21. vātavyādhicikitsitādhyāyaḥ

Adhikarana adhyAyopakramaH · Śloka

অস্মাদনন্তরং বাতব্যাধিচিকিত্সিতং ব্যাখ্যাতুমুপক্রম্যতে , সর্বচিকিত্সাবাধিতত্বাত্|

Adhikarana vAtavyAdhicikitsitAdhyAyaHvAte nirupastamBe Adau snehAH vAte nirupastamBe tataH sha~gkarAdyaiH punaH punaH svedaH (2-4) · Śloka 4

অথাতো বাতব্যাধিচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| ) কেবলং নিরুপস্তম্ভমাদৌ স্নেহৈরুপাচরেত্| বাযুং সর্পির্বসামজ্জতৈলপানৈর্নরং ততঃ||১|| স্নেহক্লান্তং সমাশ্বাস্য পযোভিঃ স্নেহযেত্পুনঃ| যূষৈর্গ্রাম্যোদকানূপরসৈর্বা স্নেহসংযুতৈঃ||২|| পাযসৈঃ কৃসরৈঃ সাম্ললবণৈঃ সানুবাসনৈঃ| নাবনৈস্তর্পণৈশ্চান্নৈঃ সুস্নিগ্ধৈঃ স্বেদযেত্ততঃ||৩|| স্বভ্যক্তং স্নেহসংযুক্তৈঃ শঙ্করাদ্যৈঃ পুনঃ পুনঃ| |৪|

স০-কেবলং-শুদ্ধং , তথা নিরুপস্তম্ভং-অন্যেনাধানকেন সমীপসম্ভবিনাঽনাধারিতং , ঈদৃশং বাযুং স্নেহৈরাদাবেবোপাচরেত্| কথম্ ? ইত্যাহ-সর্পিরিত্যাদি| ননু, তৈলস্য পবনবিজযে প্রাধান্যাদেবং নির্দেশঃ কর্তুং যুক্তঃ , তৈলবসামজ্জসর্পিঃপানৈরিতি| যুক্তমাহ ভবান্| কিন্তু, আজন্মসাত্ম্যাত্ সর্পিঃ প্রধানমনবরতমিতি সর্পিঃ প্রাগুপন্যস্তম্| সর্পিঃপানাদিভিস্তাবত্ স্নেহযেত্ যাবত্ "স্নেহোদ্বেগঃ ক্লমঃ " (হৃ. সূ. অ. ১৬|৩০) ইত্যাদি স্নেহলক্ষণং স্যাত্| স্নেহক্লান্তং চ নরং পযোভিঃ সমাশ্বাস্য পুনর্যূষাদিভিঃ স্নেহান্বিতৈঃ স্নেহযেত্| তথা তর্পণৈশ্চান্নৈঃ সুস্নিগ্ধৈঃ স্নেহযেত্| ততঃ-অনন্তরং , সুষ্ট্বভ্যক্তং অন্তং শঙ্করাদ্যৈঃ-স্বেদৈঃ স্বেদবিধিগদিতৈঃ, পুনঃ পুনঃ স্বেদযেত্| এব স্বেদিতে সতি যো গুণঃ স্যাত্তমাহ-

Adhikarana vAte snehasvedayoH prayojanam (4-5) · Śloka 5

| স্নেহাক্তং স্বিন্নমঙ্গং তু বক্রং স্তব্ধং সবেদনম্||৪|| যথেষ্টমানামযিতুং সুখমেব হি শক্যতে| |৫|

স০-স্নেহাভ্যক্তং গাত্রং স্বিন্নং সদ্বক্রং তথা স্তব্ধং তথা সরুজং যথেষ্টং সুখমেবানামযিতুং শক্যতে| "জলহ্বলহ্মলনমামনুপসর্গাণাং বা মিত্বম্|" ইতি নামযিতুমিত্যত্র ন হৃস্বত্বম্| এতদেব দৃষ্টান্তদ্বারেণ প্রতিপাদযন্নাহ--

Adhikarana vAte atra dRuShTAntaH (5-6) · Śloka 6

| শুষ্কাণ্যপি হি কাষ্ঠানি স্নেহস্বেদোপপাদনৈঃ||৫|| শক্যং কর্মণ্যতাং নেতুং কিমু গাত্রাণি জীবিতাম্| |৬|

স০-হি-যস্মাত্, শুষ্কাণ্যপি কাষ্ঠানি স্নেহস্বেদসংযোজনেন কর্মণ্যতাং নেতুং শক্যন্তে| কিমুত জীবতাং গাত্রাণি ন শক্যন্তে ? শক্যন্ত এবেত্যর্থঃ| শক্যমিতি পূর্বোক্তক্রমমাত্রে নপুংসকত্বমেকত্বং চ| যথা কালিদাসস্য-"শক্যমঙ্গুলিভিরুদ্ধৃতৈরধঃ শাখিনাং পতিতপুষ্পকোমলৈঃ| পত্রজর্জরশশিপ্রভালবৈরেভিরুত্কচযিতুং তবালকান্||" ইতি|

Adhikarana vAte svedasya Palam (6-7) · Śloka 7

| হর্ষতোদরুগাযামশোফস্তম্ভগ্রহাদযঃ||৬|| স্বিন্নস্যাশু প্রশাম্যন্তি মার্দবং চোপজাযতে| |৭|

স০-স্বিন্নস্য পুংসো হর্ষাদযঃ শীঘ্রং প্রশাম্যন্তি| মৃদুত্বং চ গাত্রেষু জাযতে|

Adhikarana vAte snehasya Palam (7-8) · Śloka 8

| স্নেহশ্চ ধাতূন্ সংশুষ্কান্ পুষ্ণাত্যাশূপযোজিতঃ||৭|| বলমগ্নিবলং পুষ্টিং প্রাণাংশ্চাস্যাভিবর্ধযেত্| |৮|

স০-তথা, স্নিন্নস্য স্নেহ উপযোজিতো ধাতূন্ বিশুষ্কান্ দ্রাগেব পুষ্ণাতি| তথা, অস্য-বাতরোগিণো, বলাদীনভিবর্ধযেত্|

Adhikarana vAte punaH punaH snehasvedAH vAte evaM snehamRudukoShThe vAtarogA na tiShThanti (8-9) · Śloka 9

| অসকৃত্তং পুনঃ স্নেহৈঃ স্বেদৈশ্চ প্রতিপাদযেত্||৮|| তথা স্নেহমৃদৌ কোষ্ঠে ন তিষ্ঠন্ত্যনিলামযাঃ| |৯|

স০-তং-আতুরং, পুনঃ স্নেহস্বেদাভ্যাং যোজযেত্| তথা-এবং কৃতে স্নেহমৃদৌ কোষ্ঠে সতি সর্বে বাতরোগা নশ্যন্তি|

Adhikarana vAte evaM SamABAve mRudusneha virecanam (9-10) · Śloka 10

| যদ্যেতেন সদোষত্বাত্কর্মণা ন প্রশাম্যতি||৯|| মৃদুভিঃ স্নেহসংযুক্তৈর্ভেষজৈস্তং বিশোধযেত্| |১০|

স০-অনেন কর্মণা চেন্ন প্রশাম্যতি বাতামযস্তদা তং-বাতামযিনং, মৃদুভির্দ্রব্যৈঃ-কর্ণিকারাদিভিঃ, স্নেহান্বিতৈর্বিশোধযেত্|

Adhikarana vAte tilvakaghRutaM sAtalA ghRutameraNDatailaM vA (10-11) · Śloka 11

| ঘৃতং তিল্বকসিদ্ধং বা সাতলাসিদ্ধমেব বা||১০|| পযসৈরণ্ডতৈলং বা পিবেদ্দোষহরং শিবম্| |১১|

স০-তিল্বকেন পক্বং সাতলযা বা পক্বং ক্ষীরেণ বা সহৈরণ্ডতৈলং পিবেত্| তচ্চ পীতং দোষহরং শিবং চ স্যাত্| ননু, কিমিত্যনুলোমনং ক্রিযতে ? ইত্যাহ-

Adhikarana vAte anulomane hetuH (11-12) · Śloka 12

| স্নিগ্ধাম্ললবণোষ্ণাদ্যৈরাহারৈর্হি মলশ্চিতঃ||১১|| স্রোতো বদ্ধ্বাঽনিলং রুন্ধ্যাত্তস্মাত্তমনুলোমযেত্| |১২|

স০-যস্মাত্ স্নিগ্ধাদিভিরাহারৈর্মলশ্চিতঃ স্রোতাংসি রুদ্ধ্বা বাযুং রুন্ধ্যাত্, তস্মান্মারুতমনুলোমযেত্|

Adhikarana vAte avirecyasya nirUhAH vAte pradIpte~agnau punaH snehasvedau (12-13) · Śloka 13

| দুর্বলো যোঽবিরেচ্যঃ স্যাত্তং নিরূহৈরুপাচরেত্||১২|| দীপনৈঃ পাচনীযৈর্বা ভোজ্যৈর্বা তদ্যুতৈর্নরম্| সংশুদ্ধস্যোত্থিতে চাগ্নৌ স্নেহস্বেদৌ পুনর্হিতৌ||১৩||

স০-যো নরো দুর্বলো বিরেচনানর্হো ভবেত্ তং-নরং, নিরূহৈরুপাচরেত্| কিম্ভূতৈঃ ? দীপনৈ পাচনীযৈশ্চ| অথবা, তদ্যুতৈঃ-দীপনীযপাচনীযযুতৈঃ, ভোজ্যৈরুপাচরেত্| অনন্তরং সম্যক্শুদ্ধস্য বহ্নৌ চোত্থিতে সতি পুনরপি স্নেহস্বেদৌ হিতৌ|

Adhikarana vAte AmAshayage ShaDdharaNAdiH (14-15) · Śloka 15

আমাশযগতে বাযৌ বমিতপ্রতিভোজিতে| সুখাম্বুনা ষড্ধরণং বচাদিং বা প্রযোজযেত্||১৪|| সন্ধুক্ষিতেঽগ্নৌ পরতো বিধিঃ কেবলবাতিকঃ| |১৫|

স০-আমাশযগতে বাতে সতি তথা বমিতশ্চাসৌ প্রতিভোজিতশ্চ তস্মিন্ বমিতপ্রতিভোজিতে নর উষ্ণজলেন ষড্ধরণং বচাদিগণং (হৃ. সূ. অ. ১৫|৩৫) বা প্রযোজযেত্| ষড্ধরণযোগঃ সঙ্গ্রহাদেবাবগন্তব্যঃ| তত্রৈবং পঠ্যতে (চি. অ. ২১)- "দার্বীকলিঙ্গকটুকাতিবিষাগ্নিপাঠা মূত্রেণ সূক্ষ্মরজসো ধরণপ্রমাণাঃ| পীতা জযন্তি গুদজোদরকুষ্ঠমেহকোষ্ঠানিলাঢ্যপবনগ্রহণীপ্রদোষান্||" ইতি| ধরণং-পলস্য দশমো ভাগঃ| অগ্নৌ সন্দীপিতে সতি, অনন্তরং কেবলবাতিকো বিধিঃ, 'কার্যঃ' ইতি শেষঃ|

Adhikarana vAte nABipradeshasthe matsyAH (15) · Śloka 15

| মত্স্যান্নাভিপ্রদেশস্থে সিদ্ধান্বিল্বশলাটুভিঃ||১৫||

স০-নাভিপ্রদেশস্থে বাতে মত্স্যান্ বিল্বশলাটুভিঃ সিদ্ধা যোজযেত্|

Adhikarana vAte adhonABisthe bastikarmAvapIDakaSca (16) · Śloka 16

বস্তিকর্ম ত্বধোনাভেঃ শস্যতে চাবপীডকঃ| |১৬|

স০-অধোনাভেঃ স্থিতে বাতেঽবপীডকঃ শস্যতে| চশব্দান্মত্স্যাশ্চ|

Adhikarana vAte koShThage kShAracUrNAdyAH (16) · Śloka 16

| কোষ্ঠগে ক্ষারচূর্ণাদ্যা হিতাঃ পাচনদীপনাঃ||১৬||

স০-কোষ্ঠগে বাযৌ ক্ষারাদ্যাঃ পাচনা দীপনাশ্চ হিতাঃ|

Adhikarana vAte hRutsthe sthirAsiddhaM kShIram (17) · Śloka 17

হৃত্স্থে পযঃ স্থিরাসিদ্ধম্| |১৭|

স০-হৃদযস্থিতে সমীরণে ক্ষীরং শালিপর্ণ্যা শৃতং হিতম্|

Adhikarana vAte shirogate shirobastyAdi (17) · Śloka 17

শিরোবস্তিঃ শিরোগতে| স্নৈহিকং নাবনং ধূমঃ শ্রোত্রাদীনাং চ তর্পণম্||১৭||

স০-শিরোগতে শিরোবস্তিঃ শস্যতে| স্নৈহিকং নস্যং তথা ধূমঃ কর্ণাদিতর্পণং চ হিতম্|

Adhikarana vAte tvagAshrite svedAdIni (18) · Śloka 18

স্বেদাভ্যঙ্গনিবাতানি হৃদ্যং চান্নং ত্বগাশ্রিতে| |১৮|

স-ত্বক্স্থে মরুতি স্বেদাদীনি হিতানি| হৃদযপ্রিযং চান্নং হিতম্|

Adhikarana vAte raktasthe shItA lepAdayaH (18) · Śloka 18

| শীতাঃ প্রদেহা রক্তস্থে বিরেকো রক্তমোক্ষণম্||১৮||

স০-রক্তস্থে বাতে শীতাঃ প্রদেহা রক্তমোক্ষণং চ হিতম্|

Adhikarana vAte mAMsamedasthe virekAdayaH (19) · Śloka 19

বিরেকো মাংসমেদঃস্থে নিরূহাঃ শমনানি চ| |১৯|

স০-মাংসমেদঃস্থিতে বাযৌ বিরেকস্তথা নিরূহাঃ শমনানি চ হিতানি|

Adhikarana vAte asthimajjage snehAH (19) · Śloka 19

| বাহ্যাভ্যন্তরতঃ স্নেহৈরস্থিমজ্জগতং জযেত্||১৯||

স০-অস্থিমজ্জস্থং মারুতং বাহ্যাভ্যন্তরতঃ স্নেহৈর্জযেত্|

Adhikarana vAte shukrasthe praharShAdayaH (20) · Śloka 20

প্রহর্ষোঽন্নং চ শুক্রস্থে বলশুক্রকরং হিতম্| |২০|

স০-শুক্রস্থে সমীরণে প্রহর্ষণং তথা বলশুক্রকারি চান্নং হিতম্|

Adhikarana vAte vibaddhamArge shukre virecanAdi (20-21) · Śloka 21

| বিবদ্ধমার্গং দৃষ্ট্বা তু শুক্রং দদ্যাদ্বিরেচনম্||২০|| বিরিক্তং প্রতিভুক্তং চ পূর্বোক্তাং কারযেত্ক্রিযাং| |২১|

স০-শুক্রং চ রুদ্ধমার্গং দৃষ্ট্বা বিরেকং দদ্যাত্| বিরিক্তং প্রতিভুক্তং চ নরং পূর্বোদিতাং ক্রিযাং কারযেত্| "হৃক্রোরন্যতরস্যাম্|" ইতি প্রতিভুক্তস্যাপি কর্মত্বম্|

Adhikarana vAte garBe bAle ca shuShke sitAdipayaH (21-22) · Śloka 22

| গর্ভে শুষ্কে তু বাতেন বালানাং চ বিশুষ্যতাম্||২১|| সিতাকাশ্মর্যমধুকৈঃ সিদ্ধমুত্থাপনে পযঃ| |২২|

স০-বাতেন গর্ভে শুষ্কে সতি বালানাং চ বিশুষ্যতাং শর্করাদিভিঃ সিদ্ধং ক্ষীরমুত্থাপনে হিতম্|

Adhikarana vAte snAvAdiprApte snehAdi (22) · Śloka 22

| স্নাবসন্ধিশিরাপ্রাপ্তে স্নেহদাহোপনাহনম্||২২||

স০-স্নাবাদিপ্রাপ্তে স্নেহদাহোপনাহনং হিতম্|

Adhikarana vAtesa~gkucite~a~gge mAShAditailam (23) · Śloka 23

তৈলং সঙ্কুচিতেঽভ্যঙ্গো মাষসৈন্ধবসাধিতম্| |২৩|

স০-সঙ্কুচিতেঽঙ্গে সতি মাষসৈন্ধবসাধিতং তৈলমভ্যঙ্গঃ|

Adhikarana vAte supte~a~gge raktamokSho AgAradhUmAdilepaSca (23-24) · Śloka 24

| আগারধূমলবণতৈলৈর্লেপঃ স্রুতেঽসৃজি||২৩|| সুপ্তেঽঙ্গে বেষ্টযুক্তে তু কর্তব্যমুপনাহনম্| |২৪|

স০-রক্তে স্রুতে সত্যাগারধূমাদিভির্লেপঃ| সুপ্তে গাত্রে তথা বেষ্টনযুক্তে চোপনাহঃ কার্যঃ| আক্ষেপকাদীনাং মধ্যাত্ মহাত্যযত্বাদপতানকস্য তাবচ্চিকিত্সামাহ-

Adhikarana vAte veShTayukte~gge upanAhanam vAte apatAnake shIghramupacAraH (24-25) · Śloka 25

| অথাপতানকেনার্তমস্রস্তাক্ষমবেপনম্||২৪|| অস্তব্ধমেঢ্রমস্বেদং বহিরাযামবর্জিতম্| অখট্বাঘাতিনং চৈনং ত্বরিতং সমুপাচরেত্||২৫||

স০-অথ-অনন্তরং, বাতব্যাধযঃ সংজ্ঞানির্দিষ্টাঃ প্রস্তূযন্তে| এনং-অপতানকার্তং নরং, অস্রস্তাক্ষাদিযুক্তং যাবদখট্বাঘাতিনং চ ত্বরিতং কৃত্বোপক্রমেত্|

Adhikarana vAte pUrvaM nasyaM tato~acCapAnaM ghRutam (26-27) · Śloka 27

তত্র প্রাগেব সুস্নিগ্ধস্বিন্নাঙ্গে তীক্ষ্ণনাবনম্| স্রোতোবিশুদ্ধযে যুঞ্জ্যাদচ্ছপানং ততো ঘৃতম্||২৬|| বিদার্যাদিগণক্বাথদধিক্ষীররসৈঃ শৃতম্| নাতিমাত্রং তথা বাযুর্ব্যাপ্নোতি সহসৈব বা||২৭||

স০-তস্মিন্নপতানকার্তে নরে, পূর্বমেব চ সুষ্ঠু স্নিগ্ধাঙ্গে স্বিন্নাঙ্গে চ তীক্ষ্ণং নস্যং-ত্রিকটুকাদিনা, স্রোতোবিশুদ্ধযে যোজ্যম্| ততঃ-অনন্তরং, অচ্ছপানং ঘৃতং যুঞ্জীত| কতরত্ ? ইত্যাহ-বিদার্যাদিগণক্বাথাদিশৃতম্| ঘৃতাদ্বিদার্যাদিগণক্বাথশ্চতুর্গুণো দধিক্ষীররসাঃ সর্পিঃসমা গ্রাহ্যাঃ| তথা-এবংকৃতে সতি, মারুতোঽতিমাত্রং ন ব্যাপ্নোতি| সহসা-ঝটিত্যেব চ, নাশ্রুতে|

Adhikarana vAte sekABya~ggAdau mahAsnehaH (28-30) · Śloka 30

কুলত্থযবকোলানি ভদ্রদার্বাদিকং গণম্| নিঃক্বাথ্যানূপমাংসং চ তেনাম্লৈঃ পযসাঽপি চ||২৮|| স্বাদুস্কন্ধপ্রতীবাপং মহাস্নেহং বিপাচযেত্| সেকাভ্যঙ্গাবগাহান্নপাননস্যানুবাসনৈঃ||২৯|| স হন্তি বাতং, তে তে চ স্নেহস্বেদাঃ সুযোজিতাঃ| |৩০|

স০-কুলত্থাদীনানূপমাংসং চ নিঃক্বাথ্য তেন ক্বাথেনাম্লৈঃ-ধান্যাম্লাদিভিঃ, স্বাদুস্কন্ধকৃতকল্কং মহাস্নেহং বিপাচযেত্| সঃ-মহাস্নেহো, বাতং হন্তি| তে তে চ-পূর্বোক্তাঃ স্নেহাঃ স্বেদাঃ, সম্যগ্যোজিতাঃ বাতং ঘ্নন্তি|

Adhikarana vAte vegAntare punaH punaH mUrdhavirekaH (30-31) · Śloka 31

| বেগান্তরেষু মূর্ধানমসকৃচ্চাস্য রেচযেত্||৩০|| অবপীডৈঃ প্রধমনৈস্তীক্ষ্ণৈঃ শ্লেষ্মনিবর্হণৈঃ| শ্বসনাসু বিমুক্তাসু তথা সংজ্ঞাং স বিন্দতি|৩১|

স০-বেগান্তরেষু-বেগান্তরালেষু, মূর্ধানমসকৃত্-বহূন্ বারান্, রেচযেত্| কৈঃ ? ইত্যাহ-অবপীডৈঃ-"কল্কাদ্যৈরবপীডস্তু স তীক্ষ্ণৈর্মূর্ধরেচনঃ|" (হৃ. সূ. অ. ২০|৭) ইত্যুক্তৈঃ| তথা প্রধমনৈঃ-"ধ্মানং বিরেচনেশ্চূর্ণৈর্যুঞ্জ্যাত্" (হৃ. সূ. অ. ২০|৮) ইত্যুক্তৈঃ| এতৈশ্চ তীক্ষ্ণৈঃ-তীক্ষ্ণদ্রব্যকৃতৈঃ, অত এব শ্লেষ্মনাশনৈঃ| [ তথা- ] এবংকৃতে সতি, শ্বসনাসু শ্লেষ্মবিমুক্তাসু সংজ্ঞাং-চেতনাং, সঃ-রোগী, লভতে| প্রাণনাড্যো হৃদাশ্রিতাঃ শ্বসনা ইত্যুচ্যন্তে|

Adhikarana vAte vAtAdhike sauvarcalAdi ghRutam (31) · Śloka 31

সৌবর্চলাভযাব্যোষসিদ্ধং সর্পিশ্চলেঽধিকে||৩১|| ||৩১||

স০-বাযাবধিকে সৌবর্চলাদিভিঃ কল্কীকৃতৈঃ সিদ্ধং সর্পির্হিতম্|

Adhikarana vAte vAtAdhike tilvakaghRutam (32-33) · Śloka 33

পলাষ্টকং তিল্বকতো বরাযাঃ প্রস্থং পলাংশং গুরুপঞ্চমূলম্| সৈরণ্ডসিংহীত্রিবৃতং ঘটেঽপাং পক্ত্বা পচেত্পাদশৃতেন তেন||৩২|| দধ্নঃ পাত্রে যাবশূকাত্ত্রিবিল্বৈঃ সর্পিঃপ্রস্থং হন্তি তত্সেব্যমানম্| দুষ্টান্ বাতানেকসর্বাঙ্গসংস্থান্ যোনিব্যাপদ্গুল্মবর্ধ্মোদরং চ||৩৩||

স০-তিল্বকতো-লোধ্রাত্ পলাষ্টকং, ত্রিফলাযাঃ প্রস্থং, মহত্পঞ্চমূলং পৃথক্ পলভাগম্| কিম্ভুতং পঞ্চমূলম্ ? এরণ্ডব্যাঘ্রীত্রিবৃতাভির্যুক্তম্| এতেঽপি পলাংশা ইত্যর্থঃ| জলদ্রোণে পচেত্| তেন চ পাদাবশেষেণ তথা দধ্ন আঢকে যবক্ষারপলৈস্ত্রিভিঘৃতপ্রস্থং পচেত্| এতচ্চ ঘৃতং সেব্যমানং দুষ্টবাতাদীন্ হন্তি| উপজাতিশালিন্যৌ বৃত্তে|

Adhikarana vAte vAtAdhike ramyakaghRutam vAte vAtAdhike ashokaghRutam (34) · Śloka 34

| বিধিস্তিল্বকবজ্জ্ঞেযো রম্যকশোকযোরপি||৩৪||

স০-তিল্বকস্যেব তিল্বকবত্ মহানিম্বস্যাশোকস্য চ বিধর্জ্ঞেযঃ|

Adhikarana vAte saMsRuShTadoShe tumbarvAdi cUrNam (35) · Śloka 35

চিকিত্সিতমিদং কুর্যাচ্ছুদ্ধবাতাপতানকে| সংসৃষ্টদোষে সংসৃষ্টং|৩৫|

স০-এবমুপক্রমং শুদ্ধবাতাপতানকে কুর্যাত্| সংসৃষ্টদোষে সংসৃষ্টং-দোষদ্বযোক্তং, চিকিত্সিতং কুর্যাত্|

Adhikarana vAte kaPAnvite tumbarvAdicUrNaM vAte kaPAnvite hi~ggvAdi cUrNam vAte kaPAnvite kaPavAtahRudrogoktaM ca karma (35-37) · Śloka 37

| চূর্ণযিত্বা কফান্বিতে||৩৫|| তুম্বরূণ্যভযা হিঙ্গু পৌষ্করং লবণত্রযম্| যবক্বাথাম্বুনা পেযং হৃত্পার্শ্বার্ত্যপতন্ত্রকে||৩৬|| হিঙ্গু সৌবর্চলং শুণ্ঠী দাডিমং সাম্লবেতসম্| পিবেদ্বা শ্লেষ্মপবনহৃদ্রোগোক্তং চ শস্যতে||৩৭||

স০-কফযুক্তে তুম্বর্বাদিকং চূর্ণযিত্বা যবক্বাথজলেন পেযং হৃত্পীডাদিষু(কে)| অথবা, হিঙ্গ্বাদিকং যবক্বাথাম্বুনা পেযম্| শ্লেষ্মবাতহৃদ্রোগে চ যত্কথিতং তচ্চ শস্যতে|

Adhikarana vAte AyAmayorarditavat tailadroNyAM shayanaM ca (38) · Śloka 38

আযামযোরর্দিতবদ্বাহ্যাভ্যন্তরযোঃ ক্রিযা| তৈলদ্রোণ্যাং চ শযনমান্তরোঽত্র সুদুস্তরঃ||৩৮||

স০-আযামযোর্বাহ্যাভ্যন্তরযোরর্দিতবত্ক্রিযা স্যাত্| তৈলদ্রোণ্যাং শযনং চ| অত্র-অনযোর্মধ্যাত্, আন্তর আযামঃ সুদুস্তরঃ-অতিকষ্টসাধ্যঃ|

Adhikarana vAte dhanuShkamBasya sAdhyAsAdhyatvam (39) · Śloka 39

বিবর্ণদন্তবদনঃ স্রস্তাঙ্গো নষ্টচেতনঃ| প্রস্বিদ্যংশ্চ ধনুষম্ভী দশরাত্রং ন জীবতি||৩৯||

স০-বিবর্ণদন্তাস্যঃ স্রস্তাঙ্গাদিঃ প্রস্বেদবাংশ্চ ধনুষ্কম্ভী দশরাত্রং ন জীবতি|

Adhikarana hanusraMse snehasvedAdi (40-42) · Śloka 42

বেগেষ্বতোঽন্যথা জীবেন্মন্দেষু বিনতো জডঃ| খঞ্জঃ কুণিঃ পক্ষহতঃ পঙ্গুলো বিকলোঽথবা||৪০|| হনুস্রংসে হনূ স্নিগ্ধস্বিন্নৌ স্বস্থানমানযেত্| উন্নামযেচ্চ কুশলশ্চিবুকং বিবৃতে মুখে||৪১|| নামযেত্সংবৃতে শেষমেকাযামবদাচরেত্| |৪২|

স০-অতোঽন্যথা-বিবর্ণদন্তাদিবিপর্যযেণ, তথা মন্দেষু বেগেষু সত্সু জীবেত্| জীবংশ্চ বিনতাদিগুণঃ স্যাত্| স০-হনুস্রংসে তু হনূ স্নিগ্ধস্বিন্নৌ সন্তৌ স্বস্থানং প্রাপযেত্| কুশলো ভিষক্ বিবৃতে মুখে সতি চিবুকমূর্ধ্বং নামযেত্| সংবৃতে তু মুখে চিবুকং নামযেত্| শেষং চিকিত্সিতমেকযামবদাচরেত্-অর্দিতবদাচরেত্|

Adhikarana jihvAstamBe vAtacikitsA (42) · Śloka 42

| জিহ্বাস্তম্ভে যথাবস্থং কার্যং বাতচিকিত্সিতম্||৪২||

স০-জিহ্বাযাঃ স্তম্ভে সতি যথাবস্থং বাতস্যোপক্রমঃ কার্যঃ স্নেহস্বেদান্বিতঃ|

Adhikarana ardrite nasyaM mUrddhatailAdi ca ardrite sashoPe vamanam ardrite dAharAgayukte sirAvyadhaH (43) · Śloka 43

অর্দিতে নাবনং মূর্ধ্নি তৈলং শ্রোত্রাক্ষিতর্পণম্| সশোফে বমনং, দাহরাগযুক্তে সিরাব্যধঃ||৪৩||

স০-অর্দিতে নাবনাদি চিকিত্সিতম্| শোফান্বিতে সতি বমনং কার্যম্| দাহাদিযুক্তে সতি সিরাব্যধঃ|

Adhikarana pakShAghAte snehanaM snehavirekaSca (44) · Śloka 44

স্নেহনং স্নেহসংযুক্তং পক্ষাঘাতে বিরেচনম্| |৪৪|

স০-পক্ষাঘাতে স্নেহনং তথা বিরেকঃ কার্যঃ স্নেহান্বিতঃ|

Adhikarana avabAhau nasyaM snehaSca (44) · Śloka 44

| অববাহৌ হিতং নস্যং স্নেহশ্চোত্তরভক্তিকঃ||৪৪||

স০-অববাহৌ নস্যাদি হিতম্| আমে তূপবাস এব হিত ইত্যুবাচ সঙ্গ্রহে (?)|

Adhikarana UrUstamBe snehasaMshodhana niShedhaH UrUstamBe rUkShopacAro yavAdyannaM jA~ggalamAsaM madhvamBoriShTapAnAdi UrUstamBe vatsakAdigaNAdikvAthAH (45-48) · Śloka 48

ঊরুস্তম্ভে তু ন স্নেহো ন চ সংশোধনং হিতম্| শ্লেষ্মামমেদোবাহুল্যাদ্যুক্ত্যা তত্ক্ষপণান্যতঃ||৪৫|| কুর্যাদ্রূক্ষোপচারশ্চ যবশ্যামাককোদ্রবাঃ| শাকৈরলবণৈঃ শস্তাঃ কিঞ্চিত্তৈলৈর্জলৈঃ শৃতৈঃ||৪৬|| জাঙ্গলৈরঘৃতৈর্মাংসৈর্মধ্বম্ভোরিষ্টপাযিনঃ| বত্সকাদির্হরিদ্রাদির্বচাদির্বা সসৈন্ধবঃ||৪৭|| আঢ্যবাতে সুখাম্ভোভিঃ পেযঃ ষড্ধরণোঽথবা| |৪৮|

স০-ঊরুস্তম্ভে তু স্নেহাদি ন হিতং শ্লেষ্মামমেদোবাহুল্যাত্| [অতঃ-] অস্মাচ্চ হেতোঃ, তযোঃ-আমশ্লেষ্মণোঃ, ক্ষপণানি-ক্ষযকরণানি, যুঞ্জ্যাত্| রূক্ষোপচারার্থং মধ্বম্ভোরিষ্টপাযিনো যবাদযঃ শাকৈরীষল্লবণৈস্তথা জলৈঃ শৃতৈঃ| তথা মাংসৈঃ সহ| কিম্ভূতৈঃ ? জাঙ্গলৈস্তথা ঘৃতরহিতৈর্হিতাঃ|

Adhikarana UrUstamBe triPalAdikalkaScavyAdikalkaSca (48-49) · Śloka 49

| লিহ্যাত্ক্ষৌদ্রেণ বা শ্রেষ্ঠাচব্যতিক্তাকণাঘনাত্||৪৮|| কল্কং সমধু বা চব্যপথ্যাগ্নিসুরদারুজম্| মূত্রৈর্বা শীলযেত্পথ্যাং গুগ্গুলুং গিরিসম্ভবম্||৪৯||

স০-অথবা ক্ষৌদ্রেণ ত্রিফলাদিকং কল্কং লিহ্যাত্| চব্যাদিকং বা কল্কং মাক্ষিকান্বিতং লিহ্যাত্| অথবা, গোমূত্রেণ হরীতকীমভ্যসেত্| তথা, গুগ্গুলুং শিলাজতু বা শীলযেত্|

Adhikarana UrUstamBe mUtraharItakirgugguluH (50) · Śloka 50

ব্যোষাগ্নিমুস্তত্রিফলাবিডঙ্গৈর্গুগ্গুলুং সমম্| খাদন্ সর্বান্ জযেদ্ব্যাধীন্ মেদঃ শ্লেষ্মামবাতজান্||৫০||

স০-ব্যোষাদিভির্নবভির্দ্রব্যৈর্গুগ্গুলং তুল্যং ভক্ষযন্ সর্বান্ মেদঃশ্লেষ্মামবাতজান্ ব্যাধীন্ হন্তি|

Adhikarana UrUstamBe kShAramUtrayuktAH svedAdayaH UrUstamBe kara~jjaPalAdilepAH UrUstamBe sthalolla~gghanAdivyAyAmAH (51-54) · Śloka 54

শাম্যত্যেবং কফাক্রান্তঃ সমেদস্কঃ প্রভঞ্জনঃ| ক্ষারমূত্রান্বিতান্ স্বেদান্ সেকানুদ্বর্তনানি চ||৫১|| কুর্যাদ্দিহ্যাচ্চ মূত্রাঢ্যৈঃ করঞ্জফলসর্ষপৈঃ| মূলৈর্বাঽপ্যর্কতর্কারীনিম্বজৈঃ সসুরাহ্বযৈঃ||৫২|| সক্ষৌদ্রসর্ষপাপক্বলোষ্টবল্মীকমৃত্তিকৈঃ| কফক্ষযার্থং ব্যাযামে সহ্যে চৈনং প্রবর্তযেত্||৫৩|| স্থলান্যুল্লঙ্ঘযেন্নারীঃ শক্তিতঃ পরিশীলযেত্| স্থিরতোযং সরঃ ক্ষেমং প্রতিস্রোতো নদীং তরেত্||৫৪||

স০-এবং-প্রাগুক্তে ক্রিযাক্রমে কৃতে সতি, কফাবৃতো মরুত্ সমেদস্কঃ শাম্যতি| তথা ক্ষারমূত্রযুতান্ স্বেদাদীন্ কুর্যাত্| তথা, করঞ্জফলসর্ষপৈঃ প্রভূতমূত্রালোডিতৈর্লিম্পেত্| অথবা, মূলৈরর্কাদিজৈঃ ক্ষৌদ্রাদিযুতৈর্লিম্পেত্| এনং-ঊরুস্তম্ভিনং, সোঢুং শক্যে ব্যাযামে চ কফক্ষযায প্রবর্তযেত্| শক্য ইতি "শকিসহোশ্চ" ইতি যত্| ব্যাযামং শনৈঃ কারযেদিত্যর্থঃ| তমেব ব্যাযামমাহ-স্থলান্যুল্লঙ্ঘযেত্| নারীর্যথাশক্তি শীলযেত্| স্থিরতোযং সরস্তরেত্| ক্ষেমং-গ্রহাদিরহিতম্| তথা নদীং তরেত্| কথম্ ? প্রতিস্রোতঃ-স্রোতোভিমুখম্|

Adhikarana UrUstamBe shleShmamedaH kShaye snehAdayaH (55) · Śloka 55

শ্লেষ্মমেদঃক্ষযে চাত্র স্নেহাদীনবচারযেত্| স্থানদূষ্যাদি চালোচ্য কার্যা শেষেষ্বপি ক্রিযা||৫৫||

স০-শ্লেষ্মমেদঃক্ষযে সত্যস্মিন্ স্নেহাদীনবচারযেত্| স০-শেষেষু চ বাতরোগেষু স্থানদূষ্যাদীন্নিরূপ্য চিকিত্সিতং কার্যম্|

Adhikarana UrUstamBe shleShmamedaHkshaye pAne sahacarAdi tailam (56) · Śloka 56

সহচরং সুরদারুং সনাগরং ক্বথিতমম্ভসি তৈলবিমিশ্রিতম্| পবনপীডিতদেহগতিঃ পিবন্ দ্রুতবিলম্বিতগো ভবতীচ্ছযা||৫৬||

স০-সহচরাদি ক্বথিতং তৈলযুতং পিবন্ মারুতার্দিতশরীর ইচ্ছযা দ্রুতগমনো বিলম্বিতগমনো বা ভবতি| তন্ত্রকৃতা সুমতিনৈতদ্বাতস্য বৃত্তস্য নামাপি শ্লিষ্টং কৃত্বা বিবদ্ধম্| দ্রুতবিলম্বিতাখ্যং হ্যেতদ্বৃত্তম্| তস্য চ লক্ষণম্ (বৃ. র. অ. ৩|৪৯)- "দ্রুতবিলম্বিতমাহ নভৌ ভরৌ|" ইতি|

Adhikarana UrUstamBe rAsnAdi ghRutam (57) · Śloka 57

রাস্নামহৌষধদ্বীপিপ্পলীশঠিপৌষ্করম্| পিষ্ট্বা বিপাচযেত্সর্পির্বাতরোগহরং পরম্||৫৭||

স০-রাস্নাদীন্ পিষ্ট্বা সর্পিঃ সামান্যপরিভাষযা বিপাচযেত্| তচ্চ সুষ্ঠু বাতরোগহৃত্|

Adhikarana UrUstamBe shleShmamedaHkShaye nimbAdighRutam (58-61) · Śloka 61

নিম্বামৃতাবৃষপটোলনিদিগ্ধিকানাং ভাগান্ পৃথক্ দশ পলান্ বিপচেদ্ধটেঽপাম্| অষ্টাংশশেষিতরসেন পুনশ্চ তেন প্রস্থং ঘৃতস্য বিপচেত্পিচুভাগকল্কৈঃ||৫৮|| পাঠাবিডঙ্গসুরদারুগজোপকুল্যা- দ্বিক্ষারনাগরনিশামিশিচব্যকুষ্ঠৈঃ| তেজোবতীমরিচবত্সকদীপ্যকাগ্নি- রোহিণ্যরুষ্করবচাকণমূলযুক্তৈঃ||৫৯|| মঞ্জিষ্ঠযাঽতিবিষযা বিষযা যবান্যা সংশুদ্ধগুগ্গুলুপলৈরপি পঞ্চসঙ্খ্যৈঃ| তত্সেবিতং বিধমতি প্রবলং সমীরং সন্ধ্যস্থিমজ্জগতমপ্যথ কুষ্ঠমীদৃক্||৬০|| নাডীব্রণার্বুদভগন্দরগণ্ডমালা- জত্রূর্ধ্বসর্বগদগুল্মগুদোত্থমেহান্| যক্ষ্মারুচিশ্বসনপীনসকাসশোফ- হৃত্পাণ্ডুরোগমদবিদ্রধিবাতরক্তম্||৬১||

স০-নিম্বাদীনাং পৃথক্ পৃথক্ দশপলানম্বুদ্রোণে পচেত্| তেনাষ্টাংশশেষেণ ক্বাথেন পাঠাদিভির্যবান্যন্তৈঃ কল্কীকৃতৈঃ কর্ষাংশৈঃ শ্রেষ্ঠগুগ্গুলুপলৈশ্চ পঞ্চভিঃ সর্পিষঃ পুনঃ প্রস্থং বিপচেত্| তত্-সর্পিঃ, শীলিতং বাযুমতিবলং সন্ধ্যাদিগতমপি পরাকরোতি| কুষ্ঠমপীদৃশং(ক্)-সন্ধ্যাদিগতং, হন্তি| তথা, নাডীব্রণাদীন্ শমযতি| বসন্ততিলকাশ্চতস্রঃ|

Adhikarana shirogate vAte ghRutamaNDa nasyam (62) · Śloka 62

বলাবিল্বশৃতে ক্ষীরে ঘৃতমণ্ডং বিপাচযেত্| তস্য শুক্তিঃ প্রকুঞ্চো বা নস্যং বাতে শিরোগতে||৬২||

স০-বলাবিল্বাভ্যাং ক্বথিতে ক্ষীরে ঘৃতমণ্ডং বিপাচযেত্| তস্য-ঘৃতমণ্ডস্য পক্বস্য, কর্ষদ্বযং পলং বা নস্যং শিরোগতে বাতে প্রযোক্তব্যম্|

Adhikarana kevale vAte nakrAdivasAnasyam (63) · Śloka 63

তদ্বত্সিদ্ধা বসা নক্রমত্স্যকূর্মচুলূকজা| বিশেষেণ প্রযোক্তব্যা কেবলে মাতরিশ্বনি||৬৩||

স০-তদ্বত্-ঘৃতমণ্ডবত্, নক্রাদিজা বসা কেবলে বাতে বিশেষেণ প্রযোজ্যা|

Adhikarana kaPayukte nasyam jIrNapiNyAkAditailam (64) · Śloka 64

জীর্ণং পিণ্যাকং পঞ্চমূলং পৃথক্ চ ক্বাথং ক্বাথাভ্যামেকস্তৈলমাভ্যাম্| ক্ষীরাদষ্টাংশং পাচযেত্তেন পানা- দ্বাতা নশ্যেযুঃ শ্লেষ্মযুক্তা বিশেষাত্||৬৪||

স০-পুরাণং পিণ্যাকং পঞ্চমূলং চ পৃথক্ ক্বাথ্যম্| ক্বাথাভ্যামেতাভ্যাং তৈলমেকতঃ-একস্মিন্ তৈলং মিশ্রিতং, ক্ষীরাদষ্টাংশং পাচযেত্| তেন তৈলেন বাতা নশ্যন্তি, বিশেষেণ কফযুক্তাঃ| বৈশ্বদেবী|

Adhikarana sarva vAtavyAdhau prasAriNItailam (65-66) · Śloka 66

প্রসারিণীতুলাক্বাথে তৈলপ্রস্থং পযঃসমম্| দ্বিমেদামিশিমঞ্জিষ্ঠাকুষ্ঠরাস্নাকুচন্দনৈঃ||৬৫|| জীবকর্ষভকাকোলীযুগুলামরদারুভিঃ| কল্কিতৈর্বিপচেত্সর্বমারুতামযনাশনম্||৬৬||

স০-প্রসারিণীতুলাক্বাথে তৈলপ্রস্থং ক্ষীরসমং দ্বিমেদাদিভিঃ কল্কিতৈঃ সামান্যপরিভাষযোক্তকল্কপ্রমাণৈর্বিপচেত্| তচ্চাশেষবাতরোগঘ্নম্|

Adhikarana sarva vAtavyAdhau sahAcarAditailam (67-69) · Śloka 69

সমূলশাখস্য সহাচরস্য তুলাং সমেতাং দশমূলতশ্চ| পলানি পঞ্চাশদভীরুতশ্চ পাদাবশেষং বিপচেদ্বহেঽপাম্||৬৭|| তত্র সেব্যনখকুষ্ঠহিমৈলা- স্পৃক্প্রিযঙ্গুনলিকাম্বুশিলাজৈঃ| লোহিতানলদলোহসুরাহ্বৈঃ কোপনামিশিতুরুষ্কনতৈশ্চ||৬৮|| তুল্যক্ষীরং পালিকৈস্তৈলপাত্রং সিদ্ধং কৃচ্ছ্রান্ শীলিতং হন্তি বাতান্| কম্পাক্ষেপস্তম্ভশোষাদিযুক্তান্ গুল্মোন্মাদৌ পীনসং যোনিরোগান্||৬৯||

স০-সহাচরস্য মূলশাখান্বিতস্য তুলাং সমেতাং দশমূলাচ্চ তুলাং শতাবর্যাঃ পলানি পঞ্চাশত্ জলস্য চতুর্দ্রোণে পাদাবশেষং বিপচেত্| তস্মিন্ পাদাবশেষে সেব্যাদিভিঃ পালিকৈস্তৈলাঢকং তুল্যক্ষীরং সিদ্ধং শীলিতং কৃচ্ছ্রান্ মারুতান্ কম্পাদিযুতান্ গুল্মাদীংশ্চ হন্তি| স্বাগতাশালিন্যৌ বৃত্তে|

Adhikarana sarva vAtavyAdhau BeDasammataM sahAcarAdi tailam (70-73) · Śloka 73

সহাচরতুলাযাস্তু রসে তৈলাঢকং পচেত্| মূলকল্কাদ্দশপলং পযো দত্ত্বা চতুর্গুণম্||৭০|| অথবা নতষড্গ্রন্থাস্থিরাকুষ্ঠসুরাহ্বযাত্| সৈলানলদশৈলেযশতাহ্বারক্তচন্দনাত্||৭১|| সিদ্ধেঽস্মিন্ শর্করাচূর্ণাদষ্টাদশপলং ক্ষিপেত্| ভেডস্য সম্মতং তৈলং তত্কৃচ্ছ্রাননিলামযান্||৭২|| বাতকুণ্ডলিকোন্মাদগুল্মবর্ধ্মাদিকান্ জযেত্| |৭৩|

স০-সহাচরতুলাযাঃ ক্বাথে তৈলাঢকং পচেত্| মূলকল্কাদ্দশপলানি ক্ষীরং তৈলচতুর্গুণং দদ্যাদিত্যেবং পাকঃ| অথবা সহাচরতুলাযাঃ ক্বাথে নতাদিভিঃ সিদ্ধেঽস্মিন্ তৈলে শর্করারজসোঽষ্টাদশপলানি ক্ষিপেত্| এতচ্চ ভেডাখ্যস্য মহর্ষেঃ সম্মতং দারুণান্ বাতরোগান্ বাতকুণ্ডলিকাদীংশ্চ জযেত্|

Adhikarana sarva vAtavyAdhau balAtailam (73-81) · Śloka 81

| বলাশতং ছিন্নরুহাপাদং রাস্নাষ্টভাগিকম্||৭৩|| জলাঢকশতে পক্ত্বা শতভাগস্থিতে রসে| দধিমস্ত্বিক্ষুনির্যাসশুক্তৈস্তৈলাঢকং সমৈঃ||৭৪|| পচেত্সাজযোর্ধাংশং কল্কৈরেভিঃ পলোন্মিতৈঃ| শঠীসরলদার্বেলামঞিষ্ঠাগুরুচন্দনৈঃ||৭৫|| পদ্মকাতিবলামুস্তাশূর্পপর্ণীহরেণুভিঃ| যষ্ট্যাহ্বসুরসব্যাঘ্রনখর্ষভকজীবকৈঃ||৭৬|| পলাশরসকস্তূরীনলিকাজাতিকোশকৈঃ| স্পৃক্কাকুঙ্কুমশৈলেযজাতীকটুফলাম্বুভিঃ||৭৭|| ত্বক্কুন্দরুককর্পূরতরুষ্কশ্রীনিবাসকৈঃ| লবঙ্গনখকঙ্কোলকুষ্ঠমাংসীপ্রিযঙ্গুভিঃ||৭৮|| স্থৌণেযতগরধ্যামবচামদনকপ্লবৈঃ| সনাগকেসরৈঃ সিদ্ধে দদ্যাচ্চাত্রাবতারিতে||৭৯|| পত্রকল্কং ততঃ পূতং বিধিনা তত্প্রযোজিতম্| কাসং শ্বাসং জ্বরং ছর্দিং মূর্চ্ছাং গুল্মক্ষতক্ষযান্||৮০|| প্লীহশোষাবপস্মারমলক্ষ্মীং চ প্রণাশযেত্| বলাতৈলমিদং শ্রেষ্ঠং বাতব্যাধিবিনাশনম্||৮১||

স০-বলাযাঃ শতং, গুডূচ্যাঃ পঞ্চবিংশতিপলানি, রাস্নাযাঃ সার্ধানি দ্বাদশপলানি, এতচ্চ জলাঢকশতে পক্ত্বাঽঽঢকমাত্রস্থিতে ক্বাথে দধ্যাদিভিস্তুল্যৈস্তৈলাঢকমজাক্ষীরস্যার্ধাঢকং শঠ্যাদিভিঃ পলোন্মিতৈঃ পচেত্| কটুফলং-লঘুকঙ্কোলকম্| প্লবঃ-কুটন্নটঃ| অবতারিতে চাস্মিন্ পত্রকল্কং দদ্যাত্| অনন্তরমেতত্তৈলং বিধিনা প্রযোজিতং কাসাদীন্ হন্তি| এতদ্বলাতৈলং শ্রেষ্ঠং গর্ভব্যাপদুক্তাদ্বলাতৈলাত্| তথা বাতরোগঘ্নম্|

Adhikarana sarva vAtavyAdhau etesnehAH pAnanasyAdidUpayojyAH (82) · Śloka 82

পানে নস্যেঽন্বাসনেঽভ্যঞ্জনে চ স্নেহাঃ কালে সম্যগেতে প্রযুক্তাঃ| দুষ্টান্ বাতানাশু শান্তিং নযেযু- র্বন্ধ্যা নারীঃ পুত্রভাজশ্চ কুর্যুঃ||৮২||

স০-এতে-পূর্বোক্তাঃ স্নেহাঃ, পানাদিষু কালে-অবসরে, প্রযুক্তা দুষ্টান্ বাতান্ দ্রাগেব শমযেযুঃ| বন্ধ্যাশ্চ নারীঃ পুত্রভাজো বিদধ্যুঃ| শালিনীবৃত্তম্|

Adhikarana pakvAshayasthe kaPe pitte ca bastiH (21) · Śloka 21

স্নেহস্বেদৈর্দ্রুতঃ শ্লেষ্মা যদা পক্বাশযে স্থিতঃ| পিত্তং বা দর্শযেদ্রূপং বস্তিভিস্তং বিনির্জযেত্||৮৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে বাতব্যাধিচিকিত্সিতং নাম একবিংশোঽধ্যাযঃ||২১||

স০-স্নেহস্বেদৈশ্চ যদা কফো দ্রুতো-দ্রবত্বং প্রাপ্তঃ, পক্বাশযস্থো রূপং দর্শযেত্, অথবা পিত্তং রূপং দর্শযেত্, তং-কফং পিত্তং বা, বস্তিভির্বিনির্জযেত্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে বাতব্যাধিচিকিত্সিতং নাম একবিংশোঽধ্যাযঃ সমাপ্তঃ|| ২১||