19. kuṣṭhacikitsitādhyāyaḥ

Adhikarana adhyAyopakramaH · Śloka

ಅಸ್ಮಾದನನ್ತರಂ ಕುಷ್ಠಚಿಕಿತ್ಸಿತಮಾರಭ್ಯತೇ| ಸಮ್ಬನ್ಧಶ್ಚಾಸ್ಯ ನಿದಾನ ಏವೋಕ್ತ ಇತ್ಯಾಹ-

Adhikarana kuShThacikitsitAdhyAyaH (2-3) · Śloka 3

ಅಥಾತಃ ಕುಷ್ಠಚಿಕಿತ್ಸಿತಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ| (ಗದ್ಯಸೂತ್ರೇ||೨|| )||೩||

ತ್ವಗ್ರಕ್ತಮಾಂಸಾದಿದೂಷಣಾತ್ತತ್ಸ್ರವಣಾದಾಮಯಸ್ವಭಾವಾಚ್ಚ ಕಾಯಕಾರ್ಶ್ಯಂ ಕುಷ್ಠಿನಃ ಪ್ರಾಯೇಣಾವಶ್ಯಂ ಭಾವಿ| ಅನೇನೈವಾನುಸಾರೇಣ ವಕ್ಷ್ಯತಿ (ಶ್ಲೋ. ೧೬)- "ಸ್ನೇಹೈರಾಪ್ಯಾಯಯೇಚ್ಚೈನಂ ಕುಷ್ಠಘ್ನೈರನ್ತರಾಽನ್ತರಾ|" ಇತ್ಯಾಹ-

Adhikarana sarvakuShThe pUrvaM snehapAnam (1) · Śloka 1

ಕುಷ್ಠಿನಂ ಸ್ನೇಹಪಾನೇನ ಪೂರ್ವಂ ಸರ್ವಮುಪಾಚರೇತ್| |೧|

ಸ೦-ಕುಷ್ಠವನ್ತಂ ನರಂ ಸರ್ವಮೇವ ಸ್ನೇಹಪಾನೈರುಪಕ್ರಮೇತ್-ಶರೀರಾಪ್ಯಾಯನಾರ್ಥಂ ಪೂರ್ವಮಸ್ಯ ಸ್ನೇಹೋಪಯೋಗೋ ಯುಕ್ತ ಇತ್ಯರ್ಥಃ|

Adhikarana vAtottare kuShThe dashamUlAdisiddhaM tailaM ghRutaM vA (1-2) · Śloka 2

| ತತ್ರ ವಾತೋತ್ತರೇ ತೈಲಂ ಘೃತಂ ವಾ ಸಾಧಿತಂ ಹಿತಮ್||೧|| ದಶಮೂಲಾಮೃತೈರಣ್ಡಶಾರ್ಙ್ಗೇಷ್ಟಾಮೇಷಶೃಙ್ಗಿಭಿಃ| |೨|

ಸ೦-ತಸ್ಮಿನ್ ವಾತೋತ್ತರೇ ಕುಷ್ಠೇ ದಶಮೂಲಾದಿಭಿಃ ಪಕ್ವಂ ತೈಲಂ ಘೃತಂ ವಾ ಹಿತಮ್|

Adhikarana pittottare kuShThe tiktakaM ghRutam (2-7) · Śloka 7

| ಪಟೋಲನಿಮ್ಬಕಟುಕಾದಾರ್ವೀಪಾಠಾದುರಾಲಭಾಃ||೨|| ಪರ್ಪಟಂ ತ್ರಾಯಮಾಣಾಂ ಚ ಪಲಾಂಶಂ ಪಾಚಯೇದಪಾಮ್| ದ್ವ್ಯಾಢಕೇಽಷ್ಟಾಂಶಶೇಷೇಣ ತೇನ ಕರ್ಷೋನ್ಮಿತೈಸ್ತಥಾ||೩|| ತ್ರಾಯನ್ತೀಮುಸ್ತಭೂನಿಮ್ಬಕಲಿಙ್ಗಕಣಚನ್ದನೈಃ| ಸರ್ಪಿಷೋ ದ್ವಾದಶಪಲಂ ಪಚೇತ್ತತ್ತಿಕ್ತಕಂ ಜಯೇತ್||೪|| ಪಿತ್ತಕುಷ್ಠಪರೀಸರ್ಪಪಿಟಿಕಾದಾಹತೃಡ್ಭ್ರಮಾನ್| ಕಣ್ಡುಪಾಣ್ಡ್ವಾಮಯಾನ್ ಗಣ್ಡಾನ್ ದುಷ್ಟನಾಡೀವ್ರಣಾಪಚೀಃ||೫|| ವಿಸ್ಫೋಟವಿದ್ರಧೀಗುಲ್ಮಶೋಫೋನ್ಮಾದಮದಾನಪಿ| ಹೃದ್ರೋಗತಿಮಿರವ್ಯಙ್ಗಗ್ರಹಣೀಶ್ವಿತ್ರಕಾಮಲಾಃ||೬|| ಭಗನ್ದರಮಪಸ್ಮಾರಮುದರಂ ಪ್ರದರಂ ಗರಮ್| ಅರ್ಶೋಽಸ್ರಪಿತ್ತಮನ್ಯಾಂಶ್ಚ ಸುಕೃಚ್ಛ್ರಾನ್ ಪಿತ್ತಜಾನ್ ಗದಾನ್||೭||

ಸ೦-ಪಟೋಲಾದಿ ಪಲಾಂಶಂ ದ್ವ್ಯಾಢಕೇ ಪಾಚಯೇತ್| ತೇನಾಷ್ಟಭಾಗಶೇಷೇಣ ಕ್ವಾಥೇನ ತಥಾ ಕರ್ಷಮಾತ್ರೈಸ್ತ್ರಾಯನ್ತ್ಯಾದಿಭಿರ್ಘೃತಸ್ಯ ಪಲಾನಿ ದ್ವಾದಶ ಪಚೇತ್| ತದೇವಂ ತಿಕ್ತಕಾಖ್ಯಂ ಸರ್ಪಿಃ ಪಿತ್ತಕುಷ್ಠಾದೀನ್ ಜಯೇತ್| ಅಪರಾನಪಿ ಪಿತ್ತಜಾನಾಮಯಾನ್ ಹನ್ತಿ| ಏತೈಶ್ಚ ದ್ವಾದಶಪಲಮಾತ್ರಂ ಪಕ್ವಂ ಪ್ರಕೃಷ್ಟಗುಣಂ ಸ್ಯಾದಿತಿ ದೃಷ್ಟಂ ತತ್ತ್ವದರ್ಶಿಭಿರ್ಮಹರ್ಷಿಭಿಃ|

Adhikarana pittottare kuShThe mahAtiktaM ghRutam (8-11) · Śloka 11

ಸಪ್ತಚ್ಛದಃ ಪರ್ಪಟಕಃ ಶಮ್ಯಾಕಃ ಕಟುಕಾ ವಚಾ| ತ್ರಿಫಲಾ ಪದ್ಮಕಂ ಪಾಠಾ ರಜನ್ಯೌ ಸಾರಿವೇ ಕಣೇ||೮|| ನಿಮ್ಬಚನ್ದನಯಷ್ಟ್ಯಾಹ್ವವಿಶಾಲೇನ್ದ್ರಯವಾಮೃತಾಃ| ಕಿರಾತತಿಕ್ತಕಂ ಸೇವ್ಯಂ ವೃಷೋ ಮೂರ್ವಾ ಶತಾವರೀ||೯|| ಪಟೋಲಾತಿವಿಷಾಮುಸ್ತಾತ್ರಾಯನ್ತೀಧನ್ವಯಾಸಕಮ್| ತೈರ್ಜಲೇಽಷ್ಟಗುಣೇ ಸರ್ಪಿರ್ದ್ವಿಗುಣಾಮಲಕೀರಸೇ||೧೦|| ಸಿದ್ಧಂ ತಿಕ್ತಾನ್ಮಹಾತಿಕ್ತಂ ಗುಣೈರಭ್ಯಧಿಕಂ ಮತಮ್| |೧೧|

ಸ೦-ಸಪ್ತಚ್ಛದಾದಿಭಿಃ ಕಲ್ಕೈರ್ಘೃತಾದಷ್ಟಗುಣೇ ಜಲೇ ದ್ವಿಗುಣಾಮಲಕರಸೇ ಸರ್ಪಿಃ ಪಕ್ವಂ ಮಹಾತಿಕ್ತಸಂಜ್ಞಂ ಗುಣೈಶ್ಚಾಭ್ಯಧಿಕಂ ತಿಕ್ತಾನ್ಮತಮ್, ಮುನೀನಾಮಿತಿ ಶೇಷಃ|

Adhikarana kaPottare kuShTheShu nimbAdisiddhaM ghRutam (11-12) · Śloka 12

| ಕಫೋತ್ತರೇ ಘೃತಂ ಸಿದ್ಧಂ ನಿಮ್ಬಸಪ್ತಾಹ್ರಚಿತ್ರಕೈಃ||೧೧|| ಕುಷ್ಠೋಷಣವಚಾಶಾಲಪ್ರಿಯಾಲಚತುರಙ್ಗುಲೈಃ| |೧೨|

ಸ೦-ಕಫೋತ್ತರೇ ನಿಮ್ಬಾದಿಭಿಃ ಕಲ್ಕೀಕೃತೈಃ ಪಕ್ವಂಘೃತಂ ಪಿಬೇತ್|

Adhikarana sarvakuShTheShu BallAtakAdisnehaH ghRutaM sarvakRumijidAdighRutam (12-13) · Śloka 13

| ಸರ್ವೇಷು ಚಾರುಷ್ಕರಜಂ ತೌವರಂ ಸಾರ್ಷಪಂ ಪಿಬೇತ್||೧೨|| ಸ್ನೇಹಂ ಘೃತಂ ವಾ ಕೃಮಿಜಿತ್ಪಥ್ಯಾಭಲ್ಲಾತಕೈಃ ಶೃತಮ್| |೧೩|

ಸ೦-ಸರ್ವೇಷು ಚ ಕುಷ್ಠೇಷು ಭಲ್ಲಾತಕೋತ್ಥಂ ತುವರಜಂ ಸರ್ಷಪಜಂ ವಾ ಸ್ನೇಹಮಥವಾ ಘೃತಂ ಕೃಮಿಜಿದಾದಿಭಿಃ ಸಾಧಿತಂ ಪಿಬೇತ್|

Adhikarana sarvakuShTheShu AragvadhamUlaghRutam (13-14) · Śloka 14

| ಆರಗ್ವಧಸ್ಯ ಮೂಲೇನ ಶತಕೃತ್ವಃ ಶೃತಂ ಘೃತಮ್||೧೩|| ಪಿಬೇನ್ ಕುಷ್ಠಂ ಜಯತ್ಯಾಶು ಭಜನ್ ಸಖದಿರಂ ಜಲಮ್| |೧೪|

ಸ೦-ಕರ್ಣಿಕಾರಸ್ಯ ಮೂಲೇನ ಶತವಾರಾನ್ ಘೃತಂ ಪಕ್ವಂ ಪಿಬನ್ ಕುಷ್ಠಂ ಜಯತಿ ಖದಿರಯುತಂ ಪಾನೀಯಂ ಸೇವಮಾನಃ|

Adhikarana sarveBireva snehairaBya~jjanam (14) · Śloka 14

| ಏಭಿರೇವ ಯಥಾಸ್ವಂ ಚ ಸ್ನೇಹೈರಭ್ಯಞ್ಜನಂ ಹಿತಮ್||೧೪||

ಸ೦-ಏಭಿರೇವ ಪೂರ್ವೋಕ್ತೈಃ ಸ್ನೇಹೈರ್ಯಥಾಯೋಗಮಭ್ಯಞ್ಜನಂ ಹಿತಮ್|

Adhikarana sarvakuShTheShu snigdhasya visarpoktaM shodhanam (15) · Śloka 15

ಸ್ನಿಗ್ಧಸ್ಯ ಶೋಧನಂ ಯೋಜ್ಯಂ ವಿಸರ್ಪೇ ಯದುದಾಹೃತಮ್| |೧೫|

ಸ೦-ಸ್ನಿಗ್ಧಸ್ಯ ಕುಷ್ಠಿನಃ ಶೋಧನಂ ಯೋಜ್ಯಂ ಯದ್ವಿಸರ್ಪೇ ಕಥಿತಮ್| ತತ್ರ ಚೋಕ್ತಮ್ (ಹೃ. ಚಿ. ಅ. ೧೮|೩)- "ರಸೇನ ಯುಕ್ತಂ ತ್ರಾಯನ್ತ್ಯಾ ದ್ರಾಕ್ಷಾಯಾಃ" ಇತ್ಯಾದಿ|

Adhikarana sarvakuShTheShu lalATahastapAdeShu shirAmokShAH (15-16) · Śloka 16

| ಲಲಾಟಹಸ್ತಪಾದೇಷು ಶಿರಾಶ್ಚಾಸ್ಯ ವಿಮೋಕ್ಷಯೇತ್||೧೫|| ಪ್ರಚ್ಛಾನಮಲ್ಪಕೇ ಕುಷ್ಠೇ ಶೃಙ್ಗಾದ್ಯಾಶ್ಚ ಯಥಾಯಥಮ್| |೧೬|

ಸ೦-ಲಲಾಟಾದಿಷು ಚಾಸ್ಯಾತುರಸ್ಯ ಬಲಾಪೇಕ್ಷೀ ವೈದ್ಯೋ ಶಿರಾಂ ವಿಮೋಕ್ಷಯೇತ್| ಅತ್ಯಲ್ಪೇ ಕುಷ್ಠೇ ಪ್ರಚ್ಛಾನಂ ಸ್ಯಾತ್| ಯಥಾಯಥಂ-ಯಥಾಸ್ವಂ, ಶೃಙ್ಗಾದ್ಯಾಶ್ಚ ಸ್ಯುಃ|

Adhikarana sarvakuShTheShu antarA~antarA snehairApyAyanaM tatkAraNaM ca (16-17) · Śloka 17

| ಸ್ನೇಹೈರಾಪ್ಯಾಯಯೇಚ್ಚೈನಂ ಕುಷ್ಠಘ್ನೈರನ್ತರಾಽನ್ತರಾ||೧೬|| ಮುಕ್ತರಕ್ತವಿರಿಕ್ತಸ್ಯ ರಿಕ್ತಕೋಷ್ಠಸ್ಯ ಕುಷ್ಠಿನಃ| ಪ್ರಭಞ್ಜನಸ್ತಥಾ ಹ್ಯಸ್ಯ ನ ಸ್ಯಾದ್ದೇಹಪ್ರಭಞ್ಜನಃ||೧೭||

ಸ೦-ಅನ್ತರಾಽನ್ತರಾ ಸ್ರುತರಕ್ತಂ ಕೃತವಿರೇಕಂ ಚ ಕುಷ್ಠಘ್ನೈಃ ಸ್ನೇಹೈರೇನಂ-ಕುಷ್ಠಿನಂ, ಆಪ್ಯಾಯಯೇತ್| ಏವಂ ಕೃತೇ ಸತ್ಯಸ್ಯ-ಕುಷ್ಠಿನೋ, ಮುಕ್ತರಕ್ತಸ್ಯ ತಥಾ ವಿರಿಕ್ತಸ್ಯಾತ ಏವ ರಿಕ್ತಕೋಷ್ಠಸ್ಯ ಪ್ರಭಞ್ಜನೋ ದೇಹಸ್ಯ ಪ್ರಭಞ್ಜನೋ-ವಿಘಾತಕೋ, ನ ಸ್ಯಾತ್|

Adhikarana sarvakuShTheShu vajrakaghRutam (18) · Śloka 18

ವಾಸಾಮೃತಾನಿಮ್ಬವರಾಪಟೋಲ- ವ್ಯಾಘ್ರೀಕರಞ್ಜೋದಕಕಲ್ಕಪಕ್ವಮ್| ಸರ್ಪಿರ್ವಿಸರ್ಪಜ್ವರಕಾಮಲಾಸ್ರ- ಕುಷ್ಠಾಪಹಂ ವಜ್ರಕಮಾಮನನ್ತಿ||೧೮||

ಸ೦-ವಾಸಾದಿಭಿಃ ಸಿದ್ಧಂ ಸರ್ಪಿರ್ವಿಸರ್ಪಾದಿಘ್ನಮ್| ಏತಚ್ಚ ವಜ್ರಕಸಂಜ್ಞಂ ಘೃತಂ ವದನ್ತಿ| ಇನ್ದ್ರವಜ್ರಾವೃತ್ತಮ್|

Adhikarana sarvakuShTheShu mahAvajrakaghRutam (19-20) · Śloka 20

ತ್ರಿಫಲಾತ್ರಿಕಟುದ್ವಿಕಣ್ಟಕಾರೀ- ಕಟುಕಾಕುಮ್ಭನಿಕುಮ್ಭರಾಜವೃಕ್ಷೈಃ| ಸವಚಾತಿವಿಷಾಗ್ನಿಕೈಃ ಸಪಾಠೈಃ ಪಿಚುಭಾಗೈರ್ನವವಜ್ರದುಗ್ಧಮುಷ್ಟ್ಯಾ||೧೯|| ಪಿಷ್ಟೈಃ ಸಿದ್ಧಂ ಸರ್ಪಿಷಃ ಪ್ರಸ್ಥಮೇಭಿಃ ಕ್ರೂರೇ ಕೋಷ್ಠೇ ಸ್ನೇಹನಂ ರೇಚನಂ ಚ| ಕುಷ್ಠಶ್ವಿತ್ರಪ್ಲೀಹವರ್ಧ್ಮಾಶ್ಮಗುಲ್ಮಾನ್ ಹನ್ತ್ಯಾತ್ಕೃಚ್ಛ್ರಾಂಸ್ತನ್ಮಹಾವಜ್ರಕಾಖ್ಯಮ್||೨೦||

ಸ೦-ತ್ರಿಫಲಾದಿಭಿಃ ಕಾರ್ಷಿಕೈಃ ಪ್ರತ್ಯಗ್ರಸ್ರುಹೀಕ್ಷೀರಪಲೇನ ಸಹ ಪಿಷ್ಟೈರೇಭಿರೌಷಧೈರ್ಘೃತಪ್ರಸ್ಥಂ ಚತುರ್ಗುಣಜಲಸಿದ್ಧಂ ಕ್ರೂರಕೋಷ್ಠೇ ಸ್ನೇಹನಂ ಸ್ಯಾತ್ ರೇಚನಂ ಚ| ತಥಾ, ಕುಷ್ಠಾದೀನ್ ದಾರುಣಾನ್ ಹನ್ಯಾತ್| ತಚ್ಚ ಮಹಾವಜ್ರಕಂ ನಾಮ| ಔಪಚ್ಛನ್ದಸಿಕಶಾಲಿನ್ಯೌ ವೃತ್ತೇ|

Adhikarana sarvakuShTheShu UrdhvAMdhaH shodhanaM dantIghRutam (21) · Śloka 21

ದನ್ತ್ಯಾಢಕಮಪಾಂ ದ್ರೋಣೇ ಪಕ್ತ್ವಾ ತೇನ ಘೃತಂ ಪಚೇತ್| ಧಾಮಾರ್ಗವಪಲೇ ಪೀತಂ ತದೂರ್ಧ್ವಾಧೋ ವಿಶುದ್ಧಿಕೃತ್||೨೧||

ಸ೦-ದನ್ತ್ಯಾಶ್ಚತುಃಷಷ್ಟಿಪಲಾನಿ ಜಲದ್ರೋಣೇ ಪಚೇತ್| ತೇನ ಕ್ವಾಥೇನ ರಾಜಕೋಶಾತಕೀಪಲೇ ಘೃತಂ ಪಚೇತ್| ತತ್ಪೀತಮೂರ್ಧ್ವಾಧೋ ವಿಶುದ್ಧಿಕರಮ್|

Adhikarana sarvakuShTheShu AvartakIghRutam (22-23) · Śloka 23

ಆವರ್ತಕೀತುಲಾಂ ದ್ರೋಣೇ ಪಚೇದಷ್ಟಾಂಶಶೇಷಿತಮ್| ತನ್ಮೂಲೈಸ್ತತ್ರ ನಿರ್ಯೂಹೇ ಘೃತಪ್ರಸ್ಥಂ ವಿಪಾಚಯೇತ್||೨೨|| ಪೀತ್ವಾ ತದೇಕದಿವಸಾನ್ತರಿತಂ ಸುಜೀರ್ಣೇ ಭುಞ್ಜೀತ ಕೋದ್ರವಮಸಂಸ್ಕೃತಕಾಞ್ಜಿಕೇನ| ಕುಷ್ಠಂ ಕಿಲಾಸಮಪಚೀಂ ಚ ವಿಜೇತುಮಿಚ್ಛನ್ ಇಚ್ಛನ್ ಪ್ರಜಾಂ ಚ ವಿಪುಲಾಂ ಗ್ರಹಣಂ ಸ್ಮೃತಿಂ ಚ||೨೩||

ಸ೦-ಆವರ್ತಕ್ಯಾಃ ಶತಂ ದ್ರೋಣೇಽಪಾಮಷ್ಟಾಂಶಶೇಷಿತಂ ಪಚೇತ್| ತ್ತ್ರಕ್ವಾಥೇ, ತಸ್ಯಾ ಮೂಲೈಃ ಕಲ್ಕೀಕೃತೈರ್ಘೃತಪ್ರಸ್ಥಂ ವಿಪಾಚಯೇತ್| ತದ್ಧೃತಮೇಕದಿವಸಾನ್ತರಿತಂ ಪೀತ್ವಾ ಸುಷ್ಠು ಜೀರ್ಣೇ ಚ ಘೃತೇ ಕೋದ್ರವಮಸಂಸ್ಕೃತೇನ ಕಾಞ್ಜಿಕೇನ ಸಹ ಭುಞ್ಜೀತ| ಕುಷ್ಠಾದೀನ್ ವಿಜಿಗೀಷುಃ, ಪ್ರಜಾಂ ಚ ವಿಸ್ತೀರ್ಣಾಮಿಚ್ಛನ್, ಗ್ರಹಣಂ ಸ್ಮೃತಿಂ ಚಾಭಿಲಷನ್| ವಸನ್ತತಿಲಕಾವೃತ್ತಮ್|

Adhikarana sarvakuShTheShu lelItakavasA (24) · Śloka 24

ಯತೇರ್ಲೇಲೀತಕವಸಾ ಕ್ಷೌದ್ರಜಾತೀರಸಾನ್ವಿತಾ| ಕುಷ್ಠಘ್ನೀ ಸಮಸರ್ಪಿರ್ವಾ ಸಗಾಯರ್ತ್ರ್ಯಸನೋದಕಾ||೨೪||

ಸ೦-ಯತೇಃ-ಬ್ರಹ್ಮಚರ್ಯಾಸ್ಥಿತಸ್ಯ, ಲೇಲೀತಕವಸಾ ಮಾಕ್ಷಿಕಜಾತೀರಸಯುತಾ ಕುಷ್ಠಘ್ನೀ ಸ್ಯಾತ್| ಲೇಲೀತಕವಸಾ-ಸೌವರ್ಚಲಲವಣತೈಲಮ್, ಗನ್ಧಕಮೇಕೇ| ಜಾತೀರಸೋ-ಬೋಲಃ| ಅಥವಾ, ಸಮಘೃತಾ ಖದಿರಾಸನೋದಕಸಹಿತಾ ಕುಷ್ಠಘ್ನೀ ಸ್ಯಾತ್|

Adhikarana sarvakuShTheShu hitamannapAnaM sarva tyAjyaM amlalavaNAdi (25-27) · Śloka 27

ಶಾಲಯೋ ಯವಗೋಧೂಮಾಃ ಕೋರದೂಷಾಃ ಪ್ರಿಯಙ್ಗವಃ| ಮುದ್ಗಾ ಮಸೂರಾಸ್ತುವರೀ ತಿಕ್ತಶಾಕಾನಿ ಜಾಙ್ಗಲಮ್||೨೫|| ವರಾಪಟೋಲಖದಿರನಿಮ್ಬಾರುಷ್ಕರಯೋಜಿತಮ್| ಮದ್ಯಾನ್ಯೌಷಧಗರ್ಭಾಣಿ ಮಥಿತಂ ಚೇನ್ದುರಾಜಿಮತ್||೨೬|| ಅನ್ನಪಾನಂ ಹಿತಂ ಕುಷ್ಠೇ, ನ ತ್ವಮ್ಲಲವಣೋಷಣಮ್| ದಧಿದುಗ್ಧಗುಡಾನೂಪತಿಲಮಾಷಾಂಸ್ತ್ಯಜೇತ್ತರಾಮ್||೨೭||

ಸ೦-ಶಾಲ್ಯಾದಿಕಮನ್ನಪಾನಂ ಚ ವರಾದಿಭಿರ್ಯೋಜಿತಂ ಕುಷ್ಠೇ ಹಿತಮ್| ಇನ್ದುರಾಜಿಃ-ಬಾಕುಚೀ| ಅಮ್ಲಾದಿಕಮನ್ನಪಾನಂ ನ ಹಿತಂ ಕುಷ್ಠೇ ಸ್ಯಾತ್| ತಥಾ ದಧ್ಯಾದೀನತಿಶಯೇನ ವರ್ಜಯೇತ್| ಪ್ರತಿರೋಗಂ ಚ ಯನ್ನಿದಾನವರ್ಜನಂ ತಚ್ಚಿಕಿತ್ಸಿತಮೇವೇತ್ಯವಗನ್ತವ್ಯಮ್|

Adhikarana sarvakuShTheShu paTolamUlAdikvAthasya ShaDrAtraprayogaH (28-30) · Śloka 30

ಪಟೋಲಮೂಲತ್ರಿಫಲಾವಿಶಾಲಾಃ ಪೃಥಕ್ತ್ರಿಭಾಗಾಪಚಿತತ್ರಿಶಾಣಾಃ| ಸ್ಯುಸ್ತ್ರಾಯಮಾಣಾ ಕಟುರೋಹಿಣೀ ಚ| ಭಾಗಾರ್ಧಿಕೇ ನಾಗರಪಾದಯುಕ್ತೇ||೨೮|| ಏತತ್ಪಲಂ ಜರ್ಜರಿತಂ ವಿಪಕ್ವಂ ಜಲೇ ಪಿಬೇದ್ದೋಷವಿಶೋಧನಾಯ| ಜೀರ್ಣೇ ರಸೈರ್ಧನ್ವಮೃಗದ್ವಿಜಾನಾಂ ಪುರಾಣಶಾಲ್ಯೋದನಮಾದದೀತ||೨೯|| ಕುಷ್ಠಂ ಕಿಲಾಸಂ ಗ್ರಹಣೀಪ್ರದೋಷ- ಮರ್ಶಾಂಸಿ ಕೃಚ್ಛ್ರಾಣಿ ಹಲೀಮಕಂ ಚ| ಷಡ್ರಾತ್ರಯೋಗೇನ ನಿಹನ್ತಿ ಚೈತದ್ ಹೃದ್ವಸ್ತಿಶೂಲಂ ವಿಷಮಜ್ವರಂ ಚ||೩೦||

ಸ೦-ಪೃಥಕ್-ಪ್ರತ್ಯೇಕಂ, ತ್ರಿಭಾಗೇನಾಪಚಿತೋ-ನ್ಯೂನಃ, ತೃತೀಯಃ ಶಾಣೋ ಯೇಷಾಂ ತೇ ಪಟೋಲಾದಯಃ ಪಞ್ಚ ಪೃಥಕ್ತ್ರಿಭಾಗಾಪಚಿತತ್ರಿಶಾಣಾಃ| ಲೋಕೇಽಪಿ ಚೈವಂ ಪ್ರಯುಕ್ತಾ ಏವ| ಯಥಾ,-ತ್ರಿಭಾಗೋನಾಸ್ತ್ರಯೋ ದ್ರಮ್ಮಾ ದೇಯಾ ಇತಿ| ಅತ್ರ ಹಿ ದ್ವೌ ದ್ರಮ್ಮೌ ತೃತೀಯಶ್ಚ ದ್ರಮ್ಮಸ್ತ್ರಿಭಾಗೇನ ಹೀನ ಇತಿ ಗಮ್ಯತೇ| ತದೇವಂ ಪಟೋಲಸ್ಯ ಶಾಣೌ ದ್ವೌ ಧಾನಕಾಶ್ಚ ಚತಸ್ರೋ ಭವನ್ತಿ| ಷಡ್ಧಾನಕೋ ಹಿ ಶಾಣಃ| ಏವಂ ಪಟೋಲಮೂಲಾದಿದ್ರವ್ಯಾಣಾಂ ಪಞ್ಚಾನಾಂ ಪ್ರತ್ಯೇಕಂ ಷೋಡಶಧಾನಕಾಃ ಸ್ಯುಃ| ಸ್ಯಾತ್ತ್ರಾಯಮಾಣಾ ಕಟುರೋಹಿಣೀ ಚ ಭಾಗಾರ್ಧಿಕೇ| ಕಿಮ್ಭೂತೇ ? ನಾಗರಪಾದಯುಕ್ತೇ ಸತ್ಯೌ, ನ ತು ಕೇವಲೇ| ತದಯಮರ್ಥಃ,-ತ್ರಾಯನ್ತ್ಯಾ ಧಾನಕಾಃ ಷಟ್, ಕಟುಕಾಯಾ ಧಾನಕಾಃ ಷಟ್, ನಾಗರಸ್ಯ ಧಾನಕಾಶ್ಚತಸ್ರಃ| ಷೋಡಶಧಾನಕಾ ಹ್ಯತ್ರ ಮೂಲದ್ರವ್ಯಭಾಗಃ| ತದೇವಂ ಪಟೋಲಾದೀನಾಂ ಪಞ್ಚಾನಾಮಶೀತಿರ್ಧಾನಕಾಃ, ತ್ರಾಯನ್ತೀಕಟುಕಯೋಃ ಶುಣ್ಠೀಪಾದಯುತಯೋಃ ಷೋಡಶಧಾನಕಾಃ, ಇತಿ ಷಣ್ಣವತಿಧಾನಕಾಭಿಃ ಪಲಂ ಭವತಿ| ತದಿದಂ ಪಲಂ ಜರ್ಜರಿತಂ ಕಿಞ್ಚಿಚ್ಚೂರ್ಣಿತಂ ಜಲೇ ವಿಪಕ್ವಂ ದೋಷವಿಶುದ್ಧ್ಯರ್ಥಂ ಪಿಬೇತ್| ಜೀರ್ಣೇ ಸತ್ಯೌಷಧೇ ಜಾಙ್ಗಲಮೃಗಪಕ್ಷಿಣಾಂ ಮಾಂಸರಸೈಃ ಸಹ ಪುರಾಣಶಾಲ್ಯೋದನಮಶ್ರ್ನೀಯಾತ್| ಉಪಜಾತೀ ವೃತ್ತೇ| ಏತಚ್ಚ ಪೀತಂ ಷಡ್ರಾತ್ರಯೋಗೇನ-ಷಡ್ದಿನಾನ್ಯುಪಯುಕ್ತಂ, ಕುಷ್ಠಾದೀನ್ ಹನ್ತಿ| ಇನ್ದ್ರವಜ್ರಾವೃತ್ತಮ್|

Adhikarana sarvakuShTheShu mANiBadrasiddho yogaH (31-32) · Śloka 32

ವಿಡಙ್ಗಸಾರಾಮಲಕಾಭಯಾನಾಂ ಪಲತ್ರಯಂ, ತ್ರೀಣಿ ಪಲಾನಿ ಕುಮ್ಭಾತ್| ಗುಡಸ್ಯ ಚ ದ್ವಾದಶ, ಮಾಸಮೇಷ ಜಿತಾತ್ಮನಾಂ ಹನ್ತ್ಯುಪಯುಜ್ಯಮಾನಃ||೩೧|| ಕುಷ್ಠಶ್ವಿತ್ರಶ್ವಾಸಕಾಸೋದರಾರ್ಶೋ- ಮೇಹಪ್ಲೀಹಗ್ರನ್ಥಿರುಗ್ಜನ್ತುಗುಲ್ಮಾನ್| ಸಿದ್ಧಂ ಯೋಗಂ ಪ್ರಾಹ ಯಕ್ಷೋ ಮುಮುಕ್ಷೋ- ರ್ಭಿಕ್ಷೋಃ ಪ್ರಾಣಾನ್ ಮಾಣಿಭದ್ರಃ ಕಿಲೇಮಮ್||೩೨||

ಸ೦-ವಿಡಙ್ಗಸಾರಾದೀನಾಂ ಸಮುದಿತಾನಾಂ ಪಲತ್ರಯಮ್, ತ್ರೀಣಿ ಪಲಾನಿ ಕುಮ್ಭಾತ್-ತ್ರಿವೃತಾಯಾಸ್ತ್ರೀಣಿ ಪಲಾನಿ, ಗುಡಸ್ಯ ಚ ದ್ವಾದಶಪಲಾನಿ| ಏಷ ಪ್ರಯೋಗೋ ಜಿತೇನ್ದ್ರಿಯಾಣಾಂ ಮಾಸಮುಪಯುಜ್ಯಮಾನೋ ವಕ್ಷ್ಯಮಾಣಾನ್ ಗದಾನ್ ಹನ್ತಿ| "ಉಪೇನ್ದ್ರವಜ್ರಾ ತು ಜತೌ ಜಗೌ ಗಃ|" ಮಾಸಶಬ್ದೋಪಾದಾನಾಚ್ಚ ಪ್ರತ್ಯಹಮಸ್ಮಾದ್ಯೋಗಾದರ್ಧಪಲಂ ಧಾನಕಾನವರಕ್ತಿಕಾತ್ರಯಸಹಿತಮಭ್ಯವಹರಣೀಯತ್ವೇನಾತ್ರಾವತಿಷ್ಠತೇ| ಅನ್ಯತ್ರಾಪಿ ಪ್ರದೇಶೇ ಯ ಏವಂವಿಧೋ ನಿರ್ದೇಶಸ್ತತ್ರ ಪರಿಮಾಣಕಲ್ಪನಾಯಾಮಯಮೇವ ನ್ಯಾಯೋಽನುಮನ್ತವ್ಯಃ| ಮಣಿಭದ್ರಾಖ್ಯೋ ಯಕ್ಷೋ ಭಿಕ್ಷೋಃ ಪ್ರಾಣಾನ್ ಮುಮುಕ್ಷೋಃ-ಜೀವಿತಂ ಜಿಹಾಸೋಃ, ಇಮಂ ಸಿದ್ಧಂ ಯೋಗಂ ಪ್ರಾಣಕರಂ ಪ್ರಾಹ,-ಜಗಾದೇತ್ಯರ್ಥಃ| ಅತ್ರ ಭೂತೇ ಕಾಲೇ ಪ್ರಾಹೇತಿ, ತಥಾ ಸಾಧು ಕಿಲೇತ್ಯಾಗಮಿಕತ್ವಂ ಚ ಸೂಚಯತಿ| ಶಾಲಿನೀವೃತ್ತಮ್|

Adhikarana sarvakuShTheShu BUnimbAdi cUrNam (33-35) · Śloka 35

ಭೂನಿಮ್ಬನಿಮ್ಬತ್ರಿಫಲಾಪದ್ಮಕಾತಿವಿಷಾಕಣಾಃ| ಮೂರ್ವಾಪಟೋಲೀದ್ವಿನಿಶಾಪಾಠಾತಿಕ್ತೇನ್ದ್ರವಾರುಣೀಃ||೩೩|| ಸಕಲಿಙ್ಗವಚಾಸ್ತುಲ್ಯಾ ದ್ವಿಗುಣಾಶ್ಚ ಯಥೋತ್ತರಮ್| ಲಿಹ್ಯಾದ್ದನ್ತೀತ್ರಿವೃದ್ಬ್ರಾಹ್ಮೀಶ್ಚೂರ್ಣಿತಾ ಮಧುಸರ್ಪಿಷಾ||೩೪|| ಕುಷ್ಠಮೇಹಪ್ರಸುಪ್ತೀನಾಂ ಪರಮಂ ಸ್ಯಾತ್ತದೌಷಧಮ್|೩೫|

ಸ೦-ಭೂನಿಮ್ಬಾದಯಸ್ತುಲ್ಯಾ ದನ್ತ್ಯಾದಯಶ್ಚ ಯಥೋತ್ತರಂ ದ್ವಿಗುಣಾಶ್ಚೂರ್ಣಿತಾ ಮಧುಸರ್ಪಿಷಾ ಲಿಹ್ಯಾತ್| ಕುಷ್ಠಾದೀನಾಮೇತತ್ ಪರಮಂ ಭೇಷಜಮ್|

Adhikarana sarvakuShTheShu triphalAdicUrNam (35) · Śloka 35

| ವರಾವಿಡಙ್ಗಕೃಷ್ಣಾ ವಾ ಲಿಹ್ಯಾತ್ತೈಲಾಜ್ಯಮಾಕ್ಷಿಕೈಃ||೩೫||

ಸ೦-ತ್ರಿಫಲಾದೀನ್ ವಾ ತೈಲಘೃತಮಾಕ್ಷಿಕೈರ್ಲಿಹ್ಯಾತ್|

Adhikarana sarvakuShTheShu vRukShakakvAthaH (36) · Śloka 36

ಕಾಕೋದುಮ್ಬರಿಕಾವೇಲ್ಲನಿಮ್ಬಾಬ್ದವ್ಯೋಷಕಲ್ಕವಾನ್| ಹನ್ತಿ ವೃಕ್ಷಕನಿರ್ಯೂಹಃ ಪಾನಾತ್ಸರ್ವಾಂಸ್ತ್ವಗಾಮಯಾನ್||೩೬||

ಸ೦-ಕಾಕೋದುಮ್ಬರಿಕಾದಿಕಲ್ಕವಾನ್ ವೃಕ್ಷಕಕ್ವಾಥಃ ಪಾನಾತ್ಸರ್ವಾನ್ ತ್ವಗ್ರೋಗಾನ್ ಹನ್ತಿ| ಕಾಕೋದುಮ್ಬರಿಕಾ-ಫಲ್ಗುಃ| ವೃಕ್ಷಕೋ-ವತ್ಸಕಃ|

Adhikarana sarvakuShTheShu kuTajAdisiddhaharItakIcUrNam (37) · Śloka 37

ಕುಟಜಾಗ್ನಿನಿಮ್ಬನೃಪತರುಖದಿರಾಸನಸಪ್ತಪರ್ಣನಿರ್ಯೂಹೇ| ಸಿದ್ಧಾ ಮಧುಘೃತಯುಕ್ತಾಃ ಕುಷ್ಠಘ್ನೀರ್ಭಕ್ಷಯೇದಭಯಾಃ|೩೭|

ಸ೦-ಕುಟಜಾದಿಕ್ವಾಥೇ ಸಿದ್ಧಾಃ ಪಕ್ವಾ ಹರೀತಕೀರ್ಮಧುಘೃತಸಂಯುಕ್ತಾಃ ಕುಷ್ಠನುದೋ ಭಕ್ಷಯೇತ್| ಆರ್ಯಾವೃತ್ತಮ್|

Adhikarana sarvakuShTheShu dArvyAditvakkvAthaH (37) · Śloka 37

ದಾರ್ವೀಖದಿರನಿಮ್ಬಾನಾಂ ತ್ವಕ್ಕ್ವಾಥಃ ಕುಷ್ಠಸೂದನಃ| ||೩೭||

ಸ೦-ದಾರ್ವ್ಯಾದೀನಾಂ ತ್ವಕ್ಕ್ವಾಥಃ ಕುಷ್ಠನಾಶನಃ ಸ್ಯಾತ್|

Adhikarana sarvakuShTheShu nishAdeH kvAtho ghRutaM ca sarva khadirAdeH pRuthak ghRutaM ca (38-39) · Śloka 39

ನಿಶೋತ್ತಮಾನಿಮ್ಬಪಟೋಲಮೂಲ- ತಿಕ್ತಾವಚಾಲೋಹಿತಯಷ್ಟಿಕಾಭಿಃ| ಕೃತಃ ಕಷಾಯಃ ಕಫಪಿತ್ತಕುಷ್ಠಂ ಸುಸೇವಿತೋ ಧರ್ಮ ಇವೋಚ್ಛಿನತ್ತಿ||೩೮|| ಏಭಿರೇವ ಚ ಶೃತಂ ಘೃತಮುಖ್ಯಂ ಭೇಷ್ಜೈರ್ಜಯತಿ ಮಾರುತಕುಷ್ಠಮ್| ಕಲ್ಪಯೇತ್ಖದಿರನಿಮ್ಬಗುಡೂಚೀ- ದೇವದಾರುರಜನೀಃ ಪೃಥಗೇವಮ್||೩೯||

ಸ೦-ನಿಶಾದಿಭಿಃ ಕಷಾಯಃ ಕೃತಃ ಕಫಪಿತ್ತಜಂ ಕುಷ್ಠಮುದ್ದಲಯತಿ| ಸುಷ್ಠು ಸೇವಿತೋ ಯಥಾ ಧರ್ಮಃ| ಏಭಿರೇವ-ಪೂರ್ವೋಕ್ತೈರೌಷಧೈಃ, ಪಕ್ವಂ ವರಂ ಘೃತಂ ವಾತಕುಷ್ಠಂ ಜಯತಿ| ಏವಂ-ಅನಯೈವ ಕಲ್ಪನಯಾ, ಪೃಥಕ್ ಖದಿರಾದೀನ್ ಕಲ್ಪಯೇತ್| ಉಪಜಾತಿಸ್ವಾಗತೇ ವೃತ್ತೇ|

Adhikarana sarvakuShTheShu pAThAdiBirmUtramuShNajalaM vA (72)) · Śloka 40

ಪಾಠಾದಾರ್ವೀವಹ್ನಿಘುಣೇಷ್ಟಾಕಟುಕಾಭಿ- ಮೂತ್ರಂ ಯುಕ್ತಂ ಶಕ್ರಯವೈಶ್ಚೋಷ್ಣಜಲಂ ವಾ| ಕುಷ್ಠೀ ಪೀತ್ವಾ ಮಾಸಮರುಕ್ ಸ್ಯಾದ್ಗುದಕೀಲೀ ಮೇಹೀಶೋಫೀ ಪಾಣ್ಡುರಜೀರ್ಣೀ ಕೃಮೀಮಾಂಶ್ಚ||೪೦||

ಸ೦-ಪಾಠಾದಿಭಿರಿನ್ದ್ರಯವೈಶ್ಚ ಗೋಮೂತ್ರಂ ಯುಕ್ತಮಥವೋಷ್ಣಜಲಂ ಮಾಸಂ ಪೀತ್ವಾ ಕುಷ್ಠೀ ನೀರುಕ್ ಸ್ಯಾತ್| ಅರ್ಶಸಾದಿಶ್ಚ| "ವೇದೈ ರನ್ಧ್ರೈರ್ಮ್ತೌ ಯಸಗಾ ಮತ್ತಮಯೂರಮ್|" (ವೃ. ರ. ಅ. ೩|೭೨)|

Adhikarana sarvakuShTheShu lAkShAdicUrNam (41) · Śloka 41

ಲಾಕ್ಷಾದನ್ತೀಮಧುರಸವರಾದ್ವೀಪಿಪಾಠಾವಿಡಙ್ಗ- ಪ್ರತ್ಯಕ್ಽಽಪುಷ್ಪೀತ್ರಿಕಟುರಜನೀಸಪ್ತಪರ್ಣಾಟರೂಷಮ್| ರಕ್ತಾ ನಿಮ್ಬಂ ಸುರತರು ಕೃತಂ ಪಞ್ಚಮೂಲ್ಯೌ ಚ ಚೂರ್ಣಂ ಪೀತ್ವಾ ಮಾಸಂ ಜಯತಿ ಹಿತಭುಗ್ಗವ್ಯಮೂತ್ರೇಣ ಕುಷ್ಠಮ್||೪೧||

ಸ೦-ಲಾಕ್ಷಾದಿಚೂರ್ಣಂ ಗೋಮೂತ್ರೇಣ ಮಾಸಂ ಪೀತ್ವಾ ಹಿತಭೋಜೀ ಸನ್ ಕುಷ್ಠಂ ಜಯತಿ| ರಕ್ತಾ-ಮಞ್ಜಿಷ್ಠಾ| ಸುರತರುಶಬ್ದಸ್ಯ ನಪುಂಸಕತ್ವಮೌಷಧವಾಚಿತ್ವಾಲ್ಲೋಕಾಶ್ರಯತ್ವಾಲ್ಲಿಙ್ಗಸ್ಯೇತಿವಾ| ಪಞ್ಚಮೂಲ್ಯೌ-ದೇಶಮೂಲಮಿತ್ಯರ್ಥಃ| "ಮನ್ದಾಕ್ರಾನ್ತಾ ಮಭನತತಗಾ ಗಃ ಸಮುದ್ರರ್ತುಲೋಕೈಃ|"

Adhikarana sarvakuShTheShu nishAdeScUrNa paTakA vA (42) · Śloka 42

ನಿಶಾಕಣಾನಾಗರವೇಲ್ಲತೌವರಂ ಸವಹ್ನಿತಾಪ್ಯಂ ಕ್ರಮಶೋ ವಿವರ್ಧಿತಮ್| ಗವಾಮ್ಬುಪೀತಂ ವಟಕೀಕೃತಂ ತಥಾ ನಿಹನ್ತಿ ಕುಷ್ಠಾನಿ ಸುದಾರುಣಾನ್ಯಪಿ||೪೨||

ಸ೦-ನಿಶಾದಿಕಂ ಕ್ರಮೇಣ ವಿವರ್ಧಿತಂ ಗೋಮೂತ್ರೇಣ ಪೀತಮಥವಾ ವಟಕೀಕೃತಂ ಕುಷ್ಠಾನಿ ಸುಕೃಚ್ಛ್ರಾಣ್ಯಪಿ ನಿಹನ್ತಿ| "ಉಶನ್ತಿ ವಂಶಸ್ಥಮಿದಂ ಜತೌ ಜರೌ|"

Adhikarana sarvakuShTheShu trikaTvAdiguTikA (43) · Śloka 43

ತ್ರಿಕಟೂತ್ತಮಾತಿಲಾರು- ಷ್ಕರಾಜ್ಯಮಾಕ್ಷಿಕಸಿತೋಪಲಾವಿಹಿತಾ| ಗುಲಿಕಾ ರಸಾಯನಂ ಕು- ಷ್ಠಜಿಚ್ಚ ವೃಷ್ಯಾ ಚ ಸಪ್ತಸಮಾ||೪೩||

ಸ೦-ತ್ರಿಕಟುಕಾದಿಭಿರ್ಗುಲಿಕಾ ವಿಹಿತಾ ರಸಾಯನಂ ಕುಷ್ಟಹೃದ್ ವೃಷ್ಯಾ ಚ ಸ್ಯಾತ್| ಏವಂ ಚ ಸಪ್ತಸಮಾಖ್ಯಾ| ತ್ರಿಕಟುಕತ್ರಿಫಲೇ ಹ್ಯತ್ರ ಸಮುದಾಯರೂಪತ್ವಾದ್ ದ್ವೇ ಏವ ಕಲ್ಪಿತೇ| "ಆರ್ಯಾ ವಿಪುಲಾ ತು ಯಾಽನ್ಯಥಾ ಪಾದಭಾಕ್|"

Adhikarana sarvakuShTheShu candraSakalAdi vaTakAH (44) · Śloka 44

ಚಾನ್ದ್ರಶಕಲಾಗ್ನಿರಜನೀ- ವಿಡಙ್ಗತುವರಾಸ್ಥ್ಯರುಷ್ಕರತ್ರಿಫಲಾಭಿಃ| ವಟಕಾ ಗುಡಾಂಶಕ್ಲ್ಱ್ಪ್ತಾಃ ಸಮಸ್ತಕುಷ್ಠಾನಿ ನಾಶಯನ್ತ್ಯಭ್ಯಸ್ತಾಃ||೪೪||

ಸ೦-ಚನ್ದ್ರಶಕಲಾದಿಭಿರ್ವಟಕಾ ಗುಡಾಂಶೇನ ಕ್ಲ್ಱ್ಪ್ತಾಃ-ಶೀಲಿತಾಃ, ನಿಃಶೇಷಕುಷ್ಠಾನಿ ಘ್ನನ್ತಿ| ಚನ್ದ್ರಶಕಲಾ-ಬಾಕುಚೀ| ಆರ್ಯಾಗೀತಿಃ|

Adhikarana sarvakuShTheShu viDa~ggAdipiNDI (45) · Śloka 45

ವಿಡಙ್ಗಭಲ್ಲಾತಕಬಾಕುಚೀನಾಂ ಸದ್ವೀಪಿವಾರಾಹಿಹರೀತಕೀನಾಮ್| ಸಲಾಙ್ಗಲೀಕೃಷ್ಣತಿಲೋಪಕುಲ್ಯಾ ಗುಡೇನ ಪಿಣ್ಡೀ ವಿನಿಹನ್ತಿ ಕುಷ್ಠಮ್||೪೫||

ಸ೦-ವಿಡಙ್ಗಾದೀನಾಂ ಚೂರ್ಣೇನ ಗುಡೇನ ಪಿಣ್ಡೀ ಲಾಙ್ಗಲಿಕಾದ್ಯನ್ವಿತಾ ಕುಷ್ಠಂ ವಿಜಯತೇ|

Adhikarana sarvakuShTheShu shashA~gkalekhAdilehaH (46) · Śloka 46

ಶಶಾಙ್ಕಲೇಖಾ ಸವಿಡಙ್ಗಸಾರಾ ಸಪಿಪ್ಪಲೀಕಾ ಸಹುತಾಶಮೂಲಾ| ಸಾಯೋಮಲಾ ಸಾಮಲಕಾ ಸತೈಲಾ ಕುಷ್ಠಾನಿ ಕೃಚ್ಛ್ರಾಣಿ ನಿಹನ್ತಿ ಲೀಢಾ||೪೬||

ಸ೦-ಶಶಾಙ್ಕಲೇಖಾ ವಿಡಙ್ಗಾದಿಭಿಃ ಸಹ ತೈಲೇನ ಲೀಢಾ ಕೃಚ್ಛ್ರಾಣಿ ಕುಷ್ಠಾನಿ ವಿನಾಶಯತಿ| ಉಪಜಾತಿವೃತ್ತಮ್(ತ್ತೇ)|

Adhikarana sarvakuShTheShu pathyAdipiNDI,sarvakuShTheShu guDAdipiNDI (47) · Śloka 47

ಪಥ್ಯಾತಿಲಗುಡೈಃ ಪಿಣ್ಡೀ ಕುಷ್ಠಂ ಸಾರುಷ್ಕರೈರ್ಜಯೇತ್| ಗುಡಾರುಷ್ಕರಜನ್ತುಘ್ನಸೋಮರಾಜೀಕೃತಾಽಥವಾ||೪೭||

ಸ೦-ಪಥ್ಯಾದಿಭಿಃ ಸಭಲ್ಲಾತಕೈಃ ಪಿಣ್ಡೀ ಕುಷ್ಠಂ ಜಯೇತ್| ಗುಡಾದಿಭಿರ್ವಾ ಕೃತಾ ಪಿಣ್ಡೀ ಕುಷ್ಠಂ ಹನ್ತಿ|

Adhikarana sarvakuShTheShu khadiracUrNam (48) · Śloka 48

ವಿಡಙ್ಗಾದ್ರಿಜತುಕ್ಷೌದ್ರಸರ್ಪಿಷ್ಮತ್ಖಾದಿರಂ ರಜಃ| ಕಿಟಿಭಶ್ವಿತ್ರದದ್ರುಘ್ನಂ ಖಾದೇನ್ಮಿತಹಿತಾಶನಃ||೪೮||

ಸ೦-ಖದಿರಚೂರ್ಣಂ ವಿಡಙ್ಗಾದಿಯುತಂ ಮಿತಹಿತಭೋಜನಃ ಕಿಟಿಭಾದಿಘ್ನಂ ಖಾದೇತ್|

Adhikarana sarvakuShTheShu sitAdilehaH (49) · Śloka 49

ಸಿತಾತೈಲಕೃಮಿಘ್ನಾನಿ ಧಾತ್ರ್ಯಯೋಮಲಪಿಪ್ಪಲೀಃ| ಲಿಹಾನಃ ಸರ್ವಕುಷ್ಠಾನಿ ಜಯತ್ಯತಿಗುರೂಣ್ಯಪಿ||೪೯||

ಸ೦-ಸಿತಾದೀನಿ ಲಿಹಾನೋಽಶೇಷಕುಷ್ಠಾನಿ ಕೃಚ್ಛ್ರಾಣ್ಯಪಿ ಜಯತಿ|

Adhikarana sarvakuShTheShu mustAdicUrNam (50-52) · Śloka 52

ಮುಸ್ತಂ ವ್ಯೋಷಂ ತ್ರಿಫಲಾ ಮಞ್ಜಿಷ್ಠಾ ದಾರು ಪಞ್ಚಮೂಲೇ ದ್ವೇ| ಸಪ್ತಚ್ಛದನಿಮ್ಬತ್ವಕ್ ಸವಿಶಾಲಾ ಚಿತ್ರಕೋ ಮೂರ್ವಾ||೫೦|| ಚೂರ್ಣಂ ತರ್ಪಣಭಾಗೈರ್ನವಭಿಃ ಸಂಯೋಜಿತಂ ಸಮಧ್ವಂಶಮ್| ನಿತ್ಯಂ ಕುಷ್ಠನಿಬರ್ಹಣಮೇತತ್ಪ್ರಾಯೋಗಿಕಂ ಖಾದನ್||೫೧|| ಶ್ವಯಥುಂ ಸಪಾಣ್ಡುರೋಗಂ ಶ್ವಿತ್ರಂ ಗ್ರಹಣೀಪ್ರದೋಷಮರ್ಶಾಂಸಿ| ವರ್ಧಭಗನ್ದರಪಿಡಕಾಕಣ್ಡೂಕೋಠಾಪಚೀರ್ಹನ್ತಿ||೫೨||

ಸ೦-ಮುಸ್ತಾದಿಕಂ ಸಮಭಾಗಂ ಸಕ್ತುಭಾಗೈರ್ನವಭಿಃ ಸಂಯೋಜಿತಂ ಮಧ್ವಂಶೇನ ಯುತಮೇತಚ್ಚೂರ್ಣಂ ಪ್ರಾಯೋಗಿಕಂ-ಪ್ರಯೋಗಯೋಗ್ಯಂ, ಕುಷ್ಠಘ್ನಂ ಸತತಂ ಖಾದೇತ್| ಆರ್ಯಾಸ್ತಿಸ್ರಃ|

Adhikarana sarvakuShTheShu tuvarAsthyAdirasAyanAni (137)) · Śloka 53

ರಸಾಯನಪ್ರಯೋಗೇಣ ತುವರಾಸ್ಥೀನಿ ಶೀಲಯೇತ್| ಭಲ್ಲಾತಕಂ ಬಾಕುಚಿಕಾಂ ವಹ್ನಿಮೂಲಂ ಶಿಲಾಹ್ವಯಮ್||೫೩||

ಸ೦-ರಸಾಯನೋಕ್ತೇನ ವಿಧಿನಾ ತುವರಾಸ್ಥೀನಿ (ಹೃ. ಊ. ಅ. ೩೯|೮೪) , ಶೀಲಯೇತ್| ಭಲ್ಲಾತಕಂ ವಾ (ಹೃ. ಉ. ಅ. ೩೯|೭೫) , ಸೋಮರಾಜೀಂ ವಾ (ಹೃ. ಉ. ಅ. ೩೯|೧೦೭) , ಚಿತ್ರಕಮೂಲಂ ವಾ (ಹೃ. ಉ. ಅ. ೩೯|೬೩) , ಶಿಲಾಜತು ವಾ (ಹೃ. ಉ. ಅ. ೩೯|೧೩೭)|

Adhikarana sarvakuShTheShu ityantadauShe vijite bahi pralepAdi hitam (54) · Śloka 54

ಇತಿ ದೋಷೇ ವಿಜಿತೇಽನ್ತಸ್- ತ್ವಕ್ಸ್ಥೇ ಶಮನಂ ಬಹಿಃ ಪ್ರಲೇಪಾದಿ ಹಿತಮ್| ತೀಕ್ಷ್ಣಾಲೇಪೋತ್ಕ್ಲಿಷ್ಟಂ ಕುಷ್ಠಂ ಹಿ ವಿವೃದ್ಧಿಮೇತಿ ಮಲಿನೇ ದೇಹೇ||೫೪||

ಸ೦-ಇತಿ-ಏವಂಪ್ರಕಾರೇಣ, ಅನ್ತರ್ವಿಜಿತೇ ದೋಷೇಽತ ಏವ ತ್ವಕ್ಸ್ಥೇ ಬಹಿಃ ಪ್ರಲೇಪಾದಿ ಹಿತಮ್| ಆದಿಶಬ್ದೇನ ಸ್ನಾನಾದಿಪರಿಗ್ರಹಃ| ನನು, ಬಹಿರ್ಭಾಗಸ್ಥಂ ಕುಷ್ಠಂ ಕಿಮಿತಿ ಪೂರ್ವಮೇವ ಪ್ರಲೇಪಾದಿನಾ ನ ಜೀಯತೇ ? ಇತ್ಯಾಹ-ತೀಕ್ಷ್ಣೇತ್ಯಾದಿ| ಯಸ್ಮಾತ್ತೀಕ್ಷ್ಣೇನ ಲೇಪೇನೋತ್ಕ್ಲಿಷ್ಟಂ-ಉತ್ಕ್ಲೇಶಂ ಪ್ರಾಪಿತಂ, ಕುಷ್ಠಂ ಮಲಿನೇ-ಸದೋಷೇ, ಕಾಯೇ ವಿವೃದ್ಧಿಂ ಯಾತಿ| ತಸ್ಮಾದನ್ತಃಶುದ್ಧೇ ಕಾಯೇ ಪ್ರಲೇಪಾದಿಕಂ ಹಿತಮ್| ಆರ್ಯಾಗೀತಿಃ|

Adhikarana sarvakuShTheShu sthirakaThiNamaNDaleShu poTalaiH svedaH (55) · Śloka 55

ಸ್ಥಿರಕಠಿನಮಣ್ಡಲಾನಾಂ ಕುಷ್ಠಾನಾಂ ಪೋಟಲೈರ್ಹಿತಃ ಸ್ವೇದಃ| ಸ್ವಿನ್ನೋತ್ಸನಂ ಕುಷ್ಠಂ ಶಸ್ತ್ರೈರ್ಲಿಖಿತಂ ಪ್ರಲೇಪನೈರ್ಲಿಮ್ಪೇತ್||೫೫||

ಸ೦-ಸ್ಥಿರಾಣಿ ಕಠಿನಾನಿ ಚ ಮಣ್ಡಲಾನಿ ಯೇಷಾಂ ಕುಷ್ಠಾನಾಂ ತೇಷಾಂ ಪೋಟಲೈಃ ಸ್ವೇದೋ ಹಿತಃ| ಸ್ವಿನ್ನೋತ್ಸನ್ನಂ ಕುಷ್ಠಂ ಶಸ್ತ್ರೈರ್ಲಿಖಿತಂ ಪ್ರಲೇಪೈರ್ಲಿಮ್ಪೇತ್| ಗೀತಿರಾರ್ಯಾ|

Adhikarana sarvakuShTheShu svinnotsanneShu lekhanaM lepanaM ca sarvakuShTheShu sparshaindriyanASaneShu kShAraH (56) · Śloka 56

ಯೇಷು ನ ಶಸ್ತ್ರಂ ಕ್ರಮತೇ ಸ್ಪರ್ಶೇನ್ದ್ರಿಯನಾಶನೇಷು ಕುಷ್ಠೇಷು| ತೇಷು ನಿಪಾತ್ಯಃ ಕ್ಷಾರೋ ರಕ್ತಂ ದೋಷಂ ಚ ವಿಸ್ರಾವ್ಯ||೫೬||

ಸ೦-ಯೇಷು ಕುಷ್ಠೇಷು ಸ್ಪರ್ಶೇನ್ದ್ರಿಯನಾಶನೇಷು ಶಸ್ತ್ರಂ ನ ಕ್ರಮತೇ, ತೇಷು ರಕ್ತಂ ದೋಷಂ ಚ ವಿಸ್ರಾವ್ಯ ಕ್ಷಾರೋ ನಿಪಾತನೀಯಃ| ಕ್ರಮತ ಇತಿ "ವೃತ್ತಿಸರ್ಗ" ಇತ್ಯಾದಿನಾ ತಡ್|

Adhikarana sarvakuShTheShu atikaThinaparuShApurANaMtvAdiyukteShu viShairagadaSca kramAllepaH (57) · Śloka 57

ಲೇಪೋಽತಿಕಠಿನಪುರುಷೇ ಸುಪ್ತೇ ಕುಷ್ಠೇ ಸ್ಥಿರೇ ಪುರಾಣೇ ಚ| ಪೀತಾಗದಸ್ಯ ಕಾರ್ಯೋ ವಿಷೈಃ ಸಮನ್ತ್ರೋಽಗದೈಶ್ಚಾನು||೫೭||

ಸ೦-ಪಾಷಾಣವತ್ಕಠಿನೇ ತಥಾ ಪರುಷಸ್ಪರ್ಶೇ ತಥಾ ಸುಪ್ತೇ ಸ್ಥಿರೀಭೂತೇ ತಥಾ ಪುರಾಣೇ ಚ ಕುಷ್ಠೇ ಸತ್ಯಾತುರಸ್ಯೋಪಯುಕ್ತಾಗದಸ್ಯ ವಿಷೈರ್ಮನ್ತ್ರಸಹಿತೈರ್ಲೇ(ತೋ ಲೇ)ಪಃ ಕಾರ್ಯಃ| ಅನು-ಪಶ್ಚಾತ್, ಅಗದೈಶ್ಚ ಲೇಪಃ|

Adhikarana sarvakuShTheShu stabdhatvAdiyukteShu ghRuShTvA lepaH (58) · Śloka 58

ಸ್ತಬ್ಧಾನಿ ಸುಪ್ತಸುಪ್ತಾನ್ಯಸ್ವೇದನಕಣ್ಡುಲಾನಿ ಕುಷ್ಠಾನಿ| ಘೃಷ್ಟಾನಿ ಶುಷ್ಕಗೋಮಯಫೇನಕಶಸ್ತ್ರೈಃ ಪ್ರದೇಹ್ಯಾನಿ||೫೮||

ಸ೦-ಕುಷ್ಠಾನಿ ಸ್ತಬ್ಧಾನಿ ತಥಾಽತಿಸುಪ್ತಾನಿ ತಥಾಽಸ್ವೇದನಾನಿ ಕಣ್ಡೂವನ್ತಿ ಚ ಶುಷ್ಕಗೋಮಯಾದಿಭಿಘೃಷ್ಟಾನ್ಯನನ್ತರಂ ಪ್ರಲೇಪ್ಯಾನಿ|

Adhikarana sarvakuShTheShu mustAdikaShAyaH siddhAthaikaM snAnam sarvakuShTheShu mustA vamanaM virecanaM tvagdoShAdi nAshakaSca (59-60) · Śloka 60

ಮುಸ್ತಾ ತ್ರಿಫಲಾ ಮದನಂ ಕರಞ್ಜ ಆರಗ್ವಧಃ ಕಲಿಙ್ಗಯವಾಃ| ಸಪ್ತಾಹ್ವಕುಷ್ಠಫಲಿನೀದಾರ್ವ್ಯಃ ಸಿದ್ಧಾರ್ಥಕಂ ಸ್ನಾನಮ್||೫೯|| ಏಷ ಕಷಾಯೋ ವಮನಂ ವಿರೇಚನಂ ವರ್ಣಕಸ್ತಥೋದ್ಧರ್ಷಃ| ತ್ವಗ್ದೋಷಕುಷ್ಠಶೋಫಪ್ರಬಾಧನಃ ಪಾಣ್ಡುರೋಗಘ್ನಃ||೬೦||

ಸ೦-ಮುಸ್ತಾದಯಃ ಸ್ನಾನಂ ಸ್ಯಾತ್| ಏಷ ಏವ ಕಷಾಯೋ ವಮನಂ [ವಿರೇಚನಂ] ವರ್ಣಕರಸ್ತಥೋದ್ಧರ್ಷಸ್ತ್ವಗ್ದೋಷಾದಿಪ್ರಬಾಧನಃ ಪಾಣ್ಡುರೋಗಹೃಚ್ಚ ಸ್ಯಾತ್|

Adhikarana sarvakuShTheShu karavIramUlAdikvAthalepaH (61) · Śloka 61

ಕರವೀರನಿಮ್ಬಕುಟಜಾಚ್ಛಮ್ಯಾಕಾಚ್ಚಿತ್ರಕಾಚ್ಚ ಮೂಲಾನಾಮ್| ಮೂತ್ರೇ ದರ್ವೀಲೇಪೀ ಕ್ವಾಥೋ ಲೇಪೇನ ಕುಷ್ಠಘ್ನಃ||೬೧||

ಸ೦-ಕರವೀರಮೂಲಾದಿನಾ ಚತುರ್ಗುಣೇ ಗೋಮೂತ್ರೇ ಕ್ವಥಿತೇ ದರ್ವೀಲೇಪೀ ಕ್ವಾಥೋ ಲೇಪೇನ ಕುಷ್ಠಘ್ನಃ-ಕುಷ್ಠಾಪಹಃ|

Adhikarana sarvakuShTheShu shvetakaravIramulAdi lepaH (62) · Śloka 62

ಶ್ವೇತಕರವೀಮೂಲಂ ಕುಟಜಕರಞ್ಜಾತ್ಫಲಂ ತ್ವಚೋ ದಾರ್ವ್ಯಾಃ| ಸುಮನಃಪ್ರವಾಲಯುಕ್ತೋ ಲೇಪಃ ಕುಷ್ಠಾಪಹಃ ಸಿದ್ಧಃ||೬೨||

ಸ೦-ಸಿತಕರವೀರಮೂಲಾದಯಃ ಸುಮನಃಪಲ್ಲವಯುತೋ ಲೇಪೋ ನಿಶ್ಚಿತಂ ಕುಷ್ಠಘ್ನಃ|

Adhikarana sarvakuShTheShu SirIShatvagAdicaturvidholepaH (63) · Śloka 63

ಶೈರೀಷೀ ತ್ವಕ್ ಪುಷ್ಪಂ ಕಾರ್ಪಾಸ್ಯಾ ರಾಜವೃಕ್ಷಪತ್ರಾಣಿ| ಪಿಷ್ಟಾ ಚ ಕಾಕಮಾಚೀ ಚತುರ್ವಿಧಃ ಕುಷ್ಠಹಾ ಲೇಪಃ||೬೩||

ಸ೦-ಶಿರೀಷತ್ವಗಾದಿಲೇಪಶ್ಚತುಃಪ್ರಕಾರಃ ಕುಷ್ಠಜಿತ್| ಆರ್ಯಾ ಅಷ್ಟೌ|

Adhikarana sarvakuShTheShu vyoShAdi lepaH (64) · Śloka 64

ವ್ಯೋಷಸರ್ಷಪನಿಶಾಗೃಹಧೂಮೈ- ರ್ಯಾವಶೂಕಪಟುಚಿತ್ರಕಕುಷ್ಠೈಃ| ಕೋಲಮಾತ್ರಗುಟಿಕಾಽರ್ಧವಿಷಾಂಶಾ ಶ್ವಿತ್ರಕುಷ್ಠಹರಣೋ ವರಲೇಪಃ||೬೪||

ಸ೦-ವ್ಯೋಷಾದಿಭಿರ್ದ್ರವ್ಯೈಃ ಸಮಾಂಶೈಸ್ತದರ್ಧವಿಷೋಪೇತೈಃ ಕೋಲಪ್ರಮಾಣಾವಟಿಕಾ ಲೇಪತಃ ಶ್ವಿತ್ರಂ ಕುಷ್ಠಂ ಹನ್ತಿ| [ ಸ್ವಾಗತಾವೃತ್ತಮ್| ]

Adhikarana sarvakuShTheShu nimbAdicUrNasyodvartanam (65-66) · Śloka 66

ನಿಮ್ಬಂ ಹರಿದ್ರೇ ಸುರಸಂ ಪಟೋಲಂ ಕುಷ್ಠಾಶ್ವಗನ್ಧೇ ಸುರದಾರು ಶಿಗ್ರುಃ| ಸಸರ್ಷಪಂ ತುಮ್ಬರುಧಾನ್ಯವನ್ಯಂ ಚಣ್ಡಾ ಚ ಚೂರ್ಣಾನಿ ಸಮಾನಿ ಕುರ್ಯಾತ್||೬೫|| ತೈಸ್ತಕ್ರಪಿಷ್ಟೈಃ ಪ್ರಥಮಂ ಶರೀರಂ ತೈಲಾಕ್ತಮುದ್ವರ್ತಯಿತುಂ ಯತೇತ| ತಥಾಽಸ್ಯ ಕಣ್ಡೂಃ ಪಿಟಿಕಾಃ ಸಕೋಠಾಃ ಕುಷ್ಠಾನಿ ಶೋಫಾಶ್ಚ ಶಮಂ ವ್ರಜನ್ತಿ||೬೬||

ಸ೦-ಪೂರ್ವಂ ತೈಲಾಭ್ಯಕ್ತಂ ಶರೀರಂ ನಿಮ್ಬಾದಿಭಿಃ ಸಮಭಾಗೇನ ಚೂರ್ಣೀಕೃತೈರುದ್ವರ್ತನಾರ್ಥಂ ಯತ್ನಂ ಕುರ್ಯಾತ್| ತಥಾ-ಏವಂ ಕೃತೇ, ಅಸ್ಯ-ಆತುರಸ್ಯ, ಕಣ್ಡ್ವಾದಯಃ ಶಾಮ್ಯನ್ತಿ| ಉದ್ವರ್ತನಾನನ್ತರಮುಷ್ಣಜಲಸ್ನಾನಂ ಕಾರ್ಯಮ್|

Adhikarana sarvakuShTheShu mustAdicUrNasyAvacUrNanam (67-68) · Śloka 68

ಮುಸ್ತಾಮೃತಾಸಙ್ಗಕಟಙ್ಕಟೇರೀ- ಕಾಸೀಸಕಮ್ಪಿಲ್ಲಕಕುಷ್ಠರೋಧ್ರಾಃ| ಗನ್ಧೋಪಲಃ ಸರ್ಜರಸೋ ವಿಡಙ್ಗಂ ಮನಃಶಿಲಾಲೇ ಕರವೀರಕತ್ವಕ್||೬೭|| ತೈಲಾಕ್ತಗಾತ್ರಸ್ಯ ಕೃತಾನಿ ಚೂರ್ಣಾ- ನ್ಯೇತಾನಿ ದದ್ಯಾದವಚೂರ್ಣನಾರ್ಥಮ್| ದದ್ರೂಃ ಸಕಣ್ಡೂಃ ಕಿಟಿಭಾನಿ ಪಾಮಾ ವಿಚರ್ಚಿಕಾ ಚೇತಿ ತಥಾ ನ ಸನ್ತಿ||೬೮||

ಸ೦-ಮುಸ್ತಾದೀನಿ ಸಮಾನ್ಯೇತಾನಿ ಚೂರ್ಣಾನಿ ಕೃತಾನಿ ತೈಲಭ್ಯಕ್ತದೇಹಸ್ಯಾವಚೂರ್ಣನಾರ್ಥಂ ದದ್ಯಾತ್| ತಥಾ-ಏವಮವಚೂರ್ಣಿತೇ ಸತಿ, ದದ್ರುರಿತ್ಯಾದಯೋ ನಶ್ಯನ್ತಿ| ಚತ್ವಾರ್ಯೇತಾನ್ಯುಪಜಾತಿಸಂಜ್ಞಾನಿ ವೃತ್ತಾನಿ|

Adhikarana sarvakuShTheShu sarShapakalkalepaH sarvakuShTheShu manaH shilAdilepaH sarvakuShTheShu kara~jjAlepaH (69-70) · Śloka 70

ಸ್ನುಗ್ಗಣ್ಡೇ ಸರ್ಷಪಾತ್ಕಲ್ಕಃ ಕುಕೂಲಾನಲಪಾಚಿತಃ| ಲೇಪಾದ್ವಿಚರ್ಚಿಕಾಂ ಹನ್ತಿ ರಾಗವೇಗ ಇವ ತ್ರಪಾಮ್||೬೯|| ಮನಃಶಿಲಾಲೇ ಮರಿಚಾನಿ ತೈಲ- ಮಾರ್ಕಂ ಪಯಃ ಕುಷ್ಠಹರಃ ಪ್ರದೇಹಃ| ತಥಾ ಕರಞ್ಜಪ್ರಪುನಾಟಬೀಜಂ ಕುಷ್ಠಾನ್ವಿತಂ ಗೋಸಲಿಲೇನ ಪಿಷ್ಟಮ್||೭೦||

ಸ೦-ಸರ್ಷಪಾಣಾಂ ಕಲ್ಕಃ ಸ್ರುಹ್ಯಾ ಗಣ್ಡೇ ಕುಕೂಲಾಗ್ನೌ ಪಾಚಿತೋ ಲೇಪೇನ ವಿಚರ್ಚಿಕಾಂ ಹನ್ತಿ, ರಾಗವೇಗೋ ಲಜ್ಜಾಂ ಯಥಾ| ಮನಃಶಿಲಾದಯಃ ಪ್ರಲೇಪಾತ್ ಕುಷ್ಠಹೃತಃ| ತದ್ವದೇವ ಕರಞ್ಜಾದಿ ಗೋಮೂತ್ರಪಿಷ್ಟಮ್| ಉಪಜಾತಿವೃತ್ತಮ್|

Adhikarana sarvakuShTheShu guggulvAdiBi miSrakatailamishrairlepaH (71-72) · Śloka 72

ಗುಗ್ಗುಲುಮರಿಚವಿಡಙ್ಗೈಃ ಸರ್ಷಪಕಾಸೀಸಸರ್ಜರಸಮುಸ್ತೈಃ| ಶ್ರೀವೇಷ್ಟಕಾಲಗನ್ಧೈರ್ಮನಃಶಿಲಾಕುಷ್ಠಕಮ್ಪಿಲ್ಲೈಃ||೭೧|| ಉಭಯಹರಿದ್ರಾಸಹಿತೈಶ್ಚಾಕ್ರಿಕತೈಲೇನ ಮಿಶ್ರಿತೈರೇಭಿಃ| ದಿನಕರಕರಾಭಿತಪ್ತೈಃ ಕುಷ್ಠಂ ಘೃಷ್ಟಂ ಚ ನಷ್ಟಂ ಚ||೭೨||

ಸ೦-ಗುಗ್ಗುಲ್ವಾದಿಭಿರೇತೈಶ್ಚಕ್ರಜತೈಲೇನ ಮಿಶ್ರಿತೈಃ ಸೂರ್ಯರಶ್ಮಿತಪ್ತೈಘೃಷ್ಟಂ ಕುಷ್ಠಂ ದ್ರಾಕ್ ನಶ್ಯತಿ| ಚಾಕ್ರಿಕಂ ತೈಲಂ-ಸದ್ಯಃಪೀಡಿತಂ ಚಕ್ರಸ್ಥಮೇವೋಷ್ಣಂ ತೈಲಮ್| ಕೇಚಿತ್ತು ಬಹುಕಾಲಕೃತತೈಲಪೀಡನಾತ್ ಕೋಲ್ಲು(ಹೃ)ಕಕಾಷ್ಠಾದ್ದೇವದಾರುಕಾಷ್ಠವತ್ ಖಣ್ಡಶಃ ಪಾಟಿತಾದ್ಯುಕ್ತ್ಯಾ ಯತ್ತೈಲಂ ಗೃಹ್ಯತೇ ತಚ್ಚಕ್ರತೈಲಮಿತ್ಯಾಹುಃ|

Adhikarana sarvakuShTheShu sidhme maricAdilepaH (73-74) · Śloka 74

ಮರಿಚಂ ತಮಾಲಪತ್ರಂ ಕುಷ್ಠಂ ಸಮನಃಶಿಲಂ ಸಕಾಸೀಸಮ್| ತೈಲೇನ ಯುಕ್ತಮುಷಿತಂ ಸಪ್ತಾಹಂ ಭಾಜನೇ ತಾಮ್ರೇ||೭೩|| ತೇನಾಲಿಪ್ತಂ ಸಿಧ್ಮಂ ಸಪ್ತಾಹಾದ್ ಘರ್ಮಸೇವಿನೋಽಪೈತಿ| ಮಾಸಾನ್ನವಂ ಕಿಲಾಸಂ ಸ್ನಾನೇನ ವಿನಾ ವಿಶುದ್ಧಸ್ಯ||೭೪||

ಸ೦-ಮರಿಚಾದಿಕಂ ತೈಲೇನ ಯುಕ್ತಂ ಸಪ್ತದಿನಾನಿ ತಾಮ್ರಭಾಜನೇ ಸ್ಥಿತಂ ತೇನ ಚ-ಮರಿಚಾದಿನಾ, ಸಿಧ್ಮಮಾಲಿಪ್ತಂ ಘರ್ಮಸೇವಿನೋ ನರಸ್ಯ ಸಪ್ತಾಹೇನಾಪೈತಿ| ಮಾಸಾದ್ಯತ್ಸದ್ಯೋತ್ಥಿತಂ ಶ್ವಿತ್ರಂ ತನ್ನಶ್ಯತಿ| ಸ್ನಾನೇನ ವಿನಾ ವಿಶುದ್ಧಸ್ಯ ನರಸ್ಯ| ಚತಸ್ರ ಆರ್ಯಾಃ, ಆರ್ಯಾಶ್ಚ ಜಘನಚಪಲಾಃ|

Adhikarana sarvakuShTheShu sidhme jyotiShmatItailam (75) · Śloka 75

ಮಯೂರಕಕ್ಷಾರಜಲೇ ಸಪ್ತಕೃತ್ವಃ ಪರಿಸ್ರತೇ| ಸಿದ್ಧಂ ಜ್ಯೋತಿಷ್ಮತೀತೈಲಮಭ್ಯಙ್ಗಾತ್ಸಿಧ್ಮನಾಶನಮ್||೭೫||

ಸ೦-ಅಪಾಮಾರ್ಗಕ್ಷಾರೋದಕೇ ಸಪ್ತವಾರಾನ್ ಪರಿಸ್ರುತೇ ಸುವರ್ಣಲತಾತೈಲಂ ಪಕ್ವಮಭ್ಯಙ್ಗೇನ ಸಿಧ್ಮಂ ನಾಶಯತಿ|

Adhikarana sarvakuShTheShu sidhme kAkaja~gghAmUlAdilepaH (76) · Śloka 76

ವಾಯಸಜಙ್ಘಾಮೂಲಂ ವಮನೀಪತ್ರಾಣಿ ಮೂಲಕಾದ್ಬೀಜಮ್| ತಕ್ರೇಣ ಭೌಮವಾರೇ ಲೇಪಃ ಸಿಧ್ಮಾಪಹಃ ಸಿದ್ಧಃ||೭೬||

ಸ೦-ಕಾಕಜಙ್ಘಾಮೂಲಂ ವಮನ್ಯಾಃ ಪತ್ರಾಣಿ ಮೂಲಕಬೀಜಂ ಚ ತಕ್ರೇಣಾಙ್ಗಾರಕದಿನೇ ಲೇಪಃ ಸಿಧ್ಮಘ್ನಃ ಸಿದ್ಧಃ|

Adhikarana sarvakuShTheShu jIvantyAdighRutatailapAkaH (77-78) · Śloka 78

ಜೀವನ್ತೀ ಮಞ್ಜಿಷ್ಠಾ ದಾರ್ವೀ ಕಮ್ಪಿಲ್ಲಕಂ ಪಯಸ್ತುತ್ಥಮ್| ಏಷ ಘೃತತೈಲಪಾಕಃ ಸಿದ್ಧಃ ಸಿದ್ಧೇ ಚ ಸರ್ಜರಸಃ||೭೭|| ದೇಯಃ ಸಮಧೂಚ್ಛಿಷ್ಟೋ ವಿಪಾದಿಕಾ ತೇನ ನಶ್ಯತಿ ಹ್ಯಕ್ತಾ| ಚರ್ಮೈಕಕುಷ್ಠಕಿಟಿಭಂ ಕುಷ್ಠಂ ಶಾಮ್ಯತ್ಯಲಸಕಂ ಚ||೭೮||

ಸ೦-ಏಷ ಘೃತತೈಲಪಾಕಃ ಘೃತತೈಲಾಭ್ಯಾಂ ಪಾಕೋ ಯಸ್ಯ ಯೋಗಸ್ಯ ಸ ಘೃತತೈಲಪಾಕಃ, ಗಮಕತ್ವಾತ್ಸಮಾಸಃ| ಸಿದ್ಧೋ-ನಿಷ್ಪನ್ನಃ| ಸಿದ್ಧೇಽಸ್ಮಿನ್ ಪಾಕೇ ಸರ್ಜರಸೋ ಮದನೇನ ಸಹ ದೇಯಃ| ತೇನ-ಸಿದ್ಧೇನ ಯೋಗೇನ, ವಿಪಾದಿಕಾಽಭ್ಯಕ್ತಾ ನಶ್ಯತಿ| ತಥಾ, ಚರ್ಮೈಕಕುಷ್ಠಾದಿಕಂ ಚ ಶಾಮ್ಯತಿ| ಕ್ಷೀರಮೂತ್ರಾರ್ಕಂ ಗ್ರಾಹ್ಯಮ್, ಯೌಗಿಕತ್ವಾದ್ವೃದ್ಧವೈದ್ಯವ್ಯವಹಾರಾಚ್ಚ| ಆರ್ಯಾಸ್ತಿಸ್ರಃ|

Adhikarana sarvakuShTheShu nADIvraNeShu vajrakaM tailam (79-80) · Śloka 80

ಮೂಲಂ ಸಪ್ತಾಹ್ವಾತ್ತ್ವಕ್ ಶಿರೀಷಾಶ್ವಮಾರಾ- ದರ್ಕಾನ್ಮಾಲತ್ಯಾಶ್ಚಿತ್ರಕಾಸ್ಫೋತನಿಮ್ಬಾತ್| ಬೀಜಂ ಕಾರಞ್ಜಂ ಸಾರ್ಷಪಂ ಪ್ರಾಪುನಾಟಂ ಶ್ರೇಷ್ಠಾ ಜನ್ತುಘ್ನಂ ತ್ರ್ಯೂಷಣಂ ದ್ವೇ ಹರಿದ್ರೇ||೭೯|| ತೈಲಂ ತೈಲಂ ಸಾಧಿತಂ ತೈಃ ಸಮೂತ್ರೈ- ಸ್ತ್ವಗ್ದೋಷಾಣಾಂ ದುಷ್ಟನಾಡೀವ್ರಣಾನಾಮ್| ಅಭ್ಯಙ್ಗೇನ ಶ್ಲೇಷ್ಮವಾತೋದ್ಭವಾನಾಂ ನಾಶಾಯಾಲಂ ವಜ್ರಕಂ ವಜ್ರತುಲ್ಯಮ್||೮೦||

ಸ೦-ಸಪ್ತಪರ್ಣಮೂಲಂ ಶಿರೀಷಾದೀನಾಂ ತ್ವಕ್ ಕರಞ್ಜಾದೀನಾಂ ಬೀಜಂ ತಥಾ ತ್ರಿಫಲಾದಯಃ, ಏತೈರ್ಗೋಮೂತ್ರಸಹಿತೈಸ್ತಿಲತೈಲಂ ಪಕ್ತ್ವಾ ವಾತಕಫೋದ್ಭವಾನಾಂ ತ್ವಗ್ದೋಷಾಣಾಂ ತಥಾ ದುಷ್ಟನಾಡೀವ್ರಣಾನಾಮಭ್ಯಙ್ಗೇನ ನಾಶಾಯ ವಜ್ರಕಸಂಜ್ಞಮೇತದಲಂ-ಸಮರ್ಥಮ್| ತಥಾ ವಜ್ರತುಲ್ಯಮ್, ಅವ್ಯಾಹತಶಕ್ತಿತ್ವಾತ್| [ ವೈಶ್ವದೇವೀ ಶಾಲಿನೀ ಚ| ]

Adhikarana sarvakuShTheShu nADIvraNeShu mahAvajratailam (81-82) · Śloka 82

ಏರಣ್ಡತಾರ್ಕ್ಷ್ಯಘನನೀಪಕದಮ್ಬಭಾರ್ಙ್ಗೀ- ಕಮ್ಪಿಲ್ಲವೇಲ್ಲಫಲಿನೀಸುರವಾರುಣೀಭಿಃ| ನಿರ್ಗುಣ್ಡ್ಯರುಷ್ಕರಸುರಾಹ್ವಸುವರ್ಣದುಗ್ಧಾ- ಶ್ರೀವೇಷ್ಟಗುಗ್ಗುಲುಶಿಲಾಪಟುತಾಲವಿಶ್ವೈಃ||೮೧|| ತುಲ್ಯಸ್ನುಗರ್ಕದುಗ್ಧಂ ಸಿದ್ಧಂ ತೈಲಂ ಸ್ಮೃತಂ ಮಹಾವಜ್ರಮ್| ಅತಿಶಯಿತವಜ್ರಕಗುಣಂ ಶ್ವಿತ್ರಾರ್ಶೋಗ್ರನ್ಥಿಮಾಲಾಘ್ನಮ್||೮೨||

ಸ೦-ಏರಣ್ಡಾದಿಭಿಸ್ತುಲ್ಯಸ್ನುಗರ್ಕದುಗ್ಧಂ ತೈಲಂ ಪಕ್ವಂ ಮಹಾವಜ್ರಸಂಜ್ಞಂ ಸ್ಮೃತಮ್| ಅತಿಶಯೇನ ವಜ್ರಕಗುಣಂ ಶ್ವಿತ್ರಾದಿಘ್ನಮ್| ವಸನ್ತತಿಲಕಂ ಆರ್ಯಾ ಚ|

Adhikarana sarvakuShTheShu kuShThAditailam (83) · Śloka 83

ಕುಷ್ಠಾಶ್ವಮಾರಭೃಙ್ಗಾರ್ಕಮೂತ್ರಸ್ನುಕ್ಕ್ಷೀರಸೈನ್ಧವೈಃ| ತೈಲಂ ಸಿದ್ಧಂ ವಿಷಾವಾಪಮಭ್ಯಙ್ಗಾತ್ ಕುಷ್ಠಜಿತ್ಪರಮ್||೮೩||

ಸ೦-ಕುಷ್ಠಾದಿಭಿಃ ಸಿದ್ಧಂ ತೈಲಂ ವಿಷಾವಾಪಮಭ್ಯಙ್ಗಾತ್ ಪರಂ ಕುಷ್ಠಹೃತ್|

Adhikarana sarvakuShTheShu pAmAvicarcikayoH kaTutailam (84) · Śloka 84

ಸಿದ್ಧಂ ಸಿಕ್ಥಕಸಿನ್ದೂರಪುರತುತ್ಥಕತಾರ್ಕ್ಷ್ಯಜೈಃ| ಕಚ್ಛೂಂ ವಿಚರ್ಚಿಕಾಂ ಚಾಶು ಕಟುತೈಲಂ ನಿಬರ್ಹತಿ||೮೪||

ಸ೦-ಸಿಕ್ಥಕಾದಿಭಿಃ ಪಕ್ವಂ ಸರ್ಷಪತೈಲಂ ಕಚ್ಛ್ವಾದೀನ್ನಿಹನ್ತಿ|

Adhikarana sarvakuShTheShu dadruShu lAkShAdilepaH (85) · Śloka 85

ಲಾಕ್ಷಾ ವ್ಯೋಷಂ ಪ್ರಾಪುನಾಟಂ ಚ ಬೀಜಂ ಸಶ್ರೀವೇಷ್ಟಂ ಕುಷ್ಠಸಿದ್ಧಾರ್ಥಕಾಶ್ಚ| ತಕ್ರೋನ್ಮಿಶ್ರಃ ಸ್ಯಾದ್ಧರಿದ್ರಾ ಚ ಲೇಪೋ ದದ್ರೂಷೂಕ್ತೋ ಮೂಲಕೋತ್ಥಂ ಚ ಬೀಜಮ್||೮೫||

ಸ೦-ಲಾಕ್ಷಾದಯೋ ನಿಶಾ ಚ ತಕ್ರೋನ್ಮಿಶ್ರೋ ದದ್ರೂಷು ಲೇಪ ಉಕ್ತಃ| ಮೂಲಕಬೀಜಂ ಚ ತಕ್ರಮಿಶ್ರಂ ತದ್ವತ್| ಶಾಲಿನೀವೃತ್ತಮ್|

Adhikarana sarvakuShTheShu citrakAdayAH ShaT lepAH (86-87) · Śloka 87

ಚಿತ್ರಕಸೋಭಾಞ್ಜನಕೌ, ಗುಡೂಚ್ಯಪಾಮಾರ್ಗದೇವದಾರೂಣಿ| ಖದಿರೋ ಧವಶ್ಚ ಲೇಪಃ, ಶ್ಯಾಮಾ ದನ್ತೀ ದ್ರವನ್ತೀ ಚ||೮೬|| ಲಾಕ್ಷಾರಸಾಞ್ಜನೈಲಾಃ, ಪುನರ್ನವಾ ಚೇತಿ ಕುಷ್ಠಿನಾಂ ಲೇಪಾಃ| ದಧಿಮಣ್ಡಯುತಾಃ ಪಾದೈಃ ಷಟ್ ಪ್ರೋಕ್ತಾ ಮಾರುತಕಫಘ್ನಾಃ||೮೭||

ಸ೦-ಚಿತ್ರಕಾದಯೋ ದಧಿಮಣ್ಡಾನ್ವಿತಾಃ ಪಾದೈಃ ಷಟ್ ವಾತಶ್ಲೇಷ್ಮಕುಷ್ಠಘ್ನಾ ಗದಿತಾಃ| ತತ್ರ ಚಿತ್ರಕಸೋಭಾಞ್ಜನಕಾವಿತ್ಯೇಕೋ ಲೇಪಃ, ಗುಡೂಚ್ಯಪಾಮಾರ್ಗದೇವದಾರೂಣೀತಿ ದ್ವಿತೀಯಃ, ಏವಮನ್ಯೇಽಪಿ ವೇದ್ಯಾಃ| ಆರ್ಯೇ|

Adhikarana sarvakuShTheShu pittakaPottareShu jalAdilepaH (88) · Śloka 88

ಜಲವಾಪ್ಯಲೋಹಕೇಸರಪತ್ರಪ್ಲವಚನ್ದನಮೃಣಾಲಾನಿ| ಭಾಗೋತ್ತರಾಣಿ ಸಿದ್ಧಂ ಪ್ರಲೇಪನಂ ಪಿತ್ತಕಫಕುಷ್ಠೇ||೮೮||

ಸ೦-ಜಲಾದೀನಿ ಭಾಗೋತ್ತರಾಣಿ ಸಿದ್ಧಃ ಪಿತ್ತಕಫಕುಷ್ಠೇ ಪ್ರಲೇಪಃ| ಜಲಂ-ವಾಲಕಮ್| ವಾಪ್ಯಂ-ಕುಷ್ಠಮ್| ಜಘನಚಪಲಾಽಽರ್ಯಾ|

Adhikarana sarvakuShTheShu dAhayukteShu tiktaghRutAdiBiraBya~ggaH sarvakuShTheShu kledaprapAtAdiShu shItalepAdayaH (89-90) · Śloka 90

ತಿಕ್ತಘೃತೈರ್ಧೌತಘೃತೈರಭ್ಯಙ್ಗೋ ದಹ್ಯಮಾನಕುಷ್ಠೇಷು| ತೈಲೈಶ್ಚನ್ದನಮಧುಕಪ್ರಪೌಣ್ಡರೀಕೋತ್ಪಲಯುತೈಶ್ಚ||೮೯|| ಕ್ಲೇದೇ ಪ್ರಪತತಿ ಚಾಙ್ಗೇ ದಾಹೇ ವಿಸ್ಫೋಟಕೇ ಚ ಚರ್ಮದಲೇ| ಶೀತಾಃ ಪ್ರದೇಹಸೇಕಾ ವ್ಯಧನವಿರೇಕೌಘೃತಂ ತಿಕ್ತಮ್||೯೦||

ಸ೦-ತಿಕ್ತದ್ರವ್ಯಸಾಧಿತೈರ್ಘೃತೈಸ್ತಥಾ ಜಲೇನ ಧೌತೈರ್ಘೃತೈರಭ್ಯಙ್ಗೋ ದಾಹಯುಕ್ತೇಷು ಕುಷ್ಠೇಷು ಹಿತಃ| ಕ್ಲೇದೇ ಚ ಪ್ರಕರ್ಷೇಣ ಪತತಿ ಸತಿ ತೈಲೈಶ್ಚನ್ದನಾದಿಯುಕ್ತೈರಭ್ಯಙ್ಗಃ, ಚಶಬ್ದಾದ್ಧೃತೈಶ್ಚ, ಪ್ರಕೃತತ್ವಾದ್ಧಿತಃ| ಅಙ್ಗೇ ದಾಹಾದಿಮತಿ ಶೀತಪ್ರದೇಹಾದ್ಯಾಸ್ತಿಕ್ತಕಂ ಚ ಘೃತಂ ಹಿತಮ್| ವ್ಯಧನಂ-ಸಿರಾವ್ಯಧಃ|

Adhikarana sarvakuShTheShu kRumikuShTheShukhadirAdayaH (91) · Śloka 91

ಖದಿರವೃಷನಿಮ್ಬಕುಟಜಾಃಶ್ರೇಷ್ಠಾಕೃಮಿಜಿತ್ಪಟೋಲಮಧುಪರ್ಣ್ಯಃ ಅನ್ತರ್ಬಹಿಃ ಪ್ರಯುಕ್ತಾಃ ಕೃಮಿಕುಷ್ಠನುದಃ ಸಗೋಮೂತ್ರಾಃ||೯೧||

ಸ೦-ಖದಿರಾದಯೋ ಗೋಮೂತ್ರಾನ್ವಿತಾ ಅಭ್ಯನ್ತರಂ ಬಾಹ್ಯತಶ್ಚ ಪ್ರಯುಕ್ತಾಃ ಕೃಮಿಯುತಕುಷ್ಠಹೃತಃ|

Adhikarana sarvakuShTheShu vAtottareShu pUrvaM ghRutaM sarvakuShTheShu kaPottareShu pUrvaM vamanaM sarvakuShTheShu pittottareShu pUrvaM raktamokSho virekaSca (92) · Śloka 92

ವಾತೋತ್ತರೇಷು ಸರ್ಪಿರ್ವಮನಂ ಶ್ಲೇಷ್ಮೋತ್ತರೇಷು ಕುಷ್ಠೇಷು| ಪಿತ್ತೋತ್ತರೇಷು ಮೋಕ್ಷೋ ರಕ್ತಸ್ಯ ವಿರೇಚನಂ ಚಾಗ್ರೇ||೯೨||

ಸ೦-ವಾತಾಧಿಕೇಷು ಕುಷ್ಠೇಷು ಘೃತಮಗ್ರೇ-ಪೂರ್ವಂ, ಹಿತಮ್| ಶ್ಲೇಷ್ಮಾಧಿಕೇಷು ಚ ವಮನಮ್| ಪಿತ್ತೋತ್ತರೇಷು ರಕ್ತಮೋಕ್ಷೋ ವಿರೇಚನಂ ಚಾಗ್ರೇ ಹಿತಮ್|

Adhikarana sarvakuShTheShu nihRutAstradoShAdiShu lepAH siddhidAH (93) · Śloka 93

ಯೇ ಲೇಪಾಃ ಕುಷ್ಠಾನಾಂ ಯುಜ್ಯನ್ತೇ ನಿರ್ಹೃತಾಸ್ರದೋಷಾಣಾಮ್| ಸಂಶೋಧಿತಾಶಯಾನಾಂ ಸದ್ಯಃ ಸಿದ್ಧಿರ್ಭವತಿ ತೇಷಾಮ್||೯೩||

ಸ೦-ನಿರ್ಹೃತಾಸ್ರದೋಷಾಣಾಂ ತಥಾ ಸಂಶೋಧಿತಶಯಾನಾಂ ಕುಷ್ಠಾನಾಂ ಯೇ ಲೇಪಾ ಯುಜ್ಯನ್ತೇ, ತೇಷಾಂ ಸದ್ಯಃ-ಶೀಘ್ರಮೇವ, ಸಿದ್ಧಿಃ-ಆಮಯನಿವೃತ್ತಿಃ, ಭವತಿ| ಅತ ಏವೇದಮಾಹ-

Adhikarana sarvakuShTheShu bahudoSheShu saMshodhanam (94) · Śloka 94

ದೋಷೇ ಹೃತೇಽಪನೀತೇ ರಕ್ತೇ ಬಾಹ್ಯಾನ್ತರೇ ಕೃತೇ ಶಮನೇ| ಸ್ನೇಹೇ ಚ ಕಾಲಯುಕ್ತೇ ನ ಕುಷ್ಠಮತಿವರ್ತತೇ ಸಾಧ್ಯಮ್||೯೪||

ಸ೦-ದೋಷೇ-ವಾತಾದೌ, ಹೃತೇ ರಕ್ತೇಽಪನೀತೇ ಬಾಹ್ಯೇಽಭ್ಯನ್ತರೇ ಶಮನೇ ಕೃತೇ ಸ್ನೇಹೇ ಕೃತೇ ಚ ಕಾಲೇ ಯುಕ್ತೇ ಕುಷ್ಠಂ ಸಾಧ್ಯಂ ನಾತಿವರ್ತತೇ| ಅಪಿ ತೂಪಶಾಮ್ಯತಿ| ಆರ್ಯಾಃ ಷಟ್, ಅನ್ಯತ್ರ ಜಘನಚಪಲಾಃ (?)|

Adhikarana sarvakuShTheShu doShAtiharaNe mRutyuH (95) · Śloka 95

ಬಹುದೋಷಃ ಸಂಶೋಧ್ಯಃ ಕುಷ್ಠೀ ಬಹುಶೋಽನುರಕ್ಷತಾ ಪ್ರಾಣಾನ್| ದೋಷೇ ಹ್ಯತಿಮಾತ್ರಹೃತೇ ವಾಯುರ್ಹನ್ಯಾದಬಲಮಾಶು||೯೫||

ಸ೦-ಬಹುದೋಷಃ ಕುಷ್ಠೀ ಪ್ರಾಣಾನ್ ರಕ್ಷತಾ ಭಿಷಜಾ ಪುನಃಪುನಃ ಸಂಶೋಧ್ಯಃ| ಏಕವೇಲಯೈವ ಕಸ್ಮಾನ್ನ ಶೋಧ್ಯತೇ ? ಇತ್ಯಾಹ-ಯಸ್ಮಾದ್ದೋಷೇಽತಿಮಾತ್ರಹೃತೇ ಸತ್ಯಬಲಂ ನರಂ ವಾತೋ ದ್ರಾಗೇವ ಹನ್ಯಾತ್| ಆರ್ಯಾ|

Adhikarana sarvakuShTheShu vamanAdInAM kAlaniyamaH (96) · Śloka 96

ಪಕ್ಷಾತ್ಪಕ್ಷಾಚ್ಛರ್ದನಾನ್ಯಭ್ಯುಪೇಯಾ- ನ್ಮಾಸಾನ್ಮಾಸಾಚ್ಛೋಧನಾನ್ಯಪ್ಯಧಸ್ತಾತ್| ಶುದ್ಧಿರ್ಮೂರ್ಘ್ನಿ ಸ್ಯಾತ್ತ್ರಿರಾತ್ರಾತ್ತ್ರಿರಾತ್ರಾತ್ ಷಷ್ಠೇ ಷಷ್ಠೇ ಮಾಸ್ಯಸೃಡ್ಮೋಕ್ಷಣಂ ಚ||೯೬||

ಸ೦-ಅಸೌ ಕುಷ್ಠೀ ಪಕ್ಷೇಣ ವಮನಾನಿ ಸೇವೇತ| ಮಾಸಾನ್ಮಾಸಾದಧಃಶೋಧನಾನಿ ಭಜೇತ್| ಶಿರಸಿ ತ್ರಿರಾತ್ರೇ ತ್ರಿರಾತ್ರೇ ಶುದ್ಧಿಃ ಸ್ಯಾತ್| ಷಷ್ಠೇ ಷಷ್ಠೇ ರಕ್ತಮೋಕ್ಷಶ್ಚ ಸ್ಯಾತ್|

Adhikarana sarvakuShTheShu kRutyadoShanirharaNam (97) · Śloka 97

ಯೋ ದುರ್ವಾನ್ತೋ ದುರ್ವಿರಿಕ್ತೋಽಥವಾ ಸ್ಯಾತ್ ಕುಷ್ಠೀ ದೋಷೈರುದ್ಧತೈರ್ವ್ಯಾಪ್ಯತೇಽಸೌ| ನಿಃಸನ್ದೇಹಂ ಯಾತ್ಯಸಾಧ್ಯತ್ವಮೇವಂ ತಸ್ಮಾತ್ ಕೃತ್ಸ್ನಾನ್ನಿರ್ಹರೇದಸ್ಯ ದೋಷಾನ್||೯೭||

ಸ೦-ಯಃ ಕುಷ್ಠೀ ಕೃತಾಸಮ್ಯಗ್ವಮನವಿರೇಚನಃ ಸ್ಯಾತ್, ಅಸಾವುದ್ಧತೈರ್ದೋಷೈರ್ವ್ಯಾಪ್ಯತೇ| ಏವಂ ನಿಶ್ಚಯೇನಾಸಾಧ್ಯತ್ವಂ ಯಾತಿ| ತಸ್ಮಾದ್ಧೇತೋರಸ್ಯ-ಕುಷ್ಠಿನಃ, ಕೃತ್ಸ್ನಾನ್-ನಿಖಿಲಾನ್, ದೋಷಾನ್ನಿರ್ಹರೇತ್| ಶಾಲಿನೀವೃತ್ತಮ್(ತ್ತೇ)|

Adhikarana sarvakuShTheShu vratasevanAdi (19) · Śloka 19

ವ್ರತದಮಯಮಸೇವಾ ತ್ಯಾಗಶೀಲಾಭಿಯೋಗೋ ದ್ವಿಜಸುರಗುರುಪೂಜಾ ಸರ್ವಸತ್ತ್ವೇಷು ಮೈತ್ರೀ| ಶಿವಶಿವಸುತತಾರಾಭಾಸ್ಕರಾರಾಧನಾನಿ ಪ್ರಕಟಿತಮಲಪಾಪಂ ಕುಷ್ಠಮುನ್ಮೂಲಯನ್ತಿ||೯೮|| ಇತಿ ಶ್ರೀವೈದ್ಯಪತಿಸಿಂಹಗುಪ್ತಸೂನುಶ್ರೀಮದ್ವಾಗ್ಭಟವಿರಚಿತಾಯಾಮಷ್ಟಾಙ್ಗಹೃದಯಸಂಹಿತಾಯಾಂ ಚತುರ್ಥೇ ಚಿಕಿತ್ಸಿತಸ್ಥಾನೇ ಕುಷ್ಠಚಿಕಿತ್ಸಿತಂ ನಾಮೈಕೋನವಿಂಶೋಽಧ್ಯಾಯಃ||೧೯||

ಸ೦-ವ್ರತಾದಿಸೇವಾ ತ್ಯಾಗಾದ್ಯಭ್ಯಾಸೋ ದ್ವಿಜಾದಿಪೂಜಾ ಸರ್ವಸತ್ತ್ವಮೈತ್ರೀ ಶಿವಾದ್ಯಾರಾಧನಾನಿ ಕುಷ್ಠಂ ಪ್ರಕಟಿತಮಲಪಾಪಂ ನಾಶಯನ್ತಿ| ಮಾಲಿನೀವೃತ್ತಮ್| ಇತಿ ಶ್ರೀಮೃಗಾಙ್ಕದತ್ತಪುತ್ರಶ್ರೀಮದರುಣದತ್ತವಿರಚಿತಾಯಾಮಷ್ಟಾಙ್ಗಹೃದಯಟೀಕಾಯಾಂ ಸರ್ವಾಙ್ಗಸುನ್ದರಾಖ್ಯಾಯಾಂ ಚತುರ್ಥೇ ಚಿಕಿತ್ಸಿತಸ್ಥಾನೇ ಕುಷ್ಠಚಿಕಿತ್ಸಿತಂ ನಾಮೈಕೋನವಿಂಶೋಽಧ್ಯಾಯಃ ಸಮಾಪ್ತಃ|| ೧೯||