2. jvaranidanādhyāyaḥ

Adhikarana adhyAyopakramaH · Śloka

স০-সর্বরোগনিদানাদনন্তরং জ্বরনিদানারম্ভেঽযং সম্বন্ধঃ| উক্তং সর্বরোগনিদানম্| অতোঽনন্তরমবশ্যং কস্যচিদ্বিশিষ্টস্য রোগস্য নিদানং বক্তুমুচিতম্| রোগেষু চ জ্বরঃ প্রধানঃ| তথা চ মুনিঃ (চ. সূ. অ.২৫|৪০) - "জ্বরো রোগাণাম্|" ইতি| স্বযমেব চাস্য প্রাধান্যং তন্ত্রকৃত্ প্রতিপাদযিষ্যতীতি জ্বরনিদানমেবারব্ধুং যুক্তম্|

Adhikarana jvaranidAnAdhyAyaH (2) · Śloka 2

অথাতো জ্বরনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে|২|

স০-অথাদিশব্দানাং পূর্ববদ্ব্যাখ্যা|

Adhikarana jvaraparyAyAH, jvaraprabhAvaH (1-2) · Śloka 2

জ্বরো রোগপতিঃ পাপ্মা মৃত্যুরোজোশনোঽন্তকঃ| ক্রোধো দক্ষাধ্বরধ্বংসী রুদ্রোর্ধ্বনযনোদ্ভবঃ||১|| জন্মান্তযোর্মোহমযঃ সন্তাপাত্মাঽপচারজঃ| বিবিধৈর্নামভিঃ ক্রূরো নানাযোনিষু বর্ততে||২||

স০-রোগাণাং পতী রোগপতিঃ-সর্বরোগপ্রধানঃ| পাপ্মা-পাপস্বভাবঃ| তথা, মৃত্যুঃ-সর্বপ্রাণিনাং হি মরণেনাসাবেব যোজযতি যথা, ন তথাঽন্যে রোগাঃ| সর্বধাত্বাপ্যাযকং যদোজস্তদশনং ভোজনং যস্যেত্যোজোশনঃ| অন্তকোমারণহেতুসামান্যাত্| ক্রোধো-ভগবতো মহেশ্বরস্য দক্ষাপমানিতস্য লোকান্নিদিধক্ষোর্ললাটান্নির্গতঃ| অত এবাহ-দক্ষাধ্বরধ্বংসী রুদ্রোর্ধ্বনযনোদ্ভব ইতি| জন্মান্তযোর্মোহময ইতি জ্বরস্য সন্তাপাত্মকত্বং লিঙ্গম্, জন্মান্তযোশ্চ ক্বচিত্সন্তাপানুপলব্ধের্মোহময ইত্যুক্তম্, মোহস্বভাবাদেবান্যজন্মজং কর্ম প্রাণী ন স্মরতি| যশ্চাপচারজঃ-তথাবিধাদাহারবিহারাদুদ্ভূতঃ, স সন্তাপস্বভাবঃ, স চ ক্রূরো-দুশ্চিকিত্স্যঃ| নানাযোনিষু-হস্ত্যশ্বগোপক্ষ্যাদিষু চ, বিবিধৈর্নামভির্বর্ততে| [যথা-"-পাকলস্তদ্যথেভানামভিতাপো হযেষু চ| গবাং গোকর্ণকশ্চৈব পক্ষিণাং মকরস্তথা|| বান্তাদানামলর্কঃ স্যাদব্জেষ্বিন্দ্রমদঃ স্মৃতঃ| ওষধীষু তথা জ্যোতিশ্চূর্ণকো ধান্যজাতিষু|| জলেষু নীলিকা ভূমা বূষো নৄণাং জ্বরো মতঃ| 'ৠতে দেবমনুষ্যেভ্যো নান্যো বিষহতে তু তম্|| শেষাঃ সর্বে বিপদ্যন্তে তির্যগ্যোন্যো জ্বরার্দিতাঃ| কর্মণা লভতে জন্তুর্দেবত্বং মানুষাদপি|| পুনশ্চৈব চ্যুতঃ স্বর্গান্মানুষ্যমভিপদ্যতে| তস্মাত্স দেবভাবাচ্চ সহতে মানবো জ্বরম্' (সু. উ. অ. ৩৯|১১)||" ইতি| ] যথা-দন্তিশরীরে পাকলো নাম জ্বরঃ, অশ্বশরীরেঽভিতাপকঃ, গোশরীরে গোকর্ণকঃ, পক্ষিশরীরে মকরঃ, শ্বশরীরেঽলর্কঃ, [ মত্স্যেষ্বিন্দ্রমদঃ, ওষধীষু জ্যোতিঃ, ধান্যেষু চূর্ণকঃ, ] অপ্সু নীলিকা, [ ভূমাবূষঃ, ] মানুষেষু জ্বরঃ, ইতি| ননু, যদি রোদ্রোর্ধ্বনযনোদ্ভবঃ, তর্হ্যপচারজ ইতি কথমুক্তম্ ? ব্রূমঃ| পূর্বং কৃতযুগে ললাটজলোচনাদুত্পন্নো জ্বরঃ| ত্রেতাযুগে তু সম্প্রাপ্তে পরিগ্রহদোষাদ্ধর্মস্য পাদোঽন্তর্হিত ইত্যপচারেণাসৌ প্রথমং প্রাণিষূদ্ভূতোঽপচারজ ইত্যুচ্যতে| কলিযুগেঽপ্যন্নপানৌষধাদ্যপচারেণ জাত ইত্যপচারজ উচ্যতে, ইতি ন কিঞ্চিদত্রাযুক্তম্|

Adhikarana jvaraBedAH (3) · Śloka 3

স চাপচারজো জ্বরঃ কিমেকো বাঽনেকবিধঃ ? ইত্যাহ স জাযতেঽষ্টধা দোষৈঃ পৃথঙ্মিশ্রৈঃ সমাগতৈঃ| আগন্তুশ্চ|৩|

স০-সঃ-সন্তাপলক্ষণো জ্বরঃ, অষ্টধা-অষ্টপ্রকারঃ, সম্পদ্যতে| কথম্ ? পৃথগ্দোষৈঃ-বাতপিত্তকফৈঃ, তথা মিশ্রৈঃ-দ্বাভ্যাং দ্বাভ্যাম্, তথা সমাগতৈঃ-সন্নিপতিতৈস্ত্রিভিঃ, তথাঽঽগন্তুকারণজনিতো জ্বরঃ, এবং পৃথগ্দোষৈস্ত্রযো মিশ্রৈস্ত্রযঃ সন্নিপতিতৈরেক আগন্তুশ্চৈক ইত্যষ্টৌ|

Adhikarana jvarasaMprAptiH (3-6) · Śloka 6

সম্প্রাপ্তিমস্যাধুনা বক্তি | মলাস্তত্র স্বৈঃ স্বৈর্দুষ্টাঃ প্রদূষণৈঃ||৩|| আমাশযং প্রবিশ্যামমনুগম্য পিধায চ| স্রোতাংসি পক্তিস্থানাচ্চ নিরস্য জ্বলনং বহিঃ||৪|| সহ তেনাভিসর্পন্তস্তপন্তঃ সকলং বপুঃ| কুর্বন্তো গাত্রমত্যুষ্ণং জ্বরং নির্বর্তযন্তি তে||৫|| স্রোতোবিবন্ধাত্প্রাযেণ ততঃ স্বেদো ন জাযতে| |৬|

স০-তত্রেতি নির্ধারণে, তেষ্বষ্টসু জ্বরেষু মধ্যে নিজানাং জ্বরাণামুত্পত্তির্নির্ধার্যতে| মলাঃ-বাতাদযঃ, স্বৈঃ স্বৈঃ প্রদূষণৈঃ-কোপনৈঃ, দুষ্টাঃ-কুপিতাঃ, জ্বরং নির্বর্তযন্তি-উত্পাদযন্তি| তত্র যথা-বাতস্তিক্তাদিভিঃ, পিত্তং কটুকাদিভিঃ, কফঃ স্বাদ্বাদিভিঃ, এবং সংসর্গে সন্নিপাতে চ চিন্ত্যম্| আগন্তুনা চ কেনচিত্ প্রকুপিতা দোষা জ্বরং নির্বর্তযন্তি| যদ্যপি চাগন্তুজ্বরস্তদ্ধেতুকঃ, তথাঽপি তত্রাপি বাতাদয এব হেতবঃ| ন হি বাতাদীন্ বিমুচ্য ব্যাধেঃ সমুদ্ভবঃ কথমপি সম্ভাব্যতে| এতাবাংস্তু বিশেষঃ,-দোষজে ব্যাধৌ পূর্বং বাতাদযঃ কুপ্যন্তি পশ্চাত্কাযস্য পীডা ভবতি| আগন্তুকে তু ব্যাধৌ পূর্বং শরীরস্য ব্যথা ভবতি পশ্চাদ্বাতাদিকোপ ইতি| কযাঽঽনুপূর্ব্যা জ্বরং নির্বর্তযন্তি ? ইত্যাহ-আমাশযমিত্যাদি| আমাশযং প্রবিশ্য-নাভিস্তনান্তরে স্থিত্বা, তথাঽঽমং-পূর্বোক্তলক্ষণলক্ষিতং, অনুগম্য তেন চামেনানুগতাঃ স্রোতাংসি-রসাদিবাহীনি, পিধাযছাদযিত্বা, তথা জ্বলনং পক্তিস্থানাদ্বহির্নিরস্য-নিষ্কাস্য| পক্তিগ্রহণমত্র জাঠরাগ্নের্নিঃসন্দেহেন গ্রহণার্থম্, অন্যথা ত্রযোদশানামগ্নীনাং মধ্যাত্ কতমং জ্বলনং স্থানাদ্বহির্নিরস্যেতি সন্দিহ্যেত| তেন চ-নিরস্তবহ্নিনা, সহ-একলোলীভূতাঃ, সকলং বপুরভিসর্পন্তস্তপন্তো গাত্রমত্যুষ্ণং কুর্বন্তো জ্বরং নির্বর্তযন্তি| অত্যুষ্ণগ্রহণেনৈবং প্রতিপাদযতি,-অত্যুষ্ণগাত্রত্বেনৈব জ্বরসম্ভবঃ, নোষ্ণগাত্রমাত্রেণ| তথা চ নিরামযস্যাপি হি প্রাণিনো জীবতো গাত্রমুষ্ণং ভবত্যেব| ননু, বাযুকৃতে জ্বরে বাযোর্যোগবাহিত্বাত্ পিত্তকৃতেঽপি জ্বরে পিত্তস্য বহ্নিনা সমানগুণত্বাত্ সন্তাপোপলব্ধির্যুক্তা| শ্লেষ্মজ্বরে তু শ্লেষ্মণো বহ্নিপ্রতিপক্ষত্বাত্ কথমিব সন্তাপকত্বং যুক্তম্ ? ইতি কেচিত্| অত্রোচ্যতে| স্বভাবাদুপপন্নমেতত্| জ্বরস্য হ্যযমচিন্ত্যঃ স্বভাবঃ, যেনাবশ্যং সন্তাপমুত্পাদযতি| এবং বাতস্যামূর্তিত্ত্বেঽপি গুল্মাদিষু শ্যাবারুণত্বোপলব্ধিঃ| তস্মাদ্ব্যাধীনামেবং স্বভাববিশেষান্ন্যায্যমেবেদম্| স০-যত এব স্রোতঃপিধানং তত এব হেতোঃ স্বেদো ন জাযতে| প্রাযোগ্রহণাত্ ক্বচিত্পিত্তজ্বরাদৌ স্বেদো জাযত এবেত্যর্থঃ| তথা চানন্তরমেব তন্ত্রকৃদধীতে (শ্লো. ২০)- "স্বেদো নিঃশ্বাসবৈগন্ধ্যং" ইত্যাদি|

Adhikarana jvarapUrvarUpam (6-10) · Śloka 10

পূর্বরূপং লক্ষযিতুমাহ | তস্য প্রাগ্রূপমালস্যমরতির্গাত্রগৌরবম্||৬|| আস্যবৈরস্যমরুচিজৃম্ভা সাস্রাকুলাক্ষিতা| অঙ্গমর্দোঽবিপাকোঽল্পপ্রাণতা বহুনিদ্রতা||৭|| রোমহর্ষো বিনমনং পিণ্ডিকোদ্বেষ্টনং ক্লমঃ| হিতোপদেশেষ্বক্ষান্তিঃ প্রীতিরম্লপটূষণে||৮|| দ্বেষঃ স্বাদুষু ভক্ষ্যেষু তথা বালেষু তৃড্ ভৃশম্| শব্দাগ্নিশীতবাতাম্বুচ্ছাযোষ্ণেষ্বনিমিত্ততঃ||৯|| ইচ্ছা দ্বেষশ্চ| |১০|

স০-তস্য-জ্বরস্য, প্রাগ্রূপম্| আলস্যং-বাঙ্মনঃকাযকর্মস্বনুদ্যমঃ| সুশ্রুতে চোক্তম্| যথা (শা. অ. ৪|৫২)- "সুখস্পর্শপ্রসঙ্গিত্বং দুঃখদ্বেষণলোলতা| শক্তস্য চাপ্যনুত্সাহঃ কর্মণ্যালস্যমুচ্যতে||" ইতি| অরতিঃ-একত্রানবস্থিতিশ্চেতসঃ| তথা, অঙ্গগুরুত্বম্| আস্যবৈরস্যং-বক্ত্রবিরসতা| অরুচিঃ-অন্নাভিলাষাভাবঃ| জৃম্ভা-জৃম্ভণম্| সহাস্রেণ বর্তেত ইতি সাস্রে, আকুলে অক্ষিণী যস্য স এবম্, তস্য ভাবঃ সাস্রকুলাক্ষিতা| অঙ্গমর্দঃ-অঙ্গভঙ্গঃ| অবিপাকঃ-অন্নস্যাবিপক্তিঃ| অল্পপ্রাণতা-স্তোকবলত্বম্| তথা, বহুনিদ্রতা| "ত্বতলোর্গুণবচনস্য পুংবদ্ভাবো বক্তব্যঃ" ইত্যত্র পুংবদ্ভাবঃ| রোমহর্ষো-রোমাঞ্চঃ| বিনমনং-অঙ্গানাং বিনামঃ| পিণ্ডিকযোরুদ্বেষ্টনং-উদ্বেষ্টঃ| ক্লমো-গ্লানিঃ| হিতস্য-গুরুপিত্রাদেঃ, উপদেশাস্তেষু, অক্ষান্তিঃ-অসহনত্বম্, তদুপদিষ্টং ন ক্ষমতে| প্রীতিরিত্যাদি| অম্লাদিষু দ্রব্যেষু প্রীতিঃ-ভক্তিঃ| স্বাদুষু ভক্ষ্যেষু-মধুরেষু দ্রব্যেষু, দ্বেষো ভবতি| তথা, বালেষু-শিশুষু সকললোকবল্লভেষ্বপি, জ্বরস্বভাবাদ্দ্বেষো ভবতি| তথা, তৃড্ ভ্রুশং-তৃষ্ণাঽত্যর্থম্| শব্দাদিষ্বনিমিত্ততঃ-কারণং বিনা, সজ্বরস্য প্রীত্যপ্রীতী জাযেতে| কদাচিদপ্রিযমপি শব্দং ন দ্বেষ্টি, কদাচিত্ প্রিযমপি বেণুবীণাদিজনিতং দ্বেষ্টি| এবং শীতার্তোঽপি কদাচিদগ্নিং দ্বেষ্টি, কদাচিদশীতার্তোঽপ্যগ্নিমভিলষতি| এবং শীতাদিষ্বপি যোজ্যম্| এবং প্রাগ্রূপং-অব্যক্তলিঙ্গম্|

Adhikarana tadanurUpotpattiH (10) · Śloka 10

তদনু জ্বরস্য ব্যক্ততা ভবেত্| |১০|

স০-এতস্য চানু (তদনু)- প্রাগ্রূপাণাং পশ্চাত্ জ্বরস্য ব্যক্ততা-স্ফুটতা ভবেত্, স্পষ্টলিঙ্গোত্পত্তিঃ| বাতজ্বরোঽযং পিত্তজ্বরোঽযং শ্লেষ্মজ্বরোঽযং সংসর্গজোঽযং সন্নিপাতজোঽযমিতি ব্যক্তীভবতি|

Adhikarana vAtajvaralakShaNam, pittajvaralakShaNam (10-20) · Śloka 20

| আগমাপগমক্ষোভমৃদুতাবেদনোষ্মণাম্||১০|| বৈষম্যং তত্রতত্রাঙ্গে তাস্তাঃ স্যুর্বেদনাশ্চলাঃ| পাদযোঃ সুপ্ততা স্তম্ভঃ পিণ্ডিকোদ্বেষ্টনং শ্রমঃ||১১|| বিশ্লেষ ইব সন্ধীনাং সাদ ঊর্বোঃ কটীগ্রহঃ| পৃষ্ঠং ক্ষোদমিবাপ্নোতি নিষ্পীড্যত ইবোদরম্||১২|| ছিদ্যন্ত ইব চাস্থীনি পার্শ্বগানি বিশেষতঃ| হৃদযস্য গ্রহস্তোদঃ প্রাজনেনেব বক্ষসঃ||১৩|| স্কন্ধযোর্মথনং বাহ্বোর্ভেদঃ পীডনমংসযোঃ| অশক্তির্ভক্ষণে হন্বোর্জৃম্ভণং কর্ণযোঃ স্বনঃ||১৪|| নিস্তোদঃ শঙ্খযোর্মূর্ধ্নি বেদনা বিরসাস্যতা| কষাযাস্যত্বমথবা মলানামপ্রবর্তনম্||১৫|| রূক্ষারুণত্বগাস্যাক্ষিনখমূত্রপুরীষতা| প্রসেকরোচকাশ্রদ্ধাবিপাকাস্বেদজাগরাঃ||১৬|| কণ্ঠৌষ্ঠশোষস্তৃট্ শুষ্কৌ ছর্দিকাসৌ বিষাদিতা| হর্ষো রোমাঙ্গদন্তেষু বেপথুঃ ক্ষবথোর্গ্রহঃ||১৭|| ভ্রমঃ প্রলাপো ঘর্মেচ্ছা বিনামশ্চানিলজ্বরে| ||১৮|| অথ পিত্তজ্বরলক্ষণার্থমাহ যুগপদ্ব্যাপ্তিরঙ্গানাং প্রলাপঃ কটুবক্ত্রতা||১৮|| নাসাস্যপাকঃ শীতেচ্ছা ভ্রমো মূর্চ্ছা মদোঽরতিঃ| বিট্স্রংসঃ পিত্তবমনং রক্তষ্ঠীবনমম্লকঃ||১৯|| রক্তকোঠোদ্গমঃ পীতহরিতত্বং ত্বগাদিষু| স্বেদো নিঃশ্বাসবৈগন্ধ্যমতিতৃষ্ণা চ পিত্তজে||২০||

স০-আগমাদীনাং বৈষম্যমনিলজ্বরে লিঙ্গমিতি যোজ্যম্| জ্বরস্যাগমঃ-সন্তাপারম্ভঃ-তস্য বৈষম্যং শিরঃপ্রভৃতীনামঙ্গানাং ন যুগপত্সন্তাপঃ, অপি তু কদাচিদস্য শিরসি পূর্বমাগচ্ছতি কদাচিদংসযোঃ পাদযোর্বেতি| অপগমো-জ্বরস্য মোক্ষঃ, তস্য বৈষম্যং-কদাচিদস্য পূর্বং পাদযোঃ সন্তাপমোক্ষঃ কদাচিত্ত্রিকে কদাচিচ্ছিরসি সন্তাপস্য মুক্তিরিতি| তথা, ক্ষোভমৃদুতযোর্বৈষম্যং-কদাচিত্তীব্রঃ সন্তাপঃ কদাচিন্মৃদুরিতি| বেদনা জ্বরস্য তাস্তাঃ, তাসাং বৈষম্যং-ন যুগপত্সর্বাঙ্গীণো বেদনোপলম্ভঃ, অপি তু ক্বচিত্ কদাচিত্ কস্মিংশ্চিদঙ্গ ইতি| তথা, জ্বরস্য য ঊষ্মা-সন্তাপঃ, তস্যাপি বৈষম্যাত্ কদাচিচ্ছিরস্যস্য সন্তাপ উপলভ্যতে কদাচিত্ পাদাদ্যন্যতমেঽঙ্গে| তত্রতত্রাঙ্গে-বাহুশিরঃপ্রভৃতৌ, তাস্তা বেদনাঃ-পাদযোঃ সুপ্ততাদ্যা বক্ষ্যমাণাঃ, চলাঃ-অনবস্থিতাঃ স্যুঃ, বাযোশ্চলরূপত্বাত্| তা এবাহ-পাদযোরিত্যাদি| পাদযোঃ সুপ্তিঃ-নিশ্চেতনত্বম্, নখক্ষতাদিকমপি ন চেতযেতাং তাবিত্যর্থঃ| স্তম্ভঃ-স্তব্ধতা, তযোরেব| পিণ্ডিকযোরুদ্বেষ্টনং-উদ্বেষ্টঃ| শ্রমঃ-খেদঃ| সন্ধীনাং বিচ্ছেদনমিব| ঊর্বোঃ সাদঃ-স্বক্রিযাযামসমর্থত্বম্| কট্যা গ্রহঃ-স্তম্ভ ইব| পৃষ্ঠং ক্ষোদমিব-সংক্ষুণ্ণতামিব, আপ্নোতি, সংক্ষুণ্ণসস্যাদিবত্| নিষ্পীড্যত ইবোদরং-পিণ্যাকাদিবত্| ছিদ্যন্ত ইবাস্থীনি-করপত্রাদিনা কাষ্ঠাদিবত্| অতিশযেন পার্শ্বগান্যস্থীনি ছিদ্যন্ত ইব| তথা, হৃদযস্য গ্রহণম্| বক্ষসঃ-উরসঃ, প্রাজনেনেব-প্রতোদেনেব, তোদো-ব্যথনম্| স্কন্ধযোর্মন্থনং-অরণেরিব| বাহ্বোর্ভেদো-বিদারণমিব| অংসযোঃ পীডনং-তৈলাদিপীডনকাষ্ঠৈরিব| হন্বোর্ভক্ষণেঽসামর্থ্যম্| তথা, জৃম্ভণাদীনি স্যুঃ| বিরসাস্যতা-অব্যক্তরসত্বং, মুখস্য ভবতি, যেন মধুরাদ্যন্যতমং রসং ন নিশ্চিনোতি| অথবা কষাযরসত্বং বক্ত্রস্য| মলানাং-মূত্রপুরীষাদীনাং, অপ্রবর্তনং-অবিসর্গঃ| রূক্ষত্বমরুণত্বং চ ত্বগাদীনাং ভবতি, রোগস্বভাবাত্| তথা, প্রসেকাদযঃ স্যুঃ| অথ, অরোচকাশ্রদ্ধযোঃ কো বিশেষঃ| ব্রূমঃ| অরোচকেন বক্ত্রস্থমপি ন ভুঙ্ক্তে| অশ্রদ্ধযা তু কেবলং নাভিলষতি মুখস্থং তু ভক্ষযত্যেবেতি বিশেষঃ| বিষাদিতা-বিষণ্ণত্বং দুঃখিতত্বম্| রোমাদীনাং হর্ষো, বেপথ্বাদযশ্চ বাতজ্বরে স্যুঃ| স০-পিত্তজ্বরে যুগপত্-তুল্যকালং, অঙ্গানাং ব্যাপ্তিঃ-শিরঃ-প্রভৃতীন্যঙ্গানি সন্তাপেনৈককালং ব্যাপ্যন্তে| ন তু বাতজ্বর ইবাগমাদীনাং বৈষম্যমিতি ব্যাপ্তিগ্রহণেন দ্যোতযতি| প্রলাপঃ-অসম্বদ্ধবচনস্যোক্তিঃ| কটুবক্ত্রতা-কটুকরসত্বমাস্যে| তথা, নাসাযামাস্যে চ পাকঃ| তথা, শীতেচ্ছাদযোঽত্র ভবন্তি| মণ্ডলাকারা নির্মুখাঃ পিটিকাঃ কোঠা ইত্যুচ্যন্তে| ননু, দোষাস্ত্রযোঽপি জ্বরং নিবর্তযন্তীত্যুক্তম্| পিত্তজ্বরে চ পিত্তেন যুক্তস্য কাযাগ্নের্ভূযো বৃদ্ধ্যা ভাব্যম্, নাগ্নিমান্দ্যেন, "বৃদ্ধিঃ সমানৈঃ সর্বেষাং" (হৃ. সূ. অ. ১|১৪) ইতি বচনাত্| এবং চাগ্নিমান্দ্যাভাবাত্ জ্বরস্য সম্ভবেঽপ্যুপপত্তিরযুক্তা| নৈবম্| স্বস্থানাচ্চালনেনাগ্নের্মান্দ্যাপত্তেঃ| স্থানবশাদ্বাঽন্যথাত্বস্যাপি ক্রিযাসামর্থ্যং দৃষ্টম্| তথা চাষ্টাঙ্গসঙ্গ্রহে (?) (চরকে) শোষনিদানে বক্ষ্যতি (চ. নি. অ. ৬|৫)- "যোংঽশঃ [ তস্য ] শরীরসন্ধীনাবিশতি তেন [ অস্য ] জৃম্ভা জ্বরশ্চোপজাযতে|" ইত্যাদি| তস্মাত্স এবাগ্নিঃ ক্বচিদেব দেশে পুক্তং শক্তো ভবতি, ন সর্বত্র| উষ্ণগুণেন তু পিত্তেন যুক্তঃ পক্তা ভবত্যেবোষ্ণতরঃ| অত এব সন্তাপাদীনধিকতরান্ করোতীতি ন কিঞ্চিদত্রানুপপন্নম্|

Adhikarana kaPajvaralakShaNam (21-22) · Śloka 22

কফজ্বরলক্ষণমাহ বিশেষাদরুচির্জাড্যং স্রোতোরোধোঽল্পবেগতা| প্রসেকো মুখমাধুর্যং হৃল্লেপশ্বাসপীনসাঃ||২১|| হৃল্লাসশ্ছর্দনং কাসঃ স্তম্ভঃ শ্বৈত্যং ত্বগাদিষু| অঙ্গেষু শীতপিটিকাস্তন্দ্রোদর্দঃ কফোদ্ভবে||২২||

স০-সর্বজ্বরেঽরুচির্ভবত্যেব, অতিশযেন তু কফজে| তথা, জাড্যাদযঃ স্যুঃ| ত্বগাদিষ্বিত্যাদিশব্দ আস্যাক্ষিনখাদীনাং গ্রহণায| [ ত্বগাদিষু শ্বৈত্যং-শ্বেততা| অঙ্গেষু-শিরঃপাণ্যাদিষু, শীতপিটিকাঃ-শ্লেষ্মপিটিকাঃ| নিদ্রার্তস্যেব বিষযাগ্রহণং-তন্দ্রা| ] উদর্দস্য লক্ষণং তন্ত্রান্তরং উক্তম্-"শীতপানীযসংস্পর্শাচ্ছীতকালে বিশেষতঃ| শ্বযথুঃ শিশিরার্তানামুদর্দঃ কফসম্ভবঃ||" ইতি|

Adhikarana jvarANAM kAlasaMprAptiH (23) · Śloka 23

এবং ত্রযাণাং দোষাণাং পৃথক্ লিঙ্গান্যভিধায সামান্যলিঙ্গান্যধুনা কথযতি কালে যথাস্বং সর্বেষাং প্রবৃত্তির্বৃদ্ধিরেব বা| |২৩|

স০-কালঃ-পূর্বাহ্ণাদিকো বর্ষাদিকো বা যো বাতাদেঃ, তস্মিন্ কালে, যথাস্বং-যথাযথং বাতাদিজ্বরাণামপ্রবৃত্তানাং, প্রবৃত্তিঃ-উত্পত্তিঃ, উত্পন্নানামাধিক্যং বা স্যাত্, তদা বাতাদিজ্বরোঽযমিত্যববুধ্যেত|

Adhikarana jvarANAM upaSayAnupaSayau (23) · Śloka 23

ইদানীং সামান্যেনান্যদপি লিঙ্গদ্বযমাহ | নিদানোক্তানুপশযো বিপরীতোপশাযিতা|২৩|

স০-নিদানানি চ তান্যুক্তানি চ,- তিক্তোষণাদীনি বাতাদিজ্বরকারণানি, তৈরনুপশযো যস্মিন্ জ্বরে স এবম্| রোগবৃদ্ধ্যা হি রোগিণো দুঃখাবহত্বম্| ননু, নিদানানুপশয ইত্যেতাবদস্তু| কিমুক্তগ্রহণেন ? উচ্যতে| উক্তগ্রহণং স্বনিদানগ্রহণার্থম্| উক্তগ্রহণমন্তরেণ যানিকানিচিন্নিদানানি রক্তপিত্তশ্বাসাদীনাং, তেষামনুপশয ইত্যেবং প্রাপ্নুযাত্| উক্তশব্দোচ্চারণসামর্থ্যাত্তু যান্যেব বাতজ্বর উক্তানি তান্যেব তত্র জ্বরে গৃহ্যন্তে, নেতরাণি| এবং পিত্তকফাদিজ্বরাদিষু| তস্মাদুক্তগ্রহণং কর্তব্যম্| বিপরীতোপশাযিতেতি| উপশেতেঽবশ্যমিত্যুপশাযি, বিপরীতৈরুপশাযি-বিপরীতোপশাযি, তস্য ভাবো বিপরীতোপশাযিতা,-সুখানুবন্ধি আরোগ্যলক্ষণা| কস্মাদ্বিপরীতৈঃ ? প্রকৃতত্বান্নিদানস্যৈব| এবং জ্বরনিদানপ্রতিপক্ষভূতৈঃ সর্বেষাং জ্বরাণামুপশযঃ সুখানুবন্ধো বিপরীতোপশাযিতেতি বোধ্যম্| ননু, "নিদানোক্তানুপশযঃ" ইতীদমেবাস্তু, কিং "বিপরীতোপশাযিতা" ইত্যনেন ? যস্য হি নিদানোক্তানুপশযঃ, তস্যাবশ্যং বিপরীতোপশাযিতযা ভাব্যম্| নৈবম্| অনৈকান্তিকত্বাত্| তথা হি,- অতীসারাদিষু নিদানোক্তানুপশয উপলভ্যতে| ন চ সামাবস্থাযাং বিপরীতং সঙ্গ্রাহ্যুপশেতে| অপি চ মদ্যোত্থানাং বিকারাণাং মদ্যমেব প্রসাধকমিত্যুক্তম্| ন চৈবং "বিপরীতোপশাযিতা" ইতি ঘটতে| তস্মান্ন্যায্যমুভযোরুপাদানম্| এবং হি লক্ষণং সম্যগুক্তং ভবতি|

Adhikarana saMsargajvaralakShaNam (23) · Śloka 23

| যথাস্বং লিঙ্গসংসর্গে জ্বরঃ সংসর্গজঃ|২৩|

স০-যদ্যত্স্বং যথাস্বং, যানি যস্য জ্বরস্য স্বানি লিঙ্গানি বাতজ্বরস্য পিত্তজ্বরস্য শ্লেষ্মজ্বরস্য বা, তেষাং সংসর্গো লিঙ্গসংসর্গঃ,-সংসৃষ্টলিঙ্গত্বং, তস্মিন্সতি সংসর্গজো জ্বরো বেদ্যঃ| অত্রাপি "কালে যথাস্বং" ইত্যাদি সর্বং লক্ষণং বোধ্যম্|

Adhikarana vAtapittajvaralakShaNam (23-24) · Śloka 24

ন চৈতাবদেব সংসর্গলক্ষণমিত্যাহ | অপি চ||২৩|| শিরোর্তিমূর্চ্ছাবমিদাহমোহকণ্ঠাস্যশোষারতিপর্বভেদাঃ| উন্নিদ্রতাতৃড্ভ্রমরোমহর্ষা জৃম্ভাতিবাক্ত্বং চ চলাত্সপিত্তাত্||২৪||

স০-চলাত্সপিত্তাত্-বাতপিত্তসংসর্গজে, শিরোর্ত্যাদযঃ স্যুঃ| কণ্ঠাস্যযোঃ শোষেণ সম্বন্ধঃ| বাতজ্বরে শিরোর্ত্যাদীনি প্রাযো দৃষ্টানি, কানিচিত্তু পিত্তজ্বরে দৃষ্টানি, তানি চ বাতপিত্তজ্বরে দৃশ্যন্তে| তথা, অন্যান্যপ্যধিকান্যত্র বাতপিত্তজ্বরে দৃশ্যন্তে, যানি ন কেবলে বাতজ্বরে নাপি পিত্তজ্বরে দৃষ্টানি| এবমন্যযোঃ সংসর্গজ্বরযোর্যোজ্যম্| উপজাতিবৃত্তম্|

Adhikarana vAtaSleShmajvaralakShaNam (25) · Śloka 25

ইদানীং কফানিলসংসর্গলক্ষণমাহ তাপহান্যরুচিপর্বশিরোরুক্ পীনসশ্বসনকাসবিবন্ধাঃ| শীতজাড্যতিমিরভ্রমতন্দ্রাঃ শ্লেষ্মবাতজনিতজ্বরলিঙ্গম্||২৫||

স০-তাপহান্যাদি শ্লেষ্মবাতকৃতস্য জ্বরস্য লিঙ্গম্| তাপহানিঃ-তাপভাবঃ| বিবন্ধো-মূত্রপুরীষাদীনামপ্রবৃত্তিঃ| স্বাগতাবৃত্তম্|

Adhikarana pittaSleShmajvaralakShaNam (26) · Śloka 26

অধুনা কফপিত্তসংসর্গজ্বরং লক্ষযতি শীতস্তম্ভস্বেদদাহাব্যবস্থা তৃষ্ণাকাসশ্লেষ্মপিত্তপ্রবৃত্তিঃ| মোহস্তন্দ্রালিপ্ততিক্তাস্যতা চ জ্ঞেযং রূপং শ্লেষ্মপিত্তজ্বরস্য||২৬||

স০-শীতাদীনামব্যবস্থা-অনিযমঃ| তথা, তৃষ্ণাপ্রবৃত্ত্যাদিকং চ শ্লেষ্মপিত্তজ্বরস্য রূপং জ্ঞেযং-বেদ্যম্| শালিনীবৃত্তম্| অথ, দ্বিদোষজানাং জ্বরাণাং কিমাগমাপগমবৈষম্যাদীনাং ক্রমেণোত্পত্তিঃ ? যুগপত্সর্বশরীরপ্রাপ্ত্যা বা ? ইত্যত্র সংশযঃ| তত্র সংসর্গজত্বাদেককালং দ্বযোরপি পক্ষযোঃ সম্ভবো যুক্তঃ| কিন্ত্বেতযোঃ পক্ষযোর্বিরোধাদ্যুগপদসম্ভব ইতি| অত্রোচ্যতে| যদি সংসর্গজে জ্বরে বলবান্ বাযুঃ স্যাত্ তদা আগমাপগমবৈষম্যাদিনা ক্রমেণ, অথ পিত্তস্য বলীযস্ত্বং তদা যুগপত্সর্বশরীরব্যাপ্তিক্রমেণ জ্বরো ভবতি| সমৌ যদা দ্বাবপি ভবতঃ, তদাঽপি যস্য দেশকালাদিনা বললাভস্তদা তস্যৈবোত্পত্তিক্রমেণ জ্বরো ভবতি| সন্নিপাতে তু যুগপদেব শরীরব্যাপ্তিক্ ২ঃ|

Adhikarana sannipAtajvaralakShaNam (27-33) · Śloka 33

অথ সন্নিপাতজ্বরস্য লক্ষণমাহ সর্বজো লক্ষণৈঃ সর্বৈর্দাহোঽত্র চ মুহুর্মুহুঃ| তদ্বচ্ছীতং মহানিদ্রা দিবা জাগরণং নিশি||২৭|| সদা বা নৈব বা নিদ্রা মহাস্বেদোঽতি নৈব বা| গীতনর্তনহাস্যাদিবিকৃতেহাপ্রবর্তনম্||২৮|| সাশ্রুণী কলুষে রক্তে ভুগ্নে লুলিতপক্ষ্মণী| অক্ষিণী পিণ্ডিকাপার্শ্বমূর্দ্ধপর্বাস্থিরুগ্ভ্রমঃ||২৯|| সস্বনৌ সরুজৌ কর্ণৌ কণ্ঠঃ শূকৈরিবাচিতঃ| পরিদগ্ধা খরা জিহ্বা গুরুঃ স্রস্তাঙ্গসন্ধিতা||৩০|| রক্তপিত্তকফষ্ঠীবো লোলনং শিরসোঽতিরুক্| কোঠানাং শ্যাবরক্তানাং মণ্ডলানাং চ দর্শনম্||৩১|| হৃদ্ব্যথা মলসংসঙ্গঃ প্রবৃত্তির্বাঽল্পশোঽতি বা| স্নিগ্ধাস্যতা বলভ্রংশঃ স্বরসাদঃ প্রলাপিতা||৩২|| দোষপাকশ্চিরাত্তন্দ্রা প্রততং কণ্ঠকূজনম্| |৩৩|

স০-সর্বেভ্যো জাতো বাতপিত্তকফসমুত্থঃ-সর্বজঃ, সর্বৈর্লক্ষণৈর্যুতো ভবতি| যথা,-অত্র চ-সন্নিপাতজ্বরে, দাহো মুহুর্মুহুঃ, তদ্বত্-দাহবত্ পুনঃ পুনঃ, শীতং ভবতি| অহনি মহতী নিদ্রা| রাত্রৌ তু জাগরণম্| সদা বা-দিবসে নিশি চ, নৈব বেতি দ্বযোরপি নক্তংদিবসযোর্নিদ্রা ন ভবতি| তথা, বহুস্বেদোঽতিশযেন নৈব বা স্বেদঃ| তথা,গীতাদিকাযা বিকৃতাযা ঈহাযাঃ- চেষ্টাযাঃ, প্রবর্তনম্| তথা, নযনে সাস্রে ভবতঃ| তথা, কলুষে রক্তে তথা কুটিলে| তথা, লুলিতে পক্ষ্মণী যযোস্ত এবম্| তথা, পিণ্ডিকাদিরুক্| ভ্রমো-মোহঃ| কর্ণৌ সশব্দৌ সরুজৌ-সপীডৌ, চ| কণ্ঠঃ শূকৈঃ-কিংশারুভিরিব, ব্যাপ্তঃ| জিহ্বা পরিদগ্ধা, তথা খরা-অমৃদুঃ, তথা গুরুঃ| তথা, স্রস্তাঙ্গসন্ধিত্বম্| রক্তাদিষ্ঠীবনম্| মূর্ধ্নো লোলনং-চলনম্| তথা, অতিরুক্| কোঠানাং শ্যাবরক্তানাং মণ্ডলানাং চ দর্শনম্| নৈব বেত্যত্রাপি যোজ্যম্| তথা, হৃদি পীডা| মলানাং-মূত্রপুরীষাদীনাং, [ সংসঙ্গঃ- ] অপ্রবৃত্তিঃ| অল্পশো বা প্রবৃত্তিরতিশযেনাথবা| তথা, স্নিগ্ধাস্যতাদি ভবতি|

Adhikarana sannipAtajvarasya nAmAni (33) · Śloka 33

অথাস্য সন্নিপাতস্য নামদ্বযমাহ | সন্নিপাতমভিন্যাসং তং ব্রূযাচ্চ হৃতৌজসম্||৩৩||

স০-তং সন্নিপাতমভিন্যাসং হৃতৌজসং চ ব্রূযাত্| তত্র "ওজস্তু তেজো ধাতূনাং" (হৃ. সূ. অ. ১১|৩৭) ইত্যাদ্যোজোলক্ষণম্| হৃতমোজো যেন স হৃতৌজাঃ, তং হৃতৌজসম্|

Adhikarana asAdhyasannipAtajvaralakShaNam (34) · Śloka 34

দোষে বিবদ্ধে নষ্টেঽগ্নৌ সর্বসম্পূর্ণলক্ষণঃ| অসাধ্যঃ|৩৪|

স০- [ ননু, ] দোষে বিবদ্ধ ইত্যেকবচনমযুক্তম্| দোষাণাং হ্যত্র চ বহুত্বাদ্বহুবচনং ন্যায্যং স্যাত্| অত্রোচ্যতে| জাত্যভিপ্রাযাদদোষঃ| জাত্যাখ্যাযামেকস্য বহুত্বসিদ্ধের্দোষ ইত্যুক্তে বহুত্বং গম্যতে| যথা-নিষ্পন্নো যব ইতি| তস্মাদ্দোষে বিবদ্ধ ইতি যুক্তম্| নষ্টেঽগ্নাবিত্যসত্| সর্বজ্বরেষ্বেব হ্যগ্নিনাশস্য প্রাগভিধানাত্| তস্মাদযুক্তমেতদুচ্যতে| ন| বিশেষাভিপ্রাযাত্| কামং সর্বজ্বরেষ্বগ্নিনাশ উক্তঃ| অস্মিংস্তু সান্নিপাতিকে বিশেষেণাগ্নিনাশ ইত্যভিপ্রাযঃ| দোষে-বাতপিত্তকফমূত্রপুরীষাদিকে, বিবদ্ধে-অপ্রবৃত্তিশীলে, অগ্নৌ নষ্টে সতি, সর্বসম্পূর্ণলক্ষণঃ সন্নিপাতোঽসাধ্যঃ-সাধযিতুমশক্যঃ|

Adhikarana kRucCrasAdhyasannipAtajvaralakShaNam (34) · Śloka 34

| সোঽন্যথা কৃচ্ছ্রো ভবেদ্বৈকল্যদোঽপি বা||৩৪||

স০-অন্যথা-অসম্পূর্ণলক্ষণত্বেন, সঃ-জ্বরঃ, কৃচ্ছ্রো ভবেত্ বৈকল্যদো বা ভবেত্|

Adhikarana amiSrIBUtadoShajasannipAtajvaraH (35-36) · Śloka 36

কিমেষ এব সন্নিপাতজ্বরপ্রকারঃ সম্ভবতি ? উতান্যোঽপি সম্ভবতি ? ইত্যাহ অন্যচ্চ সন্নিপাতোত্থো যত্র পিত্তং পৃথক্ স্থিতম্| ত্বচি কোষ্ঠেঽথবা দাহং বিদধাতি পুরোঽনু বা||৩৫|| তদ্বদ্বাতকফৌ শীতং, দাহাদির্দুস্তরস্তযোঃ| |৩৬|

স০-অন্যশব্দার্থোঽন্যদিত্যযং নিপাতঃ| অপরোঽযং সন্নিপাতোত্থো জ্বরঃ| যত্র সন্নিপাতে পিত্তং বাতকফাভ্যাং পৃথক্-ভিন্নং, স্থিতং সত্ ত্বচ্যথবা কদাচিত্ কোষ্ঠে দাহং করোতি| কথম্ ? পুরোঽনু বা,-পূর্বং পশ্চাদ্বা| অথবেতি স্থানবিশেষাভিধাযিপদসমীপে শ্রূযমাণং স্থানবিশেষে বিকল্পং করোতি| পুরোঽনুবেত্যত্র কালবিশেষাভিধাযিপদসমীপে শ্রূযমাণং কালং বিকল্পযতি| তত্র চাযং বিশেষঃ-ত্বচি স্থিতং বহিরধিকং দাহং করোতি, অন্তরল্পম্| কোষ্ঠে তু স্থিতমন্তরধিকম্, বহিঃ স্বল্পমিতি| তদিত্যনেন পিত্তং পরামৃশ্যতে| [তদ্বত্- ] পিত্তেন তুল্যম্| যথা,-পিত্তং পৃথক্ স্থিতং ত্বচি কোষ্ঠেঽথবা দাহং করোতি পুরোঽনু বা, তথৈব বাতকফৌ ত্বচি কোষ্ঠেঽথবা পুরোঽনু বা শীতং বিদধতঃ, ইতি দ্বিবিধোঽযং সন্নিপাতঃ| তযোঃ-শীতাদিদাহাদ্যোঃ সন্নিপাতযোর্মধ্যে, যো দাহাদিঃ সন্নিপাতঃ স দুস্তরঃ-কৃচ্ছ্রসাধ্য ইত্যর্থঃ| কেচিত্তু শীতাদিঃ শীতার্তো দাহাদির্দাহার্ত ইতি দ্বিধা (চতুর্ধা) সন্নিপাতং সমগিরন্|

Adhikarana SItAdisannipAtajvaralakShaNam (36-37) · Śloka 37

ননু, অস্মিন্ শীতাদৌ দাহাদৌ চ জ্বরে কো বিশেষঃ ? ইত্যাহ | শীতাদৌ তত্র পিত্তেন কফে স্যন্দিতশোষিতে||৩৬|| শীতে শান্তেঽম্লকো মূর্চ্ছা মদস্তৃষ্ণা চ জাযতে| |৩৭|

স০-শীতাদৌ তত্র-তস্মিন্ সন্নিপাতে, পিত্তেন কর্ত্রা কফে স্যন্দিতে-স্রাবিতে, শোষিতে চ গ্রীষ্ম ইব খরদিনকরকরতাপেন হিম ইব, তথা শীতে শান্তে চার্থাদ্দাহ উপজাযতে| অম্লকাদযশ্চ চত্বারঃ স্যুঃ| পিত্তেনেতি কর্তরি তৃতীযা| অত এব চ বলবত্ত্বেন প্রাধান্যাত্ কফং স্রাবযতি শোষযতি চেতি| অম্লোদ্গিরণং-অম্লকঃ|

Adhikarana dAhAdisannipAtajvaralakShaNam (37) · Śloka 37

| দাহাদৌ পুনরন্তে স্যুস্তন্দ্রাষ্ঠীববমিক্লমাঃ||৩৭||

স০-দাহ আদির্যস্মিন্ স দাহাদিঃ| শীতাবসান ইত্যর্থাদ্গম্যতে| দাহাদৌ চ সন্নিপাতেঽস্য দাহস্যান্তে-অবসানে, তন্দ্রাদযো ভবন্তি| দাহকারিপিত্তস্যন্দিতেনৈব কফেন শমিতে পিত্তে কফোদ্রেকাদেব কফজাস্তন্দ্রাদযো ভবন্তি|

Adhikarana AgantujvaraBedAH (38) · Śloka 38

আগন্তুরভিঘাতাভিষঙ্গশাপাভিচারতঃ| চতুর্ধা|৩৮|

স০-আগন্তুজ্বরশ্চতুর্ধা ভবতি, অভিঘাতজোঽভিষঙ্গজোঽভিশাপজোঽভিচারজশ্চ|

Adhikarana abhighAtajAgantujvarabhedau (38-39) · Śloka 39

| অত্র ক্ষতচ্ছেদদাহাদ্যৈরভিঘাতজঃ||৩৮|| শ্রমাচ্চ| |৩৯|

স০-অত্র-অস্মিন্নাগন্তৌ জ্বরে, অভিঘাতজো যো জ্বরঃ স ক্ষতচ্ছেদাদ্যৈঃ-শস্ত্রপ্রহারাদ্যৈঃ, জাযতে| তথা, শ্রমাচ্চ-অধ্বাদিকৃতাদাযাসাচ্চ|

Adhikarana tasya dvividhasya lakShaNam (39) · Śloka 39

তস্মিন্পবনঃ প্রাযো রক্তং প্রদূষযন্| সব্যথাশোফবৈবর্ণ্যং, সরুজং কুরুতে জ্বরম্||৩৯||

স০-তস্মিন্-অভিঘাতজে জ্বরে, প্রাযো-বাহুল্যেন, পবনো-বাযুঃ, জ্বরং কুরুতে| কিং কুর্বন্ ? রক্তং প্রদূষযন্| কীদৃশং জ্বরম্ ? সব্যথেত্যাদি| ব্যথাদিযুক্তং তথা সরুজম্| প্রাযোগ্রহণং ক্বচিদভিঘাতজেঽন্যোঽপি দোষঃ কুপ্যতি, বাহুল্যেন তু বাযুরিতি দ্যোতযতি|

Adhikarana abhiSha~ggajAgantujvarabhedAH (40) · Śloka 40

গ্রহাবেশৌষধিবিষক্রোধাভিশোককামজঃ| অভিষঙ্গাত্|৪০|

স০-গ্রহাদিজো জ্বরোঽভিষঙ্গাদ্ভবতি|

Adhikarana grahAveSajalakShaNam (40) · Śloka 40

ইদানীং গ্রহোত্পন্নস্য লিঙ্গমাহ | গ্রহেণাস্মিন্নকস্মাদ্ধাসরোদনে||৪০||

স০-গ্রহেণ-দেবদানবাদিনাঽষ্টাদশভেদভিন্নেন, যো জ্বরো ভবতি, অস্মিন্-জ্বরে, অকস্মাত্-নির্নিমিত্তমেব, হাসরোদনে ভবতঃ|

Adhikarana oShadhijalakShaNam (41) · Śloka 41

ওষধীগন্ধজে মূর্চ্ছা শিরোরুগ্বমথুঃ ক্ষবঃ| |৪১|

স০-বিষৌষধীপুষ্পগন্ধেন বাযুনোপনীতেন যো জ্বরস্তস্মিন্ মূর্চ্ছাদযো জাযন্তে|

Adhikarana viShajalakShaNam (41) · Śloka 41

| বিষান্মূর্চ্ছাতিসারাস্যশ্যাবতাদাহহৃদ্গদাঃ||৪১||

স০-বিষাজ্জাতে তস্মিন্ জ্বরে মূর্চ্ছাদযো জাযন্তে| আস্যশ্যাবতা-কৃষ্ণমুখত্বম্| হৃদ্গদো-হৃদযে পীডা|

Adhikarana krodhajalakShaNam (42) · Śloka 42

ক্রোধাত্কম্পঃ শিরোরুক্ চ| |৪২|

স০-ক্রোধাত্-কোপাত্, সঞ্জাতে জ্বরে কম্পো-বেপথুর্জাযতে| তথা, শিরোরুক্-শিরোর্তিশ্চ|

Adhikarana bhayashokajalakShaNam (42) · Śloka 42

প্রলাপো ভযশোকজে| |৪২|

স০-ভযশোকজে জ্বরে প্রলাপঃ|

Adhikarana kAmajalakShaNam (42) · Śloka 42

| কামাদ্ভ্রমোঽরুচির্দাহো হ্রীনিদ্রাধীধৃতিক্ষযঃ||৪২||

স০-কামাদুদ্ভূতে জ্বরে ভ্রমাদযো ভবন্তি| হ্রীঃ-লজ্জা, নিদ্রা-স্বপ্নঃ, ধীঃ-বুদ্ধিঃ, ধৃতিঃ-ধৈর্যম্, তেষাং [ ক্ষযো ]-বিঘাতঃ|

Adhikarana abhiSha~ggajAnAM doShAnubandhaH (43) · Śloka 43

গ্রহাদৌ সন্নিপাতস্য ভযাদৌ মরুতস্ত্রযে| কোপঃ কোপেঽপি পিত্তস্য|৪৩|

স০-গ্রহাদৌ ত্রযে-জ্বরে গ্রহাবেশৌষধিবিষজে, সন্নিপাতস্য কোপঃ| ভযাদৌ ত্রযে-ভীশোককামজে জ্বরে, মারুতস্য কোপঃ| কোপে পিত্তস্য [ কোপঃ ]| অপিশব্দাদ্বাতস্যাপি কোপ ইতি|

Adhikarana shApAbhicArajayorlakShaNam (43-44) · Śloka 44

| যৌ তু শাপাভিচারজৌ||৪৩|| সন্নিপাতজ্বরৌ ঘোরৌ তাবসহ্যতমৌ মতৌ| |৪৪|

স০-তমশব্দেনৈতদ্দর্শযতি,-অন্যেঽপি যে সন্নিপাতজ্বরাস্তেঽপ্যসহ্যাঃ-সোঢুমশক্যাঃ, এতৌ পুনঃ শাপাভিচারজাবতিশযেন সোঢুমশক্যাবিতি|

Adhikarana abhicArajasya visheShaH (44-45) · Śloka 45

| তত্রাভিচারিকৈর্মন্ত্রৈর্হূযমানস্য তপ্যতে||৪৪|| পূর্বং চেতস্ততো দেহস্ততো বিস্ফোটতৃড্ভ্রমৈঃ| সদাহমূর্চ্ছৈর্গ্রস্তস্য প্রত্যহং বর্দ্ধতে জ্বরঃ||৪৫||

স০-অভিচারিকৈর্মন্ত্রৈঃ-অথর্ববেদাদ্যুপদিষ্টৈঃ, হূযমানস্য পুংসঃ, যন্নামোদ্দেশেন হবিঃপ্রক্ষেপঃ স হূযমান উচ্যতে, অভিচারমধিকৃত্য প্রণীত ইতি "প্রাগ্বহতেষ্ঠক্" ইতি ঠক্| হূযমানস্য পুংসঃ প্রথমং চেতস্তপ্যতে-সদুঃখং জাযতে| ততঃ-অনন্তরং, দেহঃ-শরীরম্, তপ্যতে-সজ্বরং সম্পদ্যতে| ততঃ-অনন্তরং, বিস্ফোটতৃড্ভ্রমৈর্দাহমূর্চ্ছাযুতৈর্গ্রস্তস্য-আক্রান্তস্য, প্রত্যহং জ্বরো বর্দ্ধতে-জ্বরস্যাধিক্যং ভবতি| তনবঃ স্ফোটা এব বিস্ফোটা ভণ্যন্তে|

Adhikarana aShTavidhajvaropasaMhAraH (46) · Śloka 46

ইতি জ্বরোঽষ্টধা দৃষ্টঃ| |৪৬|

স০-ইতি-পূর্বোক্তেন প্রকারেণ নিজঃ সপ্তপ্রকার আগন্তুশ্চেতি, অষ্টপ্রকারো জ্বরো দৃষ্টঃ, মুনীন্দ্রৈরিতি শেষঃ|

Adhikarana aShTAnAM jvarANAM pratyekaM dvaividhyaShaTkam (46-47) · Śloka 47

সমাসাদ্দ্বিবিধস্তু সঃ| শারীরো মানসঃ সৌম্যস্তীক্ষ্ণোঽন্তর্বহিরাশ্রযঃ||৪৬|| প্রাকৃতো বৈকৃতঃ সাধ্যোঽসাধ্যঃ সামো নিরামকঃ| |৪৭|

স০-তুর্বিশেষে| সমাসাত্-সঙ্ক্ষেপাত্, তু-পুনঃ, সঃ-জ্বরো, দ্বিবিধঃ| তদেব দ্বৈবিধ্যমাহ-শারীরো মানস ইত্যেকং দ্বিকম্| সৌম্যস্তীক্ষ্ণ ইতি দ্বিতীযম্| অন্তরাশ্রযো বহিরাশ্রয ইতি তৃতীযম্| প্রাকৃতো বৈকৃত ইতি চতুর্থম্| সাধ্যোঽসাধ্য ইতি পঞ্চমম্| সামো নিরাম ইতি ষষ্ঠম্| ইতি দ্বৈবিধ্যমেষাং দ্বিকানাম্|

Adhikarana shArIrasya lakShaNam, mAnasasya lakShaNam (47) · Śloka 47

সম্প্রত্যেতানেব জ্বরান্ ব্যাচষ্টে | পূর্বং শরীরে শারীরে তাপো, মনসি মানসে||৪৭||

স০-শারীরে জ্বরে প্রথমং শরীরে তাপো ভবতি, পশ্চান্মনসীতি পূর্বশব্দস্য সম্বন্ধিশব্দত্বাদ্গম্যতে| এবং মানসে জ্বরে পূর্বং মনসি তাপো-দুঃখম্, পশ্চাদ্দেহে তাপঃ-পীডাবিশেষো জাযতে|

Adhikarana saumyasya lakShaNam (96)) · Śloka 48

ইদানীং সৌম্যতীক্ষ্ণৌ ব্যাচষ্টে- পবনে যোগবাহিত্বাচ্ছীতং শ্লেষ্মযুতে ভবেত্| |৪৮|

স০-পবনে শ্লেষ্মযুতে যোগবাহিত্বাদ্ধেতোঃ শীতং ভবেত্| তস্মাদ্বাত শ্লেষ্মজ্বরঃ সৌম্য ইতি বোধ্যম্| শ্লেষ্মা হি "সোমঃ" ইতি প্রাগুক্তম্ (হৃ. শা. অ. ৩|৯৬)|

Adhikarana tIkShNasya lakShaNam (48) · Śloka 48

তীক্ষ্ণমিদানীং বক্তি | দাহঃ পিত্তযুতে, মিশ্রং মিশ্রে|৪৮|

স০-দাহঃ পিত্তসম্বন্ধে পবনে যোগবাহিত্বাদ্ভবেত্| ইত্যেবং মিশ্রে-পিত্তশ্লেষ্মযুতে পবনে, যোগবাহিত্বাচ্চ পবনস্য মিশ্রং-দাহশীতং ভবেত্, মুহুর্দাহো মুহুঃ শীতমিতি| তদযং সৌম্যতীক্ষ্ণব্যামিশ্রস্তৃতীযো জ্বর ইতি বেদ্যম্| সৌম্যস্তীক্ষ্ণ ইতি দ্বৈবিধ্যকথনং তু সমাসাদিতি মন্তব্যম্| যোগং বহতি তচ্ছীলো যোগবাহি, যেন যেন যুক্তো ভবতি তস্য তস্য স্বভাবং ভজত ইত্যর্থঃ| এবং চ সতি স্বযং নোষ্ণো ন চ শীতো বাযুরিত্যভ্যুপগতম্| তদেবমিহ যোগবাহিত্বাত্ কফেন যুক্তে বাযৌ শীতং ভবেদিত্যুক্তম্, অসৌ বাযুঃ শীতং করোতীত্যর্থঃ| পিত্তযুক্তেঽস্মিন্ দাহো ভবেত্, অসৌ দাহং করোতীতি| এবং স্বযং নোষ্ণো ন শীত ইত্যবতিষ্ঠতে| "তত্র রূক্ষো লঘুঃ শীতঃ " ইত্যত্র চ শীত ইত্যুচ্যতে| তদিমে বচসী পরস্পরং ব্যাজঘ্নাতে| নৈবম্| "তত্র রূক্ষো লঘু শীতঃ খরঃ সূক্ষ্মশ্চলোঽনিলঃ|" (হৃ. সূ. অ. ১|১১) ইত্যত্রৈবাযমর্থস্তথা ব্যাখ্যাতো যথা ন পূর্বাপরব্যাহতত্বং ভবেত্| তেনেহ পুনর্ন প্রতন্যতে|

Adhikarana antarAshrayasya lakShaNam (48-49) · Śloka 49

| অন্তঃসংশ্রযে পুনঃ||৪৮|| জ্বরেঽধিকং বিকারাঃ স্যুরন্তঃ ক্ষোভো মলগ্রহঃ| |৪৯|

স০-অন্তরাশ্রযে তু জ্বরেঽধিকং কৃত্বাঽন্তর্বিকারাঃ স্যুঃ, ন বহিরেব| তথা, ক্ষোভঃ-তীব্রদাহত্বম্| মলানাং-মূত্রপুরীষাদীনাং, গ্রহো-বিবন্ধঃ|

Adhikarana bahirAshrayasya lakShaNam (49) · Śloka 49

| বহিরেব বহির্বর্গে তাপোঽপি চ সুসাধ্যতা||৪৯||

স০-বহির্বর্গে তু বহিরেব তাপঃ, ন ত্বন্তরে| অপিচেত্যন্তঃ-ক্ষোভমলগ্রহাবপ্যত্র ন স্ত ইতি সমুচ্চিনোতি| তত্র চ বহির্বেগেঽত এব সুসাধ্যতা-সুখসাধ্যত্বং, ভবতি| অন্তরাশ্রযে তু দুঃসাধ্যতেত্যর্থাদুক্তং ভবতি|

Adhikarana prAkRutasya lakShaNam, vaikRutasya lakShaNam (50) · Śloka 50

সম্প্রতি প্রাকৃতবৈকৃতৌ লক্ষযতি - - - - বর্ষাশরদ্বসন্তেষু বাতাদ্যৈঃ প্রাকৃতঃ ক্রমাত্| বৈকৃতোঽন্যঃ স দুঃসাধ্যঃ প্রাযশ্চ প্রাকৃতোঽনিলাত্||৫০||

স০- বর্ষাদিষু ত্রিষু ঋতুষু যথাক্রমং বাতাদ্যৈস্ত্রিভির্দোষৈর্যো জ্বরো জাযতে স প্রাকৃতঃ| বর্ষাসু বাতজ্বরঃ প্রাকৃতঃ, শরদি পিত্তজ্বরো, বসন্তে কফজ্বরঃ, ইতি পরিভাষ্যতে| অত এব বাতপ্রকৃতেন যো জ্বরঃ, পিত্তপ্রকৃতেঃ পিত্তেন, শ্লেষ্মপ্রকৃতেঃ শ্লেষ্মণেতি, স প্রকৃতিভবত্বেন প্রাকৃত ইত্যুচ্যতে| বৈকৃতোঽন্য ইতি| যো জ্বরো বর্ষাদিভ্য ঋতুভ্যোঽন্যত্র কালে জাতো বর্ষাদিষ্বপি বা ন যথাক্রমং বাতাদ্যৈর্জনিতঃ, স যথোক্তপ্রাকৃতলক্ষণাদন্যঃ, স বৈকৃত উচ্যতে| স চ দুঃসাধ্যঃ-কৃচ্ছ্রসাধ্যঃ| প্রাকৃতস্তু সুসাধ্য ইত্যর্থাদ্গম্যতে| প্রায ইত্যাদি| প্রাযো-বাহুল্যেন, প্রাকৃতোঽপি যো জ্বরোঽনিলাজ্জাযতে সোঽপি দুঃসাধ্যঃ| প্রাযোগ্রহণেনৈতদ্ দ্যোতযতি| কদাচিদ্দৈবানুকূলত্বাত্সুসাধ্য এব ভবতি| ননু, বর্ষাস্ব(শরদ্য)পি প্রাকৃতোঽপি জ্বরো যথা বিকৃতিবিজ্ঞানীযে কথিতস্তথাঽসাধ্য এব| "জ্বরো নিহন্তি বলবান্" (হৃ. শা. অ. ৫|৭১) ইত্যাদি| তদেতত্পূর্বাপরব্যাহতমিব দৃশ্যতে| নৈবম্| অনযোর্বচসোঃ সামান্যবিশেষরূপত্বাত্| তথা চেহ সামান্যেনোক্তম্, বিকৃতিবিজ্ঞানীযে তু বিশেষেণেতি| এতদেব চ স্ফুটীকর্তুং বক্ষ্যতি (শ্লো. ৫৩)- "বিকৃতিজ্ঞানে প্রাগসাধ্য উদাহৃতঃ|" ইতি|

Adhikarana viruddhAviruddhopakramaj~jAnArthaM prAkRutAnAM saMprAptiH (51-52) · Śloka 52

সম্প্রতি বর্ষাসু প্রাকৃতস্য জ্বরস্য স্বরূপং নিরূপযতি - - - - - বর্ষাসু মারুতো দুষ্টঃ পিত্তশ্লেষ্মান্বিতো জ্বরম্| কুর্যাত্ পিত্তং চ শরদি তস্য চানুবলং কফঃ||৫১|| তত্প্রকৃত্যা বিসর্গাচ্চ তত্র নানশনাদ্ভযম্| কফো বসন্তে তমপি বাতপিত্তং ভবেদনু||৫২||

স০-প্রাবৃষি পবনঃ [ দুষ্টঃ- ] কুপিতঃ, পিত্তশ্লেষ্মযুতো জ্বরং কুর্যাত্| প্রাবৃষি প্রাকৃতো জ্বরো বাতপ্রধানঃ পিত্তশ্লেষ্মাণৌ ত্বনুবলত্বেন বাতস্য স্থিতৌ, ন তু সন্নিপাত ইব স্বযং জ্বরকারকাবিত্যর্থঃ| সাম্প্রতং শরদি প্রাকৃতস্য জ্বরস্য দোষবলাবলং লক্ষযতি-পিত্তং চেত্যাদি| পিত্তং শরদি [ দুষ্টং ] প্রাকৃতং জ্বরং কুর্যাদিত্যনুবর্ততে| প্রাবৃট্সঞ্চিতস্য পিত্তস্য তদা কোপসদ্ভাবাত্| তস্য চ পিত্তস্যানুবলং-অনুবন্ধি বলং, কফঃ| অনুবলমিবানুবলম্| যথা,-কস্যচিত্ স্বতন্ত্রস্য রাজ্ঞো গজতুরগরথপুরুষাদিবলবতো বৈরিভিঃ সহ যুধ্যমানস্য পশ্চাদন্যদ্বলং তচ্ছক্তেরনুবৃংহণার্থমাগচ্ছতি, এবং স্বতন্ত্রস্য পিত্তস্য জ্বরং কুর্বতো বলোপবৃংহণং শরদি কফঃ করোতি| তত্প্রকৃত্যেতি তচ্ছব্দেন বর্ষাশরদুদ্ভূতৌ মারুতজ্বরপিত্তজ্বরৌ পরামৃশ্যেতে| তযোঃ প্রকৃতিস্তত্প্রকৃতিঃ, তযা তত্প্রকৃত্যা,- তত্স্বভাবেন, তত্র-প্রাকৃতে জ্বরে, অনশনাত্-লঙ্ঘনাত্, ভযং ন 'ভবতি' ইতি শেষঃ| বিসর্গাচ্চ বর্ষাশরদুপলক্ষিতো হি কালো বিসর্গঃ সৌম্যস্বভাবঃ, অস্মাচ্চ কারণাত্তস্মিন্কালে জ্বর উত্পন্নে লঙ্ঘনাত্ প্রত্যবাযশঙ্কা তথা ন ভবতি, যথাঽন্যস্মিন্ কালে জ্বর আদানকালস্বভাবাদ্বাতপিত্তানুবলত্বাচ্চানশনাদ্ভযং ভবতীত্যর্থঃ| বসন্তকালে কফো দুষ্টো জ্বরং কুর্যাদিতি বর্ততে| তং চ কফমনু বাতপিত্তং ভবেত্, বাতপিত্তে তস্যানুবলে ভবত ইত্যর্থঃ| ননু, অত্র সাক্ষাত্কফস্য কর্তৃত্বমুচ্যতে| কফশ্চ সৌম্যস্বভাবঃ| তস্মাদত্র নানশনাদ্ভযমিতি| তচ্চাযুক্তম্| তথাহি-বর্ষাশরদোঃ শ্লেষ্মানুবলত্বং কালশ্চ বিসর্গাখ্য ইতি কারণদ্বযসদ্ভাবাদ্ধাত্বপচযো ন সম্ভাব্যত এব| বসন্তে তু কালস্যাগ্নেযত্বাদ্বাতপিত্তানুবলত্বাচ্চাবশ্যংভাবী ধাত্বপচয এব| তস্মাদ্বসন্তেঽনশনাদ্ভযং শঙ্ক্যতে| কেচিত্তু জ্বরস্যামাশযসমুত্থত্বাত্ কফোত্থত্বাচ্চাত্রাপি কিঞ্চিন্মাত্রমনশনাদ্ভযং নাশঙ্ক্যত এবেত্যাহুঃ|

Adhikarana sAdhyalakShaNam (53) · Śloka 53

অথ সাধ্যাসাধ্যজ্বরলক্ষণার্থমাহ - - - - বলবত্স্বল্পদোষেষু জ্বরঃ সাধ্যোঽনুপদ্রবঃ| |৫৩|

স০-বলবস্তু নরেষু যৌবনাদিসম্পত্ত্যা তথাঽল্পদোষেষু যো জ্বরো জাযতে, উপদ্রবেণ-কাসাদিনা রহিতঃ, স সাধ্যঃ-সাধযিতুং শক্যঃ|

Adhikarana asAdhyalakShaNam (53) · Śloka 53

| সর্বথা বিকৃতিজ্ঞানে প্রাগসাধ্য উদাহৃতঃ||৫৩||

স০-সর্বথেতি যাদৃশস্যাতুরস্য যাদৃশো জ্বরোঽসাধ্যো ভবতি তাদৃশো, বিকৃতিবিজ্ঞানীযে শারীরে (অ. ৫|৭১)- "জ্বরো নিহন্তি বলবান্" ইত্যাদিনা গ্রন্থেন প্রাক্-পূর্বমুক্তঃ|

Adhikarana sAmajvaralakShaNam (54) · Śloka 54

অধুনা সামনিরামৌ জ্বরো লক্ষযতি - - - - জ্বরোপদ্রবতীক্ষ্ণত্বমগ্লানির্বহুমূত্রতা| ন প্রবৃত্তির্ন বিড্জীর্ণা ন ক্ষুত্সামজ্বরাকৃতিঃ||৫৪||

স০-জ্বরস্যোপদ্রবাঃ-প্রলাপভ্রমাদযঃ, তেষাং তীক্ষ্ণত্বং-তীব্রতা| তথা, বহুমূত্রত্বম্| তথা, ন প্রবৃত্তিঃ-ন পুরীষস্য প্রবর্তনম্| বিট্প্রবৃত্তাবপি হি প্রবৃত্তিশব্দঃ প্রসিদ্ধঃ| যথাঽনন্তরমধুনৈবাধীতম্ (শ্লো. ৩২)- "প্রবৃত্তির্বাঽল্পশোঽতি বা|" ইতি| অথ চেদ্বিট্ প্রবর্ততে সা ন জীর্ণা-পক্বা ন ভবতি| তথা, ন ক্ষুত্-ন বুভুক্ষা| ইযমশেষা লিঙ্গসংহতিঃ সামজ্বরাকৃতিঃ-সামজ্বরস্য লক্ষণম্| সহামেন বর্ততে যো জ্বরঃ স সামজ্বরঃ, তস্যাকৃতিঃ| "ঊষ্মণোঽল্পবলত্বেন" (হৃ. সূ. অ. ১৩|২৫) ইত্যাদ্যামলক্ষণম্|

Adhikarana pacyamAnajvaralakShaNam (55) · Śloka 55

জ্বরবেগোঽধিকং তৃষ্ণা প্রলাপঃ শ্বসনং ভ্রমঃ| মলপ্রবৃত্তিরুত্ক্লেশঃ পচ্যমানস্য লক্ষণম্||৫৫||

স০-অতিশযেন জ্বরবেগস্তৃষ্ণাদযশ্চেতি পচ্যমানজ্বরস্য লক্ষণম্| পচ্যমানজ্বরস্য চ দ্বিকেষ্বনির্দিষ্টস্যাপীহ কথনমতা(মামা)ন্তরীযকত্বাত্| তথা হি-যাবত্পচ্যমানাবস্থা ন ভবতি তাবত্কথং নিরামাবস্থা স্যাত্ ? তস্মাদ্যুক্তঃ পচ্যমানজ্বরস্য নির্দেশঃ|

Adhikarana nirAmajvaralakShaNam (56) · Śloka 56

জীর্ণতাঽঽমবিপর্যাসাত্সপ্তরাত্রং চ লঙ্ঘনাত্| |৫৬|

স০-আমশব্দেনাত্র সামজ্বরলক্ষণমুপলক্ষ্যতে| তেন সামজ্বরোক্তলক্ষণবিপর্যাসাত্ জ্বরস্য জীর্ণতা বেদ্যেতি বোধ্যম্| যথা-জ্বরোপদ্রবমৃদুত্বং গ্লানিরল্পমূত্রতা পক্ববিট্প্রবৃত্তিঃ ক্ষুদুপগমনমিতি, এবংরূপো বিপর্যাসঃ| তথা, "জ্বরবেগোঽধিকং" ইত্যাদিপচ্যমানজ্বরাকৃতেশ্চ বিপর্যাসাত্ জীর্ণতা-পক্বতা, লক্ষযিতব্যা| তথা হি-পচ্যমানতাযামপি সামতা সম্ভাব্যত এব| তথা, সপ্তরাত্রং চ লঙ্ঘনাত্| সপ্তরাত্রমিতি সপ্তানাং রাত্রীণাং সমাহার ইত্যচ্ সমাসান্তঃ, অত্যন্তসংযোগে দ্বিতীযা| তেনাযমর্থঃ,-সপ্তরাত্রীর্লঙ্ঘযিত্বা-অতিবাহ্য, ততোঽনন্তরং যঃ কালোঽষ্টমদিনাদিস্তদা জ্বরস্য জীর্ণতা-নিরামতেতি| তথা চ মুনিঃ (চ. চি. অ. ৩|২৭২)- "সপ্তাহেন তু পচ্যন্তে সপ্তধাতুগতা মলাঃ| নিরামশ্চাপ্যতঃ প্রোক্তো জ্বরঃ প্রাযোঽষ্টমেঽহনি||" ইতি| ননু, এবংসতি সপ্তরাত্রাতিপ্রবৃত্তিরেব নিরামজ্বরলিঙ্গমস্তু, "জীর্ণতাঽঽমবিপর্যাসাত্" ইত্যনেন নার্থঃ| অস্ত্যেবৈতত্| কিন্তু সন্নিপাতজ্বরে বহুনা কালেন মলপাকো ভবতি| তস্মাত্তল্লক্ষণার্থং "জীর্ণতাঽঽমবিপর্যাসাত্" ইত্যপ্যুক্তম্| যদ্যেবং "জীর্ণতাঽঽমবিপর্যাসাত্" ইত্যস্তু, কিং "সপ্তরাত্রং চ লঙ্ঘনাত্" ইত্যনেন ? অপি চ ত্রিদোষজে জ্বরে সপ্তরাত্রাতিক্রমলক্ষণং লিঙ্গং নোপযুজ্যতে| তত্র হ্যেবং পঠ্যতে (শ্লো. ৬১)- "বাতপিত্তকফৈঃ সপ্ত দশ দ্বাদশ" ইত্যারভ্য যাবত্ "শুধ্দ্যশুধ্দ্যৌ জ্বরঃ কালং দীর্ঘমপ্যনুবর্ততে||" ইতি| তস্মাত্ "সপ্তরাত্রং চ লঙ্ঘনাত্" ইত্যবাচ্যম্| অত্রোচ্যতে| অল্পদোষো যো জ্বরস্তস্যামবিপর্যাসাত্ সপ্তাহাদর্বাগপি জীর্ণতোচ্যতে| যস্তু বহুদোষো জ্বরস্তস্য তু কৃতসপ্তলঙ্ঘনস্য জীর্ণতোচ্যতে| ইতি লক্ষণদ্বযেন প্রত্যপাদি| অত এব চ তত্র পথ্যমনুজজ্ঞে| বক্ষ্যতি হি (হৃ. চি. অ. ১|৩৮)- "ইত্যযং ষডহো নেযো বলং দোষং চ রক্ষতা| ততঃ পক্বেষু দোষেষু লঙ্ঘনাদ্যৈঃ প্রশস্যতে|| কষাযো দোষশেষস্য" ইত্যাদি| তস্মাদেতযোর্লক্ষণযোর্দ্বযোরপ্যুপাদানং ন্যায্যমিতি স্থিতম্| খরনাদেনাপ্যেবমবাদি-"ন চ নিঃসপ্ততৈবেহ নিরামজ্বরকারণম্| চিরাদপি হি পচ্যন্তে সন্নিপাতজ্বরে মলাঃ|| সপ্তরাত্রাতিবৃত্তিশ্চ ক্ষামতাদি চ লক্ষণম্| তস্মাত্তদুভযং দৃষ্ট্বা নিরামং জ্বরমাদিশেত্||" ইতি| জীর্ণঃ পক্বঃ পুরাণ ইতি পর্যাযাঃ|

Adhikarana uktAnAM jvarANAM pRuthak pa~jcavidhatvam (56-57) · Śloka 57

| জ্বরঃ পঞ্চবিধঃ প্রোক্তো মলকালবলাবলাত্||৫৬|| প্রাযশঃ সন্নিপাতেন ভূযসা তূপদিশ্যতে| সন্ততঃ সততোঽন্যেদ্যুস্তৃতীযকচতুর্থকৌ||৫৭||

স০-পঞ্চপ্রকারো জ্বরো বক্ষ্যমাণঃ সন্ততাদিভির্ভেদৈঃ প্রোক্তো, 'মুনীন্দ্রৈঃ' ইতি শেষঃ| কুতঃ ? মলেত্যাদি| মলো-বাতাদিঃ| কালঃ-পূর্বাহ্ণাদিঃ| বলং চ বলং চ বলমিত্যেকশেষঃ, বলং চাবলং চ বলাবলম্, কালে বলাবলং কালবলাবলম্, সপ্তমীতি যোগবিভাগাত্ সমাসঃ, মলানাং কালবলাবলং মলকালবলাবলম্, তস্মাত্| দ্বিবলশব্দোঽত্র নির্দিষ্টো দ্বিবিধসম্বন্ধার্থঃ| কোঽসৌ দ্বিবিধঃ সম্বন্ধঃ ? ইতি চেত্ ব্রূমঃ| জ্বরঃ পঞ্চবিধঃ কথিতো মলকালবলাত্ তথা মলকালবলাবলাত্| তদযমত্রার্থঃ,-সন্ততো জ্বরো মলকালবলাদুক্তঃ| তথা চানন্তরমেব সন্ততলক্ষণং বক্ষ্যতি (শ্লো. ৫৮-৫৯)- "মলাবলিনো গুরবঃ স্তব্ধাঃ সন্ততং নিষ্প্রতিদ্বন্দ্বা জ্বরং কুর্যুঃ|" ইতি| তস্মাদ্বলবন্ত এব দোষাঃ সন্ততং জ্বরং কুর্বন্তি| বিষমজ্বরাশ্চত্বারো মলকালবলাবলাদ্ভবন্তি| তথা চ বিষমজ্বরলক্ষণেঽধুনৈবাধ্যেষ্যতে (শ্লো. ৬৪)- "অল্পোঽপি দোষো দূষ্যাদের্লব্ধ্বাঽন্যতমতো বলম্| সবিপক্ষো জ্বরং কুর্যাদ্বিষমং ক্ষযবৃদ্ধিভাক্||" ইতি| তস্মাচ্চতুষ্প্রকারোঽপি বিষমজ্বরো মলকালবলাবলাদ্ভবতি| খরনাদেনাপ্যুক্তম্-"বলিভিঃ সর্বগৈঃ সামৈ রসস্রোতোবিসারিভিঃ| নিষ্প্রত্যনীকৈর্দোষৈর্যঃ সন্ততো জাযতে জ্বরঃ||" ইত্যাদি| তথা তত্রৈব বিষমজ্বরে গদিতম্-"ব্যাধিক্লিষ্টস্য' ইত্যারভ্য যাবত্ "বলাবলবিশেষস্তু দোষাণাং সম্প্রবর্ততে|" ইতি| তথা তত্রৈব চোক্তম্-"ভুব্যুত্ক্রম্য যথাকালং বীজং কালে প্রসূযতে| তথা কালক্রমাদ্দোষঃ কালে জ্বরকারো ভবেত্||" ইতি| প্রাযশ ইত্যাদি| বাহুল্যেনাযং সন্ততাদিজ্বরঃ সন্নিপাতাদ্ভবতি| [ ননু, ] অত্র সন্নিপাতেনেত্যসাধু| ন হ্যন্যঃ কশ্চিত্সন্ততাদিব্যতিরিক্তো জ্বরোঽস্তি যমেকদোষজং দ্বিদোষজং বা পরিকল্পযেদিতি, তস্মাদসদেতত্| উচ্যতে| সমর্যাদযা দোষগত্যা যে সন্ততাদযো জ্বরা উত্পদ্যন্তে, ত একদোষজাদয উপপদ্যন্তে| যে পুনর্বিষমসম্প্রাপ্তিসমুত্পন্নাঃ সন্ততাদযস্তে সন্নিপাতেন| ইতি প্রাযশঃ সন্নিপাতেনেতি ন্যায্যমেতত্| ননু, এবং সতি বাতিকোঽযং পৈত্তিকোঽযং শ্লৈষ্মিকোঽযমযং দ্বান্দ্বিক ইতি কথং ব্যপদেশঃ ? ইত্যাহ-ভুযসেতি| সন্নিপাতোদ্ভবেঽপ্যস্মিন্ সন্ততাদৌ ভূযান্-অধিকো দোষঃ, তদ্দোষোপলক্ষিতাং সংজ্ঞামাসাদযতীত্যর্থঃ, বাতজ্বরোঽযং পিত্তজ্বরোঽযমিত্যাদি| তুরবধারণে, ভূযসৈব দোষেণ ব্যপদেশো নান্যেনাপি| ততশ্চৈবং সন্নিপাতোত্থঃ সন্ততাদিজ্বর ইতি স্থিতম্| অত এব তন্ত্রান্তর এবং জগাদ-"সন্ততো মারুতাত্প্রাযঃ পিত্তাত্ প্রাযস্তৃতীযকঃ| অন্যেদ্যুশ্চ কফাত্প্রাযঃ সন্নিপাতাচ্চতুর্থকঃ|| সন্নিপাতকৃতত্বাত্তু দুশ্চিকিত্স্যশ্চতুর্থকঃ|" ইতি| তথা চ-"পৃষ্ঠেঽনিলকফোদ্ভূতঃ শ্লেষ্মপিত্তোদ্ভবস্ত্রিকে| শিরস্যনিলসম্ভূতো গৃহ্ণাতীহ তৃতীযকঃ|| চতুর্থকস্তু শ্লেষ্মোত্থঃ প্রতিগৃহ্ণাতি জঙ্ঘযোঃ| বাতিকঃ শিরসোঽভ্যেতি দ্বিধৈবাযং স্বভাবতঃ|| প্রস্কন্ধতস্তু বিজ্ঞেযো বিপরীতশ্চতুর্থকঃ|" ইতি| অথ তদেব পঞ্চবিধত্বমাহ-সন্ততঃ সততোঽন্যেদ্যুস্তৃতীযকচতুর্থকাবিতি| ননু, পঞ্চবিধো জ্বর ইত্যনুপপন্নম্, ষষ্ঠস্য চতুর্থকবিপর্যযস্য চ বক্ষ্যমাণত্বাত্| অত্র ব্রূমঃ| চতুর্থকান্তর্গতত্বাদদোষঃ| প্লীহোদরে যকৃদুদরবত্| তথা হি-অষ্টাবুদরাণীতি, প্লীহোদরে চ যথা যকৃদুদরস্যান্তর্ভাবাদষ্টধাত্বম্, এবং জ্বরে চতুর্থক এব চতুর্থকবিপর্যযস্যান্তর্ভাবাত্ পঞ্চধাত্বমেব জ্বরস্য সাধু|

Adhikarana santatajvaralakShaNam (58-59) · Śloka 59

অথ মহারম্ভত্বেন প্রাধান্যাত্ সন্ততসম্প্রাপ্তিমেব লক্ষযতি - - - - - - ধাতুমূত্রশকৃদ্বাহিস্রোতসাং ব্যাপিনো মলাঃ| তাপযন্তস্তনুং সর্বাং তুল্যদূষ্যাদিবর্দ্ধিতাঃ||৫৮|| বলিনো গুরবঃ স্তব্ধা বিশেষেণ রসাশ্রিতাঃ| সন্ততং নিষ্প্রতিদ্বন্দ্বা জ্বরং কুর্যুঃ সুদুঃসহম্||৫৯||

স০-মলা জ্বরং কুর্যুঃ-উত্পাদযেযুঃ| কীদৃশাঃ ? ধাত্বাদিস্রোতসাং ব্যাপিনঃ| ধাতবশ্চ মূত্রং চ শকৃচ্চ তানি বহন্তি নিত্যং যানি স্রোতাংসি তেষাং| মলা ইত্যনেনৈতদ্দ্যোতযতি| যদৈব বাতাদযো মলিনীকরণস্বভাবাঃ স্যুস্তদা সন্ততং জ্বরং কুর্যুঃ, ন তু দোষরূপা ধাতুরূপা বা| তথা, সর্বাং-অশেষাং, তনুং তাপযন্তঃ-সন্তাপাদিনা পীডযন্তঃ, ন পুনঃ সন্তাপমাত্রমুত্পাদযন্তঃ| তথা, তুল্যৈঃ-সমানৈঃ, দূষ্যাদিভির্বর্দ্ধিতাঃ-বৃদ্ধিং নীতাঃ| আদিশব্দেন দেশর্তুপ্রকৃতযো গৃহ্যন্তে| দূষ্যাঃ-রসাদিধাতবঃ| তে চ ত্রযাণামপি দোষাণাং যথাযথং তুল্যত্বাদ্বর্দ্ধনহেতবঃ| দেশর্তুপ্রকৃতযস্তু তুল্যকালং মলৈঃ সর্বৈরতুল্যা অপি ভবন্তি| প্রাযেণৈকৈকস্য মলস্য চৈকৈকো দেশো বা ঋতুর্বা প্রকৃতির্বা তুল্যা ভবতি| অতঃ "তুল্যদূষ্যাদিবর্দ্ধিতাঃ" ইত্যুক্তম্| তথা চ, ধন্বদেশো বাতস্যৈব বৃদ্ধিহেতুঃ, তুল্যত্বাত্; কফস্য ত্বতুল্যত্বাত্ক্ষপণহেতুঃ| আনুপস্তুল্যত্বাত্ কফস্য বৃদ্ধিহেতুঃ, বাতস্য ত্বসমানত্বাত্ক্ষপণহেতুঃ| ঋতাবপ্যেবং চিন্ত্যম্| প্রকৃতিস্ত্রযাণাং দোষাণাং তুল্যকালং বৃদ্ধিহেতুর্ন সম্ভবতি, বিষমদোষজনিতত্বাত্| যে ত্বেবমবোচন্,-সমাখ্যা প্রকৃতিস্তুল্যত্বাদেষাং মলানামত্র জ্বরে বর্দ্ধনহেতুরিতি| তেঽপি মৈবং বোচন্তে(বচন্ত্বি)তি বচনীযাঃ| যতো রোগজননোন্মুখানাং দোষাণাং নাসৌ বৃদ্ধিহেতুঃ, আরোগ্যলক্ষণত্বাত্| কিম্ভূতা দোষাঃ ? বলিনঃ, প্রতিপক্ষৈরখণ্ডিতশক্তিত্বাত্| তথা গুরবঃ, সামত্বাত্| স্তব্ধাঃ-নিশ্চলাঃ, ঊর্ধ্বমধশ্চানিঃসরণাত্| বিশেষেণ রসাশ্রিতাঃ| বিশেষগ্রহণং মলানাং সর্বধাত্বাশ্রিতত্বং দ্যোতযতি| সকলধাতুসমাশ্রিতা অপি ভবন্তি| অতিশযেন রসাখ্যং ধাতুমাশ্রিত্যৈতে সন্ততং কুর্যুঃ| তথা, নিষ্প্রতিদ্বন্দ্বাঃ-প্রত্যনীকরহিতাঃ| কীদৃশং জ্বরম্ ? সুষ্ঠু দুঃখেন-কৃচ্ছ্রেণ, সোঢুং শক্যত ইতি সুদুঃসহম্|

Adhikarana santatasyAvadhiH (60-63) · Śloka 63

মলং জ্বরোষ্মা ধাতূন্বা স শীঘ্রং ক্ষপযেত্ততঃ| সর্বাকারং রসাদীনাং শুদ্ধ্যাঽশুদ্ধ্যাঽপি বা ক্রমাত্||৬০|| বাতপিত্তকফৈঃ সপ্ত দশ দ্বাদশ বাসরান্| প্রাযোঽনুযাতি মর্যাদাং মোক্ষায চ বধায চ||৬১|| ইত্যগ্নিবেশস্য মতং, হারীতস্য পুনঃ স্মৃতিঃ| দ্বিগুণা সপ্তমী যাবন্নবম্যেকাদশী তথা||৬২|| এষা ত্রিদোষমর্যাদা মোক্ষায চ বধায চ| শুদ্ধ্যশুদ্ধৌ জ্বরঃ কালং দীর্ঘমপ্যনুবর্ততে||৬৩||

স০-জ্বরস্যোষ্মা-অনলধর্মঃ সকলবস্তুক্ষপণস্বভাবঃ, স কদাচিত্তথাভূতাদদৃষ্টবশাদস্মিন্ জ্বরে ধাতুমলযোরেকলোলীভূতযোর্মলং-বাতবিডাদিকং, ক্ষপযেত্| তথাভূতাদদৃষ্টসামর্থ্যাদ্ধাতূন্বা-রসাদীন্, ক্ষপযেত্| শীঘ্রং-আশ্বেব, ন তু চিরেণ কালেন অত্র চ মলক্ষপণোদ্যতোঽযং জ্বরোষ্মা ন ধাতুক্ষপণোদ্যত ইতি নিরামলক্ষণেন বিজ্ঞাযতে| তত্র চৈতন্নিরামলক্ষণম্-'অসংরোধস্নোতস্ত্বং সপ্রাণত্বমঙ্গলাঘবং বাতানুলোমনত্বং বাগ্দেহমনশ্চেষ্টাস্বনালস্যমগ্নিদীপ্তত্বং বিশদাস্যত্বং মূত্রপুরীষাদিমলপ্রবর্তনত্বং ক্ষুদুপগমো নির্গ্লানিতা' ইত্যেবং কিঞ্চিদুত্পদ্যমানমুপলভ্য নিশ্চীযতে জ্বরোষ্মণো মলক্ষপণোদ্যতত্বম্| এতল্লক্ষণবিপর্যযেণ দোষোপক্রমণীযোক্তেন (হৃ. সূ. অ. ১৩|২৩) - "স্রোতোরোধ" ইত্যাদিনা সামলক্ষণমবগম্য নিশ্চীযতে, যথাঽযং জ্বরোষ্মা ধাতুক্ষপণোদ্যত ইতি| স ইত্যনুবর্ততে| ততঃ-তস্মান্মলধাতুক্ষপণাত্ কারণাত্, রসাদীনাং-ধাতুমূত্রশকৃদ্দোষাণাং দ্বাদশানাম্প্যেকলোলীভূতানাং, সর্বাকারং-নিঃশেষং কৃত্বা, শুদ্ধ্যা-জ্বরোষ্মণা নিষ্পাদিতযা নির্মলতযা, বাতপিত্তকফৈর্ভূযিষ্ঠৈরেকৈকশ উত্পন্নঃ স সন্ততো জ্বরঃ প্রাযো মোক্ষায-জ্বরমুক্তযে, মর্যাদাং-অবধিং, সপ্ত দশ দ্বাদশ বাসরাননুযাতি-অনুবর্ততে| বাসরানিতি "অত্যন্তসংযোগে" দ্বিতীযা| সর্ব আকারো যস্মিন্ শোধনে তত্সর্বাকারং-নিঃশেষরূপম্| "ক্রিযাবিশেষণানাং নপুংসকত্বং দ্বিতীযা চ" ইতি দ্বিতীযা| ক্রমাত্-যথাক্রমম্, তেন বাতভূযিষ্ঠঃ সন্ততো জ্বরঃ সপ্ত বাসরান্, পিত্তভূযিষ্ঠো দশবাসরান্ , কফভূযিষ্ঠো দ্বাদশবাসরান্, ইত্যবতিষ্ঠতে| তথা, রসাদীনাং-একলোলীভূতানাং কেবলং জ্বরোষ্মক্ষপণমাত্রমনুভবতাং, অশুধ্দ্যা-সমলতযা, এষামেষ জ্বরোষ্মা বাতপিত্তকফৈরেকৈকশ উত্পন্নঃ প্রাযো বধায মর্যাদাং সপ্ত দশ দ্বাদশ বাসরাননুযাতি| প্রাযো-বাহুল্যেন, এষা মর্যাদা| কদাচিচ্চ বাতজ্বরাদিরুক্তেভ্যঃ সপ্তাদি বাসরেভ্যোঽধিকানি দিনান্যনুবৃত্ত্য মোক্ষায বধায বা ভবতি, কদাচিত্ ন্যূনান্যপীতি| তন্ত্রান্তরে চোক্তম্-"পিত্তকফানিলবৃধ্দ্যা দশদিবসদ্বাদশাহসপ্তাহাত্| হন্তি বিমুঞ্চতি বাঽঽশু জ্বরোষ্মণা ধাতুমলপাকাত্||" ইতি| ইত্যগ্নিবেশস্য মতং-জ্ঞানম্| হারীতস্য পুনরেবং স্মৃতিঃ-স্মরণম্, নিত্যত্বাদাযুর্বেদস্য| দ্বিগুণা সপ্তমী-চতুর্দশদিনানি যাবদ্বাতজ্বরঃ সন্ততঃ, পিত্তজ্বরো দ্বিগুণা নবমী-অষ্টাদশদিনানি, কফজ্বরো দ্বিগুণৈকাদশী-দ্বাবিংশতির্দিবসাঃ| "এষা ত্রিদোষমর্যাদা মোক্ষায চ বধায চ|" ইতি "সর্বাকারং রসাদীনাং শুদ্ধ্যাঽশুদ্ধ্যাঽপি বা ক্রমাত্|" ইত্যত্রাপ্যনুবর্তনীযম্| ত্রযশ্চ তে দোষাশ্চ ত্রিদোষাঃ, তেষাং মর্যাদা-অবধিঃ, ত্রিদোষমর্যাদা| দ্বযমপি চৈতত্ তন্ত্রকৃদ্বচঃ প্রমাণম্, তথাদৃষ্টত্বাত্| ইদানীং যথাপরিভাষিতাত্ দ্বিবিধাদপি মর্যাদাপ্রকারাদধিকতরং কালং যথাঽস্য জ্বরস্যানুবৃত্তির্ভবতি তথা দর্শযিতুমাহ-শুধ্দ্যশুদ্ধাবিতি| শুদ্ধিসহিতা অশুদ্ধিঃ শুদ্ধ্যশুদ্ধিঃ| শাকপার্থিবাদিত্বাত্সমাসঃ| তস্যাং সত্যাং জ্বরঃ সন্ততাখ্যো দীর্ঘমপি কালমনুবর্ততে-অনুবধ্নাতি| কদাচিদ্রসাখ্যো ধাতুর্মলরহিতো জ্বরোষ্মণা ক্ষপিতমলো ভবতি, কদাচিদ্রক্তাদ্যন্যতমঃ, কদাচিদ্রক্তাদযঃ সর্বে ন রসঃ, কদাচিদ্রক্তাদযঃ সর্বে কিঞ্চিন্মলরহিতা ন রসস্তথাভূতঃ, কদাচিত্কিঞ্চিন্মলরহিতো রক্তাদ্যন্যতমঃ, এবংপ্রকারা শুদ্ধিসহিতা অশুদ্ধিরুচ্যতে| তস্যাং সত্যাং সন্ততাখ্যো জ্বরো দীর্ঘকালমনুবর্ততে|

Adhikarana satatAdicatuShTayasAmAnyalakShaNam (64-65) · Śloka 65

এবং সন্ততস্য লক্ষণমাখ্যায সততকাদীনাং বিষমজ্বরসংজ্ঞানিমিত্তং সামান্যেন লক্ষণমাহ - - - - কৃশানাং ব্যাধিমুক্তানাং মিথ্যাহারাদিসেবিনাম্| অল্পোঽপি দোষো দূষ্যাদের্লব্ধ্বাঽন্যতমতো বলম্||৬৪|| সবিপক্ষো জ্বরং কুর্যাদ্বিষমং ক্ষযবৃদ্ধিভাক্| |৬৫|

স০-ঈদৃশানাং পুংসামল্পোঽপি-হীনবলোঽপি, অপিশব্দান্মহাবলোঽপি, দোষো-বাতাদ্যন্যতমো, জ্বরং বিষমসংজ্ঞং কুর্যাত্| কিং কৃত্বা ? দূষ্যাদেরন্যতমতো বলং লব্ধা| আদিশব্দো দেশর্ত্বোর্গ্রহণায| অন্যতমগ্রহণং চোপলক্ষণার্থম্| তেন কদাচিদ্দূষ্যাদেরেকস্মাদ্রসাদেঃ কদাচিদ্দ্বাভ্যাং রসরক্তাদ্যন্যতমাভ্যাং কদাচিদ্দূষ্যদেশাভ্যাং কদাচিদ্দূষ্যদেশর্তুভ্যো বলং লব্ধ্বেতি যোজ্যম্| কিম্ভূতো দোষঃ ? সবিপক্ষঃ,-সহ বিপক্ষেণ-প্রত্যনীকেন দূষ্যাদ্যন্যতমেন, বর্ততে সবিপক্ষঃ| তথা চ কিম্ভূতঃ ? ক্ষযশ্চ বৃদ্ধিশ্চ, তে ভজতে-সেবতে, ক্ষযবৃদ্ধিভাক্| সন্ততো হি জ্বরো নিষ্প্রত্যনীক ইতি সন্ততাদস্য ভেদঃ| মিথ্যাহারাদিসেবিনামিত্যত্রাদিশব্দেন বিহারৌষধাদিপরিগ্রহঃ|

Adhikarana doShasya pravRuttinivRuttI (65-66) · Śloka 66

| দোষঃ প্রবর্ততে তেষাং স্বে কালে জ্বরযন্ বলী||৬৫|| নিবর্ততে পুনশ্চৈষ প্রত্যনীকবলাবলঃ| |৬৬|

স০-তেষাং-কৃশাদীনাং, দোষো-বাতাদ্যন্যতমঃ, স্বে কালে-যো যস্যাত্মীযঃ কালো বৃদ্ধিহেতুর্বযোহোরাত্রিভুক্তলক্ষণস্তস্মিন্ স্বে কালে, দোষঃ প্রবর্ততে,- স্বীযং কর্ম দর্শযতীত্যর্থঃ| কিং কুর্বন্ ? জ্বরযন্-সন্তাপমুত্পাদযন্| কীদৃশো দোষঃ ? বলী-বলবান্ সন্ প্রবর্ততে| পুনশ্চৈষঃ-বিষমজ্বরারম্ভী দোষঃ সততকাদেরুত্পাদকো, নিবর্ততে-স্বব্যাপারাদ্বিরমতি| কিম্ভূতঃ ? প্রত্যনীকস্য বলং প্রত্যনীকবলং, তেনাবলঃ| এতদুক্তং ভবতি,-যদ্যসৌ দোষো দূষ্যাদীনাং সপক্ষাণামন্যতমস্মাদ্বলং লভতে তদাঽসৌ স্বব্যাপারে প্রবর্ততে| যদা তু তস্য বিপক্ষা ভবন্তি তদাতেষাং বিপক্ষাণামন্যতমস্য বলেনাস্য দোষস্য বলং হীযতে| তদানীং চ প্রত্যনীকবলাবলত্বাদসৌ দোষো নিবর্ততে, বটাদিবীজবত্| যথা,-বটাদিবীজং জলাদিসামগ্রীতো বলমাসাদ্য বিশিষ্টে কালে রোহতি-অঙ্কুরাদিকমুদ্ভাবযতি ততো জলাদিবিরহাদ্ভূমাবেবাবতিষ্ঠতে, ন তু স্বকার্যমুদ্ভাবযতি, তথৈবৈষোঽপি বিষমজ্বরস্য কর্তা দোষঃ স্বপক্ষতো দূষ্যাদের্বলং লব্ধ্বা স্বব্যাপারং কুরুতে| যদা তু বিপক্ষবলেনাসৌ প্রতিহতশক্তিস্তদা স্বব্যাপারং ন কুরুতে, দেহ এব নিলীয তিষ্ঠতি|

Adhikarana viShamajvarasya santatanivRuttirnAsti (66-67) · Śloka 67

| ক্ষীণে দোষে জ্বরঃ সূক্ষ্মো রসাদিষ্বেব লীযতে||৬৬|| লীনত্বাত্কার্শ্যবৈবর্ণ্যজাড্যাদীনাদধাতি সঃ| |৬৭|

স০-দোষে-বিষমজ্বরকারিণি, ক্ষীণে সতি, সততকাদিজ্বরঃ সূক্ষ্মো ভূত্বা রসাদিষ্বেব ধাতুষু লীযতে-লযং যাতি| কথং পুনরেতদবগম্যতে ? যদসৌ লীনো ন পুনর্বিনষ্ট এব, ইত্যত্র হেতুমাহ-লীনত্বাদিত্যাদি| স তু লীনো জ্বরো লীনত্বাত্ কার্শ্যাদীন্ করোতি| অত এবাসৌ ন বিনষ্ট এবেত্যুচ্যতে| যতঃ কার্শ্যাদ্যুদ্গম উপলভ্যতে| নিরন্বযবিনষ্টাদ্ধি তদ্ধেতুকার্শ্যাদ্যনুপলব্ধিরেব| তস্মাল্লীনো দোষো বিষমজ্বরেষু ভবতীতি স্থিতম্|

Adhikarana santatAdInAM santatatvAdau yuktiH (67-69) · Śloka 69

ননু, তুল্যেঽপি বাতাদিদোষপ্রকোপে সন্ততজ্বর এবাশুসকলকাযব্যাপ্তিঃ, সততকাদিষু তু চিরেণ বিচ্ছিদ্য ভবতীত্যত্র যুক্তিঃ কা ? ইত্যাহ - - - - | আসন্নবিবৃতাস্যত্বাত্স্রোতসাং রসবাহিনাম্||৬৭|| আশু সর্বস্য বপুষো ব্যাপ্তির্দোষেণ জাযতে| সন্ততঃ সততস্তেন, বিপরীতো বিপর্যযাত্||৬৮|| বিষমো বিষমারম্ভক্রিযাকালোঽনুষঙ্গবান্| |৬৯|

স০-আসন্নং বিবৃতং চাস্যং-মুখং, যেষাং রসবাহিনাং স্রোতসাং তান্যেবম্| তেষাং ভাব আসন্নবিবৃতাস্যত্বম্| তস্মাদ্ধেতোস্তত্র প্রবিষ্টেন দোষেণ শীঘ্রং সর্বস্য বপুষঃ-শরীরস্য, ব্যাপ্তির্জাযতে| তেন-কারণেন দোষেণাশু সর্বশরীরব্যাপ্তিলক্ষণেন, সন্ততাখ্যো জ্বরঃ সততো-নিরন্তরো, ভবতি| বিপরীতঃ প্রকৃতত্বাত্সন্ততেন বিষমো-বিষমসংজ্ঞঃ, সততাদিজ্বরো বিপরীতো ভবতি-ন নিরন্তরং জ্বরযতি| কস্মাদ্বিপরীতঃ ? বিপর্যযাত্| এতদুক্তং ভবতি,-স্থূলান্যাসন্নানি বিবৃতাস্যানি চ রসবাহীনি স্রোতাংসি| দূরতরাণি সংবৃতাস্যানি সূক্ষ্মতরাণি চ রক্তবাহীনি| তৈর্দোষশ্চিরেণ তথা অসাকল্যেন কাযং ব্যাপ্নুবন্ বিচ্ছিন্নকালং জ্বরং করোতি| অত এবাহ (শ্লো. ৭০)- "অহোরাত্রস্য স দ্বিঃ স্যাত্" ইত্যাদি| ততো দূরতরাণি সংবৃততরাস্যানি চ মাংসবাহীনি স্রোতাংসি| তানি চিরতরেণ প্রাপ্নোতি দোষঃ| ন চৈতৈঃ স্রোতোভিঃ সাকল্যেন যুগপদ্দেহমনুব্যাপ্নোতি| অতোঽনেন কারণেনাসাবন্যস্মিন্ দিনে জ্বরং নির্বর্তযত্যন্যেদ্যুঃসংজ্ঞম্| তেনাসৌ সততাদপি বিপ্রকৃষ্টো ভবতি| ততোঽপি সূক্ষ্মতরাণি সংবৃততরমুখানি চ মেদোবহানি| তানি চিরতরেণ দোষঃ প্রাপ্নোতি| ন চ তৈরশেষদেহং ব্যাপ্নোতি| অতোঽসাবনেন কারণেন যথাক্রমমন্যদিনমেকং হিত্বা তৃতীযেঽহ্নি তৃতীযকো ভবতি| ততোঽপ্যনেনৈব বিপ্রকৃষ্টতমেন ক্রমেণ দিনদ্বযং হিত্বা চতুর্থকো ভবতি| এবং চতুর্থকবিপর্যযশ্চ| সঙ্গ্রহেঽপ্যাখ্যত্ (নি. অ. ২)- "সূক্ষ্মসূক্ষ্মতরাস্যেষু দূরদূরতরেষু চ| দোষো রক্তাদিমার্গেষু শনৈরল্পশ্চিরেণ যত্|| যাতি দেহং চ নাশেষং ভূযিষ্ঠং ভেষজেঽপি চ| ক্রমোঽযং তেন বিচ্ছিন্নসন্তাপো লক্ষ্যতে জ্বরঃ||" ইতি| অধুনা বিষমজ্বরস্য স্বরূপং প্রতিপাদযন্নাহ-বিষম ইতি| বিষমো-বিষমসংজ্ঞো জ্বরো, বিষমারম্ভক্রিযাকালো ভবতি| আরম্ভশ্চ ক্রিযা চ কালশ্চ আরম্ভক্রিযাকালাঃ| বিষমা আরম্ভক্রিযাকালা যস্য স এবম্| তত্র বিষম আরম্ভো যথা,-কশ্চিত্পূর্বং মূর্ধানমারভ্যাগচ্ছতি, কশ্চিত্পৃষ্ঠম্, কশ্চিজ্জঙ্ঘাভ্যামিতি| বিষমক্রিযো যথা,-কশ্চিচ্ছীতকৃত্, কশ্চিদ্দাহকৃদিতি| বিষমকালশ্চ যথা,- কশ্চিত্পূর্বাহ্ণে সমাগচ্ছতি, কশ্চিন্মধ্যাহ্নে, কশ্চিদপরাহ্ণে, কশ্চিন্নিশীথে, ইতি| তথা, অনুষঙ্গবান্-দীর্ঘকালানুবন্ধী|

Adhikarana satatalakShaNam (69-70) · Śloka 70

| দোষো রক্তাশ্রযঃ প্রাযঃ করোতি সততং জ্বরম্||৬৯|| অহোরাত্রস্য স দ্বিঃ স্যাত্| |৭০|

স০-প্রাযো-বাহুল্যেন, রক্তাশ্রযো দোষঃ সততং জ্বরং বিদধাতি| প্রাযোগ্রহণাত্ রসাদ্যাশ্রযত্বমস্য সূচযতি| তস্মাত্সর্বো জ্বরঃ সর্বধাতুব্যাপী| ভূযাংস্তু ধাতুর্ব্যপদিশ্যতে| অত এব সন্ততে পপাঠ (শ্লো. ৫৯) - "বিশেষেণ রসাশ্রিতাঃ|" ইতি| তস্মাদ্বিশেষেণ রক্তাশ্রযঃ সতত ইত্যবেহি| সঃ-সততঃ, অহোরাত্রস্য মধ্যে দ্বিঃ স্যাত্-দ্বৌ কালাবনুবর্ততে| অহর্যুক্তা রাত্রিরহোরাত্রঃ| "অহঃসর্বৈকদেশ" ইত্যাদিনা অচ্ সমাসান্তঃ| "রাত্রাহ্নাহাঃ পুংসি" ইতি পুংস্ত্বম্| দ্বৌ বারৌ দ্বিঃ| "দ্বিত্রিচতুর্ভ্যঃ সুচ্" ইতি সুচ্| অত্র চ নাযং নিযমঃ, যদহ্ন্যেকবারং রাত্রাবেকবারমিতি, কিং তর্হি ? কদাচিদহ্ন্যেব বারদ্বযং, কদাচিদ্রাত্রাবেব বারদ্বযং, কদাচিদ্দ্বযোরপি বারদ্বযমিতি প্রতীহি|

Adhikarana anyedyurlakShaNam (70) · Śloka 70

সকৃদন্যেদ্যুরাশ্রিতঃ| তস্মিন্মাংসবহা নাডীঃ|৭০|

স০-সকৃদন্যেদ্যুঃ 'অহোরাত্রস্য ইত্যনুবর্ততে| অহোরাত্রস্য মধ্যেঽযমন্যেদ্যুর্নাম বিষমজ্বরঃ সকৃত্-একবারং ভবেত্| কদাচিদহ্ন্যেকবারমুত্পদ্যতে, কদাচিদ্রাত্রাবিতি| তস্মিন্-অন্যেদ্যুর্জ্বরে, সর্বধাত্বাশ্রযোঽপি দোষো বিশেষেণ মাংসবহা নাডীরাশ্রিতঃ|

Adhikarana tRutIyakalakShaNam (70-71) · Śloka 71

| মেদোনাডীস্তৃতীযকে||৭০|| গ্রাহী পিত্তানিলান্মূর্ধ্নস্ত্রিকস্য কফপিত্ততঃ| সপৃষ্ঠস্যানিলকফাত্স চৈকাহান্তরঃ স্মৃতঃ||৭১||

স০-তৃতীযকে মেদোবহা নাডীর্বিশেষেণ দোষ আশ্রিত ইতি যোজ্যম্| মেদোবহা নাডীরাশ্রিত্য দোষস্তৃতীযকং কুরুত ইত্যর্থঃ| স চ ত্রিবিধঃ,-পিত্তবাতাদধিকাত্ কফপিত্তাত্ বাতকফাচ্চ| তত্র গ্রাহী মূর্ধ্নঃ-শিরসঃ, পিত্তানিলাত্তৃতীযকো ভবতি, মূর্ধ্নি বেদনাস্তাস্তা জনযতীত্যর্থঃ| যশ্চ কফপিত্তাদুত্পদ্যতে স ত্রিকস্য গ্রাহী-ত্রিকে পীডামুত্পাদযতি| যশ্চানিলকফাজ্জাযতে স পৃষ্ঠসহিতস্য ত্রিকস্য গ্রাহী-পৃষ্ঠে ত্রিকে চ পীডাং জনযতি| এবমযং ত্রিপ্রকারস্বভাবঃ| স চ তৃতীযক একাহান্তর ইতি স্মৃতো, 'মুনিভিঃ' ইতি শেষঃ| একেনাহ্নাঽন্তরং-ব্যবধানং, যস্য স এবম্| একস্মিন্নহনি তিরোভূয পুনরুদেতীত্যর্থঃ|

Adhikarana caturthakalakShaNam (72-73) · Śloka 73

চতুর্থকো মলে মেদোমজ্জাস্থ্যন্যতমস্থিতে| মজ্জস্থ এবেত্যপরে প্রভাবং স তু দর্শযেত্||৭২|| দ্বিধা কফেন জংঘাভ্যাং স পূর্বং শিরসোঽনিলাত্| |৭৩|

স০-মেদশ্চ মজ্জা চাস্থি চ মেদোমজ্জাস্থীনি, তেষামন্যতমস্মিন্ স্থিতে দোষে কদাচিন্মেদসি স্থিতে দোষে কদাচিন্মজ্জনি কদাচিদস্থনি স্থিতে দোষে চতুর্থকো জ্বরো জাযতে| একং দিনং জ্বরযিত্বা হ্যহং বিমুচ্য পুনর্জ্বরযতি স চতুর্থকো বেদ্যঃ| মজ্জস্থ এবেত্যপরে-অন্যে পুনরাচার্যা এবং স্মরন্তি, চতুর্থকো জ্বরো মজ্জস্থ এব দোষে জাযতে| স পুনশ্চতুর্থকঃ প্রভাবং দ্বিধা-দ্বিপ্রকারং, দর্শযেত্| কফেনাধিকেন যো জাযতে স পূর্বং-প্রথমং, জঙ্ঘাভ্যং ততোঽন্যেভ্যোঽঙ্গেভ্যঃ| অনিলাদ্যো ভবতি স পূর্বং শিরসো জাযতেঽনন্তরমঙ্গান্তরেভ্যঃ|

Adhikarana caturthakaviparyayalakShaNam (73-74) · Śloka 74

| অস্থিমজ্জোভযগতে চতুর্থকবিপর্যযঃ||৭৩|| ত্রিধা, হ্যহং জ্বরযতি দিনমেকং তু মুঞ্চতি| |৭৪|

স০-অস্থি চ মজ্জা চাস্থিমজ্জানৌ, অস্থিমজ্জোরুভযং-দ্বযং, তত্র গতো যো মলো বাতাদ্যন্যতমস্তস্মিন্, চতুর্থকবিপর্যযঃ-তদ্বিপরীতলক্ষণো বিষমজ্বরো, ভবতি| স চ ত্রিধা-ত্রিপ্রকারঃ, সন্নিপাতোদ্ভবত্বেঽপি কদাচিদ্বাতেনাধিকেনাঽথবা পিত্তেন শ্লেষ্মণা বা| তমেব চ লক্ষযিতুমাহ-হ্যহমিতি| দ্বিধাতুস্থিতদোষোত্পন্নত্বাত্ দ্বে দিনে জ্বরযিত্বা দিনমেকং বিমুচ্য পুনর্হ্যহং জ্বরযতি স চতুর্থকবিপর্যযঃ| অনেনৈব লক্ষণেন চতুর্থকস্যাপি লক্ষণমুক্তং ভবতি| স একমহো জ্বরযিত্বা হ্যহং বিমুচ্য পুনর্জ্বরযতি| দ্বে অহ্নী সমাহৃতে দ্ব্যহঃ| "রাজাহঃসখিভ্যষ্টচ্" ইতি টচ্| "অহ্নষ্টখোরেব" ইতি টিলোপঃ|

Adhikarana anuktajvaraBeda sa~ggrahaH (74-76) · Śloka 76

ইদানীমেষাং বিষমজ্বরাণামিমং শেষভূতং গ্রন্থমাহ - - - - | বলাবলেন দোষাণামন্নচেষ্টাদিজন্মনা||৭৪|| জ্বরঃ স্যান্মনসস্তদ্বত্কর্মণশ্চ তদা তদা| দোষদূষ্যর্ত্বহোরাত্রপ্রভৃতীনাং বলাজ্জ্বরঃ||৭৫|| মনসো বিষযাণাং চ কালং তং তং প্রপদ্যতে| |৭৬|

স০-বলং চাবলং চ বলাবলং,-সামর্থ্যাসামর্থ্যম্, আসন্নব্যাধিকারণানাং দোষাণাং-বাতাদীনাং, তদা তদা বলাবলেন জ্বরঃ স্যাত্| কিম্ভূতেন ? অন্নচেষ্টাদিজন্মনা| অদ্যত ইত্যন্নং,-রক্তশাল্যাদি| অন্নগ্রহণমুপলক্ষণার্থম্, মাংসরসাদ্যপি হি পানং গৃহ্যতে| চেষ্ট্যত ইতি চেষ্টা,-কাযবাঙ্মনোব্যাপারো, বিহার ইত্যর্থঃ| অন্নং চ চেষ্টা চান্নচেষ্টে, তে আদি যেষাং কালদূষ্যাদীনাং ত এবম্, তেভ্যো জন্ম যস্য বলাবলস্য, তেনান্নচেষ্টাদ্যুত্পন্নেন সততকাদির্জ্বরো ভবেত্| মনসস্তদ্বত্| তদ্বদিত্যনেন দোষাণাং বলাবলমতিদিশ্যতে| যথা দোষাণাং শারীরাণাং বলাবলেন সততকাদিজ্বরঃ স্যাত্, তথা মনসোঽপি দোষাণাং বলাবলেন জ্বরঃ স্যাত্| চশব্দাত্ কর্মণোঽপি পূর্বোক্তস্য বলাবলেন সততকাদিজ্বরঃ স্যাদিতি| কস্য সম্বন্ধিনঃ কর্মণঃ ? প্রকৃতত্বান্মনস এব| তদেবং কর্মণো ব্যাপারস্য চিত্তস্যার্থস্য বলাবলেন তদ্বশাজ্জ্বরোঽসৌ ভবেত্| অন্যে ত্বাচক্ষতে,-কর্মণঃ-পুরাকৃতস্য বলাবলেন, পুরাকৃতকর্মবশাদিতি| যত্তদোনিত্যাভিসম্বন্ধাদ্যদত্রানুক্তমপি লভ্যতে| তেনাযং সম্বন্ধঃ,-যদা যদাঽন্নচেষ্টাদিজন্ম দোষাণাং বলাবলং স্যাত্, তথা মনসো দোষাণাং বলাবলং স্যাত্, তথা কর্মণঃ পূর্বকৃতস্য বলাবলং স্যাত্, তদা তদা সততকাদির্জ্বরঃ স্যাদিতি| অপিচ দোষাণাং বাতাদীনাং বলেন, তথা দূষ্যাণাং রসাদীনাং তথা ঋতূনাং শিশিরাদীনাং তথাঽহোরাত্রস্য তথা প্রকৃতীনাং বলেন, মনসো বলেন, তথা বিষযাণাং শব্দস্পর্শরূপরসগন্ধানাং বলেন, জ্বরস্তং তং-বিশিষ্টং, কালং প্রপদ্যতে| তেন কদাচিত্ সততকোঽন্যেদ্যুস্তৃতীযকশ্চতুর্থকো বা ভবতি| তথা কদাচিত্ চতুর্থকো ভূত্বা তৃতীযকোঽন্যেদ্যুঃ সততকো বা ভবেত্| সঙ্গ্রহে চ রসাদিধাতুস্থজ্বরলক্ষণমুক্তম্| যথা (নি. অ. ২)- "উত্ক্লেশো গৌরবং দৈন্যং ভঙ্গোঽঙ্গানাং বিজৃম্ভণম্| অরোচকো বমিঃ সাদঃ সর্বস্মিন্ রসগে জ্বরে|| ১|| রক্তনিষ্ঠীবনং তৃষ্ণা রক্তোষ্ণপিটিকোদ্গমঃ| দাহরাগভ্রমমদপ্রলাপা রক্তসংস্থিতে|| ২|| তৃড্ গ্লানিঃ সৃষ্টবর্চস্ত্বমন্তর্দাহো ভ্রমস্তমঃ| দৌর্গন্ধ্যং গাত্রবিক্ষেপো মাংসস্থে, মেদসি স্থিতে|| ৩|| স্বেদোঽতিতৃষ্ণা বমনং স্বগন্ধস্যাসহিষ্ণুতা| প্রলাপো গ্লানিররুচিরস্থিস্থে ত্বস্থিভেদনম্|| ৪|| দোষপ্রবৃত্তিরূর্ধ্বাধঃ শ্বাসাঙ্গাক্ষেপকূজনম্| অন্তর্দাহো বহিঃ শৈত্যং শ্বাসো হিধ্মা চ মজ্জগে|| ৫|| তমসো দর্শনং মর্মচ্ছেদনং স্তব্ধমেঢ্রতা| শুক্রপ্রবৃত্তির্মৃত্যুশ্চ জাযতে শুক্রসংশ্রযে|| ৬|| উত্তরোত্তরদুঃসাধ্যাঃ পঞ্চাত্রান্ত্যৌ তু বর্জযেত্| প্রলিম্পন্নিব গাত্রাণি শ্লেষ্মণা গৌরবেণ চ|| ৭|| মন্দজ্বরপ্রলেপস্তু সশীতঃ স্যাত্প্রলেপকঃ| নিত্যং মন্দজ্বরো রূক্ষঃ শূনঃ কৃচ্ছ্রেণ সিধ্যতি|| ৮|| স্তব্ধাঙ্গঃ শ্লেষ্মভূযিষ্ঠো ভবেদ্বাতবলাসকঃ| হরিদ্রাভেকবর্ণাভস্তদ্বর্ণং যঃ প্রমেহতি|| ৯|| স বৈ হারিদ্রকো নাম জ্বরভেদোঽন্তকঃ স্মৃতঃ| কফবাতৌ সমৌ যস্য হীনপিত্তস্য দেহিনঃ|| ১০|| তীক্ষ্ণো বা যদি বা মন্দো জাযতে রাত্রিকো জ্বরঃ| দিবাকরাপীতবলে ব্যাযামাচ্চ বিশোষিতে|| ১১|| শরীরে নিযতং বাতাজ্জ্বরঃ স্যাত্পূর্বরাত্রিকঃ| আমাশযে যদা দুষ্টে শ্লেষ্মপিত্তে ব্যবস্থিতে|| ১২|| তদাঽর্দ্ধং শীতলং দেহে ত্বর্দ্ধং চোষ্ণং প্রজাযতে| কাযে পিত্তং যদা দুষ্টং শ্লেষ্মা চান্তে ব্যবস্থিতঃ|| ১৩|| উষ্ণত্বং তেন দেহস্য শীতত্বং করপাদযোঃ|" ইতি| খারণাদিনা তু শুক্রস্থ এব দোষে বর্জ্যতা প্রত্যপাদি| তথা চ তদ্গ্রন্থঃ-"শুক্রস্থে শুক্রবিণ্মোক্ষঃ শ্বসন্ প্রাণান্ বিমোক্ষ্যতি|" ইতি|

Adhikarana jvaramokShalakShaNam (76-78) · Śloka 78

| ধাতূন্ প্রক্ষোভযন্ দোষো মোক্ষকালে বিলীযতে||৭৬|| ততো নরঃ শ্বসন্ স্বিদ্যন্ কূজন্ বমতি চেষ্টতে| বেপতে প্রলপত্যুষ্ণৈঃ শীতৈশ্চাঙ্গৈর্হতপ্রভঃ||৭৭|| বিসংজ্ঞো জ্বরবেগার্তঃ সক্রোধ ইব বীক্ষতে| সদোষশব্দং চ শকৃদ্দ্রবং সৃজতি বেগবত্||৭৮||

স০-দোষো-বাতাদ্যন্যতমো, ধাতূন্-রসাদীন্, প্রক্ষোভযন্-চণ্ডপবনোদ্ধূতমহাজলাশযানিব কুর্বন্, জ্বরমোক্ষকালে বিলীযতে| বিলীযমানদোষবশাত্ নরঃ শ্বসন্, তথা স্বিদ্যন্-রোমকূপেভ্যো জলং স্রবন্, তথা কূজন্-অব্যক্তং শব্দং কুর্বন্, বমতি-ছর্দযতি, তথা চেষ্টতে-ভূমিশয্যাদৌ পরিলুণ্ঠতি, বেপতে-কম্পতে লতেব চলতি, প্রলপতি-অসম্বদ্ধং ব্রূতে, তথা হতপ্রভো-নষ্টকান্তিঃ, উষ্ণৈঃ শীতৈশ্চাঙ্গৈস্তুল্যকালমুপলক্ষিতো ভবতি| চশব্দোঽত্র তুল্যকালার্থঃ| তুল্যকালং তস্য কানিচিদুষ্ণান্যঙ্গানি কানিচিচ্ছীতানি| বিগতা সংজ্ঞা যস্যাসৌ বিসংজ্ঞঃ, তথা জ্বরবেগার্তঃ সক্রোধ ইব বীক্ষতে-সরোষ ইবালোকনং করোতি, তথা শকৃত্-পুরীষং, বিমুঞ্চতি| কিম্ভূতং শকৃত্ ? দোষশ্চ শব্দশ্চ দোষশব্দৌ, সহ তাভ্যাং বর্ততে সদোষশব্দম্| দোষশব্দেনেহামো বিবক্ষিতঃ, সামং সস্বনং চেত্যর্থঃ| তথা, দ্রবং-অকঠিনম্| তথা বেগোঽস্যাস্তীতি বেগবত্, ইতি সবেগং কৃত্বা শকৃত্সৃজতি|

Adhikarana jvaramuktalakShaNam (2) · Śloka 2

ইতি জ্বরমোক্ষকাললক্ষণমুক্ত্বা বিগতজ্বরলক্ষণমভিধিত্সুরাহ - - দেহো লঘুর্ব্যপগতক্লমমোহতাপঃ পাকো মুখে করণসৌষ্ঠবমব্যথত্বম্| স্বেদঃ ক্ষবঃ প্রকৃতিযোগি মনোঽন্নলিপ্সা কণ্ডূশ্চ মূর্ধ্নি বিগতজ্বরলক্ষণানি||৭৯|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে জ্বরনিদানং নাম দ্বিতীযোঽধ্যাযঃ||২||

স০-তস্য বিগতজ্বরস্য নরস্যৈতানি লক্ষণানি| যথা-দেহো লঘুর্ভবতি-ন তু গাত্রে গৌরবম্| তথা, ব্যপগতাঃ-নষ্টাঃ, ক্লমমোহতাপা যস্যাসৌ ব্যপগতক্লমমোহতাপস্তদা স সম্পদ্যতে| তথা, অস্য মুখে-বদনে, পাকঃ| করণানাং-চক্ষুরাদীনাং, সৌষ্ঠবং-পাটবং, জাযতে| তথা, অব্যথত্বাদযোঽস্য ভবন্তি| প্রকৃত্যা যোগঃ প্রকৃতিযোগঃ,-স্বভাবেন সম্বন্ধঃ| প্রকৃতিযোগো যস্যাস্তি মনসস্তত্ প্রকৃতিযোগি| যাদৃগ্যস্য চিত্তং পূর্বং রজোবহুলং তমোবহুলং বা আসীত্ তাদৃক্ তস্য সম্পদ্যত ইত্যর্থঃ| তথা, অন্নলিপ্সা-অন্নাভিলাষঃ| সঙ্গ্রহে চ নক্ষত্রসমাশ্রযণেন চ সাধ্যাসাধ্যজ্বরলক্ষণমুক্তম্| যথা (নি. অ. ১)- "আধানজন্মনিধনপ্রত্যরাখ্যবিপত্করে| নক্ষত্রে ব্যাধিরুত্পন্নঃ ক্লেশায মরণায বা|| জ্বরাস্তু জাতঃ ষড্রাত্রাদশ্বিনীষু নিবর্ততে| ভরণীষু তু পঞ্চাহাত্সপ্তাহাত্কৃত্তিকাসু চ|| ত্রিসপ্তরাত্রাদথবা রোহিণ্যামষ্টরাত্রতঃ| একাদশাদ্বা দিবসান্মৃগে ষণ্ণবরাত্রযঃ|| পঞ্চাহান্মৃত্যুরার্দ্রাযাং ত্রিপক্ষে সংশযোঽথবা| পুনর্বসৌ প্রবৃত্তস্তু জ্বরোঽপৈতি ত্রযোদশাত্|| দিবসাত্সপ্তবিংশাদ্বা হ্যহাত্সপ্তাহতোঽথবা|| পুষ্যে শ্লেষাসু মরণং চিরেণাঽপি মঘাসু চ|| অবশ্যং স্বাস্থ্যমাপ্নোতি দ্বাদশাহান্মৃতো ন চেত্| ফল্গুন্যোঃ পূর্বযোর্মৃত্যুরন্যযোস্তু দিনেঽষ্টমে|| নবমেঽহ্ন্যেকবিংশে বা জ্বরঃ সৌম্যত্বমৃচ্ছতি| হস্তেন সপ্তমে শান্তিশ্চিত্রাযামষ্টমেঽথবা|| পুনশ্চিত্রাগমে স্বাতৌ দশাহাদথবা ত্রিভিঃ| পক্ষৈর্মৃত্যুং বিশাখাসু দ্বাবিংশেঽহনি নির্দিশেত্|| নবমেঽহ্নি ন চেচ্ছান্তির্মৈত্রে মৃত্যুস্ততঃ পরম্| জ্যেষ্ঠাযাং পঞ্চমে মৃত্যুরূর্ধ্বং বা দ্বাদশাত্সুখম্|| স্বাস্থ্যং দশাহান্মূলেন ত্রিসপ্তাহেঽথবা গতে| পূর্বাষাঢাসু নবমে ততোঽন্যাসু তু মাসতঃ|| অষ্টাভিরথবা মাসৈর্নবভির্বা ভবেচ্ছিবম্| [জ্বরস্তু শ্রবেণে যাতি শান্তিমেকাদশাহতঃ|| ] আজ্যেষ্ঠাহাদ্ধনিষ্ঠাসু দশাহাদ্বারুণেষু তু| ষডহে দ্বাদশাহে বা মৃত্যুর্ভাদ্রপদাসু চ|| উত্তরাসু দ্বিসপ্তাহাত্ প্রশমো, রেবতীষু চ| চতূরাত্রেঽষ্টরাত্রে বা ক্ষেমমিত্যাহ হারিতঃ||" ইতি| জ্বর ইত্যুপলক্ষণম্| প্রাযঃ সর্বো ব্যাধিরনযা দিশাঽনুসৃতো বোধ্যঃ ক্ষিপ্রচিরমোক্ষায জীবিতান্তায বা| আধানং-জন্মর্ক্ষাদ্দশমং নক্ষত্রম্| বিপত্করং-তৃতীযা তারা| প্রত্যরং-পঞ্চমী| নিধানসংজ্ঞা-সপ্তমী তারা স্মৃতেতি| অথ, কিং নক্ষত্রসমাশ্রযেণেন জ্বরস্য সাধ্যাসাধ্যবিভাগোঽঙ্গীক্রিযতামুত যথানিদানং কুপিতদোষলক্ষণেন ? ব্রূমঃ| উভযথাঽপি| যতো নক্ষত্রং ত্রিবিধমপি প্রাক্তনস্য কর্মণো দৈবাখ্যস্য শুভরূপস্যাশুভরূপস্য শুভাশুভরূপস্য চ সৌম্যক্রূরমধ্যস্বভাবসূচকম্| তত্র সৌম্যেন নক্ষত্রেণ শুভং, ক্রূরেণাশুভং, মধ্যস্বভাবেন চ শুভাশুভম্| এতদুক্তং ভবতি,-পুরাতনকর্মবশান্নক্ষত্রেণ জ্বর উত্পদ্যতে, ঐহিককর্মবশান্মিথ্যাহারসেবনাখ্যাদ্যথানিদানং বাতাদিকুপিতলক্ষণেন চ| তদনযোর্বলাবলেন জ্বরস্য সাধ্যাসাধ্যবিভাগো ব্যবস্থাপ্যঃ| প্রত্যপাদি চ মুনিভিঃ| যথা (চ.বি.অ.৩)- "কদাচিত্কর্মণো বলবত্ত্বং কদাচিত্পুরুষকারস্য" ইত্যুভযথা জ্বরস্য সাধ্যাসাধ্যবিভাগো ন্যায্যঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে জ্বরনিদানং নাম দ্বিতীযোঽধ্যাযঃ সমাপ্তঃ|| ২||