4. bastikalpādhyāyaḥ

Adhikarana adhyAyopakramaH · Śloka

অথ দোষহরণসামান্যাদ্বস্তিকল্পঃ প্রক্রম্যত ইত্যাহ-

Adhikarana bastikalpAdhyAyaH (2) · Śloka 2

অথাতো বস্তিকল্পং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

সং-কল্পনং-কল্পঃ| বস্তেঃ কল্পো বস্তিকল্পঃ, তম্| শেষং পূর্ববত্|

Adhikarana vAtaharA nirUhAHbalAdiH (1-3) · Śloka 3

বলাং গুডূচীং ত্রিফলাং সরাস্নাং দ্বিপঞ্চমূলং চ পলোন্মিতানি| অষ্টৌ ফলান্যর্ধতুলাং চ মাংসা- চ্ছাগাত্পচেদপ্সু চতুর্থশেষম্||১|| পূতো যবানীফলবিল্বকুষ্ঠ- বচাশতাহ্বাঘনপিপ্পলীনাম্| কল্কৈর্গুডক্ষৌদ্রঘৃতৈঃ সতৈলৈ- র্যুক্তঃ সুখোষ্ণো লবণান্বিতশ্চ||২|| বস্তিঃ পরং সর্বগদপ্রমাথী স্বস্থে হিতো জীবনবৃংহণশ্চ| বস্তৌ চ যস্মিন্ পঠিতো ন কল্কঃ সর্বত্র দদ্যাদমুমেব তত্র||৩||

সং-বলাদীনি প্রত্যেকং পলোন্মিতানি, তথাঽষ্টৌ [ ফলানি-] মদনফলানি প্রাযেণ পলং স্যুঃ, ছাগমাংসাত্ পঞ্চাশত্পলানি, অপ্সু চতুর্ভাগাবশেষং পচেত্| পূতশ্চ ক্বাথো যবন্যাদিভিঃ কল্কৈস্তথা গুডাদিভির্যুক্তঃ সুখোষ্ণো লবণযুতশ্চ বস্ত্যর্থং পরিকল্পিতত্বাদ্বস্তিঃ সর্বগদানামপহন্তা স্বস্থে চ হিতঃ স্বাস্থ্যানুবৃত্তিকৃত্ত্বাত্ জীবনো বৃংহণশ্চ| অত্র চতুর্থশেষগ্রহণমনর্থকম্| যতো বক্ষ্যতি (ক. অ. ৬/১৪)- "ক্বাথং দ্রব্যপলে কুর্যাত্প্রস্থার্ধং পাদশেষিতম্|" ইতি| অত্রোচ্যতে| বক্ষ্যমাণপরিভাষাপ্রমাণমত্র নাশ্রীযত ইতি প্রতিপাদনায চতুর্থশেষোপাদানম্| তেন নিরূহযোগ্যক্বাথার্থং দ্রব্যাচ্চতুর্গুণং জলং ক্ষিপ্ত্বা চতুর্ভাগাবশেষং গ্রাহ্যমিতীহাবতিষ্ঠতে| এবমন্যত্রাপি নিরূহ উপযুজ্যতে| যে তু তন্ত্রকারাভিপ্রাযমবিদন্তঃ সরলাশমুখীকাস্তে সামান্যপরিভাষোক্তপ্রমাণং জলং ক্ষিপ্ত্বা চতুরংশশেষং গ্রাহ্যামিতি বদন্তি, শেষং স্থিতম্| তথা যবান্যাদিকল্কস্য পলদ্বযমাত্রং গ্রাহ্যম্, "স্বস্থে কল্কপলদ্বযম্|" (হৃ. সূ. অ. ১৯/৪৪) ইতি বচনাত্| স্নেহশ্চাত্র ক্বাথে চতুর্থাংশঃ ষষ্ঠাংশোঽষ্টমাংশঃ ক্রমেণ বাতপিত্তকফেষু যোজ্যঃ| উক্তং চ (হৃ. সূ. অ. ১৯/৩৯)- "ততঃ ক্বাথাচ্চতুর্থাশং স্নেহং বাতে প্রকল্পযেত্| পিত্তে স্বস্থে চ ষষ্ঠাংশমষ্টমাংশং কফেঽধিকে|| ইতি| মধুলবণে চ যথা নাত্যচ্ছতা নাতিলবণতা চ বস্তৌ স্যাত্তথা যোজযিতব্যে| উক্তং চ (হ্র.সূ অ . ১৯/৪১)- মধুপট্বাদিশেষং চ যুক্ত্যা এব (ইতি)| বস্তৌ চ যত্র কল্কো ন পঠিতস্তত্রামুমেব কল্কং দদ্যাত্| উপজাতিবৃত্তে ইন্দ্রবজ্রা চ|

Adhikarana dashamUlAdiH (4) · Śloka 4

দ্বিপঞ্চমূলস্য রসোঽম্লযুক্তঃ সচ্ছাগমাংসস্য সপূর্বপেষ্যঃ| ত্রিস্নেহযুক্তঃ প্রবরো নিরূহঃ সর্বানিলব্যাধিহরঃ প্রদিষ্টঃ||৪||

স০-দশমূলস্য ছাগমাংসসহিতস্য রসঃ-ক্বাথঃ, অম্লেন কাঞ্জিকাদিনা যুক্তঃ, পূর্বৈঃ-যবন্যাদিভিঃ পেষ্যৈঃ সহিতঃ, তথা ত্রিভিঃ স্নেহৈঃ-সর্পির্মজ্জাবসাখ্যৈরন্বিতঃ, শ্রেষ্ঠো নিরূহঃ সর্বব্যাধিহরো গদিতঃ|

Adhikarana balApaTolyAdiH (5-6) · Śloka 6

বলাপটোলীলঘুপঞ্চমূল- ত্রাযন্তিকৈরণ্ডযবাত্সুসিদ্ধাত্| প্রস্থো রসাচ্ছাগরসার্ধযুক্তঃ সাধ্যঃ পুনঃ প্রস্থসমঃ স যাবত্||৫|| প্রিযঙ্গুকৃষ্ণাঘনকল্কযুক্তঃ সতৈলসর্পির্মধুসৈন্ধবশ্চ| স্যাদ্দীপনো মাংসবলপ্রদশ্চ চক্ষুর্বলং চোপদধাতি সদ্যঃ||৬||

স০-বলাপটোল্যাদে রসাত্ সুসিদ্ধাত্ প্রস্থঃ সিদ্ধঃ, তথা ছাগমাংসরসাদর্ধপ্রস্থেন যুক্তঃ পুনঃ সাধ্যঃ যাবদসৌ প্রস্থপ্রমাণঃ স্যাত্| প্রিযঙ্গ্বাদিভিঃ কল্কৈর্যুক্তস্তৈলাদিভিঃ সহিতো বস্তির্দীপনো মাংসবলপ্রদশ্চ স্যাত্| চক্ষুর্বলং চ শীঘ্রমেবোপদধাতি|

Adhikarana eraNDamUlAdiH (7-10) · Śloka 10

এরণ্ডমূলাত্ত্রিপলং পলাশা ত্তথা পলাংশং লঘুপঞ্চমূলম্| রাস্নাবলাছিন্নরুহাশ্বগন্ধা- পুনর্নবারগ্বধদেবদারু||৭|| ফলানি চাষ্টৌ সলিলাঢকাভ্যাং বিপাচযেদষ্টমশেষিতেঽস্মিন্| বচাশতাহ্বাহপুষাপ্রিযঙ্গু- যষ্টীকণাবত্সকবীজমুস্তম্||৮|| দদ্যাত্সুপিষ্টং সহতার্ক্ষ্যশৈল- মক্ষপ্রমাণং লবণাংশযুক্তম্| সমাক্ষিকস্তৈলযুতঃ সমূত্রো বস্তির্জযেল্লেখনদীপনোঽসৌ||৯|| জঙ্ঘোরুপাদত্রিকপৃষ্ঠকোষ্ঠ- হৃদ্গুহ্যশূলং গুরুতাং বিবন্ধম্| গুল্মাশ্মবর্ধ্মগ্রহণীগুদোত্থাং- স্তাস্তাংশ্চ রোগান্ কফবাতজাতান্||১০||

স০-এরণ্ডমূলস্য ত্রীণি পলানি, পলাশাত্-কিংশুকাচ্চ পলানি ত্রীণি, হ্রস্বং পঞ্চমূলং পালিকং, রাস্নাদীনি প্রত্যেকং পালিকানি, অষ্টৌ মদনফলানি চ জলাঢকদ্বযে বিপাচযেত্| অষ্টাংশশেষিতে চাস্মিন্ বচাদিকমক্ষপ্রমাণং সুপিষ্টং দদ্যাত্| লবণকর্ষচতুর্থাংশযুক্তং মাক্ষিকতৈলমূত্রান্বিতোঽযং বস্তির্লেখনো দীপনো জঙ্ঘাদিশূলাদীংস্তাংস্তান্-বহুবিধানপি, বাতশ্লেষ্মোত্থান্ রোগান্ জযতি| ষডুপজাতয ইন্দ্রবজ্রা চ|

Adhikarana pittaharA nirUhAH yaShTyAhvAdiH (11) · Śloka 11

যষ্ট্যাহ্বরোধ্রাভযচন্দনৈশ্চ শৃতং পযোঽগ্র্যং কমলোত্পলৈশ্চ| সশর্করাক্ষৌদ্রঘৃতং সুশীতং পিত্তামযান্ হন্তি সজীবনীযম্||১১||

স০-যষ্ট্যাহ্বাদিভিঃ শৃতং পযোঽগ্র্যং-শ্রেষ্ঠং, স্যাত্| শর্করাক্ষৌদ্রঘৃতযুক্তং সুশীতলং জীবনীযসহিতং পিত্তামযান্ হন্তি| অভযং-উশীরম্|

Adhikarana rAsnAdiH (12-16) · Śloka 16

রাস্নাং বৃষং লোহিতিকামনন্তাং বলাং কনীযস্তৃণপঞ্চমূল্যৌ| গোপাঙ্গনাচন্দনপদ্মকর্দ্ধি- যষ্ট্যাহ্বরোধ্রাণি পলার্ধকানি||১২|| নিঃক্বাথ্য তোযেন রসেন তেন শৃতং পযোঽর্ধাঢকমম্বুহীনম্| জীবন্তিমেদর্ধ্দিবরীবিদারী- বীরাদ্বিকাকোলিকসেরুকাভিঃ||১৩|| সিতোপলাজীবকপদ্মরেণু- প্রপৌণ্ডরীকোত্পলপুণ্ডরীকৈঃ| রোধ্রাত্মগুপ্তামধুযষ্টিকাভি- র্নাগাহ্বমুঞ্জাতকচন্দনৈশ্চ||১৪|| পিষ্টৈর্ঘৃতক্ষৌদ্রযুতৈর্নিরূহং সসৈন্ধবং শীতলমেব দদ্যাত্| প্রত্যাগতে ধন্বরসেন শালীন্ ক্ষীরেণ বাঽদ্যাত্পরিষিক্তগাত্রঃ||১৫|| দাহাতিসারপ্রদরাস্রপিত্ত- হৃত্পাণ্ডুরোগান্ বিষমজ্বরং চ| সগুল্মমূত্রগ্রহকামলাদীন্ সর্বামযান্ পিত্তকৃতান্নিহন্তি||১৬||

স০-রাস্নাদীন্যর্ধপলপ্রমাণানি তোযেন নিঃক্বাথ্য তেন রসেন পযঃ শৃতমর্ধাঢকমাত্রং জলহীনং জীবন্ত্যাদিভিঃ সুপিষ্টৈর্ঘৃতক্ষৌদ্রযুতৈর্নিরূহং সৈন্ধবান্বিতং শীতলমেব দদ্যাত্| তস্মিন্নিরূহে প্রত্যাগতে-নির্গতে, পরিষিক্তাঙ্গো ধন্বমাংসরসেন শালীনদ্যাত্| সাত্ম্যাদিবশাদ্বা ক্ষীরেণাদ্যাত্| স চ দাহাদীন্ হন্তি| পঞ্চোপজাতয ইন্দ্রবজ্রা চ|

Adhikarana kaphaharA nirUhAH koshAtakAdiH (17-19) · Śloka 19

কোশাতকারগ্বধদেবদারু- মূর্বাশ্বদংষ্ট্রাকুটজার্কপাঠাঃ| পক্ত্বা কুলত্থান্ বৃহতীং চ তোযে রসস্য তস্য প্রসৃতা দশ স্যুঃ||১৭|| তান্ সর্ষপৈলামদনৈঃ সকুষ্ঠৈ- রক্ষপ্রমাণৈঃ প্রসৃতৈশ্চ যুক্তান্| ক্ষৌদ্রস্য তৈলস্য ফলাহ্বযস্য ক্ষারস্য তৈলস্য চ সার্ষপস্য||১৮|| দদ্যান্নিরূহং কফরোগিতায মন্দাগ্নযে চাশনবিদ্বিষে চ| - |১৯|

স০-কোশাতকাদীন্ জলে পক্ত্বা তস্য রসস্য-ক্বাথস্য, দশ প্রসৃতাঃ স্যুঃ| তান্ সর্ষপাদিভিরক্ষপ্রমাণৈর্যুক্তান্, ক্ষৌদ্রাদীনাং প্রত্যেকং প্রসৃতেন যুক্তান্, ফলাহ্বযং তৈলং-যন্মদনফলকল্কেনাম্লৈশ্চ পক্বং তৈলম্, তদেতত্সংযোজ্য কফরোগার্তাদিভ্যো নিরূহং দদ্যাত্| অত্র কোশাতকাদীনাং দ্রব্যাণাং পরিমাণমনুক্তমপি সামান্যপরিভাষযা তত্পরিমাণং কল্পনীযম্| যত্পরিমাণেভ্যো দ্রব্যেভ্যঃ ষোডশগুণং জলং দত্ত্বা চতুর্ভাগাবশেষং যথা দশ প্রসৃতাঃ সম্পদ্যন্তে তত্পরিমাণানি কোশাতক্যাদীন্যত্র পরিকল্পনীযানীতি বোধ্যম্|

Adhikarana sukumAranirUhAH (19) · Śloka 19

- | বক্ষ্যে মৃদূন্ স্নেহকৃতো নিরূহান্ সুখোচিতানাং প্রসৃতৈঃ পৃথক্ তু||১৯||

স০-তুশব্দো ভিন্নক্রমঃ| সুখোচিতানাং পুনঃ সুকুমারাণাং তু নিরূহান্ পৃথক্ প্রসৃতৈর্বক্ষ্যে-ভণিষ্যামি| কিম্ভূতান্ ? মৃদূন্-অতীক্ষ্ণান্, তথা স্নেহকৃতঃ-কৃতস্নেহান্| কেচিত্ত্বসমগ্রং বৃত্তং চোক্তম(ক্ত্বাঽ)নুষ্টুভা সংগৃহ্ণতে, তচ্চাসম্যক্, এবং হি বৃত্তস্যাস্য খণ্ডনা স্যাত্, তস্মাদযমেব পাঠঃ শ্রেযান্| প্রসৃতৈশ্চ নিষ্পাদিতত্বাদেতে বক্ষ্যমাণা বস্তযঃ প্রসৃতসংজ্ঞাঃ [ জ্ঞেযাঃ ]| উপজাতীন্দ্রবজ্রোপজাতযঃ|

Adhikarana kShIrAdisAdhitaH,tailAdisAdhitaH pa~jcatiktAkhyaH tailagomUtrAdisAdhitaH payasyAdisAdhitaH (20-26) · Śloka 26

অথেমান্ সুকুমারাণাং নিরূহান্ স্নেহনান্ মৃদূন্| কর্মণা বিপ্লুতানাং চ বক্ষ্যামি প্রসৃতৈঃ পৃথক্||২০|| ক্ষীরাদ্ দ্বৌ প্রসৃতৌ কার্যৌ মধুতৈলঘৃতাত্ত্রযঃ| খজেন মথিতো বস্তির্বাতঘ্নো বলবর্ণকৃত্||২১|| একৈকঃ প্রসৃতস্তৈলপ্রসন্নাক্ষৌদ্রসর্পিষাম্| বিল্বাদিমূলক্বাথাদ্দ্বৌ কৌলত্থাদ্দ্বৌ স বাতজিত্||২২|| পটোলনিম্বভূতীকরাস্নাসপ্তচ্ছদাম্ভসঃ| প্রসৃতঃ পৃথগাজ্যাচ্চ বস্তিঃ সর্ষপকল্কবান্||২৩|| স পঞ্চতিক্তোঽভিষ্যন্দকৃমিকুষ্ঠপ্রমেহহা| চত্বারস্তৈলগোমূত্রদধিমণ্ডাম্লকাঞ্জিকাত্||২৪|| প্রসৃতাঃ সর্ষপৈঃ পিষ্টৈর্বিট্সঙ্গানাহভেদনঃ| পযস্যেক্ষুস্থিরারাস্নাবিদারীক্ষৌদ্রসর্পিষাম্||২৫|| একৈকঃ প্রসৃতো বস্তিঃ কৃষ্ণাকল্কো বৃষত্বকৃত্| |২৬|

স০-অথ-অনন্তরম্, ইমান্নিরূহান্ স্নেহনসমর্থান্ মৃদূন্-অতীক্ষ্ণান্, সুকুমারাণাং নরাণাং কর্মণা-বমনাদিনা, বিপ্লুতানাং-ভ্রষ্টানাং, প্রসৃতৈঃ পৃথগুপলক্ষিতান্ বক্ষ্যামি| ক্ষীরাদ্ দ্বৌ প্রসৃতৌ-চত্বারি পলানি, মধুতৈলঘৃতাত্ ত্রযঃ প্রসৃতাঃ-ষট্ পলানি, খজেন-দর্ব্যাকারেণ, মথিতো বস্তির্বাতং হন্তি বলং বর্ণং চ করোতি| অত্র চ কল্কাভাবাত্ বলাদ্যে বস্তৌ যঃ কল্কঃ (শ্লো. ২) , স এব কল্প্যঃ| তৈলাদীনাং প্রত্যেকং প্রসৃত একঃ| বিল্বাদিপঞ্চমূলক্বাথাত্ দ্বৌ প্রসৃতৌ| কৌলত্থাত্ ক্বাথাত্ দ্বৌ প্রসৃতৌ| স বস্তির্বাতজিত্| পটোলাদিনাং পঞ্চানাং ক্বাথাত্ পৃথক্ প্রসৃতো, ঘৃতাচ্চ প্রসৃতো, বস্তিঃ স সর্ষপকল্কঃ স পঞ্চতিক্ত আভিষ্যন্দাদিহা| তৈলাদিভ্যশ্চতুর্ভ্যশ্চত্বারঃ প্রসৃতাঃ-আষ্টৌ পলানি, পিষ্টৈঃ সর্ষপৈঃ সহ বস্তির্বিট্সঙ্গাদিজিত্| পযস্যাদিক্বাথানাং পঞ্চানাং প্রসৃতাঃ পঞ্চ, মাক্ষিকঘৃতযোর্দ্বৌ প্রসৃতৌ, ইতি সপ্ত প্রসৃতাঃ| পিপ্পলীকল্কবান্ বস্তির্বৃষত্বকৃত্-শুক্রকরঃ|

Adhikarana siddhabastayaH (26-27) · Śloka 27

| সিদ্ধবস্তীনতো বক্ষ্যে সর্বদা যান্ প্রযোজযেত্||২৬|| নির্ব্যাপদো বহুফলান্ বলপুষ্টিকরান্ সুখান্| |২৭|

স০-অতঃ-প্রসৃতেভ্যো নিরূহেভ্যোঽনন্তরং, নির্ব্যাপত্ত্বাদি গুণতঃ সংজ্ঞযা সিদ্ধবস্তীনতিপ্রসিদ্ধান্ বক্ষ্যে-ভণিষ্যামি| যান্ সর্বদা প্রযোজযেত্| তথা নির্ব্যাপদো বহুফলান্ বলাদিপ্রদাংশ্চ সুখাংশ্চ| সুশ্রুতে চোক্তম্ (চি. অ. ৩৮/১১৬)- "যস্মিন্ বস্তৌ যথা যুক্তে ধ্রুবা সিদ্ধিঃ প্রকীর্তিতা| সিদ্ধবস্তিরিতি খ্যাতো মুনিভিস্তত্ত্বদর্শিভিঃ||" ইতি|

Adhikarana mAdhutailikaH (27-29) · Śloka 29

| মধুতৈলে সমে কর্ষঃ সৈন্ধবাদ্দ্বিপিচুর্মিসিঃ||২৭|| এরণ্ডমূলক্বাথেন নিরূহো মাধুতৈলিকঃ| রসাযনং প্রমেহার্শঃকৃমিগুল্মান্ত্রবৃদ্ধিনুত্||২৮|| সযষ্টিমধুকশ্চৈষ চক্ষুষ্যো রক্তপিত্তজিত্| |২৯|

স০-মধুতৈলে সমে-তুল্যে, সৈন্ধবস্য কর্ষো, মিসিঃ দ্বিপিচুঃ-দ্বিকর্ষপ্রমাণঃ, এরণ্ডমূলক্বাথেন সহ মাধুতৈলিকোঽযং নিরুহো রসাযনং স্যাত্ প্রমেহাদিজিত্| "যস্মান্মধু চ তৈলং চ প্রাধান্যেনাত্র বর্ততে| মাধুতৈলিক ইত্যেষবিজ্ঞেযো বস্তিচিন্তকৈঃ||" ইতি সুশ্রুতঃ (চি. অ. ৩৮/১১৪)| সং-মধুযষ্টিযুক্তশ্চৈষ বস্তিশ্চক্ষুষ্যো রক্তপিত্তজিত্|

Adhikarana yApano bastiH (29-30) · Śloka 30

| যাপনো ঘনকল্কেন মধুতৈলরসাজ্যবান্||২৯|| পাযুজানূরুবৃষণবস্তিমেহনশূলজিত্| |৩০|

স০-যাপনাখ্যো বস্তির্মুস্তাকল্কেন সহ মধুতৈলমাংসরসাজ্যযুতঃ পায্বাদিশূলজিত্| যাপনঃ-প্রাণধারণাত্|

Adhikarana dvitIyo yApanabastiH (30-31) · Śloka 31

| প্রসৃতাংশৈর্ঘৃতক্ষৌদ্রবসাতৈলৈঃ প্রকল্পযেত্||৩০|| যাপনং সৈন্ধবার্ধাক্ষহপুষার্ধপলান্বিতম্| |৩১|

স০-যাপনং নিরূহং ঘৃতাদিভিঃ প্রসৃতপ্রমাণৈঃ সৈন্ধবার্ধকর্ষেণ হপুষার্ধপলযুতং কল্পযেত্|

Adhikarana yuktaratho bastiH (31-32) · Śloka 32

| এরণ্ডমূলনিঃক্বাথো মধুতৈলং সসৈন্ধবম্||৩১|| এষ যুক্তরথো বস্তিঃ সবচাপিপ্পলীফলঃ| |৩২|

স০-এরণ্ডমূলনিঃক্বাথো মধুতৈলসৈন্ধবান্বিত ইত্যেষ বচাপিপ্পলীমদনফলান্বিতো যুক্তরথোঽন্বর্থনামা বস্তিঃ| সুশ্রুতে চোক্তম্ (চি. অ. ৩৮/১১৫)- "রথেষ্বপি হি যুক্তেষু হস্ত্যশ্বেষ্বপি যোজযেত্| যস্মান্ন প্রতিষিদ্ধোঽযমতো যুক্তরথঃ স্মৃতঃ||" ইতি|

Adhikarana doShaharo bastiH (32-33) · Śloka 33

| স ক্বাথো মধুষড্গ্রন্থাশতাহ্বাহিঙ্গুসৈন্ধবম্||৩২|| সুরদারু চ রাস্না চ বস্তির্দোষহরঃ শিবঃ| |৩৩|

স০-স পূর্বোক্ত এরণ্ডমূলক্বাথো মধ্বাদিভিঃ সহ এষ বস্তির্দোষহৃচ্ছিবশ্চ|

Adhikarana siddhabastiH (33-34) · Śloka 34

| পঞ্চমূলস্য নিঃক্বাথস্তৈলং মাগধিকা মধু||৩৩|| সসৈন্ধবঃ সমধুকঃ সিদ্ধবস্তিরিতি স্মৃতঃ| |৩৪|

স০-পঞ্চমূলক্বাথস্তিলতৈলাদিকঃ সৈন্ধবমধুকসহিতঃ সিদ্ধবস্তিসংজ্ঞো মুনিভিঃ স্মৃতঃ|

Adhikarana gomUtrabastiH (34-36) · Śloka 36

| দ্বিপঞ্চমূলত্রিফলাফলবিল্বানি পাচযেত্||৩৪|| গোমূত্রে, তেন পিষ্টৈশ্চ পাঠাবত্সকতোযদৈঃ| সফলৈঃ ক্ষৌদ্রতৈলাভ্যাং ক্ষারেণ লবণেন চ||৩৫|| যুক্তো বস্তিঃ কফব্যাধিপাণ্ডুরোগবিষূচিষু| শুক্রানিলবিবন্ধেষু বস্ত্যাটোপে চ পূজিতঃ||৩৬||

স০-দ্বিপঞ্চমূলাদীনি গোমূত্রেণ পাচযেত্| তেন-ক্বথিতেন গোমূত্রেণ, পিষ্টৈশ্চ পাঠাদিভির্যুক্তঃ কফামযাদিহৃত্|

Adhikarana yApanarAT bastiH (37-43) · Śloka 43

মুস্তাপাঠামৃতৈরণ্ডবলারাস্নাপুনর্নবাঃ| মঞ্জিষ্ঠারগ্বধোশীরত্রাযমাণাক্ষরোহিণীঃ||৩৭|| কনীযঃ পঞ্চমূলং চ পালিকং, মদনাষ্টকম্| জলাঢকে পচেত্তচ্চ পাদশেষং পরিস্রুতম্||৩৮|| ক্ষীরদ্বিপ্রস্থসংযুক্তং ক্ষীরশেষং পুনঃ পচেত্| সপাদজাঙ্গলরসঃ সসর্পির্মধুসৈন্ধবঃ||৩৯|| পিষ্টৈর্যষ্টিমিসিশ্যামাকলিঙ্গকরসাঞ্জনৈঃ| বস্তিঃ সুখোষ্ণো মাংসাগ্নিবলশুক্রবিবর্দ্ধনঃ||৪০|| বাতাসৃঙ্মোহমেহার্শোগুল্মবিণ্মূত্রসঙ্গ্রহান্| বিষমজ্বরবীসর্পবর্ধ্মাধ্মানপ্রবাহিকাঃ||৪১|| বঙ্ক্ষণোরুকটীকুক্ষিমন্যাশ্রোত্রশিরোরুজঃ| হন্যাদসৃগ্দরোন্মাদশোফকাসাশ্মকুণ্ডলান্||৪২|| চক্ষুষ্যঃ পুত্রদো রাজা যাপনানাং রসাযনম্| |৪৩|

স০-মুস্তাদীনি কনীযঃপঞ্চমূলপর্যন্তানি পৃথক্ পালিকানি, মদনফলান্যষ্টৌ, জলাঢকে পচেত্| তচ্চ পাদশেষং পরিস্রুতং ক্ষীরশেষং পুনঃ পচেদিতি| তাবত্কষাযেণ সহ পক্তব্যং যাবত্ক্ষীরপ্রস্থদ্বযং স্যাদিত্যর্থঃ| বস্তিঃ সর্পির্মধুসৈন্ধবযুতঃ পিষ্টৈর্যষ্ট্যাদিভিঃ সহিতঃ সুখোষ্ণো মাংসাদিবর্দ্ধনো বাতরক্তাদীন্ হন্যাত্| চক্ষুষ্যাদিগুণশ্চ| কিম্ভূতঃ ? সপাদজাঙ্গলরসঃ,- তত্র চতুর্বিংশতিপলিকো নিরুহঃ, তস্য পাদেন ষট্পলানি জাঙ্গলরসস্য স্যুরিত্যর্থঃ|

Adhikarana ativRuShyo bastiH (43-44) · Śloka 44

| মৃগাণাং লঘুবদ্রা(ড্রা)ণাং দশমূলস্য চাম্ভসা||৪৩|| হপুষামিসিগাঙ্গেযীকল্কৈর্বাতহরঃ পরম্| নিরুহোঽত্যর্থবৃষ্যশ্চ মহাস্নেহসমন্বিতঃ||৪৪||

স০-হ্রস্বানাং বৃহতামুভযরূপাণাং মৃগাণাং মাংসানাং তথা দশমূলস্য চ ক্বাথেন সহ হপুষদিকল্কো বস্তিঃ সুষ্ঠু বাতহরো মহাস্নেহযুতো বৃষ্যশ্চ স্যাত্|

Adhikarana mAyUro bastiH (45-47) · Śloka 47

মযূরং পক্ষপিত্তান্ত্রপাদবিট্তুণ্ডবর্জিতম্| লঘুনা পঞ্চমূলেন পালিকেন সমন্বিতম্||৪৫|| পক্ত্বা ক্ষীরজলে ক্ষীরশেষং সঘৃতমাক্ষিকম্| তদ্বিদারীকণাযষ্টিশতাহ্বাফলকল্কবত্||৪৬|| বস্তিরীষত্পটুযুতঃ পরমং বলশুক্রকৃত্| |৪৭|

স০-মযূরং পক্ষাদিবর্জিতং দশপলমাত্রং হ্রস্বেন পঞ্চমূলেন পলমিতেন যুতং ক্ষীরজলে পক্ত্বা ক্ষীরস্যার্ধাঢকো জলস্যার্ধঢক ইত্যেবং কৃত্বা তাবত্ক্বাথযেত্ যাবত্ক্ষীরাবশেষং স্যাত্| ক্ষীরং চ তচ্ছেষং চ ক্ষীরশেষম্| ঘৃতমাক্ষিকসহিতং বিদার্যাদিকল্কান্বিতমীষল্লবণযুক্তো বস্তিঃ পরমং [বল]শুক্রকৃত্|

Adhikarana mayUravidhirviShkirAdiShu (47-48) · Śloka 48

| কল্পনেযং পৃথক্ কার্যা তিত্তিরিপ্রভৃতিষ্বপি||৪৭|| বিষ্কিরেষু সমস্তেষু প্রতুদপ্রসহেষু চ| জলচারিষু তদ্বচ্চ মত্স্যেষু ক্ষীরবর্জিতা||৪৮||

স০-ইযং চ কল্পনা তিত্তির্যাদিষ্বপি বিষ্কিরেষ্বশেষেষু প্রতুদেষু প্রসহেষু চ পৃথক্কার্যা| তথৈব জলচারিষ্বপীযং কল্পনা কার্যা| মত্স্যেষু তু ক্ষীরবর্জিতা কল্পনেযং কার্যা, মত্স্যানাং ক্ষীরেণ সহ বিরুদ্ধত্বাত্|

Adhikarana godhAdibastiH (49-52) · Śloka 52

গোধানকুলমার্জারশল্যকোন্দুরজং পলম্| পৃথক্ দশপলং ক্ষীরে পঞ্চমূলং চ সাধযেত্||৪৯|| তত্পযঃ ফলবৈদেহীকল্কদ্বিলবণান্বিতম্| সসিতাতৈলমধ্বাজ্যো বস্তির্যোজ্যো রসাযনম্||৫০|| ব্যাযামমথিতোরস্কক্ষীণেন্দ্রিযবলৌজসাম্| বিবদ্ধশুক্রবিণ্মূত্রখুডবাতবিকারিণাম্||৫১|| গজবাজিরথক্ষোভভগ্নজর্জরিতাত্মনাম্| পুনর্নবত্বং কুরুতে বাজীকরণমুত্তমম্||৫২||

স০-গোধাদীনাং মাংসং পৃথক্-প্রত্যেকং, দশপলপ্রমাণং ক্ষীরে পঞ্চমূলং চ সাধযেত্| এতত্ক্ষীরং মদনফলকণাকল্কসৈন্ধবসৌবর্চলান্বিতং বস্তিঃ শর্করাতৈলমধুঘৃতসহিতো যোজ্যো রসাযনং স্যাত্| ব্যাযামমথিতোরস্কাদীনাং পুনর্নবত্বং কুরুতে বাজীকরণেষু মুখ্যশ্চ|

Adhikarana vRuShyabastInAM Bojane visheShaH (53) · Śloka 53

সিদ্ধেন পযসা ভোজ্যমাত্মগুপ্তোচ্চটেক্ষুরৈঃ| |৫৩|

স০-আত্মগুপ্তাদিভিঃ সিদ্ধেন পযসা সহ ভোজ্যম্| উচ্চটা-গুঞ্জা|

Adhikarana siddhAH snehAH (53) · Śloka 53

স্নেহাংশ্চাযন্ত্রণান্ সিদ্ধান্ সিদ্ধদ্রব্যৈঃ প্রকল্পযেত্| ||৫৩||

স০-স্নেহাংশ্চ-স্নেহবস্তীন্, অযন্ত্রণান্-নিষ্পরিহারান্, সিদ্ধান্-বহুশো দৃষ্টপ্রত্যযান্, সিদ্ধদ্রব্যৈঃ-নিরপাযৈঃ, প্রকল্পযেত্|

Adhikarana saparIhArAH snehabastayaH (54) · Śloka 54

দোষঘ্নাঃ সপরীহারা বক্ষ্যন্তে স্নেহবস্তযঃ| |৫৪|

স০-অধুনা দোষঘ্নাঃ সপরীহারাঃ স্নেহবস্তযো বক্ষ্যন্তে| তানেবাহ-

Adhikarana dashamUlAditailam (54-57) · Śloka 57

| দশমূলং বলাং রাস্নামশ্বগন্ধাং পুনর্নবাম্||৫৪|| গুডুচ্যৈরণ্ডবূতীকভার্গীবৃষকরোহিষম্| শতাবরীং সহচরং কাকনাসাং পলাংশকম্||৫৫|| যবমাষাতসীকোলকুলত্থান্ প্রসৃতোন্মিতান্| বহে বিপাচ্য তোযস্য দ্রোণশেষেণ তেন চ||৫৬|| পচেত্তৈলাঢকং পেষ্যৈর্জীবনীযৈঃ পলোন্মিতৈঃ| অনুবাসনমিত্যেতত্সর্ববাতবিকারনুত্||৫৭||

স০-দশমূলাদিকং পলপ্রমাণম্| কাকনাসা-কাকজঙ্ঘা| যবাদীনি প্রসৃতপ্রমাণানি, জলস্য বহে-দ্রোণচতুষ্টযে, বিপাচ্য, তেন চ দ্রোণশেষেণ তৈলাঢকং পলাংশকৈঃ জীবনীযৈঃ পেষ্যৈঃ সহ পচেত্| এতদনুবাসনমখিলপবনামযজিত্|

Adhikarana AnUpavasA (58) · Śloka 58

আনূপানাং বসা তদ্বজ্জীবনীযোপসাধিতা| |৫৮|

স০-আনূপপ্রাণিনাং বসা জীবনীযদ্রব্যসাধিতা তদ্বত্পূর্বগুণা|

Adhikarana shatAhvAditailam (58) · Śloka 58

| শতাহ্বাচিরিবিল্বাম্লৈস্তৈলং সিদ্ধং সমীরণে||৫৮||

স০-শতাহ্বাদিভিস্তৈলং পক্বং পবনে যোজ্যম্|

Adhikarana saindhavadhRutam (59) · Śloka 59

সৈন্ধবেনাগ্নিবর্ণেন তপ্তং চানিলজিদ্ ঘৃতম্| |৫৯|

স০-অগ্নিবর্ণেন সৈন্ধবেন তপ্তং চ ঘৃতং সমীরণজিদ্ভবতি|

Adhikarana jIvantyAdiyamakaH (59-62) · Śloka 62

| জীবন্তীং মদনং মেদাং শ্রাবণীং মধুকং বলাম্||৫৯|| শতাহ্বর্ষভকৌ কৃষ্ণাং কাকনাসাং শতাবরীম্| স্বগুপ্তাং ক্ষীরকাকোলীং কর্কটাখ্যাং শঠীং বচাম্||৬০|| পিষ্ট্বা তৈলঘৃতং ক্ষীরে সাধযেত্তচ্চতুর্গুণে| বৃংহণং বাতপিত্তঘ্নং বলশুক্রাগ্নিবর্ধনম্||৬১|| রজঃশুক্রামযহরং পুত্রীযং চানুবাসনম্| |৬২|

স০-জীবন্ত্যাদীন্ কল্কীকৃত্য তৈলঘৃতং-যমকং, ক্ষীরে চতুর্গুণে সাধযেত্| এতদনুবাসনং বৃংহণং বাতপিত্তঘ্নং বলাদিবর্ধনং রজঃশুক্ররোগহরং পুত্রীযং চ| পুত্রীযমিতি হিতার্থে "পুত্রাচ্ছ চ " ইতি ছঃ|

Adhikarana saindhavAditailam (62-66) · Śloka 66

| সৈন্ধবং মদনং কুষ্ঠং শতাহ্বা নিচুলো বচা||৬২|| হ্রীবেরং মধুকং ভার্ঙ্গী দেবদারু সকট্ফলম্| নাগরং পুষ্করং মেদা চবিকা চিত্রকঃ শঠী||৬৩|| বিডঙ্গাতিবিষে শ্যামা হরেণুর্নীলিনী স্থিরা| বিল্বাজমোদচপলা দন্তী রাস্না চ তৈঃ সমৈঃ||৬৪|| সাধ্যমেরণ্ডতৈলং বা তৈলং বা কফরোগনুত্| বর্ধ্মোদাবর্তগুল্মার্শঃপ্লীহমেহাঢ্যমারুতান্||৬৫|| আনাহমশ্মরীং চাশু হন্যাত্তদনুবাসনম্| |৬৬|

স০-সৈন্ধবাদিভিঃ সমাংশৈঃ সামান্যপরিভাষযা এরণ্ডতৈলং তিলতৈলং বা সাধ্যম্| দ্বির্বাগ্রহণাত্ এরণ্ডতৈলস্যার্ধং তিলতৈলস্যার্ধমিত্যপি কল্পনীযমিত্যাহুঃ| এতদনুবাসনং কফরোগজিত্ শীঘ্রং বর্ধ্মাদীন্ হন্যাত্|

Adhikarana bilvAditailam (66-67) · Śloka 67

| সাধিতং পঞ্চমূলেন তৈলং বিল্বাদিনাঽথবা||৬৬|| কফঘ্নং| |৬৭|

স০-পঞ্চমূলেন বিল্বাদিনা বা সাধিতং তৈলং কফঘ্নং কল্পযেত্|

Adhikarana kaphaghnadravyasAdhitaM tailam, phalatailam (67) · Śloka 67

কল্পযেত্তৈলং দ্রব্যৈর্বা কফঘাতিভিঃ| ফলৈরষ্টগুণৈশ্চাম্লৈঃ সিদ্ধমন্বাসনং কফে||৬৭||

স০-অথবা কফঘ্নৈর্দ্রব্যৈঃ ফলৈরষ্টগুণৈশ্চাম্লৈঃ সিদ্ধমনুবাসনং কফে শস্তম্|

Adhikarana kalpanAprakAraH (68) · Śloka 68

মৃদুবস্তিজডীভূতে তীক্ষ্ণোঽন্যো বস্তিরিষ্যতে| তীক্ষ্ণৈর্বিকর্ষিতে স্নিগ্ধো মধুরঃ শিশিরো মৃদুঃ||৬৮||

স০-মৃদুশ্চাসৌ বস্তিশ্চ মৃদুবস্তিঃ, মধুরস্নিগ্ধশীতলাত্মকত্বান্মৃদুঃ, মৃদুবস্তিশ্চাসৌ জডীভূতশ্চ মৃদুবস্তিজডীভূতঃ,-কোষ্ঠাদ্বহিরনিঃসরণাত্ কোষ্ঠ এবাবস্থিতিং কৃত্বা স্থিতঃ, তস্মিংস্তথাভূতেঽন্যো বস্তিস্তীক্ষ্ণঃ শস্যতে| তীক্ষ্ণৈঃ-গোমূত্রাদিনিষ্পাদিতৈর্বস্তিভিঃ, বিকর্ষিতে কোষ্ঠে সতি স্নিগ্ধাদিগুণো বস্তিরিষ্যতে|

Adhikarana tIkShNatvamRudutvahetUni dravyANi (69) · Śloka 69

তীক্ষ্ণত্বং মূত্রপীল্বগ্নিলবণক্ষারসর্ষপৈঃ| প্রাপ্তকালং বিধাতব্যং ক্ষীরাজ্যাদ্যৈস্তু মার্দবম্||৬৯||

স০-তীক্ষ্ণত্বং বস্তের্মূত্রপীল্বগ্নিলবণক্ষারসর্ষপৈঃ প্রাপ্তকালং- যোগ্যেঽবসরে, বিধাতব্যম্| ক্ষীরঘৃতাদ্যৈশ্চ বস্তের্মার্দবং প্রাপ্তকালং কর্তব্যম্|

Adhikarana balAdyanurodhena bastiH kalpyaH (70) · Śloka 70

বলকালরোগদোষপ্রকৃতীঃ প্রবিভজ্য যোজিতো বস্তিঃ| স্বৈঃ স্বৈরৌষধবর্গৈঃ স্বান্ স্বান্ রোগান্নিবর্তযতি||৭০||

স০-বলাদীন্ প্রবিভজ্য স্বৈঃ স্বৈরৌষধবর্গৈঃ-যথাযথং যোগ্যৈঃ, সিদ্ধো বস্তির্যোজিতঃ স্বান্ স্বানামযানুপশমযতি|

Adhikarana hetuvyAdhiviparIto bastiH kalpyaH (71) · Śloka 71

উষ্ণার্তানাং শীতাঞ্ছীতার্তানাং তথা সুখোষ্ণাংশ্চ| তদ্যোগ্যৌষধযুক্তান্ বস্তীন্ সংতর্ক্য যুঞ্জীত||৭১||

স০-উষ্ণার্তানাং নৃণাং শীতান্ বস্তীন্ শীতার্তানাং- সুখোষ্ণান্ বস্তীন্ দদ্যাত্|

Adhikarana shodhanIyeShu bRuMhaNIyaniShedhaH (72) · Śloka 72

বস্তীন্ন বৃংহণীযান্ দদ্যাদ্ব্যাধিষু বিশোধনীযেষু|৭২|

আ রং- শোধনীযেষু বৃংহণীযনিষেধমাহ-বস্তীনিতি|

Adhikarana shodhanIyAH (72) · Śloka 72

মেদস্বিনো বিশোধ্যা যে চ নরাঃ কুষ্ঠমেহার্তাঃ||৭২||

ব্

Adhikarana kShINAdiShu shodhanIyaniShedhaH (4) · Śloka 4

ন ক্ষীণক্ষতদুর্বলমূর্চ্ছিতকৃশশুষ্কশুদ্ধদেহানাম্| দদ্যাদ্বিশোধনীযান্ দোষনিবদ্ধাযুষো যে চ||৭৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং পঞ্চমে কল্পসিদ্ধিস্থান বস্তিকল্পো নাম চতুর্থোঽধ্যাযঃ||৪||

সং-যস্মাদেতে দোষৈর্নিবদ্ধজীবিতাঃ, তস্মাদেতেষাং দোষনির্হরণাত্ প্রাণসংশযঃ স্যাদিত্যাহ, জীবিতরক্ষার্থমেতে ন বিশোধ্যা ইতি| আর্যাশ্চতস্রঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং পঞ্চমে কল্পসিদ্ধস্থানে বস্তিকল্পো নাম চতুর্থোঽধ্যাযঃ সমাপ্তঃ|| ৪||