7. madātyayādicikitsitādhyāyaḥ

Adhikarana adhyAyopakramaH · Śloka

ছর্দ্যাদিচিকিত্সিতাদনন্তরং মদাত্যযচিকিত্সিতারম্ভঃ| চিকিত্সাসামান্যহেতুর্যতস্তৃষ্ণাযা যথা বাতপিত্তে কারণং তথা মদাত্যযস্যাপি|

Adhikarana madAtyayAdicikitsitAdhyAyaH madAtyaye cikitsAprakAraH (2-1) · Śloka 1

আথাতো মদাত্যযাদিচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| ) যং দোষমধিকং পশ্যেত্তস্যাদৌ প্রতিকারযেত্| কফস্থানানুপূর্ব্যা চ তুল্যদোষে মদাত্যযে||১||

সং-যং দোষং-তত্র মদাত্যযে বাতাদিকং, উল্বণং পশ্যেত্-লক্ষযেজ্জানীযাত্| তস্য-দোষস্য, আদৌ-প্রথমত এব, প্রতিকারযেত্-প্রতিকারং কুর্যাত্| এবং বিষমদোষো মদাত্যযশ্চিকিত্স্যঃ| তুল্যদোষে পুনর্মদাত্যযে কফস্থানানুপূর্ব্যা দোষান্ প্রতিকারযেত্| কিমেত্যেবং ক্রিযতে ? ইত্যাহ-

Adhikarana tatra hetuH (2) · Śloka 2

পিত্তমারুতপর্যন্তঃ প্রাযেণ হি মদাত্যযঃ| |২|

সং-হি-যস্মাত্, কালক্রমেণ পিত্তমারুতাবসানো বাহুল্যেন মদাত্যযঃ স্যাত্| প্রথমং কফস্যাধিক্যম্| ততঃ পিত্তমারুতা বধিকৌ ভবতঃ| কফস্থানানুপূর্বীব্যাখ্যানং জ্বরচিকিত্সিতে (শ্লো.১৪৮) ব্যাখ্যাতম্|

Adhikarana madyotpannavyAdhermadyamevauShadham (2-3) · Śloka 3

| হীনমিথ্যাতিপীতেন যো ব্যাধিরুপজাযতে||২|| সমপীতেন তেনৈব স মদ্যেনোপশাম্যতি| |৩|

স০-হীনমিথ্যাতিপীতেন মদ্যেন যো ব্যাধিরুত্পদ্যতে, সঃ-ব্যাধিঃ, তেনৈব মদ্যেন সমপীতেন-সম্যঙ্মাত্রযা পীতেন, শাম্যতি| "যাবদ্ দৃষ্টের্ন সম্ভ্রান্তির্যাবন্ন ক্ষোভতে মনঃ| তাবদেব বিরন্তব্যং মদ্যাদাত্মবতা সদা||" (শ্লো.১৪) ইত্যেবং লক্ষণং পানং সমমেব পীতম্| যেনৈব মার্দ্বীকেনাথবা মাধবেন গাডাদিনা বা যো জাতো ব্যাধিঃ স তেনৈব মার্দ্বীকাদিনা শাম্যতি| কুত এবং স্যাত্ ? ইত্যাহ-

Adhikarana madyasya viShasAdRuSyam (3) · Śloka 3

| মদ্যস্য বিষসাদৃশ্যাত্|৩|

স০-যথা তীক্ষ্ণাদিভির্দশভির্গুণৈর্বিষং যুক্তং তথৈব তত্সঙ্খ্যা তৈরেব গুণৈর্মদ্যমপি যুক্তম্| ততশ্চ মদ্যেনৈব শান্তির্যুক্তা| ননু, যদি বিষসাদৃশ্যং মদ্যস্য, ততো যথা বিষস্য বিষান্তরেণ শান্তিস্তথা মদ্যস্যাপি মদ্যান্তরেণ শান্তিঃ প্রাপ্তেত্যাশঙ্খ্যাহ-

Adhikarana ataH viShajavyAdherapi viShAntaramauShadham (3-4) · Śloka 4

| বিষং তূত্কর্ষবৃত্তিভিঃ||৩|| তীক্ষ্ণাদিভির্গুণৈর্যোগাদ্বিষান্তরমপেক্ষতে| |৪|

স০-সত্যমেতত্| এবং প্রাপ্তম্| কিন্তু গুণৈর্দশভিরুত্কর্ষবৃত্তিভিঃ-অধিকশক্তিস্বরূপৈঃ, তীক্ষ্ণাদিভির্যোগাত্-সম্বন্ধাত্, বিষং বিষান্তরমপেক্ষতে| ন তু তদ্ধীনাত্তদেব স্বোত্থে রোগে প্রশমাযালম্| মদ্যং তু হীনবৃত্তিভির্দশভির্গুণৈর্যোগান্ন মদ্যান্তরমপেক্ষতে| এবং তীক্ষ্ণাদীনাং গুণানাং হীনোত্কর্ষভেদাদ্বিষান্মদ্যস্য বৈলক্ষণ্যম্|

Adhikarana madyotpannavyAdhermadyauShadhatve upapattiH (4-7) · Śloka 7

| তীক্ষ্ণোষ্ণেনাতিমাত্রেণ পীতেনাম্লবিদাহিনা||৪|| মদ্যেনান্নরসক্লেদো বিদগ্ধঃ ক্ষারতাং গতঃ| যান্ কুর্যান্মদতৃণ্মোহজ্বরান্তর্দাহবিভ্রমান্||৫|| মদ্যোত্ক্লিষ্টেন দোষেণ রুদ্ধঃ স্রোতঃসু মারুতঃ| সুতীব্রা বেদনা যাশ্চ শিরস্যস্থিষু সন্ধিষু||৬|| জীর্ণামমদ্যদোষস্য প্রকাঙ্ক্ষালাঘবে সতি| যৌগিকং বিধিবদ্যুক্তং মদ্যমেব নিহন্তি তান্||৭||

সং-স্বভাবত এব তীক্ষ্ণোষ্ণেন তথাঽতিমাত্রেণ তথাঽম্লবিদাহিনা মদ্যেন পীতেনান্নরসক্লেদো বিদগ্ধঃ ক্ষারতাং চ গতো যন্ মদাদীন্ কুর্যাত্| তথা মারুতো মদ্যোত্ক্লিষ্টেন দোষেণ স্রোতঃসুরুদ্ধো যা দারুণা মূর্ধাদিষু বেদনাঃ কুর্যাত্ তান্-মদাদীন্, তাশ্চ বেদনাঃ মদ্যমেব যৌগিকং বিধিনা যুক্তং নিহন্তি| কিম্ভূতস্য পুরুষস্য ? জীর্ণামমদ্যদোষস্য, তথা প্রকাঙ্ক্ষাযাং লাঘবেসতি, তে চ তাশ্চ তান্, "পুমান্ স্ত্রিযা" ইত্যেকশেষঃ| ননু, যদি মদ্যমেব তান্নিহন্তি ততশ্চিকিত্সান্তরারম্ভো ন যুক্তঃ| মৈবম্| বহ্বযো হি চিকিত্সাঃ প্রতিরোগং প্রোক্তাঃ| তস্মাচ্চিকিত্সান্তরোপন্যাসো যুক্ত এব| ননু, কথং তান্ মদ্যমেব নিহন্তি ? ইত্যাহ-

Adhikarana atra hetuH (8) · Śloka 8

ক্ষারো হি যাতি মাধুর্যং শীঘ্রমম্লোপসংহিতঃ| মদ্যমম্লেষু চ শ্রেষ্ঠং দোষবিষ্যন্দনাদলম্||৮||

স০-যস্মাত্ ক্ষারোঽম্লোপসংহিতো দ্রাগেব মাধুর্যং যাতি| অম্লেষু মধ্যে মদ্যং দোষবিষ্যন্দনাত্ [অলং-] পর্যাপ্তম্|

Adhikarana guNayuktaM madyaM dhAtusAmyakaram (9) · Śloka 9

তীক্ষ্ণোষ্ণাদ্যৈঃ পুরা প্রোক্তৈর্দীপনাদ্যৈস্তথা গুণৈঃ| সাত্ম্যত্বাচ্চ তদেবাস্য ধাতুসাম্যকরং পরম্||৯||

স০-পুরা-মদাত্যযনিদানোক্তৈস্তীক্ষ্ণোষ্ণাদ্যৈর্গুণৈঃ (নি. অ. ৬/১) তথা মদ্যবর্গোক্তৈর্দীপনাদ্যৈর্গুণৈঃ (সূ. অ. ৫/৬২) করণভূতৈঃ, তদেব-মদ্যং, সুষ্ঠু ধাতুসাম্যকরম্| ধাতুসাম্যকরমিতি হেতৌ টঃ|

Adhikarana pAnAtyayauShadhakAlaH (10) · Śloka 10

সপ্তাহমষ্টরাত্রং বা কুর্যাত্পানাত্যযৌষধম্| জীর্যত্যেতাবতা পানং কালেন বিপথাশ্রিতম্||১০||

স০-সপ্তাহমথবাঽষ্টরাত্রং পানাত্যযৌষধং কুর্যাত্-নাধিকং কালম্| যত এতাবতা কালেন বিমর্গস্থং তত্ পানং-মদ্যপানং, পরিণমতি|

Adhikarana tataH paraM yathAyathaM rogauShadham (11) · Śloka 11

পরং ততোঽনুবধ্নাতি যো রোগস্তস্য ভেষজম্| যথাযথং প্রযুঞ্জীত কৃতপানাত্যযৌষধঃ||১১||

স০-ততঃ-তস্মাত্কালাত্, পরং-ঊর্ধ্বং, যো রোগোঽনুবধ্নাতি, তস্য-রোগস্য, কৃতপানাত্যযৌষধশ্চ যথাস্বং ভেষজং প্রযুঞ্জীত| ইতি সামান্যেন চিকিত্সিতমুক্ত্বা বিশেষেণাহ-

Adhikarana vAtAdike madAtaye piShTakRutaM madyam vAtAdike madAtaye mAMsarasAH vAtAdike madAtaye rAgaShADavAH vAtAdike madAtaye godhUmamAShAnnam vAtAdike madAtaye acCavArUNI vAtAdike madAtaye svarasakkAthAH vAtAdike madAtaye mastvAdi vAtAdike madAtaye aBya~ggAdi vAtAdike madAtaye prAvaraNam vAtAdike madAtaye dhUmo~anulepanaM ca vAtAdike madAtaye stryaH (12-19) · Śloka 19

তত্র বাতোল্বণে মদ্যং দধাতিপিষ্টকৃতং যুতম্| বীজপূরকব্রুক্ষাম্লকোলদাডিমদীপ্যকৈঃ||১২|| যবানীহপুষাজাজীব্যোষত্রিলবণার্দ্রকৈঃ| শুল্যির্মাংসৈর্হরিতকৈঃ স্নেহবদ্ভিশ্চ সকুভিঃ||১৩|| উষ্ণস্নিগ্ধাম্ললবণা মেদ্যমাংসরসা হিতাঃ| আম্রাম্রাতকপেশীভিঃ সংস্কৃতা রাগষাডবাঃ||১৪|| গোধূমমাষবিকৃতির্মৃদুশ্চিত্রা মুখপ্রিযা| আর্দ্রিকার্দ্রককুল্মাষসুক্তমাংসাদিগর্ভিণী||১৫|| সুরভির্লবণা শীতা নির্গদা বাঽচ্ছবারুণী| সরসো দাডিমাত্ ক্বাথঃ পঞ্চমূলাত্কনীযসঃ||১৬|| শুণ্ঠীধান্যাত্তথা মুস্তুসুক্তাম্ভোচ্ছাম্লকাঞ্জিকম্ অভ্যঙ্গোদ্বর্তনস্নানমুষ্ণং প্রাবরণং ঘনম্||১৭|| ঘনশ্চাগুরুজো ধূপঃ পঙ্কশ্চাগুরুকুঙ্কুমঃ| কুচোরুশ্রোণিশালিন্যো যৌবনোষ্ণাঙ্গযষ্টযঃ||১৮|| হর্ষেণালিঙ্গনে যুক্তাঃ প্রিযাঃ সংবাহনেষু চ| |১৯|

স০-[তত্র-] তেষু মদাত্যযেষু মধ্যে, বাতাধিকে মদাত্যযে পিষ্টকৃতং মদ্যং দদ্যাত্| বীজপূরকাদিভির্দেশসাত্ম্যাদিবশাদ্যস্তৈঃ সমস্তৈর্যথাযোগযুক্তম্| তথা, মেদ্যস্য-মেদুরস্য, মাংসস্যরসা হিতাঃ| কিম্ভূতাঃ ? উষ্ণাঃ স্নিগ্ধামললবণাশ্চ| তথা, রাগাঃ ষাডবাশ্চাম্রাম্রাতকপেশীভিঃ সংস্কৃতা হিতাঃ| লক্ষণমেষামৃতুচর্যামুক্তম্ (হৃ.সূ.অ.৩/৩০)| তথা, গোধূমমাষযোর্বিকৃতির্হিতা| কিম্ভূতা ? মৃদুঃ-অতীক্ষ্ণা, চিত্রা-নানাপ্রকারা, মুখপ্রিযা-বদনরুচিকৃত্| তথা, আর্দ্রিকাদিগর্ভিণী| [তথা,] অচ্ছবারুণী চ হিতা| কিম্ভূতা ? সুরভির্লবণা শীতা চ| তথা নির্গদা-পুরাণা| তথা, দাডিমাত্স্বরসো হিতঃ| পঞ্চমূলাত্ কনীযসো-হৃস্বাত্, ক্বাথঃ| শুণ্ঠীধান্যাচ্চ ক্বাথো হিতঃ| তথা, মস্ত্বাদি হিতম্| তথা, অভ্যঞ্জনাদি উষ্ণং হিতম্| প্রাবরণং-আচ্ছদনং, ঘনং হিতম্, অগরুজশ্চ ধূপো ঘনো-বহুলো, হিতঃ| অগরুকুঙ্কুমপঙ্কানুলেপনং হিতম্| তথা, প্রিযা হর্ষেণ-প্রীত্যা, আলিঙ্গনং-পরিষ্বঙ্গঃ, তত্র যুক্তাঃ, সংবাহনেষু-শরীরমর্দনেষু চ, যুক্তা হিতাঃ| কুচাশ্চোরবশ্চ শ্রোণযশ্চ তেন শালন্তে যাস্তা এবম্| তথা, যৌবনে নোষ্ণাঽঙ্গযষ্টিঃ-শরীরলতা, যাসাং তা এবম্|

Adhikarana pittAdhike shArkarAdimadyam pittAdhike pAnakam (19-21) · Śloka 21

| পিত্তোল্বণে বহুজলং শার্করং মধু বা যুতম্||১৯|| রসৈর্দাডিমখর্জূরভব্যদ্রাক্ষাপরূষজৈঃ| সুশীতং সসিতাসক্তু যোজ্যং তাদৃক্ চ পানকম্||২০|| স্বাদুবর্গকষাযৈর্বা যুক্তং মদ্যং সমাক্ষিকম্| |২১|

সং-পিত্তাধিকে মদাত্যযে বহুজলং শার্করং-মদ্যবিশেষং যোজ্যম্| মধু-মক্ষিকং বা, রসৈর্দাডিমাদিজৈর্যুক্তম্| তচ্চ সুষ্ঠু শীতং কৃত্বা যোজ্যম্| পরুষকাণ্যত্র মধুরাণি যোজ্যানি নাম্লানি, তেষাং কফপিত্তকরত্বাত্| তথা চ মুনিঃ (চ. সূ. অ. ২৭/১৩২) "অম্লং পরুষকং দ্রাক্ষা বদরাণ্যারুকাণি চ| পিত্তশ্লেষ্মপ্রকোপীণি" ইতি| তাদৃক্ চ-সুশীতং, পনকং যোজ্যম্| কিম্ভূতম্ ? সহ সিতাসক্তুভির্বততে যত্তদেবম্| সক্তবশ্চ লাজানাং যোজ্যাঃ, যোগ্যতরত্বাত্, ন তু যবানাম্| তথা, স্বাদুবর্গস্য ক্বাথেন সংযুক্তং মদ্যং সমাক্ষিকং যোজ্যম্|

Adhikarana pittAdhike shAlyAdyannam (21-22) · Śloka 22

| শালিষষ্টিকমশ্নীযাচ্ছশাজৈণকপিঞ্জলৈঃ||২১|| সতীনমুদ্গামলকপটোলীদাডিমৈ রসৈঃ| |২২|

স০-শালিষষ্টিক ভুঞ্জীত| কৈঃ সহ ? শশাদিজৈ রসৈর্দে শাদিসাত্ম্যবশাত্ সতীনাদিজৈশ্চ রসৈঃ|

Adhikarana pittAdhike samutlkiShTakaPapitte vamanam,pittAdhike tataH saMsargIkramaH (22-24) · Śloka 24

| কফপিত্তং সমুক্ত্লিষ্টমুল্লিখেত্তৃড্বিদাহবান্||২২|| পীত্বাঽম্বু শীতং মদ্যং বা ভূরীক্ষুরসসংযুতম্| দ্রাক্ষারসং বা সংসর্গী তর্পণাদিঃ পরং হিতঃ||২৩|| তথাঽগ্নির্দীপ্যতে তস্য দোষশেষান্নপাচনঃ| |২৪|

স০-তৃড্বিদাহবান্ মদাত্যযী কফপিত্তং সমুত্ক্লিষ্টং-সমুত্থিতং স্বস্থানাচ্চ্যুতাভাসং, সম্যগ্বমেত্| কিং কৃত্বা ? অম্বু শীতং পীত্বা, মদ্যং বা ভূরিণেক্ষুরসেন সংযুতং পীত্বা, অথবা দ্রাক্ষারসং পীত্বা| পরং-অনন্তরং, সংসর্গী তর্পণাদিঃ সুষ্ঠু হিতঃ| কৃতবমনাদিকস্যানন্তরং পেযাদিক্রমঃ সংসর্গীত্যুচ্যতে| এবং কৃতে সতি তস্য-মদাত্যযিনঃ, অগ্নির্দীপ্যতে| কিম্ভূতঃ ? দোষশেষস্যান্নস্য-আহারস্য চ, পাচনঃ|

Adhikarana pittAdhike saraktaniShThIvakAsAdau auShadham (24-26) · Śloka 26

| কাসে সরক্তনিষ্ঠীবে পার্শ্বস্তনরুজাসু চ||২৪|| তৃষ্ণাযাং সবিদাহাযাং সোত্ক্লেশে হৃদযোরসি| গুডূচীভদ্রমুস্তানাং পটোলস্যাথব রসম্||২৫|| সশৃঙ্গবেরং যুঞ্জীত তিত্তিরিপ্রতিভোজনম্| |২৬|

সং-পিত্তমদাত্যযে কাসে রক্তনিষ্ঠীবসহিতে পার্শ্বাদিরুজাসু চ তৃষ্ণাযাং বিদাহসিতাযাং হৃদয উরসি চ সোত্ক্লেশে সতি গুডূচ্যাদীনাং রসমথবা পটোলস্য রসং সনাগরং যুঞ্জীত| অল্পস্তিত্তিরিস্তিত্তিরিপ্রতি| "সুপ্প্রতিনা মাত্রার্থে" ইত্যব্যযীভাবঃ|

Adhikarana pittAdhike atitRuShNAdau pAnamannaM ca (26-27) · Śloka 27

| তৃষ্যতে চাতি বলবদ্বাতপিত্তে সমুদ্ধতে||২৬|| দদ্যাদ্ দ্রাক্ষারসং পানং শীতং দোষানুলোমনম্| জীর্ণেঽদ্যান্মধুরাম্লেন ছাগমাংসরসেন চ||২৭||

স০-অতিতৃষ্যতে চ পুরুষায বাতপিত্তেঽধিকে সতি দ্রাক্ষারসপানং দদ্যাত্| কিম্ভূতম্ ? শীতলং তথা দোষানুলোমনম্| জীর্ণে চ তস্মিন্ ছাগমাংসরসেন মধুরাম্লেনাশ্নীযাত্|

Adhikarana pittAdhike tRuShNAyAM pAnam (28-29) · Śloka 29

তৃষ্যল্পশঃ পিবেন্মদ্যং মদং রক্ষন্ বহূদকম্| মুস্তদাডিমলাজাম্বু জলং বা পর্ণিনীশৃতম্||২৮|| পাটল্যুত্পলকন্দৈর্বা স্বভাবাদেব বা হিমম্| |২৯|

স০-তৃষি সত্যামল্পং-মন্দং, মদং রক্ষন্ বহূদকং মদ্যং পিবেত্| মুস্তাদিজলং বা পিবেত্| পর্ণিনীভিঃ ক্বথিতং বা পটো (পাট)ল্যাদিশৃতাং বা সর্বমেতচ্ছীতং পাত্ব্যম্| যত্তোযং স্বভাবাদেব বা হিমমিতি|

Adhikarana pittAdhike abdhAtukShINAdau pAnam (29-30) · Śloka 30

| মদ্যাতিপানাদব্ধাতৌ ক্ষীণে তেজসি চোদ্ধতে||২৯|| যঃ শুষ্কগলতালোব্ষ্ঠো জিহ্বাং নিষ্কৃষ্য চেষ্টতে| পাযযেত্কামতোঽম্ভস্তং নিশীথপবনাহতম্||৩০||

স০-মদ্যাতিপানাদ্ধেতোরব্ধাতৌ ক্ষীণে-অল্পীভূতে, তেজসি চোদ্ধতে-ক্ষোভিতে সতি, যঃ পুরুষঃ শুষ্কগলতাল্বোষ্ঠঃ সন্ জিহ্বাং নিষ্কৃষ্য-নিঃসার্য, চেষ্টতে-ইতশ্চেতশ্চ লুঠ্তি, তং-নরং, কামতঃ-ইচ্ছযা, অম্ভো নিশীথে যঃ পবনস্তেনাহতং পাযযেত্|

Adhikarana pittAdhike tRu~aNAnAshako mukhAlepaH (31) · Śloka 31

কোলদাডিমবৃক্ষাম্লচুক্রীকাচুক্রিকারসঃ| পঞ্চাম্লকো মুখালেপঃ সদ্যস্তৃষ্ণং নিযচ্ছতি||৩১||

সং-কোলাদিভিঃ পঞ্চাম্লকো মুখালেপো দ্রাক্ তৃষ্ণাং শমযতি|

Adhikarana pittAdhike dAhe~atishishiro vidhiH pittAdhike dAhe~arohiNIshirAvedhaH (32-33) · Śloka 33

ত্বচং প্রাপ্তশ্চ পানোষ্মা পিত্তরক্তাভিমূর্চ্ছিতঃ| দাহং প্রকুরুতে ঘোরং তত্রাতিশিশিরো বিধিঃ||৩২|| অশাম্যতি রসৈস্তৃপ্তে রোহিণীং ব্যধযেচ্ছিরাম্| |৩৩|

স০-পানস্য মদ্যস্যোষ্মা ত্বচং প্রাপ্তঃ পিত্তরক্তাভ্যামভিমূর্চ্ছিতো-মিশ্রিতো, দাহং দারুণং প্রকর্ষেণ কুরুতে| তত্র-দাহে, [অতি] শীতো বিধিঃ কার্যঃ| শীতোপচারেণাপ্যশাম্যতি সতি দাহে মাংসরসৈস্তৃপ্তে নরে রোহিণীসংজ্ঞাং শিরাং ব্যধযেত্, বৈদ্য ইতি শেষঃ| ব্যধযেদিতি 'ঘটাদিত্বান্মত্বে' হ্ড়স্বঃ|

Adhikarana kaPAdhike vamanopavAsau,kaPAdike shuNThyAdishItakashAyaH (33-34) · Śloka 34

| উল্লেখনোপবাসাভ্যাং জযেচ্ছ্লেষ্মোল্বণং পিবেত্||৩৩|| শীতং শুণ্ঠীস্থিরোদীচ্যদুঃস্পর্শান্যতমোদকম্| |৩৪|

স০-শ্লেষ্মাধিকং মদাত্যযং বমনোপবাসাভ্যাং জযেত্| শুণ্ঠ্যাদ্যন্যতমোদকং শীতকষাযং পিবেত্|

Adhikarana kaPAdhike nirAmakShudhite shArkarAdimadyam (34-35) · Śloka 35

| নিরামং ক্ষুধিতং কালে পাযযেদ্বহুমাক্ষিকম্||৩৪|| শার্করং মধু বা জীর্ণমরিষ্টং সীধুমেব বা| রূক্ষতর্পণসংযুক্তং যবানীনাগরান্বিতম্||৩৫||

স০-ততো নিরামং জাতক্ষুধং সন্তং, কালে-যতোচিতে, শার্করং বহুমাক্ষিকং-বহুক্ষৌদ্রং, পাযযেত্| মধু-মার্দ্বীকং, বা বহুক্ষৌদ্রম্| দ্বযমপ্যেতত্ পুরাণম্| তথা, অরিষ্টং-অভযাদিকৃতং, পাযযেত্| সীধুং বা পাযযেত্| কিম্ভূতম্ ? রূক্ষাযে তর্পণাস্তৈঃ সংযুক্তং [তথা] যবানীশুণ্ঠীভ্যাং সংযুক্তম্|

Adhikarana kaPAdike yavagodhUmAdyannaM mAMsarasaSca (36-37) · Śloka 37

যূষেণ যবগোধূমং তনুনাঽল্পেন ভোজযেত্| উষ্ণাম্লকটুতিক্তেন কৌলত্থেনাল্পসর্পিষা||৩৬|| শুষ্কমূলকজৈশ্চ্ছাগৈ রসৈর্বা ধন্বচারিণাম্| সাম্লবেতসবৃক্ষাম্লপটোলীব্যোষদাডিমৈঃ||৩৭||

স০-তথা কৌলত্থেন যূষেণ যবগোধূমং ভোজযেত্| কিম্ভূতেন ? তনুনা-স্বচ্ছেন| তথা, অল্পেনোষ্ণাম্লকটুতিক্তেনাল্পঘৃতেন| অথবা, শুষ্কমূলকজৈ রসৈশ্ছারৈবা রসৈর্ধন্বচারিণাং বা রসৈর্ভোজযেত্| কিম্ভূতৈঃ ? সহাম্লবেতসতিত্তিডীকপটোলপত্রত্রিকটুকদাডিমৈঃ|

Adhikarana kaPAdike mAMsaM mAdhavapAnaM ca (38-40) · Śloka 40

প্রভূতশুণ্ঠীমরিচহরিতার্দ্রকপেশিকম্| বীজপূররসাদ্যম্লভৃষ্টনীরসর্বতিতম্||৩৮|| করীরকরমর্দাদি রোচিষ্ণু বহুশালনম্| প্রব্যক্তাষ্টাঙ্গলবণং বিকল্পিতনিমর্দকম্||৩৯|| যথাগ্নি ভক্ষযন্ মাংসং মাধবং নিগদং পিবেত্| |৪০|

স০-মাংসং যথাগ্নি-অগ্ন্যনতিক্রমেণ, ভক্ষ্যন্ মাধবং নিগদংপুরাণং, পিবেত্| কিম্ভূতং মাংসম্ ? বিবিধৈঃ প্রকারৈঃ কল্পিতোনিষ্পাদিতো, নিমর্দকো যেন মাংসেন তদ্বিকল্পিতনিমর্দকম্| তদেব বিবিধপ্রকারত্বং নিমর্দকস্যাহ-প্রভূতাঃ-উত্কটাঃ, শুণ্ঠী মরীচহরিতার্দ্রকপেশযো যস্মিংস্তদেবম্| হরিতার্দ্রকস্য শস্ত্রকৃতা দীর্ঘাকারা অবযবাঃ পেশয উচ্যন্তে| বীজপূররসাদিভিরম্লস্তথা ভৃষ্টো-যথাযথং স্নেহাদিনা, নীরসঃ-শুষ্কপ্রাযো, বর্তিতোব্যঞ্জনপ্রকারো, যত্র তদেবম্| করীরাদি রোচিষ্ণু-রোচনশীলং, বহু-প্রভূতং, শালনং-হরিতকং, যস্মিন্| তথা, প্রকর্ষেণ ব্যক্তং স্পষ্টং, বক্ষ্যমাণমষ্টাঙ্গলবণং যত্র| তদেবং বিবিধং কল্পনং কৃতম্| ক্রিযাবিশেষণান্যেতানি|

Adhikarana kaPAdike aShTA~ggalavaNam (40-41) · Śloka 41

| সিতাসৌবর্চলাজাজীতিত্তিডীকাম্লবেতসম্||৪০|| ত্বগেলামরিচার্ধাংশমষ্টাঙ্গলবণং হিতম্| স্রোতোবিশুদ্ধ্যগ্নিকরং কফপ্রাযে মদাত্যযে||৪১||

স০-সিতাদ্যৈরষ্টাঙ্গলবণমন্বর্থসংজ্ঞং মদাত্যযে হিতম্| স্রোতঃশুদ্ধিকৃদগ্নিদীপনং চ|

Adhikarana kaPAdike rUkShoShNodvartanAdi kaPAdike sakAmastrIBiryuttayAjAgaraNam (42-43) · Śloka 43

রূক্ষোষ্ণোদ্বর্তনোদ্ধর্ষস্নানভোজনলঙ্ঘনৈঃ| সকামাভিঃ সহ স্ত্রীভির্যুক্ত্যা জাগরণেন চ||৪২|| মদাত্যযঃ কফপ্রাযঃ শীঘ্রং সমুপশাম্যতি| |৪৩|

স০-রূক্ষোষ্ণৈরুদ্বর্তনাদিভির্লঙ্ঘনেন তথা যুক্ত্যা-দেশকালাদ্যপেক্ষিণ্যা, সকামাভির্দযিতাভিঃ সহ যজ্জাগরণং তেন চ কফাধিকো মদাত্যযো দ্রাগেব শমং যাতি|

Adhikarana sannipAte dashavidhe cikitsA (43-44) · Śloka 44

| যদিদং কর্ম নির্দিষ্টং পৃথগ্দোষবলং প্রতি||৪৩|| সন্নিপাতে দশবিধে তচ্ছ্হেষেঽপি বিকল্পযেত্| |৪৪|

স০-"তত্র বাতোল্বণে মদ্যং" (শ্লো. ১২) ইত্যাদি| "পিত্তোলবণে বহুজলং" (শ্লো ১৯) ইত্যাদি, তথা "উল্লেখনোপবাসাভ্যাং জযেচ্ছ্লেষ্মোল্বণং" (শ্লো ৩৩) ইত্যাদি চ ত্রিবিধং সন্নিপাতং পৃথগ্দোষবলং প্রতি লক্ষীকৃত্য কর্ম নির্দিষ্টং কর্মদমুক্তম্| ন কেবলমত্র ত্রিবিধে সন্নিপাতে, শেষেঽপি দশবিধে সন্নিপাতে বিকল্পযেত্-বিবিধং কৃত্বা কল্পযেত্,- কুর্যাট্, বৈদ্য ইতি শেষঃ| এতদুক্তং ভবতি,-বাতোল্বণে মদাত্যযজে সন্নিপাতে যত্কর্ম নির্দিষ্টং তথা পিত্তোল্বণে মদাত্যযজে সন্নিপাতে যত্কর্ম নির্দিষ্টং তদেব বাতপিত্তোল্বণে কুর্যাত্| এবং দোষবলমপেক্ষ্য সর্বস্মিন্ মদাত্যযে চিকিত্সিতং কুর্যাট্| স দশবিধঃ সন্নিপাতঃ শিষ্যহিতায পদ্যেন প্রদর্শ্যতে,-"উত্কর্ষেণ ত্বেকো মদ্যেন দ্বৌ তদাঽঽদিমঃ| উত্কর্ষেণ যদা দ্বৌ তু মধ্যেনৈকো দ্বিতীযকঃ|| একো মধ্যেন দোষঃ স্যাদ্ দ্বাবল্পেন তৃতীযকঃ| উত্কর্ষেণৈক এব স্যাদল্পেন দ্বৌ চতুর্থকঃ|| উত্কর্ষেণ যদা দ্বৌ তু অল্পেনৈকশ্চ পঞ্চমঃ| একোঽল্পেন তু মধ্যেন দ্বৌ দোষাবিতি ষষ্ঠকঃ|| উত্কর্ষেণ সমস্তাঃ স্যুরেবং ভবতি সপ্তমঃ| মধ্যেন সর্বেঽপি যদা তদা ভবতি চাষ্টমঃ|| অল্পেন সর্বেঽপি যদা তদা তু নবমঃ স্মৃতঃ| অল্পেনেকো মধ্যেনৈকস্তদা ত্বন্ত্য ইতি স্ফুটাঃ|| সন্নিপাতস্য মুনিনা দশ ভেদাঃ প্রকীর্ততাঃ|" ইতি|

Adhikarana sannipAte tvAgAdi pAnakam (44-46) · Śloka 46

| ত্বঙ্নাগপুষ্পমগধামরিচাজাজিধান্যকৈঃ||৪৪|| পরুষকমধূকৈলাসুরাহ্বৈশ্চ সিতান্বিতৈঃ| সকপিত্থরসং হৃদ্যং পানকং শশিবোবিতম্||৪৫|| মদাত্যযেষু সর্বেষু পেযং রুচ্যগ্নিদীপনম্| |৪৬|

স০-ত্বগাদিভিঃ শর্করান্বিতৈঃ কপিত্থরসযুক্তং কর্পূরকৃতাধিবাসং পানকং সর্বেষু মদাত্যযেষু পাতব্যং রুচ্যগ্নিবৃদ্ধিকরম্|

Adhikarana sannipAte harShaNI kriyA (46-47) · Śloka 47

| নাবিক্ষোভ্য মনো মদ্যং শরীরমবিহন্য বা||৪৬|| কুর্যান্মদাত্যযং তস্মাদিষ্যত হর্ষণী ক্রিযা| |৪৭|

স০-মদ্যং যস্মান্মানসং নাবিক্ষোভ্য-অপি তু মনসঃ প্রক্ষোভণং কৃত্বা, ন চ শরীরস্য বিহননমকৃত্বা, এবমেব যথা কথঞ্চিন্মদাত্যযং কুর্যাত্| যতশ্চৈবং তস্মাদ্ধেতোর্হর্ষোত্পাদিকা ক্রিযা এষ্টব্যা| নাক্ষোভ্যেত্যযং পাঠো ন শ্রেযান্, ল্যবাদেশস্যাত্র দুর্লভত্বাত্|

Adhikarana sannipAte eBirashAnte payaH pAnam (47-49) · Śloka 49

| সংশুদ্ধিশমনাদ্যেষু মদদোষঃ কৃতেষ্বপি||৪৭|| ন চেচ্ছাম্যেত্কফে ক্ষীণে জাতে দৌর্বল্যলাঘবে| তস্য মদ্যবিদগ্ধস্য বাতপিত্তাধিকস্য চ||৪৮|| গ্রীষ্মোপতপ্তস্য তরোর্যথা বর্ষং তথা পযঃ| |৪৯|

স০-সংশুদ্ধিশমনাদ্যেষূপক্রমেষু কৃতেষ্বপি যদি মদদোষোমদ্যোত্থো ব্যাধিঃ, ন শাম্যেত্, তস্য মদ্যেন বিদগ্ধস্যাত এব চ কফে সৌ-যধাতৌ ক্ষীণেঽত এব জাতে দৌর্বল্যলাঘবে-অল্পপ্রমাণত্বে কার্শ্যে চ সতি, তদানীং সামর্থ্যাদ্বাতপিত্তযোরতিরিক্ততা, বাতপিত্তধিকস্য চ ক্ষীণৌজস্ত্বাত্তথা পযঃ পথ্যম্| যথা গ্রীষ্মোপতপ্তস্য তরোর্বর্ষম্| বর্ষমিতি কৃদ্বিধৌ "ভযাদীনামুপসঙ্খ্যানম্" ইত্যচ্|

Adhikarana payaH pAne upapattiH (49-50) · Śloka 50

মদ্যক্ষীণস্য হি ক্ষীণং ক্ষীরমাশ্বেব পুষ্যতি||৪৯|| ওজস্তুল্যং গুণৈঃ সর্বৈর্বিপরীতং চ মদ্যতঃ|৫০|

স০-হি-যস্মাত্, তস্য-তুল্যং গুণৈঃ সর্বৈঃ-গুর্বাদিভিরোজসঃ ক্ষীরং, মদ্যাচ্চ বিপরীতং গুণৈঃ| তথা চ মুনিঃ (চ. সূ. অ. ২৭/২১৭)-"স্বাদু শীতং মৃদু স্নিগ্ধং বহলং শ্লক্ষ্ণপিচ্ছিলম্| গুরু মন্দং প্রসন্নং চ গব্যং দশগুণং পযঃ|| তদেবংগুণমেবৌজঃ সামান্যাদভিবর্ধযেত্|" ইতি| যতশ্চৈবং তস্মান্মদ্যক্ষীণস্ব ক্ষীণমোজঃ ক্ষীরমাশ্চেব পুষ্যতি-বৃদ্ধি প্রাপযতি, ন ত্বপরং, দ্রব্যং, যথোক্তহেত্বভাবাত্|

Adhikarana payasAvihate roge madyapAnam (50-51) · Śloka 51

| পযসা বিহতে রোগে বলে জাতে নিবর্তযেত্||৫০|| ক্ষীরপ্রযোগং, মদ্যং চ ক্রমেণাল্পাল্পমাচরেত্| ন বিক্ষযধ্বংসকোত্থৈঃ স্পৃশেতোপদ্রবৈর্যথা||৫১||

স০-পযসা রোগে-মদাত্যযাখ্যে, নিবর্তিতে বলে জাতে সতি মদ্যোচিতঃ পুমান্ ক্ষীরপ্রযোগং নিবর্তযেত্| মদ্যং চাল্পাল্পং ক্রমেণোপযুঞ্জীত| যথা বিক্ষযধ্বংসকোদ্ভবৈরুপদ্রবৈরসৌ ন স্পৃশেত| বিক্ষযোদ্ভবা বিকারাঃ-কাযশিরোরোগাদ্যাঃ (হৃংই.অ.৬/২২), ধ্বংসকোপদ্রবাঃ-শ্লেষ্মনিষ্ঠীবাদযঃ (হৃংই.অ.৬/২২)|

Adhikarana vikShayadhvaMsakayoScikitsA (52-53) · Śloka 53

তযোস্তু স্যাদ্ধৃ ক্ষীরং বস্তযো বৃংহণাঃ শিবাঃ| অভ্যঙ্গোদ্বর্তনস্নানান্যন্নপানং চ বাতজিত্||৫২|| যুক্তমদ্যস্য মদ্যোত্থো ন ব্যাধিরুপাজাযতে| অতোঽস্য বক্ষ্যতে যোগো যঃ সুখাযৈব কেবলম্||৫৩||

স০-তযোর্বিক্ষযধ্বংসকযোর্ঘৃতং ক্ষীরং চ চিকিত্সিতং স্যাত্| তথা বস্তযো বৃংহণাঃ শিবাঃ-নিরপাযাঃ| তথা, আব্যাঙ্গাদীনি যচ্চ বাতজিদন্নপানং তচ্চ স্যাত্| স০-যুক্তমদ্যস্য পুংসো মদ্যোত্থো ব্যাধির্নোপজাযতে, যুক্তমদ্যত্বাত্| অতঃ-অস্মাদ্ধেতোঃ, অস্য-মদ্যস্য, সংযোগো বক্ষ্যতে| যঃ কেবলং সুখাযৈব স্যাত্| অধুনা সুরাং সম্পন্নামাহ-

Adhikarana surApAnasya guNAH stutiSca (54-67) · Śloka 67

আশ্বিনং যা মহত্তেজো বলং সারস্বতং চ যা| দধাত্যৈন্দ্রং চ যা বীর্যং প্রভাবং বৈষ্ণবং চ যা||৫৪|| অস্ত্রং মকরকেতোর্যা পুরুষার্থো বলস্য যা| সৌত্রামণ্যাং দ্বিজমুখে যা হুতাশে চ হূযতে||৫৫|| যা সর্বৌষধিসম্পূর্ণান্মথ্যমানাত্সুরাসুরৈঃ| মহোদধেঃ সমুদ্ভূতা শ্রীশশাঙ্কামৃতৈঃ সহ||৫৬|| মধুমাধবমৈরেযসীধুগৌডাসবাদিভিঃ| মদশক্তিমনুজ্জন্তী যা রূপৈর্বহুভিঃ স্থিতা||৫৭|| যামাস্বাদ্য বিলাসিন্যো যথার্থং নাম বিভ্রতি| কুলাঙ্গনাঽপি যাং পীত্বা নযত্যুদ্ধতমানসা||৫৮|| অনঙ্গালিঙ্গিতৈরঙ্গৈঃ ক্বাপি চেতো মুনেরপি| তরঙ্গভঙ্গভ্রুকুটীতর্জনৈর্মানিনীমনঃ||৫৯|| একং প্রসাদ্য কুরুতে যা দ্বযোরপি নির্বৃতিম্| যথাকামং ভটাবাপ্তিপরিহৃষ্টাপ্সরোগণে||৬০|| তৃণবত্পুরুষা যুদ্ধে যামাস্বাদ্য ত্যজন্ত্যসূন্| যাং শীলযিত্বাঽপি চিরং বহুধা বহুবিগ্রহাম্||৬১|| নিত্যং হর্ষাতিবেগেন তত্পূর্বমিব সেবতে| শোকোদ্বেগারতিভযৈর্যাং দৃষ্ট্বা নাভিভূযতে||৬২|| গোষ্ঠীমহোত্সবোদ্যানং ন যস্যাঃ শোভতে বিনা| স্মৃত্বা স্মৃত্বা চ বহুশো বিযুক্তঃ শোচতে যযা||৬৩|| অপ্রসন্নাঽপি যা প্রীত্যৈ প্রসন্না স্বর্গ এব যা| অপীন্দ্রং মন্যতে দুঃস্থং হৃদযস্থিতযা যযা||৬৪|| অনির্দেশ্যসুখাস্বাদা স্বযংবেদ্যৈব যা পরম্| ইতি চিত্রাস্ববস্থাসু প্রিযামনুকরোতি যা||৬৫|| প্রিযাঽতিপ্রিযতাং যাতি যত্প্রিযস্য বিশেষতঃ| যা প্রীতির্যা রতির্বা বাগ্যা পুষ্টিরিতি চ স্তুতা||৬৬|| দেবদানবগন্ধর্বযক্ষরাক্ষসমানুষৈঃ| পানপ্রবৃত্তৌ সত্যাং তু তাং সুরাং বিধিনা পিবেত্||৬৭||

স০-যা-সুরা, অশ্বিনং মহত্তেজো-দীপ্তং, দধাতি| আশ্বিনমিত্যশ্বিনোরিদমিত্যণ্, "নস্তদ্ধিতে" ইতি টিলোপে প্রাপ্তে "ইনণ্যনপত্যে" ইতি প্রকৃতিভাবঃ| যা চ সুরা সারস্বতং বলং উত্সাহং, এন্দ্রং চ বীর্যং-শক্তি, বৈষ্ণবং চ প্রভাবং-মাহাত্ম্যং, দধাতি| যা চ মদনস্যাস্ত্রং-প্রহরণং, বলভদ্রস্য যা পুরুষাড়্থঃ-পরং প্রযোজনম্| যা চ সৌত্রামাণ্যাং যজ্ঞে দ্বিজাস্যে হুতাশে চ হূযতে| যা চ মহোদধেঃ সর্বৌষধিসম্পূর্ণাদ্দেবদানবৈর্বিলোড্যমানাত্ লক্ষ্ম্যাদিভিঃ সহোত্পন্না| যা চ সুরা মদশক্তিমত্যজন্তী বহুভির্মধ্বাদিভিরাকারৈঃ স্থিতা| যাং সুরাং পীত্বা বিলাসিন্যো মৃগলোচনাঃ, যথার্থং-অন্বর্থং, নাম বিভ্রতি বিলাসো বিদ্যতে যাসামিতি| যা পীত্বা কুলবামলোচনাঽপ্যুদ্ধতমানসা সত্যনঙ্গালিঙ্গিতৈরঙ্গৈর্মুনেরপি চেতঃ ক্বাপি নযতি| তরঙ্গভঙ্গা-কুটিলা, ভ্রুকুটিস্তযা তর্জনানি-প্রণযকলহবিশেষাঃ, তৈর্মানিত্যা মানসমেকং প্রসাদ্য দ্বযোরপি-স্ত্রীপুংসযোঃ, নির্বৃতিং-সৌখ্যং, যা সুরা করোতি| যাং সুরামাস্বাদ্য নরাঃ সমরে তৃণমিব প্রাণাংস্ত্যজন্তি| কীদৃষি যুদ্ধে ? যথেচ্ছং ভটস্য-শূরপুরুষস্য, যাঽবাপ্তিস্তযা পরিহৃষ্টো-মুদিতঃ, অপ্সরঃসঙ্ঘো যস্মিন্নাহবে তস্মিন্| যাংসুরাং, বহুভিঃ প্রকারৈঃ-আহারাদিমধ্যাবসানলক্ষণৈঃ, তথা যাং বহুবিগ্রহাং-মধুমাধবাদিভিরনেকশরীরাং, শীলযিত্বাঽপি নিত্যং হর্ষস্যাতিবেগেন তত্পূর্বমিব-তত্প্রথমমিব, সেবতে| যাং দৃষ্ট্বা উপলভ্যাস্বাদাদিনা, শোকাদিভির্নাভিভূযতে| যস্যাঃ সুরাযা ঋতে গোষ্ঠ্যাদির্ন শোভতে| যযা চ বিযুক্তঃ শোচতে| শোচত ইতি নঙিভ্যস্তঙ্| যা চাপ্রসন্না-কলুষাঽপি প্রীত্যৈ, প্রসন্নাস্বচ্ছা সতী, স্বর্গ এব স্যাত্| যযা চান্তঃস্থিতযেন্দ্রমপি দুঃস্থিতং মন্যতে| অনির্দেশ্যং-অভণনীযং সুখং যস্মিন্নাস্বাদে স তথাবিধ আস্বাদো যস্যাঃ সৈবম্| যা কেবলমাত্মনৈব বেদ্যা| ইতি-পূর্বোক্তেন প্রকারেণ, চিত্রাসু-নানাবিধাস্ববস্থাসু, প্রিযাংবল্লভাং, অনুকরোতি-অনুহরতি| প্রিযাপক্ষে নর্মাথঃ-প্রণযকলহার্থঃ| অপ্রসন্না-কুপিতা| প্রসন্না-ত্যক্তকোপা| অনির্দেশ্যঃ সুখাস্বাদঃ-সুখোপলম্ভো, যস্যা ইতি যোজ্যম্| এবং "যাং শীলযিত্বা" ইত্যাদিঃ সর্বোঽপি গ্রন্থঃ প্রিযাযামপি যোজ্যঃ| তথা, যত্-যস্মাত্, সুরা প্রিযা-ইষ্টা, অতিপ্রিযতাং-সুষ্ঠু বল্লভত্বং, যাতি| যত্প্রিযস্য-প্রকৃতত্বাত্সুরাপ্রিযস্য, বিশেষেণ প্রিযতাং যাতি| যা সুরা প্রীতিরিতি যা বাগিতি যা পুষ্টিরিতি যা চ দেবাদিভিঃ স্তুতা| পানপ্রবৃত্তৌ সত্যাং যেষাং পানাধিকারোঽস্তি ধর্মশাস্ত্রেষ্বনিষিদ্ধত্বাত্ তাং পূর্বোক্তগুণাং সুরাং বিধিনা-বক্ষ্যমাণেন (শ্লো. ৭৫) , পিবেত্|

Adhikarana madyasya medonilakaPajaroganAshakatvam (68) · Śloka 68

সম্ভবন্তি ন তে রোগা মেদোনিলকফোদ্ভবাঃ| বিধিযুক্তাদৃতে মদ্যাদ্যে ন সিধ্যন্তি দারুণাঃ||৬৮||

স০-তে মেদোনিলকফোদ্ভবা রোগা ন সম্ভবন্তি| দারুণাঃ দুঃসহাঃ| যে বিধিযুক্তান্মদ্যাদৃতে ন সিধ্যন্তি| বিধিযুক্তেন মদ্যেন সর্বে মেদোনিলকফজা রোগাঃ সিধ্যন্তীতি ভাবঃ|

Adhikarana madyasyAvashyakatvam (69) · Śloka 69

অস্তি দেহস্য সাঽবস্থা যস্যাং পানং নির্বাযতে| অন্যত্র মদ্যান্নিগদাদ্বিবিধৌষধসংস্কৃতাত্||৬৯||

স০-দেহস্য সাঽবস্থা-প্রক্লিন্নদেহমেহাদিকা (হৃ.সূ.অ.৮/৫৪) অস্তি, যস্যাং পানং নিবার্যতে, মদ্যাদন্যত্র| কিম্ভূতাত্ ? নিগদাত্, তথা বিবিধৌষধসংস্কৃতাত্| মদ্যমেবংবিধং বর্জযিত্বা পানং নিষিধ্যত ইত্যর্থঃ|

Adhikarana madyaMvinA AnUpAdimAMsaM kathaM pariNamet (70) · Śloka 70

আনূপং জাঙ্গলং মাংসং বিধিনাঽপ্যুপকল্পিতম্| মদ্যং সহাযমপ্রাপ্য সম্যক্ পরিণমেত্কথম্||৭০||

স০-আনূপং জাঙ্গলং মাংসং বিধানেনাপ্যুপকল্পিতং মদ্যং বিনো পযুক্তং কথং সম্যক্ পরিণমতি ?

Adhikarana madyaMvinA lashunaprayoge kiyAn guNaH (71) · Śloka 71

সুতীব্রমারুতব্যাধিঘাতিনো লশুনস্য চ| মদ্যমাংসবিযুক্তস্য প্রযোগে স্যাত্কিযান্ গুণঃ||৭১||

পুনরপি মদ্যমেব শ্লাঘযন্নাহ- স০-লশুনস্য চ দারুণতরবাতব্যাধিবিনাশিনঃ মদ্যমাংসরহিতস্য প্রযোগে কিযান্ গুণঃ স্যাত্ ? অল্প এবেত্যর্থঃ|

Adhikarana shastrAdikarmaNi madasyAvasyAvasyakatA (72) · Śloka 72

নিগূঢশল্যাহরণে শস্ত্রক্ষারাগ্নিকর্মণি| পীতমদ্যো বিষহতে সুখং বৈদ্যবিকত্থনাম্||৭২||

স০-তথা নিগূঢস্য-অত্যর্থং প্রণষ্টস্য, শল্যস্যাহরণে আকর্ষণে, তথা শস্ত্রাদিকর্মণি পীতমদ্যো নরঃ সুখং-অক্লেশেন, বৈদ্যবিকত্থনাং-কদর্থনাং, সহতে|

Adhikarana madyasya shreShThatA (73) · Śloka 73

অনলোত্তেজনং রুচ্যং শোকশ্রমবিনোদকম্| ন চাতঃ পরমস্ত্যন্যদারোগ্যবলপুষ্টিকৃত্||৭৩||

স০-তথা, অনলস্য-অগ্নেঃ উত্তেজনং শোকাদিঘ্নম্| ন চ কদাচিত্ ত(অ)স্মান্মদ্যাত্ পরং-অন্যত্, শ্রেষ্ঠমস্ত্যারোগ্যাদিকৃত্|

Adhikarana tasmAdAtmavatA madyaM peyam (74) · Śloka 74

রক্ষতা জীবিতং তস্মাত্পেযমাত্মবতা সদা| আশ্রিতোপাশ্রিতহিতং পরমং ধর্মসাধনম্||৭৪||

স০-যত এবং মহাগুণং মদ্যম্, তস্মাজ্জিবিতং রক্ষতা নরেণ তথাঽঽত্মবতা-সুধীমতা, সদা পেযম্| আশ্রিতানামুপাশ্রিতানাং চ হিতম্| পরমং ধর্মসাধনং-ধর্মোপাযঃ| অথাস্য পানে বিধিনাহ-

Adhikarana madyasya pAne vidhiH (75-85) · Śloka 85

স্রাতঃ প্রণম্য সুরবিপ্রগুরূন্ যথাস্বং বৃত্তিং বিধায চ সমস্তপরিগ্রহস্য| আপানভূমিমথ গন্ধজলাভিষীক্তা- মাহারমণ্ডপসমীপগতাং শ্রযেত||৭৫|| স্বাস্ত্রূতেঽথ শযনে কমনীযে মিত্রভৃত্যরমণীসমবেতঃ| স্বং যশঃ কথকচারণসঙ্ঘৈ রুদ্ধতং নিশমযন্নতিলোকম্||৭৬|| বিলাসিনীনাং চ বিলাসশোভি গীতং সনৃত্যং কলতূর্যঘোষৈঃ| কাঞ্চীকলাপৈশ্চলকিঙ্কিণীকৈঃ ক্রীডাবিহঙ্গৈশ্চ কৃতানুনাদম্||৭৭|| মণিকনকসমুত্থৈরাবনেযৈর্বিচিত্রৈঃ সজলবিবিধলেখক্ষো-মবস্ত্রাবৃতাঙ্গৈঃ| অপি মুনিজনচিত্তক্ষোভসম্পাদিনীভি- শ্চকিতহরিণলোলপ্রেক্ষণীভিঃ প্রিযাভিঃ||৭৮|| স্তননিতম্বকৃতাদতিগৌরবা- দলসমাকুলমীশ্বরসম্ভ্রমাত্| ইতি গতং দধতীভিরসংস্থিতং তরুণচিত্তবিলোভনকার্মণম্||৭৯|| যৌবনাসবমত্তাভির্বিলাসাধিষ্ঠিতাত্মভিঃ| সঞ্চার্যমাণং যুগপত্তন্বঙ্গীভিরিতস্ততঃ||৮০|| তালবৃন্তনলিনীদলানিলৈঃ শীতলীকৃতমতীব শীতলৈঃ| দর্শনেঽপি বিদধদ্বশানুগং স্বাদিতং কিমুত চিত্তজন্মনঃ||৮১|| চূতরসেন্দুমৃগৈঃ কৃতবাসং মল্লিকযোজ্জ্বলযা চ সনাথম্| স্ফাটিকশুক্তিগতং সতরঙ্গং কান্তমনঙ্গমিবোদ্বহদঙ্গম্||৮২|| তালীসাদ্যং চূর্ণমেলাদিকং বা হৃদ্যং প্রাশ্য প্রাগ্বযঃস্থাপনং বা| তত্প্রার্থিভ্যো ভূমিভাগে সুমৃষ্টে তোযোন্মিশ্রং দাপযিত্বা ততশ্চ||৮৩|| ঘৃতিমান্ স্মৃতিমান্নিত্যমনূনাধিকমাচরন্| উচিতেনোপচারেণ সর্বমেবোপপাদযন্||৮৪|| জিতবিকসিতাসিতসরো জনযনসঙ্ক্রান্তিবর্ধিতশ্রীকম্| কান্টমুখমিব সৌরভ- হৃতমধুপগণং পিবেন্মদ্যম্||৮৫||

স০-স্রাতো নরঃ সুরাদীন্ প্রণম্য যথাস্বং-যথাযোগ্যং, সমস্তস্য পরিকরস্য বৃত্তিং কৃত্বা, অথ পানভূমিং গন্ধজলেন-কর্পূরোশীরাদিনা বা সিরেনাম্বুনা, আভিষিক্তামাশ্রযেত্| কীদৃশীম্ ? আহারমণ্ডপস্য নিকটস্থিতাম্| পীতমদ্যস্য দূরং ব্রজত আযাসাদি স্যাত্| বসন্ততিলকং বৃত্তম্| অথ-ভূমিশ্রযণাদনন্তরং, শযনীযে স্থিতো মদ্যং পিবেদিতি বক্ষ্যমাণেন সম্বন্ধঃ| কিম্ভূতে ? সুষ্ঠু আস্তৃতে-প্রদত্তপ্রচ্ছদপটে| তথা, কমনীযে-রম্যে| মিত্রাদিসহিতঃ| স্বং যশ ইত্যাদি| কিং কুর্বন্ ? স্বং-আত্মীযং, যশঃ কথকাদিসঙ্গৈর্নিশমযন্-শ্রাবযন্| কীদৃশম্ ? উদ্ধতং তথাঽতিলোকং-অদ্ভুতরুপম্| স্বাগতাবৃত্তম্| তথা বিলাসিনীনাং সম্বন্ধি গীতং নিশমযন্| কিম্ভূতম্ ? সহ নৃত্যেন সনৃত্যম্| দ্বযমপি বিলসশোভি| বিলাসলক্ষণং চোক্তম্-"স্থানাসনযমনানাং হর্ষভ্রূনেত্রকর্মণাং চৈব| উত্পদ্যতে বিশেষো যঃ শ্লিষ্টঃ স তু বিলাসঃ স্যাত্||" ইতি| তথা তদ্গীতং মধুরতূর্যশব্দৈস্তথা কঞ্চীকলাপৈঃ স্ফুটাস্তথা স্ফুরন্ত্যঃ কিঙ্কিণ্যঃ-সূক্ষ্মঘণ্টিকাঃ, যেষাং তৈস্তথাবিধৈস্তথা ক্রীডাবিহঙ্গৈঃ-সারসাদিভিশ্চ, কৃতানুনাদম্| উপজাতিবৃত্তম্| আবনেযৈঃ-ডোলুঙ্গকৈঃ, তন্বঙ্গীভির্যুগপদিতস্ততঃ সঞ্চার্যমাণম্| এবং হ্যুনুভূযমানং রামণীযকং ধত্তে| কিম্ভূতৈরাবনেযৈঃ ? মণিকনকসমুত্থৈঃ, তথা বিচিত্রৈঃ-নানাবিধৈঃ, তথা সজলং নানাপ্রকারলেখং যত্ ক্ষৌ-বস্ত্রং তেনাবৃত্তমঙ্গং যেষাং তৈঃ| কিম্ভূতাভিস্তন্বঙ্গীভিঃ ? মুনিজনচিত্তক্ষোভসম্পাদিনীভিঃ| তথা, চকিতঃ-ত্রস্তো, যো হরিণস্তদ্বন্নেত্রেঃ সাধু প্রেক্ষন্তে যাস্তাভিঃ| বাহুলকাত্ কর্তরি ল্যুট্| তথা, বল্লভাভিঃ| মালিনীবৃত্তম্| তথা, গতমিতি| অসংস্থিতং-অনবস্থিতস্বরূপং, দধতীভিঃ| যতঃ স্তনাভ্যাং নিতম্বেন চ কৃতাদধিকং গৌরবাদলসম্| তথা, ঈশ্বরস্য-প্রভোঃ, যঃ সম্ভ্রমো-ভযং, তস্মাদাকুলং [গতং-]| অত এব চ তরুণচিত্তানাং বিলোভনে কার্মণংবশীকরণম্|" দ্রুতবিলম্বিতমাহ নভৌ ভরৌ|" তথা, তন্বঙ্গীভিরিতস্ততো যুগপত্সঞ্চার্যমাণম্| কিম্ভূতাভিঃ ? যৌবনাসবাভ্যাং মত্তাভিঃ| তথা বিলাসেনাধিষ্ঠিত আত্মা-চিত্তং, যাসাং তাভিঃ| তথা চ কীদৃশং মদ্যম্ ? তালবৃন্তাদিভিরতিশীতৈঃ শীতলীকৃতম্| দর্শনেঽপ্যেবংরূপং মদ্যং কামস্য বশানুগং জনং বিদধত্ কন্দর্পোদ্দীপনত্বাত্| কিমুত-কিংপুনঃ, পীতং সত্কামবশং জনং কুর্যাত্| "রান্নরৌ লগযুতা রথোদ্ধতা|". তথা, চূতরসাদিভিঃ কৃতাধিবাসং-সুগন্ধীকৃতম্| তথা, মল্লিকযা-পুষ্পবিশেষেণ, উজ্জবলযা-বিকসিতযা, সনাথংযুক্তম্| তথা, স্ফটিকস্য বিকারা স্ফাটিকী, স্ফাটিকী চাসৌ শুক্তিশ্চ, তস্যাং গতং-স্থিতম্| স্ফটিকস্যেযং স্ফাটিকীতি ব্যুত্পত্তৌ পুংবদ্ভাবো দুর্নিবারঃ স্যাত্| তথা, সতরঙ্গম্| এবং চ কান্তং-রম্যং, অঙ্গমুদ্বহন্| উত্প্রেক্ষতে| অনঙ্গং [ইব]-পঞ্চশরমিব, চারুতরত্বেন কামোত্পাদকত্বাত্| দোধকবৃত্তম্| প্রাক্-পূর্বং, তালীসাদ্যং চূর্ণমেলাদিকং বা হৃদ্যমথব বযঃ-স্থাপনং-রসাযনোক্তং, প্রাশ্য-ভক্ষযিত্বা| তথা, সুমৃষ্টে-উপলিপ্তে তত্প্রার্থিভ্যো-মদ্যপানাধিকৃতেভ্যো দেবদানবকূষমাণ্ডাদিভ্যঃ, তোযোন্মিশ্রং মদ্যং দাপযিত্বা পশ্চাজ্জলং দাপযিত্ব্যমিত্যর্থঃ| ততশ্চ-অনন্তরং, পিবেত্| শালিনীবৃত্তম্| কিং কুর্বন্ ? অনূনাধিকং-পূর্বোক্তং, নিত্যমাচরন্| ধৃতিমান্ স্মৃতিমাংশ্চ সন্ উচিতেন-যোগ্যেন, উপচারেণ সর্বমেবোপপাদযেত্(যন্)| কিম্ভূতং মদ্যম্ ? বিকসিতং চ তত্ অসিতং সরোজং চ বিকসিতাসিতসরোজম্| জিতং-ন্যক্কৃতং, বিকসিতাসিতসরোজং যাভ্যাং নযনাভ্যাং তে তথাবিধে, তযোঃ সঙ্ক্রান্তিঃ-প্রতিবিম্বত্বং, তযা সংবর্ধিতা শ্রীর্যস্য সরকস্য তদেবম্| তথা, সৌরভেণ হৃতো রম্যগতিত্বাদ্ ভ্রমরসার্থো যেন তদেবম্| সুরমের্ভাবঃ সৌরভম্, "ইগন্তাচ্চ লঘুপূর্বাত্" ইত্যণ্| তচ্চ কান্তামুখমিব| যতো জিতবিকসিতাসিতসরোজনযনযোর্যা সঙ্ক্রান্তিঃ-সঞ্চারঃ সকটাক্ষেক্ষিতাদিনা. তযা সংবর্ধিতা শ্রীঃ-শোভা, যস্য তদেবম্| সকটাক্ষেক্ষিতং হি মুখং নিতরাং রাজতে| তথা, উত্তমস্ত্রীণাং মুখং সুগন্ধি ভবতীতি সৌরভহৃতমধুপগণম্| "বিপুলা তু যাঽন্যথা পাদভাক্|"

Adhikarana pAnAnantaraM Bojanam BojanAnantaraM punH pAnam nishi madyapAnamalpameva (86) · Śloka 86

পীত্বৈবং চষকদ্বযং পরিজনং সন্মান্য সর্বং ততো গত্বাঽঽহারভুবং পুরঃ সুভিষজো ভুঞ্জীত ভূযোঽত্র চ| মাংসাপূপঘৃতার্দ্রকাদিহরিতৈর্যুক্তং সসৌবর্চলৈ- র্দ্বিস্ত্রির্বা নিশি চাল্পমেব বনিতাসংবল্গনার্থং পিবেত্||৮৬||

স০-এবং-অনেন প্রকারেণ, চষকদ্বযং পীত্বা তত-অনন্তরং, পরিজনং সর্বং-বেশ্যাদিকমপি, সন্মান্য তথাঽঽহারভুবং গত্বা সুভিষজঃ-শোভনবৈদ্যস্য, পুরঃ-অগ্রে, ভুঞ্জীত| অত্রে চ-আহারভুবি, মাংসাপূপাদিভির্যুক্তং দ্বিস্ত্রির্বা সরকং পিবেত্| মাংসাপূরেতি কেচিত্ পেঠুঃ| নিশি তু কান্তাযাঃ সংবল্গনার্থং-রঞ্জনার্থং, অল্পমেব পিবেত্-ন তু বহু| শার্দুলবিক্রীডিতম্| কান্তারঞ্জনপানং শ্লাঘযন্নাহ-

Adhikarana dayitAyA madyApAne prashaMsA (87-88) · Śloka 88

রহসি দযিতামঙ্কে কৃত্বা ভুজান্তরপীডনা- ত্পুলকিততনুং জাতস্বেদাং সকম্পপযোধরাম্| যদি সরভসং শীধোর্বারং ন পাযযতে কৃতী কিমনুভবতি ক্লেশপ্ড়্যং ততো গৃহতন্ত্রতাম্||৮৭|| বরতনুবক্রসঙ্গতিসুগন্ধিতরং সরকং দ্রুতমিব পদ্মরাগমণিমাসবরূপধরম্| ভবতি রতিশ্রমেণ চ মদঃ পিবতোঽল্পমপি ক্ষযমত ওজসঃ পরিহরন্ স শযীত পরম্||৮৮||

স০-কৃতী-প্রবীণো, যদি প্রিযাং মধোঃ সরকং ন পাযযতে, ততঃ কিং-কস্মাত্, গৃহতন্ত্রতাং-গৃহোপকরণসম্পাদনক্লেশং, অনুভবতি ? কিং কৃত্বা ? রহস্যঙ্কে-উত্সঙ্গে, দযিতাং কৃত্বা| কিভূতাম্ ? ভুজান্তরপীডনাত্ পুলকিতশরীরাম্, তথা জাতস্বেদাম্, তথা সবেপথুকুচাম্| রোমাঞ্চস্বেদকম্পাঃ সাত্বিকা ভাবাঃ শৃঙ্গারস্যাবির্ভাবিকাঃ| দযিতামিতি "গতিবুদ্ধি" ইত্যাদিনা কর্মত্বম্| পাযযতে ইতি "নিগরণচলনার্থেভ্যশ্চ" ইতি পরস্মৈপদে প্রাপ্তে "ন পাদম্য" ইত্যাদিনা নিষিদ্ধে চ স্বেত্যাদ্যাত্মনেপদম্| "ভবতি হরিণী ব্সৌ ম্রৌ স্লৌ গোরসোদধিসপ্তিভিঃ|" সং-কিম্ভূতং মদ্যম্ ? বরতনুবদনসঙত্যা সুরভিতরম্| তথা পদ্মরাগমণিং-দ্রবত্বমিব, প্রাপ্তমাসবরূপধরম্| যতশ্চ রতিশ্রমেণাল্পমপি মদ্যং পিবতো মদো ভবতি, ততো মদ্যমোজসশ্চ ক্ষযহেতুঃ| আত ওজঃক্ষযং পরিহরন্ সঃ-মদ্যপাযী, পানানন্তরং শযীত-স্বপ্যাত্| "নজভজজা লগৌ চ যদি নর্কুটকং তু তদা|"

Adhikarana madyapAnasukhasya surairapi spRuhaNIyatvam (89-90) · Śloka 90

ইত্থং যুক্ত্যা পিবন্মদ্যং ন ত্রিবর্গাদ্বিহীযতে| অসারসংসারসুখং পরমং চাধিগচ্ছতি||৮৯|| এশ্বর্যস্যোপভোগোঽযং স্পৃহণীযঃ সুরৈরপি| |৯০|

স০-ইত্থং-এবংপ্রকারযা, যুক্ত্যা মদ্যং পিবন্ পুরুষস্ত্রিবর্গাত্-ধর্মার্থকামলক্ষণাত্, যস্মান্ন হীযতে| হীযত ইতি কর্মকর্তরি তঙ্| অসারসংসারস্য পরমং সুখং চাধিগচ্ছতিপ্রাপ্নোতি| অযং-মদ্যপানলক্ষণঃ, এশ্ব্র্যস্যোপভোগঃ সুরৈরপি স্পৃহণীযঃ|

Adhikarana madyapAnarahitasya nindA,tasmAdvyavasthayA pAnaM hitam (90-92) · Śloka 92

| অন্যথা হি বিপত্সু স্যাত্পশ্চাত্তাপেন্ধনং ধনম্||৯০|| উপভোগেন রহিতো ভোগাবানিতি নিন্দ্যতে| নির্মিতোঽতিকদর্যোঽযং বিধিনা নিধিপালকঃ||৯১|| তস্মাহ্যবস্থযা পানং পানস্য সততং হিতম্| জিত্বা বিষযলুব্ধানামিন্দ্রিযাণাং স্বতন্ত্রতাম্||৯২||

স০-অন্যথা-এবমপি ভোগমকুর্বতো, হি বিপত্সু সতীষু ধনং-দ্রব্যং, পশ্চাত্তাপেন্ধনং স্যাত্| স হ্যেবং বিপদি চিন্তযতি,-কিং মযা ধনং প্রাপ্যোপভোগোঽস্মিন্ কৃতঃ ? উপভোগং বিনাভোগবানিতি সোল্লুণ্ঠমুচ্যমানো গর্হ্যতে| নিন্দিতত্বমেবাস্য প্রকটযতি-নির্মিত ইত্যাদি| অযমতিকদর্যঃ-কুস্বামী, বিধিনা নিধিপালকো নির্মিতঃ-কৃতঃ| যত এবং তস্মাত্ পানস্য-মদ্যস্য, ব্যবস্থযা নিযমেন পানং হিতম্| ননু, কথং নিসর্গতো বিষযলুব্ধেষ্বিন্দ্রিযেষু ব্যবস্থা পালযিতুং শক্যতে ? ইত্যাহ-জিত্বেত্যাদি| বিষযাভিলাষিণামিন্দ্রিযাণাং স্বাতন্ত্রযং জিত্বা নিযমেন ব্যবস্থযা পানং কর্তুং শক্যত ইত্যর্থঃ|

Adhikarana eSha dhaninAM vidhiH (93) · Śloka 93

বিধির্বসুমতামেষ ভবিষ্যদ্বসবস্তু যে| যথোপপত্তি তৈর্মদ্যং পাতব্যং মাত্রযা হিতম্||৯৩||

স০-বসুমতাং-ধনিনাং, এষ বিধিঃ| যে তু ভবিষ্যদ্বসবস্তেষাং চ তৈর্যথোপপত্তি-যথাযুক্তি, হিতং মদ্যং মাত্রযা পাতব্যম্|

Adhikarana draridrANAM vidhiH madyapAnasya samayogaH (14) · Śloka 14

যাবদ্ দৃষ্টের্ন সম্ভ্রান্তির্যাবন্ন ক্ষোভতে মনঃ| তাবদেব বিরন্তব্যং মদ্যাদাত্মবতা সদা||১৪||

স০-যাবদেব দৃষ্টের্ন সম্ভ্রান্তির্যাবদেব মনো ন ক্ষোভং যাতি, তাবদেব মদ্যাত্ ধীমতা সর্বদা বিরন্তব্যং-নিবৃত্তিঃ কার্যা| এষ এব সমযোগঃ| এতদতিক্রমোঽতিযোগঃ| যথোক্তাত্সমযোগাদ্ধীনস্বলক্ষণো হীনযোগঃ| দোষদেশপ্রকৃত্যাদীনপরীক্ষয মিথ্যাযোগঃ|

Adhikarana vAtAdhikasya madyapAnaprakAraH (15) · Śloka 15

অভ্যঙ্গোদ্বর্তনস্নানবাসধূপানুলেপনৈঃ| স্নিগ্ধোষ্ণৈর্ভাবিতশ্চান্নৈঃ পানং বাতোত্তরঃ পিবেত্||১৫||

স০-বাতাধিকো নরোঽভ্যঙ্গোদ্বর্তনাদিভিঃ স্নিগ্ধোষ্ণৈর্ভাবিতোঽন্নৈশ্চ মদ্যং পিবেত্|

Adhikarana paittikasya madyapAnaprakAraH (16) · Śloka 16

শীতোপচারৈর্বিবিধৈর্মধুরস্নিগ্ধশীতলৈঃ| পৈত্তিকো ভবিতশ্চান্নৈঃ পিবন্মদ্যং ন সীদতি||১৬||

স০-পৈত্তিকো বিবিধৈঃ শীতোপচারৈঃ-চন্দনানুলেপনাদিভিঃ, মধুরস্নিগ্ধশীতলৈশ্চান্নৈঃ সহ মদ্যং পিবন্ ন সীদতি|

Adhikarana shlaiShmikasya madyapAnaprakAraH (17) · Śloka 17

উপচারৈরশিশিরৈর্যবগোধূমভুক্ পিবেত্| ষ্লৈষ্মিকো ধন্বজৈর্মাংসৈর্মদ্যং মারিচিকৈঃ সহ||১৭||

স০-শ্লৈষ্মিকো যবগোধূমভুক্ সন্ মদ্যমশিশিরৈরুপচারৈস্তথা মাংসৈর্ধন্বোদ্ভবৈর্মরিচসংস্কৃতৈঃ সহ পিবেত্|

Adhikarana vAte hitaM madyam,pitte hitaM madyam,kaPe hitaM madyam (98) · Śloka 98

তত্র বাতে হিতং মদ্যং প্রাযঃ পৈষ্টিকগৌডিকম্| পিত্তে সাম্ভোমধু, কাফে মার্দ্বীকারিষ্টমধবম্||৯৮||

স০-তত্র-তেষু মদ্যেষু মধ্যে, বাতাধিকে নরে প্রাযো-বাহুল্যেন, মদ্যং পৈষ্টিকং গৌডিকং চ হিতম্| পিত্তে সজলং সমাক্ষিকং চ মদ্যং হিতম্| কফে মার্দ্বীকারিষ্টমাধবং হিতম্|

Adhikarana shlaiShmikasya madyapAnakAlaH paittikasya madyapAnakAlaH vAtikasya madyapAnakAlaH samadoShasya madyapAnakAlaH (19-2) · Śloka 2

প্রাক্ পিবেচ্ছ্লৈষ্মিকো মদ্যং, ভুক্তস্যোপরি পৈত্তিকঃ| বাতিকস্তু পিবেন্মধ্যে, সমদোষো যথেচ্ছযা||১৯|| ইতি মদাত্যযচিকিত্সিতম্||২||

স০-শ্লৈষ্মিকঃ প্রাগ্ভক্তং মদ্যং পিবেত্| পিবেত্ ভক্তং ভুক্ত্বা পিবেত্| বাতোত্তরঃ পুনর্মধ্যে ভক্তস্য পিবেত্| সমদোষো যথেচ্ছযা-ভক্তস্য পূর্বং মধ্যেঽন্তে বা, পিবেত্|

Adhikarana madamUrcCAyeShu sAmAnyacikitsA (100) · Śloka 100

অথ মদমূর্চ্ছাযচিকিত্সিতম্| মদেষু বাতপিত্তঘ্নং প্রাযো মূর্চ্ছাসু চেষ্যতে| সর্বত্রাপি বিশেষেণ পিত্তমেবোপলক্ষযেত্||১০০||

স০-মদেষু প্রাযেণ বাতপিত্তঘ্নং চিকিত্সিতম্, মূর্চ্ছাসু-মূর্চ্ছাযেষু চেষ্যতে| সর্বত্রৈব-মদে মূর্চ্ছাযে চ, পিত্তমেবাধিকং জানীযাত্| অত এব তেষামুপক্রমঃ-

Adhikarana madamUrcCAyeShu sAmAnyacikitsAvistaraH (101-104) · Śloka 104

শীতাঃ প্রদেহা মণযঃ সেকা ব্যজনমারুতাঃ| সিতা দ্রাক্ষেক্ষুখর্জূরকাশ্মর্যস্বরসাঃ পযঃ||১০১|| সিদ্ধং মধুরবর্গেণ রসা যূষাঃ সদাডিমাঃ| ষষ্টিকাঃ শালযো রক্তা যবাঃ সর্পিশ্চ জীবনম্||১০২|| কল্যাণকং মহাতিক্তং ষট্পলং পযসাঽগ্নিকঃ| পিপ্পল্যো বা শিলাহ্বং বা রসাযনবিধানতঃ||১০৩|| ত্রিফলা বা প্রযোক্তব্যা সঋতক্ষৌদ্রশর্করা| |১০৪|

স০-শীতাঃ প্রদেহাঃ| পযো মধুরবর্গেণ-দ্রাক্ষাদিনা, সিদ্ধম্| তথা,রসাঃ-মাংসরসাদযঃ| যূষাশ্চ দাডিমান্বিতাঃ| তথা, শালযো-রক্তশালয ইত্যর্থঃ| ষষ্টিকাদযশ্চ| তথা, ঘৃতং কল্যাণকাদিকম্| [কল্যাণকং-] উন্মাদপ্রতিষেধোক্তম্ (হৃ.উ.অ.)| মহাতিক্তং-কুষ্টচিকিত্সিতোক্তম্ (হৃ.উ.অ.৬/২৬)| মহাতিক্তং-কুষ্ঠচিকিত্সিতোক্তম্ (হৃ.চি.অ.১৯/৮)| ষট্পলং-রাজযক্ষ্মচিকিত্সিতোক্তম্ (হৃ.চি.অ.৫/২২)| তথা, ক্ষীরেণ চিত্রকম্| তথা, পিপ্পল্যো রসাযনবিধানেন| অথবা, শিলাজতু রসাযনবিধানেন| অথবা, ত্রিফলা সঘ্রুতক্ষৌদ্রশর্করা প্রযোক্তব্যা|

Adhikarana prasaktavegeShu visheShaH (104-107) · Śloka 107

| প্রসক্তবেগেষু হিতং মুখনাসাবরোধনম্||১০৪|| পিবেদ্বা মানুষীক্ষীরং তেন দদ্যাচ্চ নাবনম্| মৃণালবিসকৃষ্ণা বা লিহ্যাত্খৌদ্রেণ সাভযাঃ||১০৫|| দুরালভাং বা মুস্তং বা শীতেন সলিলেন বা| পিবেন্মরিচকোলাস্থিমজ্জোশীরাহিকেসরম্||১০৬|| ধাত্রীফলরসে সিদ্ধং পথ্যাক্বাথেন বা ঘৃতম্| |১০৭|

স০-প্রসক্তবেগেষু মদাদিষু মুখস্য নাসাযাশ্চ পাণ্যাদিনাঽবরোধনং হিতম্| মানুষ্যা বা ক্ষীরং পিবেত্| তেন চ মানুষীক্ষীরেণ, নস্যং দদ্যাত্| মৃণালাদীন্ সহরীতকীন্ মাক্ষিকেণ বা লিহ্যাত্| অতবা ধন্বযবাসং মুস্তং বা মধুনা লিহ্যাত্| অথবা শীতেন জলেন মরিচাদীন্ পিবেত্| অহিকেসরং-নাগকেসরম্| অথবা, আমলকরসে সিদ্ধং ঘৃতং হরীত কীক্কাথেন বা সিদ্ধং পিবেত্|

Adhikarana madamUrcCAyeShu visheShacikitsA (107) · Śloka 107

| কুর্যাত্ক্রিযাং যথোক্তাং চ যথাদোষবলোদযম্||১০৭||

স০-যথোক্তাং চ ক্রিযাং দোষবলোদযানুসারেণ কুর্যাত্|

Adhikarana madamUrcCAyeShu shodhanam (108) · Śloka 108

পঞ্চকর্মাণি চেষ্টানি সেচনং শোণিতস্য চ| |১০৮|

স০-পঞ্চকর্মাণী-বমনবিরেকাস্থাপনাব্বাসননস্যাখ্যানি, চেষ্টানি রক্তমোক্ষশ্চ|

Adhikarana madamUrcCAyeShu satvAvajayaH (108) · Śloka 108

| সত্ত্বস্যালম্বনং জ্ঞানমগৃদ্ধির্বিষযেষু চ||১০৮||

স০-সত্ত্বস্যালম্বনং-আশ্রযণম্| তথা, জ্ঞানং-মহাভূতেন্দ্রিযতন্মাত্রমনোবুধ্দ্যহঙ্কারপুরুষাদীনাম্| বিষযেষ্বগৃদ্ধিঃ অনভিলাষঃ|

Adhikarana madamUrcCAyeShu atipravRuddheShu auShadham (109) · Śloka 109

মদেষ্বতিপ্রবৃদ্ধেষু মূর্চ্ছাযেষু চ যোজযেত্| তীক্ষ্ণং সন্ন্যাসবিহিতং|১০৯|

স০-মদেষু মূর্চ্ছাযেষু অতিপ্রবৃদ্ধেষু তীক্ষ্ণং নস্যাদি সন্ন্যা সোক্তং যোজযেত্|

Adhikarana madamUrcCAyeShu viShajeShu auShadam (109-3) · Śloka 3

| বিষঘ্নং বিষজেষু চ||১০৯|| ইতি মদমূর্চ্ছাযচিকিত্সিতম্||৩||

স০-তথা বিষজেষু মদেষু বিষঘ্নং চিকিত্সিতং যোজযেত্|

Adhikarana saMnyAse auShadham (110-113) · Śloka 113

অথ সন্ন্যাসচিকিত্সিতম্| আশু প্রযোজ্যং সন্ন্যাসে সুতীক্ষ্ণং নস্যমঞ্জনম্| ধূমঃ প্রধমনং তোদঃ সূচীভিশ্চ নখান্তরে||১১০|| কেশানাং লুঞ্চনং দাহো দংশো দশনবৃশ্চিকৈঃ| কট্বম্লগালনং বক্রে কপিকচ্ছ্ববঘর্ষণম্||১১১|| উত্থিতো লব্ধসংজ্ঞশ্চ লশুনস্বরসং পিবেত্| খাদেত্সব্যোষলবণং বীজপূরককেসরম্||১১২|| লঘ্বন্নপ্রতি তীক্ষ্ণোষ্ণমদ্যাত্স্রোতোবিশুদ্ধযে| |১১৩|

স০-সন্ন্যাসে শীঘ্রং সুষ্ঠু নস্যমঞ্জনং ধূমঃ প্রধমনং চ প্রযোজ্যম্| সূচীতোদাদিকং চ নখমধ্যে| তথা, বক্রে কটূনাং মরীচাদীনাং, অম্লানাং-মাতুলুঙ্গাদীনাং, চ গালনং প্রযোজ্যম্| তথা| কপিকচ্ছ্ববঘর্ষণম্| এবমুপক্রান্তঃ সমুত্থিতো লব্ধচেতনশ্চ সন্ লশুনস্বরসং পিবেত্| তথা, বীজপূরককেসরং সব্যোষলবণং ভক্ষযেত্| স্রোতোবিশোধনার্থং লঘ্বন্নপ্রতি ভুঞ্জীত| কীদৃশম্ ? তীক্ষ্ণোষ্ণম্| লঘ্বন্নপ্রতীতি অল্পলঘ্বন্নম্| "সুপ্প্রতিনা মাত্রার্থে" ইতি সমাসঃ|

Adhikarana manasaH saMrakShaNam (7) · Śloka 7

বিস্মাপনৈঃ সংস্মরণৈঃ প্রিযশ্রবণদর্শনৈঃ||১১৩|| পটুভির্গীতবাদিত্রশব্দৈর্ব্যাযামশীলনৈঃ| স্রংসনোল্লেখনৈর্ধূমৈঃ শোণিতস্যাবসেচনৈঃ||১১৪|| উপাচরেত্তং প্রততমনুবন্ধভযাত্পুনঃ| তস্য সংরক্ষিতব্যং চ মনঃ প্রলযহেতুতঃ||১১৫|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসঈহিতাযাং চতুর্থে চিকিত্সিত- স্থানে মদাত্যযাদিচিকিত্সিতং নাম সপ্তমোঽধ্যাযঃ||৭||

স০-তং-মদাদিমন্তং, উপাচরেত্| কৈঃ ? সংস্মরণৈঃ| বিস্মাপনৈঃ-বিস্মযকারিভিঃ| বিপূর্বাত্ স্মিঙো ণিচি "নিত্যং স্মযতেঃ" ইত্যাত্বে পুকি ল্যুটি চ বিস্মাপনৈরিতি রূপম্| তথা, প্রিযস্য শ্রবণেন দর্শনেন চ গীতবাদিত্রশব্দৈঃ পটুভিঃ-মনোহরৈঃ| তথা, ব্যাযামশীলনৈঃ| তথা বমনবিরেচনাভ্যাং ধূমেন শোণিতস্রাবেণ চানুবন্ধভযাচ্চ কারণাত্ তস্য-আতুরস্য, প্রলেযহেতুতো মনঃ সম্যগ্রক্ষিতব্যং-তত ইদং কার্যমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে মদা- ত্যযাদিচিকিত্সিতং নাম সপ্তমোঽধ্যাযঃ সমাপ্তঃ|| ৭||