1. garbhāvakrāntiradhyāyaḥ

Adhikarana garBAvakrAntiradhyAyaH (2) · Śloka 2

অথাতো গর্ভাবক্রান্তি শারীরং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

Adhikarana garBotpattiH (1) · Śloka 1

শুদ্ধে শুক্রার্তবে সত্বঃ স্বকর্মক্লেশচোদিতঃ| গর্ভঃ সম্পদ্যতে যুক্তিবশাদগ্নিরিবারণৌ||১||

Adhikarana garBasya kukShau vRuddhiprakAraH (2) · Śloka 2

তদেবং গর্ভস্য সম্পত্তিমভিধায যথা তস্য কুক্ষৌ বৃদ্ধিঃ স্যাত্তথা বক্তিবীজাত্মকৈর্মহাভূতৈঃ সূক্ষ্মৈঃ সত্বানুগৈশ্চ সঃ| মাতুশ্চাহাররসজৈঃ ক্রমাত্কুক্ষৌ বিবর্দ্ধতে||২||

Adhikarana garBapraveSopalamBAbhAve~api sthitau dRuShTAntaH (3) · Śloka 3

ননু, সত্বঃ কুক্ষৌ প্রবিষ্টো গর্ভস্য বর্দ্ধনে হেতুরুক্তঃ, ন চাস্য প্রবেশ উপলভ্যতে, ইত্যাহ তেজো যথাঽর্করশ্মীনাং স্ফটিকেন তিরস্কৃতম্| নেন্ধনং দৃশ্যতে গচ্ছত্সত্বো গর্ভাশযং তথা||৩||

Adhikarana satvasya narAdirUpatve kAraNam (4) · Śloka 4

ননু, সত্বো ভূতানুগ একরূপ এব| তত্কথমনেকজাত্যাকৃত্যা নরতুরগোরগগজগবযাদিমত্যাঽঽলিঙ্গিতঃ সম্পদ্যতে ? ইত্যস্মিন্ পর্যনুযোগ ইদমাহ কারণানুবিধাযিত্বাত্কার্যাণাং তত্স্বভাবতা| নানাযোন্যাকৃতীঃ সত্বো ধত্তেঽতো দ্রুতলোহবত্||৪||

Adhikarana strIpunnapuMsakAnAM bhede kAraNam (5) · Śloka 5

তথা অত এব চ শুক্রস্য বাহুল্যাজ্জাযতে পুমান্| রক্তস্য স্ত্রী, তযোঃ সাম্যে ক্লীবঃ- |৫|

Adhikarana ekadaivAnekagarbhotpattau kAraNam (5-6) · Śloka 6

সাম্প্রতং যথাঽনেকগর্ভত্বং তুল্যকালং স্যাত্তথা প্রতিপাদযিতুমাহ শুক্রার্তবে পুনঃ||৫|| বাযুনা বহুশো ভিন্নে যথাস্বং বহ্বপত্যতা| |৬|

Adhikarana viyonivikRutAkArANAmutpattau kAraNam (6) · Śloka 6

ননু, কথং বিযোনযো বিকৃতাকারাশ্চ গর্ভাঃ স্যুঃ ? বিযোনিবিকৃতাকারা জাযন্তে বিকৃতৈর্মলৈঃ||৬||

Adhikarana strINAM rajaHsrAvo mAsimAsi vIryavatputrotpattau kAraNam (7) · Śloka 7

মাসি মাসি রজঃ স্ত্রীণাং রসজং স্ত্রবতি ত্র্যহম্| বত্সরাদ্বাদশাদূর্ধ্বং যাতি পঞ্চাশতঃ ক্ষযম্||৭||

Adhikarana garbhasyarogAdiyutatve kAraNam (8-9) · Śloka 9

পূর্ণষোডশবর্ষা স্ত্রী পূর্ণবিংশেন সঙ্গতা| শুদ্ধে গর্ভাশযে মার্গে রক্তে শুক্রেঽনিলে হৃদি||৮|| বীর্যবন্তং সুতং সূতে ততো ন্যূনাব্দযোঃ পুনঃ| রোগ্যল্পাযুরধন্যো বা গর্ভো ভবতি নৈব বা||৯||

Adhikarana SukrArtavasaMyoge~api garbhAsambhave kAraNam (10) · Śloka 10

ননু, দম্পত্যোঃ শুক্রার্তবসংযোগেঽপি সতি ক্বচিদ্গর্ভসম্ভূতির্ন দৃশ্যতে| তত্কথমেতত্ ? ইত্যাশঙ্ক্যেদমাহ বাতাদিকুণপগ্রন্থিপূযক্ষীণমলাহ্বযম্| বীজাসমর্থং রেতোস্রম্|১০|

Adhikarana svali~ggairvAtAdidoShajaSukraj~jAnam ,kuNapagranthipUyakShINamalAhvayAnAM retosrANAM kAraNAni (10-12) · Śloka 12

| স্বলিঙ্গৈর্দোষজং বদেত্||১০|| রক্তেন কুণপং, শ্লেষ্মবাতাভ্যাং গ্রন্থিসন্নিভম্| পূযাভং রক্তপিত্তাভ্যাং, ক্ষীণং মারুতপিত্ততঃ||১১|| কৃচ্ছ্রাণ্যেতান্যসাধ্যং তু ত্রিদোষং মূত্রবিট্প্রভম্| |১২|

Adhikarana vAtAdijAnAmupakramaH (12) · Śloka 12

ইদানীমুপক্রমমাহ | কুর্যাদ্বাতাদিভির্দুষ্টে স্বৌষধম্|১২|

Adhikarana kuNape upakramaH (12-13) · Śloka 13

ইদানীং কুণপচিকিত্সামাহ | কুণপে পুনঃ||১২|| ধাতকীপুষ্পখদিরদাডিমার্জুনসাধিতম্| পাযযেত্সর্পিরথবা বিপক্বমসনাদিভিঃ||১৩||

Adhikarana granthisaMj~je retasyupakramaH (14) · Śloka 14

সাম্প্রতং গ্রন্থিসংজ্ঞে রেতস্যুপক্রমং ব্রূতে পলাশভস্মাশ্মভিদা গ্রন্থ্যাভে| |১৪|

Adhikarana pUyaretasyupakramaH (14) · Śloka 14

পূযরেতসি| পরুষকবটাদিভ্যাম্|১৪|

Adhikarana kShINAhvayeretasyupakramaH (14) · Śloka 14

| ক্ষীণে শুক্রকরী ক্রিযা||১৪||

Adhikarana malasadRuSe retasyupakramaH (15) · Śloka 15

সংশুদ্ধো বিট্প্রভে সর্পির্হিঙ্গুসেব্যাদি(গ্নি)সাধিতম্| পিবেত্|১৫|

Adhikarana granthinAmnyArtave upakrame (15) · Śloka 15

বাতদ্যার্তবেষু "স্বৌষধং কুর্যাত্" (শ্লো.১২) ইত্যুক্তম্| কুণপগ্রন্থ্যদ্যার্তবেষু বিশেষেণ চিকিত্সাং বক্ষ্যতি | গ্রন্থ্যার্তবে পাঠাব্যোষবৃক্ষকজং জলম্||১৫||

Adhikarana kuNapapUyAstrayorupakramaH SuddhaSukralakShaNam (16) · Śloka 16

পেযং কুণপপূযাস্ত্রে চন্দনং বক্ষ্যতে তু যত্| গুহ্যরোগে চ তত্সর্বং কার্যং সোত্তরবস্তিকম্||১৬||

Adhikarana SuddhArtavalakShaNam (17-18) · Śloka 18

বীজাসমর্থং রেতোস্ত্রমভিধায সাম্প্রতং শুদ্ধং যচ্ছুক্রার্তবং বীজসমর্থং তল্লক্ষাণার্থমাহ শুক্রং শুক্লং গুরু স্নিগ্ধং মধুরং বহলং বহু| ঘৃতমাক্ষিকতৈলাভং সদ্গর্ভায আর্তবং পুনঃ||১৭|| লাক্ষারসশশাস্ত্রাভং ধৌতং যচ্চ বিরজ্যতে| |১৮|

Adhikarana garbhasambhavAtpUrvamitikartavyatA (18-19) · Śloka 19

শুদ্ধশুক্রার্তবলক্ষণমুক্ত্বা, ইদানীং গর্ভসম্ভবাত্পূর্বমিতি কর্তব্যতামাহ | শুদ্ধশুক্রার্তবং স্বস্থং সংরক্তং মিথুনং মিথঃ||১৮|| স্নেহৈঃ পুংসবনৈঃ স্নিগ্ধং শুদ্ধং শীলিতবস্তিকম্| |১৯|

Adhikarana dampatyoH pRuthagupakramaH ,kShIrAdibhirnarasyopacAraH (19) · Śloka 19

| নরং বিশেষাত্ক্ষীরাজ্যৈর্মধুরৌষধসংস্কৃতৈঃ||১৯||

Adhikarana tailAdibhirnAryAH samupacAraH (20) · Śloka 20

নারীং তৈলেন মাষৈশ্চ পিত্তলৈঃ সমুপাচরেত্| |২০|

Adhikarana strImadhikRutya garbhagrahaNayogyatA (20-21) · Śloka 21

ঊর্বোক্তসকলসামগ্রীযুক্তাদপি মিথুনাদ্বিশিষ্টকালমন্তরেণ গর্ভস্যাসম্ভব ইতি স্ত্রীমধিকৃত্য তদ্গর্ভগ্রহণযোগ্যং কালং দর্শযিতুমাহ | ক্ষামপ্রসন্নবদনাং স্ফুরচ্ছ্রোণিপযোধরাম্||২০|| স্বস্তাক্ষিকুক্ষিং পুংস্কামাং বিদ্যাদৃতুমতীং স্ত্রিযম্| |২১|

Adhikarana RutAvatIte yonisa~gkocAdi (21-22) · Śloka 22

"সর্বং চ হেতুমদ্ব্রূযাত্" ইত্যাগমঃ, অত আহ | পদ্মং সঙ্কোচমাযাতি দিনেঽতীতে যথা, তথা||২১|| ঋতাবতীতে যোনিঃ, সা শুক্রং নাতঃ প্রতীচ্ছতি| |২২|

Adhikarana mAsenopacitaM raktaM vAyuryonimukhAnnudet (22-23) · Śloka 23

বিবৃতাবিবৃতমুখত্বং হি যোনের্গর্ভগ্রহণাগ্রহণহেতুঃ| তচ্চ বাযোঃ ক্রিযাবতঃ কালসহাযস্যাযত্তমিত্যাহ | মাসেনোপচিতং রক্তং ধমনীভ্যামৃতৌ পুনঃ||২২|| ঈষত্কৃষ্ণং বিগন্ধং চ বাযুর্যোনিমুখান্নুদেত্| |২৩|

Adhikarana rajasvalayA vartanaprakAraH RutumatyAScaturthadinakRutyam (23-26) · Śloka 26

শুদ্ধং চ রক্তং পুষ্পসংজ্ঞম্, গর্ভাখ্যস্য ফলস্য ভবিষ্যতোঽভিব্যঞ্জকত্বাত্| অত এবাহ | ততঃ পুষ্পেক্ষণাদেব কল্যাণধ্যাযিনী ত্র্যহম্||২৩|| মৃজালঙ্কাররহিতা দর্ভসংস্তরশাযিনী| ক্ষৈরেযং যাবকং স্তোকং কোষ্ঠশোধনকর্ষণম্||২৪|| পর্ণে শরাবে হস্তে বা ভুঞ্জীত ব্রহ্মচারিণী| চতুর্থেঽহ্নি ততঃ স্নাতা শুক্লমাল্যাম্বরা শুচিঃ||২৫|| ইচ্ছন্তী ভর্তৃসদৃশং পুত্রং পশ্যেত্পুরঃ পতিম্| |২৬|

Adhikarana Rutusthitau kAlaparimANam same putraH viShame kanyA (26-27) · Śloka 27

তত্কিং ত্র্যহমেব ঋতুঃ, অত্রৈব পুষ্পদর্শনাত্| অথোত্তরকালমপি ? ইত্যাশঙ্ক্যাহ | ঋতুস্তু দ্বাদশ নিশাঃ পূর্বাস্তিস্রোঽত্র নিন্দিতাঃ||২৬|| একাদশী চ, যুগ্মাসু স্যাত্পুত্রোঽন্যাসু কন্যকা| |২৭|

Adhikarana putrIyavidhiH (27-28) · Śloka 28

| উপাধ্যাযোঽথ পুত্রীযং কুর্বীত বিধিবদ্বিধিম্||২৭|| নমস্কারপরাযাস্তু শূদ্রাযা মন্ত্রবর্জিতম্| |২৮|

Adhikarana evaM dampatyoravaMdhyaHsaMyogaH (28) · Śloka 28

| অবন্ধ্য এবং সংযোগঃ স্যাদপত্যং চ কামতঃ||২৮||

Adhikarana dampatyorekAnte maithunam (29) · Śloka 29

অত এবাহ সন্তো হ্যাহুরপত্যার্থং দম্পত্যোঃ সঙ্গতিং রহঃ| |২৯|

Adhikarana durapatyasya kulA~ggAratvam (29) · Śloka 29

ন চাপত্যমাত্রাযেত্যাহ | দুরপত্যং কুলাঙ্গারো গোত্রে জাতং মহত্যপি||২৯||

Adhikarana dampatyoH putracintanaprakAraH (30) · Śloka 30

ইচ্ছেতাং যাদৃশং পুত্রং তদ্রূপচরিতাংশ্চ তৌ| চিন্তযেতাং জনপদাংস্তদাচারপরিচ্ছদৌ||৩০||

Adhikarana dampatyoH shayyArohAdi (31-32) · Śloka 32

কর্মান্তে চ পুমান্ সর্পিঃক্ষীরশাল্যোদনাশিতঃ| প্রাগ্দক্ষিণেন পাদেন শযযাং মৌহূর্তিকাজ্ঞযা||৩১|| আরোহেত্ স্ত্রী তু বামেন তস্য দক্ষিণপার্শ্বতঃ| তৈলমাষোত্তরাহারা তত্র মন্ত্রং প্রযোজযেত্||৩২||

Adhikarana tatramantrapAThaH (33) · Śloka 33

তদেব মন্ত্রমাহ.... ঔম্ আহিরসি আযুরসি সর্বতঃ প্রতিষ্ঠাসি ধাতা ত্বাং দধাতু বিধাতা ত্বাং দধাতু ব্রহ্মবর্চসা ভবেতি| ব্রহ্মা বৃহস্পতির্বিষ্ণুঃ সোমঃ সূর্যস্তথাঽশ্বিনৌ| ভগোঽথ মিত্রাবরুণৌ বীরং দদতু মে সুতম্||৩৩||

Adhikarana anyonyaMsAntvanapUrvakaMsaMveSaH (34) · Śloka 34

সান্ত্বযিত্বা ততোঽন্যোন্যং সংবিশেতাং মুদান্বিতৌ| উত্তানা তন্মনা যোষিত্তিষ্ঠেদঙ্গৈঃ সুসংস্থিতৈঃ||৩৪||

Adhikarana evaM kRute garBadhAraNam (35) · Śloka 35

কিমেবংসতি ভবতি ? ইত্যাহ তথা হি বীজং গৃহ্ণাতি দোষৈঃ স্বস্থানমাস্থিতৈঃ| |৩৫|

Adhikarana sadyogarBayA lakShaNam (35-36) · Śloka 36

| লিঙ্গং তু সদ্যোগর্ভাযা যোন্যা বীজস্য সঙ্গ্রহঃ||৩৫|| তৃপ্তির্গুরুত্বং স্ফুরণং শুক্রাস্রাননুবন্ধনম্| হৃদযস্পন্দনং তন্দ্রা ত্ড়্ড্গ্লানির্লোমহর্ষণম্||৩৬||

Adhikarana garBAvasthAH (37) · Śloka 37

ইদানীং গর্ভস্যাবস্থাঃ প্রদর্শযিতুমাহ অব্যক্তঃ প্রথমে মাসি সপ্তাহাত্কললীভবেত্| গর্ভঃ পুংসবনান্যত্র পূর্বং ব্যক্তেঃ প্রযোজযেত্||৩৭||

Adhikarana puMsavanasya sArdhakatvam (38) · Śloka 38

ননু, "শুদ্ধেশুক্রার্তবে সত্বঃ স্বকর্মক্লেশচোদিতঃ| গর্ভঃ সম্পদ্যতে"(শ্লো.১) ইত্যুক্তম্| তত্র যদি প্রাক্কৃতেন কর্মণা স্ত্রীগর্ভঃ কুক্ষিমাক্ষিপ্তস্তদা পুরুষপ্রযত্নে সত্যপি পুংগর্ভঃ কর্তুং ন শক্যতে| তস্মাত্পুংসবনমনর্থকমেবেত্যাশঙ্ক্যাহ বলী পুরুষকারো হি দৈবমপ্যতিবর্ততে| |৩৮|

Adhikarana puMsavanaprayogaH (38-39) · Śloka 39

অধুনা পুংসবনাদিপ্রযোগমাহ | পুষ্যে পুরুষকং হৈমং রাজতং বাঽথবাঽঽযসম্||৩৮|| কৃত্বাঽগ্নিবর্ণং নির্বাপ্য ক্ষীরে তস্যঞ্জলিং পিবেত্| |৩৯|

Adhikarana puShye gauradaNDAdicaturNAM pAnam (39-40) · Śloka 40

| গৌরদণ্ডমপামার্গং জীবকর্ষভসৈর্যকান্||৩৯|| পিবেত্পুষ্যে জলে পিষ্টানেকদ্বিত্রিসমস্তশঃ| |৪০|

Adhikarana SvetabRuhatImUlasya strInAsApuTe secanam (40-41) · Śloka 41

| ক্ষীরেণ শ্বেতবৃহতীমূলং নাসাপুটে স্বযম্||৪০|| পুত্রার্থং দক্ষিণে সিঞ্চেদ্বামে দুহিতৃবাঞ্ছযা| |৪১|

Adhikarana putrotpAdasthitipradAnyauShadhAni (41-42) · Śloka 42

| পযসা লক্ষ্মণামূলং পুত্রোত্পাদস্থিতিপ্রদম্||৪১|| নাসযাঽঽস্যেন বা পীতং বটশুঙ্গাষ্টকং তথা| ওষধীর্জীবনীযাশ্চ বাহ্যান্তরুপযোজযেত্||৪২||

Adhikarana garBadhAraNe upacAraH (43) · Śloka 43

উপচারঃ প্রিযহিতৈর্ভর্ত্রা ভৃত্যৈশ্চ গর্ভধৃক্| নবনীতঘৃতক্ষীরৈঃ সদা চৈনামুপাচরেত্||৪৩||

Adhikarana garBiNyA ativyavAyatyAgAdi (44-47) · Śloka 47

অতিব্যবাযমাযাসং ভারং প্রাবরণং গুরু| অকালজাগরস্বপ্নং কঠিনোত্কটকাসনম্||৪৪|| শোকক্রোধভযোদ্বেগবেগশ্রদ্ধাবিধারণম্| উপবাসাধ্বতীক্ষ্ণোষ্ণগুরুবিষ্টম্ভিভোজনম্||৪৫|| রক্তং নিবসনং শ্বভ্রকূপেক্ষাং মদ্যমামিষম্| উত্তানশযনং যচ্চ স্ত্রিযো নেচ্ছন্তি তত্ত্যজেত্||৪৬|| তথা রক্তস্ত্রুতিং শুদ্ধিং বস্তিমামাসতোঽষ্টমাত্| এভির্গর্ভঃ স্ত্রবেদামঃ কুক্ষৌ শুষ্যেন্ম্রিযেত বা||৪৭||

Adhikarana vAtalAdyAhAraiH kubjAdayo garBAH (48) · Śloka 48

বাতলৈশ্চ ভবেদ্গর্ভঃ কুব্জান্ধজডবামনঃ| পিত্তলৈঃ খলতিঃ পিঙ্গঃ শ্বিত্রী পাণ্ডুঃ কফাত্মভিঃ||৪৮||

Adhikarana mRudvAdyauShadharvyAdhijayaH (49) · Śloka 49

ব্যাধীংশ্চাস্যা মৃদুসুখৈরতীক্ষ্ণৈরৌষধৈর্জযেত্| |৪৯|

Adhikarana dvitIyemAsi garBasya peSyAdyAkRutiH (49-50) · Śloka 50

প্রথমে মাস্যব্যক্তলিঙ্গঃ কললাবস্থো গর্ভো ভবেত্| দ্বিতীযে তু মাসি গর্ভঃ কীদৃশঃ স্যাত্ ? ইত্যাহ | দ্বিতীযে মাসি কললাদ্ধনঃ পেশ্যথবাঽর্বুদম্||৪৯|| পুংস্ত্রীক্লীবাঃ ক্রমাত্তেভ্যঃ| |৫০|

Adhikarana vyakta garBasya lakShaNam (50-52) · Śloka 52

তত্র ব্যক্তস্য লক্ষণম্| ক্ষামতা গরিমা কুক্ষের্মূর্চ্ছা চ্ছর্দিররোচকঃ||৫০|| জৃম্ভা প্রসেকঃ সদনং রোমরাজ্যাঃ প্রকাশনম্| অম্লেষ্টতা স্তনৌ পীনৌ সস্তন্যৌ কৃষ্ণচূচুকৌ||৫১|| পাদশোফো বিদাহোঽন্যে শ্রদ্ধাশ্চ বিবিধাত্মিকাঃ| |৫২|

Adhikarana garBiNyAH icCitahitAhitasyadeyatve kAraNam (52-53) · Śloka 53

গর্ভিণ্যাশ্চ শ্রদ্ধাসূত্পন্নাসু কিমপথ্যং তস্যৈ দেযং ন বা ? ইত্যেবং সংদেহে তদ্যুদাসার্থমাহ | মাতৃজং হ্যস্য হৃদযং মাতুশ্চ হৃদযেন তত্||৫২|| সম্বদ্ধং তেন গর্ভিণ্যা নেষ্টং শ্রদ্ধাবিমাননম্| |৫৩|

Adhikarana hitena sAkamahitamapyalpaM deyam (53) · Śloka 53

তদর্থমাহ | দেযমপ্যহিতং তস্যৈ হিতোপহিতমল্পকম্||৫৩||

Adhikarana ahitadAne kAraNam (54) · Śloka 54

ননু, যদ্যহিতং তত্কস্মাদ্দীযতে ? ইত্যাহ শ্রদ্ধাবিঘাতাদ্গর্ভস্য বিকৃতিশ্চ্যুতিরেব বা| |৫৪|

Adhikarana tRutIye mAsi gAtrapa~jcakAdervyaktatvam (54-55) · Śloka 55

| ব্যক্তীভবতি মাসেঽস্য তৃতীযে গাত্রপঞ্চকম্||৫৪|| মূর্দ্ধা দ্বে সক্থিনী বাহূ সর্বসূক্ষ্মাঙ্গজন্ম চ| সমমেব হি মূর্দ্ধাদ্যৈর্জ্ঞানং চ সুখদুঃখযোঃ||৫৫||

Adhikarana mAtrA~abhyavahRutAnnapAnAbhyAMgarbhavardhanaprakAraH (56) · Śloka 56

অত্র মাত্রাঽভ্যবহৃতাভ্যামন্নপানাভ্যাং কথং গর্ভো বর্দ্ধতে ? ইত্যাহ গর্ভস্য নাভৌ মাতুশ্চ হৃদি নাডী নিবধ্যতে| যযা স পুষ্টিমাপ্নোতি কেদার ইব কুল্যযা||৫৬||

Adhikarana caturthapa~jcamayora~ggAnAM cetanAyASca krameNa vyaktiH (57) · Śloka 57

চতুর্থে ব্যক্ততাঽঙ্গানাং, চেতনাযাশ্চ পঞ্চমে| |৫৭|

Adhikarana ShaShThesnAyvAdInAM vyaktatA (57) · Śloka 57

| ষষ্ঠে স্নাযুসিরারোমবলবর্ণনখত্বচাম্||৫৭||

Adhikarana saptame sarvA~ggaiH pUrNatA (58) · Śloka 58

সর্বৈঃ সর্বাঙ্গসম্পূর্ণো ভাবৈঃ পুষ্যতি সপ্তমে| |৫৮|

Adhikarana garBotpIDitA vAtAdayaH kaNDvAdikarAH (58) · Śloka 58

গর্ভেণোত্পীডিতা দোষাস্তস্মিন্ হৃদযমাশ্রিতাঃ| কণ্ডূং বিদাহং কুর্বন্তি গর্ভিণ্যাঃ কিক্কিসানি চ||৫৮||

Adhikarana tadupaSamArthaM navanItAdi sevanam (59-62) · Śloka 62

নবনীতং হিতং তত্র কোলাম্বুমধুরৌষধৈঃ| সিদ্ধমল্পপটুস্নেহং লঘু স্বাদু চ ভোজনম্||৫৯|| চন্দনোশীরকল্কেন লিম্পেদূরুস্তনোদরম্| শ্রেষ্ঠযা বৈণহরিণশশশোণিতযুক্তযা||৬০|| অশ্বঘ্নপত্রসিদ্ধেন তৈলেনাভ্যজ্য মর্দযেত্| পটোলনিম্বমঞ্জিষ্ঠাসুরসৈঃ সেচযেত্পুনঃ||৬১|| দার্বীমধুকতোযেন মৃজাং চ পরিশীলযেত্| |৬২|

Adhikarana aShTame mAtAputrayorojasaH sa~jcArAdi (62-63) · Śloka 63

ইদানীমষ্টমে মাসি গর্ভস্বরূপং তত্রেতিকর্তব্যতাং চাচষ্টে | ওজোঽষ্টমে সঞ্চরতি মাতাপুত্রৌ মুহুঃ ক্রমাত্||৬২|| তেন তৌ ম্লানমুদিতৌ তত্র জাতো ন জীবতি| শিশুরোজোনবস্থানান্নারী সংশযিতা ভবেত্||৬৩||

Adhikarana aShTame mAsi kShIrapeyAdi sevanam (64-65) · Śloka 65

ক্ষীরপেযা চ পেযাঽত্র সঘৃতাঽন্বাসনং ঘৃতম্| মধুরৈঃ সাধিতং শুদ্ধ্যৈ পুরাণশকৃতস্তথা||৬৪|| শুষ্কমূলককোলাম্লকষাযেণ প্রশস্যতে| শতাহ্বাকল্কিতো বস্তিঃ সতৈলঘৃতসৈন্ধবঃ||৬৫||

Adhikarana prasUtikAlaH (66) · Śloka 66

তস্মিংস্ত্বেকাহযাতেঽপি কালঃ সূতেরতঃ পরম্| |৬৬|

Adhikarana dvAdaSamAsAdUrdhvaM garBo vikArakari (66) · Śloka 66

| বর্ষাদ্বিকারকারী স্যাত্কুক্ষৌ বাতেন ধারিতঃ||৬৬||

Adhikarana navame snigdhaudanAdeH Sastatvam (67) · Śloka 67

শস্তশ্চ নবমে মাসি স্নিগ্ধো মাংসরসৌদনঃ| বহুস্নেহা যবাগূর্বা পূর্বোক্তং চানুবাসনম্||৬৭||

Adhikarana tadA yonau vAtavijayArthaM picusthApanAdi (68) · Śloka 68

তত এব পিচুং চাস্যা যোনৌ নিত্যং নিধাপযেত্| বাতঘ্নপত্রভঙ্গাম্ভঃ শীতং স্নানেঽন্বহং হিতম্||৬৮||

Adhikarana garBaprasavaparyantaM garBiNyAH sasnehA~ggatvaM (69) · Śloka 69

নিঃস্নেহাঙ্গী ন নবমান্মাসাত্প্রভৃতি বাসযেত্| |৬৯|

Adhikarana putrAdyanumApakAni (69-71) · Śloka 71

ইদানীং গর্ভিণ্যা যৈর্লক্ষণৈরব্যভিচারিভিঃ পুত্রদুহিতৃনপুংসকযমকপ্রসবোঽনুমীযতে, তান্যাহ | প্রাগ্দক্ষিণস্তনস্তন্যা পূর্বং তত্পার্শ্বচেষ্টিনী||৬৯|| পুন্নামদৌর্হৃদপ্রশ্নরতা পুংস্বপ্নদর্শিনী| উন্নতে দক্ষিণে কুক্ষৌ গর্ভে চ পরিমণ্ডলে||৭০|| পুত্রং সূতেঽন্যথা কন্যাং যা চেচ্ছতি নৃসঙ্গতিম্| নৃত্যবাদিত্রগান্ধর্বগন্ধমাল্যপ্রিযা চ যা||৭১||

Adhikarana ShaNDaprasavalakShaNaM (72) · Śloka 72

ইদানীম্ ষণ্ঢপ্রসবলক্ষণমাহ ক্লীবং তত্সঙ্করে, তত্র মধ্যং কুক্ষেঃ সমুন্নতম্| |৭২|

Adhikarana yamalagarBalakShaNam (72) · Śloka 72

| যমৌ পার্শ্বদ্বযোন্নামাত্কুক্ষৌ দ্রোণ্যামিব স্থিতে||৭২||

Adhikarana navamAsAtprAk sUtikAgRuhASrayo garBiNyAH (73) · Śloka 73

প্রাক্ চৈব নবমান্মাসাত্ সা সূতিগৃহমাশ্রযেত্| দেশে প্রশস্তে সম্ভারৈঃ সম্পন্নং সাধকেঽহনি||৭৩||

Adhikarana tadgRuhe sUtyudIkShaNam (74) · Śloka 74

তত্রোদীক্ষেত সা সূতিং সূতিকাপরিবারিতা| |৭৪|

Adhikarana AsannaprasavAyAlakShaNam (74-76) · Śloka 76

ইদানীমাসন্নপ্রসবাযা লক্ষণমাহ | অদ্যশ্বঃপ্রসবে গ্লানিঃ কুক্ষ্যক্ষিশ্লথতা ক্লমঃ||৭৪|| অধোগুরুত্বমরুচিঃ প্রসেকো বহুমূত্রতা| বেদনোরূদরকটীপৃষ্ঠহৃদ্বস্তিবঙ্ক্ষণে||৭৫|| যোনিভেদরুজাতোদস্ফুরণস্রবণানি চ| আবীনামনু জন্মাতস্ততো গর্ভোদকস্ত্রুতিঃ||৭৬||

Adhikarana garbhasruteranantaraM saghRutapeyA pAnam (77-78) · Śloka 78

অথোপস্থিতগর্ভাং তাং কৃতকৌতুকমঙ্গলাম্| হস্তস্থপুন্নামফলাং স্বভ্যক্তোষ্ণাম্বুসেচিতাম্||৭৭|| পাযযেত্সঘৃতাং পেযাং| |৭৮|

Adhikarana BUSayane sthitAyA mardanAdi (78-79) · Śloka 79

তনৌ ভূশযনে স্থিতাম্| আভুগ্নসক্থিমুত্তানামভ্যক্তাঙ্গীং পুনঃ পুনঃ||৭৮|| অধো নাভের্বিমৃদ্নীযাত্কারযেজ্জৃম্ভচঙ্ক্রমম্| |৭৯|

Adhikarana evamanuShThite Palam (79-80) · Śloka 80

কিমেবমনুষ্ঠিতে সতি ভবতি ? ইত্যাহ | গর্ভঃ প্রযাত্যবাগেবং, তল্লিঙ্গং হৃদ্বিমোক্ষতঃ||৭৯|| আবিশ্য জঠরং গর্ভো বস্তেরুপরি তিষ্ঠতি| |৮০|

Adhikarana garBiNyAH KaTvAropAdi (80) · Śloka 80

আব্যোঽভিত্বরযন্ত্যেনাং খট্বামারোপযেত্ততঃ| ||৮০||

Adhikarana aBya~ggAdinA yonivikAsanam (81) · Śloka 81

অথ সম্পীডিতে গর্ভে যোনিমস্যাঃ প্রসারযেত্| মৃদু পূর্বং প্রবাহেত বাঢমাপ্রসবাচ্চ সা||৮১||

Adhikarana tasyA harShotpAdanam (82) · Śloka 82

হর্ষযেত্তাং মুহুঃ পুত্রজন্মশব্দজলানিলৈঃ| |৮২|

Adhikarana harShAdyutpAdane Palam (82) · Śloka 82

অথ কিং হর্ষাদ্যুত্পাদনেন স্যাত্ ? ইত্যাহ | প্রত্যাযান্তি তথা প্রাণাঃ সূতিক্লেশাবসাদিতাঃ||৮২||

Adhikarana garBasya sa~gge kRuShNasarpanirmokena dhUpanAdi (83-87) · Śloka 87

ধূপযেদ্গর্ভসঙ্গে তু যোনিং কৃষ্ণাহিকঞ্চুকৈঃ| হিরণ্যপুষ্পীমূলং চ পাণিপাদেন ধারযেত্||৮৩|| সুবর্চলাং বিশল্যাং বা জরায্বপতনেঽপি চ| কার্যমেতত্তথোত্ক্ষিপ্য বাহ্বোরেনাং বিকম্পযেত্||৮৪|| কটীমাকোটযেত্পার্ষ্ণ্যা স্ফিজৌ গাঢং নিপীডযেত্| তালুকণ্ঠং স্পৃশেদ্বেণ্যা মূর্ধ্নি দদ্যাত্স্নুহীপযঃ||৮৫|| ভূর্জলাঙ্গলিকীতুম্বীসর্পত্বক্কুষ্ঠসর্ষপৈঃ| পৃথগ্দ্বাভ্যাং সমস্তৈর্বা যোনিলেপনধূপনম্||৮৬|| কুষ্ঠতালীসকল্কং বা সুরামণ্ডেন পাযযেত্| যূষেণ বা কুলত্থানাং বাল্বজেনাসবেন বা||৮৭||

Adhikarana tato~anuvAsanam (88-90) · Śloka 90

শতাহ্বাসর্ষপাজাজীশিগ্রুতীক্ষ্ণকচিত্রকৈঃ| সহিঙ্গুকুষ্ঠমদনৈর্মূত্রে ক্ষীরে চ সার্ষপম্||৮৮|| তৈলং সিদ্ধং হিতং পাযৌ যোন্যাং বাঽপ্যনুবাসনম্| শতপুষ্পাবচাকুষ্ঠকণাসর্ষকল্কিতঃ||৮৯|| নিরূহঃ পাতযত্যাশু সস্নেহলবণোঽপরাম্| তত্সঙ্গে হ্যনিলো হেতুঃ সা নির্যাত্যাশু তজ্জযাত্||৯০||

Adhikarana kuSalayoShitA tasyAharaNam (91) · Śloka 91

কুশলা পাণিনাঽক্তেন হরেত্ক্লৃপ্তনখেন বা| |৯১|

Adhikarana tailena mardanAdi (91) · Śloka 91

| মুক্তগর্ভাপরাং যোনিং তৈলেনাঙ্গং চ মর্দযেত্||৯১||

Adhikarana makkalAKye roge yavakShArapAnAdi (92-93) · Śloka 93

মক্কল্লাখ্যে শিরোবস্তিকোষ্ঠশূলে তু পাযযেত্| সুচূর্ণিতং যবক্ষারং ঘৃতেনোষ্ণজলেন বা||৯২|| ধান্যাম্বু বা গুডব্যোষত্রিজাতকরজোন্বিতম্| |৯৩|

Adhikarana bAlasyopacAraH (93) · Śloka 93

| অথ বালোপচারেণ বালং যোষিদুপাচরেত্||৯৩||

Adhikarana buBukShitAyA tailamAtrAdi pAnam (94-95) · Śloka 95

সূতিকা ক্ষুদ্বতী তৈলাদ্ধৃতাদ্বা মহতীং পিবেত্| পঞ্চকোলকিনীং মাত্রামনু চোষ্ণং গুডোদকম্||৯৪|| বাতঘ্নৌষধতোযং বা, তথা বাযুর্ন কুপ্যতি| বিশুধ্যতি চ দুষ্টাস্রং দ্বিত্রিরাত্রমযং ক্রমঃ||৯৫||

Adhikarana snehAyogyAyAH snehaMvinA pUrvavidhiH (96) · Śloka 96

স্নেহাযোগ্যা তু নিঃস্নেহমমুমেব বিধিং ভজেত্| পীতবত্যাশ্চ জঠরং যমকাক্তং বিবেষ্টযেত্||৯৬||

Adhikarana snAtAyAH peyApAnam (97-99) · Śloka 99

জীর্ণে স্নাতা পিবেত্পেযাং পূর্বোক্তৌষধসাধিতাম্| ত্র্যহাদূর্ধ্বং বিদার্যাদিবর্গক্বাথেন সাধিতা||৯৭|| হিতা যবাগূঃ স্নেহাঢ্যা সাত্ম্যতঃ পযসাঽথবা| সপ্তরাত্রাত্পরং চাস্যৈ ক্রমশো বৃংহণং হিতম্||৯৮|| দ্বাদশাহেঽনতিক্রান্তে পিশিতং নোপযোজযেত্| |৯৯|

Adhikarana sUtAyAH yatnenopacAraH (99-100) · Śloka 100

| যত্নেনোপচরেত্সূতাং দুঃসাধ্যো হি তদামযঃ||৯৯|| গর্ভবৃদ্ধিপ্রসবরুক্ক্লেদাস্রস্রুতিপীডনৈঃ| |১০০|

Adhikarana evaM sArdhamAsavidhiH (1) · Śloka 1

| এবং চ মাসাদধ্যর্ধান্মুক্তাহারাদিযন্ত্রণা||১০০|| গতসূতাভিধানা স্যাত্পুনরার্তবদর্শনাত্| ১০০ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং দ্বিতীযে শারীরস্থানে গর্ভাবক্রান্তির্নাম প্রথমোঽধ্যাযঃ||১||