2. dinacaryādhyāyaḥ

Adhikarana dinacaryAdhyAyaH (2) · Śloka 2

অথাতো দিনচর্যাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২||

স০-অথেতি সর্বেষ্বধ্যাযেষু মঙ্গলার্থঃ| তথা অত ইত্যানন্তর্যে প্রস্তুতাভিসম্বন্ধে বা| অথেত্যাদিশব্দানাং পূর্বাধ্যাযে বর্ণিত এবার্থঃ| মাঙ্গলিকো হ্যাচার্যঃ প্রত্যধ্যাযারম্ভে মঙ্গলার্থমথশব্দং প্রযুঙ্ক্তে| দিনে দিনে চর্যা দিনচর্যা, দিনস্য বা চর্যা দিনচর্যা| চরণং চর্যা| উভযলোকহিতমাহারবিহারচেষ্টিতমিতি যাবত্, প্রতিদিনে যত্কর্তব্যম্| দিনচর্যা যস্মিন্নধ্যাযেঽস্তীতি পূর্ববত্ ছপ্রত্যযমুত্পাদ্য তল্লোপে প্রকৃতিভাবত্বং চ প্রতিপাদ্য দিনচর্যেতি নিষ্পাদ্যতে, তমধ্যাযং ব্যাখ্যাস্যামঃ| ননু, প্রস্তুতাদাযুষ্কামীযাদধ্যাযাদনন্তরং কোঽস্য সম্বন্ধঃ ?| উচ্যতে| যস্মাদাযুষ্কামেণ পুরুষেণ যত্প্রধানমাযুষ্যং তদাসেব্যং প্রথমতঃ, তদন্বন্যানি যান্যাযুষ্যাণি| অতঃ প্রথমং তাবদাচারপ্রধানেন ভবিতব্যম্| যতঃ, "আচারাদাযুর্লভ্যতে" ইত্যাচার্যাঃ| যদ্যপ্যত্র রাত্রিচর্যাঽপি বিহিতা, তথাপি প্রাধান্যাদ্দিনচর্যা অস্মিন্নধ্যাযে নির্দিষ্টা| অতো দিনচর্যাধ্যাযোঽযমুচ্যতে|

Adhikarana brAhme muhUrta utthAnam (1) · Śloka 1

অস্মিংস্তন্ত্রে আযুঃপালনং প্রকৃতম্| তদ্বিবিধম্, স্বস্থবৃত্তমাতুরবৃত্তং চ| তত্র মঙ্গল্যত্বাত্ স্বল্পবক্তব্যত্বাদাতুরোপযোগিত্বাচ্চ স্বস্থবৃত্তমেবাদাবুচ্যতে ব্রাহ্মে মুহূর্ত উত্তিষ্ঠেত্স্বস্থো রক্ষার্থমাযুষঃ| |১|

স০-রাত্রেশ্চতুর্দশো মুহূর্তো ব্রাহ্মো মুহূর্তঃ, বিষুবতি সমরাত্রিংদিবে কালে দ্বিঘটিকোপলক্ষণঃ| মুহূর্তস্য চেহ দ্বিঘটিকোপলক্ষণার্থত্বাত্সর্বস্মিন্ কালে রাত্রেশ্চতুর্ঘটিকাবশেষে সমুত্থানং কার্যমিতি স্থিতম্| (স্বস্থো-নীরোগঃ কল্যঃ| স আযুষো যথোপচরিতস্য জীবিতস্য রক্ষার্থং ব্রাহ্মে মুহূর্ত উত্তিষ্ঠেদভ্যুত্থানং কুর্যাত্| মুহূর্তো-নাডিকাদ্বযম্| ব্রহ্ম-জ্ঞানং, তদর্থমধ্যযনাদ্যপি ব্রহ্ম, তস্য যোগ্যো মুহূর্তো ব্রাহ্মঃ, পশ্চিমযামস্য নাডিকাদ্বযম্|) তস্মিন্ ব্রাহ্মে মুহূর্ত উত্তিষ্ঠেত্| কিম্ভূতঃ ? স্বস্থোঽনাতুরঃ| (সুশ্রুতে সূ.অ.১৫/৪৮)- "সমদোষঃ সমাগ্নিশ্চ সমধাতুমলক্রিযঃ| প্রসন্নাত্মেন্দ্রিযমনাঃ স্বস্থ ইত্যভিধীযতে" ইতি স্বস্থলক্ষণম্| কিমর্থমুত্তিষ্ঠেত্ ? রক্ষার্থমাযুষো জীবিতস্য| তদা হ্যুত্তিষ্ঠতো ব্যাধ্যলক্ষ্ম্যাদ্যভাব এবাযুষো রক্ষা ভবতি| আতুরেণ ধাতুসাম্যার্থং স্বপ্তব্যমেব|

Adhikarana shaucavidhiH dantadhAvanam (1-3) · Śloka 3

| শরীরচিন্তাং নির্বর্ত্য কৃতশৌচবিধিস্ততঃ||১|| অর্কন্যগ্রোধখদিরকরঞ্জককুভাদিজম্| প্রাতর্ভুক্ত্বা চ মৃদ্বগ্রং কষাযকটুতিক্তকম্||২|| কনীন্যগ্রসমস্থৌল্যং প্রগুণং দ্বাদশাঙ্গুলম্| ভক্ষযেদ্দন্তপবনং দন্তমাংসান্যবাধযন্||৩||

স০-শরীরস্য চিন্তা শরীরচিন্তা- জীর্ণাজীর্ণনিরূপণাদিকা, তাং নির্বর্ত্য, ততো মূত্রপুরীষাদেঃ কৃতশৌচবিধানঃ, ততোঽনন্তরং দন্তপবনমর্কাদিকং ভক্ষযেত্| সঙ্গ্রহেঽপ্যুক্তম্ (সূ.অ.৩)- "ব্রাহ্মে মুহূর্ত উত্তিষ্ঠেজ্জীর্ণাজীর্ণং নিরূপযন্" ইত্যাদি| অর্কঃ- সূর্যাহ্বঃ| ন্যগ্রোধো- যক্ষাবাসঃ| খদিরো- গাযত্রী| করঞ্জশ্চিরিবিল্বঃ| ককুভোঽর্জুনঃ| আদিশব্দেন মালতীকরবীরাদিপরিগ্রহঃ| কথং ভক্ষযেত্ ? দন্তানাং মাংসান্যবাধযন্নপীডযন্| প্রাতঃ- প্রত্যুষসি, ভুক্ত্বা চ- আহারং ভক্ষযিত্বা চ| মৃদ্বগ্রং- কূর্চিতাগ্রম্| তথা কষাযকটুতিক্তম্, রসত্রযেণ হ্যনেন মুখবৈরস্যারোচকশ্লেষ্মাদ্যপনযাঃ সম্যক্ সম্পদ্যন্তে| অর্কাদ্যুপাদানাদেব কষাযাদিত্বে লব্ধে, কষাযাদিগ্রহণং সঙ্গ্রহাদিগৃহীতস্য সঙ্গ্রহার্থং স্পষ্টার্থং চ| অর্কাদিগ্রহণমুদাহরণার্থং জ্ঞেযম্| অত্র সংক্ষেপবিবক্ষযা ন দন্তপবনস্য গণসঙ্গ্রহঃ| দ্বাদশাদ্যঙ্গুলপ্রমাণত্বং শ্লেষ্মাতকাদ্যনিষ্টদন্তপবননিষেধশ্চ তন্ত্রান্তরোক্ত (সঙ্গ্রহোক্ত) মপি নেহোক্তম্| সুশ্রুতেনোক্তম্ (?) "অজগ্ধমনুপক্লিষ্টং ষডষ্টদ্বাদশাঙ্গুলম্| প্রদেশনীমুখসমং মৃদু স্যাদ্দন্তধাবনম্| কূর্চিতাগ্রং" ইত্যাদি|

Adhikarana dantadhAvananiShedhaH (4) · Śloka 4

নাদ্যাদজীর্ণবমথুশ্বাসকাসজ্বরার্দিতী| তৃষ্ণাস্যপাকহৃন্নেত্রশিরঃকর্ণামযী চ তত্||৪||

স০-অজীর্ণাদীনাং দ্বন্দ্বঃ| এতানি বিদ্যন্তে যস্যেতি 'অত ইনিঠনৌ' ইতি ইনিঃ| এবং তৃষ্ণাস্যেত্যাদৌ দ্বন্দ্বাদিনিশ্চ| তদ্দন্তপবনমজীর্ণী ন ভক্ষযেত্| এবং বমথ্বাদীনাং কর্ণাময্যন্তানাং সম্বন্ধো যোজ্যঃ|

Adhikarana sauvIrA~jjanam (5) · Śloka 5

সৌবীরমঞ্জনং নিত্যং হিতমক্ষ্ণোস্ততো ভজেত্| |৫|

স০-ততো-দন্তপবনভক্ষণানন্তরং, সৌবীরাখ্যমঞ্জনং ভজেত্| কস্মাত্ ? যতো হিতমক্ষ্ণোঃ|

Adhikarana rasA~jjanam (5-6) · Śloka 6

| চক্ষুস্তেজোমযং তস্য বিশেষাত্ শ্লেষ্মতো ভযম্||৫|| যোজযেত্সপ্তরাত্রেঽস্মাত্স্রাবণার্থং রসাঞ্জনম্| |৬|

স০-অস্মাত্কারণাত্, স্রাবণার্থং সপ্তরাত্রে সতি, রসাঞ্জনং দার্বীক্বাথসমুদ্ভবাখ্যং, যোজযেত্| যস্মাচ্চক্ষুস্তেজোমযমাগ্নেযম্| যদ্যপি পঞ্চমহাভূতাত্মকং সর্বমপি, তথাপি বাহুল্যেন ব্যপদেশাত্তেজোমযমুচ্যতে| অত এব তদ্রূপাণ্যালোচযতি| তথা চ লোকে কশ্চিদাহ-- "নরপতিরেতি" ইতি| ন চাসৌ নরাণামেব পতিঃ কিন্তর্হি নারীণামপীতি| তস্য হি চক্ষুষো বাতপিত্তাভ্যামপি ভযমস্তি, বিশেষেণ তু কফাদ্ভযম্, ততো রসাঞ্জনং যোজযেত্|

Adhikarana nasyAdisevanam (6) · Śloka 6

| ততো নাবনগণ্ডূষধূমতাম্বূলভাগ্ভবেত্||৬||

স০-নাবনাদীনাং গুণাঃ নস্যাদিবিধিষু বক্ষ্যমাণা বিধানং চ| তাম্বূলস্য তু বৈশদ্যারুচিহরত্বসৌগন্ধ্যাদিগুণাঃ প্রসিদ্ধা এব| নাবনাদীনাং তাম্বূলান্তানাং দ্বন্দ্বঃ| ততোঽঞ্জনাদনন্তরং, নাবনগণ্ডূষধূমতাম্বূলানি ভজতে যঃ স এবংবিধো ভবেত্| 'ভজো ণ্বিঃ' ইতি ণ্বিঃ|

Adhikarana tAmbUlaniShedhaH (7) · Śloka 7

যেষাং তু তাম্বূলমপথ্যং, তানাহ তাম্বূলং ক্ষতপিত্তাস্ররূক্ষোত্কুপিতচক্ষুষাম্| বিষমূর্চ্ছামদার্তানামপথ্যং শোষিণামপি||৭||

স০-ক্ষতং বিদ্যতে যেষাং তে ক্ষতাঃ| অর্শ আদিত্বাদচ্| এবং পিত্তাস্রা রূক্ষাশ্চ| উত্কুপিতমভিষ্যন্নং চক্ষুরেকং দ্বে বা যেষাং ত এবম্| ক্ষতাশ্চ পিত্তাস্রাশ্চ রূক্ষাশ্চোত্কুপিতচক্ষুষশ্চ, তেষামপথ্যমহিতম্| তথা বিষার্তানাং মূর্চ্ছার্তানাং মদার্তানাং শোষিণাং চ, ইত্যপিশব্দস্যার্থঃ| শোষিণো- রাজযক্ষ্মিণঃ|

Adhikarana aBya~ggaH (8) · Śloka 8

তদেতত্সর্বং বিধায, ভোজনাসন্নে কালেঽভ্যঙ্গ আচরণীয ইত্যাহ অভ্যঙ্গমাচরেন্নিত্যং, স জরাশ্রমবাতহা| দৃষ্টিপ্রসাদপুষ্ট্যাযুঃস্বপ্নসুত্বক্ত্বদার্ঢ্যকৃত্||৮||

স০-অভ্যঙ্গং নিত্যং সততমাচরেত্| নিত্যগ্রহণং চোপলক্ষণার্থম্| একদ্বিত্রিদিনান্তরমপি যথোদিতমাচরতো ন দোষঃ| সোঽভ্যঙ্গঃ, আচর্যমাণো জরা চ শ্রমশ্চ বাতশ্চ তান্ হন্তীতি ক্বিপ্| তথা দৃষ্টীত্যাদি| দৃষ্টেঃ প্রসাদো- বৈমল্যং দৃষ্টিপ্রসাদঃ| শোভনা চাসৌ ত্বক্ চ সুত্বক্, তস্যা ভাবঃ সুত্বক্ত্বম্| দৃঢস্য ভাবো দার্ঢ্যম্| "বর্ণদৃঢাদিভ্যঃ ষ্যঞ্চ" ইতি ষ্যঞ্| দৃষ্টিপ্রসাদাদীনাং দ্বন্দ্বঃ| তানি করোতি যোঽভ্যঙ্গঃ, স এবম্|

Adhikarana shirAdau visheSheNa shIlanam (9) · Śloka 9

শিরঃশ্রবণপাদেষু তং বিশেষেণ শীলযেত্| |৯|

স০-তমভ্যঙ্গম্, শিরঃশ্রবণপাদেষু, বিশেষেণাতিশযেন, শীলযেদভ্যসেত্, ইতি বচনাচ্চাবশ্যং ন তথা সর্বশরীরেঽভ্যঙ্গঃ কার্যঃ, যথৈতেষু শিরঃশ্রবণপাদেষু| অত্র চ পূর্ববদেকত্বাভাবঃ|

Adhikarana aBya~gganiShedhaH (9) · Śloka 9

অথেতদপবাদমাহ | বর্জ্যোঽভ্যঙ্গঃ কফগ্রস্তকৃতসংশুদ্ধ্যজীর্ণিভিঃ||৯||

স০-অভ্যঙ্গো বর্জ্যো- বর্জনীযঃ| কফগ্রস্তেন কৃতসংশুদ্ধিনা অজীর্ণিনা চ| গ্রস্তগ্রহণমতিশযপ্রতিপাদনার্থম্|

Adhikarana vyAyAmaH (10) · Śloka 10

লাঘবং কর্মসামর্থ্যং দীপ্তোঽগ্নির্মেদসঃ ক্ষযঃ| বিভক্তঘনগাত্রত্বং ব্যাযামাদুপজাযতে||১০||

স০-শরীরাযাসজননং কর্ম ব্যাযাম উচ্যতে| তস্মাত্পঞ্চগুণাঃ লাঘবাদযো নিষ্পদ্যন্তে| বিভক্তানি-বিভাগেন স্থিতানি, ঘনানি- দৃঢানি, গাত্রাণি যস্য স বিভক্তঘনগাত্রঃ, তস্য ভাবস্তত্ত্বমিতি|

Adhikarana vyAyAma niShedhaH (11) · Śloka 11

ইদানীং যেনাসৌ ন কার্যস্তং দর্শযতি বাতপিত্তামযী বালো বৃদ্ধোঽজীর্ণো চ তং ত্যজেত্| |১১|

স০-বাতপিত্তামযী, বালঃ- আষোডশাদ্বর্ষাত্, বৃদ্ধঃ- সপ্ততেরূর্ধ্বম্, অজীর্ণী চ, তং জহ্যাত্|

Adhikarana vyAyAmamAtrA,vyAyAmakAlaH (11-12) · Śloka 12

| অর্ধশক্ত্যা নিষেব্যস্তু বলিভিঃ স্নিগ্ধভোজিভিঃ||১১|| শীতকালে বসন্তে চ, মন্দমেব ততোঽন্যদা| |১২|

স০-তুরবধারণে| বলবদ্ভিঃ পুরুষৈঃ স্নিগ্ধভোজিভিরর্ধশক্ত্যৈব নিষেব্যো ব্যাযামঃ| প্রাক্ শ্রমাদ্বাযামবর্জনং কার্যমিত্যর্থঃ| কদাসৌ বিধাতব্যঃ ? ইত্যাহ- শীতকাল ইতি| হেমন্তে শিশিরে বসন্তে চ সেব্যঃ| শীতর্তুবসন্তাভ্যামন্যদা মন্দমেব সেব্যঃ| মন্দমিতি ক্রিযাবিশেষণম্| ক্রিযাবিশেষণানাং চ কর্মত্বমেকত্বং নপুংসকত্বং চ বক্তব্যমিতি|

Adhikarana dehamardanam (12) · Śloka 12

| তং কৃত্বাঽনুসুখং দেহং মর্দযেচ্চ সমন্ততঃ||১২||

স০-তং- ব্যাযামং, কৃত্বা, অনুসুখং- যথা শরীরে বাধা ন স্যাত্তথা, দেহং মর্দযেত্| সমন্ততঃ- পরিতঃ|

Adhikarana ativyAyAmaniShedhaH (13) · Śloka 13

তৃষ্ণা ক্ষযঃ প্রতমকো রক্তপিত্তং শ্রমঃ ক্লমঃ| অতিব্যাযামতঃ কাসো জ্বরশ্ছর্দিশ্চ জাযতে||১৩||

স০-অতিব্যাযামাত্তৃষ্ণাদযো ভবন্তি| তৃষ্ণেতি পৃথক্ পদম্| (তেন তৃষ্ণাদীনাং পদানামকৃতসমাসানাং নির্দেশো দোষদেশাদ্যনুরোধেনৈকস্য দ্বযোস্ত্রিচতুরাণাং বহুতরাণাং সর্বেষাং চাতি ব্যাযামব্যাপত্ত্বদ্যোতনার্থঃ|) অতিব্যাযামপ্রসঙ্গেনাতিজাগরাদীনামপি ব্যাপদো দর্শযতি-

Adhikarana ativyAyAmAdinA vyApadaH (14) · Śloka 14

ব্যাযামজাগরাধ্বস্ত্রীহাস্যভাষ্যাদি সাহসম্| গজং সিংহ ইবাকর্ষন্ ভজন্নতি বিনশ্যতি||১৪||

স০-ব্যাযামাদীনাং ভাষ্যান্তানাং দ্বন্দ্বঃ| তান্যাদির্যস্য সাহসস্য ধনুরাকর্ষণাদেস্তদেবম্| অযথাবলমারম্ভঃ সাহসম্, তদ্ভজন্সেবমানো বিনশ্যতি| ক ইব ? সিংহ ইব, সিংহো বিক্রমবানপ্যতিবলং গজপতিং মহাবর্ষ্মাণমাকর্ষন্নাক্রামন্ যথা বিনশ্যতি, তথাঽযথাবলমারব্ধেন ব্যাযামাদিনা নরো মার্যত ইতি|

Adhikarana udvartanaguNAH (15) · Śloka 15

উদ্বর্তনং কফহরং মেদসঃ প্রবিলাযনম্| স্থিরীকরণমঙ্গানাং ত্বক্প্রসাদকরং পরম্||১৫||

স০-উদ্বর্তনস্য কফহরাদযশ্চত্বারো গুণাঃ|

Adhikarana snAnaguNAH (16) · Śloka 16

দীপনং বৃষ্যমাযুষ্যং স্নানমূর্জাবলপ্রদম্| কণ্ডূমলশ্রমস্বেদতন্দ্রাতৃড্দাহপাপ্মজিত্||১৬||

স০-স্নানং দীপনং বৃষ্যামাযুষ্যং চ ভবতি| ঊর্জা- উত্সাহঃ, বলং- প্রাণঃ, এতে প্রদদাতি- করোতি যত্তদেবম্| কণ্ড্বিত্যাদি| কণ্ড্বাদীনাং দ্বন্দ্বঃ| এতান্ জযতি| স্নানস্য প্রভাবাদাযুষ্যত্ববৃষ্যত্বদীপনত্বানি বোদ্দব্যানি| অথবা স্নানেন প্রহর্ষো ভবতি, প্রহর্ষণত্বাচ্চ বৃষ্যত্বম্| তথা চ বক্ষ্যতি (উ.অ.৪০/৩৫)- "যত্কিঞ্চিন্মধুরং স্নিগ্ধং বৃংহণং বলবর্ধনম্| মনসো হর্ষণং যচ্চ তত্সর্বং বৃষ্যমুচ্যতে" ইতি| তথা, স্নানং জাঠরাগ্নের্বহির্নির্গতানি রোমকূপাশ্রিতান্যর্চীংষি রুদ্ধ্বাঽন্তর্নযতি, ততশ্চাগ্নেঃ প্রবলত্বং কুর্বদ্ দীপনং সম্পদ্যতে| যথা- শীতকালে শীতানিলস্পর্শসংরুদ্ধস্য জাঠরাগ্নেঃ প্রবলত্বম্| বালাদিত্যস্তু ব্যাচক্ষিষ্ট "স্নানেন ভ্রাজকাখ্যং ত্বগাশ্রিতং পিত্তমন্তঃ প্রবিশদূষ্মাণং সংবর্ধযতি, তেন তদ্দীপনম্"| অত এব পরিষেকে জলমুষ্ণমিষ্যতে| যস্মাচ্ছীতং নির্বাপযতি তেজো ন দেহস্যান্তঃ প্রবেশযতি| শীতকালে তু যচ্ছীতানিলস্পর্শসংরুদ্ধস্যাগ্নেঃ প্রবলত্বং তত্কাল এবং তস্মিন্, কালস্বাভাব্যাদিতি বোদ্ধব্যম্| তথা চান্যর্তৌ শীতে সতি মন্দাগ্নিত্বমেব দৃশ্যতে| যথা- বর্ষাসু| অগ্নিমান্দ্যাদেবাত্র হি বহ্নিসন্ধুক্ষণং ভোজনং সমুপদিষ্টম্| তথা চ মুনিঃ (চ.সূ.অ.৬/৩৬)- "ব্যক্তাম্ললবণস্নেহং বাতবর্ষাকুলেঽহনি| বিশেষশীতে ভোক্তব্যং বর্ষাস্বনিলশান্তযে" ইতি|

Adhikarana uShNaSItAmbusnAnaviShayaH (17) · Śloka 17

উষ্ণাম্বুনাঽধঃকাযস্য পরিষেকো বলাবহঃ| তেনৈব তূত্তমাঙ্গস্য বলহৃত্কেশচক্ষুষাম্||১৭||

স০-উষ্ণাম্বুনা অধঃকাযস্য পরিষেকো বলাবহঃ- প্রাণকৃত্| তেনৈবোষ্ণোদকেনৈব, উত্তমাঙ্গস্য- শিরসঃ, পরিষেকো বিধীযমানঃ কেশচক্ষুষাং বলহৃত্| প্রাণ্যঙ্গানাং সমাহার এব দ্বন্দ্ব ইত্যস্য প্রাযিকত্বাত্কেশচক্ষুষামিত্যুপপন্নমেব|

Adhikarana snAnaniShedhaH (18) · Śloka 18

স্নানং যেষামপথ্যম্, তান্ দর্শযিতুমাহ স্নানমর্দিতনেত্রাস্যকর্ণরোগাতিসারিষু| আধ্মানপীনসাজীর্ণভুক্তবত্সু চ গর্হিতম্||১৮||

স০-নেত্রে চাস্যং চ কর্ণৌ চ তত্র রোগাঃ| অর্দিতং চ নেত্রাস্যকর্ণরোগাশ্চাতিসারশ্চ তে বিদ্যন্তে যেষাং ত এবম্| তেষু গর্হিতমহিতম্| এবং শেষেষু যোজ্যম্| আধ্মানাদীনাং দ্বন্দ্বস্ততো মতুপ্| তেন আধ্মানবত্সু গর্হিতমিতি যোজ্যম্| এবং শেষেষ্বপি|

Adhikarana jIrNe hitaBojanamvegodIrNadhAraNaniShedhaH vyAdhyupeScAniShedhaH (19) · Śloka 19

জীর্ণো হিতং মিতং চাদ্যান্ন বেগানীরযেদ্বলাত্| ন বেগিতোঽন্যকার্যঃ স্যান্নাজিত্বা সাধ্যমামযম্||১৯||

স০-জীর্ণে- সম্যক্পরিণতে পূর্ব আহারে, অদ্যাত্- ভুঞ্জীত| কিমদ্যাত্ ? হিতং- পথ্যম্| মিতং- মাত্রযা যুক্তম্| পথ্যমপি হ্যতিমাত্রং হীনমাত্রং বা ভুক্তং দোষায স্যাত্, অতো মিতম্| ন বেগানিত্যাদি| বাতবিণ্মূত্রাদীনাং সম্বন্ধিনো বেগাননুন্মুখীভূতান্ বলান্নৈরযেন্ন প্রবর্তযেত্| ন বেগিত ইত্যাদি| সঞ্জাতবাতবিণ্মূত্রবেগস্তমকৃত্বা নান্যকার্যঃ স্যাত্| নান্যত্কার্যং কুর্যাদিত্যর্থঃ| নাজিত্বেত্যাদি| সাধযিতুং শক্যঃ সাধ্যঃ, তং রোগমজিত্বা নান্যকার্যঃ স্যাদিতি যোজ্যম্| স হ্যুপেক্ষিতো দুঃসাধ্যোঽসাধ্যো বা স্যাত্| সাধ্যশব্দোপাদানাদসাধ্যামযং প্রতি যত্নো ন কার্যঃ, চিকিত্সানৈষ্ফল্যাদিতি দ্যোতযতি|

Adhikarana dharmaprAdhAnyam (20) · Śloka 20

সুখার্থাঃ সর্বভূতানাং মতাঃ সর্বাঃ প্রবৃত্তযঃ| সুখং চ ন বিনা ধর্মাত্তস্মাদ্ধর্মপরো ভবেত্||২০||

স০-সর্বভূতানামশেষপ্রাণিনাং, যস্মাত্সুখার্থাঃ প্রবৃত্তযঃ- কর্মাণি, মতাঃ- অভিপ্রেতাঃ| সুখং চ শর্মাখ্যং, ধর্মাদ্বিনা ন ভবতি, তস্মাত্কারণাত্, ধর্মপরো- ধর্মপ্রধানঃ, স্যাত্| ধর্মাদিতি "পৃথগ্বিনা" ইতি পঞ্চমী|

Adhikarana mitrAmitrANAM svIkAraparityAgau (21) · Śloka 21

ভক্ত্যা কল্যাণমিত্রাণি সেবেতেতরদূরগঃ| |২১|

স০-কল্যাণে- শুভকর্মণি, মিত্রাণি- সহাযাঃ, উপদেশাদিনা কল্যাণমিত্রাণি, তানি ভক্ত্যা- অদম্ভমতিঃ সন্, ভজেত্| ইতরাণি- কল্যাণমিত্রাপেক্ষযেতরাণি পাপমিত্রাণি, তেভ্যো দূরগস্তদ্বর্জনপরঃ| তত্সঙ্গো হি দৃষ্টাদৃষ্টানর্থকরঃ| দূরগ ইত্যত্র "অন্তাত্যন্তাধ্বদূরপারসর্বানন্তেষু ডঃ" ইতি ডঃ|

Adhikarana hiMsAdipApaniShedhaH (21-22) · Śloka 22

| হিংসাস্তেযান্যথাকামং পৈশুন্যং পরুষানৃতে||২১|| সম্ভিন্নালাপং ব্যাপাদমভিধ্যাং দৃগ্বিপর্যযম্| পাপং কর্মেতি দশধা কাযবাঙ্মনসৈস্ত্যজেত্||২২||

স০-হিংসা- প্রাণ্যুপঘাতঃ, স্তেযং- চৌর্যম্, অন্যথাকামো- নিষিদ্ধকামসেবা পশুস্ত্রীগুরুদারগমনাদি, এতত্ত্রিবিধং কাযিকং পাপং কর্ম| পৈশুন্যং- পরেষাং ভেদকৃদ্বচনম্, পরুষমমৃদুবচনম্, অনৃতসত্যবচনম্, সম্ভিন্নালাপোঽসম্বদ্ধপ্রলপনম্, চতুর্বিধমেতদ্বাচিকম্| ব্যাপাদঃ- প্রাণ্যুপঘাতচিন্তা, অভিধ্যা- পরগুণাদ্যসহিষ্ণুতা, বিষযস্পৃহা বা. দৃগ্বিপর্যযং- শাস্ত্রদৃষ্টিবৈপরীত্যং নাস্তিকত্বাদি, ত্রিবিধমেতন্মানসম্| তদেতদ্ধিংসাদি দশধা পাপং কর্ম কাযবাঙ্মনসৈস্ত্যজেন্ন কুর্যাদিত্যর্থঃ|

Adhikarana shaktito~avRutyAdyAnuvartanam (23) · Śloka 23

অবৃত্তিব্যাধিশোকার্তাননুবর্তেত শক্তিতঃ| |২৩|

স০-ন বিদ্যতে বৃত্তির্যেষাং তানবৃত্তীন্| শক্তিতঃ- যথাসামর্থ্যম্, অনুবর্তেত- অনুকূলং গচ্ছেত্| তথা, ব্যাধিনা শোকেন চার্তাংশ্চ|

Adhikarana kITAdiShvAtmavaddarshanam (23) · Śloka 23

| আত্মবত্সততং পশ্যেদপি কীটপিপীলিকম্||২৩||

স০-কীটান্ পিপীলিকাংশ্চাত্মবত্পশ্যেত্| স্বশরীরতুল্যানিত্যর্থঃ| কিমুত সাধূনসাধূংশ্চ| কীটপিপীলিকমপ্যাত্মবত্পশ্যেদিত্যপিশব্দস্যার্থঃ| কীটপিপীলিকমিতি "ক্ষুদ্রজন্তবঃ" ইত্যেকত্বম্|

Adhikarana devAdyarcanam (24) · Śloka 24

অর্চযেদ্দেবগোবিপ্রবৃদ্ধবৈদ্যনৃপাতিথীন্| |২৪|

স০-দেবাদীনাং দ্বন্দ্বঃ| দেবাদীনর্চযেত্| বৃদ্ধাঃ- জ্ঞানবৃদ্ধাঃ শীলতপোবৃদ্ধাশ্চ| নৃপো- রাজা| অতিথিঃ- অসমানগ্রামী বৈশ্বদেবান্তে সমুপস্থিতঃ|

Adhikarana yAcakadveShaniShedhaH (24) · Śloka 24

| বিমুখান্নার্থিনঃ কুর্যান্নাবমন্যেত নাক্ষিপেত্||২৪||

স০-অর্থিনো- যাচকান্, প্রত্যাখ্যানেন বিমুখান্ন কুর্যাত্| নাবমন্যেত্- নাবমানযেত্| ন চ পরুষবচনাদিনা আক্ষিপেত্- পরিভবেত্|

Adhikarana paropakAraH (25) · Śloka 25

উপকারপ্রধানঃ স্যাদপকারপরেঽপ্যরৌ| |২৫|

স০-অরৌ শত্রাবপকারপরেঽপি সত্যুপকারপ্রধানঃ স্যাত্| ননু, রিপুরপকারক এব, তত্কিমপকারপর ইতি বিশেষণেন| তথা চ মাঘঃ (সর্গঃ ২/৩৭)- "উপকর্ত্রারিণা সন্ধির্ন মিত্রেণাপকারিণা| উপকারাপকারৌ হি লক্ষ্যং লক্ষণমেতযোঃ" ইতি| উচ্যতে| ন হি সর্বদৈবারিরপকারং কর্তুং শক্যঃ স্যাত্, কিং তর্হি কদাচিদেব| হেত্বাদ্যধীনত্বাদপকারকারিত্বস্য| বাতাদিদোষবত্| যথা- বাতাদযো দোষা দূষণস্বভাবা অপি সন্তঃ কদাচিদ্বিকারকারিত্বে সমর্থা ভবন্তি কদাচিন্নৈব| দোষত্বং তু সর্বদৈব তেষাম্| তস্মাদপকারপর ইতি যুক্তং বিশেষণম্| অপকারিণ্যুপকারকৃত্স্যাত্ কিং পুনরুপকারক ইত্যপিশব্দার্থঃ|

Adhikarana sampadAdau samacittatA, IrShyAniShedhaH (25) · Śloka 25

| সম্পদ্বিপত্স্বেকমনা, হেতাবীর্ষ্যেত্ফলে ন তু||২৫||

স০-সম্পত্সু বিপত্সু চৈকমনাঃ- সমচিত্তঃ| সম্পত্সু হর্ষেণ, বিপত্সু বিষাদাদিনা, ন ভাব্যমিত্যর্থঃ| হেতাবিত্যাদি| হেতৌ- কারণে, ঈর্ষ্যেত্| যথা- অযমেবং শ্রুতত্যাগাদিগুণবান্ কস্মাত্, কস্মাদহমপ্যেবং ন ভবেযম্| ফলে ন তু- পরকীযে শোভনে ফলে বস্ত্রালঙ্কারাদিকে নের্ষ্যেত্|

Adhikarana BAShaNam (26) · Śloka 26

কালে হিতং মিতং ব্রূযাদবিসংবাদি পেশলম্| |২৬|

স০-কালে- প্রস্তাবে, হিতং- পথ্যম্, মিতং- ন বহু, অবিসংবাদি- সত্যম্, পেশলং- মনোজ্ঞং, ব্রূযাত্|

Adhikarana sadvartanaprakAraH (26-27) · Śloka 27

| পূর্বাভিভাষী, সুমুখঃ সুশীলঃ করুণামৃদুঃ||২৬|| নৈকঃ সুখী, ন সর্বত্র বিশ্রব্ধো, ন চ শঙ্কিতঃ| |২৭|

স০-পূর্বাভিভাষী- পূর্বালাপী, স্যাত্| সুমুখো- গতভ্রুকুটিঃ| সুশীলঃ- শোভনস্বভাবঃ| তথা, করুণযা মৃদুরার্দ্রসন্তানো মাতেব পুত্রে| একোঽদ্বিতীযঃ সন্সুখী ন স্যাত্| তথা, সর্বত্র- সর্বস্মিন্ জনে, বিশ্রব্ধো- বিশ্বস্তো, ন স্যাত্| তথা চ ভগবান্ ব্যাসঃ- "মাযাচারে মাযযা বর্তিতব্যম্" ইতি| তথা, সর্বত্র- মিত্রস্বজনাদিষ্বপি, শঙ্কিতোঽবিশ্বস্তো, ন স্যাত্, তেষাং বৈমুখ্য- দোষপ্রসঙ্গভযাত্|

Adhikarana shatrutvAderaprakAshanam (27-28) · Śloka 28

| ন কঞ্চিদাত্মনঃ শত্রুং নাত্মানং কস্যচিদ্রিপুম্||২৭|| প্রকাশযেন্নাপমানং ন চ নিঃস্নেহতাং প্রভোঃ| |২৮|

স০-আত্মনঃ শত্রুং কঞ্চিদপি ন প্রকাশযেত্| তত্প্রকাশনাদ্ধিঃ ভেদঃ স্যাত্| নাত্মানং কস্যচিদ্রিপুং প্রকাশযেত্| পূর্বোক্তাদেব হেতোঃ| অপমানং- অসত্কারং, কস্যচিন্ন প্রকাশযেত্| প্রভোঃ স্বামিনঃ সম্বন্ধিনীং নিঃস্নেহতাং ন প্রকাশযেত্| তত্প্রকাশনাদসৌ প্রভুর্জাতাবসরৈর্ভেদকৈঃ সুতরাং নিঃস্নেহীক্রিযতে|

Adhikarana lokaprakRutyanusAreNa vartanam (28-29) · Śloka 29

| জনস্যাশযমালক্ষ্য যো যথা পরিতুষ্যতি||২৮|| তং তথৈবানুবর্তেত পরারাধনপণ্ডিতঃ| |২৯|

স০-জনস্যাশযমালক্ষ্য- লোকস্য অভিপ্রাযং বুদ্ধ্বা পরিচ্ছিদ্য, যো জনো যথা পরিতুষ্যতি তথা তেনৈব প্রকারেণ দানপ্রিযবচনাদিনা তমনুবর্তেতারাধযেত্| কীদৃশো ভূত্বা ? পরারাধনে পণ্ডিতস্তজ্জ্ঞঃ|

Adhikarana indriyANAM lAlanapIDananiShedhaH (29) · Śloka 29

ন পীডযেদিন্দ্রিযাণি ব চৈতান্যতি লালযেত্||২৯||

স০-ইন্দ্রিযাণি- রসনাদীনি, কদন্নাশনাদিনা ন পীডযেন্ন নিগৃহ্ণীযাত্| ন চৈতানীন্দ্রিযাণ্যতি লালযেদতিশযেন বিলাসযেত্|

Adhikarana trivargashUnyakarmAnAramBaH (30) · Śloka 30

ত্রিবর্গশূন্যং নারম্ভং ভজেত্তং চাবিরোধযন্| |৩০|

স০-ত্রযাণাং ধর্মার্থাকামানাং বর্গস্ত্রিবর্গঃ, তেন শূন্যং- রহিতং, আরম্ভমুদ্যমং, ন ভজেত্- ন কুর্যাত্| কথং ভজেত্ ? তং চ ত্রিবর্গমবিরোধযন্- পরস্পরমবাধযন্|

Adhikarana sarvadharmaiShu madhyamamArgAnuvartanam nIcaromatvAdikam (30) · Śloka 30

| অনুযাযাত্প্রতিপদং সর্বধর্মেষু মধ্যমাম্||৩০||

স০-সর্বধর্মেষু মধ্যমাং প্রতিপদং প্রতিপত্তিমনুযাযাত্- সর্বেষ্বাচারেষু মধ্যমং মার্গমনুবর্তেত| নৈকত্রাসক্তিং কুর্যাদিত্যর্থঃ|

Adhikarana nIcaromatvAdikam snAnashIlAdiH (31) · Śloka 31

নীচরোমনখশ্মশ্রুর্নির্মলাঙ্ঘ্রিমলাযনঃ| স্নানশীলঃ সুসুরভিঃ সুবেষোঽনুল্বণোজ্জ্বলঃ||৩১||

স০-নীচান্যদীর্ঘাণি রোমনখশ্মশ্রূণি যস্য স এবংভূতো ভবেত্| রোমাণি- বাহূরুপ্রভৃতিষু রোমাণি কেশাশ্চোচ্যন্তে| তথা চ "হৃষের্লোমসু" ইত্যত্র সূত্রে বিবৃতম্- 'লোমানি মূর্ধজান্যঙ্গজানি চেহ গৃহ্যন্তে' ইতি| নীচলোমাদিকফলং চ মুনিনোক্তম্ (চ.সূ.অ.৫/৯৬)- "পৌষ্টিকং ধন্যমাযুষ্যং শুচি রূপবিরাজনম্| কেশলোমনখাদীনাং কৃন্তনং সম্প্রসাধনম্" ইতি| তথাঙ্ঘ্রী- পাদৌ| মলাযনানি- ঘ্রাণকর্ণাদীনি| নির্মলান্যঙ্ঘ্রিমলাযনানি যস্য স এবম্| অস্য চ ফলম্ (চ.সূ.অ.৫/৯৫)-- "মেধ্যং পবিত্রমাযুষ্যমলক্ষ্মীকলিনাশনম্| পাদযোর্মলমার্গাণাং শৌচাদানমভীক্ষ্ণশঃ" ইতি| স্নানং শীলযতীতি স্নানশীলো- নিত্যস্নাযী স্যাত্| তথা, সুসুরভিঃ- সুগন্ধিঃ| শোভনো জীর্ণমলিনবস্ত্রাদিবিবর্জিতো বেষো যস্য স সুবেষঃ| অনুল্বণোঽনুদ্ধতঃ, স চাসাবুজ্জ্বলশ্চানুল্বণোজ্জ্বলঃ| অনুদ্ধতবেষঃ উজ্জ্বলশ্চ স্যাদিত্যর্থঃ|

Adhikarana ratnAdidhAraNam (32) · Śloka 32

ধারযেত্সততং রত্নসিদ্ধমন্ত্রমহৌষধীঃ| |৩২|

স০- ধারযেদিত্যাদি| রত্নানি- মণযো বজ্রপদ্মরাগাদযঃ| সিদ্ধমন্ত্রোঽপরাজিতাদিঃ| মহৌষধিঃ- সহদেব্যাদিকা| রত্নাদীনাং দ্বন্দ্বঃ| রত্নাদীর্বাহুগ্রীবাদিষু, সততং- সদৈব, ধারযেত্|

Adhikarana sa~jcAraprakAraH (32) · Śloka 32

| সাতপত্রপদত্রাণো বিচরেদ্যুগমাত্রদৃক্||৩২||

স০-যুগমাত্রদৃগ্বিচরেদ্ভ্রমেত্| যুগং- হস্তচতুষ্টযম্, তত্পশ্যতি যঃ স এবম্| এবং কুর্বন্সম্মুখমাগচ্ছদ্ভির্গবাশ্বাদিভির্নোপদ্রূযতে| তথা, সহাতপত্রেণ- ছত্রেণ, পদত্রাণেন- পদাধারপর্যাযেণ, যো বর্ততে স এবম্| পাদত্রচ্ছত্রযোশ্চ গুণা উক্তাঃ- "মারুতস্যানুলোম্যায খুডস্তম্ভশ্রমাপহম্| অন্বর্থসংজ্ঞং পাদত্রং বলদৃক্শুক্ররক্ষণম্| বর্ণ্যং নেত্রহিতং ছত্রং বাতবর্ষাতপাপহম্" ইতি|

Adhikarana nishi sa~jcAre visheShaH (33) · Śloka 33

নিশি চাত্যযিকে কার্যে দণ্ডী মৌলী সহাযবান্| |৩৩|

স০-রাত্রৌ চাত্যযিকে কার্যে দণ্ডী সন্ বিচরেত্| দণ্ডেন সর্পাদীনামুত্ত্রাসমপি চোক্তম্| তথা (সুশ্রুতে চি.অ.২৪/৭৬)- "শুনঃ সরীসৃপব্যালবিষাণিভ্যো ভযাপহম্| শ্রমস্খলনদোষঘ্নং স্থবিরে চ প্রশস্যতে| সত্বোত্সাহবলস্থৈর্যধৈর্যবীর্যবিবর্ধনম্| অবষ্টম্ভকরং চাপি ভযঘ্নং দণ্ডধারণম্||" ইতি| তথা চ (চরকে সূ.অ.৫/৯৯)- "স্খলতঃ সম্প্রতিষ্ঠানং শত্রূণাং চ নিষূদনম্| অবষ্টম্ভনমাযুষ্যং ভযঘ্নং দণ্ডধারণম্" ইতি| মৌলীশিরোবেষ্টনযুক্তঃ| অনেনোপরিষ্টাত্ পততাং পতঙ্গকীটাদিমূত্রপুরীষাদীনাং রক্ষা| তথা, সহাযবান্| অনেনাপি চিত্তাবষ্টম্ভঃ| দণ্ডশব্দাত্ "অত ইনিঠনৌ" ইতি ইনিঃ, মৌলিশব্দাচ্চ ব্রীহ্যাদিত্বাত্, তস্য হ্যাকৃতিগণত্বমিতি কেচিত্| আত্যযিক ইতি| অত্যযঃ- কৃচ্ছ্রম্| তস্মিন্ ভবমিত্যধ্যাত্মাদিত্বাঠ্ঠঞ্|

Adhikarana caityAdicchhAyAdyAkramaNaniShedhaH (33-34) · Śloka 34

| চৈত্যপূজ্যধ্বজাশস্তচ্ছাযাভস্মতুষাশুচীন্||৩৩|| নাক্রামেচ্ছর্করালোষ্টবলিস্নানভুবো ন চ| |৩৪|

স০-চৈত্যো- বিশিষ্টদেবতাধিষ্ঠিতো লোকপ্রসিদ্ধো বৃক্ষবিশেষঃ, বুদ্ধালয ইত্যন্যে| পূজ্যো- গুরুপিত্রাদিঃ| ধ্বজশ্চিহ্নম্| অশস্তাশ্চণ্ডালাদযঃ, অশস্তমমঙ্গল্যং বস্তু ইত্যন্যে| এষাং ছাযাম্| তথা, ভস্ম-ভূতিঃ| তুষো- ধান্যাদিত্বক্| অশুচির্বিট্, যদ্বা উচ্ছিষ্টং বস্তু| তদেতন্নাক্রামেত্| শর্করা- সূক্ষ্মপাষাণাকৃতির্মৃত্খণ্ডিকা| তথা, লোষ্টং- মৃত্পিণ্ডাদিখণ্ডঃ| বলির্দেবতাদ্যর্চনম্| স্নানং প্রসিদ্ধম্| বলিশ্চ স্নানং চ বলিস্নানে, তযোর্ভুবৌ বলিস্নানভুবৌ| শর্করা চ লোষ্টং চ বলিস্নানভুবৌ চ তা নাক্রামেত্|

Adhikarana bAhuByAM nadItaraNaniShedhAdi (34-35) · Śloka 35

| নদীং তরেন্ন বাহুভ্যাং, নাগ্নিস্কন্ধমভিব্রজেত্||৩৪|| সন্দিগ্ধনাবং বৃক্ষং চ নারোহেদ্দুষ্টযানবত্| |৩৫|

স০- নদীং- তরঙ্গিণীং, দোর্ভ্যাং ন তরেত্| অগ্নিস্কন্ধমভি- অগ্নিরাশেরভিমুখং, ন ব্রজেত্| সন্দিগ্ধা চাসৌ নৌশ্চ তাং, নারোহেন্নোচ্চলেত্| সন্দিগ্ধাযাঃ শিথিলবন্ধনত্বাজ্জর্জরত্বাদতিভারাক্রান্তত্বাত্পারগমনং প্রতি সন্দেহঃ| চেতি সমুচ্চযে| বৃক্ষং চ নারোহেত্| কথম্ ? দুষ্টযানবত্| যথা দুষ্টযানমশ্বাদিকং নারোহেত্ তথেতি| দুষ্টযানারোহণমপি চোক্তযাঽনযা নিষিদ্ধম্|

Adhikarana kShutyAdikaraNaprakAraH (35) · Śloka 35

| নাসংবৃতমুখঃ কুর্যাত্ক্ষুতিহাস্যবিজৃম্ভণম্||৩৫||

স০-নাসংবৃতাস্যঃ ক্ষুত্যাদীন্ কুর্যাত্| হস্তাদিনা মুখং পিধায কুর্যাদিত্যর্থঃ| ক্ষুতিঃ- ছিক্কা, হাস্যং- হসনম্, বিজৃম্ভণং- জৃম্ভিকা, এষাং সমাহারদ্বন্দ্বঃ|

Adhikarana nAsAvikoShaNaniShedhAdi (36) · Śloka 36

নাসিকাং ন বিকুষ্ণীযান্নাকস্মাদ্বিলিখেদ্ভুবম্| নাঙ্গৈশ্চেষ্টেত বিগুণং, নাসীতোত্কটকশ্চিরম্||৩৬||

স০-নাসাং ন বিকর্ষেত্| মলোত্সারণমাত্রং তু কার্যমেব, ইতি বিশব্দেন দ্যোতযতি| অকস্মাত্- কারণং বিনা, ভুবং- পৃথ্বীং, ন বিলিখেত্- নোত্কর্ষেত্| অঙ্গৈর্হস্তপাদাদিভিঃ, বিগুণং- অননুগুণং যথা ভবতি তথা, ন চেষ্টেত- ন ব্যাপ্রিযেত| উত্কটকং স্থিতমবস্থানং যস্য স এবম্ভূতো নাসীত| চিরং চ তিষ্ঠেদিত্যর্থঃ, অর্শোরোগাদ্যুত্পত্তেঃ|

Adhikarana SramAtprAgdohavAkceShTAH (37) · Śloka 37

দেহবাক্চেতসাং চেষ্টাঃ প্রাক্ শ্রমাদ্বিনিবর্তযেত্| নোর্ধ্বজানুশ্চিরং তিষ্ঠেত্|৩৭|

স০-দেহাদীনাং দ্বন্দ্বঃ| এষাং সম্বন্ধিনীশ্চেষ্টাঃ ক্রিযাঃ শ্রমাত্খেদাত্ পূর্বং বিনিবর্তযেত্| তাবদ্ধনুরাকর্ষাদি কুর্যাদ্যাবন্নাতীব শ্রমঃ স্যাদিত্যর্থঃ| তথা, ঊর্ধ্বে জানুনী যস্য স ঊর্ধ্বজানুশ্চিরং নাসীত|

Adhikarana rAtrau drumAdisevananiShedhaH,sUnAdisevananiShedhaH (37-38) · Śloka 38

নক্তং সেবেত ন দ্রুমম্||৩৭|| তথা চত্বরচৈত্যান্তশ্চতুষ্পথসুরালযান্| সূনাটবীশূন্যগৃহশ্মশানানি দিবাঽপি ন||৩৮||

স০-নক্তং- রাত্রৌ, দ্রুমং- তরুং, ন সেবেত| তদাশ্রিতকীটমূত্রশকৃদাদিপাতরক্ষার্থম্| চত্বরং- ত্রিপথম্| অন্যে ত্বাহুঃ- "যত্র প্রদেশে নগরনিবাসিনো গ্রাম্যা বা সমেত্য নানাবিধাঃ কথাঃ কুর্বন্তি, স চত্বর উচ্যতে"| চৈত্যান্তঃ- চৈত্যসমীপম্, চতুষ্পথং- মার্গচতুষ্টযসঙ্গমঃ, সুরালযো- দেবগৃহম্, এতাংশ্চ নক্তং ন সেবেত| সূনা- বধস্থানম্, অটবী- নির্জনো দেশঃ, শূন্যগৃহং- উজ্জটং ভবনম্, শ্মশানং- পিতৃবনম্, এতানি দিবাঽপি ন সেবেত| অপি শব্দেন রাত্রৌ নিতরামসেবনমাহ|

Adhikarana udyadAdityadarshananiShedhAdi (39) · Śloka 39

সর্বথেক্ষেত নাদিত্যং, ন ভারং শিরসা বহেত্| নেক্ষেত প্রততং সূক্ষ্মং দীপ্তামেধ্যাপ্রিযাণি চ||৩৯||

স০-আদিত্যং সর্বথা- উদ্যন্তমস্তং যান্তং প্রতিমাগতমুপরক্তং বা, নেক্ষেত| তথা, ভারং শিরসা ন চ বহেন্ন নযেত্| প্রততং- অনবরতং, সূক্ষ্মং বস্তু নেক্ষেত| দীপ্তং চামেধ্যং চাপ্রিযং চ তানি প্রততং নেক্ষেত| ননু, তর্হি সর্বথা নেক্ষেতেত্যনেন কোঽর্থঃ ? যতো রবিরপি দীপ্তঃ, দীপ্তগ্রহণেনৈবাস্য দর্শননিষেধঃ সিদ্ধঃ| অস্ত্যেবৈতত্| কিন্তু সর্বপ্রকারমাদিত্যং নেক্ষেত| দীপ্তং ত্বনবরতং নেক্ষেতেতি|

Adhikarana madyavikrayAdiniShedhaH (40) · Śloka 40

মদ্যবিক্রযসন্ধানদানাদানানি নাচরেত্| |৪০|

স০-বিক্রযো- বিনিমযঃ, ইযত্প্রমাণমধুনেদং দীযত ইতি| সন্ধীযতে যেন তত্সন্ধানম্- অনেকদ্রব্যসম্ভারো যেন তত্- মদ্যং যথাবত্প্রমাণেন সন্ধীযতে| দানং- যথাশাস্ত্রং স্বত্বনিবৃত্তিঃ পরস্বত্বাপাদানম্| আদানং- যথাশাস্ত্রমেব পরস্মাদ্ গ্রহণম্| এতেষাং দ্বন্দ্বঃ| ততো মদ্যশব্দেন ষষ্টীসমাসঃ| মদ্যবিক্রযাদীনি নাচরেত্| দ্বিজবিষযং চৈতদ্বাক্যমিতি বোধ্যম্| সর্বস্য তু নিষেধাত্ ক্রযাদিব্যবহারোচ্ছেদঃ স্যাত্|

Adhikarana purovAtAdityAgAdi (40-44) · Śloka 44

| পুরোবাতাতপরজস্তুষারপরুষানিলান্||৪০|| অনৃজুঃ ক্ষবথূদ্গারকাসস্বপ্নান্নমৈথুনম্| কূলছাযাং নৃপদ্বিষ্টং ব্যালদংষ্ট্রিবিষাণিনঃ||৪১|| হীনানার্যাতিনিপুণসেবাং বিগ্রহমুত্তমৈঃ| সন্ধ্যাস্বভ্যবহারস্ত্রীস্বপ্নাধ্যযনচিন্তনম্||৪২|| শত্রুসত্রগণাকীর্ণগণিকাপণিকাশনম্| গাত্রবক্ত্রনখৈর্বাদ্যং হস্তকেশাবধূননম্||৪৩|| তোযাগ্নিপূজ্যমধ্যেন যানং ধূমং শবাশ্রযম্| মদ্যাতিসক্তিং বিশ্রম্ভস্বাতন্ত্র্যে স্ত্রীষু চ ত্যজেত্||৪৪||

স০-ত্যজেদিতি ক্রিযা বক্ষ্যমাণা| পুরঃশব্দস্য বাতাতপাভ্যাং প্রত্যেকং সম্বন্ধঃ| পুরোবাতঃ- পূর্বদিগাগতো বাতঃ| পুর আতপঃ- পূর্বাতপঃ| পুরোবাতাদীন্ পঞ্চ ত্যজেত্| অনৃজুঃ- বিষমস্থিতশরীরঃ, ক্ষবথ্বাদীন্ ষট্ ত্যজেত্| অনৃজ্বিতি ক্রিযাবিশেষণমিতি কেচিহ্যাচক্ষতে| অন্নমত্র শাল্যাদি| কূলং- বপ্রঃ, তচ্ছাযাং ত্যজেত্| তত্র হি তিষ্ঠতস্তত্পাতাদ্ভযং স্যাত্| নৃপদ্বিষ্টং- রাজ্ঞোঽপ্রিযং, ত্যজেত্| ব্যালো- দুষ্টহস্ত্যাদিঃ, দংষ্ট্রিণঃ- সর্পাদ্যাঃ, বিষাণিনো- গবাদ্যাঃ, তাংস্ত্যজেত্| হীনাঃ- কুলশীলবিত্তাদিভির্ন্যূনাঃ, অনার্যাঃ- অসাধবঃ, অতিনিপুণাঃ- অতিগণনাপরাঃ, তেষাং সেবাং ত্যজেত্| উত্তমৈরিতি সহার্থে গম্যমানে তৃতীযা| উত্তমৈঃ সহ বিগ্রহং ত্যজেত্| সন্ধ্যাস্বভ্যবহারাদীন্ পঞ্চ ত্যজেত্| শত্রুসত্রেত্যাদি| শত্র্বশনং ত্যজেত্| সত্রং- যজ্ঞঃ, তস্যাশনং ত্যজেত্| ঋত্বিজাদীন্ বর্জযিত্বা, অন্যস্য হি তদশনং নিষেধতি| তথা হি- "যজ্ঞান্তে তদুদ্ভূতপাপোপশমনীযং প্রাযশ্চিত্তং শ্রূযতে"| গণাঃ- কথকচারণাদযঃ, তৈরাকীর্ণং- ব্যাপ্তমশনং ত্যজেত্| গণিকা- বেশ্যা, তস্যাঃ সম্বন্ধ্যশনং ত্যজেত্| তদশনাদ্ধি তপ্তাপসঙ্ক্রমণং স্যাত্| পণিকঃ- পণোপজীবী, ইতরবণিগিত্যর্থঃ| (তথা হি (সঙ্গ্রহে সূ. অ, ৩)- "গণারিগণিকাসত্রধূর্তানাং পণিনাং ন চ " ইতি|) পণিকা ইতি "নৌদ্ব্যচষ্ঠন্" ইতি ঠন্| পণিকো হি পাপীযান্নিন্দ্রিতপণ্যাদিবিক্রীণানঃ প্রশংসতীত্যাদি হেতোঃ| গাত্রেত্যাদি| গাত্রাণি-অঙ্গানি, তৈস্তথা বক্ত্রেণ নখৈশ্চ বাদ্যং ত্যজেত্| তথা, হস্তাবধূননং কেশাবধূননং চ ত্যজেত্| (অবধূননং-কম্পনম্|) তোযেত্যাদি| মধ্যশব্দঃ প্রত্যেকং সম্বধ্যতে| তোযযোর্দ্বযোর্মধ্যেন যানং ত্যজেত্| ন যাযাদিত্যর্থঃ| এবমগ্ন্যোর্মধ্যেন| তথা, পূজ্যযোর্মধ্যেন| সমাসকরণাত্তোযাগ্ন্যোস্তোযপূজ্যযোরগ্নিপূজ্যযোরপি মধ্যেন ন যাযাদিতি বোদ্ধব্যম্| তথা, ধূমং , শবাশ্রযং-শবোদ্ভূতং, ত্যজেত্| মধ্যেত্যাদি| মধ্যেঽতিসক্তিঃ- অতিসেবা, তাং ত্যজেত্| স্ত্রীষু-যোষাসু, বিশ্রম্ভং-বিশ্বাসং স্বাতন্ত্র্যং চ ত্যজেত্|

Adhikarana sarvaceShTAsu lokopadeShTRutvam (45) · Śloka 45

আচার্যঃ সর্বচেষ্টাসু লোক এব হি ধীমতঃ| অনুকুর্যাত্তমেবাতো লৌকিকেঽর্থে পরীক্ষকঃ||৪৫||

স০-হি-যস্মাত্, ধীমতো- বুদ্ধিযুক্তস্য, সর্বচেষ্টাসু- নিঃ- শেষব্যাপারেষু, লোক এবাচার্যঃ- উপদেষ্টা, অতঃ- অস্মাদ্ধেতোঃ, তমেব- লোকমেব, লৌকিকেঽর্থে পরীক্ষকঃ পুরুষোঽনুকুর্যাত্| যথা লোকো ব্যবহরতি তথা ব্যবহ্নিযাদিত্যর্থঃ|

Adhikarana sadvratasvarUpam (46) · Śloka 46

আর্দ্রসন্তানতা ত্যাগঃ কাযবাক্চেতসাং দমঃ| স্বার্থবুদ্ধিঃ পরার্থেষু পর্যাপ্তমিতি সদ্ব্রতম্||৪৬||

স০-আর্দ্রসন্তানতা- সর্বসত্ত্বেষু কৃপালুত্বম্| ত্যাগো- দানম্| কাযবাক্চেতসা ত্রযাণাং দমঃ- উপশমঃ| পরার্থেষু- পরপ্রযোজনেষু, স্বার্থবুদ্ধিঃ- যথা অযমেব স্বার্থো যঃ পরার্থঃ, ইত্যুভযলোকহিতত্বম্| ইতি- এবংপ্রকারং, সদ্ব্রতং পর্যাপ্তম্| সমাপ্তমিত্যর্থঃ| সত্ শোভনং চ তদ্ব্রতং চ সদ্ব্রতম্|

Adhikarana AcArAvahitatvam (47) · Śloka 47

নক্তংদিনানি মে যান্তি কথম্ভূতস্য সম্প্রতি| দুঃখভাঙ্ন ভবত্যেবং নিত্যং সন্নিহিতস্মৃতিঃ||৪৭||

স০-নক্তংদিনানি- রাত্রিদিনানি, সম্প্রতি- ইদানীং, কথম্ভূতস্য- কীদৃশস্য সতঃ, মে- মম, যান্তি| এবং নিত্যং সন্নিহিতস্মৃতিঃ সন্ পুমান্ দুঃখভাক্ ন ভবতি|

Adhikarana AcAraphalam (2) · Śloka 2

ইত্যাচারঃ সমাসেন, যং প্রাপ্নোতি সমাচরন্| আযুরারোগ্যমৈশ্বর্যং যশো লোকাংশ্চ শাশ্বতান্||৪৮|| ইতি শ্রীবৈদ্যপতিসিংহগুপ্তসূনু শ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দিনচর্যা নাম দ্বিতীযোঽধ্যাযঃ||২||

স০- ইতি- সমাপ্তৌ| সমাসেন- সংক্ষেপেণ, তাবদযমাচারঃ পূর্বোক্তঃ| যং সমাচরন্ননুতিষ্টন্ (পুরুষঃ) আযুরাদীন্ প্রাপ্নোতি| তথা, লোকান্- ভূর্ভুবঃস্বঃপ্রভৃতীন্, শাশ্বতান্- নিত্যান্| ননু, শাশ্বতশব্দো ন যুক্তঃ| যতঃ শশ্বচ্ছব্দস্য কালবাচিত্বাত্ "কালাঠ্ঠঞ্" ইতি ঠঞ্ প্রাপ্নোতি| তথা, "অব্যযানাং চ সাযম্প্রাতিকাদ্যর্থমুপসংখ্যানম্" ইতি টিলোপশ্চ প্রাপ্নোতি| নৈতদস্তি| "নস্তদ্ধিতে" ইত্যত্র সূত্রে হ্যুক্তম্- "শাশ্বত ইত্যাদৌ তু টিলোপো নেষ্যতে| কালাদিতি যোগবিভাগাচ্চাণ্" ইতি| তস্মাচ্ছাশ্বতশ্ব্দো ন্যায্য এবেতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দ্বিতীযোঽধ্যাযঃ সমাপ্তঃ|| ২||