3. raktapittakāsanidānādhyāyaḥ

Adhikarana adhyAyopakramaH · Śloka

জ্বরনিদানাদনন্তরং রক্তপিত্তনিদানমারভ্যতে| যতো জ্বর ঊষ্মণা বিনা ন সম্ভবতি, পিত্তং চ বিনা ন কদাচিদূষ্মা| তস্মাজ্জ্বরনিদানাদূর্ধ্বং রক্তপিত্তনিদানমিদানীমারব্ধুং যুক্তমিত্যাহ-

Adhikarana raktapittakAsanidAnAdhyAyaH (2) · Śloka 2

অথাতো রক্তপিত্তকাসনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

স০-ব্যাখ্যাঽস্য পূর্ববত্|

Adhikarana raktapittanidAnam,raktapittasya saMprAptiH (1-2) · Śloka 2

ভৃশোষ্ণতীক্ষ্ণকট্বম্ললবণাদিবিদাহিভিঃ| কোদ্রবোদ্দালকৈশ্চান্নৈস্তদ্যুক্তৈরতিসেবিতৈঃ||১|| কুপিতং পিত্তলৈঃ পিত্তং দ্রবং রক্তং চ মূর্চ্ছিতে| তে মিথস্তুল্যরূপত্বমাগম্য ব্যাপ্নুতস্তনুম্||২||

স০-ভৃশশব্দস্যোষ্ণাদিভির্বিদাহ্যন্তৈঃ সম্বন্ধঃ| আদিশব্দেনাত্র ক্ষারাদযো গৃহ্যন্তে| ভৃশোষ্ণাদিভিরন্নৈঃ পিত্তলৈরতিসেবিতৈর্দ্রবং-দ্রবস্বভাবং, যত্ পিত্তং তত্ কুপিতং-দুষ্টং, তথা রক্তং কুপিতং, তৈরেবাতিসেবিতৈঃ| অতিসেবনং চোভযতা ভবতি,-চিরকালমভ্যবহৃতৈস্তথাঽতিমাত্রাভ্যবহৃতৈঃ| ন কেবলমেতৈর্যাবত্ কোদ্রবোদ্দালকৈশ্চান্নৈঃ| তদিত্যনেন ভৃশোষ্ণাদীনি পরামৃশ্যন্তে| তৈর্যুক্তৈঃ-মিশ্রিতৈঃ কোদ্রবোদ্দালকৈশ্চান্নৈরতিসেবিতৈঃ কুপিতং পিত্তং তথা রক্তং চ ভবতি| তে-দ্বে অপি রক্তপিত্তে, মূর্চ্ছিতে-মিশ্রতাং গতে, মিথঃ-পরস্পরং, তুল্যরূপত্বং-সমবর্ণত্বং, আগম্য-প্রাপ্য, সর্বাং তনুং-দেহং, ব্যাপ্নুতো-ব্যশ্র্নুবাতে| ননু, ভৃশোষ্ণাদীনাং পিত্তলত্বাব্যভিচারাত্ কিমর্থং পিত্তলৈরিত্যুক্তম্ ? ব্রূমঃ| দাডিমামলকসৈন্ধবেষ্বম্ললবণাদিষু ব্যভিচারাত্| তথাহি-দাডিমামলকসৈন্ধবান্যম্ললবণান্যপি পিত্তং ন কুরুতে| অপি চ ন কেবলং ভৃশোষ্ণাদিযুক্তৈঃ কুপিতং পিত্তং রক্তং চ| যাবদন্যৈরপি পিত্তলৈরভৃশোষ্ণাদিস্বভাবৈর্ব্রীহিপ্রভৃতিভিরতিসেবিতৈঃ কুপিতং পিত্তং চেতি প্রতিপাদনার্থং পিত্তলৈরিত্যুক্তম্| ননু, এবং সতি পিত্তলৈরিত্যেব নির্দেশঃ কর্তুং যুক্ত উভযানুগ্রহার্থঃ| তথা চ ভৃশোষ্ণাদীনি তথাঽন্যান্যপ্যভৃশোষ্ণাদীনি ব্রীহিপ্রভৃতীন্যেবং গৃহীতানি ভবন্তি| অস্ত্যেবৈতত্| কিন্তু পিত্তলত্বসামান্যাদ্গৃহীতানামপি ভৃশোষ্ণাদীনামুপাদানং কৃতমতিশযদ্যোতনার্থম্| যথা ভৃশোষ্ণাদীন্যতিশযেন পিত্তং রক্তং চ কোপযন্তি, ন তথাঽন্যানি ব্রীহিপ্রভৃতীনি| অত এব কোদ্রবোদ্দালকৌ শীতবীর্যাবপি ভৃশোষ্ণাদিদ্রব্যযুতৌ পিত্তস্য কর্তারৌ ভবতঃ| ভৃশোষ্ণাদীনামতিপিত্তলত্বাত্| ননু, পিত্তস্য দ্রবমিতি বিশেষণমযুক্তম্, ব্যভিচারাভাবাত্| তথা চ তন্ত্রকৃজ্জগৌ (হৃ. সূ. অ. ১|১১)- "পিত্তং সস্নেহস্তীক্ষ্ণোষ্ণং লঘু বিস্রং সরং দ্রবম্|" ইতি| অত্রোচ্যতে| পিত্তমদ্রবমপ্যস্তি| কথং জ্ঞাযতে ? গ্রন্থকারবচনাত্| তথা চোবাচ তন্ত্রকৃত্ (হৃ. সূ. অ. ১২|৯০)- "পিত্তং পঞ্চাত্মকং তত্র পক্বামাশযমধ্যগম্| পঞ্চভূতাত্মকত্বেঽপি যত্তৈজসগুণোদযাত্|| ত্যক্তদ্রবত্বং" ইত্যাদি| তস্মাত্ যদ্দ্রবরূপং পিত্তং তদ্ভৃশোষ্ণাদিভিঃ কুপিতং রক্তপিত্তে কারণম্, ন পুনর্যত্ ত্যক্তদ্রবত্বং-কঠিনতাং প্রাপ্তং, ইতি প্রতিপাদযিতুং দ্রবগ্রহণম্| ননু, যদি তুল্যরূপত্বং পিত্তরক্তে প্রাপ্তে, তত্কথমীদৃশো নির্দেশ উপপদ্যতে ? " অধোগং যাপযেদ্রক্তং" (হৃ. চি. অ. ২|২) ইতি| এবমাদৌ হি রক্তস্য পিত্তসহিতস্যৈব নির্দেশো যুক্তো "রক্তপিত্তমধোগং যাপযেত্" ইতি|

Adhikarana pittasya raktatve vAcye hetuH (3) · Śloka 3

এবমাশঙ্ক্যাহ - - - - পিত্তং রক্তস্য বিকৃতেঃ সংসর্গাদ্দূষণাদপি| গন্ধবর্ণানুবৃত্তেশ্চ রক্তেন ব্যপদিশ্যতে||৩||

স০-পিত্তং রক্তেন ব্যপদিশ্যতে| যস্মাত্ পিত্তং রক্তস্য বিকৃতিঃ-বিকারো, রক্তাদুত্পন্নমিত্যর্থঃ| তথা চোক্তম্ (হৃ. শা. অ. ৩|৬৩) - "কফঃ পিত্তং মলাঃ স্বেষু প্রস্বেদো নখরোম চ| স্নেহোঽক্ষিত্বগ্বিশামোজো ধাতূনাং ক্রমশো মলাঃ||" ইতি| তথা, সংসর্গাত্-অন্যোন্যমিশ্রীভাবাত্| তথা, দূষণাদপি-যস্মাদ্রক্তং পিত্তেনাশ্বেছ দূষ্যতে, তথা রক্তদূষণৈঃ পিত্তমপি দূষ্যতে, তাত্স্থ্যাত্| তথা চ গ্রন্থঃ (হৃ. সূ. অ. ১১|২৭) - "যদেকস্য তদন্যস্য বর্দ্ধনক্ষপণৌষধম্|" ইতি| অন্যে তু ধাতবো ন তথা দূষ্যন্তে যথা পিত্তম্| তথা চোক্তম্ (হৃ. সূ. অ. ১১|২৬)- "তত্রাস্থিনি স্থিতো বাযুঃ পিত্তং তু স্বেদরক্তযোঃ|" ইতি| তথা, গন্ধবর্ণানুবৃত্তেশ্চ| গন্ধশ্চ বর্ণশ্চ গন্ধবর্ণৌ, তযোরনুবৃত্তিঃ-অনুকরণং গন্ধবর্ণানুবৃত্তিঃ| কস্য গন্ধবর্ণো ? প্রকৃতত্বাদ্রক্তস্য যাদৃশৌ গন্ধবর্ণৌ তাদৃশাবপি পিত্তস্য| এবং চ রক্তেন তত্ ব্যপদিশ্যতে| তস্মাত্ " অধোগং যাপযেদ্রক্তং" ইত্যাদিনির্দেশো যুক্ত এব| ননু, রক্তস্য শরীরে স্বাভাবিকং প্রমাণমুক্তমষ্টাবেবাঞ্জলযঃ| প্রকোপমাপন্নং ত্বাঢকাদিসঙ্খ্যাতমপি দৃশ্যতে|

Adhikarana raktodgamasthAnam (4) · Śloka 4

তত্কথমেতত্ ? ইত্যাহ - - - - প্রভবত্যসৃজঃ স্থানাত্প্লীহতো যকৃতশ্চ তত্| |৪|

স০-অসৃজঃ স্থানাত্ তত্-পিত্তমূর্চ্ছিতং রক্তং, প্রভবতি-প্রকর্ষেণ ভবতি বর্ধতে| তস্মাদ্বহুত্বমস্য যুক্তমেব| কিং তদসৃজঃ স্থানম্ ? যতস্তত্প্রভবতীত্যাহ-প্লীহতো যকৃতশ্চেতি |

Adhikarana raktapittasya pUrvarUpam (4-7) · Śloka 7

অথাস্য পূর্বরূপাণ্যাহ - | শিরোগুরুত্বমরুচিঃ শীতেচ্ছা ধূমকোঽম্লকঃ||৪|| ছর্দিশ্ছর্দিতবৈভত্স্যং কাসঃ শ্বাসো ভ্রমঃ ক্লমঃ| লোহলোহিতমত্স্যামগন্ধাস্যত্বং স্বরক্ষযঃ||৫|| রক্তহারিদ্রহরিতবর্ণতা নযনাদিষু| নীললোহিতপীতানাং বর্ণানামবিবেচনম্||৬|| স্বপ্নে তদ্বর্ণদর্শিত্বং ভবত্যস্মিন্ ভবিষ্যতি| |৭|

স০-শিরোগুরুত্বাদিকমস্মিন্-রক্তপিত্তে, ভবিষ্যতি সতি ভবতি| ছর্দিতে-বমিতে, বৈভত্স্যং-জুগুপ্সা| স্বপ্নে-স্বপ্নাবস্থাযাং, তদ্বর্ণদর্শিত্বং-রক্তবর্ণাকারং পশ্যতি| তচ্চ রক্তপিত্তং ত্রিবিধমূর্ধ্বগমধোগমুভযমার্গগং চ|

Adhikarana raktapittasya rUpam (7-8) · Śloka 8

তত্রোর্ধ্বগমাহ - | ঊর্ধ্বং নাসাক্ষিকর্ণাস্যৈর্মেঢ্রযোনিগুদৈরধঃ||৭|| কুপিতং রোমকূপৈশ্চ সমস্তৈস্তত্প্রবর্ততে| |৮|

স০-ঊর্ধ্বগং রক্তপিত্তং কুপিতং নাসাদিভিঃ সপ্তভির্দ্বারৈঃ প্রবর্ততে| অধোগং রক্তপিত্তং কুপিতং মেঢ্রযোনিগুদৈস্ত্রিভির্দ্বারৈঃ প্রবর্ততে| প্রাণ্যঙ্গানাং দ্বন্দ্ব একবদিত্যস্য প্রাযিকত্বাদ্বহুবচনমত্র ন দুষ্টম্| তথা রোমকূপৈঃ সমস্তৈঃ| চশব্দান্নাসাক্ষিকর্ণাস্যমেঢ্রযোনিগুদৈরুভযমার্গমুভযমার্গাভ্যাং তত্-রক্তপিত্তং, প্রবর্ততে|

Adhikarana Urdhvagasya sAdhyatvam virecyatvasya hetutve yuktiH bahvauShadhatvadarSanam (8-10) · Śloka 10

| ঊর্ধ্বং সাধ্যং কফাদ্যস্মাত্তদ্বিরেচনসাধনম্||৮|| বহ্বৌষধং চ, পিত্তস্য বিরেকো হি বরৌষধম্| অনুবন্ধী কফো যশ্চ তত্র তস্যাপি শুদ্ধিকৃত্||৯|| কষাযাঃ স্বাদবোঽপ্যস্য বিশুদ্ধশ্লেষ্মণো হিতাঃ| কিমু তিক্তাঃ কষাযা বা যে নিসর্গাত্কফাপহাঃ||১০||

স০-ঊর্ধ্বং-ঊর্ধ্বগং রক্তপিত্তং, সাধ্যম্| যস্মাত্কারণাত্ কফাদধিকাজ্জাযতে| তচ্চ বিরেচনসাধনম্| সাধ্যতেঽনেনেতি সাধনং,-চিকিত্সিতম্| তচ্চ-ঊর্ধ্বগং রক্তপিত্তং, বহ্বৌষধম্| বহু ঔষধং যস্য তদ্বহ্বৌষধং,-অনেকসাধনম্, মধুরকষাযতিক্তদ্রব্যসাধ্যত্বাত্| অপিচ, যস্মাদ্বিরেকঃ পিত্তস্য বরৌষধম্| তথা চোক্তম্ (চ. সূ. অ. ২৫|৪০) - "বিরেচনং পিত্তহরাণাম্|" ইতি| যশ্চ [ তত্র- ] তস্মিন্নূর্ধ্বগে রক্তপিত্তাখ্যে ব্যাধৌ, কফোঽনুবন্ধী| তস্য-অনুবন্ধিনঃ কফস্য, বিরেচনং শুদ্ধিকৃত্-শোধনং করোতি| অতো হেতোরূর্ধ্বগং রক্তপিত্তং সাধ্যম্| কষাযাঃ-স্বরসকল্কশ্রৃতশীতফাণ্টাখ্যাঃ, তে স্বাদবোঽপি হিতাঃ, ব্যাধিপ্রতিপক্ষত্বাত্| ন তু দোষপ্রতিপক্ষতাদ্বারেণ, দোষসমানত্বাত্তেষাম্| অথবা কেচন মকুষ্ঠতণ্ডুলীযাদিসম্বন্ধিনো ব্যাধিপ্রতিপক্ষাস্তথা রূক্ষত্বাদ্দোষপ্রতিপক্ষা ইতি শ্লেষ্মণোঽপি হিতাঃ| অপিশব্দাত্তিক্তাদযোঽপি| বিশুদ্ধো-বাতাদ্যদূষিতঃ, শ্লেষ্মা যস্য স তস্য| কিমু-কিংপুনঃ, তিক্তাঃ কষাযাশ্চ যে স্বরসাদযস্তেঽপ্যস্য-ঊর্ধ্বগস্য রক্তপিত্তাখ্যস্য ব্যাধেরথবা তদ্বতো নরস্য বিশুদ্ধশ্লেষ্মণো, হিতাঃ| ব্যাধিপ্রতিপক্ষত্বাদ্দোষপ্রতিপক্ষত্বাচ্চ যে নিসর্গাত্-স্বভাবাত্, কফঘ্নাঃ|

Adhikarana adhogasya yApyatvam (11-12) · Śloka 12

অধো যাপ্যং চলাদ্যস্মাত্তত্প্রচ্ছর্দনসাধনম্| অল্পৌষধং চ পিত্তস্য বমনং ন বরৌষধম্||১১|| অনুবন্ধী চলো যশ্চ শান্তযেঽপি ন তস্য তত্| কষাযাশ্চ হিতাস্তস্য মধুরা এব কেবলম্||১২||

স০-অধো যাপ্যং-অধোগং রক্তপিত্তং যাপ্যম্| কস্মাত্ ? যস্মাচ্চলাত্-বাতাদধিকাত্, 'উত্পদ্যতে' ইত্যধ্যাহার্যম্| তচ্চ-অধোগং রক্তপিত্তং, প্রচ্ছর্দনসাধনম্| প্রচ্ছর্দনং-বমনং, সাধনং-চিকিত্সিতং, যস্য তদেবম্| তথা, অল্পমৌষধং-চিকিত্সিতং, যস্য তদল্পৌষধম্, নোর্ধ্বগরক্তপিত্তবদ্বহ্বৌষধম্| কথম্ ? ইত্যাহ-যস্মাদযং রোগঃ পিত্তপ্রধানঃ| পিত্তে চ বমনং ন বরৌষধং-শ্রেষ্ঠমৌষধং ন ভবতি| কফে হি বমনং প্রধানমুক্তম্| অল্পৌষধত্বে দ্বিতীযং হেতুমাহ-কষাযাশ্চেত্যাদি| তস্য-অধোগস্য রক্তপিত্তস্য, মধুরা এব কেবলং কষাযা হিতাঃ-পথ্যাঃ, ন তিক্তাঃ কষাযাশ্চ, তেষাং বাতকোপকারণত্বাত্| তথা, অস্য চলো-বাযুঃ, যোঽনুবন্ধী-অনুবলত্বেন স্থিতঃ, তস্যাপি বাযোর্ন তত্-বমনং, শান্তযে-শান্ত্যর্থম্|

Adhikarana UrdhvAdhogasyAsAdhyatvam (13-15) · Śloka 15

কফমারুতসংসৃষ্টমসাধ্যমুভযাযনম্| অশক্যপ্রাতিলোম্যত্বাদভাবাদৌষধস্য চ||১৩|| ন হি সংশোধনং কিঞ্চিদস্ত্যস্য প্রতিলোমগম্| শোধনং প্রতিলোমং চ রক্তপিত্তে ভিষ্গ্জিতম্||১৪|| এবমেবোপশমনং সর্বশো বিদ্যতে| সংসৃষ্টেষু হি দোষেষু সর্বজিচ্ছমনং হিতম্||১৫||

স০-উভযাযনং-মার্গদ্বযপ্রপন্নং, কফমারুতসংসৃষ্টমসাধ্যং-সাধযিতুমশক্যম্| অসাধ্যত্বে হেতুদ্বযমাহ-অশক্যপ্রাতিলোম্যত্বাদিত্যাদি| অনুলোমবিপরীতঃ-প্রতিলোমঃ, তস্য ভাবঃ প্রাতিলোম্যম্| অশক্যং-কর্তুমশক্যং প্রাতিলোম্যং যস্য রক্তস্য তদশক্যপ্রাতিলোম্যম্| তস্য ভাবোঽশক্যপ্রাতিলোম্যত্বম্| তস্মাদুভযাযনং রক্তপিত্তমসাধ্যম্| অভাবাদৌষধস্য চ,-এতদ্যোগ্যৌষধাসম্পত্তেশ্চৈতদসাধ্যম্| ননু, কথমেবমুচ্যতে ? ইত্যাহ-ন হীত্যাদি| হি-যস্মাত্, তদস্য সংশোধনং প্রতিলোমগং ন কিঞ্চিদস্তি| যচ্চ প্রতিলোমগং সংশোধনং তদ্রক্তপিত্তে ভিষগ্জিতং-ঔষধম্| তচ্চ তথাভূতমৌশধং ন সম্ভবতি যত্তত্র সংশমনার্থং দীযতে| যদ্যধোমার্গাপেক্ষযা দীযতে তদানীমূর্ধ্বভাগপ্রবৃত্তং রক্তং প্রবৃদ্ধং সম্পদ্যতে| অথোর্ধ্বমার্গাপেক্ষযা বিরেচনমুপযুজ্যতে তদাঽধোগং রক্তপিত্তং বর্দ্ধতে| এবমস্য প্রতিলোমগমৌষধং শোধনং ন সম্ভবতি| তস্মাদৌষধস্যাভাবঃ| ভিষগ্জিতমিতি ভিষক্ঽঽশব্দাত্ কণ্ড্বাদিযগন্তান্নিষ্ঠা ইট্চ| স্বভাবাচ্চাযং ভেষজবাচী| ননু, উভযাযনস্য রক্তপিত্তস্য সংশোধনরূপমৌষধং মা ভবতু| শমনরূপং ত্বৌষধমস্য শমায ভবিষ্যতীতি "অভাবাদৌষধস্য চ" ইত্যযুক্তমুদিতম্, ইত্যাশঙ্ক্যাহ-এবমেবেত্যাদি| যথা শোধনমস্য-উভযাযনস্য, শমনায ন সম্ভবতি তথা শমনমপি যদৌষধং তদপ্যেতস্য শমনং ন সম্ভবতি| কুতো হেতোঃ ? ইত্যাহ-সংসৃষ্টেষ্বিত্যাদি| হি-যস্মাত্, সংসৃষ্টেষু ত্রিষু দোষেষু যত্সর্বজিচ্ছমনং তদ্ধিতম্| তচ্চ সন্তর্পণাপতর্পণরূপত্বাদ্দ্বিবিধম্| তত্র যদি সন্তর্পণং বৃংহণং শমনমধোমার্গপ্রবৃত্তরক্তপিত্তদোষাপেক্ষযা মারুতশান্ত্যর্থমুপযুজ্যতে তদা তচ্ছান্তিং কুর্বতো রক্তপিত্তবিকারকরণস্য শ্লেষ্মণো বৃদ্ধযে সম্পদ্যতে| অথাপতর্পণমূর্ধ্বভাগপ্রবৃত্তদোষাপেক্ষযা কফশান্ত্যর্থমুপযুজ্যতে তদানীং তস্য শান্তিং কুর্বতোঽধোগরক্তপিত্তস্য কারণং বাযুং প্রকোপযেত্| ন চোভযাত্মকমেকং নৃসিংহরূপবত্ শমনমস্তি যত্প্রযোজিতমুভযাযনস্য শমনায স্যাত্| তস্মাদুভযাযনমসাধ্যম্|

Adhikarana anubodhidoShaj~jAnopAyaH (16) · Śloka 16

তত্র দোষানুগমনং সিরাস্র ইব লক্ষযেত্| |১৬|

স০-তত্র-তস্মিন্ রক্তপিত্তে, দোষানুগমনং-বাতপিত্তশ্লেষ্মণামনুবন্ধং, সিরাস্র ইব-সিরাব্যধবিধ্যুক্তম্ (হৃ. সূ. অ. ২৭|৪০) - "বাতাচ্ছ্যাবারুণং রূক্ষং" ইত্যাদিগ্রন্থনির্দিষ্টেন লক্ষণেন লক্ষিতং, লক্ষযেত্|

Adhikarana raktapittasya upadravAH (16-17) · Śloka 17

| উপদ্রবাশ্চং বিকৃতিজ্ঞানতস্তেষু চাধিকম্||১৬|| আশুকারী যতঃ কাসস্তমেবাতঃ প্রবক্ষ্যতি| |১৭|

স০-উপদ্রবাংশ্চ বিকৃতিজ্ঞানতো লক্ষযেদিতি যোজ্যম্| বিকৃতিজ্ঞানশব্দেন বিকৃতিবিজ্ঞানীযঃ (হৃ. শা. অ. ৫) উপলক্ষ্যতে| তেষু চ-উপদ্রবেষু মধ্যে, যঃ কাসাখ্য উপদ্রবঃ স আশুকারী-ক্ষিপ্রং মারযতি, যতোঽতস্তমেব রক্তপিত্তনিদানানন্তরং প্রকর্ষেণ নিদানপ্রাগ্রূপাদিভির্বক্ষ্যতি-ভণিষ্যতি, তন্ত্রকৃত্|

Adhikarana kAsaprakaraNam, kAsaBedAH (17) · Śloka 17

| পঞ্চ কাসাঃ স্মৃতা বাতপিত্তশ্লেষ্মক্ষতক্ষযৈঃ||১৭||

স০-পৃথগ্দোষৈস্ত্রযঃ ক্ষযেণৈক ইতি কাসাঃ পঞ্চৈব স্মৃতাঃ| ননু, যদি পঞ্চৈব কাসাস্তত্কথং ভণিষ্যতি ? (হৃ. চি. অ. ৩|১) - "কেবলানিলজং কাসং স্নেহৈরাদাবুপাচরেত্|" ইতি| ন হ্যন্যদোষযুক্তো বাতিকঃ কাসোঽভিহিতঃ| অপি তু ত্রিভিরপি দোষৈঃ পৃথগেবোক্তাঃ কাসাঃ| তথা, (হৃ. চি. অ. ৩|২৫) - "পিত্তকাসে তু সকফে বমনং সর্পিষা হিতম্|" তথা, (হৃ. চি. অ. ৩|২৭) - "পিত্তকাসে তনুকফে ত্রিবৃতাং মধুরৈর্যুতাম্| যুঞ্জ্যাদ্বিরেকায যুতাং ঘনশ্লেষ্মণি তিক্তকৈঃ||" ইত্যাদি| তথা, অস্মিন্নেবাধ্যাযেঽধ্যেষ্যতে (শ্লো. ৩৭) - "সাধ্যা দোষৈঃ পৃথক্ ত্রযঃ| মিশ্রা যাপ্যা দ্বযাত্" ইতি| তদেতত্পূর্বাপরব্যাহতমিব| অত্রোচ্যতে| কাসাঃ পঞ্চৈব বক্ষ্যমাণযা সম্প্রাপ্ত্যা জাযন্তে, বস্তুস্বাভাব্যাত্| অনন্তরং বাতিককাসে কদাচিদাহারবিহারবশাত্ পিত্তেনানুবন্ধঃ কদাচিত্ শ্লেষ্মণা জাযতে| পিত্তকাসে তথৈবাহারবিহারবশাত্ কদাচিদ্বাতেনানুবন্ধঃ কদাচিচ্ছ্লেষ্মণেতি| কফকাসেঽপি তদ্বদাহারবিহারবশাত্ বাতেনানুবন্ধঃ কদাচিত্পিত্তেন| ইতি কিঞ্চিদত্র পূর্বাপরব্যাহতত্বম্|

Adhikarana pa~jcAnAM kShayahetutvam (18) · Śloka 18

ক্ষযাযোপেক্ষিতাঃ সর্বে| |১৮|

স০-সর্ব এব কাসা উপেক্ষিতাঃ-চিকিত্সাং বিনা, ক্ষযায সম্পদ্যন্তে, উত্তরোত্তরক্রিযাবস্থাকর্ষণাত্| ক্ষযজোঽপ্যুপেক্ষিতঃ ক্ষযাযৈবেতি বোধ্যম্|

Adhikarana pa~jcAnAmuttarottaraM duHsAdhyatvam (18) · Śloka 18

বলিনশ্চোত্তরোত্তরম্| |১৮|

স০-উত্তরোত্তরং চৈতে কাসা বলিনঃ|

Adhikarana pUrvarUpam (18-19) · Śloka 19

তেষাং কাসানাং পূর্বরূপমাহ - | তেষাং ভবিষ্যতাং রূপং কণ্ঠে কণ্ডূররোচকঃ||১৮|| শূকপূর্ণাভকণ্ঠত্বম্| |১৯|

স০-তেষাং-কাসানাং, ভবিষ্যতাং উত্পিত্সূনাং, গলে কণ্ডূঃ-খর্জূঃ, তথাঽরোচকঃ, তথা শূকপূর্ণসদৃশকণ্ঠত্বং চ ভবতি|

Adhikarana saMprAptiH (19-21) · Śloka 21

অধুনা সর্বকাসানাং সম্প্রাপ্তিং দর্শযতি - তত্রাধো বিহতোঽনিলঃ| ঊর্ধ্বং প্রবৃত্তঃ প্রাপ্যোরস্তস্মিন্ কণ্ঠে চ সংসজন্||১৯|| শিরঃস্রোতাংসি সম্পূর্য ততোঽঙ্গান্যুত্ক্ষিপন্নিব| ক্ষিপন্নিবাক্ষিণী পৃষ্ঠমুরঃ পার্শ্বে চ পীডযন্||২০|| প্রবর্ততে স বক্ত্রেণ ভিন্নকাংস্যোপমধ্বনিঃ| |২১|

স০-তত্র-তেষু কাসেষু, অনিলোঽধঃ-অধস্তাত্, বিহতো-বিশেষেণাত্যর্থং হতঃ, ঊর্ধ্বং প্রবৃত্তোঽনন্তরং ক্রমেণোরো-হৃদযং, প্রাপ্য তস্মিন্-উরসি, সংসজন্-অভিষ্বজমানঃ, তথা কণ্ঠেঽপি সংসজন্, অনন্তরং শিরস্রোতাংসি সম্পূর্য-মস্তকশিরা আদ্মাপ্য, ততঃ-অনন্তরম্, অঙ্গানি-সর্বানবযবান্, উত্ক্ষিপন্নিব-ঊর্ধ্বং প্রেরযন্নিব, তথাঽক্ষিণী ক্ষিপন্নিব-বহিরিব শরীরাত্প্রেরযন্, তথা পৃষ্ঠমুরশ্চ পার্শ্বে চ পীডযন্, সঃ-বাযুঃ, বক্ক্রেণ প্রবর্ততে| কিম্ভূতঃ ? ভিন্নকাংস্যোপমধ্বনিঃ, ভিন্নং-ভগ্নং, যত্ কাস্যং তত্তুল্যশব্দঃ|

Adhikarana kAsaBede yuktiH (21-22) · Śloka 22

ননু, কথমেকরূপাযাং কাসসম্প্রাপ্তৌ সত্যামনেকরূপতা কাসরুগ্ধ্বনীনাং জাযতে ? ইত্যাহ - | হেতুভেদাত্প্রতীঘাতভেদো বাযোঃ সরংহসঃ||২১|| যদ্রুজাশব্দবৈষম্যং কাসানাং জাযতে ততঃ| |২২|

স০-হেতুভেদাত্-নিদানবিশেষাত্, কাসসম্প্রাপ্তৌ বর্তমানস্য বাযোঃ প্রতীঘাতভেদঃ-প্রত্যাহারবিশেষঃ| কিম্ভূতস্য বাযোঃ ? সরংহসো-বেগবতঃ| যত্-যস্মাত্, ততঃ-তস্মাত্, রুজাশব্দযোঃ-শূলধ্বন্যোঃ, বৈষম্যং-ন সমতা, কাসানাং জাযতে| অন্যাদৃশৌ রুক্ঽঽশব্দৌ বাতকাসে, অন্যাদৃশাবন্যেষু কাসেষু|

Adhikarana vAtakAsasya lakShaNam (22-24) · Śloka 24

অধুনা বাতকাসস্য নিদানাদিনির্দেশার্থমাহ - | কুপিতো বাতলৈর্বাতঃ শুষ্কোরঃকণ্ঠবক্ক্রতাম্||২২|| হৃত্পার্শ্বোরঃশিরঃশূলং মোহক্ষোভস্বরক্ষযান্| করোতি শুষ্কং কাসং চ মহাবেগরুজাস্বনম্||২৩|| সোঽঙ্গহর্ষী কফং শুষ্কং কৃচ্ছ্রান্মুক্ত্বাঽল্পতাং ব্রজেত্| |২৪|

স০-বাতলৈর্বাতঃ কুপিতঃ শুষ্কোরঃকণ্ঠবক্ক্রতাং হৃত্পার্শ্বোরঃশিরঃশূলং মোহক্ষোভস্বরক্ষযান্ করোতি| তথা, অতিবেগপীডাশব্দযুতং শুষ্কং চ কাসং করোতি| বাতলৈরিতি নির্দেশেঽত্যর্থবাতলৈঃ কুপিতো বাযুরিতি বোধ্যম্| বাতিকে কাসেঽন্যেষ্বপি হি কাসেষ্বীষদ্বাতলৈঃ কুপিতস্য বাতস্যানুজ্ঞাঽস্ত্যেব| কুপিতং বাতমন্তরেণ হি কাসানাং জন্মাসম্ভবঃ| কোপস্তু কোপকারণৈর্বিনা যথাযথং দোষাণাং ন জাযতে| তস্মাদত্রাতিবাতলৈঃ কুপিত ইতি বোধ্যম্| তথা, সঃ-বাযুঃ, অঙ্গং হর্ষযতি| তথা, কফং শুষ্কং কৃচ্ছ্রান্মুক্ত্বাঽল্পতাং ব্রজেত্|

Adhikarana pittakAsasya lakShaNam (24-25) · Śloka 25

| পিত্তাত্পীতাক্ষিকফতা তিক্তাস্যত্বং জ্বরো ভ্রমঃ||২৪|| পিত্তাসৃগ্বমনং তৃষ্ণা বৈস্বর্যং ধূমকোঽম্লকঃ| প্রততং কাসবেগেন জ্যোতিষামিব দর্শনম্||২৫||

স০-পিত্তাত্-পিত্তকাসাত্, পীতাক্ষিকফতাদিকং জাযতে| জ্যোতীংষি-তারকাঃ, তেষাং দর্শনমিব|

Adhikarana kaphakAsasya lakShaNam (26-27) · Śloka 27

কফাদুরোঽল্পরুড্মূর্দ্ধহৃদযং স্তিমিতং গুরু| কণ্ঠোপলেপঃ সদনং পীনসচ্ছর্দ্যরোচকাঃ||২৬|| রোমহর্ষো ঘনস্নিগ্ধশ্বেতশ্লেষ্মপ্রবর্তনম্| |২৭|

স০-কফাত্-কফকাসাত্, উরোঽল্পরুগিত্যাদি জাযতে| পিত্তলৈঃ কুপিতাত্ পিত্তাত্, তথা শ্লেষ্মলৈঃ কুপিতাত্ কফাত্, ইত্যনির্দিষ্টমপি পিত্তকফকাসযোর্নিদিষ্টং বোধ্যম্|

Adhikarana kShatakAsasya lakShaNam (27-32) · Śloka 32

ইদানীং ক্ষতকাসস্য নিদানাদি নিরূপযতি - - - - | যুদ্ধাদ্যৈঃ সাহসৈস্তৈস্তৈঃ সেবিতৈরযথাবলম্||২৭|| উরস্যন্তঃক্ষতে বাযুঃ পিত্তেনানুগতো বলী| কুপিতঃ কুরুতে কাসং কফং তেন সশোণিতম্||২৮|| পীতং শ্যাবং চ শুষ্কং চ গ্রথিতং কুথিতং বহু| ষ্ঠীবেত্কণ্ঠেন রুজতা বিভিন্নেনেব চোরসা||২৯|| সূচীভিরিব তীক্ষ্ণাভিস্তুদ্যমানেন শূলিনা| পর্বভেদজ্বরশ্বাসতৃষ্ণাবৈস্বর্যকম্পবান্||৩০|| পারাবত ইবাকূজন্ পার্শ্বশূলী ততোঽস্য চ| ক্রমাদ্বীর্যং রুচিঃ পক্তা বলং বর্ণশ্চ হীযতে||৩১|| ক্ষীণস্য সাসৃঙ্মূত্রত্বং স্যাচ্চ পৃষ্ঠকটীগ্রহঃ| |৩২|

স০-যুদ্ধং-বাহুযুদ্ধং, আদ্যং যেষাং-সাহসানাং কঠিনধনুরাকর্ষণাদীনাং, তৈঃ সাহসৈরযথাবলং-শক্ত্যতিক্রমেণ, সেবিতৈঃ-আচরিতৈঃ, উরস্যন্তঃ-মধ্যে, ক্ষতে সতি বাযুঃ পিত্তেনানুগতঃ কাসং করোতি| তৈস্তৈরিতি সর্বনাম্না দুঃশকং হস্ত্যশ্বাদিসাধনং তথোচ্চভাষণং গুরুভারোদ্যমনং বেগবন্নদীষু প্রতিস্রোতস্তরণাদিকমুরঃক্ষতোত্পাদনং গৃহ্যতে| পিত্তানুগতমাত্রেণ চ বাযোরতিকোপং প্রতিপাদযতি| অত এবাহ-বলীতি| পিত্তানুগতত্বেনৈব স রক্তদূষণং কাসং কুর্বন্ বাযুঃ, তেন-কাসেন, কফং সশোণিতং-রক্তযুতং, তথা পীতং কুথিতং-পূতিগন্ধিং, বহু চ ষ্ঠীবেত্| তথা, কুপিতবাযুবশাত্ কফং বহু শ্যাবং শুষ্কং গ্রথিতং-পিণ্ডিতং, চষ্ঠীবেত্| তথা, কণ্ঠেন রুজতা-শূলবতা, তথোরসা বিভিন্নেনেব-দ্বিধেব বিদীর্ণেন, তথা সূচীভিরিব তীক্ষ্ণাভিস্তুদ্যমানেন শূলিনা-রুজাযুক্তেন, চ বক্ষসোপলক্ষিতঃ পর্বভেদাদিমান্ পুরুষঃ, তথা পারাবত ইবাকূজন্-অব্যক্তং শব্দং কুর্বন্| তথাঽস্য-কাসিনঃ, ক্রমেণ বীর্যাদি হীযতে| ক্ষীণস্য চাস্য সাসৃঙ্মূত্রতা স্যাত্ পৃষ্ঠকটীগ্রহশ্চেতি| ইদানীং ক্ষযকাসলক্ষণং নিরূপযতি-

Adhikarana kShayakAsasya lakShaNam (32-35) · Śloka 35

ইদানীং ক্ষযকাসলক্ষণং নিরূপযতি - - - - | বাযুপ্রধানাঃ কুপিতা ধাতবো রাজযক্ষ্মিণঃ||৩২|| কুর্বন্তিঃ যক্ষ্মাযতনৈঃ কাসং ষ্ঠীবেত্কফং ততঃ| পূতিপূযোপমং পীতং বিস্রং হরিতলোহিতম্||৩৩|| লুচ্যেত ইব পার্শ্বে চ হৃদযং পততীব চ| অকস্মাদুষ্ণশীতেচ্ছা বহ্বাশিত্বং বলক্ষযঃ||৩৪|| স্নিগ্ধপ্রসন্নবক্ক্রত্বং শ্রীমদ্দশননেত্রতা| ততোঽস্য ক্ষযরূপাণি সর্বাণ্যাবির্ভবন্তি চ||৩৫||

স০-রাজাযক্ষ্মিণো-রাজযক্ষ্মবতো নরস্য, বাযুঃ প্রধানো-বলী, যেষাং তে বাযুপ্রধানাঃ| তথা, কুপিতাঃ-ক্রুদ্ধাঃ| কে তে ? ধাতবো-বাতাদযঃ, কাসং কুর্বন্তি| কৈঃ কুপিতাঃ ? যক্ষ্মাযনৈঃ-যক্ষ্মনিদানোক্তৈঃ সাহসাদিভিঃ| ততঃ-অনন্তরং, পূতিপূযোপমং পীতং বিস্রং তথা হরিতলোহিতং ষ্ঠীবেত্| তথা, পার্শ্বেলুচ্যেতে ইব-স্থানাত্প্রচ্যাব্যেতে ইব| হৃদযং চ পততীব-ভ্রশ্যতীব| তথা, অস্য-ক্ষযজকাসিনঃ, অকস্মাত্-নিমিত্তমন্তরেণাপি, উষ্ণশীতেচ্ছা ভবতি| কদাচিচ্ছীতার্তোঽপি নোষ্ণমভিলষতি, কদাচিদত্যুষ্ণক্লান্তোঽপি ন শীতমভিলষতি| তথা, বহ্বাশিত্বাদযঃ স্যুঃ| ততঃ-অনন্তরং, সর্বাণি ক্ষযরূপাণি-পীনসশ্বাসাদীনি, অস্যাবির্ভবন্তি|

Adhikarana kShayakAsasya sAdhyatvAdikam (36-37) · Śloka 37

ইত্যেষ ক্ষযজঃ কাসঃ ক্ষীণানাং দেহনাশনঃ| যাপ্যো বা বলিনাং, তদ্বত্ ক্ষতজোঽভিনবৌ তু তৌ||৩৬|| সিধ্যেতামপি সানাথ্যাত্| |৩৭|

স০-ইত্যেষঃ-এবমাদিরূপঃ, ক্ষযজঃ কাসঃ ক্ষীণানাং দেহনাশনঃ| বলিনাং-অক্ষীণানাং, যাপ্যো বা দেহনাশনো বেতি বাশব্দস্যার্থঃ| তদ্বত্-ক্ষযজকাসবত্| ক্ষতজঃ কাসঃ ক্ষীণানাং দেহনাশনো বলবতাং যাপ্যো বা দেহনাশনো বা ভবতি| অভিনবৌ তু তৌ-নবোত্থিতৌ পুনঃ ক্ষযক্ষতজকাসৌ, বলিনাং সিধ্যেতামপি; ন কেবলমসাধ্যযাপ্যাবিত্যপিশব্দেন দ্যোত্যতে| কুতঃ সিধ্যেতাম্ ? সানাথ্যাত্-চতুষ্পাত্সম্পত্তেরিত্যর্থঃ| ইদানীং শেষাণামপি কাসানাং সাধ্যযাপ্যবিভাগং নিরূপযতি-

Adhikarana kShatakAsasya sAdhyatvAdikam, kShayakShatakAsayoHsAdhyatvAdikam (37) · Śloka 37

ইদানীং শেষাণামপি কাসানাং সাধ্যযাপ্যবিভাগং নিরূপযতি - - - - সাধ্যা দোষৈঃ পৃথক্ ত্রযঃ| মিশ্রা যাপ্যা দ্বযাত্সর্বে জরসা স্থবিরস্য চ||৩৭||

স০-পৃথগ্দোষৈঃ-বাতপিত্তশ্লেষ্মভিঃ, যে জাতাস্ত্রযঃ কাসাস্তে সাধ্যাঃ| যে পুনরুত্তরকালমাহারবিহারাদিনা মিশ্রাঃ-মিশ্রলক্ষণাঃ সম্পন্নাঃ, তে যাপ্যাঃ| কিং সর্ব এব মিশ্রদোষোত্পন্না যাপ্যাঃ ? নেত্যাহ-দ্বযাত্,- দোষদ্বযাত্, যে মিশ্রাঃ সম্পন্নাস্তে যাপ্যাঃ| ন পুনর্দোষত্রযাদ্যে মিশ্রলক্ষণাস্তেঽপি যাপ্যা ইতি দ্বযগ্রহণাত্ প্রতিপাদযতি| সর্বে-কাসা যে সাধ্যা উক্তাঃ পৃথগ্দোষজাস্তেঽপি, জরসা-জরযা হেতুভূতযা, স্থবিরস্যোত্পন্না যাপ্যাঃ| বৃদ্ধো হি নিষ্কাস এব যাপ্যানাম্| তথা চোবাচ সঙ্গ্রহে (সূ. অ. ১৩) - "বৃদ্ধো যাপ্যানাম্|" ইতি|

Adhikarana vAtAdyekadoShajakAsAnAM sAdhyatvAdikam dvidoShajakAsAnAM sAdhyatvAdikam sarveShAM kAsAnAM sAdhyatvAdikam kAsasyAnupekShaNIyatvam (3) · Śloka 3

কাসাচ্ছ্বাসক্ষযচ্ছর্দিস্বরসাদাদযো গদাঃ| ভবন্ত্যুপেক্ষযা যস্মাত্তস্মাত্তং ত্বরযা জযেত্||৩৮|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে রক্তপিত্তকাসনিদানং নাম তৃতীযোঽধ্যাযঃ||৩||

স০-[ যস্মাত্- ] যতঃ কারণাত্, কাসাদুপেক্ষযা সহকারিকারণভূতযা শ্বাসাদযো রোগা ভবন্তি, তস্মাত্ তং-কাসং, ত্বরযা-শীঘ্রমেব, জযেত্| আদিশব্দেনাত্র পীনসাদযো যক্ষ্মনিদানোক্তা গৃহ্যন্ত ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে রক্তপিত্তকাসনিদানং নাম তৃতীযোঽধ্যাযঃ সমাপ্তঃ|| ৩||