12. pramēhacikitsitādhyāyaḥ

Adhikarana adhyAyopakramaH · Śloka

মূত্রাঘাতচিকিত্সিতাদনন্তরম্ প্রমেহচিকিত্সিতব্যাখ্যানমুপক্রম্যতে|

Adhikarana pramehacikitsitAdhyAyaH (2-3) · Śloka 3

অথাতঃ প্রমেহচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| )|৩|

স০-সম্বন্ধশ্চাস্য পূর্ববদ্বোধ্যঃ|

Adhikarana pramehe vamanarecane, pramehe AsthApanam, shuddhe mAMsarasaistarpaNam (1-3) · Śloka 3

মোহিনো বলিনঃ কুর্যাদাদৌ বমনরেচনে| স্নিগ্ধস্য সর্ষপারিষ্টনিকুম্ভাক্ষকরঞ্জজৈঃ||১|| তৈলৈস্ত্রিকণ্টকাদ্যেন যথাস্বং সাধিতেন বা| স্নেহেন মুস্তদেবাহ্বনাগরপ্রতিবাপবত্||২|| সুরসাদিকষাযেণ দদ্যাদাস্থাপনং ততঃ| ন্যগ্রোধাদেস্তু পিত্তার্তং রসৈঃ শুদ্ধং চ তর্পযেত্||৩||

স০-বলবতো মেহিনঃ পুংসোঽপরেভ্য উপক্রমেভ্যস্তত্তদ্যোগ্যেভ্যঃ প্রথমং বমনবিরেচনে কুর্যান্মেহক্লেদপ্রশমনায| কিম্ভূতস্য ? সর্ষপাদিজৈস্তৈলৈঃ স্নিগ্ধস্য, ত্রিকণ্টকাদ্যেন বা স্নেহেনস্নিগ্ধস্য, "ত্রিকণ্টকনিশারোধ্র" (শ্লো. ১৭) ইত্যাদিস্নেহো বক্ষ্যমাণঃ, যথাস্বং দোষসাত্ম্যাদিবশাদ্দ্রব্যৈঃ সাধিতেন বা স্নেহেন স্নিগ্ধস্য| ততো-বমনবিরেচনকরণাদনন্তরং জাতবলায মেহিনে, "সুরসযুগ" (হৃ. সূ. অ. ১৫|৩০) ইত্যাদেঃ সম্বন্ধিনা কষাযেণাস্থাপনং দদ্যাত্| কিম্ভূতম্ ? মুস্তাদিপ্রতিবাপবত্| স প্রতিবাপো বিদ্যতে যস্য তদেবম্| পিত্তলে পুনঃ "ন্যগ্রোধপিপ্পল" (হৃ. সূ. অ. ১৫|৪১) ইত্যাদেঃ কষাযেণাস্থাপনং দদ্যাত্| প্রতিবাপান্তরানির্দেশাদত্র পূর্বোক্ত এব প্রতিবাপো যোজ্যঃ| অনন্তরং শুদ্ধং প্রমেহিণং রসৈস্তর্পযেত্| যদ্যপি রসৈরিতি সামান্যনির্দেশাত্ত্রিবিধদেশসঞ্জাতপ্রাণিমাংসরসৈস্তর্পণং প্রাপ্তং তথাঽপি যোগ্যতাবশাত্ জাঙ্গলপ্রাণিমাংসরসৈস্তর্পযেদিতি বোধ্যম্, ন ত্বানূপাদিমাংসরসৈরিতি| তেষাং মেদোমূত্রকফাবহত্বেন ব্যাধিবর্ধনহেতুত্বাত্|

Adhikarana atyapatarpaNe mUtragrahAdyAH, tato~anubandharakShArthaM shamanAni (4) · Śloka 4

মূত্রগ্রহরুজাগুল্মক্ষযাদ্যাস্ত্বপতর্পণাত্| ততোঽনুবন্ধরক্ষার্থং শমনানি প্রযোজযেত্||৪||

স০-যতোঽপতর্পণান্মূত্রগ্রহাদীনি জাযন্তে ততো হেতোরনুবন্ধরক্ষার্থং শমনানি প্রযোজযেত্| অন্যথা প্রমেহ উপশান্তোঽপি নিদানলেশমাসাদ্য পুনঃ প্রাদুর্ভবেত্| ননু, মূত্রগ্রহাদীন্যেতাবদস্তু শেষা আদিশব্দেনৈব গ্রহীষ্যন্তে| কিং মূত্রগ্রহরুজাগুল্মক্ষযাদ্যা ইতি ? সত্যম্| মূত্রগ্রহরুজাগুল্মক্ষযা যথাঽবশ্যমপতর্পণাত্ প্রমেহিণো জাযন্তে তথা নাপরে তজ্জাতীযা ইতি|

Adhikarana ashodhye pramehe ca shamanAni (5) · Śloka 5

অসংশোধ্যস্য তান্যেব সর্বমেহেষু পাযযেত্| |৫|

স০-অসংশোধ্যো-বমনে গর্ভিণ্যাদিঃ, বিরেকে নবজ্বরাদিঃ, এতস্যাসংশোধ্যস্য তান্যেব-শমনানি, সর্বেষু প্রমেহেষু পাযযেত্| এবেত্যবধারণে, ন তু শোধনাদিরূপমিত্যর্থঃ|

Adhikarana sarvaprameheShu haridrAyogaH, dArvpAdikvAthaH, citrakAdikvAthaH guDUcIsvarasaH, AmalakasvarasaH (5-7) · Śloka 7

| ধাত্রীরসপ্লুতাং প্রাহ্ণে হরিদ্রাং মাক্ষিকান্বিতাম্||৫|| দার্বীসুরাহ্বত্রিফলামুস্তা বা ক্বথিতা জলে| চিত্রকত্রিফলাদার্বীকলিঙ্গান্ বা সমাক্ষিকান্||৬|| মধুযুক্তং গুডূচ্যা বা রসমামলকস্য বা| |৭|

স০- আমলকীরসালোডিতাং হরিদ্রাং সমাক্ষিকাং প্রভাতে পাযযেত্| দার্বীদেবদারুবরামুস্তা জলে ক্বথিতা বা পাযযেত্| চিত্রকাদীন্ বা ক্বথিতান্ সমাক্ষিকান্ পাযযেত্| সমাক্ষিকং গুডূচীরসং ধাত্রীরসং বা|

Adhikarana kaPapramehe rodhrAdikaShAyaH, pAThAdikaShAyaH, gAyatryAdikaShAyaH, pittapramehe ushIrAdikAShAyaH, paTolAdikaShAyaH, rodhrAmbvAdikaShAyaH (7-8) · Śloka 8

রোধ্রাভযাতোযদকট্ফলানাং পাঠাবিডঙ্গার্জুনধন্বনানাম্| গাযত্রিদার্বীকৃমিহৃদ্ধবানাং কফে ত্রযঃ ক্ষৌদ্রযুতাঃ কষাযাঃ||৭|| উশীররোধ্রার্জুনচন্দনানাং পটোলনিম্বামলকামৃতানাম্| রোধ্রাম্বুকালীযকধাতকীনাং পিত্তে ত্রযঃ ক্ষৌদ্রযুতাঃ কষাযাঃ||৮||

স০-রোধ্রাদীনাং শ্লোকপাদোক্তানাং কষাযাঃ ক্ষৌদ্রযুতাস্ত্রযঃ কফে হিতাঃ| এবমুশীরাদীনাং মাক্ষিকান্বিতাঃ কষাযাস্ত্রযঃ পিত্তে হিতাঃ| উপজাতিবৃত্তে|

Adhikarana pramehe eBiH saMskRutaM pAnAnnam (9) · Śloka 9

| যথাস্বমেভিঃ পানান্নং যবগোধূমভাবনাঃ||৯||

স০-এভী রোধ্রাদিভির্যথাযোগং পানমন্নং চ কল্পযেত্| যবগোধূমভাবনাশ্চ কল্পযেত্|

Adhikarana vAtapramehe snehAH saMskRutAH (10) · Śloka 10

বাতোল্বণেষু স্নেহাংশ্চ প্রমেহেষু প্রকল্পযেত্| |১০|

স০-বাতাধিকেষু প্রমেহেষু স্নেহাংশ্চ তৈরেব কল্পযেত্| ন কেবলমন্নভাবনাঃ|

Adhikarana sarvapramehe yavAnAM vikRutiH, tRuNadhAnyAni, mudgAdidhAnyAni, SrIkukkuTaH khalaH, kapitthAdiPalAni, tatkRutA rAgaShADavAH, tiktAni shAkAni, madhu triPalA ca, shuShkA BakShyAH, shUlyAni dhanvamAMsAni, ayaskRutiH, jIrNA madhvariShTAdayaH, asanAdisArAdijalam (10-14) · Śloka 14

| অপূপসক্তুবাট্যাদির্যবানাং বিকৃতির্হিতা||১০|| গজাশ্বগুদমুক্তানামথবা বেণুজন্মনাম্| তৃণধান্যানি মুদ্গাদ্যাঃ শালির্জীর্ণঃ সষষ্টিকঃ||১১|| শ্রীকুক্কুটোঽম্লঃ খলকস্তিলসর্ষপকিট্টজঃ| কপিত্থং তিন্দুকং জম্বূস্তত্কৃতা রাগষাডবাঃ||১২|| তিক্তং শাকং মধু শ্রেষ্ঠা ভক্ষ্যাঃ শুষ্কাঃ সসক্তবঃ| ধন্বমাংসানি শূল্যানি পরিশুষ্কাণ্যযস্কৃতিঃ||১৩|| মধ্বরিষ্টাসবা জীর্ণাঃ সীধুঃ পক্বরসোদ্ভবঃ| তথাঽসনাদিসারাম্বু দর্ভাম্ভো মাক্ষিকোদকম্||১৪||

স০-যবানাং বিকৃতিরপূপাদিঃ প্রমেহে হিতা| অথবা, যবানাং গজাশ্বগুদমুক্তানামপূপাদিবিকৃতির্হিতা| বেণুজানাং বা যবানাং বিকৃতির্হিতা| তৃণধান্যানি-নীবারশ্যামাকাদীনি, তথা মুদ্গাদ্যাস্তথা পুরাণশালিঃ ষষ্টিকশ্চেতি হিতানি| শ্রীকুক্কুটসংজ্ঞোঽম্লঃ খলকো হিতঃ| কিম্ভূতঃ ? তিলসর্ষপকিট্টজঃ,- তিলসর্ষপপিণ্যাকজন্মা তদুপাদানকারণো ন মুদ্গাদ্যুপাদানকারণঃ, স চ মালবকেষু প্রসিদ্ধঃ, আর্দ্রকশকলনিস্তুষগোধূমাদিনা চ ক্রিযতে| তথা, কপিত্থাদযো হিতাঃ| তৈঃ-কপিত্থাদিভিঃ, কৃতা রাগাঃ ষাডবাশ্চ হিতাঃ| তিক্তশাকাদীনি চ হিতানি| শ্রেষ্ঠা-ত্রিফলা| শূল্যানীতি শূলে পক্বানি| "শূলাত্পাকে" ("শূলোখাদ্যত্") ইতি যত্| তানি চ সুপক্বত্বাত্ পরিশুষ্কাণি| তথা, অযস্কৃতিঃ-বক্ষ্যমাণা (শ্লো. ২৯)| তথা, মধ্বাদযঃ পুরাণাঃ| পক্বরসজঃ সীধুঃ| তথা, অসনাদিসারবর্গস্যাম্ভো (হৃ. সূ. অ. ১৫|১৯) দর্ভজলং মাক্ষিকোদকং চ হিতম্|

Adhikarana sarvaprameheShu yavasaktuvisheShaH (15) · Śloka 15

বাসিতেষু বরাক্বাথে শর্বরীং শোষিতেষ্বহঃ| যবেষু সুকৃতান্ সক্তূন্ সক্ষৌদ্রান্ সীধুনা পিবেত্||১৫||

স০-তথা, যবেষু সুকৃতান্ সক্তূন্ কৃত্বা সক্ষৌদ্রান্ সীধুনা আলোড্য পিবেত্| পক্বরসোদ্ভবেন তস্য যোগতঃ স ন স্যাত্(?)| যবেষ্বিতি নিমিত্তসপ্তমী| কিম্ভূতেষু যবেষু ? বরাক্বাথে-ত্রিফলাকষাযে, শর্বরীং-সকলাং রাত্রিং, বাসিতেষু-অভিষুতেষু, অনন্তরমহঃ শোষিতেষু| তত্রাত্যন্তসংযোগে দ্বিতীযা|

Adhikarana kaPapitapramehe shAlAdipuShpa cUrNam (16-17) · Śloka 17

শালসপ্তাহ্বকম্পিল্লবৃক্ষকাক্ষকপিত্থজম্| রোহীতকং চ কুসুমং মধুনাঽদ্যাত্সুচূর্ণিতম্||১৬|| কফপিত্তপ্রমেহেষু পিবেদ্ধাত্রীরসেন বা| |১৭|

স০-শালাদিজং পুষ্পং সূক্ষ্মরজীকৃতং মধুনাঽদ্যাত্| কফপিত্তপ্রমেহেষু ধাত্রীরসেন বা পিবেত্|

Adhikarana vAtakaPaje trikaNTakAdi tailam pittaje trikaNTakAdighRutam vAtapittaje kaPapittaje ca ghRutatailam (17-19) · Śloka 19

| ত্রিকণ্টকনিশারোধ্রসোমবল্কবচার্জুনৈঃ||১৭|| পদ্মকাশ্মন্তকারিষ্টচন্দনাগুরুদীপ্যকৈঃ| পটোলমুস্তমঞ্জিষ্ঠামাদ্রীভল্লাতকৈঃ পচেত্||১৮|| তৈলং বাতকফে পিত্তে ঘৃতং মিশ্রেষু মিশ্রকম্| |১৯|

স০-ত্রিকণ্টকাদিভিস্তৈলং পচেদ্বাতকফজে প্রমেহে| পিত্তজে এভিরেব ঘৃতং পচেত্| মিশ্রেষু দোষেষু মিশ্রকং-ঘৃততৈলং, পচেত্|

Adhikarana sarvapramehe dhAnvantaraM ghRutam (19-24) · Śloka 24

| দশমূলশঠীদন্তীসুরাহ্বং দ্বিপুনর্নবম্||১৯|| মূলং স্নুগর্কযোঃ পথ্যাং ভূকদম্বমরুষ্করম্| করঞ্জৌ বরুণান্মূলং পিপ্পল্যাঃ পৌষ্করং চ যত্||২০|| পৃথগ্ দশপলং প্রস্থান্ যবকোলকুলত্থতঃ| ত্রীংশ্চাষ্টগুণিতে তোযে বিপচেত্পাদবর্তিনা||২১|| তেন দ্বিপিপ্পলীচব্যবচানিচুলরোহিষৈঃ| ত্রিবৃদ্বিডঙ্গকম্পিল্লভার্গীবিশ্বৈশ্চ সাধযেত্||২২|| প্রস্থং ঘৃতাজ্জযেত্সর্বাংস্তন্মেহান্ পিটিকা বিষম্| পাণ্ডুবিদ্রধিগুল্মার্শঃশোষশোফগরোদরম্||২৩|| শ্বাসং কাসং বমিং বৃদ্ধিং প্লীহানং বাতশোণিতম্| কুষ্ঠোন্মাদাবপস্মারং ধান্বন্তরমিদং ঘৃতম্||২৪||

স০-স্নুগর্কমূলম্, করঞ্জমূলম্, বরুণমূলম্, পিপ্পলীমূলম্, পৌষ্করং চ যদিতি পুষ্করমূলং চেত্যর্থঃ| দশমূলাদিকং পৃথক্-প্রত্যেকং, দশপলপ্রমাণং যবকোলকুলত্থাংস্ত্রীন্ প্রস্থাংশ্চাষ্টগুণিতে জলে চ বিপচেত্| তেন-জলেন, পাদবর্তিনা-পাদশেষেণ, দ্বিপিপ্পল্যাদিমিশ্চ [ কল্কীকৃতৈঃ ] সামান্যপরিভাষোক্তপ্রমাণাদ্ধৃতাত্প্রস্থং পচেত্| তদ্ধৃতং সর্বান্ প্রমেহান্ পিটিকাদীংশ্চ জযেত্|

Adhikarana sarvapramehe rodhrAsavaH (25-28) · Śloka 28

রোধ্রমূর্বাশঠীবেল্লভার্গীনতনখপ্লবান্| কলিঙ্গকুষ্ঠক্রমুকপ্রিযঙ্গ্বতিবিষাগ্নিকান্||২৫|| দ্বে বিশালে চতুর্জাতং ভূনিম্বং কটুরোহিণীম্| যবানীং পৌষ্করং পাঠাং গ্রন্থিং চব্যং ফলত্রযম্||২৬|| কর্ষাংশমম্বুকলশে পাদশেষে স্রুতে হিমে| দ্বৌ প্রস্থৌ মাক্ষিকাত্ক্ষিপ্ত্বা রক্ষেত্পক্ষমুপেক্ষযা||২৭|| রোধ্রাসবোঽযং মেহর্শঃশ্বিত্রকুষ্ঠারুচিকৃমীন্| পাণ্ডুত্বং গ্রহণীদোষং স্থূলতাং চ নিযচ্ছতি||২৮||

স০-রোধ্রাদি প্রত্যেকং কর্ষপ্রমাণং জলকলশে পাদশেষে স্রুতে শীতে চ মাক্ষিকাত্ দ্বৌ প্রস্থৌ ক্ষিপ্ত্বা পক্ষমাত্রমচলং কৃত্বা রক্ষেত্| অযং রোধ্রাসবো মেহাদীন্নাশযেত্|

Adhikarana sarvapramehe ayaskRutiH (29-32) · Śloka 32

সাধযেদসনাদীনাং পলানাং বিংশতিং পৃথক্| দ্বিবহেঽপাং ক্ষিপেত্তত্র পাদস্থে দ্বে শতে গুডাত্||২৯|| ক্ষৌদ্রাঢকার্ধং পলিকং বত্সকাদিং চ কল্কিতম্| তত্ক্ষৌদ্রপিপ্পলীচূর্ণপ্রদিগ্ধে ঘৃতভাজনে||৩০|| স্থিতং দৃঢে জতুসৃতে যবরাশৌ নিধাপযেত্| খদিরাঙ্গারতপ্তানি বহুশোঽত্র নিমজ্জযেত্||৩১|| তনূনি তীক্ষ্ণলোহস্য পত্রাণ্যালোহসঙ্ক্ষযাত্| অযস্কৃতিঃ স্থিতা পীতা পূর্বস্মাদধিকা গুণৈঃ||৩২||

স০-অসনাদীনাং-"অসনতিনিশ" (হৃ. সূ. অ. ১৫|১৯) ইত্যাদিগণোক্তানাং দ্রব্যাণাং, পৃথক্-প্রত্যেকং, পলানাং বিংশতিং-বিংশতিপলানি, অপাং দ্বিবহে-জলদ্রোণাষ্টকে, সাধযেত্| তত্র-তস্মিন্, পাদশেষে শৃতে শীতে চ সতি গুডস্য দ্বে শতে ক্ষিপেত্| মাক্ষিকস্যার্ধাঢকম্| "বত্সকমূর্বা' (হৃ. সূ. অ. ১৫|৩৩) ইত্যাদিকং চ পৃথক্ পালিকং কল্কিতং কৃত্বা ক্ষিপেত্| অনন্তরমন্তর্মাক্ষিকপিপ্পলীচূর্ণপ্রলিপ্তে ঘৃতভাজনে দৃঢে জতুলিপ্তে স্থিতং যবরাশৌ স্থাপযেত্| অনন্তরং খদিরাঙ্গারতপ্তানি তীক্ষ্ণলোহপত্রাণি তনূনি পুনঃপুনরত্র নিমজ্জযেত্| যাবত্সঙ্ক্ষযং-বিলীনবৃত্তিত্বমাযান্তি| অযস্কৃতিরিযং স্থিতা-সম্পন্না, পীতা পূর্বস্মাত্-রোধ্রাসবাত্, গুণৈরধিকা| অত্র চ সঙ্গ্রহোক্তাদ্দশমূলারিষ্টাদযসঃ পরিমাণং কল্প্যং প্রাযোঽত্র প্রস্থমাত্রম্| এবমন্যত্রাপি দ্রবদ্রব্যমপেক্ষ্য নারসিংহঘৃতাদৌ (হৃ. উ. অ. ৩৯|১৭০) অনযৈব দিশাঽযসঃ পরিমাণং কল্পনীযম্|

Adhikarana sarvapramehe udvartanavyAyAmAdi (33) · Śloka 33

রূক্ষমুদ্বর্তনং গাঢং ব্যাযামো নিশি জাগরঃ| যচ্চান্যচ্ছ্লেষ্মমেদোঘ্নং বহিরন্তশ্চ তদ্ধিতম্||৩৩||

স০-তস্মিন্প্রমেহ উদ্বর্তনং রূক্ষং তথা গাঢং-ন তু শিথিলং, হিতম্| তথা ব্যাযামরাত্রিজাগরৌ চ| অপরমপি যদেবংপ্রাযং শ্লেষ্মমেদোহরং বহিরন্তশ্চ, তচ্চ প্রমেহিণে হিতম্|

Adhikarana sarvapramehe shilAjaturasAyanam (34-36) · Śloka 36

সুভাবিতাং সারজলৈস্তুলাং পীত্বা শিলোদ্ভবাত্| সারাম্বুনৈব ভুঞ্জানঃ শালীন্ জাঙ্গলজৈ রসৈঃ||৩৪|| সর্বানভিভবেন্মেহান্ সুবহূপদ্রবানপি| গণ্ডমালার্বুদগ্রন্থিস্থৌল্যকুষ্ঠভগন্দরান্||৩৫|| কৃমিশ্লীপদশোফাংশ্চ পরং চৈতদ্রসাযনম্| |৩৬|

স০-সারাঃ-অসনখদিরাদযঃ, তেষাং জলৈঃ-ক্বাথৈঃ, শিলাহ্বযাত্তুলাং সুভাবিতাং পীত্বা সারাম্বুনৈব জাঙ্গলপ্রাণিমাংসজৈ রসৈঃ শালীনদন্ সর্বান্মেহান্ সুবহূপদ্রবানপি জযেত্, গণ্ডমালাদীংশ্চ| ইদং চোত্কৃষ্টম্ রসাযনম্|

Adhikarana adhane pramehiNi munivartanAdi (36-37) · Śloka 37

| অধনশ্ছত্রপাদত্ররহিতো মুনিবর্তনঃ||৩৬|| যোজনানাং শতং যাযাত্খনেদ্বা সলিলাশযান্| গোশকৃন্মূত্রবৃত্তির্বা গোভিরেব সহ ভ্রমেত্||৩৭||

স০-ধনরহিতঃ প্রমেহী ছত্রপাদত্ররহিতো মুনিবৃত্তিঃ সন্ যোজনানাং শতং যাযাত্| অথবা, সলিলাশযান্ খনেত্| অথবা, গোশকৃন্মূত্রবর্তনো গোভিরেব সহ ভ্রমেত্|

Adhikarana kRushe bRuMhaNam (38) · Śloka 38

বৃংহযেদৌষধাহারৈরমেদোমূত্রলৈঃ কৃশম্| |৩৮|

স০-কৃশং নরমৌষধযুক্তৈরাহারৈর্বৃংহযেত্| কিম্ভূতৈঃ অমেদোমূত্রকরৈঃ|

Adhikarana piTikAnAM cikitsA (38-39) · Śloka 39

| শরাবিকাদ্যাঃ পিটিকাঃ শোফবত্সমুপাচরেত্||৩৮|| অপক্বা ব্রণবত্পক্বাঃ| |৩৯|

স০-"শরাবিকা কচ্ছপিকা" (হৃ. নি. অ. ১০|২৫) ইত্যাদ্যাঃ পিটিকা অপক্বাঃ সতীঃ শোফবদুপক্রমেত্| পক্বাঃ পুনর্ব্রণবদুপাচরেত্|

Adhikarana piTikAnAM prAgrUpe kShIrivRukShajalAdipAnam, piTikAnAM prAgrUpe tIkShNaM shodhanam (39-40) · Śloka 40

তাসাং প্রাগ্রূপ এব চ| ক্ষীরিবৃক্ষাম্বু পানাযবস্তমূত্রং চ শস্যতে||৩৯|| তীক্ষ্ণং চ শোধনং, প্রাযো দুর্বিরেচ্যা হি মেহিনঃ| |৪০|

স০-তাসাং চ পূর্বরূপাবস্থাযামেব ক্ষীরিবৃক্ষাম্বু পানায শস্যতে ছাগমূত্রং চ| তথা, শোধনং-বিরেচনং, তীক্ষ্ণং শস্যতে| কুতঃ ? ইত্যাহ-যস্মাত্ প্রমেহিণো দুঃখেন বিরেচযিতুং শক্যাঃ|

Adhikarana piTikAnAM vraNaropaNaM tailam, piTikAnAM udvartanakaShAyaH, piTikAnAM pariShekakaShAyaH (40-41) · Śloka 41

| তৈলমেলাদিনা কুর্যাদ্গণেন ব্রণরোপণম্||৪০|| উদ্বর্তনে কষাযং তু বর্গেণারগ্বধাদিনা| পরিষেকোঽসনাদ্যেন পানান্নে বত্সকাদিনা||৪১||

স০-"এলাযুগ্ম" (হৃ. সূ. অ. ১৫|৪৩) ইত্যাদিনা গণেন তৈলং ব্রণরোপণং কুর্যাত্| উদ্বর্তনে "আরগ্বধেন্দ্রযব" (হৃ. সূ. অ. ১৫|১৭) ইত্যাদিনা গণেন কষাযং কুর্যাত্| "অসনতিনিশ" (হৃ. সূ. অ. ১৫|১৯) ইত্যাদিনা পরিষেকহ্ স্যাত্| পানমন্নং চ "বত্সকমূর্বা' (হৃ. সূ. অ. ১৫|৩৩) ইত্যাদিনা সংস্কৃতং কুর্যাত্|

Adhikarana piTikAnAM pAThAdicUrNaM navAyasaM ca (42-43) · Śloka 43

পাঠাচিত্রকশার্ঙ্গষ্টাসারিবাকণ্টকারিকাঃ| সপ্তাহ্বং কৌটজং মূলং সোমবল্কং নৃপদ্রুমম্||৪২|| সঞ্চূর্ণ্য মধুনা লিহ্যাত্তদ্বচ্চূর্ণং নবাযসম্| |৪৩|

স০-পাঠাদীন্ সঞ্চূর্ণ্য মধুনাঽবলেহযেত্| নবাযসং চূর্ণং তদ্বত্-মাক্ষিকেণ লিহ্যাত্|

Adhikarana madhumehinaH shilAjaturasAyanAt punarnavatvam (12) · Śloka 12

মধুমেহিত্বমাপন্নো ভিষগ্ভিঃ পরিবর্জিতঃ||৪৩|| শিলাজতুতুলামদ্যাত্প্রমেহার্তঃ পুনর্নবঃ| ৪৩ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে প্রমেহচিকিত্সিতং নাম দ্বাদশোঽধ্যাযঃ||১২||

স০-মধুমেহিত্বমপি প্রাপ্তো ভিষগ্ভিশ্চ পরিবর্জিতো মেহী শিলাজতুপলশতং [ অদ্যাত্- ] সেবনং কুর্যাত্| কৃতশিলাজতুতুলশ্চাসৌ পুনর্নবো ভবতি| খারণাদে চ বিশেষোপক্রমা উক্তাঃ| যথা-"অশ্বত্থচন্দনাগরুপাঠাক্বাথো জলাভমেহে তু| ইক্ষুরসাভে পাঠাকৃমিহন্তৃসম্বন্ধনঃ ক্বাথঃ|| সান্দ্রাকারে মেহে হিতাঽঽঢকী কর্ণিকারো বা| ক্বাথস্তথাঽর্জুনস্য পাতব্যো বারুণীমেহে|| পিষ্টে সসিতা রজনী পাতব্যা শিশিরতোযেন| নিম্বশ্চ শুক্রমেহে তপ্তজলেনাথবা সুরযা|| সিকতামেহে চিত্রকবাহ্লীককুষ্ঠনিঃক্বাথঃ| শীতলমেহে ক্বাথঃ পিচুমন্দকৃতশ্চ পাতব্যঃ|| পাষাণভিত্তু সুরযা ক্বথিতঃ শস্তঃ শনৈর্মেহে| গোক্ষুরকস্য কষাযো লালামেহে ফলত্রিকেণ সহ|| শল্লক্যুশীরসৈন্ধববচা হিতাঃ ক্ষারমেহিনঃ পিষ্টাঃ| ক্বথিতাশ্চ নীলমেহে রোধ্রসমঙ্গাকদম্বাঃ স্যুঃ|| ক্বাথো বিভীতকস্য তু কল্কো বা কালমেহিনাং শস্তঃ| ধাতকিপদ্মকবিকসাক্বাথঃ কল্কোঽপি বা নিশামেহে|| মাঞ্জিষ্ঠে স্যুস্ত্রিফলা জলদং জলপদ্মকং রোধ্রম্| লোহিতমেহে যুঞ্জ্যাত্ত্রিফলাক্বাথেন সংযুতং গিরিজম্|| বালকং ত্রিবৃতা ধাত্রী মুস্তং চ সরসাঞ্জনম্| কটুকাতিবিষারোধ্রং খাদিরেণাম্ভসা পিবেত্|| প্রাযঃ শোধনমেতদ্ধি প্রধানং সমুদাহৃতম্|" ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে প্রমেহচিকিত্সিতং নাম দ্বাদশোঽধ্যাযঃ সমাপ্তঃ|| ১২||