1. garbhāvakrāntiradhyāyaḥ

Adhikarana adhyAyopakramaH shArIrasthAnam · Śloka

শ্রীগণেশায নমঃ| অথ সূত্রস্থানাদনন্তরং শারীরস্থানমিদমারভ্যতে| তত্রাযং সম্বন্ধঃ,-পূর্বস্মিন্স্থানে কাযাদীন্যষ্টাবঙ্গানি চিকিত্সাধারভূতানি সকলতন্ত্রসারভূতানি সূত্রিতানি "কাযবাল" (হৃ. সূ. অ. ১/৫) ইত্যাদিনা গ্রন্থেন| কাযশ্চ নিজাগন্তূনাং ব্যাধীনামধিষ্ঠানম্| তস্য চ কাযস্য চতুর্বর্গসাধনস্য পালনার্থং হেতুলিঙ্গৌষধস্কন্ধভেদেন ত্রিস্কন্ধোঽযং গ্রন্থো গ্রন্থকৃতা প্রণীতঃ| ততশ্চ শরীরস্য প্রথমং সূত্রিতত্বাত্প্রাধান্যাচ্চ প্রাক্ সূত্রস্থানমনন্তরং শারীরস্থানমিদমারভ্যত ইত্যাহ-

Adhikarana garBAvakrAntiradhyAyaH (2) · Śloka 2

অথাতো গর্ভাবক্রান্তি শারীরং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

শরীরমধিকৃত্য কৃতো গ্রন্থঃ শারীরঃ| গর্ভস্যাবক্রান্তিঃ-অবক্রমণং সম্প্রাপ্তিঃ, যথাঽগর্ভো গর্ভতাং সম্পদ্যত ইত্যর্থঃ| গর্ভাবক্রান্তির্বিদ্যতে যস্মিন্নধ্যায ইতি মত্বর্থে কপ্রত্যযঃ| তস্য "অধ্যাযানুবাকযোর্লুক্" ইতি লুক্| অথাদিশব্দানামর্থা আযুষ্কামীযাধ্যাযে (হৃ.সূ. অ.১) ব্যাখ্যাতা এব|

Adhikarana garBotpattiH (1) · Śloka 1

শুদ্ধে শুক্রার্তবে সত্বঃ স্বকর্মক্লেশচোদিতঃ| গর্ভঃ সম্পদ্যতে যুক্তিবশাদগ্নিরিবারণৌ||১||

শুক্রং-অন্ত্যো ধাতুঃ| ঋতৌ ভবমার্তবম্, স্ত্রীণাং যদপত্যমার্গাত্ শুদ্ধমীষত্কৃষ্ণং বিগন্ধং চ বাযুপ্রেরিতং লোহিতং প্রবর্ততে তদার্তবমুচ্যতে| শুক্রং চার্তবং চ শুক্রার্তবম্, পিণ্ডে পিত্রোঃ সম্বন্ধি গর্ভবীজম্, তস্মিন্ শুক্রার্তবে, শুদ্ধে-বাতাদিভিরদূষিতেঽধিষ্ঠানভূতে, সত্বো-জীবঃ, গর্ভঃ সম্পদ্যতে| কিল নাসৌ গর্ভঃ, অথ চ গর্ভতামাসাদযতি| কীদৃশঃ সত্বঃ ? স্বকর্মেত্যাদি| কর্মাণি-পূর্বজন্মার্জিতানি শুভাশুভানি, স্বানি চ তানি কর্মাণি চ স্বকর্মাণি| ক্লেশযন্তি-লোকান্ দুঃখযন্তীতি, ক্লেশাঃ| তে চ-অবিদ্যাস্মিতারাগদ্বেষাভিনিবেশাঃ| অতথাবস্তুনি তথেতি ("অনিত্যাশুচিদুঃখানাত্মসু নিত্যশুচিসুখাত্ম) খ্যাতিঃ-অবিদ্যা| দৃগ্দর্শনশক্ত্যোরেকাত্মতাঅস্মিতা| সুখানুশযী-রাগঃ| দুঃখানুশযী-দ্বেষঃ| স্বরসবাহী বিদুষোঽপি তথা রূঢঃ-অভিনিবেশঃ" (পাত.যো.সূ ২/৫-৬-৭-৮-৯)| স্বকর্মাণি চ ক্লেশাশ্চ, স্বকর্মক্লেশাঃ, তৈশ্চোদিতঃ-প্রেরিতো গর্ভঃ সম্পদ্যতে, ন তু কর্মক্লেশবিযুক্তঃ| অত এব বীতরাগাণাং জন্মাসম্ভবঃ, কর্মক্লেশরহিতত্বাত্| তথা চোক্তম্-"চিত্তমেব হি সংসারি রাগাদিক্লেশদূষিতম্| তদেব তৈর্বিনির্মুক্তং মুক্তমিত্যভিধীযতে||" ইতি| অথ কিং শুদ্ধে শুক্রার্তবে এব স্বকর্মক্লেশচোদিত এব গর্ভঃ সম্পদ্যতেঽথবাঽন্যদপি কিঞ্চিদপেক্ষতে ? ইত্যাহ-যুক্তিবশাদিতি| যোজনং যুক্তিঃ, উপাদেযস্যার্থস্যেতিকর্তব্যতাসাধনোপাযার্থম্| যুক্তের্বশঃ-সামর্থ্যং প্রভাবো, যুক্তিবশঃ| ততঃ শুদ্ধে শুক্রার্তবে স্বকর্মক্লেশচোদিত এব স সত্বো গর্ভঃ সম্পদ্যতে, নান্যথা| কথম্ ? ইত্যাহ-যুক্তিবশাদগ্নিরিবারণৌ| তথা হি,- মথ্যমন্থনমথকাদিসামগ্রীমন্তরেণারণাবগ্নির্যথা ন জাযতে, তথা গর্ভোঽপি যথোক্তসামগ্রীবৈকল্যাত্ ন ভবতি| সকলসামগ্রীসদ্ভাবত এব ভবতীতি ভাবঃ|

Adhikarana garBasya kukShau vRuddhiprakAraH (2) · Śloka 2

তদেবং গর্ভস্য সম্পত্তিমভিধায যথা তস্য কুক্ষৌ বৃদ্ধিঃ স্যাত্তথা বক্তিবীজাত্মকৈর্মহাভূতৈঃ সূক্ষ্মৈঃ সত্বানুগৈশ্চ সঃ| মাতুশ্চাহাররসজৈঃ ক্রমাত্কুক্ষৌ বিবর্দ্ধতে||২||

বীজাত্মকৈঃ-গর্ভজরাযুস্বভাবৈঃ শুক্রার্তবরূপতাং পরিণতৈঃ| কৈঃ ? মহাভূতৈঃ, -আকাশাদিভিঃ সত্বরজস্তমোমযৈঃ, "তত্র সত্ববহুলমাকাশম্, রজোবহুলো বাযুঃ, সত্বরজোবহুলোঽগ্নিঃ, সত্বতমোবহুলা আপঃ, তমোবহুলা পৃথ্বী চেতি|" (সু.শা. অ.১/২০) ইত্যেবংরূপৈঃ| সঃ-গর্ভঃ, কুক্ষৌ বিবর্দ্ধতে-বিশেষেণ বৃদ্ধিং যাতি| কিম্ভূতৈঃ ? সূক্ষ্মৈঃ,-অতীন্দ্রিযৈর্যোগিদৃশ্যৈঃ| তথা, সত্বং-চেতোঽনুগচ্ছন্তীতি সত্বানুগানি, তৈঃ| যত্র সত্বং তিষ্ঠতি তত্রাবশ্যং তান্যপি তিষ্ঠন্তি, সাত্বানুশাযিত্বাত্তেষাম্| তথা চোক্তম্ (চরকে শা. অ.২/৩৭)-"অতীন্দ্রিযৈস্তৈরতিসূক্ষ্মরূপৈরাত্মা কদাচিন্ন বিযুক্তপূর্বঃ|" ইত্যাদি| চশব্দো হেতুসমুচ্চযার্থঃ| [ ন কেবলং মহাভূতৈর্হেতুভূতৈর্গর্ভো বিবর্দ্ধতে যাবন্মাতুশ্চাহাররসজৈরিত্যতো বক্ষ্যমাণাদ্ধেতোরপি বর্দ্ধত ইত্যর্থঃ| মাতুরিত্যাদি| মাতুঃ সম্বন্ধিভিরাহাররসজৈশ্চ কুক্ষৌ বিবর্দ্ধতে| চশব্দোঽত্রানুক্তসমুচ্চযার্থঃ| ] ন কেবলং পূর্বোক্তাদ্যথানির্দিষ্ঠাদ্ধেতোর্গর্ভঃ কুক্ষৌ বিবর্দ্ধতে, যাবদনির্দিষ্ঠাদপি মাতুঃ সৌমনস্যাদেঃ কললার্বুদ পেশ্যাদ্যবস্থাভাবেন বিশেষতো বৃদ্ধিং যাতীতি| কথং বিবর্দ্ধতে ? ইত্যাহ-ক্রমাত্,-ন ঝটিত্যেব| ননু, "মাতুশ্চাহাররসজৈঃ" ইতি কথমুক্তম্ ? যতঃ পঞ্চভূতাত্মক এবাহাররসঃ| ন চ যদাত্মকোঽসৌ স তস্যৈব জন্মকারণং ভবিতুমর্হতি, অব্যতিরিক্তত্বাত্| তস্মাদেবমযং ব্যাখ্যাতব্যঃ,-আহাররসে জাতৈরাহাররসজৈঃ| সপ্তম্যন্তাদুপপদাজ্জনের্ডঃ| মাতুরাহাররসাত্মনা পরিণতৈরিতি|

Adhikarana garBapraveSopalamBAbhAve~api sthitau dRuShTAntaH (3) · Śloka 3

ননু, সত্বঃ কুক্ষৌ প্রবিষ্টো গর্ভস্য বর্দ্ধনে হেতুরুক্তঃ, ন চাস্য প্রবেশ উপলভ্যতে, ইত্যাহ তেজো যথাঽর্করশ্মীনাং স্ফটিকেন তিরস্কৃতম্| নেন্ধনং দৃশ্যতে গচ্ছত্সত্বো গর্ভাশযং তথা||৩||

ন কেবলং দৃশ্যত্বাদৃশ্যত্বাভ্যাং বস্তুসদ্ভাবাসদ্ভাবৌ ব্যবস্থাঽপ্যেতে, যেনাদৃশ্যত্বাত্সত্বস্য কুক্ষৌ প্রবেশাসম্ভবঃ| কিন্তর্হি ? তত্কার্যান্যথানুপপত্ত্যাঽপি বস্তুসদ্ভাবো ব্যবস্থাপ্যত এব| তথা চ,- যথাঽর্করশ্মীনাং সম্বন্ধি তেজঃ স্ফটিকেন-সূর্যকান্তাখ্যেন, তিরস্কৃতং-ব্যবহিতং, স্ফটিকস্যাধস্তাত্ স্থিতমিন্ধনং গচ্ছত্-ব্রজত্, ন দৃশ্যতে| অথ চ তেজঃকার্যমিন্ধনং গতং [দৃশ্যতে নান্যসম্বন্ধি কার্যম্| তদেবং তেজঃকার্যান্যথানুপপত্ত্যা তেজস ইন্ধনগমনং ], তথা তত্র তস্য সদ্ভাবোঽপ্যধিগম্যতে| এবং সত্বো গর্ভাশযং গচ্ছন্-ব্রজন্, ন দৃশ্যত এব| বস্তুপ্রভাবাদ্গচ্ছতি চ| সত্বশব্দ উপলক্ষণার্থঃ, মহাভূতান্যপি তদন্তর্গতানি ন দৃশ্যন্ত এব, অথ চ কার্যেণোপলভ্যন্ত এব| তদেবং সত্বানুযাযিভির্মহাভূতৈর্গর্ভঃ কুক্ষৌ বিবর্দ্ধতে, ন তু কেবলৈঃ সত্বানধিষ্ঠিতৈঃ| চেতোবক্রান্ত্যা হি ক্রমাত্কললাদিনা বস্তুজাতং বিবৃদ্ধিবিমলতামাপদ্যতে, নান্যথা মৃতশরীরবত্|

Adhikarana satvasya narAdirUpatve kAraNam (4) · Śloka 4

ননু, সত্বো ভূতানুগ একরূপ এব| তত্কথমনেকজাত্যাকৃত্যা নরতুরগোরগগজগবযাদিমত্যাঽঽলিঙ্গিতঃ সম্পদ্যতে ? ইত্যস্মিন্ পর্যনুযোগ ইদমাহ কারণানুবিধাযিত্বাত্কার্যাণাং তত্স্বভাবতা| নানাযোন্যাকৃতীঃ সত্বো ধত্তেঽতো দ্রুতলোহবত্||৪||

কারণং-হেতুং, অবশ্যমনুবিদধতীতি কারণানুবিধাযীনি| আবশ্যকে ণিনিঃ| কারণস্বভাবানি কার্যাণি ভবন্তি সর্বাণ্যেব, তস্মাদ্ধেতোঃ কার্যাণাং তত্স্বভাবতা| স্বভাবশব্দঃ সদৃশার্থঃ| তচ্ছব্দেন কারণং পরামৃশ্যতে, তস্য-কারণস্য স্বভাবতা, তত্সাদৃশ্যম্| তস্মাত্কার্যকারণসাদৃশ্যাদ্ধেতোঃ সত্বোমহাভূতানুগ একরূপ এব, অনেকরূপা নানাযোন্যাকৃতীঃ- জাতিবিম্ববিশেষান্, ধত্তে-ধারযতি| কথমিব ? দ্রুতলোহবত্| যথা রূপ্যাদিবস্তুজাতমগ্নিনা দ্রুতরূপতাং গতমেকরূপমেব সিক্থাদিকল্পিতাযাং নানারূপাযাং মনুষ্যাদ্যাকৃতৌ তন্নিষিক্তং তাং তামাকৃতিং যথাকল্পিতাং ধত্তে, এবং স সত্বো নানাযোনৌ গচ্ছতি, তাং তাং যথাস্বমাকৃতিং ধারযতি|

Adhikarana strIpunnapuMsakAnAM bhede kAraNam (5) · Śloka 5

তথা অত এব চ শুক্রস্য বাহুল্যাজ্জাযতে পুমান্| রক্তস্য স্ত্রী, তযোঃ সাম্যে ক্লীবঃ- |৫|

অত এব চ - পূর্বোক্তাত্কার্যকারণসাদৃশ্যাখ্যাদ্ধেতোঃ, শুক্রস্যপুংরেতসো, বাহুল্যাত্- বহুত্বাত্, সামর্থ্যলভ্যাচ্চ স্ত্রীরেতোরজোল্পত্বাত্ পুমান্ জাযতে ন স্ত্রী, তথাবিধস্য কারণস্যাভাবাত্| ["তথা, অত এব-পূর্বোক্তাত্কার্যকারণসাদৃশ্যাত্ স্ত্রীরেতসো" রক্তস্য, বাহুল্যাত্-বাহুত্বাত্, সামর্থ্যলভ্যাচ্চ পুংরেতোল্পত্বাত্ স্ত্রী জাযতে ন পুমান্, তথাবিধস্য কারণস্যাভাবাত্| ] পুংরেতো হি বলবত্, অল্পং স্ত্রীরজোঽভিভূয পুংগর্ভস্য কারণতাং যাতি| যদা তু স্ত্রীরজসো বলবত্বমল্পত্বং চ পুংরেতসঃ, তদাঽল্পং তু পুংরেতোঽভিভূয স্ত্রীরজঃ স্ত্র্যাখ্যস্য গর্ভস্য কারণতামাপদ্যতে| যদা তু শুক্রার্তবযোঃ সাম্যং-তুল্যত্বং ভবতি, তদা ন স্ত্রী ন পুমান্ জাযতে, অপি তু লিঙ্গদ্বযালিঙ্গিতঃ ক্লীবঃ-ষণ্ঢো, জাযতে| এবং পিতুঃ সম্বন্ধি শুক্রং স্ত্রীরক্তমিশ্রিতং গর্ভকারণম্| ন কেবলংপিতৃসম্বন্ধ্যেব মাতুর্বা| দারুবাহিনা তূক্তম্-"স্ত্রীপুংসযোস্তু সংযোগে যদ্যাদৌ বিসৃজেত্পুমান্| শুক্রং, ততঃ পুমান্ বীরো জাযতে বলবান্ দৃঢঃ|| অথ চেদ্বনিতা পূর্বং বিসৃজেদ্রক্তসংযুতম্| ততো রূপান্বিতা কন্যা জাযতে দৃঢসংহতা||" ইতি| অত এব চ পুংগর্ভাঃ কেচিত্কিঞ্চিন্মাতৃসদৃশা দৃশ্যন্তে, স্ত্রীগর্ভাশ্চ কেচিত্কিঞ্চিত্পিতৃসদৃশা দৃশ্যন্তে| ননু, "রসাদ্রক্তং ততো মাংসং মাংসান্মেদস্ততোঽস্থি চ| অস্থ্নো মজ্জা ততঃ শুক্রং শুক্রাদ্গর্ভঃ প্রজাযতে||" (হৃ. শা. অ. ৩/৬২) ইত্যবিশিষ্য নির্দিষ্টম্, ন তু পুংশুক্রাদ্গর্ভঃ প্রজাযত ইত্যেবং নির্দিষ্টম্| উভযোরপি চ স্ত্রীপুংসযোরবশ্যং সপ্তধাতুকত্বমভ্যুপগন্তব্যম্, ন পুংস এব| তদেবং তরুণীনাং কুসুমশরাক্রান্তমানসানাং তথাবিধেন পুরুষসংযোগেন বিনা কেবলাত্ স্মৃতিসংস্পর্শদর্শনাচ্চলিতপ্রস্ত্রুত (রক্ত)রেতসাং কিমিতি গর্ভো ন জাযতে ? শুক্রার্তবং হি গর্ভকারণম্| তচ্চ সন্নিহিতমেবেতি কেচিত্| তান্ ব্রূমহে| পুংশুক্রাভাবাত্| পুংশুক্রং হি স্ত্রীরেতোরক্তযুক্তং গর্ভকারণম্| ন চ তদত্রাস্তি| তদভাবাদ্গর্ভস্যানুত্পত্তিঃ| তথা সঙ্গ্রহেঽপ্যধ্যগীষ্ট (শা. অ. ১)-"যোষিতোঽপি স্ত্রবন্ত্যেব শুক্রং পুংসঃ সমাগমে| গর্ভস্য তু ন তত্কিঞ্চিত্কতোতীতি ন চিন্ত্যতে||" ইতি|

Adhikarana ekadaivAnekagarbhotpattau kAraNam (5-6) · Śloka 6

সাম্প্রতং যথাঽনেকগর্ভত্বং তুল্যকালং স্যাত্তথা প্রতিপাদযিতুমাহ শুক্রার্তবে পুনঃ||৫|| বাযুনা বহুশো ভিন্নে যথাস্বং বহ্বপত্যতা| |৬|

বাতেন যথাস্বং শুক্রার্তবে বহুশো ভিন্নে-বহুধা কৃতে সতি, বহ্বপত্যতা ভবতি| যথাস্বমিতি যদা শুক্রমাধিক্যেন বর্তমানং বাতেন বহুধা ভিদ্যতে তদা পুংগর্ভানেকত্বম্, যদা তু স্ত্রীরজ আধিক্যেন বর্তমানং বাযুনা বহুধা ভিদ্যতে তদা স্ত্রীগর্ভানেকত্বম্, ইতি বহ্বপত্যতা ভবতি| সূকরসারমেযাদিজাতিষু ত্বনেনৈব হেতুনা সদাঽবেকাপত্যতা|

Adhikarana viyonivikRutAkArANAmutpattau kAraNam (6) · Śloka 6

ননু, কথং বিযোনযো বিকৃতাকারাশ্চ গর্ভাঃ স্যুঃ ? বিযোনিবিকৃতাকারা জাযন্তে বিকৃতৈর্মলৈঃ||৬||

বিযোনযশ্চ বিকৃতাকারাশ্চ বিযোনিবিকৃতাকারাঃ, তে তথাবিধা গর্ভা জাযন্তে| কথম্ ? ইত্যাহ-বিকৃতৈর্মলৈঃ| বাতাদিভির্দুষ্টৈরুন্মার্গগামিভিঃ|

Adhikarana strINAM rajaHsrAvo mAsimAsi vIryavatputrotpattau kAraNam (7) · Śloka 7

মাসি মাসি রজঃ স্ত্রীণাং রসজং স্ত্রবতি ত্র্যহম্| বত্সরাদ্বাদশাদূর্ধ্বং যাতি পঞ্চাশতঃ ক্ষযম্||৭||

স্ত্রীণাং মাসি মাসি-প্রতিমাসং, রজো-রক্তং, ত্র্যহং স্ত্রবতি-ত্রীণি দিনানি প্রবর্ততে| ননু, "শুদ্ধে শুক্রার্তবে" ইতি পূর্বং শুক্রমেবোদ্দিষ্টম্, ততস্তস্যৈব নির্দেশো ন্যায্য ইতি শুক্রমানুপূর্বীপ্রাপ্তমুল্লঙ্ঘ্য কস্মাদ্রক্তং নির্দিষ্টম্? উচ্যতে| বহুবক্তব্যত্বাত্| রক্তে হি বহুবক্তব্যমস্তি, অতস্তদেব প্রাগ্বক্তুং যুক্তম্| ত্র্যহমিতি "কালাধ্বনোঃ" ইতি দ্বিতীযা| কিম্ভূতং রজঃ ? রসাজ্জাতংরসজম্| ননু, রক্তং রসজমেব| বক্ষ্যতি হি (হৃ. শা. অ. ৩/৬২)- "রসাদ্রক্তং ততো মাংসং" ইত্যাদি| তত্কিমর্থং রসজমিত্যুক্তম্ ? ব্রূমহে| রসাত্-আহাররসাত্ পরিণমতো জাতং রসজমিত্যত্র নির্দিষ্টম্, ন তু রসধাতোঃ, ইত্যচোদ্যমেতত্| কুতঃপ্রভৃতি তদ্রজঃ প্রবর্ততে ? ইত্যাহ-বত্সরাদিত্যাদি| দ্বাদশাদ্বর্ষাদূর্ধ্বং-অনন্তরং, স্ত্রবতি| পঞ্চাশতো বর্ষাদূর্ধ্বং-পরেণ, ক্ষযং যাতি| দ্বাদশানাং পূরণং বর্ষমিতি "তস্য পূরণো ডট্" ইতি ডট্| দ্বাদশাদিতি প্রাযিকমেতত্, একাদশবার্ষিকাণামপি স্ত্রীণাং রক্তপ্রবৃত্তিদর্শনাত্| পঞ্চাশতঃ ক্ষযমিত্যত্রাপ্যেবমেব চিন্ত্যম্|

Adhikarana garbhasyarogAdiyutatve kAraNam (8-9) · Śloka 9

পূর্ণষোডশবর্ষা স্ত্রী পূর্ণবিংশেন সঙ্গতা| শুদ্ধে গর্ভাশযে মার্গে রক্তে শুক্রেঽনিলে হৃদি||৮|| বীর্যবন্তং সুতং সূতে ততো ন্যূনাব্দযোঃ পুনঃ| রোগ্যল্পাযুরধন্যো বা গর্ভো ভবতি নৈব বা||৯||

পূর্ণানি ষোডশবর্ষাণি যস্যাঃ সা, এবংবিধা স্ত্রী পূর্ণবিংশেন নরেণ সঙ্গতা-মিথুনতাং যাতা সতী, গর্ভাশযাদিষু শুদ্ধেষু বীর্যবন্তং-সামর্থ্যযুক্তং, পুত্রং সূতে-জনযতি| প্রাযিকং চৈতত্, অর্বাগপি সাধুগর্ভদর্শনাত্| অত এবাযমেব তন্ত্রকারোঽন্যথা সঙ্গ্রহে জগাদ (শা. অ. ১)- "ষোডশবর্ষাযাং পঞ্চবিংশতিবর্ষঃ পুত্রার্থং প্রযতেত|" ইতি| বিংশতেঃ পূরণ ইতি ডটিতি "বিংশতেঃ" ইতি তিলোপে বিংশশব্দঃ| পূর্ণো বিংশো যস্যেতি পূর্ণবিংশঃ| গর্ভস্যাশযো গর্ভাশযঃ, তস্মিন্| শুদ্ধে-নির্মলে, বাতাদিভিরদুষ্টে| তথা, মার্গে-প্রকৃতত্বাদপত্যমার্গে, বাতাদিভিরদুষ্টে| তথা, রক্তেস্ত্রীরজসি, শুদ্ধে| তথা, শুক্রে-পুংবীজে, শুদ্ধে| তথা, অনিলে শুদ্ধেপিত্তাদিভিরনাবৃতে| তথা, হৃদি-শুদ্ধে-দোষানধিষ্ঠিতেঽসন্তপ্তে| ততঃ-পূর্বোক্তাদ্বযঃপরিমাণাত্, ন্যূনাব্দযোঃ-হীনবর্ষযোঃ স্ত্রীপুরুষযোঃ পঞ্চদশাষ্টাদশবর্ষযোঃ, রোগী ভবতি| রোগীত্যতিশয ইনির্মত্বর্থীযঃ| তথোত্পন্নোঽল্পাযুরধন্যশ্চ-অপ্রশস্তো, গর্ভো ভবতি| ন ভবত্যেব বা|

Adhikarana SukrArtavasaMyoge~api garbhAsambhave kAraNam (10) · Śloka 10

ননু, দম্পত্যোঃ শুক্রার্তবসংযোগেঽপি সতি ক্বচিদ্গর্ভসম্ভূতির্ন দৃশ্যতে| তত্কথমেতত্ ? ইত্যাশঙ্ক্যেদমাহ বাতাদিকুণপগ্রন্থিপূযক্ষীণমলাহ্বযম্| বীজাসমর্থং রেতোস্রম্|১০|

আদিশব্দেন পিত্তশ্লেষ্মণোঃ পরিগ্রহঃ| বাতাদযশ্চ কুণপং চ গ্রন্থিশ্চ পূযশ্চ ক্ষীণং চ মলং চেতি দ্বন্দ্বঃ| এত আহ্বযঃ- সংজ্ঞাঃ, যস্য রেতোস্ত্রস্য তদেবম্| আহ্বযশব্দঃ প্রত্যেকং বাতাদিষু যোজ্যঃ| রেতশ্চাস্ত্রং চ রেতোস্ত্রং বাতাদ্যাহ্বযম্| বাতসংজ্ঞং শুক্রং বাতশুক্রম্| এবং পিত্তশুক্রং কফশুক্রম্| কুণপগন্ধিত্বাত্কুণপং নাম শুক্রং কুণপশুক্রম্, তদ্রক্তেন দুষ্টেন ভবতি| এবং গ্রন্থিশুক্রং পূযশুক্রং ক্ষীণশুক্রম্| মলাহ্বযং তু দ্বিধা,-মূত্রপুরীষভেদাত্| মূত্রসদৃশং শুক্রং মূত্রশুক্রম্| এবং পুরীষশুক্রম্| আর্তবমপি শুক্রবদ্দোষদূষিতমবীজমেব| তস্য লিঙ্গং নাম চ শুক্রবদ্বেদ্যম্| যথা,-বাতার্তবং পিত্তার্তবমিত্যাদি, যাবত্পুরীষার্তবমিতি| সাধ্যাসাধ্যবিভাগশ্চ তদ্বদেব| শুক্রার্তবদোষেষু চ চিকিত্সামপি তুল্যাং ব্রূতে| যত্র তু বিশেষং দ্রক্ষ্যতি, তত্র বিশেষমভিধাস্যতি| যথা (শ্লো.১৫)-"পিবেদ্গ্রন্থ্যার্তবে পাঠা" ইত্যাদি|

Adhikarana svali~ggairvAtAdidoShajaSukraj~jAnam ,kuNapagranthipUyakShINamalAhvayAnAM retosrANAM kAraNAni (10-12) · Śloka 12

| স্বলিঙ্গৈর্দোষজং বদেত্||১০|| রক্তেন কুণপং, শ্লেষ্মবাতাভ্যাং গ্রন্থিসন্নিভম্| পূযাভং রক্তপিত্তাভ্যাং, ক্ষীণং মারুতপিত্ততঃ||১১|| কৃচ্ছ্রাণ্যেতান্যসাধ্যং তু ত্রিদোষং মূত্রবিট্প্রভম্| |১২|

স্বানি চ তানি লিঙ্গানি-লক্ষণানি চ, স্বলিঙ্গানি,-যথাস্বং বাতাদীনাং রূপাণি| যথা,-রূক্ষশ্যাবারুণাদীনি বাযোঃ, বিস্ত্রগন্ধ্যৌষ্ণ্যাদীনি পিত্তস্য, স্নিগ্ধপাণ্ডুপিচ্ছিলাদীনি কফস্য তৈঃ স্বলিঙ্গৈর্বাতাদিদোষজং বদেত্- জানীযাত্,বৈদ্যঃ |ইতি শেষঃ| রক্তেন দুষ্টেন কুণপং-কুণপগন্ধিত্বাত্কুণপসংজ্ঞং, অন্বর্থং রেতোস্ত্রং ভবতি| এবং গ্রন্থ্যাদীনামপ্যন্বর্থসংজ্ঞতা বোধ্যা| শ্লেষ্মবাতাভ্যাং দুষ্টাভ্যাং গ্রন্থিসন্নিভং-গ্রন্থ্যাকারম্| পূযাভং-পূযসদৃশম্, রক্তপিত্তাভ্যাং রেতোস্ত্রং পূযাহ্বযং ভবতি| ক্ষীণং নাম রেতোস্ত্রং মারুতপিত্ততো ভবতি, মারুতপিত্তাভ্যাং দুষ্টাভ্যাং দুষ্টং তদ্দূষাণাত্ ক্ষীণতাং নীতমিত্যর্থঃ| পূর্বোক্তানীমানি বাতাদিশুক্রার্তবানি ক্ষীণশুক্রার্তবান্তানি কৃচ্ছ্রসাধ্যত্বাত্ কৃচ্ছ্রাণি| অসাধ্যং ত্বিতি| মূত্রং চ বিট্ চ মূত্রবিশৌ, তযোরিব প্রভা যস্য তদেবম্| রেতোস্ত্রমুভযমপি মলসংজ্ঞম্| ত্রিদোষং-ত্রিদোষদুষ্টম্| অসাধ্যং-সাধযিতুমশক্যম্|

Adhikarana vAtAdijAnAmupakramaH (12) · Śloka 12

ইদানীমুপক্রমমাহ | কুর্যাদ্বাতাদিভির্দুষ্টে স্বৌষধম্|১২|

স্বং-আত্মীযং, চ তদৌষধং চ স্বৌষধম্, বাতাদ্যৌষধমিত্যর্থঃ| তেন বাযোঃ কুপিতস্য যদৌষধং-প্রশমোপাযঃ স্নিগ্ধোষ্ণাম্ললবণাদি, পিত্তস্য মধুরশীতকষাযাদি, শ্লেষ্মণঃ কটুকরূক্ষকষাযাদি, তত্তস্য ভেষজমিত্যবতিষ্ঠতে| বিশেষতস্তু-"বাতজেশুক্রদোষে বসুকসৈন্ধবফলাম্লসিদ্ধং যবক্ষারপ্রতীবাপং সর্পিষ্পানম্, বিল্ববিদারীসিদ্ধং ক্ষীরযুক্তমাস্থাপনম্, মধুভদ্রদারুসিদ্ধং তৈলমনুবাসনম্, ক্ষীরকুলীররসসিদ্ধং তৈলমনুবাসনমুত্তরবস্তিশ্চ| পৈত্তিকে কাণ্ডেক্ষুশ্বদংষ্ট্রাগুডূচীক্বাথসিদ্ধং মূর্বামধূকপ্রতীবাপং সর্পিষ্পানম্, ত্রিবৃচ্চূর্ণঃ সঘৃতো বিরেকঃ পযস্যাশ্রীপর্ণীসিদ্ধং ক্ষীরযুক্তমাস্থাপনম্, মধুকমুদ্গপর্ণীসিদ্ধং তৈলমনুবাসনমুত্তরবস্তিশ্চ| শ্লৈষ্মিকে পাষাণভেদাশ্মন্তকামলকক্বাথসিদ্ধং পিপ্পলীমধুকচূর্ণপ্রতীবাপং সর্পিষ্পানম্, মদনফলকষাযো বমনম্, দন্তীবিডঙ্গচূর্ণস্তৈললীঢো বিরেকঃ, রাজবৃক্ষমদনফলকষাযপ্রগাঢমাস্থাপনম্, মধুকপিপ্লীসিদ্ধং তৈলমনুবাসনমুত্তরবস্তিশ্চ| বাতজে পুষ্পদোষে ভার্গীভদ্রদারুসিদ্ধং সর্পিষ্পানম্, কাশ্মর্যক্ষুদ্রসহাসিদ্ধং বা ক্ষীরম্, মধুকশৃগালবিন্নাকল্কং পযঃসর্পিঃসহিতং প্রিযঙ্গুতিলকল্কং বা যোনৌ ধারযেত্, সরলমুদ্গপর্ণীকষাযঃ প্রক্ষলনম্| পিত্তজে কাকোলীদ্বযবিদারীমূলক্বাথমুত্পলপদ্মকক্বাথং মধুকপুষ্পকাশ্মর্যফলক্বাথং বা সশর্করং পিবেত্, শ্বেতচন্দনক্বাথং বা সক্ষৌদ্রম্|" ইত্যাদিকং সঙ্গ্রহাত্ (শা. অ. ১) বোধ্যম্|

Adhikarana kuNape upakramaH (12-13) · Śloka 13

ইদানীং কুণপচিকিত্সামাহ | কুণপে পুনঃ||১২|| ধাতকীপুষ্পখদিরদাডিমার্জুনসাধিতম্| পাযযেত্সর্পিরথবা বিপক্বমসনাদিভিঃ||১৩||

কুণপাহ্বযে তু রেতসি ধাতক্যাদিদ্রব্যসাধিতং ঘৃতং পাযযেত্, বৈদ্য ইতি শেষঃ| অথবা, অসনাদিভিঃ-অসনাদিগুণোদ্দিষ্টৈর্ভেষজৈঃ (হৃ.সূ.অ.১৫/১৯) বিপক্বং ঘৃতং পাযযেত্| ননু, কুণপ ইতি সামান্যোক্তাবপি কথং রেতসীতি বিষেষো লভ্যতে| ব্রূমঃ| রেতঃপ্রকরণাত্| অপি চ কুণপাস্ত্রস্য পুরস্তাদুপক্রমং বক্ষ্যতি (শ্লো.১৬)-"পেযং কুণপপূযাস্রে" ইতি| তস্মাদ্রেতস এবেহ গ্রহণং যুক্তম্| পুনর্গ্রহণমত্র বাতাদিদুষ্টে রেতস্যস্রোক্তাং ক্রিযাং কুর্যাদিতি দ্যাতযতি|

Adhikarana granthisaMj~je retasyupakramaH (14) · Śloka 14

সাম্প্রতং গ্রন্থিসংজ্ঞে রেতস্যুপক্রমং ব্রূতে পলাশভস্মাশ্মভিদা গ্রন্থ্যাভে| |১৪|

পলাশস্য ভস্ম পলাশভস্ম| অশ্মভিত্-পাষাণভেদঃ| পলাশভস্ম চাশ্মভিচ্চ, তেন বিপক্বং ঘৃতং গ্রন্থ্যাভে-গ্রন্থিনাম্নি রেতসি, পাযযেত্|

Adhikarana pUyaretasyupakramaH (14) · Śloka 14

পূযরেতসি| পরুষকবটাদিভ্যাম্|১৪|

পূযাখ্যে রেতসি পরূষকবটাদিভ্যাং বিপক্বং ঘৃতং পাযযেত্| পরুষকশ্চ বটশ্চ পরূষকবটৌ, তাবাদী যযোর্গণযোস্তৌ পরুষকবটাদী, তাভ্যাম্| "পরুষকং বরা দ্রাক্ষা" (হৃ.সূ. অ.১৫/১৩) ইতি পরুষকাদিঃ| তথা, "ন্যগ্রোধপিপ্পল" (হৃ.সূ. অ. ১৫/৪১) ইতি বটাদিঃ|

Adhikarana kShINAhvayeretasyupakramaH (14) · Śloka 14

| ক্ষীণে শুক্রকরী ক্রিযা||১৪||

ক্ষীণে-ক্ষীণত্বাত্ ক্ষীণাহ্বযে রেতসি, শুক্রকরী ক্রিযা| কার্যেতি শেষঃ| শুক্রলমতিশযেন সেব্যমিত্যর্থঃ|

Adhikarana malasadRuSe retasyupakramaH (15) · Śloka 15

সংশুদ্ধো বিট্প্রভে সর্পির্হিঙ্গুসেব্যাদি(গ্নি)সাধিতম্| পিবেত্|১৫|

সংশুদ্ধঃ-কৃতবমনবিরেচনঃ, বিট্প্রভে-বিণ্মলসদ্দশে রেতসি, আতুরো ঘৃতং পিবেত্| কিম্ভূতম্ ? হিঙ্গুসেব্যাদিসাধিতম্| অত্রাদিশব্দো ব্যবস্থাবাচী| তেন সঙ্গ্রহোক্তস্য (শা. অ. ১)- "হিঙ্গূশীর[চিত্রকৈরথবা] চিত্রক[বিতুন্নক] প্রিযঙ্গু[হিঙ্গু]সমঙ্গামৃণালসিদ্ধমেলাচোচচূর্ণপ্রতীবাপম্|" ইত্যস্য পাঠস্য সূচনা ভবতি| হিঙ্গুসেব্যাগ্নিসাধিতমিত্যপরে পেঠুঃ| ননু, "অসাধ্যং তু ত্রিদোষং মূত্রবিট্প্রভম্|" (শ্লো.১২) ইত্যুবাচ তন্ত্রকৃত্| তত্কিমিত্যস্য চিকিত্সোপদিষ্টা ? ব্রূমঃ| কিঞ্চিত্সাধ্যতাঽপ্যস্যাস্তীতি প্রতিপাদযিতুং চিকিত্সামুপদিদেশ শাস্ত্রকারঃ| অত এব মূত্রপ্রভস্যাসাধ্যত্বাচ্চিকিত্সাং নোপাদিশত্| মূত্রপ্রভার্তববিট্প্রভার্তবযোরপ্যসাধ্যত্বাদেবোপক্রমং নাভ্যধাত্|

Adhikarana granthinAmnyArtave upakrame (15) · Śloka 15

বাতদ্যার্তবেষু "স্বৌষধং কুর্যাত্" (শ্লো.১২) ইত্যুক্তম্| কুণপগ্রন্থ্যদ্যার্তবেষু বিশেষেণ চিকিত্সাং বক্ষ্যতি | গ্রন্থ্যার্তবে পাঠাব্যোষবৃক্ষকজং জলম্||১৫||

গ্রন্থ্যার্তবে-গ্রন্থিনাম্র্যার্তবে স্ত্রীরজসি, জলং পিবেত্| কিম্ভূতম্ ? পাঠাদিজাতম্| পাঠা-প্রাচীনা| ব্যোষং-ত্রিকটুকম্| বৃক্ষকঃ-কুটজঃ|

Adhikarana kuNapapUyAstrayorupakramaH SuddhaSukralakShaNam (16) · Śloka 16

পেযং কুণপপূযাস্ত্রে চন্দনং বক্ষ্যতে তু যত্| গুহ্যরোগে চ তত্সর্বং কার্যং সোত্তরবস্তিকম্||১৬||

কুণপাখ্যে রজসি পূযাখ্যে চাপি চন্দনং পেযম্| অত্র 'দ্রবানুক্তৌ জলং দেযম্' (হৃ. ক. অ. ৬/২৩) ইতি পরিভাষযা জলেন পাতব্যমিতি বোধ্যম্| ক্ষীণার্তব ইহ চিকিত্সিতং নোক্তম্, তচ্চ স্বধিযোহ্যম্| যথা ক্ষীণরেতসি শুক্রকরী ক্রিযা কার্যেত্যুক্তম্, তথা ক্ষীণে রক্তে রক্তকরী ক্রিযা কার্যেতি| ন চ কেবলমেতত্পূর্বোক্তমেব চিকিত্সিতং কার্যম্, যাবদ্গুহ্যরোগপ্রতিষেধে যদ্বক্ষ্যতে-ভণিষ্যতে, তদপি সর্বং সাধনং যথাযোগং বমনাদি যোনৌ পিচুকধারণাদিকং চ কার্যম্| কিম্ভূতম্ ? সোত্তরবস্তিকম্| সহোত্তরবস্তিনা বর্তত ইতি সোত্তরবস্তিকম্| উত্তরবস্তিরপি তত্র কার্য ইত্যর্থঃ| সোত্তরবস্তিকমিতি "তেন সহেতি তুল্যযোগে" ইতি বহুব্রীহিঃ, "শেষাদ্বিভাষা" ইতি কপ্, 'বোপসর্জনস্য" ইতি সভাবঃ| উত্তরবস্তিরপি তত্রৌষধমিত্যর্থঃ|

Adhikarana SuddhArtavalakShaNam (17-18) · Śloka 18

বীজাসমর্থং রেতোস্ত্রমভিধায সাম্প্রতং শুদ্ধং যচ্ছুক্রার্তবং বীজসমর্থং তল্লক্ষাণার্থমাহ শুক্রং শুক্লং গুরু স্নিগ্ধং মধুরং বহলং বহু| ঘৃতমাক্ষিকতৈলাভং সদ্গর্ভায আর্তবং পুনঃ||১৭|| লাক্ষারসশশাস্ত্রাভং ধৌতং যচ্চ বিরজ্যতে| |১৮|

শুদ্ধে শুক্রার্তব ইতি পূর্বং শুক্রস্যোপদেশাত্প্রাধান্যাচ্চ শুক্রস্য পূর্বমুপন্যাসঃ| "তত্রাহাররসস্য সম্যক্পরিণতস্য ক্রমান্মজ্জানমনুপ্রাপ্তস্য সারঃ শুক্রসংজ্ঞাং লভতে| তচ্চ ক্ষীর ইব সর্পিরিক্ষুরস ইব গুডঃ শরীরে শুক্রধারাং কলামাশ্রিত্য সর্বাঙ্গব্যাপিতযা স্থিতম্| বিশেষতশ্চ মজ্জমুষ্কস্তনেষু| হর্ষোদীরিতং তু সঙ্ঘট্টনেন হৃদযাবেশাত্ পিণ্ডীভূতমঙ্গাদঙ্গাত্প্রবর্ততে (সঙ্গ্রহে শা. অ.১)|" তচ্চ শুক্লাদিগুণযুক্তং শুক্রম্| তথা, ঘৃতাভং মাক্ষিকাভং তৈলাভং বা সদ্গর্ভায-শোভনগর্ভার্থং, ভবতি| তব ঘৃতাভেন গৌরবর্ণত্বং গর্ভস্য, মাক্ষিকাভেন শ্যামবর্ণত্বং, তৈলাভেন কৃষ্ণবর্ণত্বং, ভবতি| "রক্তমেব স্ত্রীণাং মাসি মাসি গর্ভকোষ্ঠমনুপ্রাপ্য ত্র্যহং প্রবর্তমানমার্তবমাচক্ষতে| অতিপ্রসঙ্গেনানৃতৌ বা প্রবর্তমানং তদেবাসৃগ্দরাদিসংজ্ঞাং লভতে" (সং.শা.অ.১)| যদার্তবং লাক্ষা রসাভং-অলক্তকরসসদৃশম্ , তথা শশরুধিরসদৃশম্, তথা যচ্চ ধৌতং সদ্বিরজ্যতে-বস্ত্রাদিলগ্নং ধৌতং সল্লৌহিত্যং জহাতীত্যর্থঃ| তদীদৃশমার্তবং তু সদ্গর্ভায সম্পদ্যতে|

Adhikarana garbhasambhavAtpUrvamitikartavyatA (18-19) · Śloka 19

শুদ্ধশুক্রার্তবলক্ষণমুক্ত্বা, ইদানীং গর্ভসম্ভবাত্পূর্বমিতি কর্তব্যতামাহ | শুদ্ধশুক্রার্তবং স্বস্থং সংরক্তং মিথুনং মিথঃ||১৮|| স্নেহৈঃ পুংসবনৈঃ স্নিগ্ধং শুদ্ধং শীলিতবস্তিকম্| |১৯|

শুক্রং চার্তবং চ শুক্রার্তবে, শুদ্ধে শুক্রার্তবে যস্য মিথুনস্য তচ্ছুদ্ধশুক্রার্তবম্,-স্ত্রীপুরুষযুগলং, সমুপাচরেদিতি সম্বন্ধঃ| তথা, স্বস্থং-অরোগং, রোগলেশেনাপ্যনাক্রান্তম্| তথা, মিথঃ পরস্পরং, সংরক্তং-অনুরাগযুক্তমন্যোন্যদর্শনেন কুসুমচাপাবিষ্টমেবংবিধম্| স্নেহৈঃ পুংসবনৈঃ-যথাভিমতগর্ভগ্রহণপ্রভাবৈঃ ফলসর্পির্মহাকল্যাণকাদিভিঃ, স্নিগ্ধম্| তথা, শুদ্ধং-কৃতবমনবিরেচনম্| তথা শীলিতবস্তিকম্, শীলিতাঃ-অভ্যাসেনানুষ্ঠিতাঃ, বস্তযো যেন-মিথুনেন, তচ্চীলিতবস্তিকম্| ন সকৃদেবানুষ্ঠিতবস্তিকমিত্যর্থঃ|

Adhikarana dampatyoH pRuthagupakramaH ,kShIrAdibhirnarasyopacAraH (19) · Śloka 19

| নরং বিশেষাত্ক্ষীরাজ্যৈর্মধুরৌষধসংস্কৃতৈঃ||১৯||

বিশেষাত্-বিশেষেণাতিশযেন, নরং ক্ষীরৈর্ঘৃতৈশ্চ সমুপাচরেদিতি সম্বন্ধঃ| বিশেষাদিত্যনেনৈতত্ দ্যোতযতি| বিশেষেণ নরং ক্ষীরাজ্যৈঃ সমুপাচরেত্, ন পুনর্নারীমপি তৈর্ন সমুপাচরেদিতি| কিম্ভূতৈঃ ? মধুরৌষধসংস্কৃতৈঃ মধুরাণি-মধুরপ্রাযাণি মধুরপ্রভাবানি চ তান্যৌষধানি-জীবনিযাদীনী, [চ]তৈর্মধুরৌষধৈঃ, সংস্কৃতৈঃ-সিদ্ধৈঃ|

Adhikarana tailAdibhirnAryAH samupacAraH (20) · Śloka 20

নারীং তৈলেন মাষৈশ্চ পিত্তলৈঃ সমুপাচরেত্| |২০|

নারীং তৈলেন মাষৈশ্চ সমুপাচরেত্| চশব্দোঽত্র ভিন্নক্রমঃ| পিত্তলৈশ্চ সমুপাচরেদিত্যর্থঃ| পিত্তলানি হি রক্তবৃদ্ধিহেতবঃ| উক্তং হি (হৃ. সূ. অ. ১১/২৬)-"আশ্রযাশ্রযিণাং মিথঃ| যদেকস্য তদন্যস্য বর্দ্ধনক্ষপণৌষধম্||" ইতি| এবং চ তৈলং পিত্তকৃত্ত্বাদেবোপন্যস্তম্| বিশেষাদিত্যত্রাপ্যনুবর্ততে| ক্ষীরাজ্যেভ্যোঽপি বিশেষেণ নারিং তৈলদিভিঃ সমুপাচরেদিত্যর্থঃ| পুরুষস্য তু রজসোঽভাবাত্তদ্বৃদ্ধিহেতবস্তৈলাদযো নোপযুজ্যন্ত এব|

Adhikarana strImadhikRutya garbhagrahaNayogyatA (20-21) · Śloka 21

ঊর্বোক্তসকলসামগ্রীযুক্তাদপি মিথুনাদ্বিশিষ্টকালমন্তরেণ গর্ভস্যাসম্ভব ইতি স্ত্রীমধিকৃত্য তদ্গর্ভগ্রহণযোগ্যং কালং দর্শযিতুমাহ | ক্ষামপ্রসন্নবদনাং স্ফুরচ্ছ্রোণিপযোধরাম্||২০|| স্বস্তাক্ষিকুক্ষিং পুংস্কামাং বিদ্যাদৃতুমতীং স্ত্রিযম্| |২১|

কার্শ্যহেতুং বিনা ক্ষামং, তথা প্রসন্নং-নির্মলং, বদনং-মুখং, যস্যাঃ সৈবংভূতা, তাম্| শ্রোণিশ্চ পযোধরৌ চ শ্রোণিপযোধরম্, স্ফুরত্-কম্পমানং, শ্রোণিপযোধরং যস্যাঃ সা, তাম্| শ্রোণিঃ-কটিঃ| স্ত্রস্তে-চ(গ)লিতে, ইবাক্ষিণী কুক্ষিশ্চ যস্যাঃ সা তাম্| তথা, পুংসি কামঃ-অভিলাষো, যস্যাঃ সা, তাম্| এবংবিধাং স্ত্রিযমৃতুমতীং-ঋতুযুক্তাং, বিদ্যাত্| তস্যাঃ স গর্ভগ্রহণকাল ইত্যর্থঃ| পুংস্কামামিতি "সংপুংকানাং সো বক্তত্র্যঃ" ইতি মকারস্য সকারদেশাদ্রুত্বাভাবঃ|

Adhikarana RutAvatIte yonisa~gkocAdi (21-22) · Śloka 22

"সর্বং চ হেতুমদ্ব্রূযাত্" ইত্যাগমঃ, অত আহ | পদ্মং সঙ্কোচমাযাতি দিনেঽতীতে যথা, তথা||২১|| ঋতাবতীতে যোনিঃ, সা শুক্রং নাতঃ প্রতীচ্ছতি| |২২|

যথা দিবা প্রফুল্লং পদ্মমনন্তরং দিবসাতিক্রান্তৌ সঙ্কোচমাযাতি-মুকুলভাবং প্রাপ্নোতি, তত্স্বভাবত্বাত্তস্য| তথা-তেনৈব প্রকারেণ, ঋতাবতীতে-অতিক্রান্তে দ্বাদশরাত্রস্বভাবে যোনিঃ সঙ্কোচমাযতি| সা চ-যোনিঃ, [অতঃ] সঙ্কুচিতত্বাত্ শুক্রং ন প্রতীচ্ছতীতি|

Adhikarana mAsenopacitaM raktaM vAyuryonimukhAnnudet (22-23) · Śloka 23

বিবৃতাবিবৃতমুখত্বং হি যোনের্গর্ভগ্রহণাগ্রহণহেতুঃ| তচ্চ বাযোঃ ক্রিযাবতঃ কালসহাযস্যাযত্তমিত্যাহ | মাসেনোপচিতং রক্তং ধমনীভ্যামৃতৌ পুনঃ||২২|| ঈষত্কৃষ্ণং বিগন্ধং চ বাযুর্যোনিমুখান্নুদেত্| |২৩|

মাসেন যদুপচিতমাহাররসতো বৃদ্ধিং প্রাপ্তং রক্তং তত্পুনর্মাসেনোপচিতং রক্তমৃতৌ বাযুর্যোনিমুখান্নুদেত্-প্রেরযেত্| বিধৌ লিঙ্| তদা যোনিমুখং বিবৃতং সম্পদ্যতে| কেন নুদেত্ ? ধমনীভ্যাংস্রোতোবিশেষাভ্যাং| কিম্ভূতং রক্তম্ ? ঈষাত্কৃষ্ণং, তথা বিগন্ধংবিস্রগন্ধরহিতম্| প্রকৃতিস্থপ্রেরকপবনসম্পর্কাদীষত্কৃষ্ণতা, ন তু কুপিতসমীরণপ্রেরণসংশ্লেষবশাদিবাত্যন্তং কৃষ্ণতা| নাপি পিত্তেন তথাভূতেন যুক্তম্, যেন বিস্ত্রগন্ধি স্যাত্| নাপি শ্লেষ্মণা তথাভূতেন যুক্তম্, যেন তদ্বর্ণযুক্তং স্যাত্| তস্মাচ্ছুদ্ধং বিশিষ্টে কালে যোনিমুখাত্প্রবর্তমানং রক্তমার্তবসংজ্ঞাং লভতে| তদেব চান্যদা যোনিমুখাত্প্রবর্তমানমসৃগ্দরসংজ্ঞামাসাদযতি|

Adhikarana rajasvalayA vartanaprakAraH RutumatyAScaturthadinakRutyam (23-26) · Śloka 26

শুদ্ধং চ রক্তং পুষ্পসংজ্ঞম্, গর্ভাখ্যস্য ফলস্য ভবিষ্যতোঽভিব্যঞ্জকত্বাত্| অত এবাহ | ততঃ পুষ্পেক্ষণাদেব কল্যাণধ্যাযিনী ত্র্যহম্||২৩|| মৃজালঙ্কাররহিতা দর্ভসংস্তরশাযিনী| ক্ষৈরেযং যাবকং স্তোকং কোষ্ঠশোধনকর্ষণম্||২৪|| পর্ণে শরাবে হস্তে বা ভুঞ্জীত ব্রহ্মচারিণী| চতুর্থেঽহ্নি ততঃ স্নাতা শুক্লমাল্যাম্বরা শুচিঃ||২৫|| ইচ্ছন্তী ভর্তৃসদৃশং পুত্রং পশ্যেত্পুরঃ পতিম্| |২৬|

পুষ্পেক্ষণাত্-পুষ্পস্য দর্শনাদেবানন্তরং, স্ত্রী ত্র্যহং-ত্রীণি দিনানি, কল্যাণং-শুভং, অবশ্যং ধ্যাযতি-চিন্তযতীতি কল্যাণধ্যাযিনী স্যাত্| আবশ্যকে ণিনিঃ| তথা, মৃজা-স্নানক্রিযা, অলঙ্কারঃ-কটকাদিঃ পুষ্পাদির্বা, অলঙ্ক্রিযতে-ভূষ্যতে শরীরমেভিরিতি কৃত্বা, এবং গন্ধমাল্যস্যাপ্যলঙ্কারত্বম্| তথা চ বক্ষ্যতি (হৃ. চি. অ. ৫/৮২)- "গন্ধমাল্যাদিকাং ভূষাম্" ইতি| মৃজালঙ্কারাভ্যাং রহিতা-বর্জিতা| তথা দর্ভাণাং সংস্তরঃ-শয্যা, তত্র শেতে সা দর্ভসংস্তরশাযিনী| "ব্রতে" ইতি ণিনিঃ| তথা, ক্ষৈরেযং-ক্ষীরসিদ্ধং, যাবকং-যবান্নবিশেষং, পর্ণে শরাবে হস্তে বা ভুঞ্জীত-ভক্ষযেত্| কিযন্মাত্রম্ ? স্তোকং-অল্পমাত্রম্| তত্ক্ষৈরেযমুপযুক্তং কীদৃশং স্যাত্ ? ইত্যাহ-কোষ্ঠশোধনকর্ষণমিতি| শোধনং চ কর্ষণং চ শোধনকর্ষণম্| কোষ্ঠস্য শোধনকর্ষণমিতি ষষ্ঠীসমাসঃ| শরীরস্য মহাস্ত্রোতো মধ্যমো ভাগ আমপক্বস্যাশযঃ কোষ্ঠশব্দবাচ্যঃ| স এব গর্ভাধিষ্ঠানম্, অতস্তস্যৈব শোধনম্| তথা, তদঙ্গানাং কর্ষণমিতি ব্যাখ্যেযম্| ন পুনঃ কোষ্ঠস্য শোধনমন্যেষাং চাঙ্গানাং কর্ষণম্| তথা হি-ত্রিবৃদাদিনা বিরিচ্যতে, নৈবমনেন যাবকেন| বস্তুস্বাভাব্যাত্ কোষ্ঠশোধনকর্ষণমাত্রমেব ক্রিযতে| ক্ষৈরেযমিতি "ক্ষীরাড্ঢঞ্" ইতি ঢঞ্| যাব এব যাবক ইতি "যাবাদিভ্যঃ কন্" ইতি কন্| তথা, ব্রহ্মচারিণী-ত্যক্তব্যবাযা, স্যাত্| ততঃ-ত্র্যহাদূর্ধ্বং,চতুর্থে বাসরে স্নাতা, তথা শুক্লানি মাল্যান্যম্বরাণি চ যস্যাঃ সৈবম্, তথা শুচিঃ-অন্তর্বহিশ্চ পবিত্রা সতী, পুরঃ-পূর্বং, পতিং পশ্যেত্| সঙ্গ্রহেঽপ্যুক্তম্ (শা. অ. ১)- চতুর্থে ত্বহন্যুদ্বর্তিতা শীতসলিলস্নাতাঽনুলিপ্তাঽলঙ্কৃতা শুক্লমাল্যাম্বরা কৃতমঙ্গলস্বস্ত্যযনৈবংবিধমেব ভর্তারং পশ্যেদনন্যমনাঃ| তদা হি যাদৃশং পশ্যতি চিন্তযতি বা তাদৃশমেব প্রসূত ইতি|" ইতি|

Adhikarana Rutusthitau kAlaparimANam same putraH viShame kanyA (26-27) · Śloka 27

তত্কিং ত্র্যহমেব ঋতুঃ, অত্রৈব পুষ্পদর্শনাত্| অথোত্তরকালমপি ? ইত্যাশঙ্ক্যাহ | ঋতুস্তু দ্বাদশ নিশাঃ পূর্বাস্তিস্রোঽত্র নিন্দিতাঃ||২৬|| একাদশী চ, যুগ্মাসু স্যাত্পুত্রোঽন্যাসু কন্যকা| |২৭|

পুষ্পদর্শনাত্প্রভৃতি যাবদ্বাদশরাত্রযস্তাবদৃতুর্যোষিতঃ, ন পুনরত্র্যহমেব, যত্র পুষ্পং প্রবর্ততে, ইতি ঋতুশব্দেন দর্শযতি| অত্র-অস্মিন্ দ্বাদশনিশাবধাবৃতুকালে, যাঃ পূর্বাস্তিস্ত্রো নিশাঃ, যাসু প্রাযঃ পুষ্পং প্রবর্ততে, তা নিন্দ্যাঃ-গর্হ্যাঃ সদ্ভিঃ| ন তত্র সন্মতিঃ স্ত্রিযং সঙ্গচ্ছেত্| অত এবাত্র ব্রহ্মচারিত্বোপদেশঃ| তথা, একাদশী নিশা নিন্দ্যা-অপ্রশস্তা| চশব্দোঽত্রানুক্তাযাস্ত্রযোদশ্যাঃ সমুচ্চযার্থঃ| ত্রযোদশ্যাং হি মিথুনীভাবে নপুংসকস্যোত্পত্তিরিতি কেচিদাহুঃ| যুগ্মাসু-চতুর্থষষ্ঠাষ্টমদশমদ্বাদশলক্ষণাসু নিশাসু, সঙ্গমে পুত্রঃ স্যাত্, অচিন্ত্যত্বাদৃতুভাবস্য| তাসু হি রাত্রিষ্বার্তবমল্পীভবতি| অন্যাসুঅযুগ্মাসু নিশাসু পঞ্চমীসপ্তমীনবমীষু, কন্যা জাযতে| তদা হি শুক্রমল্পীভবতি, পূর্বোক্তাদ্ধেতোঃ| যদি পুনরাহারাদিবশাত্ শুক্রস্যাধিকত্বমযুগ্মাসু, যুগ্মাসু চার্তবপূর্ণতা স্যাত্, তদা পুমান্ স্ত্র্যাকৃতির্দুর্বলো হীনাঙ্গো বা জাযতে, স্ত্রী চ পুরুষাকৃতির্দুর্বলা হীনাঙ্গা বা| একাদশীত্রযোদশ্যোস্তু নপুংসকমিতি| তদেবং দম্পতী পুংগর্ভমিচ্ছন্তৌ যুগ্মাসু নিশাসু পুংসবনাদিকং কর্মাচরেতাম্, স্ত্রীগর্ভমিচ্ছন্তৌ ত্বযুগ্মাসু রাত্রিষু|

Adhikarana putrIyavidhiH (27-28) · Śloka 28

| উপাধ্যাযোঽথ পুত্রীযং কুর্বীত বিধিবদ্বিধিম্||২৭|| নমস্কারপরাযাস্তু শূদ্রাযা মন্ত্রবর্জিতম্| |২৮|

অথেত্যানন্তর্যে মঙ্গলসূচকো নির্দিষ্টঃ| অত এবাযমাত্রার্থঃ-ঋতুকালাদনন্তরং মঙ্গলপূর্বিকাং সর্বামিমাং বক্ষ্যমাণামিতিকর্তব্যতাং কুর্যাদিতি| উপাধ্যাযঃ-পুরোহিতোঽথর্ববেদবিত্, পুত্রীযং-পুত্রায হিতং, বিধিমিত্থং কুর্বীত| কথম্ ? বিধিবত্ ন যথাকথঞ্চিত্| বিধিবদিতি প্রশংসাযাং মতুপ্| ক্রিযাবিশেষণং চৈতত্, তেন প্রশস্তং বেদোক্তমন্যূনাতিরিক্তবিধানং যথা ভবতি তথাবিধং কুর্বীতেত্যবতিষ্ঠতে| ব্রহ্মাণদিবর্ণত্রযস্যেমংবিধিং কুর্বীত| শূদ্রাযাঃ পুনর্নমস্কারপরাযাঃ-নমস্কারপ্রধানাযাঃ, যথোক্তং সর্বং বিধিং মন্ত্রবর্জিতং কুর্যাত্| পুত্রীযমিতি "পুত্রাচ্ছ চ" ইতি চ্ছঃ|

Adhikarana evaM dampatyoravaMdhyaHsaMyogaH (28) · Śloka 28

| অবন্ধ্য এবং সংযোগঃ স্যাদপত্যং চ কামতঃ||২৮||

এবং-যথোক্তবিধ্যনুষ্ঠানে, দম্পত্যোর্যঃ সংযোগো-মিথুনীভাবঃ, স ন বন্ধ্যঃ স্যাত্| অপি তু সফলো গর্ভসম্ভবহেতুর্ভবেদিত্যর্থঃ| ন কেবলং দম্পত্যোঃসংযোগ এবং নিষ্ফলো ন ভবেত্, অপত্যং চ কামতঃ-যথাভিমতং পুংগর্ভরূপং স্ত্রীগর্ভরূপং বা, স্যাত্|

Adhikarana dampatyorekAnte maithunam (29) · Śloka 29

অত এবাহ সন্তো হ্যাহুরপত্যার্থং দম্পত্যোঃ সঙ্গতিং রহঃ| |২৯|

রহঃশব্দেন গ্রাম্যবচসাঽত্র গ্রাম্যধর্মং সূচযতি| হিযস্মাত্, সন্তঃ-সাধবঃ, অপত্যার্থং-অপত্যজননায, দম্পত্যোঃ স্ত্রীপুরুষযোঃ, রহঃ-একান্তে, বিশিষ্টকালোচিতং বিশিষ্টসংযোগং সঙ্গতিমাহুঃ, ন গ্রাম্যসুখলিপ্সাযৈ|

Adhikarana durapatyasya kulA~ggAratvam (29) · Śloka 29

ন চাপত্যমাত্রাযেত্যাহ | দুরপত্যং কুলাঙ্গারো গোত্রে জাতং মহত্যপি||২৯||

দুষ্টাপত্যং স্ত্রীগর্ভঃ পুংগর্ভো বা, মহত্যপি গোত্রে জাতং-উত্কৃষ্টেঽপি কুল উত্পন্নং, আঙ্গারকার্যকরণসামর্থ্যাত্সমস্তত্কুলবিনাশহেতুত্বাত্কুলাঙ্গার ইত্যুচ্যতে|

Adhikarana dampatyoH putracintanaprakAraH (30) · Śloka 30

ইচ্ছেতাং যাদৃশং পুত্রং তদ্রূপচরিতাংশ্চ তৌ| চিন্তযেতাং জনপদাংস্তদাচারপরিচ্ছদৌ||৩০||

তৌ-দম্পতী, যাদৃশং পুত্রমিচ্ছেতাং-কামযেতাং, তদ্রূপচরিতান্ রূপং-বর্ণসংস্থানপ্রমাণাশাকৃত্যাদি| তথা চরিতং-শ্রদ্ধাশ্রুতসত্যার্জবানৃশংস্যদানদযাদাক্ষিণ্যস্বভাবাদি| তস্য-মনীষিতস্য, সদৃশে রূপচরিতে যেষাং তান্ জনপদান্ চিন্তযেতাং-ধ্যাযেতাং| পুত্রশব্দোঽপত্যমাত্রোপলক্ষণার্থোঽত্র| তথা হি দুহিতরমপি কশ্চিদিচ্ছত্যেব| কিম্ভূতৌ তৌ পিতরৌ ? তদাচারপরিচ্ছদৌ| আচরণং-আচারঃ, কুলানুরূপস্য দেশানুরূপস্য চেতিকর্তব্যতালক্ষণস্য কর্মণোঽনুষ্ঠানম্| পরিচ্ছদো-মনুজগবাশ্বধনধান্যবস্ত্রালঙ্কাররত্নরথাযুধগৃহোদ্যানবীণাপণবগাযনশয্যাস্তরণাদিঃ| আচারশ্চ পরিচ্ছদশ্চাচারপরিচ্ছদৌ| তদিত্যনেনাভিলষিতাপত্যং পরামৃশ্যতে| তস্যৈবাচারপরিচ্চদৌ যযোস্তৌ দম্পতী ইচ্ছা সদৃশরূপচরিতান্ জনপদান্ ধ্যাযেতাম্|

Adhikarana dampatyoH shayyArohAdi (31-32) · Śloka 32

কর্মান্তে চ পুমান্ সর্পিঃক্ষীরশাল্যোদনাশিতঃ| প্রাগ্দক্ষিণেন পাদেন শযযাং মৌহূর্তিকাজ্ঞযা||৩১|| আরোহেত্ স্ত্রী তু বামেন তস্য দক্ষিণপার্শ্বতঃ| তৈলমাষোত্তরাহারা তত্র মন্ত্রং প্রযোজযেত্||৩২||

কর্মান্তে চ-পুত্রীযবিধ্যনুষ্ঠানাবসানে চ, পুমান্ স্ত্রীতঃ প্রাক্-পূর্বং, শয্যামারোহেত্-আক্রমেত্| কিম্ভূতঃ ? সর্পিঃক্ষীরশাল্যোদনাশিতঃ,-সর্পির্মিশ্রক্ষীরশাল্যোদনেনাশিতো-ভোজিতঃ| কথমারোহেত্ ? দক্ষিণেন পাদেন, মৌহূর্তিকাজ্ঞযা-জ্যোতিঃ শাস্ত্রবিদাদিষ্টঃ| স্ত্রী তু বামেন পাদেন তস্য দক্ষিণপার্শ্বতঃ শয্যামারোহেত্, মৌহূর্তিকাজ্ঞযেতি যোজ্যম্| তুরবধারণে, উভযত্রাপি| পুমান্ দক্ষিণেনৈব পাদেন প্রাগেব, স্ত্রী পশ্চাদেব বামেনৈব পাদেন পুংসো দক্ষিণপার্শ্বত এব, শয্যামারোহেত্, নান্যথা কৃত্বেতি|"পুমান্ সর্পিঃক্ষীরশাল্যোদনাশিতঃ" ইত্যুক্তম্| স্ত্রিযাস্তু তত্কালোচিতমাহারং নিরূপযন্নাহ-তৈলেত্যাদি| তৈলং চ মাষশ্চ, তাভ্যামুত্তরঃ-অধিকঃ, আহারো যস্যাঃ সৈবম্| উত্তরশব্দোঽত্র তৈলমাষৌ পিত্তলৌ রক্তবৃদ্ধিহেতূ তযাঽত্যন্তং সেবিতব্যৌ, ন পুনস্তথা শুক্রবৃদ্ধিকরাণ্যন্যান্যপি ক্ষীরাদীনি দ্রব্যাণিতি প্রতিপাদযতি| তত্র চ মন্ত্রং বক্ষ্যমাণং প্রযোজযেত্-পঠেত্|

Adhikarana tatramantrapAThaH (33) · Śloka 33

তদেব মন্ত্রমাহ.... ঔম্ আহিরসি আযুরসি সর্বতঃ প্রতিষ্ঠাসি ধাতা ত্বাং দধাতু বিধাতা ত্বাং দধাতু ব্রহ্মবর্চসা ভবেতি| ব্রহ্মা বৃহস্পতির্বিষ্ণুঃ সোমঃ সূর্যস্তথাঽশ্বিনৌ| ভগোঽথ মিত্রাবরুণৌ বীরং দদতু মে সুতম্||৩৩||

আহিরসীত্যাদি [ বীরং দদতু মে সুতমিত্যন্তং মন্ত্রং পঠেত্ ]

Adhikarana anyonyaMsAntvanapUrvakaMsaMveSaH (34) · Śloka 34

সান্ত্বযিত্বা ততোঽন্যোন্যং সংবিশেতাং মুদান্বিতৌ| উত্তানা তন্মনা যোষিত্তিষ্ঠেদঙ্গৈঃ সুসংস্থিতৈঃ||৩৪||

ততো-মন্ত্রপাঠাদনন্তরং, পরস্পরং সান্ত্বযিত্বা-প্রিযবচনাদিনা প্রীতিমুত্পাদ্য, সম্বশেতাং-মিথুনীভাবং গচ্ছেতাম্| কিম্ভূতৌ? মুদা-হর্ষেণ, অন্বিতৌ-যুতৌ| তত্র চ সংবেশনে যোষিদুত্তানা তচ্চিত্তা চাবযবৈঃ সুসংস্থিতৈস্তিষ্ঠেত্|

Adhikarana evaM kRute garBadhAraNam (35) · Śloka 35

কিমেবংসতি ভবতি ? ইত্যাহ তথা হি বীজং গৃহ্ণাতি দোষৈঃ স্বস্থানমাস্থিতৈঃ| |৩৫|

হি-যস্মাত্, তথা-তেন প্রকরেণ, সা বীজং গৃহ্ণাতি, দোষৈঃ-বাতাদিভিঃ স্বস্থানাবস্থিতৈঃ সদ্ভিঃ| সঙ্গ্রহে তূক্তম্ (শা. অ. ১)- "ন চাসাবধস্তিষ্ঠেত্| তথা হি স্ত্রীচেষ্টঃ পুমান্ জাযতে পুংচেষ্টা বা স্ত্রী| ন চ ন্যুব্জাং পার্শ্বগতাং বা সেবেত| ন্যুব্জাযা বাতো বলবান্ স যোনিং পীডযতি| দক্ষিণপার্শ্বগাযাঃ শ্লেষ্মা পীডিতশ্চ্যুতোঽপিদধাতি গর্ভাশযম্| বামপার্শ্বগাযাস্তদ্বত্পিত্তং বিদহতি রক্তশুক্রে| তস্মাদুত্তানা বীজং গৃহ্ণীযাত্|" ইতি|

Adhikarana sadyogarBayA lakShaNam (35-36) · Śloka 36

| লিঙ্গং তু সদ্যোগর্ভাযা যোন্যা বীজস্য সঙ্গ্রহঃ||৩৫|| তৃপ্তির্গুরুত্বং স্ফুরণং শুক্রাস্রাননুবন্ধনম্| হৃদযস্পন্দনং তন্দ্রা ত্ড়্ড্গ্লানির্লোমহর্ষণম্||৩৬||

সদ্যঃ-তত্ক্ষণাত্, গর্ভো যস্যাঃ সৈবম্, তস্যাঃ সদ্যোগর্ভাযা লক্ষণং বীজস্য-গর্ভাখ্যস্য, যোন্যা-করণভূতযা, সঙ্গ্রহঃ সম্যগ্গ্রহণম্| তথা, তৃপ্তিরিব তৃপ্তিঃ গুরুত্বং স্ফুরণং চ কুক্ষের্ভবতি| তথা, শুক্রং চাস্রং চ-শুক্রাস্রে, অনুবন্ধনং-প্রবর্তনম্, নানুবন্ধনং-অননুবন্ধনম্, শুক্রাস্রযোরপ্রবর্তনং-শুক্রাস্রাননুবন্ধনম্,-শুক্রাস্রযোর্যোনিমুখাদবমনং বহিরনিঃসরণম্, অত্র চ যোন্যা গৃহীতবীজত্বং হেতুঃ| তথা, হৃদযস্পন্দনাদযঃ পঞ্চ সদ্যোগর্ভাযা লক্ষণানি ভবন্তি| লোমহর্ষণং হর্ষবশাদ্ভবতি| তথা চ সঙ্গ্রহে (শা. অ. ২)- "প্রহর্ষো হৃল্লাসঃ" ইত্যাদি|

Adhikarana garBAvasthAH (37) · Śloka 37

ইদানীং গর্ভস্যাবস্থাঃ প্রদর্শযিতুমাহ অব্যক্তঃ প্রথমে মাসি সপ্তাহাত্কললীভবেত্| গর্ভঃ পুংসবনান্যত্র পূর্বং ব্যক্তেঃ প্রযোজযেত্||৩৭||

সপ্তাহাদর্বাগ্গর্ভগোলকঃ শ্লেষ্মপিণ্ডীভুতো ভবেত্| সপ্তাহাদনন্তরং যাবন্মাসস্তাবদব্যক্তাকৃতিঃ কললীভবেত্| অত্র কললীভূতে যাবত্স্ত্রীপুরুষাদ্যুত্পত্তিলক্ষণা ব্যক্তির্ন ভবতি তাবদ্ব্যক্তেঃ প্রাক্ প্রথমে মাসি পুংসবনানি প্রযোজযেত্|

Adhikarana puMsavanasya sArdhakatvam (38) · Śloka 38

ননু, "শুদ্ধেশুক্রার্তবে সত্বঃ স্বকর্মক্লেশচোদিতঃ| গর্ভঃ সম্পদ্যতে"(শ্লো.১) ইত্যুক্তম্| তত্র যদি প্রাক্কৃতেন কর্মণা স্ত্রীগর্ভঃ কুক্ষিমাক্ষিপ্তস্তদা পুরুষপ্রযত্নে সত্যপি পুংগর্ভঃ কর্তুং ন শক্যতে| তস্মাত্পুংসবনমনর্থকমেবেত্যাশঙ্ক্যাহ বলী পুরুষকারো হি দৈবমপ্যতিবর্ততে| |৩৮|

হি-যস্মাত্, পুরুষকারো বলবান্ দুর্বলং দৈবমতিবর্ততেঅতিক্রম্য বর্ততে| অপিশব্দাত্ পুরুষকারমপি দুর্বলং দিষ্টং বলীযোঽতিক্রম্য বর্তত ইতি প্রতিপাদযতি| অত এব প্রাক্কৃতেন কর্মাণা বলীযসাঽঽক্ষিপ্তস্য স্ত্রীগর্ভস্য পুংসবনাদিদানেন পৌরুষেণ কর্মণা শতশোঽপি প্রযোজিতেন ন কথঞ্চিত্পুংগর্ভতা কর্তুং পার্যত ইতি| উক্তং চ (চরকে বি.অ. ৩/৩৬)-"দৈবং পুরুষকারেণ দুর্বলং হ্যুপহন্যতে| দৈবেন চেতরত্কর্ম প্রকৃষ্টনোপহন্যতে||" ইতি| অত্র পুংসবনাদি সম্যক্ প্রযোজিতং সিধ্যসিধ্যনুমীযমানং প্রাক্কৃতস্য কর্মণো হীনবলত্বপ্রবলত্বমবগমযতি|

Adhikarana puMsavanaprayogaH (38-39) · Śloka 39

অধুনা পুংসবনাদিপ্রযোগমাহ | পুষ্যে পুরুষকং হৈমং রাজতং বাঽথবাঽঽযসম্||৩৮|| কৃত্বাঽগ্নিবর্ণং নির্বাপ্য ক্ষীরে তস্যঞ্জলিং পিবেত্| |৩৯|

পুষ্যে-পুষ্যনক্ষত্রযুক্তে কালে, পুরুষকং-পুত্তলকং, হেমাদিকৃতমগ্নিবর্ণং কৃত্বা সুধ্মাততযা, ততঃ ক্ষীরে নির্বাপ্য-নিবেশ্য, তস্য-ক্ষীরস্য, অঞ্জলিং-পলচতুষ্টযাখ্যং, পিবেত্| পুরুষকমিতি পুরুষ ইবেত্যস্মিন্নর্থে "ইবে প্রতিকৃতৌ" ইতি কন্| হৈমমিতি হেম্তোবিকারার্থেঽণ্ "নস্তদ্ধিতে" ইতি টিলোপঃ| রাজতমিতি "প্রাণিরজতাদিভ্যোঽঞ্ ইত্যঞ্| আযসমিতি "তস্যেদম্" ইত্যণ্|

Adhikarana puShye gauradaNDAdicaturNAM pAnam (39-40) · Śloka 40

| গৌরদণ্ডমপামার্গং জীবকর্ষভসৈর্যকান্||৩৯|| পিবেত্পুষ্যে জলে পিষ্টানেকদ্বিত্রিসমস্তশঃ| |৪০|

গৌরদণ্ডাদীংশ্চতুরো দ্রব্যবিশেষান্ পিবেত্| কিম্ভূতান্ ? জলে পিষ্টান্-কল্কীকৃতান্| কথং কৃত্বা ? একদ্বিত্রিসমস্তশঃ একাদিষু প্রত্যেকং শস্প্রত্যযার্থযোগঃ| তেনৈকমেকং কৃত্বা, দ্বৌ দ্বৌ কৃত্বা, ত্রীংস্ত্রীন্কৃত্বা, চতুরশ্চতুরঃ কৃত্বা, এতান্ পিবেদিত্যর্থোঽবতিষ্ঠতে| কদা প্রাশ্যম্ ? পুষ্যে-পুষ্যযুক্তে কালে|

Adhikarana SvetabRuhatImUlasya strInAsApuTe secanam (40-41) · Śloka 41

| ক্ষীরেণ শ্বেতবৃহতীমূলং নাসাপুটে স্বযম্||৪০|| পুত্রার্থং দক্ষিণে সিঞ্চেদ্বামে দুহিতৃবাঞ্ছযা| |৪১|

শুক্লপুষ্পকণ্টকারিকাযা মূলং ক্ষীরেণ কল্কীকৃত্য স্বযং-স্ত্রী, দক্ষিণে নাসাপুটে পুত্রার্থং-পুত্রসম্পত্তযে, সিঞ্চেত্| দুহিতৃবাচ্ছযা-সুতাকাম্যযা, বামে নাসাপুটে সিঞ্চেত্|

Adhikarana putrotpAdasthitipradAnyauShadhAni (41-42) · Śloka 42

| পযসা লক্ষ্মণামূলং পুত্রোত্পাদস্থিতিপ্রদম্||৪১|| নাসযাঽঽস্যেন বা পীতং বটশুঙ্গাষ্টকং তথা| ওষধীর্জীবনীযাশ্চ বাহ্যান্তরুপযোজযেত্||৪২||

পযসা-ক্ষীরেণ, লক্ষ্মণামূলং কল্কীকৃত্য পীতং পুত্রোত্পাদপ্রদং পুত্রস্থিতিপ্রদং চ ভবতি| কথং পীতম্ ? নাসযাঽঽস্যেন বা, কদাচিন্নাসিকযা কদাচিদাস্যেন| যস্যাঃ পুত্রো নোত্পদ্যতে তথোত্পন্নো বা স্থিতিং ন লভতে-চিরং ন জীবতি, তযৈবং পাতব্যমিত্যর্থঃ| বটশুঙ্গাষ্টকং তথা-তেনৈব প্রকারেণ নাসযা আস্যেন বা পীতং পুত্রোত্পাদস্থিতিপ্রদং ভবতি| ন্যগ্রোধস্য প্রথমোদ্ভিন্নঃ প্ররোহো-বটশুঙ্গঃ, তস্যাষ্টকমিতি| প্রভাবস্যাচিন্ত্যত্বাদেতত্সঙ্খ্যাবচ্ছিন্নত্বম্| জীবনীযা যা ওষধ্যো-জীবন্তীকাকোল্যাদ্যা দশ, যাঃ শোধনাদিগণসঙ্গ্রহোক্তাঃ (হৃ.সূ.অ.১৫/৮), তা বাহ্যান্তরুপযোজযেত্| তত্র স্নানোদ্বর্তনাদিনা বাহ্য উপযোগঃ, আহারপানাদিনাঽন্তরুপযোগঃ|

Adhikarana garBadhAraNe upacAraH (43) · Śloka 43

উপচারঃ প্রিযহিতৈর্ভর্ত্রা ভৃত্যৈশ্চ গর্ভধৃক্| নবনীতঘৃতক্ষীরৈঃ সদা চৈনামুপাচরেত্||৪৩||

উপচারঃ-উপচরণম্| প্রিযাঃ-ইষ্টাঃ, হিতাঃ-পথ্যাঃ, আহারবিহারাঃ, তৈঃ প্রিযহিতৈর্য উপচারো ভর্ত্রা-পত্যা কৃতো, ভৃত্যৈশ্চ য এবংভূতঃ কৃতঃ, স গর্ভধৃক্-তদনুষ্ঠানাদ্গর্ভঃ স্থিতিং দধাতীত্যর্থঃ| এনাং চ স্ত্রিযং নবনীতাদিভির্যথাসাত্ম্যং সদোপাচরেত্|

Adhikarana garBiNyA ativyavAyatyAgAdi (44-47) · Śloka 47

অতিব্যবাযমাযাসং ভারং প্রাবরণং গুরু| অকালজাগরস্বপ্নং কঠিনোত্কটকাসনম্||৪৪|| শোকক্রোধভযোদ্বেগবেগশ্রদ্ধাবিধারণম্| উপবাসাধ্বতীক্ষ্ণোষ্ণগুরুবিষ্টম্ভিভোজনম্||৪৫|| রক্তং নিবসনং শ্বভ্রকূপেক্ষাং মদ্যমামিষম্| উত্তানশযনং যচ্চ স্ত্রিযো নেচ্ছন্তি তত্ত্যজেত্||৪৬|| তথা রক্তস্ত্রুতিং শুদ্ধিং বস্তিমামাসতোঽষ্টমাত্| এভির্গর্ভঃ স্ত্রবেদামঃ কুক্ষৌ শুষ্যেন্ম্রিযেত বা||৪৭||

গর্ভিণী স্ত্রী অতিব্যবাযাদীনুত্তানশযনান্তাংস্ত্যজেত্| ন কেবলমেতান্ অন্যদ্যচ্চাহারবিহারাদিবস্তুজাতং স্ত্রিযো-বহুশঃ প্রসূতাস্তত্কালব্যাপারনিপুণা বা যাঃ কাশ্চন স্ত্রিযো, নেচ্ছন্তি তদপি বর্জযেত্| তথা রক্তস্ত্রুতিং, শুদ্ধিং চ-বমনবিরেচনরূপাং, বর্জযেত্| বস্তিং-অনুবাসনং, অষ্টমং মাসং মর্যাদীকৃত্য বর্জযেত্| অষ্টমে তু মাসে বস্তিং প্রযোজযেদেবেত্যর্থঃ| এভিঃ-বর্জ্যৈর্বস্তুভিরাসেব্যমানৈঃ, গর্ভ আমঃ-অসম্পূর্ণঃ, স্ত্রবেত্-পতেত্, কুক্ষৌ বা শুষ্যেত্, ম্রিযেত বা-মৃত্যুং বা গর্ভঃ প্রাপ্নুযাত্|

Adhikarana vAtalAdyAhAraiH kubjAdayo garBAH (48) · Śloka 48

বাতলৈশ্চ ভবেদ্গর্ভঃ কুব্জান্ধজডবামনঃ| পিত্তলৈঃ খলতিঃ পিঙ্গঃ শ্বিত্রী পাণ্ডুঃ কফাত্মভিঃ||৪৮||

বাতলৈশ্চাহারৈর্মাত্রা সেবিতৈঃ কুব্জোঽন্ধো জডো বামনো বা গর্ভো ভবতি| পিত্তলৈরাহারৈর্মাত্রা সেবিতৈঃ খলতিঃ-খল্বাটঃ, পিঙ্গো বা স্যাত্| কফকৃদ্ভিরাহারৈর্মাত্রা সেবিতৈঃ শ্বিত্রবান্ পাণ্ডুর্বা স্যাত্|

Adhikarana mRudvAdyauShadharvyAdhijayaH (49) · Śloka 49

ব্যাধীংশ্চাস্যা মৃদুসুখৈরতীক্ষ্ণৈরৌষধৈর্জযেত্| |৪৯|

অস্যাশ্চ-গর্ভিণ্যাঃ, যে ব্যাধযো জাযন্তে, তান্ ব্যাধীন্ মৃদুসুখৈরৌষধৈস্তথাঽতীক্ষ্ণৈর্জযেত্| মৃদূনি চ তানি সুখানি চ-মৃদুসুখানি| মৃদূনি-অকর্কশানি বীর্যাদিভির্নোত্কৃষ্টসামর্থ্যানি সুকুমারোচিতানি| সুখানি-সুখোপভোগ্যানি, প্রিযাণীতি যাবত্| ননু, মৃদূনি পরিহৃত্যাতীক্ষ্ণানি চেতি নির্দেষ্টব্যম্| কিমুভযোরুপাদানেন ? যতো মৃদূনি-অকর্কশানি, অতীক্ষ্ণান্যপি-অকর্কশানি, ইত্যনর্থান্তরত্বমেতযোঃ| অত্রোচ্যতে| মৃদূনি-অকর্কশানি শর্করাদীনি, উত্কৃষ্টশক্তীনি মরিচাদীনি-অতীক্ষ্ণানি, তীক্ষ্ণানি পুনস্তীক্ষ্ণগুণযুক্তানি রাজিকাদীনি দোষোত্ক্লেশকরাণি ভেষজানি ভবন্তি, ইতি দ্বযোরুপাদানং যুক্তম্| তন্ত্রান্তরে (সঙ্গ্রহে) ত্বেবমুক্তম্ (শা.অ.২)-"ইত্যনাত্যযিকে ব্যাধৌ বিধিরাত্যযিকে পুনঃ| তীক্ষ্ণৈরপি ক্রিযাযোগৈঃ স্ত্রিযং যত্নেন পালযেত্||" ইতি| যচ্চ ব্যবাযাদি গর্ভিণ্যাঃ পরিহার্যত্বেন নির্দিষ্টম্, তথা "ব্যাধীংশ্চাস্যা মৃদুসুখৈরতীক্ষ্ণৈরৌষধৈর্জযেত্|" ইতি| তদস্মিন্ কালে বিশেষেণেতি দ্রষ্টব্যম্, ন তথাঽন্যদা| তথা চান্যদাঽতিব্যবাযাদিসেবনান্ন তথা প্রত্যবাযভযম্, তথা তীক্ষ্ণৌষধপ্রযোগাচ্চ| অত এব "তথা রক্তস্ত্রুতিং শুদ্ধিং বস্তিমামাসতোঽষ্টমাত্|" ইত্যেতত্পৃথঙ্নির্দিশত্যতিব্যবাযাদিপরিহার্যগণমধ্যে| প্রথমে মাস্যব্যক্তলিঙ্গঃ কললাবস্থো গর্ভো ভবেত্| দ্বিতীযে তু মাসি গর্ভঃ কীদৃশঃ স্যাত্ ? ইত্যাহ-

Adhikarana dvitIyemAsi garBasya peSyAdyAkRutiH (49-50) · Śloka 50

প্রথমে মাস্যব্যক্তলিঙ্গঃ কললাবস্থো গর্ভো ভবেত্| দ্বিতীযে তু মাসি গর্ভঃ কীদৃশঃ স্যাত্ ? ইত্যাহ | দ্বিতীযে মাসি কললাদ্ধনঃ পেশ্যথবাঽর্বুদম্||৪৯|| পুংস্ত্রীক্লীবাঃ ক্রমাত্তেভ্যঃ| |৫০|

দ্বিতীযে মাসি কললাদ্ধনঃ পেশ্যথবাঽর্বুদং গর্ভঃ স্যাদিতি যোজ্যম্| তেভ্যো-ঘনাদিরূপেভ্যঃ, ক্রমাত্-পরিপাঠ্যা, পুংস্ত্রীক্লীবাঃ সম্পদ্যন্তে| ঘনাত্ পুমান্| পেশ্যাঃ স্ত্রী| অর্বুদাত্ ক্লীবঃ-ষণ্ঢো, ন স্ত্রী ন পুমানিতি|

Adhikarana vyakta garBasya lakShaNam (50-52) · Śloka 52

তত্র ব্যক্তস্য লক্ষণম্| ক্ষামতা গরিমা কুক্ষের্মূর্চ্ছা চ্ছর্দিররোচকঃ||৫০|| জৃম্ভা প্রসেকঃ সদনং রোমরাজ্যাঃ প্রকাশনম্| অম্লেষ্টতা স্তনৌ পীনৌ সস্তন্যৌ কৃষ্ণচূচুকৌ||৫১|| পাদশোফো বিদাহোঽন্যে শ্রদ্ধাশ্চ বিবিধাত্মিকাঃ| |৫২|

তত্র-ব্যক্তাব্যক্তযোর্মধ্যাত্, ব্যক্তো নির্ধার্যতে| ব্যক্তস্য গর্ভস্য বক্ষ্যমাণং লক্ষণং ক্ষামতেত্যাদিকম্| গরিমেতি গুরোর্ভাব ইতি "পৃথ্বাদিভ্য ইমনিজ্বা" ইতীমনিচ্, "প্রিযস্থির" ইত্যাদিনা গরাদেশঃ| বিদাহোঽন্য ইতি| অন্যে আচার্যা বিদাহো দেহে ভবতীত্যাহুঃ| নানাপ্রকারাশ্চ শ্রদ্ধাঃ-পথ্যাপথ্যবিষযা অভিলাষাঃ, ব্যক্তস্য গর্ভস্য লক্ষণম্| সঙ্গ্রহে তূক্তম্ (শা.অ.২)-"তস্যাশ্চ রজোবাহিনাং স্রোতসাং বর্ত্মান্যুপরুধ্যন্তে গর্ভেণ| তস্মাত্ততঃ পরমার্তবং ন দৃশ্যতে| ততস্তদধঃ প্রতিহতমপরমপরং চোপচীযমানমপরেত্যাহুঃ|" ইতি|

Adhikarana garBiNyAH icCitahitAhitasyadeyatve kAraNam (52-53) · Śloka 53

গর্ভিণ্যাশ্চ শ্রদ্ধাসূত্পন্নাসু কিমপথ্যং তস্যৈ দেযং ন বা ? ইত্যেবং সংদেহে তদ্যুদাসার্থমাহ | মাতৃজং হ্যস্য হৃদযং মাতুশ্চ হৃদযেন তত্||৫২|| সম্বদ্ধং তেন গর্ভিণ্যা নেষ্টং শ্রদ্ধাবিমাননম্| |৫৩|

হি-যস্মাত্, অস্য-গর্ভস্য, যদ্ধৃদযং-চেতনাধিষ্ঠানং, তন্মাতৃজম্| তথা চোক্তম্ (হৃ. শা. অ.৩/৪)-"মৃদ্বত্র মাতৃজং রক্ত" ইত্যাদি| তচ্চ-গর্ভহৃদযং, মাতৃহৃদযেন সম্বদ্ধং-সংযুক্তং, ভবতি| ততশ্চ গর্ভিণীহৃদযেন সন্তপ্তেন গর্ভহৃদযমপি সন্তপ্যতে| পরস্পরং হৃদযস্য সম্বদ্ধত্বাত্| অত এব চ গর্ভিণী দ্বিহৃদযা দৌর্হৃদিনীত্যুচ্যতে| অত এব চ পরাযত্তহৃদযত্বাত্তত্কালেস্বস্বভাবোচিতমভিলাষং বিহায নানাভিলাষো জাযতে| যতশ্চৈবং তেন কারণেন গর্ভিণ্যাঃ শ্রদ্ধাবিমাননং-আভিলাষাপ্রতিপূরণং, নেষ্টম্|

Adhikarana hitena sAkamahitamapyalpaM deyam (53) · Śloka 53

তদর্থমাহ | দেযমপ্যহিতং তস্যৈ হিতোপহিতমল্পকম্||৫৩||

তস্যৈ-গর্ভিণ্যৈ, হিতেন-পথ্যেন, যুক্তমহিতং-অপথ্যমপি বিদাহিবিষ্টম্ভ্যাদি পূর্বনিষিদ্ধং যত্তদপি, দেযম্| অপিশব্দেনকিমু তস্যৈ প্রার্থ্যমানাযৈ হিতং দেযমিতি গমযতি| কিং মাত্রামনপেক্ষ্যৈবাহিতং দেযম্ ? নেত্যাহ| অল্পকং-অতিশযেনাল্পম্|

Adhikarana ahitadAne kAraNam (54) · Śloka 54

ননু, যদ্যহিতং তত্কস্মাদ্দীযতে ? ইত্যাহ শ্রদ্ধাবিঘাতাদ্গর্ভস্য বিকৃতিশ্চ্যুতিরেব বা| |৫৪|

যদি চিরকালোষিতঃ কুক্ষৌ গর্ভস্তদা তস্য গর্ভস্য বিকৃতিঃবৈরূপ্যং ভবেত্, শ্রদ্ধাবিমাননচিন্তানিদানকুপিতসমীরত্বাত্| তথাঽচিরোষিতো গর্ভস্তদা তস্য গর্ভস্য চ্যুতিঃ-বিনাশো ভবেত্, অত এব শ্রদ্ধাবিমাননচিন্তানিদানকুপিতপবনত্বাদ্ধেতোঃ| লব্ধদৌর্হৃদা তু বীর্যবন্তং চিরাযুষং চ সুতং সূতে|

Adhikarana tRutIye mAsi gAtrapa~jcakAdervyaktatvam (54-55) · Śloka 55

| ব্যক্তীভবতি মাসেঽস্য তৃতীযে গাত্রপঞ্চকম্||৫৪|| মূর্দ্ধা দ্বে সক্থিনী বাহূ সর্বসূক্ষ্মাঙ্গজন্ম চ| সমমেব হি মূর্দ্ধাদ্যৈর্জ্ঞানং চ সুখদুঃখযোঃ||৫৫||

অস্য-গর্ভস্য, তৃতীযে মাসি গাত্রপঞ্চকং ব্যক্তীভবতি,-অব্যক্তরূপং ব্যক্তং তদানীং সম্পদ্যত ইত্যর্থঃ| তদেব পঞ্চাঙ্গমাহ মূর্দ্ধা দ্বে সক্থিনী বাহূ ইতি| সর্বেষাং সূক্ষ্মাণাং চাঙ্গানাং চেতনাধিষ্ঠানানাং জন্ম-উত্পতিঃ, অন্যত্র জন্মোত্তরকালজেভ্যো দন্তাদিভ্যঃ| তথা, সমমেব-তুল্যকালমেব, মূর্দ্ধাদ্যৈঃ সুখদুঃখযোর্জ্ঞানং ভবতি,-তদানীং সুখসংবিদ্দুঃখসংবিচ্চ গর্ভস্য জাযত ইত্যর্থঃ| চঃ সমুচ্চযে| হির্যস্মাদর্থে|

Adhikarana mAtrA~abhyavahRutAnnapAnAbhyAMgarbhavardhanaprakAraH (56) · Śloka 56

অত্র মাত্রাঽভ্যবহৃতাভ্যামন্নপানাভ্যাং কথং গর্ভো বর্দ্ধতে ? ইত্যাহ গর্ভস্য নাভৌ মাতুশ্চ হৃদি নাডী নিবধ্যতে| যযা স পুষ্টিমাপ্নোতি কেদার ইব কুল্যযা||৫৬||

একৈব নাডী গর্ভস্য নাভৌ মাতুশ্চ হৃদযে নিবধ্যতে-অদৃষ্টবশাত্সংশ্লিষ্যতে| যযা-নাড্যা, সঃ-গর্ভঃ পুষ্টিমাপ্নোতি আবহতি| ক ইব ? কেদার ইব কুল্যযা,-লঘুনদ্যা জলং বহন্ত্যা কেদারস্থঃ শাল্যাদির্যথাঽমিবর্দ্ধতে, তথৈব মাতৃহৃদযা শ্রিতযা নাড্যা মাত্রাঽভ্যবহৃতাদাহারাজ্জাঠরাগ্নিনা পচ্যমানাত্ প্রসাদাখ্যেন রসেন| যস্মাত্ "ব্যক্তীভবদঙ্গপ্রত্যঙ্গস্য [অস্য] নাভ্যাং প্রতিবদ্ধা নাডী, নাড্যামপরা, তস্যাং মাতৃহৃদযম্| ততো মাতৃহৃদযাদাহাররসসারো ধমনীভিঃ স্যন্দমানোঽপরামুপৈতি| ততঃ ক্রমান্নাভিং চ| ততশ্চ স পুনর্গর্ভস্য পক্কাশযে [স্ব] কাযাগ্নিনা পচ্যমানঃ প্রসাদবাহুল্যাদ্ধাত্বাদি পুষ্টিকরঃ সম্পদ্যতে| তথা রোমকূপৈরুপস্নেহ এব প্রবিশতি| (স্নেহো রস এব চ পযোভূতঃ| অজাতস্য) সাক্ষাদন্নপানাননুপ্রবেশাত্ রসস্য বা সমলত্বাভাবাত্ (অমলত্বাচ্চ রসস্য) গর্ভস্য স্থূলমূত্রপুরীষাদ্যসম্ভবঃ|" (সং.শা. অ.২)|

Adhikarana caturthapa~jcamayora~ggAnAM cetanAyASca krameNa vyaktiH (57) · Śloka 57

চতুর্থে ব্যক্ততাঽঙ্গানাং, চেতনাযাশ্চ পঞ্চমে| |৫৭|

গর্ভস্যেত্যনুবর্ততে| চতুর্থে মাসি গর্ভস্য সর্বেষামঙ্গানাং সূক্ষ্মত্বাদব্যক্তরূপাণাং ব্যক্ততা ভবতি| চেতনাযাঃ পুনর্মনোদ্বিতীযনামিকাযা অব্যক্তরূপাযাঃ পঞ্চমে মাসি ব্যক্ততা জাযতে|

Adhikarana ShaShThesnAyvAdInAM vyaktatA (57) · Śloka 57

| ষষ্ঠে স্নাযুসিরারোমবলবর্ণনখত্বচাম্||৫৭||

ষষ্ঠে মাস্যব্যক্তরূপাণাং স্নায্বাদীনাং ব্যক্ততা জাযতে|

Adhikarana saptame sarvA~ggaiH pUrNatA (58) · Śloka 58

সর্বৈঃ সর্বাঙ্গসম্পূর্ণো ভাবৈঃ পুষ্যতি সপ্তমে| |৫৮|

সপ্তমে মাসি সর্বৈঃ-সকলৈঃ, ভাবৈঃ-বস্তুভিঃ, সর্বাঙ্গসম্পূর্ণো গর্ভঃ পুষ্যতি-পোষং যাতি| অঙ্গসম্পূর্ণঃ পুষ্যতীত্যেতাবতৈব প্রকৃতার্থাবগতেঃ সর্বগ্রহণমধিকার্থদ্যোতনায| তেন সর্বেণ জন্মজীবনলক্ষণেনার্থেনাঙ্গৈশ্চ সম্পূর্ণো ভবতীত্যবতিষ্ঠতে| অকালপ্রসবত্বাত্তু ন তথা গর্ভস্য জন্মজীবনলক্ষণো যোঽসাবর্থঃ সোঽপ্যস্মিন্ ভবতীতি জ্ঞাপ্যতে| তথা চাস্মিন্ মাসি গর্ভো জাতো জীবতি, কিন্ত্বকালপ্রসবত্বান্ন তথা দীর্ঘজীবিতত্বাদিকং স্যাত্| বক্ষ্যতি হি (শ্লো.৬৬)-"কালঃ সূতেরতঃ পরম্" ইতি| অমুমেব চ ন্যাযং চেতসি বিধাযাষ্টমে মাস্যোজঃস্বরূপনিগদনপ্রস্তাবে "জাতো ন জীবতি শিশুঃ" ইতি বক্ষ্যতি (শ্লো. ৬৩)| অন্যথাঽকালপ্রসবত্বাদেবাস্মিন্ গর্ভস্য জীবনং ন সম্ভাব্যত এব| "জাতো ন জীবতি" ইত্যেতদ্বাক্যমনর্থকমিব স্যাত্| তস্মাত্সপ্তমে মাসি জাতো জীবতীতি সুপ্রতিপাদিতমেতত্|

Adhikarana garBotpIDitA vAtAdayaH kaNDvAdikarAH (58) · Śloka 58

গর্ভেণোত্পীডিতা দোষাস্তস্মিন্ হৃদযমাশ্রিতাঃ| কণ্ডূং বিদাহং কুর্বন্তি গর্ভিণ্যাঃ কিক্কিসানি চ||৫৮||

গর্ভেণোত্পীডিতাঃ-ঊর্ধ্বং পীডিতাঃ, দোষাঃ-বাতাদযঃ, তস্মিন্ কালে হৃদযমাশ্রিতা গর্ভিণ্যাঃ কণ্ডূং বিদাহং [ চ ] কুর্বন্তি| তথা, কিক্বিসানি কুর্বন্তি| ঊরুস্তনোদরে বলিবিশেষা রেখাকারাস্তত্কালে প্রাযো যে জাযন্তে তে-কিক্বিসসংজ্ঞাঃ| কৈশ্চিত্ 'শূকৈরিব পূর্ণতা-কিক্বিসানি' ইতি ব্যাখ্যাযি| পাণিপাদাং সমূলেষু বিবিধঃ সন্তাপো-বিদাহ উচ্যতে|

Adhikarana tadupaSamArthaM navanItAdi sevanam (59-62) · Śloka 62

নবনীতং হিতং তত্র কোলাম্বুমধুরৌষধৈঃ| সিদ্ধমল্পপটুস্নেহং লঘু স্বাদু চ ভোজনম্||৫৯|| চন্দনোশীরকল্কেন লিম্পেদূরুস্তনোদরম্| শ্রেষ্ঠযা বৈণহরিণশশশোণিতযুক্তযা||৬০|| অশ্বঘ্নপত্রসিদ্ধেন তৈলেনাভ্যজ্য মর্দযেত্| পটোলনিম্বমঞ্জিষ্ঠাসুরসৈঃ সেচযেত্পুনঃ||৬১|| দার্বীমধুকতোযেন মৃজাং চ পরিশীলযেত্| |৬২|

তত্র-তেষু কণ্ড্বাদিষু, উপশমার্থং নবনীতং হিতম্, অন্তর্বহিশ্চোপযোগিতযা| কীদৃশম্ ? কোলাম্বুনা মধুরৌষধৈঃ দ্রাক্ষাদিভিশ্চ কল্কীকৃতৈঃ, সিদ্ধং-পক্বম্| তথা, তত্র ভোজনং হিতম্| কিম্ভূতম্ ? অল্পং পটু-লবণং, স্নেহশ্চ যত্র তদেবম্| তথা, লঘু-মাত্রাস্বভাবাভ্যাম্| তথা, স্বাদু-মধুরম্| তথা, চন্দনোশীরযোর্যঃ কল্কঃ-পিষ্টো জলেনালোডিতঃ, তেমোরুস্তনোদরং লিম্পেত্| শ্রেষ্ঠযা বা-ত্রিফলযা বা, ঊরুস্তনোদরং লিম্পেত্| কিম্ভূতযা ? এণাদিরুধিরপিষ্টযা| তথা, অশ্বঘ্নপত্রসিদ্ধেন তৈলেনাভ্যজ্য-অভ্যক্তমঙ্গং কৃত্বা, অনন্তরং পটোলনিম্বমঞ্জিষ্ঠাসুরসৈর্মর্দযেত্| অশ্বঘ্নঃ-করবীরঃ| সেচযেত্পুনঃ-পরিষেকং চ কুর্যাত্| দার্বীমধুকতোযেন-দারুহরিদ্রামধুযষ্টিকাভ্যাং ক্বথিতেন জলেন, মৃজাং-শুদ্ধিং স্নানাদিকাং, শীলযেত্| সঙ্গ্রহে তূক্তম্ (শা.অ.৩)-"পরিষেকঃ পুনর্মালতীমধুকসিদ্ধেনাম্ভসা| কণ্ডূযনং বর্জযেত্ ত্বগ্ভেদবৈরূপ্যপরিহারার্থম্| স্নানোদ্বর্তনং চ শীলযেত্| মধুরং চাহারমল্পমল্পস্নেহলবণমল্পোদকানুপানং ভুঞ্জীত|" ইতি|

Adhikarana aShTame mAtAputrayorojasaH sa~jcArAdi (62-63) · Śloka 63

ইদানীমষ্টমে মাসি গর্ভস্বরূপং তত্রেতিকর্তব্যতাং চাচষ্টে | ওজোঽষ্টমে সঞ্চরতি মাতাপুত্রৌ মুহুঃ ক্রমাত্||৬২|| তেন তৌ ম্লানমুদিতৌ তত্র জাতো ন জীবতি| শিশুরোজোনবস্থানান্নারী সংশযিতা ভবেত্||৬৩||

ওজঃ-সর্বধাতূনাং তেজঃ কর্তৃ, মাতাপুত্রৌ কর্মভূতৌ, সঞ্চরতি| মাতা চ পুত্রশ্চেতি দ্বন্দ্বঃ| "আনঙৃতো দ্বন্দ্বে" ইত্যানঙাদেশঃ| কথং সঞ্চরতি ? মুহুর্মুহুঃ| ক্রমাত্-ক্রমেণ, কদাচিদ্গর্ভিণীমোজঃ সঞ্চরতি কদাচিত্পুত্রমিতি| এবং [ তেন-] কদাচিত্কেনৌজঃসঞ্চরণেন, তৌ-মাতাপুত্রৌ, ম্লানমুদিতৌস্যাতাম্| তযা পূর্বনিরূপিতযা গর্ভগর্ভিণ্যুভযসম্বদ্ধযা নাড্যোভযত্র সঞ্চরত্তদোজ উভযসম্বদ্ধং যদা গর্ভং সঞ্চরতি তদা গর্ভো মুদিতো-হৃষিতো, ভবেদোজঃসম্পত্ত্যা, গর্ভিণী চ ম্লানা ভবেত্| যদা চ তদোজো গর্ভিণীং সঞ্চরতি তদা তযৈবোজঃ সম্পত্ত্যা গর্ভিণী মুদিতা ভবেত্, শিশুর্ম্লানো ভবেদোজঃ সম্পত্ত্যভাবাত্| [ তত্র-] তস্মিন্ কালে, শিশুঃ-বালো, জাতঃ-উত্পন্নো, ন জীবতি| কুতঃ ? ওজোনবস্থানাত্| ওজসস্তদানীং শিশাবনবস্থিতত্বাত্,-অচিরকালপ্ররূঢত্বাদোজসঃ| গর্ভিণ্যাং তু ন সর্বমচিরকালমনবস্থিতমোজঃ, যথা গর্ভে| তস্মান্ন তস্যা নিরোজস্ত্বম্| অত এবাহ-নারীসংশযিতা ভবেত্,-কদাচিজ্জীবতি কদাচিন্ন জীবতীতি সংশযিতার্থঃ|

Adhikarana aShTame mAsi kShIrapeyAdi sevanam (64-65) · Śloka 65

ক্ষীরপেযা চ পেযাঽত্র সঘৃতাঽন্বাসনং ঘৃতম্| মধুরৈঃ সাধিতং শুদ্ধ্যৈ পুরাণশকৃতস্তথা||৬৪|| শুষ্কমূলককোলাম্লকষাযেণ প্রশস্যতে| শতাহ্বাকল্কিতো বস্তিঃ সতৈলঘৃতসৈন্ধবঃ||৬৫||

অত্র-অষ্টমে মাসি, ক্ষীরসংস্কৃতা পেযা পাতব্যা| কিম্ভূতা? সঘৃতা| তথা, অন্বাসনং ঘৃতং শস্যতে| কীদৃক্? মধুরৈঃ-দ্রাক্ষাদিভিঃ, সাধিতং-পক্বম্| তথা-তেনৈব প্রকারেণ, পুরাণশকৃতঃ শুদ্ধ্যর্থং, বস্তিঃ-নিরূহঃ , প্রশস্যতে-যুজ্যতে| তত্র চ বস্তৌ কঃ কষাযঃ ? কঃ কল্কঃ? ইত্যাহ-শুষ্কমূলকেতি| শুষ্কমূলকাদীনাং কষাযেণ, তথা শতাহ্বাকল্কিতঃ, তথা সহ তৈলেন ঘৃতেন সৈন্ধবেন চ|

Adhikarana prasUtikAlaH (66) · Śloka 66

তস্মিংস্ত্বেকাহযাতেঽপি কালঃ সূতেরতঃ পরম্| |৬৬|

একং চ তদহশ্চৈকাহম্| "রাজাহঃসখিভ্যষ্টচ্" ইতি টচ্| "অহ্নষ্টখোরেব" ইতি টিলোপঃ| একাহেন যাতোঽতিক্রান্তোঽন্তরিতোঽষ্টমো মাসঃ-একাহযাতঃ, [ তস্মিন্| ] তস্মিন্-অষ্টমেমাসি, পুনরেকদিবসাতিক্রান্তেঽপ্যতঃ পরং সূতেঃ-প্রসবস্য, কালো যাবদ্বর্ষম্| অপিশব্দাদ্যাতে ত্বষ্টমে মাস্যতঃ পরং সূতেঃ কাল ইতি গম্যতে| অষ্টমান্মাসাদনন্তরং নবমদশমৈকাদশদ্বাদশমাসান্ যাবত্| এষু মাসেষু গর্ভো জাতো দীর্ঘাযুষ্ট্বাদিযুক্তো জীবতি|

Adhikarana dvAdaSamAsAdUrdhvaM garBo vikArakari (66) · Śloka 66

| বর্ষাদ্বিকারকারী স্যাত্কুক্ষৌ বাতেন ধারিতঃ||৬৬||

বর্ষাদিত্যানন্তর্যে পঞ্চমী| বর্ষাত্-দ্বাদশমাসাদনন্তরং, গর্ভঃ কুক্ষৌ বাতেন ধারিতো-রুদ্ধনিষ্ক্রমণো, বিকারকারী ভবেত্ বিকারমবশ্যং করোতি| গর্ভস্য সন্নিবেশোঽপি সঙ্গ্রহে প্রোক্তঃ, যথা (শা. অ. ২)-"গর্ভস্তু মাতৃপৃষ্ঠাভিমুখো ললাটে কৃতাঞ্জলিঃ সঙ্কুচিতাঙ্গো গর্ভকোষ্ঠে দক্ষিণম্ পার্শ্বমাশ্রিত্যাবতিষ্ঠতে পুমান্, বামং স্ত্রী, মধ্যং নপুংসকম্| তত্র স্থিতশ্চ গর্ভো মাতরি স্বপত্যাং স্বপিতি প্রতিবুদ্ধাযাং প্রতিবুধ্যতে|" ইতি|

Adhikarana navame snigdhaudanAdeH Sastatvam (67) · Śloka 67

শস্তশ্চ নবমে মাসি স্নিগ্ধো মাংসরসৌদনঃ| বহুস্নেহা যবাগূর্বা পূর্বোক্তং চানুবাসনম্||৬৭||

নবমে মাসি স্নিগ্ধো মাংসরসযুক্ত ওদনঃ শস্তো-হিতঃ| অথবা, পেযা বহুস্নেহা শস্তেতি লিঙ্গবিপরিণামেন সম্বন্ধঃ| পূর্বোক্তমনুবাসনং-"ঘৃতং মধুরৈঃ সাধিতং" ইত্যাদি, তচ্চ শস্তম্|

Adhikarana tadA yonau vAtavijayArthaM picusthApanAdi (68) · Śloka 68

তত এব পিচুং চাস্যা যোনৌ নিত্যং নিধাপযেত্| বাতঘ্নপত্রভঙ্গাম্ভঃ শীতং স্নানেঽন্বহং হিতম্||৬৮||

তত এব-অন্বাসনঘৃতাত্, পিচুং-নক্তকং, অস্যাঃ-গর্ভিণ্যাঃ, যোনৌ নিত্যং-সদা, নিধাপযেত্-তত্র স্থাপযেত্, বাতবিজযার্থম্| পবনেনানাক্রান্তযোনির্হি সুখং গর্ভং সূতে| তথা, বাতঘ্নানাং দ্রব্যাণাং পত্রাণি, তেষাং ভঙ্গঃ-সমূহঃ, তেন ক্বথিতমম্ভঃ শীতং কৃত্বা স্নানেঽন্বহং-অহরহঃ, গর্ভিণ্যৈ হিতম্| অন্বহমিত্যনশ্চেতি টচ্|

Adhikarana garBaprasavaparyantaM garBiNyAH sasnehA~ggatvaM (69) · Śloka 69

নিঃস্নেহাঙ্গী ন নবমান্মাসাত্প্রভৃতি বাসযেত্| |৬৯|

নিঃস্নেহগাত্রাং গর্ভিণীং ন বাসযেত্, অপি তু সস্নেহাঙ্গীং স্থাপযেত্| নিঃশেষেণ নিরস্তঃ স্নেহো যস্মাদঙ্গাত্তদেবং নিঃস্নেহমঙ্গং যস্যাঃ সা নিঃস্নেহাঙ্গী, তাম্| অঙ্গগাত্রকণ্ঠেভ্যো বক্তব্যমিতিঙীপ্| কুতঃ কালাদারভ্য ? নবমান্মাসাত্প্রভৃতি| যদ্যপি কালোঽত্র ন নির্দিষ্টঃ, তথাঽপি নবমান্মাসাদারভ্য সামর্থ্যাদ্যাবন্মুক্তগর্ভশল্যা স্যাত্, তাবন্নিঃস্নেহাঙ্গীং গর্ভিণীং ন স্থাপযেদিতি লভ্যতে| সস্নেহাঙ্গধারণং চ তস্যাঃ কুপিতবাযোর্নিত্যং সন্নিহিতত্বাত্|

Adhikarana putrAdyanumApakAni (69-71) · Śloka 71

ইদানীং গর্ভিণ্যা যৈর্লক্ষণৈরব্যভিচারিভিঃ পুত্রদুহিতৃনপুংসকযমকপ্রসবোঽনুমীযতে, তান্যাহ | প্রাগ্দক্ষিণস্তনস্তন্যা পূর্বং তত্পার্শ্বচেষ্টিনী||৬৯|| পুন্নামদৌর্হৃদপ্রশ্নরতা পুংস্বপ্নদর্শিনী| উন্নতে দক্ষিণে কুক্ষৌ গর্ভে চ পরিমণ্ডলে||৭০|| পুত্রং সূতেঽন্যথা কন্যাং যা চেচ্ছতি নৃসঙ্গতিম্| নৃত্যবাদিত্রগান্ধর্বগন্ধমাল্যপ্রিযা চ যা||৭১||

প্রাক্-পূর্বং, দক্ষিণে স্তনে স্তন্যং-ক্ষীরং, যস্যাঃ প্রাদুর্ভবতি সা পুত্রং সূত ইতি সম্বন্ধঃ| তথা, পূর্বং তত্পার্শ্বচেষ্টিনী| তচ্চব্দেন দক্ষিণপার্শ্বং পরামৃশ্যতে| তেন-দক্ষিণেন পার্শ্বেন, চেষ্টিতং-গমনস্বপনাদিকং, যস্যাঃ সা-তত্পার্শ্বচেষ্টিনী, পুত্রং সূত ইতি সর্বত্র যোজ্যম্| তথা গচ্ছন্ত্যাঃ পূর্বং দক্ষিণপাদোত্ক্ষেপঃ, হস্তকরণীযে চ পূর্বং দক্ষিণেন পাণিনা চেষ্টতে, ইতি তত্পার্শ্বচেষ্টা বোধ্যা`| পুন্নামেত্যাদি| পুংলিঙ্গোপলক্ষিতং নাম-পুন্নাম, দৌর্হৃদং চ প্রশ্নশ্চ দৌর্হৃদপ্রশ্নৌ| পুন্নাম্নোর্দৌর্হৃদপ্রশ্নযো রতাভিযুক্তা, পুন্নাম্নি দৌর্হৃদে রতা| দৌর্হৃদকালে যোঽভিলাষবিশেষো গর্ভিণ্যাঃ স দৌর্হৃদশব্দবাচ্যঃ| তথা, পুন্নাম্নি প্রশ্নেঽভিরতা-পুনঃ পুনঃ পুন্নামপ্রশ্নং করোতি| তথা, পুন্নামধেযান্ স্বপ্নান্-পুরুষগজবাজিবরাহাদীন্ আম্রদাডিমাশোকবৃক্ষাদীন্ বা, দ্রষ্টুং শীলং যস্যাঃ সৈবম্| তথা, উন্নতে দক্ষিণে গর্ভকোষ্ঠাখ্যে কুক্ষৌ| তথা, গর্ভে-গর্ভসংস্থানে, পরিমণ্ডলে-বর্তুলে সতি, পুত্রং সূতে| অন্যথা-পুত্রপ্রসবসূচকাদ্ধেতোর্বৈপরীত্যে চ, কান্যাং সূতে| যথা-প্রাগ্দক্ষিণস্তনস্তন্যেত্যাদি পুত্রপ্রসবসূচকং লক্ষণম্, অতোঽন্যথা প্রাগ্বামস্তনস্তন্যেত্যাদি লক্ষণং গর্ভিণ্যাঃ কন্যাপ্রসবসূচকম্| ন কেবলং পুত্রপ্রসবলক্ষণাদ্বিপর্যযেণ কন্যাং সূতে, যাবত্ যা চেচ্ছতি নৃসঙ্গতিম্| যা চ-গর্ভিণী পুরুষেণ সহ সঙ্গতিমিচ্ছতি-কামযতে, সা কন্যাং সূতে| তথা যা চ নৃত্যাদিপ্রিযা সা কন্যাং সূতে|

Adhikarana ShaNDaprasavalakShaNaM (72) · Śloka 72

ইদানীম্ ষণ্ঢপ্রসবলক্ষণমাহ ক্লীবং তত্সঙ্করে, তত্র মধ্যং কুক্ষেঃ সমুন্নতম্| |৭২|

তদিত্যনেনাত্র পুত্রপ্রসূতিলক্ষণং দুহিতৃপ্রসূতিলক্ষণং চ দ্বযমপি পরামৃশ্যতে| দ্বযস্যৈতস্য লক্ষণস্য সঙ্করে-সঙ্কীর্ণলক্ষণ তাযাং, ক্লীবং-নপুংসকং গর্ভং, সূতে| তত্র-তস্মিন্ ক্লীবে গর্ভে কুক্ষিস্থিতে, কুক্ষের্মধ্যং সমুন্নতং ভবতি|

Adhikarana yamalagarBalakShaNam (72) · Śloka 72

| যমৌ পার্শ্বদ্বযোন্নামাত্কুক্ষৌ দ্রোণ্যামিব স্থিতে||৭২||

যমৌ দ্বৌ গর্ভৌ, গর্ভিণী সূতে| কথমিতি তল্লক্ষণার্থমাহ পার্শ্বদ্বযোন্নামাত্,- পার্শ্বদ্বযোত্সেধাত্| অত এব কুক্ষৌ-উদরে, দ্রোণ্যামিব স্থিতে| দ্রোণী-মধ্যনিম্না, কুক্ষিরপি পার্শ্বদ্বযোন্নত্যা মধ্যনিম্না ভবতি|

Adhikarana navamAsAtprAk sUtikAgRuhASrayo garBiNyAH (73) · Śloka 73

প্রাক্ চৈব নবমান্মাসাত্ সা সূতিগৃহমাশ্রযেত্| দেশে প্রশস্তে সম্ভারৈঃ সম্পন্নং সাধকেঽহনি||৭৩||

সা-গর্ভিণী, সূতিগৃহং-সূতিকাগারং, নবমান্মাসাত্পূর্বমেবাশ্রযেত্| কুত্র দেশে কৃতম্ ? ইত্যাহ-দেশে প্রশস্তে,-প্রাক্প্রবণ উদক্প্রবণে বা, বাস্তুবিদ্যাবিদ্ভিঃ পরীক্ষ্য কল্পিতম্| কীদৃশম্ ? সম্ভারৈঃ সম্পন্নং,-সকলৈরুপকরণৈর্যুক্তম্| তথা, সাধকেঽহনিশুভপুংনক্ষত্রে দিবসে সতি|

Adhikarana tadgRuhe sUtyudIkShaNam (74) · Śloka 74

তত্রোদীক্ষেত সা সূতিং সূতিকাপরিবারিতা| |৭৪|

তত্র-সূতিকাগৃহে, স্থিতা সূতিমুদীক্ষেত,-অহমত্র প্রসবিষ্য ইতি চেতসি নিধায সা-গর্ভিণী, তত্রাসীতেত্যর্থঃ| কিম্ভূতা ? সূতিকাপরিবারিতা,-অনেকবারপ্রসবানুভূততত্কালোচিতব্যবহারকুশলাভিঃ স্ত্রীভিঃ পরিবারিতা| সঙ্গ্রহে তূক্তম্ (শা. অ. ৩) "বহুশঃ প্রসূতাভিরনুরক্তাভিরবিষাদিনীভিরবিসংবাদিনীভিঃক্লেশসহাভিঃ পরিবৃতা স্বস্ত্যযনপরাঽনুলোমনৈরাহারবিহারৈরনুলোমিতবাতমূত্রপুরীষা প্রসবকালমুদীক্ষেত| স্বল্পেঽপি চ বিণ্মূত্রবিবন্ধে ফলবর্তীঃ প্রযোজযেত্|" ইতি|

Adhikarana AsannaprasavAyAlakShaNam (74-76) · Śloka 76

ইদানীমাসন্নপ্রসবাযা লক্ষণমাহ | অদ্যশ্বঃপ্রসবে গ্লানিঃ কুক্ষ্যক্ষিশ্লথতা ক্লমঃ||৭৪|| অধোগুরুত্বমরুচিঃ প্রসেকো বহুমূত্রতা| বেদনোরূদরকটীপৃষ্ঠহৃদ্বস্তিবঙ্ক্ষণে||৭৫|| যোনিভেদরুজাতোদস্ফুরণস্রবণানি চ| আবীনামনু জন্মাতস্ততো গর্ভোদকস্ত্রুতিঃ||৭৬||

অদ্য বা শ্বো বা আসন্নঃ প্রসবঃ, তস্মিন্ আসন্ন (অদ্যশ্বঃ)-প্রসবে গ্লান্যাদযো ভবেযুঃ, গর্ভিণ্যা ইতি সম্বন্ধঃ| গ্লানিঃ-হর্ষক্ষযঃ| তথা, কুক্ষী চাক্ষিণী চ কুক্ষ্যক্ষি, তস্য শ্লথতা শিথিলত্বং, স্বস্থানাচ্চলিতত্বমিব| তথা, ক্লমঃ-উপতাপঃ| তথা, অধোগুরুত্বাদীনি ভবন্তি| তথা,ঊর্বাদিষু বেদনাপীডা ভবতি| তথা, যোনিভেদাদযঃ স্যুঃ| অতঃ-অস্মাদ্যোনিভেদাদেঃ, অনু-পশ্চাত্, আবীনাং-গর্ভনিষ্ক্রমণকালশূলবিশেষাণাং, জন্ম-উত্পাদঃ| ততঃ-অনন্তরং, গর্ভোদকস্ত্রুতিঃ-তত্কালং যোনিতো জলস্ত্রাবঃ, স্ত্রাবমাত্রঃ স গর্ভোদকসংজ্ঞঃ|

Adhikarana garbhasruteranantaraM saghRutapeyA pAnam (77-78) · Śloka 78

অথোপস্থিতগর্ভাং তাং কৃতকৌতুকমঙ্গলাম্| হস্তস্থপুন্নামফলাং স্বভ্যক্তোষ্ণাম্বুসেচিতাম্||৭৭|| পাযযেত্সঘৃতাং পেযাং| |৭৮|

অথ-গর্ভোদকস্ত্রুতেরনন্তরং, তাং-গর্ভিণীং, উপস্থিতগর্ভাংঅভিমুখীভূতগর্ভামাবিজন্মোদকস্রাবাদিনা জ্ঞাত্বা, সঘৃতাং পেযাং পাযযেত্| কিম্ভূতাম্ ? কৃতকৌতুকমঙ্গলাম্| বিশিষ্টকাল এব যো রক্ষাবন্ধো বাহ্বাদৌ বধ্যতে স কৌতুকবাচ্যঃ| কৌতুকাখ্যং মঙ্গলং কৌতুকমঙ্গলম্| কৃতং কৌতুকমঙ্গলং যস্যাঃ, তাম্| তথা, হস্তস্থং পুন্নাম-দাডিমাদি, ফলং যস্যাঃ, তাম্| তথা, সুষ্ঠু অক্তাং-অভ্যক্তাম্| তথা, উষ্ণাম্বুসেচিতাম্| ইত্যস্যানন্তরং "পাযযেত্পেযাং" ইতি পাঠেনোষ্ণাম্বুসেচনাদনন্তরং পেযাপানং কার্যমিতি বোধযতি

Adhikarana BUSayane sthitAyA mardanAdi (78-79) · Śloka 79

তনৌ ভূশযনে স্থিতাম্| আভুগ্নসক্থিমুত্তানামভ্যক্তাঙ্গীং পুনঃ পুনঃ||৭৮|| অধো নাভের্বিমৃদ্নীযাত্কারযেজ্জৃম্ভচঙ্ক্রমম্| |৭৯|

তনৌ-মৃদুনি, ভূশযনে স্থিতাং মৃদ্নীযাত্,-ন খট্বাদিশযনে স্থিতাম্| তথা চোক্তং সঙ্গ্রহে (শা. অ. ৩)- "সুরক্তার্ষভচর্মপ্রচ্ছদে মৃদুনি ভূশযনে শযানাং" ইত্যাদি| কুতোঽঙ্গাত্প্রভৃতি বিশেষেণ মৃদ্নীযাত্ ? নাভেরধঃ,-নোর্ধ্বং নাভেঃ| কিম্ভূতাং তাম্ ? আভুগ্নসক্থিম্, আসমন্তাদ্ভুগ্নে-কুটিলে, সক্থ্নী যস্যাঃ সাঽঽভুগ্নসক্থঃ, তাং তথাবিধাং মৃদ্নীযাত্| তথা, পুনঃপুনরভ্যক্তাঙ্গীং বাতকোপভযাত্| তথা, জৃম্ভো চঙ্ক্রমং চ তাং কারযেত্| জৃম্ভো- জৃম্ভণম্| চঙ্ক্রমঃ-চঙ্ক্রমণং দ্রুতগমনম্|

Adhikarana evamanuShThite Palam (79-80) · Śloka 80

কিমেবমনুষ্ঠিতে সতি ভবতি ? ইত্যাহ | গর্ভঃ প্রযাত্যবাগেবং, তল্লিঙ্গং হৃদ্বিমোক্ষতঃ||৭৯|| আবিশ্য জঠরং গর্ভো বস্তেরুপরি তিষ্ঠতি| |৮০|

এবং-অনযেতিকর্তব্যতযাঽনুষ্ঠিতযা, গর্ভোঽবাক্ প্রযাতিঊর্ধ্বাদধো গচ্ছতি, হৃত্স্থানং পরিত্যজ্যাধোঽবস্থিতিং করোতীত্যর্থঃ| সঙ্গ্রহে তূক্তম্ (শা. অ. ৩)- "দদ্যাত্ কুষ্ঠলাঙ্গলিকীবচাচব্যচিত্রকচিরিবিল্বচূর্ণমুপাঘ্রাতুং মুহুর্মুহুঃ| তথা ভূর্জপত্রশিংশিপাসর্জরসানামন্যতমধূমমন্তরান্তরা চ| পার্শ্বপৃষ্ঠকটীসক্থিদেশান্ কোষ্ণেন তৈলেনাভ্যজ্যানুসুখমস্যা বিমৃদ্গীযাত্| এবমবাক্ পরিবর্ততে গর্ভঃ|" ইতি| মুসলেনোলূখলং ধান্যপূর্ণমাহননীযং গর্ভস্যাবাক্স্থিতয ইতি কেচিদাহুঃ| তদযুক্তম্| যতো গর্ভিণ্যাস্তাবহ্যাযামবর্জনং সততমুপদিষ্টম্| বিশেষতশ্চ প্রসবকালে প্রচলিতসর্বধাতুদোষাযাঃ সুকুমারাযানার্যাঃ, মুসলব্যাযামপ্রেরিতো হি বাযুঃ প্রাণান্ হিংস্যাদিতি| বিমর্দনাদিক্রিযাং চ গর্ভিণ্যাস্তাবত্কারযেত্ যাবদ্গর্ভনিষ্ক্রমণং ন ভবতি| অথ মাতৃহৃদযান্মুক্তো গর্ভঃ কেন লক্ষণেন জ্ঞাযতে ? ইত্যাহ-তল্লিঙ্গমিত্যাদি| তদিত্যনেন গর্ভঃ পরামৃশ্যতে| তস্য গর্ভস্য, লিঙ্গং-লক্ষণং, তল্লিঙ্গম্| গর্ভস্যৈতল্লিঙ্গং যদ্ধৃদ্বিমোক্ষতো হৃদযমোচনাদনন্তরং স গর্ভো জঠরমাবিশ্য বস্তেরুপরি তিষ্ঠতি|

Adhikarana garBiNyAH KaTvAropAdi (80) · Śloka 80

আব্যোঽভিত্বরযন্ত্যেনাং খট্বামারোপযেত্ততঃ| ||৮০||

আব্যঃ-প্রসবকালশূলবিশেষাঃ, যস্মাদেনাং-গর্ভিণীং, অভিত্বরযন্তি, অনবরতমুত্পদ্যমানত্বাত্| ততঃতস্মাত্, এনাং গর্ভিণীং, খট্বামারোপযেত্-আরোহযেত্|

Adhikarana aBya~ggAdinA yonivikAsanam (81) · Śloka 81

অথ সম্পীডিতে গর্ভে যোনিমস্যাঃ প্রসারযেত্| মৃদু পূর্বং প্রবাহেত বাঢমাপ্রসবাচ্চ সা||৮১||

অথ-খট্বারোহণাদনন্তরং খট্বাস্থিতাযা গর্ভে সম্পীডিতে সমন্তাত্পীডিতে, বাযুনা যোনিমুখাক্রান্ততযা, অস্যা গর্ভিণ্যা যোনিং প্রসারযেত্-আভ্যঙ্গাদিদানেন বিকাসযেত্| ততঃ সা-গর্ভিণী, গর্ভং মৃদু কৃত্বা পূর্বং প্রবাহেত, যাবদ্যোনিমুখে নাগতো গর্ভঃ| গর্ভং যোনিদ্বারমাগতং তু জ্ঞাত্বা বাঢংভৃশং প্রবাহেত, আপ্রসবাত্-প্রসবং যাবত্| তথা চোক্তং সঙ্গ্রহে (শা. অ. ৩)- "শনৈঃ শনৈশ্চ পূর্বং প্রবাহিষ্ঠাঃ, নির্গমে বাঢং গর্ভস্য যোনিমুখপ্রতিপত্তৌ বাঢতরমাপ্রসবাদিতি|" ইতি| আঙ্মর্যাদা বচন ইত্যাডঃ কর্মপ্রবচনীযত্বে পঞ্চম্যপাঙ্পরিভিরিতি পঞ্চমী|

Adhikarana tasyA harShotpAdanam (82) · Śloka 82

হর্ষযেত্তাং মুহুঃ পুত্রজন্মশব্দজলানিলৈঃ| |৮২|

তাং-গর্ভিণীং, অনন্তরং [মুহুঃ] হর্ষযেত্-সুমনসং মুহুঃ কারযেত্| কেন? পুত্রজন্মশব্দেন,-প্রসূতা প্রসূতাঽসি সুভগে ধন্যং পুত্রমিত্যেবংরূপেণাসকৃত্ স্ত্রীভিরুচ্চারিতেন, তথা জলেন শীতলেন, তথাঽনিলেন| সঙ্গ্রহেঽপ্যুক্তম্ (শা. অ. ৩)- "এনাং ব্রূযাচ্চ সুভগে শনৈঃ শনৈঃ প্রবাহযস্ব শোভনস্তে মুখবর্ণঃ পুত্রং জনযিষ্যসীতি| তথাঽন্যা তু বামকর্ণেঽস্যা মন্ত্রমিমং জপেত্| 'ক্ষিতির্জলং বিযত্তেজো বাযুর্বিষ্ণুঃ প্রজাপতিঃ| সগর্ভাং ত্বাং সদা পাতু বৈশল্যং চাদধাত্বিতি|| প্রসূষ্ব ত্বমবিক্লিষ্টমবিক্লিষ্টা শুভাননে| কার্তিকেযদ্যুতিং পুত্রং কার্তিকেযাভিরক্ষিতম্||' ইতি| তথা, 'ইহামৃতং চ সোমশ্চ চিত্রভানুশ্চ ভামিনি| উচ্চৈঃশ্রবাশ্চ তুরগো মন্দিরে নিবসন্তু তে|| ইদমমৃতমপাং সমুদ্ধৃতং বৈ তব লঘু গর্ভমিমং প্রমুঞ্চতু স্ত্রি| তদনলপবনার্কবাসবাস্তে সহ লবণাম্বুধরৌর্দিশন্তু শান্তিম্||' ইতি| অথাপরা স্ত্রী গর্ভিণীমনুশিষ্যাত্| অনাগতাযাং বেদনাযাং মা প্রবাহিষ্ঠাঃ| অকালপ্রবাহণং হি বিণ্মূত্রাদিবেগানামিবোদীরণমনর্থকরমহিতং চ| গর্ভস্য শ্বাসকাসশোফকুব্জতাদিকরত্বাত্|' ইতি|

Adhikarana harShAdyutpAdane Palam (82) · Śloka 82

অথ কিং হর্ষাদ্যুত্পাদনেন স্যাত্ ? ইত্যাহ | প্রত্যাযান্তি তথা প্রাণাঃ সূতিক্লেশাবসাদিতাঃ||৮২||

তথা-তেন প্রকারেণ হর্ষাদিজননেন, প্রাণাঃ সূতেঃ ক্লেশাঃ-আধযঃ, তত্কৃতানি দুঃখানি, তৈরবসাদিতাঃ-গ্লানিং নীতাঃ, গর্ভিণ্যাঃ প্রত্যাযান্তি-পুনর্নবীভবন্তি|

Adhikarana garBasya sa~gge kRuShNasarpanirmokena dhUpanAdi (83-87) · Śloka 87

ধূপযেদ্গর্ভসঙ্গে তু যোনিং কৃষ্ণাহিকঞ্চুকৈঃ| হিরণ্যপুষ্পীমূলং চ পাণিপাদেন ধারযেত্||৮৩|| সুবর্চলাং বিশল্যাং বা জরায্বপতনেঽপি চ| কার্যমেতত্তথোত্ক্ষিপ্য বাহ্বোরেনাং বিকম্পযেত্||৮৪|| কটীমাকোটযেত্পার্ষ্ণ্যা স্ফিজৌ গাঢং নিপীডযেত্| তালুকণ্ঠং স্পৃশেদ্বেণ্যা মূর্ধ্নি দদ্যাত্স্নুহীপযঃ||৮৫|| ভূর্জলাঙ্গলিকীতুম্বীসর্পত্বক্কুষ্ঠসর্ষপৈঃ| পৃথগ্দ্বাভ্যাং সমস্তৈর্বা যোনিলেপনধূপনম্||৮৬|| কুষ্ঠতালীসকল্কং বা সুরামণ্ডেন পাযযেত্| যূষেণ বা কুলত্থানাং বাল্বজেনাসবেন বা||৮৭||

গর্ভস্য সঙ্গে-সক্তৌ, যোনিং কৃষ্ণসর্পনির্মোকেন ধূপযেত্-ধূপনং যোনৌ কুর্যাত্| ধূপযেদিতি "গুপূধূপ" ইত্যাদিনা আযপ্রত্যযঃ, ততো বিধৌ লিঙ্| তথা, হিরণ্যপুষ্পীমূলং পাণিনা পাদেন চ সা গর্ভিণী ধারযেত্| অথবা, সুবর্চলাং বিশল্যাং বা ধারযেত্| এতত্-গর্ভসঙ্গোক্তং, জরাযোঃ-অপরাখ্যস্য, অপতনে-অনিষ্ক্রান্তৌ, কার্যং-বিধাতব্যম্| ন কেবলং গর্ভসঙ্গোক্তং কার্যং যাবদেনাং-অপতিতজরাযুং, বাহ্বোর্দ্বযোরুত্ক্ষিপ্য বিকম্পযেত্-বিধুনীত| সঙ্গ্রহে তূক্তম্ (শা. অ. ৩)- "ন চেদপরা পততি ততো দক্ষিণেন পাণিনা নাভেরুপরিষ্টাদ্বলবদুত্পীড্যান্যেন পৃষ্ঠত উপসঙ্গৃহ্য বিধুনুযাত্|" ইতি| তথা, পার্ষ্ণ্যা কটীমাকোটযেদিতি পুনঃ পুনঃ কট্যাং পার্ষ্ণিঘাতং কুর্যাদিত্যর্থঃ| তথা, স্ফিজৌ যুতৌ সুষ্ঠু নিপীডযেত্| তথা, বেণ্যা-কেশরচনাবিশেষাখ্যযা, তালুকণ্ঠং স্পৃশেত্| সঙ্গ্রহেঽপ্যুক্তম্ (শা. অ. ৩)- "বেণ্যাঽঙ্গুল্যা বা কেশবেষ্টিতযা বা তালুকণ্ঠং পরামৃশেত্|" ইতি| তথা, মূর্ধ্নি-মস্তকে, স্নুহীপযঃ-সুধাদুগ্ধং দদ্যাত্| তথা ভূর্জাদিভির্দ্রব্যৈঃ পৃথক্-প্রত্যেকং, অথবা দ্বাভ্যাং কৃত্বা, সমস্তৈর্বা, যোন্যা লেপনং ধূপনং চ কার্যমিতি শেষঃ| কুষ্ঠতালীসপত্রযোঃ কল্কং বা সুরামণ্ডেন-সুরাভাগেনোপরিস্থিতেন, তাং পাযযেত্| অথবা, কুলত্থানাং যূষেণ-ক্বাথেন, পাযযেত্| বাল্বজেনাসবেন বা| বল্বজং বারিণা আসুত্য রাত্রৌ ধারিতং তচ্ছীতকষাযো বাল্বজ আসব উচ্যতে| সঙ্গ্রহেঽপ্যুক্তম্ (শা. অ. ৩)- "ভূর্জপত্রকাচমণিসর্পনির্মোকৈশ্চ যোনিং ধূপযেত্| ভূর্জগুগ্গুলুভ্যাং বা| শালিমূলসিদ্ধেন বা সর্পিষা যোনিমভ্যজ্য কটুকালাবুজালিনীনিম্বসর্পনির্মোকৈর্ধূপযেত্| অনভ্যক্তাং বা কটুতৈলমিশ্রৈঃ কল্কীকৃতৈর্বা তৈলাক্তৈরালিম্পেত্| গুডনাগরকল্কেন বা| তদেব বা ভক্ষযেত্| লাঙ্গলীমূলকল্কেন বা পাণিপাদমুদরং চ লিম্পেত্|" ইতি| তথোক্তম্ (সং. শা. অ. ৩)-"কুষ্ঠৈলাকল্কং বা সুরযা পাযযেত্| অর্কালর্ককষাযং বা সুরোন্মিশ্রম্| কুষ্ঠলাঙ্গলিকীমূলকল্কং বা মদ্যমূত্রান্যতরেণ| [ বত্সকাদিচূর্ণং বা মদ্যেন| ] শতপুষ্পাকুষ্ঠমদনহিঙ্গুসিদ্ধস্য চ তৈলস্য পিচুং গ্রাহযেত্|" ইতি|

Adhikarana tato~anuvAsanam (88-90) · Śloka 90

শতাহ্বাসর্ষপাজাজীশিগ্রুতীক্ষ্ণকচিত্রকৈঃ| সহিঙ্গুকুষ্ঠমদনৈর্মূত্রে ক্ষীরে চ সার্ষপম্||৮৮|| তৈলং সিদ্ধং হিতং পাযৌ যোন্যাং বাঽপ্যনুবাসনম্| শতপুষ্পাবচাকুষ্ঠকণাসর্ষকল্কিতঃ||৮৯|| নিরূহঃ পাতযত্যাশু সস্নেহলবণোঽপরাম্| তত্সঙ্গে হ্যনিলো হেতুঃ সা নির্যাত্যাশু তজ্জযাত্||৯০||

শতাহ্বাদিভির্দ্রব্যৈঃ সার্ষপং তৈলং মূত্রে ক্ষীরে চোভযস্মিন্ সিদ্ধং পক্বং, অনুবাসনং হিতম্| ক্ব? পাযৌ-গুদে| অথবা যোন্যাং গর্ভনিষ্ক্রমণদ্বারে| তথা, শতাহ্বাদিভির্দ্রব্যৈঃ কল্কিতো নিরূহোবস্তিকল্পোক্তৌ যৌগিকঃ, সহ স্নেহেন লবণেন চ বর্তমানঃ, আশু শীঘ্রমেব, অপরাং-জরাযুসংজ্ঞাং, পাতযতি| যস্মাত্তত্সঙ্গেঽনিলো হেতুঃ-বাযুঃ, কারণম্| তজ্জযাত্-বাতজযাত্, সা-অপরা, নির্যাতি-কুক্ষিতো বহির্নিষ্ক্রামতি| পবনবিজযে চ বস্তিঃ প্রধানম্| তথা চোক্তম্ (হৃ. সূ. অ. ১৯/১)-" বাতোল্বণেষু দোষেষু বাতে বা বস্তিরিষ্যতে|" ইত্যাদি| সঙ্গ্রহে তু গর্ভিণ্যা আস্থাপনেঽনুবাসনে চ সন্নিবেশবিশেষ উক্তঃ| যথা (শা. অ. ৩)- "গর্ভিণীং তু ন্যুব্জামাস্থাপযেদনুবাসযেচ্চ| তথাঽস্যা বিবৃতমার্গতযা সম্যগৌষধমনুপ্রবিশতি|" ইতি|

Adhikarana kuSalayoShitA tasyAharaNam (91) · Śloka 91

কুশলা পাণিনাঽক্তেন হরেত্ক্লৃপ্তনখেন বা| |৯১|

অথবা কুশলা-তদ্ব্যাপারনিপুণা যোষিত্, পাণিনা সর্পিষাঽভ্যক্তেন তাং হরেত্| কিম্ভূতেন পাণিনা ? ক্লৃপ্তনখেন, ক্লৃপ্তাঃ-কল্পিতাঃ শস্ত্রেণ, নখা যস্য তেন, তথাবিধেন পাণিনা নালানুসারত আকর্ষেত্| সঙ্গ্রহেঽপ্যুক্তম্ (শা. অ. ৩)- "[ উমা ] শাল্মলীপিচ্ছযা বা সঘৃতযা যোনিং পূরযিত্বা বিধুনুযাত্|" ইতি|

Adhikarana tailena mardanAdi (91) · Śloka 91

| মুক্তগর্ভাপরাং যোনিং তৈলেনাঙ্গং চ মর্দযেত্||৯১||

গর্ভশ্চাপারা চ গর্ভাপরম্, মুক্তং গর্ভাপরং যযা যোন্যা, তাং যোনিং তৈলেন মর্দযেত্| অঙ্গং-শরীরং চ, মর্দযেত্|

Adhikarana makkalAKye roge yavakShArapAnAdi (92-93) · Śloka 93

মক্কল্লাখ্যে শিরোবস্তিকোষ্ঠশূলে তু পাযযেত্| সুচূর্ণিতং যবক্ষারং ঘৃতেনোষ্ণজলেন বা||৯২|| ধান্যাম্বু বা গুডব্যোষত্রিজাতকরজোন্বিতম্| |৯৩|

মক্কল্লাখ্যে রোগ উত্পন্নে শিরোবস্তিকোষ্ঠশূললক্ষণে সতি যবক্ষারং সূক্ষ্মচূর্ণিতং ঘৃতেনাথবোষ্ণজলেন তাং সূতাং পাযযেত্| ধান্যাম্বু বা তাং পাযযেত্| কিম্ভূতম্ ? গুডব্যোষত্রিজাতকরজোন্বিতম্| গুড ইতি সামান্যোক্তাবপি পুরাণোঽত্র গুডো গ্রাহ্যঃ, পথ্যত্বাত্| মক্কল্লাখ্যো-রোগঃ| শিরোবস্তিকোষ্ঠশূল ইতি লাঘবেন তন্ত্রকৃতাঽস্য লক্ষণমুক্তম্|

Adhikarana bAlasyopacAraH (93) · Śloka 93

| অথ বালোপচারেণ বালং যোষিদুপাচরেত্||৯৩||

অথ বালং-জাতমাত্রমেব, উপাচরেত্-উপপাদযেত্| কা ? যোষিত্,-বহুকৃত্বঃ প্রসূতা, ন পুমান্| কেন ? বালোপচারেণ, বালোপচরণীযোক্তেনাহারবিহারাদিনা|

Adhikarana buBukShitAyA tailamAtrAdi pAnam (94-95) · Śloka 95

সূতিকা ক্ষুদ্বতী তৈলাদ্ধৃতাদ্বা মহতীং পিবেত্| পঞ্চকোলকিনীং মাত্রামনু চোষ্ণং গুডোদকম্||৯৪|| বাতঘ্নৌষধতোযং বা, তথা বাযুর্ন কুপ্যতি| বিশুধ্যতি চ দুষ্টাস্রং দ্বিত্রিরাত্রমযং ক্রমঃ||৯৫||

সূতিকা ক্ষুদ্বতী-বুভুক্ষিতা সতী, তৈলাদথবা ঘৃতান্মহতীং মাত্রাং পিবেত্| কিম্ভূতাম্ ? পঞ্চকোলকং বিদ্যতে যস্যা মাত্রাযাস্তাং পঞ্চকোলকিনীম্| সূক্ষ্মচূর্ণীকৃতপঞ্চকোলকযুক্তাং তাং মাত্রাং পিবেদিত্যর্থঃ| অষ্টাভির্যামৈর্যা জরাং গচ্ছতি সা স্নেহ মাত্রা মহতী| অনু চোষ্ণং গুডোদকং পিবেদিতি যোজ্যম্| বাতহরদ্রব্যক্বাথং বা পশ্চাত্পিবেত্| তথা-এবং কৃতে সতি, বার্যুন কুপ্যতি-ন কোপং যাতি শূন্যং কোষ্ঠং প্রাপ্য| দুষ্টং রক্তং চ বিশুধ্যতি| অযং-এষঃ, ক্রমো দ্বিরাত্রং ত্রিরাত্রং বা যথাযোগং কার্যঃ|

Adhikarana snehAyogyAyAH snehaMvinA pUrvavidhiH (96) · Śloka 96

স্নেহাযোগ্যা তু নিঃস্নেহমমুমেব বিধিং ভজেত্| পীতবত্যাশ্চ জঠরং যমকাক্তং বিবেষ্টযেত্||৯৬||

স্নেহপানাযোগ্যা তু স্ত্রী-যা স্নেহং নার্হতি সা, নিঃস্নেহং-স্নেহং বিনা, অমুমেব-পূর্বোক্তং বিধিং, ভজেত্| পীতবত্যাশ্চ তস্যা জঠরং যমকাক্তং-তৈলঘৃতাভ্যামভ্যক্তং, বিবেষ্টযেদ্বাসসেতি শেষঃ| পীতবত্যা ইত্যবিশেষনির্দেশঃ কদাচিত্ স্নেহযোগ্যা স্নেহং পীতবতী, স্নেহাযোগ্যা তূষ্ণং গুডোদকং পীতবতী, অথবা বাতঘ্নৌষধতোযং পীতবতী, ইতি সামান্যেন যো নির্দেশস্তস্যার্থঃ|

Adhikarana snAtAyAH peyApAnam (97-99) · Śloka 99

জীর্ণে স্নাতা পিবেত্পেযাং পূর্বোক্তৌষধসাধিতাম্| ত্র্যহাদূর্ধ্বং বিদার্যাদিবর্গক্বাথেন সাধিতা||৯৭|| হিতা যবাগূঃ স্নেহাঢ্যা সাত্ম্যতঃ পযসাঽথবা| সপ্তরাত্রাত্পরং চাস্যৈ ক্রমশো বৃংহণং হিতম্||৯৮|| দ্বাদশাহেঽনতিক্রান্তে পিশিতং নোপযোজযেত্| |৯৯|

স্নেহে জীর্ণে কবোষ্ণগুডোদকে বাতঘ্নৌষধতোযে বা, অনন্তরং স্নাতা সতী পূর্বোক্তৌষসাধিতাং-পঞ্চকোলকৃতাং, পেযাং পিবেত্| ত্র্যহাদূর্ধ্বং-অনন্তরং, বিদার্যাদিবর্গোক্তৌষধৈঃ সিদ্ধা যবাগূঃ- পেযা,স্নেহাঢ্যা হিতা| অথবা সাত্ম্যতঃ-সাত্ম্যবশাত্, পযসা-ক্ষীরেণ সাধিতা, যবাগূর্হিতা| সপ্তরাত্রাত্পরং-অনন্তরং, ক্রমশো-ন সহসা, তস্যৈ বৃংহণং হিতম্| বৃংহণং চ জীবনীযবৃংহণীযমধুরবর্গসিদ্ধৈরভ্যঙ্গোদ্বর্তনপরিষেকাবগাহনৈর্হৃদ্যৈশ্চান্নপানৈর্বিধাতব্যম্| দ্বাদশাহেঽনতিক্রান্তে-অপরিসমাপ্তে, পিশিতং-মাসং, নোপযোজযেত্-নাভ্যবহারযেত্, স্কন্দাদিদ্বাদশগ্রহাভিষঙ্গপরিহারার্থম্| মাংসভোজনেন হি কদাচিত্তৈরভিষঙ্গো ভবেত্, তেষাং মাংসাদত্বাত্|

Adhikarana sUtAyAH yatnenopacAraH (99-100) · Śloka 100

| যত্নেনোপচরেত্সূতাং দুঃসাধ্যো হি তদামযঃ||৯৯|| গর্ভবৃদ্ধিপ্রসবরুক্ক্লেদাস্রস্রুতিপীডনৈঃ| |১০০|

সূতাং স্ত্রীং যত্নেন-তাত্পর্যেণ, উপচরেত্-উপক্রমেত্| কুতো হেতোঃ ? ইত্যাহ-হি-যস্মাত্, তস্যা আমযো-রোগো দুঃসাধ্যঃ-কৃচ্ছ্রেণোপক্রম্যঃ| কিমিতি কৃচ্ছ্রসাধ্যঃ ? ইত্যাহ-গর্ভেত্যাদি| বৃদ্ধিশ্চ প্রসবশ্চ বৃদ্ধিপ্রসবৌ, গর্ভস্য বৃদ্ধিপ্রসবৌ চ রুক্ চ ক্লেদাস্রস্রুতিশ্চ পীডনং চ গর্ভবৃদ্ধিপ্রসবরুক্ক্লেদাস্রস্রুতিপীডনানি, তৈর্হেতুভূতৈস্তদামযো দুঃসাধ্যঃ| রুক্-প্রবাহবেদনা|

Adhikarana evaM sArdhamAsavidhiH (1) · Śloka 1

| এবং চ মাসাদধ্যর্ধান্মুক্তাহারাদিযন্ত্রণা||১০০|| গতসূতাভিধানা স্যাত্পুনরার্তবদর্শনাত্| ১০০ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং দ্বিতীযে শারীরস্থানে গর্ভাবক্রান্তির্নাম প্রথমোঽধ্যাযঃ||১||

এবং-অনেন প্রকারেণ, সার্ধং মাসমুপস্কৃতা ক্রমেণ মুক্তাহারবিহারযন্ত্রণা স্যাত্| অধ্যর্ধমাসাত্পরেণ গতসূতাভিধানাব্যপেতপ্রসূতিব্যপদেশা, পুনরার্তবদর্শনাদ্ভবেত্| সঙ্গ্রহে তূক্তম্ (শা. অ. ২)- "জরাযুণা মুখে ছন্নে কণ্ঠে চ কফবেষ্টিতে| বাযোর্মার্গনিরোধাচ্চ ন গর্ভস্থঃ প্ররোদিতি||" ইতি| ইতিশ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং দ্বিতীযে শারীরস্থানে গর্ভা- বক্রান্তির্নাম প্রথমোঽধ্যাযঃ সমাপ্তঃ|| ১||