Adhikarana adhyAyopakramaH · Śloka
🔊 Audio coming soon
শ্বাসহিধ্মনিদানাদনন্তরং রাজযক্ষ্মাদিনিদানারম্ভেঽযং সম্বন্ধঃ| কাসাদুপেক্ষযা "শ্বাসক্ষযচ্ছর্দি" (হৃ. নি. অ. ৩|৩৮) ইত্যুক্তম্| হিধ্মাশ্বাসযোশ্চৈকযোগক্ষেমত্বাত্ শ্বাসহিধ্মানিদানানন্তরং রাজযক্ষ্মনিদানমারভ্যতে -
Adhikarana rAjayakShmAdinidAnAdhyAyaH (2) · Śloka 2
অথাতো রাজযক্ষ্মাদিনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||
अथातो राजयक्ष्मादिनिदानं व्याख्यास्यामः| इति ह स्माहुरात्रेयादयो महर्षयः| गद्यसूत्रे||२||
🔊 Audio coming soon
স০-পূর্ববদত্র ব্যাখ্যা| আদিশব্দেন স্বরভেদাদীনাং গ্রহণম্|
Adhikarana rAjayakShmaNo nAmacatuShTayam (1) · Śloka 1
রাজযক্ষ্মা ক উচ্যতে ? যস্যেদং নিদানম্, ইত্যাহ - - - - অথ রাজযক্ষ্মনিদানম্| অনেকরোগানুগতো বহুরোগপুরোগমঃ| রাজযক্ষ্মা ক্ষযঃ শোষো রোগরাডিতি চ স্মৃতঃ||১||
राजयक्ष्मा क उच्यते ? यस्येदं निदानम्, इत्याह - - - - अथ राजयक्ष्मनिदानम्| अनेकरोगानुगतो बहुरोगपुरोगमः| राजयक्ष्मा क्षयः शोषो रोगराडिति च स्मृतः||१||
🔊 Audio coming soon
স০-অনেকৈঃজ্বরাতীসারাদিভিঃ, পরিবৃতঃ| তথা, বহূনাং রোগাণাং-গুল্মাতীসারাদীনাং, পুরোগমঃ-প্রধানশ্চ| যথা হি রাজা প্রাক্ পশ্চাত্ রথেভাশ্বজনৈরনুগম্যতে, তথাঽযং রোগো রোগৈঃ| রাজযক্ষ্মেত্যাদযশ্চতস্রঃ সংজ্ঞাঃ|
Adhikarana nAmanirvacanam (2-3) · Śloka 3
তত্রাদ্যাং সংজ্ঞাং ব্যুত্পাদযন্নাহ - - - - নক্ষত্রাণাং দ্বিজানাং চ রাজ্ঞোঽভূদ্যদযং পুরা| যচ্চ রাজা চ যক্ষ্মা চ রাজযক্ষ্মা ততো মতঃ||২|| দেহৌষধক্ষযকৃতেঃ ক্ষযস্তত্সম্ভবাচ্চ সঃ| রসাদিশোষণাচ্ছোষো রোগরাট্ তেষু রাজনাত্||৩||
तत्राद्यां संज्ञां व्युत्पादयन्नाह - - - - नक्षत्राणां द्विजानां च राज्ञोऽभूद्यदयं पुरा| यच्च राजा च यक्ष्मा च राजयक्ष्मा ततो मतः||२|| देहौषधक्षयकृतेः क्षयस्तत्सम्भवाच्च सः| रसादिशोषणाच्छोषो रोगराट् तेषु राजनात्||३||
🔊 Audio coming soon
স০-নক্ষত্রাণাং-অশ্চিন্যাদীনাং, তথা দ্বিজানাং-ব্রাহ্মণানাং চ, যো রাজা-চন্দ্রঃ, তস্য পুরা-পূর্বং, অভবত্| পূর্বকল্পে হি রোহিণ্যামতিসক্তস্য চন্দ্রস্য শ্বশুরং দক্ষমনৃতবাদেন বঞ্চযতোঽপমানিতদুহিতৃস্নেহবশাদুদ্ভূতক্রোধাত্ প্রজাপতের্দক্ষতঃ রাজযক্ষ্মাঽভবদিতি শ্রূযতে| তস্মাদ্রাজ্ঞো যক্ষ্মা রাজযক্ষ্মেত্যুচ্যতে ষষ্ঠীসমাসব্যুত্পত্ত্যা| যচ্চ-যস্মাচ্চ, রাজা চ যক্ষ্মা চ-রাজাচ রোগাণাং মধ্যে অনেকরোগানীকপরিবৃতত্বেন যক্ষ্মা চ, ততো রাজা চাসৌ যক্ষ্মা চ রাজযক্ষ্মাঽভিমতো মুনীনামিতি শেষঃ| তথা দেহশ্চৌষধং চ, তযোঃ ক্ষযঃ, তস্য কৃতিঃ-কারণং, ততো দেহৌষধক্ষযকৃতেঃ ক্ষয ইত্যুচ্যতে| অনেন চাস্য ব্যাধের্বহুকালস্থাযিত্বং দ্যোতযতি| কিলাযং ব্যাধির্বহুতরং কালমবতিষ্ঠতে ন চ শান্তিং গচ্ছতি| যাবদ্দেহঃ ক্ষীযতে, ঔষধান্যপি ক্ষীযন্তে, ন পুনরযং ব্যাধিঃ, ইতি দেহৌষধক্ষযকৃতেঃ ক্ষয ইত্যুচ্যতে| তত্সম্ভাবাচ্চ সঃ| তদিত্যনেন দেহৌষধক্ষযঃ প্রত্যবমৃশ্যতে| স সম্ভবো-জন্ম, যস্যাসৌ তত্সম্ভবঃ, তস্মাদপি ক্ষয ইত্যুচ্যতে| এবমন্যোঽপি যো ব্যাধির্দেহৌষধক্ষযকারী, সোঽপি ক্ষযাখ্যস্য ব্যাধেঃ সম্ভবঃ-কারণম্, তস্মাজ্জাযত ইত্যর্থঃ| রসাদীনাং শোষণাত্ শোষ ইতি ভণ্যতে| রোগেত্যাদি| বহুষু রোগেষু মধ্যে রোগত্বেনৈষ এব ভ্রাজতে, তস্মাদ্রোগরাডিত্যুচ্যতে|
Adhikarana rAjayakShmaNo hetucatuShTayam (4) · Śloka 4
সাহসং বেগসংরোধঃ শুক্রৌজঃস্নেহসঙ্ক্ষযঃ| অন্নপানবিধিত্যাগশ্চত্বারস্তস্য হেতবঃ||৪||
साहसं वेगसंरोधः शुक्रौजःस्नेहसङ्क्षयः| अन्नपानविधित्यागश्चत्वारस्तस्य हेतवः||४||
🔊 Audio coming soon
স০-সাহসং-কাযেন বাচা বাঽযথাবলমারম্ভঃ| বেগসংরোধো-বাতবিণ্মূত্রাদীনামুন্মুখীভূতানাং ধারণম্| শুক্রং চ ওজশ্চ স্নেহশ্চ তেষাং সঙ্ক্ষযো-বিনাশঃ| অত্র স্নেহশব্দেন দেহস্নেহো গ্রাহ্যঃ, দেহশব্দলোপং কৃত্বাঽযং নির্দিষ্টঃ| তথা চ মুনিঃ (চ. চি. অ. ৮|২)- "দেহস্নেহপরিক্ষযাত্" ইতি| তথা, অন্নপানযোর্যথাশাস্ত্রং যো বিধিস্তস্য ত্যাগো-অন্যথাসেবনমন্যথাঽভ্যবহারঃ| তস্য-রাজযক্ষ্মণঃ, চত্বারঃ সাহসাদযো হেতবঃ| পাঠাদেব চতুঃসঙ্খ্যাত্বে লব্ধে চতুর্গ্রহণং নিযমার্থম্| যদ্যপি সাহসাদয এতে প্রত্যেকমনেকপ্রকারতযা ভিন্নাঃ, তথাঽপি সাহসাদিচতুষ্টযং নাতিক্রামন্তীত্যর্থঃ| তথাঽস্মিন্ রাজযক্ষ্মাখ্যে সাহসজে বেগসংরোধজে শুক্রৌজঃস্নেহসঙ্ক্ষযজেঽন্নপানবিধিত্যাগজে বা চতুর্বিধে বিশেষেণ পবনো হেতুঃ|
Adhikarana rAjayakShmaNo saMprAptiH (5-6) · Śloka 6
অত এবাহ - - - - তৈরুদীর্ণোঽনিলঃ পিত্তং কফং চোদীর্য সর্বতঃ| শরীরসন্ধীনাবিশ্য তান্ সিরাশ্চ প্রপীডযন্||৫|| মুখানি স্রোতসাং রুদ্ধ্বা তথৈবাতিবিবৃত্য বা| সর্পন্নূর্ধ্বমধস্তির্যগ্যথাস্বং জনযেদ্গদান্||৬||
अत एवाह - - - - तैरुदीर्णोऽनिलः पित्तं कफं चोदीर्य सर्वतः| शरीरसन्धीनाविश्य तान् सिराश्च प्रपीडयन्||५|| मुखानि स्रोतसां रुद्ध्वा तथैवातिविवृत्य वा| सर्पन्नूर्ध्वमधस्तिर्यग्यथास्वं जनयेद्गदान्||६||
🔊 Audio coming soon
স০-তৈঃ-সাহসাদিভিঃ, উদীর্ণোঽনিল ইদমিদং কুর্বন্ যথাস্বং গদান্ জনযেত্| উদীর্ণঃ-উল্বণঃ পিত্তশ্লেষ্মভ্যামধিকঃ| অত এব পিত্তমুদীর্য-স্বস্থানাচ্চ্যাবযিত্বা, তথা কফং সর্বতঃ-সর্বস্মাত্ উদীর্য, তথা শরীরসন্ধীন্-দশাধিকশতদ্বযসঙ্খ্যাতান্ আত্রেযমতেন তু দ্বিসহস্রসঙ্খ্যাতান্, আবিশ্য-তেষামন্তঃ-প্রবেশং কৃত্বা, তাশ্চং-সন্ধীন্, প্রপীডযন্-প্রকর্ষেণ মর্দযন্নিব, তথা সিরা অপি সকলশরীরগাঃ প্রপীডযন্, তথাঽন্যেষাং স্রোতসাং মুখানি-দ্বারাণি রুদ্ধ্বা, তথৈব তানি বা অতিবিবৃত্য-প্রসার্য স্রোতোমুখানি| সর্পন্নিত্যাদি| ঊর্ধ্বং সর্পন্ বাযুঃ পীনসাদীন্ ব্যাধীন্ জনযেত্, অধঃ সর্পন্ বিড্ভ্রংশং বিট্শোষং বা কুর্যাত্, তির্যক্ সর্পন্ পার্শ্বরুজং বা কুর্যাত্, ইতি যথাস্বংশব্দস্যার্থঃ|
Adhikarana rAjayakShmaNaH pUrvarUpam (7-13) · Śloka 13
রূপং ভবিষ্যতস্তস্য প্রতিশ্যাযো ভৃশং ক্ষবঃ| প্রসেকো মুখমাধুর্যং সদনং বহ্নিদেহযোঃ||৭|| স্থাল্যমত্রান্নপানাদৌ শুচাবপ্যশুচীক্ষণম্| মক্ষিকাতৃণকেশাদিপাতঃ প্রাযোঽন্নপানযোঃ||৮|| হৃল্লাসশ্ছর্দিররুচিরশ্নতোঽপি বলক্ষযঃ| পাণ্যোরবেক্ষা পাদাস্যশোফোঽক্ষ্ণোরতিশুক্লতা||৯|| বাহ্বোঃ প্রমাণজিজ্ঞাসা কাযে বৈভত্স্যদর্শনম্| স্ত্রীমদ্যমাংসপ্রিযতা ঘৃণিত্বং মূর্দ্ধগুণ্ঠনম্||১০|| নখকেশাতিবৃদ্ধিশ্চ, স্বপ্নে চাভিভবো ভবেত্| পতঙ্গকৃকলাসাহিকপিশ্বাপদপক্ষিভিঃ||১১|| কেশস্থিতুষভস্মাদিরাশৌ সমধিরোহণম্| শূন্যানাং গ্রামদেশানাং দর্শনং শুষ্যতোঽম্ভসঃ||১২|| জ্যোতির্গিরীণাং পততাং জ্বলতাং চ মহীরুহাম্| |১৩|
रूपं भविष्यतस्तस्य प्रतिश्यायो भृशं क्षवः| प्रसेको मुखमाधुर्यं सदनं वह्निदेहयोः||७|| स्थाल्यमत्रान्नपानादौ शुचावप्यशुचीक्षणम्| मक्षिकातृणकेशादिपातः प्रायोऽन्नपानयोः||८|| हृल्लासश्छर्दिररुचिरश्नतोऽपि बलक्षयः| पाण्योरवेक्षा पादास्यशोफोऽक्ष्णोरतिशुक्लता||९|| बाह्वोः प्रमाणजिज्ञासा काये बैभत्स्यदर्शनम्| स्त्रीमद्यमांसप्रियता घृणित्वं मूर्द्धगुण्ठनम्||१०|| नखकेशातिवृद्धिश्च, स्वप्ने चाभिभवो भवेत्| पतङ्गकृकलासाहिकपिश्वापदपक्षिभिः||११|| केशस्थितुषभस्मादिराशौ समधिरोहणम्| शून्यानां ग्रामदेशानां दर्शनं शुष्यतोऽम्भसः||१२|| ज्योतिर्गिरीणां पततां ज्वलतां च महीरुहाम्| |१३|
🔊 Audio coming soon
স০-তস্য-রাজযক্ষ্মণঃ, ভবিষ্যতঃ উত্পিত্সোঃ, রূপং-অগ্ররূপং, প্রতিশ্যাযাদি| বহ্নেঃ সদনং-পাকাসামর্থ্যম্| দেহস্য সাদো-নির্বলতা| স্থাল্যমত্রান্নপানাদীনাং শুদ্ধানামপ্যশুচিদর্শনমিতি তদানীং পুরুষস্য মিথ্যাজ্ঞানং জাযত ইত্যর্থঃ| পাণ্যোরবেক্ষা-ভূযসা স্বপাণী পশ্যতি| বাহ্বোঃ প্রমাণজিজ্ঞাসা-কিযত্প্রমাণৌ মে বাহূ ইতি জ্ঞাতুমিচ্ছতি| কাযে-শরীরে শোভনেঽপি, বৈভত্স্যদর্শনমিতি মিথ্যাজ্ঞানং তদানীং রোগস্বভাবাদস্যোত্পদ্যতে| মূর্ধ্রঃ-মস্তকস্য, গুণ্ঠনং-বস্ত্রাদিনা সঞ্ছাদনম্| স্বপ্নে চ তস্য যক্ষ্মিণঃ পতঙ্গাদিভিরভিভবো ভবেত্-পতঙ্গাদ্যৈঃ পরাভূযতে| পতঙ্গঃ-কীটভেদঃ| তথা, কেশাদিরাশিষ্বধিরোহণং তথা শূন্যগ্রামদেশাদীনাং দর্শনং স্বপ্নে ভবেত্|
Adhikarana rAjayakShmaNo rUpam (13-15) · Śloka 15
প্রাগ্রূপমুক্ত্বা সম্প্রত্যেকাদশরূপমধিকৃত্যাহ - - - - | পীনসশ্বাসকাসাং সমূর্দ্ধস্বররুজোঽরুচিঃ||১৩|| ঊর্ধ্বং, বিড্ভ্রংশসংশোষাবধঃ, চ্ছর্দিশ্চ কোষ্ঠগে| তির্যক্স্থে পার্শ্বরুদ্গোষে, সন্ধিগে ভবতি জ্বরঃ||১৪|| রূপাণ্যেকাদশৈতানি জাযন্তে রাজযক্ষ্মিণঃ| |১৫|
प्राग्रूपमुक्त्वा सम्प्रत्येकादशरूपमधिकृत्याह - - - - | पीनसश्वासकासां समूर्द्धस्वररुजोऽरुचिः||१३|| ऊर्ध्वं, विड्भ्रंशसंशोषावधः, च्छर्दिश्च कोष्ठगे| तिर्यक्स्थे पार्श्वरुद्गोषे, सन्धिगे भवति ज्वरः||१४|| रूपाण्येकादशैतानि जायन्ते राजयक्ष्मिणः| |१५|
🔊 Audio coming soon
স০-অংসৌ চ মূর্দ্ধা চ স্বরশ্চ তেষাং রুজোংঽসমূর্দ্ধস্বররুজঃ| পীনসশ্চ শ্বাসশ্চাংসমূর্দ্ধস্বররুজশ্চ তাঃ, তথা অরুচিঃ, ইত্যূর্ধ্বং-ঊর্ধ্বস্থিতে দোষে, ভবতি| অরুচেরেষঃ পৃথগুপন্যাসঃ প্রাধান্যখ্যাপনার্থঃ| যথা,-অস্মিন্ ব্যাধাবতিভযাবহোঽরুচ্যাখ্য উপদ্রবো ন তথা পীনসাদয ইতি| অধঃস্থিতে দোষে বিশঃ-পুরীষস্য, ভ্রংশসংশোষৌ বিড্ভ্রংশসংশোষৌ ভবতঃ| "বিড্ভ্রংশো-ভিন্নবর্চস্ত্বং, বিট্শোষো-বদ্ধবিট্কতা|" এতযোশ্চ পরস্পরং বিরুদ্ধত্বান্ন তুল্যকালং সম্ভবঃ| তস্মাত্কদাচিদ্বিড্ভ্রংশঃ কদাচিদ্বিট্শোষো ভবতি| ছর্দিস্তু কোষ্ঠস্থিতে দোষে স্যাত্| তির্যক্স্থে দোষে পার্শ্বরুক্ ভবতি| সন্ধিগে জ্বরো ভবতি| এতানি পীনসাদীন্যেকাদশ রূপাণি শোষিণ উত্পদ্যন্তে| মুনিস্ত্বেবমবোচত্ (চ. চি. অ. ৮|২৩)- "প্রতিশ্যাযং জ্বরং কাসমঙ্গমর্দং শিরোরুজম্| শ্বাসং বিড্ভেদমরুচিং পার্শ্বশূলং স্বরক্ষযম্|| কুরুতে চাংসসন্তাপমেকাদশং" ইত্যাদি|
Adhikarana rAjayakShmaNo upadravAH (15-16) · Śloka 16
| তেষামুপদ্রবান্ বিদ্যাত্কণ্ঠোদ্ধ্বংসমুরোরুজম্||১৫|| জৃম্ভাঙ্গমর্দনিষ্ঠীববহ্নিসাদাস্যপূতিতাঃ| |১৬|
| तेषामुपद्रवान् विद्यात्कण्ठोद्ध्वंसमुरोरुजम्||१५|| जृम्भाङ्गमर्दनिष्ठीववह्निसादास्यपूतिताः| |१६|
🔊 Audio coming soon
স০-তেষাং-একাদশসঙ্খ্যানাং পীনসাদীনাং পূর্বোত্পন্নানাং, কণ্ঠোদ্ধ্বংসাদীন্ পশ্চাদুত্থিতান্ সপ্তোপদ্রবান্ জানীযাত্| "ব্যাধেরুপরি যো ব্যাধির্ভবত্যুত্তরকালজঃ| উপক্রমবিঘাতী চ স হ্যুপদ্রব উচ্যতে||" ইত্যুপদ্রবলক্ষণম্|
Adhikarana vAtajasya rUpam (16-17) · Śloka 17
| তত্র বাতাচ্ছিরঃপার্শ্বশূলমংসাঙ্গমর্দনম্||১৬|| কণ্ঠোদ্ধ্বংসঃ স্বরভ্রংশঃ| |১৭|
| तत्र वाताच्छिरःपार्श्वशूलमंसाङ्गमर्दनम्||१६|| कण्ठोद्ध्वंसः स्वरभ्रंशः| |१७|
🔊 Audio coming soon
স০-তত্র-তস্মিন্ রাজযক্ষ্মাখ্যে ব্যাধৌ, বাতাদধিকাত্ শিরঃশূলাদযঃ স্যুঃ|
Adhikarana pittajasya rUpam (17) · Śloka 17
পিত্তাত্পাদাংসপাণিষু| দাহোঽতিসারোসৃক্ঽঽছর্দির্মুখগন্ধো জ্বরো মদঃ||১৭||
पित्तात्पादांसपाणिषु| दाहोऽतिसारोसृक्ऽऽछर्दिर्मुखगन्धो ज्वरो मदः||१७||
🔊 Audio coming soon
স০-পিত্তাদধিকাত্ পাদাদিষু দাহঃ স্যাত্| তথা, অতীসারাদযশ্চ স্যুঃ|
Adhikarana kaphajasya rUpam (18) · Śloka 18
কফাদরোচকশ্ছর্দিঃ কাসো মূর্দ্ধাঙ্গগৌরবম্| প্রসেকঃ পীনসঃ শ্বাসঃ স্বরসাদোঽল্পবহ্নিতা||১৮||
कफादरोचकश्छर्दिः कासो मूर्द्धाङ्गगौरवम्| प्रसेकः पीनसः श्वासः स्वरसादोऽल्पवह्निता||१८||
🔊 Audio coming soon
স০-কফাদধিকাদরোচকাদযো দশ স্যুঃ|
Adhikarana trayANAM sAmAnyaM rUpam (19-22) · Śloka 22
যক্ষ্মিণো মাংসা(অন্না)দ্যভ্যবহারতোঽপি ধাতুক্ষযো জাযতে, ন ধাতুপুষ্টিঃ, ইত্যত্র যুক্তিমাহ - - - - দোষৈর্মন্দানলত্বেন সোপলেপৈঃ কফোল্বণৈঃ| স্রোতোমুখেষু রুদ্ধেষু ধাতূষ্মস্বল্পকেষু চ||১৯|| বিদহ্যমানঃ স্বস্থানে রসস্তাংস্তানুপদ্রবান্| কুর্যাদগচ্ছন্মাংসাদীনসৃক্ চোর্ধ্বং প্রধাবতি||২০|| পচ্যতে কোষ্ঠ এবান্নমন্নপক্ত্রৈব চাস্য যত্| প্রাযোঽস্মান্মলতাং যাতং নৈবালং ধাতুপুষ্টযে||২১|| রসোঽপ্যস্য ন রক্তায মাংসায কুত এব তু| উপস্তব্ধঃ স শকৃতা কেবলং বর্ততে ক্ষযী||২২||
यक्ष्मिणो मांसा(अन्ना)द्यभ्यवहारतोऽपि धातुक्षयो जायते, न धातुपुष्टिः, इत्यत्र युक्तिमाह - - - - दोषैर्मन्दानलत्वेन सोपलेपैः कफोल्बणैः| स्रोतोमुखेषु रुद्धेषु धातूष्मस्वल्पकेषु च||१९|| विदह्यमानः स्वस्थाने रसस्तांस्तानुपद्रवान्| कुर्यादगच्छन्मांसादीनसृक् चोर्ध्वं प्रधावति||२०|| पच्यते कोष्ठ एवान्नमन्नपक्त्रैव चास्य यत्| प्रायोऽस्मान्मलतां यातं नैवालं धातुपुष्टये||२१|| रसोऽप्यस्य न रक्ताय मांसाय कुत एव तु| उपस्तब्धः स शकृता केवलं वर्तते क्षयी||२२||
🔊 Audio coming soon
স০-দোষৈঃ-বাতপিত্তকফৈঃ, কফোল্বণত্বাত্ স্রোতোদ্বারেষু রুদ্ধেষু-পিহিতেষু সত্সু, রসঃ স্বস্থান এব বিদহ্যমানো-ন সম্যগ্রক্ততাং প্রাপ্নুবন্, তাংস্তান্-অনেকান্ কণ্ঠোদ্ধ্বংসাদীন্, উপদ্রবান্ কুর্যাত্| কিম্ভূতৈর্দোষৈঃ ? কফোল্বণৈঃ-শ্লেষ্মাধিকৈঃ| অত এব কফাধিকত্বাত্ সহোপলেপেন শ্লেষ্মলেপেন সহ বর্তন্তে সোপলেপাঃ, তৈস্তথাবিধৈর্দোষৈস্তদানীং মন্দানলত্বং ক্রিযতে| তেনৈব চ মন্দানলত্বেন হেতুনা ধাতূষ্মসু-রসাদ্যগ্নিষু, অল্পকেষু-অতিশযেনাল্পেষু| এবমনেককারণসদ্ভাবাদ্রসঃ স্বস্থান এব বিদহ্যমানঃ-পিত্তকারিণীং মধ্যমাং পাকাবস্থামনুভবন্ সম্যক্ পাকমগচ্ছন্, যথোচিতান্ বিকারাংস্তাংস্তান্ কুর্বন্, মাংসাদীন্-মাংসপ্রভৃতিকান্ ধাতূন্, অগচ্ছন্-অপ্রাপ্নুবন্, বিদহ্যমানতযা রক্ততামাপন্নঃ, তদসৃক্ চোর্ধ্বং প্রধাবতি-ঊর্ধ্বং প্রসর্পতি, কেবলং নিষ্ঠীবনসহিতং বা| তস্মাত্ ক্ষযিণো ন তন্মাংসাদিধাতুপুষ্টযে| কিঞ্চাস্মাদপি হেতোঃ স রসো ন ধাতুপুষ্টযে| [যত্-] যস্মাত্, [অন্নং] পচ্যতে-অন্নং সারকিট্টত্বং নীযতে, অন্নপক্ত্রৈব-জাঠরাগ্নিনা, কোষ্ঠ এব-আমপক্বাশযাখ্যে| উভযত্রেবকারোঽবধারণে| কোষ্ঠ এব-ন ধাতুষু, জাঠরাগ্নিনৈব-ন ধাত্বগ্নিভিঃ, ইতি| যত এবং ততোঽস্মাত্-প্রাঙ্নিরূপিতাদ্ধেতুকদম্বকাত্, প্রাযো মলতাং-আধিক্যেন মূত্রপুরীষতাং, প্রাপ্তমন্নং নৈব ধাতুপুষ্টযেঽলং-সমর্থম্| ধাতুপুষ্টিগ্রহণেনৈতত্সূচযতি,-অভিনবমৃত্কুম্ভজললবস্যন্দনন্যাযেন সূক্ষ্মস্রোতোনুপ্রবেশিতযা সোঽন্নরসো ধাত্বাপ্যাযনমাত্রং করোত্যেব, অন্যথা বর্ষগণানুবন্ধি জীবিতং ক্ষযিণো ন সম্ভাব্যেত| তস্মাদ্ধাতুস্থিতিমাত্রং ভবতি ন তু ধাতুপোষণমিতি স্থিতম্| রসঃ-উভযরূপোঽন্নরসো ধাতুরসো বা, অস্য-ক্ষযিণঃ, নিকটস্য রক্তধাতোর্ন পুষ্টযে, মাংসধাতোর্বিপ্রকৃষ্টস্য তু কুত এব স্যাত্ ? এবং ন সম্ভাব্যত ইত্যপিশব্দার্থঃ| ননু, যদ্যেবং তত্কথমন্যেভ্যো ধাতুভ্যো বিশেষেণ ধারণস্বভাবেভ্যো বিনা ক্ষযী জীবেত্? ইত্যাশঙ্ক্যাহ-উপস্তব্ধ ইতি| সঃ-ক্ষযী, শকৃতা-পুরীষেণ, কেবলমুপস্তব্ধঃ-কৃতাবষ্টম্ভো, বর্ততে-প্রাণিতি, পূর্বোক্তন্যাযেন কিঞ্চিদাহাররসাপ্যাযিতৈর্ধাতুভির্ধারণস্বভাবৈর্ধৃতমাত্রঃ| ননু, "বিদহ্যমানঃ স্বস্থানে রসস্তাংস্তানুপদ্রবান্| কুর্যাদগচ্ছন্মাংসাদীনসৃক্ চোর্ধ্বং প্রধাবতি||" ইত্যনেন রক্তস্য সত্তা প্রদিপাদিতা| "রসোঽপ্যস্য ন রক্তায" ইত্যনেন ক্ষযিণো রক্তস্য়াভাবঃ প্রত্যপাদি| তদিমে বাক্যে পরস্পরং ব্যাঘ্নাতে| অত্রোচ্যতে| নানযোর্বাক্যযোঃ পরস্পরং বিরোধঃ| যতঃ " অসৃক্ চোর্ধ্বং প্রধাবতি" ইত্যনেন ন তদ্ধাতুরূপতাং প্রাপ্তমুক্তম্| কিন্তর্হি ? রসস্য বিদহ্যমানতযা স্বস্থানস্থিতস্য রক্তধাত্বাশযমগচ্ছতো রক্তোদ্ভূতিরুক্তা| অনেনৈবাভিপ্রাযেণোত্তরত্র বাক্যে "রসোঽপ্যস্য ন রক্তায" ইত্যুবাচ| অনেন হি রসো ধাতুরূপায রক্তায শোষিণো ন সম্পদ্যতে ইতি প্রত্যপাদি|
Adhikarana asAdhyalakShaNam (23) · Śloka 23
অথাস্য ক্ষযিণঃ সাধ্যাসাধ্যতাম্ নিরূপযতি - - - - লিঙ্গেষ্বল্পেষ্বপি ক্ষীণং ব্যাধ্যৌষধবলাক্ষমম্| বর্জযেত্|২৩|
अथास्य क्षयिणः साध्यासाध्यताम् निरूपयति - - - - लिङ्गेष्वल्पेष्वपि क्षीणं व्याध्यौषधबलाक्षमम्| वर्जयेत्|२३|
🔊 Audio coming soon
স০-ক্ষযিণং বলমাংসাভ্যাং ক্ষীণং লিঙ্গেষু-পীনসাদিষু, অল্পেষ্বপি সত্সু-ন সর্বেষূত্পন্নেষু, বর্জযেত্-নোপক্রমেত্| কি তম্ ? ব্যাধ্যৌষধবলাক্ষমম্| ব্যাধ্যৌষধযোর্বলং ব্যাধ্যৌষধবলম্, তস্যাক্ষমম্| ক্ষযাখ্যস্য ব্যাধের্যদ্বলং তথাঽস্য শমনোপাযস্যৌষধস্য যদ্বলং তত্রাক্ষমং-অসহং, যতস্ততো বর্জযেদিত্যর্থঃ|
Adhikarana sAdhyalakShaNam (23-1) · Śloka 1
| সাধযেদেব লিঙ্গেষু সর্বেষ্বপি ততোঽন্যথা||২৩|| ইতি রাজযক্ষ্মনিদানম্||১||
| साधयेदेव लिङ्गेषु सर्वेष्वपि ततोऽन्यथा||२३|| इति राजयक्ष्मनिदानम्||१||
🔊 Audio coming soon
স০-অ(ত)তোঽন্যথা-বিপরীতলক্ষণং রাজযক্ষ্মিণং বলমাংসাভ্যামক্ষীণমত এব ব্যাধ্যৌষধবলক্ষমং, সর্বেষ্বপি-পীনসাদিষু লিঙ্গেষ্বপি সত্সু, সাধযেদেব| কিংপুনর্দ্বিত্রাদিষ্বেষু সাধযেদিত্যপিশব্দার্থঃ|
Adhikarana svarabhedaH ShaDvidhaH (24) · Śloka 24
অথাস্য ব্যাধেরুপদ্রবভূতানামাদিশব্দগৃহীতানাং পঞ্চানাং স্বরভেদাদীনাং রোগাণাং নিদানান্যাহ - - - - অথ স্বরভেদনিদানম্| দোষৈর্ব্যস্তৈঃ সমস্তৈশ্চ ক্ষযাত্ ষষ্ঠশ্চ মেদসা| স্বরভেদো ভবেত্|২৪|
अथास्य व्याधेरुपद्रवभूतानामादिशब्दगृहीतानां पञ्चानां स्वरभेदादीनां रोगाणां निदानान्याह - - - - अथ स्वरभेदनिदानम्| दोषैर्व्यस्तैः समस्तैश्च क्षयात् षष्ठश्च मेदसा| स्वरभेदो भवेत्|२४|
🔊 Audio coming soon
স০-দোষৈঃ-পৃথগ্বাতপিত্তকফৈঃ, সমস্তৈঃ-সন্নিপতিতৈঃ, তথা ক্ষযাত্, তথা ষষ্ঠঃ স্বরভেদো মেদসা, স্যাত্|
Adhikarana vAtajasya lakShaNam (24-25) · Śloka 25
| তত্র ক্ষামো রূক্ষশ্চলঃ স্বরঃ||২৪|| শূকপর্ণাভকণ্ঠত্বং স্নিগ্ধোষ্ণোপশযোঽনিলাত্| |২৫|
| तत्र क्षामो रूक्षश्चलः स्वरः||२४|| शूकपर्णाभकण्ठत्वं स्निग्धोष्णोपशयोऽनिलात्| |२५|
🔊 Audio coming soon
স০-তত্র-তেষু ষট্সু স্বরভেদেষু মধ্যে, বাতাত্স্বরভেদে সতি ক্ষামাদিমান্ স্বরঃ স্যাত্| তথা, শূকপূর্ণসদৃশগলত্বং স্নিগ্ধোষ্ণোপশযশ্চ ভবতি|
Adhikarana pittajasya lakShaNam (25) · Śloka 25
| পিত্তাত্তালুগলে দাহঃ শোষ উক্তাবসূযনম্||২৫||
| पित्तात्तालुगले दाहः शोष उक्तावसूयनम्||२५||
🔊 Audio coming soon
স০-পিত্তাত্ স্বরভেদে সতি তালুনি গলে চ দাহঃ, তথা শোষঃ, প্রকৃতত্বাত্তালুগলযোরেব| তথা, উক্তাবসূযনং-বাক্যবিষযেঽসহনম্, পিত্তস্বরভেদী বাক্যং বক্তুমসমর্থ ইত্যর্থঃ|
Adhikarana kaphajasya lakShaNam (26) · Śloka 26
লিম্পন্নিব কফাত্কণ্ঠং মন্দঃ খুরখুরাযতে| স্বরো বিবদ্ধঃ|২৬|
लिम्पन्निव कफात्कण्ठं मन्दः खुरखुरायते| स्वरो विबद्धः|२६|
🔊 Audio coming soon
স০-কফাত্স্বরভেদে কণ্ঠং লিম্পন্নিব-উপলেপমিব গলস্য কুর্বন্, খুরখুরাযতে-প্রকৃতত্বাত্ কণ্ঠস্যৈব খুরখুরমিত্যব্যক্তং শব্দং করোতি| তথা, সর্বেভ্যঃ স্বরভেদেভ্যোঽযং মন্দঃ স্বরো-নোচ্চৈঃ শ্রূযতে| তথা, বিবদ্ধো-বদতো মধ্যে স্খলনরূপঃ|
Adhikarana tridoShasya lakShaNam (26) · Śloka 26
| সর্বৈস্তু সর্বলিঙ্গঃ|২৬|
| सर्वैस्तु सर्वलिङ्गः|२६|
🔊 Audio coming soon
স০-সর্বৈঃ-ত্রিভির্দোষৈঃ সমুদিতৈঃ, সর্বলিঙ্গঃ-ত্রিদোষলক্ষণঃ, সর্বভেদো ভবতি|
Adhikarana kShayasya lakShaNam (26-27) · Śloka 27
| ক্ষযাত্কষেত্||২৬|| ধূমাযতীব চাত্যর্থম্| |২৭|
| क्षयात्कषेत्||२६|| धूमायतीव चात्यर्थम्| |२७|
🔊 Audio coming soon
স০-ক্ষযাত্ স্বরভেদঃ কষেত্-হিংস্যাত্, কণ্ঠমর্মঘটনাদিত্যর্থঃ| অনুক্তমপি প্রকৃতত্বাত্ কণ্ঠমিতি লভ্যতে| তথা, ক্ষযস্বরভেদী ধূমাযতীবাতিশযেন| অত্যর্থশব্দেন পিত্তস্বরভেদেঽপি ধূমাযনং ভবতীতি গমযতি| ধূমাযতীতি ধূমনিঃসরণমিব নাসিকাদিদেশেষ্বনুভবতি|
Adhikarana medojasya lakShaNam (27) · Śloka 27
মেদসা শ্লেষ্মলক্ষণঃ| কৃচ্ছ্রলক্ষ্যাক্ষরশ্চ|২৭|
मेदसा श्लेष्मलक्षणः| कृच्छ्रलक्ष्याक्षरश्च|२७|
🔊 Audio coming soon
স০-মেদসা স্বরভেদঃ শ্লেষ্মস্বরভেদলক্ষণঃ| তথা, কৃচ্ছ্রেণ-কথঞ্চিত্, লক্ষ্যাণি-জ্ঞেযানি, অক্ষরাণি যত্র স এবম্| এতদেব কৃচ্ছ্রলক্ষ্যাক্ষরত্বং কফস্বরভেদাদধিকম্|
Adhikarana eShAM sAdhyAsAdhyatvam (27-2) · Śloka 2
| অত্র সর্বৈরন্ত্যং চ বর্জযেত্||২৭|| ইতি স্বরভেদনিদানম্||২||
| अत्र सर्वैरन्त्यं च वर्जयेत्||२७|| इति स्वरभेदनिदानम्||२||
🔊 Audio coming soon
স০-সর্বৈর্দোষৈর্যঃ স্বরভেদঃ, তথাঽন্তে পঠিতত্বান্মেদঃস্বরভেদঃ-অন্ত্যঃ, তং চ বর্জযেত্| চতুরস্ত্বন্যান্ সাধযেদিত্যর্থাদবগম্যতে|
Adhikarana arocakaH pa~jcavidhaH (28) · Śloka 28
অথারোচকনিদানম্| অরোচকো ভবেদ্দোষৈর্জিহ্বাহৃদযসংশ্রযৈঃ| সন্নিপাতেন মনসঃ সন্তাপেন চ পঞ্চমঃ||২৮||
अथारोचकनिदानम्| अरोचको भवेद्दोषैर्जिह्वाहृदयसंश्रयैः| सन्निपातेन मनसः सन्तापेन च पञ्चमः||२८||
🔊 Audio coming soon
স০-জিহ্বা চ হৃদযং চ জিহ্বাহৃদযম্, তত্সংশ্রযঃ-আশ্রযো, যেষাং তৈস্তত্রস্থৈঃ পৃথগ্বাতপিত্তকফৈররোচকঃ স্যাত্| তথা, সন্নিপাতেনার্থাজ্জিহ্বাহৃদযসংশ্রিতেনারোচকঃ স্যাদিতি যোজ্যম্| তথা, মনসঃ সন্তাপেন-অনেকবিধেন ক্রোধশোকাদিনোপতপ্তেন, পঞ্চমোঽরোচক আগন্তুর্ভবেত্| অত্রাপি যথাস্বং দোষাণাং জিহ্বাহৃদযসংশ্রিতত্বমবশ্যমাশ্রযণীযম্| উপাদানাদেব পঞ্চত্বে লব্ধে মনঃসন্তাপজঃ পঞ্চম এবেতি নিযমার্থং পঞ্চমগ্রহণম্| মন্যুশোকাদ্যনেকপ্রকারমনঃসন্তাপত্বেঽপ্যেক এব মনঃসন্তাপজোঽরোচক ইত্যর্থঃ|
Adhikarana pa~jcAnAmarocakAnAM lakShaNAni (29-3) · Śloka 3
কষাযতিক্তমধুরং বাতাদিষু মুখং ক্রমাত্| সর্বোত্থে বিরসং শোকক্রোধাদিষু যথামলম্||২৯|| ইত্যরোচকনিদানম্||৩||
कषायतिक्तमधुरं वातादिषु मुखं क्रमात्| सर्वोत्थे विरसं शोकक्रोधादिषु यथामलम्||२९|| इत्यरोचकनिदानम्||३||
🔊 Audio coming soon
স০-বাতাদ্যুদ্ভবেষ্বরোচকেষু মুখং-আস্যং, ক্রমেণ কষাযতিক্তমধুরং ভবতি| ব্যাধিস্বভাবাত্ পিত্তারোচকেঽপি তিক্তবক্ত্রতা ভবতি, ন কটুকাস্যত্বম্| সর্বোত্থে-সন্নিপাতজেঽরোচকে, বিরসমাস্যং ভবতি-নিশ্চিতরসাজ্ঞানম্| শোকক্রোধাদিসমুত্থেষ্বরোচকেষু যথামলং-যথাদোষং, মুখং ভবেত্| তত্র শোকভযকামলোভের্ষ্যাদিসন্তপ্তমনঃসমুত্থে বাতপ্রকোপাত্ কষাযম্, ক্রোধসন্তপ্তমনঃসমুত্থে বাতপ্রকোপাত্ তিক্তম্, গ্রহোপতপ্তমনঃসমুত্থে সন্নিপাতপ্রকোপাত্ বিরসাস্যত্বম্, ইতি যথামলশব্দস্যার্থঃ|
Adhikarana chardiH pa~jcavidhA (30) · Śloka 30
অথ ছর্দিনিদানম্| ছর্দির্দোষৈঃ পৃথক্সর্বৈর্দ্বিষ্টৈরর্থৈশ্চ পঞ্চমী| |৩০|
अथ छर्दिनिदानम्| छर्दिर्दोषैः पृथक्सर्वैर्द्विष्टैरर्थैश्च पञ्चमी| |३०|
🔊 Audio coming soon
স০-পৃথক্-প্রত্যেকং, দোষৈঃ-বাতপিত্তকফৈঃ, ছর্দির্ভবেত্| সন্নিপতিতৈস্ত্রিভিরপি ছর্দিঃ স্যাত্| তথা, দ্বিষ্টৈঃ-অনভিপ্রেতৈঃ শব্দাদিভিশ্চ, পঞ্চমী ছর্দির্ভবেত্| পূর্ববত্ পঞ্চমীত্যেতন্নিযমার্থম্| দ্বিষ্টানাং হ্যর্থানাং বহুত্বাত্ বহ্ব্যশ্ছর্দযো ভবন্তীত্যাশঙ্ক্যতে তথা শঙ্কানিবৃত্তযে দ্বিষ্টার্থযোগজা একৈব ছর্দিরিত্যুক্তম্|
Adhikarana chardyAH saMprAptiH (30) · Śloka 30
| উদানো বিকৃতো দোষান্ সর্বাস্বপ্যূর্ধ্বমস্যতি||৩০||
| उदानो विकृतो दोषान् सर्वास्वप्यूर्ध्वमस्यति||३०||
🔊 Audio coming soon
স০-উদানাখ্যো বাযুর্বিকৃতঃ সর্বানপি দোষান্-বাতপিত্তকফান্, ঊর্ধ্বমস্যতি-ক্ষিপতি| অপিশব্দ এবার্থে, সর্বাস্বেব ছর্দিষ্বিত্যর্থঃ|
Adhikarana chardyAH pUrvarUpam (31) · Śloka 31
তাসূত্ক্লেশাস্যলাবণ্যপ্রসেকারুচযোঽগ্রগাঃ| |৩১|
तासूत्क्लेशास्यलावण्यप्रसेकारुचयोऽग्रगाः| |३१|
🔊 Audio coming soon
স০-তাসু-ছর্দিষু, উত্ক্লেশাদযোঽগ্রগাঃ-অগ্রে গচ্ছন্তি প্রাগ্রূপতযোদ্ভবন্তি| উত্ক্লেশঃ-স্বস্থান এব মূর্তস্য দোষস্যোদযো বুদ্বুদবদুত্থানম্|
Adhikarana vAtajAyA lakShaNam (31-33) · Śloka 33
| নাভিপৃষ্ঠং রুজন্ বাযুঃ পার্শ্বে চাহারমুত্ক্ষিপেত্||৩১|| ততো বিচ্ছিন্নমল্পাল্পং কষাযং ফেনিলং বমেত্| শব্দোদ্গারযুতং কৃষ্ণমচ্ছং কৃচ্ছ্রেণ বেগবত্||৩২|| কাসস্যাশোষহৃন্মূর্দ্ধস্বরপীডাক্লমান্বিতঃ| |৩৩|
| नाभिपृष्ठं रुजन् वायुः पार्श्वे चाहारमुत्क्षिपेत्||३१|| ततो विच्छिन्नमल्पाल्पं कषायं फेनिलं वमेत्| शब्दोद्गारयुतं कृष्णमच्छं कृच्छ्रेण वेगवत्||३२|| कासस्याशोषहृन्मूर्द्धस्वरपीडाक्लमान्वितः| |३३|
🔊 Audio coming soon
স০-বাযুঃ কাসাদিমান্ ইদমিদং কুর্বন্ বমেত্-ছর্দিং করোতি| নাভিং পৃষ্ঠং চ রুজন্-পীডযন্, পার্শ্বে চ রুজন্, আহারমুত্ক্ষিপেত্-ঊর্ধ্বং প্রেরযেত্| ততঃ-তস্মাদাহারস্যোর্ধ্বগমনাদনন্তরং, বিচ্ছিন্নং কৃত্বা-ন নিরন্তরং, অল্পাল্পং-অল্পং কৃত্বা, কষাযং বমেত্-ন মধুরাদ্যন্যতমম্| তথা, ফেনিলং-ফেনযুক্তম্| ফেনিলমিতি "ফেনাদিলচ্চ" ইতীলচ্| তথা, শব্দযুতমুদ্গারযুতম্| তথা, কৃষ্ণং-কৃষ্ণবর্ণম্| তথা, অচ্ছং-তনু| তথা, কৃচ্ছ্রেণ-কথংকথঞ্চিত্ ন যথাসুখম্| তথা, বেগবত্-বেগযুতম্|
Adhikarana pittajAyA lakShaNam (33-34) · Śloka 34
| পিত্তাত্ক্ষারোদকনিভং ধূম্রং হরিতপীতকম্||৩৩|| সাসৃগম্লং কটূষ্ণং চ তৃণ্মূর্চ্ছাতাপদাহবত্| |৩৪|
| पित्तात्क्षारोदकनिभं धूम्रं हरितपीतकम्||३३|| सासृगम्लं कटूष्णं च तृण्मूर्च्छातापदाहवत्| |३४|
🔊 Audio coming soon
স০-পিত্তাত্ ক্ষারোদকসদৃশাদিকং বমেত্| তথা, তৃণ্মূর্ছাতাপদাহা বিদ্যন্তে যস্মিংস্তদেবং তৃষ্ণাদিযুক্তং যথা ভবতি তথা বমেত্|
Adhikarana kaphajAyA lakShaNam (34-35) · Śloka 35
| কফাত্ স্নিগ্ধং ঘনং শীতং শ্লেষ্মতন্তুগবাক্ষিতম্||৩৪|| মধুরং লবণং ভূরি প্রসক্তং লোমহর্ষণম্| মুখশ্বযথুমাধুর্যতন্দ্রাহৃল্লাসকাসবান্||৩৫||
| कफात् स्निग्धं घनं शीतं श्लेष्मतन्तुगवाक्षितम्||३४|| मधुरं लवणं भूरि प्रसक्तं लोमहर्षणम्| मुखश्वयथुमाधुर्यतन्द्राहृल्लासकासवान्||३५||
🔊 Audio coming soon
স০-কফাত্স্নিগ্ধাদিকং বমেত্| তথা, শ্লেষ্মণঃ সম্বন্ধিনা তন্তুজালেন গবাক্ষিতম্| তথা, মুখশ্বযথ্বাদিমান্| তথা, মধুরাদিকং বমেত্|
Adhikarana sannipAtajAyAH lakShaNam (36) · Śloka 36
সর্বলিঙ্গা মলৈঃ সর্বৈ রিষ্টোক্তা যা চ তাং ত্যজেত্| |৩৬|
सर्वलिङ्गा मलैः सर्वै रिष्टोक्ता या च तां त्यजेत्| |३६|
🔊 Audio coming soon
স০-সর্বলিঙ্গা ছর্দিঃ সর্বৈর্মলৈঃ-বাতপিত্তকফৈঃ সন্নিপতিতৈঃ, ভবেত্| ন কেবলং ত্রিভির্দোষৈঃ সর্বলিঙ্গা, যা চ রিষ্টোক্তা-বিকৃতিবিজ্ঞানীযাধ্যাযে (হৃ. শা. অ. ৫|৭৭) - "ছর্দির্বেগবতী" ইত্যাদিনা গ্রন্থেনোক্তা, সাঽপি সর্বলিঙ্গা-দোষত্রযলক্ষণোপেতা, তাং ত্যজেত্-ন চিকিত্সেত্| ন তু রিষ্টোক্তা যা ছর্দিস্তাং ত্যজেদিতি ব্যাখ্যেযম্, তস্যা রিষ্টত্বেনৈবাসাধ্যত্বস্য প্রতিপাদিতত্বাত্|
Adhikarana dviShTArthajAyAH lakShaNam (36-37) · Śloka 37
| পূত্যমেধ্যাশুচিদ্বিষ্টদর্শনশ্রবণাদিভিঃ||৩৬|| তপ্তে চিত্তে হৃদি ক্লিষ্টে ছর্দির্দ্বিষ্টার্থযোগজা| |৩৭|
| पूत्यमेध्याशुचिद्विष्टदर्शनश्रवणादिभिः||३६|| तप्ते चित्ते हृदि क्लिष्टे छर्दिर्द्विष्टार्थयोगजा| |३७|
🔊 Audio coming soon
স০-পূত্যাদিভিস্তপ্তে চিত্তে-উপতপ্তে মনসি, তথা তৈরেব পূত্যাদিভিঃ ক্লিষ্টে-পীডিতে, হৃদি যা জাযতে ছর্দিঃ সা দ্বিষ্টার্থযোগজা ছর্দিরুচ্যতে| আদিঃ-প্রকারে, যথা-আকৃতিগণেষু|
Adhikarana kRumitRuShNAmadaurhRudajAnAM chardInAM vAtAdijAsvevAntarbhAvaH (37-4) · Śloka 4
ননু, কৃম্যাদিজান্যন্যানি ছর্দীংষি সম্ভবন্ত্যেব| তেষাং লক্ষণং কস্মান্নোক্তম্ ? ইত্যাহ - - - - | বাতাদীনেব বিমৃশেত্কৃমিতৃষ্ণামদৌহৃদে||৩৭|| শূলবেপথুহৃল্লাসৈর্বিশেষাত্ কৃমিজাং বদেত্| কৃমিহৃদ্রোগলিঙ্গৈশ্চ|৩৮| ইতি ছর্দিনিদানম্||৪||
ननु, कृम्यादिजान्यन्यानि छर्दींषि सम्भवन्त्येव| तेषां लक्षणं कस्मान्नोक्तम् ? इत्याह - - - - | वातादीनेव विमृशेत्कृमितृष्णामदौहृदे||३७|| शूलवेपथुहृल्लासैर्विशेषात् कृमिजां वदेत्| कृमिहृद्रोगलिङ्गैश्च|३८| इति छर्दिनिदानम्||४||
🔊 Audio coming soon
স০-কারণে কার্যোপচারাত্ কৃম্যাদিশব্দৈরেব ছর্দয উচ্যন্তে| কৃমিতৃষ্ণামগর্ভিণীদৌহৃদজে ছর্দিষি বাতাদীনেব যথা যথং স্বলক্ষণৈর্বিমৃশেত্-বিচারযেল্লক্ষযেত্| ন হি বাতাদীনন্তরেণৈতাঃ ছর্দযঃ কথঞ্চিদপি সম্ভবন্তি| অত এবৈবকারোঽবধারণার্থোঽত্র ব্যধাযি| এবং কৃমিজাং কদাচিদ্বাযুচ্ছর্দিলক্ষণোপেতামথবা পিত্তচ্ছর্দিলক্ষণোপেতাং কফচ্ছর্দিলক্ষণোপেতাং বা যথাযথং লক্ষযেত্| এবং তৃষ্ণামদৌহৃদচ্ছর্দিষি বাতাদীন্ বিমৃশেত্| বিশেষেণ শূলবেপথুহৃল্লাসৈঃ কৃমিজাং বদেত্| কৃমিহৃদ্রোগলক্ষণৈশ্চ-অনন্তরমেব বক্ষ্যমাণৈঃ, কৃমিজাং বদেত্|
Adhikarana hRudrogaH pa~jcavidhaH, hRudrogANAM nidAnam (38-39) · Śloka 39
অধুনা হৃদ্রোগং লিলক্ষযিষুরাহ - - - - অথ হৃদ্রোগনিদানম্| | স্মৃতাঃ পঞ্চ তু হৃদ্গদাঃ||৩৮|| তেষাং গুল্মনিদানোক্তৈঃ সমুত্থানৈশ্চ সম্ভবঃ| |৩৯|
अधुना हृद्रोगं लिलक्षयिषुराह - - - - अथ हृद्रोगनिदानम्| | स्मृताः पञ्च तु हृद्गदाः||३८|| तेषां गुल्मनिदानोक्तैः समुत्थानैश्च सम्भवः| |३९|
🔊 Audio coming soon
স০-হৃদ্গদাঃ পঞ্চ স্মৃতাঃ, তন্ত্রকৃদ্ভিরিতি শেষঃ| [তেষাং-হৃদ্রোগাণাং, গুল্মনিদানোক্তৈঃ-বক্ষ্যমাণৈঃ, সমুত্থানৈঃ-কারণৈঃ, সম্ভবঃ-উত্পত্তিঃ| ]
Adhikarana vAtajAyA lakShaNam (39-41) · Śloka 41
| বাতেন শূল্যতেঽত্যর্থং যুদ্যতে স্ফুটতীব চ||৩৯|| ভিদ্যতে শুষ্যতি স্তব্ধং হৃদযং শূন্যতা দ্রবঃ| অকস্মাদ্দীনতা শোকো ভযং শব্দাসহিষ্ণুতা||৪০|| বেপথুর্বেষ্টনং মোহঃ শ্বাসরোধোঽল্পনিদ্রতা| |৪১|
| वातेन शूल्यतेऽत्यर्थं युद्यते स्फुटतीव च||३९|| भिद्यते शुष्यति स्तब्धं हृदयं शून्यता द्रवः| अकस्माद्दीनता शोको भयं शब्दासहिष्णुता||४०|| वेपथुर्वेष्टनं मोहः श्वासरोधोऽल्पनिद्रता| |४१|
🔊 Audio coming soon
স০-বাতেন হৃদ্রোগেঽত্যর্থং হৃদযং শূল্যতে| অত্যর্থশব্দেনেদং গমযতি,-অন্যেষ্বপি হৃদ্রোগেষু হৃদযং শূল্যতেঽতিশযেন তু বাতজে হৃদ্রোগে ইতি| তথা, তুদ্যতে-প্রাজনেনেব| শূলং-সন্ততা পীডা| তোদো-বিচ্ছিন্নোঽতিশযেন রুগুদ্ভবঃ| তথা, হৃদযং স্ফুটতীত্যাদিক্রিযাদিযুতং ভবতি| তথা, শূন্যতা দ্রবত্বং চ, প্রকৃতত্বাদ্ধৃদযস্যৈব স্যাদিতি বোধ্যম্|
Adhikarana pittajAyA lakShaNam (41-42) · Śloka 42
| পিত্তা ত্তৃষ্ণা ভ্রমো মূর্চ্ছা দাহঃ স্বেদোঽম্লকঃ ক্লমঃ||৪১|| ছর্দনং চাম্লপিত্তস্য ধূমকঃ পীততা জ্বরঃ| |৪২|
| पित्ता त्तृष्णा भ्रमो मूर्च्छा दाहः स्वेदोऽम्लकः क्लमः||४१|| छर्दनं चाम्लपित्तस्य धूमकः पीतता ज्वरः| |४२|
🔊 Audio coming soon
স০-পিত্তাত্-পিত্তেন, তৃষ্ণাদয স্যুঃ|
Adhikarana kaphajAyA lakShaNam (42-43) · Śloka 43
| শ্লেষ্মণা হৃদযং স্তব্ধং ভারিকং সাশ্মগর্ভবত্||৪২|| কাসাগ্নিসাদনিষ্ঠীবনিদ্রালস্যারুচিজ্বরাঃ| |৪৩|
| श्लेष्मणा हृदयं स्तब्धं भारिकं साश्मगर्भवत्||४२|| कासाग्निसादनिष्ठीवनिद्रालस्यारुचिज्वराः| |४३|
🔊 Audio coming soon
স০-শ্লেষ্মণা হৃদ্রোগে হৃদযং স্তব্ধং, তথা ভারিকং-গুরু, ভবতি| কথম্ ? সাশ্মগর্ভবত্-বিদ্যমানাশ্মগর্ভসদৃশম্| তথা, কাসাদযঃ স্যুঃ|
Adhikarana tridoShasya lakShaNam (43) · Śloka 43
| সর্বলিঙ্গস্ত্রিভির্দোষৈঃ|৪৩|
| सर्वलिङ्गस्त्रिभिर्दोषैः|४३|
🔊 Audio coming soon
স০-সর্বলিঙ্গো হৃদ্রোগস্ত্রিভির্দোষৈঃ স্যাত্|
Adhikarana kRumijasya lakShaNam (43-5) · Śloka 5
| কৃমিভিঃ শ্যাবনেত্রতা||৪৩|| তমঃপ্রবেশো হৃল্লাসঃ শোষঃ কণ্ডূঃ কফস্রুতিঃ| হৃদযং প্রততং চাত্র ক্রকচেনেব দার্যতে||৪৪|| চিকিত্সেদামযং ঘোরং তং শীঘ্রং শীঘ্রকারিণম্| |৪৫| ইতি হৃদ্রোগনিদানম্||৫||
| कृमिभिः श्यावनेत्रता||४३|| तमःप्रवेशो हृल्लासः शोषः कण्डूः कफस्रुतिः| हृदयं प्रततं चात्र क्रकचेनेव दार्यते||४४|| चिकित्सेदामयं घोरं तं शीघ्रं शीघ्रकारिणम्| |४५| इति हृद्रोगनिदानम्||५||
🔊 Audio coming soon
স০-কৃমিভিশ্চ হৃদ্রোগে শ্যাবাক্ষিতাদ্যাঃ স্যুঃ| অত্র-কৃমিহৃদ্রোগে, হৃদযং ক্রকচেনেব-করপত্রেণেব, [ প্রততং- ] সন্ততং, দার্যতে| তং-কৃমিহৃদ্রোগাখ্যমামযং, ঘোরং-অতিদুঃসহং, শীঘ্রকারিণং-আশুবিঘাতকারিণং, শীঘ্রং-আশ্বেব, চিকিত্সেত্| মহামর্মণো হৃদযস্য কৃমিভির্ভক্ষণাত্|
Adhikarana tRuShNA ShaDvidhA (45-48) · Śloka 48
উক্তা হৃদ্রোগাঃ| শীঘ্রকারিত্বসামান্যাত্ তৃষ্ণাঽন্তরং ব্যাখ্যাযতে - - - - অথ তৃষ্ণানিদানম্| | বাতাত্পিত্তাত্কফাত্তৃষ্ণা সন্নিপাতাদ্রসক্ষযাত্||৪৫|| ষষ্ঠী স্যাদুপসর্গাচ্চ বাতপিত্তে তু কারণম্| সর্বাসু তে এব বাতপিত্তে হেতুঃ| কুত এবম্ ? ইত্যাহ - - - - তত্প্রকোপো হি সৌম্যধাতুপ্রশোষণাত্||৪৬|| সর্বদেহভ্রমোত্কম্পতাপতৃড্দাহমোহকৃত্| সৌম্যধাতুপ্রশোষণপূর্বকং তৃষ্ণানাং যতো জন্ম, তস্মাদিদমাহ - - - - জিহ্বামূলগলক্লোমতালুতোযবহাঃ সিরাঃ||৪৭|| সংশোষ্য তৃষ্ণা জাযন্তে| |৪৮|
उक्ता हृद्रोगाः| शीघ्रकारित्वसामान्यात् तृष्णाऽन्तरं व्याख्यायते - - - - अथ तृष्णानिदानम्| | वातात्पित्तात्कफात्तृष्णा सन्निपाताद्रसक्षयात्||४५|| षष्ठी स्यादुपसर्गाच्च वातपित्ते तु कारणम्| सर्वासु ते एव वातपित्ते हेतुः| कुत एवम् ? इत्याह - - - - तत्प्रकोपो हि सौम्यधातुप्रशोषणात्||४६|| सर्वदेहभ्रमोत्कम्पतापतृड्दाहमोहकृत्| सौम्यधातुप्रशोषणपूर्वकं तृष्णानां यतो जन्म, तस्मादिदमाह - - - - जिह्वामूलगलक्लोमतालुतोयवहाः सिराः||४७|| संशोष्य तृष्णा जायन्ते| |४८|
🔊 Audio coming soon
স০-বাতাদিভিঃ পঞ্চ তৃষ্ণাঃ স্যুঃ| ষষ্ঠী স্যাদুপসর্গাচ্চ| উপাদানাদেব ষট্সঙ্খ্যাযা লব্ধত্বাত্ ষষ্ঠীত্যেতদ্বচনং নিযমার্থম্| আমোদ্ভবাদ্যা যা বক্ষ্যমাণাস্তৃষ্ণাস্তাঃ সর্বাস্তৃষ্ণানাং ষট্ত্বং নাতিক্রামন্তি, বাতপিত্তজত্বাত্| প্রাযেণ তাসামাস্বেবান্তর্ভাবঃ| স০-সর্বাসু-পূর্বোক্তাসু বক্ষ্যমাণাসু চ তৃষ্ণাসু, বাতপিত্তে কারণম্| স০-হি-যস্মাত্, সৌম্যস্য শরীরগতস্য ধাতোঃ-শ্লেষ্মণো রসাদের্ধাতোঃ, আহারবিহারাদিনা যত্প্রশোষণং তস্মাত্, তযোঃ-বাতপিত্তযোঃ, প্রকোপো 'জাযতে' ইত্যধ্যাহার্যম্| কিম্ভূতঃ প্রকোপঃ ? সর্বদেহভ্রমোত্কম্পতাপতৃড্দাহমোহকৃত্| স০-জিহ্বাদিসিরাঃ সংশোষ্য তৃষ্ণাঃ সমুত্পদ্যন্তে|
Adhikarana tRuShNAnAM sAmAnyalakShaNam (48-49) · Śloka 49
তাসাং সামান্যলক্ষণম্| মুখশোষো জলাতৃপ্তিরন্নদ্বেষঃ স্বরক্ষযঃ||৪৮|| কণ্ঠৌষ্ঠজিহ্বাকার্কশ্যং জিহ্বানিষ্ক্রমণং ক্লমঃ| প্রলাপশ্চিত্তবিভ্রংশস্তৃঙ্গ্রহোক্তাস্তথাঽঽমযাঃ||৪৯||
तासां सामान्यलक्षणम्| मुखशोषो जलातृप्तिरन्नद्वेषः स्वरक्षयः||४८|| कण्ठौष्ठजिह्वाकार्कश्यं जिह्वानिष्क्रमणं क्लमः| प्रलापश्चित्तविभ्रंशस्तृङ्ग्रहोक्तास्तथाऽऽमयाः||४९||
🔊 Audio coming soon
স০-মুখশোষাদিকং তৃঙ্গ্রহোক্তামযপর্যন্তং নির্দিষ্টং তাসাং-তৃষ্ণানাং, সামান্যলক্ষণম্| তৃঙ্গ্রহোক্তাঃ-রোগানুত্পাদনীযোক্তাঃ (হৃ. সূ. অ. ৪|১০) শোষাঙ্গসাদবাধির্যাদযঃ|
Adhikarana vAtajAyA lakShaNam (50-51) · Śloka 51
মারুতাত্ ক্ষামতা দৈন্যং শঙ্খতোদঃ শিরোভ্রমঃ| গন্ধাজ্ঞানাস্যবৈরস্যশ্রুতিনিদ্রাবলক্ষযাঃ||৫০|| শীতাম্বুপানাদ্দৃদ্ধিশ্চ| |৫১|
मारुतात् क्षामता दैन्यं शङ्ख़तोदः शिरोभ्रमः| गन्धाज्ञानास्यवैरस्यश्रुतिनिद्राबलक्षयाः||५०|| शीताम्बुपानाद्दृद्धिश्च| |५१|
🔊 Audio coming soon
স০-বাতাত্তৃষ্ণাযাং ক্ষামতাদ্যাঃ স্যুঃ|
Adhikarana pittajAyA lakShaNam (51) · Śloka 51
পিত্তান্মূর্চ্ছাস্যতিক্ততা| রক্তেক্ষণত্বং প্রততং শোষো দাহোঽতিধূমকঃ||৫১||
पित्तान्मूर्च्छास्यतिक्तता| रक्तेक्षणत्वं प्रततं शोषो दाहोऽतिधूमकः||५१||
🔊 Audio coming soon
স০-পিত্তাত্তৃষ্ণাযাং মূর্চ্ছাদযো ভবন্তি|
Adhikarana kaphajAyA lakShaNam (52-54) · Śloka 54
কফতৃষ্ণামাহ - - - - কফো রুণদ্ধি কুপিতস্তোযবাহিষু মারুতম্| স্রোতঃসু স কফস্তেন পঙ্কবচ্ছোষ্যতে ততঃ||৫২|| শুকৈরিবাচিতঃ কণ্ঠো নিদ্রা মধুরবক্ক্রতা| আধ্মানং শিরসো জাড্যং স্তৈমিত্যচ্ছর্দ্যরোচকাঃ||৫৩|| আলস্যমবিপাকশ্চ| |৫৪|
कफतृष्णामाह - - - - कफो रुणद्धि कुपितस्तोयवाहिषु मारुतम्| स्रोतःसु स कफस्तेन पङ्कवच्छोष्यते ततः||५२|| शुकैरिवाचितः कण्ठो निद्रा मधुरवक्क्रता| आध्मानं शिरसो जाड्यं स्तैमित्यच्छर्द्यरोचकाः||५३|| आलस्यमविपाकश्च| |५४|
🔊 Audio coming soon
স০-কফঃ কুপিতো জলবাহিষু স্রোতঃসু যদা মারুতং রুণদ্ধি তদা স চ কফস্তেন-মরুতা, পঙ্ক ইব শোষ্যতে| ততঃ-তস্মিন্কফে শুষ্কে সতি, কণ্ঠঃ শূকৈরিবাচিতো-ব্যাপ্তঃ, স্যাত্| তথা, নিদ্রাদযশ্চ স্যুঃ|
Adhikarana sannipAtajAyAH lakShaNam (54) · Śloka 54
সর্বৈঃ স্যাত্সর্বলক্ষণা| |৫৪|
सर्वैः स्यात्सर्वलक्षणा| |५४|
🔊 Audio coming soon
স০-সর্বৈঃ-সন্নিপতিতৈঃ, সর্বলিঙ্গা তৃষ্ণা স্যাত্|
Adhikarana tRuShNAntarANAmantarbhAvaH (54-56) · Śloka 56
| আমোদ্ভবা চ, ভক্তস্য সংরোধাদ্বাতপিত্তজা||৫৪|| উষ্ণক্লান্তস্য সহসা শীতাম্ভো ভজতস্তৃষম্| ঊষ্মা রুদ্ধো গতঃ কোষ্ঠং যাং কুর্যাত্পিত্তজৈব সা||৫৫|| যা চ পানাতিপানোত্থা, তীক্ষ্ণাগ্নেঃ স্নেহজা চ যা| স্নিগ্ধগুর্বম্ললবণভোজনেন কফোদ্ভবা||৫৬||
| आमोद्भवा च, भक्तस्य संरोधाद्वातपित्तजा||५४|| उष्णक्लान्तस्य सहसा शीताम्भो भजतस्तृषम्| ऊष्मा रुद्धो गतः कोष्ठं यां कुर्यात्पित्तजैव सा||५५|| या च पानातिपानोत्था, तीक्ष्णाग्नेः स्नेहजा च या| स्निग्धगुर्वम्ललवणभोजनेन कफोद्भवा||५६||
🔊 Audio coming soon
স০-আমোদ্ভবা চ তৃষ্ণা ভক্তস্যাহারস্য সংরোধাত্ স্যাত্| সা চ বাতপিত্তজা| উষ্ণেন ম্লানস্য নরস্য সহসা-ঝটিত্যেব, শীতং জলং সেবমানস্যোষ্মা রুদ্ধঃ কোষ্ঠং গতো যাং তৃষং-তৃষ্ণাং, কুর্যাত্ সা পিত্তজৈব তৃষ্ণা, ন ত্বন্যা বোধ্যা| যা চ তৃট্ পানস্য-মদ্যপানস্য, অতিপানোদ্ভবা সাঽপি পিত্তজৈব| যা চ তীক্ষ্ণাগ্নেঃ পুরুষস্য স্নেহজা তৃট্ সাঽপি পিত্তজৈব| স্নিগ্ধাদিগুণযুক্তেন ভোজনেন যা তৃট্ স্যাত্ সা কফসম্ভবা বেদ্যা|
Adhikarana rasakShayajAyAH lakShaNam (57) · Śloka 57
তৃষ্ণা রসক্ষযোক্তেন লক্ষণেন ক্ষযাত্মিকা| |৫৭|
तृष्णा रसक्षयोक्तेन लक्षणेन क्षयात्मिका| |५७|
🔊 Audio coming soon
স০-রসক্ষযোক্তেন লক্ষণেন-"রসে রৌক্ষ্যং শ্রমঃ" (হৃ. সূ. অ. ১১|১৭) ইত্যাদিগ্রন্থনির্দিষ্টেন লক্ষণেন, ক্ষযাত্মিকা তৃষ্ণা বোধ্যা|
Adhikarana upasargajAyAH lakShaNam (5) · Śloka 5
| শোষমেহজ্বরাদ্যন্যদীর্ঘরোগোপসর্গতঃ||৫৭|| যা তৃষ্ণা জাযতে তীব্রা সোপসর্গাত্মিকা স্মৃতা| ৫৭ ১/২| ইতি তৃষ্ণানিদানম্| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে শরীরস্থানে রাজযক্ষ্মাদিনিদানং নাম পঞ্চমোঽধ্যাযঃ||৫||
| शोषमेहज्वराद्यन्यदीर्घरोगोपसर्गतः||५७|| या तृष्णा जायते तीव्रा सोपसर्गात्मिका स्मृता| ५७ १/२| इति तृष्णानिदानम्| इति श्रीवैद्यपतिसिंहगुप्तसूनुश्रीमद्वाग्भटविरचितायामष्टाङ्गहृदयसंहितायां तृतीये शरीरस्थाने राजयक्ष्मादिनिदानं नाम पञ्चमोऽध्यायः||५||
🔊 Audio coming soon
স০-শোষমেহজ্বরাদ্যন্যতমদীর্ঘরোগোপসর্গাত্-দীর্ঘকালানুবন্ধাত্, যা তৃষ্ণা স্যাত্ সোপসর্গাত্মিকা স্মৃতা, মুনীন্দ্রৈরিতি শেষঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে রাজযক্ষ্মাদিনিদানং নাম পঞ্চমোঽধ্যাযঃ সমাপ্তঃ|| ৫||