15. vātavyādhinidānadhyāyaḥ

Adhikarana adhyAyopakramaH · Śloka

কুষ্ঠনিদানাদনন্তরং বাতব্যাধিনিদানমারভ্যতে, বাতরোগাণাং কুষ্ঠবদ্বহুপ্রকারত্বাদ্বিবিধদুঃখদাযিত্বাচ্চ| ইত্যত আহ -

Adhikarana vAtavyAdhinidAnAdhyAyaH, sarvArthAnarthakaraNe vAyuH kAraNam (2-1) · Śloka 1

অথাতো বাতব্যাধিনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২| সর্বার্থানর্থকরণে বিশ্বস্যাস্যৈককারণম্| অদুষ্টদুষ্টঃ পবনঃ, শরীরস্য বিশেষতঃ||১||

স০-অর্থাশ্চানর্থাশ্চার্থানর্থাঃ-শুভাশুভাঃ| সর্বে চ তেঽর্থানর্থাশ্চ সর্বার্থানর্থাঃ, তেষাং করণং-নিবৃত্তিঃ, তস্মিন্| অস্য বিশ্বস্য-জগতঃ, একং-প্রধানং, কারণং বাতঃ| কিম্ভূতঃ ? অদুষ্টদুষ্টঃ, যথাক্রমম্,-অদুষ্টঃ সর্বার্থকরণে-জগত্স্থিতিলক্ষণে, বাযুঃ প্রধানং কারণম্| সর্বানর্থকরণে-জগদ্বিনাশলক্ষণে, দুষ্টঃ পবনঃ প্রধানো হেতুঃ| শরীরস্য পুনর্বিশেষতঃ-অতিশযেন, অর্থানর্থকরণে প্রধানং কারণমিতি শেষঃ| পঞ্চধাত্বং গতেন প্রাণাদিতযা শরীরজননাদ্ধারণাচ্চ| অতস্তদদুষ্টৌ যতিতব্যমিতি সম্বন্ধঃ|

Adhikarana vAyoH svarUpam (2-3) · Śloka 3

কথং বাযুঃ কারণমিত্যবগম্যতে ? ইত্যাহ - - - - স বিশ্বকর্মা বিশ্বাত্মা বিশ্বরূপঃ প্রজাপতিঃ| স্রষ্টা ধাতা বিভুর্বিষ্ণুঃ সংহর্তা মৃত্যুরন্তকঃ||২|| তদদুষ্টৌ প্রযত্নেন যতিতব্যমতঃ সদা| |৩|

স০-যতোঽসৌ বাযুর্বিশ্বকর্মা, বিশ্বানি-শরীরজননবর্ধনধারণভঞ্জনশোষণাদীন্যর্থানর্থকরণানি, কর্মাণি যস্য স বিশ্বকর্মা| কস্মাদ্বিশ্বকর্মা ? ইত্যাহ-বিশ্বাত্মা, বিশ্বেষাং-শুভাশুভানাং, আত্মা-হেতুঃ| হেত্বর্থোঽত্রাত্মশব্দঃ| ননু, বিশ্বাত্মেতি কথং জ্ঞাযতে ? ইত্যাহ-বিশ্বরূপ ইতি| যতো বিশ্বরূপং-বাহ্যাধ্যাত্মিকাখ্যং, যস্য স এবম্| তথা, প্রজাপতিঃ-প্রজানাং পালকঃ| তথা, স্রষ্টা-প্রকৃতত্বাদ্বিশ্বস্য| তথা, ধাতা-বিশ্বস্য ধারকঃ, তথা হি-বাহ্যো লোকো বাযুমণ্ডলেন ধার্যতে, সত্যলোকোঽপি প্রাণাপানাদিভিঃ| কস্মাদ্বিশ্বরূপঃ ? যস্মাদ্বিভুঃ, অতস্তদর্থানর্থকরণে প্রভুরিবেত্যর্থঃ| কস্মাত্প্রজাপতিঃ ? যস্মাদ্বিষ্ণুঃ,-ব্যাপী| "বিষ্ল্ড়্-ব্যাপ্তৌ" ইত্যস্যৌণাদিকে নুপ্রত্যযে বিষ্ণুশব্দঃ| সংহর্তা-বাহ্যাধ্যাত্মিকসর্গসংহরণাত্| মৃত্যুঃ-যমরূপঃ, তত্কার্যকরণাত্| তথা, অন্তকো-যমভট্টারক এব সাক্ষাত্| যতশ্চৈবমতস্তদদুষ্টৌ-তস্যাপ্রকোপে, সদা-সর্বকালং, যতিতব্যম্|

Adhikarana vAyoH karmanAmAdikaM sUtrasthAne uktam (3-4) · Śloka 4

| তস্যোক্তং দোষবিজ্ঞানে কর্ম প্রাকৃতবৈকৃতম্||৩|| সমাসাদ্ব্যাসতো দোষভেদীযে নাম ধাম চ| প্রত্যেকং পঞ্চধা চারো ব্যাপারশ্চ|৪|

স০-তস্য-পবনস্য, কর্মোক্তম্| ক্ব? দোষবিজ্ঞানে,-দোষবিজ্ঞানীযাধ্যাযে (হৃ. সূ. অ. ১১)| কিম্ভূতং কর্ম ? প্রাকৃতবৈকৃতম্| প্রাকৃতৌ ভবং প্রাকৃতং-স্বাভাবিকমুত্সাহোচ্ছ্বাসাদিলক্ষণম্| বৈকৃতং তু-"বৃদ্ধস্তু কুরুতেঽনিলঃ| কার্শ্যকার্ষ্যোষ্ণ" ইত্যাদিগ্রন্থনির্দিষ্টম্| এতত্সমাসাত্-সঙ্ক্ষেপতো, বাযোঃ কর্ম| ব্যাসতো-বিস্তরতঃ পুনঃ, দোষভেদীযে নাম ধাম চোক্তমিত্যনুবর্তনীযম্| প্রত্যেকং পঞ্চধা| একমেকং প্রতি প্রত্যেকং নাম ধাম চ| প্রাণাদিভেদেন নাম পঞ্চধা| ধাম-স্থানমপি, পঞ্চধা মূর্ধাদিভেদেন| প্রাণস্য মুর্ধা স্থানম্, "প্রাণোঽত্র মূর্ধগঃ" (হৃ. সূ. অ. ১২|৪) ইতি বচনাত্| তথা, "উরঃ স্থানমুদানস্য" ইতি| তথা, "ব্যানো হৃদি স্থিতঃ" ইতি| তথা, "সমানোঽগ্নিসমীপস্থঃ" ইতি| তথা, "অপানোঽপানগঃ" ইতি| তথা, চারোঽপি পঞ্চধা| চরণং-চারো গতিঃ| তথা চোক্তম্ (হৃ. সূ. অ. ১২|৪) -"প্রাণ উরঃকণ্ঠচরঃ" "উদানো নাসানাভিগলচরঃ" "ব্যানঃ কৃত্স্নদেহচরঃ" "সমানঃ কোষ্ঠচরঃ" "অপানো বস্তিমেঢ্রোরুগোচরঃ" ইতি| ব্যাপারোঽপি বাযোঃ প্রাণাদিভেদেন পঞ্চধা| তত্র প্রাণাস্য ব্যাপারো "বুদ্ধিহৃদযেন্দ্রিযচিত্তধৃক্" ইত্যাদিঃ, উদানস্য ব্যাপারো "বাক্প্রবৃত্তিঃ" ইত্যাদিঃ, ব্যানস্য ব্যাপারো "গত্যপক্ষেপণোত্ক্ষেপণাদিকঃ", সমানস্য ব্যাপারোঽন্নগ্রহণাদিকঃ, অপানস্য ব্যাপারঃ শুক্রার্তবাদীনাং নিষ্ক্রমণরূপত্বম্, এবং বিস্তরেণ দোষভেদীযে বাতঃ প্রাণাদিভেদেন পঞ্চধা নামাদিভিরুক্তঃ|

Adhikarana iha tu vaikRutaM karma (4-1) · Śloka 1

| ইহ বৈকৃতম্||৪|| তস্যোচ্যতে বিভাগেন সনিদানং সলক্ষণম্| |৫| |অসঙ্খ্যমপি সঙ্খ্যায যদশীত্যা পুরেরিতম্]||১||

স০-ইহ-অস্মিন্নধ্যাযে, তস্য-বাতস্য, বৈকৃতং কর্ম বিভাগেন-পৃথগ্রূপতযা, উচ্যতে| কিম্ভূতম্ ? সনিদানং সলক্ষণম্| সহ নিদানেন সনিদানম্| তথা, সহ লক্ষণেন সলক্ষণম্|

Adhikarana vAyukope kAraNam (5-6) · Śloka 6

বাযোশ্চোভযথাঽপি কোপঃ সম্ভবতি| তমিদানীং দর্শযন্নাহ - - - - | ধাতুক্ষযকরৈর্বাযুঃ কুপ্যত্যতিনিষেবিতৈঃ||৫|| চরন্ স্রোতঃসু রিক্তেষু ভৃশং তান্যেব পূরযন্| তেভ্যোঽন্যদোষপূর্ণেভ্যঃ প্রাপ্য বাঽঽবরণং বলী||৬||

স০-ধাতুক্ষযকরৈরাহারবিহারাদিভিরতিনিষেবিতৈঃ-অতিমাত্রসেবিতৈশ্চিরকালসেবিতৈশ্চ, পবনঃ কুপ্যতি| কিং কুর্বন্ ? স্রোতঃসু রিক্তেষু চরন্,-ধাতুক্ষযকরাতিসেবনাত্, যতস্তদানীং স্রোতসাং শূন্যতা ভবতি| তথাভূতেষু স্রোতঃসু প্রভঞ্জনস্তদন্তঃ প্রবিশংস্তান্যেব স্রোতাংসি রিক্তানি ভৃশং পূরযন্নেবং ধাতুক্ষযাত্ কুপ্যতি মরুত্| তথা তেভ্যঃ স্রোতোভ্যোঽন্যদোষপূর্ণেভ্য আবরণং প্রাপ্য বলী বাযুরেবং বা কুপ্যতি|

Adhikarana pakvAshaye kruddhasya lakShaNam (7-8) · Śloka 8

তত্র পক্বাশযে ক্রুদ্ধঃ শূলানাহান্ত্রকূজনম্| মলরোধাশ্মবর্ধ্মার্শস্ত্রিকপৃষ্ঠকটীগ্রহম্||৭|| করোত্যধরকাযে চ তাংস্তান্ কৃচ্ছ্রানুপদ্রবান্| |৮|

স০-এবমুভযথা বাযুঃ পক্বাশযে ক্রুদ্ধঃ শূলানাহাবন্ত্রকূজনাদীংশ্চ করোতি| তথা, অধরকাযে চ-শরীরস্যাধস্তাত্, তাংস্তান্-নানাবিধান্, উপদ্রবান্-ব্যাধীন্, কৃচ্ছ্রান্-কৃচ্ছ্রসাধ্যান্, করোতি| কাযস্যাধর ইতি পূর্বাপরেত্যাদিনা সমাসঃ|

Adhikarana AmAshaye kruddhasya lakShaNam (8-9) · Śloka 9

| আমাশযে তৃড্বমথুশ্বাসকাসবিসূচিকাঃ||৮|| কণ্ঠোপরোধমুদ্গারান্ ব্যাধীনূর্ধ্বং চ নাভিতঃ| |৯|

স০-আমাশযে ক্রুদ্ধস্তৃডাদীংস্তথাঽন্যানপ্যনুক্তান্ ব্যাধীন্নাভেরূর্ধ্বং-ঊর্ধ্বকাযে, করোতি|

Adhikarana shrotrAdiShu kruddhasya lakShaNam (9) · Śloka 9

| শ্রোত্রাদিষ্বিন্দ্রিযবধং|৯|

স০-শ্রোত্রাদিষু-ইন্দ্রিযাধারেষু, ক্রুদ্ধঃ ইন্দ্রিযাণাং বধং-বিনাশং, করোতি|

Adhikarana tvaci kruddhasya lakShaNam (9) · Śloka 9

| ত্বচি স্ফুটনরূক্ষতে||৯||

স০-ত্বচি ক্রুদ্ধস্তস্যাস্ত্বচঃ স্ফুটনং রূক্ষতাং চ করোতি|

Adhikarana rakte kruddhasya lakShaNam (10) · Śloka 10

রক্তে তীব্রা রুজঃ স্বাপং তাপং রাগং বিবর্ণতাম্| অরূংষ্যন্নস্য বিষ্টম্ভরুচিং কৃশতাং ভ্রমম্||১০||

স০-রক্তে ক্রুদ্ধস্তীব্র রুজস্তথা স্বাপাদীন্ করোতি|

Adhikarana mAMsamedasoH kruddhasya lakShaNam (11) · Śloka 11

মাংসমেদোগতো গ্রন্থীংস্তোদাঢ্যান্ কর্কশান্ শ্রমম্| গুর্বঙ্গং চাতিরুক্স্তব্ধং মুষ্টিদণ্ডহতোপমম্||১১||

স০-মাংসমেদোগতস্তত্রস্থঃ ক্রুদ্ধো গ্রন্থীংস্তোদাদিযুতাংস্তথা শ্রমাদীংশ্চ করোতি| সুশ্রুতে চাত্র বিশেষ উক্তঃ| তথা চ তদ্গ্রন্থঃ- (সু. নি. অ. ১|২৬) - কর্কশাংস্তোদবহুলান্ গ্রন্থীন্ মাংসসমাশ্রিতঃ| বাযুর্মেদোযুতঃ কুর্যাদ্গ্রন্থীন্ মন্দরুজোঽব্রণান্||" ইতি|

Adhikarana asthni kruddhasya lakShaNam (12) · Śloka 12

অস্থিস্থঃ সক্থিসন্ধ্যাস্থিশূলং তীব্রং বলক্ষযম্| |১২|

স০-অস্থিস্থঃ ক্রুদ্ধঃ সক্থিসন্ধ্যস্থিশূলং তীব্রং-দারুণং, বলক্ষযং চ করোতি|

Adhikarana majjAyAM kruddhasya lakShaNam (12) · Śloka 12

| মজ্জস্থোঽস্থিষু সৌষির্যমস্বপ্নং সন্ততাং রুজম্||১২||

স০-মজ্জস্থঃ ক্রুদ্ধোঽস্থিসৌষির্যাদীন্ করোতি|

Adhikarana shukre kruddhasya lakShaNam (13) · Śloka 13

শুক্রস্য শীঘ্রমুত্সর্গং সঙ্গং বিকৃতিমেব বা| তদ্বদ্গর্ভস্য শুক্রস্থঃ|১৩|

স০-শুক্রস্থঃ ক্রুদ্ধঃ শুক্রস্য শীঘ্রমুত্সর্গং সঙ্গাদীন্বা করোতি| তদ্বত্-তথৈব, গর্ভস্যাপি তথাভূতবীজোত্পন্নত্বাত্ শীঘ্রোত্সর্গাদীন্ করোতি|

Adhikarana sirAsu kruddhasya lakShaNam (13-14) · Śloka 14

| সিরাস্বাধ্মানরিক্ততে||১৩|| তত্স্থঃ| |১৪|

স০-তত্স্থঃ-সিরাস্থিতঃ, ক্রুদ্ধস্তাস্বেব সিরাস্বাধ্মানরিক্ততে করোতি|

Adhikarana snAvni kruddhasya lakShaNam (14) · Śloka 14

স্নাবস্থিতঃ কুর্যাদ্গৃধ্রস্যাযামকুব্জতাঃ| |১৪|

স০-স্নাবস্থিতঃ ক্রুদ্ধো গৃধ্রস্যাদীন্ করোতি|

Adhikarana sandhiShu kruddhasya lakShaNam (14-15) · Śloka 15

| বাতপূর্ণদৃতিস্পর্শং শোফং সন্ধিগতোঽনিলঃ||১৪|| প্রসারণাকুঞ্চনযোঃ প্রবৃত্তিং চ সবেদনাম্| |১৫|

স০-সন্ধিগতোঽনিলঃ ক্রুদ্ধঃ শোফং কুর্যাত্| কিম্ভূতম্ ? বাতপূর্ণদৃতিস্পর্শং-তত্তুল্যম্| তথা, প্রসারণ আকুঞ্চনে চ সবেদনাং প্রবৃত্তিং করোতি|

Adhikarana sarvA~gge kruddhasya lakShaNam (15-16) · Śloka 16

| সর্বাঙ্গসংশ্রযস্তোদভেদস্ফুরণভঞ্জনম্||১৫|| স্তম্ভনাক্ষেপণস্বাপসন্ধ্যাকুঞ্চনকম্পনম্| |১৬|

স০-সর্বাঙ্গসংশ্রযোঽনিলস্তত্রস্থঃ ক্রুদ্ধস্তোদাদীন্ করোতি|

Adhikarana AkShepakasya lakShaNam (16-17) · Śloka 17

| যদা তু ধমনীঃ সর্বাঃ ক্রুদ্ধোঽভ্যেতি মুহুর্মুহুঃ||১৬|| তদাঽঙ্গমাক্ষিপত্যেষ ব্যাধিরাক্ষেপকঃ স্মৃতঃ| |১৭|

স০-যদা তু সর্বা ধমনীর্বাযুঃ ক্রুদ্ধোঽভ্যেতি-আভিমুখ্যেনাগচ্ছতি, পুনঃপুনস্তদাঽঙ্গং-শরীরং, আক্ষিপতি-আক্রমতি, এষ বাতব্যাধিরাক্ষেপকঃ স্মৃতঃ|

Adhikarana apatantrakasya lakShaNam (17-20) · Śloka 20

অথাপতন্ত্রকং লক্ষযতি - - - - | অধঃ প্রতিহতো বাযুর্ব্রজন্নূর্ধ্বং হৃদাশ্রিতাঃ||১৭|| নাডীঃ প্রবিশ্য হৃদযং শিরঃ শঙ্খৌ চ পীডযন্| আক্ষিপেত্পরিতো গাত্রং ধনুর্বচ্চাস্য নামযেত্||১৮|| কৃচ্ছ্রাদুচ্ছ্বসিতি স্তব্ধস্রস্তমীলিতদৃক্ততঃ| কপোত ইব কৃজেচ্চ নিঃসংজ্ঞঃ সোঽপতন্ত্রকঃ||১৯|| স এব চাপতানাখ্যো মুক্তে তু মরুতা হৃদি| অশ্র্নুবীত মুহুঃ স্বাস্থ্যং মুহুরস্বাস্থ্যমাবৃতে||২০||

স০-অধঃ প্রতিহত ঊর্ধ্বং ব্রজন্ মারুতো হৃদাশ্রিতাঃ-হৃদযস্থাঃ, নাডীরন্তঃ প্রবিশ্য হৃদযং তথা শিরশ্চ শঙ্খৌ চ পীড্যন্, আক্ষিপেত্পরিতো গাত্রং-সমন্তাত্কাযমাক্ষিপেত্,-সংহরেত্| তথা, ধনুর্বচ্চাস্য-অপতন্ত্রকবতঃ, প্রকৃতত্বাদ্গাত্রং নামযেত্| তথা স পুমান্ কৃচ্ছ্রাদুচ্ছ্বসিতি-কথঞ্চিচ্ছ্বসিতি| দৃক্-চক্ষুরিন্দ্রিযাধিষ্ঠানং দৃক্শব্দেনেহ গৃহ্যতে| স্তব্ধা স্রস্তা মীলিতা চ দৃগ্যস্যাসৌ স্তব্ধস্রস্তমীলিতদৃক্| ততঃ-অনন্তরং, কপোত ইব কূজেত্-অব্যক্তং শব্দং বিদধ্যাত্| তথা, নিঃসংজ্ঞো-বিচেতনঃ সম্পদ্যতে| সঃ-এবংরূপো বাতব্যাধিঃ, অপতন্ত্রকাখ্যো ভণ্যতে| স এব চাপতানকসংজ্ঞো নিগদ্যতে| মুক্তে ত্বিত্যাদি| বাযুনাঽনাক্রান্তে হৃদযে ক্ষণং স্বাস্থ্যং প্রাপ্নুযাত্| মুহুরস্বাস্থ্যং-তেনাবৃতে হৃদ্যস্বাস্থ্যমশ্নুবীত|

Adhikarana apatAnakasya lakShaNam, apatantrakasya dushcikitsyatvam (21) · Śloka 21

গর্ভপাতসমুত্পন্নঃ শোণিতাতিস্রবোত্থিতঃ| অভিঘাতসমুত্থশ্চ দুশ্চিকিত্স্যতমো হি সঃ||২১||

স০-স চাকালগর্ভপাতাত্সমনন্তরং যোষিতাং প্রাযো জাযতে| কদাচিচ্ছোণিতাতিস্রবাত্ স্ত্রীণাং পুরুষাণাং চ, অভিঘাতাচ্চ স্যাত্| সঃ-অপতন্ত্রকো, গর্ভপাতসমুত্পন্নো দুশ্চিকিত্স্যঃ স্যাত্, শোণিতাতিস্রবোত্থিতো দুশ্চিকিত্স্যতরঃ, অভিঘাতসমুত্থো দুশ্চিকিত্স্যতমঃ|

Adhikarana antarAyAmasya lakShaNam (22-24) · Śloka 24

মন্যে সংস্তভ্য বাতোঽন্তরাযচ্ছন্ ধমনীর্যদা| ব্যাপ্নোতি সকলং দেহং জত্রুরাযম্যতে তদা||২২|| অন্তর্ধনুরিবাঙ্গং চ বেগৈঃ স্তম্ভং চ নেত্রযোঃ| করোতি জৃম্ভাং দশনং দশনানাং কফোদ্বমম্||২৩|| পার্শ্বযোর্বেদনাং বাক্যহনুপৃষ্ঠশিরোগ্রহম্| অন্তরাযাম ইত্যেষ|২৪|

স০-মন্যে দ্বে-গ্রীবাপার্শ্বাশ্রিতে নাড্যৌ, বাযুঃ সংস্তভ্য, অন্তরাযচ্ছন্ ধমনীর্যদা গৃহ্ণন্ সকলং দেহং ব্যাপ্নোতি তদা জত্রুরাযম্যতে-বক্রীক্রিযতে| জত্রুশব্দস্য পুংস্ত্বং লোকাশ্রযত্বাল্লিঙ্গস্যেতি| অন্তর্ধনুরিবাঙ্গং চ,-তথাঽন্তঃ-মুখতো ভাগাত্, অঙ্গং-শরীরং চ, ধনুরিবাযম্যত ইতি চার্থঃ| বেগৈঃ-বিচ্ছিদ্য পুনরুদ্ভবৈর্ভজ্যত ইব তুদ্যত ইব ইতি চ নানাব্যথারূপৈঃ| তথা স্তম্ভং চ নেত্রযোঃ করোতি| তথা জৃম্ভাম্| তথা, দশনানাং-দন্তানাং, দশনং-খাদনম্| দশনমিত্যত্র "দাম্নীশসযুযুজ" ইত্যাদৌ দংশেরনুনাসিকলোপনির্দেশো জ্ঞাপনার্থঃ, কৃতোঽন্যস্মিন্নপি প্রত্যযে লোপো ভবতীতি তেন ল্যুট্যপি ভবতি| দশনমিতি বচনাদত্র নলোপঃ| প্রাযিকং চৈতজ্জ্ঞাপকমিতি "হিতং কীটৈশ্চ দংশনম্" ইত্যপি ভবতি| তথা কফস্যোদ্বমনম্| তথা, পার্শ্বযোর্দ্বযোর্বেদনাং-শূলম্| তথা, বাক্যাদীনাং গ্রহং-স্তম্ভম্| ইত্যেষঃ-বাতব্যাধিঃ, অন্তরাযামসংজ্ঞোঽঙ্গস্যান্তরাযমনাত্-বক্রীকরণাত্, উচ্যত ইতি শেষঃ|

Adhikarana bahirAyAmasya lakShaNam (24-26) · Śloka 26

| বাহ্যাযামশ্চ তদ্বিধঃ||২৪|| দেহস্য বহিরাযামাত্ পৃষ্ঠতো নীযতে শিরঃ| উরশ্চোত্ক্ষিপ্যতে তত্র কন্ধরা চাবমৃদ্যতে||২৫|| দন্তেষ্বাস্যে চ বৈবর্ণ্যং প্রস্বেদঃ স্রস্তগাত্রতা| বাহ্যাযামং ধনুষ্কম্ভং ব্রুবতে বেগিনং চ তম্||২৬||

স০-বাহ্যাযামশ্চ তদ্বিধঃ-তাদৃশঃ| দেহস্য বহিরাযামাত্-অঙ্গস্য ধনুর্বদ্বহির্বক্রীকরণাত্, বহিরাযাম উচ্যত ইতি শেষঃ| তমেব প্রদর্শযিতুমাহ - পৃষ্ঠত ইত্যাদি| শিরঃ (পৃষ্ঠতঃ-) পৃষ্ঠাভিমুখং নীযতে| তথা, তত্র-বাহ্যাযামে, উরো-বক্ষঃ, উত্ক্ষিপ্যতে-উন্নতিং নীযতে| তথা, কন্ধরা-গ্রীবা চ, অবমৃদ্যতে-ক্ষুদ্যতে| তথা, দন্তেষু বক্ত্রে চ বৈবর্ণ্যং-প্রাকৃতাদ্বর্ণাদ্বর্ণান্তরাপত্তিঃ| তথা, প্রকর্ষেণ স্বেদঃ| তথা, স্রস্তগাত্রতা-শ্লথাঙ্গতা| তং-তথাভূতং বাতব্যাধিং, বাহ্যাযামং ধনুষ্কম্ভং চ ব্রুবতে| তমেব কেচিদ্বেগিনমিত্যাচক্ষতে|

Adhikarana vraNAyAmasya lakShaNam (27-28) · Śloka 28

অধুনা ব্রণাযামমাহ - - - - ব্রণং মর্মাশ্রিতং প্রাপ্য সমীরণসমীরণাত্| ব্যাযচ্ছন্তি তনুং দোষাঃ সর্বামাপাদমস্তকম্||২৭|| তৃষ্যতঃ পাণ্ডুগাত্রস্য ব্রণাযামঃ স বর্জিতঃ| |২৮|

স০-দোষা ব্রণং মর্মাশ্রিতং প্রাপ্যানন্তরং সমীরণস্য সমীরণাত্-প্রেরণাত্, সর্বাং তনুং-সকলং দেহমাপাদমস্তকং, ব্যাযচ্ছন্তি-বিশেষেণাক্রামন্তি| [ সঃ- ] এষ ব্রণাযামঃ, তৃষ্যতস্তথা পাণ্ডুগাত্রস্য নরস্য বর্জিতঃ, অসাধ্যত্বাত্|

Adhikarana AkShepakeShu gate vege svAsthyam (28) · Śloka 28

| গতে বেগে ভবেত্স্বাস্থ্যং সর্বেষ্বাক্ষেপকেষু চ||২৮||

স০-সর্বেষু চাক্ষেপকেষু- "যদা তু ধমনীঃ সর্বা" (শ্লো. ১৬) - ইত্যাদিগ্রন্থনির্দিষ্টেষু ব্রণাযামপর্যন্তেষু, বেগে গতে সতি-বেগানাং শান্তৌ সত্যাং, স্বাস্থ্যং ভবেত্-নান্যদা|

Adhikarana hanusraMsasya lakShaNam (29-30) · Śloka 30

জিহ্বাতিলেখনাচ্ছুষ্কভক্ষণাদভিঘাততঃ| কুপিতো হনুমূলস্থঃ স্রংসযিত্বাঽনিলো হনূ||২৯|| করোতি বিবৃতাস্যত্বমথবা সংবৃতাস্যতাম্| হনুস্রংসঃ স তেন স্যাত্কৃচ্ছ্রাচ্চর্বণভাষণাম্||৩০||

স০-জিহ্বাতিলেখনাদিভিঃ কুপিতো হন্বোর্মূলে স্থিতো বাযুর্হনূ স্রংসযিত্বা-স্থানাচ্চালযিত্বা, বিবৃতাস্যত্বং-প্রসারিতমুখত্বং, অথবা সংবৃতাস্যত্বং করোতি| সঃ-এবংভূতো, হনুস্রংস উচ্যতে| তেন চ-হনুস্রংসেন, কৃচ্ছ্রাত্-কথমপি, চর্বণং ভাষণং চ স্যাত্|

Adhikarana jihvAstambhasya lakShaNam (31) · Śloka 31

বাগ্বাহিনীসিরাসংস্থো জিহ্বাং স্তম্ভযতেঽনিলঃ| জিহ্বাস্তম্ভঃ স তেনান্নপানবাক্যেষ্বনীশতা||৩১||

স০-বাগ্বাহিনীসিরাসংস্থো বাযুর্জিহ্বাং স্তম্ভযতে| সঃ-এবংবিধো, জিহ্বাস্তম্ভ উচ্যতে| তেন-জিহ্বাস্তম্ভেন, অন্নপানবাক্যেষু অনীশতা-অসমর্থতা, ভবতি|

Adhikarana arditasya lakShaNam (32-37) · Śloka 37

শিরসা ভারহরণাদতিহাস্যপ্রভাষণাত্| উত্ত্রাসবক্ত্রক্ষবথোঃ খরকার্মুককর্ষণাত্||৩২|| বিষমাদুপধানাচ্চ কঠিনানাং চ চর্বণাত্| বাযুর্বিবৃদ্ধস্তৈস্তৈশ্চ বাতলৈরূর্ধ্বমাস্থিতঃ||৩৩|| বক্রীকরোতি বক্ত্রার্ধমুক্তং হসিতমীক্ষিতম্| ততোঽস্য কম্পতে মূর্দ্ধা বাক্সঙ্গঃ স্তব্ধনেত্রতা||৩৪|| দন্তচালঃ স্বরভ্রংশঃ শ্রুতিহানিঃ ক্ষবগ্রহঃ| গন্ধাজ্ঞানং স্মৃতের্মোহস্ত্রাসঃ সুপ্তস্য জাযতে||৩৫|| নিষ্ঠীবঃ পার্শ্বতো যাযাদেকস্যাক্ষ্ণো নিমীলনম্| জত্রোরূর্ধ্বং রুজা তীব্রা শরীরার্ধেঽধরেঽপি বা||৩৬|| তমাহুরর্দিতং কেচিদেকাযামমথাপরে| |৩৭|

স০-শিরোভারহরণাদিভির্বাযুর্বিবৃদ্ধো-বিশেষেণ বৃদ্ধিং গতঃ, তথা তৈস্তৈশ্চ বাতলৈঃ-সর্বরোগনিদানাদ্যুক্তৈঃ, ঊর্ধ্বমাত্স্থিতঃ-শরীরস্যোপরিভাগে আসমন্তাত্স্থিতো , বক্ত্রার্ধং বক্রীকরোতি| তথা, উক্তংহসিতমীক্ষিতং চ বক্রীকরোতি| তথা, উক্তং হসিতমীক্ষিতং চ বক্রীকরোতি| ততঃ-অনন্তরং, অস্য-নরস্য,মূর্ধা কম্পতে| তথা, বাক্সঙ্গো জাযতে| তথা, স্তব্ধনেত্রতাদযশ্চ| তথা, নিষ্ঠীবো-নিষ্ঠীবনং, পার্শ্বেন গচ্ছেত্| একস্য চাক্ষ্ণো নিমীলনং স্যাত্| জত্রোরূর্ধ্বং তীব্রা রুজা-দারুণা পীডা, ভবতি| শরীরার্ধেঽধরেঽপি বা-অধস্তাদ্বা, তং-ঈদৃশং বাতব্যাধিং, কেচিদর্দিতমাহুঃ, অপরে তন্ত্রকৃত একাযামং বদন্তি|

Adhikarana sirAgrahasya lakShaNam (37-38) · Śloka 38

| রক্তমাশ্রিত্য পবনঃ কুর্যান্মূর্দ্ধধরাঃ সিরাঃ||৩৭|| রূক্ষাঃ সবেদনাঃ কৃষ্ণাঃ সোঽসাধ্যঃ স্যাত্সিরাগ্রহঃ| |৩৮|

স০-পবনো রক্তমাশ্রিত্য-শ্রযিত্বা, মূর্দ্ধাশ্রিতাঃ সিরা রূক্ষাদিগুণযুক্তাঃ কুর্যাত্| স সিরাগ্রহ উচ্যতে| স চাসাধ্যঃ|

Adhikarana pakShavadhasya lakShaNam (38-40) · Śloka 40

| গৃহীত্বাঽর্ধং তনোর্বাযুঃ সিরাঃ স্নাযূর্বিশোষ্য চ||৩৮|| পক্ষমন্যতরং হন্তি সন্ধিবন্ধান্ বিমোক্ষযন্| কৃত্স্নোঽর্ধকাযস্তস্য স্যাদকর্মণ্যো বিচেতনঃ||৩৯|| একাঙ্গরোগং তং কেচিদন্যে পক্ষবধং বিদুঃ| |৪০|

স০-বাযুস্তনোঃ-শরীরস্য, অর্ধং গৃহীত্বা সিরাঃ স্নাযূশ্চ বিশোষ্য ততোঽন্যতরং-বামং দক্ষিণং বা, পক্ষং হন্তি| কিং কুর্বন্ ? সন্ধীনাং বন্ধান্ বিমোক্ষযন্-বিঘট্টযন্| তস্যৈব চ-ব্যাধিমতঃ, কৃত্স্নঃ-সর্বোঽর্ধকাযঃ, অকর্মণ্যঃ-ক্রিযাযামশক্তো, বিচেতনশ্চ স্যাত্| তং-ঈদৃশং বাতব্যাধিং, কেচিদেকাঙ্গরোগং বদন্তি, অন্যে পক্ষবধমিত্যাহুঃ| অর্ধকায ইতি "অর্ধং নপুংসকম্" ইতি সমাসঃ|

Adhikarana sarvA~ggarogasya lakShaNam (40) · Śloka 40

| সর্বাঙ্গরোগং তদ্বচ্চ সর্বকাযাশ্রিতেঽনিলে||৪০||

স০-সর্বকাযাশ্রিতে বাযৌ তেন-পূর্বোক্তেনৈকাঙ্গরোগোক্তেন লক্ষণেন, তুল্যং বর্ততে তদ্বত্, সর্বাঙ্গরোগমিত্যাহুঃ|

Adhikarana pakShavadhasya kRucchrasAdhyAsAdhyatvam (41) · Śloka 41

শুদ্ধবাতহতঃ পক্ষঃ কৃচ্ছ্রসাধ্যতমো মতঃ| কৃচ্ছ্রস্ত্বন্যেন সংসৃষ্টো বিবর্জ্যঃ ক্ষযহেতুকঃ||৪১||

স০-শুদ্ধবাতেন হতঃ পক্ষঃ-একাঙ্গরোগঃ কৃচ্ছ্রসাধ্যতমো মতঃ-অতিশযেন কৃচ্ছ্রসাধ্যঃ| অন্যেন সংযুক্তো বাতঃ কৃচ্ছ্রঃ-কৃচ্ছ্রসাধ্যঃ| ক্ষযহেতুকঃ পক্ষো বিবর্জ্যো-নোপক্রম্যঃ, অসাধ্যত্বাত্|

Adhikarana daNDakasya lakShaNam (42) · Śloka 42

আমবদ্ধাযনঃ কুর্যাত্সংস্তভ্যাঙ্গং কফান্বিতঃ| অসাধ্যং হতসর্বেহং দণ্ডবদ্দণ্ডকং মরুত্||৪২||

স০-আমেন বদ্ধানি-স্থগিতানি, অযনানি-দ্বারাণি প্রকৃতত্বাত্ স্রোতসাং, যেন স আমবদ্ধাযনঃ, কফান্বিতো মারুতোঙ্গং সংস্তভ্য-স্তম্ভযিত্বা দণ্ডবত্ দণ্ডকাখ্যং বাতব্যাধিবিশেষং কুর্যাত্| তমসাধ্যম্| তথা হতাঃ সর্বা ঈহাঃ-চেষ্টাঃ, যস্মিংস্তমেবংভূতম্|

Adhikarana avabAhukasya lakShaNam (43) · Śloka 43

অংসমূলস্থিতো বাযুঃ সিরাঃ সঙ্কোচ্য তত্রগাঃ| বাহুপ্রস্পন্দিতহরং জনযত্যববাহুকম্||৪৩||

স০-বাযুরংসমূলে স্থিতঃ, তত্রগাঃ-অংসমূলাশ্রিতাঃ, সিরাঃ সঙ্কোচ্যাববাহুকাখ্যং বাতব্যাধিং জনযতি| কিম্ভূতম্ ? বাহুপ্রস্পন্দিতং হরতীতি বাহুপ্রস্পন্দিতহরম্, " হরতেরনুদ্যমনেঽচ্" ইত্যচ্|

Adhikarana vishvAcyAH lakShaNam (44) · Śloka 44

তলং প্রত্যঙ্গুলীনাং যা কণ্ডরা বাহুপৃষ্ঠতঃ| বাহুচেষ্টাপহরণী বিশ্বাচী নাম সা স্মৃতা||৪৪||

স০-তলং-হস্ততলং, প্রতি-লক্ষণী (লক্ষ্যী) কৃত্য, যা কণ্ডরা-সুমহান্ স্নাযুসঙ্ঘাতঃ, সা বাহুপৃষ্ঠতো গতা, তথা মারুতার্দিতা-বাতেন পীডীতা সতী, বাহুচেষ্টাং-ভুজব্যাপারং, অপহরতি [ ইতি ] বাহুচেষ্টাপহরণী| বাহুলকাদত্র কর্তরী ল্যুট্ স্ত্রীত্বং চ| এবংভূতা বিশ্বাচী সংজ্ঞা স্মৃতা, মুনিভিরিতি শেষঃ|

Adhikarana kha~jjasya lakShaNam, pa~ggoH lakShaNam (45) · Śloka 45

বাযুঃ কট্যাং স্থিতঃ সক্থ্নঃ কণ্ডরামাক্ষিপেদ্যদা| তদা খঞ্জো ভবেজ্জন্তুঃ পঙ্গুঃ সক্থ্নোর্দ্বযোরপি||৪৫||

স০-কট্যাং স্থিতো মারুতো যদা সক্থ্নঃ-ঊরোঃ সম্বন্ধিনীং, কণ্ডরামাক্ষিপেত্-আকর্ষেত্, তদা প্রাণী খঞ্জো ভবেত্| দ্বযোরপি সক্থ্নোঃ সম্বন্ধিনীং কণ্ডরাং যদাঽঽক্ষিপেত্তদা পঙ্গুঃ স্যাত্|

Adhikarana kalAyakha~jjasya lakShaNam (46) · Śloka 46

কম্পতে গমনারম্ভে খঞ্জন্নিব চ যাতি যঃ| কলাযখঞ্জং তং বিদ্যান্মুক্তসন্ধিপ্রবন্ধনম্||৪৬||

স০-তথা যো গমনারম্ভে কম্পতে-বেপতে, খঞ্জন্নিব চ যাতি| তং-এবংভূতং, কলাযখঞ্জাখ্যং ব্যাধিং বিদ্যাত্| কিম্ভূতম্ ? মুক্তং সন্ধিপ্রবন্ধনং যত্র, তং তথাবিধম্|

Adhikarana UrUstambhasya lakShaNam (47-51) · Śloka 51

শীতোষ্ণদ্রবসংশুষ্কগুরুস্নিগ্ধৈর্নিষেবিতৈঃ| জীর্ণাজীর্ণে তথাঽঽযাসসঙ্ক্ষোভস্বপ্নজাগরৈঃ||৪৭|| সশ্লেষ্মমেদঃপবনমামমত্যর্থসঞ্চিতম্| অভিভূযেতরং দোষমূরু চেত্প্রতিপদ্যতে||৪৮|| সক্থ্যস্থীনি প্রপূর্যান্তঃ শ্লেষ্মণা স্তিমিতেন তত্| তদা স্কভ্নাতি তেনোরূ স্তব্ধৌ শীতাবচেতনৌ||৪৯|| পরকীযাবিব গুরূ স্যাতামতিভৃশব্যথৌ| ধ্যানাঙ্গমর্দস্তৈমিত্যতন্দ্রাচ্ছর্দ্যরুচিজ্বরৈঃ||৫০|| সংযুতৌ পাদসদনকৃচ্ছ্রোদ্ধরণসুপ্তিভিঃ| তমূরুস্তম্ভমিত্যাহুরাঢ্যবাতমথাপরে||৫১||

স০-জীর্ণেন সহিতমজীর্ণং জীর্ণাজীর্ণং-পক্বাপক্বমাহারকদম্বকং, কেনচিন্নিমিত্তেন জাঠরাগ্নিসংযোগাদাহাররাশেঃ কশ্চিদ্ভাগঃ পক্বঃ কশ্চিদপক্ব ইতি জীর্ণাজীর্ণম্, তস্মিন্সতি| শীতোষ্ণাদিভিস্তথাঽঽযাসসঙ্ক্ষোভাদিভির্নিষেবিতৈঃ-চিরমভ্যস্তৈঃ, আমমত্যর্থং সঞ্চিতং-বহু সম্ভৃতং, ঊরু যদা প্রতিপদ্যতে-উভাবাশ্রিত্যাস্তে, তদা-তস্মিন্কাযে, তেন-যথোক্তেন হেতুনা, তাবূরু স্কভ্নাতি-স্তম্ভযতি| কিম্ভূতমামম্ ? সশ্লেষ্মমেদঃপবনম্| সহ শ্লেষ্মণা মেদসা পবনেন চ বর্তত ইতি সশ্লেষ্মমেদঃপবনম্, ন তু কেবলমেব| তথা, ইতরং দোষং-বাতশ্লেষ্মাপেক্ষযা পিত্তাখ্যং, অভিভূয-আক্রম্য, ন বাতং কফং বা| তেন হি তযোরভিভবো ন যুক্তঃ, তত্সহবর্তমানত্বাত্| তথা, তেন সহবর্তমানেনাপি শ্লেষ্মণা চ স্তিমিতেন-স্ত্যানেন, সক্থিসম্বন্ধীন্যস্থীন্যন্তঃ প্রপূর্য-তানি নির্ভরাণি কৃত্বা, তদা তত্-আমং, ঊরু স্কভ্নাতীতি যোজ্যম্| তেন হেতুনা তদা-তস্মিন্কালে, তাবূরু স্তব্ধৌ-নিশ্চলৌ, তথা স্পর্শতঃ শীতৌ, তথাঽচেতনৌ-সূচ্যাদিভিস্তুদ্যমানাবপি পীডাং ন বেদযেতাম্, অত এব পরকীযাবিব গুরু স্যাতাম্| তথাঽতিভৃশব্যথৌ-অত্যন্তশূলান্বিতৌ| পরকীযাবিতি "কুগ্জনস্য পরস্য চ" ইতি ঈযঃ কুগাগমশ্চ| তথা ধ্যানাদিভিঃ সংযুতৌ| ধ্যানং-চিন্তা দৌর্মনস্যমিত্যর্থঃ| তথা পাদসদনাদিভিঃ সংযুতৌ| এবংলক্ষণো যো ব্যাধিবিশেষস্তমূরুস্তম্ভমাহুঃ, তন্ত্রকৃত ইতি শেষঃ| অপরে আচার্যা আঢ্যবাতমিতি তমাহুঃ| আমশব্দস্য নপুংসকত্বং লোকাশ্রযত্বাল্লিঙ্গস্যেতি বোধ্যম্|

Adhikarana kroShTukashIrShasya lakShaNam (52) · Śloka 52

বাতশোণিতজঃ শোফো জানুমধ্যে মহারুজঃ| জ্ঞেযঃ ক্রোষ্টুকশীর্ষশ্চ স্থূলঃ ক্রোষ্টুকশীর্ষবত্||৫২||

স০-জানুমধ্যে মহারুজঃ শোফো বাতশোণিতাজ্জাতঃ ক্রোষ্টুকশীর্ষাখ্যো বাতব্যাধিভেদঃ| স চ স্থূলঃ শৃগালশিরঃসদৃশো ভবতি|

Adhikarana vAtakaNTakasya lakShaNam (53) · Śloka 53

রুক্ পাদে বিষমন্যস্তে শ্রমাদ্বা জাযতে যদা| বাতেন গুল্ফমাশ্রিত্য তমাহুর্বাতকণ্টকম্||৫৩||

স০-পাদে-চরণে বিষমন্যস্তে সতি, অথবা শ্রমেণ যদা গুল্ফমাশ্রিত্য বাতেন রুগ্জাযতে, তং বাতকণ্টকাখ্যং বাতব্যাধিমাহুঃ|

Adhikarana gRudhrasyAH lakShaNam (54) · Śloka 54

পার্ষ্ণিং প্রত্যঙ্গুলীনাং যা কণ্ডরা মারুতার্দিতা| সক্থ্যুত্ক্ষেপং নিগৃহ্ণাতি গৃধ্রসীং তাং প্রচক্ষতে||৫৪||

স০-পার্ষ্ণিং প্রতি-পার্ষ্ণ্যভিমুখং, যা অঙ্গুলীনাং কণ্ডরা সা মারুতেন-বাযুনা, অর্দিতা-ব্যথিতা, চরণোদ্ধরণাবসরে যঃ সক্থ্যুত্ক্ষেপঃ-ঊর্ধ্বং প্রেরণং, তং নিগৃহ্ণাতি-অবমৃদ্গাতি সক্থ্নোর্নিশ্চলত্বমিবোত্পাদযতি| তাং-কণ্ডরাং, ব্যাধিবিশেষসংজ্ঞাং গৃধ্রসীং প্রচক্ষতে, তন্ত্রকৃত ইতি শেষঃ|

Adhikarana khalyAH lakShaNam (55) · Śloka 55

বিশ্বাচী গৃধ্রসী চোক্তা খল্লী তীব্ররুজান্বিতে| |৫৫|

স০-বিশ্বাচী চোক্তা "বাহুচেষ্টাপহরণী" (শ্লো. ৪৪) ইত্যাদিনা গ্রন্থেন, গৃধ্রসী চাধুনৈবোক্তা| তে দ্বে তীব্ররুজান্বিতে সত্যৌ খল্লী ভণ্যতে|

Adhikarana pAdaharShasya lakShaNam (55-56) · Śloka 56

| হৃষ্যেতে চরণৌ যস্য ভবেতাং চ প্রসুপ্তবত্||৫৫|| পাদহর্ষঃ স বিজ্ঞেযঃ কফমারুতকোপজঃ| |৫৬|

স০-যস্য পুংসশ্চরণৌ হৃষ্যেতে প্রসুপ্তাবিব চ স্যাতাম্, সঃ-এবংভূতো বাতব্যাধিঃ, পাদহর্ষাখ্যঃ| স চ বাতশ্লেষ্মকোপজো বেদ্যঃ|

Adhikarana pAdadAhasya lakShaNam (15) · Śloka 15

পাদযোঃ কুরুতে দাহং পিত্তাসৃক্সহিতোঽনিলঃ||৫৬|| বিশেষতশ্চঙ্ক্রমিতে পাদদাহং তমাদিশেত্| ৫৬ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে বাতব্যাধিনিদানং নাম পঞ্চদশোঽধ্যাযঃ||১৫||

স০-অনিলঃ পিত্তরক্তসহিতঃ পাদযোর্দাহং কুরুতে, বিশেষেণ তু চঙ্ক্রমিতে সতি| তং-এবংভূতং, পাদদাহমাদিশেত্-ব্রূযাত্, ভিষগিতি শেষঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে বাতব্যাধিনিদানং নাম পঞ্চদশোঽধ্যাযঃ সমাপ্তঃ|| ১৫||