11. vidradhivr̥ddhigulmanidānādhyāyaḥ

Adhikarana adhyAyopakramaH · Śloka

প্রমেহনিদানাদনন্তরং বিদ্রধিনিদানারম্ভঃ, যতোঽনন্তরেঽধ্যাযে পিটিকালক্ষণাবসরে "বিদ্রধির্বক্ষ্যতে" (শ্লো. ৩৪) ইত্যুক্তম্|

Adhikarana vidradhivRuddhigulmanidAnAdhyAyaH, vidradhernidAnam, vidradhiH ShaDvidhaH (2-3) · Śloka 3

অতস্তমেব বিদ্রধিং লক্ষযিতুমস্যাধ্যাযস্য প্রসঙ্গ ইত্যাহ - - - - অথাতো বিদ্রধিবৃদ্ধিগুল্মনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২|| ভুক্তৈঃ পর্যুষিতাত্যুষ্ণরূক্ষশুষ্কবিদাহিভিঃ| জিহ্মশয্যাবিচেষ্টাভিস্তৈস্তৈশ্চাসৃক্প্রদূষণৈঃ||১|| দুষ্টত্বঙ্মাংসমেদোস্থিস্নায্বসৃক্কণ্ডরাশ্রযঃ| যঃ শোফো বহিরন্তর্বা মহামূলো মহারুজঃ||২|| ষোঢেত্যুক্তম্| অথ তদেব ষোঢত্বং প্রতিপাদযিতুমাহ - - - - বৃত্তঃ স্যাদাযতো যো বা স্মৃতঃ ষোঢা স বিদ্রধিঃ| দোষৈঃ পৃথক্সমুদিতৈঃ শোণিতেন ক্ষতেন চ||৩||

স০-পর্যুষিতাদিভির্ভুক্তৈঃ, তথা জিহ্মশয্যাবিচেষ্টাভিঃ, বিবিধাশ্চেষ্টা বিচেষ্টাঃ, শয্যা চ বিচেষ্টাশ্চ শয্যাবিচেষ্টাঃ, জিহ্মাশ্চ তাঃ শয্যাবিচেষ্টাশ্চ, তাভিঃ| জিহ্মাঃ কুটিলা বক্রা ইতি পর্যাযাঃ| তথা তৈস্তৈঃ-তত্রতত্রাসৃক্প্রদূষণৈশ্চ নির্দিষ্টৈঃ, যঃ শোফো জাযতে দুষ্টত্বগাদ্যাশ্রযো বহিঃ-বহির্ভাগে, অন্তঃ-অন্তর্ভাগে বা, স শীঘ্রবিদাহিত্বাচ্ছোফঃ ষোঢা-ষট্প্রকারো, বিদ্রধিঃ স্মৃতঃ-অভিহিতঃ| শোফশব্দঃ পৃষোদরাদিত্বাত্সাধুঃ| ত্বক্ চ মাংসং চ মেদশ্চ অস্থি চ স্নাযুশ্চাসৃক্ চ কণ্ডরা চ, তা এবম্| "সুমহান্ স্নাযুসঙ্ঘাতঃ কণ্ডরেত্যভিধীযতে|" দুষ্টাঃ-দোষৈর্দূষিতাঃ, ত্বঙ্মাংসাদয আধারো যস্য স দুষ্টত্বঙ্মাংসমেদোস্থিস্নায্বসৃক্কণ্ডরাশ্রযঃ| তথা, মহমূলস্তথা মহারুজঃ, অনেনাস্য দুরুপক্রমত্বমুক্তম্| তথা, বৃত্তঃ স্যাত্, অথবা আযতো-ন বর্তুলঃ, ইত্যনেনাস্য সংস্থানমুক্তম্| স০-পৃথগ্দোষৈঃ-বাতপিত্তকফৈস্ত্রযঃ, সমুদিতৈঃ-সন্নিপাতেন চৈকঃ, তথা শোণিতেন-দোষাধিষ্ঠিতেন, ক্ষতেন-শস্ত্রাদিঘাতাদিনা, চেতি|

Adhikarana sa punarbahirantarbhedena dvidhA, bAhyAntarayorlakShaNam (4-5) · Śloka 5

ষড্বিধস্যাপি শোফস্য বিদ্রধ্যাখ্যস্যান্তর্বহীরূপতযা দ্বিধাত্বমিত্যাহ - - - - বাহ্যোঽত্র তত্রতত্রাঙ্গে দারুণো গ্রথিতোন্নতঃ| আন্তরো দারুণতরো গম্ভীরো গুল্মবদ্ধনঃ||৪|| বল্মীকবত্সমুচ্ছ্রাযী শীঘ্রঘাত্যগ্নিশস্ত্রবত্| |৫|

স০-অত্র-অনযোর্বাহ্যাভ্যন্তরভেদভিন্নযোর্বিদ্রধ্যোর্মধ্যাত্, বাহ্যো বিদ্রধিস্তত্রতত্র-নাভ্যাদাবঙ্গে, জাযতে| তথা, দারুণো গ্রথিতোন্নতঃ| গ্রথিত ইব গ্রথিতঃ| উন্নতঃ-উত্তুণ্ডিতঃ| শোফস্য স্বভাবোন্নতত্বাদুন্নতগ্রহণমতিশযার্থম্| আন্তরো দারুণতরঃ তথা, গম্ভীরঃ-অন্তর্নিগূঢঃ| তথা, গুল্মবদ্ধনো-গুল্মেন তুল্যঃ| তথা, সমুচ্ছ্রাযী-উন্নতো বল্মীকশিখরবত্| তথা, শীঘ্রঘাতী-বাহ্যবিদ্রধিতঃ শীঘ্রব্যাপাদকঃ| অগ্নিশস্ত্রবত্-অগ্নিশস্ত্রাভ্যাং তুল্যঃ|

Adhikarana vidradheH sthAnAni (5-6) · Śloka 6

| নাভিবস্তিযকৃত্প্লীহক্লোমহৃত্কুক্ষিবঙ্ক্ষণে||৫|| স্যাদ্বৃক্কযোরপানে চ| |৬|

স০-নাভ্যাদ্যন্যতমে দেশে চাযং স্যাত্|

Adhikarana vAtajasya lakShaNam (6-7) · Śloka 7

বাতাত্তত্রাতিতীব্ররুক্| শ্যাবারুণশ্চিরোত্থানপাকো বিষমসংস্থিতঃ||৬|| ব্যধচ্ছেদভ্রমানাহস্পন্দসর্পণশব্দবান্| |৭|

স০-তত্র-তেষু বিদ্রধিষু মধ্যে, বাতাত্তীব্ররুগাদিঃ শব্দবানিত্যেতদন্তলক্ষণঃ স্যাত্|

Adhikarana pittajasya lakShaNam (7-8) · Śloka 8

| রক্ততাম্রাসিতঃ পিত্তাত্তৃণ্মোহজ্বরদাহবান্||৭|| ক্ষিপ্রোত্থানপ্রপাকশ্চ| |৮|

স০-পিত্তাদ্রক্ততাম্রাসিতাদিকঃ ক্ষিপ্রোত্থানপ্রপাকশ্চেত্যন্তলক্ষণঃ স্যাত্|

Adhikarana kaphajasya lakShaNam (8-9) · Śloka 9

পাণ্ডুঃ কণ্ডূযুতঃ কফাত্| সোত্ক্লেশশীতকস্তম্ভজৃম্ভারোচকগৌরবঃ||৮|| চিরোত্থানবিপাকশ্চ| |৯|

স০-কফাত্ পাণ্ডুঃ-বর্ণেন| তথা, কণ্ডূযুত ইত্যাদিচিরোত্থানবিপাকশ্চেত্যন্তলক্ষণঃ স্যাত্|

Adhikarana sannipAtajasya lakShaNam (9) · Śloka 9

সঙ্কীর্ণঃ সন্নিপাততঃ| |৯|

স০-সন্নিপাতজো বিদ্রধিঃ সঙ্কীর্ণো-বাতাদিদোষব্যামিশ্রলক্ষণঃ|

Adhikarana raktajasya lakShaNam (9-10) · Śloka 10

| সামর্থ্যাচ্চাত্র বিভজেদ্বাহ্যাভ্যন্তরলক্ষণম্||৯|| কৃষ্ণস্ফোটাবৃতঃ শ্যাবস্তীব্রদাহরুজাজ্বরঃ| পিত্তলিঙ্গোঽসৃজা বাহ্যঃ স্ত্রীণামেব তথাঽঽন্তরঃ||১০||

স০-অত্র-বিদ্রধৌ, পূর্বোক্তাদ্দারুণাদ্দা(ণদা)রুণতরত্বাদিলক্ষণাত্-সামর্থ্যাত্, বাহ্যাভ্যন্তরলক্ষণং বিভজেত্-বাহ্যস্য বিদ্রধেস্তথাঽঽভ্যন্তরস্য চ লক্ষণং বদেত্| স০-রক্তেন বিদ্রধিঃ কৃষ্ণস্ফোটৈরাবৃতঃ-চিতো, যাবত্তীব্রদাহরুজাজ্বরঃ| তথা পিত্তলিঙ্গো-"রক্ততাম্রাসিতঃ" (শ্লো. ৭) ইত্যাদিলক্ষণঃ স চ বাহ্যো-বাহ্য এব নান্তরো নরাণাম্, বস্তুস্বাভাব্যাত্| আন্তরো যো বিদ্রধিরসৃজা জাযতে, স স্ত্রীণামেব-ন নরাণাম্, বস্তুস্বাভাব্যাত্|

Adhikarana kShatajasya lakShaNam (11-12) · Śloka 12

অথ ক্ষতবিদ্রধিং লক্ষযতি - - - - শস্ত্রাদ্যৈরভিঘাতেন ক্ষতে বাঽপথ্যকারিণঃ| ক্ষতোষ্মা বাযুবিক্ষিপ্তঃ সরক্তং পিত্তমীরযন্||১১|| পিত্তাসৃগ্লক্ষণং কুর্যাদ্বিদ্রধিং ভূর্যুপদ্রবম্| |১২|

স০-শস্ত্রলোষ্টাদ্যৈর্যোঽভিঘাতস্তেন হেতুনা যঃ ক্ষতোষ্মা, অথবাঽভিঘাতমন্তরেণাপি ব্রণাদ্যুদ্ভবাত্ ক্ষতে জাতে সত্যপথ্যকারিণঃ পুংসো যঃ ক্ষতোষ্মা-অগ্নিঃ, স বাযুনা বিক্ষিপ্তঃ পিত্তমীরযন্-কোপযন্| কিম্ভূতং পিত্তম্ ? সরক্তম্| তথা, পিত্তাসৃগ্ভ্যামুত্পন্নযোর্বিদ্রধ্যোর্যল্লক্ষণং তত্সমানলক্ষণং বিদ্রধিং কুর্যাত্| তথা, ভূর্যুপদ্রবম্| ইযানেব চাস্য বিশেষঃ, পিত্তাসৃগ্বিদ্রধ্যোঃ সকাশাত্|

Adhikarana vidradhInAM sthAnabhedenopadravAH (12-16) · Śloka 16

| তেষূপদ্রবভেদশ্চ স্মৃতোঽধিষ্ঠানভেদতঃ||১২|| তমেবোপদ্রবভেদং দর্শযতি - - - - নাভ্যাং হিধ্মা, ভবেদ্বস্তৌ মূত্রং কৃচ্ছ্রেণ পূতি চ| শ্বাসো যকৃতি, রোধস্তু প্লীহ্ন্যুচ্ছ্বাসস্য, তৃট্ পুনঃ||১৩|| গলগ্রহশ্চ ক্লোম্নি, স্যাত্সর্বাঙ্গপ্রগ্রহো হৃদি| প্রমোহস্তমকঃ কাসো হৃদযে ঘট্টনং ব্যথা||১৪|| কুক্ষিপার্শ্বান্তরাংসার্তিঃ কুক্ষাবাটোপজন্ম চ| সক্থ্নোর্গ্রহো বঙ্ক্ষণযোর্বৃক্কযোঃ কটিপৃষ্ঠযোঃ||১৫|| পার্শ্বযোশ্চ ব্যথা পাযৌ পবনস্য নিরোধনম্| |১৬|

স০-তেষু-বিদ্রধিষু, উপদ্রববিশেষোঽধিষ্ঠানবিশেষাদ্ভবতি| স০-নাভ্যাং জাতে বিদ্রধৌ হিধ্মা বিশেষেণ ভবেত্| বস্তৌ জাতে মূত্রং পূতি কৃচ্ছ্রেণ চ ভবেত্| যকৃতি জাতে শ্বাসঃ স্যাত্| প্লীহ্নি জাত উচ্ছ্বাসস্য রোধঃ| ক্লোম্নি জাতে গলগ্রহ ইব গলগ্রহো ব্যাধিবিশেষঃ স্যাত্তৃষ্ণা চ| হৃদি জাতে সর্বস্যাঙ্গস্য প্রকর্ষেণ গ্রহঃ স্যাত্| তথা, প্রমোহাদযঃ স্যুঃ| তমকঃ-শ্বাসবিশেষঃ| হৃদযে ঘট্টনং ব্যথা চ| কুক্ষৌ জাতে সতি কুক্ষিপার্শ্বযোরন্তরেংঽসযোশ্চ পীডা ভবতি, তথা কুক্ষাবাটোপসম্ভবঃ| বঙ্ক্ষণযোর্জাতে সক্থ্নোর্গ্রহো নিশ্চল ইব সক্থিনী জাযেতে| বৃক্কযোর্জাতে কট্যাঃ পৃষ্ঠস্য চ গ্রহঃ, পীডা চ পার্শ্বযোঃ স্যাত্| পাযৌ-গুদে জাতে, পবনস্য-অপানাখ্যস্য বাযোঃ, নিরোধঃ স্যাত্|

Adhikarana vidradhInAM Amapakvavidagdhatvam (16) · Śloka 16

| আমপক্ববিদগ্ধত্বং তেষাং শোফবদাদিশেত্||১৬||

স০-তেষাং-বিদ্রধীনাং, আমত্বং পক্বত্বং বিদগ্ধত্বং-পাকাতিক্রান্তত্বং, শোফবদাদিশেত্| শোফানামিব শোফবত্, ষষ্ঠ্যন্তাদ্বতিঃ| তত্র শোফস্য শস্ত্রকর্মবিধৌ (হৃ. সূ. অ. ২৯|২) - "শোফোঽল্পোঽল্পোষ্মরুক্" ইত্যাদিনা গ্রন্থেনামাদিলক্ষণমুক্তম্, তথৈব বিদ্রধিষু বোধ্যম্|

Adhikarana urdhvAdhaHsrAve sthAnavisheShaH (17) · Śloka 17

নাভেরূর্ধ্বং মুখাত্পক্বাঃ প্রস্রবন্ত্যধরে গুদাত্| গুদাস্যান্নাভিজো|১৭|

স০-নাভেরূর্ধ্বং-ঊর্ধ্বপ্রদেশেষূত্পন্নাঃ, পক্বাঃ সন্তো মুখাত্-আস্যাত্, স্রাবং স্রবন্তি| নাভেরধরে-অধস্তাত্, পক্বাঃ সন্তো গুদাত্ স্রাবং স্রবন্তি| নাভিজঃ পুনর্বিদ্রধিরুত্পন্নো গুদাস্যাত্-উভযতঃ, স্রাবং স্রবতি| গুদং চাস্যং চ গুদাস্যম্, তস্মাত্|

Adhikarana vidradhau vraNavaddoShavij~jAnam (17-18) · Śloka 18

| বিদ্যাদ্দোষং ক্লেদাচ্চ বিদ্রধৌ||১৭|| যথাস্বং ব্রণবত্| |১৮|

স০-বিদ্রধৌ ব্রণ ইব যথাস্বং বাতাদিদোষং ক্লেদাদ্বিদ্যাত্| ব্রণপ্রতিষেধোক্তযা রীত্যা (হৃ. উ. অ. ২৫|৬) মস্তুমাংসপুলাকাম্বুতুল্যতন্বল্পসংস্রত্যাদিকযা বাতিকং বিদ্রধিং বিদ্যাত্| মূত্রকিংশুকভস্মাম্বুতৈলাম্ভোষ্ণবহুস্রুতেত্যাদিকযা চ পৈত্তিকং বিদ্রধিং বিদ্যাত্| বহুশ্বেতঘনস্রুত্যাদিকযা চ কফজং বিদ্রধিং বিদ্যাত্| চশব্দান্ন কেবলং পূর্বোক্তাত্ "বাতাত্তত্রাতিতীব্ররুক্" (শ্লো. ৬) ইত্যাদের্বাতাদিলক্ষণাদ্বাতাদিদোষবিদ্রধিং জানীযত্, ক্লেদাচ্চেত্যর্থঃ| ব্রণবদিতি সপ্তম্যন্তাদ্বতিঃ, বিদ্রধাবিতি সপ্তম্যন্তনির্দেশাত্| তথা চোক্তং ভাষ্যে-"উপমানে যঃ সংশযঃ স উপমেযাদ্ব্যাবর্ততে|" ইতি|

Adhikarana vidradhInAM sAdhyAsAdhyatvam (18-19) · Śloka 19

অথৈষাং সাধ্যাসাধ্যবিভাগার্থমাহ - - - - তত্র বিবর্জ্যঃ সন্নিপাতজঃ| পক্বো হৃন্নাভিবস্তিস্থো ভিন্নোঽন্তর্বহিরেব বা||১৮|| পক্বশ্চান্তঃ স্রবন্ বক্ক্রাত্ ক্ষীণস্যোপদ্রবান্বিতঃ| |১৯|

স০-সন্নিপাতজো যো বিদ্রধিঃ স বিবর্জ্যোঽসাধ্যত্বাত্| তথা, পক্বোঽন্তর্বহিরেব বা ভিন্নোঽন্তঃ-অন্তর্ভিন্নো, বাহ্যো-বহির্ভিন্নো, হৃন্নাভিবস্তিস্থো বর্জ্য এব| পক্বশ্চান্তরো হৃদাদিভ্যোঽন্যত্রাপি জাতো বক্ত্রেণ স্রবন্ ক্ষীণস্যোপদ্রবৈঃ-হিধ্মাদিভিঃ, যুক্তো বর্জ্য এব|

Adhikarana stanavidradherlakShaNam (19-21) · Śloka 21

ইদানীং স্তনবিদ্রধির্যোষিতাং যথা স্যাত্ তথা বক্তি - - - - | এবমেব স্তনসিরা বিবৃতাঃ প্রাপ্য যোষিতাম্||১৯|| সূতানাং গর্ভিণীনাং বা সম্ভবেচ্ছ্বযথুর্ঘনঃ| স্তনে সদুগ্ধেঽদুগ্ধে বা বাহ্যবিদ্রধিলক্ষণঃ||২০|| নাডীনাং সূক্ষ্মবক্ত্রত্বাত্কন্যানাং ন স জাযতে| |২১| ইতি বিদ্রধিনিদানম্|২১|

স০-[ এবমেব- ] যথৈব বিদ্রধ্যাখ্যঃ শ্বযথুবিশেষো ভুক্তৈঃ পর্যুষিতাদিভিস্তৈস্তৈশ্চাসৃক্প্রদূষণৈর্দুষ্টত্বঙ্মাংসমেদোস্থিস্নায্বসৃক্কণ্ডরাশ্রযঃ, তথৈব সূতানাং গর্ভিণীনাং বা স্ত্রীণাং স্তনে সদুগ্ধেঽথবাঽদুগ্ধে স্তনসিরা বিবৃতাঃ প্রাপ্য-আক্রম্য, বাহ্যবিদ্রধিলক্ষণঃ-"বাহ্যোঽত্র তত্রতত্রাঙ্গে" (শ্লো. ৪) ইত্যাদিলক্ষণো ঘনো-নিবিডো, যঃ শ্বযথুঃ সম্ভবেত্ স স্তনবিদ্রধিসংজ্ঞঃ| নাডীনাং-স্তনসিরাণাং, সূক্ষ্মবক্ত্রত্বাত্ স কন্যানাং ন জাযতে|

Adhikarana vRuddheH saMprAptiH (21-22) · Śloka 22

অথ শ্বযথুসামান্যাদিদানীং বৃদ্ধিং-বর্ধ্মাপরনামানং ব্যাধিং, বক্তুমুপক্রমতে - - - - অথ বৃদ্ধিনিদানম্| | কৃদ্ধো রুদ্ধগতির্বাযুঃ শোফশূলকরশ্চরন্||২১|| মুষ্কৌ বঙ্ক্ষণতঃ প্রাপ্য ফলকোশাভিবাহিনীঃ| প্রপীড্য ধমনীর্বৃদ্ধিং করোতি ফলকোশযোঃ||২২||

স০-বাযুঃ প্রকুপিতো বৃদ্ধিং করোতি| কিং ধাতুক্ষযাত্ কুপিতঃ ? নেত্যাহ-রুদ্ধগতিঃ| রুদ্ধা গতির্যস্যেতি রুদ্ধগতিঃ, আবৃতমার্গ ইত্যর্থঃ| কিম্ভূতঃ ? শোফশূলকরঃ| তথা, চরন্-দেশাদ্দেশান্তরং গচ্ছন্| বঙ্ক্ষণতঃ-ততো দেশাত্, মুষ্কৌ-বৃষণৌ, যথা প্রাপ্য তথা ফলকোশাভিবাহিনীঃ সিরাঃ প্রকর্ষেণ পীডযিত্বা| কস্য বৃদ্ধিং করোতি ? ইত্যাহ-ফলকোশযোঃ,-বৃষণযোঃ|

Adhikarana vRuddhiH saptavidhaH (23) · Śloka 23

অধুনাঽস্য ব্যাধেঃ সঙ্খ্যাং কুর্বন্নাহ - - - - দোষাস্রমেদোমূত্রান্ত্রৈঃ স বৃদ্ধিঃ সপ্তধা গদঃ| মূত্রান্ত্রজাবপ্যনিলাদ্ধেতুভেদস্তু কেবলম্||২৩||

স০-পৃথগ্বাতপিত্তকফৈর্দোষৈস্তথাঽস্রেণ মেদসা মূত্রেণ চ তথাঽঽন্ত্রেণ চ, এবং দোষাস্রমেদোমূত্রান্ত্রৈঃ স বৃদ্ধ্যাখ্যো গদঃ সপ্তধা-সপ্তপ্রকারো, মতঃ| ন কেবলং [ বাত ] বৃদ্ধাখ্যো যো গদঃ স এবানিলজো যাবন্মূত্রান্ত্রজাবপি যৌ বৃদ্ধ্যাখ্যৌ গদৌ তাবপ্যনিলজৌ| ননু, এবং পৃথঙ্নির্দেশো মূত্রান্ত্রজযোঃ কর্তুং ন যুক্তোঽনিলজত্বাত্, ইত্যাহ-হেতুভেদস্তু কেবলম্| সত্যম্| মূত্রান্ত্রজাবপ্যনিলাজ্জাযেতে| কিন্তু কারণভেদান্মূত্রান্ত্রজাবিতি নির্দিষ্টৌ| যতো মূত্রান্ত্রেঽধিষ্ঠায বাযুর্মূত্রান্ত্রজৌ গদৌ বৃদ্ধ্যাখ্যৌ করোতি| এবং তৌ পরমার্থতো বাতজাবপি মূত্রান্ত্রজাবুচ্যতে, তথারূপাদ্ধেতুভূতাদুত্পন্নত্বাত্| এতচ্চোপলক্ষণমাত্রম্| মেদোরক্তজাবপি বৃদ্ধিগদৌ দোষজাবেব, কফপিত্তাভ্যাং দূষ্যসংজ্ঞকে মেদোরক্তেঽধিষ্ঠায কৃতত্বাত্| তস্মান্মেদোরক্তহেতুবশান্মেদোরক্তজাবিতি সংজ্ঞযা তাবুক্তৌ| এবমন্যেঽপ্যেবংরূপা ব্যাধযো বোধ্যাঃ|

Adhikarana vAtajasya lakShaNam (24) · Śloka 24

বাতপূর্ণদৃতিস্পর্শো রূক্ষো বাতাদহেতুরুক্| |২৪|

স০-তত্র বাতাদ্বৃদ্ধির্বাতেন পূরিতা যা দৃতিঃ-ভস্রা, তস্যা ইব স্পর্শো যস্য স এবংভূতো ভবতি| তথা, রূক্ষঃ| তথা, অহেতুঃ-নিমিত্তং বিনা, রুক্-পীডা, যস্মিন্ স এবম্|

Adhikarana pittajasya lakShaNam (24) · Śloka 24

| পক্বোদুম্বরসঙ্কাশঃ পিত্তাদ্দাহোষ্মপাকবান্||২৪||

স০-পিত্তাদ্বৃদ্ধিঃ পক্বোদুম্বরফলতুল্যো দাহাদিমাংশ্চ স্যাত্|

Adhikarana kaphajasya lakShaNam (25) · Śloka 25

কফাচ্ছিতো গুরুঃ স্নিগ্ধঃ কণ্ডূমান্ কঠিনোঽল্পরুক্| |২৫|

স০-কফাদ্বৃদ্ধিঃ শীতাদিযুক্তঃ স্যাত্|

Adhikarana raktajasya lakShaNam (25) · Śloka 25

| কৃষ্ণস্ফোটাবৃতঃ পিত্তবৃদ্ধিলিঙ্গশ্চ রক্ততঃ||২৫||

স০-রক্তাদ্বৃদ্ধিঃ কৃষ্ণস্ফোটৈশ্চিতঃ পিত্তবৃদ্ধিলিঙ্গশ্চ| পিত্তবৃদ্ধিলিঙ্গানীব লিঙ্গানি যস্য স এবম্| সপ্তম্যুপমানপূর্বস্যেত্যাদিনোত্তরপদলোপী সমাসঃ|

Adhikarana medojasya lakShaNam (26) · Śloka 26

কফবন্মেদসা বৃদ্ধির্মৃদুস্তালফলোপমঃ| |২৬|

স০-মেদসা বৃদ্ধিঃ কফবদিতি কার্যে কারণোপচারাত্কফকার্যো রোগঃ কফ উক্তঃ| বিশেষমত্রাহ-মৃদুস্তালফলোপম ইতি|

Adhikarana mUtrajasya lakShaNam (26-27) · Śloka 27

| মূত্রধারণশীলস্য মূত্রজঃ স তু গচ্ছতঃ||২৬|| অম্ভোভিঃ পূর্ণদৃতিবত্ক্ষোভং যাতি সরুঙ্মৃদুঃ| মূত্রকৃচ্ছ্রমধস্তাচ্চ বলযং ফলকোশযোঃ||২৭||

স০-মূত্রজো বৃদ্ধির্মূত্রধারণশীলস্য জলপূর্ণভস্ত্রেব স্যাত্| স তু-মূত্রজো বৃদ্ধিঃ, গচ্ছতো-ব্রজতঃ, ক্ষোভং যাতি সরুক্ মৃদুশ্চ স্যাত্| তথা, মূত্রকৃচ্ছ্রং স্যাত্| ফলকোশযোরধস্তাচ্চ বলযং-কটকং, স্যাত্|

Adhikarana annajasya lakShaNam, annajasyAsAdhyatvam (28-2) · Śloka 2

বাতকোপিভিরাহারৈঃ শীততোযাবগাহনৈঃ| ধারণেরণভারাধ্ববিষমাঙ্গপ্রবর্তনৈঃ||২৮|| ক্ষোভণৈঃ ক্ষুভিতোঽন্যৈশ্চ ক্ষুদ্রান্ত্রাবযবং যদা| পবনো বিগুণীকৃত্য স্বনিবেশাদধো নযেত্||২৯|| কুর্যাদ্বঙ্ক্ষণসন্ধিস্থো গ্রন্থ্যাভং শ্বযথুং তদা| উপেক্ষ্যমাণস্য চ মুষ্কবৃদ্ধি- মাধ্মানরুক্স্তম্ভবতীং স বাযুঃ| প্রপীডিতোঽন্তঃ স্বনবান্ প্রযাতি প্রধ্মাপযন্নেতি পুনশ্চ মুক্তঃ||৩০|| অন্ত্রবৃদ্ধিরসাধ্যোঽযং বাতবৃদ্ধিসমাকৃতিঃ||৩১|| ইতি বৃদ্ধিনিদানম্||২||

স০-বাতকোপ্যাহারাদিভিরন্যৈশ্চ পূর্বোক্তৈঃ ক্ষোভণৈঃ-কোপনৈঃ, ক্ষুভিতঃ-কুপিতো, যদাঽল্পস্যান্ত্রস্যাবযবঃ-একদেশঃ, তং স্বনিবেশাত্-স্বস্থানাত্, বিগুণীকৃত্যাধো নযেত্ তদা পবনো বঙ্ক্ষণসন্ধিস্থো গ্রন্থ্যাভং শ্বযথুং কুর্যাত্| উপেক্ষ্যমাণস্যেত্যাদি| উপেক্ষ্যমাণস্য-অচিকিত্স্যমানস্য বৃদ্ধ্যাখ্যগদস্য, স পূর্বনির্দিষ্টো বাযুর্মুষ্কযোর্বৃদ্ধিং-বর্দ্ধনং, কুর্যাত্| কিম্ভূতাম্ ? আধ্মানরুক্ঽঽস্তম্ভবতীম্| তথা, প্রপীডিতো বাহ্যাদন্তঃ স্বনবান্-সশব্দঃ, প্রযাতি| মুক্তঃ-অপ্রপীডিতঃ, প্রধ্মাপযন্ পুনরেতি-আগচ্ছতি| উপজাতিবৃত্তম্| অযং-এবংলক্ষণঃ, অন্ত্রবৃদ্ধিরসাধ্যো ন পুনঃ সর্ব এবেত্যযংশব্দেন দ্যোতযতি| কিমস্য লক্ষণম্ ? ইত্যাহ-বাতবৃদ্ধিসমাকৃতিঃ,-"বাতপূর্ণদৃতিস্পর্শ" (শ্লো. ২৪) ইত্যাদিলক্ষণলক্ষিতঃ|

Adhikarana gulmo~aShTavidhaH (32-33) · Śloka 33

বৃধ্যাখ্যস্য ব্যাধেরনন্তরং শোফসামান্যাত্ গুল্মস্যাবসরঃ, ইতি তং লক্ষযিতুমাহ - - - - অথ গুল্মনিদানম্| রূক্ষকৃষ্ণারুণসিরাতন্তুজালগবাক্ষিতঃ| গুল্মোঽষ্টধা পৃথগ্দোষৈঃ সংসৃষ্টৈর্নিচযং গতৈঃ||৩২|| আর্তবস্য চ দোষেণ নারীণাং জাযতেঽষ্টমঃ| |৩৩|

স০-সর্বগুল্মানাং সামান্যলক্ষণং রূক্ষকৃষ্ণেত্যাদিগ্রন্থনির্দিষ্টম্| গবাক্ষিতো-নিরন্তরমাক্রান্তঃ| গুল্মোঽষ্টধেতি সঙ্খ্যারূপা সম্প্রাপ্তিঃ| তদেবাষ্টধাত্বং প্রতিপাদযিতুমাহ-পৃথগ্দোষৈঃ-বাতপিত্তকফৈঃ, ত্রযঃ| তথা, সংসৃষ্টৈঃ-সংসর্গেণ, ত্রযঃ| নিচযং গতৈঃ-সন্নিপাতেন, একঃ| তথা, অষ্টমো নারীণাং চার্তবস্য দোষেণ-দুষ্টতযা, স্যাত্|

Adhikarana gulmasya nidAnam, gulmasya saMprAptiH (33-38) · Śloka 38

| জ্বরচ্ছর্দ্যতিসারাদ্যৈর্বমনাদ্যৈশ্চ কর্মভিঃ||৩৩|| কর্শিতো বাতলান্যত্তি শীতং বাঽম্বু বুভুক্ষিতঃ| যঃ পিবত্যনু চান্নানি লঙ্ঘনপ্লবনাদিকম্||৩৪|| সেবতে দেহসঙ্ক্ষোভি ছর্দিং বা সমুদীরযেত্| অনুদীর্ণামুদীর্ণান্বা বাতাদীন্ন বিমুঞ্চতি||৩৫|| স্নেহস্বেদাবনভ্যস্য শোধনং বা নিষেবতে| শুদ্ধো বাঽঽশুবিদাহীনি ভজতে স্যন্দনানি বা||৩৬|| বাতোল্বণাস্তস্য মলাঃ পৃথক্ ক্রুদ্ধা দ্বিশোঽথবা| সর্বে বা রক্তযুক্তা বা মহাস্রোতোনুশাযিনঃ||৩৭|| ঊর্ধ্বাধোমার্গমাবৃত্য কুর্বতে শূলপূর্বকম্| স্পর্শোপলভ্যং গুল্মাখ্যমুত্প্লুতং গ্রন্থিরূপিণম্||৩৮||

স০-"জ্বরচ্ছর্দি" ইত্যাদি যাবত্ "ভজতে স্যন্দনানি বা" ইতি নিদানম্| অতিসারাদ্যৈরিত্যাদিশব্দেন গ্রহণ্যাদযো গৃহ্যন্তে, বমনাদ্যৈরিত্যত্র চ বিরেচনাস্থাপনাদযঃ| জ্বরাদিভির্ব্যাধিভির্বমনাদিভিশ্চ কর্শিতো যো বাতলান্যন্নানি ভুঙ্ক্তে| অথবা, বুভুক্ষিতো-ভোজনং বিনৈব, শীতং-অপক্বমম্বু, যঃ পিবতি| তথা চোক্তম্ (সঙ্গ্রহে সূ. অ. ৬)- "অনবস্থিতদোষাগ্নের্ব্যাধিক্ষীণবলস্য চ| নাল্পমপ্যামমুদকং হিতং, তদ্ধি ত্রিদোষকৃত্||" ইতি| অনু চান্নানি-ভোজনাদনন্তরং, লঙ্ঘনাদিকং যত্কর্ম দেহসঙ্ক্ষোভি-শরীরসংরম্ভোত্পাদকং, তত্সেবতে| ছর্দিং বা যোঽনুদীর্ণাং-অনুত্ক্লিষ্টাং, সমুদীরযেত্-সমন্তাদূর্ধ্বং নযেত্| উদীর্ণান্ বাতাদীন্-বাতমূত্রপুরীষাদীনাগতান্, ন বিমুঞ্চতি| তথা যঃ কশ্চন স্নেহস্বেদাবনভ্যস্য-পুনঃপুনরকৃত্বা, শোধনং-বমনবিরেচনাদি, নিষেবতে| অথবা, শুদ্ধঃ-কৃতবমনবিরেচনঃ, আশু-সমনন্তরমেব, বিদাহীন্যন্নপানানি ভজতে-সন্তাপনান্যন্নপানানি ভুঙ্ক্তে| পচ্যমানান্যন্নপানানি যানি বিদাহাবস্থাং প্রাপ্তান্যামাশয এব চিরমবতিষ্ঠন্তে তানি বিদাহীন্যুচ্যন্তে| অথবা, কৃতবমনবিরেচনোঽনন্তরমেব স্যন্দনানি-স্রুতিরূপশ্লেষ্মকারীণ্যন্নপানানি, ভজতে| তস্য মলাঃ-বাতাদযো, গুল্মসংজ্ঞং ব্যাধিং কুর্বতে| কীদৃশাঃ ? বাতোল্বণাঃ-বাতকারণাঃ| ন হি পবনকারণমন্তরেণ শ্লেষ্মপিত্তরক্তানাং সংঘট্টনা ঘটতে| তস্মাত্ পিত্তাদীনামুত্পত্তিকারণানাং বাতস্য চ পিত্তাদিগুল্মেষু গুল্মনিষ্পাদনং প্রতি তুল্যকক্ষতামনেন বিশেষণেন প্রতিপাদযত্যাচার্যঃ| যদি পুনরুল্বণঃ-অধিকঃ, ইতি ব্যাখ্যাযতে| তদানীং পিত্তগুল্মেঽপ্যধিকত্বং বাতস্যেতি বাতগুল্মপিত্তগুল্মাদীনাং বিষযবিভাগো ন স্যাত্| তস্মাদ্বাতকারণত্বং বাতোল্বণা ইত্যনেন বিবক্ষিতমিতি বেদ্যম্| কিম্ভূতা দোষাঃ ? ক্রুদ্ধাঃ-কুপিতাঃ| কথম্ ? পৃথক্-প্রত্যেকং কৃত্বা| অথবা, দ্বিশো-দ্বৌ দ্বৌ কৃত্বা, সংসর্গস্থা ইত্যর্থঃ| সর্বে বা-সমস্তা রক্তযুক্তা বেতি| বাশব্দঃ সমুচ্চযে, রক্তযুক্তাশ্চেত্যর্থঃ| তথা চ খরনাদেঽভিহিতম্-"বাযুঃ, ক্রুদ্ধঃ কফং রক্তং পিত্তং চাদায পিণ্ডিতম্| গুল্মং কুর্যাত্" ইত্যাদি যাবত্ "রক্তপিত্তকফা বাতপিণ্ডিতা গুল্ম উচ্যতে|" ইতি| তথা মহাস্রোতোনুশাযিনঃ| মহাস্রোতঃ-আমপক্বাশযস্থানং, তদনুশেরতে যে তে মহাস্রোতোনুশাযিনঃ| কিং কৃত্বা গুল্মং নিষ্পাদযন্তি ? ইত্যাহ-ঊর্ধ্বাধ ইত্যাদি| ঊর্ধ্বাধোমার্গমাবৃত্য-আপূর্য, অনেনাস্য সম্প্রাপ্তিরুক্তা| শূলং পূর্বং যস্মিন্ স এবং তং শূলপূর্বকম্,-পূর্বং শূলং কৃত্বা পশ্চাদ্দোষা গুল্মং কুর্বন্তি, অনেনাস্য প্রাগ্রূপমুক্তম্| তথা স্পর্শোপলভ্যং-অশ্মাদিসদৃশম্, তথা উত্প্লুতং-ঊর্ধ্বং গতম্| তথা গ্রন্থিরূপিণং-গ্রন্থ্যাকারম্, ইত্যনেনাস্য সংস্থানমুক্তম্|

Adhikarana gulmasya utpattiH (39-41) · Śloka 41

অধুনা বাতগুল্মং লক্ষযতি - - - - কর্শনাত্কফবিট্পিত্তৈর্মার্গস্যাবরণেন বা| বাযুঃ কৃতাশ্রযঃ কোষ্ঠে রৌক্ষ্যাত্কাঠিন্যমাগতঃ||৩৯|| স্বতন্ত্রঃ স্বাশ্রযে দুষ্টঃ পরতন্ত্রঃ পরাশ্রযে| পিণ্ডিতত্বাদমূর্তোঽপি মূর্তত্বমিব সংশ্রিতঃ||৪০|| গুল্ম ইত্যুচ্যতে বস্তিনাভিহৃত্পার্শ্বসংশ্রযঃ| |৪১|

স০-কর্শনাত্-ধাতুক্ষযাত্, বাযুর্দুষ্টঃ কদাচিত্ কফবিট্পিত্তৈঃ কৃতেন মার্গস্যাবরণেন-রোধেন, কোষ্ঠে-আমপক্বাশযাখ্যে, কৃতাশ্রযো-গৃহীতাস্পদঃ, তথা রৌক্ষ্যাত্কারণাত্ কাঠিন্যমাগতঃ-পিণ্ডিতত্বং প্রাপ্তঃ, স্বাশ্রযে-পক্বাশযস্থানে, দুষ্টঃ স্বতন্ত্রঃ, পরাশ্রযে-আমাশযস্থানে, দুষ্টঃ পরতন্ত্রঃ পিত্তকফযোরাযত্তঃ, পিণ্ডিতত্বাত্কারণাত্ স্পর্শোপলভ্যঃ সন্, অমূর্তোঽপি-অকঠিনোঽপি, মূর্তত্বমিব-কাঠিন্যমিব, সংশ্রিতঃ-সম্পন্নো, গুল্ম ইত্যভিধীযতে, তন্ত্রকৃদ্ভিরিতি শেষঃ| বস্তিনাভিহৃত্পার্শ্বসংশ্রযঃ, বস্ত্যাদিঃ সংশ্রযঃ-আধারো, যস্য স এবম্|

Adhikarana vAtajasya lakShaNam (41-44) · Śloka 44

| বাতান্মন্যাশিরঃশূলং জ্বরপ্লীহান্ত্রকূজনম্||৪১|| ব্যধঃ সূচ্যেব বিট্সঙ্গঃ কৃচ্ছ্রাদুচ্ছ্বসনং মুহুঃ| স্তম্ভো গাত্রে মুখে শোষঃ কার্শ্যং বিষমবহ্নিতা||৪২|| রূক্ষকৃষ্ণত্বগাদিত্বং চলত্বাদনিলস্য চ| অনিরূপিতসংস্থানস্থানবৃদ্ধিক্ষযব্যথঃ||৪৩|| পিপীলিকাব্যাপ্ত ইব গুল্মঃ স্ফুরতি তুদ্যতে| |৪৪|

স০-বাতাদ্গুল্মে সতি মন্যাশূলাদযো ভবন্তি| তথা, চলত্বাচ্চ বাযোর্গুল্মোঽনিরূপিতসংস্থানস্থানবৃদ্ধিক্ষযব্যথঃ স্যাত্| অনিরূপিতাঃ সংস্থানাদযো যস্য স এবম্| সংস্থানং-আকারঃ| স্থানং-আশ্রযঃ| তথা, পিপীলিকাভির্ব্যাপ্তঃ-চিত ইব, গুল্মঃ স্ফুরতি তুদ্যতে চ| তুদ্যত ইতি কর্মকর্তরি|

Adhikarana pittajasya lakShaNam (44-45) · Śloka 45

| পিত্তাদ্দাহোঽম্লকো মূর্চ্ছাবিড্ভেদস্বেদতৃডূজ্বরাঃ||৪৪|| হারিদ্রত্বং ত্বগাদ্যেষু গুল্মশ্চ স্পর্শনাসহঃ| দূযতে দীপ্যতে সোষ্মা স্বস্থানং দহতীব চ||৪৫||

স০-পিত্তাদ্গুল্মে দাহাদযঃ স্যুঃ| তথা ত্বঙ্নখাদিষু হারিদ্রো বর্ণঃ স্যাত্| গুল্মশ্চ স্পর্শনং ন সহতে-স্পর্শনাসহঃ, স্যাত্| তথা, দূযতে-উপতপ্যতে, দীপ্যতে-জ্বলতীব| সোষ্মা চ স্যাত্| স চ স্বস্থানং-গুল্মাশ্রিতমাস্পদং, দহতীব-তপ্তাযঃপিণ্ড ইব| দূযত ইতি "দূড্ পরিতাপে" দিবাদিঃ|

Adhikarana kaphajasya lakShaNam (46-47) · Śloka 47

কফাত্স্তৈমিত্যমরুচিঃ সদনং শিশিরজ্বরঃ| পীনসালস্যহৃল্লাসকাসশুক্লত্বগাদিতাঃ||৪৬|| গুল্মোঽবগাঢঃ কঠিনো গুরুঃ সুপ্তঃ স্থিরোঽল্পরুক্| |৪৭|

স০-কফাদ্গুল্মে সতি স্তৈমিত্যাদযঃ স্যুঃ| গুল্মোঽবগাঢাদিযুক্তঃ স্যাত্|

Adhikarana dvidoShajAnAM lakShaNam (47-48) · Śloka 48

| স্বদোষস্থানধামানঃ স্বে স্বে কালে চ রুক্করাঃ||৪৭|| প্রাযঃ| |৪৮|

স০-তে চ গুল্মাঃ স্বদোষস্থানধামানো দোষস্য-বাতাদেঃ, স্থানং-পক্বাশযাদি স্বমাত্মীযমাত্মীযং, দোষস্থানং তদ্ধাম-স্থানং, যেষাং-বাতপিত্তকফগুল্মানাং, তে প্রাযো-বাহুল্যেন, স্বদোষস্থানধামানঃ| তথা স্বে স্বে কালে-আত্মীযে বযোহোরাত্রিভুক্তানামন্তমধ্যাদিলক্ষণে, যথাসঙ্খ্যং বাতপিত্তকফগুল্মাক্করাঃ-শূলকরাঃ, ভবন্তি|

Adhikarana tridoShajasya lakShaNam (48-49) · Śloka 49

ত্রযস্তু দ্বন্দ্বোত্থা গুল্মাঃ সংসৃষ্টলক্ষণাঃ| সর্বজস্তীব্ররুগ্দাহঃ শীঘ্রপাকী ঘনোন্নতঃ||৪৮|| সোঽসাধ্যো| |৪৯|

স০-দ্বন্দ্বোত্থাঃ-সংসর্গজা গুল্মাস্ত্রযঃ,সংসৃষ্টলক্ষণাঃ স্যুঃ| স০-সর্বজস্ত্রিদোষজো গুল্মস্তীব্ররুগাদিযুক্তঃ| স চাসাধ্যঃ|

Adhikarana raktajasya lakShaNam (49-54) · Śloka 54

রক্তগুল্মস্তু স্ত্রিযা এব প্রজাযতে| অত্রৈবোপপত্তিমাহ - - - - ঋতৌ বা নবসূতা বা যদি বা যোনিরোগিণী||৪৯|| সেবতে বাতলানি স্ত্রী ক্রুদ্ধস্তস্যাঃ সমীরণঃ| নিরুণদ্ধ্যার্তবং যোন্যাং প্রতিমাসমবস্থিতম্||৫০|| কুক্ষিং করোতি তদ্গর্ভলিঙ্গমাবিষ্করোতি চ| হৃল্লাসদৌহৃদস্তন্যদর্শনক্ষামতাদিকম্||৫১|| ক্রমেণ বাযুসংসর্গাত্পিত্তযোনিতযা চ তত্| শোণিতং কুরুতে তস্যা বাতপিত্তোত্থুগুল্মজান্||৫২|| রুক্স্তম্ভদাহাতীসারতৃড্জ্বরাদীনুপদ্রবান্| গর্ভাশযে চ সুতরাং শূলং দুষ্টাসৃগাশ্রযে||৫৩|| যোন্যাশ্চ স্রাবদৌর্গন্ধ্যতোদস্পন্দনবেদনাঃ| |৫৪|

স০-রক্তগুল্মঃ পুনঃ স্ত্রিযা এব প্রজাযতে| স০-ঋতৌ-আর্তবকালে, নবপ্রসূতা বা যোনিরোগিণী বা স্ত্রী বাতলান্যন্নপানানি যদি সেবতে তস্যাঃ-স্ত্রিযাঃ সমীরণঃ-পবনঃ, কুপিতো যোন্যাং প্রতিমাসং যদবস্থিতমার্তবং তদুপরুণদ্ধি| তত্-আর্তবং, কুক্ষিং করোতি, গর্ভলিঙ্গং চাবিষ্করোতি-প্রকটযতি| গর্ভলিঙ্গমিব লিঙ্গং যস্যেতি "সপ্তম্যুপমানপূর্বস্য" ইতি বহুব্রীহিরুত্তরপদলোপশ্চ| অথ তদেব গর্ভলিঙ্গমাহ-হৃল্লাসেত্যাদি| মুনিস্তু রক্তগুল্মে (চ. নি. অ. ৩|১৪)- "পাদযোঃ শ্বযথুর্ভবতি|" ইত্যূচে| আদিশব্দেন মূর্চ্ছাদীনাং গ্রহণম্| স০-ক্রমেণ-অনন্তরং, বাযুসংসর্গাত্-মরুত্সংশ্লেষাত্, তথা পিত্তযোনিতযা চ-পিত্তস্য কারণত্বেন, তচ্ছোণিতং বাতপিত্তোত্থগুল্মজানুপদ্রবান্ কুরুতে রুক্স্তম্ভদাহাতীসারতৃড্জ্বরাদীন্| অনযা চ ভঙ্গ্যা বাতপিত্তগুল্মযোরুপদ্রবা অপ্যুক্তা ভবন্তি| গর্ভাশয ইত্যাদি| গুল্মশ্চ গর্ভাশযে সুতরাং শূলং করোতি| কিম্ভূতে ? দুষ্টস্যাসৃজ আশ্রযে-আধারভূতে| যোন্যাশ্চ স্রাবাদীন্ কুরুতে|

Adhikarana garbhalakShaNaraktajalakShaNayorbhedaH (54-55) · Śloka 55

গর্ভলক্ষণাদ্রক্তগুল্মস্য বিলক্ষণং লক্ষণমাহ - - - - | ন চাঙ্গৈর্গর্ভবদ্গুল্মঃ স্ফুরত্যপি তু শূলবান্||৫৪|| পিণ্ডীভূতঃ স এবাস্যাঃ কদাচিত্স্পন্দতে চিরাত্| ন চাস্যা বর্দ্ধতে কুক্ষিগুল্ম এব তু বর্দ্ধতে||৫৫||

স০-ন চ গর্ভ ইবাঙ্গৈঃ-পাণ্যাদিভিরবযবৈঃ, স্ফুরতি-নিঃস্পন্দতে গুল্মোঽঙ্গাভাবাত্, অপি তু শূলবান্| স এব-গুল্মঃ, পিণ্ডীভূতঃ কদাচিচ্চিরেণাস্যাঃ স্পন্দতে-ন গর্ভবচ্ছীঘ্রম্| তথা, গর্ভেঽন্তঃস্থিতে কুক্ষিরস্যা বর্ধতে| গুল্মে ত্বন্তঃস্থিতে স এব বর্ধতে গুল্মো, ন কুক্ষিঃ| ইতি গর্ভরক্তগুল্মযোর্লক্ষণভেদঃ|

Adhikarana gulmavidradhyorbhedaH (56-57) · Śloka 57

অথ গুল্মবিদ্রধ্যোর্লক্ষণভেদং কথযতি - - - - স্বদোষসংশ্রযো গুল্মঃ সর্বো ভবতি তেন সঃ| পাকং চিরেণ ভজতে নৈব বা, বিদ্রধিঃ পুনঃ||৫৬|| পচ্যতে শীঘ্রমত্যর্থং দুষ্টরক্তাশ্রযত্বতঃ| অতঃ শীঘ্রবিদাহিত্বাদ্বিদ্রধিঃ সোঽভিধীযতে||৫৭||

স০-সর্বো গুল্মঃ স্বদোষঃ সংশ্রযো যস্য স এবম্| যেন যেন দোষেণ বাতাদ্যন্যতমেনাথবা দ্বন্দ্বস্বরূপেণ সন্নিপাতেনান্যেন বা গুল্মো জাযতে স দোষস্তস্য গুল্মস্যাশ্রযঃ| তদেবং বাতগুল্মস্য বাত এবাশ্রযো, ন তস্য পিত্তাদযঃ| পিত্তাদিকৃতানাং ত এবাশ্রযাঃ, ন পবন আশ্রযঃ| এবং স্বদোষসংশ্রযো গুল্মঃ সর্বো ভবতি| তেন-স্বদোষসংশ্রযাখ্যেন কারণেন, গুল্মশ্চিরেণ কালেন পাকং ভজতে| এতচ্চ পিত্তগুল্মং প্রতি প্রাযেণ তথৈকীযমতেনোক্তম্| অত এবাহ-নৈব বেতি| অথবা গুল্মঃ পাকং ন ভজত এব| বিদ্রধিস্তু শীঘ্রং-অচিরেণৈব কালেন, পাকং ভজতে, অত্যর্থং দুষ্টরক্তাশ্রযত্বাত্| অতঃ শীঘ্রবিদাহিত্বাত্ কারণাদসৌ বিদ্রধিরভিধীযতে| তথা চাগমঃ (সুশ্রুতে নি. অ. ৯|৩২)- "মাংসশোণিভূযস্ত্বাত্ পাকং গচ্ছতি বিদ্রধিঃ| মাংসশোণিতহীনত্বাদ্গুল্মঃ পাকং ন গচ্ছতি||" ইতি| তথা প্রাযেণ বাতাত্মকঃ সর্বো গুল্মো জাযতে| বাত এবামূর্তোঽপি মূর্তত্বমিব সংশ্রিতো গুল্ম ইত্যুচ্যতে| অত এব বাতস্যৈব সর্বগুল্মেকারণং প্রতি প্রাধান্যম্| তস্মাদ্গুল্মস্য পাকানুপপত্তিঃ|

Adhikarana bAhyAbhyantarayorlakShaNam (58-3) · Śloka 3

অথ গুল্মস্য বাহ্যাভ্যন্তরলক্ষণমাহ - - - - গুল্মেঽন্তরাশ্রযে বস্তিকুক্ষিহৃত্প্লীহবেদনাঃ| অগ্নিবর্ণবলভ্রংশো বেগানাং চাপ্রবর্তনম্||৫৮|| অতো বিপর্যযো বাহ্যে কোষ্ঠাঙ্গেষু তু নাতিরুক্| বৈবর্ণ্যমবকাশস্য বহিরুন্নততাঽধিকম্||৫৯|| ইতি গুল্মনিদানম্||৩||

স০-গুল্মেঽন্তরাশ্রযে-আভ্যন্তরে, বস্ত্যাদিবেদনাদযঃ স্যুঃ| তথা, অগ্ন্যাদিভ্রংশো-বিনাশো, বেগানাং চ প্রবর্তনং ন ভবতি| অতঃ-অস্মাদ্বাহ্যে, বিপর্যযো-বৈপরীত্যম্| যথা,-অগ্ন্যাদিভ্রংশাভাবো বেগানাং চ প্রবর্তনং ভবতি| তথা, বস্তিহৃদযাদিষু কোষ্ঠাঙ্গেষ্বতিরুঙ্ন ভবতি| যথাঽন্তরে তথাঽবকাশস্য গুল্মপ্রদেশস্য বৈবর্ণ্যং-শরীরাদন্যবর্ণত্বম্| বহিঃ-বাহ্যভাগে, উন্নতত্বমধিকং ভবতি|

Adhikarana AnAhasya lakShaNam (60) · Śloka 60

গুল্মানামানাহভূযিষ্ঠত্বাদানাহলক্ষণমাহ - - - - সাটোপমত্যুগ্ররুজমাধ্মানমুদরে ভৃশম্| ঊর্ধ্বাধোবাতরোধেন তমানাহং প্রচক্ষতে||৬০||

স০-ঊর্ধ্বাধোবাতরোধেন কারণভূতেনোদরে ভৃশমাধ্মানং যত্ তমানাহং প্রচক্ষতে, মুনযঃ ইতি শেষঃ| কিম্ভূতম্ ? সাটোপং-সশব্দম্, তথাঽত্যুগ্রা রুক্-পীডা, যত্র তদেবম্| সুশ্রুতেন প্রত্যাধ্মানস্যাপি লক্ষণমভ্যধাযি (নি. অ. ১|৮৯) - "বিমুক্তপার্শ্বহৃদযং তদেবামাশযোত্থিতম্| প্রত্যাধ্মানং বিজানীযাত্ কফব্যাকুলিতানিলম্||" ইতি|

Adhikarana aShThIlAyAH lakShaNam, pratyaShThIlAyAH lakShaNam (61) · Śloka 61

ঘনোঽষ্ঠীলোপমো গ্রন্থিরষ্ঠীলোর্ধ্বং সমুন্নতঃ| আনাহলিঙ্গস্তির্যক্তু প্রত্যষ্ঠীলা তদাকৃতিঃ||৬১||

স০-[ ঘনো- ]নিবিডো, যো গ্রন্থিরষ্ঠীলযোপমীযতে তথোর্ধ্বং সমুন্নতঃ-নাধস্তাত্, স গ্রন্থিরানাহলিঙ্গোঽষ্ঠীলা ভণ্যতে| তির্যক্ চ (পুনঃ) যো গ্রন্থিঃ-নোর্ধ্বং সমুন্নতঃ, তদাকৃতিঃ-অষ্ঠীলাসদৃশঃ, স গ্রন্থিঃ প্রত্যষ্ঠীলোচ্যতে|

Adhikarana tUnIpratUnyoH lakShaNam (62) · Śloka 62

তূনীপ্রতূন্যৌ লক্ষযতি - - - - পক্বাশযাদ্গুদোপস্থং বাযুস্তীব্ররুজঃ প্রযান্| তূনী, প্রতূনী তু ভবেত্স এবাতো বিপর্যযে||৬২||

স০-গুদং চোপস্থং চ গুদোপস্থম্| পক্বাশযাত্-ততো দেশাত্, বাযুস্তীব্ররুজঃ সন্ গুদোপস্থং প্রযান্-গচ্ছন্, তূনীত্যুচ্যতে| স এব-বাযুঃ, অতো বিপর্যযে-গুদোপস্থাত্পক্বাশযং গচ্ছন্, তীব্ররুজঃ সন্ প্রতূনীতি গদ্যতে|

Adhikarana gulmasya pUrvarUpam (11) · Śloka 11

উদ্গারবাহুল্যপুরীষবন্ধ- তৃপ্ত্যক্ষমত্বান্ত্রবিকূজনানি| আটোপমাধ্মানমপক্তিশক্তি- মাসন্নগুল্মস্য বদন্তি চিহ্নম্||৬৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে বিদ্রধিবৃদ্ধিগুল্মনিদানং নামৈকাদশোঽধ্যাযঃ||১১||

স০-উদ্গারবাহুল্যাদীন্যাসন্নগুল্মস্য চিহ্নং-প্রাগ্রূপং, বদন্তি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে বিদ্রধিবৃদ্ধিগুল্মনিদানং নামৈকাদশোঽধ্যাযঃ সমাপ্তঃ|| ১১||