2. garbhavyāpadvidhiradhyāyaḥ

Adhikarana garBavyApadvidhiradhyAyaH (2) · Śloka 2

গর্ভাবক্রান্তিশারীরাদনন্তরং গর্ভব্যাপদং শারীরমারভ্যতে| গর্ভস্য ব্যাপত্প্রতীকারবিজ্ঞানার্থমাহ অথাতো গর্ভব্যাপদং শারীরং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে|২|

গর্ভস্য ব্যাপত্ গর্ভব্যাপত্, সা বিদ্যতে যস্মিন্নিতি ধঃ, তস্য "অধ্যাযানুবাকযোর্লুক্" ইতি লুক্| যদ্যপি চাত্র গর্ভব্যাপদশ্চিকিত্সাঽপ্যুক্তা ন কেবলং ব্যাপত্, তথাঽপি বাহুল্যাদিদমুক্তমিতি বেদ্যম্| অথাদীনাং পূর্ববদ্ব্যাখ্যা|

Adhikarana garBiNyAH puShpe dRuShTe kartavyam (1-2) · Śloka 2

গর্ভিণ্যাঃ পরিহার্যাণাং সেবযা রোগতোঽথ বা| পুষ্পেদৃষ্টেঽথবা শূলে বাহ্যান্তঃ স্নিগ্ধশীতলম্||১|| সেব্যাম্ভোজহিমক্ষীরিবল্ককল্কাজ্যলেপিতান্| ধারযেদ্যোনিবস্তিভ্যামার্দ্রার্দ্রান্ পিচুনক্তকান্||২||

গর্ভিণ্যাঃ পরিহার্যাণাং-আহারবিহারাণাং পূর্বোক্তানামতিব্যবাযাদীনাং, সেবনেন পুষ্পে দৃষ্টে, অথবা রোগতঃ পুষ্পে দৃষ্টে, রোগস্য চ স্বভাবাপথ্যসর্ষপশাকমন্দকদধ্যাদেরাহারান্মাত্রাদেশকালাদিবশাদ্বা সম্ভবঃ, গর্ভাখ্যফলহেতুত্বাদ্রক্তং পুষ্পমুচ্যতে, তস্মিন্ দৃষ্টে-চক্ষুর্গোচরং প্রাপ্তে, অথবা শূলে-দৃষ্টে-প্রশ্নাদিনোপলব্ধে সতি, দৃশিরত্রোপলাব্ধিবচনঃ, বাহ্যান্তঃ স্নিগ্ধশীতলং সাধনং-অন্নপানপ্রদেহপরিষেকাদি, কার্যম্| বহিঃ-স্নানাবগাহাদৌ, অন্তশ্চভোজনানুপানাদাবিত্যর্ত্থঃ| রোগত ইতি তৃতীযার্থে তসিঃ| তথা, স্ত্রী যোনিবস্তিভ্যাং পিচুনক্তকান্ ধারযেত্| কিম্ভূতান্ ? সেব্যাদিভির্লেপিতান্| সেব্যং-উশীরম্| অম্ভোজং-পদ্মম্| হিমং চন্দনম্| ক্ষীরং বিদ্যতে যেষাং তে ক্ষীরিণো বৃক্ষাঃ-পিপ্পলাদযঃ, যেষাং শস্ত্রাদিচ্ছিন্নানাং ক্ষীরং দৃশ্যতে| বল্কং-বল্কলম্| সেব্যং চাম্ভোজং চ হিমং চ ক্ষীরিবল্কং চ, তেষাং কল্কশ্চাজ্যং চ , তৈর্লেপিতান্| তথা চ কিম্ভূতান্ ? আর্দ্রার্দ্রান্-অতিশযেনার্দ্রীকৃতান্| পিচুশব্দেন বিকেশিকাসদৃশঃ কার্পাসমযঃ| নক্তকঃ-চৈলখণ্ডঃ|

Adhikarana shatadhautaghRutAktastriyAH snAnAdi (3-6) · Śloka 6

শতধৌতঘৃতাক্তাং স্ত্রীং তদম্ভস্যবগাহযেত্| সসিতাক্ষৌদ্রকুমুদকমলোত্পলকেসরম্||৩|| লিহ্যাত্ ক্ষীরঘৃতং খাদেচ্ছৃঙ্গাটককসেরুকম্| পিবেত্কান্তাব্জশালূকবালোদুম্বরবত্পযঃ||৪|| শৃতেন শালিকাকোলীদ্বিবলামধুকেক্ষুভিঃ| পযসা রক্তশাল্যন্নমদ্যাত্সমধুশর্করম্||৫|| রসৈর্বা জাঙ্গলৈঃ| |৬|

শতশব্দো বহুবারপর্যাযঃ, ন সঙ্খ্যাবাচীত্যর্থঃ| তথা চ সঙ্গ্রহেঽধীতম্ (শা. অ. ৪)- সহস্রধৌতসর্পিষাঽধোনাভেঃ সর্বতঃ প্রদিহ্যাত্|" ইতি| শতাধৌতেন-বহুধা প্রক্ষালিতেন ঘৃতেন, অক্তাং-অভ্যক্তাং, স্ত্রীং তদম্ভস্যবগাহযেত্-তত্র তাং নিমজ্জনং কারযেত্| তদিত্যনেন হি সেব্যাদিদ্রব্যপরামর্শঃ| স্ত্রীমিতি বাম্শসোরিতীযঙ্বিকল্পাত্পূর্বরূপম্| তথা ক্ষীরং ঘৃতং চ লিহ্যাত্| কিম্ভূতম্ ? সসিতেত্যাদি| সহ সিতযা তথা ক্ষৌদ্রেণ তথা কুমুদকমলোত্পলানাং কেসরেণ-কিঞ্জল্কেন সহিতম্| অন্যে তু ক্ষীরাহৃতং ক্ষীরোদ্ভবং ঘৃতং ক্ষীরঘৃতমিতি ব্যাচক্ষতে| তথা, খাদেচ্ছৃঙ্গাটকং কসেরুকং চ| তথা, পযঃ-ক্ষীরং, পিবেত্| কিম্ভূতম্ ? কান্তেত্যাদি| কান্তা-গন্ধপ্রিযঙ্গুঃ| অপ্সু জাতং-অব্জম্, কমলাদি| শালূকং-উত্পলমূলম্| বালমুদুম্বরং-অপক্বমুদুম্বরফলম্| কান্তা চাব্জং চ শালূকং চ বলোদুম্বরং চ তানি বিদ্যন্তে যস্য পযসস্তদেবম্, তৈঃ শৃতং ক্ষীরং পিবেদিত্যর্থঃ| যৈর্হি তত্পযঃ শৃতং তানি তত্রাবশ্যং বিদ্যন্তে| ক্ষীরশ্রপণবিধিশ্চাতীসারচিকিত্সোক্তঃ (হৃ. চি. অ. ৯/৩৯)- "পযস্যুত্ক্বাথ্য মুস্তানাং বিংশতিং" ইত্যাদ্যনুসারেণাত্র কল্প্যঃ| তন্ত্রান্তরে ত্বেবমুক্তম্-"দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষঃ কর্তব্যঃ ক্ষীরপাকে ত্বযং বিধিঃ||" ইতি| অন্যে তু কান্তাদিদ্রব্যাণাং চূর্ণেন যুক্তং কল্কেন বা যুক্তং পযঃ পিবেদিত্যাহুঃ| পযসা রক্তশাল্যন্নং সমধুশর্করং সুশীতং ভুঞ্জীত| কিম্ভূতেন ক্ষীরেণ ? শাল্যাদিভিঃ শৃতেন-সিদ্ধেন| দেশসাত্ম্যাদ্যনুরোধাজ্জাঙ্গলৈর্বা রসৈঃ শাল্যন্নমদ্যাত্|

Adhikarana SuddhivarjamasroktAcaraNam (6) · Śloka 6

শুদ্ধিবর্জং চাস্রোক্তমাচরেত্| |৬|

শুদ্ধিং বর্জযিত্বা, অস্রোক্তং-রক্তপিত্তাভিহিতং, যত্সাধনং তদ্বাহ্যান্তরাচরেত্-সেবেত| অস্রশব্দস্যোপলক্ষণার্থত্বাদ্রক্তপিত্তং গম্যতে|

Adhikarana asaMpUrNatrimAsAyAH puShpadarSane kartavyam (6-7) · Śloka 7

| অসম্পূর্ণত্রিমাসাযাঃ প্রত্যাখ্যায প্রসাধযেত্||৬|| আমান্বযে চ| |৭|

অসম্পূর্ণাস্ত্রযো মাসা যস্যাঃ গর্ভিণ্যাঃ সৈবম্| তস্যাঃ পুষ্পদর্শনে সতি গর্ভঃ প্রাযো ন তিষ্ঠতি, অসঞ্জাতসারত্বাত্| তস্মাত্ প্রত্যাখ্যায-প্রত্যাখ্যানং কৃত্বা, প্রসাধযেত্-প্রকর্ষেণ যত্নেন সাধযেত্| আমান্বযে চ| অত্রাপি প্রত্যাখ্যায প্রসাধযেদিত্যনুবর্ততে| আমানুগতে রক্তদর্শনে সম্পূর্ণত্রিচতুরাদিমাসাযা অপি সঞ্জাতসারেঽপি গর্ভে সতি বিরুদ্ধোপক্রমত্বাত্ প্রত্যাখ্যায সাধনং কারযেত্| তথা হি,-রূক্ষতীক্ষ্ণোষ্ণকটুপ্রাযমামঘ্নং গর্ভিণ্যা বিরুদ্ধম্, শীতস্নিগ্ধপ্রাযং চামস্য|

Adhikarana AmaraktayoraviruddhasyopadeSaH (7-9) · Śloka 9

এবমপ্যামরক্তযোর্দ্বযোর্যদবিরুদ্ধং তদুপদেষ্টুমাহ তত্রেষ্টং শীতং রূক্ষোপসংহিতম্| উপবাসো ঘনোশীরগুডূচ্যরলুধান্যকাঃ||৭|| দুরালভাপর্পটকচন্দনাতিবিষাবলাঃ| ক্বথিতাঃ সলিলে পানং তৃণধান্যানি ভোজনম্||৮|| মুদ্গাদিযূষৈরামে তু জিতে স্নিগ্ধাদি পূর্ববত্| |৯|

তত্র-আমান্বযে সামতাযাং সত্যাং, শীতং যদন্নপানাদি, তত্সর্বং বাহ্যতোঽন্তশ্চ হিতম্| শীতং রক্তস্য পথ্যং, আমস্য বিরুদ্ধত্বাদপথ্যং, ইত্যাশঙ্ক্যাহ-রূক্ষোপসংহিতম্,-রূক্ষেণ-তিক্তকষাযাদিনা, যুক্তম্| তথা, দেশসত্বাদ্যনুরোধাদুপবাসো হিতঃ, ন কেবলং শীতং রূক্ষোপসংহিতম্| তথা ঘনাদযো দ্রব্যবিশেষাঃ সলিলে ক্বথিতাঃ পানং হিতম্| ঘনো-মুস্তঃ| অরলুঃ-স্যোনাকঃ| তথা, তৃণধান্যানি-নীবারকোদ্রবশ্যামাকাদীনি, ভোজনং-আহারঃ, তত্র-আমান্বযে, হিতম্| কৈঃ সহ ? মুদ্গাদিযূষৈঃ| আদিগ্রহণেন মকুষ্টমসূরাদযঃ শিম্বীধান্যবিশেষাঃ পিত্তশ্লেষ্মহরা গৃহ্যন্তে| সামতাযামেবোত্পন্নাযামযমুপক্রমঃ| আমে তু জিতে স্নিগ্ধাদি পূর্ববত্| পূর্বস্মিন্নিব পূর্ববত্| সপ্তম্যন্তাদ্বতিঃ| যথা প্রথমং রক্তদর্শনে স্নিধশীতলাদি হিতং, তথাঽত্রাপি পূর্বনির্দিষ্টং স্নিগ্ধাদি হিতমিত্যর্থঃ| স্নিগ্ধশীতানি বাহ্যান্তরুপযোজ্যানি|

Adhikarana garBenipatite tIkShNamadyapAnAdi (9-12) · Śloka 12

| গর্ভে নিপতিতে তীক্ষ্ণং মদ্যং সামর্থ্যতঃ পিবেত্||৯|| গর্ভকোষ্ঠবিশুদ্দ্যর্থমর্তিবিস্মরণায চ| লঘুনা পঞ্চমূলেন রূক্ষাং পেযাং ততঃ পিবেত্||১০|| পেযামমদ্যপা কল্কে সাধিতাং পাঞ্চকৌলিকে| বিল্বাদিপঞ্চকক্বাথে তিলোদ্দালকতণ্ডুলৈঃ||১১|| মাসতুল্যদিনান্যেবং পেযাদিঃ পতিতে ক্রমঃ| লঘুরস্নেহলবণো দীপনীযযুতো হিতঃ||১২||

গর্ভিণ্যা এবমাসেবমানাযা অপ্যদৃষ্টবশাদ্গর্ভে নিপতিতে-নিঃশেষেণ পতিতে সতি, তিক্ষ্ণং-কর্কশং, মদ্যং সামর্থ্যেন পিবেত্,-বহু পিবেদিত্যর্থঃ| কিমর্থম্ ? ইত্যাহ-গর্ভকোষ্ঠেত্যাদি| গর্ভকোষ্ঠবিশুদ্ধ্যর্থমর্তেঃ-পীডাযাঃ, বিস্মৃত্যর্থং চ| ততো-মদ্যপরিণামাদনন্তরং, রূক্ষাং পেযাং পিবেত্| কিম্ভূতাম্ ? লঘুনা পঞ্চমূলেন-বৃহত্যাদিনা (হৃ.সূ.অ.৬/১৬৮), কৃতাম্| অমদ্যপা তু যা স্ত্রী সা গর্ভে নিপতিতে পেযাং পিবেত্, ন তু মদ্যম্| ক্ব সাধিতাং ? কল্কে| কিং সম্বন্ধিনি ? পাঞ্চকৌলিকে,-পঞ্চকোলস্যাযং পাঞ্চকৌলিকঃ, তস্মিন্| পঞ্চকোলকং কল্কীকৃত্য তত্র পেযাং সাধিতামিত্যর্থঃ| তথা, বিল্বাদিপঞ্চকক্বাথে-মহত্পঞ্চমূলকষাযে (হৃ. সূ. অ. ৬/১৬৭) , সাধিতাং পেযাং পিবেদিতি যোজ্যম্| কৈঃ সাধিতাম্ ? তিলোদ্দালকতণ্ডুলৈঃ| উদ্দালকোব্রীহিবিশেষঃ| মাসৈস্তুল্যনি দিনানি-মাসসঙ্খ্যা বাসরাঃ| যাবন্তো মাসা গর্ভস্য তাবন্ত্যহানি গর্ভে নিপতিতে সতি, এবং-পূর্বোক্তেন প্রকারেণ, পেযাদিঃ ক্রমঃ কার্যঃ| কিম্ভূতঃ ? লঘুরস্নেহলবণঃ| ন বিদ্যেতে স্নেহলবণে যস্য| তথ, দীপনীযৈঃ-অগ্নিকৃদ্ভির্মরিচচিত্রকাদিভির্দ্রব্যৈর্যুতঃ| সঃ-তথাবিধঃ, তত্র ক্রমো হিতঃ|

Adhikarana doShAdInAM kledaSoShArtho~ayaM vidhiH (13) · Śloka 13

কিমর্থম্ ? দোষধাতুপরিক্লেদশোষার্থং বিধিরিত্যযম্| |১৩|

দোষৌ-পিত্তকফাবত্র গৃহ্যেতে| বাতস্য ক্লেদাসম্ভবাত্| দোষৌ চ ধাতবশ্চ, তেষাং পরিক্লেদঃ, তস্য শোষার্থং-শোষাণায, অযং বিধিরিতি|

Adhikarana anantaraM snehAdayo hitAH (13) · Śloka 13

| স্নেহান্নবস্তযশ্চোর্ধ্বং বল্যদীপনজীবনাঃ||১৩||

ঊর্ধ্বং-অতো দোষধাদুপরিক্লেদশোষাদনন্তরং, স্নেহান্নবস্তযোহিতাঃ| স্নেহশ্চতুর্বিধঃ পানাদৌ হিতঃ| তথা, অন্নং স্নিগ্ধং ন রূক্ষং, হিতম্| বস্তযোঽপি স্নিগ্ধা এব-ন রূক্ষা হিতাঃ, বাতকোপভযাত্| কিম্ভূতাঃ স্নেহান্নবস্তযঃ ? বল্যদীপনজীবনাঃ| বল্যাঃ-বলায হিতাঃ| দীপনাঃ-বহ্নেঃ সন্ধুক্ষণকৃতঃ| তথা, জীবনাঃ-ওজোবৃদ্ধিকরাঃ|

Adhikarana upaviShTakagarBasya lakShaNAdi (14-15) · Śloka 15

ইদানীমুপবিষ্টকনাগোদরযোর্গর্ভযোর্হেতুলিঙ্গৌষধানি বিতানযিতুমাহ সঞ্জাতসারে মহতি গর্ভে যোনিপরিস্রবাত্| বৃদ্ধিমপ্রাপ্রাপ্নুবন্ গর্ভঃ কোষ্ঠে তিষ্ঠতি সস্ফুরঃ||১৪|| উপবিষ্টকমাহুস্তং, বর্দ্ধতে তেন নোদরম্| |১৫|

সঞ্জাতঃ সারো-বলং, যস্যাসৌ সঞ্জাতসারো-বলবান্ গর্ভঃ, তস্মিন্| তথা, মহতি-প্রবৃদ্ধে সতি| গর্ভিণ্যাঃ পরিহার্যাপরিহারদ্যোঽসৌ যোনেঃ পরিস্রবঃ-পরিস্রবণং, তস্মাত্| পরিস্রব ইতি চ সামান্যেন নির্দেশাত্ কদাচিদ্রক্তরূপঃ কদাচিদন্যাদৃশোঽপি গর্ভাত্স্রবতি| পরিস্রবাচ্চ কারণাত্ বৃদ্ধিমপ্রাপ্নুবন্-অগচ্ছন্, কোষ্ঠ এব-গর্ভাধার এব, তিষ্ঠতি গর্ভঃ| যতো যোনিপরিস্রবাত্কারণাত্ বাযুঃ কুপিতঃ পিত্তশ্লেষ্মাণৌ পরিগৃহ্য গর্ভস্য রসবহাং নাডীম্ প্রতিপীড্যাবতিষ্ঠতে| ততো নাড্যাং দোষৈঃ কুল্যাযামিব তৃণপত্রাদিভিঃ প্রতিচ্ছন্নাযাং রসস্যাসম্যগ্বহনান্নাডীরোধাদ্দৃদ্ধ্যাভাবো গর্ভস্য| কিম্ভূতঃ কোষ্ঠে তিষ্ঠতি ? সস্ফুরঃ| স্ফুরণংস্ফুরঃ| অজ্বিধৌ ভযাদীনামুপসঙ্খ্যানমিত্যচ্| গাঙ্কুটাদিভ্যো ঞ্ণিঙিদিতি ঙিত্ত্বাদ্গুণাভাবঃ| সহ স্ফুরেণ-চলনেন, বর্তত ইতি সস্ফুরঃ| এতাবন্মাত্রবিশেষাবস্থঃ কোষ্ঠে তিষ্ঠতি| তং-তথাবিধং গর্ভং, উপবিষ্টকসংজ্ঞমাহুঃ| 'মুনযঃ' ইতি শেষঃ| তেন-তথাভূতেন গর্ভেণ কোষ্ঠস্থিতেন, তস্যা উদরং ন বর্দ্ধতে-ন বৃদ্ধিং যাতি, গর্ভস্যৈবাবৃদ্ধেঃ| ন হি যদ্যস্য বৃদ্ধৌ বর্দ্ধতে তদবৃদ্ধৌ তস্য বৃদ্ধিঃ স্যাত্| তথা হি,-চন্দ্রবৃদ্ধাবেব সমুদ্রবেলাযা বৃদ্ধিঃ| উপবিষ্টকাবস্থশ্চ গর্ভো ন বর্দ্ধতে| অতস্তত্কারণাভবাদুদরস্যাপ্যবৃদ্ধিঃ|

Adhikarana nAgodarAKyasya lakShaNAdi (15-16) · Śloka 16

এবমুপবিষ্টকমুক্ত্বা নাগোদরাখ্যং বক্তুমাহ শোকোপবাসরূক্ষাদ্যৈরথবা যোন্যতিস্রবাত্||১৫|| বাতে ক্রুদ্ধে কৃশঃ শুষ্যেদ্গর্ভো নাগোদরং তু তম্| উদরং বৃদ্ধমপ্যত্র হীযতে স্ফুরণং চিরাত্||১৬||

শোকোপবাসরূক্ষাদ্যৈঃ-গর্ভগর্ভিণ্যপচযকারিভিঃ পবনপ্রকোপকারিভির্হেতুভিঃ, বাতে ক্রুদ্ধে-কুপিতে, অথবা গর্ভগর্ভিণ্যোরুপচযপ্রদৈরাহারবিহারৈরুপচিতযোর্গর্ভগর্ভিণ্যোরপি কদাচিদত্যর্থং রক্তস্রুতিকারণান্যাসেবেত স্ত্রী, তদানীং তস্যা যোন্যতিস্রবো জাযতে| তস্মাদ্যোন্যতিস্রবাত্কারণাদপি পবনে কুপিতে, কৃশো গর্ভঃ সম্পদ্যতে| শুষ্যেদিত্যত্র চশব্দো লুপ্তনির্দিষ্টো দ্রষ্টব্যঃ| ন কেবলং কৃশো ভবতি শুষ্যেচ্চেত্যর্থঃ| তং-তথাভূতং গর্ভং, নাগোদরসংজ্ঞকং কেষাংচিন্মতে চোপশুষ্ককসংজ্ঞকং বিদ্যাত্| অত্র-নাগোদরসংজ্ঞকে গর্ভেঽন্তঃস্থিতে, উদরং বৃদ্ধমপি-মহদপি সত্, হীযতে-হানিং যাতি| স্ফুরণং চ চিরাত্-চিরেণ ভবতি| উপবিষ্টকে তু কেবলমবৃদ্ধির্ন তু হানিঃ|

Adhikarana tayoScikitsA (17-18) · Śloka 18

তযোর্বৃংহণবাতঘ্নমধুরদ্রব্যসংস্কৃতৈঃ| ঘৃতক্ষীররসৈস্তৃপ্তিরামগর্ভাংশ্চ খাদযেত্||১৭|| তৈরেব চ সুভিক্ষাযাঃ ক্ষোভণং যানবাহনৈঃ| |১৮|

তযোঃ-উপবিষ্টকনাগোদরাখ্যযোর্গর্ভযোঃ, ঘৃতক্ষীররসৈস্তৃপ্তির্গভিণ্যাঃ কার্যেতি শেষঃ| কিম্ভূতৈস্তৈঃ ? বৃংহণবাতঘ্নমধুরদ্রব্য সংস্কৃতৈঃ-সিদ্ধৈঃ| বৃংহণানি চ তানি বাতঘ্নানি চ মধুরাণি চ, এবংভূতানি যানি দ্রব্যাণি দ্রাক্ষাশর্করাদীনি, ন তু ব্যস্তানি বৃংহণানি বাতঘ্নানি মধুরাণি চ| তত্র কেবলং বৃংহণানি-প্রিযঙ্গুপ্রভৃতীনি, ন তু বাতঘ্নানি| বাতঘ্নানি চ বৃংহণানি, ন তু মধুররসানি, যথা-নাগরাদীনি| মধুরাণি ন বাতঘ্নানি নাপি বৃংহণানি, যথা-তণ্ডুলীযমসূরাদীনি| তদেতৈর্ব্যস্তগুণৈর্দ্রব্যৈঃ সংস্কৃতেন ঘৃতাদিনা তৃপ্তির্ন কার্যা, কিং তর্হি ? সমস্তবৃংহণাদিগুণযুক্তৈর্দ্রব্যৈঃ সংস্কৃতৈরিতি বোধ্যম্| তথা চ সঙ্গ্রহেঽধিজগে (শা.অ.৪)-'তযোর্জীবনীযবৃংহণীযমধুরৌষধসিদ্ধানাং সর্পিষামুপযোগঃ|" ইত্যাদি| তথা, তদ্গর্ভপুষ্টযে তাং গর্ভিণীমামগর্ভাংশ্চ খাদযেত্, বৈদ্য ইতি শেষঃ| আঅমগর্ভান্ স্বাদন্ত্যাঃ কদাচিদ্গর্ভিণ্যা জুগুপ্সা স্যাত্, অতো গর্ভগর্ভিণ্যোর্দ্বযোরপি ব্যাপদো ভবেযুরিতি ণ্যন্তোঽত্র খাদির্নির্দিষ্টঃ| বৈদ্যো হি তাং তথা যুক্ত্যা খাদযেত্, যথাঽসৌ ন জুগুপ্সেত| আমগর্ভা অপরিপূর্ণগর্ভা উচ্যন্তে| তথা, তৈরেববৃংহণাদিদ্রব্যসংস্কৃতৈর্ঘৃতক্ষীররসৈরামগর্ভৈশ্চ, সুভিক্ষাযাঃ-তৃপ্তিং প্রাপ্তাযাঃ, ক্ষোভণং কার্যম্| কৈঃ ? যানৈঃ-রথাদিভিঃ, বাহনৈঃ গজতুরগাদিভিঃ| তত্রারোপ্য তাং গর্ভিণীং বেগেন নযেদিত্যর্থঃ|

Adhikarana lInAKyagarBasya cikitsA (18-20) · Śloka 20

অথ লীনাখ্যস্য গর্ভস্য চিকিত্সামাহ | লীনাখ্যে নিস্ফুরে শ্যেনগোমত্স্যোত্ক্রোশবর্হিজাঃ||১৮|| রসা বহুঘৃতা দেযা মাষমূলকজা অপি| বালবিল্বংতিলান্মাষান্সক্তূংশ্চ পযসা পিবেত্||১৯|| সমেদ্যমাংসং মধু বা কট্যভ্যঙ্গং চ শীলযেত্| |২০|

অস্যোপিবিষ্টকনাগোদরাভ্যামেব হেতুলক্ষণযোরুক্তত্বাত্ যদেব নিস্ফুরণত্বাদি বিশেষান্তরং তদেবেহ তন্ত্রকৃতোক্তম্| সঙ্গ্রহে তু পপাঠ (শা. অ. ৪)- "যস্যাঃ পুনর্বাতোপসৃষ্ঠস্রোতসো লীনো গর্ভঃ প্রসুপ্তো ন স্পন্দতে তং লীনমিত্যাহুঃ|" ইতি| তত্র লীনাখ্যে গর্ভে সতি গর্ভিণ্যাঃ শ্যেনাদিজা রসা বহুঘৃতা দেযাঃ| আদিশব্দেন (উপলক্ষণত্বেন) [ সঙ্গ্রহোক্তানাং ] তিত্তিরিকুক্কুটাদীনাং গ্রহণম্| তথা, মাষমূলকজা রসা বহুঘৃতা দেযাঃ| তথা, সাত্ম্যাদিবশাত্ বালবিল্বাদীন্ সমস্তানৈকধ্যং কৃত্বা ক্ষীরেণ পিবেত্| তথা সহ মেদুরমাসেন মার্দ্বীকং বা পিবেত্| কট্যাং চাভ্যঙ্গং শীলযেত্-অভ্যসেত্|

Adhikarana tasyA AnandakaraNAdi (20) · Śloka 20

| হর্ষযেত্সততং চৈনামেবং গর্ভঃ প্রবর্দ্ধতে||২০||

সততং-মুহুর্মুহুশ্চ, এনাং-গর্ভিণীমুপবিষ্টকনাগোদরলীনাখ্যগর্ভোদরস্থাং, হর্ষযেত্-মুদিতাং কুর্যাত্| এবং-অনযেতিকর্তব্যতযা কৃতযা, গর্ভঃ প্রবর্দ্ধতে-বৃদ্ধিং যাতি|

Adhikarana anyathA vaiparItyam (21) · Śloka 21

পুষ্টোঽন্যথা বর্ষগণৈঃ কৃচ্ছ্রাজ্জাযেত, নৈব বা| |২১|

অন্যথা-অন্যেন প্রকারেণ পূর্বোক্তবিপর্যযেণ রূক্ষাত্মনা সেবিতেন মাতুরাহাররসেনাল্পেন, পুষ্টঃ-চেতনামাত্রাবশেষ এব, বত্সরসন্দোহৈঃ কৃচ্ছ্রাজ্জাযেত-কষ্টেন যোনিতো নিষ্ক্রামেত্| নৈব বেতি| অথবা যাবজ্জীবং গর্ভীণ্যাঃ কুক্ষাবেবাবসীদেত্ ন ততো নিষ্ক্রামেত্ কুক্ষাবেবাবতিষ্ঠেত|

Adhikarana garBiNyA udAvartAKye vyAdhAvupAyAdi (21-22) · Śloka 22

| উদাবর্তং তু গর্ভীণ্যাঃ স্নেহৈরাশুতরাং জযেত্||২১|| যোগ্যৈশ্চ বস্তিভির্হন্যাত্সগর্ভাং স হি গর্ভীণীম্| |২২|

গর্ভিণ্যা যদ্যুদাবর্তাখ্যো ব্যাধিঃ স্যাত্, তং স্নেহৈঃ-চতুর্ভির্যথাযোগ্যৌষধসাধিতৈঃ পানাদিনা সেবিতৈঃ, আশুতরাং-অতিত্বরিতং, জযেত্| তথা, যোগ্যৈঃ-তত্কালোচিতৈঃ, বস্তিভিঃ-অনুবাসনৈঃ, জযেত্| ননু, গর্ভিণ্যা বর্জ্যেষু "বস্তিমামাসতোঽষ্টমাত্" ইতি প্রাগুক্তম্ (হৃ. শা. অ. ১/৪৭)| তত্কথমিহ সামান্যেনানুবাসনং তন্ত্রকৃদুপাদিক্ষত্ ? ইত্যাহ-হন্যাদিত্যাদি| স যস্মাদুদাবর্তো গর্ভেণ সহ গর্ভিণীং হন্যাত্, অতস্তমাশুতরাং জযেত্|

Adhikarana udara eva garBe mRute lakShNAni (22-24) · Śloka 24

| গর্ভেঽতিদোষোপচযাদপথ্যৈর্দৈবতোঽপি বা||২২|| মৃতেঽন্তরুদরং শীতং স্তব্ধং ধ্মাতং ভৃশব্যথম্| গর্ভাস্পন্দো ভ্রমতৃষ্ণা কৃচ্ছ্রাদুচ্ছ্বসনং ক্লমঃ||২৩|| অরতিঃ স্রস্তনেত্রত্বমাবীনামসমুদ্ভবঃ| ||২৪||

দোষাণাং-বাতাদীনাং, উপচযঃ-প্রবৃদ্ধত্বম্, অতিশযেন দোষোপচযোঽতিদোষোপচযঃ, তস্মাদ্ধেতোঃ, অন্তঃ-উদরমধ্যে, গর্ভে মৃতে সতি, অপথ্যৈঃ-স্বভাবমাত্রাকালাদিবিরুদ্ধস্বভাবৈর্বা, অন্তর্মৃতে, অথবা দৈবাত্ (দৈবতঃ)-অন্যজন্মার্জিতশুভাশুভর্মবশাত্, অন্তর্মৃতে গর্ভে সতি, গর্ভীণ্যা উদরং শীতং-ঊষ্মরহিতং, ভবতি| তথা, স্তব্ধং-নিশ্চলং, ভবতি| তথা, ধ্মাতংদৃতিবদ্বাতপূরিতম্| তথা, ভৃশব্যথং-অতিবেদনং, ভবতি| তথা, গর্ভাস্পন্দো-গর্ভস্যাস্ফুরণং, ভ্রমস্তৃষ্ণা চ ভবতি| তথা, কৃচ্ছ্রাত্-কৃচ্ছ্রেণ, গর্ভীণ্যা উচ্ছ্বসনং-ঊর্ধ্বশ্বসনম্| তথা ক্লমো-গ্লানিঃ| তথা, অরতিঃ-স্থানাসনশযনাদিষ্বনবস্থিতত্বং চেতসঃ| তথা, স্রস্তে চ তে নেত্রে চ, তযোর্ভাবঃ স্রস্তনেত্রত্বম্, স্রস্তে-স্থানাচ্চ্যুতে ইব| তথা, আবীনাং-আসন্নপ্রসবকালজশূলবিশেষাণাং, অসমুদ্ভবঃ-অনুত্পাদঃ|

Adhikarana antarmRutagarBAyAupacArAH (25-27) · Śloka 27

তস্যাঃ কোষ্ণাম্বুসিক্তাযাঃ পিষ্ট্বা যোনিং প্রলেপযেত্| গুডং কিণ্বং সলবণং তথান্তঃ পূরযেন্মুহুঃ| ঘৃতেন কল্কীকৃতযা শাল্মল্যতসিপিচ্ছযা||২৫|| মন্ত্রৈর্যোগৈর্জরাযূক্তৈর্মূঢগর্ভো ন চেত্পতেত্| অথাপৃচ্ছযেশ্বরং বৈদ্যো যত্নেনাশু তমাহরেত্||২৬|| হস্তমভ্যজ্য যোনিং চ সাজ্যশাল্মলিপিচ্ছযা| হস্তেন শক্যং তেনৈব|২৭|

তস্যাঃ-অন্তর্মৃতগর্ভাযাঃ ঈষদুষ্ণজলসিক্তাযা যোনিং প্রলেপযেত্-প্রদেহযেত্| গুডাদিকং পিষ্ট্বা সামর্থ্যাদ্গুডাদিকেনৈব লেপযেদিতি যোজ্যম্| তথাঽন্তঃ পূরযেত্, শাল্মল্যতসিপিচ্ছযেতি সম্বন্ধনীযম্| যোনেঃ প্রকৃতত্বাত্তস্যা অন্তঃ-অভ্যন্তরং, অন্তর্বহিশ্চ| কীদৃশ্যা পিচ্ছযা ? ঘৃতেন কল্কীকৃতযা,-পিষ্টযা| এবং যোনের্মুহুর্মুহুরভ্যন্তরং পূরযিত্বাঽনন্তরং মূঢগর্ভপাতনার্থং মন্ত্রান্ সিদ্ধান্ প্রযোজযেত্| তথা, জরাযূক্তাঃ-জরায্বপতনে কথিতাঃ তাংশ্চ যোগান্ প্রযোজযেত্| মন্ত্রৈঃ-সঙ্গ্রহোক্তৈঃ (শা. অ.৩)-"ক্ষিতির্জলং" ইত্যাদিভিঃ, অথর্ববোদোক্তৈশ্চ মন্ত্রৈর্জরাযোঃ পাতনার্থমুক্তৈঃ| এবমনুষ্ঠীযমানেঽপি মূঢগর্ভো যদি ন পততি, অথ-অনন্তরং, ঈশ্বরং-নৃপং, আপৃচ্ছয-তদাজ্ঞাং গৃহীত্বা, তং-মূঢগর্ভং, আশু গর্ভিণ্যা আহরেত্-আকর্ষেত্| কথম্ ? হস্তমভ্যজ্য-লেপযিত্বা, তথা যোনিমভ্যজ্য| কেন ? সাজ্যেত্যাদি| শাল্মত্যাঃ পিচ্ছা শাল্মলিপিচ্ছা-নির্যাসঃ, সহাজ্যেন বর্তত ইতি সাজ্যা, সাজ্যা শাসৌ শাল্মলিপিচ্ছা চ তযা, হস্তংযোনিং চাভ্যজ্য যত্নেন গর্ভমাহরেত্| হস্তেন শক্যমাক্রষ্টুং তেনৈব-হস্তেন সাজ্যশাল্মলিপিচ্ছাক্তেন, তং-গর্ভং, সমাকর্ষেত্|

Adhikarana antarmRutagarBasyAkarShaNAdi (27-28) · Śloka 28

| গাত্রং চ বিষমং স্থিতম্||২৭|| আঞ্ছনোত্পীডসম্পীডবিক্ষেপোত্ক্ষেপণাদিভিঃ| আনুলোম্য সমাকর্ষেদ্যোনিং প্রত্যার্জবাগতম্||২৮||

গাত্রং চ গর্ভস্য বিষমং কৃত্বা স্থিতং-অযথামার্গেণ স্থিতং, আঞ্ছনাদিভিরানুলোম্য-স্পষ্টত্বং প্রাপ্তে গাত্রে সতি, যোন্যভিমুখমার্জবেন-ঋজুমার্গেণাগতং সন্তং, আহরেত্| আঞ্ছনেন-আযামেন দীর্ঘতযা স্থাপনেন, তথোত্পীডনেন-ঊর্ধ্বং পীডনেন, তথাসমন্তাত্পীডনেন, তথা বিক্ষেপেণ-বিশেষপ্রেরণেন, তথা উত্কর্ষেণ ক্ষেপণং-উত্ক্ষেপণং তেন, আদিগ্রহণাদেবংপ্রাযৈরন্যৈরপি স্ববুদ্ধিপরিকল্পিতৈঃ, স্পষ্টত্বং প্রাপ্তে সতি|

Adhikarana SastropAyasAdhyA mUDhagarBacikitsA (29-30) · Śloka 30

ইদানীম্ শস্ত্রোপাযসাধ্যাং মূঢগর্ভচিকিত্সামাহ হস্তপাদশিরোভির্যো যোনিং ভুগ্নঃ প্রপদ্যতে| পাদেন যোনিমেকেন ভুগ্নোঽন্যেন গুদং চ যঃ||২৯|| বিষ্কম্ভৌ নাম তৌ মূঢৌ শস্ত্রদারণমর্হতঃ| |৩০|

হস্তেন পাদেন শিরসা, অতুল্যকালং-কদাচিদ্ধস্তেন কদাচিত্পাদেন কদাচিচ্ছিরসা, যোনিং প্রতি ভুগ্নঃ-কুটিলঃ, প্রপদ্যতেআযাতি, যঃ স একো বিষ্কম্ভো নাম মূঢগর্ভঃ| তথা, পাদেনৈকেন যোনিং তথা দ্বিতীযপাদেন গুদং-পাযুং, ভুগ্নঃ সন্ যো মূঢগর্ভঃ প্রপদ্যতে, সোঽপরো বিষ্কম্ভঃ| তৌ-এতৌ দ্বৌ, বিষ্কম্ভৌ নাম মূঢৌ-মূঢগর্ভৌ, শস্ত্রদারণমর্হতঃ| হস্তেনাক্রষ্টুমশক্যত্বাত্তযোঃ শস্ত্রদারণং কার্যমিত্যর্থঃ|

Adhikarana maNDalA~gguliSastrAByAM dAraNam (30) · Śloka 30

অত এবাহ | মণ্ডলাঙ্গুলিশস্ত্রাভ্যাং তত্র কর্ম প্রশস্যতে||৩০||

মণ্ডলং চাঙ্গুলিশ্চ মণ্ডলাঙ্গুলী| মণ্ডলশব্দেন মণ্ডলাগ্রং শস্ত্রমুপলক্ষ্যতে, অঙ্গুলিশব্দেন চাঙ্গুলিশস্ত্রম্| তে নামনী যযোঃ শস্ত্রযোস্তে মণ্ডলাঙ্গুলিশস্ত্রে শস্ত্রবিধ্যধ্যাযোক্তে (হৃ. সূ. অ. ২৬/৫-১৩) , তাভ্যাং মণ্ডলাঙ্গুলিশস্ত্রাভ্যাং [ তত্র- ] তযোর্বিষ্কম্ভাখ্যযোর্মূঢগর্ভযোঃ, কর্ম প্রশস্যতে| তাভ্যাং শস্ত্রাভ্যাং দারণমেতযোঃ কার্যমিত্যর্থঃ|

Adhikarana vRuddhipatraSastrasya niShedhaH (31) · Śloka 31

বৃদ্ধিপত্রং হি তীক্ষ্ণাগ্রং ন যোনাববচারযেত্| |৩১|

বৃদ্ধিপত্রসংজ্ঞং শস্ত্রং যস্মাত্তীক্ষ্ণাগ্রমতস্তদ্যোনৌ নাবচারযেত্-তেন তত্র বিদারণং ন বিধেযম্, প্রত্যবাযভযাত্|

Adhikarana pUrvaM kapAladAraNAdi (31-33) · Śloka 33

দারণং চ যথা বিধেযং তথা ঽঽহ | পূর্বং শিরঃকপালানি দারযিত্বা বিশোধযেত্||৩১|| কক্ষোরস্তালুচিবুকপ্রদেশেঽন্যতমে ততঃ| সমালম্ব্য দৃঢং কর্ষেত্কুশলো গর্ভশঙ্কুনা||৩২|| অভিন্নশিরসং ত্বক্ষিকূটযোর্গণ্ডযোরপি| |৩৩|

পূর্বং শিরঃসম্বন্ধীনি কপালানি বিশোধযেত্| কিং কৃত্বা ? শস্ত্রেণ দারযিত্বা,-ছিত্বা| এবং শিরঃকপালানি শোধযিত্বাগর্ভিণীকোষ্ঠবাহ্যানি কৃত্বা, ততঃ-অনন্তরং, কক্ষোরস্তালুচিবুকপ্রদেশেঽন্যতমে-তদ্বিষযে, সমালম্ব্য-তং গর্ভং গৃহীত্বা, দৃঢং কৃত্বা আকর্ষেত্| কেন ? গর্ভশঙ্কুনা| কঃ ? কুশলঃ,-অভ্যস্তকর্মা বৈদ্যঃ| অভিন্নশিরসং-অবিদারিতোত্তমাঙ্গং পুনর্গর্ভং, অক্ষিকূটযোস্তথা গণ্ডযোস্তদ্বিষযেঽন্যতমে প্রদেশে-কদাচিদক্ষিকূটপ্রদেশে কদাচিদ্গণ্ডপ্রদেশে, সমালম্ব্য তং গর্ভং দৃঢং গর্ভশঙ্কুনা গৃহীত্বা কর্ষেত্|

Adhikarana bAhucCedanAdi (33-34) · Śloka 34

| বাহুং চ্ছিত্বাংঽসসক্তস্য বাতাধ্মাতোদরস্য তু||৩৩|| বিদার্য কোষ্ঠমন্ত্রাণি বহির্বা সন্নিরস্য চ| |৩৪|

অংসাভ্যাং সক্তোংঽসসক্তঃ, তস্য বাহুং চ্ছিত্বাঽঽকর্ষণং কুর্যাত্| বামেনাংসেন সক্তস্য বামং বাহুং দক্ষিণেনাংসেন সক্তস্য দক্ষিণং বাহুং চ্ছিত্বেত্যর্থঃ| বাতেনাধ্মাতং-দৃতিবত্পূরিতং, উদরং যস্য মূঢগর্ভস্যাঽসৌ বাতাধ্মাতোদরঃ, তস্য তু কোষ্ঠং-আমপক্বাশযাশ্রযং, বিদার্য-পাটযিত্বা, অন্ত্রাণী চ বহিঃ সম্যঙ্ক্ষিরস্য-বাহ্যতঃ প্রক্ষিপ্য, আকর্ষেত্|

Adhikarana kaTIsaktasya dAraNAdi (34) · Śloka 34

| কটীসক্তস্য তদ্বচ্চ তত্কপালানি দারযেত্||৩৪||

কটীসক্তস্যেতি তৃতিযা সমাসঃ| কট্যা সক্তস্য-ককুদ্মত্যা লীনস্য, তদ্বচ্চেতি তেন-বাতাধ্মাতোদরেণ, তুল্যং কর্ম দারণাত্মকং কৃত্বা, তত্কপালানি তস্যাঃ-কট্যাঃ, কপালানি-খণ্ডনি, বিদারযেত্|

Adhikarana sAmAnyena mUDhagarBacikitsA (35) · Śloka 35

ইতি বিশেষেণ গর্ভস্যাকর্ষণমুক্ত্বা, সামান্যেন মূঢগর্ভচিকিত্সামাহ যদ্যদ্বাযুবশাদঙ্গং সজ্জেদ্গর্ভস্য খণ্ডশঃ| তত্তচ্ছিত্ত্বাঽঽহরেত্সম্যগ্রক্ষেন্নারীং চ যত্নতঃ||৩৫||

যদ্যদঙ্গং মূঢগর্ভস্য বাযুবশাত্ সজ্জেত্-সংশ্লিষ্যেত্, তত্তদঙ্গং খণ্ডশো-লবশঃ, চ্ছিত্বা-দারযিত্বা, সম্যগাহরেত্| কিলৈকবেলযা সকলগর্ভশরীরচ্ছেদনাদন্তস্থিতমূঢগর্ভাযা নার্যা অপি বলবচ্ছস্ত্রনিপাতনাদ্বিঘাতঃ সম্ভাব্যত ইতি খণ্ডশ ইত্যুক্তম্| অত এবাহ-রক্ষেদিত্যাদি| নারীং চ যত্নেন-তাত্পর্যং কৃত্বা, রক্ষেত্| যথা নার্যা অঙ্গং কিঞ্চিদপি ন চিদ্যতে তথা বিধেযমিত্যর্থঃ|

Adhikarana tatra BiShajA svamatyA yatnaH kAryaH (36) · Śloka 36

গর্ভস্য হি গতিং চিত্রাং করোতি বিগুণোঽনিলঃ| তত্রানল্পমতিস্তস্মাদবস্থাপেক্ষমাচরেত্||৩৬||

যস্মাদ্গর্ভস্য চিত্রাং-নানারূপাং, গতিং-অবস্থিতিং, বিগুণঃ প্রকুপিতঃ, প্রভঞ্জনঃ করোতি, তস্মাদ্যোঽনল্পমতিঃ-মহাবুদ্ধির্বৈদ্যঃ, স তত্র-তস্যাং গতৌ, অবস্থাপেক্ষমাচরেত্,-মূঢগর্ভং প্রত্যনুক্তমপ্যবস্থিতং কর্ম কুর্যাদিত্যর্থঃ|

Adhikarana jIvato garbhasya chedananiShedhaadi (37) · Śloka 37

ছিন্দ্যাদ্গর্ভং ন জীবন্তং মাতরং স হি মারযেত্| সহাত্মনা, ন চোপেক্ষ্যঃ ক্ষণমপ্যস্তজীবিতঃ||৩৭||

জীবন্তং গর্ভং গর্ভিণ্যন্তর্মৃতগর্ভলক্ষণানভিজ্ঞো বৈদ্যাভিমানী যঃ স তং গর্ভং ন দারযেত্| কুতো হেতোঃ ? ইত্যাহ-যস্মাত্সমাতরং মারযেত্| কথম্ ? সহাত্মনা,- মাতরমাত্মানং চ, স ছিন্নো গর্ভো ব্যাপাদযেদিত্যর্থঃ| ন চাস্তজীবিতো-গর্ভিণ্যা অন্তর্মৃতো গর্ভঃ, ক্ষণমপি-মুহূর্তমাত্রমপি, উপেক্ষ্যঃ| অপি তু তস্য দ্রাগেব প্রতিক্রিযাং কুর্যাত্|

Adhikarana mUDhagarBastriyA asAdhyatvam (38) · Śloka 38

ইদানীমুপেক্ষ্যাং মূঢগর্ভা স্ত্রিযমাহ যোনিসংবরণভ্রংশমক্কল্লশ্বাসপীডিতাম্| পূত্যুদ্গারাং হিমাঙ্গী চ মূঢগর্ভাং পরিত্যজেত্||৩৮||

যোনেঃ সংবরণং-সংবৃতযোনিত্বম্, তথা তস্যা এব যোনের্ভ্রশঃ স্বস্থানাচ্চ্যবনম্, তথা মক্কল্লঃ-শিরোবস্তিকোষ্ঠশূললক্ষণঃ প্রাগুক্তো ব্যাধিঃ, তৈর্যোনিসংবরণাদিভিঃ পীডিতাম্| তথা, পূত্যুদ্গারাম্| তথা, হিমাঙ্গীম্| এবংবিধাং মূঢগর্ভাং ত্যজেত্-নোপক্রমেত্|

Adhikarana aparApAtanam (39-40) · Śloka 40

অথাপতন্তীমপরাং পাতযেত্পূর্ববদ্ভিষক্| এবং নির্হৃতশল্যাং তু সিঞ্চেদুষ্ণেন বারিণা||৩৯|| দদ্যাদভ্যক্তদেহাযৈ যোনৌ স্নেহপিচুং ততঃ| যোনির্মৃদুর্ভবেত্তেন শূলং চাস্যাঃ প্রশাম্যতি||৪০||

অথ-মূঢগর্ভাহরণাদনন্তরং, অপরাং-জরাযুসংজ্ঞাং, অপতন্তীমনিষ্ক্রামন্তীং, পূর্ববত্পাতযেত্| পূর্বেণ তুল্যং-পূর্ববত্, পূর্বোক্তেনাপরাপাতনোক্তবিধিনা "হিরণ্যপুষ্পীমূলং চ" (হৃ.শা. অ. ১/৮৩) ইত্যাদিনেত্যর্থঃ| এবং-অনন্তরোক্তেন বিধিনা, নির্হৃতং শল্যং-গর্ভজরাযুসংজ্ঞং, যস্যাস্তাং তু স্ত্রিযমুষ্ণেন জলেন সিঞ্চেত্| ততঃ-স্নানাদনন্তরং, অভ্যক্তশরীরাযৈ স্ত্রিযৈ যোনৌ স্নেহপিচুং দদ্যাত্| তেন-স্নেহপিচুনা, অস্যাঃ-যোষিতঃ, যোনির্মৃদুর্ভবেত্| শূলং-রুজা চ, প্রশম্যতি|

Adhikarana nirhRutaSalyAyA upacAraH (41-46) · Śloka 46

দীপ্যকাতিবিষারাস্নাহিঙ্গ্বেলাপঞ্চকোলকাত্| চূর্ণং স্নেহেন কল্কং বা ক্বাথং বা(তাং)পাযযেত্ততঃ||৪১|| কটুকাতিবিষাপাঠাশাকত্বগ্ঘিঙ্গুতেজিনীঃ| তদ্বচ্চ দোষস্যন্দার্থং বেদনোপশমায চ||৪২|| ত্রিরাত্রমেবং, সপ্তাহং স্নেহমেব ততঃ পিবেত্| সাযং পিবেদরিষ্টং চ তথা সুকৃতমাসবম্||৪৩|| শিরীষককুভক্বাথপিচূন্ যোনৌ বিনিক্ষিপেত্| উপদ্রবাশ্চ যেঽন্যে স্যুস্তান্ যথাস্বমুপাচরেত্||৪৪|| পযো বাতহরৈঃ সিদ্ধং দশাহং ভোজনে হিতম্| রসো দশাহং চ পরং লঘুপথ্যাল্পভোজনা||৪৫|| স্বেদাভ্যঙ্গপরা স্নেহান্ বলাতৈলাদিকান্ ভজেত্| ঊর্ধ্বং চতুর্ভ্যো মাসেভ্যঃ সা ক্রমেণ সুখানি চ||৪৬||

ততঃ-স্নানাভ্যঙ্গাদনন্তরং, দীপ্যকাদেশ্চূর্ণ স্নেহেন-ঘৃতাদিনা প্রকৃত্যাদিবশাত্ যথাযোগ্যেন,, তাং-স্ত্রিযং, পাযযেত্| কল্কং বাদীপ্যকাদের্জলেন পিষ্ট্বা, স্নেহেন তাং পাযযেত্| ক্বাথং বা দীপ্যকাদেস্তাং পাযযেত্| তথা, কটুকাদীনি তদ্বত্ তাং স্ত্রিযং পাযযেত্| এতানি দ্রব্যাণি চূর্ণীকৃত্য স্নেহেন কল্কীকৃত্য ক্বাথীকৃত্য বা পাযযেত্| শাকং-খরচ্ছদম্| ত্বক্-ত্বচম্| তেজিনী-তেজোবতী| কিমর্থং পাযযেত্ ? দোষস্যন্দার্থম্| দোষস্য-রক্তাদেঃ, স্যন্দঃ-স্রবণং, তদর্থং পাযযেত্| তথা, বেদনাযাঃ-পীডাযাঃ, উপশান্ত্যর্থং চ| ত্রিরাত্রমেবং মূঢগর্ভাকর্ষণদিনাত্প্রভৃতি কার্যম্| ততঃ-ত্রিরাত্রাদনন্তরং, সা মূঢগর্ভা, সপ্তাহং স্নেহমেব পিবেত্, ন তু রূক্ষৌষধম্, ইত্যেবকারোঽবধারণার্থো দ্যোতযতি| সাযং-দিনান্তে, অরিষ্টং-পূর্বোক্তলক্ষণং, পিবেত্| তথা, শোভনং কৃত্বা কৃতং-নিষ্পাদিতং, আসবং-মদ্যবিশেষং, তথা শিরীষককুভক্বাথাক্তান্ পিচূন্-বিকেশিকাপ্রাযান্ কার্পাসাদিমযান্, যোনৌ বিনিক্ষিপেত্| উপদ্রবা জ্বরাদযশ্চান্যে যে ভবেযুঃ, তান্-উপদ্রবান্, যথাস্বমুপাচরেত্,-যস্য জ্বরাদের্য আত্মীয উপক্রমঃ, তেন তমুপক্রমেদিত্যর্থঃ| এতচ্চ পূর্বোক্তমাসেব্য, অনন্তরং যত্কর্তব্যং মূঢগর্ভাযাঃ স্ত্রিযাস্তদাহ- পযঃ-ক্ষীরং, অনন্তরং তস্যৈ দশাহং ভোজনে হিতম্| কিম্ভূতম্ ? বাতহরৈঃ-রাস্নাদিভির্দ্রব্যৈঃ, সিদ্ধং-শৃতম্| দশাহাদনন্তরং দ্বিতীযং চ দশাহং রসো ভোজনে হিতঃ| পরং-অতো দিনবিংশতেরনন্তরং, সা-স্ত্রী, লঘুপথ্যাল্পভোজনা সতী, তথা স্বেদাভ্যঙ্গপরাতত্প্রধানা সতী, স্নেহান্-বলাতৈলাদিকান্, ভজেত্| ঊর্ধ্বং-অনন্তরং চতুর্ভ্যো মাসেভ্যঃ পঞ্চমমাসাত্প্রভৃতি, সা-নিষ্ক্রান্তমূঢগর্ভা স্ত্রী, ক্রমেণ-ন তু সহসা, সুখানি-অন্নপানাহারবিহাররূপাণি, ভজেত্|

Adhikarana balAtailam (47-52) · Śloka 52

অথ বলাতৈলং নিরূপযতি বলামূলকষাযস্য ভাগাঃ ষট্ পযসস্তথা| যবকোলকুলত্থানাং দশমূলস্য চৈকতঃ||৪৭|| নিষ্ক্বাথভাগো ভাগশ্চ তৈলস্য তু চতুর্দশঃ| দ্বিমেদাদারুমঞ্জিষ্ঠাকাকোলীদ্বযচন্দনৈঃ||৪৮|| সারিবাকুষ্ঠতগরজীবকর্ষভসন্ধবৈঃ| কালানুসার্যাশৈলেযবচাগুরুপুনর্নবৈঃ||৪৯|| অশ্বগন্ধাবরীক্ষীরশুক্লাযষ্টীবরারসৈঃ| শতাহ্বাশূর্পপর্ণ্যেলাত্বক্পত্রৈঃ শ্লক্ষ্ণকল্কিতৈঃ||৫০|| পক্বং মৃদ্বগ্নিনা তৈলং সর্ববাতবিকারজিত্| সূতিকাবালমর্মাস্থিহতক্ষীণেষু পূজিতম্||৫১|| জ্বরগুল্মগ্রহোন্মাদমূত্রাঘাতান্ত্রবৃদ্ধিজিত্| ধন্বন্তরেরভিমতং যোনিরোগক্ষযাপহম্||৫২||

বলাযা মূলানি, তেষাং কষাযঃ-ক্বাথঃ, তস্য ভাগাঃ ষট্| তৈলৈকভাগাপেক্ষযৈতদ্বোধ্যম্| পযসস্তথা-ক্ষীরস্য ষডেব ভাগাঃ| যবকোলকুলত্থানাং দশমূলস্য চৈকতঃ-একত্র ক্বথিতানাং নিষ্ক্বাথভাগঃ| যবাদীনাং তৈলসমো নিষ্ক্বাথভাগ এক ইত্যর্থঃ| এবং ত্রযোদশ ভাগা ভবন্তি| তৈলস্য তু চতুর্দশো ভাগঃ| চতুর্দশানাং পূরণঃ "তস্য পূরণে ডট্" ইতি ডট্| এতদেব স্পষ্টীক্রিযতে শিষ্যহিতার্থম্| তত্র যদা ষোডশপলানি তৈলস্য শ্রপযিতব্যানি তদা বলামূলপলানি চতুর্বিশতির্ভবন্তি, জলপলশতানি ত্রীণি চতুরশীত্যধিকানি, ততশ্চতুর্থাশেন ষণ্ণবতিঃ ক্বাথপলানি| ক্ষীরপলানি ষণ্ণবতিঃ| যবাদীনাং পলানি চত্বারি, পানীযপলানি চতুঃষষ্টিঃ, ষোডশপলানি কষাযস্য| দ্বিমেদাদীনি দ্রব্যাণিপ্রত্যেকমর্ধকর্ষপ্রমাণানি রক্তিকযা পঞ্চমভাগসহিতযা সধানকযাঽধিকানীতি| কালানুসার্যা-উত্পলসারিবা| ক্ষীরশুক্লাক্ষীরবিদারী| বরা-ত্রিফলা| রসো-বোলঃ| যোঽযং যবকোলকুলত্থদশমূলৈরেকো ভাগঃ পরিকল্পিতঃ, তত্র যবকোলকুলত্থানাং ত্রযোংঽশা দশমূলস্য দশাংশা ইতি ব্যাখ্যেযম্| "কল্পযেত্সদৃশান্ভাগান্ প্রমাণং যত্র নোদিতম্|" (হৃ. ক. অ. ৬/২৪) ইতি বচনাত্| সঙ্গ্রহেঽপ্যুক্তম্ (শা. অ. ৪)- "যবকোলকুলত্থদশমূলকষাযস্য ভাগঃ" ইতি| যে তু যবকোলকুলত্থানাং ত্রযোংঽশা দশমূলস্য চতুর্থোংঽশ ইতি ভাগোঽযং কল্প্য ইত্যাহুঃ, তে তু পৌর্বাপর্যং ন পর্যালোচযন্ত্যেব| যতঃ "কল্পযেত্" ইত্যাদিকযা পরিভাষযা দ্রব্যাণামেষাং সমাংশত্বং নিযমিতমেব| পৃথক্ ষষ্ঠ্যাঽত্র যো নির্দেশঃ স চন্দোনুরোধাদেব বোধ্যঃ| তথা চানেনৈব তন্ত্রকৃতা সঙ্গ্রহে সমস্তান্যেবৈতানি দ্রব্যাণি নির্দিষ্টানি| অপি চ, দশমূলস্যাধিক্যেন বাতরোগহন্তৃত্বং যথাঽস্য তৈলস্য, ন তথা যবাদিভিরিতি সর্বথা পূর্বং ব্যাখ্যানং শ্রেযঃ| মৃদ্বগ্নিনেতি মৃদুশব্দোঽগ্নিবিশেষণায প্রযুক্তঃ| কিল খরতরদহনসম্পর্কাত্ ক্ষীরবাহুল্যেনাস্য তৈলস্য ঝটিতি পাকাতিক্রান্ততাঽপি কিঞ্চিত্সম্ভাব্যতে| এতচ্চ তৈলমশেষবাতরোগহন্তৃ| তথা, সূতিকাদিষু প্রশস্তম্| তথা, জ্বরাদিজিত্| তথা, ভগবতো ধন্বন্তরেরভিমতম্, অতিশযগুণবত্বাত্| তথা, যোনিরোগং ক্ষযং চাপহন্তি|

Adhikarana mRutagarBiNyA jIvadgarBaniShkAsanAdi (53) · Śloka 53

বস্তিদ্বারে বিপন্নাযাঃ কুক্ষিঃ প্রস্পন্দতে যদি| জন্মকালে ততঃ শীঘ্রং পাটযিত্বোদ্ধরেচ্ছিশুম্||৫৩||

বিপন্নাযাঃ-মৃতাযা গর্ভিণ্যাঃ, যদি কুক্ষিঃ প্রস্পন্দতে-অত্যন্তং চলতি| ক্ব প্রদেশে ? বস্তিদ্বারে,-তত্সমীপে| কদা ? জন্মকালে,-গর্ভপ্রসবোন্মুখে কালে| তদা কুশলো বৈদ্যঃ শীঘ্রং [ ততঃ-] কুক্ষিপ্রস্পন্দনাদনন্তরং, পাটযিত্বা শিশুং-বালং, উদ্ধরেত্|

Adhikarana garBe sravati saptasu mAseShu saptayogAH (54-58) · Śloka 58

মধুকং শাকবীজং চ পযস্যা সুরদারু চ| অশ্মন্তকঃ কৃষ্ণতিলাস্তাম্রবল্লী শতাবরী||৫৪|| বৃক্ষাদনী পযস্যা চ লতা সোত্পলসারিবা| অনন্তা সারিবা রাস্না পদ্মা চ মধুযষ্টিকা||৫৫|| বৃহতীদ্বযকাশ্মর্যক্ষীরিশুঙ্গত্বচা ঘৃতম্| পৃশ্নিপর্ণী বলা শিগ্রুঃ শ্বদংষ্ট্রা মধুপর্ণিকা||৫৬|| শৃঙ্গাটকং বিসং দ্রাক্ষা কসেরু মধুকং সিতা| সপ্তৈতান্ পযসা যোগানর্দ্ধশ্লোকসমাপনান্||৫৭|| ক্রমাত্সপ্তসু মাসেষু গর্ভে স্রবতি যোজযেত্| |৫৮|

মধুকাদিদ্রব্যোপলক্ষিতান্ সপ্ত যোগান্ ক্রমাত্-যথাক্রমনির্দিষ্টানতিক্রমেণ, সপ্তসু মাসেষু গর্ভে স্রবতি তদ্রক্ষার্থং তান্ যোজযেত্| কীদৃশান্ যোগান্ ? অর্দ্ধশ্লোকেন সমাপনং-সমাপ্তিঃ, যেষাং তানর্দ্ধশ্লোকসমাপনান্| অশ্মন্তকো-যমলপত্রকঃ| তাম্রবল্লী-রামতরুণী, মঞ্জিষ্ঠেত্যেকে| লতা-গন্ধপ্রিযঙ্গুঃ, গৌরসারিবেত্যন্যে| উত্পলসারিবা-কৃষ্ণসারিবা| ক্ষীরিণাং-ন্যগ্রোধাদীনাং, শুঙ্গাঃ, তথা তেষামেব ত্বক্ চেতি দ্বন্দ্বঃ| "দ্বন্দ্বাচ্চুদষহান্তাত্" ইতি টচ্|

Adhikarana aShTamanavamadaSamamAseShu yogAH (58-60) · Śloka 60

| কপিত্থবিল্ববৃহতীপটোলেক্ষুনিদিগ্ধিকাত্||৫৮|| মূলৈঃ শৃতং প্রযুঞ্জীত ক্ষীরং মাসে তথাঽষ্টমে| নবমে সারিবানন্তাপযস্যামধুযষ্টিভিঃ||৫৯|| যোজযেদ্দশমে মাসি সিদ্ধং ক্ষীরং পযস্যযা| অথবা যষ্টিমধুকনাগরামরদারুভিঃ||৬০||

কপিত্থাদীনাং সমাহারদ্বন্দ্বঃ| কপিত্থাদের্দ্রব্যান্মূলৈঃ শৃতং ক্ষীরমষ্টমে মাসি প্রযুঞ্জীত| নবমে মাসি সারিবাদিভিঃ সিদ্ধং ক্ষীরং প্রযুঞ্জীত| দশমে মাসি কাকোল্যাদিসিদ্ধং ক্ষীরমথবা যষ্ট্যাদিভিঃ সিদ্ধং যোজযেত্|

Adhikarana garBaviShaye~aj~jAnAM mativiBramaH (2) · Śloka 2

অবস্থিতং লোহিতমঙ্গনাযা বাতেন গর্ভং ব্রুবতেঽনভিজ্ঞাঃ| গর্ভাকৃতিত্বাত্কটুকোষ্ণতীক্ষ্ণৈঃ স্রুতে পুনঃ কেবল এব রক্তে||৬১|| গর্ভং জডা ভূতহৃতং বদন্তি মূর্তেন দৃষ্টং হরণং যতস্তৈঃ| ওজোশনত্বাদথবাঽব্যবস্থৈ- র্ভূতৈরুপেক্ষ্যেত ন গর্ভমাতা||৬২|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং দ্বিতীযে শারীরস্থানে গর্ভব্যাপন্নাম দ্বিতীযোঽধ্যাযঃ||২||

লোহিতং বাতেন হেতুনাঽবস্থিতং-কুক্ষৌ পবনেন রুদ্ধং, গর্ভং ব্রুবতেঽনভিজ্ঞাঃ| নঞত্র পর্যুদাসে, অভিজ্ঞসদ্দৃশা ইত্যর্থঃ| কুতস্তেষাং ভ্রান্তিঃ ? ইতি তদ্বীজমাহ-গর্ভাকৃতিত্বাদিতি| গর্ভস্যাকৃতিঃ-সংস্থানমুন্নত্যাদিকম্, তথা "হৃল্লাসদৌর্হৃদ" (হৃ. নি. অ. ১১/৫১) ইত্যাদি রক্তগুল্মনিদানোক্তং লক্ষণং, বাতরুদ্ধলোহিতাবস্থিতৌ গর্ভস্থিতৌ চোভযত্র সমানম্| অতোঽল্পবুদ্ধিত্বাদবস্থিতং লোহিতং গর্ভং ব্রুবতে| কটুকোষ্ণাদিভিঃ-অবস্থিতলোহিতস্রুতিহেতুভিঃ, স্রুতে কেবল এব রক্তে-গর্ভরহিতে, জডাঃ নির্বুদ্ধযো, ভূতহৃতমিতি গর্ভং বদন্তি| পুনঃশব্দঃ শিরসঃ কম্পং কৃত্বা তেষামসম্ভাব্যাঙ্গীকারেণ সর্বজনপ্রথিতেন জডত্বং সহেতুকং প্রতিপাদযতি| অত এবাহ-যতো,-যস্মাত্, মূর্তেঃ-শরীরস্য, হরণং তৈঃ-ভূতৈঃ, ন দ্দৃষ্টং-ন ক্বচিদুপলব্ধম্, অতঃ-অসম্ভাব্যবস্তুপ্রতিজ্ঞানাত্, তেষাং জডত্বমিত্যর্থঃ| ননু, এতদপি কথমুচ্যতে ? ইত্যাহ-ওজোশনত্বাত্| যস্মাত্তে ভূতা ওজোশনাঃ-ওজোভক্ষণমর্যাদাঃ| অথবা কদাচিত্তে-ভূতা উল্লঙ্ঘিতমর্যাদাঃস্যুঃ| তৈঃ-তথাভূতৈঃ, অব্যবস্থৈঃ-অব্যবস্থাবস্থিতৈঃ, ভূতৈর্গর্ভস্য মাতা নোপেক্ষ্যেত, অপি তু হ্রিযেতৈব| তথা হি-যথা গর্ভমাতোপচিতশরীরা ন তথা গর্ভ ইতি| উপজাতীন্দ্রবজ্রাখ্যে বৃত্তে| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টঙ্গহৃদয- টীকাযাং সর্বাঙ্গসুন্দরাখ্যাযাং দ্বিতীযে শারীরস্থানে গর্ভ ব্যাপন্নাম দ্বিতীযোঽধ্যাযঃ সমাপ্তঃ|| ২||