16. vātaśōṇitanidānādhyāyaḥ

Adhikarana adhyAyopakramaH · Śloka

বাতশোণিতনিদানং বাতব্যাধিনিদানাত্ পৃথগারভ্যতে, বহুবক্তব্যত্বাত্| অন্যথা বাতব্যাধিবিশেষ এব বাতশোণিতাখ্যো ব্যাধিরিতি তত্রৈব বক্তুং যুক্তং স্যাত্|

Adhikarana vAtaSoNitanidAnAdhyAyaH, vAtaSoNitasya nidAnam, vAtaSoNitasya saMprAptiH, vAtaSoNitasya nAmAni (2-4) · Śloka 4

তস্মাদ্বাতশোণিতনিদানং প্রক্রম্যত ইত্যাহ - - - - অথাতো বাতশোণিতনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২|| বিদাহ্যন্নং বিরুদ্ধং চ তত্তচ্চাসৃক্প্রদূষণম্| ভজতাং বিধিহীনং চ স্বপ্নজাগরমৈথুনম্||১|| প্রাযেণ সুকুমারাণামচঙ্ক্রমণশীলিনাম্| অভিঘাতাদশুদ্ধেশ্চ নৃণামসৃজি দূষিতে||২|| বাতলৈঃ শীতলৈর্বাযুর্বৃদ্ধঃ কৃদ্ধো বিমার্গগঃ| তাদৃশৈবাসৃজা রুদ্ধঃ প্রাক্তদেব প্রদূষযেত্||৩|| আঢ্যরোগং খুডং বাতবলাসং বাতশোণিতম্| তদাহুর্নামভিঃ|৪|

স০-মদ্যাম্লতক্রদধিনিষ্পাবব্রীহিবারিচরমাংসকুলত্থকুঠেরাদিকং-বিদাহ্যন্নং, তথা বিরুদ্ধমন্নং-সংযোগমাত্রাদিবশাত্ যথা "আনূপমামিষং মাষক্ষৌদ্রক্ষীর" (হৃ. সূ. অ. ৭|২৯) ইত্যাদিকং প্রাগুক্তম্, তত্তচ্চাসৃক্প্রদূষণং-অন্যদপ্যাহারবিহারজাতং যত্তত্রতত্রোক্তম্, তদ্ভজতাং-শীলযতাং, নৃণাং-পুরুষাণাং, তথা বিধিহীনং-অযথাশাস্ত্রং, স্বপ্নজাগরমৈথুনং ভজতাং প্রাযেণ সুকুমারাণাম্, প্রাযোগ্রহণম(ণেনা)ন্যেষামপি রক্তোপচযহেত্বাহারসেবিনাম্, তথা অচঙ্ক্রমণশীলিনাং-অত্যন্তমাস্যাদিসুখসেবিনাম্, অভিঘাতাত্-অনেকবিধাত্প্রহারবিশেষাত্, তথা অশুদ্ধেঃ-অশোধনান্মলানির্হরণাত্, তেষামসৃজি দূষিতে-তদ্দূষণহেতুভির্যথোক্তৈর্দুষ্টে সম্পন্নে, ততো বাতলৈঃ-তিক্তোষণাদিভিঃ সর্বরোগনিদানোক্তৈঃ, তথাঽতিশযেন শীতলৈর্বাযুর্বৃদ্ধঃ-অত্যন্তমুপচযং প্রাপ্য, পশ্চাত্কুদ্ধঃ-কুপিতঃ, অত এব চ বিমার্গগো-বিশেষেণোন্মার্গগামী, তাদৃশৈব-তথাভূতেনৈব, অসৃজা দুষ্টেন ক্রুদ্ধেন রুদ্ধো-বিহতগতিঃ কৃতাত্যন্তসংশ্লেষঃ, তদেব-শোণিতং, প্রাক্-পূর্বং, প্রদূষযেত্| প্রাগ্গ্রহণাদনন্তরং সর্বান্ ধাতূন্ মাংসাদীন্ প্রদূষযেত্| তচ্চ তথাবিধং রক্তমত্যুপচিতং প্রদুষ্টমাঢ্যরোগং খুডং বাতবলাসং বাতশোণিতমিতি নামভিরাচার্যা আহুঃ|

Adhikarana vAtashoNitasya pUrvarUpam (4-5) · Śloka 5

| তচ্চ পূর্বং পাদৌ প্রধাবতি||৪|| বিশেষাদ্যানযানাদ্যৈঃ প্রলম্বৌ| |৫|

স০-তচ্চ রোগস্বভাবাত্ পূর্বং পাদৌ প্রধাবতি-সমুত্পদ্যতে| তৌ চ পাদৌ বিশেষাত্-অতিশযেন, যানযানাদ্যৈঃ প্রলম্বৌ-উচ্ছূনৌ সন্তৌ, প্রধাবতি| যানেন-হস্ত্যশ্বাদিনা, যানং-গমনম্| আদিগ্রহণাদন্যৈরপি পাদপ্রলম্বনোত্পাদকৈর্গজতুরগাদিসদৃশৈঃ|

Adhikarana vAtashoNitasya sarvadehaprasaratvam (5-8) · Śloka 8

তস্য লক্ষণম্| ভবিষ্যতঃ কুষ্ঠসমং তথা সাদঃ শ্লথাঙ্গতা||৫|| জানুজঙ্ঘোরুকট্যংসহস্তপাদাঙ্গসন্ধিষু| কণ্ডূস্ফুরণনিস্তোদভেদগৌরবসুপ্ততাঃ||৬|| ভূত্বা ভূত্বা প্রণশ্যন্তি মুহুরাবির্ভবন্তি চ| পাদযোর্মূলমাস্থায কদাচিদ্ধস্তযোরপি||৭|| আখোরিব বিষং ক্রুদ্ধং কৃত্স্নং দেহং বিধাবতি| |৮|

স০-তস্য-বাতশোণিতস্য, ভবিষ্যতো-ভাবিনো, লক্ষণং-প্রাগ্রূপং, কুষ্ঠসমং-কুষ্ঠেন তুল্যম্, কুষ্ঠস্য যত্ প্রাগ্রূপং-"অতিশ্লক্ষ্ণখরস্পর্শ (হৃ, নি. অ. ১৪|১১) ইত্যাদি কুষ্ঠনিদানোক্তং, তদস্যাপি| ন কেবলমেতদেব যাবত্তথা সাদঃ শ্লথাঙ্গতেত্যাদি চ, যাবন্মুহুরাবির্ভবন্তি চেত্যেতদপি ভবিষ্যতো লক্ষণম্| স০-তচ্চ বাতশোণিতং পাদযোর্মূলমাস্থায-তত্র পূর্বং স্থিতিং কৃত্বা, কদাচিদ্ধস্তযোরপি প্রতিষ্ঠাং কৃত্বা, আখোঃ-মূষকস্য সম্বন্ধি, যথা বিষং ক্রুদ্ধং দেহৈকদেশে পূর্বং স্থিতিং কৃত্বাঽনন্তরং কৃত্স্নং দেহং বিধাবতি-বিশেষেণ প্রসরতি|

Adhikarana vAtashoNitasya dvaividhyam (8-9) · Śloka 9

তচ্চ বাতশোণিতমুত্তানগম্ভীরভেদেন দ্বিধা স্যাদিত্যাহ - - - - | ত্বঙ্মাংসাশ্রযমুত্তানং তত্পূর্বং জাযতে ততঃ||৮|| কালান্তরেণ গম্ভীরং সর্বান্ ধাতূনভিদ্রবত্| |৯|

স০-ত্বক্ চ মাংসং চ, তে আশ্রযো যস্য বাতরক্তস্য তদেবংভূতং তত্-বাতশোণিতং, উত্তানং পূর্বং-প্রাক্, জাযতে| ততঃ-পশ্চাত্, কালান্তরেণ পুনঃ সর্বান্ ধাতূন্-অপরানপি মেদঃপ্রভৃতীন্, অভিদ্রবদ্গম্ভীরং জাযতে|

Adhikarana uttAnasya lakShaNam (9-10) · Śloka 10

| কণ্ড্বাদিসংযুতোত্তানে ত্বক্তাম্রা শ্যাবলোহিতা||৯|| সাযামা ভৃশদাহোষা| |১০|

স০-উত্তানে বাতশোণিতে ত্বক্ কণ্ড্বাদিসংযুতা-কণ্ডূস্ফুরণনিস্তোদাদিযুক্তা (শ্লো. ৬) , তথা তাম্রা শ্যাবলোহিতা-ব্যামিশ্রবর্ণা, ভবতি| তথা সহাযামেন বর্তত ইতি সাযামা, তথা ভৃশদাহোষা-অত্যর্থং দাহরুগ্যুক্তা|

Adhikarana gambhIrasya lakShaNam (10-11) · Śloka 11

গম্ভীরেঽধিকপূর্বরুক্| শ্বযথুর্গ্রথিতঃ পাকী বাযুঃ সন্ধ্যস্থিমজ্জসু||১০|| ছিন্দন্নিব চরত্যন্তর্বক্রীকুর্বংশ্চ বেগবান্| করোতি খঞ্জং পঙ্গুং বা শরীরে সর্বতশ্চরন্||১১||

স০-গম্ভীরে বাতশোণিতেঽধিকপূর্বরুক্ শ্বযথুঃ স্যাত্| অধিকং কৃত্বা পূর্বা রুক্ যস্য শ্বযথোরসাবধিকপূর্বরুক্ শ্বযথুঃ| কুতোঽধিকপূর্বরুক্ ? প্রকৃতত্বাদুত্তানবাতশোণিতাত্| তথা শ্বযথুর্গ্রথিতঃ, তথা পাকী-পাকযুক্তঃ, স্যাত্| তথাঽস্মিন্ গম্ভীরে বাযুর্বেগবান্-বলবান্, শরীরে সর্বতশ্চরন্-গচ্ছন্, বক্রীকুর্বংশ্চ সামর্থ্যাত্তদেব শরীরং খঞ্জং পঙ্গুং বা করোতি| তথা অসৌ সন্ধ্যস্থিমজ্জসু ছিন্দন্নিবান্তশ্চরতি|

Adhikarana vAtAdhikasya lakShaNam (12-13) · Śloka 13

বাতেঽধিকেঽধিকং তত্র শূলস্ফুরণতোদনম্| শোফস্য রৌক্ষ্যকৃষ্ণত্বশ্যাবতাবৃদ্ধিহানযঃ||১২|| ধমন্যঙ্গুলিসন্ধীনাং সঙ্কোচোঽঙ্গগ্রহোঽতিরুক্| শীতদ্বেষানুপশযৌ স্তম্ভবেপথুসুপ্তযঃ||১৩||

স০-তত্র-বাতশোণিতে, বাতাধিকেঽধিকং শূলস্ফুরণতোদনং ভবতি| শূলং-সন্ততা রুক্| তোদনং তু-বিচ্ছিন্না রুক্ প্রতোদেনেব| তথা, শোফস্য রৌক্ষ্যকৃষ্ণত্বশ্যাবতাবৃদ্ধিহানযঃ স্যুঃ, বাতস্য চলস্বভাবত্বাত্| তথা, ধমনীনাং-সিরাবিশেষাণাং, অঙ্গুলিসন্ধীনাং চ সঙ্কোচঃ স্যাত্| তথা, অঙ্গগ্রহঃ-অঙ্গান্যববদ্ধানীব স্যুঃ| তথা, অতিরুক্ শীতদ্বেষানুপশযৌ চ ভবতঃ| শীতদ্বেষঃ-শীতাসহিষ্ণুত্বম্| তথা, অনুপশযঃ-অসুখানুবন্ধঃ| কেনানুপশযঃ ? প্রকৃতত্বাচ্ছীতদ্বেষেণোষ্ণকামিতযোষ্ণসেবনেন ভবতি| তথা, স্তম্ভবেপথুসুপ্তযঃ স্যুঃ| স্তম্ভ ইব স্তম্ভো-দেহস্তব্ধতা| বেপথুঃ-কম্পনম্| দেহস্য সুপ্তিঃ-অঙ্গানামচৈতন্যম্|

Adhikarana raktAdhikasya lakShaNam (14) · Śloka 14

বাতোত্তরস্য লক্ষণমুক্ত্বা রক্তোত্তরং বক্তুমাহ - - - - রক্তে শোফোঽতিরুকতোদস্তাম্রশ্চিমিচিমাযতে| স্নিগ্ধরূক্ষৈঃ শমং নৈতি কণ্ডূক্লেদসমন্বিতঃ||১৪||

স০-অধিক ইত্যত্রানুবর্ততে| রক্তেঽধিকে শোফোঽতিরুক্তোদ ইতি| বাতেঽপ্যধিকে শোফঃ সরুগ্ভবতি কিন্তু রক্তেঽধিকেঽতিরুক্তোদঃ শোফঃ স্যাদিতি বিশেষঃ| তথা, তাম্রো-বর্ণেন, ভবতি| চিমিচিমামিবাচরতি-চিমিচিমাযতে| তথা, স্নিগ্ধরূক্ষৈরসৌ শোফঃ শমং নৈতি-ন যাতি, কণ্ডূক্লেদযুক্তঃ সন্|

Adhikarana pittAdhikasya lakShaNam (15) · Śloka 15

পিত্তে বিদাহঃ সম্মোহঃ স্বেদো মূর্চ্ছা মদঃ সতৃট্| স্পর্শাক্ষমত্বং রুগ্রাগঃ শোফঃ পাকো ভৃশোষ্মতা||১৫||

স০-পিত্তে-পিত্তানুবিদ্ধে বাতশোণিতে, বিদাহাদযঃ স্যুঃ|

Adhikarana kaphAdhikasya lakShaNam (16) · Śloka 16

কফে স্তৈমিত্যুগুরুতাসুপ্তিস্নিগ্ধত্বশীততাঃ| কণ্ডূর্মন্দা চ রুক্|১৬|

স০-কফানুবিদ্ধে বাতশোণিতে স্তৈমিত্যাদযঃ স্যুঃ|

Adhikarana dvidoShAdhikasya lakShaNam, sannipAtajasya lakShaNam (16) · Śloka 16

| দ্বন্দ্বসর্বলিঙ্গং চ সঙ্করে||১৬||

স০-দ্বন্দ্বশব্দেন চ বাতপিত্তকফরক্তানাং দ্বন্দ্বানীতি প্রাযেণেহ গৃহ্যন্তে, সর্বশব্দেন চ বাতপিত্তরক্তকফা গৃহ্যন্তে| দ্বন্দ্বং চ সর্বং চ দ্বন্দ্বসর্বে, তযোর্লিঙ্গং-লক্ষণং, দ্বন্দ্বসর্বলিঙ্গম্| সঙ্করে-ব্যামিশ্রত্বে সতি, দ্বন্দ্বসর্বলিঙ্গং বাতশোণিতং ভবতি| কস্য সঙ্করে ? প্রকৃতত্বাদ্বাতপিত্তরক্তকফানাং দ্বন্দ্বসঙ্করে দ্বন্দ্বলিঙ্গং বাতশোণিতং ভবতি| সর্বসঙ্করে-সর্বেষাং বাতাদীনাং সঙ্করে, সর্বলিঙ্গং বাতশোণিতং ভবতি|

Adhikarana vAtashoNitasya sAdhyAsAdhyatvam (17) · Śloka 17

একদোষানুগং সাধ্যং নবং, যাপ্যং দ্বিদোষজম্| ত্রিদোষজং ত্যজেত্স্রাবি স্তব্ধমর্বুদকারি চ||১৭||

স০-একদোষানুগং বাতশোণিতং নবং সাধ্যং-সাধযিতুং শক্যম্| দ্বিদোষোদ্ভবং যাপ্যং-যাপনার্হম্| ত্রিদোষজং বাতশোণিতং ত্যজেত্-অসাধ্যত্বান্নোপক্রমেত্| তথা, স্রাবি যদ্বাতরক্তমর্বুদকারি চ, তচ্চাসাধ্যম্|

Adhikarana vAtashoNitasya upadravAH (18) · Śloka 18

রক্তমার্গং নিহত্যাশু শাখাসন্ধিষু মারুতঃ| নিবিশ্যান্যোন্যমাবার্য বেদনাভির্হরত্যসূন্||১৮||

স০-শাখাসন্ধিষু মারুতো নিবিশ্য-তত্র স্থিতিং কৃত্বা, তথা রক্তমার্গমাশু-শীঘ্রং নিহত্য, অনন্তরমন্যোন্যমাবার্য-প্রকৃতত্বাদ্রক্তং কর্তৃ বাতমাবার্য বাতোঽপি রক্তম্, ততো বেদনাভিঃ বাতরক্তোচিতাভিঃ পীডাভিঃ, অসূন্-প্রাণান্, হরতি |

Adhikarana kupitasya prANasya nidAnalakShaNe (19-20) · Śloka 20

বাযৌ পঞ্চাত্মকে প্রাণো রৌক্ষ্যব্যাযামলঙ্ঘনৈঃ| অত্যাহারাভিঘাতাধ্ববেগোদীরণধারণৈঃ||১৯|| কুপিতশ্চক্ষুরাদীনামুপঘাতং প্রবর্তযেত্| পীনসার্দিততৃট্কাসশ্বাসাদীংশ্চামযান্বহূন্||২০||

স০-পঞ্চাত্মকে-প্রাণাদিভেদাত্ পঞ্চস্বভাবে বাতে সতি, প্রাণো নাম বাতো রৌক্ষ্যাদিভিঃ কুপিতশ্চক্ষুরাদীনামুপঘাতং প্রবর্তযেত্-বিদধাতি| তথা, পীনসদীংশ্চ বহূন্ রোগান্ কুর্যাত্| আদিশব্দেন হিধ্মাদযো গৃহ্যন্তে|

Adhikarana kupitasya udAnasya nidAnalakShaNe (21-22) · Śloka 22

উদানঃ ক্ষবথূদ্গারচ্ছর্দিনিদ্রাবিধারণৈঃ| গুরুভারাতিরুদিতহাস্যাদ্যৈর্বিকৃতো গদান্||২১|| কণ্ঠরোধমনোভ্রংশচ্ছর্দ্যরোচকপীনসান্| কুর্যাচ্চ গলগণ্ডাদীংস্তাংস্তান্ জত্রূর্ধ্বসংশ্রযান্||২২||

স০-উদানঃ ক্ষবথুবিধারণাদিভির্বিকৃতঃ-কুপিতঃ, কণ্ঠরোধাদীন্ গদান্ কুর্যাত্| চশব্দোঽত্র ভিন্নক্রমঃ| গলগণ্ডাদীংশ্চ গদান্, তাংস্তান্-অনেকবিধান্, জত্রূর্ধ্বসংশ্রযান্ কুর্যাত্|

Adhikarana kupitasya vyAnasya nidAnalakShaNe (23-25) · Śloka 25

ব্যানোঽতিগমনধ্যানক্রীডাবিষমচেষ্টিতৈঃ| বিরোধিরূক্ষভীহর্ষবিষাদাদ্যৈশ্চ দূষিতঃ||২৩|| পুংস্ত্বোত্সাহবলভ্রংশশোফচিত্তোপ্লবজ্বরান্| সর্বাঙ্গরোগনিস্তোদরোমহর্ষাঙ্গসুপ্ততাঃ||২৪|| কুষ্ঠং বিসর্পমন্যাংশ্চ কুর্যাত্সর্বাঙ্গগান্ গদান্| |২৫|

স০-ব্যানোঽতিগমনাদিভির্বিরোধ্যাদিভিশ্চ দূষিতো-দুষ্টিং প্রাপ্তঃ, পুংস্ত্বোত্সাহাদিভ্রংশাদীন্ অপরানপি সর্বাঙ্গগান্ গদান্ কুর্যাত্|

Adhikarana kupitasya samAnasya nidAnalakShaNe (25-26) · Śloka 26

| সমানো বিষমাজীর্নশীতসঙ্কীর্ণভোজনৈঃ||২৫|| করোত্যকালশযনজাগরাদ্যৈশ্চ দূষিতঃ| শূলগুল্মগ্রহণ্যাদীন্ পক্বামাশযজান্ গদান্||২৬||

স০-সমানো বিষমাদিভোজনাদিভিরকালশযনাদিভিশ্চ দূষিতঃ শূলাদীন্ পক্বামাশযজান্ গদান্ করোতি|

Adhikarana kupitasya apAnasya nidAnalakShaNe (27-28) · Śloka 28

অপানো রূক্ষগুর্বন্নবেগাঘাতাতিবাহনৈঃ| যানযানাসনস্থানচঙ্ক্রমৈশ্চাতিসেবিতৈঃ||২৭|| কুপিতঃ কুরুতে রোগান্ কৃচ্ছ্রান্ পক্বাশযাশ্রযান্| মূত্রশুক্রপ্রদোষার্শোগুদভ্রংশাদিকান্ বহূন্||২৮||

স০-অপানো রূক্ষান্নাদিভিরতিসেবিতৈর্বেগাঘাতাদিভিশ্চাতিসেবিতৈঃ কুপিতঃ কৃচ্ছ্রান্-দারুণান্, পক্বাশযাশ্রযান্ মূত্রশুক্রপ্রদোষাদীন্ বহূন্ গদান্ কুর্যাত্|

Adhikarana kupitasya sAmasyavAyoH nidAnalakShaNe, nirAmasya vAyoH nidAnalakShaNe (29-30) · Śloka 30

সর্বং চ মারুতং সামং তন্দ্রাস্তৈমিত্যগৌরবৈঃ| স্নিগ্ধত্বারোচকালস্যশৈত্যশোফাগ্নিহানিভিঃ||২৯|| কটুরূক্ষাভিলাষেণ তদ্বিধোপশযেন চ| যুক্তং বিদ্যান্নিরামং তু তন্দ্রাদীনাং বিপর্যযাত্||৩০||

স০-সর্বমপি মারুতং তন্দ্রাদিভির্লক্ষণৈর্যুতং সামং বিদ্যাত্| তন্দ্রাদিলক্ষণবিপর্যযেণ তু নিরামং জানীযাত্|

Adhikarana vAyvAvaraNasya bahubhedatvam (31) · Śloka 31

বাযোরাবরণং চাতো বহুভেদং প্রবক্ষ্যতে| |৩১|

স০-অতঃ-সামাদিলক্ষণাদনন্তরং, বাতস্যাবরণং বহুভেদং-অনেকপ্রকারং, প্রকর্ষেণ বক্ষ্যতে| কিল নাস্যাম এবাবরণম্, অপি ত্বন্যদপ্যস্তীতি দ্যোতযতি|

Adhikarana pittAvRutasya vAyorlakShaNam (31-32) · Śloka 32

| লিঙ্গং পিত্তাবৃতে দাহস্তৃষ্ণা শূলং ভ্রমস্তমঃ||৩১|| কটুকোষ্ণাম্ললবণৈর্বিদাহঃ শীতকামতা| |৩২|

স০-পিত্তেনাবৃতে মরুতি দাহাদিকং লিঙ্গম্|

Adhikarana kaphAvRutasya vAyorlakShaNam (32-33) · Śloka 33

| শৈত্যগৌরবশূলানি কট্বাদ্যুপশযোঽধিকম্||৩২|| লঙ্ঘনাযাসরূক্ষোষ্ণকামতা চ কফাবৃতে| |৩৩|

স০-কফাবৃতে বাযৌ শৈত্যাদিকং লিঙ্গং লঙ্ঘনাদিকামতা চ|

Adhikarana raktAvRutasya vAyorlakShaNam (33-34) · Śloka 34

| রক্তাবৃতে সদাহাঽর্তিস্ত্বঙ্মাংসান্তরজা ভৃশম্||৩৩|| ভবেচ্চ রাগী শ্বযথুর্জাযন্তে মণ্ডলানি চ| |৩৪|

স০-রক্তাবৃতে পবনেঽর্তিঃ-পীডা, ভৃশং ত্বঙ্মাংসান্তরজা দাহযুক্তা স্যাত্| রাগবাশ্চ শ্বযথুঃ স্যাত্| তথা, মণ্ডলানি চ জাযন্তে|

Adhikarana mAMsAvRutasya vAyorlakShaNam (34-35) · Śloka 35

| মাংসেন কঠিনঃ শোফো বিবর্ণঃ পিটিকাস্তথা||৩৪|| হর্ষঃ পিপীলিকানাং চ সঞ্চার ইব জাযতে| |৩৫|

স০-মাংসেনাবৃতে বাযৌ কঠিনো বিবর্ণশ্চ শোফস্তথা পিটিকাঃ স্যুঃ, হর্ষেশ্চ| তথা, পিপীলিকানাং গাত্রেষু সঞ্চার ইব জাযতে|

Adhikarana medasAvRutasya vAyorlakShaNam (35-36) · Śloka 36

| চলঃ স্নিগ্ধো মৃদুঃ শীতঃ শোফো গাত্রেষ্বরোচকঃ||৩৫|| আঢ্যবাত ইতি জ্ঞেযঃ স কৃচ্ছ্রো মেদসাঽঽবৃতে| |৩৬|

স০-মেদসা আবৃতে বাযাবঙ্গেষু শোফশ্চলস্তথা স্নিগ্ধস্তথা শীতো মৃদুশ্চ স্যাত্ তথাঽরোচকঃ| সঃ-এবংবিধঃ, আঢ্যবাত ইতি বেদ্যঃ| স চ কৃচ্ছ্রঃ-কৃচ্ছ্রসাধ্যঃ|

Adhikarana asthyAvRutasya vAyorlakShaNam (36-37) · Śloka 37

| স্পর্শমস্থ্যাবৃতেঽত্যুষ্ণং পীডনং চাভিনন্দতি||৩৬|| সূচ্যেব তুদ্যতেঽত্যর্থমঙ্গং সীদতি শূল্যতে| |৩৭|

স০-অস্থ্যাবৃতে সমীরণে স্পর্শমত্যুষ্ণং পীডনং চাভিনন্দতি-অভিলষতি| তথা, অঙ্গমতিশযেন সূচ্যেব তুদ্যতে| তথা, সীদতি শূল্যতে চ|

Adhikarana majjAvRutasya vAyorlakShaNam (37-38) · Śloka 38

| মজ্জাবৃতে বিনমনং জৃম্ভণং পরিবেষ্টনম্||৩৭|| শূলং চ পীড্যমানেন পাণিভ্যাং লভতে সুখম্| |৩৮|

স০-মজ্জাবৃতে সমীরে বিনমনাদিকং স্যাত্| বিনমনং-অঙ্গানাম্| তথা, পাণিভ্যাং পীড্যমানেন চ-প্রকৃতত্বাদঙ্গেন, সুখং লভতে|

Adhikarana shukrAvRutasya vAyorlakShaNam (38) · Śloka 38

| শুক্রাবৃতেঽতিবেগো বা ন বা নিষ্ফলতাঽপি বা||৩৮||

স০-শুক্রাবৃতে প্রভঞ্জনেঽতিবেগো বা-প্রকৃতত্বাচ্ছুক্রস্য, ন বা বেগো নিষ্ফলতা বা স্যাত্|

Adhikarana annAvRutasya vAyorlakShaNam (39) · Śloka 39

ভুক্তে কুক্ষৌ রুজা জীর্ণে শাম্যত্যন্নাবৃতেঽনিলে| |৩৯|

অন্নাবৃতে বাতে ভুক্তে সতি রুজা কুক্ষৌ ভবতি| জীর্ণেঽন্নে সতি রুজা শাম্যতি|

Adhikarana mUtrAvRutasya vAyorlakShaNam (39) · Śloka 39

| মূত্রাপ্রবৃত্তিরাধ্মানং বস্তের্মূত্রাবৃতে ভবেত্||৩৯||

স০-মূত্রাবৃতে বাযৌ মূত্রস্যাপ্রবৃত্তিরাধ্মানং চ বস্তেঃ স্যাত্|

Adhikarana viDAvRutasya vAyorlakShaNam (40-41) · Śloka 41

বিডাবৃতে বিবন্ধোঽধঃ স্বস্থানে পরিকৃন্ততি| ব্রজত্যাশু জরাং স্নেহো ভুক্তে চানহ্যতে নরঃ||৪০|| শকৃত্পীডিতমন্নেন দুঃখং শুষ্কং চিরাত্সৃজেত্| |৪১|

স০-বিডাবৃতে মাতরিশ্বনি স্বস্থানে-অপানাখ্যে, অধোবিবন্ধো জাতবিবন্ধত্বাত্ পরিকৃন্ততি| স্নেহশ্র্চাশু জরাং যাতি| ভুক্তে চ সতি নর আনহ্যতে-আধ্মাপ্যতে| শকৃদন্নেন পীডিতং চিরেণ শুষ্কং দুঃখং কৃচ্ছ্রেণ সৃজেত্|

Adhikarana sarvadhAtvAvRutasya vAyorlakShaNam (41-42) · Śloka 42

| সর্বধাত্বাবৃতে বাযৌ শ্রোণিবঙ্ক্ষণপৃষ্ঠরুক্||৪১|| বিলোমো মারুতোঽস্বস্থং হৃদযং পীড্যতেঽতি চ| |৪২|

স০-সর্বধাত্বাবৃতেঽনিলে শ্রোণ্যাদিরুক্ স্যাত্| তথা, পবনো বিগুণো ভবতি| হৃদযং চ ব্যাকুলং [অতি] পীড্যতে চ|

Adhikarana pittAvRutasya prANasya vAyorlakShaNam (42-43) · Śloka 43

| ভ্রমো মূর্চ্ছা রুজা দাহঃ পিত্তেন প্রাণ আবৃতে||৪২|| বিদগ্ধেঽন্নে চ বমনম্| |৪৩|

স০-প্রাণে পিত্তেনাবৃতে ভ্রমাদ্যাঃ স্যুঃ| অন্নে চ বিদাহাবস্থাং প্রাপ্তে সতি বমনং স্যাত্|

Adhikarana pittAvRutasyodAnasya vAyorlakShaNam (43) · Śloka 43

উদানেঽপি ভ্রমাদযঃ| দাহোঽন্তরূর্জাভ্রংশশ্চ|৪৩|

স০-উদানে চ পিত্তেনাবৃতে সতি ভ্রমাদ্যাঃ-পূর্বোক্তাঃ, স্যুঃ| তথা, অন্তর্দাহ ঊর্জাযাঃ-বলস্য চ, বিনাশঃ|

Adhikarana pittAvRutasya vyAnasya vAyorlakShaNam (43-44) · Śloka 44

| দাহো ব্যানে চ সর্বগঃ||৪৩|| ক্লমোঽঙ্গচেষ্টাসঙ্গশ্চ সসন্তাপঃ সবেদনঃ| |৪৪|

স০-ব্যানে চ পিত্তেনাবৃতে সর্বশঃ(গঃ)-অন্তর্বহিশ্চ দাহঃ, ক্লমাদযশ্চ স্যুঃ|

Adhikarana pittAvRutasya samAnasya vAyorlakShaNam (44-45) · Śloka 45

| সমান ঊষ্মোপহতিরতিস্বেদোঽরতিঃ সতৃট্||৪৪|| দাহশ্চ স্যাত্| |৪৫|

স০-সমানে পিত্তেনাবৃতে ঊষ্মণঃ-অগ্নেঃ, উপহতিঃ-উপঘাতঃ, অতিস্বেদাদযশ্চ স্যুঃ|

Adhikarana pittAvRutasyApAnasya vAyorlakShaNam (45) · Śloka 45

অপানে তু মলে হারিদ্রবর্নতা| রজোতিবৃত্তিস্তাপশ্চ যোনিমেহনপাযুষু||৪৫||

স০-অপানে পুনঃ পিত্তেনাবৃতে সতি মলে-পুরীষাদৌ, হারিদ্রবর্ণতা স্যাত্| যোন্যাদিষু রুজঃ-পীডযাঃ, অতিবৃত্তিস্তাপশ্চ স্যাত্|

Adhikarana kaphAvRutasya prANasya vAyorlakShaNam (46) · Śloka 46

শ্লেষ্মণা ত্বাবৃতে প্রাণে সাদস্তন্দ্রাঽরুচির্বমিঃ| ষ্ঠীবনং ক্ষবথূদ্গারনিঃশ্বাসোচ্ছ্বাসসঙ্গ্রহঃ||৪৬||

স০-প্রাণে চ শ্লেষ্মাবৃতে সাদাদযঃ স্যুঃ|

Adhikarana kaphAvRutasyodAnasya vAyorlakShaNam (47) · Śloka 47

উদানে গুরুগাত্রত্বমরুচির্বাক্স্বরগ্রহঃ| বলবর্ণপ্রণাশশ্চ|৪৭|

স০-উদানে চ শ্লেষ্মাবৃতে গুরুগাত্রত্বাদযঃ স্যুঃ|

Adhikarana kaphAvRutasya vyAnasya vAyorlakShaNam (47-48) · Śloka 48

| ব্যানে পর্বাস্থিবাগ্গ্রহঃ||৪৭|| গুরুতাঽঙ্গেষু সর্বেষু স্খলিতং চ গতৌ ভৃশম্| |৪৮|

স০-ব্যানে কফাবৃতে পর্বাস্থিবাগ্গ্রহস্তথাঽঙ্গেষু গৌরবং গতৌ চ স্খলনং স্যাত্|

Adhikarana kaphAvRutasya samAnasya vAyorlakShaNam (48) · Śloka 48

| সমানেঽতিহিমাঙ্গত্বমস্বেদো মন্দবহ্নিতা||৪৮||

স০-সমানে কফাবৃতেঽতিশীতাঙ্গত্বমস্বেদো মন্দাগ্নিত্বং চ স্যাত্|

Adhikarana kaphAvRutasyApAnasya vAyorlakShaNam (49) · Śloka 49

অপানে সকফং মূত্রশকৃতঃ স্যাত্প্রবর্তনম্| |৪৯|

স০-অপানে কফাবৃতে মূত্রশকৃতঃ প্রবর্তনং সকফং স্যাত্|

Adhikarana iti dvAviMshatividhamAvaraNam (49) · Śloka 49

| ইতি দ্ববিংশতিবিধং বাযোরাবরণং বিদুঃ||৪৯||

স০-ইতি-অনেন প্রকারেণ, বাযোরাবরণং দ্বাবিংশতিপ্রকারং [বিদুঃ-] জানন্তি, তন্ত্রকৃত ইতি শেষঃ|

Adhikarana prANAdInAmanyonyamAvaraNaM viMshatividham (50) · Śloka 50

প্রাণাদযস্তথাঽন্যোন্যমাবৃণ্বন্তি যথাক্রমম্| সর্বেঽপি বিংশতিবিধং বিদ্যাদাবরণং চ তত্||৫০||

স০-প্রাণাদযঃ-পঞ্চ বাযবঃ, অন্যোন্যং-পরস্পরং, আবৃণ্বন্তি যথাক্রমং-যথাসঙ্খ্যং, তথা-তেনোক্তেন প্রকারেণ, যথা পিত্তকফাভ্যং প্রাণাদয আবৃতাস্তথা প্রাণাদযোঽন্যোন্যমাবৃণ্বন্তীতি তথাশব্দস্যার্থঃ| তত্র যথা,-প্রাণেনোদানাদযশ্চত্বার আব্রিযন্তে, তথৈবোদানাদিভিরপি প্রাণ আব্রিযতে| এবমুদানেন ব্যানাদযস্ত্রয আব্রিযন্তে, ব্যানাদিভিশ্চ ত্রিভিরুদানঃ| তথা ব্যানেন সমানাপানৌ, তথা সমানাপানাভ্যাং ব্যানঃ| সমানেনাপানঃ, অপানেনাঽপি সমান আব্রিযতে| ইত্যেকদ্বিত্রাদিক্রমেণাপ্যেবমাবরণং নিরূপ্যম্| এবং চ সর্বেঽপি পরস্পরমাবৃণ্বন্তি| তচ্চাবরণং বিংশতিভেদং বিদ্যাত্|

Adhikarana prANAvRutasyodAnasya lakShaNam, udAnAvRutasya lakShaNam (51-52) · Śloka 52

অথাস্যাবরণস্য লিঙ্গমাহ - - - - নিঃশ্বাসোচ্ছ্বাসসংরোধঃ প্রতিশ্যাযঃ শিরোগ্রহঃ| হৃদ্রোগো মুখশোষশ্চ প্রাণেনোদান আবৃতে||৫১|| উদানেনাবৃতে প্রাণে বর্ণৌজোবলসঙ্ক্ষযঃ| |৫২|

স০-প্রাণেনোদান আবৃতে নিঃশ্বাসোচ্ছ্বাসসংরোধাদযঃ স্যুঃ| উদানেন প্রাণ আবৃতে বর্ণৌজোবলসঙ্ক্ষযঃ স্যাত্| ননু চ, পিত্তাদিভিঃ প্রাণাদীনামাবরণং যুক্তম্| পরস্পরং তু প্রাণাদীনাং যদাবরণং তদমূর্তত্বাদনুপপন্নমিব মন্যামহে| ব্রূমঃ| দ্বযোর্বাতযোরন্যোন্যমুপসর্পতোর্বলবতা দুর্বলস্যাভিঘাতেন গতিভঙ্গাত্স তেনাবৃতমার্গ ইত্যুচ্যতে| তস্মাদ্বাতানামপি পরস্পরমাবরণং যুক্তমেব|

Adhikarana anayA dishA sheShAvaraNasya vibhAgaH (52-53) · Śloka 53

| দিশাঽনযা চ বিভজেত্সর্বমাবরণং ভিষক্||৫২|| স্থানান্যবেক্ষ্য বাতানাং বৃদ্ধিং হানিং চ কর্মণাত্| |৫৩|

স০-অনযা দিশা-দিঙ্মাত্রপ্রদর্শনেন, সর্বমাবরণং বিভজেদ্ভিষক্| ইযং চাত্র দিক্,-উদানেনাবৃতেঽপানে ছর্দিশ্বাসকাসাদযঃ স্যুস্তথাঽল্পোঽগ্নিরতিসারশ্চ| উদানেঽপানেনাবৃতে বস্ত্যাধ্মানোদাবর্তগুল্মাল্পাগ্নিপরিকর্তিকাঃ স্যুঃ| অপানে ব্যানেনাবৃতে বিণ্মূত্ররেতসামতিপ্রবৃত্তিঃ| ব্যানে সমানেনাবৃতে মূর্চ্ছাতন্দ্রাপ্রলাপাঙ্গসাদবহ্নযোজোবলক্ষযঃ| ব্যান উদানেনাবৃতে চ শ্যাবাস্যতা স্তব্ধতাঽল্পাগ্নিতা স্বেদশ্চেষ্টাহানির্নিমীলনমিতি| এবমন্যদপ্যাবরণং ভিষক্ স্বমনীষযা যথাশাস্ত্রসংস্কারবত্যা বিভজেত্| গ্রন্থকৃতা তু গ্রন্থগৌরবভযান্নোক্তম্| কথং বিভজেত্ ? ইত্যত্র যুক্তিং দর্শযতি-স্থানানীত্যাদি| স্থানানি-পক্বাশযাদীনি দোষভেদীযোক্তানি, বাতানাং-প্রাণাদীনাং, অবেক্ষ্য| তথা, বৃদ্ধিং-আবরকবাযুসম্বন্ধিনাং বৈকৃতকর্মণাং, অবেক্ষ্য-জ্ঞাত্বা| তথা, আবার্যমরুতাং হানিমবেক্ষ্য, সর্বমাবরণং-অনুক্তমপি, বিভজেত্| যথা-উত্সাহোচ্ছ্বাসচেষ্টাদীনি কর্মাণি প্রাণাদিসম্বন্ধীনি যদা হীনানি দৃশ্যন্তে উদানাদীনাং কর্মাণি বাক্প্রবৃত্ত্যাদীনি বৃদ্ধানি তদৈবং জ্ঞাতব্যম্, যথা-প্রাণ উদানাদীনামেকেন দ্বাভ্যাং ত্রিভিশ্চতুর্ভির্বা আবৃত ইতি| এবমুদানাদিষ্বপি প্রাণাদিভিরাবরণং বিভাগীকার্যম্|

Adhikarana AvaraNasyAsa~gkhyeyatvam (53-54) · Śloka 54

| প্রাণাদীনাং চ পঞ্চানাং মিশ্রমাবরণং মিথঃ||৫৩|| পিত্তাদিভির্দ্বাদশভির্মিশ্রাণাং মিশ্রিতৈশ্চ তৈঃ| |৫৪|

স০-প্রাণাদীনাং পঞ্চানাং বাযূনাং পরস্পরমাবার্যাবরকত্বেন স্থিতানাং মিশ্রং-দ্বযেন ত্রযেণ চতুষ্টযেন চ, মিথঃ-পরস্পরং, আবরণমবেক্ষ্য যাত্যাবৃতিরসঙ্খ্যতামিতি সম্বন্ধঃ| তথা, পিত্তাদিভির্দ্বাদশভিঃ-ধাত্ববসানৈঃ, মিশ্রাণাং প্রাণাদীনাং মিশ্রং মিথ আবরণমবেক্ষ্য যাত্যাবৃতিরসঙ্খ্যতামিতি যোজ্যম্| অত্র চৈষা উদাহরণদিগ্দ্রষ্টব্যা,-প্রাণেন দ্বাদশবিধেন পিত্তাদিভির্মিশ্রিতত্বাত্ চতুর্ণামুদানাদীনামাবরণং বিভজেত্| তথা, চতুর্ভিরুদানাদিভিঃ পিত্ত্স্যাবরণং প্রত্যেকং দ্বাদশবিধৈর্দ্বাদশবিধস্যৈকস্য প্রাণস্যাবরণমিতি| তৈরিত্যনেন প্রাণাদযঃ পরামৃশ্যন্তে| তৈঃ-পিত্তাদ্যাবরণমিশ্রিতৈঃ প্রাণাদিভিঃ, পরস্পরমাবার্যাবরকত্বেন স্থিতৈর্মিশ্রমাবরণমবেক্ষ্য যাত্যাবৃতিরসসঙ্খ্যতামিতি যোঽজ্যম্| চঃ সমুচ্চযে|

Adhikarana tadavahitatvena lakShayet (54-56) · Śloka 56

| মিশ্রৈঃ পিত্তাদিভিস্তদ্বন্মিশ্রণাভিরনেকধা||৫৪|| তারতম্যবিকল্পাচ্চ যাত্যাবৃতিরসঙ্খ্যতাম্| তাং লক্ষযেদবহিতো যথাস্বং লক্ষণোদযাত্||৫৫|| শনৈঃশনৈশ্চোপশযাদ্গূঢামপি মহুর্মুহুঃ| |৫৬|

স০-তৈস্তুল্যং তদ্বত্| যথা প্রাণাদীনাং পিত্তাদিভির্দ্বাদশভির্মিশ্রাণাং মিশ্রমাবরণং মিথস্তথা মিশ্রৈশ্চ তৈঃ-প্রাণাদিভিঃ, যথা মিশ্রমাবরণং মিথস্তথৈব মিশ্রৈঃ-সংযুক্তৈরেতৈঃ পিত্তাদিভির্ন কেবলৈঃ, প্রাণাদীনাং মিশ্রমাবরণং মিথস্তথা মিশ্রৈঃ পিত্তাদিভির্যে প্রাণাদযো মিশ্রিতাস্তৈস্তথাভূতৈঃ প্রাণাদীনামাবরণম্| এবমনেকধা মিশ্রণাভিঃ-বহুভিঃ সংযোজনৈঃ, আবৃতিরসঙ্খ্যতাং যাতি| তথা তারতম্যবিকল্পাচ্চ প্রাণদীনামাবৃতিরসঙ্খ্যতাং যাতি-সঙ্খ্যামতিক্রম্য গচ্ছতি| তাং-আবৃতিং, তেষাং প্রাণাদীনাং গূঢাং-দুর্লক্ষ্যামপি, অবহিতঃ-তজ্জ্ঞানায তত্পরঃ সন্, লক্ষযেত্-জানীযাত্| কথম্ ? যথাস্বং লক্ষণোদযাত্| তেষাং প্রাণাদীনাং যথাযথং লক্ষণোদযাত্-আত্মীযাল্লিঙ্গোদ্ভবাত্, শনৈঃশনৈঃ-ন ঝটিত্যেব, তথা মুহুর্মুহুঃ-ক্ষণে ক্ষণে লক্ষযেত্, ন তু সকৃদেব, প্রাণাদীনাং যথাস্বং লক্ষণোদযাজ্জানীযাদিতি| ন কেবলং কেবলা-দ্যথাস্বং লক্ষণোদযাত্ প্রাণাদীনামাবৃতিং লক্ষযেত্, যাবদুপশযাদপ্যেষাং গূঢামপ্যাবৃতিমবগচ্ছেত্| তত্র প্রাণাদীনামেকৈকেনান্যোন্যাবরণে বিংশতির্ভেদাঃ| এবমেকেন দ্বযোর্দ্বাভ্যাং চৈকস্যাবরণে নিরূপ্যমাণে ত্বমী ভেদাঃ-প্রাণস্যোদানব্যানাভ্যামন্যোন্যাবরণে দ্বৌ ভেদৌ| এবমুদানসমানাভ্যামুদানাপানাভ্যাং [ব্যানসমানাভ্যাং ব্যানাপানাভ্যাং সমানাপানাভ্যাং ] চ সহান্যোন্যাবরণে পরাণি পঞ্চ দ্বিকানি, ইতি প্রাণস্য দ্বাদশ ভেদা ভবন্তি| উদানস্য ষট্| ব্যানস্য দ্বৌ| এবং ব্যানস্যোদানাদিভিস্ত্রিভিরন্যোন্যাবরণে ষট্| উদানস্য দ্বৌ| প্রাণস্যোদানাদিভিশ্চতুর্ভিদ্বৌ চান্যোন্যাবরণাদ্ভেদৌ ভবতঃ| তথা, প্রাণাদীনাং পিত্তাদিভির্দ্বাদশভিরাবৃতত্বাত্ দ্বাদশপ্রকারাণামন্যোন্যানাং মিশ্রণাত্ চত্বারিশতানি বিংশত্যুত্তরাণি ভবন্তি| এবমন্যদপ্যাবরণং নিরূপ্যম্|

Adhikarana prANodAnayorjIvitabalatvam, tayoH pIDanAdAyurbalayorhAniH (56-57) · Śloka 57

| বিশেষাজ্জীবিতং প্রাণ উদানো বলমুচ্যতে||৫৬|| স্যাত্তযোঃ পীডনাদ্ধানিরাযুষশ্চ বলস্য চ| |৫৭|

স০-প্রাণাদযঃ সর্ব এব বাতা জীবিতম্, বিশেষেণ তু প্রাণাখ্যো বাযুর্জীবিতমুচ্যতে| তথা, উদানাখ্যো বাযুর্বিশেষেণ বলমুচ্যতে| যতশ্চৈবমতস্তযোঃ-প্রাণোদানযোঃ, পীডনাত্-ক্ষোভণাত্, যথাস্বমাযুষো বলস্য চ হানির্ভবেত্| তস্মাদ্ধেতোঃ প্রাণোদানাখ্যৌ পবনাবাহারাদিনা যত্নেন ভিষজা রক্ষ্যৌ| তথা চ বক্ষ্যতি (হৃ. চি. অ. ২২|৬৯) - "প্রাণো রক্ষ্যশ্চতুর্ভ্যোঽপি তত্স্থিতৌ দেহসংস্থিতঃ|" ইতি|

Adhikarana AvRutavAtAnAM duHsAdhyAsAdhyatvam (57-58) · Śloka 58

| আবৃতা বাযবোঽজ্ঞাতা জ্ঞাতা বা বত্সরং স্থিতাঃ||৫৭|| প্রযত্নেনাপি দুঃসাধ্যা ভবেযুর্বাঽনুপক্রমাঃ| |৫৮|

স০-বাতাদীনামন্যমেনাবৃতা ইত্যেবমজ্ঞাতাঃ-সম্যগনিশ্চিতাঃ, বর্ষোষিতাঃ প্রযত্নেনাপি দুঃসাধ্যাঃ-কৃচ্ছ্রসাধ্যা ভবেযুঃ| জ্ঞাতা বা-পিত্তাদিনা আবৃতা যথাবত্সম্যঙ্নিশ্চযং গতাঃ, বত্সরং স্থিতাঃ| বাশব্দ এবার্থে, অনুপক্রমা এব ভবেযুঃ| ততো বাতা আবৃতেঃ প্রযত্নেন রক্ষণীযাঃ|

Adhikarana AvRutavAtAnAmupadravAH (16) · Śloka 16

| বিদ্রধিপ্লীহহৃদ্রোগগুল্মাগ্নিসদনাদযঃ||৫৮|| ভবন্ত্যুপদ্রবাস্তেষামাবৃতানামুপেক্ষণাত্| ৫৮ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে বাতশোণিতনিদানং নাম ষোডশোঽধ্যাযঃ||১৬||

স০-তেষাং-বাযূনাং, আবৃতানামুপেক্ষণাত্-অচিকিত্সনাত্, বিদ্রধ্যাদয উপদ্রবা জাযন্তে| তস্মাত্তদুপক্রমে যতিতব্যমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে বাতশোণিতনিদানং নাম শোডশোঽধ্যাযঃ সমাপ্তঃ|| ১৬||