13. pāṇḍurōgaśōphavisarpanidānadhyāyaḥ

Adhikarana adhyAyopakramaH · Śloka

উদরনিদানাদনন্তরং পাণ্ডুশোফবিসর্পনিদানমারভ্যতে|

Adhikarana pANDurogashophavisarpanidAnAdhyAyaH, pANDurogasya saMprAptiH (2-4) · Śloka 4

যতো যথৈবোদরং দোষসঙ্ঘাতজং তথৈতেঽপি, ইত্যাহ - - - - অথাতঃ পাণ্ডুরোগশোফবিসর্পনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২|| পিত্তপ্রধানাঃ কুপিতা যথোক্তৈঃ কোপনৈর্মলাঃ| তত্রানিলেন বলিনা ক্ষিপ্তং পিত্তং হৃদি স্থিতম্||১|| ধমনীর্দশ সম্প্রাপ্য ব্যাপ্নুবত্সকলাং তনুম্| শ্লেষ্মত্বগ্রক্তমাংসানি প্রদূষ্যান্তরমাশ্রিতম্||২|| ত্বঙ্মাংসযোস্তত্কুরুতে ত্বচি বর্ণান্ পৃথগ্বিধান্| পাণ্ডুহারিদ্রহরিতান্ পাণ্ডুত্বং তেষু চাধিকম্||৩|| যতোঽতঃ পাণ্ডুরিত্যুক্তঃ স রোগঃ| |৪|

স০- যত্র মলাঃ-বাতাদযঃ, পিত্তপ্রধানা যথোক্তৈঃ-সর্বরোগনিদানাদ্যুক্তৈঃ, কোপনৈঃ কুপিতাঃ-ক্রুদ্ধাঃ, পাণ্ডুরোগহেতবঃ| কথম্ ? ইত্যাহ-তত্রেত্যাদি| [ তত্র- ] তেষু তথাভূতেষু সত্সু, বাতেন বলিনা-বলবতা, ক্ষিপ্তং পিত্তং হৃদি স্থিতমনন্তরং তত্পিত্তং ধমনীর্দশ-হৃদি স্থিতাঃ, সম্প্রাপ্য-আশ্রিত্য, সকলাং তনুং ব্যাপ্নুবত্-অশ্নুবানম্| সকলশব্দোপাদানং মূত্রপুরীষাদীনামপি গ্রহণার্থম্| অত এবাখ্যাস্যতি (শ্লো. ৯) - "কৃষ্ণরূক্ষারুণসিরানখবিণ্মূত্রনেত্রতা|" ইতি| তথা শ্লেষ্মত্বগ্রক্তমাংসানি প্রদূষ্য| কিম্ভূতং পিত্তম্ ? ত্বঙ্মাসযোরন্তরং-মধ্যমাশ্রিতম্| তত্-পিত্তং, ত্বচি বর্ণান্ পৃথগ্বিধান্-নানাপ্রকারান্, পাণ্ডুহারিদ্রহরিতান্ কুরুতে| তেষু-বর্ণেষু মধ্যে, যতো-যস্মাত্, অতিশযেন পাণ্ডুত্বমধিকমতঃ-অস্মাত্, স রোগঃ পাণ্ডুরিত্যুক্তঃ-সংজ্ঞিতঃ| ননু, 'পিত্তপ্রধানাঃ' ইতি কথমুক্তম্ ? যাবতা (যতো) বাযোর্বলীযস্ত্বাত্ 'বাতপ্রধানাঃ' ইতি বক্তুং যুক্তং স্যাত্| বলীযস্ত্বং চানন্তরমেব প্রতিপাদিতং 'তত্রানিলেন বলিনা ক্ষিপ্তং' ইতি| অসদেতত্| যতো নাত্র বলীযস্ত্বাবলীযস্ত্বকৃতে প্রাধান্যাপ্রাধান্যে বিবক্ষিতে| কিন্তর্হি ? পাণ্ডুরোগকরণং প্রতি কর্তৃত্বাকর্তৃত্বে| পিত্তস্য চ পাণ্ডুরোগকরণং প্রতি মুখ্যং কর্তৃত্বম্, অতঃ 'পিত্তপ্রধানাঃ' ইতি যুক্তমুক্তম্| ননু, যদি ত্রযো দোষাঃ পাণ্ডুরোগহেতবঃ, কথং তর্হি বক্ষ্যতি ? (শ্লো. ৭) - "স পঞ্চধা পৃথগ্দোষৈঃ সমস্তৈর্মৃত্তিকাদনাত্|" ইতি| উচ্যতে| সর্বঃ পাণ্ডুরোগস্ত্রিদোষজ এব| কিন্তু হেতুবিশেষৈর্যো রূপভেদস্তেন পঞ্চাত্মকঃ শোফবত্, ইতি ন কিঞ্চিদত্রাযুক্তম্|

Adhikarana pANDurogasya sAmAnyalakShaNam (4-7) · Śloka 7

তেন গৌরবম্| ধাতূনাং স্যাচ্চ শৈথিল্যমোজসশ্চ গুণক্ষযঃ||৪|| ততোঽল্পরক্তমেদস্কো নিঃসারঃ স্যাচ্ছ্লথেন্দ্রিযঃ| মৃদ্যমানৈরিবাঙ্গৈর্না দ্রবতা হৃদযেন চ||৫|| শূনাক্ষিকূটঃ সদনঃ কোপনঃ ষ্ঠীবনোঽল্পবাক্| অন্নদ্বিট্ শিশিরদ্বেষী শীর্ণরোমা হতানলঃ||৬|| সন্নসক্থো জ্বরী শ্বাসী কর্ণক্ষ্বেডী ভ্রমী শ্রমী| |৭|

স০-তেন-পাণ্ডুরোগেণ, ধাতূনাং-রসরুধিরাদীনাং, গৌরবং শৈথিল্যং চ স্যাত্| তথা, ওজসো গুণক্ষযো-মাধুর্য(মন্দ)শৈত্যাদীনামোজোগুণানাং (হৃ. নি. অ. ৬|১) বিনাশঃ| তত এব-ওজোগুণক্ষযাত্, পাণ্ড্বামযী নরোঽল্পরক্তমেদস্কঃ| অল্পে রক্তমেদসী যস্য স এবম্| তথা, নিঃসারো-দুর্বলঃ স্যাত্|তথা শ্লথেন্দ্রিযঃ| [ শ্লথানি- ] শিথিলানি, ইন্দ্রিযাণি-বাক্পাণিপাদপাযূপস্থরূপাণি, যস্য স শ্লথেন্দ্রিযঃ| তথা, ইন্দ্রিযশব্দেন বুদ্ধীন্দ্রিযাণাং চক্ষুরাদীনামধিষ্ঠানান্যুপলক্ষ্যন্তে| ননু, পিত্তপ্রধানাঃ কুপিতা ইতি পিত্তবৃদ্ধিরুক্তা| পিত্তবৃদ্ধ্যা চ রক্তবৃদ্ধ্যা ভবিতব্যম্| তত্কথমুক্তমল্পরক্ততেতি ? অত্রোচ্যতে| দোষাণামন্যোন্যদূষণাত্ দূষস্য চ দোষৈর্দূষিতত্বাত্ প্রসাদপরম্পরযাঽপুষ্টৌ সত্যাং কিট্টবাহুল্যাত্ পিত্ত[স্য]অধিক্যম্, ন রক্তস্য প্রসাদাত্মকস্য, ইতি পিত্তাধিক্যমল্পরক্ততা চেত্যুপপন্নম্| তথা, অঙ্গৈঃ-অবযবৈঃ, মৃদ্যমানৈরিবাসৌ নর উপলক্ষিতঃ, তথা হৃদযেন দ্রবতা চ| তথা, শূনাবক্ষিকূটৌ যস্য স এবম্| তথা, সদনঃ-অঙ্গসাদবান্| তথা, কোপনাদিকঃ স্যাত্|

Adhikarana pANDurogasya pa~jcavidhatvam (7) · Śloka 7

| স পঞ্চধা পৃথগ্দোষৈঃ সমস্তৈর্মৃত্তিকাদনাত্||৭||

স০-সঃ-পাণ্ডুরোগঃ, পঞ্চধা স্যাত্| কথম্ ? ইত্যাহ-পৃথগ্দোষৈঃ সন্নিপাতেন মৃদ্ভক্ষণাচ্চ| ননু, মৃত্তিকাদনাত্ পৃথগ্পাণ্ডুরোগো ন বাচ্যঃ, পৃথগ্বাতাদিদোষজে পাণ্ডুরোগেঽন্তর্ভূতত্বাত্| মৃদা হি বাতাদিপ্রকোপো বিধীযতে তিক্তোষণাদিভিরিব| বাতাদিপ্রকোপশ্চ পাণ্ডুরোগকৃত্| তস্মাত্পৃথঙ্মৃদো ন যুক্তো নির্দেশঃ| অত্র ব্রূমঃ| মৃদোঽন্যে যে বাতাদিপ্রকোপহেতবঃ পাণ্ডুরোগসম্পাদনে সম্ভাবনাযোগ্যাঃ, তে পাণ্ডুরোগং সম্পাদ্য হেতুস্বরূপসত্তযা বিনিবর্তন্তে| মৃত্তিকা তু তীক্ষ্ণৈঃ সংশোধনৈর্বিনা পাণ্ডুরোগং যাবত্কাযেঽবতিষ্ঠতে| ইত্যযং বাতাদিকোপহেতুভ্যোঽন্যেভ্যো মৃদঃ পাণ্ডুরোগং প্রতি বিশেষঃ| তস্মান্মৃদা পৃথক্ পাণ্ডুরোগো বক্তুং ন্যায্যঃ|

Adhikarana pANDurogasya pUrvarUpam (8-9) · Śloka 9

প্রাগ্রূপমস্য হৃদযস্পন্দনং রূক্ষতা ত্বচি| অরুচিঃ পীতমূত্রত্বং স্বেদাভাবোঽল্পবহ্নিতা||৮|| সাদঃ শ্রমো| |৯|

স০-অস্য পাণ্ডুরোগস্য হৃদযস্পন্দনাদি প্রাগ্রূপম্|

Adhikarana vAtajasya lakShaNam (9-10) · Śloka 10

অনিলাত্তত্র গাত্ররুক্তোদকম্পনম্| কৃষ্ণরূক্ষারুণসিরানখবিণ্মূত্রনেত্রতা||৯|| শোফানাহাস্যবৈরস্যবিট্শোষাঃ পার্শ্বমূর্ধরুক্| |১০|

স০-তত্র-তেষু পাণ্ডুরোগেষু মধ্যে, বাতাত্পাণ্ডুরোগে গাত্ররুগাদযঃ স্যুঃ|

Adhikarana pittajasya lakShaNam (10-11) · Śloka 11

| পিত্তাদ্ধরিতপীতাভসিরাদিত্বং জ্বরস্তমঃ||১০|| তৃট্স্বেদমূর্চ্ছাশীতেচ্ছা দৌর্গন্ধ্যং কটুবক্ক্রতা| বর্চোভেদোঽম্লকো দাহঃ|১১|

স০-পিত্তাদ্ধরিতপীতাভসিরাদিত্বং(ত্বাদি) স্যাত্|

Adhikarana kaphajasya lakShaNam (11-12) · Śloka 12

| কফাচ্ছুক্লসিরাদিতা||১১|| তন্দ্রা লবণবক্ত্রত্বং রোমহর্ষঃ স্বরক্ষযঃ কাসশ্চছর্দিশ্চ| |১২|

স০-কফাচ্ছুক্লসিরাদিতা[দি] স্যাত্|

Adhikarana sannipAtajasya lakShaNam (12) · Śloka 12

| নিচযান্মিশ্রলিঙ্গোঽতিদুঃসহঃ||১২||

স০-নিচযাত্-সন্নিপাতাত্, মিশ্রলিঙ্গঃ পাণ্ডুরোগঃ সোঽতিদুঃসহো-ঘোরতমঃ|

Adhikarana mRuttikAjasya lakShaNam (13-15) · Śloka 15

মৃত্কষাযাঽনিলং পিত্তমূষরা মধুরা কফম্| দূষযিত্বা রসাদীংশ্চ রৌক্ষ্যাদ্ভুক্তং বিরূক্ষ্য চ||১৩|| স্রোতাংস্যপক্বৈবাপূর্য কুর্যাদ্রুদ্ধ্বা চ পূর্ববত্| পাণ্ডুরোগং ততঃ শূননাভিপাদাস্যমেহনঃ||১৪|| পুরীষং কৃমিমন্মুঞ্চেদ্ভিন্নং সাসৃক্কফং নরঃ| |১৫|

স০-মৃদ্ভক্ষিতা কষাযরসা বাতং দূষযিত্বা পাণ্ডুরোগং কুর্যাত্| ঊষরা-সক্ষারমৃত্তিকা, পিত্তং দূষযিত্বা পাণ্ডুরোগং কুর্যাত্| মধুরা মৃত্তিকা কফং দূষযিত্বা পাণ্ডুরোগং কুর্যাত্| তথা, রসাদীংশ্চ ধাতূন্ দূষযিত্বা রৌক্ষ্যাচ্চ হেতোর্ভুক্তং বিরূক্ষ্য চেতি| যতঃ স্বভাবত এব মৃত্তিকা রূক্ষা| তস্মাদ্ভুক্তং বিরূক্ষযতি| স্রোতাংসি চাপূর্য রুদ্ধ্বাঽপক্বৈব সতী পাণ্ডুরোগং পূর্ববত্ পিত্তপ্রধানাঃ কুপিতা ইত্যাদিনা ন্যাযেন কুর্যাত্| মৃত্তিকাযা গুরুত্বাত্ পাকাভাবঃ| অথবা অশব্দোঽত্রেষদর্থে| অলোমিকা এডকেতি যথা| তেন কিঞ্চিত্পক্বেতি গম্যতে| ততঃ-তেন পাণ্ডুরোগেণ, শূননাভ্যাদিকঃ সন্ কৃম্যাদিযুতং পুরীষং মুঞ্চেত্|

Adhikarana kAmalAyAH lakShaNam (15-17) · Śloka 17

অথ প্রতিজ্ঞাবাক্যেঽনুক্তামপি কামলাং তুল্যহেত্বাদিকত্বাত্ প্রদর্শযন্নাহ - - - - | যঃ পাণ্ডুরোগী সেবেত পিত্তলং তস্য কামলাম্||১৫|| কোষ্ঠশাখাশ্রযাং পিত্তং দগ্ধ্বাঽসৃঙ্মাংসমাবহেত্| হারিদ্রনেত্রমূত্রত্বঙ্নখবক্ত্রশকৃত্তযা||১৬|| দাহাবিপাকতৃষ্ণাবান্ ভেকাভো দুর্বলেন্দ্রিযঃ||১৭|| কিং পাণ্ডুরোগিণ এব পিত্তলান্যাসেবমানস্য কামলা ভবেত্, উতাপাণ্ডুরোগিণোঽপি ? ইত্যাহ - - - - ভবেত্পিত্তোল্বণস্যাসৌ পাণ্ডুরোগাদৃতেঽপি চ||১৭||

স০-যো নরঃ পাণ্ডুরোগী সন্ পিত্তলং-মরিচকাঞ্চিকাদিদ্রব্যমত্যর্থং, সেবেত-উপযুঙ্ক্তে, তস্য-পাণ্ডুরোগিণঃ, পিত্তং কর্তৃ কামলামাবহেত্| কীদৃশীম্| কোষ্ঠশাখাশ্রযাম্| কোষ্ঠো-মহাস্রোতঃ, শাখা-রক্তাদযস্ত্বক্ চ, ইতি তদুভযমাশ্রযো যস্যাস্তাম্, কিং কৃত্বা ? রক্তং মাংসং চ দগ্ধ্বা| কথম্ ? হারিদ্রনেত্রমূত্রত্বঙ্নখবক্ত্রশকৃত্তযা| তদা চ পুরুষো দাহাদিমান্ মণ্ডূকচ্ছাযো দুর্বলেন্দ্রিযশ্চ স্যাত্| দুর্বলানি-স্ববিষযেঽপ্যশক্তানি, ইন্দ্রিযাণি যস্য স এবম্| স০-পাণ্ডুরোগমন্তরেণাপি পিত্তাধিকস্য নরস্য পিত্তলান্যাসেবমানস্যাসৌ কোষ্ঠশাখাশ্রযা কামলা স্যাত্, ন কেবলং পাণ্ডুরোগিণঃ|

Adhikarana kumbhakAmalAyAH lakShaNam (18) · Śloka 18

উপেক্ষযা চ শোফাঢ্যা সা কৃচ্ছ্রা কুম্ভকামলা| |১৮|

স০-উপেক্ষযা-চিকিত্সাং বিনা, সৈব-কামলা, যদা শোফাঢ্যা-শ্বযথুবহুলা, স্যাত্তদা কুম্ভকামলেত্যুচ্যতে| কৃচ্ছ্রা-কৃচ্ছ্রসাধ্যা|

Adhikarana halImakasya lakShaNam (18-20) · Śloka 20

হলীমকং লক্ষযতি - - - - | হরিতশ্যাবপীতত্বং পাণ্ডুরোগে যদা ভবেত্||১৮|| বাতপিত্তাদ্ভ্রমস্তৃষ্ণা স্ত্রীষ্বহর্ষো মৃদুর্জ্বরঃ| তন্দ্রাবলানলভ্রংশো লোঢরং তং হলীমকম্||১৯|| অলসং চেতি শংসন্তি| |২০|

স০-পাণ্ডুরোগে সতি যদা হরিতশ্যাবপীততা ভ্রমাদযশ্চ বাতপিত্তাত্স্যুঃ, অতশ্চ তং হলীমকং শংসন্তি, মুনয ইতি শেষঃ| তং চ হলীমকং, লোঢরং তথাঽলসং চাচক্ষতে|

Adhikarana shophasya saMprAptiH (20-22) · Śloka 22

তেষাং পূর্বমুপদ্রবাঃ| শোফপ্রধানাঃ কথিতাঃ স এবাতো নিগদ্যতে||২০|| ইতি পাণ্ডুরোগনিদানম্| অথ শোফনিদানম্| পিত্তরক্তকফান্বাযুর্দুষ্টো দুষ্টান্ বহিঃসিরাঃ| নীত্বা রুদ্ধগতিস্তৈর্হি কুর্যাত্ত্বঙ্মাংসসংশ্রযম্||২১|| উত্সেধং সংহতং শোফং তমাহুর্নিচযাদতঃ| সর্বং|২২|

স০-তেষাং-পাণ্ডুরোগপ্রকারাণাং, পূর্বমুপদ্রবা যতঃ শোফপ্রধানাঃ কথিতাঃ| অতঃ-অস্মাদ্ধেতোঃ, পাণ্ডুরোগনিদানাদনন্তরং শোফ এব ভণ্যতে, ন বিসর্পঃ| শোফঃ প্রধানঃ-প্রথমো, যেষাং ত এবং কথিতাঃ| ক্বঃ ? ইহৈব| যথোক্তম্ (শ্লো. ৬)- "শূনাক্ষিকূটঃ" ইত্যাদি| তথা (শ্লো. ১৪)- "শূননাভিপাদাস্যমেহনঃ" ইতি| স০-বহির্ভূতাঃ সিরা বহিঃসিরাঃ,-বাহ্যাঃ সিরাঃ| বাযুঃ পিত্তরক্তকফান্ কর্মভূতান্ বহিঃ সিরাঃ কর্মভূতা নীত্বোত্সেধং কুর্যাত্| নযতের্দ্বিকর্মকত্বাত্ পিত্তাদযো বহিঃসিরাশ্চ কর্ম| যথা,-অজাং নযতি গ্রামমিতি| তেনাযমর্থোঽবতিষ্ঠতে-বহিঃসিরাসু পিত্তাদীন্নীত্বেতি| কিম্ভূতো বাযুঃ ? দুষ্টঃ সন্,-কোপনৈঃ কুপিতঃ| কিম্ভূতমুত্সেধম্ ? ত্বক্ চ মাংসং চ ত্বঙ্মাংসে, তে সংশ্রযঃ-আশ্রযো, যস্য তম্| তৈর্হীতি হিশব্দোঽবধারণে| তৈরেব-বহিঃসিরাঃ প্রাপ্তৈঃ পিত্তরক্তকফৈঃ, রুদ্ধগতিঃ| অত এব সংহতং-সমন্তাদ্ধতং নিশ্চলমিব সম্পন্নং, উত্সেধম্| যতশ্চৈবং বাতপিত্তকফৈঃ শোফঃ সঞ্জাযতে, তস্মাত্সর্বং শোফং নিচযাত্-দোষত্রযাত্, আহুঃ|

Adhikarana shophasya navavidhatvam (22-23) · Śloka 23

ননু, এবং সতীদং বিরুধ্যতে "দোষৈঃ পৃথগ্দ্বযৈঃ সর্বৈ" ইতি| অত আহ - - - - | হেতুবিশেষৈস্তু রূপভেদান্নবাত্মকম্||২২|| দোষৈঃ পৃথগ্দ্বযৈঃ সর্বৈরভিঘাতাদ্বিষাদপি| |২৩|

স০-তুশব্দো বিশেষার্থঃ| যদ্যপি সর্বস্ত্রিদোষজঃ শোফস্তথাঽপি হেতুবিশেষৈর্যো রূপভেদস্তস্মান্নবাত্মকং শোফমাহুঃ| তথা হি-যোঽযং সন্নিপাতঃ শোফহেতুরেষ কদাচিত্সমং কৃত্বা কুপ্যতি কদাচিদ্বিষমং কৃত্বৈকদোষবৃদ্ধিস্বরূপতযা| এবং চ হেতুবিশেষৈর্যো লক্ষণভেদস্তস্মান্নবপ্রকারত্বং শোফস্য ন্যায্যমেব| লক্ষণভেদশ্চৈষাং স্পষ্ট এব| তথা চাভিঘাতাদ্ধেতোশ্চ যথাবদন্যল্লক্ষণং বিষাদ্ধেতোরন্যল্লক্ষণং তদ্বত্ পৃথগ্বাতাদেশ্চ যথাবদন্যত্ দ্বন্দ্বজে চান্যত্ সন্নিপাতজে চান্যদিতি| এবং লক্ষণবিশেষান্নবাত্মকমাহুঃ| উপলক্ষণং চেদম্, চিকিত্সাবিশেষাদপি হি নবাত্মক এব শোফঃ|

Adhikarana shophasya dvidhAtvam (23-24) · Śloka 24

| দ্বিধা বা নিজমাগন্তুং সর্বাঙ্গৈকাঙ্গজং চ তম্||২৩|| পৃথূন্নতগ্রথিততাবিশেষৈশ্চ ত্রিধা বিদুঃ| |২৪|

স০-অথবা নিজাগন্তুভেদেন দ্বিধা শ্বযথুমাহুঃ| তথা, তং-শোফং, সর্বাঙ্গজং-সর্বশরীরজং, একাঙ্গজং-একাবযবজং চ, ইতি পুনর্দ্বিপ্রকারমাহুঃ| পৃথুশ্চোন্নতশ্চ গ্রথিতশ্চ তেষাং ভাবঃ পৃথূন্নতগ্রথিততা, তযা বিশেষাস্তৈস্ত্রিধা-ত্রিপ্রকারং, শোফং বিদুঃ| বিদুরিতি "বিদ জ্ঞানে" ইত্যস্মাদুসাদেশঃ| পৃথুত্বেন-বিস্তীর্ণকৃতত্বেন বিশেষেণ, তথোন্নতত্বেন বিশেষেণ, তথা গ্রথিতস্বরূপত্বেন বিশেষেণেতি যোজ্যম্|

Adhikarana shophasya tridhAtvam, shophasya nidAnasaMprAptI (24-29) · Śloka 29

| সামান্যহেতুঃ শোফানাং দোষজানাং বিশেষতঃ||২৪|| ব্যাধিকর্মোপবাসাদিক্ষীণস্য ভজতো দ্রুতম্| অতিমাত্রমথান্যস্য গুর্বম্লস্নিগ্ধশীতলম্||২৫|| লবণক্ষারতীক্ষ্ণোষ্ণশাকাম্বু স্বপ্নজাগরম্| মৃদ্গ্রাম্যমাংসবল্লূরমজীর্ণশ্রমমৈথুনম্||২৬|| পদাতের্মার্গগমনং যানেন ক্ষোভিণাঽপি বা| শ্বাসকাসাতিসারার্শোজঠরপ্রদরজ্বরাঃ||২৭|| বিষূচ্যলসকচ্ছর্দিগর্ভবীসর্পপাণ্ডবঃ| অন্যে চ মিথ্যোপক্রান্তাস্তৈর্দোষা বক্ষসি স্থিতাঃ||২৮|| ঊর্ধ্বং শোফমধো বস্তৌ মধ্যে কুর্বন্তি মধ্যগাঃ| সর্বাঙ্গগাঃ সর্বগতং প্রত্যঙ্গেষু তদাশ্রযাঃ||২৯||

স০-বক্ষ্যমাণো গুর্বম্লস্নিগ্ধাদিকো বর্গঃ [ শোফানাং- ] শ্বযথূনাং নিজানামাগন্তূনাং চ, সামান্যহেতুঃ-উত্পত্তৌ কারণম্| দোষজানাং শ্বযথূনাং পুনরতিশযেন হেতুঃ, ন তথাঽঽগন্তূনাং, ইতি বিশেষশব্দেন দ্যোতযতি| ব্যাধিকর্মোপবাসাদিভিঃ ক্ষীণস্য, ব্যাধিনা-জ্বরাদিনা ক্ষীণস্য, তথা কর্মণা-পঞ্চবিধেন বমনবিরেচননিরূহানুবাসননস্যাখ্যেন, তথোপবাসেন, আদিগ্রহণাদন্যেন চ মার্গাদিনা ক্ষীণস্য, দ্রুতং কৃত্বা-সহসৈব, গুর্বাদিকং ভজতঃ| অথেতি সমুচ্চযে| ব্যাধ্যাদিক্ষীণলক্ষণেভ্যঃ সকাশাদন্যস্য স্বস্থাদেরপ্যতিমাত্রং-মাত্রামতিক্রম্য, ভজতো দোষা বক্ষসি স্থিতা ঊর্ধ্বং শোফং কুর্বন্তি, প্রকৃতত্বাদ্বক্ষস ঊর্ধ্বম্| বস্তৌ স্থিতা অধঃ শোফং কুর্বন্তি| মধ্যে স্থিতা দোষা মধ্যে শোফং কুর্বন্তি| গ্রাম্যাণাং-চটককুক্কুটাদীনাং, মাংসং গ্রাম্যমাংসম্| বল্লূরং-শুষ্কমাংসম্| স্বপ্নোঽত্রাহঃস্বপ্নো জাগরশ্চ রাত্রিজাগরো বোধ্যঃ| যানেন-তুরগাদিনা, ক্ষোভিণা-শরীরসংরম্ভজনকেন| তথা, শ্বাসাদযঃ পাণ্ডুপর্যন্তা রোগাঃ প্রাধান্যেন| তথা, অন্যেঽপি-শ্বাসকাসাদিব্যতিরিক্তা রোগাঃ, মিথ্যোপক্রান্তাঃ-মিথ্যোপচরিতা অযথাশাস্ত্রমুপক্রান্তাঃ, শোফহেতবঃ| তৈরপি দোষা বক্ষসি স্থিতা ঊর্ধ্বং শোফং কুর্বন্তি| বস্তৌ স্থিতা অধো, মধ্যগা মধ্যে, সর্বাঙ্গগাঃ সর্বগতং, প্রত্যঙ্গেষু তদাশ্রযাঃ, দোষাঃ শোফং কুর্বন্তি|

Adhikarana shophasya pUrvarUpam (30) · Śloka 30

তত্পূর্বরূপং দবথুঃ সিরাযামোঽঙ্গগৌরবম্| |৩০|

স০-তস্য-শ্বযথোঃ, পূর্বরূপং তত্পূর্বরূপম্| দবথুঃ-চক্ষুরাদিষু যস্তীব্র ঊষ্মা স ভণ্যতে| যদুক্তম্-"দবথুশ্চক্ষুরাদিভ্যস্তীব্রমূষ্মপ্রবর্তনম্|" ইতি| তথা, সিরাযামো-যত্র প্রদেশে শ্বযথুরুদ্বুভূষুস্তত্র সিরাণাং দৈর্ঘ্যমিব| তথা, অঙ্গগৌরবং স্যাত্|

Adhikarana vAtajasya lakShaNam (30-32) · Śloka 32

| বাতাচ্ছোফশ্চলো রূক্ষঃ খররোমাঽরুণাসিতঃ||৩০|| সঙ্কোচস্পন্দহর্ষার্তিতোদভেদপ্রসুপ্তিমান্| ক্ষিপ্রোত্থানশমঃ শীঘ্রমুন্নমেত্পীডিতস্তনুঃ||৩১|| স্নিগ্ধোষ্ণমর্দনৈঃ শাম্যেদ্রাত্রাবল্পো দিবা মহান্| ত্বক্ চ সর্ষপলিপ্তেব তস্মিংশ্চিমিচিমাযতে||৩২||

স০-বাতাচ্ছোফশ্চলাদিলক্ষণঃ|

Adhikarana pittajasya lakShaNam (33-34) · Śloka 34

পীতরক্তাসিতাভাসঃ পিত্তাদাতাম্ররোমকৃত্| শীঘ্রানুসারপ্রশমো মধ্যে প্রাগ্জাযতে তনুঃ||৩৩|| সতৃড্দাহজ্বরস্বেদদবক্লেদমদভ্রমঃ| শীতাভিলাষী বিড্ভেদী গন্ধী স্পর্শাসহো মৃদুঃ||৩৪||

স০-পিত্তাচ্ছোফঃ পীতরক্তাসিতাভাসাদিলক্ষণঃ| স চ মধ্যে-মধ্যপ্রদেশে, প্রাক্-পূর্বং, জাযতে| প্রাগ্গ্রহণং পশ্চাত্সকলেঽপি দেহদেশে স্যাদিতি দ্যোতযতি|

Adhikarana kaphajasya lakShaNam (35-37) · Śloka 37

কণ্ডূমান্ পাণ্ডুরোমত্বক্কঠিনঃ শীতলো গুরুঃ| স্নিগ্ধঃ শ্লক্ষ্ণঃ স্থিরঃ স্ত্যানো নিদ্রাচ্ছর্দ্যগ্নিসাদকৃত্||৩৫|| আক্রান্তো নোন্নমেত্কৃচ্ছ্রশমজন্মা নিশাবলঃ| স্রবেন্নাসৃক্ চিরাত্পিচ্ছাং কুশশস্ত্রাদিবিক্ষতঃ||৩৬|| স্পর্শোষ্ণকাঙ্ক্ষী চ কফাত্| |৩৭|

স০-কফাচ্ছোফঃ কণ্ডূযুতাদিলক্ষণঃ স্যাত্| তথা, আক্রান্তঃ-পীডিতঃ সন্, বাতিক ইব নোন্নমেত্| তথা, কৃচ্ছ্রে শমজন্মনী যস্য স এবম্| তথা, নিশাবলো-রাত্রাবধিক ইত্যর্থঃ| তথা, কুশশস্ত্রাদিভির্বিক্ষতঃ স শোফো ন রক্তং স্রবেত্| কিন্তর্হি ? চিরেণ পিচ্ছাং-লসীকাপরপর্যাযাং, স্রবেত্| তথা, স্পর্শাভিলাষী উষ্ণাভিলাষী চ স্যাত্|

Adhikarana dvidoShajAnAM lakShaNam (37) · Śloka 37

যথাস্বং দ্বন্দ্বজাস্ত্রযঃ| সঙ্করাদ্ধেতুলিঙ্গানাম্|৩৭|

স০-হেতবশ্চ লিঙ্গানি চ, তেষাং সঙ্করাত্-সঙ্কীর্ণত্বেন, যথাস্বং দ্বন্দ্বজাস্ত্রযঃ শোফাঃ, স্যুরিতি শেষঃ|

Adhikarana tridoShajasya lakShaNam (37) · Śloka 37

| নিচযান্নিচযাত্মকঃ||৩৭||

স০-নিচযাত্মকো-দোষত্রযজঃ শোফো, নিচযাত্-হেতুলিঙ্গনিচযাত্, স্যাত্|

Adhikarana abhighAtajasya lakShaNam (38-39) · Śloka 39

অভিঘাতেন শস্ত্রাদিচ্ছেদভেদক্ষতাদিভিঃ| হিমানিলোদধ্যনিলৈর্ভল্লাতকপিকচ্ছুজৈঃ||৩৮|| রসৈঃ শূকৈশ্চ সংস্পর্শাচ্ছ্বযথুঃ স্যাদ্বিসর্পবান্| ভৃশোষ্মা লোহিতাভাসঃ প্রাযশঃ পিত্তলক্ষণঃ||৩৯||

স০-তথা, শস্ত্রাদিচ্ছেদভেদক্ষতাদিভির্যঃ শোফঃ সোঽভিঘাতেন, বেদ্য ইতি শেষঃ| তথা, হিমেনানিলেন তথোদধ্যনিলেন-সাগরজেন বাযুনা, তথা রসৈঃ শূকৈশ্চ ভল্লাতকপিকচ্ছুজৈঃ সংস্পর্শাচ্ছ্বযথুর্বিসর্পবান্ ভবেত্| স চ ভৃশোষ্মা লোহিতাভাসশ্চ বাহুল্যেন চ পিত্তলক্ষণঃ স্যাত্| পিত্তশোফস্য লক্ষণং পিত্তশোফলক্ষণম্, পিত্তশোফলক্ষণমিব লক্ষণং যস্য স পিত্তলক্ষণঃ| সপ্তম্যুপমানপূর্বস্যেতি বহুব্রীহিরুত্তরপদলোপশ্চ|

Adhikarana viShajasya lakShaNam (40-42) · Śloka 42

বিষজঃ সবিষপ্রাণিপরিসর্পণমূত্রণাত্| দংষ্ট্রাদন্তনখাপাতাদবিষপ্রাণিনামপি||৪০|| বিণ্মূত্রশুক্রোপহতমলবদ্বস্ত্রসঙ্করাত্| বিষবৃক্ষানিলস্পর্শাদ্গরযোগাবচূর্ণনাত্||৪১|| মৃদুশ্চলোঽবলম্বী চ শীঘ্রো দাহরুজাকরঃ| |৪২|

স০-বিষজঃ শোফঃ সবিষাণাং প্রাণিনামঙ্গে পরিসর্পণাত্-গমনাত্, তথা তেষামেব মূত্রণাত্| তথা, দংষ্ট্রাদন্তনখানামাপাতাত্ অবিষপ্রাণিনামপি শোফঃ স্যাত্| অপিশব্দান্ন কেবলং সবিষপ্রাণিনাম্| তথা, বিণ্মূত্রশুক্রৈরুপহতং-তত্স্পর্শাদ্দূষিতমপ্রশস্তম্| বিণ্মূত্রশুক্রোপহতং চ তন্মলবচ্চ বিণ্মূত্রশুক্রোপহতমলবত্, তথাবিধং চ তদ্বস্ত্রং চ, তস্য সঙ্করঃ-সংস্পর্শঃ, তস্মাদপি শোফঃ স্যাত্| তথা বিষবৃক্ষাণামনিলস্তস্য সংস্পর্শাত্, গরযোগস্যাবচূর্ণনং-অবধ্বংসনং, তস্মাচ্চ মৃদ্বাদিগুণযুক্তঃ শ্বযথুঃ স্যাত্|

Adhikarana shophasya sAdhyAsAdhyatvam (42-4) · Śloka 4

| নবোঽনুপদ্রবঃ শোফঃ সাধ্যোঽসাধ্যঃ পুরেরিতঃ||৪২|| ইতি শোফনিদানম্||৪||

স০-নবঃ-অচিরোত্পন্নঃ, তথাঽনুপদ্রবঃ-উপদ্রবরহিতঃ, শোফঃ সাধ্যঃ| অসাধ্যঃ পুরা-বিকৃতিবিজ্ঞানীযে, ঈরিতঃ-অভিহিতঃ| যথোক্তম্ (হৃ. শা. অ. ৫|৯২) - "অনেকোপদ্রবযুতঃ পাদাভ্যাং প্রসৃতো নরম্| নারীং শোফো মুখাদ্ধন্তি কুক্ষিগুহ্যাদুভাবপি||" ইতি|

Adhikarana visarpasya aShTavidhatvam (43) · Śloka 43

শ্বযথুবদ্দোষৈর্দূষ্যৈশ্চ যতো বিসর্পো ভবতি,অতস্তন্নিদানং প্রকম্যতে - - - - অথ বিসর্পনিদানম্| স্যাদ্বিসর্পোঽভিঘাতান্তৈর্দোষৈর্দূষ্যৈশ্চ শোফবত্| |৪৩|

স০-বিসর্পঃ সর্ব এব শোফবত্| দোষৈঃ-পৃথগ্বাতপিত্তকফৈর্দ্বযৈঃ সমস্তৈস্তথাঽভিঘাতাত্, এবমভিঘাতান্তৈর্দোষৈঃ শোফবদ্বিসর্পসম্ভবঃ| দূষ্যৈরপি শোফবত্| এবং "পিত্তরক্তকফান্ বাযুঃ" (শ্লো. ২১) ইত্যাদিরপি গ্রন্থোঽত্র যোজ্যঃ|

Adhikarana visarpasya tryadhiShThAnatvam (43-44) · Śloka 44

| ত্র্যধিষ্ঠানং চ তং প্রাহুর্বাহ্যান্তরুভযাশ্রযাত্||৪৩|| যথোত্তরং চ দুঃসাধ্যাঃ| |৪৪|

স০-তং চ-বিসর্পং, ত্র্যধিষ্ঠানং প্রাহুঃ, আত্রেযাদয ইতি শেষঃ| [ কস্মাত্ ? ] বাহ্যান্তরুভযাশ্রযাত্-পূর্বার্জিতকর্মবশাত্ কদাচিদ্বাহ্যাশ্রযো বিসর্পো জাযতে, বাহ্য আশ্রযো যস্য স তথা, এবং কদাচিদন্তরাশ্রযঃ, কদাচিদুভযাশ্রযঃ, [ তস্মাত্ ]| তে চ বাহ্যান্তরুভযাশ্রযা বিসর্পা যথোত্তরং দুঃসাধ্যাঃ| দুঃখেন সাধ্যন্ত ইতি দুঃসাধ্যাঃ|

Adhikarana visarpasya saMprAptiH (44-45) · Śloka 45

তত্র দোষা যথাযথম্| প্রকোপণৈঃ প্রকুপিতা বিশেষেণ বিদাহিভিঃ||৪৪|| দেহে শীঘ্রং বিসর্পন্তি তেঽন্তরন্তঃস্থিতা বহিঃ| বহিঃস্থা দ্বিতযে দ্বিস্থাঃ|৪৫|

স০-তস্মিন্ বিসর্পে যথাযথং প্রকোপণৈঃ-তিক্তোষণাদিভিঃ, প্রকুপিতা বিশেষেণ পুনর্বিদাহিভিরত্যর্থং কৃত্বা প্রকুপিতা দেহে শীঘ্রং-আশ্বেব, বিসর্পন্তি| তেঽন্তঃস্থিতা অন্তর্বিসর্পন্তি| বহিঃস্থা দোষা বহির্বিসর্পন্তি| দ্বিতযেঽন্তর্বহীরূপে, দ্বিস্থাঃ-উভযস্থাঃ সন্তো, বিসর্পন্তি|

Adhikarana antarAshrayasya lakShaNam, bahirAshrayasya lakShaNam (45-47) · Śloka 47

| বিদ্যাত্তত্রান্তরাশ্রযম্||৪৫|| মর্মোপতাপাত্সম্মোহাদযনানাং বিঘট্টনাত্| তৃষ্ণাতিযোগাদ্বেগানাং বিষমং চ প্রবর্তনাত্||৪৬|| আশু চাগ্নিবলভ্রংশাদতো বাহ্যং বিপর্যযাত্| |৪৭|

স০-তত্র-তেষু ত্রিষু বিসর্পেষু মধ্যে, অন্তরাশ্রযং বিসর্পং মর্মোপতাপাদিভির্বিদ্যাত্| মর্মণাং-হৃদযাদীনাং, উপতাপো-দুঃখং, তস্মাত্| তথা, সম্মোহাত্-মূর্চ্ছোদ্ভবাত্| অযনানাং-কর্ণনাসাদীনাং, বিঘট্টনাত্-বিশেষেণ চলনাদতিশযেন পরিস্ফুরণাদিত্যর্থঃ| তথা, তৃষ্ণাযা অতিযোগাত্| তথা বেগানাং-নানারূপাণাং বেদনানাং, বিষমং কৃত্বা-বিচ্ছিদ্য বিচ্ছিদ্য কৃত্বা, প্রবর্তনাত্| আশুচ-শীঘ্রমেব, অগ্নিবলযোর্ভ্রংশাত্-বিনাশাত্| অতো [ বিপর্যযাত্-পূর্বোক্তান্তর্বিসর্প ] লক্ষণবিপর্যযাত্, বাহ্যং-বাহ্যাশ্রযং, বিসর্পং বিদ্যাত্|

Adhikarana vAtajasya lakShaNam (47-48) · Śloka 48

| তত্র বাতাত্পরীসর্পো বাতজ্বরসমব্যথঃ||৪৭|| শোফস্ফুরণনিস্তোদভেদাযামার্তিহর্ষবান্| |৪৮|

স০-[তত্র-] তেষু বিসর্পেষু মধ্যে, বাতাদ্যো বিসর্পঃ স বাতজ্বরতুল্যব্যথঃ স্যাত্ শোফাদিযুতশ্চ|

Adhikarana pittajasya lakShaNam (48) · Śloka 48

| পিত্তাদ্দ্রুতগতিঃ পিত্তজ্বরলিঙ্গোঽতিলোহিতঃ||৪৮||

স০-পিত্তাদ্বিসর্পো দ্রুতগতিঃ-শীঘ্রব্যাপী, তথা পিত্তজ্বরলিঙ্গোঽতিলোহিতশ্চ স্যাত্| পিত্তজ্বরলিঙ্গানীব লিঙ্গানি যস্য, ইতি সপ্তম্যুপমানপূর্বস্যেত্যাদিনা বহুব্রীহিরুত্তরপদলোপশ্চ|

Adhikarana kaphajasya lakShaNam (49) · Śloka 49

কফাত্কণ্ডূযুতঃ স্নিগ্ধঃ কফজ্বরসমানরুক্| |৪৯|

স০-কফাদ্বিসর্পঃ কণ্ডূমান্ স্নিগ্ধঃ কফজ্বরতুল্যরুক্ চ| বাতাদিজ্বরলক্ষণং যথোক্তম্ (হৃ. নি. অ. ২|১১) - "বৈষম্যং তত্রতত্রাঙ্গে তাস্তাঃ স্যুর্বেদনাশ্চলাঃ|" ইত্যাদি|

Adhikarana upekShayA sarveShAM sphoTayutatvam (49-50) · Śloka 50

| স্বদোষলিঙ্গৈশ্চীযন্তে সর্বে স্ফোটৈরুপেক্ষিতাঃ||৪৯|| তে পক্বভিন্নাঃ স্বং স্বং চ বিভ্রতি ব্রণলক্ষণম্| |৫০|

স০-সর্বে চ বিসর্পা উপেক্ষিতাঃ-উপক্রমরহিতাঃ, স্ফোটৈশ্চীযন্তে-ব্যাপ্যন্তে| কিম্ভূতৈঃ ? স্বদোষলিঙ্গৈঃ-যথাযথং স্বদোষলক্ষণৈঃ| তে চ পক্বভিন্নাঃ স্বংস্বং-আত্মীযমাত্মীযং দোষং(ষজং), ব্রণলক্ষণং বিভ্রতি-ধারযন্তি| পূর্বং পক্বাঃ পশ্চাদ্ভিন্নাঃ পক্বভিন্নাঃ, "পূর্বকাল" ইত্যাদিনা সমাসঃ| "তত্র মারুতাত্| শ্যাবঃ কৃষ্ণোঽরুণঃ" (হৃ. উ. অ. ২৫|৫) ইত্যাদিগ্রন্থনির্দিষ্টং ব্রণলক্ষণম্| "পিত্তেন ক্ষিপ্রজঃ" ইত্যাদিগ্রন্থনির্দিষ্টম্| এবং কফাদিলক্ষণমপি বোধ্যম্|

Adhikarana agnivisarpasya lakShaNam (50-56) · Śloka 56

অধুনা দ্বন্দ্বজং লক্ষযতি - - - - | বাতপিত্তাজ্জ্বরচ্ছর্দিমূর্চ্ছাতীসারতৃড্ভ্রমৈঃ||৫০|| অস্থিভেদাগ্নিসদনতমকারোচকৈর্যুতঃ| করোতি সর্বমঙ্গং চ দীপ্তাঙ্গারাবকীর্ণবত্||৫১|| যং যং দেশং বিসর্পশ্চ বিসর্পতি ভবেত্স সঃ| শান্তাঙ্গারাসিতো নীলো রক্তো বাঽঽশু চ চীযতে||৫২|| অগ্নিদগ্ধ ইব স্ফোটৈঃ শীঘ্রগত্বাদ্ দ্রুতং চ সঃ| মর্মানুসারী বীসর্পঃ স্যাদ্বাতোঽতিবলস্ততঃ||৫৩|| ব্যথেতাঙ্গং হরেত্সংজ্ঞাং নিদ্রাং চ শ্বাসমীরযেত্| হিধ্মাং চ স গতোঽবস্থামীদৃশীং লভতে ন না||৫৪|| ক্বচিচ্ছর্মারতিগ্রস্তো ভূমিশয্যাসনাদিষু| চেষ্টমানস্ততঃ ক্লিষ্টো মনোদেহশ্রমোদ্ভবাম্||৫৫|| দুষ্প্রবোধোঽশ্নুতে নিদ্রাং সোঽগ্নিবীসর্প উচ্যতে| |৫৬|

স০-বাতপিত্তাদ্বিসর্পো জ্বরাদিভির্যুতঃ সকলমঙ্গং চ দীপ্তাঙ্গারাবকীর্ণবত্-জ্বলিতাঙ্গারব্যাপ্তসদৃশং করোতি| যং যং চ শরীরদেশং বিসর্পো বিসর্পতি-প্রসরতি, স স প্রদেশঃ শান্তাগারবদসিতো নীলো রক্তো বা ভবেত্| তথা, সঃ-বিসর্পো, দ্রাগেবাগ্নিদগ্ধ ইব স্ফোটৈশ্চীযতে-ব্যাপ্যতে| স চ বিসর্পঃ শীঘ্রগত্বাত্-তত্স্বভাববশাত্, মর্মানুসারী দ্রুতং-ত্বরিতং কৃত্বা, স্যাত্| তত এব চ বাতোঽতিবলো-বলীযান্, অঙ্গং-শরীরং, ব্যথেত-পীডযেত্| সংজ্ঞাং-সংবিদং, হরেত্-নাশযেত্, নিদ্রাং চ হরেত্| শ্বাসমীরযেত্-কুর্যাত্, তথা হিধ্মাং চ| সঃ-বিসর্পী, না-পুরুষঃ, ঈদৃশীমবস্থাং গতঃ-প্রাপ্তঃ, চেতোনবস্থালক্ষণযা-অরত্যা, গ্রস্তঃ-অভিভূতো, ন ক্বচিদ্ভূমিশয্যাসনাদিষু শর্ম-সুখং, লভতে| অরতিগ্রস্ত ইতি হেতৌ প্রথমা, অরতিগ্রস্তত্বাদিত্যর্থঃ| এবং ক্বচিদপি সুখালাভাদ্ভূম্যাদিষু চেষ্টমানঃ-পরিলুঠন্, ততঃ ক্লিষ্টো-মনসা কাযেন চ, মনোদেহশ্রমোদ্ভবাং-তদুত্থাং, নিদ্রামশ্নুতে| কিম্ভূতঃ ? দুষ্প্রবোধঃ,-দুঃখেন প্রবোধো-নিদ্রাপগমো, যস্য স এবম্| এষ চাগ্ন্যাখ্যো বিসর্প উচ্যতে|

Adhikarana granthivisarpasya lakShaNam (56-59) · Śloka 59

| কফেন রুদ্ধঃ পবনো ভিত্ত্বা তং বহুধা কফম্||৫৬|| রক্তং বা বৃদ্ধরক্তস্য ত্বক্সিরাস্নাবমাংসগম্| দূষযিত্বা চ দীর্ঘাণুবৃত্তস্থূলখরাত্মনাম্||৫৭|| গ্রন্থীনাং কুরুতে মালাং রক্তানাং তীব্ররুগ্জ্বরাম্| শ্বাসকাসাতিসারাস্যশোষহিধ্মাবমিভ্রমৈঃ||৫৮|| মোহবৈবর্ণ্যমূর্ছাঙ্গভঙ্গাগ্নিসদনৈর্যুতাম্| ইত্যযং গ্রন্থিবীসর্পঃ কফমারুতকোপজঃ||৫৯||

স০-কফেন পবনো রুদ্ধস্তমেব-কফং, বহুধা ভিত্বা গ্রন্থীনাং মালাং কুরুতে| রক্তং চ বৃদ্ধরক্তস্য নরস্য দূষযিত্বা গ্রন্থীনাং মালাং কুরুতে| কিম্ভূতং রক্তম্ ? ত্বক্সিরাস্নাবমাংসগম্| কিম্ভূতানাং গ্রন্থীনাম্ ? দীর্ঘাণুবৃত্তস্থূলখরস্বভাবানাং তথা রক্তবর্ণানাম্| কিম্ভূতাম্, মালাম্ ? তীব্ররুগ্জ্বরাম্| তীব্রৌ রুগ্জ্বরৌ যস্যাস্তাম্ তথা শ্বাসাদিভির্যুতাম্| ইত্যযং-অনন্তরোক্তো, গ্রন্থিবীসর্প উচ্যতে| কফবাতকোপজশ্চাযং বেদ্যঃ|

Adhikarana kardamavisarpasya lakShaNam (60-64) · Śloka 64

কফপিত্তাজ্জ্বরঃ স্তম্ভো নিদ্রাতন্দ্রাশিরোরুজঃ| অঙ্গাবসাদবিক্ষেপপ্রলাপারোচকভ্রমাঃ||৬০|| মূর্চ্ছাগ্নিহানির্ভেদোঽস্থ্নাং পিপাসেন্দ্রিযগৌরবম্| আমোপবেশনং লেপঃ স্রোতসাং স চ সর্পতি||৬১|| প্রাযেণামাশযে গৃহ্ণন্নেকদেশং ন চাতিরুক্| পিটকৈরবকীর্ণোঽতিপীতলোহিতপাণ্ডুরৈঃ||৬২|| মেচকাভোঽসিতঃ স্নিগ্ধো মলিনঃ শোফবান্ গুরুঃ| গম্ভীরপাকঃ প্রাজ্যোষ্মা স্পৃষ্টঃ ক্লিন্নোঽবদীর্যতে||৬৩|| পঙ্কবচ্ছীর্ণমাংসশ্চ স্পষ্টস্নাযুসিরাগণঃ| শবগন্ধিশ্চ বীসর্পং কর্দমাখ্যমুশন্তি তম্||৬৪||

স০-কফপিত্তাত্ কর্দমাখ্যো জাযতে| তত্র জ্বরাদযঃ স্যুঃ| স চ-বিসর্পঃ, প্রাযেণ-বাহুল্যেন, আমাশযে-নাভিস্তনান্তরমধ্যে, একদেশং গৃহ্ণন্-আক্রামন্, অনন্তরং দেহং সর্পতি-ব্যাপ্নোতি| ন চাতিরুক্ স্যাত্| তথা, পিটকৈরবকীর্ণো-ব্যাপ্তঃ, স্যাত্| কিম্ভূতৈঃ ? অতিপীতলোহিতপাণ্ডুরৈঃ| তথা, মেচকাভাদিকঃ স্যাত্| মেচকো-মযূরকণ্ঠসদৃশো বর্ণঃ| তং-তাদৃশং, বিসর্পং কর্দমাখ্যং-কর্দমসংজ্ঞং, উশন্তি, মুনয ইতি শেষঃ|

Adhikarana tridoShajasya lakShaNam (65) · Śloka 65

সর্বজো লক্ষণৈঃ সর্বৈঃ সর্বধাত্বতিসর্পণঃ| |৬৫|

স০-সর্বৈস্ত্রিভির্দোষৈর্জাতঃ সর্বজঃ-সন্নিপাতোদ্ভবো, বীসর্পঃ সর্বৈর্লক্ষণৈরুপলক্ষিতঃ| স চ সর্বান্ ধাতূনতিশযেন সর্পতি সর্বধাত্বতিসর্পণঃ স্যাত্|

Adhikarana kShatajasya lakShaNam (65-66) · Śloka 66

| বাহ্যহেতোঃ ক্ষতাত্ক্রুদ্ধঃ সরক্তং পিত্তমীরযন্||৬৫|| বিসর্পং মারুতঃ কুর্যাত্ কুলত্থসদৃশৈশ্চিতম্| স্ফোটৈঃ শোফজ্বররুজাদাহাঢ্যং শ্যাবলোহিতম্||৬৬||

স০-মারুতো-বাতঃ, ক্ষতাদ্বাহ্যকারণাত্ ক্রুদ্ধঃ সন্ বিসর্পং কুর্যাত্| কিং কুর্বন্ ? পিত্তং সহ রক্তেন প্রেরযন্| তথা, স্ফোটৈঃ-পিটকৈঃ, চিত্তং-ব্যাপ্তম্| কিম্ভূতৈঃ ? কুলত্থসদৃশৈঃ| তথা, শোফাদিভিরাঢ্যং-অতিশযেন যুতম্| তথা, শ্যাবলোহিতং-বর্ণেন|

Adhikarana visarpANAM sAdhyAsAdhyatvam (13) · Śloka 13

পৃথগ্দোষৈস্ত্রযঃ সাধ্যা দ্বন্দ্বজাশ্চানুপদ্রবাঃ| অসাধ্যো ক্ষতসর্বোত্থৌ সর্বে চাক্রান্তমর্মকাঃ||৬৭|| শীর্ণস্নাযুসিরামাংসাঃ প্রক্লিন্নাঃ শবগন্ধযঃ| ৬৭ ১/২| ইতি বিসর্পনিদানম্| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে পাণ্ডুরোগশোফবিসর্পনিদানং নাম ত্রযোদশোঽধ্যাযঃ||১৩||

স০-পৃথগ্দোষৈঃ-বাতপিত্তকফৈঃ কেবলৈঃ, ত্রযো বিসর্পাঃ সাধযিতুং শক্যাঃ| দ্বন্দ্বজাশ্চানুপদ্রবাঃ-কাসবৈবর্ণ্যজ্বরাদিভিরুপদ্রবৈঃ (হৃ. শা. অ. ৫|৯৭) রহিতাঃ, ত্রযঃ সাধ্যাঃ| ক্ষতসর্বোত্থৌ দ্বৌ বিসর্পাবসাধ্যৌ, তথাস্বভাবত্বাত্| সর্বে বিসর্পাশ্চাক্রান্তমর্মকাঃ-অভিভূতমর্মকাশ্চ, অসাধ্যাঃ| তথা, শীর্ণানি স্নাযুসিরামাংসানি যৈস্তেঽপ্যসাধ্যাঃ| তথা, প্রকর্ষেণ-অতিশযেন ক্লিন্নাঃ, তথা শবগন্ধযঃ-কুণপগন্ধতুল্যাঃ, যে তেঽপ্যসাধ্যাঃ| শবস্যেব গন্ধো যেষামিতি "উপমানাচ্চ" ইতি গন্ধস্যেদাদেশঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে পাণ্ডুরোগশোফবিসর্পনিদানং নাম ত্রযোদশোঽধ্যাযঃ সমাপ্তঃ|| ১৩||