1. sarvarōganidānādhyāyaḥ

Adhikarana adhyAyopakramaH · Śloka

স০-শ্রীগণেশায নমঃ| অথ শরীরস্থানাদনন্তরং নিদানস্থানারম্ভঃ| অস্য চাযং সম্বন্ধঃ| হেতুলিঙ্গৌষধস্কন্ধলক্ষণোঽযমাযুর্বেদঃ প্রণীতঃ| তানি চ হেতুলিঙ্গৌষধানি সূত্রস্থানে সূচিতানি| শরীরলক্ষণং চাধারং সমুত্পাদ্য তানি বিস্তারেণোপদেষ্টুং শক্যন্তে| তস্মাচ্ছারীরস্থানং পূর্বমারব্ধবান্| ননু, এবং সত্যৌষধস্কন্ধ এব প্রাক্ প্রাধান্যাদুপদেষ্টুং ন্যায্যঃ| নৈবম্| হেতুলিঙ্গাভ্যাং হ্যামযং পরীক্ষ্যানন্তরং যথাযোগমামযপ্রশমনার্থমৌষধং দাতুমুচিতম্| তস্মাদ্ধেতুলিঙ্গযোরেবোপাদানং প্রাগ্যুক্তম্, ন ত্বৌষধস্য, ইতি চিকিত্সিতস্থানাত্ প্রাগিদমেব স্থানমুপদেষ্টুং যুক্তম্| তথা চোক্তং মুনিনা (চ. সূ. অ. ২০|২৪)- "রোগমাদৌ পরীক্ষেত ততোঽনন্তরমৌষধম্|" ইতি| তস্মাদৌষধাদ্ধেতুলিঙ্গযোরেবামযং প্রতি প্রাধান্যম্| অতো নিদানস্থানারম্ভঃ| তত্র চ পূর্বং সর্বরোগনিদানমেবারব্ধুং যুক্তম্, প্রাধান্যাত্| প্রাধান্যং চ সর্বরোগকারণনির্দেশাত্| তথা হি বাতাদয এব প্রকুপিতাঃ সর্বরোগকারণম্| বক্ষ্যতি হি (শ্লো. ১২)- "সর্বেষামেব রোগাণাং নিদানং কুপিতা মলাঃ|" ইতি|

Adhikarana sarvaroganidAnAdhyAyaH (2) · Śloka 2

তেষাং চ প্রকোপকারণমস্মিন্নির্দিশ্যত ইত্যাহ - অথাতঃ সর্বরোগনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-অথাত ইত্যাদি| সর্বে চ তে রোগাশ্চ সর্বরোগাঃ, তেষাং নিদানং সর্বরোগনিদানম্| শেষমাযুষ্কামীযাধ্যাযবদ্ব্যাখ্যেযম্| ইতীত্যাদিশব্দানামপি পূর্ববদ্ব্যাখ্যা|

Adhikarana rogaparyAyAH (1) · Śloka 1

তত্র রোগাণাং সামান্যং নিদানং বিভণিষুস্তাবদ্রোগাণামেব পর্যাযান্ বদতি| রোগপর্যাযশ্রবণেন হি শিষ্যাণাং তত্র তত্র শাস্ত্রপ্রদেশেষু সম্মোহো ন ভবতি রোগঃ পাপ্মা জ্বরো ব্যাধির্বিকারো দুঃখমামযঃ| যক্ষ্মাতঙ্কগদাবাধাঃ শব্দাঃ পর্যাযবাচিনঃ||১||

স০-রোগাদযঃ শব্দাঃ পর্যাযবাচিনঃ-একার্থা ইত্যর্থঃ| ননু চ, এষাং রোগাদিশব্দানাং প্রবৃত্তিনিমিত্তং প্রত্যর্থভেদোঽপি দৃশ্যতে| যথা,-রুজতীতি রোগঃ, দুঃখস্য কর্তৃত্বাদ্দুঃখস্যাভিধাযকঃ| পাপ্মেতি কিল সর্বে রোগাঃ পাপস্য কর্মণঃ ফলমিতি কৃত্বা পাপ্মেত্যুচ্যতে| "জ্বরঃ প্রধানো রোগাণামুক্তঃ" (চ. চি. অ. ৩|৪)| প্রাধান্যং চাস্য দুরুপক্রমত্বাদতিদুঃসহত্বাচ্চ| অত এব সর্বকাযমনঃসন্তাপকত্বং জ্বরস্যাহুঃ| তথা, "জ্যাবযোহানৌ" ইত্যস্য ধাতোরৌণাদিকে বরপ্রত্যযে সতি জ্বরশব্দস্যার্থান্তরত্বমপ্যাপততি| বিবিধমাধিং-দুঃখং, আদধাতি শরীরে মনসি চেতি-ব্যাধিঃ| বিকারো বুদ্ধীন্দ্রিযমনঃশরীরাণাং বিকৃতিং-অন্যথাত্বং, জনযতীত্যর্থঃ| দুঃখমিত্যনেনোপতাপকত্বমনুভবং গমযতি| আময ইত্যস্যার্থঃ-কিলাঽঽমসমুত্থাঃ সর্বে ব্যাধযঃ| প্রাযেণ হি লোকোঽখিল এব লৌল্যাদদেশকালাপথ্যাতিমাত্রাশী ভবতি| তস্য চাবশ্যমামসম্ভবাদ্বাহুল্যেনামসমুত্থা ব্যাধযঃ| বাহুল্যং চাঙ্গীকৃত্য শব্দপ্রবৃত্তিঃ| যক্ষ্মেব যক্ষ্মা, যথা-"যক্ষ্মা রোগসমূহানাম্" (চ. সূ. অ. ২৫|৩৯, সং. সূ. অ. ১৩) ইত্যুক্তঃ| এবং সর্বোঽপি রোগো রোগসমূহ ইত্যনেন দ্যোতযতি| তথা চ, সর্বো বিকার উত্পদ্যমানোঽনেকৈর্ব্যাধিলক্ষণভূতৈশ্চ যুক্ত উত্পদ্যতে| যথা,-জ্বরস্যালস্যারোচকাদযঃ| আতঙ্ক ইতি "তকি কৃচ্ছ্রজীবনে" ইত্যস্য ধাতোরাঙ্পূর্বস্য রূপম্| রোগোপতপ্তত্বাদ্ধি স্ত্রীপানভোজনাদিভ্যো নিবৃত্তাঃ কৃচ্ছ্রেণ জীবন্তি| গদ ইব গদোঽনেককারণজন্যত্বাত্| যথা হি গদোঽনেককারণজস্তথা গদোঽপীতি গদশব্দস্যার্থঃ| আবাধ ইতি আসমন্তাত্ কাযমনসোর্বাধনং-পীডেত্যর্থঃ| এবং প্রবৃত্তিনিমিত্তং প্রত্যর্থভেদদর্শনাত্ কথমুক্তং পর্যাযবাচিনঃ ইতি| অত্রাচক্ষ্মহে| এবমেবৈতত্| কিন্তু পীডাকারিত্বসামান্যং প্রবৃত্তিনিমিত্তমুররীকৃত্য পর্যাযবাচিনঃ ইত্যুক্তম্|

Adhikarana rogavij~jAnaBedAH (2) · Śloka 2

নিদানং পূর্বরূপাণি রূপাণ্যুপশযস্তথা| সম্প্রাপ্তিশ্চেতি বিজ্ঞানং রোগাণাং পঞ্চধা স্মৃতম্||২||

স০-নিদানাদযঃ সম্প্রাপ্ত্যন্তা রোগাণাং বিজ্ঞানং পঞ্চধা স্মৃতম্, মুনীন্দ্রৈরিতি শেষঃ| নিদানাদিবিজ্ঞানেন সর্বে রোগা বিশেষেণ বুধ্যন্ত ইত্যর্থঃ| উপশযস্তথেতি যথা নিদানাদযো রোগাণাং বিজ্ঞানং তথোপশযোঽপীতি তত্তুল্যকক্ষতাং দ্যোতযিতুং তথাশব্দং তন্ত্রকৃত্ প্রত্যুক্তবান্| এবং সম্প্রাপ্তিশ্চেত্যত্র চকারমপি| ইতি-পরিসমাপ্তৌ, এতাবদেব রোগাণাং বিজ্ঞানম্| নিদানং দ্বিধা,-রোগাণামাসন্নং বিপ্রকৃষ্টং চ| তত্রাসন্নং যথা-বাতাদযঃ প্রকুপিতাঃ| বিপ্রকৃষ্টং কারণং যথা-বাতাদিচযপ্রকোপকরমাহারবিহারাদি| তত্র নিদানং-কটুকাম্লদধ্যাদিকং জ্বরস্য| পূর্বরূপং যথা-জ্বরস্যৈবালস্যাদযঃ| রূপং যথা-"আগমাপগমক্ষোভমৃদুতাবেদনোষ্মণাম্| বৈষম্যং তত্রতত্রাঙ্গে তাস্তাঃ স্যুর্বেদনাশ্চলাঃ||" (হৃ. নি. অ. ২|১০) ইত্যাদি| উপশযো যথা জ্বরং স্নেহমর্দনাদিনোপশাম্যন্তমুপলভ্য স তস্যোপশয ইত্যুচ্যতে| সম্প্রাপ্তিস্তু-"যথাদুষ্টেন" (শ্লো. ৮) ইত্যাদিলক্ষণা| বিনিশ্চিতজ্ঞানকারণত্বাদ্বিজ্ঞানম্, কারণে কার্যোপচারাত্| নিদানাদীনামসমাসনির্দেশ একৈকস্যাপি প্রাধান্যমিতি দ্যোতনায| এবমেকৈকস্যোপলব্ধিকারণত্বং ভবতি| উপচারাদেব সঙ্খ্যাযাং লব্ধাযাং পঞ্চধেত্যুক্তং নিযমার্থম্| পঞ্চধৈবৈতানি তত্ত্বতো নান্যে রোগাববোধহেতবঃ সন্তীত্যর্থঃ|

Adhikarana nidAnaparyAyAH (3) · Śloka 3

নিমিত্তহেত্বাযতনপ্রত্যযোত্থানকারণৈঃ| নিদানমাহুঃ পর্যাযৈঃ|৩|

স০-নিমিত্তাদিভিঃ ষড্ভিঃ পর্যাযৈর্নিদানমাহুঃ-বদন্তি, মুনয ইতি শেষঃ| তত্র তত্র শাস্ত্রপ্রদেশে নিদানমেতৈঃ পর্যাযৈর্বেদ্যমিত্যর্থঃ|

Adhikarana pUrvarUpalakShaNam (3-4) · Śloka 4

| প্রাগ্রূপং যেন লক্ষ্যতে||৩|| উত্পিত্সুরামযো দোষবিশেষেণানধিষ্ঠিতঃ| |৪|

স০-যেন-আলস্যারুচ্যাদিনা, উত্পিত্সুঃ-উদ্বুভূষুঃ, আমযো-জ্বরাদিঃ, লক্ষ্যতে-জ্ঞাযতে, তত্প্রাগ্রূপম্| দোষবিশেষেণ-বাতাদিনা, অনধিষ্ঠিতঃ-অনাসাদিতো, 'ব্যক্তরূপেণ' ইত্যত্রানুক্তমপি গম্যমানত্বাদুক্তং বোধ্যম্| তথা হি-বাতাদিদোষেণানধিষ্ঠিতত্বাদ্ব্যাধেরুত্পিত্সুতৈব ন ঘটতে, ব্যাধিকারণাভাবাত্| ন হি বাতাদীন্ বিমুচ্য ব্যাধেঃ প্রাযেণান্যতঃ সম্ভবঃ সম্ভাব্যতে| বক্ষ্যতি হি (শ্লো. ১২)- "সর্বেষামেব রোগাণাং নিদানং কুপিতা মলাঃ|" ইতি| তস্মাদ্দোষবিশেষানধিষ্ঠিতত্বমুত্পিত্সোরামযস্য যদুচ্যতে, তদ্ব্যক্তরূপদোষাপেক্ষমবগন্তব্যম্|

Adhikarana pUrvarUpasya sAmAnyarUpatvam (4) · Śloka 4

অত এবাহ | লিঙ্গমব্যক্তমল্পত্বাদ্ব্যাধীনাং তদ্যথাযথম্||৪||

স০-তদিত্যনেন প্রাগ্রূপং পরামৃশ্যতে| তত্-প্রাগ্রূপং, উত্পিত্সূনাং জ্বরাদীনামল্পত্বাত্-অনাসাদিতবলত্বাত্, অব্যক্তং লিঙ্গং-অস্পষ্টং লক্ষণম্| যথাযথং-যদ্যস্য ব্যাধের্জ্বরাদ্যন্যতমস্যাত্মীযমাত্মীযম্| তচ্চ প্রাগ্রূপং ত্রিধা দৃষ্যতে,- কিঞ্চিচ্ছারীরং কিঞ্চিন্মানসং কিঞ্চিচ্ছারীরমানসং চ| তত্র শারীরং যথা-জ্বরস্যালস্যাস্যবৈরস্যগাত্রগৌরবজৃম্ভাসাস্রাকুলাক্ষিতেত্যেবংপ্রাযম্| মানসং চ-অরতির্হিতোপদেশেষ্বক্ষান্তিরিত্যেবংপ্রাযম্| কিঞ্চিচ্ছারীরমানসং যথা-"প্রীতিরম্লপটূষণে| দ্বেষঃ স্বাদুষু ভক্ষ্যেষু" (হৃ. নি. অ. ২|৮) ইত্যেবংপ্রাযম্, শারীরমানসদোষজনিতত্বাত্|

Adhikarana rUpalakShaNam (5) · Śloka 5

ইদানীং রূপং লক্ষযিতুমাহ তদেব ব্যক্ততাং যাতং রূপমিত্যভিধীযতে| সংস্থানং ব্যঞ্জনং লিঙ্গং লক্ষণং চিহ্নমাকৃতিঃ||৫||

স০-তদেব-প্রাগ্রূপং, ব্যক্ততাং যাতং-ব্যক্তদোষাধিষ্ঠিতং সত্, রূপমিত্যভিধীযতে| তদেবেত্যেবশব্দেনৈতত্ দ্যোতযতি,-যদেব শারীরং প্রাগ্রূপং পূর্বোপবর্ণিতং তদেবেহ গৃহীতব্যম্, স্থাযিত্বাত্| তধ্দ্যামযানুবন্ধি| মানসং শারীরমানসং চাস্থাযিত্বান্ন গৃহীতব্যম্| তদ্ধি দ্বযমপ্যুত্পন্নব্যাধিসমনন্তরং প্রাযেণ নশ্যতীতি তদ্ব্যক্ততাং ন যাতি| অতঃ শারীরমেবোত্পিত্সুব্যাধিপ্রাগ্রূপমিহ পরাম্রষ্টুং যুক্তম্| সংস্থানাদযঃ ষট্ রূপস্য পর্যাযা ইত্যর্থঃ| ইমে চ পর্যাযাঃ প্রাগ্রূপস্যাপি যোজ্যাঃ| যথা-পূর্বসংস্থানং পূর্বব্যঞ্জনং পূর্বলিঙ্গমিত্যাদি|

Adhikarana upaSayalakShaNam (6-7) · Śloka 7

হেতুব্যাধিবিপর্যস্তবিপর্যস্তার্থকারিণাম্| ঔষধান্নবিহারাণামুপযোগং সুখাবহম্||৬|| বিদ্যাদুপশযং ব্যাধেঃ স হি সাত্ম্যমিতি স্মৃতঃ| |৭|

স০-উপযুজ্যত ইত্যুপযোগঃ-সেবনম্| সুখমাবহতি-উত্পাদযতীতি সুখাবহঃ,-দেহস্য সুখং করোতীত্যর্থঃ| য উপযোগঃ সুখাবহস্তমুপশযং বিদ্যাত্-জানীযাত্, মুনীন্দ্র ইতি শেষঃ| কেষামুপযোগঃ ? ঔষধান্নবিহারাণাম্| ঔষধং-হরীতক্যাদি| অন্নং-রক্তশাল্যাদি| বিহারো-বাগ্দেহমনোনির্বর্তিতশ্চেষ্টাবিশেষো ব্যাযামব্যবাযজাগরণাধ্যযনগীতভাষণধ্যানধারণাদিরূপঃ| ঔষধং চান্নং চ বিহারশ্চৌষধান্নবিহারাঃ, তেষামৌষধান্নবিহারাণাম্| তেষাং কিম্ভূতানাম্ ? হেতুব্যাধিবিপর্যস্তবিপর্যস্তার্থকারিণাম্| হেতুব্যাধিবিপর্যস্তানাং বিপর্যস্তার্থকারিণাং চ| বিপর্যস্তাঃ-বিপরীতাঃ, হেতুব্যাধ্যোর্বিপর্যস্তাঃ| হেতুশ্চ ব্যাধিশ্চ হেতুব্যাধী, তযোর্বিপর্যস্তা হেতুব্যাধিবিপর্যস্তাঃ,-নিদানরোগযোর্বিপরীতাঃ| তথা বিপর্যস্তানামর্থো বিপর্যস্তার্থঃ, তং কুর্বন্তীতি বিপর্যস্তার্থকারিণঃ| হেতুব্যাধিবিপর্যস্তাশ্চ বিপর্যস্তার্থকারিণশ্চ হেতুব্যাধিবিপর্যস্তবিপর্যস্তার্থকারিণঃ, তেষাম্| কেষাং বিপর্যস্তানামর্থং কুর্বন্তি ? অত্র প্রকৃতত্বাদ্ধেতুব্যাধিবিপর্যস্তানাম্| তদযমর্থঃ-হেতুব্যাধ্যোরবিপরীতা অপি হেতুরূপা ইব ভাসমানা ব্যার্ধিরূপা ইব ভাসমানা হেতুব্যাধিবিপর্যস্তানামর্থং ব্যাধ্যুপশমলক্ষণং কুর্বন্তি| যথা হেতুবিপরীতৈর্ব্যাধিবিপরীতৈশ্চৌষধান্নবিহারৈর্ব্যাধ্যুপশমঃ ক্রিযতে প্রতিপক্ষত্বাত্, তথা বিপর্যস্তার্থকারিভিরপীত্যর্থঃ| সঙ্গ্রহে তু জগাদ (সূ. অ. ১২)- "উভযার্থকারি পুনর্দৈবব্যপাশ্রযম্| তথা ছর্দ্যাং ছর্দনমিত্যাদি| এবংবিধং হ্যবিপরীতমেব সত্ ভেষজং বিপরীতমর্থং করোতি|" ইতি| তত্র হেতুবিপরীতা ঔষধান্নবিহারা যথা-গুরুস্নিগ্ধশীতজে ব্যাধৌ লঘুরূক্ষোষ্ণমৌষধমন্নং বা| তথা, সন্তর্পণোত্থেঽপতর্পণম্, অপতর্পণোত্থে সন্তর্পণম্, জাগরণোত্থে ব্যাধৌ স্বাপঃ, স্বাপোত্থে জাগরণম্, ব্যাযামোত্থে আসনা, ইত্যাদি| তথা, ব্যাধিবিপর্যস্তা ঔষধান্নবিহারা যথা-বাতজে জ্বরে সর্পিঃপানমৌষধম্| তস্মিন্নেব জ্বরেঽন্নং পেযা| বিহারশ্চ তস্মিন্নেব জ্বরে দেহমনোব্যাপারোপরমঃ| তথা, পাচনসাধ্যে জ্বরে দোষানপেক্ষমৌষধং মুস্তাপর্পটকম্| অন্নং রক্তশাল্যাদি| প্রমেহে রজনী যবান্নং চ| তথা চ বক্ষ্যতি (হৃ. চি. অ. ১|৭২)- "রক্তাদ্যাঃ শালযো জীর্ণাঃ ষষ্টিকাশ্চ জ্বরে হিতাঃ|" ইত্যাদি| বিহারশ্চ যথা (হৃ. চি. অ. ১|১৭১)- "জ্বরকালস্মৃতিং চাস্য হারিভির্বিষযৈর্হরেত্|" ইতি| তথা মুনিরপ্যবোচত্ (চ. চি. অ. ৩|৩১৯)- "জ্বরকালং চ বেগং চ চিন্তযন্ জ্বর্যতে তু যঃ| তস্যেষ্টৈশ্চ বিচিত্রৈশ্চ বিষযৈর্নাশযেত্স্মৃতিম্||" ইতি| বিপর্যস্তার্থকারিণশ্চ দ্বেধা ভবন্তি,-ব্যাধিবিপর্যস্তার্থকারিণো হেতুবিপর্যস্তার্থকারিণশ্চ| তত্র ব্যাধিবিপর্যস্তার্থকারুণো যথা-ছর্দিব্যাধৌ তদর্থকার্যৌষধং মদনাদি| অন্নং চ তদুপসৃষ্টং শাল্যাদি| অথবা যদহৃদ্যমসাত্ম্যমপরিশুষ্কং গুরু চ| বিহারোঽঙ্গুল্যুত্পলনালাদিনা তদুদ্বমনম্| যথা চাতিসারে বিরেচনম্| বমনেন বিরেচনেন চ ছর্দ্যতীসারযোর্বৃদ্ধিরেব কর্তুং যুক্তা, তদ্ধেতুকত্বাত্তস্য| ইহ চ শমনকরণাদ্বিপর্যস্তার্থকারিত্বম্| হেতুবিপর্যস্তার্থকারিণশ্চ যথা-মদ্যোত্থে ব্যাধৌ মদ্যমেবোযুক্তং ব্যাধিং শমযত্যৌষধত্বেন| এবমন্নবিহারাবপ্যূহ্যৌ| মদ্যেন মদাত্যযস্য বৃদ্ধিরেব কর্তুং যুক্তা, তদ্ধেতুকত্বাত্তস্য| ইহ তু শমনকরণাদ্বিপর্যস্তার্থকারিত্বম্| এতদেব চ তদর্থকারীতি বদন্তি| তচ্চ মাত্রাশিতীযে (হৃ. সূ. অ. ৮|২৪) ব্যাখ্যাতমেব| হি-যস্মাত্, সঃ-উপশযো, ব্যাধেঃ-আমযস্য, সাত্ম্যমিতি স্মৃতঃ| মুনীন্দ্রৈরিতি বাক্যশেষঃ| এবং ব্যাধিগুণবিপরীতো য আহারো বিহারশ্চ প্রাযেণ নিদানবিপরীতঃ স ব্যাধিসাত্ম্যম্| মুনিস্ত্ববোচত্ (চ. সূ. অ. ৬|৫০)- "দেশানামামযানাং চ বিপরীতগুণং গুণৈঃ| সাত্ম্যমিচ্ছন্তি সাত্ম্যজ্ঞাশ্চেষ্টিতং চাদ্যমেব চ||" ইতি|

Adhikarana anupaSayalakShaNam (7) · Śloka 7

উপশযলক্ষণকথনপ্রস্তাবাদনুপশযোঽপি লক্ষ্য ইত্যাহ | বিপরীতোঽনুপশযো ব্যাধ্যসাত্ম্যাভিসংজ্ঞিতঃ||৭||

স০-অতো যথানির্দিষ্টলক্ষণাদুপশযাখ্যাত্ যো বিপরীতলক্ষণ ঔষধান্নবিহারাণামুপযোগঃ-সেবনমসুখাবহঃ, সোঽনুপশয উচ্যতে| স এব ব্যাধেরসাত্ম্যমিত্যভিসংজ্ঞিতঃ-আভিমুখ্যেন সঙ্কেতিতঃ|

Adhikarana saMprAptilakShaNam (8) · Śloka 8

নিদানপ্রাগ্রূপরূপোপশযানুক্ত্বা, সম্প্রতি সম্প্রাপ্তিং লক্ষযিতুমাহ যথাদুষ্টেন দোষেণ যথা চানুবিসর্পতা| নির্বৃত্তিরামযস্যাসৌ সম্প্রাপ্তির্জাতিরাগতিঃ||৮||

স০-যেন প্রকারেণ দুষ্টঃ-কুপিতো, বাতাদ্যন্যতমো দোষো-যথাদুষ্টঃ, তেন যথাদুষ্টেন দোষেণ যথা চানুবিসর্পতা-দেহমনুধাবতা সন্নিবেশবিশেষেণ গচ্ছতা, প্রত্যামযং বা নির্বৃত্তিঃ-নিষ্পত্তিরুদ্ভব ইতি যাবত্, নির্দিষ্টা সা সম্প্রাপ্তিঃ| সা চ জাতিরাগতিশ্চ কথ্যতে| যথা জ্বরস্য-"মলাস্তত্র (হৃ. নি. অ. ২|৩) ইত্যাদিলক্ষণলক্ষিতা| তত্র মলানামামাশযপ্রবেশনেন, তথাঽঽমানুগমনেন, তথা স্রোতোরোধেন, তথা পক্তিস্থানাজ্জ্বলননিরসনেন, তথা তেনৈব জাঠরেণ বহ্নিনা তেষামভিসর্পণেন, তথা সকলদেহতাপেন, গাত্রং চাত্যুষ্ণং কুর্বতা, এবংবিধযা সম্প্রাপ্ত্যা জ্বরোঽযমিতি নিশ্চীযতে| এবং রক্তপিত্তাদিষ্বপি চিন্ত্যা সম্প্রাপ্তিঃ|

Adhikarana saMprAptiBedAH (9-11) · Śloka 11

সঙ্খ্যাবিকল্পপ্রাধান্যবলকালবিশেষতঃ| সা ভিদ্যতে, যথাঽত্রৈব বক্ষ্যন্তেঽষ্টৌ জ্বরা ইতি||৯|| দোষাণাং সমবেতানাং বিকল্পোংঽশাংশকল্পনা| স্বাতন্ত্র্যপারতন্ত্র্যাভ্যাং ব্যাধেঃ প্রাধান্যমাদিশেত্||১০|| হেত্বাদিকার্ত্স্ন্যাবযবৈর্বলাবলবিশেষণম্| নক্তংদিনর্তুভুক্তাংশৈর্ব্যাধিকালো যথামলম্||১১||

স০-সা চ-সম্প্রাপ্তিঃ, সঙ্খ্যাদিবিশেষেণ ভিদ্যতে,- সঙ্খ্যা চ বিকল্পশ্চ প্রাধান্যং চ বলং চ কালশ্চ ত এবম্, তেষাং বিশেষঃ সঙ্খ্যাবিকল্পপ্রাধান্যবলকালবিশেষঃ, তস্মাত্সা সম্প্রাপ্তির্বহুধা সম্পদ্যতে| তত্র সঙ্খ্যাবিশেষো যথা-[অত্রৈব-]ইহৈব, বক্ষ্যন্তেঽষ্টৌ জ্বরাঃ, ইতি| এবমন্যত্র পঞ্চ কাসাঃ, পঞ্চ শ্বাসাঃ, অষ্টৌ গুল্মাঃ, ইত্যেবমাদযঃ সঙ্খ্যাবিশেষাঃ সম্প্রাপ্তিভেদাঃ| দোষাণাং-বাতাদীনাং, সমবেতানাং-একস্মিন্ ব্যাধৌ সঙ্ঘট্টিতানাং, যা অংশাংশকল্পনা-ভাগেন ভাগেন কার্যানুমেযেন নিরূপণা, স বিকল্পঃ| অংশশ্চাংশশ্চাংশাংশৌ, তাভ্যাং কল্পনা-অনেকবিধো বিশেষঃ| যথা-অস্মিন্ ব্যাধৌ বাতঃ কুপিতঃ কদাচিদেকেন গুণেনাধিকেন রূক্ষেণ কদাচিল্লঘুনা কদাচিচ্ছীতেন কদাচিদ্দ্বাভ্যাং ত্রিভির্বাঽধিকৈর্দুষ্যতি| এবং পিত্তং কট্বম্লাদিনা কুপিতং কদাচিদেকেন গুণেন তীক্ষ্ণেন কদাচিদুষ্ণেন কদাচিদ্দ্বাভ্যাং বহুভির্বাঽধিকৈর্দুষ্যতি| এবং কফেঽপি নিরূপ্যম্| তদেবংরূপো যো নিশ্চযঃ স বিকল্প ইতি| যতশ্চৈবং ততঃ সর্বেষু রোগেষু তুল্যাঃ কোপনপ্রকারা ন ভবন্তি| তথা হি-রূক্ষাদযো গুণা বাতস্য সদা কোপকাঃ, কিন্তু কদাচিত্ কস্যচিদ্গুণস্য প্রকৃষ্টত্বং কোপনে কস্যচিন্ন্যূনত্বমিতি| অত এব হেতোর্গদানন্ত্যং চিকিত্সানন্ত্যং চ| দোষাণামিতি বহুবচনোপাদানাদেব সমবেতানামিত্যর্থে লব্ধে সমবেতগ্রহণং পৃথগ্দ্বন্দ্বসমস্তানামপি চাংশাংশকল্পনা বিকল্প উচ্যত ইতি প্রতিপাদনার্থম্| স্বাতন্ত্র্যং চ পারতন্ত্র্যং চ, তাভ্যাং ব্যাধেঃ প্রাধান্যমাদিশেত্-জানীযাত্| তত্র স্বতন্ত্রস্য ব্যাধেঃ প্রাধান্যম্, যথা স্বনির্দিষ্টোপক্রমসাধ্যত্বাত্| অস্বতন্ত্রস্য ব্যাধেরপ্রাধান্যম্, প্রধানব্যাধ্যুপক্রমেণ প্রাযস্তস্যাপ্যুপক্রম্যত্বাত্| যদ্যপি প্রাধান্যবিশেষাদসৌ সম্প্রাপ্তির্ভিদ্যত ইত্যুক্তম্, তথাঽপ্যপ্রাধান্যবিশেষাদপ্যসৌ সম্প্রাপ্তির্ভিদ্যত ইত্যর্থাদুক্তং ভবত্যেব| প্রাধান্যাপ্রাধান্যযোঃ পরস্পরং সাপেক্ষত্বাত্| তথা হি-অপ্রাধান্যং প্রাধান্যমপেক্ষ্য বক্তুং যুজ্যতে, অপ্রধান্যং চাপেক্ষ্য প্রাধান্যমিতি| কৃত্স্নস্য ভাবঃ কার্ত্স্ন্যম্| কার্ত্স্ন্য চাবযবাশ্চ কার্ত্স্ন্যাবযবাঃ| হেত্বাদিনা কার্ত্স্ন্যাবযবাঃ| আদিশব্দেন প্রাগ্রূপাদযো গৃহ্যন্তে| বলং চাবলং চ বলাবলে ব্যাধেঃ সম্বন্ধিনী, তযোর্বিশেষেণং-বিশিষ্টতা, বলাবলবিশেষণম্| তদ্যথাসঙ্খ্যেন হেত্বাদিকার্ত্স্ন্যাবযবৈরাদিশেত্| তত্র প্রতিরোগং যন্নিদানত্বেনোপদিষ্টং, তত্কিং কার্ত্স্ন্যেনাস্য ব্যাধেরুত্পাদকমুতাবযবেন ? এবং প্রাগ্রূপমপি| তথা লক্ষণমপি কিং সমস্তমস্য ব্যাধের্লক্ষ্যত উতাবযবেন ? উপশযোঽপ্যস্য ব্যাধেঃ সন্তর্পণাপতর্পণরূপঃ, স কিং কার্ত্স্ন্যেন সুখানুবন্ধং করোত্যুতাবযবেন ? তত্র কার্ত্স্ন্যেন যথা-রক্তশাল্যাদিমাংসঘৃতক্ষীরদধিবসামজ্জতৈলাদিনা| অবযবেন তু-রক্তশাল্যাদিমাংসাদ্যন্যতমেন চৈকৈকেন| তথাঽপতর্পণরূপোঽপি যবশ্যামাকগবেধুককোরদূষনীবারতক্রারনালাদিঃ, স কিং কার্ত্স্ন্যেন সুখানুবন্ধং করোত্যুতাবযবেন যবাদিনৈকৈকেন ? এবমন্যদপি চিন্ত্যম্| যথা চ জ্বরস্য-আমাশযং প্রবিশ্য কিং কার্ত্স্ন্যেনাথাংশেন ? তথাঽঽমমনুগম্য কিং কার্ত্স্ন্যেনাথাংশেন ? ইত্যাদি| তদেবংভূতৈর্মলৈরযং জ্বরো নির্বর্তিত ইত্যেবং বলাবলবিশেষণমাদিশেদিতি| নক্তং চ দিনং চ ঋতুশ্চ ভুক্তং চ, তানি নক্তংদিনর্তুভুক্তানি| তেষামংশাঃ-অবযবাঃ, নক্তংদিনর্তুভুক্তাংশাঃ| ব্যাধেঃ কালো ব্যাধিকালঃ| যথামলং-যথাদোষম্| যো যস্য দোষস্যাত্মীযঃ কালস্তং নক্তংদিনর্তুভুক্তাংশৈর্ব্যাধিকালমাদিশেত্| যথা-শ্লেষ্মজ্বরস্য রাত্রিমুখে পূর্বাহ্ণে বা বসন্তে ঋতাবাহারে চ ভুক্তমাত্রে বললাভো ভবতি| এবং মারুতপিত্তযোরপি বললাভো নিরূপ্যঃ|

Adhikarana iti samAsena nidAnArthaH (12) · Śloka 12

ইতি প্রোক্তো নিদানার্থঃ| |১২|

স০-ইতিশব্দঃ প্রকারে, অনেন সঙ্ক্ষেপাখ্যেন প্রকারেণ যথানির্দিষ্টেন, নিদানার্থো-নিদানাভিধেযঃ, সমাসতঃ [ প্রোক্তঃ- ] প্রকর্ষেণোক্তো, ন তু ব্যাসতঃ|

Adhikarana tasya vistareNopadeSaH (12) · Śloka 12

অত এবাহ - তং ব্যাসেনোপদেক্ষ্যতি| |১২|

স০-য এব নিদানার্থঃ সমাসেন প্রোক্তঃ, তমেব ব্যাসেনোপদেক্ষ্যতি-তন্ত্রকৃদভিধাস্যতি|

Adhikarana sarveShAmeva rogANAM nidAnam (12-13) · Śloka 13

| সর্বেষামেব রোগাণাং নিদানং কুপিতা মলাঃ||১২|| তত্প্রকোপস্য তু প্রোক্তং বিবিধাহিতসেবনম্| |১৩|

স০-সর্বেষামপি রোগাণাং কুপিতা মলাঃ-ক্রুদ্ধা বাতপিত্তকফাঃ, নিদানং-হেতুঃ| তদিত্যনেন বাতাদযঃ পরামৃশ্যন্তে| তস্য-বাতাদিপ্রকোপস্য, নিদানং বিবিধং-নানাপ্রকারং, অহিতসেবনং-অহিতানুষ্ঠানং, প্রোক্তম্|

Adhikarana tridoShANAM prakopasya nidAnam (13) · Śloka 13

কিং তত্ ? ইত্যাহ- | অহিতং ত্রিবিধো যোগস্ত্রযাণাং প্রাগুদাহৃতঃ||১৩||

স০-ত্রযাণাং-কালার্থকর্মণাং, ত্রিবিধো-হীনমিথ্যাতিমাত্রলক্ষণো, যোগোঽহিতমিতি প্রাক্-সূত্রস্থানে, উদাহৃতঃ-উক্তঃ| যথা (হৃ.সূ.অ.১২|৩৫)- "অর্থৈরসাত্ম্যৈঃ সংযোগঃ কালঃ কর্ম চ দুষ্কৃতম্|" ইত্যাদি|

Adhikarana vAtaprakopasya nidAnam (14-15) · Śloka 15

ইদানীং বাতাদীনামন্নপানবিহারসহিতং কোপকারণমাহ তিক্তোষণকষাযাল্পরূক্ষপ্রমিতভোজনৈঃ| ধারণোদীরণনিশাজাগরাত্যুচ্চভাষণৈঃ||১৪|| ক্রিযাতিযোগভীশোকচিন্তাব্যাযামমৈথুনৈঃ| গ্রীষ্মাহোরাত্রিভুক্তান্তে প্রকুপ্যতি সমীরণঃ||১৫||

স০-তিক্তাদিভিঃ সমীরণঃ কুপ্যতি| ননু, অল্পপ্রমিতভোজনশব্দযোঃ পর্যাযশব্দত্বাদ্দ্বযোরুপাদানমযুক্তম্| নৈতদস্তি| ভিন্নার্থত্বাদনযোঃ| তথা হি-অল্পভোজনং হীনভোজনমুচ্যতে| প্রমিতভোজনং তু তদুচ্যতে যদতিক্রান্তবেলং ভুক্তম্| তথা চাগমঃ-"ধান্যং পুলাকনিষ্পন্নং জ্ঞেযং তত্প্রমিতাশনম্| অতীতকালং যদ্ভুক্তং" ইত্যাদি| ধারণোদীরণে-বাতবেগাদীনাম্| ক্রিযাতিযোগে-বমনবিরেচনাস্থাপনাদিক্রিযাণামতিসেবনম্| ননু, আস্থাপনেন চ বাযোঃ কোপোঽনুপপন্নঃ| তথা হি-"বাতে বস্তিরিষ্যতে " (হৃ. সূ. অ. ১৯|১) ইত্যুক্তম্| নৈবম্| আস্থাপনাতিযোগো হি পিত্তশ্লেষ্মাদীনাং ধাতূনামপচযকৃত্| তদপচযাচ্চ বাযোঃ কোপঃ| তথা চোক্তম্-"বাযোর্ধাতুক্ষযাত্ কোপো মার্গস্যাবরণেন চ|" ইতি| তস্মাদ্যুক্তো বাযোরাস্থাপনাতিযোগেন কোপঃ| তন্ত্রকৃতাঽপ্যুক্তম্ (হৃ. সূ. অ. ১৯|৬৫)- "স্নেহবস্তিং নিরূহং বা নৈকমেবাতিশীলযেত্| উত্ক্লেশাগ্নিবধৌ স্নেহান্নিরূহান্মরুতো ভযম্||" ইতি| গ্রীষ্মান্ত ইত্যন্তশব্দঃ সমীপবচনো বেদ্যঃ| তেন গ্রীষ্মসমীপে বর্ষাখ্যে কালে প্রকোপ ইতি যুজ্যতে| অন্যথা "চযপ্রকোপপ্রশমা বাযোর্গীষ্মাদিষু ত্রিষু|" (হৃ. সূ. অ. ১২|২৪) ইত্যেতদ্ব্যাহন্যেত|

Adhikarana pittaprakopasya nidAnam (16) · Śloka 16

পিত্তং কট্বম্লতীক্ষ্ণোষ্ণপটুক্রোধবিদাহিভিঃ| শরন্মধ্যাহ্নরাত্র্যর্ধবিদাহসমযেষু চ||১৬||

স০-পিত্তং কট্বাদিভিঃ কুপ্যতি| অর্ধরাত্রে পিত্তস্য কালস্বভাবাত্কোপঃ|

Adhikarana kaPaprakopasya nidAnam (17-18) · Śloka 18

স্বাদ্বম্ললবণস্নিগ্ধগুর্বভিষ্যন্দিশীতলৈঃ| আস্যাস্বপ্নসুখাজীর্ণদিবাস্বপ্নাতিবৃংহণৈঃ||১৭|| প্রচ্ছর্দনাদ্যযোগেন ভুক্তমাত্রবসন্তযোঃ| পূর্বাহ্ণে পূর্বরাত্রে চ শ্লেষ্মা|১৮|

স০-স্বাদ্বাদিভিঃ কফঃ কুপ্যতি|

Adhikarana dvandvaprakopasya nidAnam (18) · Śloka 18

| দ্বন্দ্বং তু সঙ্করাত্||১৮||

স০-দ্বন্দ্বং-দ্বযং, বাতপিত্তে বাতকফৌ পিত্তকফাবিতি| সঙ্করাত্-মিশ্রীভাবাত্তিক্তাদীনাং, কুপ্যতি| এতদুক্তং ভবতি,-যেন তিক্তাদির্বাতহেতুঃ সেবিতঃ কট্বম্লাদিশ্চ পিত্তহেতুঃ, তস্য বাতপিত্তে প্রকুপ্যতঃ| এবং শেষযোর্যোজ্যম্|

Adhikarana sannipAtaprakopasya nidAnam (19-23) · Śloka 23

মিশ্রীভাবাত্সমস্তানাং সন্নিপাতস্তথা পুনঃ| সঙ্কীর্ণাজীর্ণবিষমবিরুদ্ধাধ্যশনাদিভিঃ||১৯|| ব্যাপন্নমদ্যপানীযশুষ্কশাকামমূলকৈঃ| পিণ্যাকমৃদ্যবসুরাপূতিশুষ্ককৃশামিষৈঃ||২০|| দোষত্রযকরৈস্তৈস্তৈস্তথাঽন্নপরিবর্তনাত্| ঋতোর্দুষ্টাত্পুরোবাতাদ্গ্রহাবেশাদ্বিষাদ্গরাত্||২১|| দুষ্টান্নাত্ পর্বতাশ্লেষাদ্গ্রহৈর্জন্মর্ক্ষপীডনাত্| মিথ্যাযোগাচ্চ বিবিধাত্পাপানাং চ নিষেবণাত্||২২|| স্ত্রীণাং প্রসববৈষম্যাত্তথা মিথ্যোপচারতঃ| |২৩|

স০-সমস্তানাং-তিক্তাদীনাং, মিশ্রীভাবাত্ সন্নিপাতঃ কুপ্যতি| তথেতি সমুচ্চযে| সঙ্কীর্ণাশনাদিভিশ্চ সন্নিপাতঃ কুপ্যতি| আদিশব্দেন পর্যুষিতক্লিন্নাদিভোজনাদযো গৃহ্যন্তে| সঙ্কীর্ণাশনাদীনাং লক্ষণং প্রাগুক্তম্| দোষত্রযকরৈস্তৈস্তৈরিতি পূর্বোক্তৈর্মন্দকদধিফাণিতযবকপাটলব্রীহিসর্ষপশাকাদিভিঃ| তথেতি ন কেবলমৈতেঃ, অন্নপরিবর্তনাদিভিশ্চেতি তথাশব্দস্যার্থঃ|

Adhikarana rogasaMprAptiH (1) · Śloka 1

প্রতিরোগমিতি ক্রুদ্ধা রোগাধিষ্ঠানগামিনীঃ||২৩|| রসাযনীঃ প্রপদ্যাশু দোষা দেহে বিকুর্বতে| ২৩ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে সর্বরোগনিদানং নাম প্রথমোঽধ্যাযঃ||১||

স০-প্রত্যামযমিতি-অনেন প্রকারেণ, ক্রুদ্ধাঃ-কুপিতাঃ, দোষা আশু-দ্রাগেব, দেহে বিকুর্বতে-শরীরে বিকারং জনযন্তি| কিং কৃত্বা ? রসাযনীঃ-নাডীঃ, প্রপদ্য-প্রাপ্য| কিম্ভূতাঃ ? রোগস্যাধিষ্ঠানানি-স্থানানি রসরুধিরাদীনি, তানি গন্তুং শীলং যাসাং তা রোগাধিষ্ঠানগামিন্যঃ, তাস্তথাবিধা নাডীঃ প্রাপ্য বিকৃতিভাজো দোষাঃ সম্পদ্যন্ত ইত্যর্থঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে সর্বরোগনিদানং নাম প্রথমোঽধ্যাযঃ সমাপ্তঃ|| ১||