যতি (শ্লো. ৯৩)| অথ জীর্ণজ্বরচিকিত্সামাহ-

Adhikarana jIrNajvarAnuvRuttau hetuH (84) · Śloka 84

দেহধাত্ববলত্বাচ্চ জ্বরো জীর্ণোঽনুবর্ততে| |৮৪|

স০-জীর্ণঃ-পুরাণো জ্বরঃ, অনুবর্ততে-অনুবধ্নাতি| কুতঃ ? দেহধাত্ববলত্বাত্| দেহধাতবঃ-তদারম্ভকা রসরুধিরাদযঃ, দেহগ্রহণাদ্বাতপিত্তশ্লেষ্মাণোঽপি ধারণাদ্ধাতব উচ্যন্তে| দেহধাতূনামবলত্বং-স্বল্পত্বম্| তস্মাচ্চ জীর্ণো জ্বরোঽনুবধ্নাতি, ন স্বভাবমাত্রাদেব, ইতি চশব্দস্যার্থঃ| জীর্ণজ্বরস্য শান্ত্যর্থং দেহবলাধানার্থং চ সর্পিঃপানং হিতমিতি প্রতিপাদযন্নাহ-

Adhikarana sarpiH kvAthaiH prayoge yuktiH (84-86) · Śloka 86

| রূক্ষং হি তেজো জ্বরকৃত্তেজসা রূক্ষিতস্য চ||৮৪|| বমনস্বেদকালাম্বুকষাযলঘুভোজনৈঃ| যঃ স্যাদতিবলো ধাতুঃ সহচারী সদাগতিঃ||৮৫|| তস্য সংশমনং সর্পির্দীপ্তস্যেবাম্বু বেশ্মনঃ| |৮৬|

স০-রূক্ষং যত্তেজস্তজ্জ্বরকৃত্| রূক্ষমিতি বচনাদ্দেহোষ্মা জাঠরোঽনলো গৃহ্যতে, তস্যৈব জ্বরকৃত্ত্বাত্| তথোক্তম্ (হৃংই.অ.২/৩)- "মলাস্তত্র স্বৈঃস্বৈর্দুষ্টাঃ" ইত্যাদি যাবত্| "জ্বরং নির্বর্তযন্তি তে|" ইত্যাদি জাঠরানলস্যৈব জ্বরকৃতত্বম্| তেন জ্বরকৃতা রূক্ষেণ তেজসা রূক্ষিতস্য চ পুংসঃ সর্পিঃ সংশমনম্| চশব্দাচ্চান্যস্যাপি| অত এবাহ-বমনেত্যাদি| বমনাদিভী রৌক্ষ্যকৃদ্ভিঃ কৃতৈস্তদানীং যঃ স্যাত্-ভবেত্, অতিবলঃ-প্রবৃদ্ধত্বাদতিসমর্থো ধাতুঃ| কো ধাতুঃ ? সহচারী,-যঃ সহ চরতি তচ্ছীলো বাতাখ্যো ধাতুরগ্নিনা সহ চরতি| ননু, এবং পরস্পরসহচরভাবত্বেঽগ্নিরপি বাযুনা সহ চরতি, ততোঽগ্নিস্বভাবত্বাত্ পিত্তাখ্যোঽপি ধাতুরিহ সহচারী প্রাপ্তঃ, তন্নিবৃত্ত্যর্থং সদাগতিরিত্যাহ| সদাগতিত্বং বাযোরেবান্বর্থত্বেনোপপদ্যত ইতি পিত্তস্যাগ্রহণম্| কিং কস্য যথা সংশমনম্ ? অম্বু বেশ্মনো-গৃহস্য, দীপ্তস্য-জ্বলিতস্য, জলং যথা|

Adhikarana sarpirdAnam (86-87) · Śloka 87

| বাতপিত্তজিতাংগ্র্যং সংস্কারং চানুরুধ্যতে||৮৬|| সুতরাং তদ্ধ্যতো দদ্যাদ্যথাস্বৌষধসাধিতম্| |৮৭|

স০-যস্মাদ্ধৃতং সর্বেষাং বাতপিত্তজিতামগ্র্যং যথা ন তথাঽন্যান্যৌষধানি বাতপিত্তজিন্তীতি| অত এব প্রাগভ্যধাত্ (শ্লো. ৮২)- "সর্পির্দদ্যাত্কফে মন্দে বাতপিত্তোত্তরে জ্বরে|" ইত্যাদি| যস্মাচ্ছ ঘৃতং সংস্কারমনুরুধ্যতে-অনুবর্ততে| গুণান্তরাধানং-সংস্কারঃ| তং চ যস্মাদ্ধৃতং সুষ্ট্বতিশযবৈলক্ষণ্যাদনুরুধ্যতে-আত্মসাত্করোতি| তৈলাদিরপি স্নেহঃ সংস্কারমনুবর্ততে| ন তু যথা ঘৃতং স্বশৈত্যমজহদেব সংস্কারমনুবর্তত ইতি| এতচ্ছ স্নেহবিধৌ প্রতিপাদিতমেব| অমুমেব ছ ন্যাযমঙ্গীকৃত্য মুনিরপ্যবোচত্ (চংই.অ.১/৪০)-"নান্যঃ স্নেহস্তথা কশ্চিত্ সংস্কারমনুবর্ততে| যথা সর্পিরতঃ সর্পিঃ সর্বস্নেহোত্তমং মতম্||" ইতি| হি-যস্মাত্, সুতরাং সংস্কারমনুরুধ্যতে ঘৃতম্, তস্মাদ্ধৃতং জীর্ণে বাতপিত্তোত্তরে নির্বিকল্পং দদ্যাত্| কীদৃশম্ ? যথাস্বৌষধসাধিতম্,-যথাযথং ব্যাধিপ্রতিপক্ষৈরৌষধৈঃ পক্বম্|

Adhikarana sarpiSho hetuvyAdhiviparItatvam (87-88) · Śloka 88

| বিপরীতং জ্বরোষ্মাণং জযেত্পিত্তং চ শৈত্যতঃ||৮৭|| স্নেহাদ্বাতং ঘৃতং তুল্যং যোগসংস্কারতঃ কফম্| |৮৮|

স০-ঘৃতং বিপরীতং জ্বরোষ্মাণং জযেত্| জ্বরনির্বর্তক ঊষ্মাজাঠরোঽনলো, রূক্ষতীক্ষ্ণাদিগুণঃ স পক্তিস্থানান্নিরস্তো জ্বরনির্বর্তকো ঘৃতস্য স্নিগ্ধশীতত্বাদিগুণযোগাদ্বিপরীতঃ, এবং বিপরীতং জ্বরোষ্মাণং ঘৃতং জযেত্| পিত্তং চ শৈত্যতঃ-শৈত্যাদ্ধৃতং জযেত্, ন স্নেহাত্, "পিত্তং সস্নেহ" (হৃ.সূ.অ.১/১১) ইতি বচনাত্| স্নেহাত্-স্নিগ্ধত্বাত্, ঋতং বাতং জযেত্ ন তু শৈত্যাত্, "শীতোঽনিলঃ" (হৃ.সূ.অ.১/১১) ইতি বছনাত্| কফং স্নিগ্ধশীতত্বাদিনা তুল্যং যোগসংস্কারাভ্যাং জযেত্| যোগো-যুক্তিঃ কফজ্বরহরৈর্দ্রব্যৈঃ সহ যোজনা, সংস্কারো-গুণাধানম্, যোগশ্চ সংস্কারশ্ছ যোগসংস্কারৌ, তাভ্যাং ঘৃতং কফং জযেত্| ননু, বিপরীতং জ্বরোষ্মাণং ঘৃতং জযেদিতি ন ঘটতে, ঘৃতস্যাগ্নিবৃদ্ধিহেতুত্বাত্| তথা চ বক্ষ্যতি (হৃ.ছি.অ.১০/৬৮)-"স্নেহমেব পরং বিদ্যাদ্দুর্বলানলদীপনম্| নালং স্নেহসমিদ্ধিস্য শমাযান্নং সুগুর্বপি||" ইতি| অত্রাচক্ষ্মহে| ঘৃতং স্নেহনত্বদীপনত্বাভ্যাং বাতশমনং কুর্বঞ্জ্বরোষ্মাক্ষেপত্বং বাতস্য বিনির্বায জ্বরোষ্মণোঽপি রৌক্ষ্যতৈক্ষ্ণ্যাদিযুতস্য ঘৃতং বিপরীতগুণত্বাচ্ছমং করোতি, ন বৃদ্ধিম্| ননু, যথা স্নেহাদ্বাতং শমযতি তথা তত এব স্নেহাত্কিমিতি ঘৃতং সমানগুণত্বাত্ পিত্তং শমযতি ? বৄমঃ| জীর্ণজ্বরে লঙ্ঘনাদিভিরতিরূক্ষেণ জ্বরোষ্মণা পিত্তং রূক্ষ্মেব সম্পন্নং স্নেহভাগপরিক্ষযান্ন সস্নেহম্, অতঃ কথং কৃত্বা জ্বরযতু ?| তচ্চ ঘৃতং পিত্তমেব শমযতি, ন বাতং কোপযতি, দ্রব্যপ্রভাবত্বাত্সস্নেহনত্বাচ্চ|

Adhikarana uktiH kvAthaiH sarpiH pAnam (88) · Śloka 88

| পূর্বে কষাযাঃ সঘৃতাঃ সর্বে যোজ্যা যথামলম্||৮৮||

স০-পূর্বে কষাযাঃ-প্রাগুক্তানি পাচনানি, সহ ঘৃতেন প্রযুঞ্জ্যাত্| কথম্ ? যথামলং-দোষানতিক্রমেণ|

Adhikarana kAsopadravake jvare sarpiH prayogaH (89) · Śloka 89

ত্রিফলাপিচুমন্দত্বঙ্মাধুকং বৃহতীদ্বযম্| সমসূরদলং ক্বাথঃ সঘৃতো জ্বরকাসহা||৮৯||

স০-ত্রিপলাদীনি মসূরদলানি চৈষ ক্বাথো ঘৃতেন সহোপযোজিতো জ্বরকাসহা স্যাত্|

Adhikarana pippalyAdisiddhaM ghRutam (90-91) · Śloka 91

পিপ্পলীন্দ্রযবধাবনিতিক্তা- সারিবামলকতামলকীভিঃ| বিল্বমুস্তহিমপালনিসেব্যৈ- র্দ্রাক্ষযাঽতিবিষযা স্থিরযা চ||৯০|| ঘৃতমাশু নিহন্তি সাধিতং জ্বরমগ্নিং বিষমং হলীমকম্| অরুচিং ভৃশতাপমংসযো- র্বমথুং পার্শ্বশিরোরুজং ক্ষযম্||৯১||

স০-পিপ্পলীত্যাদিভির্দ্রব্যৈঃ কল্কীকৃতৈর্ঘৃতচতুর্থাংশৈস্তোযেন চতুর্গুণেন ঘৃতাপেক্ষযা সাধিতং ঘৃতমাশু জ্বরং হন্তি, বিষমা গ্ন্যাদীংশ্চ|

Adhikarana tailvakAdighRutAni (92) · Śloka 92

তৈল্বকং পবনজন্মনি জ্বরে যোজযেত্রিবৃতযা বিযোজিতম্| তিক্তকং বৃষঘৃতং চ পৈত্তিকে যচ্চ পালনিকযা শৃতং হবিঃ||৯২||

স০-তৈল্বকং ঘৃতং-বাতব্যাধিচিকিত্সিতোক্তং (অ.২১/৩২), ত্রিবৃতযা রহিত [ বাতিকে জ্বরে ] পিবেত্| পৈত্তিকে জ্বরে তিক্তকং কুষ্ঠচিকিত্সিতোক্তং (অ.১৯/২), তথা বৃষঘৃতং-রক্তপিত্তচিকিত্সিতোক্তং (অ.২/৪০), অত্রৈব বা বক্ষ্যমাণং (শ্লো.৯৪), যোজযেত্| পালনিকযা-ত্রাযন্ত্যা, যদ্ধৃতং পক্বং তচ্চ পিত্তজ্বরে যোজযেত্|

Adhikarana jIrNakaPajvaraghnaM ghRutam (93) · Śloka 93

বিডঙ্গসৌবর্চলচব্যপাঠা- ব্যোষাগ্নিসিন্ধূদ্ভবযাবশূকৈঃ| পলাংশকৈঃ ক্ষীরসমং ঘৃতস্য প্রস্থং পচেজ্জীর্ণকফজ্বরঘ্নম্||৯৩||

স০-বিডঙ্গাদিভিঃ পলপ্রমাণৌর্ঘৃতপ্রস্থং ক্ষীরতুল্যং চতুর্গুণজলং পচেত্| তচ্চোপযুক্তং জীর্ণো যঃ কফজ্বরস্তং হন্তি|

Adhikarana guDUcIghRutAdipa~jcakam (94) · Śloka 94

গুডূচ্যা রসকল্কাভ্যাং ত্রিফলাযা বৃষস্য চ| মৃদ্বীকাযা বলাযাশ্চ স্নেহাঃ সিদ্ধা জ্বরচ্ছিদঃ||৯৪||

স০-গুডূচ্যাদীনাং পঞ্চানাং পৃথ্ক্পৃথগ্রসকল্কাভ্যাং সিদ্ধাঃ পঞ্চ স্নেহাঃ জ্বরচ্ছিদো-জীর্ণজ্বরঘ্নাঃ স্যুরিত্যর্থঃ|

Adhikarana jIrNai ghRute mAMsarasAshanam (95) · Śloka 95

জীর্ণে ঘৃতে চ ভুঞ্জীত মৃদুমাংসরসৌদনম্| বলং হ্যলং দোষহরং পরং তচ্চ বলপ্রদম্||৯৫||

স০-ঘৃতে চ পরিণতে সতি মৃদু-অতীক্ষ্ণং মাংসরসাশনং ভুঞ্জীত| হি-যস্মাত্, অলং বলং জাতং দোষহরং ভবতি| তচ্চরসাশনং অতিশযেন বলকরং স্যাত্|

Adhikarana vAtottare jIrNajvare yUShaKalayorniShedhaH (96-97) · Śloka 97

কফপিত্তহরা মুদ্গকারবেল্লাদিজা রসাঃ| প্রাযেণ তস্মান্ন হিতা জীর্ণে বাতোত্তরে জ্বরে||৯৬|| শূলোদাবর্তবিষ্টম্ভজননা জ্বরবর্ধনাঃ| |৯৭|

স০-অত এব তস্মাত্কারণাত্ মুদ্গকারবেল্লাদিজা রসাঃ কফপিত্তহরা জীর্ণজ্বরে বাতোত্তরে প্রাযেণ ন হিতাঃ| তে হ্যুপযুক্তাঃ শূলাদিকৃতো জ্বরবর্ধনাশ্চ স্যুঃ|

Adhikarana jIrNajvare shodhanakAlaH (97-98) · Śloka 98

| ন শাম্যত্যেবমপি চেজ্জ্বরঃ কুর্বীত শোধনম্||৯৭|| শোধনার্হস্য, বমনং প্রাগুক্তং তস্য যোজযেত্| আমাশযগতে দোষে বলিনঃ পালযন্বলম্||৯৮||

স০-এবমপি কৃতে সতি যদি জ্বরো ন শাম্যতি তদা শোধনার্হস্য নরস্য প্রাগুক্তং-"পিপ্পলীভির্যুতান্ গালান্" (শ্লো.৬) ইত্যাদিকং, বমনং যোজযেত্| কদা ? দোষে আমাশযগতে সতি, বলবতঃ পুংসো বমনং যোজযেত্, বলং পালযন্-রক্ষযন্|

Adhikarana virecanamauShadhAni (99-101) · Śloka 101

পক্বে তু শিথিলে দোষে জ্বরে বা বিষমদ্যজে| মোদকং ত্রিফলাশ্যামাত্রিবৃত্পিপ্পলিকেসরৈঃ||৯৯|| সসিতামধুভির্দদ্যাহ্যোষাদ্যং বা বিরেচনম্| (লিহ্যাদ্বা ত্রৈবৃতং সংযুক্তং মধুসর্পিষা| ) দ্রাক্ষাধাত্রীরসং তদ্বত্সদ্রাক্ষাং বা হরীতকীম্||১০০|| আরগ্বধং বা পযসা মৃদ্বীকানাং রসেন বা| ত্রিফলাং ত্রাযমাণাং বা পযসা জ্বরিতঃপিবেত্||১০১||

স০-পক্বে পুনর্দোষে তথা শিথিলে-অবিষ্টব্ধে, অথবা বিষজেমদ্যোত্থে বা জ্বরে, মোদকং ত্রিফলাদিভির্বিরেচনং দদ্যাত্| ব্যোষাদ্যং বা-"ব্যোষত্রিজাতকাম্ভোদকৃমিঘ্নামলকৈস্ত্রিবৃত্| সর্বৈঃ সমা সমসিতা ক্ষৌদ্রেণ গুটিকাঃ কৃতাঃ||" (হৃ.ক.অ. ২/২১) ইতি বা, দদ্যাত্| অথবা পযসা-ক্ষীরেণ, মৃদ্বীকানাং রসেন বা, আরগ্বধং বিরেচনং দদ্যাত্| ত্রিফলাং ত্রাযন্তী বা পযসা জ্বরী পিবেত্|

Adhikarana virecAnAnantaraM saMsargIkramaH (102) · Śloka 102

বিরিক্তানাং চ সংসর্গী মণ্ডপূর্বা যথাক্রমম্| |১০২|

স০-বিরিক্তানাং জ্বরিণাং চশব্দাদ্বমিতানাং চ যথাক্রমংক্রমানতিক্রমেণ, সংসর্গী কর্তব্যেত্যধ্যাহার্যম্| মণ্ডঃ পূর্বঃ-প্রথমো, যস্যাং সৈবম্| মণ্ডং প্রথমং দত্ত্বাঽনন্তরং পেযাবিলেপ্যাদযো যথাক্রমং দেযাঃ| কৃতবমনবিরেচনানন্তরং যঃ পেযাদ্যবচারণাক্রমঃ স সংসর্গীত্যুচ্যতে|

Adhikarana svayaMpravRutteH stamBananiShedhaH (102-103) · Śloka 103

| চ্যবমানং জ্বরোত্ক্লিষ্টমুপেক্ষেত মলং সদা||১০২|| পক্বোঽপি হি বিকুর্বীত দোষঃ কোষ্ঠে কৃতাস্পদঃ| |১০৩|

স০-জ্বরেণোত্ক্লিষ্টং-উত্ক্লেশিতং জ্বরোত্ক্লিষ্টং, মলং-পুরীষাখ্যং, চ্যবমানং-পতন্তং, সদা উপেক্ষেত-ন তদ্বিধারণে প্রযত্নং কুর্যাত্| ননু, ঔষধানি (ধেন) কিমিত্যসৌ ন বিধ্নীযতে ? ইত্যাহ-পক্বোঽপীত্যাদি| দোষঃ-পুরীষাখ্যো, যতঃ পক্বঃ| অপিশব্দাত্কিমুতাপক্বঃ ? কোষ্ঠে-আমপক্বাশযাশ্রযাখ্যে, কৃতং-গৃহীতং, আস্পদং-অবস্থিতিঃ, যেন স এবংভূতো বিকুর্বীত-বিকারং কুর্যাত্|

Adhikarana atipravRuttau pAcanapUrvakaM stambhanaM kAryam (103-104) · Śloka 104

| অতিপ্রবর্তমানং বা পাচযন্ সঙ্গ্রহং নযেত্||১০৩|| আমসঙ্গ্রহণে দোষা দোষোপক্রম ঈরিতাঃ| |১০৪|

স০-অতিপ্রবর্তমানং বা তং মলং অপক্বং পাচযন্ সঙ্গ্রহং নযেত্- ন ত্বাম এব সঙ্গৃহীতব্য ইত্যাহ-আমসঙ্গ্রহণ ইত্যাদি| আমশব্দঃ পুরীষাখ্যস্য দোষস্য পচ্যমানাবস্থোপলক্ষণার্থঃ| আমস্য-অপক্বস্য দোষস্য, সঙ্গ্রহণমামসঙ্গ্রহণং তস্মিন্নাম সঙ্গ্রহণে যে দোষা ভবন্তি তে দোষোক্রমে-দোষোপক্রমণীযেঽধ্যাযে, ঈরিতাঃ-উক্তাঃ| তথা চ তত্রোক্তম্ (হৃ.সূ.অ.১৩/৩১)- "উত্ক্লিষ্টনধ ঊর্ধ্বং বা ন চামান্ বহতঃ স্বযম্| ধারযেদৌষধৈর্দোষান্ বিধৃতাস্তে হি রোগদাঃ||" ইতি| তস্মাদামসঙ্গ্রহণার্থমৌষধং ন দেযম্| তথা, আমজ্বরেঽপ্যামনির্হরণার্থমৌষধং ন দেযম্, ইতিপ্রতিপাদযন্নাহ-

Adhikarana Amajvare shodhananiShedhaH (104-105) · Śloka 105

| পাযযেদ্দোষহরণং মোহাদামজ্বরে তু যঃ||১০৪|| প্রসুপ্তং কৃষ্ণসর্পং স করাগ্রেণ পরামৃশেত্| |১০৫|

স০-তুর্ব্যতিরেকে ভিন্নক্রমঃ| যস্তু মোহাত্-অজ্ঞানাত্, ভিষক্পাপো দোষহরণমামজ্বরে পাযযেত্ স স্বযমনর্থকারী সুপ্তং কৃষ্ণসর্পং করস্যাগ্রেণ পরামৃশেত্-স্পৃশেত্| অতিপ্রত্যবাযং পশ্যতৈবমুক্তং তন্ত্রেকৃতা| তত্র চ বাক্যে রূপকাখ্যোঽলঙ্কারঃ| তস্য হ্যেতল্লক্ষণম্-"তদপরমৌপম্যে সতি যস্মিন্ স্যাদ্বাক্যযোর্যোগঃ|" অস্যোদাহরণম্-"যঃ সেবতে কুনৃপতিং কুরুতে বধিরস্য কর্ণজাপং সঃ ইতি|

Adhikarana jvarakShINasya niShedhaH (105) · Śloka 105

| জ্বরক্ষীণস্য ন হিতং বমনং ন বিরেচনম্||১০৫||

স০-জ্বরেণ ক্ষীণস্য পুংসো ন বমনং হিতং ন চ বিরেচনং হিতম্| তর্হি কথং দোষনির্হরণং তস্য ? ইত্যাহ-

Adhikarana tasya payasA nirUhairvA shodhanam (2) · Śloka 2

কামং তু পযসা তস্য নিরুহৈর্বা হরেন্মলান্| ||২||

স০-তস্য কামং-যথেষ্টং কৃত্বা, পযসা নিরূহৈর্বা মলান্ হরেত্|

Adhikarana payaH pAne adhikArI (106-107) · Śloka 107

| ক্ষীরোচিতস্য প্রক্ষীণশ্লেষ্মণো দাহতৃঙ্বতঃ||১০৬|| ক্ষীরং পিত্তানিলার্তস্য পথ্যমপ্যতিসারিণঃ| |১০৭|

স০-ক্ষীরমুচিতং-সাত্ম্যং, যস্য তস্য ক্ষীরোচিতস্য, তথা প্রকর্ষেণ ক্ষীণঃ শ্লেষ্মা যস্য তস্য প্রক্ষীণশ্লেষ্মণঃ, তথা দাহশ্চ তৃট্ চ তে বিদ্যেতে যস্য তস্য দাহত্ড়্ড্বতঃ, অত এব পিত্তানিলাভ্যামার্তস্য-পীডিতস্য, ক্ষীরং পথ্যম্| অতিসারিণোঽপিপথ্যম্, কিং পুনঃ প্রক্ষীণঃ শ্লেষ্মা যস্য তস্য ক্ষীরোচিতস্য পূর্বোক্তবিশেষণবিশিষ্টস্য ক্ষীরং ন পথ্যম্ ? ইত্যপি শব্দার্থঃ|

Adhikarana kShIraguNAH (107-108) · Śloka 108

| তদ্বপুর্লঙ্ঘনোত্তপ্তং প্লুষ্টং বনমিবাগ্নিনা||১০৭|| দিব্যাম্বু জীবযেত্তস্য জ্বরং চাশু নিযচ্ছতি| |১০৮|

স০-তচ্চ-ক্ষীরং, লঙ্ঘনোত্তপ্তং বপুর্জীবযেত্-কাযস্য সপ্রাণতামুত্পাদযেত্| কিং কিমিব ? অগ্নিনা-দাবেন, প্লুষ্টং বনং যথা দিব্যাম্বু জীবযেত্-প্রতোহযেত্, তথা বপুঃ ক্ষীরমিতি| লঙ্ঘনশব্দেনাত্র সামান্যং লঙ্ঘনবাচ্যং বস্তু ভণ্যতে| "শরীরলাঘবকরং যদ্দ্রব্যং কর্ম বা পুনঃ| তল্লঙ্ঘনমিতি জ্ঞেযম্" ইত্যেবংলক্ষণম্, ন তু বিশিষ্টমুপবাসলক্ষণম্, যোগ্যতাবশাত্| তস্যজ্বরিণঃ পুংসঃ, তত্-ক্ষীরং, আশু জ্বরং চ নিযচ্ছতি| ন কেবলং বপুর্জীবযেদিতি চার্থঃ|

Adhikarana kShIravisheShe niyamaH (108-109) · Śloka 109

| সংস্কৃতং শীতমুষ্ণং বা তস্মাদ্ধারোষ্ণমেব বা||১০৮|| বিভজ্য কালে যুঞ্জীত জ্বরিণং হন্ত্যতোঽন্যথা| |১০৯|

স০-যত এবং মহাগুণং ক্ষীরং তস্মাদ্ধেতোঃ সংস্কৃতং-দ্রব্যান্তরেণ, তথা শীতমুষ্ণং বেতি কৃত্বা, অথবা ধারোষ্ণমেব কালে বিভজ্য, যুঞ্জীত-যথাবিষযং কালে প্রযোজযেত্| অতঃ-যথানিরূপিতাত্ ক্ষীরোপযোগবিষযাত্, অন্যথা-অন্যেন প্রকারেণ, প্রযুক্তং ক্ষীরং জ্বরিণং হন্তি|

Adhikarana tRuDAdinAshanaM kShIram (109-110) · Śloka 110

| পযঃ সশুণ্ঠীখর্জূরমৃদ্বীকাশর্করাঘৃতম্||১০৯|| শৃতশীতং মধুযুতং তুড্দাহজ্বরনাশনম্| |১১০|

স০-ক্ষীরং শুণ্ঠ্যাদিযুতং শৃতমনন্তরং শীতং মধুযুতং তৃড্দাহজিদিত্যর্থঃ|

Adhikarana tRuDAdinAshanaM anyatkShIratrayam (110-111) · Śloka 111

| তদ্বদ্ দ্রাক্ষাবলাযষ্টীসারিবাকণচন্দনৈঃ||১১০|| চতুর্গুণেনাম্ভসা বা পিপ্পল্যা বা শৃতং পিবেত্| |১১১|

স০-তেনৈব পূর্বোক্তেন পযসা তুল্যং-তদ্বত্| যথা পূর্বোক্তং শৃতশীতং তৃড্দাহজ্বরহৃত্ তথা দ্রাক্ষাদিভিঃ শৃতমনন্তরং শীতং মধুযুতং তৃডাদিজিদিত্যর্থঃ| অথবা ক্ষীরং চতুর্গুণেন জলেন শৃতং পিবেত্| অথবা পিপ্পল্যা শৃতং পিবেত্|

Adhikarana kAsAdijit kShIram (111-112) · Śloka 112

| কাসাচ্ছ্বাসাচ্ছিরঃশূলাত্পার্শ্বশূলাচ্চিরজ্বরাত্| মুচ্যতে জ্বরিতঃ পীত্বা||১১১|| পঞ্চমূলীশৃতং পযঃ| |১১২|

স০-পঞ্চমূলেন শৃতং ক্ষীরং পীত্বা কাসাদিভ্যো মুচ্যতে| মুচ্যত ইতি কর্মকর্তরি তঙ্| চিরজ্বরো-দীর্ঘকালানুবন্ধী জ্বরঃ|

Adhikarana vibaddhavAtAdijit kShIram (112-113) · Śloka 113

| শৃতমেরণ্ডমূলেন বালবিল্বেন বা জ্বরাত্||১১২|| ধারোষ্ণং বা পযঃ পীত্বা বিবদ্ধানিলবর্চসঃ| সরক্তপিচ্ছাতিসৃতেঃ সতৃট্শূলপ্রবাহিকাত্||১১৩||

স০-এরণ্ডমূলেনাথবা বালবিল্বেন শৃতমথবা ধারোষ্ণং ক্ষীরং পীত্বা পুরুষো জ্বরাদ্বিমুচ্যতে| কিম্ভূতাজ্জ্বরাত্ ? বিবদ্ধা নিলবর্চসঃ| বিবদ্ধে-বিশেষেণ বদ্ধে, অসম্যক্প্রবর্তনাদনিলবর্চসী যস্মিন্ জ্বরে স বিবদ্ধানিলবর্চাঃ, তস্মাজ্জ্বরাদ্বিমুচ্যতে| তথা, রক্তং চ পিচ্ছা চ রক্তপিচ্ছে, তাভ্যামুপলক্ষিতা অতি সৃতিঃ-অতীসারঃ, সহ তযা বর্ততে যো জ্বরঃ, তস্মাত্তথাবিধাজ্জ্বরাত্ তথা সহ তৃষা সহ শূলেন তথা প্রবাহিকযা-নিস্ছারিকাপরসংজ্ঞযা, বর্ততে যস্তমাত্ তথাবিধাজ্জবরাত্ প্রমুচ্যতে|

Adhikarana shoPAdijit kShIram (114) · Śloka 114

সিদ্ধং শুণ্ঠীবলাব্যাঘ্রীগোকণ্টকগুডৈঃ পযঃ| শোফমূত্রশকৃদ্বাতবিবন্ধজ্বরকাসজিত্||১১৪||

স০-শুণ্ঠ্যাদিভিঃ সাধিতং পযঃ শোফাদিজিত্|

Adhikarana jvarashoPanut kShIram (115) · Śloka 115

বৃশ্চীববিল্ববর্ষাভূসাধিতং জ্বরশোফনুত্| |১১৫|

স০-বৃশ্চীবাদিভিঃ সাধিতং পযো জ্বরশোফনুদিতি| বৃশ্চীবঃ-সূক্ষ্মপুনর্নর্বঃ| স্থূলপুনর্নবস্তু-বর্ষাভূঃ| পুনর্নবদ্বযং বিল্বং চাত্র যোজ্যম্|

Adhikarana ASujvarApaham kShIram (115) · Śloka 115

| শিংশিপাসারসিদ্ধং চ ক্ষীরমাশু জ্বরাপহম্||১১৫||

স০-শিংশিপাসারেণ সিদ্ধং-শৃতং ক্ষীরমুপযুক্তং, আশু-ন তু চ, জ্বরহৃত্| ক্ষীরস্য শ্রবণে বিধিরতীসারচিকিত্সিতোক্তঃ (হৃ. ছি. অ. ৯/৩৯)-"পযস্যুত্ক্বাথ্য মুস্তানাং বিংশতি" ইত্যনুসারেণানুকল্প্যঃ| তন্ত্রান্তরে ত্বেবমুক্তম্-"দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষঃ কর্তব্যঃ ক্ষীরক্বাথে ত্বযং বিধিঃ||" ইতি| ননু, কিং বাতপিত্তোত্তরে জ্বরে জ্বরে ঘৃতং প্রধানমা শ্রীযতাং পূর্ববচনপ্রামাণ্যাত্ ? অথবা ক্ষীরং প্রধানমেতদ্বচনপ্রামাণ্যাত্ ? ইত্যত্র সংশযঃ| অত্রোচ্যতে| উভযমপীদং ঘৃতং ক্ষ্রীরং ছ বাতপিত্তোত্তরে জ্বরে প্রধানম্, অবস্থাবশাত্ সাত্ম্যবশাছ্ছ ক্বচিত্কিঞ্চিদুপযুজ্যতে|

Adhikarana nirUhaguNAH kShIram (116-117) · Śloka 117

নিরুহস্তু বলং বহ্নিং বিজ্বরত্বং মুদং রুচিম্| দোষে যুক্তঃ করোত্যাশু পক্বে পক্বাশাযং গতে||১১৬|| পিত্তং বা কফপিত্তং বা পক্বাশযগতং হরেত্| স্রংসনং ত্রীনপি মলান্ বস্তিঃ পক্বাশযাশ্রযান্||১১৭||

স০-নিরূহো যুক্তো দোষে পক্বে তথা পক্বাশযং গতে সতি বলাদীন্ দ্রাগেব করোতি| পিত্তং কেবলং কফপিত্তং বা পক্বাশযাশ্রিতং স্রংসনং-বিরেচনং, হরেত্| বস্তিঃ প্রযোজিতস্ত্রীনপি মলান্বাতাদ্যান্ হরেত্| কীদৃশান্ ? পক্বাশযমাশ্রিতান্|

Adhikarana anuvAsane adhikarI (118) · Śloka 118

প্রক্ষীণকফপিত্তস্য ত্রিকপৃষ্ঠকটিগ্রহে| দীপ্তাগ্নের্বদ্ধশকৃতঃ প্রযুঞ্জীতানুবাসনম্||১১৮||

স০-প্রক্ষীণে কফপিত্তে যস্য পুংসস্তথা দীপ্তাগ্নের্বদ্ধবর্চস্স্ত্রিক্পৃষ্ঠকটিগ্রহে সত্যনুবাসনং প্রযুঞ্জীত|

Adhikarana jvaranAshako nirUhaH (119-121) · Śloka 121

পটোলনিম্বচ্ছদনকটুকাচতুরঙ্গুলৈঃ| স্থিরাবলাগোক্ষুরকমদনোশীরবালকৈঃ||১১৯|| পযস্যর্ধোদকে ক্বাথং ক্ষীরশেষং বিমিশ্রিতম্| কল্কিতৈর্মুস্তমদনকৃষ্ণামধুকবত্সকৈঃ||১২০|| বস্তি মধুঘৃতাভ্যাং চ পীড্যেজ্জ্বরনাশনম্| ||১২১||

স০-পটোলাদিভিঃ ক্বাথং ক্ষীরেঽর্ধোদকে ক্ষীরশেষং তথামিশ্রিতং কল্কীকৃতৈর্দ্রব্যৈর্মুস্তাদিভির্মধুঘৃতাভ্যাং চ যোজিতং বস্তিং জ্বরনাশনং দদ্যাত্|

Adhikarana jvaranAshako anyo nirUhaH (121-122) · Śloka 122

| চতস্রঃ পর্ণিনীর্যষ্টীফলোশীরনৃপদ্রুমান্||১২১|| ক্বাথযেত্কল্কযেদ্যশ্টীষতাহ্বাফলিনীফলম্| মুস্তং চ বস্তিঃ সগুডক্ষৌদ্রসর্পির্জ্বরাপহঃ||১২২||

স০-মুদ্গপর্ণী মাষপর্ণী শালিপর্ণী পৃশ্র্নিপর্ণীত্যাদি(চেতি)-চস্রঃ পর্ণীনীঃ যষ্টীফলাদীংশ্চ ক্বাথযেত্| ফলং-মদনফলম্| তথা, যষ্ট্যাদীন্ কল্কযেত্, ইত্যেষ সগুডাদির্বস্তির্জ্বরহৃত্|

Adhikarana jvaranAshakamanuvAsanam (123-124) · Śloka 124

জীবন্তীং মদনং মেদাং পিপ্প্প্লীং মধুকং বচাম্| ঋদ্ধিং রাস্রাং বলাং বিল্বং শতপুষ্পাং শতাবরীম্||১২৩|| পিষ্ট্বা ক্ষীরং জলং সর্পিস্তৈলং চৈকত্র সাধিতম্| জ্বরেঽনুবাসনং দদ্যাদ্যথাস্নেহং যথামলম্||১২৪||

স০-জীবন্ত্যাদীনি দ্রব্যাণি স্নেহস্য চতুর্ভাগমাত্রাণি জলেন পিষ্ট্বা ক্ষীরং স্নেহসমং তৈলাত্সর্পিষশ্চ চতুর্গুণং জলং চ তৈলসর্পির্দ্রব্যাচ্চতুর্গুণমিত্যেকত্র সাধিতং পক্বমেতত্ জ্বরেঽনুবাসনং দদ্যাত্| যথাস্নেহং যথামলং-যো যস্মিন্ জ্বরে দোষে-বাতাদৌ, যঃ স্নেহো যোগ্যস্তত্র তং, দদ্যাত্|

Adhikarana jvaranASakAanye bastayaH (125) · Śloka 125

যে চ সিদ্ধিষু বক্ষ্যন্তে বস্তযো জ্বরনাশনাঃ| |১২৫|

স০-যে চ বস্তযঃ সিদ্ধিষু-বস্তিকল্পাধ্যাযে, বক্ষ্যন্তে জ্বরনাশনাস্তে চ, 'দেযাঃ' ইতি শেষঃ|

Adhikarana shiraH shUlAdiShu nasyam (125-126) · Śloka 126

| শিরোরুগ্গৌরবশ্লেষ্মহরমিন্দ্রিযবোধনম্||১২৫|| জীর্ণজ্বরে রুচিকরং দদ্যান্নস্যং বিরেচনম্| স্নৈহিকং শূন্যশিরসো দাহার্তে পিত্তনাশনম্||১২৬||

স০-জীর্ণজ্বরে বিরেচনাখ্যং নস্যং দদ্যাত্| কীদৃশং তন্নস্যং স্যাত্ ? শিরসো রুজং গৌরবং চ শ্লেষ্মাণং চ হরতি তচ্ছীলং তত্| তথা, ইন্দ্রিযাণাং-বক্ষুরাদীনাং, চ বোধনম্| তথা, রুচিকৃত্| শূন্যশিরসঃ পুংসঃ স্নেহিকং-স্নেহেন মিশ্রং স্নিগ্ধং, নস্যং দদ্যাত্| দাহার্তে শিরসি পিত্তহরং নস্যং দদ্যাত্|

Adhikarana pratishyAyAdau dhUmAdayaH (127) · Śloka 127

ধূমগণ্ডূষকবলান্ যথাদোষং চ কল্পযেত্| প্রতিশ্যাযাস্যবৈরস্যশিরঃ কণ্ঠামযাপহান্||১২৭||

স০-ধূমাদীংশ্চ যথাদোষং কল্পযেত্| কিম্ভূতান্ ? প্রতিশ্যাযাদিঘ্নান্|

Adhikarana arUcau kalkadvayam (128) · Śloka 128

অরুচৌ মাতুলুঙ্গস্য কেসরং সাজ্যসৈন্ধবম্| ধাত্রীদ্রাক্ষাসিতানাং বা কল্কমাস্যেন ধারযেত্||১২৮||

স০-অরুচৌ সত্যাং বীজপূরকস্য কেসরং সঘৃতসৈন্ধবমাস্যেন ধারযেদিতি সম্বন্ধঃ| অথবা ধাত্র্যাদীনাং কল্কং ধারযেত্|

Adhikarana tvaggate jvare aBya~ggAdayaH (129-130) · Śloka 130

যথোপশযসংস্পর্শান্ শীতোষ্ণদ্রব্যকল্পিতান্| অভ্যঙ্গালেপসেকাদীন্ জ্বরে জীর্ণে ত্বগাশ্রিতে||১২৯|| কুর্যাদঞ্জনধূমাংশ্চ তথৈবাগন্তুজেঽপি তান্| |১৩০|

স০-ত্বগাশ্রিতে জীর্ণজ্বরেঽভ্যঙ্গাদীন্ কুর্যাত্| যথোপশযং-যথাসুখাবহং, সংস্পর্শো যেষাং, তান্, তথা শীতবীর্যৈরুষ্ণ বীর্যৈশ্চ দ্রব্যৈঃ কল্পিতান্-যোজিতান্| তথা, অঞ্জনংধূমাংশ্চ কুর্যাত্| অঞ্জনধূমানাগন্তুজেঽপি জ্বরে তথৈব কুর্যাত্| সদ্যোগত্বাদাগন্তুজেঽপ্যেতেঽনিষিদ্ধা এব| তানিতি পুনঃ কৃতমতিশযার্থম্| বিশেষেণাগন্তুজেঽপি জ্বরে-ভূতবিষাদ্যুদ্ভবে, তান্ কুর্যাদিত্যর্থঃ|

Adhikarana dAhe sahastradhautaghRutam (130) · Śloka 130

| দাহে সহস্রধৌতেন সর্পিষাঽভ্যঙ্গমাচরেত্||১৩০||

সং-দাহে সতি সর্পিষা সহস্রধৌতেনাভ্যঙ্গমাচরেত্|

Adhikarana aBya~ggArthaM tailam (131-133) · Śloka 133

সূত্রোক্তৈশ্চ গণৈস্তৈস্তৈর্মধুরাম্লকষাযকৈঃ| দূর্বাদিভির্বা পিত্তঘ্নৈঃ শোধনাদিগণোদিতৈঃ||১৩১|| শীতবীর্যৈর্হিমস্পর্শৈঃ ক্বাথকল্কীকৃতৈঃ পচেত্| তৈলং সক্ষীরমভ্যঙ্গাত্সদ্যো দাহজ্বরাপহম্||১৩২|| শিরো গাত্রং চ তৈরেব নাতিপিষ্টৈঃ প্রলেপযেত্| তত্ক্বাথেন পরীষেকমবগাহং চ যোজযেত্||১৩৩|| তথাঽঽরনালসলিলক্ষীরশুক্তঘৃতাদিভিঃ| ||১৩৩||

স০-সূত্রোক্তৈঃ-সূত্রস্থানোদিতৈঃ, মধুরাম্লকষাযকৈর্গণৈঃ| তত্র মধুরো গণো-"ঘৃতহেম" (হৃ.সূ.অ. ১০/২২) ইত্যাদিঃ, অম্লো গণো-"ধাত্রীফলাম্লীকা" (হৃ. সূ. অ. ১০/২৫) ইত্যাদিঃ, কষাযো গণঃ-"পথ্যাঽক্ষং" (হৃ. সূ. অ. ১০/৩১) ইত্যাদিঃ, তত্র চৈতৈর্মধুরাম্লকষাযৈর্বর্গৈঃ| তত্র দূর্বাদিদিভির্গণৈঃ- "দূর্বাঽনন্তা" (হৃ.সূ.অ. ১৫/৬) ইতি নির্দিষ্ট একঃ, "ন্যগ্রোধাদিঃ" (হৃ. সূ. অ. ১৫/৪২) দ্বিতীযঃ, তৃতীযস্তু "পদ্মকপুণ্ড্রৌ" (হৃ. সূ. অ. ১৫/১২) ইত্যাদিঃ, চতুর্থঃ "সারিবোশীর" (হৃ. সূ. অ. ১৫/১১) ইত্যাদিঃ, এতৈ পূর্বোক্তৈর্গণৈঃ পিত্তঘ্নৈঃ শোধনাদিগণসঙ্গ্রহোক্তৈঃ শীতবীর্যৈর্হিমস্পর্শৈর্ভেষজৈস্তথা স্পর্শতো বীর্যতশ্চ শীতগুণৈঃ, অক্বাথাঃ ক্বাথাঃ কৃতাঃ, অকল্কাঃ কল্কাঃ কৃতাঃ, তৈঃ ক্বাথকল্কীকৃতৈরেতৈর্গণৈস্তৈলং ক্ষীরেণ সহ পচেত্| তচ্চ পক্বমভ্যঙ্গাত্-ম্রক্ষণাত্, সদ্যো-ন চিরেণ কালেন, দাহজ্বরং জযেত্| ন কেবলমেতৈর্গণৈস্তৈলং পচেদ্দাহজ্বরশান্ত্যৈ, যাবত্তৈরেব শিরো-মূর্ধানং, গাত্রং চ নাতিপিষ্টৈঃ-কিঞ্চিত্পিষ্টৈঃ, প্রলেপযেত্| সুপিষ্টৈর্হ্যৈতৈঃ প্রত্যুত দাহ উত্পদ্যতে| তথা চোক্তম্ (সঙ্গ্রহে সূ. অ. ৭)- "শ্লক্ষ্ণশুষ্কঘনো লেপশ্চন্দনস্যাপি দাহকৃত্| ত্বগ্গতস্যোষ্মণো রোধাচ্ছীকৃত্ত্বন্যথাঽগুরোঃ|| ইতি| অনেনৈবাভিপ্রাযেণ শীতজ্বরে বক্ষ্যতি (শ্লো. ১৪১)- "তৈঃ সুপিষ্টৈশ্চ লেপযেত্|" ইতি| গাত্রগ্রহণেনৈব শিরোগ্রহণে লব্ধে পুনঃ শিরোগ্রহণং বিশেষার্থম্| বিশেষেণ শিরো লেপযেত্, তস্য বিশেষেণ জ্বরাশ্রযত্বাত্| তথা চোক্তম্-"বিমুক্তস্যাপি হি শিরো জ্বরো যস্য ন মুঞ্চতি| অবিমুক্তঃ স বিজ্ঞেযা জ্বরঃ পুনরুপৈতি তম্||" ইতি| তস্মাচ্ছিরসো বিশেষেণ লেপনার্থং পৃথগুপাদানম্| তেষাং গণানাং ক্বাথস্তত্ক্বাথঃ, তেন পরিষেকমবগাহং চ ক্বাথপূর্ণাযাং দ্রোণ্যাং যোজযেত্| তথা, আরনালাদিভিঃ পরিষেকাদি যোজযেত্|

Adhikarana dAhAdighnaM lepatrayam (134-135) · Śloka 135

| কপিত্থমাতুলুঙ্গাম্লবিদারীরোধ্রদাডিমৈঃ||১৩৪|| বদরীপল্লবোত্থেন ফেনেনারিষ্টকস্য বা| লিপ্তেঽঙ্গে দাহরুঙ্মোহাশ্রচ্ছর্দিস্তৃষ্ণা চ শাম্যতি||১৩৫||

স০-কপিত্থাদিভির্বদরীপল্লবোদ্ভবেন বা ফেনেন লিপ্তেঽঙ্গে সতি দাহাদযঃ শাম্যন্তি|

Adhikarana pittaharaH kramaH (136) · Śloka 136

যো বর্ণিতঃ পিত্তহরো দোষোপক্রমণে ক্রমঃ| তং চ শীলযতঃ শীঘ্রং সদাহো নশ্যতি জ্বরঃ||১৩৬||

স০-যশ্চ দোষোপক্রমণীযাধ্যাযে পিত্তহরঃ ক্রমো বর্ণিতঃ-উক্তঃ, তং চ-ক্রমং, শীলযতঃ-অভ্যসতঃ, জ্বরো দাহেন সহ নশ্যতি|

Adhikarana shItajvare tailalepasvedAdInyauShadhAni (137-147) · Śloka 147

বীর্যোষ্ণৈরুষ্ণসংস্পর্শৈস্তগরাগুরুকুঙ্কুমৈঃ| কুষ্ঠস্থৌণেযশৈলেযসরলামরদারুভিঃ||১৩৭|| নখরাস্নাপুরবচাচণ্ডৈলাদ্বযচোরকৈঃ| পৃথ্বীকাশিগ্রুসুরসাহিংস্রাধ্যামকসর্ষপৈঃ||১৩৮|| দশমূলামৃতৈরণ্ডদ্বযপত্তূররোহিষৈঃ| তমালপত্রভূতীকশল্লকীধান্যদীপ্যকৈঃ||১৩৯|| মিশিমাষকুলত্থাগ্নিপ্রকীর্যানাকুলীদ্বযৈঃ| অন্যৈশ্চ তদ্বিধৈর্দ্রব্যৈঃ শীতে তৈলং জ্বরে পচেত্||১৪০|| ক্বথিতৈঃ কল্কিতৈর্যুক্তৈঃ সুরাসৌবীরকাদিভিঃ| তেনাভ্যঞ্জযাত্সুখোষ্ণেন, তৈঃ সুপিষ্টৈশ্চ লেপযেত্||১৪১|| কবোষ্ণৈস্তৈঃ পরীষেকমবগাহং চ কল্পযেত্| কেবলৈরপি তদ্বচ্চ সুক্তগোমূত্রমস্তুভিঃ||১৪২|| আরগ্বধাদিবর্গং চ পানাভ্যঞ্জনলেপনে| ধূপানগরুজান্ যাংশ্চ বক্ষ্যন্তে বিষমজ্বরে||১৪৩|| অগ্ন্যনগ্নিকৃতান্ স্বেদান্ স্বেদি ভেষজভোজনম্| গর্ভভূবেশ্মশযনং কুথকম্বলরল্লকান্||১৪৪|| নির্ধূমদীপ্তৈরঙ্গারৈর্হসন্তীশ্চ হসন্তিকাঃ| মদ্যং সত্র্যূষণং তক্রং কুলত্থব্রীহিকোদ্গবান্||১৪৫|| সংশীলযেদ্বেপথুমান্ যচ্চান্যদপি পিত্তলম্| দযিতাঃ স্তনশালিন্যঃ পীনা বিভ্রমভূষণাঃ||১৪৬|| যৌবনাসবমত্তাশ্চ তমালিঙ্গেযুরঙ্গনাঃ| বীতশীতং চ বিজ্ঞায তাস্ততোঽপনযেত্পুনঃ||১৪৭||

স০-বীর্যোষ্ণৈরুষ্ণসংস্পর্শৈঃ-উভযথা বীর্যতঃ স্পর্শতশ্চোষ্ণৈস্তগরাদিভির্দ্রব্যৈঃ, [ অন্যৈশ্চ- ] অপরৈরপি, তদ্বিধৈঃ-উষ্ণবীর্যৈঃ উষ্ণসংস্পর্শৈশ্চ, ক্বাথীকৃতৈঃ কল্কীকৃতৈশ্চ সুরাদিভিঃ-অম্লপাকরসৈঃ, [শীতে-] শীতজ্বরএতদ্বিষযে, তৈলং পচেত্| তেন-তৈলেন, সুখোষ্ণেনাভ্যঞ্জযাত্-ম্রক্ষযেত্| তৈশ্চ-পূর্বোক্তৈর্দ্রব্যৈঃ, সুপিষ্টৈঃ-অতিশ্লক্ষ্ণৈঃ, লেপযেত্| তৈশ্চ কিঞ্চিদুষ্ণৈঃ পরিষেকমবগাহং চ কল্পযেত্-যোজযেত্| তদ্বচ্চ-তথৈব, সুক্তাদিভিঃ কেবলৈশ্চ পরিষেকাদিকং কল্পযেত্| "আরগ্বধেন্দ্গব" (হৃ. সূ. অ. ১৫/১৭) ইত্যাদি চ পানাভ্যঞ্জনলেপনে কল্পযেত্| অগরুজাম্ ধূপান্ কল্পযেত্| যাংশ্চ ধূপান্ বিষমজ্বরে বক্ষ্যন্তে তাংশ্চ কল্পযেত্| তথা স্বেদান্ শীলযেত্| কিম্ভূতান্ ? অগ্নিকৃতাননগ্নিকৃতাংশ্চস্বেদবিদ্ধ্যুক্তান্ | তথা-স্বেদযতি সাধু স্বেদি যদ্ভেষজং ভোজনং চ তচ্চ সংশীলযেত্| তথা গর্ভে-গর্ভগৃহাভ্যন্তরে, যদ্ভূবেশ্ম-ভূমিগৃহং, তত্র শযনং-শয্যাম্, তথা কুথাদীনাবরণবিশেষান্, তথা হসন্তিকাঃ-বহ্নিশকটিকাঃ, শীলযেত্| কিম্ভূতাঃ ? নির্ধূমদীপ্তৈরঙ্গারৈর্হসন্তীরিব| তথা, মদ্যাদীংশ্চ শীলযেত্| বেপথুমন্তমঙ্গনা আলিঙ্গযেযুর্দযিতাদিগুণযুক্তঃ| গতশীতং চ বিদিত্বা ততস্তাঃ-যোষাঃ, পুনরপনযেত্| এতচ্চ ব্রুবংস্তাভিঃ সম্ভোগাভিলাষং নিবারযতি| অধুনা সন্নিপাতচিকিত্সিতং ব্রূতে-

Adhikarana sannipAtacikitsAkramaH (148) · Śloka 148

বর্ধনেনৈকদোষস্য ক্ষপণেনোচ্ছ্রিতস্য বা| কফস্থানানুপূর্ব্যা বা তুল্যকক্ষাঞ্জযেন্মলান্||১৪৮||

স০-হীনাধিকভাবত্বেন বিষমদোষজে সন্নিপাতে বর্ধনেনৈকদোষস্যার্থাত্ ক্ষীণস্য ক্ষীণযোর্বা, উচ্ছ্রিতস্যোচ্ছ্রিতযোর্বা ক্ষপণেন, দেশকালবলান্মলান্ জযেত্| কথং বিষমদোষজে সন্নিপাতে বর্ধনেনৈকদোষস্য সন্নিপাতজ্বরস্যোপশান্তি ? তস্মাদ্বর্ধনমযুক্তম্| অত্রাচক্ষ্মহে| সন্নিপাতস্থেন ক্ষীণেন দোষেণ সতাঽক্ষীণৌ দোষৌ জ্বরকারিণৌ| ন তৌ সুখেন জেতুং শক্যেতে, বিষমাশ্রযত্বাত্| ক্ষীণস্য তু দোষস্য বর্ধনেন দোষসাম্যমুত্পাদ্যৈকরূপযা ক্রিযযা সন্নিপাতঃ সুখেন জেতুং শক্যতে| তস্মাদ্বর্ধনেনৈকদোষস্যেতি বক্তুং যুক্তম্| তথা চ,-বাতাখ্যে যতো দোষে শীতলঘুরূক্ষাদিরুপৈর্দ্রব্যৈর্বৃদ্ধির্ভবতি| বর্ধমানেন চ তত্রস্থৌ পিত্তকফাবপ্যেবং প্রাযেণ কিঞ্চিত্ ক্ষযং যাতঃ, তত্ক্ষ্যাচ্চাসৌ জ্বরোঽপ্য মৃদুতাং গতঃ সুখেন শক্যতে জেতুং ইতি| এবং দোষত্রযস্যাপি জ্বরকারণে তথা যুক্ত্যা প্রতীকারঃ কৃতো ভবতি| এবমুচ্ছ্রিতস্যাপি ক্ষপণৈরে(ণেনৈ)করূপযা ক্রিযযা সুখেন সন্নিপাতো জীযতে| তদেবং ব্দ্যুল্বণৈকোল্বণৈর্দোষৈর্জনিতে সন্নিপাতে চিকিত্সাক্রম উক্তঃ| সম্প্রতি সমদোষজে সন্নিপাতে চিকিত্সাক্রমং দর্শযিতুমাহ-কফেত্যাদি| স্থিতিঃ-স্থানম্, কফশ্চ স্থানং চ কফস্থানে, তযোরানুপূর্বী-ক্রমঃ, তযা চ তুল্যকক্ষান্-সমান্ সন্নিপাতান্, জ্বরে মলান্ জযেত্| তত্র কফঃ প্রাগ্জেতব্যস্ততঃ পিত্তং ততো বাযুরিতি কফানুপূর্বীত্যুচ্যতে| উক্তং চ (সঙ্গ্রহে সূ.অ.২১)-"স্থানতঃ কেচিদিচ্ছন্তি প্রাক্ তাবচ্ছ্লেষ্মণো বধম্| শিরস্যুরসি কণ্ঠে চ প্রলিপ্তেঽন্নরুচিঃ কুতঃ|| তদভাবে কথং ভোজ্যপানদ্রব্যাবচারণম্| অসত্যভ্যবহারে চ কুতো দোষস্য নিগ্রহঃ|| তস্মাদাদৌ কফো ধাত্যঃ কাযদ্বারার্গলো হি সঃ| মধ্যস্থাযি যতঃ পিত্তমাশুকারি চ চিন্ত্যতে|| অতো বাতসস্বস্যাস্য কুর্যাত্তদনু নিগ্রহম্| অধঃস্থাযী চ তদনু নিগ্রাহ্যঃ স্যাত্সমীরণঃ||" ইতি| সুশ্রুতস্ত্বাহ(?) (সঙ্গ্রহে সূ.অ. ২১)-"[সুশ্রুতশ্চ ন সর্বত্র মতমেতদ্ব্রবীতি তু|] জযেজ্বরেঽতিসারে চ ক্রমাত্পিত্তকফানিলান্|| প্রাযেণ তাপাত্মতযা জ্বরে তেজো বিশিষ্যতে| বিশশ্চ সরতা পিত্তাত্তথা চ মৃদুকোষ্ঠতা|| তস্য চানুবলঃ শ্লেষ্মা গৌরবাপক্তিজাড্যকৃত্| বাযুশ্চ বর্ধতেঽবশ্যং যস্ত্বহঃসু তযোঃ ক্ষযে|| জ্বরাতিসারযোস্তস্মাদেষ দোষজযে ক্রমঃ| কফপিত্তানিলানন্যে ক্রমাদাহুস্তযোরপি|| যস্মাদামাশযোত্ক্লেশাদ্ভূযিষ্ঠং তত্সমুদ্ভবঃ| ক্রমেণাদ্যেন তত্রাপি প্রবৃদ্ধান্ স্বাশযে স্থিতান্| স্বাশযেষু প্রদুষ্টানাংস্থিতৈব হ্যাশুকারিতা| বিজ্ঞায কর্মভিঃ স্বৈঃ স্বের্দোষোদ্রেকং যথামলম্| ভেষজং যোজযেত্তত্তু স্বীকুর্যান্ন ক্রমং ভিষক্|" ইতি| অন্যে ত্বাহুঃ (সং.সূ.অ. ২১)-"ক্রমান্মরুত্পিত্তকফাঃ সর্বত্র সদৃশে বলে| বাতাদীনাং যথাপূর্বং যতঃ স্বাভাবিকং বলম্|| ঊচে পরাশরোঽপ্যর্থমমুমেব প্রমাণযন্| যথোপন্যাসতঃ প্রাপ্তমাদৌ দোষভিষগ্জিতম্| নেত্ড়ভঙ্গেন দৃষ্টৌ হি সমং সৈন্যপরাজযঃ||" ইতি| স্থানানুপূর্ব্যা বা দোষাংস্তুল্যকক্ষান্ জযেত্| স্থানং চ যদ্যপ্যবিশেষেণৈব সম্ভবতি তথাঽপীহ জ্বরকারিদোষপ্রস্তাবাদামাশযো গৃহ্যতে| তেনামাশযস্থো দোষঃ প্রাগ্জেতব্যস্ততঃ পক্বাশযস্থঃ, ইতি স্থানানুপূর্বী-স্থানমাহাত্ম্যস্য চিকিত্সাক্রমঃ, কার্যঃ| তথা চ প্রাগধ্যগীষ্ট (হৃ. সূ. অ. ১৭/১৩)-"আমাশযগতেবাযৌ কফে পক্বাশযাশ্রিতে| রূক্ষপূর্বং তথা স্নেহপূর্বং স্থানানুরোধতঃ||" ইতি| তদেবং কফস্থানানুপূর্ব্যা বা তুল্যকক্ষান্ মলান্ জযেত্| অন্যে ত্বেবং ব্যাখ্যানযন্তি,- কফস্য স্থানংকফস্থানম্, কফস্থানলক্ষণা চাসাবানুপূর্বী চ, তযা কফ স্থানানুপূর্ব্যা বা তুল্যকক্ষান্ মলান্ জযেত্| যদ্যপি কফস্থানানি কণ্ঠাদীন্যপি তথাঽপীহ জ্বরকারিদোষপ্রস্তাবাদামাশযোগৃহ্যতে| তথা চোক্তম্ (শ্লো.১)-"আমশযস্থো হত্বাঽগ্নিং সোমো মার্গান্ পিধায যত্| বিদধাতি জ্বরং দোষস্তস্মাত্কুর্বীত লঙ্ঘনম্||" ইতি| তদেবং রূক্ষোষ্ণপাচনাদিঃ ক্রমোঽত্র কার্য ইত্যবতিষ্ঠতে| ননু, কফস্থানানুপূর্ব্যা বেত্যেতন্ন বাচ্যম্, যতস্তুল্যকালং ত্রিদোষহরৈর্দ্রব্যৈঃ সন্নিপাতস্য ক্রিযা কার্যা| দ্রব্যাণি দোষঘ্নানি| অত্রোচ্যতে| জ্বরনাশনানি দ্রব্যাণি ত্রিদোষঘ্নানি বিরলানি| একদোষঘ্নানি পুনর্জ্বরহন্তৃণি ত্রিদোষঘ্নেভ্যঃ সমর্থরাণি বহুতরাণীতি কফস্থানানুপূর্ব্যা বেত্যুক্তম্| অপি চ দোষকালাদিবশাচ্চিকিত্সাপ্রকারান্তরোঽযমুপযুজ্যত ইতি| সন্নিপাতচিকিত্সাপ্রক্রমাদিদমপ্যাহ-

Adhikarana sannipAtAtopadravakarNamUlam (149) · Śloka 149

সন্নিপাতজ্বরস্যান্তে কর্ণমূলে সুদারুণঃ| শোফঃ সঞ্জাযতে যেন কশ্চিদেব বিমুচ্যতে||১৪৯||

সং-সন্নিপাতজ্বরস্যাবসানে কর্ণমূলপ্রদেশে সুষ্ঠ দারুণঃ শোফঃ সঞ্জাযতে| যেন-শোফেনোত্পন্নেন, কশ্চিদেব বিমুচ্যতে| কশ্চিদেবেত্যমেনাস্য রোগস্য নাবশ্যমসাধ্যতেতি ব্রূতে| অত এব চিকিত্সামত্রাহ-

Adhikarana karNamUlacikitsA (150) · Śloka 150

রক্তাবসেচনৈঃ শীঘ্রং সর্পিঃপানৈশ্চ তং জযেত্| প্রদেহৈঃ কফপিত্তঘ্নৈর্নাবনৈঃ কবলগ্রহৈঃ||১৫০||

স০-রক্তাবসেচনাদিভিঃ কবলগ্রহান্তৈরাশু তং জযেত্| প্রদেহঃ-প্রলেপঃ|

Adhikarana shAkhAnusArI jvaraH asya cikitsA bAhushirAmokShaH (151) · Śloka 151

শীতোষ্ণস্নিগ্ধরূক্ষাদ্যৈর্জ্বরো যস্য ন শাম্যতি| শাখানুসারী তস্যাশু মুঞ্চেদ্বাহ্বোঃ ক্রমাচ্ছিরাম্||১৫১||

স০-আদিশব্দেন স্তম্ভস্বেদনাদযো গৃহ্যন্তে| শীতোষ্ণাদিভিরুপক্রমৈর্যথাযথং পৃথগ্বাতপিত্তশ্লেষ্মসংসর্গসন্নিপাতজ্বরপ্রশমনৈঃ সম্যক্ প্রযোজিতৈর্জ্বরো যস্য নরস্য শমং ন গচ্ছতি, তস্য শাখানুসারিত্বাদ্ধেতোর্বাহ্বোঃ ক্রমাত্-একৈকস্মিন্ ন যুগপদ্ দ্বযোর্ভুজযোঃ, শিরাং মুঞ্চেত্| শাখাশব্দেনাত্র কেবলং রক্তং বিবক্ষিতম্, ন মাংসাদযঃ| অত এব রক্তস্যৈব চিকিত্সানুবাচ মুঞ্চেচ্ছিরামিতি| মাংসজানাং হি শস্ত্রক্ষারাগ্নিকর্মাদিচিকিত্সা| তস্মাচ্ছাখাশব্দেন রক্তস্যৈব গ্রহণং যুক্তম্|

Adhikarana viShamajvare~apyayameva vidhiH (152) · Śloka 152

অযমেব বিধিঃ কার্যো বিষমেঽপি যথাযথম্| জ্বরে বিভজ্য বাতাদীন্ যশ্চানন্তরমুচ্যতে||১৫২||

স০-অযমেব-পূর্বোক্তো, বিধির্বিষমেঽপি-বিষমজ্বরে সততকাদৌ, যথাস্বং বাতাদীন্ বিভজ্য কার্যঃ| অনন্তরমধুনৈব চ যো বিধিরুচ্যতে পটোলকটুকাদিভিঃ, সোঽপি বিষমজ্বরে কার্যঃ|

Adhikarana viShamajvare kvAthAH (153) · Śloka 153

পটোলকটুকামুস্তাপ্রাণদামধুকৈঃ কৃতাঃ| ত্রিচতুঃপঞ্চশঃ ক্বাথা বিষমজ্বরনাশনাঃ||১৫৩||

স০-পটোলাদিভিস্ত্রিভিশ্চতুর্ভিঃ পঞ্চভির্বা কৃতাঃ ক্বাথা বিষমজ্বরঘ্নাঃ|

Adhikarana viShamajvare triPalAdirasAyanAni (154) · Śloka 154

যোজযেত্রিফলাং পথ্যাং গুডূচীং পিপ্পলীং পৃথক্| তৈস্তৈর্বিধানৈঃ সগুডং ভল্লাতকমথাপি বা||১৫৪||

সং-ত্রিফলাং বা পথ্যাং বা গুডূচীং পিপ্পলীং বা পৃথক্ পৃথক্ যোজযেত্ সততকাদিকে বিষমজ্বরে| অথবা তৈস্তৈঃ-রসাযনাদ্যুক্তৈর্বিধিভিঃ, গুডসহিতং ভল্লাতকং বা যোজযেত্|

Adhikarana jvrarotpattidine la~gghanaM bRuMhaNaM vA (155) · Śloka 155

লঙ্ঘনং বৃংহণং বাঽঽদৌ জ্বরাগমনবাসরে| |১৫৫|

স০-যদি বা জ্বরাগমনদিবসে আদৌ-প্রথমং, লঙ্ঘনং বৃংহণং বা যোজযেত্|

Adhikarana jvarotpattidine prAtaH kAle ojanAdoy vAlashuna purAnadhRutadadhikShIratakraNiShaTrapalAdIni ghRutAni ca (155-156) · Śloka 156

প্রাতঃ সতৈলং লশুনং প্রাগ্ভক্রং বা তথা ঘৃতম্||১৫৫|| জীর্ণং তদ্বদ্দধি পযস্তক্রং সর্পিশ্চ ষট্পলম্| কল্যাণকং পঞ্চগব্যং তিক্তাখ্যং বৃষসাধিতম্||১৫৬||

স০-বিষমজ্বরে প্রগে সহতৈলেন লশুনং যোজযেত্| প্রাগ্ভক্তমিত্যাদি| ভক্তাত্প্রথমং প্রাতর্বাঘৃতং চ জীর্ণং-পুরাণং, যোজযেত্| তথৈব দধি, তথা পযঃ, তথা তক্রং, ষট্পলং চ সর্পিঃক্ষযচিকিত্সিতোক্তং (হৃ. চি. অ. ৫/২৮) , প্রাতঃ প্রাগ্ভক্তং বা যোজযেদিত্যর্থঃ| কল্যাণকং-উন্মাদপ্রতিষেধোক্তং (হৃ. উ. অ. ৬/২৬) , পঞ্চগব্যং-অপস্মারপ্রতিষেধোক্তং (হৃ. উ. অ. ৭/১৯), তিক্তাখ্যং-কুষ্টচিকিত্সিতোক্তং (হৃ. চি. অ. ১৯/২), তথা বৃষসাধিতং-রক্তপিত্তচিকিত্সিতোক্তং (হৃ. চি. অ. ২/৪০), প্রাতঃ প্রাগ্ভক্তং বা যোজযেত্| ষট্পলাদীন্যতিদিশতি-সর্পিশ্চেতি|

Adhikarana viShamajjarajit triPalAdi ghRutam (157) · Śloka 157

ত্রিফলাকোলতর্কারীক্বাথে দধ্না শৃতং ঘৃতম্| তিল্বকত্বক্কৃতাবাপ বিষমজ্বরজিত্পরম্||১৫৭||

স০-ত্রিফলাদিক্বাথে চতুর্গুণে সর্পির্দধিসমং শাবররোঘ্নত্বক্কৃতাবাপমতিশযেন বিষমজ্বরজিত্|

Adhikarana viShamajvare prayogAntaram (158-159) · Śloka 159

সুরাং তীক্ষ্ণং চ যন্মদ্যং শিখিতিত্তিরিদক্ষজম্| মাংসং মেদ্যোষ্ণবীর্যং চ সহান্নেন প্রকামতঃ||১৫৮|| সেবিত্বা তদহঃ স্বপ্যাদথবা পুনরুল্লিখেত্| |১৫৯|

সং-সুরাং চ তীক্ষ্ণং চ যন্মদ্যং শিখিতিরিদক্ষজং চ মাংসং মেধ্যো(দ্যো)ষ্ণবীর্যমন্নেন সহ বহু সেবিত্বা তদহঃ স্বপ্যাত্| যস্মিন্ দিনে তদ্ভুক্তং তং দিবসং শযীত| তদহঃ স্বপ্যাদিতি "কালাধ্বনোরত্যন্তসংযোগে" ইতি দ্বিতীযা| অথবা পূর্বোক্তপীতভুক্তভক্তো নরঃ পুনরুল্লিখেত্-উদ্বমেত্|

Adhikarana viShamajvare sarpirvamantaram (159) · Śloka 159

| সর্পিষো মহতীম্ মাত্রাং পীত্বা বা ছ্হর্দযেত্পুনঃ||১৫৯||

সং-সর্পিষো বা মহতীম্-উত্তমাং, মাত্রাং পীত্বা পুনশ্ছ্হর্দযেত্ উদ্বমেত্|

Adhikarana viShamajvare virecanam (160) · Śloka 160

নীলিনীভজগন্ধাং চ ত্রিবৃতাং কটুরোহিণীম্| পিবেজ্জ্বরস্যাগমনে স্নেহস্বেদোপপাদিতঃ||১৬০||

সং-নীলিন্যাদীন্ পৃথগ্জ্বরাগমনবাসরে কৃতস্নেহস্বেদঃ পিবেত্|

Adhikarana viShamajvare a~jjanam (162) · Śloka 162

মনোহ্বা সৈন্ধবং কৃষ্ণা তৈলেন নযনাঞ্জনম্| যোজ্যং|১৬২|

সং-মনোহ্বাদিকং তৈলেন নযনাঞ্জনং যোজ্যম্| অঞ্জনশব্দো ম্রক্ষণেঽপি দৃশ্যত ইতিনযনশব্দেঽত্র প্রযুক্তঃ|

Adhikarana viShamajvare nasyatrayam (161-162) · Śloka 162

| হিঙ্গুসমা ব্যাঘ্রীবসা নস্যং সসৈন্ধবম্||১৬১|| পুরাণসর্পিঃ সিংহস্য বসা তদ্বত্সসৈন্ধবা| |১৬২|

স০-হিঙ্গুতুল্যা ব্যাঘ্রীবসা নস্যং সসৈন্ধবং যোজ্যম্| ব্যাঘ্রীতি স্ত্রীলিঙ্গনির্দেশঃ স্ত্রিযা গ্রহণার্থোঽচিন্ত্যত্বাত্প্রভাবস্য, অন্যথা পুংলিঙ্গেনৈব নির্দেশং কুর্যাত্| যথা বক্তি-"পুরাণসর্পিঃ সিংহস্য বসা তদ্বত্সসৈন্ধবা|" ইতি|

Adhikarana viShamajvare dhUpadvayam (162-163) · Śloka 163

| পলঙ্কষা নিম্বপত্রং বচা কুষ্ঠং হরীতকী||১৬২|| সর্ষপাঃ সযবাঃ সর্পির্ধূপো বিড্বা বিডালজা| |১৬৩|

সং-পলঙ্কষাদিধূমঃ সর্বেষু জ্বরেষু কার্যঃ| অথবা বিডালাজ্জাতা বিডালজা বিট্|

Adhikarana sarvajvare~aparAjito dhUpaH (163-164) · Śloka 164

| পুরধ্যামবচাসর্জনিম্বার্কাগরুদারুভিঃ||১৬৩|| ধূপো জ্বরেষু সর্বেষু কার্যোঽযমপরাজিতঃ| |১৬৪|

সং-পুরাদিভিঃ সহাপরাজিতাখ্যোঽযং ধূপো জ্বরেষু কার্যঃ|

Adhikarana unmAdAdiShUkto dhUpAdiH (164) · Śloka 164

| ধূপনস্যাঞ্জনোস্ত্রাসা যে চোক্তাশ্চিত্তবৈকৃতে||১৬৪||

সং-যে চ চিত্তবৈকৃতে-উন্মাদাপস্মারে, ধূমাদয উক্তাস্তে চ বিষমজ্বরে যোজ্যাঃ| বিকৃতমেব বৈকৃতম্| প্রজ্ঞাদিত্বাত্স্বার্থেঽণ্|

Adhikarana daivavyapAshryayamauShadham (165) · Śloka 165

দৈবাশ্রযং চ ভৈষজ্যং জ্বরান্ সর্বান্ ব্যপোহতি| বিষেষাদ্বিষমান্ প্রাযস্তে হ্যাগন্ত্বনুবন্ধজাঃ||১৬৫||

সং-ন কেবলং ধূপাদযো জ্বরং নাশ্যন্তি| দৈবাশ্রযং চৌষধং মণিমঙ্গলবল্যুপহারপ্রাযশ্চিত্তজপদানস্বস্ত্যযনহোমাদিকং সর্বান্ জ্বরান্-আগন্তূন্নিজাংশ্চ, ব্যপোহতি| "উপসর্গাদস্যত্যূহ্যোর্বা বচনম্ (র্বেতি বাচ্যম্)" ইতি তঙভাবঃ| বিশেষেণ বিষমান্ ব্যপোহতি| যস্মাত্তে-বিষমজ্বরাঃ, আগন্তুনাং-ভূতাদীনাং, অনুবন্ধজ্জাতাঃ|

Adhikarana viShamajvare shirAvyadhaH (166) · Śloka 166

যথাস্বং চ সিরাং বিধ্যেদশান্তৌ বিষমজ্বরে| |১৬৬|

স০-বিষমজ্বরাশান্তৌ সত্যাং যথাস্বং-দোষাদ্যপেক্ষযা, সিরাং বিধ্যেত্| সঙ্গ্রহে চ রসাদিধাতুস্থে জ্বরে চিকিত্সোক্তা| যথা (চি.অ.২)-"রসসংস্থে তু সর্বস্মিন্ কুর্যাদ্বমনলঙ্ঘনে| সেকসংশমনালেপরক্তমোক্ষমসৃকূস্থিতে|| তীক্ষ্ণং বিরেকং মাংসাস্থে, মেদোঘ্নং মেদসি স্থিতে| অস্থিস্থে বাতশমনমভ্যঙ্গস্বেদমর্দনম্|| জ্বরে বাতার্তিশমনং বিশেষাদ্বূস্তিকর্ম চ|" ইতি| মজ্জস্থশুক্রস্থযোর্জ্বরযোরসাধ্যত্বাত্তত্র চিকিত্সা নোক্তা|

Adhikarana aBighAtaje Agantujvare auShadham (166-167) · Śloka 167

| কেবলানিলবীসর্পবিস্ফোটাভিহতজ্বরে||১৬৬|| সর্পিঃপানহিমালেপসেকমাংসরসাশনম্| কুর্যাদ্যথাস্বমুক্তং চ রক্তমোক্ষাদি সাধনম্||১৬৭||

সং-কেবলানিলাদিভির্জ্বরে সর্পিঃপানাদিকং কুর্যাত্| যচ্চ রক্তমোক্ষাদি সাধনং যথাস্বমুক্তং তচ্চ কুর্যাত্|

Adhikarana grahAveshaje Agantujvare auShadham (168) · Śloka 168

গ্রহোত্থেভূতবিদ্যোক্তং বলিমন্ত্রাদি সাধনম্| |১৬৮|

সং-গ্রহোত্থে জ্বরে ভূতবিদ্যোক্তং বলিমন্ত্রাদি সাধনং চিকিত্সিতম্|

Adhikarana auShadhigandhaje Agantujvare auShadham (168) · Śloka 168

| ওষধীগন্ধজে পিত্তশমনং|১৬৮|

সং-ওষধীগন্ধজে পিত্তশমনং চিকিত্সিতম্|

Adhikarana viShaje Agantujvare auShadham (168) · Śloka 168

| বিষজিদ্বিষে||১৬৮||

সং-বিষে-বিষজে জ্বরে, বিষজিচ্চিকিত্সিতম্|

Adhikarana krodhAdije Agantujvare auShadham (169-170) · Śloka 170

ইষ্টৈরর্থৈর্মনোজ্ঞৈশ্চ যথাদোষশমেন চ| হিতাহিতবিবেকৈশ্চ জ্বরং ক্রোধাদিজং জযেত্||১৬৯|| ক্রোধজো যাতি কামেন শান্তিং ক্রোধেন কামজঃ| ভযোশোকোদ্ভবৌ তাভ্যাং ভীশোকাভ্যং তথেতরৌ||১৭০||

সং-ক্রোধাদিজং জ্বরমিষ্টৈঃ-অভিমতৈঃ, অর্থৈঃ-বিষযৈঃ, তথা মনোজ্ঞৈঃ-রম্যৈঃ, তথা যথাদোষং যঃ শমঃ-শমনং তেন, তথা হিতাহিতবিবেকৈশ্চ জযেত্| আদিশব্দোঽত্র ভীশোকাদি পরিগ্রহার্থঃ|

Adhikarana shApaje~aBicAraje ca Agantujvare auShadham (171-172) · Śloka 172

শাপাথর্বণমন্ত্রোত্থে বিধির্দৈবব্যপাশ্রযঃ| তে জ্বরাঃ কেবলাঃ পূর্বং ব্যাপ্যন্তেঽনন্তরং মলৈঃ||১৭১|| তস্মাদ্দোষানুসারেণ তেষ্বাহারাদি কল্পযেত্| ন হি জ্বরোঽনুবধ্নাতি মারুতাদ্যৈর্বিনা কৃতঃ||১৭২||

স০-শাপাদ্যুত্থে জ্বরে দৈবব্যপাশ্রযো বিধিঃ কার্যঃ| শাপোমুনিপিত্রাদিভিঃ সক্রোর্ধৈর্দত্তঃ| [তে-] ওষধ্যাদ্যুত্থা জ্বরাঃ পূর্বং কেবলা ভবন্তি| অনন্তরং মলৈঃ-বাতাদিভিঃ, ব্যাপ্যন্তে| তস্মাদ্ধেতোস্তেষু-জ্বরেষু, দোষানুসারেণাহারাদি কল্পযেত্| ননু, শাপাদ্যুত্থেষু বাতাদিকোপো নাশঙ্ক্যত এব| তত্কিমিতি তেষ্বাহারাদিকং দোষানুসারেণ কল্প্যতে ? ইত্যাহ-ন হীত্যাদি| যস্মাদ্বাতাদীনন্তরেণ বিনা কৃতো জ্বরো নানুবধ্নাতি, তস্মাদবশ্যং তেষ্বপি বাতাদিকোপঃ সম্ভাব্যতে| অত এব চ তদনুসারেণাহারদিকল্পনম্|

Adhikarana sarvajvare manoharaviShayasevanam (173) · Śloka 173

জ্বরকালস্মৃতিং চাস্য হারিভির্বিষযৈর্হরেত্| |১৭৩|

সং-জ্বরকালং চ বেগং চ যশ্চিন্তযন্ জ্বর্যতে, অস্য চজ্বরিণো, জ্বরকালস্মরণং হারিভিঃ-মনোহরৈঃ, বিষযৈঃ-শব্দাদিভিঃ, হরেত্-বিস্মারযেত্|

Adhikarana sarvajvare manasaH shuddhatvaM karUNAdratvaM ca (173) · Śloka 173

| করুণার্দ্রং মনঃ শুদ্ধং সর্বজ্বরবিনাশনম্||১৭৩||

সং-শুদ্ধং-রাগদ্বেষাদ্যনুপহতং, তথা করুণযাঽঽদ্রং-কৃপাপরং, চেতঃ সর্বজ্বরবিনাশনং স্যাত্|

Adhikarana sarvajvare vyAyAmAdivarjanam (174) · Śloka 174

ত্যজেদাবললাভাচ্চ ব্যাযামস্নানমৈথুনম্| গুর্বসাত্ম্যবিদাহ্যন্নং যচ্চান্যজ্জবরকারণম্||১৭৪||

সং-বললাভাদা-বললাভমবধীকৃত্য, ব্যাযামাদি ত্যজেত্-নাচরেত্| স্নানং চ যদ্যপি দীপনাদিগুণযুক্তং প্রাগধীতং, তথাঽপি প্রভাবজ্জবরং করোতীতি তদ্বর্জনম্| এবং ব্যাযামাদিষ্বপিচিন্ত্যম্| [অন্যত্]-অপরমনুক্তমপীহ যজ্জ্বরকারণং, তদপি ত্যজেত্| খারণাদেঽপ্য্ক্তম্-"পিষ্টান্নং হরিতং শাকং মাংসং শুষ্কং তিলান্ দধি| গ্রাম্যানূপৌদকাজাবিগব্যসূকরভাহিষম্|| মাংসং শুষ্কাণি শাকানি সর্বমেব ত্যজেজ্জবরী|" তথোক্তম্-"জ্বরিতৈ স্থিত্তিরিক্রৌঞ্চশিখিবর্তককুক্কুটাঃ| গুরুষ্ণত্বাদ্বিবর্জ্যাঃ স্যুরত্র সোপদ্রবে জ্বরে||" ইতি|

Adhikarana sarvajvare sahasA~a~ahAravRuddiniShedhaHniShedhAtikrame doShaH (175) · Śloka 175

ন বিজ্বরোঽপি সহসা সর্বান্নীনো ভবেত্তথা| নিবৃত্তোঽপি জ্বরঃ শীঘ্রং ব্যাপাদযতি দুর্বলম্||১৭৫||

সং-তথা বিজ্জ্বরোঽপি-পূর্বানুভূতজ্বরঃ, সহসা-অক্রমেণৈব, সর্বান্নভক্ষো ন স্যাত্| সর্বান্নীন ইত্যুপপদসর্বান্নেত্যাদিনা খঃ| যতো নিবৃত্তোঽপি-অপগতোঽপি, জ্বরঃ শীঘ্রমেব দুর্বলং ব্যাপাদযতি|

Adhikarana jvarAvasthAyAM sAvadhAnatA (176) · Śloka 176

সদ্যঃ প্রাণহরো যস্মাত্তস্মাত্তস্য বিশেষতঃ| তস্যাং তস্যামবস্থাযাং তত্তত্কুর্যাদ্ভীষগ্জিতম্||১৭৬||

সং-যস্মাচ্চ জ্বরঃ সদ্য এব প্রাণহৃদ্ভবতি, তস্মাত্কারণাত্তস্য-জ্বরিণো, বিশেষেণান্যরোগেভ্যঃ সকাশাত্তস্যাং তস্যাংসামপচ্যমানপক্বাজীর্ণবিষমচিরনিবৃত্তজ্বরাদ্যবস্থাযাং চ, তত্তত্-লঙ্ঘনস্বেদনযবাগূপাচনক্ষীরসর্পিঃপানাদিকং, ভিষগ্জিতং-ঔষধং, কুর্যাত্|

Adhikarana jvare siddhauShadhAdidhAraNam (1) · Śloka 2

ঔষধযো মণযশ্চ সুমন্ত্রাঃ সাধুগুরুদ্বিজদৈবতপূজাঃ| প্রীতিকরা মনসো বিষযাশ্চ ঘ্নন্ত্যপি বিষ্ণুকৃতং জ্বরমুগ্রম্||১৭৭|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা যামষ্টাঙ্গহৃদযসংহিতাযাং চতুর্থে চিতিত্সিতস্থানে জ্বরচিকিত্সিতং নাম প্রথমোঽধ্যাযঃ||১|| গ্||২||

সং-ওষধ্যাদযো বিষ্ণুকৃতমপ্যুগ্রং জ্বরং ঘ্নান্তি| কিং পুনরপচারাদিকৃতং জ্বরং ন ঘ্নান্তি ? ইত্যপিশব্দার্থঃ| ভৌ তু ভাগাবিতি দোধকমেতত্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে জ্বরচিকিত্সিতং নাম প্রথমোঽধ্যাযঃ সমাপ্তঃ|| ১||