8. atīsāragrahaṇirōganidānādhyāyaḥ

Adhikarana adhyAyopakramaH · Śloka

অর্শোনিদানাদনন্তরমতিসারগ্রহণীরোগনিদানারম্ভঃ| যতো বক্ষ্যতি (হৃ. চি. অ. ৮|১৬৪) - "অর্শোতিসারগ্রহণীবিকারাঃ প্রাযেণ চান্যোন্যনিদানভূতাঃ|" ইতি|

Adhikarana atIsAragrahaNIroganidAnAdhyAyaH (2) · Śloka 2

তস্মাদতীসারগ্রহণীরোগনিদানং প্রক্রম্যত ইত্যাহ - - - - অথাতোঽতীসারগ্রহণীদোষনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

স০-পূর্ববদ্ব্যাখ্যা|

Adhikarana atIsAraH ShaDvidhaH (1) · Śloka 1

দোষৈর্ব্যস্তৈঃ সমস্তৈশ্চ ভযাচ্ছোকাচ্চ ষড্বিধঃ| অতীসারঃ|১|

স০-দোষৈর্ব্যস্তৈঃ-পৃথগ্বাতপিত্তকফৈঃ, সমস্তৈঃ-সন্নিপাতেন, তথা ভযাত্ শোকাচ্চেতি ষড্বিধোঽতীসারঃ|

Adhikarana atIsArasya nidAnam (1-4) · Śloka 4

| স সুতরাং জাযতেঽত্যম্বুপানতঃ||১|| কৃশশুষ্কামিষাসাত্ম্যতিলপিষ্টবিরূঢকৈঃ| মদ্যরূক্ষাতিমাত্রান্নৈরর্শোভিঃ স্নেহবিভ্রমাত্||২|| কৃমিভ্যো বেগরোধাচ্চ তদ্বিধৈঃ কুপিতোঽনিলঃ| বিস্রংসযত্যধোঽব্ধাতুং হত্বা তেনৈব চানলম্||৩|| ব্যাপদ্যানুশকৃত্কোষ্ঠং পুরীষং দ্রবতাং নযন্| প্রকল্পতেঽতিসারায|৪|

স০-স চ সুতরামত্যম্বুপানাত্ জাযতে| কৃশশুষ্কামিষাদিভিস্তথা তদ্বিধৈঃ-বাতপ্রকোপহেতুভিরিহানুক্তৈরপি, অনিলঃ কুপিতোঽব্ধাতুং শরীরগতমধো বিস্রংসযতি-অধস্তান্নযতি| স্নেহবিভ্রমঃ-স্নেহব্যাপত্তিঃ| তেনৈব-অব্ধাতুনা, অনলং-জঠরাগ্নিং, হত্বা-মন্দত্বং নীত্বা, তথা কোষ্ঠং ব্যাপদ্য-শূন্যতাং কোষ্ঠস্য কারযিত্বা, অনুশকৃত্-শকৃতঃ সমীপে, ন তু সর্বং কোষ্ঠম্| পুরীষং চ তেনৈব ধাতুনা দ্রবতাং নযন্-প্রাপযন্| অতীসারায কল্পতে-সম্পদ্যতে| অনিল ইতি যোজ্যম্|

Adhikarana atIsArasya pUrvarUpam (4-5) · Śloka 5

| লক্ষণং তস্য ভাবিনঃ||৪|| তোদো হৃদ্গুদকোষ্ঠেষু গাত্রসাদো মলগ্রহঃ| আধ্মানমবিপাকশ্চ|৫|

স০-তস্য-অতীসারস্য, ভাবিনো-ভবিষ্যতো লক্ষণং, তোদো হৃদাদিষু গাত্রসাদাদি চ|

Adhikarana vAtajAnAM lakShaNam (5-7) · Śloka 7

| তত্র বাতেন বিড্জলম্||৫|| অল্পাল্পং শব্দশূলাঢ্যং বিবদ্ধমুপবেশ্যতে| রূক্ষং সফেনমচ্ছং চ গ্রথিতং বা মুহুর্মুহুঃ||৬|| তথা দগ্ধগুডাভাসং সপিচ্ছাপরিকর্তিকম্| শুষ্কাস্যো ভ্রষ্টপাযুশ্চ হৃষ্টরোমা বিনিষ্টনন্||৭||

স০-[তত্র-] তেষু ষডতীসারেষু, বাতেনাতীসারে বিড্জলাদিকং শুষ্কমুখাদিকো নর উপবেশ্যতে| কিং কুর্বন্ ? বিনিষ্টনন্| কোঽর্থঃ ? নিঃকুথন্|

Adhikarana pittajAnAM lakShaNam (8-9) · Śloka 9

পিত্তেন পীতমসিতং হারিদ্রং শাদ্বলপ্রভম্| সরক্তমতিদুর্গন্ধং তৃণ্মূর্চ্ছাস্বেদদাহবান্||৮|| সশূলং পাযুসন্তাপপাকবান্| |৯|

স০-পিত্তেন তৃডাদিমান্নরঃ পীতাদিকমুপবেশ্যতে|

Adhikarana kaphajAnAM lakShaNam (9-11) · Śloka 11

শ্লেষ্মণা ঘনম্| পিচ্ছিলং তন্তুমচ্ছ্বেতং স্নিগ্ধমামং কফান্বিতম্||৯|| অভীক্ষ্ণং গুরু দুর্গন্ধং বিবদ্ধমনুবদ্ধরুক্| নিদ্রালুরলসোঽন্নদ্বিডল্পাল্পং সপ্রবাহিকম্||১০|| সরোমহর্ষঃ সোত্ক্লেশো গুরুবস্তিগুদোদরঃ| কৃতেঽপ্যকৃতসংজ্ঞশ্চ|১১|

স০-শ্লেষ্মণা ঘনাদিগুণং নর উপবেশ্যতে| নিদ্রালুস্তথাঽলসোঽন্নদ্বেষী চ স্তোকং স্তোকং সহ প্রবাহিকযা বর্ততে সপ্রবাহিকং চোপবেশ্যতে| তথা, সরোমহর্ষাদিকঃ স্যাত্| কৃতেঽপ্যকৃতসংজ্ঞশ্চ-তথা কৃতেঽপ্যকৃতসংজ্ঞশ্চ পুরীষোত্সর্গেঽকৃতসংজ্ঞঃ কৃতপুরীষোত্সর্গ ইতি সংবেদনা ন ভবতি|

Adhikarana tridoShasya lakShaNam (11) · Śloka 11

| সর্বাত্মা সর্বলক্ষণঃ||১১||

স০-সর্বাত্মা-সন্নিপাতেন, সর্বদোষলিঙ্গঃ|

Adhikarana bhayajasya lakShaNam (12-13) · Śloka 13

ভযেন ক্ষোভিতে চিত্তে সপিত্তো দ্রাবযেচ্ছকৃত্| বাযুস্ততোঽতিসার্যেত ক্ষিপ্রমুষ্ণং দ্রবং প্লবম্||১২|| বাতপিত্তসমং লিঙ্গৈরাহুঃ| |১৩|

স০-ভযেন চিত্তে ক্ষোভিতে সতি পিত্তসহিতো বাযুঃ শকৃদ্দ্রাবযেত্| ততোঽনন্তরমতিসার্যেত, ক্ষিপ্রাদিগুণযুক্তং লিঙ্গৈর্বাতপিত্ততুল্যম্|

Adhikarana shokajasya lakShaNam (13) · Śloka 13

তদ্বচ্চ শোকতঃ| |১৩|

স০-তদ্বচ্চ-ভযেন তুল্যলিঙ্গং, শোকাদতিসার্যতে|

Adhikarana ShaNNAmatIsArANAM pratyekaM dvaividhyadvikam (13-14) · Śloka 14

| অতীসারঃ সমাসেন দ্বিধা সামো নিরামকঃ||১৩|| সাসৃঙ্নিরস্রঃ| |১৪|

স০-অতীসারঃ ষোঢা ভবন্ দ্বিপ্রকারঃ সঙ্ক্ষেপেণ| একঃ সামো দ্বিতীযো নিরামকঃ| তথা, একঃ সরক্তো দ্বিতীযো নিরস্রঃ|

Adhikarana sAmasya lakShaNam (14) · Śloka 14

তত্রাদ্যে গৌরবাদপ্সু মজ্জতি| শকৃদ্দুর্গন্ধমাটোপবিষ্টম্ভার্তিপ্রসেকিনঃ||১৪||

স০-তত্র-তস্মিন্, আদ্যে-সামেঽতীসারে, গৌরবাদপ্সু পতিতং পুরীষং মজ্জতি-ব্রুডতি, দুর্গন্ধং চ স্যাত্| আটোপাদিযুতস্য পুংসঃ|

Adhikarana nirAmasya lakShaNam (15) · Śloka 15

বিপরীতো নিরামস্তু কফাত্পক্বোঽপি মজ্জতি| |১৫|

স০-নিরামস্ত্বতীসারোঽতো বিপরীতঃ-অপ্সু প্লবতি, আটোপাদিরহিতস্য পুংসঃ| স০-কফাত্পুনঃ স্বভাবগুরুত্বাত্ পক্বোঽপি মজ্জতি|

Adhikarana grahaNIrogasya nidAnam (15-16) · Śloka 16

অথ গ্রহণীরোগং লক্ষযতি - - - - | অতীসারেষু যো নাতিযত্নবান্ গ্রহণীগদঃ||১৫|| তস্য স্যাদগ্নিবিধ্বংসকরৈরন্যস্য সেবিতৈঃ| |১৬|

স০-অতীসারেষু যোঽতিযত্নবান্ন ভবতি তস্য গ্রহণীগদো ভবেদিতি গ্রহণ্যা নিদানম্| অন্যস্য-অনতিসারিণঃ, অগ্নিবিধ্বংসকরৈঃ-বহ্নিমান্দ্যহেতুভিরন্নপানৈঃ, শীলিতৈর্গ্রহণীরোগঃ স্যাত্|

Adhikarana atIsArasya medakalakShaNam (16-17) · Śloka 17

অতীসারগ্রহণীরোগযোঃ সমানাভাসত্বাত্ কো বিশেষঃ ? ইত্যাহ - - - - | সামং শকৃন্নিরামং বা জীর্ণে যেনাতিসার্যতে||১৬|| সোঽতিসারোঽতিসরণাদাশুকারী স্বভাবতঃ| |১৭|

স০-সামং পুরীষমথবা নিরামং জীর্ণ আহারে সতি যেন-ব্যাধিনা, অতিসার্যতে-অত্যর্থং বহির্নিঃসার্যতে, স ব্যাধিরতীসারঃ| অতিসরণাদ্ধেতোঃ| অতিসরণশব্দনির্দেশেন চাস্যান্বর্থত্বং দ্যোতিতম্| তদেবমতিসরণাদতীসার ইত্যুচ্যতে| ননু, এবং সতি যদা গ্রহণীদোষেঽপ্যতিসরণং কথঞ্চিত্স্যাত্তদা তস্যাপ্যতীসারত্বং স্যাদিত্যাশঙ্ক্যাহ-আশুকারীত্যাদি| প্রভাবপ্রধানোঽযং নির্দেশঃ| হেতৌ প্রথমা| স্বভাবেনাশুকারিত্বাদতীসারো গ্রহণীদোষাদন্য ইত্যর্থঃ| গ্রহণীদোষো হি নাশুকারী, কিন্তর্হি ? চিরকৃত্| তথা চাহ (শ্লো. ১৮)- "চিরকৃদ্গ্রহণীদোষঃ" ইতি|

Adhikarana grahaNIrogasya medakalakShaNam (17-18) · Śloka 18

অথ গ্রহণীদোষস্য স্বরূপং বর্ণযন্নতীসারাদ্ভূযো মেদমাহ - - - - | সামং সান্নমজীর্ণেঽন্নে জীর্ণে পক্বং তু নৈব বা||১৭|| অকস্মাদ্বা মুহুর্বদ্ধমকস্মাচ্ছিথিলং মুহুঃ| চিরকৃদ্গ্রহণীদোষঃ সঞ্চযাচ্চোপবেশযেত্||১৮||

স০-গ্রহণীদোষোঽজীর্ণেঽন্নে সামং কদাচিত্সান্নং, কদাচিজ্জীর্ণেঽন্নে পক্বং তথা নৈব বা| অকস্মাত্-কদাচিন্নিমিত্তমন্তরেণাপি, মুহুর্মুহুঃ-পুনঃপুনর্বদ্ধং, কদাচিন্নিমিত্তং বিনা মুহুঃ শিথিলং, সঞ্চযাদুপবেশযেদিতি যোজ্যম্| অযং তু গ্রহণীদোষশ্চিরকৃত্|

Adhikarana grahaNIrogashcaturdhA (19) · Śloka 19

স চতুর্ধা পৃথগ্দোষৈঃ সন্নিপাতাচ্চ জাযতে| |১৯|

স০-সঃ-গ্রহণীদোষঃ, পৃথগ্দোষৈঃ-বাতপিত্তকফৈঃ, সন্নিপাতেন চেতি চতুষ্প্রকারো জাযতে|

Adhikarana grahaNIrogasya pUrvarUpam (19-20) · Śloka 20

| প্রাগ্রূপং তস্য সদনং চিরাত্পচনমম্লকঃ||১৯|| প্রসেকো বক্ক্রবৈরস্যমরুচিস্তৃট্ ক্লমো ভ্রমঃ| আনদ্ধোদরতা ছর্দিঃ কর্ণক্ষ্বেডোঽন্ত্রকূজনম্||২০||

স০-তস্য-গ্রহণীদোষস্য, প্রাগ্রূপং সদনং চিরাত্পচনাদি চ|

Adhikarana grahaNIrogasya sAmAnyalakShaNam (21) · Śloka 21

সামান্যং লক্ষণং কার্শ্যং ধূমকস্তমকো জ্বরঃ| মূর্চ্ছা শিরোরুগ্বিষ্টম্ভঃ শ্বযথুঃ করপাদযোঃ||২১||

স০-চতুর্বিধস্যাস্য গ্রহণীগদস্য সামান্যং লক্ষণং কার্শ্যাদিকম্|

Adhikarana vAtajasya lakShaNam (22-25) · Śloka 25

তত্রানিলাত্তালুশোষস্তিমিরং কর্ণযোঃ স্বনঃ| পার্শ্বোরুবঙ্ক্ষণগ্রীবারুজাঽভীক্ষ্ণং বিষূচিকা||২২|| রসেষু গৃদ্ধিঃ সর্বেষু ক্ষুত্তৃষ্ণা পরিকর্তিকা| জীর্ণে জীর্যতি চাধ্মানং ভুক্তে স্বাস্থ্যং সমশ্নুতে||২৩|| বাতহৃদ্রোগগুল্মার্শঃপ্লীহপাণ্ডুত্বশঙ্কিতঃ| চিরাদ্দুঃখং দ্রবং শুষ্কং তন্বামং শব্দফেনবত্||২৪|| পুনঃপুনঃ সৃজেদ্বর্চঃ পাযুরুক্শ্বাসকাসবান্| |২৫|

স০-তত্র-তেষু চতুর্ষু গদেষু মধ্যে, বাতাত্তালুশোষাদি স্যাত্|

Adhikarana pittajasya lakShaNam (25-26) · Śloka 26

| পিত্তেন নীলপীতাভং পীতাভঃ সৃজতি দ্রবম্||২৫|| পূত্যম্লোদ্গারহৃত্কণ্ঠদাহারুচিতৃডর্দিতঃ| |২৬|

স০-পিত্তেন পীতাভঃ সন্ তথা পূত্যম্লোদ্গারাদ্যর্দিতো নীলবর্ণাদিকং বর্চঃ সৃজতি|

Adhikarana kaphajasya lakShaNam (26-29) · Śloka 29

| শ্লেষ্মণা পচ্যতে দুঃখমন্নং ছর্দিররোচকঃ||২৬|| আস্যোপদেহেনিষ্ঠীবকাসহৃল্লাসপীনসাঃ| হৃদযং মন্যতে স্ত্যানমুদরং স্তিমিতং গুরু||২৭|| উদ্গারো দুষ্টমধুরঃ সদনং স্ত্রীষ্বহর্ষণম্| ভিন্নামশ্লেষ্মসংসৃষ্টগুরুবর্চঃপ্রবর্তনম্||২৮|| অকৃশস্যাপি দৌর্বল্যম্| |২৯|

স০-শ্লেষ্মণা দুঃখং-কৃচ্ছ্রেণ, অন্নং পচ্যতে| ছর্দ্যাদি চ স্যাত্| তথা, হৃদযং স্ত্যানং-পিণ্ডিতমিব, মন্যতে| জঠরং নিশ্চলং গুরু চ| উদ্গারশ্চ দুষ্টমধুরঃ স্যাত্| সদনং শরীরস্য| স্ত্রীষ্বহর্ষণাদি চ স্যাত্|

Adhikarana sannipAtajasya lakShaNam (29) · Śloka 29

সর্বজে সর্বসঙ্করঃ| |২৯|

স০-সর্বজে-সন্নিপাতজে, সর্বেষাং লক্ষণানাং সঙ্করো-মিশ্রত্বং, ভবতি|

Adhikarana viShamAdyAstrayo~agnayo~api grahaNIdoShAH (29-30) · Śloka 30

| বিভাগেঽঙ্গস্য যে চোক্তা বিষমাদ্যাস্ত্রযোঽগ্নযঃ||২৯|| তেঽপি স্যুর্গ্রহণীদোষাঃ| |৩০|

স০-অঙ্গস্য বিভাগে চ যে বিষমাদ্যাঃ-বিষমতীক্ষ্ণমন্দাঃ, ত্রযোঽগ্নয উক্তাস্তেঽপি গ্রহণীদোষাঃ স্যুঃ| ননু, এবং সতি সপ্ত গ্রহণীদোষা ইতি প্রাপ্নোতি| মৈবম্| মুখ্যাঃ সপ্রাপ্তিপূর্বরূপরূপনির্দেশাদিযুক্তাশ্চত্বার এব গ্রহণীগদাঃ| যে তু বিষমাদ্যাস্ত্রযস্তে গ্রহণীরোগাভাসা ইতি বোধ্যম্|

Adhikarana samo~agniH svAsthyadaH (30) · Śloka 30

সমস্তু স্বাস্থ্যকারণম্| |৩০|

স০-সমঃ পুনরগ্নিঃ স্বাস্থ্যস্য-আরোগ্যস্য, কারণম্|

Adhikarana aShTau mahArogAH (8) · Śloka 8

বাতব্যাধ্যশ্মরীকুষ্ঠমেহোদরভগন্দরাঃ| অর্শাংসি গ্রহণীত্যষ্টৌ মহারোগাঃ সুদুস্তরাঃ||৩০|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানেঽতীসারগ্রহণীদোষনিদানং নামাষ্টমোঽধ্যাযঃ||৮||

স০-বাতব্যাধ্যাদযোঽষ্টৌ মহারোগাঃ সুদুস্তরাঃ-বিষমাঃ| তস্মাত্তেষু যত্নঃ কার্য ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানেঽতিসারগ্রহণীদোষনিদানং নামাষ্টমোঽধ্যাযঃ সমাপ্তঃ|| ৮||