11. dōśāhivijñānīyādhyāyaḥ

Adhikarana adhyAyopakramaH · Śloka

রসভেদীযাদনন্তরং দোষাদিবিজ্ঞানীয আরভ্যতে| যতো "দোষভেষজবশাদুপযোজ্যাঃ" ইত্যুক্তম্, অত ঈদৃক্স্বরূপাস্তে দোষা ইতি জ্ঞাপনার্থমধ্যাযোঽযমুচ্যতে-

Adhikarana doShAdivij~jAnIyAdhyAyaH (2) · Śloka 2

রসভেদীযাদনন্তরং দোষাদিবিজ্ঞানীয আরভ্যতে| যতো "দোষভেষজবশাদুপযোজ্যাঃ" ইত্যুক্তম্, অত ঈদৃক্স্বরূপাস্তে দোষা ইতি জ্ঞাপনার্থমধ্যাযোঽযমুচ্যতে - - - - অথাতো দোষাদিবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-দোষা আদযো যেষাং তে-দোষাদযঃ, তেষাং বিজ্ঞানং-প্রাকৃতেন বৈকৃতেন চ স্বরূপেণা ৯ বগমঃ, তস্মৈ হিতো যঃ, তমধ্যাযং ব্যাখ্যাস্যামঃ| আদিশব্দেন ধাতবো মলাশ্চ সঙ্গ্রহ্যন্তে| তত্স্বরূ ১০ পাবগমেন চ ত এব দোষাঃ সম্যগ্জ্ঞাতা ভবন্তি| ধাতূনাং মলানাং চ দোষাধারভূতত্বাত্|

Adhikarana dehasya mUlaM doShAdayaH (1) · Śloka 1

দোষধাতুমলা মূলং সদা দেহস্য--| |১|

স০-দোষাঃ-বাতাদযঃ, ধাতবো-রসাদযঃ, মলাঃ-মূত্রাদযঃ, তে দেহস্য মূলমিব মূলম্| যথা,-বৃক্ষস্য স্কন্ধশাখাদিযুক্তস্য মূলং প্রধানম্, তদারব্ধত্বাত্| তথা,-দেহস্য দোষধাতুমলাঃ|

Adhikarana vAyoH sAmyalakShaNam, pittasya sAmyalakShaNam, shcleShmaNaH sAmyalakShaNam (1-3) · Śloka 3

তং চলঃ| উত্সাহোচ্ছ্বাসনিশ্বাসচেষ্টাবেগপ্রবর্তনৈঃ||১|| সম্যগ্গত্যা চ ধাতূনামক্ষাণাং পাটবেন চ| অনুগৃহ্ণাত্যবিকৃতঃ, পিত্তং পক্ত্যূষ্মদর্শনৈঃ||২|| ক্ষুত্তৃড্রুচিপ্রভামেধাধীশৌর্যতনুমার্দবৈঃ| শ্লেষ্মা স্থিরত্বস্নিগ্ধত্বসন্ধিবন্ধক্ষমাদিভিঃ||৩||

স০-তং চ-দেহং, চলো-বাযুঃ, উত্সাহাদিভিরনুগৃহ্ণাতি-উপকুরুতে| উত্সাহঃ-সর্বচেষ্টাসূদ্যোগঃ, উচ্ছ্বাসঃ-ঊর্ধ্বং শ্বসনং শ্বাসমুক্তিঃ, নিশ্বাসঃ-শ্বাসস্য শরীরান্তঃ প্রবেশনম্, চেষ্টনং-চেষ্টা বাক্কাযমনোব্যাপারঃ, বেগানাং প্রবর্তনং-বাতবিণ্মূত্রাদীনাং বহির্নিরসনম্, এতৈশ্চ মারুতো দেহমনুগৃহ্ণাতি| পিত্তং পক্ত্যাদিভিরনুগৃহ্ণাতি| পক্তিঃ-পাকঃ| ঊষ্মা-ঔষ্ণ্যম্| দর্শনং-দৃষ্টিঃ| মেধা-বুদ্ধিবিশেষঃ| ধীঃ-প্রজ্ঞা| শৌর্যং-পৌরুষম্| তনুমার্দবং-শরীরমৃদুত্বম্| শ্লেষ্মা স্থিরত্বাদিভিরনুগৃহ্ণাতি| ক্ষমা-ক্ষান্তিঃ|

Adhikarana dhAtUnAM shreShThakarmANi (4) · Śloka 4

ইদানীং ধাতূনাং কর্মাণ্যাহ - - - - প্রীণনং জীবনং লেপঃ স্নেহো ধারণপূরণে| গর্ভোত্পাদশ্চ ধাতূনাং শ্রেষ্ঠং কর্ম ক্রমাত্স্মৃতম্||৪||

স০-প্রীণনাদীনি কর্মাণি রসাদীনাং ক্রমাত্-ক্রমেণ শ্রেষ্ঠানি স্মৃতানি, মুনিভিরিতি শেষঃ| সঙ্গ্রহোক্তানি মধ্যমান্যপরাণি কর্মাণ্যেষাং সন্ত্যেব| যথা,-রসস্য তুষ্টিরক্তপুষ্ট্যাদিকং কর্ম, রক্তস্য চ বর্ণপ্রসাদো মাংসপোষণম্, মাংসস্য বলং মেদঃপুষ্টী চ মেদসঃ স্বেদদার্ঢ্যাস্থিপুষ্টযশ্চ, অস্থ্নো মজ্জপোষণম্, মজ্জ্ঞো বলমস্থিপূরণং শুক্রপুষ্টিশ্চ, শুক্রস্য হর্ষো বলং চ, এতৈর্ধাতবো দেহমনুগৃহ্ণন্তীত্যর্থঃ| প্রীণনং-আপ্যাযনম্| রসো হি সম্যগভ্যবহরতঃ স্রোতাংসি প্রবিশ্যেন্দ্রিযপ্রসাদমভিনির্বর্তযন্ মনসঃ প্রীতিমাদধাতি| জীবনং-ওজোবৃদ্ধিকরম্, রক্তকর্ম| লেপঃ-উপদেহো, মাংসস্য কর্ম| তদুপলিপ্তান্যস্থীনি চেষ্টাং ক্ষমন্তে| স্নেহো-নেত্রাদিষু স্নিগ্ধতা, মেদসঃ কর্ম| ধারণং-ঊর্ধ্বধারণম্, অস্থিকর্ম| পূরণং-স্নেহেনাস্থ্নাম্, মজ্জ্ঞঃ কর্ম| শুক্রস্য গর্ভোত্পত্তিঃ, শ্রেষ্ঠং কর্মেতি যোজ্যম্|

Adhikarana malAnAM karmANi (5) · Śloka 5

ইদানীং মলানাং কর্মাণ্যাহ - - - - অবষ্টম্ভঃ পুরীষস্য, মূত্রস্য ক্লেদবাহনম্| স্বেদস্য ক্লেদবিধৃতিঃ|৫|

স০-অবষ্টম্ভো-দেহধারণশক্তিঃ, শ্রেষ্ঠং কর্ম পুরীষস্য স্মৃতম্| মূত্রস্য ক্লেদবাহনং শ্রেষ্ঠং কর্ম, মূত্রং ক্লেদং নির্বাহযতি| স্বেদস্য ক্লেদবিধারণং শ্রেষ্ঠং কর্ম, ক্লেদাভাবে হি শোষঃ স্যাত্, মধ্যমত্বক্ঽঽস্নেহকচরোমধারণমপি|

Adhikarana vRuddhavAyoH karmANi (5-6) · Śloka 6

| বৃদ্ধস্তু কুরুতেঽনিলঃ||৫|| কার্শ্যকার্ষ্ণ্যোষ্ণকামত্বকম্পানাহশকৃদ্গ্রহান্| বলনিদ্রেন্দ্রিযভ্রংশপ্রলাপভ্রমদীনতাঃ||৬||

স০-বৃদ্ধঃ পুনর্বাযুঃ কার্শ্যাদীন্ করোতি| বলাদীনাং ভ্রংশেন সম্বন্ধঃ| বলস্য প্রাণোপঘাতো ভ্রংশঃ| নিদ্রাযাস্তু নাশো ভ্রংশঃ|

Adhikarana vRuddhapittasya karmANi (7) · Śloka 7

পীতবিণ্মূত্রনেত্রত্বক্ক্ষুত্তৃড্দাহাল্পনিদ্রতাঃ| পিত্তম্|৭|

স০-পীতস্য বিডাদিভিস্ত্বগন্তৈঃ সম্বন্ধঃ, ততঃ ক্ষুদাদিভির্দ্বন্দ্বঃ, ততস্তলপ্রত্যযঃ| পিত্তং বৃদ্ধং পীতবিণ্মূত্রাদীন্ করোতি|

Adhikarana vRuddhashleshmaNaH karmANi (7-8) · Śloka 8

| শ্লেষ্মাঽগ্নিসদনপ্রসেকালস্যগৌরবম্||৭|| শ্বৈত্যশৈত্যশ্লথাঙ্গত্বং শ্বাসকাসাতিনিদ্রতাঃ| |৮|

স০-শ্লেষ্মা বৃদ্ধোঽগ্নিসাদাদীন্ করোতি| শ্বৈত্যং- গাত্রশুক্লতা| শৈত্যং-অঙ্গানাং শিশিরত্বম্|

Adhikarana vRuddharasasya karmANi (8) · Śloka 8

| রসোঽপি শ্লেষ্মবত্|৮|

স০-রসশ্চ শ্লেষ্মবত্, রসোঽপি বৃদ্ধোঽগ্নিসাদাদীন্ বিদধাতীত্যর্থঃ|

Adhikarana vRuddharaktasya karmANi (8-9) · Śloka 9

| রক্তং বিসর্পপ্লীহবিদ্রধীন্||৮|| কুষ্ঠবাতাস্রপিত্তাস্রগুল্মোপকুশকামলাঃ| ব্যঙ্গাগ্নিনাশসম্মোহরক্তত্বঙ্নেত্রমূত্রতাঃ||৯||

স০-রক্তং বৃদ্ধং বিসর্পাদীন্ করোতি| উপকুশো নাম দন্তরোগজাতিঃ, উত্তরতন্ত্রে (অ. ২১|২১) বক্ষ্যমাণলক্ষণা|

Adhikarana vRuddhamAMsasya karmANi (10) · Śloka 10

মাংসং গণ্ডার্বুদগ্রন্থিগণ্ডোরূদরবৃদ্ধিতাঃ| কণ্ঠাদিষ্বধিমাংসং চ|১০|

স০-মাংসং বৃদ্ধং গণ্ডাদীন্ রোগান্ করোতি| গণ্ডশব্দেন গণ্ডমালা গলগণ্ডশ্চ গৃহীতৌ, আদ্যন্তলোপাত্| ইতরশ্চ গণ্ডো গণ্ডমাংসাঢ্যাত্| গণ্ডশ্চার্বুদং চ গ্রন্থিশ্চ গণ্ডার্বুদগ্রন্থযঃ| গণ্ডৌ চ ঊরূ চোদরং চ তেষাং বৃদ্ধিতা| ততো দ্বন্দ্বঃ| তাঃ করোতি| বৃদ্ধিতা-বৃদ্ধিত্বম্| কণ্ঠাদিষ্বধিকং মাংসং চ কুরুতে| আদিশব্দেন তালুজিহ্বাদিপরিগ্রহঃ|

Adhikarana vRuddhamedasaH karmANi (10-11) · Śloka 11

তদ্বন্মেদস্তথা শ্রমম্||১০|| অল্পেঽপি চেষ্টিতে শ্বাসং স্ফিক্স্তনোদরলম্বনম্| |১১|

স০- মেদোঽপি বৃদ্ধং গণ্ডাদীন্ কুরুতে| তথাল্পেঽপি চেষ্টিতে শ্রমং কুরুতে, শ্বাসং চ| তথা, স্ফিজোঃ স্তনযোরুদরস্য চ লম্বনং কুরুতে|

Adhikarana vRuddhAsthnaH karmANi (11) · Śloka 11

| অস্থ্যধ্যস্থ্যধিদন্তাংশ্চ|১১|

স০-অস্থি বৃদ্ধমধ্যস্থ্যধিহন্তাংশ্চ কুরুতে|

Adhikarana vRuddhamajj~jaH karmANi (11-12) · Śloka 12

মজ্জা নেত্রাঙ্গগৌরবম্||১১|| পর্বসু স্থূলমূলানি কুর্যাত্কৃচ্ছ্রাণ্যরূংষি চ| |১২|

স০-মজ্জা বৃদ্ধো নেত্রযোরঙ্গানাং চ গৌরবং কুর্যাত্| কুরুত ইতি প্রকৃতে কুর্যাদিত্যুক্তং স্পষ্টার্থম্| পর্বসু-অঙ্গুল্যাদিসন্ধিষু, অরূংষি-পিটিকাবিশেষান্, কুর্যাত্| কীদৃশানি ? স্থূলমূলানি,-স্থূলানি মূলানি যেষাং তানি| তথা, কৃচ্ছ্রাণি-কৃচ্ছ্রসাধ্যানি|

Adhikarana vRuddhashukrasya karmANi (12) · Śloka 12

| অতিস্ত্রীকামতাং বৃদ্ধং শুক্রং শুক্রাশ্মরীমপি||১২||

স০-শুক্রং বৃদ্ধমতিস্ত্রীকামতাং কুর্যাত্, শুক্রাশ্মরীং চ| অপিশব্দাদ্বলস্নেহাদ্যপি|

Adhikarana vRuddhashakRutaH karmANi (13) · Śloka 13

কুক্ষাবাধ্মানমাটোপং গৌরবং বেদনাং শকৃত্| |১৩|

স০-শকৃত্-পুরীষং, বৃদ্ধং কুক্ষাবাধ্মানাদীন্ কুর্যাত্| কুর্যাদিতি সম্ভাবনাযাং লিঙ্| আধ্মানং-আনাহঃ| আটোপঃ-অন্ত্রকূজনাদি| [গৌরবং-গুরুত্বম্, বেদনাং চ কুক্ষৌ|]

Adhikarana vRuddhamUtrasya karmANi (13) · Śloka 13

| মূত্রং তু বস্তিনিস্তোদং কৃতেঽপ্যকৃতসংজ্ঞতাম্||১৩||

স০-মূত্রং বৃদ্ধং বস্তের্নিস্তোদং-অতিব্যথাং কুর্যাত্| তথা কৃতেঽপি মূত্রেঽকৃতসংজ্ঞতাং-অকৃতাভাসত্বমিব কুর্যাত্|

Adhikarana vRuddhasvedasya karmANi (14) · Śloka 14

স্বেদোঽতিস্বেদদৌর্গন্ধ্যকণ্ডূঃ| |১৪|

স০-স্বেদো বৃদ্ধোঽতিস্বেদাদীন্ কুর্যাত্|

Adhikarana evaM dUShikAdayo malAH (14) · Śloka 14

এবং চ লক্ষযেত্| দূষিকাদীনপি মলান্ বাহুল্যগুরুতাদিভিঃ||১৪||

স০-এবং-অনেন প্রকারেণ, দূষিকাদীনপি মলান্ লক্ষযেত্-অনুমিনুযাত্| দূষিকা-অক্ষিমলঃ| আদিশব্দাত্ ঘ্রাণকর্ণনাসামলাদীনাং গ্রহণম্| কথং লক্ষযেত্ ? ইত্যাহ-বাহুল্যেত্যাদি| মলবাহুল্যেন তত্স্থানগৌরবেণ চ| আদিগ্রহণাত্কণ্ডূক্লেদাদযো গৃহ্যন্তে|

Adhikarana kShINAnilasya karmANi (15) · Śloka 15

বৃদ্ধানাং বাতাদীনাং লিঙ্গান্যভিধায, ক্ষীণানাং বাতাদীনাং লিঙ্গান্যাহ - - - - লিঙ্গং ক্ষীণেঽনিলেঽঙ্গস্য সাদোঽল্পং ভাষিতেহিতম্| সংজ্ঞামোহস্তথা শ্লেষ্মবৃদ্ধযুক্তামযসম্ভবঃ||১৫||

স০-অনিলে ক্ষীণে-স্বপ্রমাণাপচিতে, বক্ষ্যমাণানি লিঙ্গানি| বাযোস্তু সর্বক্ষযে দেহ এব ন স্যাত্, কস্য তল্লিঙ্গং স্যাত্| কিং পুনস্তল্লিঙ্গম্ ? ইত্যাহ-অঙ্গস্যেত্যাদি| অঙ্গস্য সাদঃ-ক্রিযাস্বসামর্থ্যম্| ঈহিতং-চেষ্টিতম্, কাযিকং কর্ম| ভাষিতং চেহিতং চ ভাষিতেহিতম্,-অল্পবচনাঽল্পচেষ্টিতত্বং চ স্যাত্| তথা, সংজ্ঞামোহঃ-সংবিদোঽভাবঃ| তথা, শ্লেষ্মবৃদ্ধৌ য উক্তাঃ-অগ্নিসাদপ্রসেকাদযঃ, তেষামামযানাং সম্ভবো ভবতি|

Adhikarana kShINapittasya karmANi (16) · Śloka 16

পিত্তে মন্দোঽনলঃ শীতং প্রভাহানিঃ| |১৬|

স০-লিঙ্গং ক্ষীণে ইত্যনুবর্ততে| পিত্তে ক্ষীণে লিঙ্গমেতত্| অগ্নির্মন্দঃ শীতং কান্তিহানিশ্চ স্যাত্|

Adhikarana kShINakaphasya karmANi (16) · Śloka 16

কফে ভ্রমঃ| শ্লেষ্মাশযানাং শূন্যত্বং হৃদ্দ্রবঃ শ্লথসন্ধিতা||১৬||

স০-কফে ক্ষীণে ভ্রমো ভবতি| তথা, শ্লেষ্মাশযানাং শূন্যত্বং ভবতি| শ্লেষ্মাশযাঃ-উরঃশিরঃসন্ধ্যাদ্যাঃ| [তথা, হৃদ্দ্রাবাদযঃ স্যুঃ| হৃদ্দ্রবঃ-হৃদি কম্প ইত্যর্থঃ|]

Adhikarana kShINarasasya karmANi (17) · Śloka 17

রসে রৌক্ষ্যং শ্রমঃ শোষো গ্লানিঃ শব্দাসহিষ্ণুতা| |১৭|

স০-রসে ক্ষীণে রৌক্ষ্যাদযঃ স্যুঃ|

Adhikarana kShINaraktasya karmANi (17) · Śloka 17

| রক্তেঽম্লশিশিরপ্রীতিশিরাশৈথিল্যরূক্ষতাঃ||১৭||

স০-রক্তে ক্ষীণেঽম্লাদ্যভিলাষাদযঃ স্যুঃ|

Adhikarana kShINamAMsasya karmANi (18) · Śloka 18

মাংসেঽক্ষগ্লানিগণ্ডস্ফিক্ঽঽশুষ্কতাসন্ধিবেদনাঃ| |১৮|

স০-মাংসে ক্ষীণেঽক্ষগ্লানিঃ, গল্লযোঃ স্ফিজোশ্চ শুষ্কত্বম্, সন্ধীনাং বেদনাঃ স্যুঃ, স্ফুটন্তীব সন্ধয ইত্যর্থঃ|

Adhikarana kShINamedasaH karmANi (18) · Śloka 18

| মেদসি ক্ষীণে কট্যাঃ প্লীহ্নো বৃদ্ধিঃ কৃশাঙ্গতা||১৮||

স০-মেদসি ক্ষীণে কট্যাঃ স্বাপঃ প্লীহবৃধিঃ কৃশাঙ্গত্বং চ|

Adhikarana kShINasyAsthnaH karmANi (19) · Śloka 19

অস্থ্ন্যস্থিতোদঃ শদনং দন্তকেশনখাদিষু| |১৯|

স০-অস্থ্নি ক্ষীণেঽস্থ্নাং তোদো ভবতি| শদনং-শাতঃ, পাত ইত্যর্থঃ| কেষাম্ ? দন্তাদীনাম্|

Adhikarana kShINamajj~jaH karmANi (19) · Śloka 19

| অস্থ্নাং মজ্জনি সৌষির্যং ভ্রমস্তিমিরদর্শনম্||১৯||

স০-মজ্জনি ক্ষীণেঽস্থ্নাং সৌষির্যং ভ্রমাদিশ্চ|

Adhikarana kShINashukrasya karmANi (20) · Śloka 20

শুক্রে চিরাত্ প্রসিচ্যেত শুক্রং শোণিতমেব বা| তোদোঽত্যর্থং বৃষণযোর্মেঢ্রং ধূমাযতীব চ||২০||

স০-শুক্রে ক্ষীণে শুক্রং চিরাত্ প্রসিচ্যেত, রক্তং বা| প্রসিচ্যেতেতি কর্মকর্তরি| বৃষণযোরতিশযেন তোদো-ব্যথা স্যাত্| মেঢ্রং-শিশ্নং, ধূমাযতীব চ| ধূমাযতীতি লোহিতাদেরাকৃতিগণত্বাত্ ক্বিপ্, অকৃত্সার্বধাতুকেত্যাদিনা দীর্ঘঃ|

Adhikarana kShINapurIShasya karmANi (21) · Śloka 21

পুরীষে বাযুরন্ত্রাণি সশব্দো বেষ্টযন্নিব| কুক্ষৌ ভ্রমতি যাত্যূর্ধ্বং হৃত্পার্শ্বে পীডযন্ ভৃশম্||২১||

স০-পুরীষে ক্ষীণে বাযুঃ কুক্ষৌ ভ্রমতি| অন্ত্রাণি বেষ্টযন্নিব শব্দং জনযন্ যাত্যূর্ধ্বম্| কিং কুর্বন্ ? হৃত্পার্শ্বে ভৃশং পীডযন্|

Adhikarana kShINamUtrasya karmANi (22) · Śloka 22

মূত্রেঽল্পং মূত্রযেত্কৃচ্ছ্রাদ্বিবর্ণং সাস্রমেব বা| |২২|

স০- মূত্রে ক্ষীণেঽল্পং মূত্রযেত্, কৃচ্ছ্রাদ্বিবর্ণং সরক্তমেব বা|

Adhikarana kShINasvedasya karmANi (22) · Śloka 22

| স্বেদে রোমচ্যুতিঃ স্তব্ধরোমতা স্ফুটনং ত্বচঃ||২২||

স০-স্বেদে ক্ষীণে রোম্ণাং চ্যুতিঃ-শাতঃ, রোম্ণাং চ স্তব্ধত্বম্| ত্বচঃ-চর্মণঃ, স্ফুটনং-দরণম্|

Adhikarana ghrANAmalAnAM kShayali~ggam (23) · Śloka 23

ইদানীং ঘ্রাণাদিমলানামপি সামান্যেনক্ষযলিঙ্গমাহ - - - - মলানামতিসূক্ষ্মাণাং দুর্লক্ষ্যং লক্ষযেত্ ক্ষযম্| স্বমলাযনসংশোষতোদশূন্যত্বলাঘবৈঃ||২৩||

স০-মলানামতিসূক্ষ্মাণাং-সুস্বল্পানাং দূষিকাদীনাং, দুঃখেন বোদ্ধুং শক্যং-দুর্লক্ষ্যম্, ক্ষযং লক্ষযেত্-জানীযাত্| কৈঃ ? মলানাং স্থানানি-মলাযনানি, স্বানি চ তানি মলাযনানি চ-স্বমলাযনানি, তেষাম্ সংশোষতোদশূন্যত্বলাঘবানি-স্বমলাযনসংশোষতোদশূন্যত্বলাঘবানি, তৈঃ|

Adhikarana doShadhAtumalAnAM samAsato vRuddhikShayanidAnam (24-25) · Śloka 25

এবং ব্যাসেন দোষধাতুমলানাং বৃদ্ধিক্ষযাবভিধায সমাসতোঽভিধাতুমিদমাহ- দোষাদীনাং যথাস্বং চ বিদ্যাদ্দৃদ্ধিক্ষযৌ ভিষক্| ক্ষযেণ বিপরীতানাং গুণানাং বর্ধনেন চ||২৪|| বৃদ্ধিং মলানাং সঙ্গাচ্চ ক্ষযং চাতি বিসর্গতঃ| |২৫|

স০-দোষধাতুমলানাং বৃদ্ধিক্ষযৌ জানীযাত্| কথম্ ? যথাস্বং দোষাদীনাং গুণেভ্যো বিপরীতা যে গুণাস্তেষাং গুণানাং ক্ষযেণ বর্ধনেন চ দেহগতেন দোষাদীনাং যথাক্রমং বৃদ্ধিং ক্ষযং চ বিদ্যাত্| যথা,-বাযোর্গুণা রূক্ষলঘুশীতাদযঃ, তেষাং বিপরীতাঃ-স্নিগ্ধগুরূষ্ণাদযঃ, তেষাং স্নিগ্ধাদীনাং দেহে যদা ক্ষযো দৃশ্যতে তদা বাযোর্বৃদ্ধিং বিদ্যাত্| যদা তু তেষাং স্নিগ্ধাদীনাং দেহে বৃদ্ধির্দৃশ্যতে তদা বাযোঃ ক্ষযো জ্ঞেযঃ| এবং স্ববুধ্দ্যা বিকল্প্য মলানাং ধাতূনাং চ বাচ্যম্| বৃদ্ধিং মলানামিত্যাদি| ন কেবলং মলানাং পূর্বোক্তেন প্রকারেণ বৃদ্ধিক্ষযৌ জ্ঞেযৌ, যাবদমুনাঽপি বক্ষ্যমাণেন লক্ষণেন তেষাং বৃদ্ধিক্ষযৌ জ্ঞেযৌ, [ইতি চশব্দেন দ্যোতযতি]| এবং স্ববুধ্দ্যা বিকল্প্য, মলানাং সঙ্গাত্-বহিরনিঃসরণলক্ষণাচ্চ বৃদ্ধিং বিদ্যাত্| তেষামেব মলানামতিবিসর্গাত্-অতিপ্রবর্তনাত্ ক্ষযং বিদ্যাত্|

Adhikarana kShayavRuddhyoH pIDAkaratve tAratamyam (25) · Śloka 25

| মলোচিতত্বাদ্দেহস্য ক্ষযো বৃদ্ধেস্তু পীডনঃ||২৫||

স০-দ্বাবপি মলানাং বৃদ্ধিক্ষযৌ পীডাকরৌ দেহস্য| তত্রাপি য এষাং ক্ষযঃ স বৃদ্ধিতোঽপ্যতিশযেন পীডাকরঃ, অনৌচিত্যাত্| দেহিনাং হি প্রাযেণ মলক্ষযোঽনুচিতো-অনভ্যস্তঃ, বৃদ্ধিস্তূচিতৈবেতি ন তথা পীডাং করোতি|

Adhikarana doShadUShyayorAshrayAshrayibhAvaH, AshrayAshrayibhAvasya phalam, apavAdaH, vRuddhikShayajavikAreShu la~gghana bRuMhaNam (26-29) · Śloka 29

অথ দোষাদীনামাশ্রযাশ্রযিভাবং দর্শযতি - - - - তত্রাস্থনি স্থিতো বাযুঃ, পিত্তং তু স্বেদরক্তযোঃ| শ্লেষ্মা শেষেষু, তেনৈষামাশ্রযাশ্রযিণাং মিথঃ||২৬|| যদেকস্য তদন্যস্য বর্ধনক্ষপণৌষধম্| অস্থিমারুতযোর্নৈবং, প্রাযো বৃদ্ধির্হি তর্পণাত্||২৭|| শ্লেষ্মণাঽনুগতা তস্মাত্ সঙ্ক্ষযস্তদ্বিপর্যাত্| বাযুনাঽনুগতোঽস্মাচ্চ বৃদ্ধিক্ষযসমুদ্ভবান্||২৮|| বিকারান্ সাধযেচ্ছীঘ্রং ক্রমাল্লঙ্ঘনবৃংহণৈঃ| |২৯|

স০-তত্র-তেষু বাতাদিষু মধ্যে, অস্থ্নি বাযুঃ স্থিতঃ-আশ্রিতঃ| পিত্তং তু স্বেদরক্তযোঃ স্থিতম্| শ্লেষ্মা শেষেষু-রসমাংসমেদোমজ্জশুক্রমূত্রপুরীষাদিষু স্থিতঃ| যতশ্চৈবমাশ্রযাশ্রযিভাবোদোষধাতূনাং, তেন হেতুনা, আশ্রযাশ্রযিণাং মিথঃ-পরস্পরং, যদেকস্য-আশ্রযস্য বর্ধনং, তদন্যস্য-আশ্রযিণোঽপি বর্ধনম্, যদাশ্রযস্য ক্ষপণং তদাশ্রযিণোঽপি ক্ষপণম্| ননু, এবমস্থ্নো বাতাশ্রযস্য যদ্বর্ধনং তদস্যাশ্রযিণো বাতস্যাপি বর্ধনং, যদস্য ক্ষপণং তদপি বাতস্য ক্ষপণং প্রাপ্নোতীত্যত আহ-অস্থীত্যাদি| অস্থিমারুতযোর্নৈবং বর্ধনক্ষপণৌষধম্, সম্ভবতীত্যধ্যাহার্যম্| হি-যস্মাত্, প্রাযো-বাহুল্যেন, যা বৃদ্ধিঃ-বর্ধনং দোষধাতূনাম্, সা তর্পণাত্-বৃংহণাদ্ভবতি| প্রাযোগ্রহণং বাযুপরিহারার্থম্| সা চ শ্লেষ্মণাঽনুগতা-অনুবদ্ধা| যত এবং যা বৃদ্ধিঃ সা সন্তর্পণাত্, তস্মাদ্ধেতোর্য এষাং দোষাদীনাং ক্ষযঃ স প্রাযো-ভূযিষ্ঠম্, অপতর্পণাত্-লঙ্ঘনরূপাদ্ভবতি| স চ সঙ্ক্ষযো বাযুনাঽনুগতঃ| এবং যদস্থ্নো বর্ধনমৌষধম্, তত্ স্নিগ্ধমধুরাদি বৃংহণরূপং বাতস্য ক্ষপণম্| যচ্চ বাতস্য বর্ধমৌষধম্, তত্ রূক্ষতিক্তাদ্যপতর্পণং লঙ্ঘনরূপমস্থ্নঃ ক্ষপণম্| তদর্থমেতদুক্তম্-অস্মাচ্চেত্যাদি| যত এবং বৃদ্ধেঃ সন্তর্পণরূপত্বং ক্ষযস্যাপতর্পণরূপত্বম্, অতো বৃদ্ধিক্ষযসম্ভবান্ বিকারান্ দোষধাতূনাং সম্বন্ধিনঃ ক্রমাল্লঙ্ঘনবৃংহণৈঃ সাধযেত্-উপক্রমেত্| কথম্ ? শীঘ্রং চিরোত্থিতা হি তে দুশ্চিকিত্স্যাঃ স্যুঃ| বৃদ্ধ্যুত্থান্ বিকারান্ লঙ্ঘনৈঃ, ক্ষযোত্থান্ বৃংহণৈরিতি ক্রমার্থঃ|

Adhikarana apavAdaH (29) · Śloka 29

ননু, এবং বাতবৃদ্ধ্যুত্থান্ বিকারান্ লঙ্ঘনৈস্তত্ক্ষযোত্থান্ বৃংহণৈরিতি স্যাত্| অত ইদমাহ - - - - | বাযোরন্যত্র, তজ্জাংস্তু তৈরেবোত্ক্রমযোজিতৈঃ||২৯||

স০-বাযুং হিত্বা বৃদ্ধ্যুত্থান্ বিকারান্ লঙ্ঘনৈঃ, ক্ষযোত্থান্ বৃংহণৈঃ সাধযেত্| তজ্জান্-বাযুসম্ভবান্ বিকারান্, পুনস্তৈরেব-লঙ্ঘনবৃংহণৈরুত্ক্রমযোজিতৈরুপক্রমেত্| যথানির্দিষ্টক্রমাদ্বিপরীতঃ ক্রমঃ-উত্ক্রমঃ| যথা,-বাতবৃদ্ধ্যুত্থান্ বিকারান্ বৃংহণৈঃ তত্ক্ষযোত্থাংশ্চ লঙ্ঘনৈরিতি|

Adhikarana raktavRuddhyutthAdInAM raktasrutivirecanAdibhirupakramaH, dhAtorvRuddhikShayakaraNaprakAraH (30-33) · Śloka 33

দোষাণাং বিশেষচিকিত্সেহ নোক্তা, দোষোপক্রমণীযে বক্ষ্যমাণত্বাত্| রসচিকিত্সা চ "রসোঽপি শ্লেষ্মবত্" ইত্যুক্তের্নেহ পুনর্নির্দিষ্টা| অতো রক্তাদীনাং চিকিত্সামাহ - - - - বিশেষাদ্রক্তবৃদ্ধ্যুত্থান্ রক্তস্রুতিবিরেচনৈঃ| মাংসবৃদ্ধিভবান্ রোগান্ শস্ত্রক্ষারাগ্নিকর্মভিঃ||৩০|| স্থৌল্যকার্শ্যোপচারেণ মেদোজানস্থিসঙ্ক্ষযাত্| জাতান্ ক্ষীরঘৃতৈস্তিক্তসংযুতর্বস্তিভিস্তথা||৩১|| বিড্বৃদ্ধিজানতীসারক্রিযযা, বিট্ক্ষযোদ্ভবান্| মেষাজমধ্যকুল্মাষযবমাষদ্বযাদিভিঃ||৩২|| মূত্রবৃদ্ধিক্ষযোত্থাংশ্চ মেহকৃচ্ছ্রচিকিত্সযা| ব্যাযামাভ্যঞ্জনস্বেদমদ্যৈঃ স্বেদক্ষযোদ্ভবান্||৩৩||

স০-বৃদ্ধিক্ষযোপক্রমে এবং স্থিতেঽপি বিশেষেণ রক্তবৃদ্ধ্যুত্থান্ রক্তস্রুতিবিরেচনৈরুপক্রমেত| মাংসবৃদ্ধিজান্ শস্ত্রক্ষারাগ্নিকর্মভিঃ| মেদোবৃদ্ধিক্ষযাভ্যাং জাতান্-মেদোজানিতি মধ্যমপদলোপোঽত্র দ্রষ্টব্যঃ| মেদোবৃদ্ধিজান্ বিকারান্ স্থৌল্যোপচারেণ দ্বিবিধোপক্রমণীযোক্ত্যা স্থৌল্যচিকিত্সযা, মেদঃক্ষযজান্ কার্শ্যোপচারেণোপাচরেত্| অস্থিক্ষযজান্ ক্ষীরঘৃতৈস্তিক্তসংযুতৈঃ, বস্তিভিস্তথা-তথারূপৈস্তিক্তসংযুতৈরিত্যর্থঃ| ননু, যানি বাতকৃন্তি দ্রব্যাণি তান্যস্থিক্ষযোদ্ভববিকারাণাং বৃদ্ধিকরণানীতি তদ্দ্রব্যোপযোগোঽত্র ন যুক্তঃ, তিক্তস্য বাতকৃতত্বাত্| অত্রোচ্যতে| যদ্দ্রব্যং স্নিগ্ধং শোষণং খরত্বমুত্পাদযতি তদস্থ্নো বর্ধনং যুক্তম্, খরস্বভাবত্বাদস্থ্নাম্| ন চৈবংবিধমেকং দ্রব্যমস্তি, যত্ স্নিগ্ধং শোষণং চ| তস্মাত্ ক্ষীরঘৃতৈস্তিক্তসংযুতৈর্বস্তিভিশ্চ তিক্তসংযুতৈশ্চেত্যুপদিষ্টম্| ক্ষীরঘৃতস্য তিক্তযুক্তস্য খরস্বভাবত্বাত্| বিড্বৃদ্ধিজান্-পুরীষবৃদ্ধিজান্, অতীসারচিকিত্সযা সাধযেত্| বিট্ক্ষযোদ্ভবান্ মেষাজমধ্যাদিভিঃ সাধযেত্| মেষ-উরভ্রঃ, অজঃ-চ্ছাগঃ, তযোর্মধ্যং-অন্তরাধিঃ| কুল্মাষঃ-অর্ধস্বিন্নো মাষাদির্হিঙ্গুঘৃতাদিসংস্কৃতঃ| মাষদ্বযং-মাষো রাজমাষশ্চ| আদিশব্দেন কাকাণ্ডোলাত্মগুপ্তাদীনাং গ্রহণম্| মূত্রবৃদ্ধ্যুত্থান্ মেহচিকিত্সযা, মূত্রক্ষযোত্থান্ মূত্রকৃচ্ছ্রচিকিত্সযা, স্বেদক্ষযজান্ ব্যাধীন্ ব্যাযামাদিভিঃ সাধযেত্|

Adhikarana dhAtujAnAmupakramAntaram (34-35) · Śloka 35

স্বস্থানস্থস্য কাযগ্নেরংশা ধাতুষু সংশ্রিতাঃ| তেষাং সাদাতিদীপ্তিভ্যাং ধাতুবৃদ্ধিক্ষযোদ্ভবঃ||৩৪|| পূর্বো ধাতুঃ পরং কুর্যাদ্দৃদ্ধঃ ক্ষীণশ্চ তদ্বিধম্| |৩৫|

স০-স্বস্থানং কাযাগ্নেঃ-পক্বামাশযযোর্মধ্যম্| যথা চ বক্ষ্যতি (হৃ. সূ. অ. ১২|১০) - "পিত্তং পঞ্চাত্মকং তত্র পক্বামাশযমধ্যগম্|" ইত্যাদি যাবত্ "পাচকং নাম তত্ স্মৃতম্|" ইতি| তত্র পক্বামাশযমধ্যে তিষ্ঠতীতি স্বস্থানস্থঃ, তস্যৈবংবিধস্য কাযাগ্নেঃ-জাঠরানলস্য, অংশাঃ-ভাগাঃ, ধাতুষু-রসাদিষু সংশ্রিতাঃ| তেষাং-অগ্ন্যংশানাম্, সাদেন-মান্দ্যেন, ধাতূনাং বৃদ্ধ্যুদ্ভবঃ| তথা তেষামংশানামতিদীপ্ত্যা-অতিতৈক্ষ্ণ্যাত্, ধাতুক্ষযোদ্ভবঃ| পূর্বো-রসাখ্যো, ধাতুর্বৃদ্ধো ভূত্বা পরং-রক্তাখ্যং, ধাতুং বৃদ্ধং কুর্যাত্| পূর্বশ্চ ক্ষীণো ধাতুঃ পরং ধাতুং তদ্বিধং-ক্ষীণমেব কুর্যাত্|

Adhikarana vRuddhikShayavikArasaMprAptiH, malAyanAni (35-36) · Śloka 36

| দোষা দুষ্টা রসৈর্ধাতূন্ দূষযন্ত্যুভযে মলান্||৩৫|| অধো দ্বে, সপ্ত শিরসি, খানি স্বেদবহানি চ| মলা মলাযনানি স্যুর্যথাস্বং তেষ্বতো গদাঃ||৩৬||

স০-দোষা দুষ্টা রসৈঃ-মধুরাদিভির্মিথ্যাযোগাতিযোগসেবিতৈঃ কুপিতাঃ, ধাতূন্ দূষযন্তি| উভযে-দোষা ধাতবশ্চ, মলান্ দূষযন্তি| মলা মলাযনানি দূষযন্তীতি সম্বন্ধঃ| তথা চ মুনিঃ (চ. সূ. অ. ৭|৪২) - "মলাযনানি বাধ্যন্তে দুষ্টৈর্মাত্রাধিকৈর্মলৈঃ|" ইতি| কানি মলাযনানি ? ইত্যাহ-অধো দ্বে ইত্যাদি| অধো দ্বে-গুদমেঢ্রাখ্যে, সপ্ত শিরসি খানি-দ্বে অক্ষিণী দ্বৌ কর্ণৌ দ্বৌ নাসাপুটাবাস্যং চেতি, তথা স্বেদবহানি-রোমকূপাখ্যানি ছিদ্রাণি সর্বশরীরগতানি, মলাযনানি স্যুঃ| অতো-দূষণাত্কারণাত্, তেষু-মলাযনেষু দুষ্টেষু, যথাস্বং গদাঃ-রোগাঃ স্যুঃ| যো যস্য স্বো- যথাস্বম্|

Adhikarana ojasaH prAdhAnyam (37-39) · Śloka 39

দোষধাতুমলানাং সমবিষমাবস্থা গদিতা| ওজসস্তু নিরূপযন্নাহ - - - - ওজস্তু তেজো ধাতূনাং শুক্রান্তানাং পরং স্মৃতম্| হৃদযস্থমপি ব্যাপি দেহস্থিতিনিবন্ধনম্||৩৭|| স্নিগ্ধং সোমাত্মকং শুদ্ধমীষল্লোহিতপীতকম্| যন্নাশে নিযতং নাশো যস্মিংস্তিষ্ঠতি তিষ্ঠতি||৩৮|| নিষ্পদ্যন্তে যতো ভাবা বিবিধা দেহসংশ্রযাঃ| |৩৯|

স০-রসাদীনাং ধাতূনাং শুক্রান্তানাং যত্পরং-উত্কৃষ্টং, তেজস্তদোজঃ স্মৃতম্, [ন তু শুক্রস্যৈব মলঃ|] তথা,হৃদযস্থমপি ব্যাপি| সকলশরীরব্যাপিনস্তস্য ষড্বিন্দুকস্য বিশেষেণ হৃদযং স্থানম্| তথা, দেহস্য স্থিতির্দেহস্থিতিস্তস্যা নিবন্ধনং-জীবিতাধিষ্ঠানমিত্যর্থঃ| অন্যে ত্বাহুঃ, পরশব্দেনৈতত্ দ্যোতযতি,-অন্যদপ্যোজোঽস্তি ন তদ্ধাতূনাং শুক্রান্তানাং তেজঃ, শ্লেষ্মাখ্যমিতি| তথা চোক্তং সঙ্গ্রহে (সূ. অ. ১৯) - "তেজো যত্সর্বধাতূনামোজস্তত্ পরমুচ্যতে| মৃদু সোমাত্মকং শুদ্ধং রক্তমীষত্সপীতকম্||" ইত্যাদি| যন্নাশে-যস্যৌজসোঽভাবে, নিযতং-নিশ্চিতং, প্রাণিনো নাশঃ-অভাবঃ| যস্মিন্নোজসি তিষ্ঠতি-বিদ্যমানে, তিষ্ঠতি-প্রাণিতি, দেহীতি শেষঃ| যতো-যস্মাত্, ভাবাঃ-পদার্থাঃ, নিষ্পদ্যন্তে-জাযন্তে| কিম্ভূতাঃ ? বিবিধাঃ-অনেকপ্রকারাঃ| তথা, দেহঃ সংশ্রযো যেষাং তে দেহসংশ্রযাঃ| লক্ষণমোজসো মুনিনাঽভ্যধাযি (চ. সূ. অ. ১৭|৭৪) - "হৃদি তিষ্ঠতি যচ্ছুদ্ধং স্নিগ্ধমীষত্সপীতকম্| ওজঃ শরীরে সঙ্খ্যাতং তন্নাশে না বিনশ্যতি||" ইত্যাদি|

Adhikarana ojaHkShayalakShaNaM cikitsA (39-41) · Śloka 41

| ওজঃ ক্ষীযেত কোপক্ষুদ্ধ্যানশোকশ্রমাদিভিঃ||৩৯|| বিভেতি দুর্বলোঽভীক্ষ্ণং ধ্যাযতি ব্যথিতেন্দ্রিযঃ| দুঃচ্ছাযো দুর্মনা রূক্ষো ভবেত্ক্ষামশ্চ তত্ক্ষযে||৪০|| জীবনীযৌষধক্ষীররসাদ্যাস্তত্র ভেষজম্| |৪১|

স০-ওজঃ কোপাদিভিঃ ক্ষীযেত| তত্ক্ষযে-তস্যৌজসঃ ক্ষযে, বিভেতি দুর্বল ইত্যাদিলক্ষণম্| জীবনীযৌষধাদ্যাস্তত্র ভেষজম্| জীবনীযৌষধানি-জীবন্ত্যাদীনি দশ জীবনসংজ্ঞানি (হৃ. সূ. অ. ১৫|৮) তথাঽন্যানি যানি মধুরাণি ক্ষীরাদীনি দ্রব্যাণি| ক্ষীরস্য জীবনীযত্বেনৈব গ্রহণে সিদ্ধে পৃথক্পাঠোঽতিশযার্থঃ, অতিশযেনাত্র ক্ষীরমৌষধমিতি| রসো-মাংসরসঃ| আদি (দ্য)-গ্রহণেন কাকাণ্ডোলাত্মগুপ্তাঘৃতাদিপরিগ্রহঃ|

Adhikarana ojovRuddhilakShaNam (41) · Śloka 41

| ওজোবৃদ্ধৌ হি দেহস্য তুষ্টিপুষ্টিবলোদযঃ||৪১||

স০-ওজোবিবৃদ্ধৌ সত্যাং দেহস্য তুষ্টিঃ-প্রহর্ষঃ, পুষ্টিঃ-বৃদ্ধিঃ, বলং-সামর্থ্যম্, এষামুদযঃ-সম্যগ্বৃদ্ধির্ভবতি|

Adhikarana saMkShepeNa vRuddhikShayabheShajakathanam (42) · Śloka 42

ইদানীং সঙ্ক্ষেপেণ বৃদ্ধিক্ষযভেষজং কথযন্নাহ - - - - যদন্নং দ্বেষ্টি যদপি প্রার্থযেতাবিরোধি তু| তত্তত্ত্যজন্ সমশ্নংশ্চ তৌ তৌ বৃদ্ধিক্ষযৌ জযেত্||৪২||

স০-যদন্নং পুরুষো দ্বেষ্টি-নাভিনন্দতি, যদপ্যন্নং প্রার্থযেত, তত্তদন্নং দ্বিষ্টং ত্যজন্-পরিহরন্, ইষ্টমন্নং সমশ্নন্-ভক্ষযন্, দোষাণাং সম্বন্ধিনৌ বৃদ্ধিক্ষযৌ তৌ তৌ-যৌ যস্য দোষস্যাত্মীযৌ বৃদ্ধিক্ষযৌ, তৌ তৌ জযেত্| ননু, কিমবিশেষেণৈতত্ প্রার্থিতমশ্নন্ দোষক্ষযং জযেত্ ? নেত্যাহ-অবিরোধি তু| তুরবধারণে| অবিরোধ্যেব| তত্তথাবিধমন্নমশ্নন্ দোষাণাং ক্ষযং জযেত্, ন তু বিরোধ্যন্নমশ্নন্|

Adhikarana yathArucyupacArasya nAnucitatvam, vAtAdInAM viparItasamAnayo rucikaratvam (43) · Śloka 43

ননু, দ্বেষ্যান্নত্যাগেনেষ্টান্নভক্ষণেন | চ ] কুতো হেতোর্দোষাণাং বৃদ্ধিক্ষযৌ জযেত্ ? ইত্যাহ - - - - কুর্বতে হি রুচিং দোষা বিপরীতসমানযোঃ| বৃদ্ধাঃ ক্ষীণাশ্চ ভূযিষ্ঠং লক্ষযন্ত্যবুধাস্তু ন||৪৩||

স০-হি-যস্মাত্, দোষাঃ-বাতাদযো, বিপরীতসমানযোঃ রুচিং কুর্বন্তি| কিম্ভূতাঃ সন্তঃ ? বৃদ্ধাঃ ক্ষীণাশ্চ, যথাক্রমম্| বৃদ্ধাঃ-প্রমাণাধিকাঃ সন্তঃ, স্বগুণেভ্যো যদ্বিপরীতগুণমন্নং তেষাং ক্ষপণহেতুঃ, তদ্বিষযাং রুচিং-প্রীতিমুত্পাদযন্তি| ভূযিষ্ঠং-বাহুল্যেন| ক্ষীণাঃ-স্বপ্রমাণাপচিতাঃ সন্তো, যত্স্বসমানগুণমাহারজাতং তেষাং বর্ধনহেতুঃ, তদ্বিষযাং প্রীতিমুত্পাদযন্তি| যথা,-বাতো বৃদ্ধঃ স্নিগ্ধাম্লমধুরমন্নমভিলষতি|পিত্তং বৃদ্ধং শীতমধুররুক্ষতিক্তকশাযমন্নভিলষতি| শ্লেষ্মা বৃদ্ধো রূক্ষোষ্ণকটুতিক্তকষাযমন্নমভিলষতি| বাতঃ ক্ষীণো রূক্ষকষাযাদ্যন্নমভিলষতি| পিত্তং ক্ষীণমম্ললবণকটুকমন্নমভিলষতি| শ্লেষ্মা ক্ষীণঃ স্নিগ্ধমধুরাম্ললবণমন্নমভিলষতি| ভূযিষ্ঠমিত্যনেন প্রাযিকত্বমস্যা ব্যবস্থাযা দর্শযতি| তেন দোষগতিবৈচিত্র্যাদন্যথাঽপি ক্বচিদ্ভবতি| যথা,-কস্যচিন্নরস্য বাতোঽপি ক্ষীণঃ স্নিগ্ধমধুরাদ্যন্নমভিলষতি, পিত্তমপি বৃদ্ধমম্ললবণাদ্যন্নমভিলষতি, শ্লেষ্মাঽপি বৃদ্ধো মধুরাম্লাদ্যন্নমভিলষতীতি ব্যভিচারাত্| অত এবাবুধাঃ-অপণ্ডিতাঃ, ন লক্ষযন্তি-ন বিদন্তি, যথা-কিময দোষঃ ক্ষীণ উত বৃদ্ধ ইতি|

Adhikarana uktayo rucidveShayorupapattiH (44) · Śloka 44

ন চানেনৈব লক্ষণেন বৃদ্ধাঃ ক্ষীণাশ্চ লক্ষণীযাঃ| কিং তর্হি ? অন্যদপি লক্ষণমস্তীত্যাহ - - - - যথাবলং যথাস্বং চ দোষা বৃদ্ধা বিতন্বতে| রূপাণি, জহতি ক্ষীণাঃ, সমাঃ স্বং কর্ম কুর্বতে||৪৪||

স০-যথাবলং-বলানতিক্রমেণ, যথাস্বং চ-যদ্যদাত্মীযং যথা, রূপাণি-গুণকর্মলক্ষণানি, দোষা বৃদ্ধা বিতন্বতে-বিস্তারযন্তি| ক্ষীণাশ্চ বলানতিক্রমেণ যথাস্বং রূপাণি জহতি-ত্যজন্তি| যথা,-বাযুর্বৃদ্ধো রৌক্ষ্যশৈত্যপারুষ্যস্রংসব্যাসাদীনি বিস্তারযতি| ক্ষীণস্তু বাযুঃ পূর্বোক্তানি রৌক্ষ্যাদীনি জহাতি, অত এব ন ব্যঞ্জযতি| অথ সমা দোষাঃ কিং বিদধতি ? ইত্যাহ-সমা ইত্যাদি| যদা ন বৃদ্ধা ন চ ক্ষীণাঃ-সমা দোষাঃ,-স্বপ্রমাণস্থাঃ, তদা স্বং কর্ম-উত্সাহোচ্ছ্বাসাদিকং যথোক্তং কুর্বতে| তল্লক্ষণত্তে লক্ষণীযাঃ| তদেবং বৃদ্ধক্ষীণসমা দোষা বেদ্যাঃ|

Adhikarana doShavaiShamyAnutpAdane yatnaH (11) · Śloka 11

ক্ষীণা দোষাঃ ক্ষীণত্বাদেবাকিঞ্চিত্করত্বাত্ কদাচিত্পীডাং নোত্পাদযন্ত্যেব, ইতি বিচিন্ত্যাল্পমতযো বৈদ্যাঃ ক্ষীণদোষবর্ধনার্থং কদাচিদনাদরং কুর্যুরিত্যাহ - - - - য এব দেহস্য সমা বিবৃদ্ধ্যৈ ত এব দোষা বিষমা বধায| যস্মাদতস্তে হিতচর্যযৈব ক্ষযাদ্বিবৃদ্ধেরিব রক্ষণীযাঃ||৪৫|| ইতি শ্রীবৈদ্যপতিসিংহগুপ্তসুনূশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দোষাদিবিজ্ঞানীযো নামৈকাদশোঽধ্যাযঃ||১১||

স০-য এব দোষাঃ সমাঃ সন্তো দেহস্য বিবৃদ্ধ্যৈ-বর্ধনায ভবন্তি, ত এব দোষা বিষমাঃ-স্বপ্রমাণাদধিকা হীনা বা সন্তো, বধায-দেহবিঘাতায স্যুঃ| যস্মাদেবং ততস্তে দোষা হিতচর্যযৈব ক্ষযাত্-হীনত্বাদ্রক্ষণীযাঃ| কুত ইব ? বিবৃধেরিব| যথা বিবৃদ্ধেঃ-বিশেষেণ বর্ধনাত্তে রক্ষ্যন্তে, তথা ক্ষযাদপি রক্ষণীযা ইতি| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দোষাদিবিজ্ঞানীযাধ্যায একাদশঃ সমাপ্তঃ|| ১১||