2. garbhavyāpadvidhiradhyāyaḥ

Adhikarana garBavyApadvidhiradhyAyaH (2) · Śloka 2

garbhāvakrāntiśārīrādanantaraṁ garbhavyāpadaṁ śārīramārabhyatē| garbhasya vyāpatpratīkāravijñānārthamāha athātō garbhavyāpadaṁ śārīraṁ vyākhyāsyāmaḥ| iti ha smāhurātrēyādayō maharṣayaḥ| gadyasūtrē|2|

garbhasya vyāpat garbhavyāpat, sā vidyatē yasminniti dhaḥ, tasya "adhyāyānuvākayōrluk" iti luk| yadyapi cātra garbhavyāpadaścikitsā'pyuktā na kēvalaṁ vyāpat, tathā'pi bāhulyādidamuktamiti vēdyam| athādīnāṁ pūrvavadvyākhyā|

Adhikarana garBiNyAH puShpe dRuShTe kartavyam (1-2) · Śloka 2

garbhiṇyāḥ parihāryāṇāṁ sēvayā rōgatō'tha vā| puṣpēdr̥ṣṭē'thavā śūlē bāhyāntaḥ snigdhaśītalam||1|| sēvyāmbhōjahimakṣīrivalkakalkājyalēpitān| dhārayēdyōnibastibhyāmārdrārdrān picunaktakān||2||

garbhiṇyāḥ parihāryāṇāṁ-āhāravihārāṇāṁ pūrvōktānāmativyavāyādīnāṁ, sēvanēna puṣpē dr̥ṣṭē, athavā rōgataḥ puṣpē dr̥ṣṭē, rōgasya ca svabhāvāpathyasarṣapaśākamandakadadhyādērāhārānmātrādēśakālādivaśādvā sambhavaḥ, garbhākhyaphalahētutvādraktaṁ puṣpamucyatē, tasmin dr̥ṣṭē-cakṣurgōcaraṁ prāptē, athavā śūlē-dr̥ṣṭē-praśnādinōpalabdhē sati, dr̥śiratrōpalābdhivacanaḥ, bāhyāntaḥ snigdhaśītalaṁ sādhanaṁ-annapānapradēhapariṣēkādi, kāryam| bahiḥ-snānāvagāhādau, antaścabhōjanānupānādāvityartthaḥ| rōgata iti tr̥tīyārthē tasiḥ| tathā, strī yōnibastibhyāṁ picunaktakān dhārayēt| kimbhūtān ? sēvyādibhirlēpitān| sēvyaṁ-uśīram| ambhōjaṁ-padmam| himaṁ candanam| kṣīraṁ vidyatē yēṣāṁ tē kṣīriṇō vr̥kṣāḥ-pippalādayaḥ, yēṣāṁ śastrādicchinnānāṁ kṣīraṁ dr̥śyatē| valkaṁ-valkalam| sēvyaṁ cāmbhōjaṁ ca himaṁ ca kṣīrivalkaṁ ca, tēṣāṁ kalkaścājyaṁ ca , tairlēpitān| tathā ca kimbhūtān ? ārdrārdrān-atiśayēnārdrīkr̥tān| picuśabdēna vikēśikāsadr̥śaḥ kārpāsamayaḥ| naktakaḥ-cailakhaṇḍaḥ|

Adhikarana shatadhautaghRutAktastriyAH snAnAdi (3-6) · Śloka 6

śatadhautaghr̥tāktāṁ strīṁ tadambhasyavagāhayēt| sasitākṣaudrakumudakamalōtpalakēsaram||3|| lihyāt kṣīraghr̥taṁ khādēcchr̥ṅgāṭakakasērukam| pibētkāntābjaśālūkabālōdumbaravatpayaḥ||4|| śr̥tēna śālikākōlīdvibalāmadhukēkṣubhiḥ| payasā raktaśālyannamadyātsamadhuśarkaram||5|| rasairvā jāṅgalaiḥ| |6|

śataśabdō bahuvāraparyāyaḥ, na saṅkhyāvācītyarthaḥ| tathā ca saṅgrahē'dhītam (śā. a. 4)- sahasradhautasarpiṣā'dhōnābhēḥ sarvataḥ pradihyāt|" iti| śatādhautēna-bahudhā prakṣālitēna ghr̥tēna, aktāṁ-abhyaktāṁ, strīṁ tadambhasyavagāhayēt-tatra tāṁ nimajjanaṁ kārayēt| tadityanēna hi sēvyādidravyaparāmarśaḥ| strīmiti vāmśasōritīyaṅvikalpātpūrvarūpam| tathā kṣīraṁ ghr̥taṁ ca lihyāt| kimbhūtam ? sasitētyādi| saha sitayā tathā kṣaudrēṇa tathā kumudakamalōtpalānāṁ kēsarēṇa-kiñjalkēna sahitam| anyē tu kṣīrāhr̥taṁ kṣīrōdbhavaṁ ghr̥taṁ kṣīraghr̥tamiti vyācakṣatē| tathā, khādēcchr̥ṅgāṭakaṁ kasērukaṁ ca| tathā, payaḥ-kṣīraṁ, pibēt| kimbhūtam ? kāntētyādi| kāntā-gandhapriyaṅguḥ| apsu jātaṁ-abjam, kamalādi| śālūkaṁ-utpalamūlam| bālamudumbaraṁ-apakvamudumbaraphalam| kāntā cābjaṁ ca śālūkaṁ ca balōdumbaraṁ ca tāni vidyantē yasya payasastadēvam, taiḥ śr̥taṁ kṣīraṁ pibēdityarthaḥ| yairhi tatpayaḥ śr̥taṁ tāni tatrāvaśyaṁ vidyantē| kṣīraśrapaṇavidhiścātīsāracikitsōktaḥ (hr̥. ci. a. 9/39)- "payasyutkvāthya mustānāṁ viṁśatiṁ" ityādyanusārēṇātra kalpyaḥ| tantrāntarē tvēvamuktam-"dravyādaṣṭaguṇaṁ kṣīraṁ kṣīrāttōyaṁ caturguṇam| kṣīrāvaśēṣaḥ kartavyaḥ kṣīrapākē tvayaṁ vidhiḥ||" iti| anyē tu kāntādidravyāṇāṁ cūrṇēna yuktaṁ kalkēna vā yuktaṁ payaḥ pibēdityāhuḥ| payasā raktaśālyannaṁ samadhuśarkaraṁ suśītaṁ bhuñjīta| kimbhūtēna kṣīrēṇa ? śālyādibhiḥ śr̥tēna-siddhēna| dēśasātmyādyanurōdhājjāṅgalairvā rasaiḥ śālyannamadyāt|

Adhikarana SuddhivarjamasroktAcaraNam (6) · Śloka 6

śuddhivarjaṁ cāsrōktamācarēt| |6|

śuddhiṁ varjayitvā, asrōktaṁ-raktapittābhihitaṁ, yatsādhanaṁ tadvāhyāntarācarēt-sēvēta| asraśabdasyōpalakṣaṇārthatvādraktapittaṁ gamyatē|

Adhikarana asaMpUrNatrimAsAyAH puShpadarSane kartavyam (6-7) · Śloka 7

| asampūrṇatrimāsāyāḥ pratyākhyāya prasādhayēt||6|| āmānvayē ca| |7|

asampūrṇāstrayō māsā yasyāḥ garbhiṇyāḥ saivam| tasyāḥ puṣpadarśanē sati garbhaḥ prāyō na tiṣṭhati, asañjātasāratvāt| tasmāt pratyākhyāya-pratyākhyānaṁ kr̥tvā, prasādhayēt-prakarṣēṇa yatnēna sādhayēt| āmānvayē ca| atrāpi pratyākhyāya prasādhayēdityanuvartatē| āmānugatē raktadarśanē sampūrṇatricaturādimāsāyā api sañjātasārē'pi garbhē sati viruddhōpakramatvāt pratyākhyāya sādhanaṁ kārayēt| tathā hi,-rūkṣatīkṣṇōṣṇakaṭuprāyamāmaghnaṁ garbhiṇyā viruddham, śītasnigdhaprāyaṁ cāmasya|

Adhikarana AmaraktayoraviruddhasyopadeSaH (7-9) · Śloka 9

ēvamapyāmaraktayōrdvayōryadaviruddhaṁ tadupadēṣṭumāha tatrēṣṭaṁ śītaṁ rūkṣōpasaṁhitam| upavāsō ghanōśīraguḍūcyaraludhānyakāḥ||7|| durālabhāparpaṭakacandanātiviṣābalāḥ| kvathitāḥ salilē pānaṁ tr̥ṇadhānyāni bhōjanam||8|| mudgādiyūṣairāmē tu jitē snigdhādi pūrvavat| |9|

tatra-āmānvayē sāmatāyāṁ satyāṁ, śītaṁ yadannapānādi, tatsarvaṁ bāhyatō'ntaśca hitam| śītaṁ raktasya pathyaṁ, āmasya viruddhatvādapathyaṁ, ityāśaṅkyāha-rūkṣōpasaṁhitam,-rūkṣēṇa-tiktakaṣāyādinā, yuktam| tathā, dēśasatvādyanurōdhādupavāsō hitaḥ, na kēvalaṁ śītaṁ rūkṣōpasaṁhitam| tathā ghanādayō dravyaviśēṣāḥ salilē kvathitāḥ pānaṁ hitam| ghanō-mustaḥ| araluḥ-syōnākaḥ| tathā, tr̥ṇadhānyāni-nīvārakōdravaśyāmākādīni, bhōjanaṁ-āhāraḥ, tatra-āmānvayē, hitam| kaiḥ saha ? mudgādiyūṣaiḥ| ādigrahaṇēna makuṣṭamasūrādayaḥ śimbīdhānyaviśēṣāḥ pittaślēṣmaharā gr̥hyantē| sāmatāyāmēvōtpannāyāmayamupakramaḥ| āmē tu jitē snigdhādi pūrvavat| pūrvasminniva pūrvavat| saptamyantādvatiḥ| yathā prathamaṁ raktadarśanē snidhaśītalādi hitaṁ, tathā'trāpi pūrvanirdiṣṭaṁ snigdhādi hitamityarthaḥ| snigdhaśītāni bāhyāntarupayōjyāni|

Adhikarana garBenipatite tIkShNamadyapAnAdi (9-12) · Śloka 12

| garbhē nipatitē tīkṣṇaṁ madyaṁ sāmarthyataḥ pibēt||9|| garbhakōṣṭhaviśuddyarthamartivismaraṇāya ca| laghunā pañcamūlēna rūkṣāṁ pēyāṁ tataḥ pibēt||10|| pēyāmamadyapā kalkē sādhitāṁ pāñcakaulikē| bilvādipañcakakvāthē tilōddālakataṇḍulaiḥ||11|| māsatulyadinānyēvaṁ pēyādiḥ patitē kramaḥ| laghurasnēhalavaṇō dīpanīyayutō hitaḥ||12||

garbhiṇyā ēvamāsēvamānāyā apyadr̥ṣṭavaśādgarbhē nipatitē-niḥśēṣēṇa patitē sati, tikṣṇaṁ-karkaśaṁ, madyaṁ sāmarthyēna pibēt,-bahu pibēdityarthaḥ| kimartham ? ityāha-garbhakōṣṭhētyādi| garbhakōṣṭhaviśuddhyarthamartēḥ-pīḍāyāḥ, vismr̥tyarthaṁ ca| tatō-madyapariṇāmādanantaraṁ, rūkṣāṁ pēyāṁ pibēt| kimbhūtām ? laghunā pañcamūlēna-br̥hatyādinā (hr̥.sū.a.6/168), kr̥tām| amadyapā tu yā strī sā garbhē nipatitē pēyāṁ pibēt, na tu madyam| kva sādhitāṁ ? kalkē| kiṁ sambandhini ? pāñcakaulikē,-pañcakōlasyāyaṁ pāñcakaulikaḥ, tasmin| pañcakōlakaṁ kalkīkr̥tya tatra pēyāṁ sādhitāmityarthaḥ| tathā, bilvādipañcakakvāthē-mahatpañcamūlakaṣāyē (hr̥. sū. a. 6/167) , sādhitāṁ pēyāṁ pibēditi yōjyam| kaiḥ sādhitām ? tilōddālakataṇḍulaiḥ| uddālakōvrīhiviśēṣaḥ| māsaistulyani dināni-māsasaṅkhyā vāsarāḥ| yāvantō māsā garbhasya tāvantyahāni garbhē nipatitē sati, ēvaṁ-pūrvōktēna prakārēṇa, pēyādiḥ kramaḥ kāryaḥ| kimbhūtaḥ ? laghurasnēhalavaṇaḥ| na vidyētē snēhalavaṇē yasya| tatha, dīpanīyaiḥ-agnikr̥dbhirmaricacitrakādibhirdravyairyutaḥ| saḥ-tathāvidhaḥ, tatra kramō hitaḥ|

Adhikarana doShAdInAM kledaSoShArtho~ayaM vidhiH (13) · Śloka 13

kimartham ? dōṣadhātupariklēdaśōṣārthaṁ vidhirityayam| |13|

dōṣau-pittakaphāvatra gr̥hyētē| vātasya klēdāsambhavāt| dōṣau ca dhātavaśca, tēṣāṁ pariklēdaḥ, tasya śōṣārthaṁ-śōṣāṇāya, ayaṁ vidhiriti|

Adhikarana anantaraM snehAdayo hitAH (13) · Śloka 13

| snēhānnabastayaścōrdhvaṁ balyadīpanajīvanāḥ||13||

ūrdhvaṁ-atō dōṣadhādupariklēdaśōṣādanantaraṁ, snēhānnabastayōhitāḥ| snēhaścaturvidhaḥ pānādau hitaḥ| tathā, annaṁ snigdhaṁ na rūkṣaṁ, hitam| bastayō'pi snigdhā ēva-na rūkṣā hitāḥ, vātakōpabhayāt| kimbhūtāḥ snēhānnabastayaḥ ? balyadīpanajīvanāḥ| balyāḥ-balāya hitāḥ| dīpanāḥ-vahnēḥ sandhukṣaṇakr̥taḥ| tathā, jīvanāḥ-ōjōvr̥ddhikarāḥ|

Adhikarana upaviShTakagarBasya lakShaNAdi (14-15) · Śloka 15

idānīmupaviṣṭakanāgōdarayōrgarbhayōrhētuliṅgauṣadhāni vitānayitumāha sañjātasārē mahati garbhē yōniparisravāt| vr̥ddhimaprāprāpnuvan garbhaḥ kōṣṭhē tiṣṭhati sasphuraḥ||14|| upaviṣṭakamāhustaṁ, varddhatē tēna nōdaram| |15|

sañjātaḥ sārō-balaṁ, yasyāsau sañjātasārō-balavān garbhaḥ, tasmin| tathā, mahati-pravr̥ddhē sati| garbhiṇyāḥ parihāryāparihāradyō'sau yōnēḥ parisravaḥ-parisravaṇaṁ, tasmāt| parisrava iti ca sāmānyēna nirdēśāt kadācidraktarūpaḥ kadācidanyādr̥śō'pi garbhātsravati| parisravācca kāraṇāt vr̥ddhimaprāpnuvan-agacchan, kōṣṭha ēva-garbhādhāra ēva, tiṣṭhati garbhaḥ| yatō yōniparisravātkāraṇāt vāyuḥ kupitaḥ pittaślēṣmāṇau parigr̥hya garbhasya rasavahāṁ nāḍīm pratipīḍyāvatiṣṭhatē| tatō nāḍyāṁ dōṣaiḥ kulyāyāmiva tr̥ṇapatrādibhiḥ praticchannāyāṁ rasasyāsamyagvahanānnāḍīrōdhāddr̥ddhyābhāvō garbhasya| kimbhūtaḥ kōṣṭhē tiṣṭhati ? sasphuraḥ| sphuraṇaṁsphuraḥ| ajvidhau bhayādīnāmupasaṅkhyānamityac| gāṅkuṭādibhyō ñṇiṅiditi ṅittvādguṇābhāvaḥ| saha sphurēṇa-calanēna, vartata iti sasphuraḥ| ētāvanmātraviśēṣāvasthaḥ kōṣṭhē tiṣṭhati| taṁ-tathāvidhaṁ garbhaṁ, upaviṣṭakasaṁjñamāhuḥ| 'munayaḥ' iti śēṣaḥ| tēna-tathābhūtēna garbhēṇa kōṣṭhasthitēna, tasyā udaraṁ na varddhatē-na vr̥ddhiṁ yāti, garbhasyaivāvr̥ddhēḥ| na hi yadyasya vr̥ddhau varddhatē tadavr̥ddhau tasya vr̥ddhiḥ syāt| tathā hi,-candravr̥ddhāvēva samudravēlāyā vr̥ddhiḥ| upaviṣṭakāvasthaśca garbhō na varddhatē| atastatkāraṇābhavādudarasyāpyavr̥ddhiḥ|

Adhikarana nAgodarAKyasya lakShaNAdi (15-16) · Śloka 16

ēvamupaviṣṭakamuktvā nāgōdarākhyaṁ vaktumāha śōkōpavāsarūkṣādyairathavā yōnyatisravāt||15|| vātē kruddhē kr̥śaḥ śuṣyēdgarbhō nāgōdaraṁ tu tam| udaraṁ vr̥ddhamapyatra hīyatē sphuraṇaṁ cirāt||16||

śōkōpavāsarūkṣādyaiḥ-garbhagarbhiṇyapacayakāribhiḥ pavanaprakōpakāribhirhētubhiḥ, vātē kruddhē-kupitē, athavā garbhagarbhiṇyōrupacayapradairāhāravihārairupacitayōrgarbhagarbhiṇyōrapi kadācidatyarthaṁ raktasrutikāraṇānyāsēvēta strī, tadānīṁ tasyā yōnyatisravō jāyatē| tasmādyōnyatisravātkāraṇādapi pavanē kupitē, kr̥śō garbhaḥ sampadyatē| śuṣyēdityatra caśabdō luptanirdiṣṭō draṣṭavyaḥ| na kēvalaṁ kr̥śō bhavati śuṣyēccētyarthaḥ| taṁ-tathābhūtaṁ garbhaṁ, nāgōdarasaṁjñakaṁ kēṣāṁcinmatē cōpaśuṣkakasaṁjñakaṁ vidyāt| atra-nāgōdarasaṁjñakē garbhē'ntaḥsthitē, udaraṁ vr̥ddhamapi-mahadapi sat, hīyatē-hāniṁ yāti| sphuraṇaṁ ca cirāt-cirēṇa bhavati| upaviṣṭakē tu kēvalamavr̥ddhirna tu hāniḥ|

Adhikarana tayoScikitsA (17-18) · Śloka 18

tayōrbr̥ṁhaṇavātaghnamadhuradravyasaṁskr̥taiḥ| ghr̥takṣīrarasaistr̥ptirāmagarbhāṁśca khādayēt||17|| tairēva ca subhikṣāyāḥ kṣōbhaṇaṁ yānavāhanaiḥ| |18|

tayōḥ-upaviṣṭakanāgōdarākhyayōrgarbhayōḥ, ghr̥takṣīrarasaistr̥ptirgabhiṇyāḥ kāryēti śēṣaḥ| kimbhūtaistaiḥ ? br̥ṁhaṇavātaghnamadhuradravya saṁskr̥taiḥ-siddhaiḥ| br̥ṁhaṇāni ca tāni vātaghnāni ca madhurāṇi ca, ēvaṁbhūtāni yāni dravyāṇi drākṣāśarkarādīni, na tu vyastāni br̥ṁhaṇāni vātaghnāni madhurāṇi ca| tatra kēvalaṁ br̥ṁhaṇāni-priyaṅguprabhr̥tīni, na tu vātaghnāni| vātaghnāni ca br̥ṁhaṇāni, na tu madhurarasāni, yathā-nāgarādīni| madhurāṇi na vātaghnāni nāpi br̥ṁhaṇāni, yathā-taṇḍulīyamasūrādīni| tadētairvyastaguṇairdravyaiḥ saṁskr̥tēna ghr̥tādinā tr̥ptirna kāryā, kiṁ tarhi ? samastabr̥ṁhaṇādiguṇayuktairdravyaiḥ saṁskr̥tairiti bōdhyam| tathā ca saṅgrahē'dhijagē (śā.a.4)-'tayōrjīvanīyabr̥ṁhaṇīyamadhurauṣadhasiddhānāṁ sarpiṣāmupayōgaḥ|" ityādi| tathā, tadgarbhapuṣṭayē tāṁ garbhiṇīmāmagarbhāṁśca khādayēt, vaidya iti śēṣaḥ| āamagarbhān svādantyāḥ kadācidgarbhiṇyā jugupsā syāt, atō garbhagarbhiṇyōrdvayōrapi vyāpadō bhavēyuriti ṇyantō'tra khādirnirdiṣṭaḥ| vaidyō hi tāṁ tathā yuktyā khādayēt, yathā'sau na jugupsēta| āmagarbhā aparipūrṇagarbhā ucyantē| tathā, tairēvabr̥ṁhaṇādidravyasaṁskr̥tairghr̥takṣīrarasairāmagarbhaiśca, subhikṣāyāḥ-tr̥ptiṁ prāptāyāḥ, kṣōbhaṇaṁ kāryam| kaiḥ ? yānaiḥ-rathādibhiḥ, vāhanaiḥ gajaturagādibhiḥ| tatrārōpya tāṁ garbhiṇīṁ vēgēna nayēdityarthaḥ|

Adhikarana lInAKyagarBasya cikitsA (18-20) · Śloka 20

atha līnākhyasya garbhasya cikitsāmāha | līnākhyē nisphurē śyēnagōmatsyōtkrōśabarhijāḥ||18|| rasā bahughr̥tā dēyā māṣamūlakajā api| bālabilvaṁtilānmāṣānsaktūṁśca payasā pibēt||19|| samēdyamāṁsaṁ madhu vā kaṭyabhyaṅgaṁ ca śīlayēt| |20|

asyōpiviṣṭakanāgōdarābhyāmēva hētulakṣaṇayōruktatvāt yadēva nisphuraṇatvādi viśēṣāntaraṁ tadēvēha tantrakr̥tōktam| saṅgrahē tu papāṭha (śā. a. 4)- "yasyāḥ punarvātōpasr̥ṣṭhasrōtasō līnō garbhaḥ prasuptō na spandatē taṁ līnamityāhuḥ|" iti| tatra līnākhyē garbhē sati garbhiṇyāḥ śyēnādijā rasā bahughr̥tā dēyāḥ| ādiśabdēna (upalakṣaṇatvēna) [ saṅgrahōktānāṁ ] tittirikukkuṭādīnāṁ grahaṇam| tathā, māṣamūlakajā rasā bahughr̥tā dēyāḥ| tathā, sātmyādivaśāt bālavilbādīn samastānaikadhyaṁ kr̥tvā kṣīrēṇa pibēt| tathā saha mēduramāsēna mārdvīkaṁ vā pibēt| kaṭyāṁ cābhyaṅgaṁ śīlayēt-abhyasēt|

Adhikarana tasyA AnandakaraNAdi (20) · Śloka 20

| harṣayētsatataṁ caināmēvaṁ garbhaḥ pravarddhatē||20||

satataṁ-muhurmuhuśca, ēnāṁ-garbhiṇīmupaviṣṭakanāgōdaralīnākhyagarbhōdarasthāṁ, harṣayēt-muditāṁ kuryāt| ēvaṁ-anayētikartavyatayā kr̥tayā, garbhaḥ pravarddhatē-vr̥ddhiṁ yāti|

Adhikarana anyathA vaiparItyam (21) · Śloka 21

puṣṭō'nyathā varṣagaṇaiḥ kr̥cchrājjāyēta, naiva vā| |21|

anyathā-anyēna prakārēṇa pūrvōktaviparyayēṇa rūkṣātmanā sēvitēna māturāhārarasēnālpēna, puṣṭaḥ-cētanāmātrāvaśēṣa ēva, vatsarasandōhaiḥ kr̥cchrājjāyēta-kaṣṭēna yōnitō niṣkrāmēt| naiva vēti| athavā yāvajjīvaṁ garbhīṇyāḥ kukṣāvēvāvasīdēt na tatō niṣkrāmēt kukṣāvēvāvatiṣṭhēta|

Adhikarana garBiNyA udAvartAKye vyAdhAvupAyAdi (21-22) · Śloka 22

| udāvartaṁ tu garbhīṇyāḥ snēhairāśutarāṁ jayēt||21|| yōgyaiśca bastibhirhanyātsagarbhāṁ sa hi garbhīṇīm| |22|

garbhiṇyā yadyudāvartākhyō vyādhiḥ syāt, taṁ snēhaiḥ-caturbhiryathāyōgyauṣadhasādhitaiḥ pānādinā sēvitaiḥ, āśutarāṁ-atitvaritaṁ, jayēt| tathā, yōgyaiḥ-tatkālōcitaiḥ, bastibhiḥ-anuvāsanaiḥ, jayēt| nanu, garbhiṇyā varjyēṣu "bastimāmāsatō'ṣṭamāt" iti prāguktam (hr̥. śā. a. 1/47)| tatkathamiha sāmānyēnānuvāsanaṁ tantrakr̥dupādikṣat ? ityāha-hanyādityādi| sa yasmādudāvartō garbhēṇa saha garbhiṇīṁ hanyāt, atastamāśutarāṁ jayēt|

Adhikarana udara eva garBe mRute lakShNAni (22-24) · Śloka 24

| garbhē'tidōṣōpacayādapathyairdaivatō'pi vā||22|| mr̥tē'ntarudaraṁ śītaṁ stabdhaṁ dhmātaṁ bhr̥śavyatham| garbhāspandō bhramatr̥ṣṇā kr̥cchrāducchvasanaṁ klamaḥ||23|| aratiḥ srastanētratvamāvīnāmasamudbhavaḥ| ||24||

dōṣāṇāṁ-vātādīnāṁ, upacayaḥ-pravr̥ddhatvam, atiśayēna dōṣōpacayō'tidōṣōpacayaḥ, tasmāddhētōḥ, antaḥ-udaramadhyē, garbhē mr̥tē sati, apathyaiḥ-svabhāvamātrākālādiviruddhasvabhāvairvā, antarmr̥tē, athavā daivāt (daivataḥ)-anyajanmārjitaśubhāśubharmavaśāt, antarmr̥tē garbhē sati, garbhīṇyā udaraṁ śītaṁ-ūṣmarahitaṁ, bhavati| tathā, stabdhaṁ-niścalaṁ, bhavati| tathā, dhmātaṁdr̥tivadvātapūritam| tathā, bhr̥śavyathaṁ-ativēdanaṁ, bhavati| tathā, garbhāspandō-garbhasyāsphuraṇaṁ, bhramastr̥ṣṇā ca bhavati| tathā, kr̥cchrāt-kr̥cchrēṇa, garbhīṇyā ucchvasanaṁ-ūrdhvaśvasanam| tathā klamō-glāniḥ| tathā, aratiḥ-sthānāsanaśayanādiṣvanavasthitatvaṁ cētasaḥ| tathā, srastē ca tē nētrē ca, tayōrbhāvaḥ srastanētratvam, srastē-sthānāccyutē iva| tathā, āvīnāṁ-āsannaprasavakālajaśūlaviśēṣāṇāṁ, asamudbhavaḥ-anutpādaḥ|

Adhikarana antarmRutagarBAyAupacArAH (25-27) · Śloka 27

tasyāḥ kōṣṇāmbusiktāyāḥ piṣṭvā yōniṁ pralēpayēt| guḍaṁ kiṇvaṁ salavaṇaṁ tathāntaḥ pūrayēnmuhuḥ| ghr̥tēna kalkīkr̥tayā śālmalyatasipicchayā||25|| mantrairyōgairjarāyūktairmūḍhagarbhō na cētpatēt| athāpr̥cchayēśvaraṁ vaidyō yatnēnāśu tamāharēt||26|| hastamabhyajya yōniṁ ca sājyaśālmalipicchayā| hastēna śakyaṁ tēnaiva|27|

tasyāḥ-antarmr̥tagarbhāyāḥ īṣaduṣṇajalasiktāyā yōniṁ pralēpayēt-pradēhayēt| guḍādikaṁ piṣṭvā sāmarthyādguḍādikēnaiva lēpayēditi yōjyam| tathā'ntaḥ pūrayēt, śālmalyatasipicchayēti sambandhanīyam| yōnēḥ prakr̥tatvāttasyā antaḥ-abhyantaraṁ, antarbahiśca| kīdr̥śyā picchayā ? ghr̥tēna kalkīkr̥tayā,-piṣṭayā| ēvaṁ yōnērmuhurmuhurabhyantaraṁ pūrayitvā'nantaraṁ mūḍhagarbhapātanārthaṁ mantrān siddhān prayōjayēt| tathā, jarāyūktāḥ-jarāyvapatanē kathitāḥ tāṁśca yōgān prayōjayēt| mantraiḥ-saṅgrahōktaiḥ (śā. a.3)-"kṣitirjalaṁ" ityādibhiḥ, atharvavōdōktaiśca mantrairjarāyōḥ pātanārthamuktaiḥ| ēvamanuṣṭhīyamānē'pi mūḍhagarbhō yadi na patati, atha-anantaraṁ, īśvaraṁ-nr̥paṁ, āpr̥cchaya-tadājñāṁ gr̥hītvā, taṁ-mūḍhagarbhaṁ, āśu garbhiṇyā āharēt-ākarṣēt| katham ? hastamabhyajya-lēpayitvā, tathā yōnimabhyajya| kēna ? sājyētyādi| śālmatyāḥ picchā śālmalipicchā-niryāsaḥ, sahājyēna vartata iti sājyā, sājyā śāsau śālmalipicchā ca tayā, hastaṁyōniṁ cābhyajya yatnēna garbhamāharēt| hastēna śakyamākraṣṭuṁ tēnaiva-hastēna sājyaśālmalipicchāktēna, taṁ-garbhaṁ, samākarṣēt|

Adhikarana antarmRutagarBasyAkarShaNAdi (27-28) · Śloka 28

| gātraṁ ca viṣamaṁ sthitam||27|| āñchanōtpīḍasampīḍavikṣēpōtkṣēpaṇādibhiḥ| ānulōmya samākarṣēdyōniṁ pratyārjavāgatam||28||

gātraṁ ca garbhasya viṣamaṁ kr̥tvā sthitaṁ-ayathāmārgēṇa sthitaṁ, āñchanādibhirānulōmya-spaṣṭatvaṁ prāptē gātrē sati, yōnyabhimukhamārjavēna-r̥jumārgēṇāgataṁ santaṁ, āharēt| āñchanēna-āyāmēna dīrghatayā sthāpanēna, tathōtpīḍanēna-ūrdhvaṁ pīḍanēna, tathāsamantātpīḍanēna, tathā vikṣēpēṇa-viśēṣaprēraṇēna, tathā utkarṣēṇa kṣēpaṇaṁ-utkṣēpaṇaṁ tēna, ādigrahaṇādēvaṁprāyairanyairapi svabuddhiparikalpitaiḥ, spaṣṭatvaṁ prāptē sati|

Adhikarana SastropAyasAdhyA mUDhagarBacikitsA (29-30) · Śloka 30

idānīm śastrōpāyasādhyāṁ mūḍhagarbhacikitsāmāha hastapādaśirōbhiryō yōniṁ bhugnaḥ prapadyatē| pādēna yōnimēkēna bhugnō'nyēna gudaṁ ca yaḥ||29|| viṣkambhau nāma tau mūḍhau śastradāraṇamarhataḥ| |30|

hastēna pādēna śirasā, atulyakālaṁ-kadāciddhastēna kadācitpādēna kadācicchirasā, yōniṁ prati bhugnaḥ-kuṭilaḥ, prapadyatēāyāti, yaḥ sa ēkō viṣkambhō nāma mūḍhagarbhaḥ| tathā, pādēnaikēna yōniṁ tathā dvitīyapādēna gudaṁ-pāyuṁ, bhugnaḥ san yō mūḍhagarbhaḥ prapadyatē, sō'parō viṣkambhaḥ| tau-ētau dvau, viṣkambhau nāma mūḍhau-mūḍhagarbhau, śastradāraṇamarhataḥ| hastēnākraṣṭumaśakyatvāttayōḥ śastradāraṇaṁ kāryamityarthaḥ|

Adhikarana maNDalA~gguliSastrAByAM dAraNam (30) · Śloka 30

ata ēvāha | maṇḍalāṅguliśastrābhyāṁ tatra karma praśasyatē||30||

maṇḍalaṁ cāṅguliśca maṇḍalāṅgulī| maṇḍalaśabdēna maṇḍalāgraṁ śastramupalakṣyatē, aṅguliśabdēna cāṅguliśastram| tē nāmanī yayōḥ śastrayōstē maṇḍalāṅguliśastrē śastravidhyadhyāyōktē (hr̥. sū. a. 26/5-13) , tābhyāṁ maṇḍalāṅguliśastrābhyāṁ [ tatra- ] tayōrviṣkambhākhyayōrmūḍhagarbhayōḥ, karma praśasyatē| tābhyāṁ śastrābhyāṁ dāraṇamētayōḥ kāryamityarthaḥ|

Adhikarana vRuddhipatraSastrasya niShedhaH (31) · Śloka 31

vr̥ddhipatraṁ hi tīkṣṇāgraṁ na yōnāvavacārayēt| |31|

vr̥ddhipatrasaṁjñaṁ śastraṁ yasmāttīkṣṇāgramatastadyōnau nāvacārayēt-tēna tatra vidāraṇaṁ na vidhēyam, pratyavāyabhayāt|

Adhikarana pUrvaM kapAladAraNAdi (31-33) · Śloka 33

daaraṇaṁ ca yathaa vidhēyaṁ tathaa ''ha | pūrvaṁ śiraḥkapālāni dārayitvā viśōdhayēt||31|| kakṣōrastālucibukapradēśē'nyatamē tataḥ| samālambya dr̥ḍhaṁ karṣētkuśalō garbhaśaṅkunā||32|| abhinnaśirasaṁ tvakṣikūṭayōrgaṇḍayōrapi| |33|

pūrvaṁ śiraḥsambandhīni kapālāni viśōdhayēt| kiṁ kr̥tvā ? śastrēṇa dārayitvā,-chitvā| ēvaṁ śiraḥkapālāni śōdhayitvāgarbhiṇīkōṣṭhabāhyāni kr̥tvā, tataḥ-anantaraṁ, kakṣōrastālucibukapradēśē'nyatamē-tadviṣayē, samālambya-taṁ garbhaṁ gr̥hītvā, dr̥ḍhaṁ kr̥tvā ākarṣēt| kēna ? garbhaśaṅkunā| kaḥ ? kuśalaḥ,-abhyastakarmā vaidyaḥ| abhinnaśirasaṁ-avidāritōttamāṅgaṁ punargarbhaṁ, akṣikūṭayōstathā gaṇḍayōstadviṣayē'nyatamē pradēśē-kadācidakṣikūṭapradēśē kadācidgaṇḍapradēśē, samālambya taṁ garbhaṁ dr̥ḍhaṁ garbhaśaṅkunā gr̥hītvā karṣēt|

Adhikarana bAhucCedanAdi (33-34) · Śloka 34

| bāhuṁ cchitvāṁ'sasaktasya vātādhmātōdarasya tu||33|| vidārya kōṣṭhamantrāṇi bahirvā sannirasya ca| |34|

aṁsābhyāṁ saktōṁ'sasaktaḥ, tasya bāhuṁ cchitvā''karṣaṇaṁ kuryāt| vāmēnāṁsēna saktasya vāmaṁ bāhuṁ dakṣiṇēnāṁsēna saktasya dakṣiṇaṁ bāhuṁ cchitvētyarthaḥ| vātēnādhmātaṁ-dr̥tivatpūritaṁ, udaraṁ yasya mūḍhagarbhasyā'sau vātādhmātōdaraḥ, tasya tu kōṣṭhaṁ-āmapakvāśayāśrayaṁ, vidārya-pāṭayitvā, antrāṇī ca bahiḥ samyaṅkṣirasya-bāhyataḥ prakṣipya, ākarṣēt|

Adhikarana kaTIsaktasya dAraNAdi (34) · Śloka 34

| kaṭīsaktasya tadvacca tatkapālāni dārayēt||34||

kaṭīsaktasyēti tr̥tiyā samāsaḥ| kaṭyā saktasya-kakudmatyā līnasya, tadvaccēti tēna-vātādhmātōdarēṇa, tulyaṁ karma dāraṇātmakaṁ kr̥tvā, tatkapālāni tasyāḥ-kaṭyāḥ, kapālāni-khaṇḍani, vidārayēt|

Adhikarana sAmAnyena mUDhagarBacikitsA (35) · Śloka 35

iti viśēṣēṇa garbhasyākarṣaṇamuktvā, sāmānyēna mūḍhagarbhacikitsāmāha yadyadvāyuvaśādaṅgaṁ sajjēdgarbhasya khaṇḍaśaḥ| tattacchittvā''harētsamyagrakṣēnnārīṁ ca yatnataḥ||35||

yadyadaṅgaṁ mūḍhagarbhasya vāyuvaśāt sajjēt-saṁśliṣyēt, tattadaṅgaṁ khaṇḍaśō-lavaśaḥ, cchitvā-dārayitvā, samyagāharēt| kilaikavēlayā sakalagarbhaśarīracchēdanādantasthitamūḍhagarbhāyā nāryā api balavacchastranipātanādvighātaḥ sambhāvyata iti khaṇḍaśa ityuktam| ata ēvāha-rakṣēdityādi| nārīṁ ca yatnēna-tātparyaṁ kr̥tvā, rakṣēt| yathā nāryā aṅgaṁ kiñcidapi na cidyatē tathā vidhēyamityarthaḥ|

Adhikarana tatra BiShajA svamatyA yatnaH kAryaH (36) · Śloka 36

garbhasya hi gatiṁ citrāṁ karōti viguṇō'nilaḥ| tatrānalpamatistasmādavasthāpēkṣamācarēt||36||

yasmādgarbhasya citrāṁ-nānārūpāṁ, gatiṁ-avasthitiṁ, viguṇaḥ prakupitaḥ, prabhañjanaḥ karōti, tasmādyō'nalpamatiḥ-mahābuddhirvaidyaḥ, sa tatra-tasyāṁ gatau, avasthāpēkṣamācarēt,-mūḍhagarbhaṁ pratyanuktamapyavasthitaṁ karma kuryādityarthaḥ|

Adhikarana jIvato garbhasya chedananiShedhaadi (37) · Śloka 37

chindyādgarbhaṁ na jīvantaṁ mātaraṁ sa hi mārayēt| sahātmanā, na cōpēkṣyaḥ kṣaṇamapyastajīvitaḥ||37||

jīvantaṁ garbhaṁ garbhiṇyantarmr̥tagarbhalakṣaṇānabhijñō vaidyābhimānī yaḥ sa taṁ garbhaṁ na dārayēt| kutō hētōḥ ? ityāha-yasmātsamātaraṁ mārayēt| katham ? sahātmanā,- mātaramātmānaṁ ca, sa chinnō garbhō vyāpādayēdityarthaḥ| na cāstajīvitō-garbhiṇyā antarmr̥tō garbhaḥ, kṣaṇamapi-muhūrtamātramapi, upēkṣyaḥ| api tu tasya drāgēva pratikriyāṁ kuryāt|

Adhikarana mUDhagarBastriyA asAdhyatvam (38) · Śloka 38

idānīmupēkṣyāṁ mūḍhagarbhā striyamāha yōnisaṁvaraṇabhraṁśamakkallaśvāsapīḍitām| pūtyudgārāṁ himāṅgī ca mūḍhagarbhāṁ parityajēt||38||

yōnēḥ saṁvaraṇaṁ-saṁvr̥tayōnitvam, tathā tasyā ēva yōnērbhraśaḥ svasthānāccyavanam, tathā makkallaḥ-śirōbastikōṣṭhaśūlalakṣaṇaḥ prāguktō vyādhiḥ, tairyōnisaṁvaraṇādibhiḥ pīḍitām| tathā, pūtyudgārām| tathā, himāṅgīm| ēvaṁvidhāṁ mūḍhagarbhāṁ tyajēt-nōpakramēt|

Adhikarana aparApAtanam (39-40) · Śloka 40

athāpatantīmaparāṁ pātayētpūrvavadbhiṣak| ēvaṁ nirhr̥taśalyāṁ tu siñcēduṣṇēna vāriṇā||39|| dadyādabhyaktadēhāyai yōnau snēhapicuṁ tataḥ| yōnirmr̥durbhavēttēna śūlaṁ cāsyāḥ praśāmyati||40||

atha-mūḍhagarbhāharaṇādanantaraṁ, aparāṁ-jarāyusaṁjñāṁ, apatantīmaniṣkrāmantīṁ, pūrvavatpātayēt| pūrvēṇa tulyaṁ-pūrvavat, pūrvōktēnāparāpātanōktavidhinā "hiraṇyapuṣpīmūlaṁ ca" (hr̥.śā. a. 1/83) ityādinētyarthaḥ| ēvaṁ-anantarōktēna vidhinā, nirhr̥taṁ śalyaṁ-garbhajarāyusaṁjñaṁ, yasyāstāṁ tu striyamuṣṇēna jalēna siñcēt| tataḥ-snānādanantaraṁ, abhyaktaśarīrāyai striyai yōnau snēhapicuṁ dadyāt| tēna-snēhapicunā, asyāḥ-yōṣitaḥ, yōnirmr̥durbhavēt| śūlaṁ-rujā ca, praśamyati|

Adhikarana nirhRutaSalyAyA upacAraH (41-46) · Śloka 46

dīpyakātiviṣārāsnāhiṅgvēlāpañcakōlakāt| cūrṇaṁ snēhēna kalkaṁ vā kvāthaṁ vā(tāṁ)pāyayēttataḥ||41|| kaṭukātiviṣāpāṭhāśākatvagghiṅgutējinīḥ| tadvacca dōṣasyandārthaṁ vēdanōpaśamāya ca||42|| trirātramēvaṁ, saptāhaṁ snēhamēva tataḥ pibēt| sāyaṁ pibēdariṣṭaṁ ca tathā sukr̥tamāsavam||43|| śirīṣakakubhakvāthapicūn yōnau vinikṣipēt| upadravāśca yē'nyē syustān yathāsvamupācarēt||44|| payō vātaharaiḥ siddhaṁ daśāhaṁ bhōjanē hitam| rasō daśāhaṁ ca paraṁ laghupathyālpabhōjanā||45|| svēdābhyaṅgaparā snēhān balātailādikān bhajēt| ūrdhvaṁ caturbhyō māsēbhyaḥ sā kramēṇa sukhāni ca||46||

tataḥ-snānābhyaṅgādanantaraṁ, dīpyakādēścūrṇa snēhēna-ghr̥tādinā prakr̥tyādivaśāt yathāyōgyēna,, tāṁ-striyaṁ, pāyayēt| kalkaṁ vādīpyakādērjalēna piṣṭvā, snēhēna tāṁ pāyayēt| kvāthaṁ vā dīpyakādēstāṁ pāyayēt| tathā, kaṭukādīni tadvat tāṁ striyaṁ pāyayēt| ētāni dravyāṇi cūrṇīkr̥tya snēhēna kalkīkr̥tya kvāthīkr̥tya vā pāyayēt| śākaṁ-kharacchadam| tvak-tvacam| tējinī-tējōvatī| kimarthaṁ pāyayēt ? dōṣasyandārtham| dōṣasya-raktādēḥ, syandaḥ-sravaṇaṁ, tadarthaṁ pāyayēt| tathā, vēdanāyāḥ-pīḍāyāḥ, upaśāntyarthaṁ ca| trirātramēvaṁ mūḍhagarbhākarṣaṇadinātprabhr̥ti kāryam| tataḥ-trirātrādanantaraṁ, sā mūḍhagarbhā, saptāhaṁ snēhamēva pibēt, na tu rūkṣauṣadham, ityēvakārō'vadhāraṇārthō dyōtayati| sāyaṁ-dināntē, ariṣṭaṁ-pūrvōktalakṣaṇaṁ, pibēt| tathā, śōbhanaṁ kr̥tvā kr̥taṁ-niṣpāditaṁ, āsavaṁ-madyaviśēṣaṁ, tathā śirīṣakakubhakvāthāktān picūn-vikēśikāprāyān kārpāsādimayān, yōnau vinikṣipēt| upadravā jvarādayaścānyē yē bhavēyuḥ, tān-upadravān, yathāsvamupācarēt,-yasya jvarādērya ātmīya upakramaḥ, tēna tamupakramēdityarthaḥ| ētacca pūrvōktamāsēvya, anantaraṁ yatkartavyaṁ mūḍhagarbhāyāḥ striyāstadāha- payaḥ-kṣīraṁ, anantaraṁ tasyai daśāhaṁ bhōjanē hitam| kimbhūtam ? vātaharaiḥ-rāsnādibhirdravyaiḥ, siddhaṁ-śr̥tam| daśāhādanantaraṁ dvitīyaṁ ca daśāhaṁ rasō bhōjanē hitaḥ| paraṁ-atō dinaviṁśatēranantaraṁ, sā-strī, laghupathyālpabhōjanā satī, tathā svēdābhyaṅgaparātatpradhānā satī, snēhān-balātailādikān, bhajēt| ūrdhvaṁ-anantaraṁ caturbhyō māsēbhyaḥ pañcamamāsātprabhr̥ti, sā-niṣkrāntamūḍhagarbhā strī, kramēṇa-na tu sahasā, sukhāni-annapānāhāravihārarūpāṇi, bhajēt|

Adhikarana balAtailam (47-52) · Śloka 52

atha balātailaṁ nirūpayati balāmūlakaṣāyasya bhāgāḥ ṣaṭ payasastathā| yavakōlakulatthānāṁ daśamūlasya caikataḥ||47|| niṣkvāthabhāgō bhāgaśca tailasya tu caturdaśaḥ| dvimēdādārumañjiṣṭhākākōlīdvayacandanaiḥ||48|| sārivākuṣṭhatagarajīvakarṣabhasandhavaiḥ| kālānusāryāśailēyavacāgurupunarnavaiḥ||49|| aśvagandhāvarīkṣīraśuklāyaṣṭīvarārasaiḥ| śatāhvāśūrpaparṇyēlātvakpatraiḥ ślakṣṇakalkitaiḥ||50|| pakvaṁ mr̥dvagninā tailaṁ sarvavātavikārajit| sūtikābālamarmāsthihatakṣīṇēṣu pūjitam||51|| jvaragulmagrahōnmādamūtrāghātāntravr̥ddhijit| dhanvantarērabhimataṁ yōnirōgakṣayāpaham||52||

balāyā mūlāni, tēṣāṁ kaṣāyaḥ-kvāthaḥ, tasya bhāgāḥ ṣaṭ| tailaikabhāgāpēkṣayaitadbōdhyam| payasastathā-kṣīrasya ṣaḍēva bhāgāḥ| yavakōlakulatthānāṁ daśamūlasya caikataḥ-ēkatra kvathitānāṁ niṣkvāthabhāgaḥ| yavādīnāṁ tailasamō niṣkvāthabhāga ēka ityarthaḥ| ēvaṁ trayōdaśa bhāgā bhavanti| tailasya tu caturdaśō bhāgaḥ| caturdaśānāṁ pūraṇaḥ "tasya pūraṇē ḍaṭ" iti ḍaṭ| ētadēva spaṣṭīkriyatē śiṣyahitārtham| tatra yadā ṣōḍaśapalāni tailasya śrapayitavyāni tadā balāmūlapalāni caturviśatirbhavanti, jalapalaśatāni trīṇi caturaśītyadhikāni, tataścaturthāśēna ṣaṇṇavatiḥ kvāthapalāni| kṣīrapalāni ṣaṇṇavatiḥ| yavādīnāṁ palāni catvāri, pānīyapalāni catuḥṣaṣṭiḥ, ṣōḍaśapalāni kaṣāyasya| dvimēdādīni dravyāṇipratyēkamardhakarṣapramāṇāni raktikayā pañcamabhāgasahitayā sadhānakayā'dhikānīti| kālānusāryā-utpalasārivā| kṣīraśuklākṣīravidārī| varā-triphalā| rasō-bōlaḥ| yō'yaṁ yavakōlakulatthadaśamūlairēkō bhāgaḥ parikalpitaḥ, tatra yavakōlakulatthānāṁ trayōṁ'śā daśamūlasya daśāṁśā iti vyākhyēyam| "kalpayētsadr̥śānbhāgān pramāṇaṁ yatra nōditam|" (hr̥. ka. a. 6/24) iti vacanāt| saṅgrahē'pyuktam (śā. a. 4)- "yavakōlakulatthadaśamūlakaṣāyasya bhāgaḥ" iti| yē tu yavakōlakulatthānāṁ trayōṁ'śā daśamūlasya caturthōṁ'śa iti bhāgō'yaṁ kalpya ityāhuḥ, tē tu paurvāparyaṁ na paryālōcayantyēva| yataḥ "kalpayēt" ityādikayā paribhāṣayā dravyāṇāmēṣāṁ samāṁśatvaṁ niyamitamēva| pr̥thak ṣaṣṭhyā'tra yō nirdēśaḥ sa candōnurōdhādēva bōdhyaḥ| tathā cānēnaiva tantrakr̥tā saṅgrahē samastānyēvaitāni dravyāṇi nirdiṣṭāni| api ca, daśamūlasyādhikyēna vātarōgahantr̥tvaṁ yathā'sya tailasya, na tathā yavādibhiriti sarvathā pūrvaṁ vyākhyānaṁ śrēyaḥ| mr̥dvagninēti mr̥duśabdō'gniviśēṣaṇāya prayuktaḥ| kila kharataradahanasamparkāt kṣīrabāhulyēnāsya tailasya jhaṭiti pākātikrāntatā'pi kiñcitsambhāvyatē| ētacca tailamaśēṣavātarōgahantr̥| tathā, sūtikādiṣu praśastam| tathā, jvarādijit| tathā, bhagavatō dhanvantarērabhimatam, atiśayaguṇavatvāt| tathā, yōnirōgaṁ kṣayaṁ cāpahanti|

Adhikarana mRutagarBiNyA jIvadgarBaniShkAsanAdi (53) · Śloka 53

bastidvārē vipannāyāḥ kukṣiḥ praspandatē yadi| janmakālē tataḥ śīghraṁ pāṭayitvōddharēcchiśum||53||

vipannāyāḥ-mr̥tāyā garbhiṇyāḥ, yadi kukṣiḥ praspandatē-atyantaṁ calati| kva pradēśē ? bastidvārē,-tatsamīpē| kadā ? janmakālē,-garbhaprasavōnmukhē kālē| tadā kuśalō vaidyaḥ śīghraṁ [ tataḥ-] kukṣipraspandanādanantaraṁ, pāṭayitvā śiśuṁ-bālaṁ, uddharēt|

Adhikarana garBe sravati saptasu mAseShu saptayogAH (54-58) · Śloka 58

madhukaṁ śākabījaṁ ca payasyā suradāru ca| aśmantakaḥ kr̥ṣṇatilāstāmravallī śatāvarī||54|| vr̥kṣādanī payasyā ca latā sōtpalasārivā| anantā sārivā rāsnā padmā ca madhuyaṣṭikā||55|| br̥hatīdvayakāśmaryakṣīriśuṅgatvacā ghr̥tam| pr̥śniparṇī balā śigruḥ śvadaṁṣṭrā madhuparṇikā||56|| śr̥ṅgāṭakaṁ bisaṁ drākṣā kasēru madhukaṁ sitā| saptaitān payasā yōgānarddhaślōkasamāpanān||57|| kramātsaptasu māsēṣu garbhē sravati yōjayēt| |58|

madhukādidravyōpalakṣitān sapta yōgān kramāt-yathākramanirdiṣṭānatikramēṇa, saptasu māsēṣu garbhē sravati tadrakṣārthaṁ tān yōjayēt| kīdr̥śān yōgān ? arddhaślōkēna samāpanaṁ-samāptiḥ, yēṣāṁ tānarddhaślōkasamāpanān| aśmantakō-yamalapatrakaḥ| tāmravallī-rāmataruṇī, mañjiṣṭhētyēkē| latā-gandhapriyaṅguḥ, gaurasārivētyanyē| utpalasārivā-kr̥ṣṇasārivā| kṣīriṇāṁ-nyagrōdhādīnāṁ, śuṅgāḥ, tathā tēṣāmēva tvak cēti dvandvaḥ| "dvandvāccudaṣahāntāt" iti ṭac|

Adhikarana aShTamanavamadaSamamAseShu yogAH (58-60) · Śloka 60

| kapitthabilvabr̥hatīpaṭōlēkṣunidigdhikāt||58|| mūlaiḥ śr̥taṁ prayuñjīta kṣīraṁ māsē tathā'ṣṭamē| navamē sārivānantāpayasyāmadhuyaṣṭibhiḥ||59|| yōjayēddaśamē māsi siddhaṁ kṣīraṁ payasyayā| athavā yaṣṭimadhukanāgarāmaradārubhiḥ||60||

kapitthādīnāṁ samāhāradvandvaḥ| kapitthādērdravyānmūlaiḥ śr̥taṁ kṣīramaṣṭamē māsi prayuñjīta| navamē māsi sārivādibhiḥ siddhaṁ kṣīraṁ prayuñjīta| daśamē māsi kākōlyādisiddhaṁ kṣīramathavā yaṣṭyādibhiḥ siddhaṁ yōjayēt|

Adhikarana garBaviShaye~aj~jAnAM mativiBramaH (2) · Śloka 2

avasthitaṁ lōhitamaṅganāyā vātēna garbhaṁ bruvatē'nabhijñāḥ| garbhākr̥titvātkaṭukōṣṇatīkṣṇaiḥ srutē punaḥ kēvala ēva raktē||61|| garbhaṁ jaḍā bhūtahr̥taṁ vadanti mūrtēna dr̥ṣṭaṁ haraṇaṁ yatastaiḥ| ōjōśanatvādathavā'vyavasthai- rbhūtairupēkṣyēta na garbhamātā||62|| iti śrīvaidyapatisiṁhaguptasūnuśrīmadvāgbhaṭaviracitā- yāmaṣṭāṅgahr̥dayasaṁhitāyāṁ dvitīyē śārīrasthānē garbhavyāpannāma dvitīyō'dhyāyaḥ||2||

lōhitaṁ vātēna hētunā'vasthitaṁ-kukṣau pavanēna ruddhaṁ, garbhaṁ bruvatē'nabhijñāḥ| nañatra paryudāsē, abhijñasaddr̥śā ityarthaḥ| kutastēṣāṁ bhrāntiḥ ? iti tadvījamāha-garbhākr̥titvāditi| garbhasyākr̥tiḥ-saṁsthānamunnatyādikam, tathā "hr̥llāsadaurhr̥da" (hr̥. ni. a. 11/51) ityādi raktagulmanidānōktaṁ lakṣaṇaṁ, vātaruddhalōhitāvasthitau garbhasthitau cōbhayatra samānam| atō'lpabuddhitvādavasthitaṁ lōhitaṁ garbhaṁ bruvatē| kaṭukōṣṇādibhiḥ-avasthitalōhitasrutihētubhiḥ, srutē kēvala ēva raktē-garbharahitē, jaḍāḥ nirbuddhayō, bhūtahr̥tamiti garbhaṁ vadanti| punaḥśabdaḥ śirasaḥ kampaṁ kr̥tvā tēṣāmasambhāvyāṅgīkārēṇa sarvajanaprathitēna jaḍatvaṁ sahētukaṁ pratipādayati| ata ēvāha-yatō,-yasmāt, mūrtēḥ-śarīrasya, haraṇaṁ taiḥ-bhūtaiḥ, na ddr̥ṣṭaṁ-na kvacidupalabdham, ataḥ-asambhāvyavastupratijñānāt, tēṣāṁ jaḍatvamityarthaḥ| nanu, ētadapi kathamucyatē ? ityāha-ōjōśanatvāt| yasmāttē bhūtā ōjōśanāḥ-ōjōbhakṣaṇamaryādāḥ| athavā kadācittē-bhūtā ullaṅghitamaryādāḥsyuḥ| taiḥ-tathābhūtaiḥ, avyavasthaiḥ-avyavasthāvasthitaiḥ, bhūtairgarbhasya mātā nōpēkṣyēta, api tu hriyētaiva| tathā hi-yathā garbhamātōpacitaśarīrā na tathā garbha iti| upajātīndravajrākhyē vr̥ttē| iti śrīmr̥gāṅkadattaputraśrīmadaruṇadattaviracitāyāmaṣṭaṅgahr̥daya- ṭīkāyāṁ sarvāṅgasundarākhyāyāṁ dvitīyē śārīrasthānē garbha vyāpannāma dvitīyō'dhyāyaḥ samāptaḥ|| 2||