9. mūtrāghātanidānādhyāyaḥ

Adhikarana adhyAyopakramaH · Śloka

অতীসারগ্রহণীরোগনিদানাদনন্তরং মূত্রাঘাতনিদানমেকসম্বন্ধনত্বাদুচ্যত ইত্যাহ - - - -

Adhikarana mUtrAghAtanidAnAdhyAyaH (2) · Śloka 2

অতীসারগ্রহণীরোগনিদনানন্তরং মূত্রাঘাতনিদানমেকসম্বন্ধনত্বাদুচ্যত ইত্যাহ - - - - অথাতো মূত্রাঘাতনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

০০০০০

Adhikarana bastyAdaya ekasambandhanAH (1) · Śloka 1

বস্তিবস্তিশিরোমেঢ্রকটীবৃষণপাযবঃ| একসম্বন্ধনাঃ প্রোক্তা গুদাস্থিবিবরাশ্রযাঃ||১||

স০-বস্ত্যাদীনাং দ্বন্দ্বঃ| বস্ত্যাদয একসম্বন্ধনাঃ প্রোক্তাঃ| একং সম্বন্ধনং-গ্রন্থনং, যেষাং ত এবম্| তদেবৈকসম্বন্ধনত্বমেষাং প্রকটযতি-গুদেত্যাদি| গুদাস্থিবিবরমাশ্রযো যেষাং ত এবম্, তত্রাশ্রিতা ইত্যর্থঃ|

Adhikarana mUtrAghAtasaMprAptiH (2-3) · Śloka 3

ননু, অত্র মূত্রাশ্রিতা দোষা অবশ্যং বস্তিং প্রাপ্য বিকুর্বতে| বস্তেশ্চাধোমুখত্বান্মূত্রান্তঃপ্রবেশো বস্তিমুখেন ন সম্ভাব্যতে, তস্মান্মূত্রাঘাতানুত্পত্তিরেব, ইত্যাশঙ্ক্যাহ - - - - অধোমুখোঽপি বস্তির্হি মূত্রবাহিসিরামুখৈঃ| পার্শ্বেভ্যঃ পূর্যতে সূক্ষ্মৈঃ স্যন্দমানৈরনারতম্||২|| যৈস্তৈরেব প্রবিশ্যৈনং দোষাঃ কুর্বন্তি বিংশতিম্| মূত্রাঘাতান্ প্রমেহাংশ্চ কৃচ্ছ্রান্মর্মসমাশ্রযান্||৩||

স০-হির্যস্মাদর্থে| অপিশ্চ হেত্বভ্যুপগমে| যদ্যপ্যধোমুখো বস্তিস্তথাঽপি জলমধ্যস্থিতাধোমুখনবমৃত্কুম্ভবত্| হি-যস্মাত্, পার্শ্বেভ্যো মূত্রবাহিসিরামুখৈঃ-স্রোতোদ্গারৈঃ, সূক্ষ্মৈঃ প্রকৃতত্বান্মূত্রং স্যন্দমানৈঃ-স্রবদ্ভিঃ, অনারতং-অনবরতং, যৈরেব মূত্রস্রোতোদ্বারৈর্বস্তিঃ পূর্যতে তৈরেব মূত্রস্রোতোদ্বারৈর্দোষা এনং-বস্তিং, প্রবিশ্য বিংশতিং মূত্রাঘাতান্ কুর্বন্তি তাবতশ্চ প্রমেহান্| কিম্ভূতান্ ? বস্ত্যাখ্যমর্মসমাশ্রযান্| হেতৌ দ্বিতীযা| মর্মসমাশ্রিতত্বাত্ কৃচ্ছ্রান্-কৃচ্ছ্রসাধ্যান্|

Adhikarana vAtajasya lakShaNam (4) · Śloka 4

বস্তিবঙ্ক্ষণমেড্রার্তিযুক্তোঽল্পাল্পং মুহুর্মুহুঃ| মূত্রযেদ্বাতজে কৃচ্ছ্রে|৪|

স০-অত্র চত্বারো মূত্রাঘাতা বাতপিত্তকফসন্নিপাতাত্মকাঃ| তত্র বাতজে কৃচ্ছ্রে-মূত্রাঘাতে, বস্ত্যাদ্যর্তিযুক্তঃ পুমানল্পাল্পং কৃত্বা মুহুর্মুহুর্মূত্রযেত্|

Adhikarana pittajasya lakShaNam (4-5) · Śloka 5

| পৈত্তে পীতং সদাহরুক্||৪|| রক্তং বা| |৫|

স০-পৈত্তে কৃচ্ছ্রে পুমান্ মূত্রং পীতং সদাহরুঙ্মূত্রযেত্, অথবা রক্তম্|

Adhikarana kaphajasya lakShaNam (5) · Śloka 5

কফজে বস্তিমেড্রগৌরবশোফবান্| সপিচ্ছং সবিবন্ধং চ|৫|

স০-কফজে কৃচ্ছ্রে বস্তিমেড্রগৌরবশোফযুক্তঃ সন্ সপিচ্ছং সবিবন্ধঃ চ-রুদ্ধ্বা রুদ্ধ্বা, মূত্রং মূত্রযেত্|

Adhikarana tridoShajasya lakShaNam (5) · Śloka 5

| সর্বৈঃ সর্বাত্মকং মলৈঃ||৫||

স০-সর্বৈঃ-ত্রিভির্দোষৈঃ সন্নিপতিতৈর্জাতে কৃচ্ছ্রে, সর্বাত্মকং-দোষত্রযলক্ষণলিঙ্গিতং, মূত্রং মূত্রযেত্|

Adhikarana ashmarIsaMprAptiH (6-7) · Śloka 7

ইদানীমশ্মরীং লক্ষযতি - - - - যদা বাযুর্মুখং বস্তেরাবৃত্য পরিশোষযেত্| মূত্রং সপিত্তং সকফং সশুক্রং বা তদা ক্রমাত্||৬|| সঞ্জাযতেঽশ্মরী ঘোরা পিত্তাদ্গোরিব রোচনা| শ্লেষ্মাশ্রযা চ সর্বা স্যাত্|৭|

স০-যদা-যস্মিন্ কালে, বাযুঃ কুপিতো বস্তের্মুখমাবৃত্য-রুদ্ধ্বা, পরিশোষযেন্মূত্রং কেবলং কদাচিত্সপিত্তং কদাচিত্সকফমথবা সশুক্রং মূত্রং তদা সঞ্জাযতেঽশ্মরী| ক্রমাত্-যথোত্তরম্, ঘোরা মূত্রাশ্মরী, ঘোরতরা পিত্তাশ্মরী, ঘোরতমা শ্লেষ্মাশ্মরী, ততোঽপি ঘোরা শুক্রাশ্মরী, ইতি ক্রমশব্দস্যার্থঃ| বাযুনা পিত্তং সংশোষ্য গোর্যথা রোচনা সঞ্জাযতে তথাঽশ্মরীতি| সর্বা চাশ্মরী শ্লেষ্মাশ্রযা| শ্লেষ্মা আশ্রযঃ-আধারো, যস্যাঃ সৈবম্| কফমাশ্রিত্য সর্বাঽশ্মরী স্যাদিত্যর্থঃ|

Adhikarana ashmaryAH pUrvarUpam (7-8) · Śloka 8

| অথাস্যাঃ পূর্বলক্ষণম্||৭|| বস্ত্যাধ্মানং তদাসন্নদেশেষু পরিতোঽতিরুক্| মূত্রে চ বস্তগন্ধত্বং মূত্রকৃচ্ছ্রং জ্বরোঽরুচিঃ||৮||

স০-অথ-অনন্তরং, অস্যাঃ পূর্বলক্ষণং-প্রাগ্রূপং, বস্ত্যাধ্মানাদি|

Adhikarana ashmaryAH sAmAnyalakShaNam (9-10) · Śloka 10

সামান্যলিঙ্গং রুড্নাভিসেবনীবস্তিমূর্ধসু| বিশীর্ণধারং মূত্রং স্যাত্তযা মার্গনিরোধনে||৯|| তহ্যপাযাত্সুখং মেহেদচ্ছং গোমেদকোপমম্| তত্সঙ্ক্ষোভাত্ক্ষতে সাস্রমাযাসাচ্চাতিরুগ্ভবেত্||১০||

স০-সামান্যং লক্ষণং নাভ্যাদিষু রুগ্ভবতি| তযা-অশ্মর্যা, মার্গনিরোধে সতি মূত্রং বিশীর্ণধারং-বিচ্ছিন্নধারং, ভবেত্| তহ্যপাযাত্-অশ্মর্যপগমাত্, নরঃ সুখং-অকৃচ্ছ্রেণ, মেহেত্-মূত্রং মুঞ্চেত্| কীদৃশম্ ? অচ্ছং-অকলুষম্, গোমেদকোপমম্, গোমেদকো-রত্নবিশেষঃ, উপমা যস্য তদেবম্| তস্যাঃ সঙ্ক্ষোভস্তত্সঙ্ক্ষোভাদ্যত্ক্ষতং ভবতি তস্মিন্ক্ষতে সতি সাস্রং-সলোহিতং, মেহেত্| আযাসাত্-অধ্বাদিকৃতাত্ শ্রমাত্, অতিরুগ্ভবেত্|

Adhikarana vAtajAyA lakShaNam (11-12) · Śloka 12

তত্র বাতাদ্ভৃশার্ত্যার্তো দন্তান্ খাদতি বেপতে| মৃদ্গাতি মেহনং নাভিং পীডযত্যনিশং ক্বণন্||১১|| সানিলং মুঞ্চতি শকৃন্মুহুর্মেহতি বিন্দুশঃ| শ্যাবা রূক্ষাঽশ্মরী চাস্য স্যাচ্চিতা কণ্টকৈরিব||১২||

স০-তত্র-তাস্বশ্মরীষু মধ্যে, বাতাদ্যাঽশ্মরো তস্যামুত্পন্নাযাং সত্যাং পুমান্ ভৃশার্ত্যার্তঃ-অত্যন্তং পীডযা পীডিতো, দন্তান্ খাদতি| তথা, বেপতে-কম্পতে| মেহনং-মেঢ্রং, মৃদ্গাতি-মলযতি| নাভিং চ হস্তাভ্যাং পীডযতি| কিং কুর্বন্ ? অনিশং-অনবরতং, ক্বণন্-নানাবিধদুঃখোদ্ভাবকং শব্দং বিদধত্| তথা, সহানিলেন-বাতসহিতং, শকৃন্মুঞ্চতি| তথা, মুহুর্মেহতি-মূত্রং পুনঃপুনঃ সৃজতি| বিন্দুশো-বিন্দুং বিন্দুং কৃত্বা| অস্য চ-নরস্য, অশ্মরী শ্যাবা বর্ণতঃ, তথা রূক্ষা কণ্টকৈশ্চিতেব-ব্যাপ্তা, ভবেত্|

Adhikarana pittajAyA lakShaNam (13) · Śloka 13

পিত্তেন দহ্যতে বস্তিঃ পচ্যমান ইবোষ্মবান্| ভল্লাতকাস্থিসংস্থানা রক্তা পীতাঽসিতাঽশ্মরী||১৩||

স০-পিত্তেন যাঽশ্মরী তযা বস্তির্দহ্যতে| পচ্যমান ইব ঊষ্মবান্-সন্তাপযুক্তো ভবতি| সা চাশ্মরী ভল্লাতকাস্থিসংস্থানা-তদাকারা স্যাত্| তথা, বর্ণতো রক্তা পীতা তথাঽসিতা-কৃষ্ণচ্ছাযা|

Adhikarana kaphajAyA lakShaNam (14) · Śloka 14

বস্তির্নিস্তুদ্যত ইব শ্লেষ্মণা শীতলো গুরুঃ| অশ্মরী মহতী শ্লক্ষ্ণা মধুবর্ণাঽথবা সিতা||১৪||

স০-শ্লেষ্মণা জাতাযামশ্মর্যাং বস্তির্নিস্তুদ্যত ইব শীতলো গুরুশ্চ স্যাত্| অশ্মরী চ মহতী-স্থূলা বাতপিত্তোত্থাভ্যাং সকাশাত্| তথা, শ্লক্ষ্ণা-কোমলা| মধুবর্ণা-মাক্ষিকাভা| অথবা, সিতা-শুক্লা|

Adhikarana etAstisro bAlAnAM bhavanti (15) · Śloka 15

এতা ভবন্তি বালানাং তেষামেব চ ভূযসা| আশ্রযোপচযাল্পত্বাদ্গ্রহণাহরণে সুখাঃ||১৫||

স০-এতাঃ-তিস্রোঽশ্মর্যো, বালানামেব ভবন্তি| তথা চ তন্ত্রান্তরে (সুশ্রুতে নি. অ. ৩|১১)- "তিস্রোঽশ্মর্যো দিবাস্বপ্নশীলনাধ্যশনশীতস্নিগ্ধমধুরাহারপ্রিযত্বাদ্বালানামেব ভবন্তি|" ইতি| তেষাং চ বালানাং জাতাস্তা ভূযসা গ্রহণাহরণে সুখাঃ| গ্রহণং-বডিশাদিনা, আহরণং-শস্ত্রাদিনা, তস্মিন্ সুখাঃ-সুখোপাযাঃ| অত্রৈব হেতুমাহ-আশ্রযেত্যাদি| আশ্রযঃ-আধারঃ, উপচযো-বৃদ্ধিঃ, তযোরল্পত্বং, তস্মাদ্ধেতোর্বলানামশ্মর্যা আশ্রযোঽল্পো ভবতি, যত্রাসাবশ্মরী জাযতে| অত এব চাশ্রযানুসারেণোপচযোঽপ্যশ্মর্যা বালানামল্পো ভবতি| অতস্তা গ্রহণাহরণে সুখাঃ| মহতাং তু যথোক্তহেত্বভাবাদ্গ্রহণাহরণে তা দুঃখাবহাঃ|

Adhikarana shukrAshmarI mahatAmeva, shukrAshmaryAH saMprAptiH, shukrAshmaryAH lakShaNam (16-18) · Śloka 18

শুক্রাশ্মরী তু মহতাং জাযতে শুক্রধারণাত্| স্থানাচ্চ্যুতমমুক্তং হি মুষ্কযোরন্তরেঽনিলঃ||১৬|| শোষযত্যুপসঙ্গৃহ্য শুক্রং তচ্ছুষ্কমশ্মরী| বস্তিরুক্কৃচ্ছ্রমূত্রত্বমুষ্কশ্বযথুকারিণী||১৭|| তস্যামুত্পন্নমাত্রাযাং শুক্রমেতি বিলীযতে| পীডিতে ত্ববকাশেঽস্মিন্|১৮|

স০-তুরবধারণে| মহতামেব শুক্রাশ্মরী জাযতে, ন বালানাম্, তথাবিধস্য তেষাং শুক্রস্যাভাবাত্| কুতো জাযতে ? শুক্রধারণাত্-হর্ষাদ্যুদীরণাত্স্থানচ্যুতস্য শুক্রস্য ধারণাত্| অত এবাহ-স্থানাদিত্যাদি| যস্মাত্স্থানাচ্চ্যুতং-পরিভ্রষ্টং, বহিরমুক্তং-অত্যক্তং, তদানীং বাযুর্মুষ্কযোঃ-বৃষণযোঃ, অন্তরে-মধ্যে, শোষযতি| কিং কৃত্বা ? উপসঙ্গৃহ্য,-শুক্রং সর্বতো গৃহীত্বা| তচ্চ শুষ্কং সদশ্মরীতি ভণ্যতে| সা চ বস্তিরুগাদিকারিণী| তস্যামুত্পন্নমাত্রাযাং-ন চিরকালোত্পন্নাযাং, পীডিতে-হস্তাদিনাঽভিভূতে, অস্মিন্নবকাশে-শুক্রাশ্মরীস্থানে, শুক্রমেতি-আগচ্ছতি, তথা বিলীযতে চ, ইতি চশব্দো লুপ্তনির্দিষ্টো বোধ্যঃ| বিশেষেণ লীযতে-তত্রৈব সুষ্ঠু শ্লিষ্যতে, কঠিনত্বাত্|

Adhikarana sharkarAyAH lakShaNam (18-19) · Śloka 19

| অশ্মর্যেব চ শর্করা||১৮|| অণুশো বাযুনা ভিন্না সা ত্বস্মিন্ননুলোমগে| নিরেতি সহ মূত্রেণ প্রতিলোমে বিবধ্যতে||১৯||

স০-অশ্মর্যেব চ পবনেনাণুশো ভিন্না সতী শর্করা স্যাত্, ন তু তস্যা অন্যদুপাদানকারণমিত্যর্থঃ| সা-শর্করা, অস্মিন্-পবনে, অনুলোমগে-অনুলোমং কৃত্বা স্থিতে সতি, মূত্রেণ সহ নিরেতি-বহির্নিষ্ক্রামতি| প্রতিলোমে বাযৌ সা সর্করা বিবধ্যতে- ন তু বহির্নিষ্ক্রামতি| অশ্মরী ত্বনুলোমগেঽপি মরুতি ন নিরেতি-মূত্রেণ সহ ন নিষ্ক্রামতি, ইত্যনযোর্ভেদঃ| অশ্মরীণাং ভল্লাতকাদিসংস্থাননির্দেশস্তদনুসারেণাহরণার্থং বস্ত্যবযববিপাটনমুপযুজ্যতে| শ্যাবাদিবর্ণনির্দেশশ্চ বহির্নিষ্ক্রান্তানাং শ্যাবাদিবর্ণনিদর্শনেন বাতাদীননুমায তত্কৃতানাং ব্রণানাং চিকিত্সার্থমুপযুজ্যতে| ননু চ, সংস্থানেনৈব বাতাদ্যনুমানমশ্মরীব্রণস্য ভবিষ্যতীতি বর্ণনির্দেশোঽনর্থকঃ| মৈবম্| সংস্থানং প্রাযিকমিতি কেচিন্মন্যন্তে, তস্মাদ্বর্ণনির্দেশোঽপি বাচ্যঃ| প্রাযিকত্বে চ তদ্দ্বযোরুপাদানং লিঙ্গম্|

Adhikarana vAtabasteH lakShaNam (20-23) · Śloka 23

অথ বাতবস্ত্যাদীনাহ - - - - মূত্রসন্ধারিণঃ কুর্যাদ্বুদ্ধ্বা বস্তের্মুখং মরুত্| মূত্রসঙ্গং রুজং কণ্ডূং কদাচিচ্চ স্বধামতঃ||২০|| প্রচ্যাব্য বস্তিমুদ্বৃত্তং গর্ভাভং স্থূলবিপ্লুতম্| করোতি তত্র রুগ্দাহস্পন্দনোদ্বেষ্টনানি চ||২১|| বিন্দুশশ্চ প্রবর্তেত মূত্রং বস্তৌ তু পীডতে| ধারযা দ্বিবিধোঽপ্যেষ বাতবস্তিরিতি স্মৃতঃ||২২|| দুস্তরো দুস্তরতরো দ্বিতীযঃ প্রবলানিলঃ| |২৩|

স০-মূত্রসন্ধারিণঃ পুরুষস্য বস্তেঃ-মূত্রধারস্য, মুখং-দ্বারং, রুদ্ধ্বা মারুতো মূত্রসঙ্গং কুর্যাদ্রুজং কণ্ডূং চ| স বাতবস্তির্মূত্রাঘাতবিশেষঃ| কদাচিত্-অদৃষ্টবশাত্, বাযুস্তং বস্তিং স্বধামতঃ-স্বস্থানাত্, প্রচ্যাব্য-চ্যাবযিত্বা, উদ্বৃত্তং-ঊর্ধ্বমুখং, গর্ভাভং-গর্ভসদৃশং, স্থূলং-স্বপ্রমাণাত্ প্রবৃদ্ধং, তথা বিপ্লুতং-চঞ্চলং, করোতি| চশব্দান্ন কেবলং বস্তিভ্রংশমেবংবিধং করোতি, যাবত্তত্র রুগাদীনপি| মূত্রং চ বিন্দুশঃ-বিন্দুবিন্দুঃ প্রবর্ততে| বস্তৌ চ পীডিতে-হস্তাদিনা, মূত্রং ধারযা-অবিচ্ছিন্নং, প্রবর্ততে| এষ দ্বিবিধো বাতবস্তিরিতি নাম্না স্মৃতঃ| স চ প্রথমো দুস্তরো-দুঃখেন কৃচ্ছ্রেণ তরিতুং শক্যতে| দ্বিতীযো বাতবস্তির্দুস্তরতরো যতঃ প্রবলানিলঃ| অত এব চাত্র প্রবলানিলত্বান্মূত্রস্য বিন্দুশঃ প্রবর্তনম্|

Adhikarana vAtAShThIlAyAH lakShaNam (23-24) · Śloka 24

| শকৃন্মার্গস্য বস্তেশ্চ বাযুরন্তরমাশ্রিতঃ||২৩|| অষ্ঠীলাভং ঘনং গ্রন্থিং করোত্যচলমুন্নতম্| বাতাষ্ঠীলেতি সাঽঽধ্মানবিণ্মূত্রানিলসঙ্গকৃত্||২৪||

স০-শকৃন্মার্গস্য-গুদস্য, বস্তেশ্চান্তরং-মধ্যং, বাযুরাশ্রিতঃ সন্ গ্রন্থিমষ্ঠীলাভং ঘনমচলমুন্নতং করোতি| সা বাতাষ্ঠীলেত্যুচ্যতে| সা চাধ্মানাদিকৃত্|

Adhikarana vAtakuNDalikAyAH lakShaNam (25-26) · Śloka 26

বিগুণঃ কণ্ডলীভূতো বস্তৌ তীব্রব্যথোঽনিলঃ| আবিধ্য মূত্রং ভ্রমতি সস্তম্ভোদ্বেষ্টগৌরবঃ||২৫|| মূত্রমল্পাল্পমথবা বিমুঞ্চতি শকৃত্সৃজন্| বাতকুণ্ডলিকেত্যেষা|২৬|

স০-বিগুণঃ-কুপিতো ন ত্বনুলোমগঃ, তথা দোষদেশাদিসহকারিকারণবশাত্ কুণ্ডলাকারগতিঃ, তথা তীব্রব্যথঃ, কার্যে কারণোপচারাদেবমুক্তঃ, তথা সহ স্তম্ভেন-স্তব্ধতযা, তথোদ্বেষ্টেন গৌরবেণ চ বর্ততে| স এবংভূতো বাযুর্মূত্রমাবিধ্য-ক্ষোভযিত্বা বস্তৌ ভ্রমতি| অথবা ন মূত্রমাবিধ্য ভ্রমতি| কিম্ভূতস্তর্হি ? শকৃত্-পুরীষং, সৃজন্-বিসর্গং কুর্বন্, মূত্রমল্পাল্পং-স্তোকং স্তোকং কৃত্বা, বিমুঞ্চতি| এবংরূপা বাতকুণ্ডলিকোচ্যতে|

Adhikarana mUtrAtItasya lakShaNam (26-27) · Śloka 27

| মূত্রং তু বিধৃতং চিরম্||২৬|| ন নিরেতি বিবদ্ধং বা মূত্রাতীতং তদল্পরুক্| |২৭|

স০-মূত্রং তু চিরং বিধৃতং ন নিরেতি-ন প্রবর্ততে| অথবা পবনবশাদ্বিবদ্ধং নির্গচ্ছত্যল্পরুক্ তন্মূত্রাতীতং কথ্যতে|

Adhikarana mUtrajaTharasya lakShaNam (27-29) · Śloka 29

| বিধারণাত্প্রতিহিতং বাতোদাবর্তিতং যদা||২৭|| নাভেরধস্তাদুদরং মূত্রমাপূরযেত্তদা| কুর্যাত্তীব্ররুগাধ্মানমপক্তিং মলসঙ্গ্রহম্||২৮|| তন্মূত্রজঠরম্| |২৯|

স০-বিধারণাত্-মূত্রবেগস্য রোধাত্, প্রতিহিতং মূত্রং কর্তৃভূতং বাতেনোদাবর্তিতং যদা নাভেরধস্তাদুদরং কর্মভূতমাপূরযেত্ তদা তীব্ররুজাদিকং কুর্যাত্, তন্মূত্রজঠরমিত্যুচ্যতে|

Adhikarana mUtrotsa~ggasya lakShaNam (29-30) · Śloka 30

ছিদ্রবৈগুণ্যেনানিলেন বা| আক্ষিপ্তমল্পং মূত্রং তদ্বস্তৌ নালেঽথবা মণৌ||২৯|| স্থিত্বা স্রবেচ্ছনৈঃ পশ্চাত্সরুজং বাঽথ নীরুজম্| মূত্রোত্সঙ্গঃ স বিচ্ছিন্নতচ্ছেষগুরুশেফসঃ||৩০||

স০-ছিদ্রবৈগুণ্যেন-মূত্রদ্বারদোষেণ, অনিলেন বা তথাভূতেন, যদাক্ষিপ্তং মূত্রমল্পং-কিঞ্চিচ্ছেষং মূত্রং, তদ্বস্তৌ স্থিতমথবা নালে মণিকন্দে বা স্থিতম্| তত্র স্থিত্বা পশ্চাত্-অনন্তরং, শনৈঃ-মন্দং মন্দং কৃত্বা, সরুজমথবা নীরুজং স্রবেত্| পুংসঃ কিম্ভূতস্য ? বিচ্ছিন্নতচ্ছেষগুরুশেফসঃ| তদতি প্রকৃতং মূত্রং পরামৃশ্যতে, তস্য-মুক্তমূত্রস্য, শেষস্তচ্ছেষঃ, বিচ্ছিন্নশ্চাসৌ তচ্ছেষশ্চ বিচ্ছিন্নতচ্ছেষঃ, তেন গুরুশেফো-গুরু মেঢ্রং, যস্য স বিচ্ছিন্নতচ্ছেষগুরুশেফাঃ, তস্য বিচ্ছিন্নতচ্ছেষগুরুশেফসঃ| স এবংবিধঃ সন্ মূত্রোত্সঙ্গ উচ্যতে|

Adhikarana mUtragrantheH lakShaNam (31) · Śloka 31

অন্তর্বস্তিমুখে বৃত্তঃ স্থিরোঽল্পঃ সহসা ভবেত্| অশ্মরীতুল্যরুক্ গ্রন্থির্মূত্রগ্রন্থিঃ স উচ্যতে||৩১||

স০-বস্তের্মুখস্য মধ্যে গ্রন্থির্বৃত্তো-বর্তুলঃ, তথা স্থিরোঽল্পশ্চ সহসা-ঝটিত্যেব, ভবেত্| অশ্মরীতুল্যরুগ্ গ্রন্থিঃ স মূত্রগ্রন্থিরুচ্যতে|

Adhikarana mUtrashukrasya lakShaNam (32-33) · Śloka 33

মূত্রিতস্য স্ত্রিযং যাতো বাযুনা শুক্রমুদ্ধতম্| স্থানাচ্চ্যুতং মূত্রযতঃ প্রাক্ পশ্চাদ্বা প্রবর্ততে||৩২|| ভস্মোদকপ্রতীকাশং মূত্রশুক্রং তদুচ্যতে| |৩৩|

স০-সঞ্জাতমূত্রস্য পুংসঃ স্ত্রিযং গচ্ছতো মূত্রযতো-মূত্রং কুর্বতঃ, স্থানাচ্চ্যুতং শুক্রং বাযুনোদ্ধতং-ধ্মাতং, ভস্মোদকেন প্রতীকাশং-তুল্যং, প্রাক্ মূত্রিতাত্ পশ্চাদ্বা যত্ প্রবর্ততে শুক্রং তন্মূত্রশুক্রমুচ্যতে|

Adhikarana viDvighAtasya lakShaNam (33-34) · Śloka 34

| রূক্ষদুর্বলযোর্বাতাদুদাবর্তং শকৃদ্যদা||৩৩|| মূত্রস্রোতোঽনুপর্যেতি সংসৃষ্টং শকৃতা তদা| মূত্রং বিট্তুল্যগন্ধং স্যাদ্বিড্বিঘাতং তমাদিশেত্||৩৪||

স০-রূক্ষদুর্বলযোঃ পুংসোর্বাতাদুদাবর্তং-পীডিতং, শকৃদ্যদা মূত্রস্রোতোঽনুপর্যেতি-মূত্রস্রোতোঽভিত আগচ্ছতি, তদা শকৃতা সংসৃষ্টং মূত্রং পুরীষসদৃশগন্ধং স্যাত্, তং বিড্বিঘাতমিত্যাদিশেত্|

Adhikarana uShNavAtasya lakShaNam (35-36) · Śloka 36

পিত্তং ব্যাযামতীক্ষ্ণোষ্ণভোজনাধ্বাতপাদিভিঃ| প্রবৃদ্ধং বাযুনা ক্ষিপ্তং বস্ত্যুপস্থার্তিদাহবত্||৩৫|| মূত্রং প্রবর্তযেত্পীতং সরক্তং রক্তমেব বা| উষ্ণং পুনঃপুনঃ কৃচ্ছ্রাদুষ্ণবাতং বদন্তি তম্||৩৬||

স০-পিত্তং কর্তৃ ব্যাযামাদিভিঃ প্রবৃদ্ধং তথা বাতেন ক্ষিপ্তং বস্ত্যুপস্থার্তিদাহযুক্তং মূত্রং কর্মভূতং প্রবর্তযেত্| কিম্ভূতম্ ? পীতং তথা সহ রক্তেন সরক্তং রক্তমেব বা কেবলং তথোষ্ণং মুহুর্মুহুঃ কৃচ্ছ্রেণ মূত্রযেত্, তং উষ্ণবাতং বদন্তি|

Adhikarana mUtrakShayasya lakShaNam (37) · Śloka 37

রূক্ষস্য ক্লান্তদেহস্য বস্তিস্থৌ পিত্তমারুতৌ| মূত্রক্ষযং সরুগ্দাহং জনযেতাং তদাহ্বযম্||৩৭||

স০-রূক্ষস্য পুংসস্তথা ক্লান্তদেহস্য-গ্লানশরীরস্য, বস্তিস্থৌ পিত্তমারুতৈ সরুগ্দাহং মূত্রস্য ক্ষযং জনযেতাং-উত্পাদযেতাম্| তদাহ্বযং-মূত্রক্ষযসংজ্ঞম্, মূত্রক্ষযমিত্যর্থঃ|

Adhikarana mUtrasAdasya lakShaNam (38-39) · Śloka 39

পিত্তং কফো দ্বাবপি বা সংহন্যেতেঽনিলেন চেত্| কৃচ্ছ্রান্মূত্রং তদা পীতং রক্তং শ্বেতং ঘনং সৃজেত্||৩৮|| সদাহং রোচনাশঙ্খচূর্ণবর্ণং ভবেচ্চ তত্| শুষ্কং সমস্তবর্ণং বা মূত্রসাদং বদন্তি তম্||৩৯||

স০-পিত্তমথবা কফো ব্যস্তোঽনিলেন সংহন্যতে-সমন্তাত্পীড্যত আক্রম্যতে| অথবা দ্বাবপি-সংসর্গরূপৌ, তেন হন্যেতে যদি, তদা কৃচ্ছ্রেণ মূত্রং পীতাদিনৈকৈকেন বর্ণেন শ্বেতান্তেন যুক্তং ঘনং সদাহং সৃজেত্-মুঞ্চেত্| তচ্চ শুষ্কং কালান্তরেণ রোচনাশঙ্খচূর্ণবর্ণং ভবেত্, কদাচিদ্রোচনাচূর্ণবর্ণং কদাচিচ্ছঙ্খচূর্ণবর্ণং কদাচিত্পীতাদিসমস্তবর্ণং বা স্যাত্, তং মূত্রসাদং বদন্তি|

Adhikarana mUtrapravRuttijAnAmupasaMhAraH (9) · Śloka 9

ইতি বিস্তরতঃ প্রোক্তা রোগা মূত্রাপ্রবৃত্তিজাঃ| নিদানলক্ষণৈরূর্ধ্বং বক্ষ্যন্তেঽতিপ্রবৃত্তিজাঃ||৪০|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে মূত্রাঘাতনিদানং নাম নবমোঽধ্যাযঃ||৯||

স০-ইতি-এবং, বিস্তরেণ মূত্রাপ্রবৃত্তিঃ-অপ্রবর্তনং, ততো জাতা রোগাঃ, নিদানানি চ লক্ষণানি চ, তৈঃ প্রকর্ষেণোক্তাঃ| ঊর্ধ্বমিত্যতোঽধ্যাযাদনন্তরং তুল্যস্থানসঙ্খ্যাদিত্বাত্ মূত্রাতিপ্রবৃত্তিজাঃ-প্রমেহাখ্যাঃ, রোগা বক্ষ্যন্তে-বদিষ্যন্তে| অনেনাস্য গ্রন্থকৃতা যুক্ত্যা সম্বন্ধোঽভিহিত ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে মূত্রাঘাতনিদানং নাম নবমোঽধ্যাযঃ সমাপ্তঃ|| ৯||