4. śvāsahidhmācikitsitādhyāyaḥ

Adhikarana adhyAyopakramaH · Śloka

কাসচিকিত্সিতাদনন্তরং শ্বাসহিধ্মাচিকিত্সিতং ব্যাখ্যাযতে| সম্বন্ধোঽত্র নিদান এবোক্তঃ |

Adhikarana shvAsahidhmAcikitsitAdhyAyaH shvAsacikitsitaM hidhmAsvapi kartavyam (2-1) · Śloka 1

অথাতঃ শ্বাসহিধ্মাচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| শ্বাসহিধ্মা যতস্তুল্যহেত্বাদ্যাঃ, সাধনং ততঃ| তুল্যমেব|১|

স০-যস্মাত্ শ্বাসহিধ্মাস্তুল্যহেত্বাদ্যাঃ| আদিগ্রহণাত্ প্রাগ্রূপাদযো গৃহ্যন্তে| নিদানে হ্যুক্তম্ (হৃংই.অ.৪/১৮)-"শ্বাসৈকহেতুপ্রাগ্রূপসঙ্খ্যাপ্রকৃতিসংশ্রযাঃ|" ইতি| ততঃ-তস্মাদ্ধেতোঃ, সাধনং- চিকিত্সিতং, শ্বাসহিধ্মযোস্তুল্যমেব বিহিতম্|

Adhikarana tatra prathamaM svedaH (1-2) · Śloka 2

| তদার্থং চ পূর্বং স্বেদৈরুপাচরেত্||১|| স্নিগ্ধৈর্লবণতৈলাক্তং| |২|

স০-তদার্তং-শ্বাসহিধ্মাতুরং, পূর্বং-উপক্রমেভ্যঃ সর্বেভ্যোঽপি প্রাক্, স্বেদৈরুপাচরেত্| কিম্ভূতৈঃ ? স্নিগ্ধৈঃ-ন রূক্ষৈঃ, বাতকোপভযাত্| কিম্ভূতম্ ? লবণান্বিতেন তৈলেনাভ্যক্তম্|

Adhikarana svedaPalam (2-3) · Śloka 3

কিমেবং সতি স্যাত্ ? ইত্যাহ তৈঃ খেষু গ্রথিতঃ কফঃ| সুলীনোঽপি বিলীনোঽস্য কোষ্ঠং প্রাপ্তঃ সুনির্হরঃ||২|| স্রোতসাং স্যান্মৃদুত্বং চ মরুতশ্চানুলোমতা| |৩|

সং-তৈঃ-স্বেদৈঃ, খেষু-স্রোতঃসু, যোঽস্য-শ্বাসহিধ্মাবতো, গ্রথিতঃ-পিণ্ডিতঃ, কফঃ সুলীনোঽপি-অতিশযেন শ্লিষ্টোঽন্ত র্ভূতঃ, অনযেতিকর্তব্যতযা বিলীনোঽস্য কোষ্ঠং প্রাপ্তঃ সুনির্হরঃ স্যাত্-সুখেন নির্হর্তুং শক্যতে| তথা, স্রোতসাং-বাযুস্তব্ধানাং, মৃদুত্বং চ স্যাত্| মরুতশ্চানুলোমতা-স্বমার্গগামিত্বং স্যাত্|

Adhikarana svinnaBojanam (3-5) · Śloka 5

| স্বিন্নং চ ভোজযেদন্নং স্নিগ্ধমানূপজৈ রসৈঃ||৩|| দধ্যুত্তরেণ বা, দদ্যাত্ততোঽস্মৈ বমনং মৃদু| বিশেষাত্কাসবমথুহৃদ্গ্রহস্বরসাদিনে||৪|| পিপ্পলীসৈন্ধবক্ষৌদ্রযুক্তং বাতাবিরোধি যত্| |৫|

স০-স্নিন্নং চ সন্তমাতুরং স্নিগ্ধং-শাল্যাদিকং ন রূক্ষং যবাদিকম্, আনূপজৈঃ-সূকরাদিমাংসজৈ রসৈঃ সহ, ভোজযেত্| অথবা স্বেদাদনন্তরমস্মৈ-শ্বাসহিধ্মাবতে, দধ্যুত্তরেণ-দধিসরেণ, বমনং মৃদু দদ্যাত্| বিশেষেণ কাসাদিমতে বমনং দদ্যাত্| তচ্চ বমনং পিপ্পলীসৈন্ধবক্ষৌদ্রযুক্তং বাতাবিরোধি-বাতং ন করোতি, যত্তদ্দদ্যাত্|

Adhikarana vamanaPalam (5-6) · Śloka 6

| নির্হৃতে সুখমাপ্ন্পোতি স কফে দুষ্টবিগ্রহে||৫|| স্রোতঃসু চ বিশুদ্ধেষু চরত্যবিহতোঽনিলঃ| |৬|

স০-নির্হৃতে কফেঽসৌ (সঃ)-শ্বাসহিধ্মাবান্, সুখমশ্রুতে, রুঙ্ক্ষিবৃত্তেঃ| কিম্ভূতে কফে ? দুষ্টো বিগ্রহঃ-শরীরং, যেন তস্মিন্| তথা, স্রোতঃসু বিশুদ্ধেষু-উপলেপাদিরহিতেষু, বাযুরবিহতো-ন কেনচিদ্রুদ্ধগতিঃ, স্রোতঃসু চরতি|

Adhikarana virecanam (6-7) · Śloka 7

| ধ্মানোদাবর্ততমকে মাতুলুঙ্গাম্লবেতসৈঃ||৬|| হিঙ্গুপীলুবিডৈর্যুক্তমন্নং স্যাদনুলোমনম্| সসৈন্ধবং ফালাম্লং বা কোষ্ণং দদ্যাদ্বিরেচনম্||৭||

স০-ধ্মানং-আনাহঃ| উদাবর্তঃ-শকৃদাদীনামপ্রবৃত্তিঃ| তমকঃ-শ্বাসবিশেষঃ| ধ্মানং চোদাবর্তশ্চ তমকশ্চ ধ্মানোদাবর্ততমকম্, তস্মিন্-প্রকৃতত্বাত্ তথাবিধে হিধ্মাশ্বাসবতি| মাতুলুঙ্গাদ্যৈস্তথা হিঙ্গুপীলুবিডৈর্যুক্তমন্নমনুলোমকারি স্যাত্| অথবা, অস্যামবস্থাযাং সৈন্ধবেন সহ ফলাম্লং ফলেন-বাতানুলোমনেন বীজপূরাদিনা, অম্লং-অম্লীকৃতং, তথা কোষ্ণং-ঈষদুষ্ণং, বিরেচনং দদ্যাত্|

Adhikarana shodhane yuktiH (8-9) · Śloka 9

স্রোতঃশুদ্ধ্যর্থং কিমেবং ক্রিযতে ? ইত্যাহ এতে হি কফসংরুদ্ধগতিপ্রাণপ্রকোপজাঃ| তস্মাত্তন্মার্গশুদ্ধ্যর্থমূর্ধ্বাধঃ শোধনং হিতম্||৮|| উদীর্যতে ভৃশতরং মার্গরোধাদ্বহজ্জলম্| যথা তথাঽনিলস্তস্য মার্গমস্মাদ্বিশোধযেত্||৯||

স০-যস্মাদেতে-হিধ্মাশ্বাসাঃ| কফেন সংরুদ্ধা গতির্যস্য স এবম্, কফসংরুদ্ধগতিশ্বাসৌ প্রাণাশ্চ, তস্য প্রকোপঃ, ততো জাতাঃ| যত এবং তস্মাদ্ধেতোস্তন্মার্গশুদ্ধ্যর্থং-তস্য প্রাণস্য বাযোর্মার্গবিশুদ্ধিনিমিত্তং, ঊর্ধ্বমধশ্চ শোধনং হিতম্| এতচ্চ দৃষ্টান্তদ্বারেণ স্পষ্টযতি-উদীর্যত ইত্যাদি| যথা মার্গস্য রোধাজ্জলং বহত্ ভৃশতরং-সুতরাং, উদীর্যতে-বৃদ্ধিং যাতি| তথাঽনিলঃ স্বভাবতো বহন্ মার্গরোধাত্-মার্গস্যাবরণাত্, ভৃশতরমুদীর্যতে| তস্য-বাযোঃ, মার্গমস্মাত্-যথোক্তাত্কারণাত্, বিশোধযেত্|

Adhikarana shodhanenAshAntau dhUmaH kartavyaH (10) · Śloka 10

অশান্তৌ কৃতসংশুদ্ধের্ধূমৈর্লীনং মলং হরেত্| |১০|

স০-পূর্বস্যাং ক্রিযাযাং কৃতাযামপ্যশমে সতি, কৃতসংশুদ্ধেঃ-শ্বাসহিধ্মার্তস্য, লীনং-সূক্ষ্মস্রোতঃশ্লিষ্টং, মলং-কফাখ্যং, ধূমৈঃ-বক্ষ্যমাণৈঃ, হরেত্|

Adhikarana dhUmaprayogAH (10-14) · Śloka 14

| হরিদ্রাপত্রমেরণ্ডমূলং লাক্ষাং মনঃশিলাম্||১০|| সদেবদার্বলং মাংসীং পিষ্ট্বা বর্তিং প্রকল্পযেত্| তাং ঘৃতাক্তাং পিবেদ্ধূমং যবান্ বা ঘৃতসংযুতান্||১১|| মধূচ্ছিষ্টং সর্জরসং ঘৃতং বা গুরু বাঽগুরু| চন্দনং বা তথা শৃঙ্গং বালান্বা স্নাব বা গবাম্||১২|| ঋক্ষগোধকুরঙ্গৈণচর্মশৃঙ্গখুরাণি বা| গুগ্গুলুং বা মনোহ্বাং বা শালিনির্যাসমেব বা||১৩|| শল্লকীং গুগ্গুলুং লোহং পদ্মকং বা ঘৃতাপ্লুতম্| |১৪|

স০-হরিদ্রাদীনি পিষ্ট্বা জলেন বর্তিং প্রকল্পযেত্| তাং-বর্তি, ঘৃতাক্তাং কৃত্বা ধূমং পিবেত্, সামর্থ্যাদগ্নিপ্লুষ্টাম্| অথবা যবান্ ঘৃতাক্তান্ ধূমং পিবেত্| মধূচ্ছিষ্টং-সিক্থকং, সর্জরসং ঘৃতং বা একীকৃত্য ধূমং পিবেত্| অথবা, গুরু-শ্রেষ্ঠং, অগুরু কৃষ্ণাগরু, ধূমং পিবেত্| অথবা, চন্দনম্ [ ধূমং পিবেত্ ]| অথবা, গবাং শৃঙ্গং ধূমং পিবেত্| অথবা, গবাং বালান্-গলকম্বলজানি রোমণি, ধূমং পিবেত্| স্নাব বা-স্নাযু বা গবামেব, ধূমং পিবেত্| রূক্ষাদীনাং চর্মাদীনি বা ধূমং পিবেত্| খুরশব্দস্যার্ধর্চাদিত্বান্নপুংসকত্বম্| গুগ্গুলুং বা, অথবা মনঃ শিলাং শালনির্যাসং বা ধূমং পিবেত্| শল্লক্যাদি ঘৃতাপ্লুতং বা|

Adhikarana svedaprayogAH (14-16) · Śloka 16

| অবশ্যং স্বেদনীযানামস্বেদ্যানামপি ক্ষণম্||১৪|| স্বেদযেত্সসিতাক্ষীরসুখোষ্ণস্নেহসেচনৈঃ| উত্কারিকোপনাহৈশ্চ স্বেদাধ্যাযোক্তভেষজৈঃ||১৫|| উরঃ কণ্ঠং চ মৃদুভিঃ| |১৬|

স০-অবশ্যং স্বেদনীযানাং তথাঽস্বেদার্হাণামপি ক্ষণমুরঃ কণ্ঠং চ মৃদুভিঃ স্বেদৈঃ স্বেদযেত্| কৈঃ ? সশর্করাক্ষীরৈঃ সুখোষ্ণৈঃ স্নেহসেচনৈঃ| তথা, স্বেদাধ্যাযে যান্যুক্তানি দ্রব্যাণি তত্কৃতৈরুত্কারিকোপনাহৈশ্চ স্বেদযেত্|

Adhikarana sAme AmavidhiH (16) · Śloka 16

সামে ত্বামবিধিং চরেত্| |১৬|

স০-সামে চ শ্বাসহিধ্মাবত্যামবিধিং-লঙ্ঘনপাচনাদিকং, চরেত্ নিরামীকরণায|

Adhikarana shleShmauShadhAtiyoddatavAtasyauShadham (16-17) · Śloka 17

| অতিযোগোদ্ধতং বাতং দৃষ্ট্বা পবননাশনৈঃ||১৬|| স্নিগ্ধৈ রসাদ্যৈর্নাত্যুষ্ণৈরভ্যঙ্গৈশ্চ শমং নযেত্| |১৭|

স০-অতিযোগাদ্বমনবিরেচনযোর্নরাণামুদ্ধতং বাতং দৃষ্ট্বা পবননাশনৈঃ স্নিগ্ধৈ রসাদ্যৈঃ-মাংসরসঘৃতক্ষীরাদিভিরাহারৈঃ, তথা কিঞ্চিদুষ্ণৈরভ্যঙ্গৈশ্চ শমং নযেত্|

Adhikarana shodhanAnarhANAM shamanam kShayAdyutpannasyauShadham (17-18) · Śloka 18

| অনুত্ক্লিষ্টকফাস্বিন্নদুর্বলানাং হি শোধনাত্||১৭|| বাযুর্লব্ধাস্পদো মর্ম সংশোষ্যাশু হরেদসূন্| কষাযলেহস্নেহাদ্যৈস্তেষাং সংশমযেদতঃ||১৮||

স০-অনুত্ক্লিষ্টকফানামস্বিন্নানাং দুর্বলানাং চ শোধনাদ্ধেতোঃ পবনো লব্ধাস্পদঃ সন্ অন্যস্থানাশ্রযবশাদাসাদিত সামর্থ্যোঽত এবামন্দঃ শোষণস্বভাবত্বাদ্ মর্ম-হৃদযাখ্যং, সংশোষ্য শীঘ্রমসূন্ হরেত্| তস্মাদেবংবিধান্ হিধ্মাশ্বাসবতো ন শোধযেত্| অতোঽন্যথাভূতাংশ্চ শোধযেদিত্যর্থাদুক্তং ভবতি| তথা চ তেষাং সংশোধনাদারোগ্যং সম্পদ্যতে| অনুত্ক্লিষ্টকফাদীনাং শোধনাযোগ্যানাং তর্হি কিং কার্যম্ ? ইত্যাহ-কষাযেত্যাদি| যতো যস্মাত্তে সংশোধনাযোগ্যাস্তস্মাত্তেষাং কষাযাদিভিঃ সংশমযেত্, শ্বাসহিধ্মা ইতি শেষঃ|

Adhikarana kShayAdyutpannasyauShadham (19) · Śloka 19

ক্ষীণক্ষতাতিসারাসৃক্পিত্তদাহানুবন্ধজান্| মধুরস্নিগ্ধশীতাদ্যৈর্হিধ্মাশ্বাসানুপাচরেত্||১৯||

স০-ক্ষীণক্ষতাতিসারাসৃক্পিত্তদাহানুবন্ধজান্ হিধ্মাশ্বাসান্ মধুরাদিভিরুপক্রমেত্|

Adhikarana annapAnAni tatra rasAH (20) · Śloka 20

কুলত্থদশমূলানাং ক্বাথে স্যুর্জাঙগলা রসাঃ| যূষাশ্চ|২০|

স০-কুলত্থদশমূলানাং ক্বাথে জাঙ্গলরসা যূষাশ্চ স্যুঃ|

Adhikarana yUShAH yUShAntaram yUShAntaram (20-22) · Śloka 22

| শিগ্রুবার্তাককাসঘ্নবৃষমূলকৈঃ||২০|| পল্লবৈর্নিম্বকুলকবৃহতীমাতুলুঙ্গজৈঃ| ব্যাঘ্রীদুরালভাশৃঙ্গীবিল্বমধ্যত্রিকণ্টকৈঃ||২১|| সামৃতাগ্নিকুলত্থৈশ্চ যূষঃ স্যাত্ক্বথিতৈর্জলে| তদ্বদ্রাস্নাবৃহত্যাদিবলামুদ্গৈঃ সচিত্রকৈঃ||২২||

স০-শিগ্র্বাদিভিশ্চ জলে ক্বথিতৈর্যূষঃ স্যাত্| তথৈব রাস্নাদিভির্যূষঃ স্যাত্|

Adhikarana peyAdvayam (23) · Śloka 23

পেযা চ চিত্রকাজাজীশৃঙ্গীসৌবর্চলৈঃ কৃতা| দশমূলেন বা কাসশ্বাসহিধ্মারুজাপহা||২৩||

স০-পেযা চ চিত্রকাদিভিঃ কৃতাঽথবা দশমূলেন কৃতা, সা চ কাসদিহরা|

Adhikarana kaShAyaH peyA ca (24-25) · Śloka 25

দশমূলশঠীরাস্নাভার্গীবিল্বর্দ্ধিপৌষ্করৈঃ| কুলীরশৃঙ্গীচপলাতামলক্যমৃতৌষধৈঃ||২৪|| পিবেত্কষাযং জীর্ণেঽস্মিন্ পেযাং তৈরেব সাধিতাম্| |২৫|

স০-দশমূলাদিভিঃ কষাযং পিবেত্| অস্মিন্কষাযে পরিণতে তৈরেব-দশমূলাদিভিঃ, সাধিতাং পেযাং হিধ্মাশ্বাসী পিবেত্|

Adhikarana annaM shAlyAdi (25-26) · Śloka 26

| শালিষষ্টিকগোধূমযবমুদ্গকুলত্থভুক্||২৫|| কাসহৃদ্গ্রহপার্শ্বার্তিহিধ্মাশ্বাসপ্রশান্তযে| |২৬|

স০-তথা শাল্যাদিভুক্ স্যাত্, কাসাদিশান্ত্যর্থম্|

Adhikarana yavasaktavaH (26-27) · Śloka 27

| সক্তূন্ বাঽর্কাঙ্কুরক্ষীরভাবিতানাং সমাক্ষিকান্||২৬|| যবানাং দশমূলাদিনিষ্ক্বাথলুলিতান্ পিবেত্| |২৭|

স০-অথবাঽর্কাঙ্কুরক্ষীরভবিতানাং যবানাং সম্বন্ধিনঃ সক্তূন্ সমাক্ষিকান্ দশমূলশঠীত্যাদিনির্যূহান্বিতান্ পিবেত্|

Adhikarana anne kShArAdiyojanam (27-28) · Śloka 28

| অন্নে চ যোজযেত্ ক্ষারহিঙ্গ্বাজ্যবিডদাডিমান্||২৭|| সপৌষ্করশঠীব্যোষমাতুলুঙ্গাম্লবেতসান্| |২৮|

স০-অন্নে-আহারে চ, ক্ষারাদীন্ যোজযেত্|

Adhikarana tRuShitasya dashamUlakkAthAdipAnam,tRuShitasya vArUNImaNDapAnam (28-29) · Śloka 29

| দশমূলস্য বা ক্বাথমথবা দেবদারুণঃ||২৮|| পিবেদ্বা বারুণীমণ্ডং হিধ্মাশ্বাসী পিপাসিতঃ| |২৯|

স০-হিধ্মাশ্বাসবান্ পিপাসিতো দশমূলস্য ক্বাথং দেবদারুণো বা, অথবা বারুণীমণ্ডং পিবেত্|

Adhikarana tRuShitasya takravisheShapAnam (29-30) · Śloka 30

| পিপ্পলীপিপ্পলীমূলপথ্যাজন্তুঘ্নচিত্রকৈঃ||২৯|| কল্কিতৈর্লেপিতে রূঢে নিঃক্ষিপেদ্ধৃতভাজনে| তক্রং মাসস্থিতং তদ্ধি দীপনং শ্বাসকাসজিত্||৩০||

স০-পিপ্পল্যাদিভিঃ কল্কিতৈর্লেপিতে ঘৃতভাজনে রূঢে-শুষ্কে, তক্রং নিঃক্ষিপেত্| তচ্চ তক্রং মাসস্থিতং দীপনং শ্বাসকাসজিত্|

Adhikarana tRuShitasya surAmaNDapAnamtRuShitasya BArgIshuNThcambu pAnam tRuShitasya bAShpikAkkAthapAnam (31-32) · Śloka 32

পাঠাং মধুরসাং দারু সরলং চ নিশি স্থিতম্| সুরামণ্ডেঽল্পলবণং পিবেত্প্রসৃতসম্মিতম্||৩১|| ভার্গীশুণ্ঠ্যো সুখাম্ভোভিঃ ক্ষারং বা মরিচান্বিতম্ স্বক্বাথপিষ্টাং লুলিতাং বাষ্পিকাং পাযযেত বা||৩২||

স০-পাঠাদিকং সুরামণ্ডে নিশি স্থিতং কিঞ্চিল্লবণং প্রসৃতসম্মিতং-পলদ্বযমাত্রং, পিবেত্| অথবা, ভার্গীশুণ্ঠ্যাবুষ্ণাম্বুনা পিবেত্| যবক্ষারং মরিচযুক্তং বা| বাষ্পিকাং-হিঙ্গুপত্রিকাং, হিঙ্গু পত্রিক্বাথেন পিষ্টাং তেনৈবালোডিতাং বা পাযযেত্|

Adhikarana pittakaPAnuroge hidhmAshvAse saptaparNAdisvarasau pittAnude utkArikA vAtapittAnuge kShIram vAtApittAnuge kShIrAntaram (33-36) · Śloka 36

স্বরসঃ সপ্তপর্ণস্য পুষ্পাণাং বা শিশীষতঃ| হিধ্মাশ্বাসে মধুকণাযুক্তঃ পিত্তকফানুগে||৩৩|| উত্কারিকা তুগাকৃষ্ণামধূলীঘৃতনাগরৈঃ| পিত্তানুবন্ধে যোক্তব্যা, পবনে ত্বনুবন্ধিনি||৩৪|| শ্বাবিচ্ছশামিষকণাঘৃতশল্যকশোণীতৈঃ| সুবর্চলারসব্যোষসর্পির্ভিঃ সহিতং পযঃ||৩৫|| অনু শাল্যোদনং পেযং বাতপিত্তানুবন্ধিনি| চতুর্গুণাম্বুসিদ্ধং বা ছাগং সগুডনাগরম্||৩৬||

স০-সপ্তপর্ণস্য-অযুগ্মচ্ছদস্য স্বরসঃ, শিরীষাত্ পুষ্পাণাং বা স্বরসঃ, এতৌ মধুকণাযুতৌ পিত্তকফানুগে হিধ্মাশ্বাসে সতি পাযযেত্| পিত্তানুবন্ধিনি হিধ্মাশ্বাসে তুগাদিভিরুত্কারিকা যোজ্যা| মধূলী-জলজা মধুযষ্টী, গোধূমবিশেষো বা| পবনে পুনরনুবন্ধিনি শ্বাবিদাদিভিরুত্কারিকা নিষ্পাদিতা যোজ্যা| হিধ্মাশ্বাসে বাতপিত্তানুবন্ধিনি সতি সুবর্চলারসাদিভিঃ সিদ্ধং পযোঽনু শাল্যোদনং ভুক্ত্বা পশ্চাত্ ক্ষীরং পেযম্, গব্যং ছাগং বা দেশসাত্ম্যাদিবশাত্| অথবা চতুর্গুণাম্বুসিদ্ধং বা পযশ্ছাগং সগুডনাগরং পিবেত্|

Adhikarana pippalImUlAdilehaH (37) · Śloka 37

পিপ্পলীমূলমধুকগুডগোশ্বশকৃদ্রসান্| হিধ্মাভিষ্যন্দকাসঘ্নান্ লিহ্যান্মধুঘৃতান্বিতান্||৩৭||

স০-পিপ্পলীমূলাদীন্ মধুঘৃতান্বিতান্ সম্মিশ্র্য হিধ্মাভিষ্যন্দকাসঘ্নান্ লিহ্যাত্|

Adhikarana kaPolbaNe gogajAdishakRudrasalehAH kaPolbaNe catuShpAccarmAdimaShIlehaH kaPolbaNe ashvagandhAmaShIlehaH kaPolbaNe shaThcAdilehaH kaPolbaNe pauShkarapippalIlehaH kaPolbaNe gairikAdilehaH kaPolbaNe kapitthasvarasalehaH kaPolbaNe dhAtryAdilehaH kaPolbaNe pathyAdilehaH kaPolbaNe kolAdilehaH kaPolbaNe guDAdilehaH kaPolbaNe uktaleha auShadhacUrNAnAM rasAdiBiH pAnam (38-43) · Śloka 43

গোগজাশ্ববরাহোষ্ট্রখরমেষাজবিড্রসম্| সমধ্বেকৈকশো লিহ্যাদ্বহুশ্লেষ্মাঽথবা পিবেত্||৩৮|| চতুষ্পাচ্চর্মরোমাস্থিখুরশৃঙ্গোদ্ভবাং মষীম্| তথৈব বাজিগন্ধাযা লিহ্যাচ্ছ্বাসী কফোল্বণঃ||৩৯|| শঠীপৌষ্করধাত্রীর্বা পৌষ্করং বা কণান্বিতম্| গৈরিকাঞ্জনকৃষ্ণা বা স্বরসং বা কপিত্থজম্||৪০|| রসেন বা কপিত্থস্য ধাত্রীসৈন্ধবপিপ্পলীঃ| ঘৃতক্ষৌদ্রেণ বা পথ্যাবিডঙ্গোষণপিপ্পলীঃ||৪১|| কোললাজামলদ্রাক্ষাপিপ্পলীনাগরাণি বা| গুডতৈলনিশাদ্রাক্ষাকণারাস্নোষণানি বা||৪২|| পিবেদ্রসাম্বুমদ্যাম্লৈর্লেহৌষধরজাংসি বা| |৪৩|

স০-গোগজাদীনাং শকৃদ্রসং বহুকফঃ সমাক্ষিকমেকৈকশো লিহ্যাত্, অথবা পিবেত্| অথবা, চতুষ্পদাং চর্মাদিজাং মষীং পিবেত্| শ্বাসী কফাধিকোঽশ্বগন্ধাযাশ্চ মষীং তদ্বত্-মধুনা, লিহ্যাত্| শঠীপৌষ্করাদিণ্ বা মধুনা লিহ্যাত্| পৌষ্করং সকণং বা লিহ্যাত্| গৈরিকাদীন্ বা লিহ্যাত্, কপিত্থজং স্বরসং বা| কপিত্থস্বরসেন ধাত্র্যাদীন্ লিহ্যাত্| পথ্যাবিডঙ্গাদীন্ ঘৃতক্ষৌদ্রেণ বা লিহ্যাত্| কোলাদীন্ বা পূর্ববল্লিহ্যাত্, গুডাদীন্ বা| অথবা, লেহস্য-অগস্ত্যাদেঃ, ঔষধানাং চূর্ণানি মাংসরসাদিভিঃ পিবেত্|

Adhikarana jIvantyAdikaM dviguNasharkaraM cUrNam (43-45) · Śloka 45

| জীবন্তীমুস্তসুরসত্বগেলাদ্বযপৌষ্করম্||৪৩|| চণ্ডাতামলকীলোহভার্গীনাগরবালকম্| কর্কটাখ্যাশঠীকৃষ্ণানাগকেসরচোরকম্||৪৪|| উপযুক্তং যথাকামং চূর্ণং দ্বিগুণশর্করম্| পার্শ্বরুগ্জ্বরকাসঘ্নং হিধ্মাশ্বাসহরং পরম্||৪৫||

স০-জীবন্ত্যাদিকং চূর্ণং ভুক্তং পার্শ্বরুগাদিঘ্নং সুষ্ঠু হিধ্মাদিহরম্| লোহং-অগুরু|

Adhikarana shaThyAdikaM aShTaguNasharkaraM cURnam (46) · Śloka 46

শঠীতামলকীভার্ঙ্গীচণ্ডাবালকপৌষ্করম্| শর্করাষ্টগুণং চূর্ণং হিধ্মাশ্বাসহরং পরম্||৪৬||

স০-শঠ্যাদিকং চূর্ণং পূর্বগুণম্|

Adhikarana nasyAni guDanAgaranasyam (47) · Śloka 47

তুল্যং গুডং নাগরং চ ভক্ষ্যেন্নাবযেত বা| |৪৭|

স০-তুল্যাং সগুডশুণ্ঠীং চ ভক্ষযেত্ নস্যং বা দদ্যাত্|

Adhikarana lashunamUlAdinasyacatuShkam makShikAviShThAdinasyatrayam stanyasiddaM ghRutam kShIram virecanauShadhasiddaM ghRutam (47-50) · Śloka 50

| লশুনস্য পলাণ্ডোর্বা মূলং গৃঞ্জনকস্য বা||৪৭|| চন্দনাদ্বা রসং দদ্যান্নারীক্ষীরেণ নাবনম্| স্তন্যেন মক্ষিকাবিষ্ঠামলক্তকরসেন বা||৪৮|| সসৈন্ধবং ঘৃতাচ্ছং বা, সিদ্ধং স্তন্যেন বা ঘৃতম্| কল্কিতৈর্মধুরদ্রব্যৈস্তত্পিবেন্নাবযেত বা||৪৯|| সকৃদুষ্ণং সকৃচ্ছীতং ব্যত্যাসাত্ সসিতামধু| তদ্বত্পযস্তথা সিদ্ধমধোভাগৌষধৈর্ঘৃতম্||৫০||

স০-লশুনাদীনাং মূলং পিষ্ট্বা নারীক্ষীরেণ পৃথক্ পৃথক্ নাবনং চ স্যাত্ হিধ্মাশ্বাসার্তায| চন্দনাদ্বা রসং নারীক্ষীরেণ সহ নস্যং দদ্যাত্| মক্ষিকাবিষ্ঠাং স্তন্যেন সহ নস্যং দদ্যাত্, অলক্তকরসেন বা|

Adhikarana kaNAdighRutam jIvanIyaghRutam (51-52) · Śloka 52

কণাসৌবর্চলক্ষারবযস্থাহিঙ্গুচোরকৈঃ| সকাযস্থৈর্ঘৃতং মস্তুদশমূলরসে পচেত্||৫১|| তত্পিবেজ্জীবনীযৈর্বা লিহ্যাত্সমধু সাধিতম্| |৫২|

স০-কণাদিভিঃ কল্কৈর্মস্তুদশমূলরসে স্নেহপানবিধ্যুক্তপরিভাষামাশ্রিত্য ঘৃতং পক্ত্বা হিধ্মাশ্বাসার্তঃ পিবেত্| জীবনীযৈর্বা দ্রব্যৈঃ কল্কৈর্ঘৃতং পক্ত্বা সমাক্ষিকং লিহ্যাত্-ন পিবেত্| বিষযভেদাদেবং কার্যম্| অথবা, বস্তুস্বভাবাদেকস্মিন্নপি বিষযে কণাদিভিঃ পক্বং ঘৃতং পীতং হিধ্মাশ্বাসার্তানামারোগ্যায, জীবনীযৈঃ পুনঃ কল্কৈঃ পক্বং ঘৃতং লীঢং তেষামারোগ্যাযেতি|

Adhikarana tejovatyAdighRutam (52-55) · Śloka 55

| তেজোবত্যভযা কুষ্ঠং পিপ্পলী কটুরোহিণী||৫২|| ভূতীকং পৌষ্করং মূলং পলাশশ্চিত্রকঃ শঠী| পটুদ্বযং তামলকী জীবন্তী বিল্বপেশিকা||৫৩|| বচা পত্রং চ তালীসং কর্ষাংশৈস্তৈর্বিপাচযেত্| হিঙ্গুপাদৈর্ঘৃতপ্রস্থং পীতমাশু নিহন্তি তত্||৫৪|| শাখানিলার্শোগ্রহণীহিধ্মাহৃত্পার্শ্ববেদনাঃ| |৫৫|

স০-তেজোবত্যাদিভিঃ কল্কৈঃ কর্ষাংশৈর্হিঙ্গুপাদৈর্হিঙ্গুনঃ পাদঃ-চতুর্থাংশো, যেষাং তৈরেবংবিধৈর্ঘৃতং পচেত্| তত্পীতং দুষ্টকফাবৃতস্রোতসাং প্রমাথিতযা তেষাং বিবৃতত্বমুত্পাদযন্ শাখানিলাদীন্ হন্তি|

Adhikarana ardhAMshakShAraghRutam ardhAMshalavaNaghRutam dhAnvantarAdighRutacatuShkasyAtideshaH (55-56) · Śloka 56

| অর্ধাংশেন পিবেত্সর্পিঃ ক্ষারেণ পটুনাঽথবা||৫৫|| ধান্বন্তরং বৃষঘৃতং দাধিকং হপুষাদি বা| |৫৬|

স০-ধান্বন্তরাদিঘৃতস্যার্ধাংশেন ক্ষারেণ, অথবা পটুনা-লবণেন চার্ধাংশেন, সর্পিঃ পিবেত্| ধান্বন্তরং-প্রমেহোক্তম্ (হৃ. চি. অ. ১২/১৯)| বৃষঘৃতং-রক্তপিত্তোক্তম্ (হৃ. চি. অ. ২/৪০)| দাধিকং-গুল্মোক্তম্ (হৃ. চি. অ. ১৪/১৩)| হপুষাদিকং-উদরোক্তম্ (হৃ. চি. অ. ১৫/২২)|

Adhikarana cittakShoBaNamauShadham (56-57) · Śloka 57

| শীতাম্বুসেকঃ সহসা ত্রাসবিক্ষেপভীশুচঃ||৫৬|| হর্ষের্ষ্যোচ্ছ্বাসরোধাশ্চ হিতং কীটৈশ্চ দংশনম্| |৫৭|

স০-সহসা-ঝটিত্যেবাজ্ঞাতসঙ্কেতস্যৈব, হিধ্মাশ্বাসার্তস্য শীতাম্বুনা সেকো হিতঃ| ত্রাসঃ-চিত্তস্যোদ্বেগকৃত্কর্ম, বিক্ষেপঃ-অবধূননম্, ভীঃ-ভযম্, শুক্-শোকশ্চেতসঃ সন্তাপঃ, ত্রাসাদযশ্চতস্রস্তামসগুণোদ্ভবাঃ, ঈর্ষ্যা-অসূযা পরগুণাসহিষ্ণুতা, ইযং রজোগুণোদযা, তথা উচ্ছ্বাসস্য রোধঃ, এতে চ সর্বে হিধ্মাশ্বাসার্তায হিতাঃ| তথা, কীটৈঃ-পিপীলিকাদিভিঃ, তস্মিন্ দংশনং হিতম্, বাতবেগবিঘাতায|

Adhikarana anuktasaMgrAhArthaM sAmAnya cikitsA (57-59) · Śloka 59

এবং হিধ্মাশ্বাসানাং বিশেষেণ চিকিত্সামুক্ত্বা সামান্যেনাহ যত্কিঞ্চিত্কফবাতঘ্নমুষ্ণং বাতানুলোমনম্||৫৭|| তত্সেব্যং প্রাযশো যচ্চ সুতরাং মারুতাপহম্| |৫৯|

স০-যত্কিঞ্চিত্-আহারবিহারৌষধাদিকং, কফবাতৌ-পৃথক্ সহিতৌ বা, নিহন্তি তত্কফবাতঘ্নম্| তথা, উষ্ণং-ন-শীতম্| কফবাতঘ্নং হি প্রাযেণোষ্ণমেব ভবতি| উষ্ণমিতি যদিহ কৃতং তদতিশযেনোষ্ণং ন ত্বীষদুষ্ণমিতি প্রতিপাদনার্থম্| তথা, বাতানুলোমনং কফবাতঘ্নত্বেনৈব বাতানুলোমনকারিত্বে লব্ধে প্রাধান্যেন বাতপ্রতিপক্ষেণ স্নিগ্ধেন যদ্যুক্তং তদ্ধিধ্মাশ্বাসার্তৈঃ কফবাতঘ্নমধিকোষ্ণং সেব্যমিতি প্রতিপাদনাযেতি| অত এবাহ-প্রাযশ ইত্যাদি| প্রাযশো-বাহুল্যেন, যত্ সুতরাং মারুতশমনং তত্ হিধ্মাশ্বাসার্তৈঃ সেব্যম্|

Adhikarana shamanabRuMhaNaiScopacAraH (58-59) · Śloka 59

কিমিত্যেবং ক্রিযতে ? ইত্যাহ- | সর্বেষাং বৃংহণে হ্যল্পঃ শক্যশ্চ প্রাযশো ভবেত্||৫৮|| নাত্যর্থং শমনেঽপাযো ভৃশোঽশক্যশ্চ কর্ষণে| শমনৈর্বৃংহণৈশ্চাতো ভূযিষ্ঠং তানুপাচরেত্||৫৯||

স০-সর্বেষাং-হিধ্মাশ্বাসার্তানাং, হি-যস্মাত্, বৃংহণে বিধীযমানে কদাচিদ্দৈববশাত্ যোঽপাযো-রোগাধিক্যমন্যরোগপ্রাদুর্ভাবো বা, ভবেত্ স প্রাযশোঽল্পস্তথা শক্যঃ-সাধযিতুং সুখসাধ্যঃ| তথা, তেষাং, শমনে ভেষজাদৌ ক্রিযমাণেঽপাযো যদি দৈবাত্স্যাত্ স নাত্যর্থং-নাতিশযেন| কিং তর্হি ? মধ্যমযা বৃত্ত্যা| হিধ্মাশ্বাসশান্ত্যর্থং কর্ষণে ভেষজাদৌ ক্রিযমাণে যোঽপাযো জাযতে স ভৃশো-দুঃসহঃ, অত এবাশক্যঃ-সাধযিতুং ন শক্যতে| যত এবং কর্ষণে ভৃশোঽশক্যশ্চাপযো ভবতি| অতঃ-অস্মাত্কারণাত্, তান্-হিধ্মাশ্বাসান্, ভূযিষ্ঠং-বাহুল্যেন, শমনৈর্ভেষজৈস্তথা বৃংহণৈরুপাচরেত্|

Adhikarana kAsAdInAmanyonyaBeShajam (4) · Śloka 4

অধুনা কাসাদীনাং পঞ্চানামপ্যেষাং সামান্যেন চিকিত্সিতং বক্তুমাহ কাসশ্বাসক্ষযচ্ছর্দিহিধ্মাশ্চান্যোন্যভেষজৈঃ| ৫৯ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে শ্বাসহিধ্মাচিকিত্সিতং নাম চতুর্থোঽধ্যাযঃ||৪||

স০-কাসোক্তৈর্ভেষজৈঃ শ্বাসাদীনুপাচরেত্| শ্বাসাদ্যুক্তৈঃ কাসানুপাচরেত্| এবং পরস্পরং সর্বৈর্যথোক্তৈর্ভেষজৈঃ সর্বানেতানুপাচরেদিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে শ্বাসহিধ্মাচিকিত্সিতং নাম চতুর্থোঽধ্যাযঃ সমাপ্তঃ||৪||