4. marmavibhāgaśārīrō'dhyāyaḥ

Adhikarana adhyAyopakramaH · Śloka

aṅgavibhāgādantaraṁ marmavibhāgaṁ śārīraṁ prārabhyatē| marmaṇāmaṅgāśritatvāt| yatō marmāṇyaṅgapratyaṅgasamāśritāni, atastatraiva vyākhyātuṁ yuktāni, bahuvaktavyatvātpr̥thagucyantē| tasmādasyaivādhyāyasyārambhō yukta ityāha-

Adhikarana marmaviBAgaSArIro~adhyAyaH (2) · Śloka 2

athātō marmavibhāgaṁ śārīraṁ vyākhyāsyāmaḥ| iti ha smāhurātrēyādayō maharṣayaḥ| gadyasūtrē||2||

mriyatē'sminnaṅga upahata iti marma| vibhajanaṁ-vibhāgaḥ, marmaṇāṁ vibhāgō marmavibhāgaḥ| sō'sminnadhyāyē'stīti marmavibhāgaḥ| arśāditvādac| śārīrasthāna pratibaddhatvācca śārīraḥ| śēṣaṁ pūrvavat|

Adhikarana marmaNAM saMKyA (1) · Śloka 1

sukhagrahaṇādyarthaṁ ca pūrvaṁ marmaṇāṁ saṅkhyāṁ baktumāha saptōttaraṁ marmaśatam| |1|

saptōttarāṇi-adhikāni, yasmin-śatē, tadēvam|

Adhikarana teShAM sthAnAni (1-2) · Śloka 2

tēṣāmēkādaśādiśēt| pr̥thaksakthnōstathā bāhvōstrīṇi kōṣṭhē navōrasi||1|| pr̥ṣṭhē caturdaśōrdhvaṁ tu jatrōstriṁśacca sapta ca| |2|

tēṣāṁ-marmaṇāṁ madhyē, pr̥thak-pratyēkaṁ kr̥tvā, sakthnōrdvayōrbāhṇōśca dvayōrēkādaśādiśēt, ēvaṁ catuścatvāriṁśanmarmāṇi śākāsu vidyāt| kōṣṭhē-jaṭharē, trīṇi marmāṇi| urasi-vakṣasi, navasaṅkhyāni| pr̥ṣṭhē caturdaśa| jatrōrūrdhvaṁ-jatruṇa upariṣṭāt, triṁśattathā sapta, ēvaṁ saptatriṁśadityarthaḥ| jatrōriti puṁstvamatra cintyam| athavā 'anityamāgamaśāsanam' ityatra num na kr̥taḥ|

Adhikarana talahRunmarmaNaH sthAnaM karma ca (2-3) · Śloka 3

idānīmēṣāṁ marmaṇāmāpādatalānmastakaṁ yāvadviśiṣṭadēśasamāśrayēṇa viśiṣṭasaṁjñāntarāṇi viśiṣṭakarmāṇi marmāṇi darśayitumāha | madhyē pādatalasyāhurabhitō madhyamāṅgulim||2|| talahr̥nnāma rujayā tatra viddhasya pañcatā| |3|

pādatalasya madhyē-madhyapradēśē, madhyamāṅgulimabhitō-madhyamāṅgulēḥ pādasambandhinyā ābhimukhyēna, yatpādatalaṁ-pādapr̥ṣṭhaṁ, tatra talahr̥nnāma marmāhuḥ, pūrvācāryā iti śēṣaḥ| madhyamāṅgulimiti "ābitaḥ [ paritaḥ samayānikaṣāhāpratiyōgē'pi" iti ] śabdaprayōgē dvitīyā| tatra-tasmin, viddhasya-āhatasya, pañcatā-maraṇaṁ, bhavati| kayā? rujayā,-vēdanayā|

Adhikarana kShiprasya sthAnaM karma ca (3) · Śloka 3

| aṅguṣṭhāṅgulimadhyasthaṁ kṣipramākṣēpamāraṇam||3||

aṅguṣṭhaścāṅguliśca, tayōrmadhyasthaṁ-aṅguṣṭhāṅgulimadhyasthitaṁ, kṣipraṁnāma marma| tadviddhamākṣēpamāraṇaṁ-ākṣēpakākhyēna vātavyādhinā mārayati|

Adhikarana kUrcasya sthAnaM karma ca (4) · Śloka 4

tasyōrdhvaṁ dvyaṅgulē kūrcaḥ pādabhramaṇakampakr̥t| |4|

tasyōrdhvaṁ-tasya kṣiprākhyasya marmaṇa upariṣṭāt, dvyaṅgulē-dvyaṅgulaṁ vimucya, kūrcō nāma marma| tadviddhaṁ pādasya bhramaṇaṁ kampaṁ ca karōti|

Adhikarana kUrchaSirasaH sthAnaM karma ca (4) · Śloka 4

| gulphasandhēradhaḥ kūrcaśiraḥśōpharujākaram||4||

gulphasandhēradhaḥ kūrcaśirō nāma marma| tadviddhaṁ śōpharujākaram|

Adhikarana gulPasya sthAnaM karma ca (5) · Śloka 5

jaṅghācaraṇayōḥ sandhau gulphō rukstambhamāndyakr̥t| |5|

jaṅghācaraṇayōḥ sandhau-sandhipradēśē, gulphō nāma marma| tadviddhaṁ ruk ca stambhaśca māndyaṁ ca, tāni karōti| stambhaḥ stabdhatvamivāṅgasya|

Adhikarana indrabasteH sthAnaM karma ca (5) · Śloka 5

| jaṅghāntarē tvindrabastirmārayatyasr̥jaḥ kṣayāt||5||

jaṅghantarē-jaṅghāmadhyē pārṣṇiprabhr̥tidvādaśabhiraṅgulaiḥ, indrabastirnāma marma| tadviddhaṁ raktakṣayānmārayati, nānyathā| tasmādraktastambhanē yatitavyamiti pratipādanārthamasr̥kkṣayāditi hēturupanyastaḥ| ēṣa ēva nyāyō'nyatrāpyanusartavyaḥ| tēna yatra yaddhētukaṁ māraṇādikaṁ karma vyadhē kathitaṁ, tatra taccikitsāyāṁ yatitavyamiti|

Adhikarana jAnunaH sthAnaM karma ca (6) · Śloka 6

jaṅhghōrvōḥ saṅgamē jānu khañjatā tatra jīvataḥ| |6|

jaṅghōrvōḥ saṅgamē-sandhau, jānunāma marma| tatra-jānuni viddhē, puruṣō mriyata ēva| atha jīvati tatō'sya jīvataḥ puṁsaḥ khañjatā syāditi| arthāt prāyēṇa maraṇaṁ puruṣasyēti bōdhayati|

Adhikarana ANImarmaNaH sthAnaM karma ca (6) · Śloka 6

| jānunastryaṅgulādūrdhvamāṇyūstambhaśōphakr̥t||6||

jānunaḥ-jānusandhēḥ, tryaṅgulādūrdhvamāṇīnāma marma| tadviddhamūrustambhaśōphakaram|

Adhikarana urvImarmaNaH sthAnaM karma ca (7) · Śloka 7

urvyūrumadhyē tadvēdhātsakthiśōṣō'srasaṅkṣayāt| |7|

urvī nāma marma ūrumadhyē| tadvēdhāt-tadabhighātāt, sakthiśōṣaḥ-ūrukārśyam| sakthiśōṣō'srasaṅkṣayāt,syāt nānyathā vyadhē satyapi|

Adhikarana lohitAkShasya sthAnaM karma ca (7) · Śloka 7

| ūrumūlē lōhitākṣaṁ hanti pakṣamasr̥kkṣayāt||7||

ūrumūlē- urvyāstūrdhvaṁ vaṅkṣaṇasandhēradhastāllōhitākṣaṁ nāma marma| tadviddhaṁ pakṣaṁ hatyasr̥kkṣayāt vyadhē satyapi|

Adhikarana viTapasya sthAnaM karma ca (8) · Śloka 8

muṣkavaṅkṣaṇayōrmadhyē viṭapaṁ ṣaṇḍhatākaram| |8|

muṣkavaṅkṣaṇayōrmadhyē viṭapaṁ nāma marma| tadviddhaṁ puṁsaḥ ṣaṇḍhatākaraṁ-nirapatyatākaram|

Adhikarana iti sakthnoH pratyekamekAdaSa marmANi ,tathA bAhvoH pratyekamekAdaSa ,atra maNibandha kUrparakakShAdhRu~gmarmaNAM sthAnaM karma , (8-9) · Śloka 9

| iti sakthnōstathā bāhṇōrmaṇibandhō'tra gulphavat||8|| kūrparaṁ jānuvatkauṇyaṁ tayōrviṭapavatpunaḥ| kakṣākṣamadhyē kakṣādhr̥k kuṇitvaṁ tatra jāyatē||9||

iti-ēvamanēna prakārēṇa, sakthnōrdvayōḥ pratyēkamēkādaśa marmāṇi bhavanti| tathā bāhvōḥ-tēnaiva prakārēṇa bāhvōḥ, talahr̥dādīnyēkādaśa marmāṇi bhavanti| atha kiñcinmātramatra viśēṣamāhamaṇītyādi| atra-bāhumarmasu, gulphēna tulyō maṇibandhaḥ, saṁjñāmātrabhēdaḥ, jānutulyaṁ kūrparam| tayōḥ-maṇibandhakūrparākhyayōrbāhumarmaṇōḥ, viddhayōḥ kauṇyaṁ-pāṇipāṇyaṅgulīkubjatvam| viṭapētyādi| kakṣā cākṣaśca kakṣākṣau, tayōrmadhyē viṭapēna tulyaṁ kakṣādhr̥ksaṁjñaṁ marma| tatra viddhē sati kuṇitvaṁ-bāhupāṇyaṅgulikubjatā, jāyatē|

Adhikarana gudamarmaNaH sthAnaM karma ca (10) · Śloka 10

iti śākhāsu marmāṇi catuścatvāriṁśaduktvā, antarādhau kathayati sthūlāntrabaddhaḥ sadyōghnō viḍvātavamanō gudaḥ| |10|

sthūlāntrasūkṣmāntrabhēdāt dvidhā'ntram| tatra sthūlāntrabaddhō gudō nāma marmaviśēṣaḥ| sa ca viḍvātau-vātavarcasī, vamatiudgirati, iti viḍvātavamanaḥ| bāhulakātkartari lyuṭ| sa gudaḥ sadyaḥ-tatkṣaṇādēva, hanti| sadyōghna iti "amanuṣyakartr̥kē ca" iti ṭhak| gudaśabdasyātra puṁstvaṁ cintyam, na cārdharcādiṣvayamasti|

Adhikarana bastimarmaNaH sthAnaM karma ca (10-12) · Śloka 12

adhunā bastyākhyamāha | mūtrāśayō dhanurvakrō bastiralpāsramāṁsagaḥ||10|| ēkādhōvadanō madhyē kaṭyāḥ sadyō nihantyasūn| r̥tē'śmarīvraṇādviddhastatrāpyubhayataśca saḥ||11|| mūtrasnāvyēkatō bhinnē vraṇō rōhēcca yatnataḥ| |12|

mūtrasyāśaya ādhārō mūtrāśayō-yatra mūtraṁ tiṣṭhati, sa dhanurvakraḥ-cāpavat kuṭilaḥ| anēnāsya saṁsthānamuktam| sa ca bastināma marmaviśēṣaḥ| asraṁ ca māṁsaṁ cāsramāṁsē, alpē asramāṁsē gacchati| "anyēbhyō'pi dr̥śyatē" iti ḍaḥ| tatrāsthō na bahuraktamāṁsapradēśa ityarthaḥ| tathā, ēkamadhōvadanaṁ yasyāsāvēkādhōvadanaḥ| kaṭyā madhya iti sthānanirdēśaḥ| kaṭyā madhyapradēśē'sāvavatiṣṭhatē| sa viddhaḥ sadyaḥ-tatkṣaṇādēva, asūn-prāṇān, nihanti| r̥tē'śmarīvraṇāt-aśmaryāharaṇārthaṁ yō vraṇaḥ kriyatē taṁ vraṇaṁ varjayitvā| tatrāpi-aśmarīvraṇē, ubhayataḥ-ubhayapārśvataśca, sa viddhastadā'sau sadyō'sūnnihanti| tasmin bastāvēka [taḥ-ēka]pārśvatō, bhinnē-viddhē sati, mūtrasrāvī vraṇaḥ syāt| sa ca yatnataḥ-ādarēṇōpakrāntō, rōhati nānyathā|

Adhikarana nABimarmaNaH sthAnaM karma ca (12-13) · Śloka 13

| dēhāmapakvasthānānāṁ madhyē sarvasirāśrayaḥ||12|| nābhiḥ sō'pi hi sadyōghnō| |13|

āmaṁ ca pakvaṁ cāmapakvē, sthānaṁ ca sthānaṁ ca sthānē, āmapakvayōḥ sthānē āmapakvasthānē, dēhaścāmapakvasthānē ca dēhāmapakvasthānāni, tēṣāṁ madhyē| tatraikatvāddēhasya dēhamadhyapradēśē, tathōbhayōrāmapakvāśayayōrmadhyē-antarālē, nābhirnāma marma| sa sarvāsāṁ sirāṇāṁ-sakalaśarīragānāṁ āśrayaḥ-ādhāraḥ| sō'pi hi sadyōghnaḥ| apiḥ samuccayē| hiryasmādarthē| na kēvalaṁ gudabastī sadyōghnau yāvannābhirapi viddhaḥ sadyōghnaḥ| nābhiśabdasya puṁstavaṁ cintyam|

Adhikarana hRudayamarmaNaH sthAnaM karma ca (13) · Śloka 13

dvāramāmāśyasya ca| satvādidhāma hr̥dayam stanōraḥ kōṣṭhamadhyagam||13||

hr̥dayaṁ nāma yanmarma tadapi sadyōghnam| taccāmāśayasya dvāraṁmukham| tēna hi dvārēṇānnapānamāmāśayē praviśati| tacca satvādīnāṁ-satvarajastamasāṁ, tathā vijñānasya-indriyāṇāṁ cārthapañcakasya, tathā''tmanaḥ-cētasaḥ, dhāma-sthānam| tacca stanōraḥ kōṣṭhamadhyagam| stanau cōraśca kōṣṭhaśca stanōraḥkōṣṭhaṁ, tasya madhyaṁ tatra gacchati-sthitiṁ badhnāti, kōṣṭhavakṣasōḥ stanayōśca madhyē sthitamityarthaḥ|

Adhikarana stanarohitasya sthAnaM karma ca,stanamUlasya sthAnaM karma ca (14) · Śloka 14

stanarōhitamūlākhyē dvyaṅgulē stanayōrvadēt| ūrdhvādhō'srakaphāpūrṇakōṣṭhō naśyēttayōḥkramāt||14||

stanarōhitaṁ ca mūlaṁ ca prakr̥tatvātstanasyaiva, tē| stanarōhitastanamūlē ākhyē-saṁjñē, yayōstē stanarōhitamūlākhyē dvē marmaṇī vadēt| kva pradēśē ? stanayōḥ| kramāditi vakṣyamāṇamihāpi sambadhyatē| tēna stanayōrūrdhvaṁ dvyaṅgulē stanarōhitē| stanayōradhō dvyaṅgulē stanamūlē| tayōḥ-stanarōhitastanamūlākhyayōrmarmaṇōrviddhayōḥ, puruśō'srakaphāpūrṇakōṣṭhaḥ kramāt-yathākramaṁ, naśyēt| tēna stanarōhitē viddhē satyasr̥jā pūrṇakōṣṭhē narō naśyēt, stanamūlē viddhē kaphēna pūrṇakōṣṭhō naśyēt|

Adhikarana apastamBamarmaNoH sthAnaM karma ca (15) · Śloka 15

apastambhāvuraḥpārśvē nāḍyāvanilavāhinī| raktēna pūrṇakōṣṭhō'tra śvāsātkāsācca naśyati||15||

urasaḥ pārśvē dvē nāḍyāvapastambhākhyē marmaṇī| anilavāhinī-vātavahē| atra marmadvayē viddhē raktēna pūrṇakōṣṭhaḥ śvāsakāsābhyāṁ vipadyatē|

Adhikarana apalApamarmaNoH sthAnaM karma ca (16-17) · Śloka 17

pr̥ṣṭhavaṁśōrasōrmadhyē tayōrēva ca pārśvayōḥ| adhōṁ'sakūṭayōrvidyādapālāpākhyamarmaṇī||16|| tayōḥ kōṣṭhē'sr̥jā pūrṇē naśyēdyātēna pūyatām| |17|

pr̥ṣṭhavaṁśasya tathōrasaḥ, anayōrmadhyē-antarālē, tayōrēva capr̥ṣṭōrasōḥ, yē pārśvē, tayōruparibhāgayōraṁsakūṭayōradhaḥ, apālāpākhyē dvē marmaṇī vidyāt| tayōrviddhayō raktēna kōṣṭhē pūrṇē, pūyatāṁ yātēna-gatēna, lōhitēna naśyēt| yāvadraktaṁ pūyatāṁ na yātaṁ tāvajjīvati| na tu raktakōṣṭhapūraṇamātrādēva mriyata iti bhāvaḥ|

Adhikarana kaTIkataruNayoHsthAnaM karma ca (17-18) · Śloka 18

idānīṁ pr̥ṣṭhē vakti | pārśvayōḥ pr̥ṣṭhavaṁśasya śrōṇīkarṇau prati sthitē||17|| vaṁśāśritē sphijōrūrdhvaṁ kaṭīkataruṇō smr̥tē| tatra raktakṣayātpāṇḍurhīnarūpō vinaśyati||18||

pr̥ṣṭhavaṁśasya pārśvayōḥ-ubhayataḥ, pratiśrōṇīkarṇau sthitē| vaṁśāśritē-vaṁśaprativaddhē, sphijōrūrdhvaṁ-upariṣṭāt, dvē'sthinī kaṭīkataruṇē-ētatsaṁjñē dvē marmaṇī, smr̥tē-uktē| tatra-tasminmarmadvayē viddhē, raktakṣyātpāṇḍurhīnarūpō-vigatakāntiḥ san, narō vinaśyati|

Adhikarana kukundarayoH sthAnaM karma ca (19-20) · Śloka 20

pr̥ṣṭhavaṁśaṁ hyubhayatō yau sandhī kaṭīpārśvayōḥ| jaghanasya bahirbhāgē marmaṇī tau kukundarau||19|| cēṣṭāhāniraghaḥkāyē sparśājñānaṁ ca tadvyadhāt| |20|

pr̥ṣṭhavaṁśasyōbhayōḥ kaṭipārśvayōryau sandhī jaghanasya bahirbhāgēnāntaḥ, tau kukundarau nimrākārau sandhimamarṇī| tadvyadhāt-tayōrvyadhāt, adhaḥśarīrē cēṣṭāhāniḥ-gamanākuñcanaprasāraṇādāvadhaḥkāyō'śaktaḥ sampadyata ityarthaḥ| tathā, sparśājñānaṁ-sparśāsaṁvittirbhavati| pr̥ṣṭhavaṁśamubhayata iti "ubhasarvatasōḥ" ityādinādvitīyā|

Adhikarana nitambamarmaNoH sthAnaM karma ca (20-21) · Śloka 21

| pārśvāntaranibaddhau yāvupari śrōṇikarṇayōḥ||20|| āśayaccādanau tau tu nitambau taruṇāsthigau| adhaḥśarīrē śōphō'tra daurbalyaṁ maraṇaṁ tataḥ||21||

pārśvāntarē-pārśvamadhyē, nibaddhau-prativaddhau lagnau, pārśvāntaranibaddhau yau, tathā śrōṇikarṇayōrupari-upariṣṭāt, mūtrādīnāṁ ya āśayāḥ-adhārā bastyādayaḥ, tēṣāṁ chādanau, nitambau-nitambasaṁjñau marmaviśēṣau| tau ca taruṇāsthigau-taruṇasaṁjñē'sthni sthitāvityarthaḥ| atra-asminmarmadvayē viddhē sati, adhaḥkāyē śōphō bhavati| tathā, daurbalyaṁ prakr̥tatvādadhaḥśarīra ēva| daurbalyaṁ-alpabalatvaṁ svavyāpārākṣamatvam| tatō-daurbalyādanantaraṁ, maraṇaṁ bhavati|

Adhikarana pArSvasandhimarmaNoH sthAnaM karma ca (22-23) · Śloka 23

pārśvāntaranibaddhau ca madhyē jaghanapārśvayōḥ| tiryagūrdhvaṁ ca nirdiṣṭau pārśvasandhī tayōryadhāt||22|| raktapūritakōṣṭhasya śarīrāntarasambhavaḥ| |23|

pārśvayōrantaraṁ-madhyaṁ, tatra nibaddhau-saṁśliṣṭau, sandhī marmaviśēṣau pārśvasandhī iti nirdiṣṭau| tataścaikasmin pārśvāntara ēkaḥ sandhirdvitīyasmin pārśvāntarē dvitīyaḥ sandhiḥ| kva sthitau katham ? jaghanasya pārśvē jaghanapārśvē, tayōrmadhyē tiryagūrdhvaṁ ca| ēvamēkasmin jaghanapārśvamadhya ēkaḥ sandhirdvitīyasmin dvitīyaḥ sthita iti| tayōrvyadhāt puṁsō raktapūritakōṣṭhasya śarīrāntarasambhavaḥ-aparaśarīrōtpattiḥ, maraṇamityarthaḥ|

Adhikarana bRuhatImarmaNoH sthAnaM karma ca (23-24) · Śloka 24

| stanamūlārjavē bhāgē pr̥ṣṭhavaṁśāśrayē sirē||23|| br̥hatyau, tatra viddhasya maraṇaṁ raktasaṅkṣayāt| |24|

stanayōrmūlaṁ-stanamūlaṁ tasyārjavē bhāgē-spaṣṭa uddēśē, pr̥ṣṭhavaṁśāśrayē sirē-pr̥ṣṭhavaṁśasyōbhayapārśvapratibaddhē sirē, br̥hatyau-ētatsaṁjñē marmaṇī| tatra-marmadvayē, viddhasya maraṇaṁ bhavati raktasaṅkṣayāt, nānyathā|

Adhikarana aMsaPalakamarmaNoH sthAnaM karma ca (24-25) · Śloka 25

| bāhumūlābhisambaddhē pr̥ṣṭhavaṁśasya pārśvayōḥ||24|| aṁsayōḥ phalakē bāhusvāpaśauṣau tayōrvyadhāt| |25|

bāhvōrmūlē bāhumūlē,-yatra bāhū pratiṣṭhitau| mūlē hi pratiṣṭhā, vr̥kṣamūlavat| pr̥ṣṭhavaṁśasya pārśvadvayē bāhumūlayōrābhimukhyēna sambaddhē-saṁśliṣṭē| kē tē ? aṁsayōḥ phalakē| asamāsanirdēśaścandōnurōdhāt| phalakasya ca napuṁsakatvaṁ lōkāśrayatvālliṅgasyēti| aṁsaphalakākhyē dvē marmaṇī| tayōrvyadhāt bāhusvāpaśōṣau bhavataḥ| svāpa iva svāpaḥ, yathā suptasya niścētanamaṅgaṁ bhavati tathā bāhū aṁsaphalakē viddhē bhavataḥ|

Adhikarana aMsamarmaNoH sthAnaM karma ca (25-26) · Śloka 26

| grīvāmubhayataḥ snāvnī grīvābāhuśirōntarē||25|| skandhāṁsapīṭhasambandhāvaṁsau bāhukriyāharau| |26|

grīvāyā ubhayōḥ pārśvayōḥ snāvnī dvē aṁsāvucyētē| kva sthitau ? grīvābāhuśirōntarē| grīvāyāstathā bāhnōḥ śirasaśca madhyē tēṣāmantarālē sthitau| kiṁ prayōjanau? skandhētyādi| aṁsayōḥ pīṭha iva pīṭhē,-pratiṣṭhānē, yatrāṁsau tiṣṭhataḥ| skandhē cāṁsapīṭhē ca, tēṣāṁ sambandhaḥ-prayōjanaṁ, yayōstāvēvāṁsau viddhau bāhvōḥ kriyā-ākuccanaprasāraṇādikā, tāṁ harataḥ, tau bāhukriyāharau|

Adhikarana nIlAmarmaNoH sthAnaM karma ca,manyAmarmaNoH sthAnaM karma ca (26-27) · Śloka 27

| kaṇṭhanāḍīmubhayataḥ sirā hanusamāśritāḥ||26|| catasrastāsu nīlē dvē manyē dvē marmaṇī smr̥tē| svarapraṇāśavakr̥tyaṁ rasājñānaṁ ca tadvyadhē||27||

kaṇṭhanāḍyāḥ pārśvayōrdvayōḥ sirā yāścatasrō hanvōḥ samāśritāḥ, tāsu madhyē dvē sirē nīlē nāma dvē marmaṇī, manyē nāma dvē marmaṇi smr̥tē, tantrakr̥dbhiriti śēṣaḥ| tāsāṁ vyadhastadvayadhaḥ, tasmin tadvyadhē svarapraṇāśādayō jāyantē| svarasya praṇāśaḥ svaraprāṇāśaḥ,-svarahāniḥ| athavā vaikr̥tyam, tacca prakr̥ttvātsvarasyaiva, svarabhāvānyathātvamityarthaḥ| rasājñānaṁ-rasānavabōdhaḥ|

Adhikarana mAtRukAmarmaNAM sthAnaM karma ca (28) · Śloka 28

kaṇṭhanāḍīmubhayatō jihvānāsāgatāḥ sirāḥ| pr̥thak catasrastāḥ sadyō ghnantyasūnmātr̥kāhvayāḥ||28||

kaṇṭhanāḍyā ubhayapārśvayōḥ sirā jihvāgatāstathā nāsāgatāḥ pr̥thak-pratyēkaṁ, ēkasmin pārśvē catasraḥ dvitīyē pārśvē catasraḥ| tā mātr̥kāhvayāḥ-mātr̥kāsaṁjñāḥ, viddhāḥ sadyō'sūn ghnanti| ētāni mātr̥kākhyāni sirāmarmāṇi|

Adhikarana kRukATikAmarmaNoH sthAnaM karma ca (29) · Śloka 29

kr̥kāṭikē śirōgrīvāsandhau, tatra calaṁ śiraḥ| |29|

śiraśca grīvā ca, tayōḥ sandhānē yau sandhī pārśvadvayē kr̥kāṭikākhyē tē dvē marmaṇī| tatra-tasminmarmadvayē viddhē, calaṁ-sakampaṁ, śirō bhavati|

Adhikarana vidhuramarmaNoH sthAnaM karma ca (29) · Śloka 29

| adhastātkarṇayōrnimnē vidhurē śrutihāriṇī||29||

adhastātkarṇayōḥ-karṇapr̥ṣṭhayōradhō, nimnē-nōnnatē, vidhurākhyē dvē marmaṇī| tē ca viddhē satī śrutiṁ-śabdaśravaṇaṁ, harataḥ, śrutihāriṇī|

Adhikarana PaNamarmaNoH sthAnaM karma ca (30) · Śloka 30

phaṇāvubhayatō ghrāṇamārgaṁ śrōtrapathānugau| antargalasthitau vēdhādgandhavijñānahāriṇau||30||

phaṇau nāma marmaviśēṣau ghrāṇamārgasyōbhayōḥ pāRśvayōḥ śrōtrapathānugau-śrōtramārgaprāptau| antargalasthitau-galābhyantarē sthitau| phaṇāviva saṁsthānaṁ rūpamanayōḥ phaṇāviti nāma| tau vēdhādgandha vijñānaṁ-gandhōpalabdhiḥ, taddharatastau gandhavijñānahāriṇau|

Adhikarana apA~ggamarmaNoH sthAnaM karma ca (31) · Śloka 31

nētrayōrbāhyatō'pāṅgau bhruvōḥ pucchāntayōradhaḥ| tathōpari bhruvōrnimnāvāvartāvāndhyamēṣu tu||31||

nētrēyōrdvayōrbāhyataḥ-bahirbhāgē, bhruvōḥ pucchāntayōḥ-avasānayōḥ, adhaḥ, apāṅgau nāma marmaviśēṣau prasiddhāvēva| tathōparīti tēnaivāpāṅgōddiṣṭēna nyāyēna bhruvōḥ pucchāntayōrupari nimrāvāvartasaṁjñau| ēṣu tu-apāṅgāvartākhyēṣu caturṣu, viddhasya narasyāndhyaṁ bhavati|

Adhikarana Sa~gKamarmaNoH sthAnaM karma ca (32) · Śloka 32

anukarṇaṁ lalāṭāntē śaṅkhau sadyōvināśanau| |32|

atrāpi bhruvōḥ pucchāntayōrupati lalāṭāvasānē'nukarṇaṁkarṇasamīpē, śaṅkhau marmaviśēṣau| tau viddhau puruṣasya sadyōvināśanau bhavataḥ|

Adhikarana utkShepamarmaNoH sthAnaM karma ca ,sthapanImarmaNaH sthAnaM karma ca (32-33) · Śloka 33

| kēśāntē śaṅkhayōrūrdhvamutkṣēpau, sthapanī punaḥ||32|| bhruvōrmadhyē, trayē'pyatra śalyē jīvēdanuddhr̥tē| svayaṁ vā patitē pākātsadyō naśyati tūddhr̥tē||33||

kēśāvasānē śaṅkhayōrūrdhvaṁ-upari, utkṣēpau marmaṇī| sthapanī punarmarma bhruvōrmadhyē| trayē'pyatra-asmin marmatrayē dvāvutkṣēpāvēkā sthapanī ēvaṁbhūtē, viddhē puruṣō'nuddhr̥tē śalyē jīvēt| kālāntarēṇa pākāt-pākēna hētunā, svayaṁ vā patitē śalyē sati,-na tūddharaṇahētunā, jīvēt puruṣaḥ| sadya ityādi| uddhr̥tē tu śalyē sadya ēva narō naśyati, vāyukōpāditi bhāvaḥ|

Adhikarana SRu~ggATakamarmaNAM sthAnaM karma ca (34-35) · Śloka 35

jihvākṣināsikāśrōtrakhacatuṣṭayasaṅgamē| tālunyāsyāni catvāri srōtasāṁ, tēṣu marmasu||34|| viddhaḥ śr̥̄ṅgāṭakākhyēṣu sadyastyajati jīvitam| |35|

jihvā cākṣiṇī ca nāsikā ca śrōtrē ca tadēvam| tasya khāni, tēṣāṁ catuṣṭayaṁ-catvāri srōtāṁsi, tēṣāṁ saṅgamaḥ-sannipātaḥ, tasmiṁstāluni-yatra jihvādīnāṁ tarpaṇāni srōtāṁsi sannipatyāvatiṣṭhantē, jihvādisrōtasāṁ catvāryāsyāni śr̥ṅgāṭakākhyāni| tēṣu marmasu viddhaḥ puruṣaḥ sadyastyajati jīvitaṁ-viddhamātra ēva prāṇairviyujyatē|

Adhikarana sImantamarmaNAM sthAnaM karma ca (35-36) · Śloka 36

| kapālē sandhayaḥ pañca sīmantāstiryagūrdhvagāḥ||35|| bhramōnmādamanōnāśaistēṣu viddhēṣu naśyati| |36|

śiraḥ sambandhinaḥ pañca sandhayaḥ| pañcānāṁ kapālakhaṇḍānāṁ saṁślēṣā yē śirasyavatiṣṭhantē tiryagūrdhvagāḥ, ta ēva sīmantākhyā marmaviśēṣāḥ| tēṣu-sīmantākhyēṣu, viddhēṣu bhramēṇa tathōnmādēna tathā manōnāśēna-cittavismr̥tyā ca, naśyati|

Adhikarana AdhipamarmaNAM sthAnaM karma ca (36-37) · Śloka 37

| āntarō mastakasyōrdhvaṁ sirāsandhisamāgamaḥ||36|| rōmāvartō'dhipō nāma marma sadyō haratyasūn| |37|

mastakasyābhyantaratō yaḥ sthitaḥ, tathōrdhvaṁ-prakr̥tatvānmastakasyaivōpari, sirāsandhisamāgamaḥ-sirāsandhīnāṁ sannipātō, rōmāvartalakṣaṇaḥ sō'dhipō nāma marmaviśēṣaḥ| marmaṇāmadhipō yathārthanāmā, tadāyattāni hi sarvāṇi marmāṇītyarthaḥ| sō'dhipō viddhō narasya sadyō'sūn harati-puruṣaṁ mārayatītyarthaḥ|

Adhikarana sAmAnyaM marmalakShaNam (37) · Śloka 37

iti saptōttarasya marmaśatasya lakṣaṇānyuktvā, sāmānyēna yanmarmalakṣaṇaṁ tadākhyātumāha | viṣamaṁ spandanaṁ yatra pīḍitē ruk ca marma tat||37||

yatra-yasmin dēhadēśē, viṣamaṁ spandanaṁ-sphuraṇaṁ, tanmarma| yatra ca dēhadēśē pīḍitē sati ruk ca viṣamā bhavati, tacca marma| atrāpi viṣamamiti sambadhyatē| viṣamaṁ ca viṣamā ca viṣamam, "napuṁsakamanapuṁsakēnaikavacca" iti napuṁsakaśēṣaḥ| tadēvaṁ marmalakṣaṇaṁ dvidhā mantavyam,-kasyacinmarmaṇaḥ sirādhamanyādikasya viṣamaṁ spandanaṁ prāyō lakṣaṇam, māṁsāsthijātīyasya marmaṇaḥ pīḍanāt prāyaḥ pīḍōtpattirlakṣaṇamiti| saṅgrahē ca marmaviddhasya lakṣaṇamuktam| yathā (śā. a. 7)- "dēhaprasuptirgurutā sammōhaḥ śītakāmitā| svēdō mūrcchā vamiḥ śvāsō marmaviddhasya lakṣaṇam||" iti| maraṇakāritvānmarma, maraṇāsadr̥śaduḥkhadāyitvādvā| idānīṁ marmaṇāṁ suprabhēdaṁ lakṣaṇaṁ ṣaṭprakāramāha-

Adhikarana mAMsadInAM ShaNNAM samAgamo marma (38) · Śloka 38

māṁsāsthisnāyudhamanīsirāsandhisamāgamaḥ| syānmarmēti ca tēnātra sutarāṁ jīvitaṁ sthitam||38||

māṁsādīnāṁ sandhyantānāṁ svajātyapēkṣō yaḥ samāgamaḥ-sannipātaḥ, sa marmākhyaḥ, tanmarmēti tasyaiva nāma| tadēvaṁ māṁsapēśīsamāgamō māṁsamarma, asthnāṁ samāgamō'sthimarma, snāyūnāṁ samāgamaḥ snāyumarma, dhamanīnāṁ samāgamō dhamanīmarma, sirāṇāṁ samāgamaḥ sirāmarma, sandhīnāṁ samāgamaḥ sandhimarmēti| yatō māṁsādīnāṁ yaḥ samāgamaḥ sa ēva marmētyucyatē, tēna hētunā, atra sutarāṁ jīvitaṁ sthitaṁ-prāṇā vyavasthitāḥ| nanu, yadi māṁsādīnāṁ samāgamō marmētyabhidhīyatē, tadānīmanēkasaṅkhyākāni marmāṇi śarīrē sambhavyēran| māṁsapēśyādibhāvānāmanēkasaṅkhyāśrayatvāt| tathā ca,-māṁsapēśīśatāni pañca puṁsāmuktāni strīṇāṁ tu viśatyadhikāni (hr̥. śā. a. 3/17)| ēvamasthyādīnyapyanēkānyuktāni| tataśca marmaṇāmasaṅkhyēyatvaṁ prāpnōti| ēvaṁ ca "saptōttaraṁ marmaśatam" (ślō 1) iti virudhyata ityāha-

Adhikarana evaM marmakalpanA ShoDhA,ekaiva vA marmakalpanA (39) · Śloka 39

bāhulyēna tu nirdēśaḥ ṣōḍhaivaṁ marmakalpanā| prāṇāyatanasāmānyadaikyaṁ vā marmaṇāṁ matam||39||

saptōttaramēva marmaṇāṁ śatamityēva na| kiṁ tarhi ? pūrvōktēna nyāyēna bahūni marmāṇi| "saptōttaraṁ marmaśatam" ityayaṁ tu yō nirdēśaḥ sa bāhulyēna-bhūyasā, yēṣāṁ marmaṇāṁ marmatvēna prasiddhistadviṣaya ēva| ēvaṁ-anēna prakārēṇa māṁsāsthyādīnāṁ samāgamō marmēti, marmaṇāṁ-ṣōḍhā-ṣaḍvidhā, kalpanā bhavati| kalpanāśabdēnaitatprati pādayati,-tadēvaṁ manuṣyasya prasiddhitō jīvitadhāmatvēna marmaṇāṁ kalpanā-nirūpaṇā| prāṇētyādi| athavā na marmaṇāṁ ṣōḍhā kalpanā| kiṁ tarhi ? prāṇāyatanasāmānyāt-jīvitasyādhiṣṭhānamityēvaṁlakṣaṇāt, aikyaṁ-ēkatvaṁ, marmaṇāṁ mataṁ-na ṣaṭtvam| ēvamēkaiva marmakalpanā| ēvaṁ saṅkṣēpavistarakauśalaṁ marmasu darśitam| māṁsādīnāṁ sandhyantānāṁ yathāsvaṁ pratiniyatani marmāṇi saṅkhyayā'bhidhātumāha-

Adhikarana mAMsAdInAM marmaNAM saMKyayA~aBidhAnam ,mAMsajAni daSamarmANi asthnyaShTau (40) · Śloka 40

māṁsādīnāṁ sandhyantānāṁ yathāsvaṁ pratiniyatani marmāṇi saṅkhyayā'bhidhātumāha māṁsajāni daśēndrākhyatalahr̥tstanarōhitāḥ| |40|

jaṅghayōrindrākhyē dvē marmaṇī, bāhvōrdvē ēva, talahr̥dākhyāni catvāri-pādayōrdvē hastayōrdvē iti, stanarōhitē dvē-pratyēkaṁ stanē ēkaikam, ēvaṁ daśa maṁsajāni|

Adhikarana mAMsajAni daSamarmANi asthnyaShTau (40-41) · Śloka 41

| śaṅkhau kaṭīkataruṇē nitambāvaṁsayōḥ phalē||40|| asthnyaṣṭau| |41|

asthnyaṣṭau marmāṇi| śaṅkhau dvē marmaṇī, kaṭīkataruṇē dvē, nitambau dvē, aṁsayōḥ phalakē dvē, ityēvamaṣṭau marmāṇi|

Adhikarana snAvamarmANi trayoviMSatiH (41) · Śloka 41

snāvamarmāṇi trayōviṁśatirāṇayaḥ| kūrcakūrcaśirō'pāṅgakṣiprōtkṣēpāṁsabastayaḥ||41||

snāvamarmāṇi trayōviṁśatiḥ| katham ? āṇayaścatvāri-pratyēkamūrumadhyē ēkaikaṁ bāhvōḥ pratyēkamēkaikam, ēvaṁ catvāryāṇayaḥ kūrcākhyāni catvāri-hastaryōdvē pādayōrdvē| kūrcaśiraḥsaṁjñāni catvāri-pādayōrdvē hastayōrdvē iti catvāri| apāṅgākhyē dvē-"nētrayōrbāhyataḥ (ślō.31) ityādinā nirdiṣṭē dvē| kṣiprākhyāni catvāri-"aṅguṣṭhāṅgulimadhyasthaṁ kṣipraṁ" (ślō.3) iti, tacca pādadvayē dvividhaṁ hastadvayē ca| utkṣōpaudvau-"kēśāntē śaṅkhayōrūrdhvamutkṣēpau" (ślō.32) iti| aṁsākhyē dvē-"skandhāṁsapīṭhasambandhāvaṁsau" (ślō 26) iti| bastirēkō-"mūtrāśayō" (ślō.10) ityādinōktaḥ| ēvaṁ snāvamarmāṇi trayōviṁśatiḥ|

Adhikarana dhamanyASritAni nava (42) · Śloka 42

gudāpastambhavidhuraśr̥ṅgāṭāni navādiśēt| marmāṇi dhamanīsthāni|42|

gudaḥ-sthūlāntrabaddha ēkaḥ| apastambhākhyē dvē-"apastambhāvuraḥpārśvē nāḍyāvanilavāhinī|" (ślō.15)iti, vidhurākhyē dvē-"adhastātkarṇayōrnimnē vidhurē" (ślō.29) iti| śr̥ṅgāṭakākhyāni catvāri-"jihvākṣināsikā" (ślō.34) ityādinōktāni| ēvaṁ dhamanīsthāni-dhamanyāśritāni, nava marmāṇi|

Adhikarana sirASritAni saptatriMSat (42-44) · Śloka 44

| saptatriṁśatsirāśrayāḥ||42|| br̥hatyau mātr̥kā nīlē manyē kakṣādharau phaṇau| viṭapē hr̥dayaṁ nābhiḥ pārśvasandhī stanādharē||43|| apālāpau sthapanyurvyaścatasrō lōhitāni ca| |44|

sirāśrayā marmaviśēṣāḥ saptatriṁśat| katham ? ityāha-br̥hatyāvityādi| br̥hatyau dvē-"stanamūlārjavē bhāgē" (ślō 23) ityādinōktē| mātr̥kākhyāni-"kaṇṭhanāḍīmubhayatō jihvānāsāgatāḥ" (ślō.28) ityādinōktānyaṣṭau| nīlākhyē dvē sirē manyākhyē [ca] dvē-"kaṇṭhanāḍīmubhayataḥ sirāhanusamāśritāḥ| catasraḥ (ślō.26) ityādinōktāni| kakṣādharau dvau-yathōktam (ślō.9) "kakṣākṣamadhyē kakṣādhr̥k" ityādi| phaṇau dvau-"phaṇāvubhayatō" (ślō.30) ityādinā kr̥talakṣaṇau| viṭapē dvē-"muṣkavaṅkṣaṇayōrmadhyē (ślō.8) pratyēkaṁ sakthnyēkam, dvitīyē'pyēvam| hr̥dayamēkamēva, tasya lakṣaṇam (ślō.13)-"dvāramāmāśayasya ca" ityādi| nābhirēka ēva, tallakṣaṇam (ślō.12)- "dēhāmapakvasthānānāṁ" ityādi| pārśvasandhī dbau-"pārśvāntaranibaddhau ca" (ślō.22) ityādinōktau| stanādharē-stanayōradhō, dvē| apālāpau dvāvēva-"pr̥ṣṭhavaṁśōrasōḥ (ślō.16) ityādinōktau| sthapanī ēkaiva, tallakṣaṇam, (ślō.33)-"bhruvōrmadhyē" iti| urvyaścatasraḥ-ūrvōrdvayōrdvē bāhvōśca, "urvyūrumadhyē" (ślō.7) iti tasyā lakṣaṇam, iti sakthnōstathā bāhvōḥ (ślō.8) iti cātidēśaḥ| lōhitānīti lōhitākṣanāmāni catvāri, "ūrumūlē lōhitākṣaṁ" sakthivadbāhvōḥ" (ślō.7-8) iti tallakṣaṇam| samprati sandhimarmāṇyāha-

Adhikarana sandhimarmANi viMSati (44-45) · Śloka 45

| sandhau viṁśatirāvartau maṇibandhau kukundarau||44|| sīmantāḥ kūrparau gulphau kr̥kāṭyau jānunī patiḥ| |45|

sandhau viṁśatirmarmāṇi| āvartākhyē dvē, tayōrlakṣaṇam (ślō. 31)-"tathōpari bhruvōrnimnāvāvartau" iti| maṇibandhau dvau, tallakṣaṇam (ślō.8)-maṇibandhō'tra gulphavat" iti| kukundarau dvau, tallakṣaṇam (ślō.19)-"jaghanasya bahirbhāgē marmaṇī tau kukundarau|" iti| sīmantākhyāni pañca, tallakṣaṇam (ślō.35)-"kapālasandhayaḥ pañca sīmantāḥ" iti| kūrparau dvau, tallakṣaṇam (ślō.9)-"kūrparaṁ jānuvat" iti| kūrparaśabda ubhayaliṅgaḥ| gulphau dvē marmaṇī, tayōrlakṣaṇam (ślō.5)-"jaṅghācaraṇayōḥ sandhau gulphaḥ" iti| kr̥kāṭyau dvē, tallakṣaṇam (ślō.29)-"kr̥kāṭikē śirōgrīvāsandhī" iti| jānunī dvē, tayōrlakṣaṇam (ślō.6)-"jaṅghōrvōḥ saṅgamē jānu" iti| patiḥ-adhipatirmarmaṇām, taccaikam, tallakṣaṇam (ślō.36)-"āntarō mastakasyōrdhvaṁ" ityādinōktam| ēvaṁ saptōttaraṁ marmaśataṁ māṁsādiparikalpanayā kalpitam|

Adhikarana gudakakShAdharAdau anyeShAM matam (45-46) · Śloka 46

| māṁsamarma gudō'nyēṣāṁ,snāvni kakṣādharau tathā||45|| viṭapau vidhurākhyē ca, śr̥ṅgāṭāni sirāsu tu| apastambhāvapāṅgau ca, dhamanīsthaṁ na taiḥ smr̥tam||46||

anyēṣāmācāryāṇaṁ matēna gudō māṁsamarma-na dhamanīmarma| snāvnītyādi| tēṣāmēva matēna kakṣādharau snāvāśritau na tu sirāśrayau| viṭapau vidhurākhyē ca snāvāśritau| pūrvamatēna tu viṭapau sirāśritau, vidhurē ca dhamanyāśritē| śr̥ṅgāṭakāni catvāryapi sirāsvēva, turavadhāraṇē, na tu dhamanīsthāni, apastambhau tathāpāṅgau ca| ētaddhamanīsthamanyairācaryairna smr̥tam, api tu snāvā[dyā]śritamabhihitam|

Adhikarana mAMsAdijAnAM marmaNAM vyadhalakShaNam, mAMsaje marmaNi viddhe lakShaNAni (47) · Śloka 47

idānīṁ māṁsādijānāṁ marmaṇāṁ vyadhalakṣaṇamāha viddhē'jasramasr̥ksrāvō māṁsadhāvanavattanuḥ| pāṇḍutvamindriyājñānaṁ maraṇaṁ cāśu māṁsajē||47||

māṁsajē marmaṇi viddhē sati,[ajasraṁ] anavarataṁ, asr̥ksrāvō bhavati māṁsadhāvanavat-māṁsadhāvanōdakēna tulyaḥ| tathā, tanuḥ-acchō bhavati, na bahalaḥ| pāṇḍutvaṁ-pītābhatvaṁ śarīrasya| indriyaiḥ-cakṣurādibhiḥ, svaviṣayājñānaṁ-anavabōdhaḥ| maraṇaṁcāśu-śīghraṁ, bhavati| tadēvamindrabastyādimāṁsajamarmavyadhē nirantarasrāvādisarvaliṅgadarśanānumānēna maraṇamanumīyamānaṁ budhvā vaidyaḥ pratyākhyāya cikitsāṁ prayōjayēt| niyatāyuṣāṁ kvacinmaraṇasya vyabhicārāditi|

Adhikarana asthimarmaNi viddhe lakShaNAni (48) · Śloka 48

majjānvitō'cchō vicchinnaḥ srāvō ruk cāsthimarmaṇī| |48|

asthimarmaṇi-śaṅkhādikē, viddhē majjānvitaḥ srāvaḥ tathā'cchō-na ghanaḥ, vicchnnō-na māṁsamarmavyadha iva nirantarō, bhavati| rukcētyanēnātyantaṁ pīḍā bhavatīti pratipādayati| ruṅmātrasya sarvamarmasvapi sadbhāvāt|

Adhikarana snAvaje marmaNi viddhe lakShaNAni (48-49) · Śloka 49

| āyāmākṣēpakastambhāḥ snāvajē'bhyadhikaṁ rujā||48|| yānasthānāsanāśaktirvaikalyamathavā'ntakaḥ| |49|

snāvajē-kūrcā(āṇyā)dikē marmaṇi, viddhē āyāmādayō bhavanti| ākṣēpakaḥ-ākṣēpaḥ, stambhō-yathāsvamaṅgānām, atirujā ca| tathā, yānasthānāsanāśaktiḥ-yātuṁ sthātumāsituṁ cāsāmarthyam| vaikalyaṁ cāṅgānām| athavā'ntakō-maraṇaṁ, bhavati|

Adhikarana dhamanIsthe viddhe lakShaNAni (49) · Śloka 49

| raktaṁ saśabdaphēnōṣṇaṁ dhamanīsthē vicētasaḥ||49||

dhamanīsthē-[gudā]pastambhādau marmaṇi, viddhē sati vicētasō-mūrcchitasya satō, raktaṁ sravēt| kīdr̥śam ? saśabdaphēnōṣṇam| saśabdasyātra pratyēkaṁ sambandhaḥ|

Adhikarana sirAmarmavyadhe lakShaNAni (50) · Śloka 50

sirāmarmavyadhē sāndramajasraṁ bahvasr̥ksravēt| tatkṣayāttr̥ḍbhramaśvāsamōhahidhmābhirantakaḥ||50||

sirāmarmaṇō-br̥hatyādērvyadhē sati, asr̥k sāndraṁ-ghanaṁ, ajasraṁ-nirantaraṁ, bahu-prabhūtaṁ, sravati| tatkṣyāt-tasyāsr̥jaḥ kṣayāt, tr̥ḍbhramādibhirantakō-jīvitanāśaḥ|

Adhikarana sandhije viddhe lakShaNAni (51) · Śloka 51

vastu śūkairivākīrṇaṁ rūḍhē ca kuṇikhañjatā| balacēṣṭākṣayaḥ śōṣaḥ parvaśōphaśca sandhijē||51||

sandhijēmarmaṇi-āvartādau, viddhē vastu śūkairivākīrṇaṁ bhavati| vastuśabdēnādhiṣṭhānaṁ viddhadēśa ucyatē| tacchūkaiḥ-śāliyavādisambandhibhiḥ kiṁśārubhiḥ, vyāptamiva bhavati| rūḍhē ca sati tasminmarmavyadhē kuṇitā khañjatā vā bhavati| tathā balacēṣṭayōḥ kṣayaḥ, tathā śōṣō'ṅgasya, parvasu śōphaḥ-śvayathuśca, sandhijē bhavati| idānīmēṣāmēva marmaṇāṁ vyadhē jīvitanāśē kālaṁ niyanayati-

Adhikarana sadyaH prANaharANyekonaviMSatirmarmANi (52-53) · Śloka 53

nābhiśaṅkhādhipāpānahr̥cchr̥ṅgāṭakabastayaḥ| āṣṭau ca mātr̥kāḥ sadyō nighnatyēkānnaviṁśatiḥ||52|| saptāhaḥ paramastēṣāṁ kālaḥ kālasya karṣaṇē| |53|

nābhiśaṅkhādīni marmāṇyēkānnaviṁśatiḥ sadyō ghnanti| nābhirēkaḥ, śaṅkhau dvau, adhipa ēkaḥ, apānō'pyēkaḥ, hr̥dēkam, śr̥ṅgāṭakāni catvāri, bastirēkaḥ, āṣṭau mātr̥kāḥ ēkānnaviṁśatirētāni sadyaḥprāṇaharāṇi| tēṣāṁ-marmaṇāṁ, kālasya-mr̥tyōḥ karṣaṇē-ākarṣaṇē, saptāhaḥ paramaḥ kālaḥ-prakr̥ṣṭō'vadhiḥ| ēkānnaviṁśatiriti na viṁśatiriti supsupēti samāsaḥ, tata ēkēna na viṁśatiriti tr̥tīyēti yōgavibhāgātsamāsaḥ, tataḥ "ēkādiścaikasya" ityādinā nañaḥ prakr̥tibhāva ēkasyādugāgamaśca, ūnārthē'tra nañ, ēkōnaviṁśatirityarthaḥ|

Adhikarana kAlAntaraprANaharANi trayastriMSat (53-55) · Śloka 55

| trayastriṁśadapastambhatalahr̥tpārśvasandhayaḥ||53|| kaṭītaruṇasīmantastanamūlēndrabastayaḥ| kṣiprāpālāpabr̥hatīnitambastanarōhitāḥ||54|| kālāntaraprāṇaharā māsamāsārddhajīvitāḥ| |55|

trayastriṁśadapastambhādayaḥ kālāntaraprāṇaharāḥ| māsaṁ māsārddhaṁ vā jīvitaṁ yēṣu viddhēṣviti māsamāsārddhajīvitāḥ, māsēna prāṇān haranti māsārddhēna vētyarthaḥ| saṅgrahē tūktam (śā. a. 7)-"saumyāgrēyatvāttēṣāṁ pakṣābhyantaraṁ kālaḥ|" iti| trayastriṁśaditi "trēstrayaḥ" iti trayasādēśaḥ| tatra, apastambhau dau, talahr̥nti catvāri, pārśvasandhī dbau, kaṭīkataruṇē dvē, sīmāntāḥ pañca, stanamūlē dvē, indravastayaścatvārō-jaṅghāmadhyayōrdvēbāhumadhyayōrdvē, kṣiprāṇi catvāri-hastayōrdvē pādayōrdvē, apālāpabr̥hatīnitambastanarōhitāḥ pratyēkaṁ dvau dvāviti|

Adhikarana viSalyaghnAni trINi ,tatra hetuH (55-56) · Śloka 56

| utkṣēpau sthapanī trīṇi viśalyaghnāni, tatra hi||55|| vāyurmāṁsavasāmajjamastuluṅgāni śōṣayan| śalyāpāyē vinirgacchan śvāsātkāsācca hantyasūn||56||

utkṣēpau dvau sthapanyēkā, ityētāni trīṇi viśalyaghnāni| kō'tra hētuḥ ? ityāha-tatra hītyādi| hi-yasmāt, tatra-vyadhē, śalyāpāyē vāyurvinirgacchan-niryān, māṁsādīn śōṣayan śvāsa kāsābhyāṁ prāṇān hanti| tatra ca hētau śatr̥pratyyaaḥ| nirgamēna hi hētunā māṁsādīnāṁ śōṣaṇaṁ bhavati|

Adhikarana vaikalyakarANi catuScatvAriMSat (57-59) · Śloka 59

phaṇāvapāṅgau vidhurē nīlē manyē kr̥kāṭikē| aṁsāṁsaphalakāvartaviṭapōrvīkukundarāḥ||57|| sajānulōhitākṣāṇikakṣādhr̥kkūrcakūrparāḥ| vaikalyamiti catvāri catvāriṁśacca kurvatē||58|| haranti tānyapi prāṇān kadācidabhighātataḥ| |59|

phaṇādīni viṭapāntāni pratyēkaṁ dvau dvau, urvyaścatasraḥ, kukundarau dvau, jānunī dvē, lōhitākṣāṇi catvāri, āṇayaścatvāraḥ, kakṣādharau dvau, kūrcāścatvārō-hastayōrdvau pādayōrdvau, kūrparau dvau, ityēvaṁ catvāri catvāriṁśaccēti catuśctvāriṁśanmarmāṇi vaikalyamaṅgasya kurvatē| kadācittvabhighātāt tānyapicatuścatvāriṁśat, prāṇān haranti|

Adhikarana rujAkarANyaShTau (59) · Śloka 59

| aṣṭau kūrcaśirōgulphamaṇibandhā rujākarāḥ||59||

aṣṭau kūrcadayō marmaviśēṣā rujākarāḥ| "agnivāyusōmaguṇabāhulyāt| agnivāyū hi viśēṣēṇa śūlakarau| sōmastu prāṇāvalambakaḥ (saṁ.śā. a.7)|" iti naitāni prāṇahantr̥̄ṇi| tatra kūrcaśirāṁsi hastapādēṣu catvāri, gulphau dvau, maṇibandhau dvau, ityaṣṭau| idānīm marmaṇāṁ yathāyathaṁ pramāṇamabhidhātumāha-

Adhikarana marmaNAM pramANenABidhAnam ,a~ggulamAnAni dvAdaSamarmANi (60) · Śloka 60

tēṣāṁ viṭapakakṣādhr̥gurvyaḥ kūrcaśirāṁsi ca| dvādaśāṅgulamānāni|60|

tēṣāṁ-marmaṇāṁ madhyē, viṭapādīni dvādaśa marmāṇyaṅgulamānāni-aṅgulapramāṇāni|

Adhikarana dvya~ggulAni ShaT marmANi (60-61) · Śloka 61

| dvyaṅgulē maṇibandhanē||60|| gulphau ca stanamūlē ca| |61|

maṇibandhanē-maṇibandhau, dvyaṅgulapramāṇau| gulphau stanamūlē ca dvyaṅgulē pratyēkam| ēkaścaśabdaḥ samuccayārthō dvitīyaḥ pādapūraṇē|

Adhikarana trya~ggulAni catvAri marmANi (61) · Śloka 61

tryaṅgulaṁ jānukūrparam| |61|

tryaṅgulapramāṇau jānū kūrparau ca|

Adhikarana hastatalamAnAnyekonatriMSat (61-62) · Śloka 62

| apānabastihr̥nnābhinīlāḥ sīmantamātr̥kāḥ||61|| kūrcaśr̥ṅgāṭamanyāśca triṁśadēkēna varjitāḥ| ātmapāṇitalōnmānāḥ|62|

apānabastyādayastriṁśadēkēna varjitāḥ ēkōnatriṁśat, ātmapāṇitalōnmānāḥ-svahastatalaparimāṇāḥ|

Adhikarana ardhA~ggulAni ShaT pa~jcASat ,anyeShAM mate tilavrIhimAnAni , (62-63) · Śloka 63

| śēṣāṇyarddhāṅgulaṁ vadēt||62|| pañcāśatṣaṭ ca marmāṇi, tilavrīhisamānyapi| iṣṭāni marmāṇyanyēṣām|63|

śēṣāṇi ṣaṭpañcāśanmarmāṇī svēnāṅgulaprimāṇōnārddhaṅgulapramāṇānyādiśēt| anyēṣāṁ tantrakr̥tāṁ tilapramāṇāni vrīhipramāṇāni vā marmāṇīṣṭāni-ābhimatāni| "paramataṁmapratiṣiddhamanumatamēva" ityasyāpi granthakr̥ta ētadēva matamiti bōdhyam|

Adhikarana marmABiGAtamaraNe kAraNam (63-66) · Śloka 66

idānīṁ yathā marmābhighātē maraṇaṁ sampadyatē tathā darśayati | caturddhōktāḥ sirāstu yāḥ||63|| tarpayanti vapuḥ kr̥tsnaṁ tā marmāṇyāśritāstataḥ| tatkṣatātkṣatajātyarthapravr̥ttērdhātusaṅkṣayē||64|| vr̥ddhaścalō rujastīvrāḥ pratanōti samīrayan| tējastaduddhr̥taṁ dhattē tr̥ṣṇāśōṣamadabhramān||65|| svinnasrastaślathatanuṁ haratyēnaṁ tatō'ntakaḥ| |66|

yāḥ sirāścaturddhā uktāḥ-prāṅkṣirdiṣṭā vātapittakaphajuṣṭaśuddharaktavāhinyaḥ saptasaṅkhyāḥ, kr̥tsnaṁ-aśēṣaṁ, śarīraṁ tarpayanti prīṇayanti, tā marmāṇyāśritāḥ-gatāḥ prāptāḥ| tatkṣatādityādi| yata ēvaṁ sarvāḥ sirā marmāṇi prāptāḥ, tataḥ kāraṇāt-marmāśrayalakṣaṇāt, tatkṣatāt-tēṣāṁ marmaṇāṁ kṣataṁ tatkṣataṁ, tasmānmarmakṣatātkāraṇāt, kṣatajasya-raktasya, atipravr̥ttiḥ| tasmātkṣatajātyarthapravr̥ttēḥ kāraṇāt, yō dhātusaṅkṣayaḥ-paramparākramāyātō māṁsādidhātvapacayaḥ, tasmin dhātukṣayē sati yō vr̥ddhaścalō-vāyuḥ, sa tīvrāḥ-atyantaduḥkhadāyinīḥ, rujaḥ-śūlaviśēṣān, pratanōti-karōti| kiṁ kurvan ? tējaḥ-pittaṁ, samīrayan-udīrayan vr̥ddhiṁ nayan, tat-tējaḥ, uddhr̥taṁ- br̥hatsampannaṁ, tr̥ṣṇādīn dhattēkarōti| tataḥ-anantaraṁ tr̥ṣṇādibhyaḥ, ēnaṁ-puruṣaṁ marmaviddhaṁ, antakō harati| kimbhūtam ? svinnā srastā ślathā tanuryasya tam| tadayamarthaḥ,-marmābhighatē raktavāhinīnāṁ sirāṇāṁ mukhavikāsō jāyatē| tadvikāsājjīvitādhiṣṭhānasyāsr̥jō'tyarthaṁ yā niḥsr̥tiryāvattasya kṣayaḥ, tatkṣayācca jīvitanāśaḥ, aśrayābhavāt|

Adhikarana marmABiGAte cikitsA (66-67) · Śloka 67

| vardhayētsandhitō gātraṁ marmaṇyabhihatē drutam||66|| chēdanātsandhidēśasya saṅkucanti sirā hyataḥ| jīvitaṁ prāṇināṁ tatra raktē tiṣṭhati tiṣṭhati||67||

adhunā marmābhighātē cikitsāmāha- marmaṇyabhihatē sati, gātraṁ-śarīraṁ, āśvēva cēdayēt| kutaḥ ? sandhitaḥ,-sandhipradēśāt| hi-yasmāt, sandhidēśasya cēdanātsirāḥ saṅkucanti-saṁvr̥tamukhā bhavanti| varddhayēditi varddhachēdanādāviti caurādikaḥ| ataḥ-sirāsaṅkōcātkāraṇāt, raktaṁ na bahirnissarati| tatra raktē tiṣṭhati-bahiravahati sati, jīvitaṁ tiṣṭhati|

Adhikarana amarmaNi viddhasya jIvanAdi ,marmasu kShArAdIn varjayet (68-69) · Śloka 69

tadanēna prakārēṇa marmābhighātakṣatānmaraṇam, na tvamarmābhighātakṣatāt| ata idamāha suvikṣatō'pyatō jīvēdamarmaṇi na marmaṇi| prāṇaghātini jīvēttu kaścidvaidyaguṇēna cēt||68|| asamagrābhighātācca sō'pi vaikalyamaśnutē| tasmatkṣāraviṣāgnyādīn yatnānmarmasu varjayēt||69||

yatō marmābhighātakṣatāt prāṇī mriyatē, nānyathā kṣatamātrāt| ataḥ-asmātkāraṇāt, suṣṭhu kr̥tvā viśēṣēṇa kṣatō'piparaśatairviddhō'pi, amarmaṇi viddhō jīvēt, na tu marmaṇī viddhō jīvēt| kimbhūtē ? prāṇaghātini| dvividhaṁ hi marma-prāṇaghātyēkamaparaṁ vaikalyakaram| tatra prāṇaghātini marmaṇi kuśāgrēṇāpi viddhō na jīvati| atha puṇyavānniyatāyuśca prāṇaghātinyapi marmaṇi viddhō vaidyaguṇēnāsamagrasya-asakalasya, marmaṇō'bhighātāśca kaścidyadi viddhō jīvēt, sō'pi vaikalyamaśnutē-vikalatāṁ prāpya jīvatītyarthaḥ| vaidyaśabdaḥ prādhānyādravyādipādatrayamupalakṣayati| vaidyaguṇēna-pādatrayasampattyētyarthaḥ| yataścaivaṁ marmābhighātaḥ sāpāyaḥ prāṇōparōdhakr̥t, tasmātkāraṇāt marmasu kṣārādīn yatnāt-tātparyēṇa, varjayēt-pariharēt agnyādīnatrādiśabdēna bhallātakarasakapikacchuśūkādīnāṁ grahaṇam|

Adhikarana svalpo~api marmAghAto~ati pIDAkaraH ,marmAshrayA rogA api tadvat (4) · Śloka 4

marmābhighātaḥ svalpō'pi prāyaśō bādhatētarām| rōgā marmāśrayāstadvatprakrāntā yatnatō'pi ca||70|| iti śrīvaidyapatisiṁhaguptasūnuśrīmadvāgbhaṭaviracitā yāmaṣṭāṅgahr̥dayasaṁhitāyāṁ dvitīyē śārīrasthānē marmavibhāgō nāma caturthō'dhyāyaḥ||4||

ēvaṁ marmābhighātō rakṣyaḥ| yasmānmarmābhighātaḥ suṣṭvatiśayēnālpō'pi prāyaśō-bāhulyēna, bādhatētarāṁ-atiśayēna pīḍayati| na kēvalaṁ marmābhighātō bādhatē yāvadrōgā api marmāśrayāstadvadbādhantē| yatnatō'pi-ādarēṇāpi, prakrāntāḥ-upakrāntāḥ, iti| iti śrīmr̥gāṅkadattaputraśrīmadaruṇadattaviracitāyāmaṣṭaṅgahr̥daya- ṭīkāyāṁ sarvāṅgasundarākhyāyāṁ dvitīyē śārīrasthānē marma- vibhāgō nāma caturthō'dhyāyaḥ samāptaḥ|| 4||

Adhikarana atha garBavyApannAma caturtho~adhyAyaH --pratij~jA (1) · Śloka 1

athātō garbhavyāpadaṁ vyākhyāsyāmaḥ| iti ha smāhurātrēyādayō maharṣayaḥ||1||

atha prakaraṇāyātagarbhavyāpaccikitsitapradarśanārthamadhyāyārambhaḥ|| 1||

Adhikarana garBiNyAH sashUle puShpadarshane cikitsAkramaH (2) · Śloka 2

strī cēdāpannagarbhā parihāryyāṇyāsēvēta| tataśca yasyāḥ bastipārśvaśrōṇiyōnimukhēṣu śūlaṁ puṣpadarśanaṁ ca syāt tāṁ mr̥dusukhaśiśirāstaraṇaśayanasthāmīṣadavanataśirasaṁ śītapradēhapariṣēkādibhirupācarēt||2||

āpannagarbhā samprāptagarbhā strī parihāryyāṇyāsēvēta cēt tataśca yadyasyāḥ śūlaṁ puṣpadarśanaṁ ca syāt tatastāṁ mr̥dutvādiguṇayuktaśayanasthāṁ śītaiḥ pradēhābhirupācarēt|| 2||

Adhikarana cikitsAvisheShAH (3) · Śloka 3

tadyathā-sahasradhautēna sarpiṣā'dhōnābhēḥ sarvataḥ pradihyāt| madhukasiddhasarpiṣā suśītēna picumāplāvya yōnisamīpē sthāpayēt| gavyēna payasā madhukāmbunā nyagrōdhādikaṣāyēṇa va pariṣēcayēt| paripītatatsvarasāni ca tailāni yōnau nidhāpayēt| tacchr̥ṅgasiddhasya vā kṣīrasarpiṣaḥ picum||3||

sahasradhautaṁ sarpiryadanēkaśō'gnau vilāpya śītōdakē prakṣipya styānīkriyatē| madhukēna siddhaṁ sarpistathōktam| tacchr̥ṅgairnyagrōdhādiśr̥ṅgaiḥ siddhasya kṣīrasarpiṣaḥ picuṁ yōnau dadyāt| kṣīramēva pramathya sampāditaṁ sarpiḥ kṣīraghr̥tam|| 3||

Adhikarana garBiNyAH raktAtisrAve cikitsA (4) · Śloka 4

atisravati tu raktē tata ēva akṣamātraṁ prāśayēt| kēva- lādēva vā kṣīrasarpiṣaḥ| padmōtpalakumudakiñjalkaṁ ca samadhuśarkaraṁ lēhayēt| dhātakīgairikisarjarasāñjanacūrṇaṁ vā madhunā| nyagrōdhā- ditvakpravālakalkaṁ vā| śaśaiṇahariṇarudhiraṁ vā sakṣaudraṁ pāyayēt| r̥ddhividārījīvantīrvā payasā| nīlōtpala- sitāpakvalōṣṭhacandanādi vā| taṇḍulāmbuvāsārasānya- tarēṇa| gandhapriyaṅgusitōtpalaśālūkōdumbaraśalāṭunya- grōdhaśr̥ṅgāni vā''jēna payasā| kaśērukamr̥ṇālakaśr̥ṅgāṭakakāśmaryaparuṣakadrākṣāsāri- vāprapauṇḍarīkānantōtpalakadambabījakvāthēna vā śarka- rāmadhumadhurēṇa śālicūrṇam| jīvanīyaśr̥taṁ vā kṣīram| balātibalāśāliṣaṣṭikēkṣumūlakākōlīśr̥tēna payasā samadhuśarkarēṇa raktaśālyōdanaṁ suśītaṁ bhōjayēt| śīta- vīryyajāṅgalarasēna vā| raktapittakriyāśca śōdhanavarjyāḥ prayuñjīta| saumyāśca manō'nukūlāḥ kathāḥ||4||

raktē tvatisravati tata ēva nyagrōdhādisiddhāt kṣīrasarpiṣō'kṣamātraṁ prāśayēt| kēvalādēva vā kṣīrasarpiṣō'kṣamātraṁ na tu nyagrōdhādiśr̥ṅgasiddhāt kṣīrasarpiṣaḥ| padmādikiñjalkaṁ ca madhuśarkarābhyāṁ yuktaṁ lēhayēt| madhunā vā dhātakyādicūrṇam| madhunaiva nyagrōdhāditvacāṁ śr̥ṅgāṇāṁ ca kalkam| sakṣaudraṁ va śaśādyanyatamarudhiram| r̥ddhyādikaṁ ca payasa nīlōtpalādīni taṇḍalāmbuvāsārasayōranyatarēṇa| pakvō mr̥llōṣṭhastathōktaḥ| ājēna payasa gandhapriyaṅvādīni| kaśērukādīnāṁ kaṣāyēṇa mādhuryyasampādanamātrābhyāṁ śarkarāmadhubhyāṁ miśrēṇa śālicūrṇaṁ pāyayēt| jīvanīyauṣadhaśr̥taṁ kṣīraṁ vā pāyayēt| balātibalādiśr̥takṣīrēṇa madhuśarkarāsaṁyuktēna suśītaṁ raktaśālyōdanaṁ bhōjayēt| śītavīryyāṇāṁ ca jāṅgalānāṁ rasēna vā suśītaṁ raktaśālyōdanaṁ bhōjayēt| śōdhanavarjyāśca sarvā raktapittōktāḥ kriyāḥ yathāvasaraṁ kurvīta|| 4||

Adhikarana shoNitasrAvaM vinA bastyAdi- shUle cikitsA (5) · Śloka 5

adr̥ṣṭaśōṇitāṁ tu madhukapayasyāsuradārubhiḥ siddhaṁ payaḥ pāyayēt| tāmravalyaśmantakaśatāvarīpayasyābhirvā| vidāryyādigaṇēna vā| śvadaṁṣṭrāsvarasakṣīrasiddhaṁ vā sarpiḥ| palāṇḍurasasiddhaṁ vā sakṣaudram||5||

yadā tu śōṇitadarśanaṁ vinaiva bastyādau śūlaṁ kēvalaṁ bhavati| garbhiṇyāstathā tāṁ madhukādisiddhaṁ payaḥ pāyayēt| tāmravalyādisiddhaṁ vā payaḥ| vidāryyādigaṇasiddhaṁ vā| śvadaṁṣṭrāsvarasakṣīrābhyāṁ vā siddhaṁ sarpiḥ pāyayēt| palāṇḍurasasiddhaṁ vā kṣaudrayuktaṁ sarpiḥ|| 5||

Adhikarana trimAsaM yAvadasrasrutau garBasyAsAdhyatvam (6) · Śloka 6

asampūrṇatrimāsāyāstu puṣpadarśanē garbhaḥ prāyō na tiṣṭha- tyasañjātasāratvāt||6||

prathamānmāsādārabhya māsatrayaṁ puṣpadarśanē samyak cikitsitō'pi garbhaḥ kōṣṭhē na tiṣṭhatyasañjātasāratvāt| sravatyēvētyarthaḥ| tēna prathamamāsatrayaṁ puṣpadarśanē prāyō garbhaścikitsayāpi kōṣṭhē na tiṣṭhati| māsatrayādūrdhvamapi caturthādiṣvapi māsēṣvakāṭhinyāt|

Adhikarana AmAnvaye puShpadarshane cikitsopakramaH (7) · Śloka 7

āmānvayē cōrdhvamapi viruddhōpakramatvāt| tatra rūkṣaśī- tāni prayuñjīta||7||

āmānvayē puṣpadarśanē viruddhōpakramatvādgarbhaḥ kōṣṭhē na tiṣṭhati| āmē hyuṣṇatīkṣṇādikā kriyā| sā tu garbhē viparītā| atō viruddhōpakramatvam| yatra caturthādiṣvapi māsēṣvāmānvayō nāsti, tatra puṣpadarśanē'pi garbhō vidhārayituṁ suśakyatē| tatra tvāmānvayē rūkṣaśītānyauṣadhāni prayuñjīta|| 7||

Adhikarana tatra cikitsAvidhiH (8) · Śloka 8

tadyathā-prāgupavāsaṁ tatō durālabhāmr̥tōśīraparpaṭaka- ghanacandanātiviṣābalākaṭvaṅgadhānyākakvāthapānam| tr̥ṇadhānyaśāliṣaṣṭikapēyāmaśanaṁ ca mudgādiyūṣaiḥ| jitē tvāmē snigdhaśītāni pūrvavat||8||

tadyathētyādinā tēṣāmēvōpayōgaviśēṣaṁ darśayati| auṣadhāt pūrvamupavāsaḥ durālabhādikvāthasya pānam| tr̥ṇadhānyādipēyā mudgādiyūṣaiścāśanaṁ prayuñjītēti sambadhyatē| ēvamāmē jitē prathamapuṣpadarśanavat snigdhādīnyupayuñjīta|| 8||

Adhikarana AmagarBapAte cikitsA (9) · Śloka 9

āmagarbhē tu patitē madyānāmanyatamaṁ sāmarthyataḥ pāyayēt| garbhakōṣṭhaviśuddhyarthamartivismaraṇārthañca| amadyapāṁ pāca- nīyadravyōpahitābhiḥ snēhalavaṇavarjyābhiḥ satilābhi- ruddālakādiyavāgūbhirupācarēd yāvantō māsāstāvantya- hānīti| tataḥ prīṇanairbalānurakṣibhirasnēhairāhārairādōṣadhātuklēda- śuddhēḥ| āmagarbhaśēṣēṇa hi punaḥ punarakuśalamanuṣajyēta| tasmāt tīkṣṇairanavaśēṣayannupācarēt| tataḥ paraṁ snēhapānai- rbastibhirāhāraiśca dīpanīyapācanīyajīvanīyabr̥ṁhaṇīya- madhuravātaharairiti||9||

āmagarbhapātē madyānāmanyatamaṁ garbhiṇīṁ pāyayēt| prayōjananirdēśastadguṇamanyat pradarśayitum| amadyapā yā kēnacit kāraṇēna madyaṁ na pibati tāṁ pācanīyadravyasammiśrābhirasnēhalavaṇābhiḥ satilābhiḥ tuṇadhānyayavāgūbhirupācarēt| yāvat saṅkhyē māsi garbha pātastāvat saṅkhyānyahāni ayaṁ kramaḥ| tatō'nantaramēvādōṣādiśuddhēḥ prīṇanādiguṇairāhārairupācarēt| kuta ityāha-āmagarbhaśēṣēṇētyādi| tadanu ca snēhapānairbastibhistathā dīpanīyādiyuktairāhārairiti|| 9||

Adhikarana garBasyopaviShTakopashuShkakasamBavahetuH (10) · Śloka 10

yasyāḥ punarmahati jātasārē garbhē varjyānāmavarjanāt puṣpa- darśanaṁ syādanyadvā yōnisravaṇam| tasyāstannimittaṁ vāyuḥ prakupitaḥ pittaślēṣmāṇau parigr̥hya garbhasya rasavahāṁ nāḍīṁ pratipīḍyāvatiṣṭhatē| tatō nāḍyāṁ dōṣaiḥ kulyāyāmiva vahanādgarbhō vr̥ddhimanāpnuvannupaviśatyupaśuṣyati vā||10||

mahati jātasārē varjyāvarjanādyōnirārttavamanyadvā kiñcit sravati| tasyā yōnisrutinimittaṁ vāyuḥ kupitaḥ san pittaślēṣmāṇau parigr̥hya yā tu nāḍī māturāhārasāraṁ rasaṁ garbhasya vahati tāṁ nāḍīṁ pratipīḍya tiṣṭhati| tatastayā tadvr̥ddhayā nāḍyā kulyayēva tr̥ṇādicchannayā kēdārō garbhō vr̥ddhimaprāpnuvannupaviśatyupaśuṣyati vā|| 10||

Adhikarana upaviShTakagarBalakShaNam (11) · Śloka 11

tatra yasyāḥ kādācitkārttavaparisrāvāvalpau ca dr̥śyētē satataṁ ca garbhaḥ prāptāt parimāṇādaparihīyamāna ēva sphurati| na ca kukṣirvivardhatē, tamupaviṣṭakamityā- cakṣatē||11||

tatra dvau bhēdau| ēkō vr̥ddhyaprāptiḥ dvitīya upaśōṣaḥ| prathamē kādācitkēna srāvēṇa garbhō na parihīyatē| nāpi vardhatē| sphurati ca tamupaviṣṭakamityācakṣata ācāRyyāḥ|| 11||

Adhikarana upashuShkakagarBalakShaNam (12) · Śloka 12

yadā tu pratimāsamārttavaṁ pratyahaṁ vā parisravaṇaṁ nātyalpaṁ ca tathā parihīyamāṇō garbhaścirāt kiñcit spandatē| kukṣiśca vr̥ddhō'pi parihīyatē| tadupaśuṣkakaṁ nāgōdaraṁ ca||12||

dvitīyē tvatisrāvāddr̥ddhō'pi parihīyatē| cirāt stōkaṁ ca spandatē| kukṣiśca vr̥ddhō'pi parihīyatē| taṁ garbhamupaśuṣkakanāgōdaraśabdābhyāmācakṣatē|| 12|

Adhikarana upaviShTakanAgodarayoH prasavakAlanishcayaH (13) · Śloka 13

tau tu māturāhāratējasā'lpēnāpyāyyamānau yadā puṣṭau syātāṁ kēśadaśanādiyuktau| tadā varṣagaṇairapi pramadā prasūyēta ēva||13||

tau cōpaviṣṭakōpaśuṣkakau māturāhāratējasa svalpēnāpyāyyamānau kramēṇa yada puṣṭau syātāṁ tada kēśadaśanādiyuktau bahubhirapi varṣaiḥ pramadā prasūyēt|| 13||

Adhikarana vAtikopaviShTakanAgodarayorlakShaNAni (14) · Śloka 14

tatra vātēnōpaviṣṭakōpaśuṣkakayōrvāyuḥ pratihanyatē| saśabdaṁ phēnilaṁ vicchinnaṁ śakr̥dupavēśyatē| mūtramuparudhyatē| kaṭīpr̥ṣṭhahr̥dayēṣu vēdanā| jr̥mbhā, nidrānāśō'bhīkṣṇaṁ pratiśyāyaḥ, śuṣkakāsaḥ, sādaḥ, kṣvēḍētē iva karṇau, tudyētē iva śaṅkhau| pipīlikābhiriva saṁsr̥jyatē śarīraṁ parir̥ntanniva vāyurbhramati kukṣau tama iva pravēśyatē| duḥkhēnānnasya jaraṇam| aharahaḥ parihāniḥ| sphuṭitavivarṇaparuṣatvaktvaṁ ca bhavati||14||

tatrētyādinā dōṣaviśēṣēṇa tayōrlakṣaṇamucyatē| tatrāpathyaviśēṣasēvayā yadōpaviṣṭakōpaśuṣkakayōrvāyōrādhikyaṁ bhavati tadā tatra vātahētukayōrupaviṣṭakōpaśuṣkakayōḥ kōṣṭhacarō vāyustābhyāṁ pratihanyatē| saśabdatādiyuktaṁ ca sakr̥t garbhiṇyupavēśyatē| subōdhamanyat|| 14||

Adhikarana paittikopaviShTakanAgodararyorlakShaNAni (15) · Śloka 15

pittēna tāmraharitamupavēśyatē| dhūmakō'mlakaśchardimūrcchākṣihr̥dayadāhaḥ| pītaraktagōmūtrābhanētramūtranakhatvaktvaṁ kālī durbalā nityaśūnā ca nārī bhavati||15||

pittēnōbhayōrgarbhiṇyāstāmraharitaśakr̥dupavēśanādi subōdham| gōmūtravat pītaraktanētrāditvam|| 15||

Adhikarana shlaiShmikopaviShTakanAgodarayorlakShaNAni (16) · Śloka 16

ślēṣmaṇā madhurāsyatvamutklēśaḥ ślēṣmōdvamanaṁ bhaktadvēṣaḥ śvētahastapādanētratā kāsaḥ śvāsaśca||16||

ślēṣmaṇā tayōrgarbhiṇyā madhurāsyatvādikaṁ bhavatīti dōṣaviśēṣalakṣaṇam|| 16||

Adhikarana upaviShTakanAgodarayoH sAmAnyA cikitsA (17) · Śloka 17

tayōrjīvanīyabr̥ṁhaṇīyamadhurauṣasiddhānāṁ sarpiṣāmupayōgaḥ| tathā payasāṁ rasānāmāmagarbhāṇāṁ ca garbhavr̥ddhikaraḥ| tathā sambhōjanamētairēva ca ghr̥tādibhiḥ| subhikṣāyā abhīkṣṇaṁ yānavāhanāpavarjjanabr̥ṁhaṇairupapādanam||17||

cikitsā tūbhayōḥ sāmānyēna jīvanīyādiśr̥tasarpirādikā| ēṣāmupayōgō garbhavr̥ddhikara ityarthaḥ| tathā ētairēva sarpirādibhih sambhōjanaṁ saha bhōjanam| tairēva ca subhikṣāyāstr̥ptāyā garbhiṇyā yānavāhanādibhirapavarjanam| upapādanamupaskāraḥ dānam| iti sāmānyēnōpaviṣṭakōpaśuṣkakayōrvivaddhanārthaṁ cikitsitam|| 17||

Adhikarana vAtikopaviShTakanAgodara- yoshcikitsA (18) · Śloka 18

atha viśēṣēṇa vātē pūrvamēva saindhavōpahitaṁ kṣīrabastiṁ dattvā śītōdakasnātāṁ mr̥du śālyōdanaṁ bhōjayēt| tatō vidāryyādigaṇasādhitēna sarpiṣā'nuvāsayēt| nivātaṁ ca sēvēta||18||

vātādidōṣē viśēṣēṇa athētyādinā kathayati-bastidānādanubhōjanam| tatō'nuvāsanam| subōdham|| 18||

Adhikarana paittikopaviShTakanAgodarayoshcikitsA (19) · Śloka 19

pittē madhukavidārīniryyūhasiddhaṁ payaḥ pibēt| tisraḥ sthūlakukkuṭīrnistuṣamāṣāḍhakaṁ ca kṣīrōdakēnōlūkhalē saṁkṣudya tadrasēna sarpiṣā ca tittirikapiñjalānyatararasaṁ sādhayitvā pāyayēdupaviṣṭakavivardhanārthamupaśuṣkakabr̥ṁhaṇārthaṁ ca| ajāsarpiṣā kṣīrēṇa jīvanīyaiśca saṁskr̥tāṁ yavāgūṁ pibēt| payasyā kākōlīdvayasuniṣaṇḍakakalkēna payasā ca sarpirvipācayēt| tatkālyaṁ kṣīrānupānamupayuñjīta| āma- garbharasēna cāśnīyāt| tānēva ca tatra bhr̥ṣṭān bhakṣayēt| jalacaramāṁsāni ca||19||

sthūlāśca tāḥ kukkuṭyastathōktāḥ tēna māṣakukkuṭīrasēna sarpiṣā miśritēna saha tittirēḥ kapiñjalasya vā rasaṁ sādhayitvā upaviṣṭakavivardhanārthamupaśuṣkakabr̥ṁhaṇārthañca pāyayēditi sambandhaḥ | jīvanīyānāṁ yathāsaṁskāraṁ mātrā| payasyādīnāṁ caturṇāṁ kalkēna taccaturguṇaṁ sarpiḥ payasā snēhasamēna vipacēt| payasyā kṣīravidārī| kālyaṁ prātaḥ| tasmina kṣīrānupānē prayuktē bhōjanakālē āmagarbhāṇāṁ tvacirakālajātānāṁ prāṇināṁ rasēnāvamaśnīyāt| tānēvāmagarbhāṁstatraiva rasē bhr̥ṣṭānnistālitān bhakṣayēt tattajjalacāriṇāṁ haṁsādīnāṁ māṁsāni ca|

Adhikarana shlaiShmikopaviShTakanA- godarayoshcikitsA (20) · Śloka 20

kaphē tvānūpaudakapiśitōpadaṁśāmacchasurāṁ trirātraṁ pañcarātraṁ saptarātraṁ vā pibēt| tilamudgamāṣalavaṇabilvapātraiḥ| pañcabhirghr̥tapātraṁ saṁyōjya svanuguptaṁ nidhāpayēt| tataḥ prātaḥ piṇḍaṁ bilvamātraṁ śr̥taśītacchāgadugdhanupānaṁ vā'śnīyāt| atraiva vā badara- cūrṇapātramapi nidadhyāt||20||

piśitamupadaṁśaḥ pānōpāyabhōjanaṁ yasyāḥ surāyāstām| tilādīnāṁ pañcānāmēkīkr̥tya cūrṇasya pañcapātraṁ ghr̥tasya pātrēṇa saṁyōjya nidhāpayēt| svanuguptaṁ kr̥tvaiṣa tataḥ prayōgaḥ| atraiva badaracūrṇapātraprakṣēpō dvitīyaḥ| pātraṁ śuṣkadravyasya catuṣṣaṣṭipalāni| ghr̥tasyāṣṭāviṁśatyadhikaṁ palaśatam||20||

Adhikarana garBasya sarvathA avRuddhau tatpAtanam (21) · Śloka 21

ēvamavr̥ddhau tīkṣṇairvirēcayēdaparāpātanīyaiśca pātayēt||21||

ēvaṁ garbhō na vardhatē tadā garbhiṇīṁ tīkṣṇairdravyairvirēcayēt aparāpātanīyairvā prayōgairgabhaṁ pātayēt|| 21||

Adhikarana lInagarBalakShaNam (22) · Śloka 22

yasyāḥ punarvātōpasr̥ṣṭasrōtasi līnō garbhaḥ prasuptō na spandatē taṁ līnamityāhuḥ||22||

līnō nāma garbhō yō garbhiṇyā vātōpasr̥ṣṭasrōtasi līnō na spandatē|| 22||

Adhikarana lInagarBacikitsA (23) · Śloka 23

tatra śyēnōtkrōśagōmatsyagōdhāśikhikukkuṭatittirīṇāmanyatamasya rasēna bhūrisarpiṣkēṇa māṣayūṣēṇa vā ghr̥tāḍhyēna raktaśālyōdanaṁ bhōjayēt| saktūn vā tilamāṣabilvaśalāṭuyuktān payasa pāyayēt mēdyamāṁsōpadaṁśaṁ vā mārdvīkam| tailēna cābhīkṣṇamudaravaṅkṣaṇōrukaṭīpārśvapr̥ṣṭhānyabhyajyāt| muhurmuhuścaināṁ harṣayēt| pūrvōktaṁ cēkṣēta||23||

tatra līnē garbhē śyēnādīnāmanyatamasya rasēna bahusarpiṣkēṇāthavā māṣayūṣēṇa ghr̥tāḍyēna mūlakayūṣēṇa vā ghr̥tāḍhyēna raktaśālyōdanaṁ bhōjayēt| saktūn vā tilādisaṁyuktān kṣīrēṇa pāyayēt| bilvaśalāṭu bālabilvam| mēdyaṁ mēduram| subōdham| pūrvōktaṁ garbhavr̥ddhikarōktam|| 23||

Adhikarana udAvartacikitsA (24) · Śloka 24

yasyāḥ punarudāvartavibandhaḥ syāttāṁ vātaharasnigdhānnapānairupācarēt| aṣṭamē tu māsē madhukasiddhēna tailēnānuvāsayēt| tadasiddhau vīraṇaśālikuśakāśēkṣubālikāvētasaparivyādhamūlānāṁ bhūtīkānantākāśmaryaparūṣakamadhūkamadhukamr̥dvīkānāṁ ca payasā'rdhōdakēnōdgr̥hya rasaṁ tēna priyālabibhītakamajjatilakalkayuktēnēṣallavaṇōṣṇēna nirūhayēt| vigatavibandhāṁ ca snātāśitāṁ sāyaṁ tēnaiva tailēnānuvāsayēt||24||

yasyā ityādi subōdham| aṣṭamē māsē tvanuvāsanaṁ tēnānuvāsanēnāsiddhau vīraṇādīnāṁ saptānāṁ mūlānāṁ bhūtīkādīnāṁ yathāsambhavaṁ mūlānāṁ phalānāṁ ca kṣīrōdakābhyāṁ anukvāthanēna cūrṇamēlanēna rasamudgr̥hya tēna rasēna priyālādikalkamiśrēṇa īṣallavaṇēnēṣaduṣṇēna ca nirūhayēt| vīraṇaṁ tr̥ṇaviśēṣaḥ| ikṣubālikā karaṅkaśālirikṣuḥ parivyādhō jalavētasaḥ| vigatōdāvartavibandhāṁ cānuvāsayēt| tēnaiva madhukasiddhēna tailēna|| 24||

Adhikarana udAvartepekShAyAM vyApat (25) · Śloka 25

udāvartō hi samupēkṣitaḥ sahasā sagarbhāṁ garbhiṇīmatipātayēt||25||

avaśyaṁ cōdāvarttē cikitsāṁ kuryāt| yat udāvarta upēkṣitaḥ sahasa śīghramēva sagarbhāṁ garbhiṇīṁ hanyāt|| 25||

Adhikarana AmagarBasrAvahetavaH (26) · Śloka 26

yasyāḥ punaratimātradōṣōpacayādyathōktairvā vyavāyādibhiranyairvā vyādhibhiḥ pūrvōpacitēna vā jananyapatyayōḥ karmaṇā bandhanānmucyatē garbhaḥ phalamiva vr̥ntātsamuktabandhanō garbhaśayyāmatikramya kr̥taplīhāntravivarairavasraṁsamānaḥ kōṣṭhasaṁkṣōbhamāpādayati| tataḥ kōṣṭhasaṁkṣōbhādvāyurapānō mūḍhaḥ kukṣibastipārśvōdarayōniśūlānāhaviṇmūtrasaṅgānāpādya garbhaṁ cyāvayati taruṇaṁ śōṇitabhāvēna| sō'bhihitaḥ prāk||26||

yasyā ityādi subōdham| garbhasya bandhanaṁ yatra tatra māturanubandhō bhavati paripōṣārtham| vr̥ntādyēna śākhāyāṁ nibadhyatē phalam| sa vyāpannō garbha āmaḥ san śōṇitabhāvēnāpi prasūyatē| tatra ca vidhēyamuktam|| 26||

Adhikarana mRutagarBAyA lakShaNam (27) · Śloka 27

vivr̥ddhē tu garbhē stabdhaṁ stimitaṁ śītamaśmagarbhamivōdaramābhāti| śūlamadhikamupajāyatē| na ca spandatē garbhō nā''vyaḥ prādurbhavanti| na sravati yōnirakṣiṇī cāsyāḥ sraṁsyētē| tathā bhr̥śamaratiparītā vyathatē'nyathā cēṣṭatē tāmyati bhrāmyati rōdityaharniśam| na svapiti| pūtyucchvāsā kr̥cchrācchvasityatikaṣṭaṁ prāṇiti| jakṣitītyēvaṁvidhāṁ striyaṁ mr̥tagarbhāṁ vidyāt||27||

yadā tu vr̥ddhō vyāpadyatē tadā garbhiṇyāḥ stabdhōdaratvādikaṁ karōti| āvyō garbhaprasavavēdanāḥ| akṣṇōḥ sraṁsō bandhaḥ bhraṁśaḥ| pūtirucchvāsō yasyāḥ sā tathōktā| atikaṣṭaṁ prāṇiti| kathamapi cēṣṭāsu prabhavati| jīvati vā kaṣṭaṁ ca jakṣitibhakṣayati| svapiti vā ityēvaṁvidhalakṣaṇayuktāṁ striyaṁ mr̥tagarbhāṁ vidyāt|

Adhikarana mUDhagarBalakShaNam (28) · Śloka 28

taṁ tu garbhaṁ kadācidasamyagapatyapathamanēkadhā pratipannaṁ viguṇēnēva vāyunā pīḍitaṁ mōhitaṁ ca mūḍhagarbhamityāhuḥ| viguṇānilapratipīḍanavaicitryādasaṅkhyagatiṁ ca||28||

taṁ garbhaṁ kadācidvātavaśādasamyaganārjavēnāpatyapathaṁ yōnimārgaṁ pravr̥ttaṁ vāyunā pīḍitaṁ mōhitamaspandaṁ mūḍhagarbhamityāhurācāryyāḥ| vāyupīḍanavaicitryācca tasya garbhasyāsaṅkhyagatitvam|| 28||

Adhikarana mUDhagarBagatayaH sthAnAni ca (29) · Śloka 29

samāsatastu trividhā gatirurdhvā, tiryyaṅ, nyubjā ca| saṁsthānāni punaraṣṭau| tānyatraivōttaratra vakṣyantē||29||

saṁkṣēpēṇa trividhā gatirūrdhvādibhēdēna| ūrdhvā yasyāmutthitō garbha āyāti| tiraścīnā garbhiṇīpārśvayōḥ kr̥tapādaśirasaḥ| nyubjā adhaśśirasa ūrdhvapādasya| tasya ca garbhasyāṣṭau saṁsthānāni| tāni ca vakṣyantē- 1. sakthibhyāmāgamanamēkam| 2. ēkēna sakthnā dvitīyam| 3. sphiṅmūlēna tr̥tīyam| 4. tiryyak caturtham| 5. pārśvavr̥ttaśirasaḥ pañcamam| 6. bāhudvayēna ṣaṣṭham| 7. vakrēṇa pr̥ṣṭhēna pāṇipādaśirasā yōnimukhāgamanaṁ saptamam| 8. ēkēna pādēna yōniṁ dvitīyēna gudamityaṣṭamam|| 29||

Adhikarana asAdhyamUDhagarBAlakShaNam (30) · Śloka 30

tēṣu sarvēṣvapi viparītēndriyārthāmākṣēpayōnibhraṁśasaṁvaraṇamakkalaśvāsabhramābhipannāṁ śītagātrāṁ pūtyudgārāṁ ca varjayēt||30||

tēṣu sarvēṣvapi mūḍhagarbhēṣu viparītēndriyārthatvādiyuktāṁ garbhiṇīṁ varjayēt| na cikitsēdityarthaḥ|| 30||

Adhikarana mRutagarBashalyopekShAyAM vyApat (31) · Śloka 31

na tu kṣaṇamapyupēkṣēta garbhaśalyam| tadvinirucchavāsīkr̥tyā''śu jananīṁ hanyāt||31||

śalyabhūtaṁ garbhaṁ mr̥taṁ santaṁ kṣaṇamapi bhiṣaṅnōpēkṣēta| taddhi garbhaśalyaṁ jananyā ucchvāsarōdhaṁ kr̥tva tāṁ hanyāt|| 31||

Adhikarana sacetanamUDhagarBasya Cedane vyApattatrAnuShTheya~jca (32) · Śloka 32

sacētanaśca garbhaḥ śastrēṇa vidāryyamāṇō viṣayamaṅgāni vikṣipēt| tasmāt tatsaṅgē sūtyaḥ prayatēran purvōktāni ca mantrauṣadhāni prayuñjīta||32||

avijñānācca sacētanō'pi garbhaḥ śastrēṇa vidāryyamāṇō viṣamaṁ kr̥tvāṅgāni vikṣipan nirucchvāsīkr̥tya jananīṁ hanyāditi sambandhaḥ| tasmāttasya jivatō garbhasya saṅgē aprasavē sūtyō yā anubhūtānēkaprasavāstāḥ| prasavāya nānāvidhairupāyaiḥ prayatēran|| 32||

Adhikarana garBasa~ggasya traividhyam (33) · Śloka 33

trividhastu saṅgō bhavati| śirasyaṁsē jaghanē vā| tasya hi saṅgastrividhō bhavati| mūḍhagarbhanirharaṇantatra matāntarāṇi mūḍhagarbhasya tu jarāyupātanasāmānyaṁ karmētyēkē| mantrādika- rmātharvavēdavihitamityēkē| dr̥ṣṭakarmaṇā śalyahartrā śalyā- haraṇamityēkē||33||

yaḥ punarmūḍhagarbhastasyaikē ācāryyāḥ acētanasāmānyājjarāyupātanasadr̥śaṁ karmēti kathayanti| anyē mantrādikaṁ daivēhētōḥ| kēcidā''haraṇamāśukāritvātpratyakṣōpāyatvācca|

Adhikarana garBashastrakarmaNaH kaShTatamatvam (34) · Śloka 34

na tvataḥ kaṣṭatamamasti śastrakarma| yatō yōniyakr̥tplīhāntragarbhāśayādīnāṁ madhyē tānanupahiṁsatā'sparśavatā śastramavacāryyamutkarṣaṇavyāvartanōtkartanacchēdanabhēdanapīḍanarjūkaraṇāni caikēna pāṇinā kāryyāṇi||34||

atō garbhaśastrakarmaṇō'nyacchastrakarma kaṣṭatamaṁ nāsti| yatō yōnyādīni rakṣyāṇi sparśanēnaiva śastramavacāryyamadr̥ṣṭigōcaratvāt| ēkēnaiva pāṇinōtkarṣaṇādīni kāryyāṇītyatikaṣṭam|| 34||

Adhikarana mUDhagarBe prANasaMshayerAshu shastramavacAryam (35) · Śloka 35

tasmādīśvaramāpr̥cchya paraṁ ca yatnamāsthāya tadvidyasahitastamupakramēt| akriyāyāṁ dhruvaṁ maraṇam| upakramē saṁśayaḥ| tathōdarā'śmarīprabhr̥tīnapi||35||

tasmādbhiṣagīśvaramāpr̥cchya yathā mr̥tāyāmayaśasā yōgō na bhavatīti| paraṁ ca yatnamāsthāya kr̥tābhyāsaiśca bhiṣagbhiḥ śastrēṇōpakramēta| yasmādanāharaṇē garbhasya garbhiṇyāśca dhruvamavaśyaṁ mr̥tyurbhavati| upakramē tu saṁśayaḥ| prasaṅgādudarādīnāmapyēvaṁ vijñēyam|

Adhikarana mUDhagarBAharaNavidhiH (36) · Śloka 36

athōttānāyā vyābhugnasakthyā vastracumbalānnamitakaṭipradēśāyāśca dhanvanāgavr̥ntikāśālmalīpicchāghr̥tairabhyajya hastaṁ yōniṁ ca garbhamāharēt||36||

vyābhugnē saṅkucitē sakthinī| vastracumbalaṁ paṭṭamayaḥ kōmalapiṇḍaḥ| nāgavr̥ntikā sallakī svanāmikā| vā nāgamr̥ttikēti pāṭhaḥ| hastaṁ bhiṣajaḥ| ityuttānāyā garbhamāharēt|| 36||

Adhikarana tatra prakArAntaranirdeshaH (37) · Śloka 37

tatra sakthibhyāmāgatasyānulōmamāñchanamēva| ēkasakthiprapannasyētaraṁ sakthiṁ prasāryya| sphigdēśāgatasya sphigdēśaṁ pratiṣidhyōrdhvamutkṣipya sakthinī prasāryya| tiryyagāgatasya parighasyēvāparārdhamutkṣipya pūrvārdhamapatyapathaṁ pratyārjavamānīya| pārśvāpavr̥ttaśirasōṁ'saṁ pratipīḍyōrdhvamutkṣipya śirō'patyapathamānīya| bāhudvayaprapannasyōrdhvamutpīḍyā'sau śirōmūlamānīya nirharēt||37||

tatrētyādi ācchānamātmadikkarṣaṇam| sakthinī prasāryya tannirharēditi sambandhaḥ| sphigdēśaṁ yōnimukhādantairnītvā pādau yōnimukhamānīya| sakthinī prasārya garbhasya| parighō daṇḍākāra āyudhō yōnimadhyē hi tatparivartanē chinattīti| pūrvārdhaṁ śirōbhāgaḥ| pārśvē vakraṁ śirō yasya| tasyāṁ sampratipīḍya śira apatyapathamānīya nirharēt|| 37||

Adhikarana shastradAraNArhamUDhagarBalakShaNam (38) · Śloka 38

yastvābhugnamadhyaḥ pāṇipādaśirōbhiryōniṁ pratipadyatē| yaścābhugna ēkēna pādēna yōniṁ dvitīyēna pāyum| tau mūḍhau hastēnāhartumaśakyāviti śastramavacārayēt||38||

yau vā tābhyāṁ saṁsthānābhyāṁ mūḍhagarbhau tau dvāvēva hastēnāharttumaśakyatvāt śastradāraṇamarhataḥ|| 38||

Adhikarana tatra shastrAvadAraNavidhiH (39) · Śloka 39

atha striyamāśvāsya maṇḍalāgrēṇāṅguliśastrēṇa vā (śirō) vidāryya śirāḥ kapālānyāhr̥tya garbhaśaṅkunā gr̥hītvā cibukē tālunyurasi kakṣyāyāṁ vā'paharēt| abhinnaśirasaṁ cākṣikūṭē gaṇḍē vā| tathāsaṁsaktasyāṁsadēśē bāhuṁ chitvā| dr̥tērivādhmātasya vātapūrṇamudaramavadāryya nirasyāntrāṇi śithilībhūtamāharēt| jaghanasaktasya jaghanakapālāni dārayitvēti||39||

athētyādi subōdham| garbhaśaṅkuḥ pūrvōktaṁ vakravaktraṁ yantram| garbhasya hi kakṣyādyāsajjanē baḍiśavat| yasya tu yuktivaśāt kapālānyavidāritāni tasyākṣikūṭē gaṇḍē vā śaṅkvā baḍiśavat sakthiḥ|| 39||

Adhikarana api ca- (40) · Śloka 40

yadyadvāyuvaśādaṅgaṁ sajjēdgarbhasya khaṇḍaśaḥ| tattacchitvā harētsamyagrakṣētrārīṁ ca yatnataḥ||40||

api cēti samuccayē| yadityādi subōdham|| 40||

Adhikarana vyapagatagarBashalyAyA upacArAH (41) · Śloka 41

athāpatantīmaparāṁ pātayētpūrvavadbhiṣak| ēvaṁ nirhr̥taśalyāntu siñcēduṣṇēna vāriṇā| dadyādabhyaktadēhāyai yōnau snēhapicuṁ tataḥ| yōnirmr̥durbhavattēna śūlaṁ cāsyāḥ praśāmyati| dīpyakātiviṣārāsnāhiṁgvēlāpañcakōlakāt| cūrṇaṁ snēhēna kalkaṁ vā kvāthaṁ vā pāyayēttaḥ| kaṭukātiviṣāpāṭhāśākatvaghiṅgutaijanīḥ| tadvacca dōṣasyandārthaṁ vēdanōpaśamāya ca| trirātramēvaṁ saptāhaṁ snēhamēva tataḥ pibēt| sāyaṁ pibēdariṣṭaṁ ca tathā sukr̥tamāsavam| śirīṣakakubhakvāthapicūnyōnau ca nikṣipēt| upadravāśca yē'nyē syustānyathāsvamupācarēt| payō vātaharaiḥ siddhaṁ daśāhaṁ bhōjanē hitam| rasō daśāhaṁ ca paraṁ laghupathyālpabhōjanā| snēhābhyaṅgaparā snēhān balātailādikān bhajēt| ūrdhvañcaturbhyō māsēbhyaḥ sa kramēṇa sukhāni ca||41||

mr̥tagarbha āhatē yā'vaśiṣṭa'parā sa pūrvōktā| dīpyakādīnāṁ samānāṁ cūrṇaṁ snēhēna ghr̥tādyanyatamēna yathāyōgyaṁ pāyayēt| tēṣāmēva kalkaṁ va| kalkō jalapiṣṭadravyam| dīpyakādivat kaṭukādīni| ēvamēvauṣadhēna trirātramāsīta dōṣasrāvāya vēdanōpaśamāya ca| dōṣō na vātādiḥ| apitu raktapicchādiḥ| tryahādūrdhvaṁ snēhamēva saptarātraṁ pibēt| auṣadhapratiṣēdhārthamēvakāraḥ| ēvaṁ sāyamariṣṭaṁ prātaḥ snēhē pītē| upadravā jvarādayō vyādhayaḥ| ēvaṁ tryahamauṣadham| snēhaḥ saptarātram| daśāhaṁ payaḥ| daśāhaṁ māṁsarasa iti kramaḥ| tatō'nantaraṁ snēhābhyaṅgaparā satī vātavyādhinirdiṣṭān balātailādikān bhajēt| ādiśabdēna tatsvarūpāṇāmanyēṣāṁ grahaṇam| tataścaturthamāsāntaṁ yāvallaghubhōjanatvādiyuktā, pañcamānmāsādārabhya kramēṇa na sahasa yathēṣṭāni sukhāni bhajēt|| 41||

Adhikarana balAtailam (42) · Śloka 42

atha balātailamupadēkṣyāmaḥ| balāmūlākaṣāyasya bhāgāḥ ṣaṭ| tāvanta ēva payasō yavakōlakulatthadaśamūlaka- ṣāyasya bhāgō bhāgaścaturdaśastailasya| tatsarvamaikadhyaṁ kr̥tva ślakṣṇapiṣṭāni cāvāpya kākōlīkṣīrakākōlī- jīvakarṣabhakamudgaparṇīmāṣaparṇīmēdākṣīraśuklāmadhu- kadēvadārumañjiṣṭhācandanaśārivātagarakuṣṭhaśatāvaryyaśva- gandhāpunarnavāśatapuṣpāvarāpatrarasasaralaśailēyailāvacā- 'garukālānusārisaindhavāni śanairmr̥dvagninā sādhayitvā subhājanē'nuguptaṁ nidadhyāt| ēṣa bhagavatō dhanvantarē- rabhimatastailarājō rājñāṁ rājamātrāṇāṁ sūtikānāṁ kr̥śānāṁ śiśūnāmatītavayasāṁ sukumārāṇāṁ śūlināṁ mahāgraha- gr̥hītānāṁ dīrgharōgakṣapitavapuṣāṁ marmaviddhapatitābhihata- bhagnaviśliṣṭadēhānāṁ daivōpaghātātabhiśaptamanōjvaraparī- tānāṁ pānanāvanābhyaṅgabastiṣu prayōjyaḥ| tēna bala- pauruṣasmr̥timatimēdhāgnivīryyaujāṁsi vivardhantē| pakṣā- ghātākṣēpakārdditādivividhavātavikāragulmahikkāśvāsa- kāsā nivartantē| aharahaścōpayujyamānē ṣaṇmāsādantra- vr̥ddhiḥ praśāmyati ca| vandhyā ca putraṁ guṇavantamicchayā labhata iti||42||

snēhān bhajēdityuktiprasaṅgēna balātailamēkamucyatē| dvitīyaṁ tu balāśataṁ chinnaruhāpādamityādiśabdayuktaṁ vakṣyatē| athēti maṅgalārthaḥ| balāmūlakvāthasya ṣaḍ bhāgāḥ| kṣīrasya ṣaḍēvaṁ dvādaśa| yavādīnāṁ trayāṇāṁ caturthasya daśamūlasya caikīkr̥tya kvāthasyaikō bhāgaḥ| ēvaṁ trayōdaśa bhāgāḥ kvāthasya| caturdaśō bhāgastailasya| tailāccaturthabhāgēnāvāpanam| kvāthyadravyāṇāṁ jalāt ṣōḍaśāṁśaṁ mānam| kvāthadravyāccaturguṇaḥ kvāthaśēṣaḥ| daśamūlasamudāyasya yavādyanyatamasamatvam| kākōlyādīnāṁ parasparasamatvam| kṣīraśuklā kṣīrakākōlī| patraṁ gandhapatram| rasō bōlaḥ| kālānusāryyamuśīram| ēvaṁ dvātriṁśadāvāpanadravyāṇi|| subōdham|| 42||

Adhikarana mRutagarBiNyA jIvadgarBaniShkAsanam (43) · Śloka 43

bhavanti cātra- bastidvārē vipannāyāḥ kukṣiḥ praspandatē yadi| janmakālē tataḥ śīghraṁ pāṭayitvōddharēcchiśum||43||

bhavanti cātrēti tantrarītiḥ| garbhasya janmakālē jīvatō yadi mātā vipannā syāttataḥ kukṣipraspandanēna jīvantaṁ garbhaṁ viditvā tatō bastidvārē vipāṭya tamuddharēt|| 43||

Adhikarana garBasrAve mAsAnusAraM garBasthA- pakAH yogAH (44) · Śloka 44

madhukaṁ śākabījaṁ ca payasyā suradāru ca| aśmantakaḥ kr̥ṣṇatilāstāmravallī śatāvarī| vr̥kṣādanī payasyā ca latā cōtpalaśārivā| anantā śārivā rāsnā padmā ca madhuyaṣṭikā| br̥hatīdvayakāśmaryyakṣīriśr̥ṅgatvacō ghr̥tam| pr̥śniparṇībalāśigruḥ śvadaṁṣṭrāmadhuparṇikā| śr̥ṅgāṭakaṁ bisaṁ drākṣā kaśērumadhukaṁ balā| saptaitān payasa yōgānardhaślōkasamāpanān| kramāt saptasu māsēṣu garbhē sravati yōjayēt||44||

madhukādīni catvāri prathamē māsē garbhaṁ sravati yōjayēdyathāyōgyakalpanayā aśmantakādīni dvitīyē| aśmantakō bhālukaparṇaḥ| tāmravallī rāmataruṇī mañjiṣṭhā vā| vr̥kṣādanyādīni pañca tr̥tīyē| vr̥kṣādanī drumavyādhiḥ| saiva vandākaḥ| latā priyaṅguḥ| anantādīni pañca caturthē māsi yōjayēt| anantā dūrvā| padmā padmacāriṇī| ghr̥taṁ yathōpayōgam| kṣīrivr̥kṣāṇāṁ śr̥ṅgatvacō yathālābhaṁ pañcamē| śr̥ṅgamaṅkuram| pr̥śniparṇyādīni ṣaḍ ṣaṣṭhē| śvadaṁṣṭrā gōkṣurakaḥ| madhuparṇikā jīvantī| śr̥ṅgāṭakādīni saptamē|| 44||

Adhikarana aShTamamAsAtpraBRutigarBasyApyAyanAyogAH (45) · Śloka 45

kapitthabilvabr̥hatīpaṭōlēkṣunidigdhakāt| mūlaiḥ śr̥taṁ prayuñjīta kṣīraṁ māsē tathā'ṣṭamē| navamē sārivānantāpayasyāmadhuyaṣṭibhiḥ| yōjayēddaśamē māsi siddhaṁ kṣīraṁ payasyayā| athavā yaṣṭimadhukanāgarāmaradārubhiḥ||45||

iti vaidyapatisiṁhaguptasya sūnōrvāgbhaṭasya kr̥tau aṣṭāṅgasaṁgrahasaṁhitāyāṁ śārīrasthānē garbha- vyāpannāma caturthō'dhyāyaḥ kapitthādīnāṁ ṣaṇṇāṁ mūlaiḥ śr̥taṁ kṣīramaṣṭamē| śārivādicatuṣṭayēna navamē| payasyayā daśamē| athavā yaṣṭimadhukāditrayēṇa daśamē| sarvaṁ br̥ṁhaṇamāmānvayaṁ vinā jñēyam|| 45|| iti śrīmanmahāmahōpādhyāyēnduviracitāyā- maṣṭāṅgasaṁgrahavyākhyāyāṁ śaśilēkhāyāṁ śarīrasthānē caturthō'dhyāyaḥ