6. annasvarūpavijñānīyādhyāyaḥ

Adhikarana adhyAyopakramaH · Śloka

স০-অন্নবিধৌ প্রকৃতেঽল্পবক্তব্যাত্বাত্পূর্বং দ্রবদ্রব্যমভিধাযান্নং বক্তি-

Adhikarana annasvarUpavij~jAnIyAdhyAyaH ShaShThaH (2) · Śloka 2

অথাতোঽন্নস্বরূপবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসুত্রে)|২|

স০-অন্নস্য স্বরূপং-স্বভাবো রসবীর্যবিপাকপ্রভাবগুণকর্মাদি, তস্য বিজ্ঞানং-অবগম:, তস্মৈ হিতোঽধ্যাযঃ-অন্নরূপবিজ্ঞানীযঃ, তং ব্যাখ্যাস্যামঃ| শেষং পূর্ববদ্ব্যাখ্যেযম্| দ্রব্যশব্দশ্চাপ্রযুক্তোঽপ্যর্থস্য গমক ইত্যন্নদ্রব্যস্বরূপবিজ্ঞানীয ইতি দ্রষ্টব্যম্| তথা হি পূর্বস্মিন্নধ্যাযে মন্দমতিপ্রবোধনায প্রযুক্তো দ্রব্যশব্দঃ|আচার্যা হি বৈচিত্র্যেণ গ্রন্থরচনাং বিদধতি| তত্র প্রাক্ স্বরূপশব্দো ন নির্দিষ্টঃ, ইহ চ দ্রব্যশব্দঃ| অথবোভযমপ্রযুক্তমপি গম্যতে মধ্যলোপাখ্যযা তন্ত্রযুক্ত্যাঽন্তলোপায চ| অদ্যতে যত্তত্-অন্নম্ ধান্যমাংসাদি| ধান্যং চ দ্বিধা শূকশিম্বিধান্যভেদেন তত্র প্রাধান্যাচ্ছূকধান্যস্য পূর্বমুপন্যাসঃ| প্রাধান্যং চাস্য ভূযস্ত্বোপযোগিত্ত্বাত্|

Adhikarana shUkadhAnyavargaH raktashAlyAdiguNAH (1-4) · Śloka 4

শিম্বীধান্যস্য তু তদ্ব্যঞ্জনত্ত্বেন স্বল্পোপযোগিত্ত্বাত্ প্রাযেণাপথ্যাত্ত্বাচ্চাপ্রাধন্যং, ইত্যাহ- অথ শূকধান্যবর্গঃ| রক্তো মহান্ সকলমস্তূর্ণকঃ শকুনাহৃতঃ| সারামুখো দীর্ঘশূকো রোধ্রশূকঃ সুগন্ধিকঃ||১|| পুণ্ড্রঃ পাণ্ডুঃ পুণ্ডরীকঃ প্রমোদো গৌরসারিবৌ| কাঞ্হ্চনো মহিষঃ শূকো দূষকঃ কুসুমাণ্ডকঃ||২|| লাঙ্গলা লোহবালাখ্যঃ কর্দমাঃ শীতভীরুকাঃ| পতঙ্গাস্তপনীযাশ্চ যে চান্যে শালযঃ শুভাঃ||৩|| স্বাদুপাকরসঃ স্নিগ্ধা বৃষ্যা বদ্ধাল্পবর্চসঃ| কষাযানুরসাঃ পথ্য লঘবো মূত্রল হিমাঃ||৪||

স০- তত্র রক্তশালিমহাশালী-সুপ্রথিতাবেব| কলমোমগধাদিষু প্রসিদ্ধঃ| স এব মহাতণ্ডুল ইতি কাশ্মীরেষু| তূর্ণকশ্চ-তত্রৈব আজব ইতি প্রসিদ্ধঃ| শকুনহৃতো-যো মগধেষু বুদ্ধোত্পাদকাল উত্তরকুরুভ্যো হংসৈরানীতো ভৃঙ্গারপাত্রে বিশাখাখ্যযা বাপিতো বিস্তরং গতঃ| অত এব শকুনিনাঽঽহৃতঃ শকুনাহৃত ইত্যন্বর্থা

Adhikarana raktashAliguNAH (5) · Śloka 5

শূকজেষু বরস্তত্র রক্তস্তৃষ্ণাত্রিদোষহা| |৫|

স০-তত্র-তেষু মহাশালিকলমাদিষু মধ্যে, রক্তো-রক্তশালিসংজ্ঞো বরঃ, তৃষ্ণাং বাতাদীশ্চ ত্রিদোষান্নিহন্তি| অস্য চ প্রাগুপাদানেনৈব বরত্বে লব্ধে বরগ্রহণং যুক্ত্যা

Adhikarana mahAshAlyAdInAM guNAH (5) · Śloka 5

| মাহাংস্তমনু কলমস্তং চাপ্যনু ততঃ পরে||৫||

স০-তস্যানু-রক্তশালেঃ পশ্চাত্, মহান্ শালির্বরঃ| তং চ-মহান্তমনু কলমঃ, মহত্সংজ্ঞাত্ কলমঃ কিঞ্চিদূন ইত্যর্থঃ| ততঃ-অনন্তরম্, পরে-অন্যে শালযো

Adhikarana yavakAdInAM pUrvasya pUrvasya ninditatvam (6-7) · Śloka 7

যবকা হাযনাঃ পাংসুবাষ্পনৈষধকাদযঃ| স্বাদূষ্ণা গুরবঃ স্নিগ্ধাঃ পাকেঽম্লাঃ শ্লেষ্মপিত্তলাঃ||৬|| সৃষ্টমূত্রপুরীষাশ্চ পূর্বং পূর্বং চ নিন্দিতাঃ| |৭|

স০-যবকাদযঃ শালিবিশেষাঃ স্বাদবঃ| তথা, উষ্ণাদিগুণযুক্তাঃ| তথা, সৃষ্টে মূত্রপুরীষে যৈস্তে সৃষ্টমূত্রপুরীষাঃ| পূর্বং পূর্বং চ নিন্দিতাঃ-তেন যবকাঃ সর্বেভ্যোঽপি গর্হিতাঃ, তদন্বন্যে কিঞ্চিত্কিঞ্চিত্ক্রমেণ গর্হিতা ইতি বিজ্ঞেযম্| নৈষধকাদয ইত্য- ত্রাঽঽদিশব্দেন চম্পকপত্রিকাদযঃ শালিবিশেষা গৃহ্যন্তে|

Adhikarana ShaShTikaguNAH (7-8) · Śloka 8

| স্নিগ্ধো গ্রাহী লঘুঃ স্বাদুদুস্ত্রিদোষঘ্নঃ স্থিরো হিমঃ||৭|| ষষ্টিকো ব্রীহিষু শ্রেষ্ঠো গৌরশ্চাসিতগৌরতঃ| |৮|

স০-ব্রীহিষু মধ্যে ষষ্টিকঃ শ্রেষ্ঠঃ, রক্তশালিরিব শালিষু| তথা, স্নিগ্ধাদিগুণযুক্তঃ| স্থিরো হিম ইতি শরীরস্তৈর্যকরো জ্বরশ্রমক্লমগ্লানিহরঃ| অত এব রসাযনপ্রযোগে জ্বরাদোউ ছ তত্র তত্র ক্ষামবপুষামুপদিষ্টঃ| যবস্তু স্তৈর্যকরোঽপি নাম্নাতো গুরুবাতলত্বাদিতি বেদ্যম্| ষষ্টিকশ্ছ দ্বিবিধঃ,-গৌরঃ কৃষ্ণগোউরশ্চ| অত্রাসিতগোউরতো গৌরঃ ষষ্টিকঃ শ্রেষ্টঃ| (তথা চ সুশ্রুতে (সূ.অ.৪৬|৯)-"রসে পাকে চ মধুড়্রাঃ পিত্তানিলহরাস্তথা| শালীনাং চ গুণৈস্তুল্যা বিজ্ঞ্হেযাঃ কফশুক্রলাঃ|| ষষ্টিকঃ প্রবরস্তেষাং কষাযানুরসো লঘুঃ|" কৃষ্ণাত্রেযঃ:-ষষ্টিকঃ সুরকব্রীহিপাটলোটকনালকাঃ| কৃষ্ণব্রীহিঃ শীতভীরুঃ প্রমোদোহাযনস্তথা|| অনভিষ্যন্দিনঃ স্নিগ্ধাঃ কষাযমধুরা হিমাঃ| লঘবঃ কটুপাকাশ্ছ ষষ্টিকোঽত্রাপি পূজিতঃ||" খারণাদিঃ- "কষাযমধুরো গ্রাহী দোষঘ্নঃ ষষ্টিকো লঘুঃ|" পরাশরেঽপ্যুক্তম্- "রক্তো মহাচ্ছকুনাহৃতঃ ষষ্টিককলমপ্রমোদপতড্গাঃ শীতগৌরদীর্ঘশূকসুগন্ধিকপাণ্ডুতপনীযাঃ শালয এবংভূতাঃ| মধুরবহলাঃ স্থিরাঃ স্নিগ্ধাঃ পিত্তানিলপ্রশমনা লঘবঃ সঙ্গ্রাহিকাঃ শীতাঃ|" ইতি| চরকে ত্বেবং পঠ্যতে (সূ.অ.৫|৩)-"তত্র শালিষষ্টিকমুদ্গলাবকপিঞ্জলৈণশশশরভবরাহাদীন্যাহারদ্রব্যাণি প্রকৃতিলঘূন্যপি মাত্রাপেক্ষীণি ভবন্তি|" তথা চ চরকো জ্বরে পঠতি (চি.অ.৩|১৭৬)-"রক্তশাল্যাদযঃ শস্তাঃ পুরাণাঃ ষষ্টিকৈঃ সহ| যবাগ্বোদনলাজার্থে জ্বরিতানাং জ্বরাপহাঃ||" ইতি|

Adhikarana mahAvrIhyAdiguNAH (8-10) · Śloka 10

| ততঃ ক্রমান্মহাব্রীহিকৃষ্ণব্রীহিজতূমুখাঃ||৮|| কুক্কুটাণ্ডকলাবাখ্যপারাবতকশূকরাঃ| বরকোদ্দালকোজ্জ্বালচীনশারদদর্দুরাঃ||৯|| গন্ধনাঃ কুরুবিন্দাশ্চ গুণৈরল্পান্তরাঃ স্মৃতাঃ| |১০|

স০-ততঃ-ষষ্টিকাত্, মহাব্রীহ্যাদযঃ ক্রমাদ্গুণৈরল্পান্তরাঃ-গুণৈর্হীনাঃ|

Adhikarana ShaShTikAdiByo~anyavrIhiguNAH (10-11) · Śloka 11

| স্বাদুরম্লবিপাকোঽন্যো ব্রীহিঃ পিত্তকরো গুরুঃ|১০| বহুমূত্রপুরীষোষ্মা, ত্রিদোষস্ত্বেব পাটলঃ| |১১|

স০-এভ্যঃ ষষ্টিকাদিভ্যোঽন্যঃ-অনুক্তো, ব্রীহিঃ স্বাদুঃ- মধুররসঃ, অম্লবিপাকঃ পিত্তকরো গুরুর্বহুমূত্রপুরীষোষ্মা ছ| পাটলঃ- পটলাকুসুমাকারঃ| ত্রিদোষঃ-ত্রিদোষকোপনঃ| ত্রিদোষস্ত্বেবেত্যত্রৈবশব্দোঽতিশযখ্যাপনায| অতিশযেন ত্রিদোষল ইত্যর্থঃ| অতিত্রিদোষলত্বেনাস্যাঽভ্যবহারনিষেধং করোতি| অত এব চ রসাদিমত্ত্বং ন ব্যধাদস্য শাস্ত্রকারঃ|

Adhikarana ShaShTikAdiByo~anyavrIhiguNAH (10-11) · Śloka 11

| স্বাদুরম্লবিপাকোঽন্যো ব্রীহিঃ পিত্তকরো গুরুঃ||১০|| বহুমূত্রপুরীষোষ্মা, ত্রিদোষস্ত্বেব পাটলঃ| ||১১||

স০-এভ্যঃ ষষ্টিকাদিভ্যোঽন্যঃ-অনুক্তো, ব্রীহিঃ স্বাদুঃ- মধুররসঃ, অম্লবিপাকঃ পিত্তকরো গুরুর্বহুমূত্রপুরীষোষ্মা ছ| পাটলঃ- পটলাকুসুমাকারঃ| ত্রিদোষঃ-ত্রিদোষকোপনঃ| ত্রিদোষস্ত্বেবেত্যত্রৈবশব্দোঽতিশযখ্যাপনায| অতিশযেন ত্রিদোষল ইত্যর্থঃ| অতিত্রিদোষলত্বেনাস্যাঽভ্যবহারনিষেধং করোতি| অত এব চ রসাদিমত্ত্বং ন ব্যধাদস্য শাস্ত্রকারঃ|

Adhikarana priya~gguguNAH (12) · Śloka 12

| ভগ্নসন্ধানকৃত্তত্র প্রিযঙ্গুর্বৃংহণী গুরুঃ||১২||

স০-তত্র-তেষু তৃণধান্যেষু মধ্যে, প্রিযাঙ্গুঃ-কঙ্গুঃ, ভগ্নস্যাঙ্গস্য সন্ধানং করোতি| তথা, গুরুঃ| সুশ্রুতে তূক্তম্ (সূ.অ.৪৬|২৪)-"রক্তাঃ পীতাশ্চ কৃষ্ণাশ্চ শ্বেতাশ্চৈব প্রিযঙ্গবঃ| যথোত্তরং প্রধানাঃ স্যূ রূক্ষাঃ কফহরাঃ স্মৃতাঃ||" ইতি|

Adhikarana koradUShaguNAH (13) · Śloka 13

কোরদূষঃ পরং গ্রাহী স্পর্শে শীতো বিষাপহঃ| |১৩|

স০-কোরদূষঃ-কোদ্রবঃ, অত্যর্থং সঙ্গ্রাহী| তথা স্পর্শশীতো বিষাপহশ্চ|

Adhikarana yavaguNAH (13-14) · Śloka 14

| রূক্ষঃ শীতো গুরুঃ স্বাদুঃ সরো বিড্বাতকৃদ্যবঃ||১৩|| বৃষ্যঃ স্থৈর্যকরো মূত্রমেদঃপিত্তকফান্ জযেত্| পীনসশ্বাসকাসোরুস্তম্ভকণ্ঠত্বগামযান্||১৪||

স০-যবো রূক্ষাদিগুণৈর্যুক্তো বিড্বাতকরো বৃষ্যঃ স্থৈর্যকৃচ্চ| তথা, মূত্রাদীন্ জযেত্|

Adhikarana anuyavaguNAH (15) · Śloka 15

ন্যূনো যবাদনুযবঃ| |১৫|

স০-অনুযবো নাম শূকধান্যবিশেষো লোকপ্রসিদ্ধঃ| স যবান্ন্যূনঃ-স্বল্পৈর্যবগুণৈর্যুক্তঃ|

Adhikarana vaMshodBavayavaguNAH (15) · Śloka 15

রুক্ষোষ্ণো বংশজো যবঃ| |১৫|

স০-বংশোদ্ভবো-বেণুজো যবো রুক্ষোষ্ণো ভবতি|

Adhikarana godhUmaguNAH (15-16) · Śloka 16

| বৃষ্যঃ শীতো গুরুঃ স্নিগ্ধো জীবনো বাতপিত্তহা||১৫|| সন্ধানকারী মধুরো গোধূমঃ স্থৈর্যকৃত্সরঃ| |১৬|

স০-গোধূমো বৃষ্যাদিগুণযুক্তঃ| জীবনঃ-ওজোভিবর্ধনঃ| তথা, বাতপিত্তহরঃ| সন্ধানকারী-ঊরুপ্রভৃতের্ভগ্নস্য সন্ধানং করোতি| তথা, স্থৈর্যকৃত্সরশ্চ| চরকে (সূ,অ. ২৭|২০) ত্বন্যথৈব গুণা উক্তাঃ| যথা-"স্থৈর্যকৃত্সকষাযশ্চ বল্যঃ শ্লেষ্মবিকারহা| সন্ধানকৃদ্বাতহরো গোধূমঃ স্বাদুশীতলঃ||"ইতি|

Adhikarana nandImuKIguNAH (16-1) · Śloka 1

| পথ্যা নন্দীমুখী শীতা কষাযমধুরা লঘুঃ||১৬|| ইতি শূকধান্যবর্গঃ||১||

স০-নন্দীমুখী-(কৃশদীর্ঘা গোধূমজাতিঃ|) পথ্যা-শরীরায হিতা, শীতা কষাযমধুরা লঘুশ্চ| ইতি শূকধান্যবর্গঃ| অস্মাদনন্তরং শিম্বীধান্যবর্গস্য সম্বন্ধপ্রযোজনং প্রাগুক্তমেব|

Adhikarana shimbIdhAnyavargaH (17-18) · Śloka 18

অথ শিম্বীধান্যবর্গঃ| মুদ্গাঢকীমসূরাদি শিম্বীধান্যং বিবন্ধকৃত্| কষাযং স্বাদু সঙ্গ্রাহি কটুপাকং হিমং লঘু||১৭|| মেদঃশ্লেষ্মাস্ত্রপিত্তেষু হিতং লেপোপসেকযোঃ| |১৮|

স০- শিম্ব্যাঃ-কোশ্যাঃ, ধান্যং-মুদ্গাদিকং, যত্ শিম্বীধান্যং তদ্বিবন্ধকৃত্| কেষাং বিবন্ধং করোতি ? সামর্থ্যাত্ স্রোতসাম্, ন তু পুরীষাদীনাম্| তথা চ সঙ্গ্রাহীত্যত্রৈব পঠতি শাস্ত্রকৃত্| সঙ্গ্রাহিলক্ষণং চ তত্রান্তরে| যথা-"ভেদি তত্পিণ্ডতান্ ভাবান্ শকৃদাদীন্ভিনত্তি যত্| বিপরীতমতো গ্রাহি" ইতি| তস্মাদ্বিবন্ধং স্রোতসামেবেত্যবেহি| তথা, কষাযং স্বাদু কটুপাকং শীতবীর্যং লঘু চ| মসূরাদীত্যত্রাঽঽদিশব্দেন মকুষ্ঠচণকাদীনাং গ্রহণম্| তথা, মেদআদিষু হিতম্, প্রকৃতত্বাদভ্যবহারে তথা লেপ উপসেকে চেতি| চশব্দোঽত্র লুপ্তনির্দিষ্টো বোধ্যঃ| লেপঃ-প্রদেহঃ| উপসেকঃ-পরিষেকঃ| কষাযশীতরূক্ষত্বেন কটুপাকিত্বেন চ বাতকৃত্ত্বং শিম্বীধান্যস্য শাস্ত্রকৃতোক্তম্| অত এবেদমুপপন্নম্-"মুদ্গোঽল্পচলঃ" ইতি| যদি হি শিম্বীধান্যস্য মারুতকৃত্ত্বং সমেযাত্, তদৈতদ্বক্তুং যুজ্যতে| তস্মাত্ বাতকৃত্ত্বমস্যাস্তীতি স্থিতম্| তস্মিংশ্চ সত্যাধ্মানকারিত্বমপ্যুপপন্নমেব| অত এব সঙ্গ্রহেঽস্যাধ্মানকারিত্বমুক্তম্| মুদ্গাদীনাং চ বিশেষাস্তত্রৈবোক্তাঃ (সং. সূ. অ. ৭)| যথা-"হরিতাস্তেষ্বপি বরা মকুষ্ঠাঃ কৃমিকারিণঃ| বর্ণ্যাঃ পরং প্রলেপাদ্যৈর্মসূরা গ্রাহিণো ভৃশম্||" ইতি|

Adhikarana shimbIdhAnyanAM sAmAnyaguNAH mudgaguNAH kalAyaguNAH rAjamAShaguNAH (18-19) · Śloka 19

| বরোঽত্র মুদ্গোঽল্পচলঃ, কলাযস্ত্বতিবাতলঃ||১৮|| রাজমাষোঽনিলকরো রূক্ষো বহুশকৃদ্গুরুঃ| |১৯|

স০- অত্র-এষু শিম্বীধান্যেষু মধ্যে, মুদ্গ উত্তমঃ| তথা, অল্পং চলং-পবনং করোতীত্যল্পচলঃ _ তুর্ব্যতিরেকে| কলাযঃ পুনরতিশযেন বাতলো ভবতি| রাজমাষো রূক্ষো বহু শকৃত্করোতীতি বহুশকৃত্| তথা, গুরুঃ| তথা, অনিলকরঃ- "কৃঞো হেতুঃ" ইতি তাচ্ছীল্যে টঃ, কলাযবন্নাতিবাতলঃ, অন্যশিম্বীধান্যাচ্চাতিবাতলোঽযমিতি বেদ্যম্, অনিলকরগ্রহণাত্| অন্যথাশিম্বীধান্যসামান্যলক্ষণেন বাতমাত্রকরণস্য লব্ধত্বাদনিলকরগ্রহণং ন কুর্যাত্|

Adhikarana kulatthaguNAH (19-20) · Śloka 20

| উষ্ণাঃ কুলত্থাঃ পাকেঽম্লাঃ শুক্রাশ্মশ্বাসপীনসান্||১৯|| কাসার্শঃকফবাতাংশ্চ ঘ্নন্তি পিত্তাস্রদাঃ পরম্| |২০|

স০- কুলত্থা উষ্ণবীর্যাঃ পাকেঽম্লাঃ| তথা, শুক্রাদীন্ ঘ্নন্তি- অশ্ম-অশ্মরী বক্ষ্যমাণলক্ষ্ণা| তথা, পিত্তাস্রদাঃ পরং-অতিশযেন রক্তপিত্তকরাঃ| কষাযস্বাদুসঙ্গ্রাহিত্বং শিম্বীধান্যসামান্যলক্ষণেনৈষাং বেদ্যম্, দৃষ্টিনাশনত্বং চোষ্ণবীর্যত্বেন রক্তপিত্তকরত্বেন চ| সঙ্গ্রহে তু স্পষ্টং কৃত্বোক্তম্ (সূ. অ. ৭)-"কষাযস্বাদুরূক্ষোষ্ণাঃ কুলত্থা রক্তপিত্তলাঃ| পীনসশ্বাসকাসার্শোহিক্কাঽঽনাহকফানিলান্| ঘ্নন্তি শুক্রাশ্মরীং শুক্রং দৃষ্টিং শোফং তথোদরম্| গ্রাহিণো লঘবস্তীক্ষ্ণা বিপাকেঽম্লা বিদাহিনঃ" ইতি|

Adhikarana niShpAvaguNAH (20-21) · Śloka 21

| নিষ্পাবো বাতপিত্তাস্রস্তন্যমূত্রকরো গুরুঃ||২০|| সরো বিদাহী দৃক্শুক্রকফশোফবিষাপহঃ| |২১|

স০-নিষ্পাবো-রাজশিম্বীসংজ্ঞো, বাতাদিকরঃ| তথা, গুরুঃ সরো বিদাহী চ| তথা, দৃগাদীনপহন্তি| সঙ্গ্রহোক্তং চাম্লপাকত্বং কষাযমধুরত্বং চেহ নোক্তম্| যতোঽম্লবিপাকিত্বং তাবদ্বিদাহিত্বাদেবাস্যোক্তম্| কষাযস্বাদুত্বং চ শিম্বীধান্যসামান্যগুণকথনেনৈব| কৃষ্ণাত্রেযস্ত্বাহ-"নিষ্পাবা মধুরা রূক্ষাঃ সকষাযা বিদাহিনঃ| উদাবর্তে প্রশস্যন্তে গুরবো বাতপিত্তলাঃ" ইতি|

Adhikarana mAShaguNAH (21-22) · Śloka 22

| মাষঃ স্নিগ্ধো বলশ্লেষ্মমলপিত্তকরঃ সরঃ||২১|| গুরূষ্ণোঽনিলহা স্বাদুঃ শুক্রবৃদ্ধিবিরেককৃত্| |২২|

স০-মাষঃ স্নিগ্ধো বলাদিকরঃ| তথা, সরো গুরূরূষ্ণশ্চ| তথা, বাতহা স্বাদুশ্চ| তথা, শুক্রস্য বৃদ্ধিং শুক্রস্যৈব বিরেকং-বহিঃপ্রেরণং, করোতি|

Adhikarana kAkANDolAtmaguptAPalaguNAH (22) · Śloka 22

| ফলানি মাষবদ্বিদ্যাত্কাকাণ্ডোলাত্মগুপ্তযোঃ||২২||

স০-কাকাণ্ডোলা চাত্মগুপ্তা চ, তযোঃ ফলানি মাষবদ্বিদ্যাত্-মাষসমগুণানি বিজানীযাত্| কাকাণ্ডোলা-কটভী| আত্মগুপ্তা-কপিকচ্ছূঃ|

Adhikarana tilaguNAH (23) · Śloka 23

উষ্ণস্ত্বচ্যো হিমঃ স্পর্শে কেশ্যো বল্যস্তিলো গুরুঃ| অল্পমূত্রঃ কটুঃ পাকে মেধাঽগ্নিকফপিত্তকৃত্||২৩||

স০-তিল উষ্ণবীর্যঃ| তথা, ত্বচ্যঃ| তথা, স্পর্শে শীতঃ| কেশ্যো বল্যো গুরুশ্চ| তথা, অল্পমূত্রঃ-অল্পমূত্রকরঃ| পাকে কটুঃ| তথা, মেধাদীন্ করোতি| ত্বচ্যকেশ্যবল্যা হিতার্থা যত্প্রত্যযান্তাঃ| স্নিগ্ধত্বমনিলঘ্নত্বং কষাযকটুতিক্তরসত্বং নানাজাতিত্বং চেহাস্য গ্রন্থকৃতা লাঘবান্নোক্তম্| সঙ্গ্রহে তূক্তমেব (সূ. অ. ৭)| যথা-"স্নিগ্ধোষ্ণতিক্তকটুককষাযমধুরস্তিলঃ| ত্বচ্যঃ কেশ্যো গুরুর্বৃষ্যঃ স্পর্শশীতোঽনিলাপঃ|| অল্পমূত্রঃ কটুঃ পাকে মেধাঽগ্নিকফপিত্তকৃত্| কৃষ্ণঃ প্রশস্তস্তমনু শুক্লস্তমনু চারুণঃ||" ইতি| অন্যে ত্বনযা যুক্ত্যা সঙ্গ্রহোক্তমর্থং সঙ্গৃহ্ণতে| স্নিগ্ধত্বং তাবত্তিলস্য তৈলেষু মুখ্যস্য স্নেহস্য যোনিভূতত্বাত্সিদ্ধম্, কফপিত্তকৃদিতি বচনাত্স্নিগ্ধত্বাচ্চ সামর্থ্যাল্লব্ধং বাতঘ্নত্বম্, কষাযস্বাদ্বিতি শিম্বীধান্যসামান্যগুণকথনেন কষাযস্বাদুত্বং লব্ধমিতি| এতদেবোররীকৃত্য ব্রণপ্রতিষেধে বক্ষ্যতি (হৃ.উ.অ.২৫|৫৪)-কল্কং সংরোহণং কুর্যাত্তিলানাং মধুকান্বিতম্| স্নিগ্ধোষ্ণতিক্তমধুরকষাযত্বৈঃ স সর্বজিত্||" ইতি|

Adhikarana atasIguNAH kusumBabIjaguNAH (24) · Śloka 24

স্নিগ্ধোমা স্বাদুতিক্তোষ্ণা কফপিত্তকরী গুরুঃ| দৃক্শুক্রহৃত্কটুঃ পাকে, তদ্বদ্বীজং কুসুম্ভজম্||২৪||

স০-উমা-অতসী, স্নিগ্ধা স্বাদ্বাদিগুণযুক্তোষ্ণবীর্যা চ| সা শ্লেষ্মপিত্তযোঃ কর্ত্রী চ| তথা, দৃষ্টিং শুক্রং চ হরতি| কটুপাকা চ| তযা-উমযা তুল্যং বর্ততে-তদ্বত্, উমাসমানগুণং কুসুম্ভীজমিত্যর্থঃ|

Adhikarana mAShayavakayoravaratvam (25) · Śloka 25

মাষোঽত্র সর্বেষ্ববরো, যবকঃ শূকজেষু চ| |২৫|

স০-অত্র-শিম্বীধান্যেষু, মাষোঽশ্রেষ্ঠঃ| শূকজেষু-শূকধান্যেষু, যবকোঽশ্রেষ্ঠঃ|

Adhikarana navadhAnyaguNAH purANadhAnyaguNAH shIghrajanmAdisUpyaguNAH (25-1) · Śloka 1

নবং ধান্যমভিষ্যন্দি, লঘু সংবত্সরোষিতম্||২৫|| শীঘ্রজন্ম তথা সূপ্যং নিস্তুষং যুক্তিভর্জিতম্| |২৬| ইতি শিম্বীধান্যবর্গঃ||১||

স০- নবং প্রত্যগ্রং, ধান্যমভিষ্যন্দি-আভিমুখ্যেন স্যন্দযতি| তাচ্ছীল্যে ণিনিঃ| মালিন্যাত্স্রোতসাং স্রুতিরূপং শ্লেষ্মাণং করোতীত্যর্থঃ| অর্থাত্পুরাণমনভিষ্যন্দি| সংবত্সরোষিতং-বর্ষাতীতং, লঘু ভবতি| নবং চার্থাদ্গুর্বিত্যনুক্তমপ্যুক্তং ভবতি| তন্ত্রান্তরেঽপ্যুক্তম্- "বর্ষস্থিতং সর্বমন্নং পরিত্যজতি গৌরবম্| ন তু ত্যজতি তদ্বীর্যং বীর্যং মুঞ্চত্যতঃ ক্রমাত্||" ইতি| শীঘ্রেত্যাদি| লঘ্বিত্যনুবর্ততে| সূপ্যং-মুদ্গাদি যচ্ছীঘ্রজন্ম, তল্লঘু ভবতি| তথা, বিগততুষং যুক্ত্যা ভর্জিতং-ভৃষ্টং লঘু ভবতি| সঙ্গ্রহে ত্বেবমুক্তম্ (সূ.অ.৭)-"নবং ধান্যমভিষ্যন্দি সেক্যং কেদারজং চ যত্| লঘু বর্ষোষিতং দগ্ধভূমিজং স্থলসম্ভবম্|" ইতি| ইতি শিম্বীধান্যবর্গঃ| নির্দিষ্টে শূকশিম্বীধান্যে| তযোশ্চ সংস্কৃতযোরুপযোগ ইতি কৃতান্নবর্গঃ প্রারভ্যতে-

Adhikarana kRutAnnavargaH maNDAdInAM yathApUrvaM lAghavam maNDaguNAH (26-28) · Śloka 28

অথ কৃতান্ন(পক্বান্ন)বর্গঃ| | মণ্ডপেযাবিলেপীনামোদনস্য চ লাঘবম্||২৬|| যথাপূর্বং শিবস্তত্র মণ্ডো বাতানুলোমনঃ| তৃড্গ্লানিদোষশেষঘ্নঃ পাচনো ধাতুসাম্যকৃত্||২৭|| স্রোতোমার্দবকৃত্স্বেদী সন্ধুক্ষযতি চানলম্| |২৮|

স০-মণ্ডাদীনাং যথাপূর্বং লাঘবম্| তেনৌদনমপেক্ষ্য লঘ্বী বিলেপী, ততোঽপি পেযা, পেযাতো মণ্ডো লঘুতর ইত্যর্থোঽবতিষ্ঠতে| মণ্ডপেযাবিলেপ্যোদনানাং যথাপুর্বং লাঘবমিত্যেব বক্তব্যে যদত্রৌদনস্য পৃথক্পাঠঃ, স ইদং জ্ঞাপযতি,-মণ্ডাদযো লাজোপাদানা বেদ্যাঃ, ন তু তণ্ডুলোপাদানাঃ, যথা-ওদনঃ, ইতি| তথা চ মুনিঃ (চ, সূ,অ.২৭|২৫২)-"শৃতঃ পিপ্পলিশুণ্ঠীভ্যাং যুক্তো লাজাম্বুদাডিমৈঃ| মণ্ডঃ সন্দীপযত্যগ্নিং বাতং চাপ্যনুলোমযেত্||" ইতি| তদুক্তম্_"দ্রব্যস্যার্ধপলং দত্ত্বা তোযস্য প্রস্থমাবপেত্| অর্ধশেষং গৃহীত্বা তত্কর্ষৌ দ্বৌ দাডিমস্য চ|| যুক্তং সৈন্ধববিশ্বাহ্বধান্যকৈঃ শাণমাত্রকৈঃ| দ্বিকর্ষমাত্রৈর্লাজৈশ্চ ভূযঃ সংক্বথিতং চ তত্|| পিপ্পলীজীরকাভ্যাং চ শাণৈকেনাবচূর্ণিতম্| পেযাস্বেষ বিধিঃ কল্প্যো দাডিমাদিকৃতাস্বপি||" ইতি| তথা (সুশ্রুতে সূ. অ. ৪৬|৩৪৫)-"সিক্থৈর্বিরহিতো মণ্ডঃ পেযা সিক্থসমন্বিতা| ধনসিক্থা বিলেপী স্যাদ্যবাগূর্বিরলদ্রবা||" ইতি| অন্যে তু মণ্ডলক্ষণং পেযালক্ষণং চান্যথৈবেচ্ছন্তি| তথা তল্লক্ষণম্-"লাজাম্বুসৈন্ধবকণাধান্যনাগরদাডিমৈঃ| যুক্তো বিমৃদিতঃ পূতো মণ্ডঃ সংস্কৃত উচ্যতে|| নির্দ্রব্যা প্রাকৃতা পেযা তক্রদাডিমতণ্দুলৈঃ|" ইতি| সামান্যপেযাযাশ্চ তক্রদাডিমলাজাদিসাধিতাযা গুণনির্দেশোঽযম্, ন তু বিশিষ্টাযা জ্বরচিকিত্সাদিবিহিতাযা ইতি দ্রষ্টব্যম্| তস্যাস্তু তত্রৈবেত্যর্থঃ, বিশেষগ্রহণাত্কর্মান্তরনির্দেশাচ্চ| তত্র-তেষু মণ্ডাদিষু মধ্যে, মণ্ডঃ শিবঃ| তথা, বাতানুলোমনঃ| তথা, তৃষং গ্লানিং দোষশেষং চ হন্তীতি তৃড্গ্লানিদোষশেষঘ্নঃ| "অমনুষ্যকর্তৃকে চ" ইত্যত্র ঠক্| দোষস্য শেষো দোষশেষঃ| এষ এব হি বিহিতবমনস্য বিহিতবিরেচনস্য বা কিঞ্চিচ্ছেষো যো দোষঃ, তস্য| দোষশেষেতি বচনজ্ঞাপকাত্ কৃতবমনবিরেচনস্য দোষশেষকরণম্| তেন চ বমনকর্মণি বিরেচনকর্মণি বা কর্তব্যেঽতিযোগভযাত্ দোষশেষঃ কার্যঃ, ইত্যযমর্থো যুক্ত্যা প্রতিপাদিতঃ| তথা, মণ্ডঃ পাচনো ধাতুসাম্যকরশ্চ| তথা, স্রোতসাং মার্দবং করোতি| তথা, স্বেদযতীতি স্বেদী, বহ্নিং চ দীপযতি|

Adhikarana peyAguNAH (28-29) · Śloka 29

| ক্ষত্তৃষ্ণাগ্লানিদৌর্বল্যকুক্ষিরোগজ্বরাপহা||২৮|| মলানুলোমনী পথ্যা পেযা দীপনপাচনী| |২৯|

স০-ক্ষুচ্চ তৃষ্ণা চ, তাভ্যং গ্লানিঃ, সা চ দৌর্বল্যং চ কুক্ষিরোগশ্চ জ্বরশ্চ, তানপহন্তি যা সৈবংভূতা পেযা| দৌর্বল্যং- কার্শ্যম্| তথা, মলান্-বাতাদীন্, অনুলোমযতি-স্বমার্গস্থান্ করোতি| তথা, পথ্যা-শরীরস্য হিতা| তথা, দীপনী চাসৌ পাচনী চেতি "পুংবত্কর্মধারয" ইতি পুংবদ্ভাবঃ|

Adhikarana vilepIguNAH (29-30) · Śloka 30

| বিলেপী গ্রাহিণী হৃদ্যা তৃষ্ণাঘ্নী দীপনী হিতা||২৯|| ব্রণাক্ষিরোগসংশুদ্ধদুর্বলস্নেহপাযিনাম্| |৩০|

স০-বিলেপী গ্রাহিণী হৃদ্যা তৃষ্ণাঘ্নী দীপনী হিতা চ| ব্রণশ্চাক্ষিরোগশ্চ সংশুদ্ধশ্চ দুর্বলশ্চ স্নেহপাযী চ, তেষাং হিতা| ব্রণাক্ষিরোগশব্দৌ মত্বর্থীযাকারান্তৌ|

Adhikarana odanaguNAH (30-31) · Śloka 31

| সুধৌতঃ প্রস্রুতঃ স্বিন্নোঽত্যক্তোষ্মা চৌদনো লঘুঃ||৩০|| যশ্চাগ্নেযৌষধক্বাথসাধিতো ভৃষ্টতণ্ডুলঃ| বিপরীতো গুরুঃ ক্ষীরমাংসাদ্যৈর্যশ্চ সাধিতঃ||৩১||

স০-ওদনঃ সুষ্ঠু ধৌতস্তথা প্রস্রুতো-নিশ্চোতিতঃ স্বিন্নোঽত্যক্তবাষ্পশ্চ লঘুর্ভবতি| যশ্চৌদন আগ্নেযৌষধানাং-মরীচচিত্রকাদীনাং ক্বাথেন সাধিতঃ, সোঽতিলঘুঃ| তথা, ভৃষ্টাস্তণ্ডুলা যস্মিন্নোদনে সোঽতিলঘুতমঃ| যথোক্তলক্ষণাদোদনাদ্বিপরীতো-যোঽধৌতাদিঃ, স গুরুঃ| ক্ষীরমাংসাদিভিঃ-মধুরৈর্যশ্চ সাধিতঃ, সোঽতিগুরুঃ|

Adhikarana odanodAharaNA pariBAShA (32) · Śloka 32

ইতি দ্রব্যক্রিযাযোগমানাদ্যৈঃ সর্বমাদিশেত্| |৩২|

স০-ইতি-অনযা দিশা, সর্বং-পেযাদিকং পূর্বোক্তং বক্ষ্যমাণং চ ভক্ষ্যাদিকং, দ্রব্যেণ ক্রিযযা সংযোগেন মানেন চাদিশেত্| তত্র দ্রব্যতো যথা-ওদনস্য রক্তশাল্যাদিজস্য লাঘবম্, যবকাদিজস্য তু গৌরবম্| ক্রিযাতো যথা-সাক্ষাদগ্নিপাকাদিসংস্কারাচ্ছূল্যস্য মাংসস্য লঘ্বাদিগুণযোগঃ, অপরস্য ত্বন্যথাত্বং দৃশ্যতে| তথা চোক্তং তন্ত্রান্তরে-"বৃষ্যং বাতহরং বল্যং পথ্যং শূল্যামিষং লঘু| অপথ্যং গুরু বিষ্টম্ভি মাংসং যচ্চ রসোদ্ধতম্||" ইতি| তন্ত্রান্তরে চোক্তম্-"স্বিন্নং মাংসং গুরু স্তম্ভি শূলপক্বং ত্রিদোষজিত্|" ইতি| ক্রিযা-সংস্কার ইত্যর্থঃ| যোগঃ-সংযোগঃ, তেন যথা-আগ্নেযচিত্রকাদ্যৌষধক্বাথৈঃ সাধিতস্য লাঘবম্| মানতো যথা-বহুভির্লঘুভিরল্পৈশ্চ গুরুভির্যুক্তৈর্লঘুরেব, বিপরীতৈস্তু বিপরীত এব| আদ্যগ্রহণেন দেশাদিপরিগ্রহঃ| জাঙ্গলদেশপ্রভবতণ্ডুলকৃতো লঘুঃ, আনূপদেশতণ্ডুলকৃতো গুরুরিত্যাদি বোধ্যম্|

Adhikarana mAMsarasaguNAH (32) · Śloka 32

| বৃংহণঃ প্রীণনো বৃষ্যশ্চক্ষুষ্যো ব্রণহাং রসঃ||৩২||

স০-রস ইতি মাংসরসঃ, আদিশব্দলোপাত্| স বৃংহণাদিগুণযুক্তঃ| কৃতাকৃতস্য চ রসস্যাযং গুণনির্দেশো বোধ্যঃ| রসো হি স্নেহশুণ্ঠ্যাদিযুতঃ-কৃত ইত্যুচ্যতে, বিপরীতস্তু-অকৃতঃ| তত্র কৃতস্য তন্ত্রান্তরে বিধানমুক্তং গুণাশ্চ| যথা-"ছাগলং সক্থিজং মাংসং নিরস্থি তৈত্তিরং তথা| চতুষ্পলোন্মিতং সূক্ষ্মং কল্পিতং ক্ষালিতং জলে|| পিপ্পলীপিপ্পলীমূলশুণ্ঠীচিত্রকধান্যকৈঃ| দ্বিশাণৈঃ সংযুতে তোযে ক্বাথ্যং সার্ধাঢকোন্মিতে|| মাংসেঽরিমন্ দ্বিপলং তত্র দাডিমাত্কুট্টিতাত্ক্ষিপেত্| তং রসং মর্দিতং পূতং হিঙ্গুসৈন্ধবজীরকৈঃ|| যুক্তং সুধূপিতং পথ্যং শুদ্ধানাং শুদ্ধিকাঙ্ক্ষিণাম্| শুষ্যতাং ব্যাধিমুক্তানাং ব্রণিনাং বাতরোগিণাম্|| ভগ্নবিশ্লিষ্টসন্ধীনাং ক্ষীণধাত্বিন্দ্রিযৌজসাম্|" ইতি| তন্ত্রান্তরে চোক্তম্-"রসস্তত্র বরোঽনম্লঃ শাকুনো বৃংহণঃ সরঃ| তক্রসিদ্ধস্তু বিষ্টম্ভী লঘুর্বাতকফাপহঃ|| ফলাম্লগোরসোদারং সবিশ্বাজাজিধান্যকম্| স্নিগ্ধং মাংসং হিতং বল্যং বৃহণং রোচনং গুরু|| কাসমর্দকধান্যাম্লদাডিমাদিরজঃকৃতাঃ| লেহাস্তক্রাদিজাশ্চান্যে যোনিবদ্গুরুরোচনাঃ|| মালুধানীযবাসাদিপুষ্পৈর্যোঽতিগুণঃ খলঃ| ফলমূলৈর্ঘনাদানং ব্যঞ্জনং পাকতো ঘনম্|| লেহবত্খল ইত্যন্যে দোষলঃ স্বস্বযোনিবত্| তদ্বচ্চ তিলকল্কাম্লপ্রাযঃ কাম্বলিকো মতঃ|| কট্বরঃ কফজিদ্গ্রাহী পিত্তলো রোচকো লঘুঃ| মাংসাদজাজিশুণ্ঠ্যাদিগলিতঃ সট্টকো লঘুঃ|| ইতি|

Adhikarana mudgayUShaguNAH (33) · Śloka 33

| মৌদ্গস্তু পথ্যঃ সংশুদ্ধব্রণকণ্ঠাক্ষিরোগিণাম্|৩৩|

স০-মৌদ্গো রসো-যূষো, ব্রণিনাং কণ্ঠরোগিণাং অক্ষিরোগিণাং চ পথ্যঃ| অস্য চ সংস্কৃতস্য বিধানমুক্তম্-"মুদ্গানাং দ্বিপলং তোযে শৃতমর্ধাঢকোন্মিতে| পাদস্থং মর্দিতং পূতং দাডিমস্য পলেন তু| যুক্তং সৈন্ধববিশ্বাহ্বধান্যকৈঃ পাদকার্ষিকৈঃ| কণাজীরকযোশ্চূর্ণাচ্ছাণৈকেনাবচূর্ণিতম্| সংস্কৃতো মুদ্গযূষোঽযং পিত্তশ্লেষ্মহরো মতঃ|" তথা-"পটোলপত্রাচ্ছাণো দ্বে মুদ্গানাং দ্বিপলং জলে| দ্রব্যাদ্বাত্রিংশদ্গুণিতে অর্ধস্থে দাডিমাত্পলম্|| কর্ষমামলকানাং চ ক্ষিপ্ত্বা পুনরধিশ্রযেত্| পূর্বং তত্সৈন্ধবাদ্যৈশ্চ যুক্তমাজ্যেন যোজিতম্|| পটোলপত্রকাখ্যোঽযং যূষঃ পিত্তোত্থরোগজিত্| নিম্বপত্রৈর্নিম্বযূষমেবমেব প্রকল্পযেত্|| মুলকাচ্ছুণ্ঠিকা স্বিন্না ঘৃতভৃষ্টা সধান্যকা| হিঙ্গুজীরকসংযুক্তা ততো মথিতদাডিমে|| সসৈন্ধবে বিনিক্ষিপ্য পুনরগ্নাবধিশ্রযেত্| তাবদ্যাবন্মৃদূভূতং ততস্ত্র্যূষণসংযুতম্|| সুধূপিতং হিঙ্গুঘৃতৈশ্চাতুর্জাতাবচূর্ণিতম্| শুণ্ঠীরসং দীপনীযং বাতশ্লেষ্মামযাপহম্|| অকৃতাকৃতযূষাচ্চ রসাচ্চ জলসাধিতাত্| স্নেহাম্লপটুযুক্তাচ্চ পূর্বঃ পূর্বো লঘুর্মতঃ|| (সঙ্গ্রহে সূ. অ. ৭)-বিদ্যাদ্যুষে রসে সূপে শাকে চৈবোত্তরোত্তরম্| গৌরবং তনুসান্দ্রাম্লস্বাদুষ্বেষু পৃথক্ তথা||" তথোক্তম্ (সঙ্গ্রহে সূ.অ.৭)-"খলকাম্বলিকৌ হৃদ্যৌ ছেদিনৌ স্বৌষধানুগৌ| পিশিতেন রসস্তত্র, যূষো ধান্যৈঃ খলঃ ফলৈঃ|| মূলৈশ্চ তিলকল্কাম্লপ্রাযঃ কাম্বলিকঃ স্মৃতঃ| জ্ঞেযাঃ কৃতাকৃতাস্তে তু স্নেহাদিযুতবর্জিতাঃ|| অল্পমাংসাদযঃ স্বচ্ছা দকলাবণিকাঃ স্মৃতাঃ|" ইতি| স্বল্পেন মাংসেন শুণ্ঠ্যদিভিঃ স্বল্পৈঃ স্বচ্ছা যে ক্রিযন্তে, তে দকলাবণিকা বোধ্যাঃ| এবং যূষে যত্র ধান্যমল্পং, খলাদৌ বা মূলাদীন্যল্পানি, তত্রাপি দকলাবণিকত্বং বোধ্যম্| তন্ত্রান্তরে চোক্তম্ (সুশ্রুতে সূ.অ.৪৬|৩৮০)-"অথ গোরসধান্যাম্লফলাম্লৈরন্বিতং চযত্| যথোত্তরং লঘু হিতং সংস্কৃতাসংস্কৃতং তথা|| প্রভূতাস্তমলোযূষঃ সূপাল্লঘুতরঃ স্মৃতঃ| সূপস্তু রসযূষাভ্যাং স্থৈর্যাদ্গুরুতরো মতঃ|| তং সরোগো ন চাশ্রীযান্ন চাল্পাশী কথঞ্চন|" ইতি|

Adhikarana kulatthayUShaguNAH (33) · Śloka 33

| বাতানুলোমী কৌলত্থো গুল্মতূনীপ্রতূনিজিত্||৩৩||

স০-কৌলত্থো যূষো বাতমনুলোমযতি| গুল্মাদীংশ্চ জযতি| তূনীপ্রতূনীরোগৌ-গুল্মনিদানে বক্ষ্যমাণলক্ষণৌ|

Adhikarana tilavikRutyAdiguNAH (34) · Śloka 34

তিলপিণ্যাকবিকৃতিঃ শুষ্কশাকং বিরূঢকম্| শণ্ডাকীবটকং দৃগ্ঘ্নং দোষলং গ্লপনং গুরু||৩৪||

স০-তিলস্য বিকৃতিঃ পিণ্যাকস্য চ| তথা শুষ্কশাকাদি দৃষ্টিঘ্নং ত্রিদোষকরং গ্লানিকরং গুরু চ| অঙ্কুরিতং সস্যং-বিরূঢকম্| শাণ্ডাক্যা সহ সংযুতং মাষাদিবটকং-শাণ্ডাকীবটকম্|

Adhikarana rasAlAguNAH (35) · Śloka 35

রসালা বৃংহণী বৃষ্যা স্নিগ্ধা বল্যা রুচিপ্রদা| |৩৫|

স০-রসালা-করমথিতেন মরীচশর্করাদিযুক্তেন দধ্না কৃতা উল্লেখিকাসংজ্ঞা, বৃংহণী-দেহস্য বৃহত্ত্বকরী, বৃষ্যাদিগুণযুক্তা চ|

Adhikarana pAnakaguNAH (35-36) · Śloka 36

| শ্রমক্ষুত্তৃট্ক্লমহরং পানকং প্রীণনং গুরু||৩৫|| বিষ্টম্ভি মূত্রলং হৃদ্যং যথাদ্রব্যগুণং চ তত্| |৩৬|

স০-পানকং শ্রমাদিহরং প্রীণনাদিগুণযুক্তম্| প্রীণনং-মনঃ প্রীতিকরম্| যথাদ্রব্যগুণং চ-স্বস্বদ্রব্যগুণেন চ যুক্তম্| পর্পটাদীনাং লাঘবাদিহ গুণা নোক্তাঃ| যথা (সঙ্গ্রহে সূ. অ. ৭)-"পর্পটা লঘবো রুচ্যা লঘীযান্ ক্ষারপর্পটঃ| হৃদ্যা বৃষ্যা রুচিকরা গুরবো রাগখাণ্ডবাঃ|| প্রীণনা ভ্রমতৃট্ছর্দিমদমূর্চ্ছাশ্রমচ্ছিদঃ|" ইতি|

Adhikarana lAjAguNAH (36-37) · Śloka 37

| লাজাস্তৃট্ছর্দ্যতীসারমেহমেদঃকফচ্ছিদঃ||৩৬|| কাসপিত্তোপশমনা দীপনা লঘবো হিমাঃ| |৩৭|

স০-লাজাস্তৃডাদীংশ্ছিন্দন্তি| কাসপিত্তে চোপশমযন্তি| তথা, দীপনা লঘবঃ শীতবীর্যাশ্চ|

Adhikarana pRuthukaguNAH (37) · Śloka 37

| পৃথুকা গুরবো বল্যাঃ কফবিষ্টম্ভকারিণঃ||৩৭||

স০-হরিতধান্যানি নিস্তুষভৃষ্টমুশলহতানি-পৃথুকাশ্চিপিটসংজ্ঞা গুরুত্বাদিযুক্তাঃ|

Adhikarana dhAnAguNAH (38) · Śloka 38

ধানা বিষ্টম্ভিনী রূক্ষা তর্পণী লেখনী গুরুঃ| |৩৮|

স০-ধানা-ভৃষ্টযবাদি, বিষ্টম্ভিনী রূক্ষাদিগুণযুক্তা চ|

Adhikarana saktuguNAHsaktubhakShaNaguNAH (38-40) · Śloka 40

| সক্তবো লঘবঃ ক্ষুত্তৃট্শ্রমনেত্রামযব্রণান্||৩৮|| ঘ্নন্তি সন্তর্পণাঃ পানাত্সদ্য এব বলপ্রদাঃ| নোদকান্তরিতান্ন দ্বির্ন নিশাযাং ন কেবলান্||৩৯|| ন ভুক্ত্বা ন দ্বিজৈশ্ছিত্ত্বা সক্তূনদ্যান্ন বা বহূন্| |৪০|

স০-সক্তবো লঘবঃ, ক্ষুধাদীংশ্চ ঘ্নন্তি| তথা, উদকপীতাঃ সন্তর্পণাঃ, সদ্য এব বলং কুর্বন্তি| তাংশ্চ জলেনান্তরিতান্-ব্যবহিতান্, নাশ্নীযাত্| অন্যভোজনেষু হ্যন্তরাপানং বিহিতম্, ন তথা সক্তুষু কার্যমিতি বোধযতি| (অপরে ত্বেবমাহুঃ-আদৌ পিণ্ডী মধ্যে জলমন্তে চ পিণ্ডীত্যুদকান্তরিতা ইতি|) তথা, ন দ্বিঃ-দ্বৌ বারৌ নাদ্যাত্| ন নিশাযাং- রাত্র্যাম্| ন কেবলান্-উদকাদিরহিতান্| ন ভুক্ত্বা-অন্যদ্ভোজনাদি| ন দ্বিজৈশ্ছিত্ত্বা-দন্তৈঃ করস্থাং পিণ্ডীং ছিত্ত্বেত্যর্থঃ| বহূংশ্চ সক্তূংন্নাদ্যাত্| তন্ত্রান্তরে চোক্তং রূক্ষবাতলত্বং সক্তূনামিহ নোক্তম্, লঘুত্বাদিনৈবাবগতত্বাত্| ননু, রূক্ষবাতলত্বং চেদভ্যুপগম্যতে সক্তূনাম্, ততঃ সন্তর্পণা ইত্যনুপপন্নম্| সদ্য এব বলপ্রদা ইত্যেতদপ্যযুক্তম্| ভুক্তো হ্যাহারঃ পরিণমন্ রসধাতুগতো ধাতুপুষ্টযে, নান্যথা| অত্রাচক্ষ্মহে| প্রভাবাদুভযমপ্যেতদুক্তম্| সক্তূনাং হ্যযমচিন্ত্যঃ প্রত্যক্ষবেদ্যঃ প্রভাবঃ,যত্পীতাঃ সন্তঃ সদ্যঃ সন্তর্পযন্তি| সদ্য এব চ বলং প্রযচ্ছন্তি| বাজীকরণং হি-অপরিণতমেব স্বকার্যং জনযতি| তথা চ মদ্যং,-অপরিণতমেব মদং জনযতি| তস্মাত্সন্তর্পণত্বং বলপ্রদত্বং চৈষামুপপন্নমেব| তন্ত্রান্তরে চোক্তম্-"তুল্যাজ্যঃ সক্তুপ্রাশস্তু বৃষ্যো ভেদী রসাযনম্| (সং.সূ.অ.৭)-'তৃট্ছর্দিশ্রমনুন্মন্থঃ শীতস্তৃষ্ণানিবর্তকঃ|| প্রমেহক্ষযকুষ্ঠানি ন চ স্যুর্মন্থপাযিনাম্| নিচযাত্কঠিনা গুর্বী পিণ্ডী প্রোক্তা মৃদুর্লঘুঃ|| সক্তূনাং দ্রবতাযোগাল্লঘীযস্যবলেহিকা|' লাজসক্তুকৃতাঽপি স্যাদ্বিলেপী তু গরীযসী||" ইতি|

Adhikarana piNyAkaguNAH (40) · Śloka 40

| পিণ্যাকো গ্লপনো রূক্ষো বিষ্টম্ভী দৃষ্টিদূষণঃ||৪০||

স০-পিণ্যাকাখ্যো-যস্তিলাদীনাং নিষ্পীডিততৈলঃ কল্কো, গ্লপনো-গ্লানিকরঃ| গ্লপন ইতি গ্লাযতের্ণিজন্তাত্ "গ্লাস্রাবনুবমাং চ" ইতি মিত্ত্বাদ্ধ্রস্বঃ, বাহুলকাত্কর্তরি ল্যুট্| তথা, বিষ্টম্ভী দৃষ্টিবিকারকৃচ্চ|

Adhikarana vesavAraguNAH (41) · Śloka 41

বেসবারো গুরুঃ স্নিগ্ধো বলোপচযবর্ধনঃ| |৪১|

স০-বেসবারো-নাগরধান্যকাজাজিহিঙ্গুঘৃতাদিসংস্কৃতং কুট্টিতং মাংসম্| স গুরুঃ স্নিগ্ধো বলবর্ধনঃ শরীরোপচযবর্ধনশ্চ|

Adhikarana mudgAdijavesavAraguNAH (41) · Śloka 41

| মুদ্গাদিজাস্তু গুরবো যথাদ্রব্যগুণানুগাঃ||৪১||

স০-মুদ্গাদিজাতস্তু বেসবারা যে ইণ্ডরিকাদিভির্দ্রব্যৈঃ সূক্ষ্মচ্ছিন্নৈঃ ক্রিযন্তে লোকে পূরণশব্দেন প্রসিদ্ধাঃ, তে গুরবঃ প্রকৃতিদ্রব্যগুণাশ্চ| আদিশব্দেন মাষাদযো গৃহ্যন্তে| (অন্যে ত্বাদিশব্দাত্ বার্তাকসূরণালূকাদীন্ গৃহ্যন্তে|) তন্ত্রান্তরে চোক্তম্-"সর্পিস্তৈলগুডক্ষীরৈর্যবগোধূমপৈষ্টিকাঃ| পূপা বিষ্টম্ভিনঃ শীতাঃ পৈষ্টিকা বাতলাঃ খরাঃ|| বৃষ্যা বল্যাঃ সরা মাষৈর্বাতঘ্না মৃদুপিচ্ছিলাঃ| যথান্নং গুরবো বল্যাঃ স্থূলাশ্চ কঠিনাশ্চ যে|| তৈলপক্বাস্তু ত্বগ্দৃগ্ঘ্না গরীযাংসো বিদাহিনঃ| কাসারসারা লঘবো লাজৈর্লঘুতরাঃ স্মৃতাঃ|| বাতপিত্তহরো বৃষ্যো ঘৃতপূরঃ কফপ্রদঃ| সদ্যঃ প্রাণকরো রুচ্যো মাংসলো রক্তলো গুরুঃ|| লঘীযান্ মণ্ডককৃতো গরীযান্ ফলপূরিতঃ মধুরোত্কারিকা বৃষ্যা, কাসারঃ পিচ্ছিলো গুরুঃ|| গুডমত্স্যণ্ডিকাখণ্ডক্ষীরেক্ষুরসমাক্ষিকৈঃ| পূপাঃ শুক্রবলশ্লেষ্মরুচিদাস্তর্পণাঃ ক্ষণাত্|| নানাদ্রব্যৈঃ সমাযুক্তাঃ পক্বামক্লিন্নভর্জিতৈঃ| নিমর্দকো গুরুঃ স্নিগ্ধো বৃষ্যো বলবতাং হিতঃ|| ঘারিকেণ্ডরিকাপূরবটিকাবটকাদযঃ| বিশদা রোচনা বল্যা গুরবঃ স্যুঃ স্বযোনিবত্|| যাবকঃ পিচ্ছিলঃ স্নিগ্ধঃ প্লীহোদাবর্তহা গুরুঃ| ভৃষ্টস্বিন্নতযা বাঽঽদ্যো কণ্ঠ্যোঽতিকাসিনাম্|| জ্বরোদাবর্তমেহানাং পথ্যো বাতানুলোমনঃ| ওলকং হরিতাবস্থং শিম্বিজত্বাত্খরং গুরু|| মন্দজর্যো যবাদিত্বাদভ্যোষো বৃংহণঃ সরঃ||" ইতি|সিদ্ধসারে চোক্তম্-"অত্যুষ্ণা মণ্ডকাঃ পথ্যাঃ শীতলা গুরুবো মতাঃ|' ইতি|

Adhikarana pacanapAtraviSeShAdguNavisheShAH (42-2) · Śloka 2

কুকূলকর্পরভ্রাষ্ট্রকন্দ্বঙ্গারবিপাচিতান্| একযোনীংল্লঘূন্বিদ্যাদপূপানুত্তরোত্তরম্||৪২|| ইতি কৃতান্ন (পক্বান্ন) বর্গঃ||২||

স০-অপূপান্ কুকূলাদিসিদ্ধান্ একযোনীন্-এককারণান্ যথোত্তরং লঘূন্বিদ্যাত্| তেন কুকূলপক্বাত্ সজাতীযাদপূপাত্কর্পরপক্বো লঘুঃ| কর্পরপক্বাচ্চ ভ্রাষ্ট্রপক্বঃ| ভ্রাষ্ট্রপক্বাত্কন্দুপক্বঃ| কন্দুপক্বাচ্চাঙ্গারপক্বঃ| কুকূলঃ-অপাং বাষ্পস্বেদঃ, গোশকৃদাদিচূর্ণসন্তাপ ইত্যন্যে| কর্পরো-জ্বালাসন্তপ্তং কপালম্| ভ্রাষ্ট্রকন্দূ প্রসিদ্ধাবেব| অঙ্গারাঃ-বৃহন্তঃ কাষ্ঠসম্ভূতা ইতি| ইতি কৃতান্নবর্গঃ| কৃতান্নবর্গাদনন্তরং মাংসশকবর্গযোস্তদ্ব্যঞ্জনভূতযোর্নির্দেশঃ| তত্রাপি প্রাধান্যান্মাংসবর্গস্য পূর্বং নির্দেশঃ| প্রাধান্যং চাস্য ভক্তেন সহ প্রচুরোপযোগেঽপ্যদোষাত্| শাকস্য তু বহূপযোগে দোষং বক্ষ্যতি (হৃ. সূ. অ. ৮|৩৯)- "শাকাবরান্নভূযিষ্ঠমত্যুষ্ণলবণং ত্যজেত্|" ইত্যনেন-

Adhikarana mAMsavargaH hariNAdayo dasha mRUgAH (43) · Śloka 43

অথ মাংসবর্গঃ| হরিণৈণকুরঙ্গর্ক্ষগোকর্ণমৃগমাতৃকাঃ| শশশম্বরচারুষ্কশরভাদ্যা মৃগাঃ স্মৃতাঃ||৪৩||

স০-হরিণাদযো দশ-মৃগাঃ স্মৃতাঃ| আদিশব্দেন কালপুচ্ছকপৃষতাদযঃ সঙ্গ্রহোক্তা গৃহ্যন্তে (সূ.অ.৭)-("কালপুচ্ছকচারুষ্কবরপোতশশোরণাঃ| শ্বদংষ্ট্রারামশরভকোহকার কশম্বরাঃ| করালকৃতমালৌ চ পৃষতশ্চ মৃগাঃ স্মৃতাঃ||" ইতি)

Adhikarana lAvAdaya ekaviMshatirviShkirAH (44-46) · Śloka 46

লাববার্তীকবর্তীররক্তবর্ত্মককুক্কুভাঃ| কপিঞ্জলোপচক্রাখ্যচকোরকুরুবাহবঃ||৪৪|| বর্তকো বর্তিকা চৈব তিত্তিরিঃ ক্রকরঃ শিখী| তাম্রাচূডাখ্যবকরগোনর্দগিরিবর্তিকাঃ||৪৫|| তথা শারপদেন্দ্রাভবরটাদ্যাশ্চ বিষ্কিরাঃ| |৪৬|

স০-তত্র লাবাদযো বরটান্তা একবিংশতিঃ, বিকীর্য ভক্ষণাদ্বিষ্কিরাঃ| রক্তে বর্ত্মনী যস্যাত্যর্থং স রক্তবর্ত্মকঃ| বর্তকো বর্তিকেতি জাত্যন্তরম্, ন তু বর্তকস্য স্ত্রী বর্তিকা| যথা চ বলাকা সারিকেতি| পুংস্যপি স্ত্রীলিঙ্গত্বাবেশাত্| শিখী-মযূরঃ, ব্রীহ্যাদিত্বাদিনিঃ|

Adhikarana jIvaMjIvakAdayo dasha pratudAH (46-47) · Śloka 47

| জীবঞ্জীবকদাত্যূহভৃঙ্গাহ্বশুকসারিকাঃ||৪৬|| লট্বাকোকিলহারীতকপোতচটকাদযঃ| প্রতুদাঃ|৪৭|

স০-জীবঞ্জীবকাদযঃ প্রতুদা দশ স্মৃতাঃ| প্রতুদ্য-তুণ্ডেনাহত্য শাল্যাদের্ভক্ষণাত্ প্রতুদাঃ| আদিশব্দেন সঙ্গ্রহোক্তাঃ খঞ্জরীটকপারাবতাদযো গৃহ্যন্তে|

Adhikarana BekAdayashcatvAro bileshayAH (47) · Śloka 47

| ভেকগোধাহিশ্বাবিদাদ্যা বিলেশযাঃ||৪৭||

স০-ভেকাদযশ্চত্বারো বিলেশযাঃ| বিলে বাহুল্যেন শেরত ইতি বিলেশযাঃ| আদিশব্দেন শ্বেতশ্যামশল্যকাদযো গৃহ্যন্তে|

Adhikarana gavAdayaH prasahAH (48-50) · Śloka 50

গোখরাশ্বতরোষ্ট্রাশ্বদ্বীপিসিংহর্ক্ষবানরাঃ| মার্জারমূষকব্যাঘ্রবৃকবভ্রুতরক্ষবঃ||৪৮|| লোপাকজম্বুকশ্যেনচাষবান্তাদবাযসাঃ শশঘ্নীভাসকুররগৃধ্রোলূককুলিঙ্গকাঃ||৪৯|| ধূমিকা মধুহা চেতি প্রসহা মৃগপক্ষিণঃ| |৫০|

স০-গবাদযঃ প্রসহ্যা| প্রসহ্যা-আহৃত্য ভক্ষণাত্ প্রসহাঃ| মৃগাশ্চ পক্ষিণশ্চ মৃগপক্ষিণঃ, কেচিন্মৃগাঃ কেচিত্পক্ষিণ ইত্যর্থঃ| অশ্বতরো-বেগসরঃ| অশ্বঃ-তুরগঃ| বভ্রুঃ-জাহকো, নকুল ইত্যন্যে| লোপাকো-লোমশঃ| জম্বুকঃ-শৃগালঃ| শ্যেনো-গরুডাকৃতিঃ| চাষঃ-কিকীদিবিঃ| বান্তাদঃ-শ্বা| বাযসঃ-কাকঃ| উলূকঃ-কাকারিঃ| কুলিঙ্গকঃ-কৃষ্ণচটকঃ|

Adhikarana varAhAdayo dasha mahAmRugAH (50-51) · Śloka 51

| বরাহমহিষন্যঙ্কুরুরুরোহিতবারণাঃ||৫০|| সৃমরশ্চমরঃ খড্গো গবযশ্চ মহামৃগাঃ| |৫১|

স০-বরাহাদযো দশ মহামৃগ সজ্ঞা| বারণো-হস্তী|

Adhikarana haMsAdayo~apcarAH (51-52) · Śloka 52

| হংসসারসকাদম্ববককারণ্ডবপ্লবাঃ||৫১|| বলাকোত্ক্রোশচক্রাহ্বমদ্গুক্রৌঞ্চাদযোঽপ্চরাঃ| |৫২|

স০-হংসাদযঃ ক্রৌঞ্চান্তা অপ্সু চরণাদপ্চরসংজ্ঞাঃ| আদিশব্দেন রক্তশীর্ষকাদযো গৃহ্যন্তে|

Adhikarana rohitakAdayo matsyAH (52-54) · Śloka 54

| মত্স্যা রোহিতপাঠীনকূর্মকুম্ভীরকর্কটাঃ||৫২|| শুক্তিশঙ্খোদ্রশম্বূকশফরীবর্মিচন্দ্রিকাঃ| চুলূকীনক্রমকরশিশুমারতিমিঙ্গিলাঃ||৫৩|| রাজীচিলিচিমাদ্যাশ্চ| |৫৪|

স০-রোহিতকাদয একোনবিংশতির্জলোদ্ভবা মত্স্যসংজ্ঞাঃ| চশব্দোঽনুক্তকদলকপর্দকাদিসমুচ্চযার্থঃ|

Adhikarana ityaShTadhA mAMsam (54-1) · Śloka 1

মাংসমিত্যাহুরষ্টধা| |৫৪| (মৃগ্যং বৈষ্কিরিকং কিঞ্চ প্রাতুদং চ বিলেশযম্| প্রাসহং চ মহামৃগ্যমপ্চরং মাত্স্যমষ্টধা||১||

স০-ইত্যষ্টভিঃ প্রকারৈস্তন্ত্রকারা মাংসমাহুঃ|

Adhikarana vyAmishrAdayaH (54) · Śloka 54

| যোনিষ্বজাবী ব্যামিশ্রগোচরত্বাদনিশ্চিতে||৫৪||

স০-যোনিষু পূর্বোক্তাস্বষ্টাসু মধ্যে, ব্যামিশ্রগোচরত্বাত্-ব্যামিশ্রবিষ্যত্বাত্, অজাবী-ব্যামিশ্রে| অজাবী-ছাগোরভ্রৌ, তে অনিশ্চিতে, তে হি জাঙ্গলেঽপি দেশে বর্ততে অনূপেঽপি| অজাবী ইতি স্ত্রীলিঙ্গনির্দেশোঽত্র বিবক্ষিত এব| কেচিত্তু 'অনিশ্চিতৌ' নিজগদুঃ| ননু, তিত্তিরিরপি ধন্বানূপচারী প্রথিতঃ| তত্কথমসাবিহ জাঙ্গলঃ কীর্তিতঃ? ব্রূমঃ| তত্স্বভাবত্বাত্| যদ্যপ্যুভযচরোঽযং, তথাঽপি জাঙ্গলস্বভাবত্বাজ্জাঙ্গলোঽযম্| বিকীর্য ভক্ষণাচ্চ বিষ্কিরত্বং তিত্তিরের্নিশ্চিতং নিমিত্তমস্তি| তস্মাদযং জাঙ্গল এব বক্তুং যুক্তাঃ| হরিণাদীনাং চ কিরাতকৈবর্তাদিভ্যো নানাদেশপ্রসিদ্ধাঃ সংজ্ঞা বেদ্যাঃ|

Adhikarana mAMsasya traividhyam (55) · Śloka 55

আদ্যান্ত্যা জাঙ্গলানূপা মধ্যৌ সাধারণৌ স্মৃতৌ| |৫৫|

স০-আদৌ ভবাঃ-আদ্যাঃ,- মৃগবিষিকরপ্রতুদাখ্যাঃ, জাঙ্গলচারিত্বাজ্জাঙ্গলশব্দবাচ্যাঃ| এবমন্ত্যাঃ-মহামৃগাপ্চরমত্স্যাখ্যাঃ,-আনূপাঃ| মধ্যৌ-দ্বৌ বিলেশযপ্রসহাখ্যৌ,-সাধারণৌ, জাঙ্গলানূপচারিণাবিত্যর্থঃ| মধ্যাবিতি দ্বিবচননির্দেশসামর্থ্যাদাদ্যন্তানাং বর্গাণাং প্রত্যেকং ত্রিত্বমনুমীযতে ত্রিগ্রহণমন্তরেণাপি|

Adhikarana jA~ggalAnAM guNAH (55-56) · Śloka 56

| তত্র বদ্ধমলাঃ শীতা লঘবো জাঙ্গলা হিতাঃ||৫৫|| পিত্তোত্তরে বাতমধ্যে সন্নিপাতে কফানুগে| |৫৬|

স০-তত্র-তেষু জাঙ্গলানূপসাধারণেষু মধ্যে, জাঙ্গলা বদ্ধমলাঃ- গ্রথিতং পুরীষং কুর্বন্তি| শীতবীর্যা লঘবঃ| সন্নিপাতে হিতাঃ| কিম্ভূতে? পিত্তোত্তরে,-পিত্তাধিকে| তথা বাতো মধ্যো যস্মিংস্তস্মিন্ মধ্যমমরুতি| তথা কফানুগে,-কফোঽনুগো-অবলো হীনো, যস্মিংস্তস্মিন্ স্বল্পশ্লেষ্মণি|

Adhikarana shashaguNAH (56) · Śloka 56

| দীপনঃ কটুকঃ পাকে গ্রাহী রূক্ষো হিমঃ শশঃ||৫৬||

স০-শশোঽগ্নিদীপনঃ পাকে কটুকো, গ্রাহী, রূক্ষঃ, শীতশ্চ| গ্রাহিশীতত্বং চাস্য জাঙ্গলত্বাদেব লব্ধমপ্যতিশযার্থং পুনরিহোপাত্তম্| স্বাদুকষাযত্বাদিকমেষামিহ যুক্ত্যোক্তম্| সঙ্গ্রহে তু (সূ.অ.৭) স্পষ্টং কৃত্বোক্তম্| যথা-"তত্র বদ্ধমলা রুচ্যা মাংসানামুত্তমা হিমাঃ| কষাযস্বাদুবিশদা লঘবো জাঙ্গলা হিতাঃ|| তাম্রোঽত্র হরিণঃ কৃষ্ণস্ত্বেণো হৃদ্যস্ত্রিদোষজিত্| লঘীযান্ ষড্রসশ্চাসৌ, গ্রাহী রূক্ষো হিমঃ শশঃ|| কটুপাকোঽগ্নিকৃত্পথ্যঃ সন্নিপাংতেঽনিলাবরে|" ইতি|

Adhikarana vartakAdiguNAH,tittiriguNAH (57-58) · Śloka 58

ঈষদুষ্ণগুরুস্নিগ্ধা বৃংহণা বর্তকাদযঃ| তিত্তিরিস্তেষ্বপি বরো মেধাগ্নিবলশুক্রকৃত্||৫৭|| গ্রাহী বর্ণ্যোঽনিলোদ্রিক্তসন্নিপাতহরঃ পরম্| |৫৮|

স০-বর্তকাদারভ্য যাবজ্জাঙ্গলসমাপ্তিস্তাবত্সর্বে ঔষ্ণ্যগৌরবস্নিগ্ধত্বৈরল্পৈর্যুক্তাঃ| তেষ্বপি মধ্যে তিত্তিরিঃ শ্রেষ্ঠো মেধাদিকরশ্চ| তথা, সঙ্গ্রহী| তথা, বর্ণ্যো বাতাধিকসন্নিপাতহরশ্চ| স চ তিত্তিরির্ধন্বন্যানূপে চ দেশে বিচরতি, অতঃ স্নিগ্ধ উষ্ণো গুরুর্বৃংহণশ্চ| তথা চ সঙ্গ্রহে (সূ.অ.৭)-"ধন্বানূপবিচারিত্বাত্ স্নিগ্ধোষ্ণগুরুবৃংহণঃ|"ইতি|

Adhikarana shikhiguNAH (58) · Śloka 58

| নাতিপথ্যঃ শিখী পথ্যঃ শ্রোত্রস্বরবযোদ্দশাম্||৫৮||

স০-শিখী-বর্হী, নাতিপথ্যঃ| শ্রোত্রাদীনাং পথ্যঃ| বযসঃ রতম্ভনকারিত্বেন পথ্যঃ|

Adhikarana kukkuTaguNAH (59) · Śloka 59

তদ্বচ্চ কুক্কুটো বৃষ্যঃ| |৫৯|

স০-তদ্বচ্চ কুক্কুটো-মযূরতুল্যগুণো বৃষ্যশ্চ|

Adhikarana grAmyakukkuTaguNAH (59) · Śloka 59

গ্রাম্যস্তু শ্লেষ্মলো গুরুঃ| |৫৯|

স০-গ্রাম্যঃ পুনঃ কুক্কুটঃ শ্লেষ্মলো গুরুশ্চ|

Adhikarana krakaropacakrakayorguNAH (59) · Śloka 59

| মেধাঽনলকরা হৃদ্যাঃ ক্রকরাঃ সোপচক্রকাঃ||৫৯||

স০-ক্রকরা উপচক্রকাশ্চ মেধামগ্নিং চ কুর্বন্তি হৃদ্যাশ্চ|

Adhikarana kANakapotaguNAH (60) · Śloka 60

গুরুঃ সলবণঃ কাণকপোতঃ সর্বদোষকৃত্| |৬০|

স০-কাণঃ কপোতো গুরুরীষল্লবণস্ত্রিদোষকৃচ্চ|

Adhikarana caTakaguNAH (60) · Śloka 60

| চটকাঃ শ্লেষ্মলাঃ স্নিগ্ধা বাতঘ্নাঃ শুক্রলাঃ পরম্||৬০||

স০-চটকাঃ শ্লেষ্মলত্বাদিগুণযুক্তা অতিশযেন শুক্রকৃতশ্চ|

Adhikarana bileshayAdInAM guNAH (61) · Śloka 61

গুরূষ্ণস্নিগ্ধমধুরা বর্গাশ্চাতো যথোত্তরম্| মূত্রশুক্রকৃতো বল্যা বাতঘ্নাঃ কফপিত্তলাঃ||৬১||

স০-অতঃ-অনন্তরম্, বিলেশযাদ্যা বর্গা যথোত্তরং গুরুত্বেন উষ্ণত্বেন স্নিগ্ধত্বেন মধুরত্বেন চাধিকাঃ| যো যস্মাদুত্তরো বর্গঃ , স তস্মাদ্গুরুত্বাদিভিরধিক ইত্যর্থঃ| তথা, যথোত্তরমেব মূত্রশুক্রকৃতো বল্যা বাতঘ্নাঃ শ্লেষ্মপিত্তলাশ্চ|

Adhikarana mahAmRugaguNAH, kravyAdaprasahaguNAH (62-63) · Śloka 63

এবং বর্গপঞ্চকস্য সামান্যগুণানুক্ত্বা, অপবাদমাহ- শীতা মহামৃগাস্তেষু, ক্রব্যাদপ্রসহাঃ পুনঃ| লবণানুরসাঃ পাকে কটুকা মাংসবর্ধনাঃ||৬২|| জীর্ণার্শোগ্রহণীদোষশোষার্তানাং পরং হিতাঃ| |৬৩|

স০-তেষু বর্গেষু মধ্যে মহামৃগাঃ শীতবীর্যাঃ| ক্রব্যং-আমমাংসং ভুঞ্জতে যে, তে ক্রব্যাদাঃ| ক্রব্যাদাস্তু যে প্রসহাঃ-মার্জারগৃধ্রোলূকাদযঃ, তে লবণানুরসাঃ পাকে কটুকা মাংসবর্ধনাশ্চাতিতরাম্| জীর্ণার্শঃপ্রভ্রুত্যামযানামতিশযেন হিতাঃ|

Adhikarana AjamAMsaguNAH (63-64) · Śloka 64

| নাতিশীতগুরুস্নিগ্ধং মাংসমাজমদোষলম্||৬৩|| শরীরধাতুসামান্যাদনভিষ্যন্দি বৃংহণ্ম্| |৬৪|

স০-নাতিশব্দোঽত্রেষদর্থে| যদি তু প্রতিষেধনমাত্রমভীষ্টমভবিষ্যদাচার্যস্য, ততো নঞ এব কেবলস্যোপাদানমকরিষ্যত্| তস্মাদীষদর্থ এব বিবক্ষিতঃ| অত এবং ব্যাখ্যানযন্তি, যথা-অনতিদগ্ধো গ্রাম ইতি| অদোষলমিতি অল্পদোষলম্, (পথ্যমিত্যর্থঃ| তথা চ হারীতঃ-"ত্রিদোষনুদ্দেহধাতুসামান্যাচ্ছাগলং লঘু|" ইতি| অন্যে তু চরকমতমনুসরন্ত এবং ব্যাখ্যানযন্তি,-অদোষলমিতি নঞ্ ঈষদর্থে, কিঞ্চিচ্ছীতগুরুত্বাদল্পদোষলম্| যথা-অবৃক্ষো গ্রাম ইতি|) শরীরস্য ধাতুঃ শরীরধাতুঃ, প্রকৃতত্বাত্পুরুষশরীরস্য মাংসাখ্যো ধাতুঃ, তস্য সামান্যাত্-তুল্যত্বাত্, আজং মাংসমনভিষ্যন্দি বৃংহণং চ| গুণকৃতং চাত্র সামান্যং গৃহ্যতে, ন দ্রব্যকৃতম্| দ্রব্যকৃতে হি সামান্যে গৃহ্যমাণে তুরগোরগাদিমাংসমপি পুরুষশরীরধাতোর্মাসাখ্যস্য মাংসত্বেন ভবতীতি তদ্প্যমভিষ্যন্দি বৃংহণং চ স্যাত্, ন কেবলমাজং মাংসম্| গুণকৃতে তু সামান্যে গৃহীতে শরীরধাতু সামন্যাদাজমেব মাংসমনভিষ্যন্দি বৃংহণং চেতি বক্তুং যুজ্যতে| মাংসগ্রহণং চাত্রোপলক্ষণার্থম্| ন কেবলমাজং মাংসং পুরুষশরীরধাতুনা মাংসাখ্যেন তুল্যম্, যাবদন্যেঽপি যে ছাগশরীরগতা ধাতবস্তেঽপি মনুষ্যশরীরধাতুনা তুল্যগুণাঃ, তেঽপ্যনভিষ্যন্দিনো বৃংহণাশ্চ| অনযা ভঙ্গ্যা পুরুষমাংসস্যাপ্যাচার্যেণাত্র গুণা উক্তাঃ| ননু, বৃংহণং যদ্দ্রব্যং তদ্ভৌমাপ্যমভিষ্যন্দি চ| অপামেবাঽসাধারণো ধর্মঃ স্রবণরূপঃ| তত্কথমনভিষ্যন্দীত্যুক্তম্ ? ব্রূমঃ| দ্রব্যপ্রভাবাত্| ঈদৃশোঽযং দ্রব্যপ্রভাবো যদ্বৃংহণমপি দ্রব্যমনভিষ্যন্দীতি|

Adhikarana AvikamAMsaguNAH (64) · Śloka 64

| বিপরীতমতো জ্ঞেযমাবিকং বৃংহণং তু তত্||৬৪||

স০-অতঃ-আজমাংসাত্, বিপরীতমাবিকং মাংসং-অত্যুষ্ণস্নিগ্ধগুরু সদোষলমভিষ্যন্দি চেতি| বৃংহণত্বস্যাপি বিপর্যযে প্রাপ্তে তদপবাদমাহ-বৃংহণং তু তদিতি| তুশব্দোঽবধারণে| বৃংহণমেব তদিত্যর্থঃ|

Adhikarana gomAMsaguNAH (65) · Śloka 65

শুষ্ককাসশ্রমাত্যগ্নিবিষমজ্বরপীনসান্| কার্শ্যং কেবলবাতাংশ্চ গোমাংসং সন্নিযচ্ছতি||৬৫||

স০-গোমাসং শুষ্ককাসাদীন্নিযচ্ছতি|

Adhikarana mahiShamAMsaguNAH (66) · Śloka 66

উষ্ণো গরীযান্মহিষঃ স্বপ্নদার্ঢ্যবৃহত্ত্বকৃত্| |৬৬|

স০-মহিষ উষ্ণো গুরুতরঃ স্বপ্নাদীংশ্চ করোতি| গুরু শব্দাদীযসুনি "প্রিযস্থির" ইত্যাদিনা গরাদেশঃ| দার্ঢ্যমিতি "বর্ণদৃঢ" ইত্যাদিনা ষ্যঞ্|

Adhikarana varAhamAMsaguNAH (66) · Śloka 66

| তদ্বদ্বরাহঃ শ্রমহা রুচিশুক্রবলপ্রদঃ||৬৬||

স০-বরাহঃ-সূকরঃ, তদ্বত্-মহিষগুণো, জ্ঞেয ইত্যর্থঃ| তথা, শ্রমহা রুচ্যাদিপ্রদশ্চ|

Adhikarana matsyaguNAH (67) · Śloka 67

মত্স্যাঃ পরং কফকরাঃ| |৬৭|

স০-"গুরূষ্ণস্নিগ্ধমধুরা বর্গাশ্চাতো যথোত্তরম্|" ইত্যনেন গ্রন্থেনাতিগুরূষ্ণস্নিগ্ধমধুরত্বমতিমূত্রশুক্রকৃত্ত্বমতিবল্যত্বমতিবাতঘ্নত্বমতিকফপিত্তলত্বং চ মত্স্যানামুক্তম্| "পরং কফকরাঃ" ইত্যনেনাঽতঃ কফকৃত্তমা মত্স্যা ইতি বোধযতি| সঙ্গ্রহে স্পষ্টার্থমেবমুক্তম্ (সূ.অ.৭)-"কফপিত্তকরা মত্স্যাঃ পরং পবননাশনাঃ|" ইতি|

Adhikarana cilicImaguNAH (67) · Śloka 67

চিলিচীমস্ত্রিদোষকৃত্| |৬৭|

স০-চিলিচীমসংজ্ঞো মত্স্যস্ত্রিদোষকরঃ|

Adhikarana lAvAdayaH sve sve vargai shreShThAH (67) · Śloka 67

| লাবরোহিতগোধৈণাঃ স্বে স্বে বর্গে বরাঃ পরম্||৬৭||

স০-লাবাদযঃ স্বস্ববর্গেষু বরতরাঃ| তত্র লাবো-বিষ্কিরেষ্বতিশ্রেষ্ঠঃ, রোহিতো-মত্স্যেষু| স হি প্রতিস্রোতোবিচারী আকাশপ্লবনশ্চ| তথা চোক্তম্ (সঙ্গ্রহে সূ.অ.৭)-"প্রতিস্রোতোবিচারিত্বাদাকাশপ্লবনেন চ| রোহিতঃ প্রবরস্তেষাম্" ইতি| গোধা চ-বিলেশযেষু বরা| এণো-মৃগেষ্বিতি|

Adhikarana sadyohatAdimAMsaM sevyam (68) · Śloka 68

মাংসং সদ্যোহতং শুদ্ধং বযঃস্থং চ ভজেত্| |৬৮|

স০-মাংসং সদ্যোহতং ভজেত্, সদ্যোহতস্য মাংসং ভজেদিত্যর্থঃ| তথা, শুদ্ধং-স্নায্বস্থ্যাদিরহিতম্| তথা, বযসি তিষ্ঠতীতি বযঃস্থম্,- যদ্যপি সর্বং মাংসং বযঃস্থমেব, তথাঽপীহ বযঃস্থমিত্যুক্ত্যা শোভনং তরুণং বয ইতি গম্যতে| তস্মাদ্যূনঃ প্রাণিনো মাংসং ভজেত্, ন বালবৃদ্ধযোরিতি|

Adhikarana mRutamAMsaM tyAjyam (68) · Śloka 68

ত্যজেত্| মৃতং কৃশং ভৃশং মেদ্যং ব্যাধিবারিবিষৈর্হতম্||৬৮||

স০-মৃতং-স্বযং মৃতং ন ভজেত্, অবিজ্ঞাতস্বরূপেণ ব্যাধিনামৃতস্য প্রাণিনো যন্মাংসং তত্ত্যজেদিত্যর্থঃ| কৃশং-দুর্বলং ন ভজেত্| তথা, ভৃশং মেদ্যং-অতিমেদুরং মাসং ত্যজেত্| তথা, ব্যাধিনা-বিজ্ঞাতস্বরূপেণ হতস্য, বারিণা বিষেণ চ হতস্য, নির্জীবীকৃতস্য, যন্মাংসং তত্ত্যজেত্| সঙ্গ্রহে তু (সূ,অ.৭) হংসাদীনাং বিশেষা উক্তাঃ| যথা-"হংসঃ স্বরকরঃ পিত্তরক্তজিন্মধুরো হিমঃ| কুলীরঃ পরমং বৃষ্যো বৃংহণঃ প্রীণনো গুরুঃ|| গোধা নিযচ্ছতি বিষং মূষকঃ শুক্রবর্ধনঃ| গুরুণ্যণ্ডানি বালানাং কষাযমধুরং পলম্|| বৃদ্ধানাং স্নাযুভূযিষ্ঠমবল্যং গুরু দোষলম্|" ইতি|

Adhikarana puMstriyoravayavAdi visheSheNa gauravalAghave (69-3) · Śloka 3

পুংস্ত্রিযোঃ পূর্বপশ্চার্ধে গুরুণী, গর্ভিণী গুরুঃ| লঘুর্যোষিচ্চতুষ্পাত্সু, বিহঙ্গেষু পুনঃ পুমান্||৬৯|| শিরঃস্কন্ধোরুপৃষ্ঠস্য কট্যাঃ সক্থ্নোশ্চ গৌরবম্| তথাঽঽমপক্বাশযযোর্যথাপূর্বং বিনির্দিশেত্||৭০|| শোণিতপ্রভৃতীনাং চ ধাতূনামুত্তরোত্তরম্| মাংসাদ্গরীযো বৃষণমেঢ্রবৃক্কযকৃদ্গুদম্||৭১|| ইতি মাংসবর্গঃ||৩||

স০-পুংস্ত্রিযোঃ পূর্বপশ্চার্ধে যথাসংখ্যং গুরুণী| পূর্বং চ পশ্চং চ পূর্বপশ্চে, তযোরর্ধে| পুংসঃ পূর্বার্ধং গুরু, স্ত্রিযঃ পশ্চার্ধং গুর্বিত্যর্থঃ| গর্ভিণী গুরুঃ-গর্ভিণীমাংসং গুরু| চত্বারঃ পাদা যেষাং তে চতুষ্পাদঃ, তেষু চতুষ্পাত্সু-গবাদিষু মধ্যে, স্ত্রী লঘুঃ| চতুষ্পাদিতি "সংখ্যাসু পূর্বস্য" ইত্যন্তলোপঃ| বিহঙ্গেষু-দ্বিজেষু তু, পুমান্ লঘুঃ| শিরঃপ্রভৃতীনাং মাংসানাং যথাপূর্বং গুরুত্বং নির্দিশেত্| এবং সক্থ্যাদিমাংসেভ্যঃ শিরোমাংসং গুরুতমমিত্যবতিষ্ঠতে| আমপক্বাশযযোশ্চ যথাপূর্বং গুরুত্বনির্দেশঃ| তেন পক্বাশযাদামাশযো গুরুঃ| রক্তাদীনাং ধাতূনাং যথোত্তরং গুরুত্বং নির্দিশেত্| তেন লোহিতান্মাংসং গুরু, মাংসান্মেদ ইত্যাদি| "মাংসাদ্গরীযো বৃষণমেঢ্রবৃক্কযকৃদ্গুদম্|" ইত্যত্রাঽপ্যুত্তরোত্তরমিত্যনুবর্ততে| তেন মাংসাদ্গুরুতরো বৃষণঃ তস্মান্মেঢ্রঃ, যাবত্সর্বগরিষ্ঠং গুদং নির্দিশেদিতি| ইতি মাংসবর্গঃ| মাংসবর্গাদনন্তরং শকবর্গো নিগদ্যতে--

Adhikarana shAkavargaH pAThAdijashAkaguNAH (72) · Śloka 72

অথ শাকবর্গঃ| শাকং পাঠাশঠীসূষাসুনিষণ্ণসতীনজম্| ত্রিদোষঘ্নং লঘু গ্রাহি সরাজক্ষববাস্তুকম্||৭২||

স০-পাঠাদিজং শাকং ত্রিদোষহরং লঘু গ্রাহি চ| তদ্বত্ রাজক্ষবকবাস্তুকে|

Adhikarana suniShaNNAguNAH (73) · Śloka 73

সুনিষণ্ণোঽগ্নিকৃদ্বৃষ্যস্তেষু| |৭৩|

স০-তেষু মধ্যে, সুনিষণ্ণঃ-স্বস্তিকাখ্যো, জলমধ্যে ভবতি| পত্রৈশ্চাঙ্গেরীতুল্যোঽগ্নিকরো বৃষ্যঃ|

Adhikarana rAjakShavaguNAH (73) · Śloka 73

রাজক্ষবঃ পরম্| গ্রহণ্যর্শোবিকারঘ্নঃ|৭৩|

স০-রাজক্ষবঃ-ক্ষুদ্বিবোধনো রাজশাকাখ্যঃ, পরং-অত্যর্থং, গ্রহণ্যর্শোবিকারঘ্নঃ|

Adhikarana vAstukaguNAH (73) · Śloka 73

| বর্চোভেদি তু বাস্তুকম্||৭৩||

স০-বাস্তুকং তু-পুনঃ রক্তবাস্তুকাখ্যং, বর্চোভেদি-পুরীষস্য ভেদনম্|

Adhikarana kAkamAcIguNAH (74) · Śloka 74

হন্তি দোষত্রযং কুষ্ঠং বৃষ্যা সোষ্ণা রসাযনী| কাকমাচী সরা স্বর্যা|৭৪|

স০-কাকমাচীং ত্রিদোষঘ্নী, কুষ্ঠনাশিনী, বৃষ্যা, কিঞ্চিদুষ্ণা, সরা-ভেদিনী, স্বরহিতা চ| স্বাস্থ্যসংবাহকত্বেন চ রসাযনসদৃশী|

Adhikarana cA~ggerIguNAH (74-75) · Śloka 75

| চাঙ্গের্যম্লাঽগ্নিদীপনী||৭৪|| গ্রহণ্যর্শোঽনিলশ্লেষ্মহিতোষ্ণা গ্রাহিণী লঘুঃ| |৭৫|

স০-চাঙ্গেরী-ক্ষুদ্রাম্লিকা, অম্লা, অগ্নিদীপনী, গ্রহণ্যাদিষু হিতা, উষ্ণবীর্যা, সঙ্গ্রাহিণী, লঘ্বী চ|

Adhikarana paTolAdInAM guNAH (75-78) · Śloka 78

| পটোলসপ্তলারিষ্টশার্ঙ্গেষ্টাবল্গুজাঽমৃতাঃ||৭৫|| বেত্রাগ্রবৃহতীবাসাকুতিলীতিলপর্ণিকাঃ| মণ্ডূকপর্ণীকর্কোটকারবেল্লকপর্পটাঃ||৭৬|| নাডীকলাযগোজিহ্বাবার্তাকং বনতিক্তকম্| করীরং কুলকং নন্দী কুচৈলা শকুলাদনী||৭৭|| কটিল্লং কেম্বুকং শীতং সকোশাতককর্কশম্| তিক্তং পাকে কটু গ্রাহি বাতলং কফপিত্তজিত্||৭৮||

স০-পটোলাদীনি কর্কশান্তান্যষ্টাবিংশতিঃ শীতবির্যাণি তিক্তানি পাকে কটূনি গ্রাহীণি বাতলানি কফপিত্তঘ্নানি চ| সপ্তলা-সাতলা| অরিষ্টো-নিম্বঃ| শার্ঙ্গেষ্টা-অঙ্গারবল্লিকা| অবল্গুজো-বাকুচী| অমৃতা-গুডূচী| বেত্রো-বংশসদৃশঃ, তস্যাগ্রম্| বাসা-বৃষঃ| কুতিলী-সূক্ষ্মতিলজাতিঃ| তিলপর্ণী-বদরকঃ| মণ্ডুকপর্ণীং-মণ্ডূকী, আদিত্যবল্লী| কর্কোটকারবেল্লকেপুনঃ প্রথিতে এব| পর্পটঃ-শীতপ্রিযাখ্যঃ| নাডীকলাযং-সকুলাক্ষকঃ সুবর্চলাভেদঃ| গোজিহ্বা-গোধূমিকা, "গোধূমিকা তু গোজিহ্বা গোজী ক্রোষ্টুকমূলিকা|" বনতিক্তকং-বত্সকঃ| কুলকং-কাকতিন্দুকঃ| নন্দী-জযবৃক্ষশ্চশব্দিতঃ| কুচৈলা-পাঠা| শকুলাদনী-কটুকা| কটিল্লং-দীর্ঘপত্রা বর্ষাভূঃ| কোশাতকোঘণ্টোলিঃ| কর্কশঃ-কম্পিল্লকঃ|

Adhikarana paTolaguNAH (79) · Śloka 79

হৃদ্যং পটোলং কৃমিনুত্স্বাদুপাকং রুচিপ্রদম্| |৭৯|

সামান্যগুণানুক্ত্বা কেষাংচিদ্গুণকর্মবিশেষমাহ- স০-পটোলং হৃদ্যাদিগুণযুক্তম্| মুনিনা (?) তু ত্রিদোষশমনত্বমুক্তম্-"পটোলপত্রং পিত্তঘ্নং বল্লী চাস্য কফাপহা| ফলং ত্রিদোষশমনং মূলং চাস্য বিরেচনম্||" ইতি|

Adhikarana bRuhatIdvayaguNAH (79) · Śloka 79

| পিত্তলং দীপনং ভেদি বাতঘ্নং বৃহতীদ্বযম্||৭৯||

স০-বৃহতীদ্বযং,-স্থূলবৃহতী-মহোটিকাখ্যা, ক্ষুদ্রবৃহতী-কণ্টকারিকাখ্যা| তদেতদুভযং পিত্তকরমগ্নিদীপনং শকৃদাদীনাং ভেদনং বাতঘ্নং চ|

Adhikarana vRuShaguNAH (80) · Śloka 80

বৃষং তু বমিকাসঘ্নং রক্তপিত্তহরং পরম্| |৮০|

স০-বৃষং ছর্দিকাসৌ হন্তি| রক্তপিত্তং চাত্যর্থং জযতি|

Adhikarana kAravellaguNAH (80) · Śloka 80

| কারবেল্লং সকটুকং দীপনং কফজিত্পরম্||৮০||

স০-কারবেল্লমীষদ্রসে কটুকমগ্নিদীপ্তিকরমতিশ্লেষ্মঘ্নম্|

Adhikarana vArtAkaguNAH (81) · Śloka 81

বার্তাকং কটু তিক্তোষ্ণং মধুরং কফবাতজিত্| সক্ষারমগ্নিজননং হৃদ্যং রুচ্যমপিত্তলম্||৮১||

স০-বার্তাকং রসে কটু তিক্তমুষ্ণবীর্যং মধুরং বাতশ্লেষ্মঘ্নম্| সহ ক্ষারেণ বর্ততে সক্ষারং,-কিঞ্চিত্ক্ষারত্বযুক্তম্| অগ্নিজননম্| হৃদ্যং-হৃদযায হিতম্| রুচ্যং-রুচিকৃত্| অপিত্তলং-নঞীষদর্থে, কিঞ্চিত্পিত্তকরমিত্যর্থঃ| ননু, সহ ক্ষারেণ বর্ততে ইত্যত্র সক্ষারমিত্যেবং কথমুক্তম্ ? যাবতা ক্ষারো দ্রব্যম্| তথা চ প্রাগুক্তং ক্ষরণাদিত্যাদি| ন দ্রব্যং দ্রব্যেণ সহ বর্ততে| তথা চ গুণানামেবাযং ধর্মো যদ্দ্রব্যাশ্রিতত্বং নাম| তস্মাত্ সক্ষারমিত্যযুক্তমিব মন্যামহে| অত্রাঽঽচক্ষ্মহে| ক্ষারশব্দেনাত্র ক্ষারধর্ম উপলক্ষ্যতে বিস্রাবণাদ্যাত্মকঃ| যদ্বশাত্ সক্ষারমিতি দ্রব্যং ব্যপদিশ্যতে| তস্মাত্সক্ষারমিত্যুপপন্নম্|

Adhikarana karIraguNAH (82) · Śloka 82

করীরমাধ্মানকরং কষাযং স্বাদু তিক্তকম্| |৮২|

স০-করীরং-গূঢপত্রাখ্যম্, আধ্মানকরং রসে কষাযমধুরতিক্তকম্|

Adhikarana koshAtakAvalgujakayorguNAH (82) · Śloka 82

| কোশাতকাবল্গুজকৌ ভেদিনাবগ্নিদীপনৌ||৮২||

স০-কোশাতকাবল্গুজকৌ ভেদিনাবগ্নিদীপনৌ চ| অনযোশ্চ পিত্তকারিত্বং বাতকফঘ্নত্বং চ বেদ্যম্| তথা হি-প্রাযেণ যদুষ্ণং গুডূচ্যাদিদ্রব্যং, তত্পিত্তলং বাতকফহরং চ দৃষ্টম্| তথা চাহ মুনিঃ(?)-"কফবাতনুদবল্গুজঃ" ইতি| তদেবমন্যত্রাপ্যৌচিত্যেন দোষকরত্বাদি কল্প্যম্| সঙ্গ্রহে (সূ.অ.৭) চান্যেঽপ্যুক্তাঃ| যথা-"সতরূঢং কদম্বং চ রূক্ষং গ্রাহি হিমং গুরু| কুমারজীবলোণিকা নলিনী চুচুপর্ণিকা|| স্বাদু রূক্ষং সলবণং বাতশ্লেষ্মকরং গুরু| শ্যামাশাল্মলিকাশ্মর্যফঞ্জীকর্ণিকযূথিকাঃ| বৃক্ষাদনীক্ষীরবৃক্ষবিম্বীতনিকবৃক্ষকাঃ| রোধ্রঃ শণঃ কর্বুদারঃ সশেলুর্বৃষমূষিকা|| ভল্লাতকঃ কোবিদারঃ কমলোত্পলকিংশুকম্| পটোলাদিগুণং স্বাদু কষাযং পিত্তজিত্পরম্|| বাতপিত্তহরা ভণ্ডী পর্বিণী পর্বপুষ্পিকা| লঘুরুষ্ণা সরা তিক্তাসোরুবূকা চ লাঙ্গলী| বাতলৌ কটুতিক্তাম্লভেদিনৌ তিলবেতসৌ| বিশ্বরাস্নাবলাশাকং বাতঘ্নমতিসারনুত্|| বাতং বত্সাদনী হন্যাত্কফং কণ্ডীরচিত্রকৌ|" ইতি| মুনিনা চান্যেঽপ্যুক্তাঃ (চ.সূ.অ.২৭|১০২)-"ন্যগ্রোধোদুম্বরাশ্বত্থপ্লক্ষপদ্মাদিপল্লবাঃ| কষাযাঃ স্তম্ভনাঃ শীতা হিতাঃ পিত্তাতিসারিণাম্||" ইতি| তথা, সুশ্রুতে গদিতম্ (সূ.অ.৪৬|২৮২)-"করীরকুসুমং জ্ঞেযং কফপিত্তহরং লঘু| আগস্ত্যং নাতিশীতোষ্ণং নক্তান্ধানাং প্রশস্যতে|| চাতুর্থকজ্বরহরং নস্যযোগেন শীলিতম্| রাজবৃক্ষস্য নিম্বস্য শিগ্রোঃ সিংহমুখস্য চ|| কফপিত্তহরং পুষ্পং কুষ্ঠঘ্নং কুটজস্য চ| শ্রেযসী তিলপর্ণী চ বিল্বপত্রং চ বাতনুত্||" ইতি|

Adhikarana taNDulIyaguNAH (83) · Śloka 83

তণ্ডুলীযো হিমো রূক্ষঃ স্বাদুপাকরসো লঘুঃ| মদপিত্তবিষাস্রঘ্নঃ|৮৩|

স০-তণ্ডুলীযো-মণ্ডীরকাখ্যঃ, শীতবীর্যো রূক্ষঃ স্বাদুপাকরসো লঘুর্মদাদিনাশনশ্চ|

Adhikarana mu~jjAtaguNAH (83-84) · Śloka 84

মুঞ্জাতং বাতপিত্তজিত্||৮৩|| স্নিগ্ধং শীতং গুরু স্বাদু বৃংহণং শুক্রকৃত্পরম্| |৮৪|

স০-মুঞ্জাতং বাতপিত্তহৃত্ স্নিগ্ধাদিগুণযুতমতিশুক্রকৃচ্চ|

Adhikarana pAla~gkyAguNAH (84) · Śloka 84

| গুর্বী সরা তু পালঙ্ক্যা|৮৪|

স০-পালঙ্ক্যা গুর্বী| তথা, সরা-শকৃদাদিভেদিনী| তুশব্দঃ পিচ্ছিলশ্লেষ্মলহিমাদীনাং সঙ্গ্রহোক্তানাং সমুচ্চযার্থঃ| তথা চোক্তং সঙ্গ্রহে (সূ.অ.৭)-"পালঙ্ক্যা পিচ্ছিলা গুর্বী শ্লেষ্মলা ভেদিনী হিমা|" ইতি|

Adhikarana upodakAguNAH (84) · Śloka 84

| মদঘ্নী চাপ্যুপোদকা||৮৪||

স০-উপোদকা মদনাশিনী| অপিশব্দাত্ গুর্বী সরা চ| উপোদকা-মযালী, খণ্ডপালঙ্ক্যেতি প্রথিতা|

Adhikarana ca~jcuguNAH (85) · Śloka 85

পালঙ্ক্যাবত্স্মৃতশ্চঞ্চুঃ স তু সঙ্গ্রহণাত্মকঃ| |৮৫|

স০-চঞ্চুঃ পালঙ্ক্যাসদৃশো গুণৈঃ স্মৃতঃ| স পুনশ্চঞ্চুঃ সঙ্গ্রহণাত্মকো-ন ভেদী|

Adhikarana vidArIguNAH (85-86) · Śloka 86

| বিদারী বাতপিত্তঘ্নী মূত্রলা স্বাদুশীতলা||৮৫|| জীবনী বৃংহণী কণ্ঠ্যা গুর্বী বৃষ্যা রসাযনম্| |৮৬|

স০-বিদারী-শৃগালিকা, বাতপিত্তহরা মূত্রলাদিগুণযুক্তা রসাযনং চ| কন্দস্যৈবাযং গুণনির্দেশো বোধ্যঃ| তথা চ মুনিঃ (চ.সূ.অ.২৭|১১৭)-"জীবনো বৃংহণো বৃষ্যো বল্যঃ শস্তো রসাযনম্| বিদারিকন্দঃ কণ্ঠ্যশ্চ মূত্রলঃ স্বাদুশীতলঃ||" ইতি|

Adhikarana jIvantIguNAH (86) · Śloka 86

| চক্ষুষ্যা সর্বদোষঘ্নী জীবন্তী মধুরা হিমা||৮৬||

স০-জীবন্তী চক্ষুষ্যাদিগুণযুক্তা| যা মধুড়্রা সা শীতবীর্যা চ| যা ত্বমধুরা সা এভির্গুণৈঃ কিঞ্চিদূনা| তথা চোক্তং সঙ্গ্রহে (সূ.অ.৭)-"চক্ষুষ্যা সর্বদোষঘ্নী জীবন্তী মধুরা হিমা| শাকানাং প্রবরা, ন্যূনা দ্বিতীযা কিঞ্চিদেব তু||" ইতি| মুনিনা তু জীবন্ত্যাঃ শতাবর্যাদ্যাশ্চ বাতপিত্তহরত্বমগাদি| তত্পাঠো হি (চ,সূ.অ.২৭|১০৪)-"ভণ্ডীশতাবরীশাকং বলাজীবন্তিজং চ যত্| পর্বণ্যাঃ পর্বপুষ্প্যাশ্চ বাতপিত্তহরং মতম্||" ইতি|

Adhikarana kUShmANDAdiguNAH (87-88) · Śloka 88

কূষ্মাণ্ডতুম্বকালিঙ্গকর্কার্বের্বারুতিণ্ডিশম্| তথা ত্রপুসচীনাকচির্ভটং কফবাতকৃত্||৮৭|| ভেদি বিষ্টম্ভ্যভিষ্যন্দি স্বাদুপাকরসং গুরু| |৮৮|

স০-কূষ্মাণ্ডাদিকং কফবাতকৃত্ ভেদি বিষ্টম্ভ্যভিষ্যন্দি স্বাদুপাকরসং গুরু চ|

Adhikarana kUShmANDaguNAH (88-89) · Śloka 89

অত্র বিষেশমাহ | বল্লীফলানাং প্রবরং কূষ্মাণ্ডং বাতপিত্তজিত্||৮৮|| বস্তিশুদ্ধিকরং বৃষ্যম্| |৮৯|

স০-বল্লীফলানাং মধ্যে কূষ্মাণ্ডং-পুষ্পফলসংজ্ঞ বরম্| তথা, বাতপিত্তহরং বস্তিশুদ্ধিকরং বৃষ্যং চ|

Adhikarana trapusaguNAH (89) · Śloka 89

ত্রপুসং ত্বতিমূত্রলম্| |৮৯|

স০-ত্রপুসং পুনরতিশযেন মূত্রলম্|

Adhikarana tumbaguNAH kAli~ggAdInAM guNAH bAlakUShmANDAderguNAH pakvakUShmANDAderguNAH (89-90) · Śloka 90

| তুম্বং রূক্ষতরং গ্রাহি কালিঙ্গৈর্বারুচির্ভটম্||৮৯|| বালং পিত্তহরং শীতং বিদ্যাত্পক্বমতোঽন্যথা| |৯০|

স০- তুম্বং-অলাবুসংজ্ঞং রূক্ষতরম্| এর্বারুকাদ্যপি রূক্ষম্, তুম্বং ত্বতিশযেনেত্যর্থঃ| তথা, গ্রাহি| পূর্বাণি তু সামান্যগুণোক্ত্যা ভেদীন্যেব| চরকমুনিমতানুসারিণস্ত্বেবং ব্যাচক্ষতে,-তুম্বং রূক্ষতরম্, কালিঙ্গৈর্বারুচির্ভটং গ্রাহীতি| কালিঙ্গং- কর্চরম্| এর্বারুঃ-কর্কটিকা| চির্ভটং-ডঙ্গরম্, মালবেষু প্রসিদ্ধম্, অতিপ্রসিদ্ধং জালন্ধরাদিষু| এতচ্চ বালং-অসম্পূর্ণরসাদি, পিত্তহরং শীতবীর্যং চ| অতো-বালাদ্বিপরীতম্, পক্বং পিত্তকরমুষ্ণবীর্যং চেত্যর্থঃ| সুশ্রুতেনোক্তম্ (সূ.অ.৪৬|২১৮)-" নীলং যত্ত্রপুসং বালং বৃষ্যং পিত্তহরং মতম্| তত্পাণ্ডু কফকৃজ্জীর্ণমম্লং পিত্তকরং স্মৃতম্||" ইতি|

Adhikarana shIrNavRuntasya kUShmANDAderguNAH (90-91) · Śloka 91

| শীর্ণবৃন্তং তু সক্ষারং পিত্তলং কফবাতজিত্||৯০|| রোচনং দীপনং হৃদ্যমষ্ঠীলাঽনাহনুল্লঘু| |৯১|

স০-শীর্ণবৃন্তং-কর্চরম্, ঈষত্ক্ষারং পিত্তলং কফবাতঘ্নং চ| রুচিকরমগ্নিদীপ্তিকৃত্ হৃদ্যম্, অষ্ঠীলামানাহং চ হন্তি, লঘু চ|| "ঘনোঽষ্ঠীলোপমো গ্রন্থিরষ্টীলোর্ধ্বং সমুন্নতঃ|" ইতি (হৃ. নি. হ. ১১|৬০) অষ্ঠীলালক্ষণম্| সাটোপমত্যুগ্ররুজমাধ্মানমুদরে ভৃশম্| ঊর্ধ্বাধোবাতরোধেন তমানাহং প্রচক্ষতে " ইতি (হৃ. নি. অ. ১১|৫৯) আনাহলক্ষম্|

Adhikarana mRuNAlAdiguNAH (91-92) · Śloka 92

| মৃণালবিসশালূককুমুদোত্পলকন্দকম্||৯১|| নন্দীমাষককেলূটশৃঙ্গাটককসেরুকম্| ক্রৌঞ্চাদনং কলোড্যং চ রূক্ষং গ্রাহি হিমং গুরু||৯২||

স০-মৃণালাদি রূক্ষং সঙ্গ্রহণং শীতবীর্যং গুরু চ| মৃণালং দ্বিবিধং,-সূক্ষ্মং স্থূলং চ| তত্র সূক্ষ্মং-মৃণালম্, ইতরত্-বিসম্| শালূকং-পদ্মমূলম্| কুমুদকন্দম্| কুমুদং-শশিপ্রিযম্| উত্পলকন্দকং-রক্তোত্পলকন্দম্| নন্দী-তুণ্ডেরিকা| মাষকো-বাস্তুলঃ| কেলূটং-কিস্মকসংজ্ঞমুদুম্বরভেদঃ| শৃঙ্গাটকং-ত্রিকোণাকৃতি জলোদ্ভবং কন্দম্| কসেরুকং-মাগধম্| ক্রৌঞ্চাদনং-তমেদম্| কলোড্যং-পদ্মবীজম্|

Adhikarana kalambAdiguNAH (93-96) · Śloka 96

কলম্বনালিকামার্ষকুটিঞ্জরকুতুম্বকম্| চিল্লীলট্বাকলোণীকাকুরূটকগবেধুকম্||৯৩|| জীবন্তঝুঞ্ঝ্বেডগজযবশাকসুবর্চলাঃ| আলুকানি চ সর্বাণি তথা সূপ্যানি লক্ষ্মণম্||৯৪|| স্বাদু রূক্ষং সলবণং বাতশ্লেষ্মকরং গুরু| শীতলং সৃষ্টবিণ্মূত্রং প্রাযো বিষ্টভ্য জীর্যতি||৯৫|| স্বিন্নং নিষ্পীডিতরসং স্নেহাঢ্যং নাতিদোষলম্| |৯৬|

স০-কলম্বাদিকং মধুরং রূক্ষং কিঞ্চিল্লবণং বাতশ্লেষ্মকরং গুরু চ| শীতবির্যং সৃষ্টমূত্রপুরীষং চ| মূত্রপুরীষে সৃজতি-বহিঃ ক্ষিপতি| বিষ্টভ্য-উদরপ্রদেশে পিণ্ডীভূয, জীর্যতি-পরিণমতি| প্রাযোগ্রহণং কিঞ্চিদেষাং মধ্যে নৈবংস্বরূপমিতি জ্ঞাপনার্থম্| কলম্বং-কদম্বঃ| নালিকা-দীর্ঘনালরূপা কলম্বুসংজ্ঞা| মার্ষো-গন্ধারিকা| কুটিঞ্জরং-তাম্রমূলকম্| কুতুম্বকো-দ্রোণপুষ্পী| চিল্লী-পৃথুপত্রং যবশাকং কুনামসংজ্ঞম্| লট্বাকো-গুগ্গুলুশাকম্| লোণীকা-লোণারঃ| কুরুটকঃ-স্থিতিবারকঃ| গবেধুকং-তৃণধান্যবিশেষঃ| জীবন্তো-বৃহদ্গান্ধারম্| ঝুঞ্ঝুঃ-ঝুঞ্ঝুরুকঃ| এডগজঃ-প্রপুন্নাটঃ| যবশাকং-হ্নস্বপত্রা চিল্লী| সুবর্চলা-রবিভক্তা| আলুকানি চ সর্বাণি-নানাবিধানি রক্তালুকমধুকালুকাদিভেদেন| সূপ্যানি-মুদ্গরাজমাষাদিপত্রাণী| লক্ষ্মণং-মধুযষ্টিকা| এতচ্চ সর্বং স্বিন্নং নিষ্পীডিতরসমতিবহুস্নেহং চ নাত্যপথ্যম্| সুশ্রুতে(?)চোক্তম্-"সংস্কৃতং বেসবারেণ সস্নেহং শাকমিষ্যতে| রাজিকাসক্তুভক্তাদিসংস্কারং চানুবর্ততে||" ইতি|

Adhikarana laghupatrAcillIguNAH (96) · Śloka 96

| লঘুপত্রা তু যা চিল্লী সা বাস্তুকসমা মতা||৯৬||

স০-লঘুপত্রা যা চিল্লী-যবশাকবিশেষঃ, সা তু বাস্তুকসমা গুণৈর্মতা|

Adhikarana tarkArIvarUNayorguNAH (97) · Śloka 97

তর্কারীবরুণং স্বাদু সতিক্তং কফবাতজিত্| |৯৭|

স০-তর্কারী-অরণিকা, বরুণঃ-তমালঃ, সমাহারেণ তযোর্দ্বন্দ্বঃ| এতত্স্বাদু কিঞ্চিত্তিক্তং কফবাতঘ্নং চ|

Adhikarana punarnavAdiguNAH (97-98) · Śloka 98

| বর্ষাভ্বৌ কালশাকং চ সক্ষারং কটুতিক্তকম্||৯৭|| দীপনং ভেদনং হন্তি গরশোফকফানিলান্| |৯৮|

স০-বর্ষাভ্বৌ-পুনর্নবে, তথা কালশাকং, কিঞ্চিত্ক্ষারং রসে চ কটুতিক্তং বহ্নিদীপনং ভেদনং গরাদীংশ্চ হরতি| কঠিল্লোঽপি বর্ষাভূঃ স চ প্রাগুক্তগুণঃ| তথা চ নিঘণ্টুঃ (ধন্বন্তরীযঃ বর্গঃ ১|২৭৪)-"পুনর্নবা বিশাখশ্চ কঠিল্লঃ শশিবাটিকা| বৃশ্চীরঃ ক্ষুদ্রবর্ষাভূর্দীর্ঘপত্রঃ কঠিল্লকঃ|| পুনর্নবোঽপরঃ ক্রূরঃ সদ্যো মণ্ডলপত্রকঃ| শ্বেতমূলো বর্ষকেতুর্মহাবর্ষাভুরুচ্যতে||" ইতি|

Adhikarana ciribilvA~gkuraguNAH (98) · Śloka 98

| দীপনাঃ কফবাতঘ্নাশ্চিরিবিল্বাঙ্কুরাঃ সরাঃ||৯৮||

স০-চিরিবিল্বঃ-পূতিকরঞ্জঃ, তস্যাঙ্কুরা বহ্নিদীপনাঃ কফবাতঘ্নাঃ সরাশ্চ|

Adhikarana shatAvarya~gkuraguNAH (99) · Śloka 99

শতাবর্যঙ্কুরাস্তিক্তা বৃষ্যা দোষত্রযাপহাঃ| |৯৯|

স০-শতাবর্যা অঙ্কুরাঃ-প্ররোহাঃ, তিক্তরসা বৃষ্যাঃ শুক্রকৃতস্ত্রিদোষঘ্নাশ্চ|

Adhikarana vaMshA~gkuraguNAH (99) · Śloka 99

| রূক্ষো বংশকরীরস্তু বিদাহী বাতপিত্তলঃ||৯৯||

স০-বংশকরীরো-বংশাঙ্কুরো, রূক্ষো বিদাহী বাতপিত্তকৃত্|

Adhikarana pattUraguNAH (100) · Śloka 100

পত্তূরো দীপনস্তিক্তঃ প্লীহার্শঃকফবাতজিত্| |১০০|

স০-পত্তুরো দীপনস্তিক্তরসঃ প্লীহাদিজিত্| পত্তূরো-মত্স্যাক্ষকঃ|

Adhikarana kAsamardaguNAH (100) · Śloka 100

| কৃমিকাসকফোত্ক্লেদান্ কাসমর্দো জযেত্সরঃ||১০০||

স০-কাসমর্দঃ সরঃ কৃম্যাদীংশ্চ নাশযতি| উত্ক্লেদঃস্রোতসাং মালিন্যেনার্দ্রত্বম্|

Adhikarana kusumBashAkaguNAH (101) · Śloka 101

রূক্ষোষ্ণমম্লং কৌসুম্ভং গুরু পিত্তকরং সরম্| |১০১|

স০-কুসুম্ভশাকং রূক্ষমুষ্ণবীর্যমম্লং গুরু পিত্তকৃত্সরং চ|

Adhikarana sArShapashAkaguNAH (101) · Śloka 101

| গুরূষ্ণং সার্ষপং বদ্ধবিণ্মূত্রং সর্বদোষকৃত্||১০১||

স০-সার্ষপং শাকং গুরূষ্ণবীর্যম্| তথা, বিশং-শকৃত্, মূত্রং চ বধ্নাতি| ত্রিদোষকৃচ্চ| সঙ্গ্রহে তু (সূ.অ.৭) সক্ষারত্বমস্যোক্তম্| তত্পাঠো হি-"সক্ষারমধুরং স্নিগ্ধমুষ্ণং চ গুরু সার্ষপম্|" ইতি| সুশ্রুতেন চোক্তম্ (সূ.অ.৪৬|২৩৮ টীকা)-"কফঘ্নং সার্ষপং শাকমাসুরং শাকমেব চ|" ইতি|

Adhikarana bAlamUlakaguNAH (102-103) · Śloka 103

যদ্বালমব্যক্তরসং কিঞ্চিত্ক্ষারং সতিক্তকম্| তন্মূলকং দোষহরং লঘু সোষ্ণং নিযচ্ছতি||১০২|| গুল্মকাসক্ষযশ্বাসব্রণনেত্রগলামযান্| স্বরাগ্নিসাদোদাবর্তপীনসাংশ্চ|১০৩|

স০-যন্মূলকং বালং, অব্যক্তরসং-অস্ফুটাস্বাদম্, তথা কিঞ্চিত্ক্ষারং-ঈষত্ক্ষারগুণযুক্তং কার্যতোঽনুমীযমানম্, তথা সতিক্তং-ঈষত্তিক্তকং রসনেন্দ্রিযস্য কিঞ্চিদুদ্বেজকম্, তন্মূলকং দোষাণাং হরং-দোষহরম্, নান্যাবস্থম্| বালং মূলকং দোষহরমিত্যনেনাস্য বিশিষ্টা বালাবস্থা দোষহরত্বেন নিযম্যতে| ন সর্বং বালাবস্থং দোষহরম্, অপি ত্বীদৃগ্রূপমিত্যর্থঃ| অন্যে তু দোষযোর্হরং-দোষহরম্, ইত্যত্র সমাসং কৃত্বা |বাতশ্লেষ্মঘ্নত্বমেবাস্য প্রতিজানতে| যতঃ কিঞ্চিদুষ্ণবীর্যত্বাত্ পিত্তকরত্বমস্যাস্ত্যেব| কিঞ্চিত্তিক্তরসোপেতত্বেন পিত্তকর্তৃত্বমস্য ব্যাহর্তুং ন যুক্তম্| বক্ষ্যতি হি (হৃ.সূ.অ.৯|২৫)-"রসং বিপাকস্তৌ বীর্যং প্রভাবস্তান্যপোহতি|" ইতি| এবং চৈতন্মূলকং বাতশ্লেষ্মঘ্নমেব যুক্তম্, ন তু পিত্তহৃচ্চ, ইতি তেষামভিপ্রাযঃ| এতচ্চ মূলকং গুল্মাদীন্নিযচ্ছতি| পীনসাংশ্চেতি চশব্দঃ সমুচ্চযে| অন্যানপ্যেবংপ্রাযান্ রোগান্নিযচ্ছতীতি| সুশ্রুতস্তু (সূ.অ.৪৬|২৪০)-সর্বদোষহরা লঘ্বী কণ্ঠ্যা মূলকপোতিকা|" ইতি যদ্ভেদান্তরমূচে, তদপ্যত্রৈব বালমূলকলক্ষণেঽন্তর্ভূতমিতি তন্ত্রকৃতেহ পৃথঙ্নোক্তম্|

Adhikarana mahatmUlakaguNAH (103-104) · Śloka 104

মহত্পুনঃ||১০৩|| রসে পাকে চ কটুকমুষ্ণবীর্যং ত্রিদোষকৃত্| গুর্বভিষ্যন্দি চ|১০৪|

স০-অব্যক্তরসাদিলক্ষণাবস্থাং বিহায যাবদ্ব্যক্তরসাদ্যবস্থং তত্সম্পদ্যতে| ততোঽনন্তরং ক্রমেণ রসবিপাকযোঃ কটুকমুষ্ণবীর্যং তন্মূলকং মহত্-বৃদ্ধং ত্রিদোষকৃদ্ গুর্বভিষ্যন্দি চ ভবতি| বৃদ্ধস্য চ মূলকস্যানেকা অবস্থাঃ সম্ভবন্তি| তত্র চাস্যাদ্যাবস্থাযাং কিঞ্চিত্ত্রিদোষকৃত্ত্বম্, অন্ত্যাবস্থাযাং ত্বতিশযেন ত্রিদোষকৃত্ত্বং বেদ্যম্| সঙ্গ্রহে (সূ.অ.৭) ত্বস্য স্বাদুবিপাকিত্বমুক্তম্| তত্পাঠে-"মহত্পুনঃ| রূক্ষোষ্ণং কটুকং স্বাদু বিপাকে সর্বদোষকৃত্||" ইতি| তচ্চামবিষযম্|

Adhikarana snigdhasiddhamUlakaguNAH (104) · Śloka 104

| স্নিগ্ধসিদ্ধং তদপি বাতজিত্||১০৪||

স০-অপিশব্দ এবার্থে| তদেব-মহন্মূলকং স্নিগ্ধস্বিন্নং বাতজিত্| স্নিগ্ধং চ তত্স্বিন্নং চ স্নিগ্ধস্বিন্নম্| ন ত্বস্নিগ্ধস্বিন্ন্মাত্রমিত্যর্থঃ|

Adhikarana shuShkamUlakaguNAH (105) · Śloka 105

বাতশ্লেষ্মহরং শুষ্কং সর্বম্| |১০৫|

স০-সর্বং-বালং বৃদ্ধং চ মূলকং, শুষ্কং সত্ বাতশ্লেষ্মহরম্|

Adhikarana AmamUlakaguNAH (105) · Śloka 105

আমং তু দোষলম্| |১০৫|

স০-আমং পুনর্মূলকং হরিতকত্বেন যদ্ভক্ষ্যতে তদ্দোষলম্| সর্বমিত্যত্রাযত্নকৃতেন সম্বন্ধেন সম্বধ্যতে| তেনাদোষলস্য বালস্যাপ্যামস্য দোষলত্বম্, ন তু বৃদ্ধস্যৈবেত্যর্থঃ| মূলকং নীলকণ্ঠাপরসংজ্ঞম্|

Adhikarana piNDAluguNAH (105) · Śloka 105

| কটূষ্ণো বাতকফহা পিণ্ডালুঃ পিত্তবর্ধনঃ||১০৫||

স০-পিণ্ডালুঃ কটুকো রসে, বীর্যে চোষ্ণো, বাতকফঘ্নঃ পিত্তকরশ্চ|

Adhikarana kuTherAdiharitakaguNAH (106-107) · Śloka 107

কুঠেরশিগ্রুসুরসসুমুখাসুরিভূস্তৃণম্| ফণিজ্জার্জকজম্বীরপ্রভৃতি গ্রাহি শালনম্||১০৬|| বিদাহি কটু রূক্ষোষ্ণং হৃদ্যং দীপনরোচনম্| দৃক্শুক্রকৃমিহৃত্তীক্ষ্ণং দোষোত্ক্লেশকরং লঘু||১০৭||

স০-কুঠেরাদি শালনং গ্রাহি বিদাহি কটুকং রসপাকযো রূক্ষমুষ্ণবীর্যম্ হৃদ্যমগ্নিদীপনং চ| তথা, দৃগাদিহৃত্তীক্ষ্ণম্| তথা, দোষান্-বাতাদীন্, উত্ক্লেশযতি-কোপযন্ স্থানাচ্চালযতি, ইতী দোষোত্ক্লেশকরম্, লঘু চ| শালনং-অবদংশঃ, যেন সহান্নং ভোক্তুং যুজ্যতে| কুঠেরো-বৈকুণ্ঠকঃ| শিগ্রুঃ-ফলপত্রকঃ| সুরসঃ-কৃষ্ণতুলসী| সুমুখঃ-কটুপত্রকঃ| আসুরী-রাজিকা| ভূস্তৃণং-গুহ্যবীজকম্| 'ফণিজ্জকো-মরিচকস্তীক্ষ্ণগন্ধঃ প্রকীর্তিতঃ|' আর্জকঃ-খরপত্রকঃ| জম্বীরঃ-করপত্রকঃ| প্রভৃতিশব্দেন সঙ্গ্রহোক্তা গৃহ্যন্তে (সূ.অ.৭)-"ধান্যতুম্বরুসালেযযবানীশৃঙ্গবেরকাঃ| পর্ণাশো গৃঞ্জনোঽজাজী কণ্ডীরং গজপিপ্পলী|| ফণিজ্জার্জকজম্বীরখরাশ্বাকালমালিকাঃ| দীপ্যকঃ ক্ষবকো দ্বীপী বস্তগন্ধাদি বদ্ধবিট্||" ইতি| তন্ত্রান্তরে চোক্তম্-"কটুতিক্তরসা শীতা কফপিত্তবিনাশিনী| বিপাকে মধুরা লঘ্বী তস্করাঙ্গুলিকা স্মৃতা||" ইতি|

Adhikarana surasaguNAH (108) · Śloka 108

হিধ্মাকাসবিষশ্বাসপার্শ্বরুক্পূতিগন্ধহা| সুরসঃ|১০৮|

স০-সুরসো হিধ্মাদিঘ্নঃ| পূতিগন্ধং-দৌর্গন্ধ্যং, সৌরভ্যোত্পাদনাদ্ধন্তি|

Adhikarana sumukhaguNAH (108) · Śloka 108

| সুমুখো নাতিবিদাহী গরশোফহা||১০৮||

স০-সুমুখঃ-কটুপত্রাখ্যঃ, কিঞ্চিদ্বিদাহী গরশোফৌ চ হন্তি|

Adhikarana ArdrikAguNAH (109) · Śloka 109

আর্দ্রিকা তিক্তমধুরা মূত্রলা ন চ পিত্তকৃত্| |১০৯|

স০-আর্দ্রিকা-আর্দ্রধানিকা, তিক্তমধুরা মূত্রকরী পিত্তং চ ন করোতি|

Adhikarana lashunaguNAH (109-111) · Śloka 111

| লশুনো ভৃশতীক্ষ্ণোষ্ণঃ কটুপাকরসঃ সরঃ||১০৯|| হৃদ্যঃ কেশ্যো গুরুর্বৃষ্যঃ স্নিগ্ধো রোচনদীপনঃ| ভগ্নসন্ধানকৃদ্বল্যো রক্তপিত্তপ্রদূষণঃ||১১০|| কিলাসকুষ্ঠগুল্মার্শোমেহক্রিমিকফানিলান্| সহিধ্মাপীনসশ্বাসকাসান্ হন্তি রসাযনম্||১১১||

স০-লশুনোঽতিতীক্ষ্ণোঽত্যুষ্ণবীর্যঃ, কটুপাকরসঃ সরঃ- ভেদী, হৃদ্যাদিগুণযুক্তশ্চ| কিলাসাদীন্ হন্তি, রক্তপিত্তং চ করোতি| কিলাসং-শ্বিত্রম্| কন্দস্যৈবাযং গুণবীর্যনির্দেশো বোধ্যঃ| পত্রমধ্যযোর্মধুরত্বাত্ ভৃশোষ্ণত্বানুপপত্তিঃ| তথা চোক্তং সঙ্গ্রহে (সূ.অ.৭)-"পত্রে সক্ষারমধুরো মধ্যে মধুরপিচ্ছিলঃ| তীক্ষ্ণোষ্ণো লশুনঃ কন্দে" ইতি|

Adhikarana palANDuguNAH (112) · Śloka 112

পলাণ্ডুস্তদ্গুণন্যূনঃ শ্লেষ্মলো নাতিপিত্তলঃ| |১১২|

স০-পলাণ্ডুঃ-ধবলাক্ষকাখ্যঃ, তদ্গুণন্যূনঃ,-তস্য-রসোনস্য গুণাস্তদ্গুণাঃ, তৈর্হীনঃ| লশুনাত্কিঞ্চিদ্ধীনগুণ ইত্যর্থঃ| তথা শ্লেষ্মলো নাতিপিত্তং চ করোতি| ন তু লশুনবত্কফঘ্নোঽতিপিত্তকৃচ্চ| কফবাতার্শসাং স্বেদে ভক্ষণে চ প্রভাবাত্পথ্যঃ| তন্ত্রান্তরেঽন্যোঽপ্যুক্তঃ, যথা (সুশ্রুতে সূ.অ.৪৬|২৪৭)-"স্নিগ্ধো রুচিষ্যঃ স্থিরধাতুকারী বল্যোঽথ মেধাকফপুষ্টিদশ্চ| স্বাদুর্গুরুঃ শোণিতপিত্তশস্তঃ সপিচ্ছিলঃ ক্ষীরপলাণ্ডুরুক্তঃ"|| ইতি|

Adhikarana gRu~jjanakaguNAH (112-113) · Śloka 113

| কফবাতার্শসাং পথ্যঃ স্বেদেঽভ্যবহৃতৌ তথা||১১২|| তীক্ষ্ণো গ্ড়ঞ্জনকো গ্রাহী পিত্তিনাং হিতকৃন্ন সঃ| |১১৩|

স০-গৃঞ্জনকস্তীক্ষ্ণো গ্রাহী পিত্তিনামহিতশ্চ|

Adhikarana sUraNaguNAH (113-114) · Śloka 114

| দীপনঃ সূরণো রুচ্যঃ কফঘ্নো বিশদো লঘুঃ||১১৩|| বিশেষাদর্শসাং পথ্যঃ| |১১৪|

স০-সূরণো নাম কন্দবিশেষো দীপনো রুচ্যঃ শ্লেষ্মঘ্নো বিশদো লঘুরর্শসামতিপথ্যশ্চ|

Adhikarana BUkandaguNAH (114) · Śloka 114

ভূকন্দস্ত্বতিদোষলঃ| |১১৪|

স০-ভূকন্দঃ ভূস্ফোটাখ্যঃ প্রাবৃডুদ্ভবঃ প্রসিদ্ধ এব| স চাত্যর্থং দোষলঃ|

Adhikarana patrAdInAM yathottaraM gurUtvam (114) · Śloka 114

| পত্রে পুষ্পে ফলে নালে কন্দে চ গুরুতা ক্রমাত্||১১৪||

স০-পত্রাদীনাং যথোত্তরং ক্রমাদ্গুরুত্বম্| তেন পত্রশাকমপেক্ষ্য পুষ্পশাকং গুরু, ততঃ ফলশাকম্, ততো নালশাকম্, ততোঽপি কন্দশাকমিতি| এবং হরিতকেষ্বপি গুরুত্বং বেদ্যম্| বাহুল্যেন চৈতদুক্তম্| মূলকে হি বৈপরীত্যং দৃশ্যতে| তথা হি- মূলকস্য হি কন্দে লঘুত্বম্| অত এব মুনিরপ্যাহ (?)-"মূলকে তু বিপর্যযঃ|"ইতি| শাকানাং হরিতকানাং চ যেষামিহ পর্যাযা নোক্তাস্তেষাং সদ্বৈদ্যেভ্যোঽবগন্তব্যাঃ| অথ বরাবরত্বং নির্ধারযতি-

Adhikarana shAkeShu jIvantyAHshreShThatvam sarShapANAmavaratvam (2-115) · Śloka 115

বরা শাকেষু জীবন্তী সার্ষপং ত্ববরং পরম্| ইতি শাকবর্গঃ||২|| |১১৫|

স০-শাকেষু মধ্যে জীবন্তী বরা| সার্ষপং পুনরবরম্| ইতি শাকবর্গঃ|

Adhikarana PalavargaH drAkShAguNAH (115-117) · Śloka 117

অথ ফলবর্গঃ| | দ্রাক্ষা ফলোত্তমা বৃষ্যা চক্ষুষ্যা সৃষ্টমূত্রবিট্||১১৫|| স্বাদুপাকরসা স্নিগ্ধা সকষাযা হিমা গুরুঃ| নিহন্ত্যনিলপিত্তাস্রতিক্তাস্যত্বমদাত্যযান্||১১৬|| তৃষ্ণাকাসশ্রমশ্বাসস্বরভেদক্ষতক্ষযান্| |১১৭|

ফলানামাহারকালে শাকেভ্যোঽল্পোপযোগিত্বাচ্ছাকবর্গাদনন্তরং ফলবর্গ উচ্যতে| খরনাদেঽপ্যুক্তম্-"ভুক্তাবসানে ফলং ভুজ্যতে, ইতি ফলবর্গোঽভিধীযতে" ইত্যাহ স০-ফলেষুত্তমা-ফলোত্তমা গোস্তনীপর্যাযা দ্রাক্ষা| সা বৃষ্যাদিগুণযুক্তা| সকষাযা-ঈষত্কষযা| অনিলাদীন্ ক্ষযান্তান্ হন্তি| উদাবর্তহরত্বং চরকমুনিনাঽস্যা উক্তম্| তচ্চ স্নিগ্ধত্ববৃষ্যত্বসৃষ্টবিণ্মূত্রত্বেনেহোক্তপ্রাযম্| অন্যাসাং চ দ্রাক্ষাণাং গুণহীনত্বং দেশাদ্যনুরোধাত্ কল্প্যম্|

Adhikarana dADimaguNAH (117-118) · Śloka 118

| উদ্রিক্তপিত্তাঞ্জযতি ত্রীন্দোষান্স্বাদু দাডিমম্||১১৭|| পিত্তাবিরোধি নাত্যুষ্ণমম্লং বাতকফাপহম্| সর্বং হৃদ্যং লঘু স্নিগ্ধং গ্রাহি রোচনদীপনম্||১১৮||

স০-উদ্রিক্তং-অতিরিক্তং, পিত্তং যেষাং তাংস্তথাবিধান্ ত্রীন্ দোষান্ মধুরং দাডিমং জযতি| মধুরস্য পূর্বকথনং প্রাধান্যখ্যাপনার্থম্| পিত্তেত্যাদি| অম্লদাডিমং পিত্তাবিরোধি-ন পিত্তং কুরুতে ন চ পিত্তং শমযতি| অত এবৈতদ্বাতকফাপহমুক্তম্| সর্বং-মধুরমম্লং, চ, যদ্দাডিমং তত্ হৃদ্যাদিগুণসংযুক্তম্| মুনিনা তূক্তম্ (চ.সূ.অ.২৭|১৪৬)-"রূক্ষাম্লং দাডিমং যত্তু তত্পিত্তানিলকোপনম্|" ইতি|

Adhikarana mocAdiguNAH (119-122) · Śloka 122

মোচখর্জূরপনসনারিকেলপরূষকম্| আম্রাততালকাশ্মর্যরাজাদনমধূকজম্||১১৯|| সৈবীরবদরাঙ্কোল্লফল্গুশ্লেষ্মাতকোদ্ভবম্| বাতামাভিষুকাক্ষোডমুকূলকনিকোচকম্||১২০|| উরুমাণং প্রিযালং চ বৃংহণং গুরু শীতলম্| দাহক্ষতক্ষযহরং রক্তপিত্তপ্রসাদনম্||১২১|| স্বাদুপাকরসং স্নিগ্ধং বিষ্টম্ভি কফশুক্রকৃত্| |১২২|

স০-মোচাদিপ্রিযালান্তং বৃংহণত্বাদিযুক্তম্| মোচং-কদলীফলম্| নারিকেলং-রোমফলাখ্যম্| পরুষকো-মৃদুফলঃ| আম্রাতঃ-কপিচূডঃ| তালঃ-তলঃ| কাশ্মর্যং-কাশ্মরীফলম্| রাজাদনং-ক্ষীরশুক্লা| সৌবীরং-বদরম্| বদরং-কর্ণিকাবদরম্| অঙ্কোল্ল ইতি বিল্বঃ| ফল্গুঃ-কাকোদুম্বরিকা| শ্লেষ্মাতকং-শেলুঃ| অভিষুকং-স্যারাটম্| আক্ষোডং-স্নেহফলাখ্যম্| মুকূলকং- দন্তীফলম্| নিকোচকং-সরলফলম্| উরুমাণং-স্নিগ্ধফলম্| প্রিযালং-সন্নতরুঃ|

Adhikarana tAlaphalaguNAH kAshmaryajaguNAH vAtAmAdiguNAH priyAlaguNAH, priyAlamajjaguNAH, kolamajjaguNAH (122-125) · Śloka 125

| ফলং তু পিত্তলং তালং সরং কাশ্মর্যজং হিমম্||১২২|| শকৃন্মূত্রবিবন্ধঘ্নং কেশ্যং মেধ্যং রসাযনম্| বাতামাদ্যুষ্ণবীর্যং তু কফপিত্তকরং সরম্||১২৩|| পরং বাতহরং স্নিগ্ধমনুষ্ণং তু প্রিযালজম্| প্রিযালমজ্জা মধুরো বৃষ্যঃ পিত্তানিলাপহঃ||১২৪|| কোলমজ্জা গুণৈস্তদ্বত্তৃট্ছর্দিঃকাসজিচ্চ সঃ| |১২৫|

স০-তালস্যেদং তালং ফলং পিত্তকারি| কাশ্মর্যজং ফলং সরং শীতবীর্যাদিগুণযুক্তম্| মধূকবদরযোরপি বিশেষান্তরমুক্তং সঙ্গ্রহে (সূ.অ.৭)-"মধূকজমহৃদ্যং তু বদরং সরণাত্মকম্|" ইতি| বাতামাদীনাং গুণবিশেষপ্রদর্শনার্থং নির্ধারিতম্| তুঃ-বিশেষে| বাতামাদিকমুষ্ণবীর্যং কফপিত্তকরং সরমতিশযেন বাতঘ্নং স্নিগ্ধং চ| আদিশব্দেনাঽভিষুকাদীনাং গ্রহণম্| প্রিযালজাতং- প্রিযালজং ফলমনুষ্ণবীর্যম্| তুর্বিশেষে, বিশেষস্তু শীতবীর্যত্বমেব| শেষং বৃংহণাদি সর্বং সমানম্| প্রিযালস্য মজ্জা-অস্থ্যভ্যন্তরং, মধুরাদিগুণযুক্তম্| বদরমজ্জা গুণৈস্তদ্বত্-প্রিযালমজ্জাবত্, তৃডাদিজিচ্চ| তন্ত্রান্তরে চোক্তম্ (সুশ্রুতে সূ.অ.৪৩|২০৫)-"বৈভীতকো মদকরঃ কোলানাং পিত্তনাশনঃ|" তথা, "তালখর্জূরাদীনাং মস্তকমজ্জানঃ স্বাদুপাকা বৃষ্যাঃ শীতবীর্যাশ্চ|" ইতি সুশ্রুতোঽপঠত্(?)|

Adhikarana bilvaguNAH (125-126) · Śloka 126

| পক্বং সুদুর্জরং বিল্বং দোষলং পূতিমারুতম্||১২৫|| দীপনং কফবাতঘ্নং বালং, গ্রাহ্যুভযং চ তত্| |১২৬|

স০-বিল্বং পক্বং সুদুর্জরং পূতিমারুতং চ-দুর্গন্ধ্যপানবাতকৃত্ ভবতি| বালং-অসম্পূর্ণমনুপচিতং বিল্বং, দীপনং কফবাতঘ্নম্| উভযং-আমং পক্বং চ, গ্রাহি-মূত্রপুরীষাদেঃ সঙ্গ্রহণম্|

Adhikarana kapitthaguNAH (126-127) · Śloka 127

| কপিত্থমামং কণ্ঠঘ্নং দোষলং, দোষঘাতি তু||১২৬|| পক্বং হিধ্মাবমথুজিত্, সর্বং গ্রাহি বিষাপহম্| |১২৭|

স০-আমং কপিত্থং কণ্ঠং হন্তি, দোষলং-ত্রিদোষকৃত্| পক্বং কপিত্থং দোষঘ্নং হিক্কাচ্ছর্দিহৃচ্চ| সর্বং-আমং পক্বং চ কপিত্থং, গ্রাহি বিষাপহং চ| আমকপিত্থস্য কষাযত্বং কণ্ঠঘ্নত্বেনৈবোদিতম্, অম্লত্বং চাম্লবর্গমধ্যে পাঠাদবগতম্| পক্বস্য চ মধুরত্বং সুপ্রসিদ্ধমিতীহৈতন্নোক্তম্| তথা, আমকপিত্থগুণকথনেন চ তথাবিধানি কষাযাম্লস্বভাবানি বিবিধানি কপিত্থানি সদৈবামকপিত্থগুণানি বেদ্যানি| পক্বকপিত্থগুণকথনেন চ তথাবিধানি মাধুর্যানুবিদ্ধানি সদা পক্বগুণানি বেদ্যানি|

Adhikarana jAmbavaguNAH (127-128) · Śloka 128

| জাম্ববং গুরু বিষ্টম্ভি শীতলং ভৃশবাতলম্||১২৭|| সঙ্গ্রাহি মূত্রশকৃতোরকণ্ঠ্যং কফপিত্তজিত্| |১২৮|

স০-জাম্ববং গুর্বাদিগুণযুক্তম্, মূত্রশকৃতোশ্চ সঙ্গ্রহণম্| কণ্ঠায ন হিতম্, কফপিত্তজিচ্চ| জাম্ববমিতি ফলার্থে "জম্ব্বা বা " ইত্যণ্|

Adhikarana AmraguNAH (128-129) · Śloka 129

আম্রস্য ত্র্যবস্থস্যাপ্যুপযোগদর্শনাত্তথৈব গুণানাহ | বাতপিত্তাস্রকৃদ্বালং, বদ্ধাস্থি কফপিত্তকৃত্||১২৮|| গুর্বাম্রং বাতজিত্পক্বং স্বাদ্বম্লং কফশুক্রকৃত্| |১২৯|

স০-বাতেত্যাদি| আম্রমিতি বক্ষ্যমাণেন সম্বন্ধঃ| আম্রং-চূতাখ্যং, বালং সদ্বাতপিত্তাস্রকৃত্| বদ্ধাস্থি-সঞ্জাতাস্থি, কফপিত্তকৃত্| পক্বমাম্রং গুরু বাতজিত্ মধুরাম্লং কফশুক্রকৃচ্চ| সঙ্গ্রহে (সূ.অ.৭) সহকাররসস্যাপি গুণা উক্তাঃ| যথা-"সহকাররসো হৃদ্যঃ সুরভিঃ স্নিগ্ধরোচনঃ|" ইতি|

Adhikarana vRukShAmlaguNAH (129) · Śloka 129

| বৃক্ষাম্লং গ্রাহি রূক্ষোষ্ণং বাতশ্লেষ্মহরং লঘু||১২৯||

স০-বৃক্ষাম্লং গ্রাহ্যাদিগুণৈর্যুক্তম্| বাতশ্লেষ্মহৃল্লঘু চ| কোশাম্রং চ কিঞ্চিদেতস্মান্ন্যূনগুণং জ্ঞেযম্| তথা চ সঙ্গ্রহে (সূ.অ.৭)-"বৃক্ষাম্লং গ্রাহি রূক্ষোষ্ণং লঘু রোচনদীপনম্| বাতশ্লেষ্মহরং কিঞ্চিদূনং কোশাম্রজং ততঃ|| ইতি|

Adhikarana shamIPalaguNAH (130) · Śloka 130

শম্যা গুরূষ্ণং কেশঘ্নং রূক্ষম্| |১৩০|

স০-ফলাপেক্ষযা ষষ্ঠী| শম্যাঃ ফলং গুরু উষ্ণবীর্যং কেশঘ্নং রূক্ষং চ|

Adhikarana pIluguNAH (130-131) · Śloka 131

পীলু তু পিত্তলম্| কফবাতহরং ভেদি প্লীহার্শঃকৃমিগুল্মনুত্||১৩০|| সতিক্তং স্বাদু যত্পীলু বাত্যুষ্ণং তত্ত্রিদোষজিত্| |১৩১|

স০-পীলুফলং চ পিত্তলং যাবদ্গুল্মনুত্| সতিক্তং-ঈষত্তিক্তং মধুরং চ যত্পীলু তন্নাত্যুষ্ণং ত্রিদোষজিচ্চ|

Adhikarana mAtulu~ggaguNAH (131-133) · Śloka 133

মাতুলুঙ্গস্য ত্বঙ্মাংসকেসরাণাং পৃথগুপযোগদর্শনাত্ পৃথগেব গুণানাহ | ত্বক্তিক্তকটুকা স্নিগ্ধা মাতুলুঙ্গস্য বাতজিত্||১৩১|| বৃংহণং মধুরং মাংসং বাতপিত্তহরং গুরু| লঘু তত্কেসরং কাসশ্বাসহিধ্মামদাত্যযান্||১৩২|| আস্যশোষানিলশ্লেষ্মবিবন্ধচ্ছর্দ্যরোচকান্ গুল্মোদরার্শঃশূলানি মন্দাগ্নিত্বং চ নাশযেত্||১৩৩||

স০-বীজপূরকস্য ত্বক্ তিক্তকটুকা রসে, স্নিগ্ধা বাতঘ্নী চ| খরনাদস্ত্বাহ-"ত্বঙ্মাতুলুঙ্গাত্কটুকা গুর্বী বাতপ্রকোপনী| ইতি চরকেঽপ্যুক্তম্ (?)-"গুর্বী ত্বগস্য কটুকা মারুতস্য প্রকোপনী|" ইতি| এতন্মতানুসারিণস্ত্বত্রৈবং পাঠং পঠন্তি,-"ত্বক্তিক্তকটুকাঽস্নিগ্ধা মাতুলুঙ্গস্য বাতকৃত্|" ইত্যকারপ্রশ্লেষাত্| মাংসং-কেসরাদর্বাক্, বৃংহণং মধুরং বাতপিত্তহৃত্ গুরু চ| তস্য-মাতুলুঙ্গস্য কেসরং, তত্কেসরং লঘু| তথা, কাসাদীন্ মন্দাগ্নিত্বান্তান্নাশযেত্|

Adhikarana BallAtakaguNAH (134) · Śloka 134

ভল্লাতকস্য ত্বঙ্মাংসং বৃংহণং স্বাদু শীতলম্| তদস্থ্যগ্নিসমং মেধ্যং কফবাতহরং পরম্||১৩৪||

স০-ত্বক্ চ মাংসং চ ত্বঙ্মাংসং ভল্লাতকসম্বন্ধি, বৃংহণং মধুরং শীতলং চ| তস্য-ভল্লাতকস্যাস্থি,-তদস্থি, অগ্নিসমং-তীক্ষ্ণত্বাত্ অগ্নিবত্স্ফোটককর্তৃত্বাত্(চ্চ)| অথবা, অগ্নিঃ-চিত্রকঃ, তস্য গুণদোষকর্তৃতযা তুল্যং ভল্লাতকাস্থীতি| তথা, মেধাযৈ হিতম্| অতিকফবাতঘ্নম্|

Adhikarana pAlevataguNAH (135) · Śloka 135

স্বাদ্বম্লং শীতমুষ্ণং চ দ্বিধা পালেবতং গুরু| রুচ্যমত্যগ্নিশমনম্|১৩৫|

স০-পালেবতং-রৈবতকাখ্যং দ্বিধা| কথং দ্বিপ্রকারম্ ? ইত্যাহ-স্বাদু অম্লং চ, তত্তু যথাসংখ্যেন শীতমুষ্ণং চ| তথা, দ্বযমপি গুরু রুচ্যমত্যগ্নিশমনং চ| অথবা যথাসম্ভবং সম্বন্ধঃ,-মধুরং গুরু অত্যগ্নিশমনং চ, অম্লং রুচ্যমিতি|

Adhikarana pakvArukaguNAH (135-136) · Śloka 136

| রুচ্যং মধুরমারুকম্||১৩৫|| পক্বমাশু জরাং যাতি নাত্যুষ্ণগুরুদোষলম্| |১৩৬|

স০-মধুরমারুকং রুচ্যং ভবতি| অপক্বস্যৈবৈতে গুণা বেদ্যাঃ| যস্মাদাহ-পক্বমিত্যাদি| পক্বং সত্তদাশু-দ্রাগেব পরিণামং যাতি| কিঞ্জিদুষ্ণবীর্যম্ কিঞ্চিদ্গুরু, কিঞ্চিদ্দোষলং-অপথ্যম্| নিঘণ্টাবুক্তম্ (ধন্বন্তরীযে ব.৫|৩৮)-"আরুকং বীরসেনং চ বীরা বীরারুকং তথা| বিদ্যাজ্জাতিবিশেষেণ তচ্চতুর্বিধমারুকম্|| ইতি|

Adhikarana amladrAkShAparUShakakaramardakaguNAH (136-137) · Śloka 137

| দ্রাক্ষাপরূষকং চার্দ্রমম্লং পিত্তকফপ্রদম্||১৩৬|| গুরূষ্ণবীর্যং বাতঘ্নং সরং সকরমর্দকম্| |১৩৭|

স০-দ্রাক্ষাপরূষকং সকরমর্দকং চার্দ্রং-অশুষ্কম্, অম্লং সত্ পিত্তশ্লেষ্মকরং গুরূষ্ণবীর্যং বাতঘ্নং সরং চেতি| করমর্দকং-সুষেণম্|

Adhikarana amlakolAdiguNAH (137-138) · Śloka 138

| তথাঽম্লং কোলকর্কন্ধুলকুচাম্রাতকারুকম্||১৩৭|| ঐরাবতং দন্তশঠং সতূদং মৃগলিণ্ডিকম্| নাতিপিত্তকরং পক্বং শুষ্কং চ করমর্দকম্||১৩৮||

স০-অম্লং কোলাদিকং মৃগলিণ্ডিকান্তং তদ্বচ্চেতি অম্লদ্রাক্ষাদিবত্, গুণৈর্জ্ঞেযমিত্যর্থঃ| কর্কন্ধুঃ-হ্রস্ববদরী| লকুচং-লিকুচম্| আরুকস্যাম্লস্যৈবৈতে গুণা জ্ঞেযাঃ| মধুরস্য হি বিশেষেণপূর্বমুক্তা এব গুণাঃ| তথা, ঐরাবতাদি নাত্যর্থং পিত্তং করোতি| ঐরাবতং-নাগরঙ্গম্| দন্তশঠং-জম্বীরম্| তথা, তূদং মৃগলিণ্ডিকং চ| তথা, করমর্দকং পক্বং শুষ্কং চ নাত্যর্থং পিত্তকরম্|

Adhikarana shuShkAmlIkAPalAdiguNAH (139) · Śloka 139

দীপনং ভেদনং শুষ্কমম্লীকাকোলযোঃ ফলম্| তৃষ্ণাশ্রমক্লমচ্ছেদি লঘ্বিষ্টং কফবাতযোঃ||১৩৯||

স০-অম্লীকাফলং কোলফলং চ শুষ্কং সদ্দীপনং ভেদনং তৃষ্ণাদিনাশনং লঘু কফবাতযোশ্চ পথ্যম্|

Adhikarana PalAnAM madye lakucamavaram (140) · Śloka 140

ফলানামবরং তত্র লকুচং সর্বদোষকৃত্| |১৪০|

স০-ফলানাং সর্বেষাং মধ্যে লকুচমবরং-অপ্রধানং, ত্রিদোষকরং চ| চরকমুনিস্ত্বস্য পিত্তশ্লেষ্মকৃত্ত্বমেবানুজজ্ঞে| তত্পাঠো হি (সূ.অ. ২৭|১২৮)-"অম্লং পরূষকং দ্রাক্ষা বদরাণ্যারুকাণি চ| পিত্তশ্লেষ্মপ্রকোপীণি কর্কন্ধুলকুচানি চ||" ইতি| সঙ্গ্রহে ত্বতোঽপ্যধিকমুক্তম্ (সূ.অ.৭)-"তিন্দুকাশ্মন্তকাসীসফলিনীবিম্বতোদনম্| টঙ্কাশ্বকর্ণবকুলগাঙ্গেরুধবধন্বনম্| শ্বেতপাকং কপিত্থানি সিঞ্চতীভব্যজাম্ববম্| ক্ষীরিবৃক্ষফলং বীজং পৌষ্করং কফপিত্তজিত্|| কষাযমধুরং রূক্ষং শীতলং গুরু লেখনম্| বিবন্ধাধ্মানজননং স্তম্ভনং বাতকোপনম্|| বৃংহণং বাতপিত্তঘ্নং স্নিগ্ধং সিঞ্চিতিকাফলম্| ভব্যং বিশদমম্লং চ, জাম্ববং ত্বতিবাতলম্|| বিষ্টম্ভকৃদকণ্ঠ্যং চ সাম্লং তু ক্ষীরিবৃক্ষজম্| পিত্তশ্লেষ্মঘ্নমম্লং চ বাতলং চাক্ষকীফলম্|| নীপং শতাক্ষিকং প্রাচীনামলং তৃণশূল্যজম্| অস্মাদল্পান্তরগুণং সেঙ্গুদং সবিকঙ্কতম্|| ফলং করঞ্জং বিষ্টম্ভি পিত্তশ্লেষ্মাবিরোধি চ|"ইতি| মুনিনা ত্বতোঽপি কিঞ্চিদধিকমুক্তম্| যথা (চ.সূ.অ.২৭|১৫০)-"রোচনো দীপনো হৃদ্যঃ সুগন্ধিস্ত্বগ্বিবর্জিতঃ| কর্চূরঃ কফবাতঘ্নঃ শ্বাসহিক্কার্শসাং হিতঃ|| বাতলং কফপিত্তঘ্নং বিদ্যাত্কর্পটকীফলম্| মধুরাণ্যতিপাকানি বাতপিত্তহরাণি চ|| অশ্বত্থোদুম্বরপ্লক্ষন্যগ্রোধানাং ফলানি তু| প্রাচীনামলকং চৈব দোষঘ্নং গরঘাতি চ|| ইঙ্গুদং তিক্তমধুরং স্নিগ্ধোষ্ণং কফবাতজিত্|" ইতি| সুশ্রুতে চোক্তম্ (সূ.অ.৪৬|১৮৯,১৬০)-|"সুগন্ধি মধুরং স্নিগ্ধং লবলীফলমুচ্যতে| বৃক্ষাম্লাল্পান্তরগুণং কোশাম্রফলমুচ্যতে||" ইতি| সম্প্রতি যাদৃশং ফলং শাকং চ ত্যাজ্যম্, তদুপদিশন্নাহ-

Adhikarana tyAjyAni dhAnyashAkaPalAni (140-3) · Śloka 3

| হিমানলোষ্ণদুর্বাতব্যাললালাদিদূষিতম্||১৪০|| জন্তুজুষ্টং জলে মগ্নমভূমিজমনার্তবম্| অন্যধান্যযুতং হীনবীর্যং জীর্ণতযাঽতি চ||১৪১|| ধান্যং ত্যজেত্তথা শাকং রূক্ষসিদ্ধমকোমলম্| অসঞ্জাতরসং তদ্বচ্ছূষ্কং চান্যত্র মূলকাত্||১৪২|| প্রাযেণ ফলমপ্যেবং তথাঽঽমং বিল্ববর্জিতম্| |১৪৩| ইতি ফলবর্গঃ||৩||

স০-দূষিতশব্দঃ প্রত্যেকং সম্বদ্যতে| ধান্যং কেদারস্থং হিমেন দূষিতং ত্যজেত্| তথা, অনলেন প্রবৃদ্ধেন দূষিতং, উষ্ণেন আতপাদিনা, দুর্বাতেন-পুরোবাতাদিনা, তথা, ব্যালানাং-সর্পাদীনাং লালযা দূষিতং ত্যজেত্| আদিগ্রহণেন শবকোথমূত্রপুরীষাদীনাং গ্রহণম্| তথা, জন্তুভিঃ-কৃম্যাদিভিঃ, জুষ্টং-সেবিতম্| জলে মগ্নং-আশিখং বুডিতম্| অভূমৌ-বিপরীতভুবি জাতং-অভূমিজম্, যা যস্যোচিতা ভূমিস্ততোঽন্যা-বিপরীতা| অনার্তবং অপ্রাপ্তসমযম্, যস্মিন্নৃতৌ যস্যোত্পত্তিঃ প্রসিদ্ধা ততোঽন্যস্মিন্ জাতমিত্যর্থঃ| তল্লক্ষণং চ রসাদীনামপরিপূর্ণত্বেন বিজ্ঞেযম্| অন্যেন-বিজাতীযেন ধান্যেন সংযুতং কেদারগতম্| { যথা, রক্তশালির্যবকেন সহ বিরুধ্যতে| তথা, মুদ্গো মাষেণ| } (এবং শূকধান্যং বিজাতীযেন শূকধান্যেন| তথা, শিম্বীধান্যং শিম্বীধান্যেন বিজাতীযেন সহ বিরুদ্ধং ত্যজেত্) { কেচিচ্ছূকধান্যেন সহ বিরুদ্ধমিতি বর্ণযন্তি| অন্যে তু জীর্ণং নবেনমিশ্রিতমন্যধান্যযুতমিতি ব্রুবতে| } জীর্ণতযা-অতিপুরাণত্বেন, হীনবীর্যং-নষ্টশক্তি| এবংবিধং ধান্যং ত্যজেত্| তথা, শাকমপি ত্যজেত্| কীদৃশম্ ? রূক্ষসিদ্ধং-নিঃস্নেহসিদ্ধমিত্যর্থঃ| অথবা, রূক্ষেণ-কাঞ্জিকাদিনা সিদ্ধং-রূক্ষসিদ্ধম্| অকোমলং-জরঠম্| অসঞ্জাতরসং-অপরিপূর্ণস্বরূপমিত্যর্থঃ| তদ্বচ্ছুষ্কং-তথৈব শুষ্কশাকমপ্যসঞ্জাতরসবত্ ত্যজেত্, অন্যত্র মূলকাত্| শুষ্কমূলকং ভজেদেব| প্রাযেণ ফলমপ্যেবংবিধং ত্যজেত্| প্রাযোগ্রহণং দ্রাক্ষাপরূষকাদীনাং শুষ্কাণামপি পথ্যত্বাদত্যাজ্যত্বজ্ঞাপনার্থম্| তথা, আমং-অসম্প্রাপ্তপাকং ফলং, ত্যজেদিতি বর্ততে| কিং সর্বম্ ? নেত্যাহ-বিল্ববর্জিতম্| বিল্বং ত্বামমপি পথ্যত্বাদ্ভজেদেবেত্যর্থঃ| ইতি ফলবর্গঃ| ফলবর্গাদনন্তরং বিবিধৌষধবর্গারম্ভঃ, প্রাযেণাস্যাঽঽহারোপযোগিত্বাত্| তত্রাপি লবণানাং পূর্বমুপন্যাসো যুক্তঃ, সুতরামুপযোগিত্বাত্| ইত্যাহ-

Adhikarana auShadhavargaH lavaNasAmAnyaguNAH (143-144) · Śloka 144

অথৌষধবর্গঃ| | বিষ্যন্দি লবণং সর্বং সূক্ষ্মং সৃষ্টমলং মৃদু||১৪৩|| বাতঘ্নং পাকি তীক্ষ্ণোষ্ণং রোচনং কফপিত্তকৃত্| |১৪৪|

স০-সর্বং লবণম্ বিষ্যন্দ্যাদিগুণযুক্তং বিদুঃ-জানন্তি, সদ্বৈদ্যা ইতি শেষঃ| বিষ্যন্দযতি তচ্ছীলং-বিষ্যন্দি, স্ত্যানস্য কফাদিসঙ্ঘাতস্য বিলীনবিগ্রহতামুত্পাদযতীত্যর্থঃ| সূক্ষ্মং-সূক্ষ্মস্রোতোগামি| সৃষ্টং মলং-মূত্রপুরীষাদি যেন তত্সৃষ্টমলম্| তথা, বাতাপহম্| পাকি-অন্নব্রণাদীনাং পাককারি| তীক্ষ্ণং-অমৃদু, মরীচাদিবত্| উষ্ণং-উষ্ণবীর্যম্| রোচনং-রুচিকৃত্| তথা, কফপিত্তকৃত্|

Adhikarana saindhavaguNAH (144-145) · Śloka 145

| সৈন্ধবং তত্র সস্বাদু বৃষ্যং হৃদ্যং ত্রিদোষনুত্||১৪৪|| লঘ্বনুষ্ণং দৃশঃ পথ্যমবিদাহ্যগ্নিদীপনম্| |১৪৫|

স০-তত্র-তেষু লবণেষু মধ্যে, সৈন্ধবং সস্বাদু-ঈষন্মধুরং, বৃষ্যং হৃদ্যং ত্রিদোষঘ্নং লঘু তথা কিঞ্চিদুষ্ণং দৃষ্টেঃ পথ্যং কিঞ্চিদ্বিদাহি অগ্নিদীপনং চ| সামন্যগুণাশ্চ বিষ্যন্দিসূক্ষ্মসৃষ্টমলত্বরোচনান্যস্য সন্ত্যেব|

Adhikarana sauvarcalaguNAH (145-146) · Śloka 146

| লঘু সৌবর্চলং হৃদ্যং সুগন্ধ্যুদ্গারশোধনম্||১৪৫|| কটুপাকং বিবন্ধঘ্নং দীপনীযং রুচিপ্রদম্| |১৪৬|

স০-সৌবর্চলং লঘু হৃদযায হিতং সুগন্ধি উদ্গারং শোধযতি-দুষ্টং সচ্ছুদ্ধং করোতি| কটুপাকং চ| তথা, বিবন্ধং স্রোতসাং হন্তি-বিবন্ধঘ্নম্| অগ্নিদীপ্তিরুচিকৃত্|

Adhikarana biDaguNAH (146-147) · Śloka 147

| ঊর্ধ্বাধঃকফবাতানুলোমনং দীপনং বিডম্||১৪৬|| বিবন্ধানাহবিষ্টম্ভশূলগৌরবনাশনম্| |১৪৭|

স০-বিডং ঊর্ধ্বংমধশ্চ কফবাতাননুলোমযতি| তথা, দীপনং বিবন্ধাদিঘ্নং চ|

Adhikarana sAmudraguNAH (147) · Śloka 147

| বিপাকে স্বাদু সামুদ্রং গুরু শ্লেষ্মবিবর্ধনম্||১৪৭||

স০-সামুদ্রং বিপাকে মধুরং গুরু কফবর্ধনং চ|

Adhikarana audBidaguNAH (148) · Śloka 148

সতিক্তকটুকক্ষারং তীক্ষ্ণমুত্ক্লেদি চৌদ্ভিদম্| |১৪৮|

স০-ভূমিমুদ্ভিদ্য যদ্ভবতি তদৌদ্ভিদম্, ঈষত্তিক্তকটুকক্ষারং তীক্ষ্ণমুত্ক্লেদি চ- দোষোত্ক্লিষ্টকরম্|

Adhikarana kRuShNalavaNaguNAH (148) · Śloka 148

| কৃষ্ণে সৌবর্চলগুণা লবণে গন্ধবর্জিতাঃ||১৪৮||

স০-কৃষ্ণে লবণে সৌবর্চলগুণাঃ-লঘুত্বাদযো, গন্ধেন বর্জিতাঃ-সৌগন্ধ্যরহিতাঃ, সন্তীতি শেষঃ|

Adhikarana romakalavaNaguNAHpAMsujaguNAH (149) · Śloka 149

রোমকং লঘু, পাংসূত্থং সক্ষারং শ্লেষ্মলং গুরু| |১৪৯|

স০-রোমকং লবণং লঘু| পাংসূত্থং-শিলালবণম্, ঈষত্ ক্ষারং শ্লেষ্মলং গুরু চ|

Adhikarana lavaNAnAM prayoge saindhavAdiprayojanam (149) · Śloka 149

| লবণানাং প্রযোগে তু সৈন্ধবাদি প্রযোজযেত্||১৪৯||

স০-লবণানাং প্রযোগে সৈন্ধবমাদি কৃত্বা প্রযোজযেত্-অন্যত্র প্রদেশে লবণানি দ্বিত্রাণি ত্রিচতুরাণি বা যত্র প্রযুজ্যন্তে তত্র সৈন্ধবমাদি কৃত্বা প্রযোজ্যানি| যথা-হিঙ্গ্বাদিচূর্ণে "দ্বিপটু" ইত্যুক্তম্| তত্র সৈন্ধবসৌবর্চলে প্রযোজ্যে| { যত্র ত্রযাণাং প্রযোগঃ, তত্র সৈন্ধবসৌবর্চলবিডানি| এবমৌদ্ভিদাদীনাং লবণবর্গে পঠিতানামন্যত্রাঽপি } বেদ্যম্| খরনাদে চোক্তম্-"সৈন্ধবং সারসং পাক্যং সৌবর্চলমথৌদ্ভিদম্| পূর্বং পূর্বং গুণোত্কৃষ্টমৌষ্ণ্যং তেষাং যথোত্তরম্|| ইতি|

Adhikarana yavakShAraguNAH (150) · Śloka 150

গুল্মহৃদ্গ্রহণীপাণ্ডুপ্লীহানাহগলামযান্| শ্বাসার্শঃকফকাসাংশ্চ শমযেদ্যবশূকজঃ||১৫০||

স০-যবশূকজো-যবক্ষারো, গুল্মাদীন্ শমযতি|

Adhikarana sAmAnyakShAraguNAH (151-152) · Śloka 152

ক্ষারঃ সর্বশ্চ পরমং তীক্ষ্ণোষ্ণঃ কৃমিজিল্লঘুঃ| পিত্তাসৃগ্দূষণঃ পাকী ছেদ্যহৃদ্যো বিদারণঃ||১৫১|| অপথ্যঃ কটুলাবণ্যাচ্ছুক্রৌজঃকেশচক্ষুষাম্| |১৫২|

স০-ক্ষারঃ সর্বশ্চ পরমং-অতিশযেন, তীক্ষ্ণোষ্ণঃ কৃমিজিত্ লঘুশ্চ| পিত্তাসৃজী দূষযতি| পাকী-পাককারী| ছেদী-মেদঃ শ্লেষ্মাদিগ্রন্থিঘ্নঃ| অহৃদ্যো-হৃদযায ন হিতঃ| বিদারণঃ পক্বগণ্ডাদীনাম্| কটুলাবণ্যাচ্ছুক্রাদীনামপথ্যঃ|

Adhikarana hi~gguguNAH (152-153) · Śloka 153

| হিঙ্গু বাতকফানাহশূলঘ্নং পিত্তকোপনম্||১৫২|| কটুপাকরসং রুচ্যং দীপনং পাচনং লঘু| |১৫৩|

স০-হিঙ্গু বাতাদিঘ্নং পিত্তকোপনং কট্বাদিগুণযুক্তং চ|

Adhikarana harItakIguNAH (153-157) · Śloka 157

| কষাযা মধুরা পাকে রূক্ষা বিলবণা লঘু||১৫৩|| দীপনী পাচনী মেধ্যা বযসঃ স্থাপনী পরম্| উষ্ণবীর্যা সরাঽঽযুষ্যা বুদ্ধীন্দ্রিযবলপ্রদা||১৫৪|| কুষ্ঠবৈবর্ণ্যবৈস্বর্যপুরাণবিষমজ্বরান্| শিরোঽক্ষিপাণ্ডুহৃদ্রোগকামলাগ্রহণীগদান্||১৫৫|| সশোষশোফাতীসারমেদমোহবমিক্রিমীন্| শ্বাসকাসপ্রসেকার্শঃপ্লীহানাহগরোদরম্||১৫৬|| বিবন্ধং স্রোতসাং গুল্মমূরুস্তম্ভমরোচকম্| হরীতকী জযেদ্ব্যাধীংস্তাংস্তাংশ্চ কফবাতজান্||১৫৭||

স০-হরীতকী কষাযা-কষাযরসা| কষাযরসত্বাত্কটুবিপাকিত্বং প্রাপ্তমিত্যাহ-মধুরা পাক ইতি| তথা, রূক্ষা| বিলবণেতি বচনং লবণং বর্জযিত্বা শেষাঃ পঞ্চরসা অস্যাঃ সন্তীতি বেদযতি| ননু, এবং কষাযেত্যনর্থকম্, যতঃ পঞ্চসু রসেষু লবণহীনেষু মধ্যে কষাযোঽনুপ্রবিষ্ট এব| অস্ত্যেবৈতত্| কষাযেত্যেতদতিশযখ্যাপনায, কষাযো রসোঽস্যাং বাহুল্যেনাস্তীত্যর্থঃ| তথা চ মুনিঃ (চ.চি.অ.১|২৯)-"হরীতকীং পঞ্চরসামুষ্ণাং বিলবণাং শিবাম্|" ইতি| তথা, লঘু| দীপনী-অগ্রেঃ| পাচনী-আমাদেঃ| মেধ্যা-মেধাযৈ হিতা| বযস ইত্যাদি,- কালকৃতা শরীরাবস্থা যৌবনাদির্বযস্তস্য, পরং-অতিশযেন, স্থাপনী-স্থিরীকরণী| উষ্ণেত্যেতাবতৈবোষ্ণবীর্যেত্যস্যার্থস্য লব্ধত্বাত্ বীর্যগ্রহণমতিশযোষ্ণবীর্যত্বখ্যাপনার্থম্| সরা- ভেদনী| তথা, আযুষে হিতা| বুদ্ধিঃ-বর্তমানার্থগ্রাহিণী প্রজ্ঞা, ইন্দ্রিযাণি-চক্ষুরাদীনি, তেষাং বলং প্রদদাতি যা সৈবম্| কুষ্ঠাদীন্ রোগান্ জযতি| খরনাদে ত্বেবমভ্যধাযি-"স্বাদ্বম্লভাবাত্পবনং, কটুতিক্ততযা কফম্| কষাযমধুরত্বাচ্চ পিত্তং হন্তি হরীতকী||" ইতি|

Adhikarana AmalakaguNAH (158) · Śloka 158

তদ্বদামলকং শীতমম্লং পিত্তকফাপহম্| |১৫৮|

স০-তযা-হরীতক্যা, তুল্যং বর্তত ইতি তৃতীযান্তাদ্বতিঃ| হরীতকীসমানগুণমামলকমিত্যর্থঃ| বিশেষং ত্বস্যাহ-অভযোষ্ণা ইদং শীতং,- শীতবীর্যম্| তথা, অম্লং-অম্লরসং, পিত্তকফঘ্নং চেতি| কৃষ্ণাত্রেযস্ত্বামলকং ত্রিদোষঘ্নমাখ্যত্| যথা-"অম্লভাবাজ্জযেদ্বাতং পিত্তং মাধুর্যশৈত্যতঃ| কফং রূক্ষকষাযত্বাদেবমেতত্ত্রিদোষনুত্||" সুশ্রুতেঽপি (সূ.অ.৪৬|১৪৩) ত্রিদোষঘ্নত্বমুক্তম্| তদ্গ্রন্থো হি-"চক্ষুষ্যং সর্বদোষঘ্নং বৃষ্যমামলকীফলম্| হন্তি বাতং তদম্লত্বাত্ পিত্তং মাধুর্যশৈত্যতঃ|| কফং রূক্ষকষাযত্বাত্ ফলেভ্যোঽভ্যধিকং তু তত্|" ইতি|

Adhikarana akShaguNAH (158) · Śloka 158

| কটু পাকে হিমং কেশ্যমক্ষমীষচ্চ তদ্গুণম্||১৫৮||

স০-অক্ষং-বিভীতকং, পাকে কটুকং শীতবীর্যং কেশেভ্যো হিতম্| তথা, ঈষতদ্গুণং,-তাভ্যাং-হরীতকীধাত্রীভ্যাং, সমানা গুণা যস্য তত্তদ্গুণং কিঞ্চিদক্ষম্| ননু, হরীতক্যাদীনাং স্থূলসূক্ষ্মাদিভেদেনানিযতস্বরূপত্বাত্কথমিবোপযোগঃ ক্রিযতাম্ ? ইতি কেচিত্| তান্ ব্রূমহে| অক্ষং তাবদত্র কর্ষপ্রমাণং গ্রাহ্যম্| তথা চ ধন্বন্তরিরাখ্যত্ (ধংইঘণ্টৌ ব.১|২৯২)-"বিভীতকঃ কর্ষফলো" ইত্যাদি| অন্বর্থা হীযং সংজ্ঞা| কর্ষং-কর্ষপ্রমাণং, ফলং যস্য স কর্ষফল ইতি| তদেবং বিভীতকস্য ফলং যত্কর্ষপ্রমাণং তদ্গ্রাহ্যমিত্যবতিষ্ঠতে| হরীতক্যা অপি প্রমাণং নিযতমেব| হরীতক্যা অপি প্রমাণং নিযতমেব| তন্ত্রান্তরেঽপ্যুক্তম্-"নবা স্নিগ্ধা ঘনা বৃত্তা গুর্বী ক্ষিপ্তা তথাঽম্ভসি| নিমজ্জেদ্যা প্রশস্তত্বাত্ গুণকৃত্সা প্রকীর্তিতা| নবাদিগুণযুক্তত্বং তথৈকত্বং দ্বিকর্ষতা| হরীতক্যাঃ ফলে যেনং তেনৈতচ্ছ্রেষ্ঠমুচ্যতে||" ইতি| তদেবং দ্বিকর্ষপ্রমাণত্বং হরীতক্যাঃ স্থিতম্| ধাত্রীফলস্যপি যুক্ত্যা নিযতপ্রমাণত্বমেব| তথা চোক্তং তন্ত্রান্তরে "অভযৈক প্রদাতব্যা দ্বাবেব তু বিভীতকৌ| ধাত্রীফলানি চত্বারি ত্রিফলেযং প্রকীর্তিতা|| ইতি| তদেবমামলকানামর্ধকর্ষপ্রমাণত্বমবতিষ্ঠতে| তস্মান্নিযতপ্রমাণত্বং ত্রিফলাযাঃ স্থিতম্|

Adhikarana triphalAguNAH (159) · Śloka 159

ইযং রসাযনবরা ত্রিফলাঽক্ষ্যামযাপহা| রোপণী ত্বগ্গ্দক্লেদমেদোমেহকফাস্ত্রজিত্||১৫৯||

স০-ইযং-ঈদৃশী, ত্রিফলা রসাযনবরা| চক্ষূরোগঘ্নী| রোপণী-ব্রণানাম্| ত্বগ্গদাঃ-কুষ্ঠাদযঃ, ক্লেদো-ব্রণাদীনাং স্রাবঃ মেদঃ-চতুর্থো ধাতুঃ, মেহঃ-প্রমেহঃ, কফঃ-শ্লেষ্মা, অস্রং-রক্তম্, তানি জযতি যা সৈবম্|

Adhikarana caturjAtaguNAH trijAtakaguNAH (160) · Śloka 160

সকেসরং চতুর্জাতং ত্বক্পত্রৈলং ত্রিজাতকম্| পিত্তপ্রকোপি তীক্ষ্ণোষ্ণং রূক্ষং রোচনদীপনম্||১৬০||

স০-দীপনরোচনমিত্যেতত্পর্যন্তম্| ত্বক্ চ পত্রং চৈলা চেতি দ্বন্দ্বৈকবদ্ভাবঃ| এতস্য নাম ত্রিজাতকং ত্রিসুগন্ধমিতি| এতত্ত্রিজাতকং কেসরযুক্তং চতুর্জাতকমিত্যুচ্যতে| তচ্চ পিত্তপ্রকোপিত্বাদিগুণম্| পিত্তপ্রকোপি তীক্ষ্ণাদিগুণযুক্তম্|

Adhikarana maricaguNAH (161) · Śloka 161

রসে পাকে চ কটুকং কফঘ্নং মরিচং লঘু| |১৬১|

স০-রসে পাকে চ কটুকং মরিচং কফঘ্নং লঘু চ| কটুরসত্বেন কটুপাকত্বে লব্ধে পাকগ্রহণ্মতিশযার্থম্|

Adhikarana pippalIguNAH (161-163) · Śloka 163

| শ্লেষ্মলা স্বাদুশীতাঽঽর্দ্রা গুর্বী স্নিগ্ধা চ পিপ্পলী||১৬১|| সা শুষ্কা বিপরীতাঽতঃ স্নিগ্ধা বৃষ্যা রসে কটুঃ| স্বাদুপাকাঽনিলশ্লেষ্মশ্বাসকাসাপহা সরা||১৬২|| ন তামত্যুপযুঞ্জীত রসাযনবিধিং বিনা| |১৬৩|

স০-আর্দ্রা-অশুষ্কা, পিপ্পলী শ্লেষ্মলা স্বাদুরসা শীতবীর্যা গুরুঃ স্নিগ্ধা চ| সা-পিপ্পলী, শুষ্কা অতঃ-আর্দ্রাযাঃ পিপ্পল্যাঃ সকাশাত্, বিপরীতা-শীতবিপর্যযেণোষ্ণা, গুরুবিপর্যযেণ লঘুঃ, স্নিগ্ধবিপর্যযস্ত্বত্র নাস্তি স্নিগ্ধেত্যুক্তত্বাত্| তথা, বৃষ্যা রসে কটুশ্চ| কটুরসত্বাচ্চ কটুপাকত্বং প্রাপ্তমিত্যাহ-স্বাদুপাকা| তথা, অনিলাদীন্ হন্তি, সরা চ| এবংবিধামপি তাং-পিপ্পলীং, নাত্যর্থং যুঞ্জীত, রসাযনবিধিং বিনা| পিপ্পলীং বর্ধমানাদিরসাযনবিধান এবাতিশযেনোপযুঞ্জীত|

Adhikarana nAgaraguNAH (163-164) · Śloka 164

| নাগরং দীপনং বৃষ্যং গ্রাহি হৃদ্যং বিবন্ধনুত্||১৬৩|| রুচ্যং লঘু স্বাদুপাকং স্নিগ্ধোষ্ণং কফবাতজিত্| |১৬৪|

স০-নাগরং-শ্রুঙ্গবেরং, দীপনাদিগুণযুক্তম্| গ্রাহি-বিড্বিবন্ধকৃত্| তথা, হৃদ্যম্| বিবন্ধনুত্-স্রোতঃশুদ্ধিকৃত্|

Adhikarana ArdrakaguNAH,trikaTukaguNAH (164-165) · Śloka 165

| তদ্বদার্দ্রকমেতচ্চ ত্রযং ত্রিকটুকং জযেত্||১৬৪|| স্থৌল্যাগ্নিসদনশ্বাসকাসশ্লীপদপীনসান্| |১৬৫|

স০-আর্দ্রকং শুণ্ঠীসমানগুণমেব| এতচ্চ ত্রযং-মরিচপিপ্পলীশুণ্ঠ্যাখ্যং, ত্রিকটুসংজ্ঞং স্থৌল্যাদীন্ জযেত্|

Adhikarana cavikApippalImUlayorguNAH (165) · Śloka 165

| চবিকাপিপ্পলীমুলং মরিচাল্পান্তরং গুণৈঃ||১৬৫||

স০-চবিকাপিপ্পলীমূলং মরিচাত্ স্তোকবিশেষং গুণৈর্ভবতি কটুরসবিপাকং কফঘ্নং লঘূষ্ণবীর্যং চেত্যর্থঃ| গুণশব্দেন রসবিপাকাদযোঽপি পারতন্ত্র্যাদ্গৃহ্যন্তে, ন তু পারিভাষিকা এব গুরুলঘ্বাদযঃ, ব্যাপ্তের্ন্যাযাত্|

Adhikarana citrakaguNAH (166) · Śloka 166

চিত্রকোঽগ্নিসমঃ পাকে শোফার্শঃকৃমিকুষ্ঠহা| |১৬৬|

স০-চিত্রকো-দহনসংজ্ঞঃ, অগ্নিসমঃ পাকে-অত্যন্তোষ্ণ ইত্যর্থঃ| তথা, শোফাদীন্ হন্তি|

Adhikarana pa~jcakolaguNAH (166-167) · Śloka 167

| পঞ্চকোলকমেতচ্চ মরিচেন বিনা স্মৃতম্||১৬৬|| গুল্মপ্লীহোদরানাহশূলঘ্নং দীপনং পরম্| |১৬৭|

স০-এতচ্চ-পূর্বোক্তং, মরিচরহিতং-পিপ্পলীপিপ্পলীমূলচব্যচিত্রকশুণ্ঠ্যাখ্যং, পঞ্চকোলসংজ্ঞং স্মৃতং বৈদ্যকে তন্ত্রে| তথা, গুল্মাদিঘ্নমতিদীপনং চ|

Adhikarana bRuhatpa~jcamUlaguNAH (167-168) · Śloka 168

| বিল্বকাশ্মর্যতর্কারীপাটলাটিণ্টুকৈর্মহত্||১৬৭|| জযেত্কষাযতিক্তোষ্ণং পঞ্চমূলং কফনিলৌ| |১৬৮|

স০-বিল্বাদীনামুপলক্ষণার্থে তৃতীযা| বিল্বাদিভিরুপলক্ষিতং মহত্পঞ্চমূলং কফানিলৌ জযেত্| তচ্চ কষাযতিক্তরসমুষ্ণবীর্যং চ| বিল্বং-শ্রীফলম্| কাশ্মর্যং-গম্ভারী| তর্কারী-অরণিকা| পাটলা-তাম্রপুষ্পা| টিণ্টুকঃ-স্যোনাকঃ| মহত্ গুরু বৃহত্ অনল্পমিতি পর্যাযাঃ|

Adhikarana hasvapa~jcamUlaguNAH (168-169) · Śloka 169

| হ্রস্বং বৃহত্যংশুমতীদ্বযগোক্ষুরকৈঃ স্মৃতম্||১৬৮|| স্বাদুপাকরসং নাতিশীতোষ্ণং সর্বদোষজিত্| |১৬৯|

স০-পঞ্চমূলমিতি বর্ততে| হৃস্বং কনীযো লঘু অল্পমিতি পর্যাযাঃ বৃহতীদ্বযং-ক্ষুদ্রবৃহতী মহাবৃহতী চ| অংশুমতীদ্বযং- শালিপর্ণী পৃশ্নিপর্ণী চ গোক্ষুরকো-ভক্ষটকঃ| ইদং হৃস্বং পঞ্চমূলং স্বাদুপাকরসং নাতিশীতং নাত্যুষ্ণং সর্বদোষজিচ্চ| [ গোক্ষুরাদিভিঃ পঞ্চভির্লঘু দ্বিতীযং পঞ্চমূলম্|]

Adhikarana madhyamapa~jcamUlaguNAH (169-170) · Śloka 170

| বলাপুনর্নবৈরণ্ডশূর্পপর্ণীদ্বযেন তু||১৬৯|| মধ্যমং কফবাতঘ্নং বাতিপিত্তকরং সরম্| |১৭০|

স০-বলাদিভিঃ পঞ্চভির্মধ্যমং পঞ্চমূলম্| এতচ্চ কফবাতঘ্নং নাতিপিত্তকরং সরং চ| { বলাদিভিঃ পঞ্চভিস্তৃতীযং পঞ্চমূলম্| } অধুনা চতুর্থং পঞ্চমূলমাহ-

Adhikarana jIvanAkhyapa~jcamUlaguNAH (170-171) · Śloka 171

| অভীরুবীরাজীবন্তীজীবকর্ষভকৈঃ স্মৃতম্||১৭০|| জীবনাখ্যং তু চক্ষুষ্যং বৃষ্যং পিত্তানিলাপহম্| |১৭১|

স০-অভীরুবীরাদিভিঃ পঞ্চভির্জীবনাখ্যং পঞ্চমূলং চক্ষুষ্যাদিগুণযুক্তম্|

Adhikarana tRuNasaMj~jakapa~jcamUlaguNAH (171-7) · Śloka 7

| তৃণাখ্যং পিত্তজিদ্দর্ভকাসেক্ষুশরশালিভিঃ||১৭১|| ইত্যৌষধবর্গঃ||৭||

স০-তৃণসংজ্ঞং পঞ্চমূলং দর্ভকাসেক্ষুশরশালিভিঃ| তচ্চ পিত্তজিত্| সঙ্গ্রহে ত্বধিকমুক্তম্ (সূ.অ.১২)| যথা-"সুবর্ণং বৃহণং স্নিগ্ধং মধুরং রসপাকযোঃ| বিষদোষহরং শীতং সকষাযং রসাযনম্| রূপ্যং স্নিগ্ধং কষাযাম্লং বিপাকে মধুরং সরম্| বযসঃ স্থাপনং শীতং লেখনং বাতপিত্তজিত্|| তাম্রং সতিক্তমধুরং কষাযং লেখনং লঘু| কটুপাকরসং শীতং রোপণং কফপিত্তজিত্|| কাংস্যং কষাযানুরসং বিশদং লেখনং সরম্| দৃষ্টিপ্রসাদনং রূক্ষং তিক্তং পিত্তকফাপহম্|| সতিক্তলবণং ভেদি পাণ্ডুত্বকৃমিবাতনুত্| লেখনং পিত্তলং কিঞ্চিত্ ত্রপু, সীসং চ তদ্গুণম্|| চক্ষুষ্যং কৃষ্ণলোহং তু কষাযং স্বাদু তিক্তকম্| লেখনং বাতলং শীতং কৃমিপিত্তকফপ্রণুত্|| (গাত্রশৈথিল্যপালিত্যপাণ্ডুঘ্নং শোষশোফজিত্| তদ্বত্তীক্ষ্ণং বিশেষেণ তদ্বিকাশি সুদুর্জরম্|| পদ্মরাগমহানীলপুষ্পরাগবিদূরকাঃ|) মুক্তাবিদ্গুমবজ্রেন্দ্রবৈডূর্যস্ফটিকাদিকম্|| মণিরত্নং সরং শীতং কষাযং স্বাদু লেখনম্| চক্ষুষ্যং ধারণাত্তত্তু পাপ্মাঽলক্ষ্মীবিষাপহম্|| সক্ষার উষ্ণবির্যশ্চ কাচো দৃষ্টিকৃদঞ্জনাত্| শঙ্খোদধিমলৌ শীতৌ কষাযাবতিলেখনৌ|| তুত্থকং কটু সক্ষারং কষাযং বিশদং লঘু| লেখনং ভেদি চক্ষুষ্যং কণ্ডূকৃমিবিষাপহম্|| বিশদো গৈরিকঃ স্নিগ্ধঃ কষাযমধুরো হিমঃ| কফঘ্নী তিক্তকটুকা মনোহ্বা লেখনী সরা|| স্নিগ্ধং কষাযকটুকং হরিতালং বিষপ্রণুত্| কষাযমধুরং শীতং লেখনং স্নিগ্ধমঞ্জনম্|| রক্তপিত্তবিষচ্ছর্দিহিধ্মাঘ্নং দৃক্প্রসাদনম্| স্রোতোঽঞ্জনং বরং তত্র ততঃ সৌবীরকাঞ্জনম্|| (সর্বদোষপ্রশমনং কাসমেহক্ষযাপহম্||) কফঘ্নমুষ্ণং কটুকং শিলাজতু রসাযনম্| (তিক্তং চ ছেদনং যোগবাহিত্বাত্সর্বরোগজিত্||) কষাযা মধুরা রূক্ষা কাসঘ্নী বংশরোচনা| তুগাক্ষীরী ক্ষযশ্বাসকাসঘ্নী মধুরা হিমা|| কারব্যৌ কুঞ্জিকাঽজাজী কবরী ধান্যতুম্বরু| অন্নগন্ধহরং রুচ্যং দীপনং কফবাতজিত্|| বাষ্পিকা কটুতিক্তোষ্ণা কৃমিশ্লেষ্মহরা পরম্| তদ্বচ্চ রাজিকা (বিঘ্নসাদনী দীপনী পরম্|| শূলাটোপহরা) রুচ্যা, দীপ্যকঃ কোষ্ঠশূলজিত্| অহৃদ্যাঃ সর্ষপাঃ স্নিগ্ধা বাষ্পিকাবত্প্রকীর্তিতাঃ|| শতাহ্বাকুষ্ঠতগরসুরদারুহরেণবঃ| এলৈলবালুসরলত্বগ্ব্যাঘ্রনখচোরকাঃ|| লঘূষ্ণাঃ কটুকাঃ পাকে কফবাতনিবর্হণাঃ| সৈর্যকস্তিক্তমধুরঃ স্নিগ্ধোষ্ণঃ কফবাতজিত্|| বস্তিমূত্রবিবন্ধঘ্নো বৃষ্যো গোক্ষুরকো হিমঃ| পাচনং কফপিত্তঘ্নং তিক্তং শীতং বিষাদ্বযম্|| কফঘ্নং তিক্তকটুকং মুস্তং সঙ্গ্রাহি পাচনম্| তিক্তাঽমৃতা ত্রিদোষঘ্নী গ্রাহিণ্যুষ্ণা রসাযনী|| দীপনী জ্বরতৃড্দাহকামলাবাতরক্তনুত্| তিক্তশীতৌ জ্বরহরৌ লঘূ ভূনিম্বপর্পটৌ|| নিম্বস্তিক্তো হিমঃ কুষ্ঠকৃমিপিত্তকফাপহঃ| মহানিম্বঃ পরং গ্রাহী কষাযো রূক্ষশীতলঃ|| গুগ্গুলুঃ পিচ্ছিলঃ স্পর্শে বিশদোঽভ্যবহারতঃ| সস্বাদুঃ সকটুস্তিক্তঃ সকষাযো রসাযনম্|| ব্রণ্যঃ স্বর্যঃ কটুঃ পাকে রূক্ষঃ সূক্ষ্মোঽগ্নিদীপনঃ| ক্লেদমেদোনিলশ্লেষ্মগণ্ডমেহাপচীকৃমীন্|| পিটিকাগ্রন্থিশোপাংশ্চ হন্ত্যুষ্ণঃ স্রংসনো লঘুঃ| শঙ্খপুষ্পী সরাতিক্তা মেধ্যা কৃমিবিষাপহা|| কটুতিক্তোষ্ণমগুরু স্নিগ্ধং বাতকফাপহম্| পিত্তাস্রবিষতৃড্দাহকৃমিঘ্নং গুরু রূক্ষণম্|| সর্বং সতিক্তমধুরং চন্দনং শিশিরং পরম্| লঘু রক্তং, তথোশীরং বাতলং পাচনং চ তত্| জ্বরাতিসারবমথুরক্তপিত্তকফাপহম্| মধুকং রক্তপিত্তঘ্নং ব্রণশোধনরোপণম্|| গুরু স্বাদু হিমং বৃষ্যং চক্ষুষ্যং স্বরবর্ণকৃত্| কটুতিক্তে নিশে কুষ্ঠমেহপিত্তকফাপহে|| প্রলেপাজ্জযতঃ কণ্ডূং শোফং দুষ্টব্রণং বিষম্| প্রপৌণ্ডরীকং চক্ষুষ্যং শিশিরং ব্রণরোপণম্|| কষাযমধুরং তিক্তং রক্তপিত্তপ্রসাদনম্| বলাত্রযং স্বাদু বৃষ্যং স্নিগ্ধং শীতং বলপ্রদম্|| তত্র নাগাঽধিকং বল্যা ক্ষতক্ষীণহিতা গুরুঃ| তাম্বূলং কটু সক্ষারং রুচ্যমুষ্ণং কফপ্রণুত্|| ভেদি সম্মোহকৃত্পূগং কষাযং স্বাদু রোচনম্| জাতিপত্রী কটুফলং কঙ্কোলকলবঙ্গকম্|| লঘু তৃষ্ণাপহং হৃদ্যং বক্ত্রদৌর্গন্ধ্যনাশনম্| সস্বাদুতিক্তস্তৃষ্ণাঘ্নঃ কর্পূরশ্ছেদনো হিমঃ|| লতাকস্তূরিকা তদ্বন্মুখশোষহরা পরম্| কষাযমধুরং শীতং পদ্মং পিত্তকফাস্ত্রজিত্|| তদ্বদ্বকুলপুন্নাগকুমুদোত্পলপাটলম্| সচম্পকং ততো ন্যূনং গুণৈঃ কোরণ্টকিংশুকম্|| মালতীমল্লিকাপুষ্পং তিক্তং জযতি মারুতম্| বিষপিত্তকফান্নাগং সিন্দুবারং চ তদ্গুণম্|| কফঘ্নং কৈতকং তিক্তং শৈরীষং বিষহারি চ| বাতলং পুষ্পমাগস্ত্যং কষাযং কফপিত্তজিত্|| বন্ধূকং শ্লেষ্মলং গ্রাহি তদ্বদেব চ যূথিকা| কফঘ্নমুষ্ণবীর্যং চ কুঙ্কুমং ব্রণশোধনম্|| অবল্গুজৈডগজজং বীজং বাতকফপ্রণুত্| আস্যা বর্ণশ্লেষ্মমেদঃসৌকুমার্যকৃদন্যথা|| অতোঽধ্বাঽগ্নিবলাযূংষি কুর্যাচ্চঙ্ক্রমণং সুখম্| মারুতস্যানুলোম্যং চ খুডস্তম্ভশ্রমাপহম্|| অন্বর্থসংজ্ঞং পাদত্রং বলকৃচ্ছুক্রলং তথা| বর্ণ্যং নেত্রহিতং ছত্রং বাতবর্ষাতপাপহম্|| প্রবাতং রৌক্ষ্যবৈবর্ণ্যস্তম্ভকৃদ্দাহতৃড্ভ্রমান্| শ্রমাগ্নিমূর্চ্ছাশ্চ জযেদপ্রবাতমতোঽন্যথা|| প্রাগ্বাযুরুষ্ণোঽভিষ্যন্দী ত্বগ্দোষার্শোবিষেকৃমীন্| সন্নিপাতজ্বরশ্বাসমামবাযুং চ কোপযেত্|| যাম্যোঽসৃগ্বাতকফকৃচ্ছীতঃ স্বাদুকষাযকঃ| কষাযঃ পশ্চিমো রূক্ষো লঘুর্নাতিবিদহ্যতে|| বাতকৃত্ কফপিত্তঘ্নো মূর্চ্ছাদাহভ্রমাপাহঃ| স্নিগ্ধঃ শীতো লঘুঃসাত্ম্য উত্তরঃ ষড্রসোঽনিলঃ|| ঐশানঃ কটুরূক্ষোষ্ণ আগ্নেযশ্চৈব মারুতঃ| অম্লো বিদাহী নৈঋত্যো বাযব্যস্তিক্ত উচ্যতে|| আতপো ভ্রমতৃট্স্বেদদাহমূর্চ্ছাবিবর্ণতাঃ| কুর্যাত্পিত্তাস্রবহ্নীংশ্চ, ছাযা ত্বেতান্ব্যপোহতি|| তমঃ কষাযকটুকং, জ্যোস্না মধুরশীতলা|| ইতি|

Adhikarana saMgrahashlokaH (96) · Śloka 6

শূকশিম্বীজপক্বান্নমাংসশাকফলৌষধৈঃ| বর্গিতৈরন্নলেশোঽযমুক্তো নিত্যোপযোগিকঃ||১৭২|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচি তাযমষ্টাঙ্গহৃদযসংহিতাযাং সূত্রস্থানেঽন্নস্বরূপবিজ্ঞানিযো নাম ষষ্ঠোঽধ্যাযঃ||৬||

স০-সম্প্রতি সুখগ্রহণধারণার্থং সঙ্গ্রহশ্লোকমাহ-স০-শূকধান্যাদিভির্বর্গিতৈঃ-বর্গীকৃতৈঃ, অযমন্নস্য লেশঃ-একদশঃ স্তোকমাত্রো, নির্দিষ্টঃ| কিম্ভূতঃ? নিত্যোপযোগো বিদ্যতে যস্য স নিত্যোপযোগিকঃ, সদোপযোগবানিত্যর্থঃ| মাত্রাযোগক্রিযাদেশকালাবস্থাদিবিশেষাচ্চোক্তানামপি দ্রব্যাণামন্যথাত্বং দৃষ্টম্| যথা-"তিলশো নিষেব্যমাণং বিষমপি সঞ্জাযতেঽমৃতসমানম্| ভল্লাতকঃ সহ তিলৈস্তত্কার্যপি কুষ্ঠমুপহন্তি|| সংস্কারেণ লঘুভ্যঃ সক্তুভ্যঃ সিদ্ধপিণ্ডিকা গুরবঃ| মরুবাসিষু তু সাত্ম্যং দধিপীলুশমীকরীরাণাম্|| ঘৃতদুগ্ধৈর্হেমন্তে মন্দাগ্নিঃ কফোত্তরো ভবেত্প্রাযঃ| দধিদুগ্ধং বাতঘ্নং তদজাতং বাতকৃদ্ভবতি|| রেচনমপি চ ক্ষীরং গব্যং সঙ্গ্রাহি কস্যচিদ্ভবতি|" ইতি| তস্মাদেবমাদি স্ববুদ্ধ্যৈবোহ্যম্| শাস্ত্রকৃতা তু গ্রন্থগৌরবভযাত্স্পষ্টং কৃত্বা নোক্তম্, প্রদেশান্তরেষু যুক্ত্যৈব প্রতিপাদিতমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গাসুন্দরাখ্যাযাং সূত্রস্থানেঽন্নস্বরূপাদিবিজ্ঞানীযোঽধ্যাযঃ ষষ্ঠঃ|| ৯৬||