7. annarakṣādhyāyaḥ

Adhikarana adhyAyopakramaH · Śloka

অন্নপানস্বরূপং শরীরসন্ধারণার্থং প্রাগুক্তম্| পথ্যমপি চান্নপানং বিষাদ্যুপহতং রোগায মৃত্যবে বা সম্পদ্যতে, অতস্তদ্রক্ষার্থমধ্যাযোঽযমারভ্যতে-

Adhikarana annarakShAdhyAyaH saptamaH (2-3) · Śloka 3

অথাতোঽন্নরক্ষাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| )||৩||

স০-অন্নস্য রক্ষা-অন্নরক্ষা| সোপদিষ্টা যত্রাধ্যাযে, সোঽপ্যুপচারাদন্নরক্ষেত্যুচ্যতে| যথা, শিশুপালবধঃ কাব্যমিতি| শেষং ব্যাখ্যানমত্র পূর্ববত্কার্যম্|

Adhikarana rAjanikaTe vaidyasthitiH (1) · Śloka 1

রাজা রাজগৃহাসন্নে প্রাণাচার্যং নিবেশযেত্| সর্বদা স ভবত্যেবং সর্বত্র প্রতিজাগৃবিঃ||১||

স০-রাজা-নৃপঃ, প্রাণাচার্যং-বৈদ্যং, রাজগৃহাসন্নে নিবেশযেত্-আবাসযেত্| এবং সতি যো গুণঃ স্যাত্তমাহ-সর্বদেত্যাদি| সর্বদা-সর্বকালং রাত্রিদিবসমেব, নৃপভবনসমীপস্থিতঃ সঃ-বৈদ্যঃ সর্বত্র-অন্নপানশযনমাল্যাদৌ, প্রতিজাগৃবিঃ-দত্তাবধানো ভবতি|

Adhikarana vaidyena rAj~jo~annapAnaM viShAdrakShyam (2) · Śloka 2

ননু, কিমেবং ক্রিযতে? ইত্যাহ- অন্নপানং বিষাদ্রক্ষেদ্বিশেষেণ মহীপতেঃ| যোগক্ষেমৌ তদাযত্তৌ ধর্মাদ্যা যন্নিবন্ধনাঃ||২||

স০-মহীপতেঃ সম্বন্ধ্যন্নপানং বিষাত্-বিষসংস্পর্শাত্, বিশেষেণ-অতিশযেন রক্ষেত্| অন্নপানমিত্যুপলক্ষণম্| শযনবস্ত্রগন্ধরত্নমাল্যাদীনামপি পরিরক্ষ্যত্বাত্| ননু, কিমিতি, নৃপান্নপানাদি বিশেষেণ রক্ষেত্ ? ইত্যাহ-যোগেত্যাদি| যোগঃ-অন্নবস্ত্রাদিভিঃ সম্বন্ধঃ| ক্ষেমঃ-তেষামন্নাদীনাং চৌরাদ্যুপদ্রবরক্ষণাত্| দ্বাবপ্যেতৌ তদাযত্তৌ-নৃপাযত্তৌ স্যাতাম্| ক্ষেমশব্দোঽর্ধর্চাদিঃ| ধর্মাদ্যা ইতি ধর্মার্থকামমোক্ষাঃ| যন্নিবন্ধনাঃ-যোগক্ষেমনিবন্ধনাঃ|

Adhikarana saviShAnnalakShaNam (3-4) · Śloka 4

সম্প্রতি বিষদুষ্টস্য ভক্তস্য লক্ষণমাহ ওদনো বিষবান্ সান্দ্রো যাত্যবিস্ত্রাব্যতামিব| চিরেণ পচ্যতে পক্বো ভবেত্পর্যুষিতোপমঃ||৩|| মযূরকণ্ঠতুল্যোষ্মা মোহমূর্ছাপ্রসেককৃত্| হীযতে বর্ণগন্ধাদ্যৈঃ ক্লিদ্যতে চন্দ্রিকাচিতঃ||৪||

স০-বিষবানোদনঃ সান্দ্রো-বিলেপ্যাকারঃ| তথা, বিস্রাবযিতুং শক্যো-বিস্রাব্যঃ, নৈবং যোঽসৌ-অবিস্রাব্যঃ, তস্য ভাবঃ, অবিস্রাব্যতামিব যাতি| চিরেণ কালেন পচ্যতে| পক্বশ্চ পর্যুষিতভক্তমুপমা যস্য স পর্যুষিতোপমো ভবেত্, নিরূষ্মা স্তব্ধশ্চ সদ্যোঽবতারিতোঽপি স্যাদিত্যর্থঃ| তস্য চ ভক্তস্য সম্বন্ধী মযূরকণ্ঠতুল্যোষ্মা মোহাদীন্ করোতি| মযূরকণ্ঠেন তুল্যো নানাবর্ণো মযূরকণ্ঠতুল্যঃ, স চাসাবূষ্মা চেতি| ঊষ্মা-বাষ্পঃ| তথা, অসাবোদনো বর্ণগন্ধাদ্যৈর্হীযতে| আদি (দ্য) শব্দেন রসাদীনাং গ্রহণম্| ক্লিদ্যতে-প্রক্লিন্নো ভবতি| তথা, জলমধ্যক্ষিপ্ততৈলবিন্দুসদৃশৈশ্চন্দ্রিকৈরাচিতো ভবতি| ইতি চক্ষুরাদিভিঃ পরীক্ষা|

Adhikarana vya~jjanAdInAM parIkShA (5-6) · Śloka 6

ব্যঞ্জনানাং পরীক্ষামাহ ব্যঞ্জনান্যাশু শুষ্যন্তি ধ্যামক্বাথানি তত্র চ| হীনাঽতিরিক্তা বিকৃতা ছাযা দৃশ্যেত নৈব বা||৫|| ফেনোর্ধ্বরাজীসীমন্ততন্তুবুদ্বুদসম্ভবঃ| বিচ্ছিন্নবিরসা রাগাঃ খাণ্ডবাঃ শাকমামিষম্||৬||

স০-ব্যঞ্জনানি-বার্তাকাদীনি দধিতক্রদাডিমাদিসংস্কৃতানি, আশু-ক্ষিপ্রং শুষ্যন্তি| তথা, ধ্যামো-মলিনঃ ক্বাথো যেষাং তান্যেবম্| তত্র চ-তেষু ব্যঞ্জনবত্সু ক্বাথেষু, হীনা-ভুজাদিহীনা, অধিকা, বিকৃতা-শিরোবিরহাদিলক্ষণবিকারোপেতা চাত্মীযা ছাযা-প্রতিবিম্বং, দৃশ্যতে| নৈব বা-কীদৃশ্যপি ছাযা ন দৃশ্যতে| ন চেদমরিষ্টম্, সনিমিত্তত্বাত্| তেষ্বেব ব্যঞ্জনেষু ফেনাদীনাং সম্ভবঃ| তত্রেতি প্রকৃতব্যঞ্জনোপলক্ষিতেষু সর্বদ্রবেষ্বেব| বিশেষেণ পুনর্লবণোল্বণদ্রবে ফেনমালা| ঊর্ধ্বরাজীসম্ভবং তু রসকাদিষু স্বযং দর্শযিষ্যতি| বিচ্ছিন্নবিরসা রাগা ইতি| রাগাঃ-দ্রাক্ষাদিকৃতাঃ, ঋতুচর্যোক্তলক্ষণাঃ, বিচ্ছিন্না বিরসাশ্চ ভবন্তি| ক্বচিদ্রাগো দৃশ্যতে ক্বচিন্নেতি বিচ্ছিন্নত্বম্| ক্বচিদ্রসো দৃশ্যতে ক্বচিন্নেতি বিরসত্বম্| এবং খাণ্ডবোঽপি| শাকমামিষং চ বিচ্ছিন্নং-স্থানে স্থানে ত্রুটিতম্, বিরসং চ|

Adhikarana mAMsarasAdidraveShu reShA visheShaH,phaleShupAkavisheShaH mAlyavastradhAtvAdiShu visheShaH (7-12) · Śloka 12

যত্র দ্রবে যাদৃশী রাজী সম্ভবতি, তাং বিশেষতো দর্শযন্নাহ নীলা রাজী রসে, তাম্রা ক্ষীরে, দধনি দৃশ্যতে| শ্যাবাঽঽপীতাসিতা তক্রে, ঘৃতে পানীযসন্নিভা||৭|| মস্তুনি স্যাত্কপোতাভা, রাজী কৃষ্ণা তুষোদকে| কালী মদ্যাম্ভসোঃ, ক্ষৌদ্রে হরিত্তৈলেঽরুণোপমা||৮|| পাকঃ ফলানামামানাং পক্বানাং পরিকোথনম্| দ্রব্যাণামার্দ্রশুষ্কাণাং স্যাতাং ম্লানিবিবর্ণতে||৯|| মৃদূনাং কঠিনানাং চ ভবেত্স্পর্শবিপর্যযঃ| মাল্যস্য স্ফুটিতাগ্রত্বং ম্লানির্গন্ধান্তরোদ্ভবঃ||১০|| ধ্যামমণ্ডলতা বস্ত্রে, শদনং তন্তুপক্ষ্মণাম্| ধাতুমৌক্তিককাষ্ঠাশ্মরত্নাদিষু মলাক্ততা||১১|| স্নেহস্পর্শপ্রভাহানিঃ সপ্রভত্বং তু মৃণ্মযে| |১২|

স০-রসে-মাংসরসে বিষবতি, নীলা-নীলবর্ণা, রাজী দৃশ্যত ইতি প্রকৃতেন সম্বন্ধঃ| এবং চাগ্রেঽপি রাজী দৃশ্যত ইতি যোজ্যম্| ক্ষীরে-ক্ষীরমধ্যে, তাম্রা-তাম্রবর্ণা| দধনি-দধ্নিশ্যাবা| তক্রে আপীতাসিতা-আনীলপীতা| ঘৃতে সলিলনিভা| মস্তুনি কপোতাভা| তুষোদকে-কাঞ্জিকে, রাজী কৃষ্ণা| মদ্যেঽম্ভসি চ কালী| মাক্ষিকে হরিদ্বর্ণা| তৈলেঽরুণোপমা-ঈষল্লোহিতবর্ণা| উদাহরণমাত্রং ত্বেতত্, তেন বসাগন্ধস্য চ তৈলে সম্ভবঃ, দ্রবৌষধস্য কপিলা, ইতি| তথা, আমানাং ফলানাং পাকঃ| পক্বানাং পরিকোথনং-শাতনং ভবতি| আর্দ্রশুষ্কাণাং যথা সংখ্যং ম্লানতা-শুষ্কাভাসত্বম্, তথা বিবর্ণতা-শ্যাবত্বাদি লক্ষণা| মৃদূনাং কঠিনত্বম্, কঠিনানাং মৃদুত্বম্, অযং স্পর্শবিপর্যযঃ| মাল্যস্য-পুষ্পস্য, স্ফুটিতং-বিশীর্ণং, অগ্রং-প্রান্তো যস্য তত্স্ফুটিতাগ্রম্, তস্য ভাবস্তত্ত্বম্| তথা, ম্লান্যুদ্ভবো-ম্লানতা, গন্ধান্তরোদ্ভবঃ-স্বগন্ধনাশোঽন্যগন্ধসম্ভবশ্চ| ধ্যামানি-মলিনানি, মণ্ডলানি-বৃত্তানি, তেষাং ভাবো ধ্যামমণ্ডলতা, বস্ত্রে-আস্তরণপ্রাবরণাদিরূপে স্যাত্| শদনং-শাতঃ পাতঃ স্যাত্| কেষাম্ ? তন্তুপক্ষ্মণাম্,-তন্তূনাং-সূত্রাণাং পক্ষ্মণাং চ পার্শ্ববর্তিনাং, বস্ত্রসম্বন্ধিনামেব| ধাতুঃ-সুবর্ণাদিঃ মৌক্তিকং-মুক্তা, কাষ্ঠং-দারু, অশ্মা-পাষাণঃ, রত্নানি-বজ্রমরকতাদীনি, আদিশব্দেন শঙ্খশুক্ত্যাদিপরিগ্রহঃ, তেষু মলাক্ততা-পঙ্কমলোপদিগ্ধতা| স্নেহহানিঃ-তেষামেব ধাত্বাদীনাং স্নেহস্য ব্যপগমঃ| এবং স্পর্শপ্রভাহানিঃ| মৃণ্মযে তু ভাণ্ডে সবিষে নিষ্প্রভেঽপি সপ্রভত্বম্|

Adhikarana viShadAtRulakShaNam (12-13) · Śloka 13

ইদানীং যো বিষং দদাতি, তস্য লক্ষণমাহ | বিষদঃ শ্যাবশুষ্কাস্যো বিলক্ষো বীক্ষতে দিশঃ||১২|| স্বেদবেপথুমাংস্ত্রস্তো ভীতঃ স্খলতি জৃম্ভতে| |১৩|

স০-বিষং দদাতীতি-বিষদো নরঃ, শ্যাবং-শ্যামং শুষ্কমাস্যংমুখং, যস্যাসৌ শ্যাবশুষ্কাস্যঃ,-শ্যামশুষ্কবদনঃ| কিং করোতি? বিলক্ষো বীক্ষতে দিশঃ,- দিশ ইতি সমন্তাদিত্যর্থঃ, বিলক্ষ ইতি লজ্জাবান্, বীক্ষতে-অবলোকযতি| কিঞ্চ, স্বদোষশঙ্কযা স্বেদবান্, বেপথুমান্, ত্রস্তঃ-শরীরেণ জাতকম্পত্বাত্, ভীতঃ-চিত্তেন সোদ্বেগতযোপলক্ষ্যমাণত্বাত্| স্তম্ভকুড্যাদিভিরাত্মানমন্তর্ধাপযিতুমিচ্ছন্নিতস্ততো গচ্ছংশ্চ স্খলিতগতির্ভবতি, তত আহ-স্খলতি| পুনঃপুনশ্চ জৃম্ভাং করোতি, তেনাহ জৃম্ভতে| উপলক্ষ্ণং চেদং তত্তত্কালভাবিনীনাং ক্রিযাণাম্| তদ্যথা (সঙ্গ্রহে সূ.অ.৮)-"অস্থানহাসী, পৃষ্টোঽসম্বদ্ধমুত্তরং দদাতি নৈব বা দদাতি, বিবক্ষুর্মুহ্যতি, অঙ্গুলীঃ স্ফোটযতি, শিরঃ কণ্ডূযতে, ওষ্ঠৌ লেঢি, ভুবং বিলিখতি, ক্রিযাসু ত্বরতে, বিপরীতমাচরতি, স্বভূমৌ চ নাবতিষ্ঠতে|" ইতি|

Adhikarana saviShasyAnnasyAgnikShepAdinA parIkShA (13-14) · Śloka 14

ইদানীং সবিষযস্যাগ্নিপ্রক্ষেপণাদিকমুপদিশন্নাহ | প্রাপ্যান্নং সবিষং ত্বগ্নিরেকাবর্তঃ স্ফুটত্যতি||১৩|| শিখিকণ্ঠাভধূমার্চিরনর্চির্বোগ্রগন্ধবান্| |১৪|

স০-সবিষমন্নং প্রাপ্যাঽগ্নিঃ স্ফুটত্যতি-চটচটাযতে, অতিশযেনেত্যর্থঃ| একাবর্ত ইতি এক এবাবর্তো যস্য, সংহতসর্বজ্বালত্বাদসাবেকাবর্তঃ| শিখিকণ্ঠাভধূমার্চিঃ,-শিখী-মযূরঃ, তস্য কণ্ঠঃ-ইন্দ্রাযুধবদনেকবর্ণঃ, তস্যেবাভা যযোর্ধূমার্চিষোস্তে শিখিকণ্ঠাভে, তে তাদৃশে ধূমার্চিষী যস্যাগ্নেরসৌ শিখিকণ্ঠাভধূমর্চিঃ ইন্দ্রাযুধবদনেকবর্ণধূমজ্বাল ইতি যাবত্| অনর্চির্বা-অজ্বাল ইতি বা| উগ্রগন্ধবানিতি কুণপগন্ধবান্| নিদর্শনং চেদম্| ধূমোঽপ্যস্য প্রসেকরোমহর্ষশিরোবেদনাপীনসদৃষ্ট্যা কুলতা অপ্যুত্পাদযতি|

Adhikarana makShikAkAkAdiBiH parIkShA saviShAnnatyAgaprakAraH (14-18) · Śloka 18

স্নেহলবণযোগাদপ্যগ্নিরেবং স্যাত্, অতঃ পক্ষিমৃগৈরপি পরীক্ষাপ্রকারান্তরং দর্শযন্নাহ | ম্রীযন্তে মক্ষিকাঃ প্রাশ্য কাকঃ ক্ষামস্বরো ভবেত্|১৪| উত্ক্রোশন্তি চ দৃষ্ট্বৈতচ্ছুকদাত্যূহসারিকাঃ| হংসঃ প্রস্খলতি, গ্লানির্জীবঞ্জীবস্য জাযতে||১৫|| চকোরস্যাঽক্ষিবৈরাগ্যং, ক্রৌঞ্চস্য স্যান্মদোদযঃ| কপোতপরভৃদ্দক্ষচক্রবাকা জহত্যসূন্||১৬|| উদ্বেগং যাতি মার্জারঃ শকৃন্মুঞ্চতি বানরঃ| হৃষ্যেন্মযূরস্তদৃষ্ট্যা মন্দতেজো ভবেদ্বিষম্||১৭|| ইত্যন্নং বিষবজ্জ্ঞাত্বা ত্যজেদেবং প্রযত্নতঃ| যথা তেন বিপদ্যেরন্নপি ন ক্ষুদ্রজন্তবঃ||১৮||

স০-সবিষমন্নমিত্যনুবর্ততে| মক্ষিকাঃ সবিষমন্নং প্রাপ্যম্রিযন্তে-মক্ষিকাঃ সবিষেঽন্নে ন নিলীযন্তে, নিলীনাস্তু সদ্যো বিপদ্যন্তে| বিষদুষ্টাহারাত্ কাকঃ ক্ষামস্বরো ভবেত্| উত্ক্রোশন্তি-উচ্চৈঃ কূজন্তি, দর্শনাদেব শুকদাত্যূহসারিকাঃ| বিষদর্শনমাত্রাদেব চ হংসগতিঃ স্খলতি| গ্লানির্জীবঞ্জীবস্য জাযতে| উপলক্ষণং চেদম্| মরণমপি কস্যচিন্ন গ্লানিরেব, এবং জীবঞ্জীবকস্য| চকোরস্য অক্ষিবিরক্ততা| 'দৃষ্ট্বৈতত্' ইতি সর্বত্র যোজনীযম্| ক্রৌঞ্চস্য মদোদযো-মদোত্পত্তিঃ স্যাত্| কপোতপরভৃদ্দ্দক্ষচক্রবাকাস্ত্যজন্ত্যসূন্-প্রাণান্বিমুঞ্চন্তি, চাত্যর্থং মরণদুঃখাভ্যাহতাঃ| উদ্বিজতেঽত্যর্থং মার্জারঃ| বানরস্তু শকৃত্পুরীষং মুঞ্চতি| উপলক্ষণং চেদম্| পৃষ্ঠতোমুখো রোদিতি চ| তথা, হৃষ্যেন্মযূরস্তদ্দৃষ্ট্বা| তদিতি সবিষান্নপরামর্শঃ| দৃষ্ট্বেত্যনুবর্তমানেঽপি পুনর্দৃষ্ট্বেতি বচনং সর্বত্র মধ্যে সম্প্রত্যযার্থম্, আদ্যন্তাভ্যং গৃহীতত্বাত্| বিষং চাস্য দর্শনাদেব মন্দতেজস্কং ভবতি| ইতি-এবং পূর্বোক্তাভিঃ পরীক্ষাভিঃ, অন্নং-ভক্তাদি, বিষবত্-বিষসংসৃষ্টং, জ্ঞাত্বা ত্যজেদেতত্| কথম্? প্রযত্নতঃ-প্রযত্নেন| তমেব প্রযত্নং দর্শযন্নাহ-যথা-যেন প্রকারেণ ত্যজ্যমানেন, ক্ষুদ্রজন্তবো-মক্ষিকাদযোঽপি, তেন-বিষেণ, ন বিপদ্যেরন্ ন নশ্যেযুঃ তথা ত্যজেত্| ক্ষুদ্রজন্তবোঽপি কিং পুনর্মহান্তঃ, ইত্যপি শব্দার্থঃ|

Adhikarana saviShasyAnnasyAgnikShepAdinA parIkShA (13-14) · Śloka 14

ইদানীং সবিষযস্যাগ্নিপ্রক্ষেপণাদিকমুপদিশন্নাহ | প্রাপ্যান্নং সবিষং ত্বগ্নিরেকাবর্তঃ স্ফুটত্যতি||১৩|| শিখিকণ্ঠাভধূমার্চিরনর্চির্বোগ্রগন্ধবান্| ||১৪||

স০-সবিষমন্নং প্রাপ্যাঽগ্নিঃ স্ফুটত্যতি-চটচটাযতে, অতিশযেনেত্যর্থঃ| একাবর্ত ইতি এক এবাবর্তো যস্য, সংহতসর্বজ্বালত্বাদসাবেকাবর্তঃ| শিখিকণ্ঠাভধূমার্চিঃ,-শিখী-মযূরঃ, তস্য কণ্ঠঃ-ইন্দ্রাযুধবদনেকবর্ণঃ, তস্যেবাভা যযোর্ধূমার্চিষোস্তে শিখিকণ্ঠাভে, তে তাদৃশে ধূমার্চিষী যস্যাগ্নেরসৌ শিখিকণ্ঠাভধূমর্চিঃ ইন্দ্রাযুধবদনেকবর্ণধূমজ্বাল ইতি যাবত্| অনর্চির্বা-অজ্বাল ইতি বা| উগ্রগন্ধবানিতি কুণপগন্ধবান্| নিদর্শনং চেদম্| ধূমোঽপ্যস্য প্রসেকরোমহর্ষশিরোবেদনাপীনসদৃষ্ট্যা কুলতা অপ্যুত্পাদযতি|

Adhikarana vaktrage viShe lAlAdayaH teShAmauShadham (21-22) · Śloka 22

লালা জিহ্বোষ্ঠযোর্জাড্যমূষা চিমিচিমাযনম্| দন্তহর্ষো রসাজ্ঞত্বং হনুস্তম্ভশ্চ বক্ত্রগে||২১|| সেব্যাদ্যৈস্তত্র গণ্ডূষাঃ সর্বং চ বিষজিদ্ধিতম্| |২২|

স০-বক্ত্রগে-মুখপ্রাপ্তে, লালা ভবতি| জিহ্বোষ্ঠযোর্জাড্যং ভবতি, ঊষাদযশ্চ স্যুঃ| রসাজ্ঞত্বং-জিহ্বা রসং ন চেতযত ইত্যর্থঃ| হন্বোঃ স্তম্ভশ্চ স্যাত্| তত্র সেব্যাদ্যৈঃ-পূর্বোক্তৈঃ, গণ্ডূষা হিতাঃ| সর্বং চ-অন্যদপি, যদ্বিষং জযতি তদ্ধিতম্|

Adhikarana AmAshayagate vamanAdayaH pakkAshyagate vamanAdayaH teShAmauShadham (22-26) · Śloka 26

| আমাশযগতে স্বেদমূর্চ্ছাধ্মানমদভ্রমাঃ||২২|| রোমহর্ষো বমির্দাহশ্চক্ষুর্হৃদযরোধনম্| বিন্দুভিশ্চাচযোঽঙ্গানাং, পক্বাশযগতে পুনঃ||২৩|| অনেকবর্ণং বমতি মূত্রযত্যতিসার্যতে| তন্দ্রা কৃশত্বং পাণ্ডুত্বমুদরং বলসঙ্ক্ষযঃ||২৪|| তযোর্বান্তবিরিক্তস্য হরিদ্রে কটভীং গুডম্| সিন্দুবারিতনিষ্পাববাষ্পিকাশতপর্বিকাঃ||২৫|| তণ্ডুলীযকমূলানি কুক্কুটাণ্ডমবল্গুজম্| নাবনাঞ্জনপানেষু যোজযেদ্বিষশান্তযে||২৬||

স০-বিষান্নে আমাশযং প্রাপ্তে স্বেদাদযঃ স্যুঃ| অক্ষিহৃদযযোঃ রোধনং-স্তম্ভঃ| বিন্দুভিঃ-নানাবর্ণৈঃ, অঙ্গানামাচযঃ-সমন্তাচ্চযনম্| পক্বাশযগতে তু বিষেঽনেকবর্ণং বমতি, মূত্রযতি, অতিসার্যতে, তন্দ্রাদযশ্চ ভবন্তি| তযোঃ-আমপক্বাশযগতযোর্বিষযোঃ, বর্তমানস্য পুংসো যথাযোগং বান্তবিরিক্তস্য হরিদ্রে কটভীত্যাদিকমৌষধং নাবনাদিষু যোজযেত্| তত্র মদনফলালাবুকুম্ভীকোশাতকীফলৈর্মধুযুক্তৈর্নিষ্পাবাম্বুযুক্তৈর্বমনম্| বান্তস্য স্নেহযিত্বা বিরেচনম্| পক্বাশযগতে ত্ববমিতস্যৈব নীলিনীফলযুক্তেন ঘৃতেন বিরেচনমেব|

Adhikarana BuktaviShasyauShadham (27-28) · Śloka 28

বিষভুক্তায দদ্যাচ্চ শুদ্ধাযোর্ধ্বমধস্তথা| সূক্ষ্মং তাম্ররজঃ কালে সক্ষৌদ্রং হৃদ্বিশোধনম্||২৭|| শুদ্ধে হৃদি ততঃ শাণং হেমচূর্ণস্য দাপযেত্| |২৮|

স০-বিষভুক্তায পুংসে ঊর্ধ্বমধশ্চ শুদ্ধায কালে সূক্ষ্মং- অতিশ্লক্ষ্ণং তাম্রচূর্ণং সমাক্ষিকং দদ্যাত্| কিম্ভূতম্? হৃদ্বিশোধনং,- হৃদযশুদ্ধযে ইত্যর্থঃ| বিষভুক্তাযেতি 'আহিতাগ্ন্যাদিত্বাত্' পরনিপাতঃ| কাল ইত্যুপলক্ষণম্| দেশসাত্ম্যাগ্ন্যাদীন্ ব্যপেক্ষেতেত্যর্থঃ| শুদ্ধে হৃদে-স্বলিঙ্গে জ্ঞাতে, ততঃ-অনন্তরং, হেমচূর্ণস্য শাণং-কর্ষচতুর্থাংশং, দাপযেত্|

Adhikarana suvarNaprayogaPalam (28-29) · Śloka 29

হেম্নি দত্তে সতি, যো গুণঃ স্যাত্তমাহ | ন সজ্জতে হেমপাঙ্গে পদ্মপত্রেঽম্বুবদ্বিষম্||২৮|| জাযতে বিপুলং চাযুর্গরেঽপ্যেষ বিধিঃ স্মৃতঃ| |২৯|

স০- হেম পিবতীতি-হেমপঃ, তস্যাঙ্গে বিষং ন সজ্জতে| কথম্? পদ্মপত্রে জলমিব| তস্য চ হেমপস্য বিস্তীর্ণমাযুর্জাযতে| এষ বিধির্গরেঽপি স্মৃতঃ, যো বিষ উক্তঃ| সজ্জত ইত্যত্রাত্মনেপদং চিন্ত্যম্|

Adhikarana virUddhAhArasya viShagarIpamatvam (29) · Śloka 29

| বিরুদ্ধমপি চাহারং বিদ্যাদ্বিষগরোপমম্||২৯||

স০-বিরুদ্ধং চাহারং বিষগরোপমং বিদ্যাত্| বিষগরবদ্বিরুদ্ধাহারা অপি ব্যাধিমৃত্যুহেতব ইত্যর্থঃ| তথা চোক্তং সঙ্হ্গ্রহে(সূ.অ.৯)-"বিস্ফোটগুল্মমদবিদ্রধিমেহযক্ষ্মতেজোবলস্মৃতিমতীন্দ্রযচিত্তনাশম্| কুর্যাদ্বিরুদ্ধমশনং জ্বরমস্রপিত্তমষ্টৌ গদাংশ্চ মহতো বিষবচ্চ মৃত্যুম্|" ইতি|

Adhikarana virUddhabhojanam (30-31) · Śloka 31

তদেব বিরুদ্ধভোজনমাহ আনূপমামিষং মাষক্ষৌদ্রক্ষীরবিরূঢকৈঃ| বিরুধ্যতে সহ বিসৈর্মূলকেন গুডেন বা||৩০|| বিশেষাত্পযসা মত্স্যা মত্স্যেষ্বপি চিলীচিমঃ| |৩১|

স০-আমিষং-মাংসং, আনূপং-মহামৃগবারিচরবারিশযাখ্যং, মাষাদিভিঃ সপ্তভিঃ সহ বিরুধ্যতে| আনূপেষ্বপি মধ্যে বিশেষাত্-অতিশযেন, পযসা সহ মত্স্যা বিরুধ্যন্তে| যতো মত্স্যক্ষীরে স্বাদুরসবিপাকিত্বান্মহাভিষ্যন্দিনী, শীতোষ্ণযোগাচ্চ পরস্পরবিরুদ্বে| মস্ত্যেষ্বপি চিলীচিমাখ্যো মত্স্যঃ পযসা সহাত্যন্তবিরুদ্ধঃ| স পুনঃ শকলী লোহিতাক্ষঃ সর্বতো লোহিতরাজিঃ প্রাযো ভূমৌ চরতি, সোঽত্যভিষ্যন্দিতমত্বাত্সুতরাং বিরুদ্ধঃ| এষ চাহারোঽনির্দিষ্টবিকারকারী যথোক্তান্ বিস্ফোটাদীন্ করোতি| কালান্তরেণ চ চিকিত্সাং বিনা প্রাণানপি হরতি| কশ্চিচ্চ বিরুদ্ধাহারো নির্দিষ্টবিকারকারী| যথা "উপোদকাঽতিসারায" ইতি|

Adhikarana anUpamAMsasya mAShAdibhirvirodhaH payaso~amlAdibhirvirodhaH (31-32) · Śloka 32

বিরুদ্ধমম্লং পযসা সহ সর্বং ফলং তথা||৩১|| তদ্বত্কুলত্থবরককঙ্গুবল্লমকুষ্টকাঃ|৩২|

স০-অম্লং দ্রব্যং পযসা সহ সর্বং বিরুদ্ধম্| সর্বগ্রহণং দ্রবাদ্রবগ্রহণার্থম্| দ্রবং-কাঞ্জিকাদি, অদ্রবং-চুক্রিকাদিকমিত্যর্থঃ| অন্যথা পযসো দ্রবসমানজাতীযত্বাত্ কাঞ্জিকাদ্যেব দ্রবদ্রব্যং বিরুধ্যেত, ন চুক্রিকাদিকমপি| ননু, তৃতীযযৈব সহার্থো লব্ধ এব| যথা-"বারাহং শ্বাবিধা নাদ্যাত্" ইত্যত্র| ততঃ কিং সহশব্দেন| সত্যমেতত্| সহগ্রহণং তু নিযমার্থম্| সহৈকধ্যমম্লেনোপযুজ্যমানং বিরুদ্ধম্| যদা ত্বম্লেন গোরসাদিনা ক্ষীরশাকসংজ্ঞব্যঞ্জনকরণার্থং পযঃ সংস্ক্রিযতে তদা তস্য দ্রব্যান্তরত্বাপত্তের্বিরোধো নাস্তি| তথা, দধিক্ষীরাদিনা ঘৃতং পচ্যতে তত্রাঽপ্যবিরোধ এব, দ্রব্যান্তরত্বাত্| পূর্বস্যাঽপি সহশব্দস্যৈবং প্রাযমেব প্রযোজনমভ্যূহ্যমিতি| অপি চ, ক্ষীরে ভুক্তে উত্তরকালমপ্যম্লং ন ভোজ্যমিতি প্রতিপাদনার্থং চ সহগ্রহণম্| তথা চোক্তং সঙ্গ্রহে (সূ.অ.)-"সর্বং চাম্লং পযসা সহৈকধ্যং তদুত্তরং বা বিরুদ্ধম্" ইতি| ফলং তথেতি| ফলং-অক্ষোডাদি চ, পযসা সহ বিরুদ্ধম্| সর্বশব্দঃ সর্বত্র ন সম্বন্ধনীযঃ, যতো ন সর্বং ফলং পযসা সহাভ্যবহর্তুং বিরুদ্ধম্| অপি তু কিঞ্চিদেব| তথা চ মুনিঃ পরিসংখ্যযৈবাঽপঠত্(চ.সূ.অ.২৬|৮৬)- "তথাঽঽম্রাম্রাতকলকুচকরমর্দমোচদন্তশঠবদরকোশাম্রভব্য জাম্ববকপিত্থতিন্তিডীকপালেবতাক্ষোডপনসনারিকেরদাডিমামলকান্যেবং প্রকারাণি চান্যানি" ইতি| তস্মান্ন সর্বং ফলং পযসা সহাভ্যবহর্তুং বিরুদ্ধম্, কিন্তু মুন্যুক্তমেব| তদ্বদিতি ফলবত্, কুলত্থাদযঃ পযসা সহ বিরুদ্ধাঃ| বরকো-ব্রীহিভেদঃ, "বরকোদ্দালক" ইতি প্রাগুক্তেঃ (হৃ.সূ.অ.৬|৯)| বল্লমকুষ্টকৌ শিম্বীধান্যবিশেষৌ| উপলক্ষণং চেদম্| 'মাষনিষ্পাবাবপি' হি বিরুদ্ধৌ পযসা সহেতি সঙ্গ্রহে (সূ.অ.৯) কথিতম্|

Adhikarana payoharItakayorvirodhaH (32) · Śloka 32

| ভক্ষযিত্বা হরিতকং মূলকাদি পযস্ত্যজেত্||৩২||

স০-ভক্ষযিত্বেতি| হরিতকং মূলককুঠেরাদি ভুক্ত্বা পযস্ত্যজেত্, ন পুনঃ শাকং মূলকাদি স্নিগ্ধস্বিন্নং শাকসাধনেন সাধিতং ভুক্ত্বা ক্ষীরং ন ভক্ষযেত্| এতস্মাদেব চ জ্ঞাপকাত্ মূলকাদীনামুভযরূপত্বং বেদ্যম্, হরিতকত্বং শাকত্বং চ| তথা চ মূলকাদীনাং যদি শাকত্বপ্রসিদ্ধিরেবাঽভবিষ্যত্, ততো "হরিতকং মূলকাদি ভক্ষযিত্বা" ইতি তন্ত্রকৃন্নাবক্ষ্যত্| তস্মান্মূলকস্য হরিতকত্বং শাকত্বং চ জ্ঞেযম্| লশুনেন সহ ক্ষীরস্য প্রযোগো য উক্তঃ (হৃ.চি.অ.৯৪|৪৫)-"সাধযেচ্ছুদ্ধুশুষ্কস্য লশুনস্য চতুঃপলম্|" ইতি| স ন বিরুদ্ধঃ, অগ্ন্যাদিসম্পর্কাদ্রব্যান্তরত্বাপত্তেঃ|

Adhikarana varAhashvAvidhoH pRuShatakukkuTayordagdhA AmamAMsapittayoH mAShasUpamUlakayoH avikusumbhashAkayoH bisavirUdakayoH lakucaphalasya mAShAdibhiH kadalIphalasya takradibhiH kAkamAcyAH kaNAdibhiH (33-36) · Śloka 36

বারাহং শ্বাবিধা নাদ্যাদ্দধ্না পৃষতকুক্কুটৌ| আমমাংসানি পিত্তেন, মাষসূপেন মূলকম্||৩৩|| অবিং কুসুম্ভশাকেন, বিসৈঃ, সহ বিরূঢকম্| মাষসূপগুডক্ষীরদধ্যাজ্যৈর্লাকুচং ফলম্||৩৪|| ফলং কদল্যাস্তক্রেণ দধ্না তালফলেন বা| কণোষণাভ্যাং মধুনা কাকমাচীং গুডেন বা||৩৫|| সিদ্ধাং বা মত্স্যপচনে পচনে নাগরস্য বা| সিদ্ধামন্যত্র বা পাত্রে কামাত্তামুষিতাং নিশাম্||৩৬||

স০-শ্বাবিধা-সেধামাংসেন সহ, বারাহং মাংসং নাদ্যাত্| অগ্রেঽপি নাদ্যাদিতি ক্রিযাযোগো যাবত্ত্যজেদিতি ক্রিযান্তরম্| পৃষতকুক্কুটৌ দধ্না সহ নাদ্যাত্| আমানি-অপক্বানি মাংসানি পিত্তেন সহ| মাষসূপেন সহ মূলকম্| আবিং-মেষং, কুসুম্ভশাকেন সহ| বিরূঢকং-অঙ্কুরিতধান্যং, বিসৈঃ সহ| মাষসূপাদীনামন্যতমেন সহ লকুচফলম্| কদল্যাঃ ফলং তক্রেণ সহ, দধ্না বা, তালফলেন বা| কণোষণাভ্যাং সহ কাকমাচীম্, কেবলেন মাক্ষিকেণ সহ কাকমাচীম্, গুডেন বা সহ কাকমাচীম্, মত্স্যাঃ পচ্যন্তে যস্মিন্ ভাণ্ডে তত্র বা সিদ্ধাং কাকমাচীম্, নাদ্যাত্| নাগরস্য বা পচনে-শুণ্ঠীপাকভাণ্ডে সিদ্ধাং কাকমাচীম্, তথাঽন্যত্র বা ভাজনে যথারুচিসিদ্ধাং কামাত্তাং কাকমাচীং, রত্রিমুষিতাং-পর্যুষিতাং, নাদ্যাত্|

Adhikarana pippalyAH matsyanistalanasnehena sarShiShaH kAMsye dashAhamuShitasya uShNArUShkarayoH (37) · Śloka 37

মত্স্যনিস্তলস্নেহে সাধিতাঃ পিপ্পলীস্ত্যজেত্| ` কাংস্যে দশাহমুষিতং সর্পিরুষ্ণং ত্বরুষ্করে||৩৭||

স০- মত্যানিস্তল্যন্তে- ভৃজ্যন্তে, যেন স্নেহেন সহ- মত্স্যনিস্তলস্নেহঃ, তত্র সাধিতাঃ পিপ্পলীস্ত্যজেত্, বিরুদ্ধত্বাত্| নাদ্যাদিতি প্রকৃতেঽপি ত্যজেদিতি বচনং ন কেবলং নাদ্যাত্, লেপাদিকমপি ন কুর্যাদিতি প্রতিপাদনার্থম্| উত্তরত্রাপি ত্যজেদিত্যস্যানুবৃত্তাবেতদেব তাত্পর্যম্| কাংস্যপাত্রে দশরাত্রমুষিতং সর্পিস্ত্যজেত্| দশাহাদর্বাগবিরুদ্ধমেব| অরুষ্করে- ভল্লাতকবিষযে, উষ্ণং- অন্নপানাদিকং ত্যজেত্| তথা, "পেযং নোষ্ণোপচারেণ" ইত্যনেন মদ্যস্যোষ্ণং নিষিদ্ধং| তথা, "উষ্ণমুষ্ণার্তমুষ্ণে চ যুক্তং চোষ্ণৈঃ "ইতি মাক্ষিকস্য| তথা, দধ্নো-"নৈবাদ্যান্নিশিনৈবোষ্ণং বসন্তোষ্ণ" ইত্যাদিভিঃ| তস্মান্মধুমদ্যদধিভল্লাতকেষ্বপ্যুষ্ণং বিরুদ্ধমিত্যত্রাচার্যো যুক্ত্যা প্রত্যপাদযত্| সঙ্গ্রহে তু স্পষ্টং কৃত্বোক্তং (সূ. অ. ৯)-"মদ্যমধুদধিভল্লাতকেষু চোষ্ণং|" ইতি|

Adhikarana BAsasya shUlasaMskArAt kampillasya takrasaMskArAt (38) · Śloka 38

ভাসো বিরুধ্যতে শূল্যঃ কম্পিল্লস্তক্রসাধিতঃ| |৩৮|

স০- ভাসঃ-পক্ষিবিশেষঃ শূল্যো বিরুধ্যতে, শূলে সংস্কৃতো ভাসঃ কৃতপক্তির্বিরুধ্যত ইত্যর্থঃ| শূল্য ইতি "শূলোখাদ্যত্" ইতি যত্| কম্পিল্লস্তক্রসাধিতো বিরুধ্যতে| সঙ্গ্রহে চাতোঽধিকমপ্যুক্তম্| যথা (সূ.অ.৯)-"সৌবীরেণ তিলশষ্কুলী| ক্ষীরেণ লবণম্| নবনীতেন শাকম্| নবপুরাণমামপক্বং চৈকধ্যম্| তথা সলিলাবগাহঃ সহসোষ্ণাভিতপ্তস্য ত্বগ্দৃষ্ট্যপঘাতায তৃষ্ণাতিবৃদ্ধযে চ| তথৈব পযঃপানং রক্তপিত্তায| শরীরেণাঽযস্তস্য সহসাঽঽভ্যবহারশ্ছর্দিষে গুল্মায বা| বাচা ত্বাযস্তস্য স্বরসাদায|" ইতি|

Adhikarana pAyasAdInAM mithaH saMyogAt (38) · Śloka 38

| একধ্যং পাযসসুরাকৃশরাঃ প্রিবর্জযেত্||৩৮||

স০-একধ্যং-একত্র, পাযসসুরাকৃশরাস্ত্যজেত্| একধ্যমিতি "একাদ্ধো ধ্যমুঞ্" ইতি ধ্যমুঞ্|

Adhikarana madhvAdInAM mithaH saMyuktAnAm (39) · Śloka 39

মধুসর্পির্বসাতৈলপানীযানি দ্বিশস্ত্রিশঃ| একত্র বা সমাংশানি বিরুধ্যন্তে পরস্পরম্||৩৯||

স০-মধ্বাদীনি সমাংশানি-তুল্যপ্রমাণানি, মিথো বিরুধ্যন্তে| কথম্ ? দ্বে বা, ত্রীণি বা, একত্র বা সর্বাণি| যথা-মধুসর্পিষী, মধুবসে, মধুতৈলে, মধুসর্পির্বসাঃ, মধুসর্পির্বসাতৈলানি, ইত্যেবমাদীনি| ননু, যদ্যেবংবিধো বিরোধ উচ্যতে তত্কথমগস্ত্যলেহে (হৃ.চি.অ.৩|১২৮)-"কুডবং চ পৃথগ্ঘৃতাত্| তৈলাত্সপিপ্পলীচুর্ণাত্সিদ্ধশীতে চ মাক্ষিকাত্||" ইতি তৈলঘৃতমধূনাং তুল্যাংশানাং প্রযোগঃ ? ব্রূমঃ| কেবলানাং মধ্বাদীনাং সমাংশানামুপযোগো বিরুদ্ধঃ ন তু দ্রব্যান্তরসংযুক্তানাম্| অপি তু দ্রব্যান্তরসংযুক্তানাং তেষাং সংযোগসংস্কারাদিবশাদ্বিশিষ্টগুণান্তরোত্পত্তির্দৃষ্টা| তস্মাদগস্ত্যলেহাদৌ দ্রব্যান্তরসংযোগাদিবশাদবিরুদ্ধ এব|

Adhikarana madhvAjyayordivyAnupAnAt madhupuShkarabIjayoH madhumaireyashArkarANAm kShaireyasya manthAnupAnAt hAridrakaTutailayoH (40-41) · Śloka 41

ভিন্নাংশে অপি মধ্বাজ্যে দিব্যবার্যনুপানতঃ| মধুপুষ্করবীজং চ, মধুমৈরেযশার্করম্||৪০|| মন্থানুপানঃ ক্ষৈরেযো, হারিদ্রঃ কটুতৈলবান্| |৪১|

স০-ভিন্নাংশে অপি মধ্বাজ্যে দিব্যবার্যনুপানেন বিরুধ্যেতে| তৃতীযার্থে তসিপ্রত্যযঃ| অপিশব্দান্ন কেবলং সমাংশ ইত্যর্থঃ| মধু-মাক্ষিকং, পুষ্করবীজং চৈকধ্যং বিরুধ্যতে| তথা, মধুমার্দ্বীকং, মৈরেযং-খর্জূরাসবং, শার্করং-শর্করযা কৃতং মদ্যং, এতদেকত্রোপযুক্তং বিরুধ্যতে| ক্ষৈরেযঃ-পাযসো, মন্থানুপানো বিরুদ্ধঃ| মন্থোঽনুপানং যস্য স এবম্| ক্ষৈরেয ইতি "ক্ষীরাড্ঢঞ্" ইতি ঢঞ্| হারিদ্রঃ-কুপ্রসবঃ শাকবিশেষঃ সর্পচ্ছত্রানুকারী পীতাভাসঃ, কটুতৈলবান্-সর্ষপতৈলভৃষ্টো, বিরুদ্ধঃ|

Adhikarana upodakAyAstilakalkasaMskAreNa (41) · Śloka 41

| উপোদকাঽতিসারায তিলকল্কেন সাধিতা||৪১||

স০-উপোদকা তিলকল্কেন সাধিতাঽতিসারায| তাদর্থ্যে চতুর্থ্যত্র| অর্থো-নিমিত্তম্, তস্মৈ ইদং-তদর্থম্, তদর্থমেবতাদর্থ্যম্| তেনাতীসারকারণমিত্যযমর্থো জাযতে|

Adhikarana balAkAyA varAhavasABarjanAt (42) · Śloka 42

বলাকা বারুণিযুক্তা কুল্মাষৈশ্চ বিরুধ্যতে| ভৃষ্টা বরাহবসযা সৈব সদ্যো নিহন্ত্যসূন্||৪২||

স০-বলাকা-পক্ষিজাতিঃ, বারুণ্যা-প্রসন্নযা যুক্তা, বিরুদ্ধা| কুল্মাষৈঃ-নাতিস্বিন্নমুদ্গাদিভিশ্চ সহ বিরুধ্যতে| সৈব বলাকা, বরাহবসযা ভৃষ্টা সদ্যঃ-তত্ক্ষণাদেব, প্রাণান্ মারযতি|

Adhikarana tittiryAdInAM saMskAravisheShAt (43) · Śloka 43

তদ্বত্তিত্তিরিপত্রাঢ্যগোধালাবকপিঞ্জলাঃ| এরণ্ডেনাগ্নিনা সিদ্ধাস্তত্তৈলেন বিমূর্চ্ছিতাঃ||৪৩||

স০-তিত্তির্যাদয এরণ্ডেনাগ্নিনা সিদ্ধাঃ, তত্তৈলেন-এরণ্ডতৈলেন, বিমূর্চ্ছিতাঃ-বহুশো ভৃষ্টাঃ, তদ্বত্-বলাকাবত্ সদ্যো জীবিতহরাঃ| পত্রাঢ্যো-মযূরঃ|

Adhikarana hArItasya saMskAravisheShAt (44) · Śloka 44

হারীতমাংসং হারিদ্রশূলকপ্রোতপাচিতম্| হরিদ্রাবহ্নিনা সদ্যো ব্যাপাদযতি জীবিতম্||৪৪||

স০-হারীতস্য-পক্ষিবিশেষস্য, মাংসং হারিদ্রশূলকে প্রোতং- আসক্তং, চ তত্পাচিতং চ হারিদ্রাগ্নিনা সদ্যো জীবিতং হন্তি|

Adhikarana hAritasya BasmAdisaMyogAt (45) · Śloka 45

ভস্মপাংশুপরিধ্বস্তং তদেব চ সমাক্ষিকম্| |৪৫|

স০-তদেব-হারীতমাংসং, ভস্মপাংশুপরিধ্বস্তং সমাক্ষিকং বিরুদ্ধম্| ভস্ম চ পাংশুশ্চ ভস্মপাংশূ,-ভূতিরেণূ, তাভ্যাং পরিধ্বস্তং-ধূসরিতম্| সিদ্ধসারে চোক্তম্-"ন জাতু কটুতৈলেন ভৃষ্টামদ্যাদুপোদকাম্| প্রিযঙ্গুকল্কদিগ্ধাঙ্গঃ পাযসং ন সমাচরেত্||" ইতি|

Adhikarana virUddhasya sAmAnyalakShaNAm (45-46) · Śloka 46

| যত্কিঞ্চিদ্দোষমুত্ক্লেশ্য ন হরেত্তত্সমাসতঃ||৪৫|| বিরুদ্ধং| |৪৬|

দ্রব্যাণামানন্ত্যাত্ প্রতিপদোক্ত্যাঽশেষবিরুদ্ধসঙ্গ্রহঃ কর্তুমশক্যঃ, ইতি তত্সঙ্গ্রহার্থং ব্যাপি লক্ষণমাহ- স০-যত্কিঞ্চিত্-অন্নপানমৌষধং বা, দোষমুত্ক্লেশ্য-স্বস্থানাত্সঞ্চলয্য, ন হরেত্-বহির্ন নিষ্কাসযেত্, তত্র সমাসতঃ সংক্ষেপতো বিরুদ্ধম্|

Adhikarana virUddhajavyAdhInAM pratIkAraH (46) · Śloka 46

শুদ্ধিরত্রেষ্টা শমো বা তদ্বিরোধিভিঃ| |৪৬|

স০-শুদ্ধিরত্রেষ্টা| অত্র-বিরুদ্দ্ধাহারকৃতে বিকারে, শুদ্ধিঃ বমনবিরেকাদিরূপা, ইষ্টা-শ্রেষ্ঠা| কুপিতদোষসমূহস্য বমনাদিভির্নির্হরণাত্তন্নির্হারে চারোগ্যোত্পত্তিঃ| শমো বেতি| ন কেবলং শুদ্ধিরিষ্টা, শমশ্চেষ্টঃ| কৈঃ? তেষাং-বৈরোধিককোপিতদোষাণাং তত্কৃতানাং বা বিস্ফোটাদীনাং বিকারাণাং, বিরোধিভিঃ-প্রতিপক্ষভূতৈরোষধৈঃ|

Adhikarana anutpannAnAM pratibandhahetuH pratIkAraH (46) · Śloka 46

ন চ শোধনশমনরূপ এবোপক্রমোঽত্রেত্যাহ- | দ্রব্যৈস্তৈরেব বা পূর্বং শরীরস্যাভিসংস্কৃতিঃ||৪৬||

স০-তৈরেব-বৈরোধিককুপিতদোষপ্রতিপক্ষভূতৈর্দ্রব্যৈঃ, পূর্বং-প্রথমং, যা শরীরস্যাভিসংস্কৃতিঃ, সা চ বিরুদ্ধাহারকৃতে বিকারে প্রশস্তেতি| যথা,-মাক্ষিকহরীতক্যাদিনা পিত্তশ্লেষ্মহরণৌষধেন সন্ততশীলনাদভিসংস্কৃতে দেহে পিত্তশ্লেষ্মকরং বিরুদ্ধমুপযুক্তং সদ্বিকর্তুমশক্তম্| এতদুক্তং ভবতি,-বিরুদ্ধপ্রতিপক্ষগুণবতা দ্রব্যেণ দেহস্তথা দার্ঢ্যং গ্রাহিতো যথা বিরুদ্ধমপি দ্রব্যং বিকারং কর্তুং নালম্|

Adhikarana vyAyAmAdInAmanutpattihetutvam (47) · Śloka 47

ব্যাযামস্নিগ্ধদীপ্তাগ্নিবযঃস্থবলশালিনাম্| বিরোধ্দ্যপি ন পীডাযৈ সাত্ম্যমল্পং চ ভোজনম্||৪৭||

স০-ব্যাযামো বিদ্যতে যেষামিতি "অর্শআদিত্বাত্" অচ্| বযঃস্থাঃ-তরুণাঃ| বলেন শালিতুং-শ্লাঘিতুং শীলং যেষাং তে-বলশালিনঃ| স্নিগ্ধাঃ স্নিগ্ধবৃষ্যাহারসাত্ম্যাঃ| ব্যাযামিনাং বিরোধ্যপি ভোজনং ন পীডাযৈ-ন রোগোত্পত্তযে| এবং স্নিগ্ধাদীনাং প্রত্যেকং সম্বন্ধঃ কার্যঃ| কেচিত্ "ব্যাযামি" ইতি পঠন্তি| তথা, বিরুদ্ধমপ্যন্নং যদভ্যাসাত্ সাত্ম্যং-সাত্মীভূতং, তথা, অল্পং-অল্পমাত্রযা চ যদ্ভোজনং, তচ্চ বিরুদ্ধমপি ন পীডাযৈ ইতি যোজ্যম্| অথ যদ্যপথ্যমপি সাত্ম্যতাং প্রাপ্তং তত্কিং ত্যাজ্যং ন বা? কথং চ ত্যাজ্যং ? কথং চ পথ্যং ভোজ্যং? ইত্যাহ-

Adhikarana sAtmyIkaraNe kramaH (48) · Śloka 48

পাদেনাপথ্যমভ্যস্তং পাদপাদেন বা ত্যজেত্| নিষেবেত হিতং তদ্বদেকদ্বিত্র্যন্তরীকৃতম্||৪৮||

স০-অপথ্যং-অহিতমন্নং পানং বা যল্লঙ্ঘনপ্লবনজাগরণস্বপ্নাদিকং বা চেষ্টিতমহিতমভ্যস্তং তত্ পাদেন-চতুর্থাংশেন ত্যজেত্, অহিতফলত্বাত্| তদ্ধি শরীরোচিতমপ্যপথ্যত্বাদুদর্কে দোষায সম্পদ্যতে, ন গুণায| যদি তু তদপথ্যমভ্যস্তং তথা সাত্ম্যীভূতং যস্মিংশ্চতুর্থাশেনাঽপি ত্যজ্যমানেন শরীরবাধা শঙ্ক্যতে বহ্নিমান্দ্যাদ্বা, তদা পাদপাদেন-ষোডশাংশেন বা ত্যজেত্| ইতি বাশব্দার্থঃ| তেন তুল্যং বর্ততে-তদ্বত্,-তেনৈব ক্রমেণ পাদেন পাদপাদেন বা, হিতং নিষেবেত-শীলযেত্| কথমেতদ্দ্বযমপ্যপথ্যপথ্যরূপং ত্যাজ্যং নিষেব্যং চ ? ইত্যাহ-একেত্যাদি| একশ্চ দ্বৌ চ ত্রযশ্চ তৈরন্তরীকৃতম্| একদ্বিত্রিভিরন্নকালৈর্ব্যবধানং কৃত্বা [যথা ভবতি তথা] অপথ্যং পাদেন পাদপাদেন বা ত্যজেত্| তদ্বত্ হিতং সেবেত| একদ্বিত্র্যন্তরীকৃতমিতি ক্রিযাবিশেষণত্বাদত্র নপুংসকলিঙ্গত্বম্| অধুনৈতদেব স্পষ্টীকৃত্যোচ্যতে| অপথ্যাত্পাটলব্রীহ্যাদেরভ্যস্তাত্পাদমেকং ত্যক্ত্বাঽনুচিতাত্পথ্যাদ্রক্তশাল্যাদেস্তমেব পাদং দত্ত্বা চতুষ্পাত্ত্বং সম্পাদ্য যোজ্যম্| এবমন্নকালমেকমতিবাহযেত্| এবং পাদেনাপথ্যমভ্যস্তং ত্যক্তং ভবতি| পথ্যং চানুচিতং নিষেবিতং ভবতি| ততো দ্বিতীযেঽন্নকালে সর্বমপথ্যং যোজনীযম্| এবমেকেনান্নকালেনাপথ্যপাদোঽন্তরীকৃতঃ| ততস্তৃতীযেঽপ্যুচিতাদপথ্যাত্ পাদদ্বযমপাস্যানুচিতাত্পথ্যাত্ পাদদ্বযমুপযুজ্য, ততশ্চতুর্থে সর্বমপথ্যং ভোজ্যং পঞ্চমে চ| এবমন্নকালদ্বযেন পথ্যপাদদ্বযসহিতমপথ্যপাদদ্বযমন্তরীকৃতম্| ততঃ ষষ্ঠেঽন্নকালে পাদমুচিতাদপথ্যাত্ পাদত্রযমনুচিতাত্পথ্যাদ্ভুক্ত্বা, সপ্তমাষ্টমনবমান্নকালেষু সর্বমপথ্যং ভোজ্যম্| এবমন্নকালত্রযেণাপথ্যমন্তরীকৃতম্| ততো দশমেঽন্নকালে সর্বং পথ্যং সেবনীযম্| এবং পাদপাদেনাপ্যযমেব ক্রমঃ| স্পষ্টার্থং চ দিক্প্রদশর্যতে| যথা-যবকাদেঃ ষোডশাংশং ত্যক্ত্বাঽনুচিতাচ্ছাল্যাদেঃ পথ্যাত্ষোডশাংশমেব দত্ত্বা চতুষ্পাত্ত্বং সম্পাদ্য ভোজ্যম্| এবমপথ্যমভ্যস্তং পাদপাদেন ত্যক্তং ভবতি পথ্যং চানুচিতং নিষেবিতং ভবতি| দ্বিতীযেঽন্নকালে সর্বমপথ্যং সেব্যম্| এবমেকে (নান্নকালে) নাপথ্যষোডশাংশোঽন্তরীকৃতঃ| ততস্তৃতীযেঽপ্যুচিতাদপথ্যাত্ পাদপাদদ্বযমপাস্যানুচিতাত্পথ্যাত্ পাদপাদদ্বযং দত্ত্বা চতুষ্পাত্ত্বং সম্পাদ্য সেব্যম্| ততশ্চতুর্থে পঞ্চমে চান্নকালে সর্বমপথ্যং ভোজ্যম্| এবং কালদ্বযেন পাদপাদদ্বযমপথ্যস্যান্তরীকৃতম্| ততঃ ষষ্ঠেঽন্নকালেঽনুচিতাত্পথ্যাত্ পাদপাদত্রযমুচিতাদপথ্যাত্ পাদপাদাস্ত্রযোদশেতি ভোজ্যম্| ততঃ সপ্তমাষ্টমনবমান্নকালেষু সর্বমপথ্যং ভোজ্যম্| এবং কালত্রযেণান্তরীকৃতম্| ততো দশমেঽন্নকালে পথ্যাদনুচিতাত্ পাদপাদাশ্চত্বারঃ, অপথ্যপাদপাদা দ্বাদশেতি ভোজ্যম্| তত একাদশেঽন্নকালে সর্বমপথ্যং ভোজ্যম্| তত একেনান্নকালেনান্তরীকৃতম্| এবমন্নকালদ্বযত্রযান্তরিতং চ তাবদ্যোজ্যম্, যাবত্পথ্যস্য ষোডশপাদাঃ সেব্যতযা সম্পদ্যন্তে|

Adhikarana akrameNa sAtmyIkaraNe doShaH (41) · Śloka 41

এবমনেন ক্রমেণাপথ্যদোষাস্ত্যক্তাঃ পীডাযৈ ন ভবন্তি, পথ্যগুণাশ্চ সংবর্ধিতাঃ স্থিরতাং প্রাপ্নুবন্তি| ইত্যত আহ অপথ্যমপি হি ত্যক্তং শীলিতং পথ্যমেব বা| সাত্ম্যাসাত্ম্যবিকারায জাযতে সহসাঽন্যথা||৪১||

স০-হি-যস্মাত্, সহসা-ক্রমমিমমনালোচ্য, অন্যথা উক্তবিধ্যতিক্রমেণ, অপথ্যমপি ত্যক্তং সাত্ম্যবিকারায জাযতে| পথ্যমেব বা সহসা শীলিতমসাত্ম্যবিকারায জাযতে| সাত্ম্যাসাত্ম্যাভ্যাং বিকারঃ-সাত্ম্যাসাত্ম্যবিকারঃ, তস্মৈ "ক্ল্ড়্পিসম্পদ্যমানে" ইতি চতুর্থী|

Adhikarana krameNa sAtmyIkaraNe guNAH (50) · Śloka 50

ক্রমেণ ত্বপথ্যত্যাগপথ্যশীলনে বিধীযমানে গুণায স্যাতামিতি দর্শযতি ক্রমেণাপচিতা দোষাঃ ক্রমেণোপচিতা গুণাঃ| সন্তো যান্ত্যপুনর্ভাবমপ্রকম্প্যা ভবন্তি চ||৫০||

স০-দোষাঃ অপথ্যাভ্যাসজাঃ, ক্রমেণ-পূর্বোক্তেন, অপচিতাঃ-ক্ষযং নীতাঃ, গুণাশ্চ-পথ্যোপযোগজাঃ, ক্রমেণ-পূর্বোক্তেনৈব, উপচিতাঃ-বৃদ্ধিং নীতাঃ সন্তঃ, পুরুষাণাং যথাসঙ্খ্যমপুনর্ভাবং যান্তি দোষাঃ| গুণাশ্চাপ্রকম্প্যাঃ-স্থিরা ভবন্তি|

Adhikarana apathyasya sAtmyIkaraNaniShedhaH (51) · Śloka 51

সাম্প্রতমহিতাহারসেবনং সদা ত্যাজ্যমিতি সদ্যুক্তিং দর্শযতি অত্যন্তসন্নিধানানাং দোষাণাং দূষণাত্মনাম্| অহিতৈর্দূষণং ভূযো ন বিদ্বান্ কর্তুমর্হতি||৫১||

স০-দোষাণামহিতৈঃ-আহারাদিভিঃ দূষণং কর্তুং বিদ্বান্-পণ্ডিতো, নার্হতি-ন যুজ্যতে| কিম্ভূতানাম্? অত্যন্তং-অতিশযেন, সন্নিধানং-নিকটত্বং, যেষাং দোষাণাং ত এবং তেষাম্| তথা, দূষণাত্মনাং-দূষণস্বভাবানাম্|

Adhikarana yuktiprayojitairAhArAdiBiH sharIradhAraNam (52) · Śloka 52

এতত্প্রসঙ্গেন চেদমাহ আহারশযনাব্রহ্মচর্যের্যুক্ত্যা প্রযোজিতৈঃ| শরীরং ধার্যতে নিত্যমাগারমিব ধারণৈঃ||৫২||

স০-আহারঃ-অন্নপানসেবা| শযনং-স্বপ্নঃ| অব্রহ্মচর্যং স্ত্রীণাং সেবা| আহারাদীনাং দ্বন্দ্বঃ| এতৈর্যুক্ত্যা প্রযোজিতৈঃ শরীরং সততং ধার্যতে| কিমিব কৈঃ? আগারং-গৃহমিব, ধারণৈঃ স্তম্ভৈর্যথা|

Adhikarana tatrAhArasyAtideshaH (2) · Śloka 2

আহারো বর্ণিতস্তত্র তত্র তত্র চ বক্ষ্যতে| ||২||

স০-তত্র-তেষু ত্রিষু মধ্যাত্, আহারো বর্ণিতঃ-ঋতুচর্যাযাং দ্রবান্নস্বরূপবিজ্ঞানীযযোশ্চ| তত্র তত্র চ-শাস্ত্রভাগে জ্বরচিকিত্সাদৌ চ, বক্ষ্যতে|

Adhikarana nidrAyattaM sukhaduHkhAdikam (53-54) · Śloka 54

শযনাব্রহ্মচর্যযোস্ত্বিহৈব বিধিং বক্তুকাম আহ- | নিদ্রাযত্তং সুখং দুঃখং পুষ্টিঃ কার্শ্যং বলাবলম্||৫৩|| বৃষতা ক্লীবতা জ্ঞানমজ্ঞানং জীবিতং ন চ| |৫৪|

স০-নিদ্রাযত্তং-নিদ্রাধীনম্| সুখং-আরোগ্যম্| দুঃখং-রোগঃ| তথা, পুষ্ট্যাদি চ| জীবিতং ন চ জীবিতমিতি সম্বন্ধঃ| অজীবিতেন-মরণেন যোগো ভবতীত্যর্থঃ|

Adhikarana nidrAyAshcaturvidhatvam (54-55) · Śloka 55

সাম্প্রতং দুষ্টনিদ্রাং নির্দিশতি- | অকালেঽতিপ্রসঙ্গাচ্চ ন চ নিদ্রা নিষেবিতা||৫৪|| সুখাযুষী পরাকুর্যাত্ কালরাত্রিরিবাপরা| |৫৫|

স০-অকালে নিষেবিতাঽতি চ নিষেবিতা ন চ নিষেবিতা নিদ্রা সুখং-আরোগ্যলক্ষ্ণম্, আযুশ্চ-জীবিতম্, তে সুখাযুষী পরাকুর্যাত্-নাশযেত্| কেব? অপরা কালরাত্রিরিব|

Adhikarana caturvidhAyAH svarUpam (55-56) · Śloka 56

অথ নিদ্রাগুণপ্রসঙ্গেন তত্প্রতিপক্ষভূতস্য জাগরণস্যাপি গুণমাহ | রাত্রৌ জাগরণং রূক্ষং, স্নিগ্ধং প্রস্বপনং দিবা||৫৫|| অরূক্ষমনভিষ্যন্দি ত্বাসীনপ্রচলাযিতম্| |৫৬|

স০-অপিশব্দাবত্র সামর্থ্যলব্ধৌ বোদ্ধব্যৌ| তেন রাত্রাবপি জাগরণং রূক্ষম্, দিবা ত্বাগ্নেযমত্যর্থং রূক্ষং কালেনাহিতবলত্বাত্| তথা, প্রস্বপনং দিবাঽপি স্নিগ্ধম্, রাত্রৌ তু সৌম্যে কালেঽতিশযেন স্নিগ্ধমিত্যবতিষ্ঠতে| অপিশব্দাভ্যামন্তরেণ তু রাত্রাবেব জাগরণং রূক্ষম্, দিবা তু স্নিগ্ধমিত্যর্থো জাযতে| ব্যবচ্ছেদ্যফলত্বাদ্বাক্যানাম্| এবং দিবস এব স্নিগ্ধং প্রস্বপনম্, রাত্রৌ তু রূক্ষমিতি| ন চৈতদ্যুজ্যতে| যদি জাগরণং সদা রূক্ষং নাভবিষ্যত্, তত্কথমিদমুপপত্স্যতে ? "বহুমেদঃকফাঃ স্বপ্যুঃ স্নেহনিত্যাশ্চ নাহনি| বিষার্তঃ কণ্ঠরোগী চ নৈব জাতু নিশাস্বপি||" ইতি| এষাং হ্যাপতর্পণমেব হিতম্| যচ্চাপতর্পণং তদবশ্যং রূক্ষম্| তস্মাদেতৈরপতর্পণস্বভাবং জাগরণমেব সেব্যম্| তথা, "গ্রীষ্মে বাযুচযাদানরৌক্ষ্যরাত্র্যল্পভাবতঃ| দিবাস্বপ্নোহিতোঽন্যস্মিন্ কফপিত্তকরো হি সঃ|| মুক্ত্ত্বা তু ভাষ্যযানাধ্বমদ্যস্ত্রীভারকর্মভিঃ| ক্রোধশোকভযৈঃ ক্লান্তান্ শ্বাসহিধ্মাতিসারিণঃ|| বৃদ্ধবালাবলক্ষীণক্ষততৃট্শূলপীডিতান্| অজীর্ণ্যভিহিতোন্মত্তান্ দিবা স্বপ্নোচিতানপি||" তদেতেষাং সন্তর্পণার্হত্বাত্সন্তর্পণমেব হিতম্| যচ্চ সন্তর্পণং তদবশ্যং স্নিগ্ধম্| তস্মাদেতৈঃ সন্তর্পণস্বভাবমেব সদা প্রস্বপনং সেব্যম্| এবং চ পূর্বমেব ব্যাখ্যানং যুক্তম্| প্রস্বপ্নজাগরণক্রিযযোরদ্রব্যযোরপি রূক্ষস্নিগ্ধত্বমুপচারাদুপপন্নম্| যথা,-রূক্ষং দ্রব্যং গুগ্গুল্বাদি কফমেদঃপ্রভৃতীন্ সৌম্যান্ ভাবান্ ক্ষপযতি, তথৈব যদা জাগরণমপি তত্ক্ষপযদ্দৃষ্টং তদা তদ্রূক্ষকার্যকরণাদরূক্ষমপি রূক্ষমিত্যুপচর্যতে| তথা, প্রস্বপনাদর্বাক্ কফমেদঃপ্রভৃতীনাং সোম্যানাং ভাবানাং স্বহেতোরুত্পাদস্তথা নোপলভ্যতে, যথা প্রস্বপনাদনন্তরম্| তস্মাত্প্রস্বপনমস্নিগ্ধমপি স্নিগ্ধমিত্যুপচর্যতে| প্রচল ইবাচরতীতি ক্যঙন্তান্নিষ্ঠা| আসীনস্য উপবিষ্টস্য, প্রচলাযিতং-অবঘূর্ণিতং,-আসীনপ্রচলাযিতম্, ন তু প্রস্বপনং সর্বসর্বিকযা| যেন স্নেহনহেতুঃ স্যাত্| রূক্ষকার্যা করণাদরূক্ষম্| অনভিষ্যন্দি তু বিশেষেণ| আসীনপ্রচলাযিতং পুনরীদৃগ্রূপমিত্যর্থঃ|

Adhikarana divAsvapnasyApavAdaH (56-59) · Śloka 59

যদি স্নিগ্ধত্বাদভিষ্যন্দী দিবাস্বপ্নঃ, তত্কিং কদাচিদপি ন কার্যঃ? ইত্যাহ- গ্রীষ্মে বাযুচযাদানরৌক্ষ্যরাত্র্যল্পভাবতঃ||৫৬|| দিবাস্বপ্নো হিতোঽন্যস্মিন্ কফপিত্তকরো হি সঃ| মুক্ত্বা তু ভাষ্যযানাধ্বমদ্যস্ত্রীভারকর্মভিঃ||৫৭|| ক্রোধশোকভযৈঃ ক্লান্তান্ শ্বাসহিধ্মাতিসারিণঃ| বৃদ্ধবালাবলক্ষীণক্ষততৃট্শূলপীডিতান্||৫৮|| অজীর্ণ্যভিহতোন্মত্তান্ দিবাস্বপ্নোচিতানপি| ধাতুসাম্যং তথা হ্যেষাং শ্লেষ্মা চাঙ্গানি পুষ্যতি||৫৯||

স০-গ্রীষ্মকালে দিবাস্বপ্নো হিতঃ| যতস্তস্মিন্ কালে পবনচ্চযো ভবতি| আদানস্য চ পরিপুষ্টত্বাদতিরৌক্ষ্যং ভবতি| রাত্রযশ্চনিদ্রাসমাপ্ত্যযোগ্যা অল্পা ভবন্তি| দিবাস্বপ্নশ্চ সন্তর্পকঃ| গ্রীষ্মাদপরস্মিন্ কালে কফপিত্তকরঃ| সোঽচিন্ত্যত্বাদ্ধেতুপ্রভাবস্য| ভাষ্যাদিক্লান্তাদীন্ মুক্ত্বা-বর্জযিত্বা| তেনৈতদুক্তং ভবতি,-গ্রীষ্মাদপরস্মিন্নপি কালে স্বপ্ন এষাং হিত এব| যানং অশ্বাদি| ক্ষতঃ-খড্গাদিচ্ছিন্নঃ| অভিহতো-লগুডাদিনা| দিবাস্বপ্নোচিতাঃ-শীলিতদিবাস্বপ্নাঃ| তত্র ভাষ্যাদিক্লান্তানাং পবনকোপাত্ স্বপ্নোঽনুজ্ঞাতঃ| শ্বাসহিধ্মাদীনাং বেগবিস্মরণার্থম্| বৃদ্ধাদীনাং যথাযথং সন্তর্পণার্থং বেগবিস্মরণার্থং চ| অজীর্ণিনাং দিবাস্বপ্নোচিতানাং চ ধাতুবৈষম্যপরিহারার্থং দিবাস্বপ্নোঽনুমতস্তন্ত্রকৃতা| তথা চোক্তম্-"উচিতো হি দিবাস্বপ্নো যেষাং নিত্যং শরীরিণাম্| বাতাদযঃ প্রকুপ্যন্তি তেষামস্বপতাং দিবা||" ইতি| ননু, অজীর্ণিনাং দিবাস্বপ্নো ন যুক্তঃ, দিবাস্বপ্নস্য কফবৃদ্ধিকরত্বাত্| কফবৃদ্ধ্যা চাগ্নিমান্দ্যম্| অগ্নিমান্দ্যাদজীর্ণান্নস্যাপাক ইত্যনুক্তস্তেষাং দিবাস্বপ্নঃ| অত্রোচ্যতে| দিবাস্বপ্নেনাজীর্ণিনাং ধাতুসাম্যং ভবতি| ধাতুসাম্যে চ সতিস্বস্থানস্থিতৈর্দোষৈরনুপহতো বহ্নিঃ পচনক্ষমো ভবতি| কফস্তু বৃদ্ধোঽপি নৈতেষামগ্নিমান্দ্যং বিধত্তে| অপি ত্বঙ্গানাং পুষ্টিমাদধাতি| অত এবানন্তরমেবোবাচ শাস্ত্রকারঃ-"ধাতুসাম্যং তথা হ্যেষাং শ্লেষ্মা চাঙ্গানি পুষ্যতি|" ইতি|

Adhikarana divAsvapnasyAsamyagyogatvam,rAtrisvapnasyApavAdaH (60) · Śloka 60

বহুমেদঃকফাঃ স্বপ্যুঃ স্নেহনিত্যাশ্চ নাহনি| বিষার্তঃ কণ্ঠরোগী চ নৈব জাতু নিশাস্বপি||৬০||

স০-তথা, বহুমেদঃশ্লেষ্মাণঃ স্নিগ্ধাহারাদিশীলিনশ্চ গ্রীষ্মেঽপ্যহনি ন স্বপ্যুঃ| বিষার্তঃ কণ্ঠরোগী চ রাত্রিষ্বপি কদাচিদপি ন স্বপ্যাত্|

Adhikarana akAlashayanAnmohAdayaH (61) · Śloka 61

অকালশযনান্মোহজ্বরস্তৈমিত্যপীনসাঃ| শিরোরুক্শোফহৃল্লাসস্রোতোরোধাগ্নিমন্দতাঃ||৬১||

স০-অকালে শযনং-স্বপ্নঃ,-অকালশযনম্, তস্মাদকালশযনাত্ মোহাদযঃ স্যুঃ| স্তৈমিত্যং-গাত্রাণাং নিরুত্সাহত্বম্|

Adhikarana tatra cikitsA (62-63) · Śloka 63

অত্র চ কা চিকিত্সা? ইত্যাহ তত্রোপবাসবমনস্বেদনাবনমৌষধম্| যোজযেদতিনিদ্রাযাং তীক্ষ্ণং প্রচ্ছর্দনাঞ্জনম্||৬২|| নাবনং লঙ্ঘনং চিন্তাং ব্যবাযং শোকভীক্রুধঃ| এভিরেব চ নিদ্রাযা নাশঃ শ্লেষ্মাতিসঙ্ক্ষযাত্||৬৩||

স০-তত্র-তেষ্বকালস্বপ্নজেষু রোগেষু, উপবাসাদ্যৌষধং যোজযেত্| নিদ্রাযাশ্চ বাহুল্যেন রাত্রিঃ কালঃ| তথা চোক্তম্ (সঙ্গ্রহে সূ.অ.৯)-"লোকাদিসর্গপ্রভবা তমোমূলা তমোমযী| বাহুল্যাত্তমসো রাত্রৌ নিদ্রা প্রাযেণ জাযতে||" ইতি| অতিনিদ্রাযাং সত্যাং তীক্ষ্ণানি বমনাঞ্জননস্যানি যোজযেত্, লঙ্ঘনাদি চ| এভিরেব চ-তীক্ষ্ণবমনাদিভির্নিদ্রাযা নাশো ভবতি| শ্লেষ্মাখ্যস্য ধাতোরতিশযেনাপচযাত্|

Adhikarana nidrAnAshajanyavikArAH (64) · Śloka 64

সম্প্রতি নিদ্রানাশজান্ বিকারানাচষ্টে নিদ্রানাশাদঙ্গমর্দশিরোগৌরবজৃম্ভিকাঃ| জাড্যগ্লানিভ্রমাপক্তিতন্দ্রা রোগাশ্চ বাতজাঃ||৬৪||

স০-নিদ্রানাশাদঙ্গমর্দাদযো বাতোত্থাশ্চ রোগাঃ স্যুঃ|

Adhikarana yathAkAlaM rAtrau nidrA rAtrAvanidritasya divAsvanpaH (65) · Śloka 65

যথাকালমতো নিদ্রাং রাত্রৌ সেবেত সাত্ম্যতঃ| অসাত্ম্যাজ্জাগরাদর্ধং প্রাতঃ স্বপ্যাদভুক্তবান্||৬৫||

স০-যতশ্চ সম্যক্ সেবিতাযা নিদ্রাযা অসম্যক্ সেবিতাযাশ্চাঽনন্তরোক্তা গুণদোষাঃ| অতঃ-অস্মাদ্ধেতোঃ, কালানতিক্রমেণ সাত্ম্যতো-যামদ্বযং ত্রযং বা, নিশি নিদ্রাং ভজেত্| অসাত্ম্যাজ্জাগরাদর্দ্ধেন প্রাতঃ স্বপ্যাত্| অভুক্তবান্-অভুক্তে সতি| অসাত্ম্যগ্রহণেনৈতত্ দ্যোতযতি,-ন সর্বস্য রাত্রাবসুপ্তস্য জাগরণকালাদর্ধেন দিবাস্বপ্ন ইষ্যতে, কিং তর্হি ? যো যাবন্তং কালমুচিতং স্বপিতি তস্মাত্কালাদ্যাবন্তং কালং নিশি জাগৃযাত্তাবতোঽর্ধেনাসৌ প্রাতঃ স্বপ্যাত্| কেচিদ্ধি স্বল্পনিদ্রাঃ স্বভাবতো ভবন্তি|

Adhikarana mandanidrasya kShIrAdisevanam (66-68) · Śloka 68

শীলযেন্মন্দনিদ্রস্তু ক্ষীরমদ্যরসান্ দধি| অভ্যঙ্গোদ্বর্তনস্নানমূর্ধকর্ণাক্ষিতর্পণম্||৬৬|| কান্তাবাহুলতাশ্লেষো নির্বৃতিঃ কৃতকৃত্যতা| মনোঽনুকূলা বিষযাঃ কামং নিদ্রাসুখপ্রদাঃ||৬৭|| ব্রহ্মচর্যরতের্গ্রাম্যসুখনিঃস্পৃহচেতসঃ| নিদ্রা সন্তোষতৃপ্তস্য স্বং কালে নাতিবর্ততে||৬৮||

স০-যো মন্দনিদ্রঃ স ক্ষীরাদীন্ শীলযেত্| কান্তাবাহুলতাশ্লেষাদযো নিদ্রাসুখহেতবঃ| কান্তাবাহুলতাশ্লেষগ্রহণমাশ্লেষমাত্রমেব নিদ্রাসুখহেতুঃ, ন তু গ্রাম্যধর্মসেবেতি দর্শনার্থম্| অত এবানন্তরমাহ-"ব্রহ্মচর্যরতের্নিদ্রা স্বং কালং নাতিবর্ততে|" ইতি| ব্রহ্মচর্যরতস্যাপ্যনুরাগতো মৈথুনাভিলাষো নিদ্রাং নাশযেদিত্যাহ-গ্রাম্যসুখে নিঃস্পৃহং চেতো যস্য স তস্য| তথা, সন্তোষতৃপ্তস্য|

Adhikarana maithune niShiddhAni (69-72) · Śloka 72

যদা তু গ্রাম্যধর্মেণ বিনা ন রতিঃ, অপত্যার্থিতা বা, তদা তদধিকারার্থমুচ্যতে গ্রাম্যধর্মে ত্যজেন্নারীমনুত্তানাং রজস্বলাম্| অপ্রিযামপ্রিযাচারাং দুষ্টসঙ্কীর্ণমেহনাম্||৬৯|| অতিস্থূলকৃশাং সূতাং গর্ভিণীমন্যযোষিতম্| বর্ণিনীমন্যযোনিং চ গুরুদেবনৃপালযম্||৭০|| চৈত্যশ্মশানাঽঽযতনচত্বরাম্বুচতুষ্পথম্| পর্বাণ্যনঙ্হ্গং দিবসং শিরোহৃদযতাডনম্||৭১|| অত্যাশিতোঽধৃতিঃ ক্ষুদ্বান্ দুঃস্থিতাঙ্গঃ পিপাসিতঃ| বালো বৃদ্ধোঽন্যবেগার্তস্ত্যজেদ্রোগী চ মৈথুনম্||৭২||

স০-গ্রাম্যধর্মে-স্ত্রীপুংসংযোগবিষযে, অনুত্তানং স্ত্রিযং ত্যজেত্, উত্তানাং- ভজেদিত্যর্থঃ| তথা, রজস্বলত্বাদিযুতাং ত্যজেত্| দুষ্টং ব্যাধিমলাদিভিঃ, সঙ্কীর্ণং-সঙ্কটং চ, মেহনং-যোনির্যস্যাস্তাম্| তথা, বর্ণিনীং-ব্রহ্মচারিণীম্| অন্যযোনিং-অজামহিষ্যাদিং চ ত্যজেত্| গুর্বিত্যাদি| গ্রাম্যধর্মে নির্বর্তনে সতি গুরুদেবনৃপালযাংস্ত্যজেত্| তথা, চৈত্যাদীংস্ত্যজেত্| তেষু স্ত্রিযং ন সঙ্গচ্ছেদিত্যর্থঃ| চৈত্যাদীনাং পর্যাযা দিনচর্যাযামুক্তাঃ| আযতনং-দুষ্টানাং নিগ্রহস্থানম্| পর্বাণি-রবিসঙ্ক্রান্ত্যাদীনি ত্যজেত্, তেষু কামং ন সেবেতেত্যর্থঃ| তথা, অনঙ্গং,-অঙ্গং-জঘনম্, নাঙ্গং-অনঙ্গমঙ্গসদৃশং জঘনকার্যনির্বর্তনযোগ্যং মুখাদিকমুচ্যতে| দাক্ষিণাত্যা হি মুখেন তত্ কুর্বন্তি, তন্নিষিধ্যতে| দিবসং চ ত্যজেত্, দিনে রতং ন কুর্বন্তি, তন্নিষিধ্যতে| দিবসং চ ত্যজেত্, দিনে রতং ন কুর্বীতেত্যর্থঃ| মূর্ধবক্ষোঽভিঘাতং চ ত্যজেত্| তথা, অত্যাশিতাদযঃ সুরতং ত্যজেযুঃ| অত্যাশিতঃঅতিসুহিতঃ| অধৃতিঃ-দুর্মনাঃ| অন্যবেগার্তঃ-পুরীষাদিবেগাতুরঃ| ননু, ক্ষুদ্বেগার্ত উচ্যতে| ততোঽন্যবেগার্ত ইত্যনেনৈবাস্যার্থস্য লব্ধত্বাত্ কিং ক্ষুদ্বানিত্যনেন? সত্যমেতত্| অতিশযার্থং ত্বেতত্| যথা ক্ষুদ্বেগার্তঃ স্ত্রিযং গচ্ছন্নতিশযেন পীডযা বাধ্যতে, ন তথাঽন্যবেগার্ত ইতি|

Adhikarana RutuvisheShe samBoganiyamaH (73) · Śloka 73

সম্প্রতি ঋতুবিশেষেষু নিধুবনং নিযমযতি সেবেত কামতঃ কামং তৃপ্তো বাজীকৃতাং হিমে| ত্র্যহাদ্বসন্তশরদোঃ পক্ষাদ্বর্ষানিদাঘযোঃ||৭৩||

স০-তৃপ্তো-বাজীকরণৈঃ সঞ্জাতসন্তর্পণঃ সন্, কামতো- যথেচ্ছযা, হিমে-হেমন্তর্তৌ শিশিরে চ, কামং-যথেচ্ছং, সেবেত| বাজীকৃতামিতি সম্পদাদিত্বাত্ক্বিপ্| তৃপ্ত ইতি ক্তোঽধিকরণে চ ধ্রৌব্যেত্যাদিনাঽধিকরণে ক্তঃ| অধিকরণবাচিনশ্চেতি ষষ্ঠী| বসন্তে শরদি চ ত্র্যহাত্-ত্রযহমতিক্রম্য, মৈথুনং নিষেবেত| বর্ষাগ্রীষ্মযোঃ পক্ষাত্ কামং ভজেত্|

Adhikarana anyaprakAreNa strIgamane bhramAdayaH (74) · Śloka 74

ভ্রমক্লমোরুদৌর্বল্যবলধাত্বিন্দ্রিযক্ষযাঃ| অপর্বমরণং চ স্যাদন্যথা গচ্ছতঃ স্ত্রিযম্||৭৪||

স০-অন্যথা-উক্তাদ্বিধেরন্যেন প্রকারেণ, স্ত্রিযং গচ্ছতো ভ্রমাদযঃ স্যুঃ| অপর্বণি-অকালে মরণং-অপর্বমরণম্|

Adhikarana samyaksamBogAcaraNe Palam (75) · Śloka 75

স্মৃতিমেধাযুরারোগ্যপুষ্টীন্দ্রিযযশোবলৈঃ| অধিকা মন্দজরসো ভবন্তি স্ত্রীষু সংযতাঃ||৭৫||

স০-স্ত্রীষু সংযতাঃ-স্ত্রীঃ সম্যক্ সেবমানাঃ, স্মৃত্যাদিভিরধিকা অল্পজরাশ্চ ভবন্তি|

Adhikarana samBogAvasAne sevyAH (76) · Śloka 76

স্নানানুলেপনহিমানিলখণ্ডখাদ্য শীতাম্বুদুগ্ধরসযূষসুরাপ্রসন্নাঃ| সেবেত চানু শযনং বিরতৌ রতস্য তস্যৈবমাশু বপুষঃ পুনরেতি ধাম||৭৬||

স০-রতান্তে যথৌচিত্যেন স্নানাদীন্ সেবেত| খণ্ড্দখাদ্যং খণ্ডকৃতং কণিকেত্যাদি(?)| রসো-মাংসরসঃ| চানুশযনমিতি| অনু-পশ্চাচ্চ, স্বপ্নং সেবেত| তস্য-স্নানাদিসেবিনঃ শরীরস্য, এবং-অস্মিন্কৃতে, ধাম-তেজো, ভূয আগচ্ছতি| ত্মৌ জৌ বসন্ততিলকং গুরুকদ্বযং চ| সঙ্গ্রহে চোক্তম্ (সূ.অ.৯)- "স্নানাঙ্গরাগব্যজনেন্দুপাদযূষাসবক্ষীররসান্ রসালাম্| ভক্ষ্যান্ সিতাঢ্যান্ সলিলং সুশীতং সেবেত নিদ্রাং চ রতান্ততান্তঃ||" ইতি|

Adhikarana vaidyAdhIne deharakShaNe Palam (7) · Śloka 7

এতঞ্চ সর্বং পূর্বোক্তং হিতাহিতং বৈদ্য এব বেত্তি| তস্মাদ্বৈদ্যস্য সর্বথা শরীরং রাজ্ঞা নিবেদ্যমিতি দর্শযন্নাহ শ্রুতচরিতসমৃদ্ধে কর্মদক্ষে দযালৌ ভিষজি নিরনুবন্ধং দেহরক্ষাং নিবেশ্য| ভবতি বিপুলতেজঃস্বাস্থ্যকীর্তিপ্রভাবঃ স্বকুশলফলভোগী ভূমিপালশ্চিরাযুঃ||৭৭|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানেঽন্নরক্ষা নাম সপ্তমোঽধ্যাযঃ||৭||

স০-ভিষজি শরীররক্ষণং নিরনুবন্ধং-নির্বিকল্পমাধায, পৃথ্বীশো বহুকালমাত্মীয শ্রেষ্ঠফলভোগবান্ ভবতি| তথা, তেজশ্চ স্বাস্থ্যং চ কীর্তিশ্চ প্রভাবশ্চ, ত এবম্, বিপুলাঃ বিস্তীর্ণাঃ, তেজঃস্বাস্থ্যকীর্তিপ্রভাবা যস্য স এবংবিধঃ| কীদৃশো ভিষজি ? শ্রুতং-শাস্ত্রাববোধঃ, চরিতং-আচারঃ, তাভ্যাং সমৃদ্ধে-সম্পূর্ণে| তথা, ক্রিযাচতুরে| তথা, কৃপালৌ| বসুমুনিবিরতিশ্চেন্মালিনী নৌ মযৌ যঃ| ইতি শ্রীমৃগাঙ্কদতপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানেঽন্নরক্ষাধ্যাযঃ সপ্তমঃ সমাপ্তঃ|| ৭||