11. mūtrāghātacikitsitādhyāyaḥ

Adhikarana adhyAyopakramaH · Śloka

গ্রহণীদোষচিকিত্সিতাদনন্তরং মূত্রাঘাতচিকিত্সিতমারভ্যতে| সম্বন্ধশ্চাস্য সমসম্বন্ধনত্বাত্| তথা চ প্রাগধ্যৈষ্ট (হৃংই.অ.৯|১)- "বস্তিবস্তিশিরোমেঢ্রকটীবৃষণপাযবঃ| একসম্বন্ধনাঃ প্রোক্তা গুদাস্থিবিবরাশ্রযাঃ||" ইতি|

Adhikarana mUtrAghAtacikitsitAdhyAyaH vAtaje mUtrakRucchre svedaH (2-1) · Śloka 1

তেনেদমাহ অথাতো মূত্রাঘাতচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| ) কৃচ্ছ্রে বাতঘ্নতৈলাক্তমধোনাভেঃ সমীরজে| সুস্নিগ্ধৈঃ স্বেদযেদঙ্গং পিণ্ডসেকাবগাহনৈঃ||১||

স০-কৃচ্ছ্রে-মূত্রকৃচ্ছ্রে, আদিপদলোপং কৃত্বা নির্দিষ্টম্| যথা-মাংসরসে রস ইতি| মূত্রকৃচ্ছ্রে বাতোত্থে, অঙ্গং-শরীরং, বাতঘ্নতৈলেন-বলাতৈলাদিনা, অভ্যক্তমধো নামেঃ সমন্তাত্ স্বেদৈঃ পিণ্ডাদিভিঃ সুষ্ঠু স্নিগ্ধৈঃ-ন রূক্ষৈঃ, স্বেদযেত্|

Adhikarana vAtaje dashamUlAdisiddhAH snehAH (2-3) · Śloka 3

দশমূলবলৈরণ্ডযবাভীরুপুনর্নবৈঃ| কুলত্থকোলপত্তূরবৃশ্চীবোপলভেদকৈঃ||২|| তৈলসর্পির্বরাহর্ক্ষবসাঃ ক্বথিতকল্কিতৈঃ| সপঞ্চলবণাঃ সিদ্ধাঃ পীতাঃ শূলহরাঃ পরম্||৩||

স০-দশমূলাদিভিঃ ক্বথিতকল্কিতৈস্তৈলসর্পির্বরাহর্ক্ষবসাঃ সিদ্ধাঃ-পক্বাঃ, সহ পঞ্চলবণৈর্বর্তন্ত ইতি সপঞ্চলবণাঃ পীতাঃ পরং-সুষ্ঠু, শূলহরাঃ|

Adhikarana vAtaje dashamUlAdInAM pAnAnnasvedeShvapyupayogaH (4) · Śloka 4

দ্রব্যাণ্যেতানি পানান্নে তথা পিণ্ডোপনাহনে| সহ তৈলফলৈর্যুঞ্জ্যাত্সাম্লানি স্নেহবন্তি চ||৪||

স০-এতানি-দশমূলাদীনি, দ্রব্যাণি পানান্নে তদ্বিজযায, তথা পিণ্ডোপনাহাখ্যং স্বেদদ্বযং তৈলফলৈঃ সহ যুঞ্জ্যাত্| তৈলার্থানি ফলানি নালিকেরাক্ষোডাদীনি তৈলফলানি, যথা-যূপায দারু, তৈঃ সহ| কেচিত্তু তৈলফলানি তিলানাহুঃ| কিম্ভূতানি? সাম্লানি, সহাম্লৈঃ-তক্রারনালাদিভিঃ, বর্তন্ত ইতি সাম্লানি| তথা, স্নেহবন্তি-বহুস্নেহানি| "ভূম্নি মতুপ্"|

Adhikarana vAtaje madirA (5) · Śloka 5

সৌবর্চলাঢ্যাং মদিরাং পিবেন্মূত্ররুজাপহাম্| |৫|

স০-তথা মদিরাং বহুসৌবর্চলাং মূত্ররুজাপহাং পিবেত্|

Adhikarana pittaje mUtrakRucCre sekalepAdi (5) · Śloka 5

| পৈত্তে যুঞ্জীত শিশিরং সেকলেপাবগাহনম্||৫||

স০-পৈত্তে মূত্রকৃচ্ছ্রে শীতলং সেকলেপাবগাহনং যুঞ্জীত|

Adhikarana pittaje mUtrakRucCre shatAvaryAdikvAthaH (6) · Śloka 6

পিবেদ্বরীং গোক্ষুরকং বিদারীং সকসেরুকাম্| তৃণাখ্যং পঞ্চমূলং চ পাক্যং সমধুশর্করম্||৬||

স০-তথা শতাবর্যাদিকং পাক্যং কৃত্বা সমধুশর্করং পিবেত্|

Adhikarana pittaje mUtrakRucCre vRuShakAdikalkaH (7) · Śloka 7

বৃষকং ত্রপুসৈর্বারুলট্বাবীজানি কুঙ্কুমম্| দ্রাক্ষাম্ভোভিঃ পিবন্ সর্বান্ মূত্রাঘাতানপোহতি||৭||

স০-বৃষকাদিকং কল্কীকৃত্য দ্রাক্ষাজলেন পিবন্ সর্বান্ মূত্রাঘাতান্ পরাকরোতি| অপোহতীতি "উপসর্গাদস্যত্যূহ্যোর্বা বচনম্" ইতি পরস্মৈপদম্| বৃষকঃ-পাষাণভেদকঃ| লট্বাবীজং-কুসুম্ভবীজম্|

Adhikarana pittaje mUtrakRucCre ervArubIjakalkaH, drAkShAkalkaH (8) · Śloka 8

এর্বারুবীজযষ্ট্যাহ্বদার্বীর্বা তণ্ডুলাম্বুনা| তোযেন কল্কং দ্রাক্ষাযাঃ পিবেত্পর্যুষিতেন বা||৮||

স০-এর্বারুবীজাদিকং বা তণ্ডুলাম্ভসা পিবেত্ পূর্বগুণম্| পর্যুষিতেন বা জলেন দ্রাক্ষাকল্কং পিবেত্|

Adhikarana kaPaje mUtrakRucCre vamanasvedAdi (9) · Śloka 9

কফজে বমনং স্বেদং তীক্ষ্ণোষ্ণকটুভোজনম্| যবানাং বিকৃতীঃ ক্ষারং কালশেযং চ শীলযেত্||৯||

স০-কফজে মূত্রকৃচ্ছ্রে বমনাদীনি শীলযেত্|

Adhikarana kaPaje mUtrakRucCre sUkShmailAyogaH, sArasAsthyAdiyogaH, kaNTakArIsvarasaH, kara~jjabIjacUrNam, dhavAdikvAthaH, dhavAdisiddhA peyA, pravAlacUrNam, pATalAkShAraH (10-13) · Śloka 13

পিবেন্মদ্যেন সূক্ষ্মৈলাং ধাত্রীফলরসেন বা| *সারসাস্থিশ্বদংষ্ট্রৈলাব্যোষং বা মধুমূত্রবত্||১০|| স্বরসং কণ্টকার্যা বা পাযযেন্মাক্ষিকান্বিতম্| শিতিবারকবীজং বা তক্রেণ শ্লক্ষ্ণচূর্ণিতম্||১১|| ধবসপ্তাহ্বকুটগুডূচীচতুরঙ্গুলম্| কেম্বুকৈলাকরঞ্জং চ পাক্যং সমধু সাধিতম্||১২|| তৈর্বা পেযাং প্রবালং বা চূর্ণিতং তণ্ডুলাম্বুনা| সতৈলং পাটলাক্ষারং সপ্তকৃত্ত্বোঽথবা স্রুতম্||১৩||

স০-তথা মদ্যেন সূক্ষ্মৈলাং পিবেত্| আমলকরসেন বা সূক্ষ্মৈলাং পিবেত্| [অথবা,] সারসাস্থ্যাদীনি মধুযুক্তানি গোমূত্রেণ পিবেত্| অথবা, কণ্টকার্যাঃ স্বরসং সমাক্ষিকং পাযযেত্| [অথবা,] শিতিবারকস্য-করঞ্জস্য, বীজং শ্লক্ষ্ণপিষ্টং তক্রেণ সহ পাযযেত্| ধবাদিভিঃ কৃতং পাক্যং-ক্বাথং, বা সমধু পাযযেত্| তৈর্বা-ধবাদিভিঃ, সাধিতাং পেযাং পাযযেত্| প্রবালং-বিদ্রুমং, রজীকৃতং তণ্ডুলাম্ভসা [বা] পাযযেত্| পাটলাযাঃ ক্ষারং সপ্তবারান্ স্রুতং তৈলেন বা পাযযেত্|

Adhikarana kaPaje mUtrakRucCre kShArayuktA madirA, pATalyAdikShArAH (14-15) · Śloka 15

পাটলীযাবশূকাভ্যাং পারিভদ্রাত্তিলাদপি| ক্ষারোদকেন মদিরাং ত্বগেলোষকসংযুতাম্||১৪|| পিবেদ্গুডোপদংশান্বা লিহ্যাদেতান্ *পৃথক্ পৃথক্| |১৫|

স০-পাটলীযবক্ষারাভ্যাং ক্ষারোদকেন তথা পারিভদ্রতিলক্ষারোদকেন মদিরাং ত্বগেলোষকসংযুক্তাং পিবেত্| ঊষকঃ-কল্লরঃ| গুডোপদংশান্বেতি| অথবা গুডমুপদংশ্য এতান্-ত্বগাদীন্, পৃথক্ পৃথক্ লিহ্যাত্|

Adhikarana tridoShajamUtrakRucCrAdau yathAvastham (15-16) · Śloka 16

| সন্নিপাতাত্মকে সর্বং যথাবস্থমিদং হিতম্||১৫|| অশ্মন্যপ্যচিরোত্থানে বারবস্ত্যাদিকেষু চ| |১৬|

স০-সন্নিপাতাত্মকে মূত্রকৃচ্ছ্রে সর্বমিদং-পূর্বোক্তং পৃথগ্দোষাত্মকমূত্রকৃচ্ছ্রনির্দিষ্টং, যথাবস্থং-অবস্থামপেক্ষ্য, হিতম্| ন কেবলং সন্নিপাতাত্মকে কৃচ্ছ্রে প্রাঙ্ নির্দিষ্টং পৃথগ্দোষাত্মকমূত্রকৃচ্ছ্রচিকিত্সকং হিতম্| যাবদশ্মর্যামপ্যচিরোত্থানে, অচিরকালং উত্থানং-জন্ম, যস্য তস্মিন্ হিতম্| চশব্দাদ্বাতবস্ত্যাদিকেষু মূত্রাঘাতেষু হিতম্| আদিশব্দেন বাতকুণ্ডলিকাদযো গৃহ্যন্তে|

Adhikarana ashmaryAH sAdhyatvAdi (16-17) · Śloka 17

| অশ্মরী দারুণো ব্যাধিরন্তকপ্রতিমো মতঃ||১৬|| তরুণো ভেষজৈঃ সাধ্যঃ প্রবৃদ্ধশ্ছেদমর্হতি| |১৭|

স০-অশ্মরী দারুণো ব্যাধিরন্তকপ্রতিমঃ-তত্তুল্যো মতঃ, শীঘ্রং প্রাণহারিত্বাত্| স চাশ্মরী তরুণঃ-অচিরোত্পন্নঃ, ঔষধৈঃ সাধ্যঃ-সাধযিতুং শক্যঃ| প্রবৃদ্ধঃ পুনশ্ছেদনং-পাটনং, শস্ত্রেণার্হতি|

Adhikarana ashmaryAH pUrvarUpeShu snehAdikramaH (17) · Śloka 17

| তস্য পূর্বেষু রূপেষু স্নেহাদিক্রম ইষ্যতে||১৭||

স০-তস্য-আশ্মর্যাখ্যস্য ব্যাধেঃ, প্রাগ্রূপেষু স্নেহাদিক্রম ইষ্যতে| আদিশব্দঃ স্বেদনবমনাদীনাং গ্রহায| অথ স্নেহমাহ-

Adhikarana vAtAshmaryA pAShANabhedAdi ghRutam (18-20) · Śloka 20

পাষাণভেদো বসুকো বশিরোঽশ্মন্তকো বরী| কপোতবঙ্কাতিবলাভল্লূকোশীরকচ্ছকম্||১৮|| বৃক্ষাদনী শাকফলং ব্যাঘ্র্যৌ গুণ্ঠস্ত্রিকণ্টকঃ| যবাঃ কুলাত্থাঃ কোলানি বরুণঃ কতকাত্ফলম্||১৯|| ঊষকাদিপ্রতীবাপমেষাং ক্বাথে শৃতং ঘৃতম্| ভিনত্তি বাতসম্ভূতাং তত্পীতং শীঘ্রমশ্মরীম্||২০||

স০-পাষাণভেদাদীনাং ক্বাথে ঘৃতং শৃতমূষকাদিগণোক্তদ্রব্যপ্রতিবাপং-তত্কল্কং সত্, পীতং বাতজামশ্মরীং ভিনত্তি| বসুকঃ-ঈশ্বরমল্লিকা| বশিরং-সামুদ্রলবণম্| অশ্মন্তকো-মালুকপর্ণঃ| কপোতবঙ্কা-সুবর্চলা| ভল্লূকঃ-শ্যোনাকঃ|

Adhikarana vAtAshmaryAM eraNDamUlAdikalkaH (21) · Śloka 21

গন্ধর্বহস্তবৃহতীব্যাঘ্রীগোক্ষুরকেক্ষুরাত্| মূলকল্কং পিবেদ্দধ্না মধুরেণাশ্মভেদনম্||২১||

স০-গন্ধর্বহস্তাদীনাং সমাহারদ্বন্দ্বঃ, অনিত্যমাগমশাসনমিতি তু প্রকৃতম্| এরণ্ডাদীনাং দ্রব্যাণাং যন্মূলং তত্কল্কীকৃত্য মধুরেণ দধ্না পিবেদশ্মভেদনম্,-প্রকৃতত্বাদ্বাতাশ্মরীভেদনং গম্যতে|

Adhikarana pittAshmaryAM kushAdighRutam (22-24) · Śloka 24

কুশঃ কাশঃ শরো গুণ্ঠ ইত্কটো মোরটোঽশ্মভিত্| দর্ভো বিদারী বারাহী শালিমূলং ত্রিকণ্টকঃ||২২|| ভল্লূকঃ পাটলী পাঠা পত্তূরঃ সকুরণ্টকঃ| পুনর্নবে শিরীষশ্চ তেষাং ক্বাথে পচেদ্ধৃতম্||২৩|| পিষ্টেন ত্রপুসাদীনাং বীজেনেন্দীবরেণ চ| মধুকেন শিলাজেন তত্পিত্তাশ্মরিভেদনম্||২৪||

স০-কুশাদীনাং ক্বাথে ত্রপুসাদীনাং-পূর্বোক্তানাং (শ্লো.৭) ত্রপুসৈর্বারুলট্বানাং, বীজেন নীলোত্পলবীজেন মধুকেন চ পিষ্টেন শিলাজতুনা চ ঘৃতং পচেত্| তত্পিত্তাশ্মরীভেদনং ভবতি| শোধনাদিগণসঙ্গ্রহোক্তাস্তু (হৃ. সূ. অ. ১৫|১) ত্রপুসাদযোঽত্র ন গৃহ্যন্তে, তদন্তঃপাতিনাং পিত্তবিরোধিনাং সর্পিরা(সর্ষপা)দীনাং দ্রব্যাণাং তত্র পাঠাত্|

Adhikarana kaPAshmaryAM varUNAdighRutam (25-26) · Śloka 26

বরুণাদিঃ সমীরঘ্নৌ গণাবেলাহরেণুকা| গুগ্গুলুর্মরিচং কুষ্ঠং চিত্রকঃ সসুরাহ্বযঃ||২৫|| তৈঃ কল্কিতৈঃ কৃতাবাপমূষকাদিগণেন চ| ভিনত্তি কফজামাশু সাধিতং ঘৃতমশ্মরীম্||২৬||

স০-"বরুণসৈর্যক" (হৃ.সূ.অ.১৫|২১) ইত্যাদির্বরুণাদির্গণঃ, সমীরঘ্নৌ গণৌ-"বীরতরাদিঃ (হৃ.সূ.অ.১৫|২৪) . তথা বিদার্যাদিঃ (হৃ.সূ.অ.১৫|৯) , এতৈর্বরুণাদিভির্দ্রব্যৈঃ কল্কিকৃতৈস্তথোষকাদিগণেন-"ঊষকস্তুত্থকং" (হৃ.সূ.অ.১৫|২৩) ইত্যাদিনা, কৃতাবাপং-কল্কবত্কৃত্বা, ঘৃতং সাধিতমাশু কফজামশ্মরীং হন্তি|

Adhikarana ashmaryAM kShArakShIrayavAgvAdayaH (27) · Śloka 27

ক্ষারক্ষীরযবাগ্বাদি দ্রব্যৈঃ স্বৈঃ স্বৈশ্চ কল্পযেত্| |২৭|

স০-ক্ষারাদি চ স্বৈঃ স্বৈঃ-তদ্যোগ্যৈর্দ্রবৈঃ কল্পযেত্|

Adhikarana sharkarAyAM picukAdikvAthaH (27-28) · Śloka 28

| পিচুকাঙ্কোল্লকতশাকেন্দীবরজৈঃ ফলৈঃ||২৭|| পীতমুষ্ণাম্বু সগুডং শর্করাপাতনং পরম্| |২৮|

স০-পিচুকাদিভিরুষ্ণাম্বু সগুডং পীতং শর্করাযাঃ পরং শাতনম্| পিচুকঃ-শিতিবারকঃ|

Adhikarana SarkarAyAM krau~jcAsthyAdicUrNam (28-29) · Śloka 29

| ক্রৌঞ্চোষ্ট্ররাসভাস্থীনি শ্বদংষ্ট্রা তালপত্রিকা||২৮|| অজমোদা কদম্বস্য মূলং বিশ্বস্য চৌষধম্| পীতানি শর্করাং ভিন্দ্যুঃ সুরযোষ্ণোদকেন বা||২৯||

স০-ক্রৌঞ্চাস্থ্যাদীনি পীতানি সুরযোষ্ণজলেন বা শর্করাং হন্যুঃ|

Adhikarana ashmaryAM nRutyakuNDakacUrNam (30) · Śloka 30

নৃত্যকুণ্ডকবীজানাং চূর্ণং মাক্ষিকসংযুতম্| অবিক্ষীরেণ সপ্তাহং পীতমশ্মরিপাতনম্||৩০||

স০-তুম্বরীবীজানাং চূর্ণং মাক্ষিকান্বিতমবিক্ষীরেণ সপ্তাহং পীতমশ্মরিপাতনম্| অত্রাশ্মরীশব্দস্য "ঢ্যাপোঃ সংজ্ঞাছন্দসোঃ" ইতি হ্রস্বঃ|

Adhikarana ashmaryAM shigrumUlakvAthaH (31) · Śloka 31

ক্বাথশ্চ শিগ্রুমূলোত্থঃ কদুষ্ণোঽশ্মরীপাতনঃ| |৩১|

স০-সোভাঞ্জনকমূলক্বাথশ্চ কোষ্ণঃ পীতোঽশ্মরিপাতনঃ|

Adhikarana ashmaryAM tilAdikShAraH (31-32) · Śloka 32

| তিলাপামার্গকদলীপলাশযবসম্ভবঃ||৩১|| ক্ষারঃ পেযোঽবিমূত্রেণ শর্করাস্বশ্মরীষু চ| |৩২|

স০-তিলাদিসম্ভবঃ ক্ষারোঽবিমূত্রেণ শর্করাস্বশ্মরীষু চ বিষযে পেযঃ|

Adhikarana ashmarIvedanAyAM kapotava~gkA cUrNam, kapotava~gkasiddhaM kShIram, harItakyasthisiddhaM kShIram, punarnavAsiddhaM kShIram, mayUrashikhAmUlacUrNam (32-34) · Śloka 34

| কপোতবঙ্কামূলং বা পিবেদেকং সুরাদিভিঃ||৩২|| তত্সিদ্ধং বা পিবেত্ক্ষীরং বেদনাভিরুপদ্রুতঃ| হরীতক্যস্থিসিদ্ধং বা সাধিতং বা পুনর্নবৈঃ||৩৩|| ক্ষীরান্নভুগ্বর্হিশিখামূলং বা তণ্ডুলাম্বুনা| |৩৪|

স০- কপোতবঙ্কাযা মূলং কেবলং সুখোষ্ণজলাদিভিঃ পিবেত্| তযা-কপোতবঙ্কযা, সিদ্ধং-শৃতং, বা ক্ষীরং বেদনোপদ্রুতঃ পিবেত্| হরীতক্যস্থিভিঃ সিদ্ধং বা ক্ষীরমথবা পুনর্নবপক্বং ক্ষীরং পিবেত্| মযূরশিখামূলং তণ্ডুলাম্ভসা পিবেত্| কিম্ভূতঃ ? ক্ষীরান্নাশী সন্|

Adhikarana mUtrAghAteShu kriyAviBAgaH (34) · Śloka 34

| মুত্রাঘাতেষু বিভজেদতঃ শেষেষ্বপি ক্রিযাম্||৩৪||

স০-অতঃ-অস্মাত্পূর্বোক্তাঞ্চিকিত্সিতাত্, যথাযোগং শেষেষ্বপি মূত্রাঘাতেষু-মূত্রাতীতাদিষ্বপি, ক্রিযাং বিভজেত্-নিরূপ্য কুর্যাত্|

Adhikarana mUtrAghAteShu bRuhatyAdigaNasya kvAthAdi (35) · Śloka 35

বৃহত্যাদিগণে সিদ্ধং দ্বিগুণীকৃতগোক্ষুরে| তোযং পযো বা সর্পির্বা সর্বমূত্রবিকারজিত্||৩৫||

স০-বৃহত্যাদিগণে দ্বিগুণীকৃতগোক্ষুরে জলং পক্বং ক্ষীরং বা সর্পির্বা সর্বান্ মূত্রবিকারান্ জযতি|

Adhikarana mUtrAghAteShu devadArvAdicUrNam (36) · Śloka 36

দেবদারুং ঘনং মূর্বাং যষ্টীমধু হরীতকীম্| মূত্রঘাতেষু সর্বেষু সুরাক্ষীরজলৈঃ পিবেত্||৩৬||

স০-দেবদার্বাদীন্ সুরাদীনামন্যতমেন সর্বেষু মূত্রাঘাতেষু পিবেত্|

Adhikarana mUtrAghAteShu dhanvayAsasvarasaH, kakuBakvAthaH, triPalAkalkaH, yavAgUH vyAghryAdisiddhA, vIratarAdisiddhA, tAmracUDarasasiddhA, shilAjatu vIratarAdi BAvitam (37-39) · Śloka 39

রসং বা ধন্বযাসস্য কষাযং কুকুভস্য বা| সুখাম্ভসা বা ত্রিফলাং পিষ্টাং সৈন্ধবসংযুতাম্||৩৭|| ব্যাঘ্রীগোক্ষুরকক্বাথে যবাগূং বা সফাণিতাম্| ক্বাথে বীরতরাদের্বা তাম্রচূডরসেঽপি বা||৩৮|| অদ্যাদ্বীরতরাদ্যেন ভাবিতং বা শিলাজতু| |৩৯|

স০-ধন্বযবাসকস্য রসং বা ককুভস্য ক্বাথং বা ত্রিফলামুষ্ণোদকেন পিষ্টাং সৈন্ধবান্বিতাং বা পিবেত্| কণ্টকারিকাগোক্ষুরক্বাথসিদ্ধাং বা যবাগূং সফাণিতাং পিবেত্| বীরতরাদেঃ ক্বাথে বা সিদ্ধাং পেযাং পিবেত্| অথবা, তাম্রচূডস্য-কুক্কুটস্য, মাংসরসে সিদ্ধাং পেযাং পিবেত্| শিলাজতু বীরতরাদ্যেন বা গণেন ভাবিতমদ্যাত্|

Adhikarana ashmarIcyutau rathAdigamanam (39-40) · Śloka 40

| মদ্যং বা নিগদং পীত্বা রথেনাশ্বেন বা ব্রজেত্||৩৯|| শীঘ্রবেগেন সঙ্ক্ষোভাত্তথাঽস্য চ্যবতেঽশ্মরী| |৪০|

স০-অথবা, পুরাণং মদ্যং পীত্বা রথেন বাঽশ্বেন বা শীঘ্রবেগেন গচ্ছেত্| তথা-তেন প্রকারেণ, সঙ্ক্ষোভিতস্যতস্য্নাশ্মরী চ্যবতে|

Adhikarana mUtrAghAteShu vIratarAdiH, virecanArthaM tailvakaM sarpiH, bastikarma (40-41) · Śloka 41

| সর্বথা চোপযোক্তব্যো বর্গো বীরতরাদিকঃ||৪০|| রেকার্থে তৈল্বকং সর্পির্বস্তিকর্ম চ শীলযেত্| বিশেষাদুত্তরান্ বস্তীন্|৪১|

স০-[সর্বথা-] সর্বেণ চ প্রকারেণ ক্বাথপেযাজলাদিষু, বীরতরাদিকো যোজ্যঃ| বিরেচনার্থং তৈল্বকং-"শম্যাকেন" (হৃ.চি.অ.৩|১৫২) ইত্যাদিনা সাধিতং সর্পিরুপযোক্তব্যম্| তথা, বস্তিকর্ম-"প্রাক্ স্নেহ একঃ" (হৃ.সূ.অ.১৯|৬৩) ইত্যাদিকং শীলযেত্| বিশেষেণোত্তরবস্তীনভ্যসেত্|

Adhikarana mUtrAghAteShu uttarabastirvisheShataH, shukrAshmaryAM pramadAsevanam (41-43) · Śloka 43

| শুক্রাশ্মর্যাং তু শোধিতে||৪১|| তৈর্মূত্রমার্গে বলবান্ শুক্রাশযবিশুদ্ধযে| পুমান্ সুতৃপ্তো বৃষ্যাণাং মাংসানাং কুক্কুটস্য চ||৪২|| কামং সকামাঃ সেবেত প্রমদা মদদাযিনীঃ| |৪৩|

স০-শুক্রাশ্মর্যাং চ তৈঃ-উত্তরবস্তিভিঃ, মূত্রমার্গে শোধিতে সতি পুমান্ বৃষ্যাণাং দ্রব্যাণাং কুক্কুটস্য মাংসানাং চ সুহিতঃ সন্ যথেচ্ছং মদদাযিনীঃ প্রমদাঃ সেবেত শুক্রাশযবিশুদ্ধযে| কুক্কুটস্য বৃষ্যত্বেনৈব সিদ্ধে গ্রহণেঽতিশযেন কুক্কুটস্যাত্র পথ্যত্বমিতি জ্ঞাপনার্থং [ পুনঃ ] উপাদানম্|

Adhikarana evamupashamABAve rAj~jaH prashrnapUrvakaM shastrAvacAraNam (43-44) · Śloka 44

| সিদ্ধৈরুপক্রমৈরেভির্ন চেচ্ছান্তিস্তদা ভিষক্||৪৩|| ইতি রাজানমাপৃচ্ছ্য শস্ত্রং সাধ্ববচারযেত্| |৪৪|

স০-এভিঃ-পূর্বোক্তৈঃ, উপক্রমৈঃ সিদ্ধৈঃ-অশ্মরীহরৈঃ, যদি শমো ন স্যাত্, তদেতি রাজানমাপৃচ্ছ্যাশ্মর্যাহরণং শস্ত্রং সাধ্ববচারযেত্|

Adhikarana prashrnaprakAraH (44-45) · Śloka 45

কিমাপৃচ্ছ্য ? ইত্যাহ | অক্রিযাযাং ধ্রুবো মৃত্যুঃ ক্রিযাযাং সংশযো ভবেত্||৪৪|| নিশ্চিতস্যাপি বৈদ্যস্য বহুশঃ সিদ্ধকর্মণঃ| |৪৫|

স০-হে নৃপতে জাতব্যাধাবক্রিযাযাং-চিকিত্সাং বিনা, ধ্রুবঃ-আবশ্যং, মৃত্যুঃ স্যাত্| অপরং চ ক্রিযাযাং-চিকিত্সাযাং ক্রিযমাণাযাং, নিশ্চিতস্যাপি-শাস্ত্রার্থবিদোঽপি, বৈদ্যস্য তথা বহুশঃ-অনেকশঃ, সিদ্ধকর্মণো-নিষ্পন্নক্রিযাক্রমস্যাপি, সংশযো ভবেত্-কদাচিজ্জীবতি ন বা, এবংপ্রকারেণ রাজানমাপৃচ্ছয|

Adhikarana shastrakarmavidhiH (45-55) · Śloka 55

| অথাতুরমুপস্নিগ্ধশুদ্ধমীষচ্চ কর্শিতম্||৪৫|| অভ্যক্তস্বিন্নবপুষমভুক্তং কৃতমঙ্গলম্| আজানুফলকস্থস্য নরস্যাঙ্গ্কে ব্যাপাশ্রিতম্||৪৬|| পূর্বেণ কাযেনোত্তানং নিষণ্ণং বস্ত্রচুম্ভলে| ততোঽস্যাকুঞ্চিতে জানুকূর্পরে বাসসা দৃঢম্||৪৭|| সহাশ্রযমনুষ্যেণ বদ্ধস্যাশ্বাসিতস্য চ| নাভেঃ সমন্তাদভ্যজ্যাদধস্তস্যাশ্চ বামতঃ||৪৮|| মৃদিত্বা মুষ্টিনাঽঽক্রামেদ্যাবদশ্মর্যধোগতা| তৈলাক্তে বর্ধিতনখে তর্জনীমধ্যমে ততঃ||৪৯|| অদক্ষিণে গুদেঽঙ্গুল্যৌ প্রণিধাযানুসেবনি| আসাদ্য বলযত্নাভ্যামশ্মরীং গুদমেঢ্রযোঃ||৫০|| কৃত্বাঽন্তরে তথা বস্তিং নির্বলীকমনাযতম্| উত্পীডযেদঙ্গুলিভ্যাং যাবদ্গ্রন্থিরিবোন্নতম্||৫১|| শল্যং স্যাত্সেবনীং মুক্ত্বা যবমাত্রেণ পাটযেত্| অশ্মমানেন ন যথা ভিদ্যতে সা তথাঽঽহরেত্||৫২|| সমগ্রং সর্পবক্রেণ, স্ত্রীণাং বস্তিস্তু পার্শ্বগঃ| গর্ভাশযাশ্রযস্তাসাং শস্ত্রমুত্সঙ্গবত্ততঃ||৫৩|| ন্যসেদতোঽন্যথা হ্যাসাং মূত্রস্রাবী ব্রণো ভবেত্| মূত্রপ্রসেকক্ষণনান্নরস্যাপ্যপি চৈকধা||৫৪|| বস্তিভেদোঽশ্মরীহেতুঃ সিদ্ধিং যাতি ন তু দ্বিধা| |৫৫|

স০-অথ-রাজপৃচ্ছনাদনন্তরম্, আতুরমুপস্নিগ্ধাদিরূপং কৃত্বা ততোঽস্য নাভেরধোঽভ্যজ্যাত্| পূর্বমুপস্নিগ্ধঃ পশ্চাচ্ছুদ্ধস্তমুপস্নিগ্ধশুদ্ধম্| তথা, অভুক্তং-অকৃতাহারম্| তথা, মনাক্ কর্শিতম্| তথা, অভ্যক্তস্বিন্নশরীরং চ| তথা, কৃতমঙ্গলং-বিহিতস্বস্ত্যযনম্| তথা, নরস্যান্যস্যাঙ্কমাশ্রিতম্| কিম্ভূতস্য ? আজানুফলকস্থস্য| ফলকঃ-আসনবিশেষঃ, আজানুজানুপ্রমাণো যঃ ফলকস্তস্মিন্ স্থিতস্য| তথা, পূর্বেণ কাযেনোত্তানম্| তথা, বস্ত্রচুম্ভলে নিষণণম্| চুম্ভলঃ-তৃণমযো ঘটাদীনাং চলনরক্ষণার্থমাধারবিশেষো যঃ ক্রিযতে স উচ্যতে, তথারূপো বস্ত্রমযচুম্ভলো বস্ত্রচুম্ভলঃ,-বস্ত্রং বেষ্টযিত্বা কৃত আসনবিশেষঃ, তস্মিন্নুপবিষ্টম্| [ততোঽস্য-] তথাভূতস্যানন্তরং, আকুঞ্চিতে-ঈষত্কুটিলীকৃতে, জানুকূর্পরে সতি| জানুনী চ কর্পূরে চ জানুকর্পূরং, তস্মিন্| তথা, আশ্রযমনুষ্যেণ সহ বাসসা সূত্রৈর্বা বদ্ধস্য-দৃঢং কৃত্বা এবংযন্ত্রিতস্য, আশ্রযশ্চাসৌ মনুষ্যশ্চ| কস্যাশ্রযঃ ? প্রকৃতত্বাদাতুরস্য, তমাশ্রিত্যাতুরস্য স্থিতত্বাত্| তথা, আশ্বাসিতস্য-নিরামযো ভবস্রীত্যেবংপ্রাযাভির্বাগ্ভিঃ শীতপবনাদিভিশ্চ সান্ত্বিতস্য| ততো নাভেরধঃ সমন্তাত্-পরিতঃ, অভ্যজ্যাত্| তস্যাশ্চ-নাভেঃ, বামতো-বামপার্শ্বে, মৃদিত্বা মুষ্টিনাঽঽক্রামেত্-পীডযেত্, তাবদ্যাবদশ্মর্যধো গতা-অধঃ প্রতিপন্না| ততঃ-অনন্তরং, অদক্ষিণে-বামে, তর্জনীমধ্যাঙ্গুল্যৌ বর্ধিতনখে তথা তৈলাভ্যক্তে কৃত্বা গুদে প্রণিধাযানুসেবনি| অনন্তরং বলযত্নাভ্যাং আসাদ্য-অশ্মরীং প্রাপ্য, গুদমেঢ্রযোরন্তরে-মধ্যে কৃত্বা, কথম্ ? কৃত্বা-তত্র নীত্বা, তথা বস্তিং নির্বলিকং কৃত্বা, তথা তমনাযতং-অবিস্তীর্ণং সন্নিবেশ্য, অনন্তরমঙ্গুলিভ্যাং-বামহস্ততর্জনীমধ্যমাভ্যাং, প্রকৃতত্বাদশ্মরীমুত্পীডযেত্| তাবদ্যাবচ্ছল্যং-অশ্মর্যাখ্যং, গ্রন্থিরিবোন্নতং স্যাত্| অনন্তরং সেবন্যা বামপার্শ্বে সেবনীং যবমাত্রেণ ত্য(মু)ক্ত্বা-বর্জযিত্বা, পাটযেচ্ছস্ত্রেণ| কিযন্মাত্রম্ ? অশ্মমানেন,-অশ্মরীপ্রমাণেন, ন তু ততোঽধিকমূনং বা| ব্রণং চ কৃত্বাঽশ্মরীং সমগ্রং-নিরবশেষং যথা ভবত্যেবং, সর্পফণবদগ্রবক্রেণ যন্ত্রেণাহরেত্,-তথা চাকর্ষেদ্যথা সা হ্রিযমাণা ন ভিদ্যতে| ভিন্না হি পুনর্বৃদ্ধিমিযাত্| স্ত্রীণাং তু বস্তিঃ পার্শ্বতো ভবন্ গর্ভাশযাশ্রযো যস্মাত্তত উত্সঙ্গবদধঃ শস্ত্রং ন্যসেত্-পাতযেত্| অতঃ-অস্মাচ্ছস্ত্রপাতনবিধানাত্, অন্যথাঽশ্মর্যাহরণার্থং শস্ত্রপাতনেন মূত্রস্রাবী ব্রণো ভবেত্| ন কেবলং স্ত্রীণাং মূত্রপ্রসেকক্ষণনান্মূত্রস্রাবী ব্রণো ভবেত্| যাবদ্ দীর্ঘকালানুবন্ধী মূত্রপ্রসেকক্ষণনান্নরস্যাপি| অপি চ-অন্যচ্চ, একধা-একতো, বস্তিভেদোঽশ্মরীহেতুঃ-তন্নিমিত্তঃ, সিধ্যতি ক্রিযাভ্যাসান্নিত্যমতিবৃদ্ধত্বাচ্চ শল্যস্যেতি, ন তু সহসা শস্ত্রাদ্যভিঘাতহেতুজ একতো ভিন্নোঽপি বস্তিঃ সিধ্যতি| মর্মবিভাগেঽপ্যবাদীত্ (হৃ. শা. অ. ৪|১০)- "ধনুর্বক্রো বস্তিঃ সদ্যো নিহন্তি" ইতি| অশ্মরীহেতুরপি যো বস্তিভেদো দ্বিধা-উভযতঃ, সোঽপি ম সিধ্যতি, ব্রণস্বভাবাত্|

Adhikarana vishalyasya vidhiH (55-56) · Śloka 56

| বিশল্যমুষ্ণপানীযদ্রোণ্যাং তমবগাহযেত্||৫৫|| তথা ন পূর্যতেঽস্ত্রেণ বস্তিঃ, পূর্ণে তু পীডযেত্| মেঢ্রান্তঃ ক্ষীরিবৃক্ষাম্বু|৫৬|

স০-বিশল্যং-নির্গতাশ্মরীকং, উষ্ণপানীযদ্রোণ্যাং তং-আতুরং, অবগাহযেত্| তথা-তেনবগাহনেন, বস্তিরস্রেণ ন পূর্যতে| এবমপি কৃতে দৈবদস্রেণ তু পূর্ণে বস্তৌ ক্ষীরিবৃক্ষাম্বু মেঢ্রান্তঃ-মেঢ্রে, পীডযেত্| ক্ষীরিবৃক্ষকষাযেণোত্তরবস্তিং দদ্যাদিত্যর্থঃ| ন্যগ্রোধোদুম্বরাশ্বত্থকপীতনপ্লক্ষাঃ-ক্ষীরিণঃ|

Adhikarana mUtrasaMshuddhau guDasauhityam, yavAgUH, odanam, mAMsarasAH (56-58) · Śloka 58

| মূত্রসংশুদ্ধযে ততঃ||৫৬|| কুর্যাট্গুডস্য সৌহিত্যং মধ্বাজ্যাক্তব্রণঃ পিবেত্| দ্বৌ কালৌ সঘৃতাং কোষ্ণাং যবাগূং মূত্রশোধনৈঃ||৫৭|| ত্র্যহং, দশাহং পযসা গুডাঢ্যেনাল্পমোদনম্| ভুঞ্জীতোর্ধ্বং ফলাম্লৈশ্চ রসৈর্জাঙ্গলচারিণাম্||৫৮||

স০-ততঃ-অনন্তরং, মূত্রস্য সংশুদ্ধ্যর্থং গুডস্য সৌহিত্যং-তৃপ্তিং, কুর্যাত্| ততো মধ্বাজ্যাক্তব্রণো নরো দ্বৌ কালৌ [ মূত্রশোধনৈঃ- ] ত্রপুসৈর্বারুকূষ্মাণ্ডগোক্ষুরাদিভিঃ কৃতাং, যবাগূং সঘৃতাং কোষ্ণাং ত্র্যহং পিবেত্| অনন্তরং দশাহং গুডাঢ্যেন-বহুগুডেন, ক্ষীরেণাল্পমোদনমদ্যাত্| উর্ধ্বং-দশাহাদনন্তরং, জাঙ্গলচারিণাং প্রাণিনাং রসৈর্মাংসরসৌদনং চ মাত্রাযা ভুঞ্জীত| ফলাম্লৈরিতি কোলদাডিমাদ্যম্লৈঃ, ন তু মস্তুকাঞ্জিকাদ্যম্লৈরিত্যর্থঃ|

Adhikarana ashmarIvraNe prakShAlanam, lepaH, tailam (59-60) · Śloka 60

ক্ষীরিবৃক্ষকষাযেণ ব্রণং প্রক্ষাল্য লেপযেত্| প্রপৌণ্ডরীকমঞ্জিষ্ঠাযষ্ট্যাহ্বনযনৌষধৈঃ||৫৯|| ব্রণাভ্যঙ্গে পচেত্তৈলমেভিরেব নিশান্বিতৈঃ| |৬০|

স০-ক্ষীরিবৃক্ষকষাযেণ ব্রণং প্রক্ষাল্য প্রপৌণ্ডরীকাদিভির্লেপযেত্| নযনৌষধং-পাট্টিকারোধ্রম্| এভিরেব-প্রপৌণ্ডরীকাদিভিঃ, হরিদ্রান্বিতৈর্ব্রণাভ্যঙ্গবিষযে তৈলং পচেত্|

Adhikarana ashmarI vraNe svedaH, agacCati mUtre dAhaH, gacCatimUtre bastayaH (60-62) · Śloka 62

| দশাহং স্বেদযেচ্চৈনং, স্বমার্গং সপ্তরাত্রতঃ||৬০|| মূত্রে ত্বগচ্ছতি দহেদশ্মরীব্রণমগ্নিনা| স্বমার্গপ্রতিপত্তৌ তু স্বাদুপ্রাযৈরুপাচরেত্||৬১|| তং বস্তিভিঃ| |৬২|

স০-এনং চ ব্রণং দশাহং স্বেদযেত্| স্বেদনাদনন্তরং তু- পুনঃ, সপ্তরাত্রেণ স্বমার্গং মূত্রেঽগচ্ছতি সত্যশ্মরীব্রণমগ্নিনা দহেদ্বৈদ্য ইতি| মূত্রস্য স্বমার্গপ্রতিপত্তৌ সত্যাং তং-আতুরং, স্বাদুপ্রাযৈঃ-মধুরভূযিষ্ঠদ্রব্যসাধিতৈঃ, বস্তিভিঃ-উত্তরবস্ত্যাদিভেদভিন্নৈঃ, উপাচরেত্-উপক্রমেত্|

Adhikarana rUDhavraNe~api varShaparyantaM nagAdyArohaNaniShedhaH (62) · Śloka 62

ন চারোহেদ্বর্ষং রূঢব্রণোঽপি সঃ| নগনাগাশ্ববৃক্ষস্ত্রীরথান্নাপ্সু প্লবেত চ||৬২||

স০-রূঢব্রণোঽপি [সঃ-] অশ্মর্যাতুরো, বর্ষং যাবন্নগাদীন্নারোহেত্| অপ্সু চ ন প্লবেত|

Adhikarana shastrakarmaNi varjyAni marmANi (11) · Śloka 11

মূত্রশুক্রবহৌ বস্তিবৃষণৌ সেবনীং গুদম্| মূত্রপ্রসেকং যোনিং চ শস্ত্রেণাষ্টৌ বিবর্জযেত্||৬৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে মূত্রাঘাতচিকিত্সিতং নামৈকাদশোঽধ্যাযঃ||১১||

স০-অশ্মরীব্রণাবসরে তদর্থমন্যার্থমপি মূত্রবহাদীনি [ অষ্টৌ ] মর্মাণি শস্ত্রেণ বর্জযেত্| তত্র মূত্রবহস্রোতশ্ছেদান্মূত্রপূর্ণবস্তের্মরণং স্যাত্, শুক্রবহস্রোতশ্ছেদানমরণং ক্লৈব্যং বা, বস্তিগুদচ্ছেদাত্সদ্যো মরণম্, বৃষণস্রোতশ্ছেদাত্ ধ্বজভঙ্গঃ, সেবনীযোনিচ্ছেদাদ্রুজাপ্রাদুর্ভাবঃ, মূত্রপ্রসেকস্রোতশ্ছেদান্মূত্রপ্রস্রবণমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে মূত্রাঘাতচিকিত্সিতং নামৈকাদশোঽধ্যাযঃ সমাপ্তঃ|| ১১||