2. virēcanakalpādhyāyaḥ

Adhikarana adhyAyopakramaH · Śloka

বমনাদনন্তরং বিরেচনস্যোপযোগ ইতি বমনকল্পাদনন্তরং বিরেচনকল্পঃ প্রক্রম্যত ইত্যাহ-

Adhikarana virecanakalpAdhyAyaH (2) · Śloka 2

অথাতো বিরেচনকল্পং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

স০-কল্পনং কল্পো-যোজনা| বিরেচনং-অধোভাগেন দোষনির্হরণম্, তস্য কল্পো-বিরেচনকল্পঃ, তং ব্যাখ্যাস্যামঃ| শেষং পূর্ববত্| দন্তীদ্রবন্ত্যাদিভ্যঃ সর্বেভ্যোঽপি বিরেচনদ্রব্যেভ্যো নিরপাযিত্বাদ্বিরেচনসাধ্যে ব্যাধাবনিষিদ্ধপ্রসরত্বাত্[চ] পূর্বং ত্রিবৃতাযা উপন্যাসঃ|

Adhikarana trivRucchyAmayoH kalpaH trivRuto guNAshca (1) · Śloka 1

অথ ত্রিবৃচ্ছ্যামযোঃ কল্পঃ| কষাযমধুরা রূক্ষা বিপাকে কটুকা ত্রিবৃত্| কফপিত্তপ্রশমনী রৌক্ষ্যাচ্চানিলকোপনী||১||

স০-অনেনাস্যাঃ স্বরূপকথনম্|

Adhikarana trivRutaH saMyogAdikRutA guNAH (2) · Śloka 2

সেদানীমৌষধৈর্যুক্তা বাতপিত্তকফাপহৈঃ| কল্পবৈশেষ্যমাসাদ্য জাযতে সর্বরোগজিত্||২||

স০-সা-এবংগুণা ত্রিবৃত্, অধুনা বাতপিত্তকফঘ্নৈরৌষধৈর্যুক্তা কল্পবিশেষত্বং প্রাপ্য বিরেচনসাধ্যব্যাধিবিষযে সর্বরোগজিজ্জাযতে|

Adhikarana trivRuto Bedadvayam (3) · Śloka 3

দ্বিধা খ্যাতং চ তন্মূলং শ্যামং শ্যামাঽরুণং ত্রিবৃত্| |৩|

স০ - তস্যাঃ-ত্রিবৃতো, মূলং দ্বিপ্রকারম্,-একং শ্যামমপরমরুণম্| শ্যামং মূলং শ্যামা, ত্রিবৃদরুণামিতি ব্যাখ্যং দ্বিসংজ্ঞম্|

Adhikarana arUNasya viShayaH (3-4) · Śloka 4

| ত্রিবৃদাখ্যং বরতরং নিরপাযং সুখং তযোঃ||৩|| সুকুমারে শিশৌ বৃদ্ধে মৃদুকোষ্ঠে চ তদ্ধিতম্| |৪|

স০ -তযোঃ-শ্যামারুণযোঃ, যদরুণং মূলং তদ্বরতরম্| সামর্থ্যাত্ শ্যামং বরম্| অরুণং যন্মূলং তন্নিরপাযত্বাত্ সুকুমারাদিষু হিতম্, ন শ্যামং সাপাযত্বাত্|

Adhikarana shyAmasya viShayaH (4-5) · Śloka 5

সাপাযত্বে বিশেষেণ হেতুমাহ | মূর্চ্ছাসম্মোহহৃত্কণ্ঠকষণক্ষণনপ্রদম্||৪|| শ্যামং তীক্ষ্ণাশুকারিত্বাদতস্তদপি শস্যতে| ক্রূরে কোষ্ঠে বহৌ দোষে ক্লেশক্ষমিণি চাতুরে||৫||

স০ - শ্যামং মূলং মূর্চ্ছাদিহৃত্কণ্ঠকষণক্ষণনপ্রদম্| তত্তীক্ষ্ণত্বাদাশুকারিত্বাচ্চ সাপাযত্বমস্য| তদেবংরূপমপি শ্যামং শস্যতে ক্রূরকোষ্ঠাদিবিষযে|

Adhikarana grahaNavidhiH (6) · Śloka 6

গম্ভীরানুগতং শ্লক্ষ্ণমতির্যগ্বিসৃতং চ যত্| গৃহীত্বা বিসৃজেত্কাষ্ঠং ত্বচং শুষ্কাং নিধাপযেত্||৬||

স০ -গম্ভীরানুগতং-গূঢং কৃত্বা ভূমাবন্তঃপ্রবিষ্টম্, তথা শ্লক্ষ্ণং-অপরুষম্, তথাঽতির্যগ্যাতং(বিসৃতং)-স্পষ্টং কৃত্বা ভূমৌ গতম্, এবংবিধং ত্রিবৃতাযা মূলং গৃহীত্বা তত্কাষ্ঠং বিসৃজেত্| ত্বচং শুষ্কাং কৃত্বা নিধাপযেত্-স্থাপযেত্|

Adhikarana vAtaroge virecanayogaH (7) · Śloka 7

অথ কালে ততশ্চূর্ণং কিঞ্চিন্নাগরসৈন্ধবম্| বাতামযে পিবেদম্লৈঃ|৭|

স০-অথ-অনন্তরম্, কালে-বিরেচনপ্রস্তাবে, ততঃ-মূলত্বচঃ, চূর্ণমীষন্নাগরসৈন্ধবমম্লৈঃ-কাঞ্জিকাদিভিঃ, বাতবিকারে পিবেত্|

Adhikarana pittaroge virecanayogaH (7-8) · Śloka 8

| পৈত্তে সাজ্যসিতামধু||৭|| ক্ষীরদ্রাক্ষেক্ষুকাশ্মর্যস্বাদুস্কন্ধবরারসৈঃ| |৮|

স০-পৈত্তে বিকারে সহঘৃতশর্করামধু তচ্চূর্ণং ক্ষীরেণ দ্রাক্ষাদিরসৈর্বা পিবেত্|

Adhikarana kaParoge virecanayogaH (8-9) · Śloka 9

| কফামযে পীলুরসমূত্রমদ্যাম্লকাঞ্জিকৈঃ||৮|| পঞ্চকোলাদিচূর্ণৈশ্চ যুক্ত্যা যুক্তং কফাপহৈঃ| |৯|

স০-কফবিকারে তচ্চূর্ণং পীলুরসাদিভিঃ পিবেত্| পঞ্চকোলাদিভিশ্চূর্ণৈশ্চ কফঘ্নৈর্যুক্তম্| কথম্ ? যুক্ত্যা,-পঞ্চকোলাদিচূর্ণানাং যোগে নাতিব্যাপ্তির্ন বাঽব্যাপ্তিঃ, পঞ্চকোলাদিচূর্ণেন ত্রিবৃতাচূর্ণস্য সম্যগ্যোগঃ স্যাদিত্যর্থঃ| আদিশব্দেনান্যেষাং পাচনদীপনানাং পঞ্চকোলসদৃশানাং চিত্রকা(মরিচা)দীনাং গ্রহণম্|

Adhikarana hRudyo virecanayogaH (9-10) · Śloka 10

| ত্রিবৃত্কল্ককষাযাভ্যাং সাধিতঃ সসিতো হিমঃ||৯|| মধুত্রিজাতসংযুক্তো লেহো হৃদ্যং বিরেচনম্| |১০|

স০-ত্রিবৃতঃ কল্কেন কষাযেণ চ সাধিতঃ সশর্করো লেহঃ শীতো মধুত্রিজাতসংযুক্তো হৃদ্যং বিরেচনং স্যাত্| অত্র চ কাসচিকিত্সিতোক্তকণ্টকারিকালেহবত্ (হৃ. চি. অ. ৩/৬৩) প্রমাণং নিরূপযিতব্যম্|

Adhikarana sannipAtajvarAdau virecanayogaH (10-11) · Śloka 11

| অজগন্ধা তবক্ষীরী বিদারী শর্করা ত্রিবৃত্||১০|| চূর্ণিতং মধুসর্পির্ভ্যাং লীঢ্বা সাধু বিরিচ্যতে| সন্নিপাতজ্বরস্তম্ভপিপাসাদাহপীডিতঃ||১১||

স০-অজগন্ধাদিচূর্ণং মধুসর্পির্ভ্যাং লীঢ্বা সাধু বিরিচ্যতে| সন্নিপাতজ্বরাদিপীডিতঃ সন্|

Adhikarana sannipAtajvarAdau anyo virecanayogaH (12) · Śloka 12

লিম্পেদন্তস্ত্রিবৃতযা দ্বিধাকৃত্বেক্ষুগণ্ডিকাম্| একীকৃত্য চ তত্স্বিন্নং পুটপাকেন ভক্ষযেত্||১২||

স০-ইক্ষুগণ্ডিকাং দ্বিধাকৃত্য(ত্বা)-পাটযিত্বা, ত্রিবৃতযাঽন্তর্লিম্পেত্| অনন্তরমেকীকৃত্য পুটপাকেন স্বিন্নং ভক্ষযেত্|

Adhikarana vAtarogAdiShu nirapAyo virecanayogaH (13-14) · Śloka 14

ভৃঙ্গৈলাভ্যাং সমা নীলী তৈস্ত্রিবৃত্তৈশ্চ শর্করা| চূর্ণং ফলরসক্ষৌদ্রসক্তুভিস্তর্পণং পিবেত্||১৩|| বাতপিত্তকফোত্থেষু রোগেষ্বল্পানলেষু চ| নরেষু সুকুমারেষু নিরপাযং বিরেচনম্||১৪||

স০-ত্বগেলাভ্যাং তুল্যা নীলী, তৈশ্চ তুল্যা ত্রিবৃত্, সর্বৈশ্চ তুল্যা সিতা, চূর্ণং ফলরসক্ষৌদ্রসক্তুভিস্তর্পণং পিবেত্| বাতপিত্তকফোত্থেষু রোগেষ্বল্পাগ্নিষু চ নরেষু তথা সুকুমারেষু বিরেচনমেতন্নিরপাযম্|

Adhikarana gulmAdiShu virecanayogaH (15-16) · Śloka 16

বিডঙ্গতণ্ডুলবরাযাবশূককণাস্ত্রিবৃত্| সর্বতোঽর্ধেন তল্লীঢং মধ্বাজ্যেন গুডেন বা||১৫|| গুল্মং প্লীহোদরং কাসং হলীমকমরোচকম্| কফবাতকৃতাংশ্চান্যান্ পরিমার্ষ্টি গদান্ বহূন্||১৬||

স০-বিডঙ্গতণ্ডুলাদযঃ সমাংশাঃ, সর্বেভ্যোঽর্ধেন ত্রিবৃত্, তদেতচ্চূর্ণং মধুঘৃতাভ্যাং লীঢং গুডেন বাঽঽস্বাদিতং গুল্মাদীন্ কফবাতোত্থাংশ্চান্যানপি গদান্ বহূন্ পরিমার্ষ্টি-পরাকরোতি|

Adhikarana kalyANakaguDaH kuShThAdiShu (17-21) · Śloka 21

বিডঙ্গপিপ্পলীমূলত্রিফলাধান্যচিত্রকান্| মরীচেন্দ্রযবাজাজীপিপ্পলীহস্তিপিপ্পলীঃ||১৭|| দীপ্যকং পঞ্চলবণং চূর্ণিতং কার্ষিকং পৃথক্| তিলতৈলত্রিবৃচ্চূর্ণভাগৌ চাষ্টপলোন্মিতৌ||১৮|| ধাত্রীফলরসপ্রস্থাংস্ত্রীন্ গুডার্ধতুলান্বিতান্| পক্ত্বা মৃদ্বগ্নিনা খাদেত্ততো মাত্রামযন্ত্রণঃ||১৯|| কুষ্ঠার্শঃকামলাগুল্মমেহোদরভগন্দরান্| গ্রহণীপাণ্ডুরোগাংশ্চ হন্তি পুংসবনশ্চ সঃ||২০|| গুডঃ কল্যাণকো নাম সর্বেষ্বৃতুষু যৌগিকঃ| |২১|

স০-বিডঙ্গাদীনি কার্ষিকাণি, ত্রিবৃতাচূর্ণতিলতৈলে পৃথগষ্টপলপ্রমাণে, আমলকফলরসপ্রস্থাংস্ত্রীন্, গুডপলানি পঞ্চাশত্, মৃদ্বিগ্নিনা পক্ত্বা তস্মান্মাত্রামযন্ত্রণঃ-যন্ত্রণারহিতঃ সন্, ভক্ষযেত্| স চ ভক্ষিতঃ কুষ্ঠাদীন্ হন্তি পুংসবনশ্চ স্যাত্| গুডোঽযং কল্যাণকসংজ্ঞঃ সর্বেষু চ ঋতুষু যৌগিকঃ-যুজ্যতে|

Adhikarana avipattiyogo mUtrakRucCrAdiShu (21-23) · Śloka 23

| ব্যোষত্রিজাতকাম্ভোদকৃমিঘ্নামলকৈস্ত্রিবৃত্||২১|| সর্বৈঃ সমা সমসিতা ক্ষৌদ্রেণ গুটিকাঃ কৃতাঃ| মূত্রকৃচ্ছ্রজ্বরচ্ছর্দিকাসশোষভ্রমক্ষযে||২২|| তাপে পাণ্ড্বামযেঽল্পেঽগ্নৌ শস্তাঃ সর্ববিষেষু চ| অবিপত্তিরযং যোগঃ প্রশস্তঃ পিত্তরোগিণাম্||২৩||

স০-ব্যোষাদিভিঃ সমভাগৈঃ সর্বৈর্দ্রব্যৈস্ত্রিবৃত্সমা, সা চ ত্রিবৃত্ তুল্যশর্করা, এবমেতাঃ ক্ষৌদ্রেণ গুটিকাঃ কৃতা মূত্রকৃচ্ছ্রাদিষু শস্যন্তে| অবিপত্তিরযং যোগঃ পিত্তরোগিণাং প্রশস্তঃ|

Adhikarana varShAsu virecanayogaH (24) · Śloka 24

ত্রিবৃতা কৌটজং বীজং পিপ্পলী বিশ্বভেষজম্| ক্ষৌদ্রদ্রাক্ষারসোপেতং বর্ষাকালে বিরেচনম্||২৪||

স০-ত্রিবৃতাদিকং ক্ষৌদ্রদ্রাক্ষারসসংযুক্তং প্রাবৃষি বিরেচনম্|

Adhikarana sharadi virecanayogaH (25) · Śloka 25

ত্রিবৃদ্দুরালভামুস্তশর্করোদীচ্যচন্দনম্| দ্রাক্ষাম্বুনা সযষ্ট্যাহ্বসাতলং জলদাত্যযে||২৫||

স০-ত্রিবৃদ্দুরালভাদিকং দ্রাক্ষাজলেন শরদি বিরেচনম্|

Adhikarana hemante virecanayogaH (26) · Śloka 26

ত্রিবৃতাং চিত্রকং পাঠামজাজীং সরলং বচাম্| স্বর্ণক্ষীরীং চ হেমন্তে চূর্ণমুষ্ণাম্বুনা পিবেত্||২৬||

স০-ত্রিবৃতাদিকং চূর্ণমুষ্ণাম্বুনা সহ হেমন্তে পিবেত্|

Adhikarana grIShme virecanayogaH (27) · Śloka 27

ত্রিবৃতা শর্করাতুল্যা গ্রীষ্মকালে বিরেচনম্| |২৭|

স০-ত্রিবৃচ্ছর্করাসমা গ্রীষ্মর্তৌ বিরেচনম্|

Adhikarana snigdhAnAM sarvartuko virecanayogaH (27-28) · Śloka 28

| ত্রিবৃত্ত্রাযন্তিহপুষাসাতলাকটুরোহিণীঃ||২৭|| স্বর্ণক্ষীরীং চ সঞ্চূর্ণ্য গোমূত্রে ভাবযেত্ত্র্যহম্| এষ সর্বর্তুকো যোগঃ স্নিগ্ধানাং মলদোষহৃত্||২৮||

স০-ত্রিবৃদাদীনি সঞ্চূর্ণ্য ত্র্যহং গোমূত্রে ভাবযেত্| এষ যোগঃ সর্বর্তুষ্বপি স্নিগ্ধানাং নরাণাং মলদোষস্য হারকঃ স্যাত্|

Adhikarana rUkShANAM sarvartuko virecanayogaH (29-1) · Śloka 1

শ্যামাত্রিবৃদ্দুরালম্ভাহস্তিপিপ্পলিবত্সকম্| নীলিনীকটুকামুস্তাশ্রেষ্ঠাযুক্তং সুচূর্ণিতম্||২৯|| রসাজ্যোষ্ণাম্বুভিঃ শস্তং রূক্ষাণামপি সর্বদা| |৩০| ইতি ত্রিবৃচ্ছ্যামযোঃ কল্পঃ||১||

স০-শ্যামাদ্যং চূর্ণীকৃতং মাংসরসঘৃতোষ্ণাম্বুভী রূক্ষাণামপি সর্বকালং শস্তম্| অপিশব্দাত্ স্নিগ্ধানাং শস্তমেব|

Adhikarana rAjavRukShakalpaH jvarAdiShu virecanayogaH (30-31) · Śloka 31

অথ রাজবৃক্ষকল্পঃ| | জ্বরহৃদ্রোগবাতাসৃগুদাবর্তাদিরোগিষু||৩০|| রাজবৃক্ষোঽধিকং পথ্যো মৃদুর্মধুরশীতলঃ| |৩১|

স০-জ্বরাদিষ্বন্যেভ্যস্তদ্বিষযোক্তেভ্যো বিরেচনদ্রব্যেভ্যো রাজবৃক্ষোঽতিশযেন পথ্যঃ| কিম্ভূতঃ ? মৃদুর্মধুরঃ শীতলশ্চ|

Adhikarana bAlAdiShu visheSheNa yogaH (31-32) · Śloka 32

| বালে বৃদ্ধে ক্ষতে ক্ষীণে সুকুমারে চ মানবে||৩১|| যোজ্যো মৃদ্বনপাযিত্বাদ্বিশেষাচ্চতুরঙ্গুলঃ| |৩২|

স০-বালাদৌ মৃদুত্বাদনপাযিত্বাচ্চ বিশেষেণ চতুরঙ্গুলো যোজ্যঃ|

Adhikarana grahaNavidhiH (32-34) · Śloka 34

| ফলকালে পরিণতং ফলং তস্য সমাহরেত্||৩২|| তেষাং গুণবতাং ভারং সিকতাসু বিনিক্ষিপেত্| সপ্তরাত্রাত্সমুদ্ধৃত্য শোষযেদাতপে ততঃ||৩৩|| ততো মজ্জানমুদ্ধৃত্য শুচৌ পাত্রে নিধাপযেত্| |৩৪|

স০-তস্য-শম্যাকস্য, ফলকালে পরিণতং-পক্বং, ফলং সমাহরেত্-সঙ্গৃহ্ণীযাত্| তেষাং-ফলানাং, গুণবতাং-সুনিষ্পন্নানাং, ভারং-পলশতবিংশতিঃ, বালুকাসু বিনিক্ষিপেত্| সপ্তরাত্রাদূর্ধ্বং সিকতাভ্য উদ্ধৃত্যানন্তরমাতপে শোষযেত্| ততঃ-অনন্তরং, তেভ্যঃ ফলেভ্যো মজ্জানমুদ্ধৃত্য-গৃহীত্বা, পাত্রে-ভাণ্ডে, শুচৌ শুদ্ধে, স্থাপযেত্|

Adhikarana dAhodAvartayoH virecanayogaH (34-35) · Śloka 35

| দ্রাক্ষারসেন তং দদ্যাদ্দাহোদাবর্তপীডিতে||৩৪|| চতুর্বর্ষে সুখং বালে যাবদ্দ্বাদশবার্ষিকে| |৩৫|

স০-তং-মজ্জানং, দ্রাক্ষারসেন দদ্যাত্| দাহাদ্যার্তে নরে চতুর্বর্ষে বালে সুখেনৈতদ্বিরেচনম্, যাবদ্দ্বাদশবার্ষিকে বালে সুখং বিরেচনমিদম্|

Adhikarana dAhodAvartayoH anye pa~jca yogAH (35-36) · Śloka 36

| চতুরঙ্গুলমজ্জ্ঞো বা কষাযং পাযযেদ্ধিমম্||৩৫|| দধিমণ্ডসুরামণ্ডধাত্রীফলরসৈঃ পৃথক্| সৌবীরকেণ বা যুক্তম্ কল্কেন ত্রৈবৃতেন বা||৩৬||

স০-অথবা রাজবৃক্ষমজ্জ্ঞো হিমং [কষাযং]-শীতকষাযং, দধিমণ্ডাদিভিঃ পৃথগ্যুক্তমথবা কাঞ্জিকেনাথবা কল্কেন ত্রিবৃতাসম্বন্ধিনা যুক্তং পাযযেত্|

Adhikarana rAjavRukShAriShTaM virecanayogaH (37-2) · Śloka 2

দন্তীকষাযে তন্মজ্জ্ঞো গুডং জীর্ণং চ নিক্ষিপেত্| তমরিষ্টং স্থিতং মাসং পাযযেত্ পক্ষমেব বা||৩৭|| ইতি রাজবৃক্ষকল্পঃ||২||

স০-দন্তীকষাযে তন্মজ্জ্ঞঃ-কর্ণিকারস্য মধ্যানি, গুডং জীর্ণং চ বিনিক্ষিপেত্| তমরিষ্টং মাসং স্থিতং পাযযেত্| পক্ষং বা স্থিতম্|

Adhikarana tilvakakalpaH tilvakamUlacUrNasya yogaH (38-40) · Śloka 40

অথ তিল্বককল্পঃ| ত্বচং তিল্বকমূলস্য ত্যক্ত্বাঽঽভ্যন্তরবল্কলম্| বিশোষ্য চূর্ণযিত্বা চ দ্বৌ ভাগৌ গালযেত্ততঃ||৩৮|| রোধ্রস্যৈব কষাযেণ তৃতীযং তেন ভাবযেত্| কষাযে দশমূলস্য তং ভাগং ভাবিতং পুনঃ||৩৯|| শুষ্কং চূর্ণং পুনঃ কৃত্বা ততঃ পাণিতলং পিবেত্| মস্তুমূত্রসুরামণ্ডকোলধাত্রীফলাম্বুভিঃ||৪০||

স০-তিল্বকমূলস্য ত্বচং ত্যক্ত্বা মধ্যবল্কলং বিশোষ্য তথা চূর্ণযিত্বা ততশ্চূর্ণাত্ দ্বৌ ভাগৌ রোধ্রস্যৈব কষাযেণ গালযেত্| ততঃ-অনন্তরম্, অবশিষ্টো যস্তৃতীযো ভাগস্ততশ্চূর্ণাত্, তং তেন কষাযেণ বস্ত্রগালিতেন ভাবযেত্| অনন্তরং বস্ত্রগালিতকষাযেণ ভাবিতং পুনঃ কষাযে দশমূলস্য ভাবিতমনন্তরং শুষ্কচূর্ণং [কৃত্বা] ততশ্চূর্ণাত্ পাণিতলং-কর্ষং, মস্তুগোমূত্রাদিকেন পিবেত্| (কোলং-বদরম্, ধাত্রীফলং-আমলকম্, তযোরম্বুনী স্বরসৌ|) তদ্ভাবনৌষধপ্রমাণং চ শিলাজতুনঃ কল্পবত্ কল্পযেত্| শিলাজতুকল্পং চ বক্ষ্যতি (হৃ. উ. অ. ৩৯/১৩৫)- "সমগিরিজমষ্টগুণিতে নিঃক্বাথ্যং ভাবনৌষধং তোযে|" ইত্যাদি| তস্মাদত্র তিল্বকত্বচো ভাব্যৌষধস্য রোধ্রশ্চ(ধ্রংচ)ভাবনৌষধং সমং দেযম্, ততোঽষ্টগুণং জলং দেযম্, তচ্চ ক্বথনেনাষ্টাংশশেষং কার্যমিতি| এবমন্যত্রাপ্যনির্দিষ্টপ্রমাণানাং ভাব্যদ্রব্যভাবনাদ্রব্যতোযাবশিষ্টানাং পরিমাণং বোধ্যম্|

Adhikarana tilvakamUlakalkasya yogaH (41-3) · Śloka 3

তিল্বকস্য কষাযেণ কল্কেন চ সশর্করঃ| সঘৃতঃ সাধিতো লেহঃ স চ শ্রেষ্ঠং বিরেচনম্||৪১|| ইতি তিল্বককল্পঃ||৩||

স০-রোধ্রস্য কষাযেণ কল্কেন চ সশর্করো ঘৃতান্বিতো লেহঃ স্যাত্| স চ লেহঃ শ্রেষ্ঠং বিরেচনম্|

Adhikarana sudhAkalpaH sudhAkShIrasya virecanayogaH (42-47) · Śloka 47

অথ সুধাকল্পঃ| সুধা ভিনত্তি দোষাণাং মহান্তমপি সঞ্চযম্| আশ্বেব কষ্ঠবিভ্রংশান্নৈব তাং কল্পযেদতঃ||৪২|| মৃদৌ কোষ্ঠেঽবলে বালে স্থবিরে দীর্ঘরোগিণি| কল্প্যা গুল্মোদরগরত্বগ্রোগমধুমেহিষু||৪৩|| পাণ্ডৌ দূষীবিষে শোফে দোষবিভ্রান্তচেতসি| সা শ্রেষ্ঠা কণ্টকৈস্তীক্ষ্ণৈর্বহুভিশ্চ সমাচিতা||৪৪|| দ্বিবর্ষাং বা ত্রিবর্ষাং বা শিশিরান্তে বিশেষতঃ| তাং পাটযিত্বা শস্ত্রেণ ক্ষীরমুদ্ধারযেত্ততঃ||৪৫|| বিল্বাদীনাং বৃহত্যোর্বা ক্বাথেন সমমেকশঃ| মিশ্রযিত্বা সুধাক্ষীরং ততোঽঙ্গারেষু শোষযেত্||৪৬|| পিবেত্কৃত্বা তু গুটিকাং মস্তুমূত্রসুরাদিভিঃ| |৪৭|

স০-সুধা-গুডা, দোষাণাং মহান্তমপি সঞ্চযং হন্তি| এবংগুণামপি তাং-সুধাং, ভিষক্ মৃদুকোষ্ঠাদিষু অতো ন কল্পযেত্| শীঘ্রমেব কষ্টবিভ্রংশাদিতি| কল্পযেদিত্যতিসর্জনে লিঙ্| তর্হি ক্বেযং প্রযোজ্যা ? ইত্যাহ-কল্প্যেতি| গুল্মাদিষু কল্প্যা সাস্নুক্, তীক্ষ্ণৈর্বহুভিঃ কণ্টকৈশ্চিতা শ্রেষ্ঠা স্যাত্| তাং-সুধাং, দ্বিবর্ষামথবা ত্রিবর্ষাং বিশেষেণ শিশিরান্তে কার্যবশাদন্যস্মিন্নপি ঋতৌ শস্ত্রেণ পাটযিত্বা ততঃ-সুধাতঃ, ক্ষীরমুদ্ধারযেত্| দ্বে বর্ষে প্রমাণমস্যা ইতি ঠক্| তস্য রসাল্লুগিতি লুক্| ততশ্চ টাপ্| ততঃ-অনন্তরং, বিল্বাদীনাং কণ্টকারীমহোটিকযোর্বা ক্বাথেন একশঃ-একেনৈকেন, সমং মেলযিত্বা সুধাক্ষীরমনন্তরমঙ্গারেষু তদুভযমপি শোষযেত্| ততো গুটিকাং কৃত্বা যথাযোগং মস্ত্বাদিভিঃ পিবেত্|

Adhikarana sudhAkShIrasya anyo virecanayogaH (47-4) · Śloka 4

| ত্রিবৃতাদীন্নব বরাং স্বর্ণক্ষীরীং সসাতলাম্||৪৭|| সপ্তাহং স্নুক্পযঃ পীতান্ রসেনাজ্যেন বা পিবেত্| তদ্বদ্ব্যোষোত্তমাকুম্ভনিকুম্ভাগ্নীন্ গুডাম্বুনা||৪৮|| ইতি সুধাকল্পঃ||৪||

স০-ত্রিবৃতাদীন্নবেতি 'ত্রিবৃচ্ছ্যামা রাজবৃক্ষস্তিল্বকশ্চ তথা সুধা| শঙ্খিনী সপ্তলা দন্তী দ্রবন্তীতি [স্মৃতা নব||]' ইতি| তদেতান্ ত্রিবৃতাদীংস্তথা ত্রিপালাং স্বর্ণক্ষীরীং সাতলাং চ সপ্ত বাসরান্ স্নুক্পযঃ পীতান্-স্নুক্ক্ষীরভাবিতান্, মাংসরসেন ঘৃতেন বা পিবেত্| তথৈব ব্যোষাদীন্ গুডাম্বুনা পিবেত্|

Adhikarana sha~gkhinIphalasya kalpaH saptalAmUlasya kalpaH (49-5) · Śloka 5

অথ শঙ্খিনীসপ্তলযোঃ কল্পঃ| নাতিশুষ্কং ফলং গ্রাহ্যং শঙ্খিন্যা নিস্তুষীকৃতম্| সপ্তলাযাস্তথা মূলং তে তু তীক্ষ্ণবিকাষিণী||৪৯|| শ্লেষ্মামযোদরগরশ্বযথ্বাদিষু কল্পযেত্| অক্ষমাত্রং তযোঃ পিণ্ডং মদিরালবণান্বিতম্||৫০|| হৃদ্রোগে বাতকফজে তদ্বদ্গুল্মেঽপি যোজযেত্| |৫১| ইতি শঙ্খিনীসপ্তলযোঃ কল্পঃ||৫||

স০-শঙ্খিন্যাঃ ফলং নিস্তুষীকৃতং নাতিশুষ্কং গ্রাহ্যম্| সপ্তলাযাশ্চ মূলং গ্রাহ্যম্| তে চ-শঙ্খিনীফলসাতলামূলে, তীক্ষ্ণবিকাষিণী-তৈক্ষ্ণ্যাত্ বিকাশিত্বাচ্চ, শ্লেষ্মামযাদ্যেষু কল্পযেত্| তযোঃ-শঙ্খিনীসপ্তলযোঃ পূর্বোক্তযোঃ, কর্ষমাত্রং পিণ্ডং সুরালবণযুক্তং বাতকফজহৃদ্রোগাদিষু কল্পযেত্|

Adhikarana dantIdravantyoH kalpaH praklinnadehAdiShu kalpaH (51-57) · Śloka 57

অথ দন্তীদ্রবন্ত্যোঃ কল্পঃ| | দন্তিদন্তস্থিরং স্থূলং মূলং দন্তীদ্রবন্তিজম্||৫১|| আতাম্রশ্যাবতীক্ষ্ণোষ্ণমাশুকারি বিকাশি চ| গুরু প্রকোপি বাতস্য পিত্তশ্লেষ্মবিলাযনম্||৫২|| তত্ক্ষৌদ্রপিপ্পলীলিপ্তং স্বেদ্যং মৃদ্দর্ভবেষ্টিতম্| শোষ্যং মন্দাতপেঽগ্ন্যর্কৌ হতো হ্যস্য বিকাশিতাম্||৫৩|| তত্পিবেন্মস্তুমদিরাতক্রপীলুরসাসবৈঃ| অভিষ্যণ্ণতনুর্গুল্মী প্রমেহী জঠরী গরী||৫৪|| গোমৃগাজরসৈঃ পাণ্ডুঃ কৃমিকোষ্ঠী ভগন্দরী| সিদ্ধং তত্ক্বাথকল্কাভ্যাং দশমূলরসেন চ||৫৫|| বিসর্পবিদ্রধ্যলজীকক্ষাদাহান্ জযেদ্ধৃতম্| তৈলং তু গুল্মমেহার্শোবিবন্ধকফমারুতান্||৫৬|| মহাস্নেহঃ শকৃচ্ছুক্রবাতসঙ্গানিলব্যথাঃ| ইতি দন্তীদ্রবন্ত্যোঃ কল্পঃ| বিরেচনে মুখ্যতমা নবৈতে ত্রিবৃতাদযঃ||৫৭||

স০-দন্তিনো দন্তঃ, তদ্বত্স্থিরং স্থূলং চ দন্তীদ্রবন্ত্যুদ্ভবং মূলং কিঞ্চিত্তাম্রশ্যাবতীক্ষ্ণোষ্ণমাশুকারি বিকাশি চেত্যাদিনা তত্স্বরূপোক্তিঃ| তচ্চ ক্ষৌদ্রপিপ্পলীভ্যাং লিপ্তং মৃদ্দর্ভবেষ্টিতং স্বেদিতং পশ্চান্মন্দাতপে শোষ্যম্| কিমেবং ক্রিযতে ? ইত্যাহ যস্মাদগ্ন্যর্কাবস্য বিকাশিতাং হতঃ| তচ্চ মস্ত্বাদিভিঃ পিবেত্| অভিষ্যণ্ণদেহাদিঃ পাণ্ড্বামযী কৃমিকোষ্ঠী ভগন্দরী চ গোমৃগাজমাংসরসৈঃ পিবেত্| তস্য মূলস্য ক্বাথকল্কাভ্যাং দশমূলরসেন চ সিদ্ধং ঘৃতং বিসর্পাদীন্ জযেত্| তৈলং তু সিদ্ধং গুল্মাদীন্ জযেত্| মহাস্নেহঃ শকৃতাদিসঙ্গাদীন্ জযেত্| স০-এতে ত্রিবৃতাদযো বিরেচনে নব শ্রেষ্ঠতমাঃ|

Adhikarana harItakIkalpaH grahaNyAdiShu kalpaH (58-6) · Śloka 6

অথ হরীতকীকল্পঃ| হরীতকীমপি ত্রিবৃদ্বিধানেনোপকল্পযেত্| গুডস্যাষ্টপলে পথ্যাবিংশতিঃ স্যাত্পলং পলম্||৫৮|| দন্তীচিত্রকযোঃ কর্ষৌ পিপ্পলীত্রিবৃতোর্দশ| প্রকল্প্য মোদকানেকং দশমে দশমেঽহনি||৫৯|| উষ্ণাম্ভোঽনু পিবেত্খাদেত্তান্ সর্বান্বিধিনাঽমুনা| এতে নিষ্পরিহারাঃ স্যুঃ সর্বব্যাধিনিবর্হণাঃ||৬০|| বিশেষাদ্গ্রহণীপাণ্ডুকণ্ডূকোঠার্শসাং হিতাঃ| |৬১| ইতি হরীতকীকল্পঃ||৬||

স০-যথা ত্রিবৃতাযা বিধানমুক্তং "অথ কালে ততশ্চূর্ণং কিঞ্চিন্নাগরসৈন্ধবম্|"(শ্লো.৭) ইত্যাদি, তথৈব হরীতক্যা অপি বিধাতব্যমিত্যর্থঃ| স০-গুডস্যাষ্টপলে পথ্যাবিংশতির্দন্তীচিত্রকযোঃ পলং পলং প্রত্যেকং স্যাত্| পিপ্পলীত্রিবৃতযোঃ কর্ষাবুভৌ| দশ মোদকানেবং প্রকল্প্যৈকমেকং মোদকং দশমে দশমে দিনে যোজযেত্| পশ্চাদুষ্ণাম্বু পিবেত্| অমুনা বিধিনা সর্বান্ মোদকান্ ভক্ষযেত্| এতে মোদকা নিষ্পরিহারাস্তথাঽশেষব্যাধিনিবর্হণাঃ স্যুঃ| বিশেষেণ গ্রহণ্যাদীনাং হিতাঃ| সম্বন্ধমাত্রস্য বিবক্ষিতত্বাদত্র ষষ্ঠী, অন্যথা তু হিতযোগে চতুর্থী স্যাত্|

Adhikarana uktAnAM virecanakalpAnAM ki~jcidvisheShaH (2) · Śloka 2

অল্পস্যাপি মহার্থত্বং প্রভূতস্যাল্পকর্মতাম্||৬১|| কুর্যাত্সংশ্লেষবিশ্লেষকালসংস্কারযুক্তিভিঃ| ৬১ ১/২| ত্বক্কেসরাম্রাতকদাডিমৈলা- সিতোপলামাক্ষিকমাতুলুঙ্গৈঃ| মদ্যেন তৈস্তৈশ্চ মনোনুকূলৈ- র্যুক্তানি দেযানি বিরেচনানি| ৬২ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা যামষ্টাঙ্গহৃদযসংহিতাযাং পঞ্চমে কল্পসিদ্ধিস্থানে বিরেচনকল্পো নাম দ্বিতীযোঽধ্যাযঃ||২||

স০-অল্পস্য-বীর্যেণ মাত্রযা বা কদাচিদল্পৌষধযোগস্য, কেনচিত্তত্তদ্যোগ্যৌষধসংশ্লেষেণ তস্য মহার্থত্বং কার্যম্| তথা কালেন-মধ্যাহ্নাদিনা, তথা সংস্কারেণ-তদ্যোগ্যেন গুণান্তরোত্পাদনেন, তথা যুক্ত্যা-যোজনাপ্রকারবিশেষেণ, তথা বীর্যেণ প্রভূতস্য-মাত্রযাঽথবা মহার্থস্য, কদাচিত্ কেনচিদ্দ্রব্যেণ বিশ্লেষং কৃত্বা তস্যাল্পকর্মত্বং কার্যম্| তথা কালেন প্রত্যূষাদিনা মন্দবীর্যেণ, তথা সংস্কারেণ-গুণান্তরাধানেন, তথা যুক্ত্যা-তাদৃশ্যা, অল্পশক্তিত্বলক্ষণং কর্ম কার্যম্| ত্বক্কেসরাদিভিস্তৈস্তৈঃ-অন্যৈশ্চ তথাবিধৈঃ, মনোনুকূলৈঃ-মানসপ্রিযৈঃ, ঔষধৈর্যুক্তানি বিরেচনানি দেযানি| এবং কৃতে সতি সম্যগ্যোগো বিরেচনস্য স্যাদিতি| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং পঞ্চমে কল্পসিদ্ধিস্থানে বিরে- চনকল্পো নাম দ্বিতীযোঽধ্যাযঃ সমাপ্তঃ|| ২||