12. dōṣabhēdīyādhyāyaḥ

Adhikarana adhyAyopakramaH · Śloka

দোষাদিবিজ্ঞানীযাদনন্তরং দোষভেদীযাধ্যাযারম্ভঃ| যতো দোষভেদমন্তরেণ দোষবিজ্ঞানং সম্যঙ্নোক্তং স্যাত্|

Adhikarana doShabhedIyAdyAyaH (2) · Śloka 2

পূর্বস্মিন্নধ্যাযে বহুবক্তব্যত্বাদ্দোষভেদো নোক্ত ইত্যাহ - - - - অথাতো দোষভেদীযাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২||

স০-দোষাণাং ভেদো-দোষভেদঃ, স্থাননামবিভাগাদিভিঃ| তস্মৈ হিতো দোষভেদীযঃ| শেষং পূর্ববত্|

Adhikarana vAtasya sthAnam (1) · Śloka 1

পক্বাশযকটীসক্থিশ্রোত্রাস্থিস্পর্শনেন্দ্রিযম্| স্থানং বাতস্য, তত্রাপি পক্বাধানং বিশেষতঃ||১||

স০-পক্বাশযাদি বাতস্য স্থানম্| তত্রাপি ষড্বিধে স্থানে বিশেষেণ পক্বাধানং স্যাত্| অন্নং পক্বমাধীযতে-স্থাপ্যতেঽস্মিন্নিতি পক্বাধানং,-পক্বাশযঃ| অত এব বাতে বস্তিরুপক্রমঃ প্রধান উক্তঃ, মূলাপকর্ষণাত্| সকলশরীরব্যাপিত্বেঽপ্যেষামিদং বিশেষেণোক্তম্| তথা চ প্রাগধ্যগীষ্ট (হৃ. সূ. অ. ১|৭) - "তে ব্যাপিনোঽপি হৃন্নাভ্যোঃ" ইতি| বিচিত্রগতিত্বাচ্চৈষাং বক্ষ্যমাণপ্রাণাদিভেদেন পৃথক্ স্থানকর্মনির্দেশঃ|

Adhikarana pittasya sthAnam (2) · Śloka 2

নাভিরামাশযঃ স্বেদো লসীকা রুধিরং রসঃ| দৃক্ স্পর্শনং চ পিত্তস্য, নাভিরত্র বিশেষতঃ||২||

স০-পিত্তস্য নাভ্যাদীনি স্থানানি| লসীকা-জলসদৃশী| দৃক্-চক্ষুঃ| স্পর্শনং-ত্বক্| ননু, স্পর্শনেন্দ্রিযং বাযোঃ স্থানমুদ্দিষ্টম্| তদেব কথং পিত্তস্যাপি স্যাত্| ব্রূমঃ| বাতসখিত্বাদগ্নেঃ| বাতসখো হ্যগ্নিঃ, পিত্তং চ বহ্নিরিতি বচনাত্| তস্মাদুভযোরপ্যেতদ্যুক্তং স্থানম্| বিশেষত ইতি| অত্র-এষু স্থানেষু মধ্যে, পিত্তস্য বিশেষেণ নাভিঃ স্থানম্|

Adhikarana kaphasya sthAnam (3) · Śloka 3

উরঃকণ্ঠশিরঃক্লোমপর্বাণ্যামাশযো রসঃ| মেদো ঘ্রাণং চ জিহ্বা চ কফস্য, সুত্রামুরঃ||৩||

স০-কফস্যোরঃ প্রভৃতীনি জিহ্বান্তানি স্থানানি| সুতরাং-সুষ্ঠু স্থানমুরো-বক্ষঃ|

Adhikarana vAyoH pa~jcAtmakatvam (4) · Śloka 4

অথ প্রত্যেকমেতেষাং দোষাণাং বিশিষ্টস্থানাশ্রযেণ ক্রিযাভেদাত্ পঞ্চ পঞ্চ ভেদানাহ - - - - প্রাণাদিভেদাত্পঞ্চাত্মা বাযুঃ| |৪|

স০-বাযুরেক এব চলনস্বভাবঃ সন্ প্রাণাদিভিঃ-প্রাণোদানব্যানসমানাপানৈঃ, ভেদাত্-বিশেষাত্, পঞ্চাত্মা-পঞ্চস্বভাবঃ| যথৈকোঽপি দেবদত্তো যাং যাং ক্রিযাং করোতি তদনুরূপামেব সংজ্ঞাং লাবকপাচকাদিকাং লভতে, তদ্বদ্বাতাদযঃ|

Adhikarana prANasya sthAnakarmANi (4-5) · Śloka 5

প্রাণোঽত্র মূর্ধগঃ| উরঃকণ্ঠচরো বুদ্ধিহৃদযেন্দ্রিযচিত্তধৃক্||৪|| ষ্ঠীবনক্ষবথূদ্গারনিঃশ্বাসান্নপ্রবেশকৃত্| |৫|

স০-অত্র-এষু মধ্যে, প্রাণো বাযুর্মূর্ধগঃ-শিরসি স্থিতঃ, উরঃ কণ্ঠং চ চরতি| তথা, বুদ্ধ্যাদীনাং ধারকঃ| তথা, ষ্ঠীবনাদিক্রিযঃ| ষ্ঠীবনং- মুখস্রাবোদ্গারঃ| ষ্ঠীবনমিতি "ষ্ঠীবের্ল্যুটি ষ্ঠীবিসিব্যোর্দীর্ঘশ্চ" ইতি পৃষোদরাদিপাঠাদ্দীর্ঘঃ|

Adhikarana udAnasya sthAnakarmANi (5-6) · Śloka 6

| উরঃ স্থানমুদানস্য নাসানাভিগলাংশ্চরেত্||৫|| বাক্প্রবৃত্তিপ্রযত্নোর্জাবলবর্ণস্মৃতিক্রিযঃ| |৬|

স০-উদানস্য প্রধানমুরঃ স্থানম্, নাসাদীংশ্চ চরতি| বাক্প্রবৃত্ত্যাদিক্রিযঃ| প্রযত্নঃ-কার্যেষু পদার্থগ্রহণাদিষূদ্যমঃ|

Adhikarana vyAnasya sthAnakarmANi (6-7) · Śloka 7

| ব্যানো হৃদি স্থিতঃ কৃত্স্নদেহচারী মহাজবঃ||৬|| গত্যপক্ষেপণোত্ক্ষেপনিমেষোন্মেষণাদিকাঃ| প্রাযঃ সর্বাঃ ক্রিযাস্তস্মিন্ প্রতিবদ্ধাঃ শরীরিণাম্||৭||

স০-ব্যানো হৃদযে স্থিতঃ প্রাধান্যেন কৃত্স্নে-সর্বস্মিন্, শরীরে চরতি| তথা, মহাজবঃ-শীঘ্রগতিঃ, প্রাণাদ্যপেক্ষযা| তথা, গত্যাদিকাঃ ক্রিযাঃ প্রাযঃ সর্বদেহিনাং তস্মিন্-ব্যানে, প্রতিবদ্ধাঃ-তদাযত্তাঃ| গতিঃ-চঙ্ক্রমণম্| অপক্ষেপণং-অঙ্গস্যাধোঅনযনম্| উত্ক্ষেপঃ- অঙ্গস্যোর্ধ্বনযনম্| নিমেষঃ-অক্ষ্ণোর্নিমীলনম্| উন্মেষঃ-তযোর্বিকাসঃ| আদিগ্রহণেন জৃম্ভণান্নাস্বাদনবিশোধনাদিপরিগ্রহঃ|

Adhikarana samAnasya sthAnakarmANi (8) · Śloka 8

সমানোঽগ্নিসমীপস্থঃ কোষ্ঠো চরতি সর্বতঃ| অন্নং গৃহ্ণাতি পচতি বিবেচযতি মুঞ্চতি||৮||

স০-সমানো বাযুরগ্নিসমীপস্থঃ| সামান্যোক্তাবপি প্রাধান্যাত্পাচকোঽগ্নির্গৃহ্যতে| অত এবাহ-কোষ্ঠে চরতি সর্বত ইত্যাদি| সর্বস্মিন্ কোষ্ঠে চরতি| স চান্নং গৃহ্ণাতি-অপক্বমামাশযে ধারযতীত্যর্থঃ| পচতি-অগ্নিসন্ধুক্ষণাদ্ভক্তকার ইব| বিবেচযতি-সংহতমন্নং পাকায বিভজতে| মুঞ্চতি-শকৃন্মূত্রাদিরূপমধঃ|

Adhikarana apAnasya sthAnakarmANi (9) · Śloka 9

অপানোঽপানগঃ শ্রোণিবস্তিমেঢ্রোরুগোচরঃ| শুক্রার্তবশকৃন্মূত্রগর্ভনিষ্ক্রমণক্রিযঃ||৯||

স০-অপানো বাযুরপানং প্রাধান্যেনাশ্রিতঃ, শ্রোণ্যাদিচরঃ, শুক্রাদিনিষ্ক্রমণক্রিযঃ| ইতি বাতভেদাঃ পঞ্চ|

Adhikarana pittaM pa~jcAtmakam (10) · Śloka 10

পঞ্চ পিত্তভেদানাহ - - - - পিত্তং পঞ্চাত্মকম্| |১০|

স০-পাচকরঞ্জকসাধকালোচকভ্রাজকভেদাঃ পঞ্চ পিত্তস্য|

Adhikarana pAcakasya sthAnakarmANi (10-12) · Śloka 12

তত্র পক্বামাশযমধ্যগম্| পঞ্চভূতাত্মকত্বেঽপি যত্তৈজসগুণোদযাত্||১০|| ত্যক্তদ্রবত্বং পাকাদিকর্মণাঽনলশব্দিতম্| পচত্যন্নং বিভজতে সারকিট্টৌ পৃথক্ তথা||১১|| তত্রস্থমেব পিত্তানাং শেষাণামপ্যনুগ্রহম্| করোতি বলদানেন পাচকং নাম তত্স্মৃতম্||১২||

স০-তত্র-তেষু পঞ্চসু মধ্যে, পক্বামাশযযোর্মধ্যস্থং যত্পিত্তং তথা পঞ্চভূতাত্মকত্বেঽপি সতি যত্তৈজসগুণোদযাত্-আগ্নেযগুণোত্কর্ষাত্, ক্ষপিতসোমগুণত্বেন ত্যক্তদ্রবত্বং-সঞ্জাতকাঠিন্যম্, তথা সহকারিকারণৈঃ পাচনক্রিযাং প্রতি সব্যাপারৈর্বায্বাদিভিরনুগ্রহাদুপকারাত্ যতঃ পাকদাহাদিক্রিযযাঽনলশব্দিতং-অগ্নিশব্দবাচ্যং যত্পিত্তং তত্পাচকমুচ্যতে| তচ্চান্নং পচতি| সারকিট্টৌ পৃথগ্ বিভজতে-বিভাগীকরোতি| কিট্টশব্দস্য লোকাশ্রযত্বাল্লিঙ্গস্যেতি পুংস্ত্বম্| তত্রস্থমেব-পক্বামাশযমধ্যগমেব, শেষাণাং-রঞ্জকাদীনাং ধাতুস্থানাং চ, অনুগ্রহং-উপকারং করোতি| বলদানেন-সামর্থ্যাধানেন, স্বস্থানস্থমেব তেষূপকুরুত ইত্যর্থঃ|

Adhikarana ra~jjakasya sthAnakarmANi (13) · Śloka 13

আমাশযাশ্রযং পিত্তং রঞ্জকং রসরঞ্জনাত্| |১৩|

স০-যত্ত্বামাশযস্থং পিত্তং তদ্রসাখ্যধাতো রঞ্জনাত্রাগনিষ্পাদনাত্, রঞ্জকমুচ্যতে|

Adhikarana sAdhakasya sthAnakarmANi (13-14) · Śloka 14

| বুদ্ধিমেধাভিমানাদ্যৈরভিপ্রেতার্থসাধনাত্||১৩|| সাধকং হৃদ্গতং পিত্তং| |১৪|

স০-যত্তু হৃদ্গতং-হৃদযস্থং পিত্তং তদ্বুদ্ধ্যাদিভিঃ করণ্ভূতৈরভিপ্রেতস্যার্থস্য বাহ্যগ্রহণস্মরণাদিরূপেণ সাধনাত্ সাধকমুচ্যতে| বর্তমানকালে যা মনোর্থসংশযস্য নিশ্চযং কর্তুং তদর্থাধ্যবসাযোপারূঢা সা-বুদ্ধিঃ| বুদ্ধিবিশেষো-মেধা|

Adhikarana Alocakasya sthAnakarmANi (14) · Śloka 14

রূপালোচনতঃ স্মৃতম্| দৃক্স্থমালোচকং|১৪|

স০-দৃষ্টিস্থং পিত্তং রূপালোচনাত্ (নতঃ)-অন্তস্তারকযোঃ স্থিতং তদাযত্তরূপগ্রহণশক্তিত্বাত্, আলোচকমুচ্যতে|

Adhikarana bhrAjakasya sthAnakarmANi (14) · Śloka 14

| ত্বক্স্থং ভ্রাজকং ভ্রাজনাত্ত্বচঃ||১৪||

স০-ত্বচো ভ্রাজনাত্-দীপনাত্, ভ্রাজকং নাম পিত্তম্| এতচ্চ পিত্তমভ্যঙ্গলেপপরিষেকাদীন্ পাচযতি|

Adhikarana shleShmA pa~jcavidhaH (15) · Śloka 15

শ্লেষ্মা তু পঞ্চধা| |১৫|

স০-শ্লেষ্মা তু পঞ্চধা,-পঞ্চপ্রকারঃ|

Adhikarana avalambakasya sthAnakarmANi (15-16) · Śloka 16

তদেব পঞ্চপ্রকারত্বমাহ - - - - উরঃস্থঃ স ত্রিকস্য স্ববীর্যতঃ| হৃদযস্যান্নবীর্যাচ্চ তত্স্থ এবাম্বুকর্মণা||১৫|| কফধাম্নাং চ শেষাণাং যত্করোত্যবলম্বনম্| অতোঽবলম্বকঃ শ্লেষ্মা|১৬|

স০-সঃ-শ্লেষ্মা, উরসি তিষ্ঠতীত্যুরঃস্থঃ, ত্রিকস্য-পৃষ্ঠাধা(ধ)রাখ্যস্য, স্ববীর্যতঃ-স্বপ্রভাবাত্, যত্-যস্মাত্, অবলম্বনং করোতি-স্বকর্মণি তস্য সামর্থ্যমুত্পাদযতি| হৃদযস্যান্নবীর্যাত্-অন্নবীর্যেণাভ্যবহৃতাদন্নাদ্রসরূপতাপরিণতাত্ তদ্বীর্যেণ-তদ্বলেনাবলম্বনং করোতি| চশব্দাত্ স্ববীর্যেণাপি হৃদযস্যাবলম্বনং করোতি| কিন্ত্বন্নবীর্যাদতিশযেন যথাঽবলম্বনং হৃদযস্য করোতি ন তথা স্ববীর্যতঃ| যতোঽন্নরসঃ পূর্বং হৃদি স্থিতিং কৃত্বা ততো ব্যানবিক্ষিপ্তঃ সর্বং শরীরং যাতি, তস্মাদ্বিশেষেণ হৃদযস্যান্নবীর্যাদবলম্বনং যুক্তম্| আগমোঽপি-"হৃদযং মনসঃ স্থানমোজসাশ্চিন্তিতস্য চ| মাংসপেশীচযো রক্তপদ্মাকারমধোমুখম্|| যোগিনো যত্র পশ্যন্তি সম্যগ্ জ্যোতিঃ সমাহিতাঃ| রসো যঃ স্বচ্ছতাং যাতঃ স তত্রৈবাবতিষ্ঠতে|| ততো ব্যানেন বিক্ষিপ্তঃ কৃত্স্নং দেহঃ প্রপদ্যতে|" ইতি| তথা, তত্স্থ এব-উরঃস্থ এব, এষ শ্লেষ্মা শেষাণাং কফস্থানানামম্বুকর্মণা-ক্লেদসংশ্লেষাদিলক্ষণেন জলব্যাপারেণ, অবলম্বনং করোতি| অতঃ-অস্মাদ্যথোক্তাদ্ধেতোঃ, অবলম্বকঃ শ্লেষ্মেত্যুচ্যতে|

Adhikarana kledakasya sthAnakarmANi (16-17) · Śloka 17

যস্ত্বামাশযসংস্থিতঃ||১৬|| ক্লেদকঃ সোঽন্নসঙ্ঘাতক্লেদনাত্| |১৭|

স০-যঃ পুনঃ শ্লেষ্মা আমাশযে স্থিতঃ, স ক্লেদক ইত্যুচ্যতে| কুতঃ ? অন্নসঙ্ঘাতক্লেদনাত্কারণাত্|

Adhikarana bodhakasya sthAnakarmANi (17) · Śloka 17

রসবোধনাত্| বোধকো রসনাস্থাযী|১৭|

স০-রসনাস্থাযী-জিহ্বাস্থো, বোধক ইত্যুচ্যতে, রসবোধনাত্ কারণাত্|

Adhikarana tarpakasya sthAnakarmANi (17-18) · Śloka 18

| শিরঃসংস্থোঽক্ষতর্পণাত্||১৭|| তর্পকঃ| |১৮|

স০-শিরঃস্থস্তর্পক ইত্যুচ্যতে, অক্ষতর্পণাদ্বেতোঃ|

Adhikarana shleShakasya sthAnakarmANi (18) · Śloka 18

সন্ধিসংশ্লেষাচ্ছ্লেষকঃ সন্ধিষু স্থিতঃ| |১৮|

স০-সন্ধিষু স্থিতঃ শ্লেষ্মা শ্লেষক ইত্যুচ্যতে, সন্ধিসংশ্লেষাত্ কারণাত্|

Adhikarana doShasthAnakarmaupasaMhAraH (18-19) · Śloka 19

এবং দোষাণাং স্থানান্যুক্ত্বোপসংহরন্নাহ - - - - | ইতি প্রাযেণ দোষাণাং স্থানান্যবিকৃতাত্মনাম্||১৮|| ব্যাপিনামপি জানীযাত্কর্মাণি চ পৃথক্পৃথক্| |১৯|

স০-প্রাযেণ-বাহুল্যেন, দোষাণামবিকৃতাত্মনাং-অপ্রচ্যুতস্বভাবানাম্, ইতি-উক্তপ্রকারাণি, স্থানানি ব্যাপিনামপি-সকলশরীরচরাণামপি, জানীযাত্| বৈদ্য ইতি শেষঃ| তথা, কর্মাণি পৃথক্পৃথক্-প্রত্যেকং কৃত্বা, জানীযাত্|

Adhikarana vAyucayakopayornidAnam (19-20) · Śloka 20

বিকৃতিরেষাং বৃদ্ধিঃ ক্ষযশ্চ| বৃদ্ধিরপি দ্বিবিধা,-চযপ্রকোপভেদেন| দোষাদিবিজ্ঞানীযে সামান্যেন বৃদ্ধিক্ষযলক্ষণমুক্তম্| সম্প্রতি চযপ্রকোপরূপং বৃদ্ধিনিদানং সঙ্ক্ষেপেণ সূচযন্নাহ - - - - - | উষ্ণেন যুক্তা রূক্ষাদ্যা বাযোঃ কুর্বন্তি সঞ্চযম্||১৯|| শীতেন কোপমুষ্ণেন শমং স্নিগ্ধাদযো গুণাঃ| |২০|

স০-উষ্ণেন গুণেন বিরুদ্ধেনোপহিতা রূক্ষাদযঃ-প্রথমাধ্যাযোক্তাঃ (শ্লো. ১১) ষড্বাতগুণাঃ, বাযোশ্চযং কুর্বন্তি, ন কোপমুষ্ণস্য বিরুদ্ধত্বাত্| ত এব চ রূক্ষাদযঃ শীতগুণোপহিতাস্তত্সদৃশত্বাদ্বাযোঃ কোপং কুর্বন্তি| উষ্ণেন যুক্তাঃ স্নিগ্ধাদযো গুণা বাযোঃ শমং কুর্বন্তি, বিপরীতত্বাত্|

Adhikarana pittacayakopayornidAnam (20-21) · Śloka 21

| শীতেন যুক্তাস্তীক্ষ্ণাদ্যাশ্চযং পিত্তস্য কুর্বতে||২০|| উষ্ণেন কোপং, মন্দাদ্যাঃ শমং শীতোপসংহিতাঃ| |২১|

স০-এবং পিত্তস্য শীতেন গুণেন যুক্তাস্তীক্ষ্ণাদযো গুণাশ্চযং কুর্বন্তি| ত এব তীক্ষ্ণাদযো গুণা উষ্ণেন সহিতাঃ কোপং কুর্বন্তি| মন্দাদযো গুণাঃ শীতগুণযুক্তাঃ শমং কুর্বন্তি, বিপরীতত্বাত্|

Adhikarana shleShmacayakopayornidAnam (21-22) · Śloka 22

| শীতেন যুক্তাঃ স্নিগ্ধাদ্যাঃ কুর্বতে শ্লেষ্মণশ্চযম্||২১|| উষ্ণেন কোপং, তেনৈব গুণা রূক্ষাদযঃ শমম্| |২২|

স০-শীতগুণোপহিতাঃ স্নিগ্ধাদযঃ কফস্য চযং কুর্বতে| উষ্ণেন যুক্তাস্ত এব স্নিগ্ধাদযঃ কফস্য কোপং কুর্বতে| তেনৈব-উষ্ণেন, যুক্তা রূক্ষাদযঃ কফস্য চ শমং কুর্বন্তি| কফস্য হি শীতগুণেন সদৃশেনাপি স্নিগ্ধাদিগুণযুক্তেন স্ত্যানত্বাচ্চযঃ স্যাত্| বিপরীতেনোষ্ণেন বিলযনাত্ কোপঃ| স এবোষ্ণো যদা রূক্ষাদিযুক্তো ভবতি তদা বিপরীতত্বাত্ শমো ভবতি|

Adhikarana cayalakShaNam (22-23) · Śloka 23

ইদানীং চযাদীনাং লক্ষণান্যাহ - - - - | চযো বৃদ্ধিঃ স্বধাম্ন্যেব প্রদ্বেষো বৃদ্ধিহেতুষু||২২|| বিপরীতগুণেচ্ছা চ| |২৩|

স০-স্বধাম্নীযে স্থানে দোষস্য যা বৃদ্ধিঃ স চয উচ্যতে| চিতস্য দোষস্য লিঙ্গমাহ-প্রদ্বেষ ইত্যাদি| যদা হি বাতশ্চিতো ভবতি তদা রূক্ষাদিষু তদ্গুণসামান্যেষু প্রদ্বেষঃ স্যাত্| তদ্বিপরীতগুণেষু স্নিগ্ধাদিষ্বভিলাষঃ স্যাত্| এবং কফপিত্তযোশ্চিতযোর্ব্যাখ্যেযম্| ননু, "প্রদ্বেষো বৃদ্ধিহেতুষু" ইত্যেকমেব লক্ষণং দোষচযসত্তানুমাপকং কর্তুং ন্যায্যম্| যদি বা "বিপরীতগুণেচ্ছা চ" ইত্যেতত্| কিং দ্বযোরূপাদানেন ? অত্রোচ্যতে| কদাচিদচিতোঽপি দোষো বাতাখ্যঃ স্বপ্রমাণস্থঃ ক্ষীণো বা যস্য স বাতবৃদ্ধিহেতূন্ রূক্ষাদীন্ন দ্বেষ্টি, অপি তু তানিচ্ছতি, সাত্ম্যবশাত্| যথা,-গর্ভিণী স্ত্রী দোহদবশাত্| তদেবং ব্যভিচারদর্শনাত্| প্রদোষো বৃদ্ধিহেতুষু" "বিপরীতগুণেচ্ছা চ" ইতি দ্বযমপি কর্তব্যম্| তেন যদা তুল্যকালং পুরুষস্য বাতসমানগুণেষু তদ্বৃদ্ধিহেতুষু প্রদ্বেষো জাযতে, বাতগুণপ্রতিপক্ষেষু তত্ক্ষপণহেতুষু চাভিলাষঃ, তদা সম্যক্ নিশ্চীযতে বাতস্যোপচিতিঃ, ইতি দ্বযমপ্যেতদুক্তম্|

Adhikarana kopalakShaNam (23-24) · Śloka 24

কোপস্তূন্মার্গগামিতা| লিঙ্গানাং দর্শনং স্বেষামস্বাস্থ্যং রোগসম্ভবঃ||২৩|| স্বস্থানস্থস্য সমতা বিকারাসম্ভবঃ শমঃ| |২৪|

স০-উন্মার্গগামিতা-স্বস্থানং ত্যক্ত্বা দোষস্য যত্ পুনর্মার্গান্তরগমনম্, স কোপ ইত্যুচ্যতে| কোপস্য তু লিঙ্গমাহ-লিঙ্গানাং স্বেষাং যথাযথং দর্শনং-উদ্ভবঃ| বাতাদীনাং কুপিতানাং যানি লিঙ্গানি দোষাদিবিজ্ঞানীযেঽভিহিতানি বাতব্যাধিনিদানে চ বক্ষ্যন্তে, তেষাং লক্ষণানামুপলব্ধিঃ, [ বৈদ্যেনাতুরেণ চ| যত্তত্ কোপস্য লিঙ্গম্| তথা, অস্বাস্থ্যং-উত্পিত্সুরোগেচ্ছযা সামান্যেন দেহমনোভিভূতত্বম্| তথা, রোগস্য-জ্বরাদেঃ, সম্ভবো-জন্ম| ননু, "লিঙ্গানাং দর্শনং স্বেষাম্" "অস্বাস্থ্যম্" "রোগসম্ভবঃ" ইতি কিং ত্রিতযমুদ্দিষ্টম্ ? একেনৈব দোষকোপাবগমাদেকমেবোপদেষ্টুং যুক্তম্| নৈবম্| ব্যভিচারদর্শনাত্| তথা হি বক্ষ্যতি পাণ্ডুরোগচিকিত্সিতে (শ্লো. ৪৬)- "রূক্ষশীতগুরুস্বাদুব্যাযামবলনিগ্রহৈঃ| কফসম্মূর্চ্ছিতো বাযুর্যদা পিত্তং বহিঃ ক্ষিপেত্||" ইত্যারভ্য যাবত্ "পিত্তে শাখাসমাশ্রিতে|" ইতি| তদেবমেষঃ কামলাখ্যো রোগঃ পিত্তলিঙ্গদর্শনাদপি ন পিত্তস্য কোপমনুপযাতি| অত এব পিত্তপ্রকোপকরং ভৃশাম্লতীক্ষ্ণকটুকাদি চিকিত্সিতমত্র নির্দিষ্টম্| অস্বাস্থ্যমিত্যেতদপি ন দোষকোপস্য নিশ্চিতং লিঙ্গম্| তথা হি-মানসেনাপি ভযশোকাদিনাঽস্বাস্থ্যং দৃশ্যতে| তথা, আগন্তবোঽপি রোগা দোষকোপমন্তরেণৈবোত্পদ্যমানা দৃশ্যন্তে| তস্মাদ্রোগসম্ভবাদপি দোষকোপোঽযমনিশ্চিতঃ| তদেবং লক্ষণত্রিতযেনৈবানেন দোষকোপো নিশ্চেতুং শক্যত ইতি ত্রিতযমপ্যেতদ্বক্তব্যম্| স্বস্থানস্থস্যেত্যাদি| স্বস্থানং-যথোদ্দিষ্টং পক্বাশযাদি| স্বস্থানাবস্থিতস্যৈব বাতাদিদোষস্য যা সমতা-স্বপ্রমাণত্বম্, বিকারস্য-রোগস্য, অসম্ভবঃ-অনুত্পত্তিঃ, স শম উচ্যতে|

Adhikarana vAtAdeshcayaprakopaprashamakAlaH (24-25) · Śloka 25

|ইদানীং বাতাদীনাং চযপ্রকোপপ্রশমা যস্মিন্ কালে জাযন্তে তং দর্শযন্নাহ -] | চযপ্রকোপপ্রশমা বাযোর্গ্রীষ্মাদিষু ত্রিষু||২৪|| বর্ষাদিষু তু পিত্তস্য, শ্লেষ্মণঃ শিশিরাদিষু| |২৫|

স০-বাতস্য গ্রীষ্মাদিষু ত্রিষু যথাসঙ্খ্যং চযপ্রকোপপ্রশমা জাযন্তে| গ্রীষ্মে বাযোশ্চযঃ, বর্ষাসু প্রকোপঃ, শরদি প্রশম ইতি| এবমগ্রেঽপি যোজ্যম্| বর্ষাদিষ্বিত্যাদি| অত্রাপি ত্রিষ্বিতি বর্ততে| বর্শাশরদ্ধেমন্তেষু ত্রিষু পিত্তস্য চযপ্রকোপপ্রশমা ভবন্তি| তথা, শিশিরাদিষু ত্রিষু-শিশিরবসন্তগ্রীষ্মেষু, শ্লেষ্মণশ্চযপ্রকোপপ্রশমা ভবন্তি|

Adhikarana kAlaniyame yuktiH (25-28) · Śloka 28

ননু মরুতো গ্রীষ্মে চযো ন যুক্তঃ, যতস্তস্মিন্কালে লঘুরূক্ষা ওষধযো ভবন্তি| তথা, বর্ষাসু পিত্তচযো ন যুক্তঃ, জলানামোষধীনাং চাম্লপাকত্বাত্| তথা, শ্লেষ্মণঃ শিশিরে চযো ন যুক্তঃ, তদা হ্যাপ ওষধযশ্চ স্নিগ্ধা ভবন্তি কালশ্চ শীতঃ| ইতি কোপ এবোপপন্নঃ| ইত্যস্মিন্ পর্যনুযোগ ইদমাহ - - - - | চীযতে লঘুরূক্ষাভিরোষধীভিঃ সমীরণঃ||২৫|| তদ্বিধস্তদ্বিধে দেহে কালস্যৌষ্ণ্যান্ন কুপ্যতি| অদ্ভিরম্লবিপাকাভিরোষধীভিশ্চ তাদৃশম্||২৬|| পিত্তং যাতি চযং কোপং ন তু কালস্য শৈত্যতঃ| চীযতে স্নিগ্ধশীতাভিরুদকৌষধিভিঃ কফঃ||২৭|| তুল্যেঽপি কালে দেহে চ স্কন্নত্বান্ন প্রকুপ্যতি| |২৮|

স০-গ্রীষ্মকালে বাতো লঘুরূক্ষাভিরোষধীভির্দেহে চাদানকালস্বাভাব্যাত্তদ্বিধে-লঘুরূক্ষে, তদ্বিধো-লঘুরূক্ষঃ, সমীরণ ইতি সমানগুণত্বাত্ পবনস্য কোপঃ প্রাপ্তঃ, স নিষিধ্যতে "কালস্যৌষ্ণ্যাত্" ইত্যনেন এবং পিত্তস্য বর্ষাসু কোপঃ, "ন তু কালস্য শৈত্যঃ" ইত্যনেন নিষিধ্যতে |

Adhikarana kAlAdAhArAdInAM balavatvam (28-29) · Śloka 29

| ইতি কালস্বভাবোঽযমাহারাদিবশাত্পুনঃ||২৮|| চযাদীন্ যান্তি সদ্যোঽপি দোষাঃ কালেঽপি বা ন তু| |২৯|

স০-ইতি-পূর্বোক্তঃ, অযং-বায্বাদিচযাদিঃ, কালস্য স্বভাবঃ| আহারাদিবশাত্-অন্নপানসামর্থ্যাত্, পুনর্দোষাঃ সদ্যোঽপি-তত্ক্ষণাদেব কালমনপেক্ষ্যৈব, চযাদীন্-চযপ্রকোপপ্রশমান্ যান্তি| তস্মাদেব চাহারাদিবশাত্ যথাস্বং চযাদিকালেঽপি বা দোষা ন তু চযাদীন্ যান্তি| তস্মাত্ কালাদাহারাদীনাং প্রাধান্যমিত্যর্থঃ|আহারাদীত্যত্রাদিশব্দেন রসাযনবাজীকরণবমনবিরেচনাদযো গৃহ্যন্তে|

Adhikarana prakopaprashamayoH kShipraciraniShpAdyatvam (29-30) · Śloka 30

এবং দোষাণাং চযাদীন্ প্রদর্শ্য, ব্যাপ্তিনিবৃত্তিবৈচিত্র্যং কোপজং দর্শযিতুমাহ - - - - | ব্যাপ্নোতি সহসা দেহমাপাদতলমস্তকম্||২৯|| নিবর্ততে তু কুপিতো মলোঽল্পাল্পং জলৌঘবত্| |৩০|

স০-মলঃ কুপিতঃ সহসা-শীঘ্হ্রমেব, আপাদতলমস্তকং ব্যাপ্নোতি,-পাদতলাদারভ্য যাবন্মস্তকমিত্যর্থঃ| আঙ্মর্যাদাভিবিধ্যোর্বিভক্ত্যর্থেঽব্যযীভাবঃ| নিবর্ততে পুনরল্পাল্পং-স্তোকং স্তোকমিতি| জলৌঘবত্-যথা গিরিনদ্যাদীনাং জলপূরঃ সমবিষমং সহসৈব ব্যাপ্নোতি, নিবর্ততে তু স্তোকং স্তোকমিতি|

Adhikarana vikArasya sAmAnyena hetvAdikam (30-31) · Śloka 31

ননু, প্রতিরোগং নিদানলক্ষণচিকিত্সিতমানন্ত্যাদ্বক্তুমশক্যম্| তচ্চাবিদন্ন কশ্চিদত্র তথা যত্নং কুর্যাদিত্যাশঙ্ক্যাহ - - - - | নানারূপৈরসঙ্খ্যেযৈর্বিকারৈঃ কুপিতা মলাঃ||৩০|| তাপযন্তি তনুং তস্মাত্তদ্ধেত্বাকৃতিসাধনম্| শক্যং নৈকৈকশো বক্তুমতঃ সামান্যমুচ্যতে||৩১||

স০-যত্তদোর্নিত্যসম্বন্ধাত্ যস্মাদিতি লভ্যতে| যস্মান্নানারূপৈঃ-অনেকপ্রকারৈঃ, অসঙ্খ্যেযৈঃ-গণনাং সমতীতৈঃ, বিকারৈঃ-জ্বরাদিভিঃ, মলা-বাতপিত্তশ্লেষ্মাণঃ, কুপিতাস্তনুং-দেহং, তাপযন্তি-দুঃখযন্তি| তস্মাত্তদ্ধেত্বাকৃতিসাধনং শক্যং নৈকৈকশো বক্তুং-অযমস্য বিকারস্য হেতুরিযমাকৃতিরিদং লক্ষণমিদমস্য সাধনং-চিকিত্সিতমিতি| অতঃ সামান্যমুচ্যতে|

Adhikarana doShANAM rogahetutve yuktiH (32-34) · Śloka 34

অত্রৈব হেত্বন্তরমাহ - - - - দোষা এব হি সর্বেষাং রোগাণামেককারণম্| যথা পক্ষী পরিপতন্ সর্বতঃ সর্বমপ্যহঃ||৩২|| ছাযামত্যেতি নাত্মীযাং যথা বা কৃত্স্নমপ্যদঃ| বিকারজাতং বিবিধং ত্রীন্ গুণান্নাতিবর্ততে||৩৩|| তথা স্বধাতুবৈষম্যনিমিত্তমপি সর্বদা| বিকারজাতং ত্রীন্দোষাণ্|৩৪|

স০-সর্বেষাং রোগাণাং যস্মাদ্দোষা এবৈককারণম্| একং-প্রধানং চ তত্কারণং-নিমিত্তমেককারণম্| যদি বা সর্বেষাং রোগাণাং দোষা একং-তুল্যং কারণম্, সমানং কারণমিত্যর্থঃ| এবশব্দোঽবধারণার্থঃ| দোষা এব কারণম্, নাপরং কিঞ্চিদ্বস্তুজাতম্| অত্র দৃষ্টান্তমাহ-যথেত্যাদি| পক্ষী-প্রাচিকাদিঃ, যথা সর্বতঃ-সমন্তাত্, পরিপতন্-ভ্রমন্, সর্বমপ্যহঃ-সকলমপি দিবসম্, আত্মীযাং ছাযাং নাত্যেতি-নাতিক্রামতি, তযা বিনা ক্ষণমপ্যসৌ নোপলভ্যত ইত্যর্থঃ| তথা অন্যদপি নিদর্শনমাহ-যথা বেত্যাদি| যথা বা কৃত্স্নং-নিরবশেষম্, এতদ্বিকারজাতং-স্থাবরজঙ্গমাদিভেদভিন্নং জরাযুজাণ্ডজাদিভেদভিন্নং বা, বিবিধং-নানাপ্রকারং, ত্রীন্ গুণান্-সত্ত্বরজস্তমঃসংজ্ঞান্, নাতিবর্ততে-নাত্যেতি, ত্রিভিরেতৈর্বিরহিতং ন জাতুচিদ্ভবতীত্যর্থঃ| তথা স্বধাত্বিত্যাদি| ধাতবো-দোষধাতুমলাঃ শরীরধারণসামান্যাত্, তেষাং বৈষম্যং-স্বলক্ষণতোঽন্যথাত্বম্, স্বধাতুবৈষম্যং নিমিত্তং যস্য তদ্বিকারজাতং ত্রীন্ দোষানাতিক্রামতি, ত্রিদোষরহিতং ন সম্ভবতীত্যর্থঃ| ধাতুবৈষম্যং চ প্রতিরোগমন্যাদৃশত্বান্নানাবিধম্| যত্তু যেন ধাতুবৈষম্যেণ জন্যতে, তত্তস্য স্বং-স্বীযং ভবতি| যেষাং তু রোগাণাং দেবগ্রহাদি নিমিত্তং ন তেষু তথা দোষানুবন্ধঃ, আগন্তুকত্বাত্| আগন্তুকনিজযোর্হ্যযমেব ভেদঃ,-যদাগন্তুকেষু প্রথমং রোগোদ্ভূতিঃ পশ্চাদ্দোষানুবন্ধঃ, নিজেষু প্রাগ্দোষানুবন্ধ ইতি| যে তু ব্যাচক্ষতে,-স্বে চ তে ধাতবশ্চ তেষাং বৈষম্যমিতি| তেষাং নাযমর্থঃ প্রতিপাদিতঃ স্যাত্| স্বগ্রহণং চাতিরিচ্যতে| যতঃ শরীরান্তরাবস্থাযিনো দোষা বাতাদযঃ শরীরান্তরে রোগং জনযিতুং নালম্| তস্মাত্পূর্বমেব ব্যাখ্যানং শ্রেযঃ|

Adhikarana asAtmyaviShayasevA duShkAlo duShkarma ceti doShakopahetuH (34-35) · Śloka 35

| তেষাং কোপে তু কারণম্||৩৪|| অর্থৈরসাত্ম্যৈঃ সংযোগঃ কালঃ কর্ম চ দুষ্কৃতম্| হীনাতিমিথ্যাযোগেন ভিদ্যতে তত্পুনস্ত্রিধা||৩৫||

স০-তেষাং-বাতাদীনাং, কোপে কারণম্,-অসাত্ম্যৈঃ-অনুচিতৈঃ, অর্থৈঃ-শব্দস্পর্শরূপরসগন্ধাখ্যৈঃ, শ্রোত্রত্বক্চক্ষূরসনঘ্হ্রাণাখ্যানামিন্দ্রিযাণাং যঃ সংযোগঃ, তথা কালঃ-শীতোষ্ণবর্ষালক্ষণো দুষ্টঃ, তথা কর্ম-চৈহিকমন্যজন্মজং চ, যদ্ দুষ্কৃতং-অশুভম্, এতত্ত্রযং তেষাং দোষাণাং কোপে হেতুঃ| তুশব্দঃ সমুচ্চযে| ন কেবলং রূক্ষাদযো বাতাদীনাং কোপে কারণম্, যাবদসাত্ম্যেন্দ্রিযার্থসংযোগাদিরপি| এতচ্চ (তত্)- পূর্বোক্তং দোষকোপকারণমসাত্ম্যেন্দ্রিযার্থসংযোগাদিভেদেন ত্রিধা ভিন্নমপি, পুনঃ-ভূযঃ, ত্রিধা-ত্রিপ্রকারং, ভিদ্যতে| কথম্ ? হীনাতিমিথ্যাযোগভেদেন|

Adhikarana asAtmyaviShayasevAyA hInamithyAtiyogAH (36-38) · Śloka 38

তানেব হীনাতিমিথ্যাযোগান্ দর্শযন্নাহ - - - - হীনোঽর্থেনেন্দ্রিযস্যাল্পঃ সংযোগঃ স্বেন নৈব বা| অতিযোগোঽতিসংসর্গঃ, সূক্ষ্মভাসুরভৈরবম্||৩৬|| অত্যাসন্নাতিদূরস্থং বিপ্রিযং বিকৃতাদি চ| যদক্ষ্ণা বীক্ষ্যতে রূপং মিথ্যাযোগঃ স দারুণঃ||৩৭|| এবমত্যুচ্চপূত্যাদীনিন্দ্রিযার্থান্ যথাযথম্| বিদ্যাত্|৩৮|

স০-অর্থেন-শব্দাদিনা, স্বেনেন্দ্রিযস্য-শ্রোত্রাদেঃ, অল্পো যঃ সংযোগঃ স হীনঃ-হীনযোগঃ| নৈব বেতি| অথবা সর্বসর্বিকযা তেনার্থেন ন সংযোগঃ, সোঽপি হীনযোগঃ| তস্যৈবেন্দ্রিযস্য স্বেনার্থেন যোঽতিসংসর্গঃ-অতিসেবালক্ষণঃ, স তস্য স্বেনার্থেনাতিযোগঃ| তথা, সূক্ষ্মভাসুরভৈরবমিত্যাদি যদক্ষ্ণা বীক্ষ্যতে-নযনেনালোক্যতে, স তস্য চক্ষুরিন্দ্রিযস্য স্বেনার্থেন মিথ্যাযোগঃ| এবমনযা দিশা সূক্ষ্মভাসুরভৈরবম্, তথা অত্যাসন্নাতিদূরস্থং বিপ্রিযং বিকৃতাদি চ যদক্ষ্ণা রূপং বীক্ষ্যতে, স দারুণো মিথ্যাযোগঃ, তিমিরাদিহেতুত্বাত্| এবং-অনযা চক্ষুষো রীত্যা, অন্যানপীন্দ্রিযার্থান্ যথাস্বমিন্দ্রিযাণামত্যুচ্চপূত্যাদীন্ মিথ্যাযোগরূপান্ বিদ্যাত্| যদাঽত্যুচ্চপরুষেষ্টবিনাশভীষণাদ্যনিষ্টঃ শব্দঃ শ্রোত্রেন্দ্রিযেণ গৃহ্যতে, তদা শ্রোত্রেন্দ্রিযস্য স্বেনার্থেন শব্দাখ্যেন মিথ্যাযোগঃ| যদা পূতিবিষ্ঠাদ্যনিষ্টো গন্ধো ঘ্রাণেন্দ্রিযেণ গৃহ্যতে, তদা ঘ্রাণেন্দ্রিযস্য স্বেনার্থেন গন্ধাখ্যেন মিথ্যাযোগঃ| যদা স্নানানুলেপনাদীনাং শীতোষ্ণাদীনাং চ স্পৃশ্যানামক্রমসেবনেন স্পর্শঃ স্পর্শনেন্দ্রিযেণ গৃহ্যতে, তদা স্পর্শনেন্দ্রিযস্য স্বেনার্থেন স্পর্শাখ্যেন মিথ্যাযোগঃ| তথা, রসনেন্দ্রিযেণ যো রসোঽপরিপাট্যা যুজ্যতে, তথাঽপথ্যদ্রব্যনিবিষ্টোঽপি যো রসো রসনেন্দ্রিযেণ গৃহ্যতে, স তস্য রসনেন্দ্রিযস্য স্বেন রসাখ্যেনার্থেন মিথ্যাযোগঃ|

Adhikarana kAlasya traividhyam (38-39) · Śloka 39

কালস্তু শীতোষ্ণবর্ষাভেদাত্ত্রিধা মতঃ||৩৮|| স হীনো হীনশীতাদিরতিযোগোঽতিলক্ষণঃ| মিথ্যাযোগস্তু নির্দিষ্টো বিপরীতস্বলক্ষণঃ| ||৩৯||

স০-কালঃ পুনঃ শীতোষ্ণবর্ষাভেদেন ত্রিধা-ত্রিপ্রকারো মতো মুনীনাম্| তত্র হেমন্তশিশিরলক্ষণঃ-শীতঃ| উষ্ণো-বসন্তগ্রীষ্মলক্ষণঃ| প্রাবৃট্শরল্লক্ষণো-বর্ষাখ্যঃ| স চ কালো হীনশীতাদির্হিনযোগলক্ষণঃ| অতিযোগোঽতিমাত্রযোগলক্ষণঃ| বিপরীতং স্বং-শীতোষ্ণবর্ষাখ্যং, লক্ষণং যস্য কালস্য, স বিপরীতস্বলক্ষণো মিথ্যাযোগঃ| গুণগুণিনোরভেদোপচারাত্ কাল এবমুচ্যতে| তত্র যথা,-হেমন্তে শীতস্যাল্পত্বং হীনো যোগঃ, তস্মিন্নেব হেমন্তেঽতিশৈত্যমতিযোগঃ, তস্মিন্নেব হেমন্ত ঔষ্ণ্যং মিথ্যাযোগঃ| উপলক্ষণং চেদম্| এবং শরদ্বসন্তযোরপি যন্মন্দবর্ষোষ্ণত্বং স্বলক্ষণং তদ্যদা হীনতরং স্যাত্, সোঽপি হীনযোগঃ| এবমতিযোগা (গমিথ্যা) যোগযোরপি যোজ্যম্|

Adhikarana karmaNo~api traividhyam (40-43) · Śloka 43

কাযবাক্চিত্তভেদেন কর্মাপি বিভজেত্ত্রিধা| কাযাদিকর্মণো হীনা প্রবৃত্তির্হীনসংজ্ঞকঃ||৪০|| অতিযোগোঽতিবৃত্তিস্তু, বেগোদীরণধারণম্| বিষমাঙ্গক্রিযারম্ভপতনস্খলনাদিকম্||৪১|| ভাষণং সামিভুক্তস্য রাগদ্বেষভযাদি চ| কর্ম প্রাণাতিপাতাদি দশধা যচ্চ নিন্দিতম্||৪২|| মিথ্যাযোগঃ সমস্তোঽসাবিহ বাঽমুত্র বা কৃতম্| |৪৩|

স০-যথা কালস্ত্রিধা নিরূপিতঃ, তথা কর্মাপি কাযবাক্চিত্তভেদেন ত্রিপ্রকারং বিভজেত্| তত্র কাযকর্মণস্তথা বাক্কর্মণস্তথা চিত্তকর্মণো হীনা যা প্রবৃত্তিঃ স হীনসংজ্ঞকো যোগঃ| অতিপ্রবৃত্তিস্ত্বতিযোগঃ| কাযাদিকর্মণো মিথ্যাযোগমধিকৃত্যাহ-বেগোদীরণেত্যাদি| "বেগোদীরণধারণম্" ইত্যারভ্য যাবত্ "পতনস্খলনাদিকম্" যদেতত্ কাযিকং কর্ম, তস্য কর্মণ এবংরূপস্য যা প্রবৃত্তিঃ স কাযকর্মণো মিথ্যাযোগঃ| বিষমাঙ্গৈঃ ক্রিযা-কর্ম, বিষম আরম্ভঃ-উভযলোকবিরুদ্ধঃ, তথা, বিষমপতনম্, বিষমস্খলনম্, আদিশব্দেন বিষমগমনাদীনাং গ্রহণম্| সামিভুক্তস্য-অর্ধভুক্তস্য, যদ্ভাষণং-জল্পনম্, এবংরূপা যা প্রবৃত্তিঃ স বাক্কর্মণো মিথ্যাযোগঃ| রাগদ্বেষভযাদি যদেতন্মানসং কর্ম, তস্য কর্মণ এবংরূপা যা প্রবৃত্তিঃ স চিত্তকর্মণো মিথ্যাযোগঃ| তথা, দিনচর্যাধ্যাযোক্তং যত্প্রাণাতিপাতাদি দশধা-দশপ্রকারং, কর্ম নিন্দিতং-অশুভং নির্দিষ্টং "হিংসাস্তেয" ইত্যাদিনা গ্রন্থেন, তচ্চ যথাযথং কাযবাক্চিত্তানাং কর্মণাং মিথ্যাযোগঃ| সমস্তোঽসাবিহ বাঽমুত্র বা কৃতং-অস্মিন্ লোকে কৃতমন্যত্র বা লোকে কৃতং-আচরিতং সর্বমেবং মিথ্যাযোগঃ|

Adhikarana doShahetorupasaMhAraH, doShaheto rogahetutvam (43-44) · Śloka 44

| নিদানমেতদ্দোষাণাং, কুপিতাস্তেন নৈকধা||৪৩|| কুর্বন্তি বিবিধান্ ব্যাধীন্ শাখাকোষ্ঠাস্থিসন্ধিষু| |৪৪|

স০-নিদানমেতদ্দোষাণাং 'কোপে' ইতি বাক্যশেষঃ| কুপিতাস্তেন-নিদানেন, নৈকধা| কিং তর্হি ? অনেকপ্রকারেণ, ব্যাধীন্ বিবিধান্-নানাপ্রকারান্ কুর্বন্তি| কুপিতা দোষা ইতি বচন (বিভক্তি) বিপরিণামেন সম্বন্ধঃ| ক্ব ব্যাধীন্ কুর্বন্তি ? ইত্যাহ-শাখেত্যাদি| শাখাশ্চ কোষ্ঠশ্চাস্থীনি চ সন্ধযশ্চ তেষু|

Adhikarana shAkhAH, bAhyo rogamArgaH (44-45) · Śloka 45

শাখেতি কিমুচ্যতে| ইত্যাহ - - - - | শাখা রক্তাদযস্ত্বক্ চ বাহ্যরোগাযনং হি তত্||৪৪|| তদাশ্রযা মষব্যঙ্গগণ্ডালজ্যর্বুদাদযঃ| বহির্ভাগাশ্চ দুর্নামগুল্মশোফাদযো গদাঃ||৪৫||

স০-শাখা রক্তাদযঃ ষড্ধাতবস্ত্বক্ চ| তদ্বাহ্যরোগাযনং,-বাহ্যানাং রোগাণামযনং-স্থানম্| হিশব্দো যস্মাদর্থে| যস্মাদ্বাহ্যানাং রোগাণামযনম্, অতস্তদাশ্রযা মষব্যঙ্গাদযো রোগা বহির্ভাগা উচ্যতে| আদিশব্দেন বিসর্পবিদ্রধ্যাদীনাং পরিগ্রহঃ| দুর্নামেত্যাদি| বহির্ভাগাশ্চেত্যত্র চ শব্দো ভিন্নক্রমঃ, শোফাদয ইত্যস্মাদনন্তরং দ্রষ্টব্যঃ| দুর্নামগুল্মশোফাদযশ্চ বহির্ভাগা ইত্যর্থঃ|

Adhikarana koShThaH, Antaro rogamArgaH (46-47) · Śloka 47

অন্তঃকোষ্ঠো মহাস্রোত আমপক্বাশযাশ্রযঃ| তত্স্থানাঃ চ্ছর্দ্যতীসারকাসশ্বাসোদরজ্বরাঃ||৪৬|| অন্তর্ভাগং চ শোফার্শোগুল্মবীসর্পবিদ্রধি| |৪৭|

স০-কোষ্ঠঃ কথ্যতে অন্তঃ, তথা মহাস্রোতঃ, তথা আমপক্বাশযাশ্রযঃ| তত্স্থানাঃ-অন্তর্ভাগাশ্রযাঃ চ্ছর্দ্যাদযো রোগাঃ| ন কেবলমেতে এব ছর্দ্যাদযোঽন্তর্ভাগাশ্রযা যাবচ্ছোফার্শোগুল্মবীসর্পবিদ্রধ্যাদীনাং অন্তর্ভাগত্বং চ| শোফাদীনাং বিদ্রধ্যন্তানাং সমাহারদ্বন্দ্বনির্দেশেনৈব সম্বন্ধঃ|

Adhikarana asthisandhayaH, madhyamo rogamArgaH (47-49) · Śloka 49

ইদানীং মধ্যমং রোগমার্গং বক্তি - - - - | শিরোহৃদযবস্ত্যাদিমর্মাণ্যস্থ্নাং চ সন্ধযঃ||৪৭|| তন্নিবদ্ধাঃ শিরাস্নাযুকণ্ডরাদ্যাশ্চ মধ্যমঃ| রোগমার্গঃ স্থিতাস্তত্র যক্ষ্মপক্ষবধার্দিতাঃ||৪৮|| মূর্ধাদিরোগাঃ সন্ধ্যস্থিত্রিকশূলগ্রহাদযঃ| |৪৯|

স০-শিরোহৃদযাদীনি মধ্যমো রোগমার্গঃ| অস্থ্নাং চ সন্ধয ইত্যেবং নির্দেশেনেদং বোধযতি,-নাত্র দ্বযং বিবক্ষিতমস্থীনি চ সন্ধযশ্চেতি, কিং তর্হি ? অস্থ্নাং সম্বন্ধিনঃ সন্ধয ইতি| সন্ধযো হ্যন্যেঽপি সন্তি| তথা চ বক্ষ্যতি (হৃ. শা. অ. ৪|৩৮) - "মাংসাস্থিস্নাযুধমনীসিরাসন্ধিসমাগমঃ|" ইতি| তন্নিবদ্ধাঃ,-তেষু-অস্থিসন্ধিষু, নিবদ্ধাঃ, সংলগ্না ইত্যর্থঃ| শিরাঃ স্নাযবঃ কণ্ডরাশ্চ আদযো (আদ্যা) যেষাং ধমনীকূর্চাদীনাং তে| চ শব্দাত্ পূর্বোক্তাশ্চ| তত্র-মধ্যমে রোগমার্গে, যক্ষ্মাদযো গদাস্ত্রিকশূলগ্রহাদ্যন্তাঃ| মূর্ধাদীত্যত্রাদিশব্দেন হৃদযবস্ত্যাদিপরিগ্রহঃ| সন্ধ্যস্থিত্রিকে শূলানি, সন্ধ্যস্থিত্রিকে গ্রহা ইতি যোজ্যম্| আদিশব্দেন পক্ষগ্রহাদযো বাতবিকারা গৃহ্যন্তে| যক্ষ্মণোঽত্র মর্মাস্থিসন্ধ্যধিষ্ঠানত্বাত্পূর্বং নির্দেশঃ| বক্ষ্যতি হি (হৃ. নি. অ. ৫|৫) - "তৈরুদীর্ণোঽনিলঃ পিত্তং কফং চোদীর্য সর্বতঃ| শরীরসন্ধীনাবিশ্য তান্ শিরাশ্চ প্রপীডযন্||" ইত্যাদি|

Adhikarana vAyoH karmANi (49-51) · Śloka 51

ইদানীং বাযোঃ কর্মাণ্যাহ - - - - | স্রংসব্যাসব্যধস্বাপসাদরুক্তোদভেদনম্||৪৯|| সঙ্গাঙ্গভঙ্গসঙ্কোচবর্তহর্ষণতর্ষণম্| কম্পপারুষ্যসৌষির্যশোষস্পন্দনবেষ্টনম্||৫০|| স্তম্ভঃ কষাযরসতা বর্ণঃ শ্যাবোঽরুণোঽপি বা| কর্মাণি বাযোঃ|৫১|

স০-স্রংসো-হন্বাদিসন্ধের্ভ্রংশঃ| ব্যসনং-ব্যাসো, বিক্ষেপণমঙ্গপ্রত্যঙ্গাদের্যথাঽঽক্ষেপকাদিষু| ব্যধঃ-তাডনমিব মুদ্গরাদিনা| স্বাপঃ-সুপ্তিঃ কর্মণ্যচৈতন্যম্| সদনং-সাদঃ, অঙ্গানাং ক্রিযাস্বসামর্থ্যম্| রুক্-সততং শূলম্| তোদো-বিচ্ছিন্নং শূলম্| ভেদনং-ভেদো, বিদারণমিবাঙ্গস্য| সঙ্গো-মূত্রপুরীষাদেঃ স্বাশযেভ্যোঽনিঃসারো বাক্সঙ্গাদযশ্চ| অঙ্গানাম্-জঙ্ঘোরুপ্রভৃতীনাং, ভঙ্গ ইব ভঙ্গঃ-চূর্ণনমিব,-অঙ্গভঙ্গঃ| সঙ্কোচনং-সঙ্কোচঃ, শিরাদীনাম্| বর্তনং-বর্তঃ, পুরীষাদীনাং পিণ্ডীকরণম্| হর্ষণং-রোম্ণামূর্ধ্বীভাবঃ| তর্ষণং-তর্ষঃ, তৃট্| কম্পঃ-অতিবেপনম্| স্পন্দনং হি-কিঞ্চিচ্চলনম্| পারুষ্যং-পরুষত্বম্| সৌষির্যং-অস্থ্নাম্| শোষঃ-শোষণম্| বেষ্টনং-গ্রথনমিবাঙ্গস্য| স্তম্ভো-বাহূরুজঙ্ঘাদীনাং সঙ্কুঞ্চনাদ্যভাবঃ| কষাযরসতা-কষাযরসাস্বাদত্বম্| বর্ণঃ শ্যাবোঽরুণোঽপি বা-শ্যাবারুণৌ বর্ণাবিত্যর্থঃ| এতানি বাযোঃ কর্মাণি|

Adhikarana pittasya karmANi (51-52) · Śloka 52

অথ পিত্তস্যাহ - - - - | পিত্তস্য দাহরাগোষ্মপাকিতাঃ||৫১|| স্বেদঃ ক্লেদঃ স্রুতিঃ কোথঃ সদনং মূর্চ্ছনং মদঃ| কটুকাম্লৌ রসৌ বর্ণঃ পাণ্ডুরারুণবর্জিতঃ||৫২||

স০-দাহাদীনি পিত্তস্য কর্মাণি| সর্বাঙ্গীণস্তাপো-দাহঃ| রাগো-লৌহিত্যম্| ঊষ্মা-ঔষ্ণ্যম্| পাকিতা-পাককর্তৃত্বম্, অজীর্ণেষু ব্রণেষ্বন্নে চ| স্বেদনং-স্বেদঃ| ক্লেদঃ-শোণিতাদিবিকারঃ| স্রুতিঃ-স্রাবঃ| কোথঃ-ক্লেদস্যাতিশযঃ, অবিচ্ছিন্নত্বম্| সদনং-সাদঃ| মূর্চ্ছনং-ভ্রমঃ| মদো-বক্ষ্যমাণো রোগবিশেষঃ| রসৌ-আস্বাদৌ, কটুকাম্লৌ| বর্ণঃ পাণ্ডুরারুণাভ্যামন্যঃ-শুক্ললোহিতবর্ণনিষেধেন তচ্ছেষনানাবর্ণসম্ভবঃ সূচ্যতে|

Adhikarana shleShmaNaH karmANi (25) · Śloka 54

শ্লেষ্মকর্মাণ্যাহ - - - - শ্লেষ্মণঃ স্নেহকাঠিন্যকণ্ডূশীতত্বগৌরবম্| বন্ধোপলেপস্তৈমিত্যশোফাপক্ত্যতিনিদ্রতাঃ||৫৩|| বর্ণঃ শ্বেতো রসৌ স্বাদুলবণৌ চিরকারিতা| |৫৪|

স০-কফস্য স্নেহাদীনি কর্মাণি| স্নেহঃ-স্নৈগ্ধ্যম্| কাঠিন্যং-অমৃদুত্বম্| কণ্ডূঃ-খর্জূঃ| শীতত্বং-শীতসদ্ভাবঃ| গৌরবং-গুরুত্বম্| বন্ধঃ-স্রোতসাম্| অস্থ্যাদীনামুপলেপঃ| স্তৈমিত্যং-গাত্রাণামপটুত্বম্| কাযে বর্ণঃ শুক্লঃ| রসৌ চ মধুরপটূ| চিরকারিতা-কার্যাদৌ বিশ্রব্ধত্বম্| ননু, বাযোরমূর্তত্বাদ্বর্ণরসত্বোপলব্ধিরনুপপন্না| অমূর্তস্য হি বর্ণরসৌ দূরোত্সারিতৌ| নৈতদস্তি| ন হি সর্বাণি কার্যাণি কারণসদৃশান্যেব ভবন্তি| তথা চেন্দ্রিযেভ্যো জডেভ্যো বুদ্ধেরজডাযা উত্পত্তির্দৃষ্টা| তস্মাত্ কারণসদৃশানি কার্যাণীতি প্রাযিকমেতত্, অচিন্ত্যত্বাচ্চ দ্রব্যপ্রভাবস্য| বাযোঃ সকাশাত্ কষাযরসতা শ্যাবারুণবর্ণোত্পত্তিশ্চান্বযব্যতিরেকসিদ্ধা কথমিব নিবার্যতাম্| ইত্যেবং দোষাণাং কর্মাণ্যুপদিষ্টানি| তদ্বিকারাশ্চ সঙ্গ্রহ উক্তাঃ| তথা চ তদ্গ্রন্থঃ (?) (সূ. অ. ২০) -"অশীতির্বাতজা রোগাশ্চত্বারিংশচ্চ পিত্তজাঃ| বিংশতিঃ শ্লেষ্মজাশ্চৈব স্থূলা নানাত্মজা মতাঃ|| ১|| নখভেদঃ পাদশূলং সুপ্তির্ভ্রংশো বিপাদিকা| খুডো গুল্ফগ্রহো জানুবিশ্লেষো জানুকুঞ্চনম্|| ২|| পিণ্ডিকোদ্বেষ্টনং সাদশ্চোর্বোঃ স্তম্ভশ্চ গৃধ্রসী| পাঙ্গুল্যং ভ্রংশশূলং চ গুদে স্তম্ভস্তু মেহনে|| ৩|| মুষ্কাক্ষেপঃ শ্রোণিভেদো বঙ্ক্ষণানাহ এব চ| উদাবর্তোঽথ বিড্মেদঃ পার্শ্বপৃষ্ঠত্রিকগ্রহাঃ|| ৪|| খঞ্জবামনকুব্জত্বং হৃদ্দ্রবোদরবেষ্টকৌ| হৃন্মোহো বক্ষনিস্তোদঃ শোষোদ্বাতৌ তথোরসঃ|| ৫|| বাহুশোষো হনুগ্রীবামন্যাস্তম্ভৌষ্ঠভেদনম্| দন্তভেদোঽথ শৈথিল্যং কণ্ঠোধ্বংসোঽথ বাগ্গ্রহঃ|| ৬|| কষাযাস্যত্বমূকত্বে মুখশোষো রসাজ্ঞতা| ঘ্রাণানাহোঽজ্ঞতা গন্ধেঽশব্দোচ্চৈঃশ্রবণং তথা|| ৭|| বাধির্যং কর্ণশূলং চ বর্ত্মস্তম্ভনকুঞ্চনম্| তিমিরং চাক্ষিশূলং চ ভ্রূব্যুদাসোঽথ নেত্রযোঃ|| ৮|| ললাটশঙ্খভেদৌ চ কেশভ্রূস্ফুটনং তথা| শিরোরুজাঽর্দিতং জৃম্ভা প্রলাপো বেপথুর্ভ্রমঃ|| ৯|| একাঙ্গব্যাধিরাযামঃ পক্ষাঘাতোঽপতন্ত্রকঃ| দণ্ডকঃ স্বপ্ননাশশ্চ গ্লানিঃ পরুষরূক্ষতা|| ১০|| বিষাদোঽথানবস্থানমরুণশ্যামবর্ণতা| ইত্যশীতিঃ সমাখ্যাতা রোগা বাতসমুদ্ভবাঃ|| ১১|| অন্তর্দাহো বিদাহশ্চ প্লোষৌষৌ দবথুর্দবঃ| অত্যূষ্মা চাংসদাহশ্চ স্বেদোঽত্যম্লকধূমকৌ|| ১২|| রক্তক্লেদোঽঙ্গগন্ধশ্চ গাত্রাবযবশাতনম্| ত্বড্মাংসদরণং মাংসক্লেদশ্চর্মদলং তথা|| ১৩|| রক্তবিস্ফোটকঃ কোঠঃ পিত্তাসৃগ্রক্তমণ্ডলে| নীলিকা কামলা কক্ষ্যা গাত্রে হরিতপীততা|| ১৪|| পূতিতিক্তাস্যতা তৃষ্ণা লোহগন্ধাস্যতা তথা| জীবাদানমতৃপ্তিশ্চ প্রবেশস্তমসস্তথা|| ১৫|| গলাস্যগুদমেঢ্রাক্ষিপাকো হারিদ্রতাঽপি চ| নখাক্ষিমূত্রশকৃতাং, চত্বারিংশত্তু পিত্তজাঃ|| ১৬|| স্তৈমিত্যং গৌরবং তৃপ্তিরালস্যমতিনিদ্রতা| তন্দ্রাঽঽস্যস্রাবমাধুর্যে প্রলোপো হৃদযস্য চ|| ১৭|| সাদঃ কণ্ঠপ্রলেপশ্চ শ্লেষ্মোদ্গিরণমেব চ| মলাধিক্যমতিস্থৌল্যং ধমনী প্রতিসঞ্চযম্|| ১৮|| উদর্দো গলগণ্ডশ্চ শৈত্যং শ্বেতাবভাসতা| বিণ্মূত্রনখনেত্রাণাং শুক্লতা চ কফামযাঃ|| ১৯|| যথাস্থূলং বিকারাণাং চত্বারিংশমিদং শতম্| হৃদাদৌ শূলবদ্দাহো যোঽন্তর্দাহঃ স কীর্তিতঃ|| ২০|| পাণিপাদাংসমূলেষু সন্তাপো বিবিধস্তু যঃ| স বিদাহ ইতি প্রোক্তো, দাহঃ প্রাদেশিকস্তু যঃ|| ২১|| অগ্ন্যর্চিষেব নিঃস্বেদঃ স প্লোষঃ পরিকীর্তিতঃ| ওষঃ সর্বাঙ্গিকস্তীব্রো দাহঃ স্বেদারতিপ্রদঃ|| ২২|| দবথুশ্চক্ষুরাদিভ্যস্তীব্র ঊষ্মা প্রবর্ততে| মুখৌষ্ঠতালুষু দবশ্চাম্লোদ্গিরণমম্লকঃ|| ২৩|| ধূমাযনং শিরোঘ্হ্রাণকণ্ঠতালুষু ধূমকঃ| প্রমীলকস্তু স্তৈমিত্যং গুরুতাঽঙ্গস্য গৌরবম্|| ২৪|| আহারানভিলাষস্তু তৃপ্তিঃ স্যাদ্বিষযাগ্রহঃ| নিদ্রার্তস্যেব তন্দ্রা স্যাচ্ছেষাঃ প্রথিতনামকাঃ|| ২৫||

Adhikarana lakShaNaj~jAne sAvadhAnatA (54-55) · Śloka 55

দোষাণাং কর্মাণ্যুপদিশ্য নির্দেশপ্রযোজনমাহ - - - - | ইত্যশেষমযব্যাপি যদুক্তং দোষলক্ষণম্||৫৪|| দর্শনাদ্যৈরবহিতস্তত্সম্যগুপলক্ষযেত্| ব্যাধ্যবস্থাবিভাগজ্ঞঃ পশ্যন্নার্তান্ প্রতিক্ষণম্||৫৫||

স০-ইতি-প্রকারে| দোষাণাং লক্ষণং দোষলক্ষণং,-যথাযথং লিঙ্গম্| ইতি-পূর্বোক্তেন প্রকারেণ, যদ্দোষলক্ষণমুক্তম্, তদ্দর্শনাদ্যৈঃ সম্যগুপলক্ষযেত্-জানীযাত্| বৈদ্য ইতি শেষঃ| দর্শনাদ্যৈরিত্যাদি(দ্য)শব্দেন স্পর্শনপ্রশ্নৌ গৃহ্যেতে| কিম্ভূতং দোষলক্ষণং তত্ ? অশেষামযব্যাপি,-অশেষাশ্চ ত আমযাশ্চাশেষামযাস্তান্,-সর্বামযান্, সাধু ব্যাপ্নোতীতি| কিম্ভূতো বৈদ্যঃ ? অবহিতো,-দত্তাবধানঃ| তথা, ব্যাধ্যবস্থাবিভাগজ্ঞঃ,-ব্যাধেরবস্থাঃ-কালকৃতা দশাঃ, তাসাং বিভাগঃ-পৃথক্ত্বম্, যথা,-ইযমস্য ব্যাধেরবস্থেযমন্যাবস্থেতি| অবস্থাভেদাচ্চোপক্রমভেদঃ| তথা হি,-একস্যৈব জ্বরস্য নবস্যান্য উপক্রমো জীর্ণস্যান্যঃ| তদেবং বিভাগং যো জানাতি স ব্যাধ্যবস্থাবিভাগজ্ঞঃ| তথা, আর্তান্-ব্যাধিতান্, প্রতিক্ষণং-মুহূর্তে মুহূর্তে, পশ্যন্-আলোকযন্|

Adhikarana lakShaNadarshanAbhyAsaH karmasiddhidaH (56) · Śloka 56

কিমিতি পুনঃ পুনর্ব্যাধিতদর্শনং ক্রিযতে ? ইত্যাহ - - - - অভ্যাসাত্প্রাপ্যতে দৃষ্টিঃ কর্মসিদ্ধিপ্রকাশিনী| রত্নাদিসদসজ্জ্ঞানং ন শাস্ত্রাদেব জাযতে||৫৬||

স০-অভ্যাসাত্-মুহুর্মুহুশ্চিকিত্সিতকর্মণি প্রবর্তনাত্, দৃষ্টিঃ-দর্শনং চিকিত্সাবিজ্ঞানং জাযতে, ন কেবলং-কেবলচ্চিকিত্সাশাস্ত্রাবগমাত্| কিম্ভূতা দৃষ্টিঃ ? কর্মণি সিদ্ধিস্তাং প্রকাশযিতুং শীলং যস্যাঃ সা কর্মসিদ্ধিপ্রকাশিনী| অত্র দৃষ্টান্তমাহ-রত্নাদীত্যাদি| আদিশব্দেন সুবর্ণরূপ্যাদীনাং গ্রহণম্| তেষাং যত্সদসজ্জ্ঞানং-ইদং শোভনমিদং ন শোভনমিত্যবগমঃ তন্ন শাস্ত্রাদেব জাযতে| কিং তর্হি ? অভ্যাসাচ্চ| এবকারোঽবধারণার্থঃ| ন শাস্ত্রাববোধান্ন চ কেবলাদভ্যাসাদিত্যেবকারেণ বোধযতি| কিল যথা রত্নপরীক্ষা তচ্ছাস্ত্রাববোধদর্শনাভ্যাসাভ্যাং সম্যগ্জাযতে, তথৈব চিকিত্সা শাস্ত্রাববোধান্নিত্যমাতুরদর্শনাচ্চাবগম্যত ইত্যর্থঃ|

Adhikarana vyAdhestraividhyam (57) · Śloka 57

দৃষ্টাপচারজঃ কশ্চিত্কশ্চিত্পূর্বাপরাধজঃ| তত্সঙ্করাদ্ভবত্যন্যো ব্যাধিরেবং ত্রিধা স্মৃতঃ||৫৭||

স০-দৃষ্টশ্চাসাবপচারশ্চ, তস্মাজ্জাতো দৃষ্টাপচারজঃ| অপচারো-ব্যাধিহেতুঃ| ঐহিকলৌকিকাদ্ব্যাধিকারণাজ্জাতো দৃষ্টাপচারজঃ| কশ্চিদাত্মকৃতাত্পূর্বাপরাধাত্-অশুভকর্মাখ্যাজ্জাতঃ পূর্বাপরাধজঃ| অপরঃ কশ্চিত্তত্সঙ্করাদ্ভবতি| তযোঃ সঙ্করস্তত্সঙ্করো-মিশ্রত্বং, তস্মাত্| ন কেবলাত্পূর্বাপরাধান্ন চ কেবলাদ্দৃষ্টাপরাধাত্, অপি তু দ্বযোঃ সংসর্গাজ্জাত ইত্যর্থঃ| এবং-অনেন প্রকারেণ, ব্যাধিস্ত্রিধা-ত্রিপ্রকারঃ, স্মৃতঃ|

Adhikarana trayANAM lakShaNam (58) · Śloka 58

অথ ত্রিপ্রকারব্যাধিলক্ষণার্থমাহ - - - - যথানিদানং দোষোত্থঃ কর্মজো হেতুভির্বিনা| মহারম্ভোঽল্পকে হেতাবাতঙ্কো দোষকর্মজঃ||৫৮||

স০-যথানিদানং দোষোত্থ ইতি| যদ্যস্য দোষস্য বাতাদের্লঘুরূক্ষাদি নিদানং, তেন কুপিতাদ্দোষাত্ য উত্থিতো ব্যাধিঃ স দোষোত্থো জ্ঞেযঃ| যো দৃষ্টাপচারজ উক্ত ইত্যর্থঃ| হেতুভিঃ-বাতাদিনিদানৈর্লঘুরূক্ষাদিভির্বিনা যো ভবতি স কর্মজঃ| যস্ত্বল্পে নিদানে সেবিতে মহারম্ভঃ স্যাত্, স দোষকর্মজো রোগো জ্ঞেযঃ| মহানারম্ভো যস্য সঃ, পূর্বরূপরূপৈর্বলবদ্ভির্যুক্ত ইত্যর্থঃ|

Adhikarana trividhavyAdheshcikitsA (59) · Śloka 59

অথ ত্রিবিধস্যাপি ব্যাধেশ্চিকিত্সামাহ - - - - বিপক্ষশীলনাত্পূর্বঃ কর্মজঃ কর্মসঙ্ক্ষযাত্| গচ্ছত্যুভযজন্মা তু দোষকর্মক্ষযাত্ক্ষযম্||৫৯||

স০-বিপক্ষশীলনাত্পূর্ব ইতি| পূর্বঃ-পূর্বমুক্তো যঃ কেবলং দোষজো ব্যাধিঃ সঃ, বিপক্ষশীলনাত্-যথোক্তবিপক্ষাদিসেবনাত্, ক্ষযং যাতি| কর্মজো রোগঃ কর্মসঙ্ক্ষযাত্ ক্ষযং যাতি| উভযজন্মা-দোষকর্মোত্থো, দোষকর্মণোরুভযোরপি ক্ষযাত্ ক্ষযং যাতি|

Adhikarana trayANAM pRuthagdvaividhyam (60) · Śloka 60

ব্যাধীনাং ত্রৈবিধ্যমুক্ত্বা দ্বৈবিধ্যমাহ - - - - দ্বিধা স্বপরতন্ত্রত্বাদ্ব্যাধযোঽন্ত্যাঃ পুনর্দ্বিধা| |৬০|

স০-স্বতন্ত্রশ্চ পরতন্ত্রশ্চ স্বতন্ত্রপরতন্ত্রৌ, তযোর্ভাবঃ স্বতন্ত্রপরতন্ত্রত্বম্, তস্মাদ্ধেতোর্দ্বিধা ব্যাধযঃ| একে স্বতন্ত্রা অন্যে পরতন্ত্রা ইত্যর্থঃ| অন্তে ভবা অন্ত্যাঃ,--পরতন্ত্রাঃ| তে পুনঃ-ভূযো, দ্বিধা|

Adhikarana paratantrasya dvaividhyam (60) · Śloka 60

তদেব দ্বৈবিধ্যং দর্শযিতুমাহ - - - - | পূর্বজাঃ পুর্বরূপাখ্যা, জাতাঃ পশ্চাদুপদ্রবাঃ||৬০||

স০-পূর্বং জাতাঃ পূর্বজাঃ| "অন্যেষ্বপি দৃশ্যতে" ইতি ডঃ| পূর্বজাঃ-পূর্বরূপসংজ্ঞা রোগাঃ| যে চ পশ্চাজ্জাতাগদাস্তে ব্যাধীনামুপদ্রবাঃ| ইত্যন্ত্যা দ্বিধা|

Adhikarana svatantralakShaNam (61) · Śloka 61

অথ স্বতন্ত্রান্ লক্ষযতি - - - - যথাস্বজন্মোপশযাঃ স্বতন্ত্রাঃ স্পষ্টলক্ষণাঃ| |৬১|

স০-জন্ম চোপশযশ্চ জন্মোপশযৌ| জন্ম- উত্পত্তিঃ| উপশযঃ-সুখানুবন্ধঃ| যো যঃ স্বং স্বং-যথাস্বম্| যস্য জ্বরাদের্যাবাত্মীযৌ শাস্ত্রনির্দিষ্টৌ তৌ যথাস্বশব্দেন সূচ্যেতে| যথাস্বং জন্মোপশযৌ যেষাং তে যথাস্বজন্মোপশযা ব্যাধযঃ স্বতন্ত্রা উচ্যন্তে| চিকিত্সাগুরুলাঘবপ্রতিপত্ত্যর্থং চ স্বতন্ত্রাদিসংজ্ঞাকরণম্| স্বগ্রহণাদ্যেঽন্যজন্মনি জাযন্তেঽন্যস্য চ ব্যাধের্যত উপশযঃ-সুখানুবন্ধস্তত এতত্পরিবারস্যাপি, তে তু ন স্বতন্ত্রাঃ| তথা চোক্তম্-"পূর্বরূপরূপাদিক্রমেণ জ্বরাদাবুত্পন্নে তত্পরিবারা যে শ্বাসাদয উত্পদ্যন্তে তদুপশযে চোপশেরতে ন তে স্বতন্ত্রাঃ| জ্বরাদয এব তু মূলব্যাধিরূপত্বাত্স্বতন্ত্রা উচ্যতে|" ইতি|

Adhikarana paratantralakShaNam (61) · Śloka 61

| বিপরীতাস্ততোঽন্যে তু|৬১|

স০-ততঃ-স্বতন্ত্রেভ্যো রোগেভ্যো, যেঽন্যে-পরতন্ত্রাঃ, পূর্বরূপাখ্যাস্তথোপদ্রবসংজ্ঞাশ্চ, তে বিপরীতাঃ,-বিপরীতস্বরূপাঃ, ন যথাস্বজন্মোপশযা ন চ স্পষ্টলক্ষণাঃ|

Adhikarana doShANAmapi svatantraparatantratA (61) · Śloka 61

এবং ব্যাধীনাং স্বতন্ত্রপরতন্ত্রত্বং প্রতিপাদ্য, দোষাণাং প্রতিপাদযন্নাহ - - - - | বিদ্যাদেবং মলানপি||৬১||

স০-ন কেবলং রোগান্ স্বতন্ত্রপরতন্ত্রভেদৈর্বিদ্যাদ্বৈদ্যঃ, যাবন্মলান্-দোষানপি বাতাদীন্, এবং-স্বতন্ত্রপরতন্ত্রভেদৈর্জানীযাত্|

Adhikarana bhiShajA pratirogaM svatantraparatantratvena te lakShyAH (62) · Śloka 62

তাংল্লক্ষযেদবহিতো বিকুর্বাণান্ প্রতিজ্বরম্| |৬২|

স০-তান্-বাতপিত্তকফান্ যথাস্বজন্মোপশযলক্ষণাবচ্ছিন্নস্বরূপান্, প্রতিজ্বরং-প্রতিবিকারং, বিকুর্বাণান্-বিকৃতিংকোপং গচ্ছতো, জানীযাত্| বৈদ্য ইতি শেষঃ| কীদৃক্ ? অবহিতো-দত্তচিত্তঃ|

Adhikarana paratantrANAM prashamopAyaH (62-63) · Śloka 63

এবং স্বতন্ত্রাণাং ব্যাধীনাং যথাস্বোপশয এব ভেষজমুক্তম্| পরতন্ত্রাণাং তু ব্যাধীনাং কঃ প্রশমোপাযঃ ? ইত্যাহ - - - - | তেষাং প্রধানপ্রশমে প্রশমোঽশাম্যতস্তথা||৬২|| পশ্চাচ্চিকিত্সেত্তূর্ণং বা বলবন্তমুপদ্রবম্| |৬৩|

তেষাং-পরতন্ত্রাণাং রোগাণামপ্রধানানাম্, প্রধানপ্রশমে-স্বতন্ত্রব্যাধিপ্রশমে, প্রশমো ভবতি,-ন তু তেষাং পৃথগুপক্রমো বিধেয ইত্যর্থঃ| অশাম্যতঃ-তথা শমমগচ্ছতঃ পরতন্ত্রান্ ব্যাধীন্ দোষান্ বা, তথা-তেন প্রকারেণ প্রধান চিকিত্সালক্ষণেন, পশ্চাত্-প্রধানচিকিত্সাত উত্তরকালং, চিকিত্সেত্| অচিকিত্স্যমানো হ্যসাধ্যতাং যাযাত্| তূর্ণং বেতি| উপদ্রবশ্চেদ্বলবান্ স্যাত্তদা তমেবোপদ্রবং তূর্ণমেব চিকিত্সেত্-, ন পশ্চাত্|

Adhikarana balavadupadravasyAdau cikitsA (63) · Śloka 63

ননু, কুতোঽপ্রধানং শীঘ্রং চিকিত্সেত্ ? ইত্যাহ - - - - | ব্যাধিক্লিষ্টশরীরস্য পীডাকরতরো হি সঃ||৬৩||

স০-হি-যস্মাত্, ব্যাধিক্লিষ্টশরীরস্য পুংসঃ সোঽতিশযেন পীডাকরঃ| প্রাগুত্পন্নোঽপি রোগঃ পীডাকরঃ| উপদ্রবস্তু পশ্চাজ্জাযমানো ব্যাধিক্লিষ্টশরীরোত্পন্নত্বাত্পীডাকরতরঃ| তদযমত্রার্থঃ,-পরতন্ত্রো ব্যাধির্হীনবলঃ প্রধানোপক্রমেণৈবোপশাম্যতি| যস্তু পরতন্ত্রঃ পশ্চাদুত্পদ্যমানোঽপি স্বতন্ত্রব্যাধ্যুপক্রমেণ শমং ন যাতি তং পশ্চাদুপক্রমেত্| যস্তু বলবান্ পরতন্ত্রস্তমাদাবেব চিকিত্সেত্, অতিপীডাকরত্বাত্|

Adhikarana shAstre~anuktaM vikAranAma svayamUhanIyam (64) · Śloka 64

ননু, যেষাং বিকারাণাং নামগ্রাহং চিকিত্সা |চ] নোক্তা| তেষাং নামাকুশলো বৈদ্যঃ কিং চিকিত্সেন্ন ? ইত্যাশঙ্ক্যাহ - - - - বিকারনামাকুশলো ন জিহ্রীযাত্ কদাচন| ন হি সর্ববিকারাণাং নামতোঽস্তি ধ্রুবা স্থিতিঃ||৬৪||

স০-বিকারাঃ-রোগাঃ, তেষাং নামানি, তেষ্বকুশলো বৈদ্যো ন জাতুচিজ্জিহ্রীযাত্-রোগসংজ্ঞানভিজ্ঞোঽহমিতি লজ্জাং ন কুর্যাত্, চিকিত্সামেব বিদধ্যাদিত্যর্থঃ| কুতো হেতোঃ ? ইত্যাহ-ন হীত্যাদি| যস্মাত্সর্ববিকারাণাং নামতঃ-সংজ্ঞাতো, ধ্রুবা-নিশ্চিতা, স্থিতিঃ-অবস্থানং, নাস্তি|

Adhikarana lakShaNasya durbodhatvam (65-66) · Śloka 66

ননু, কুতোঽশেষরোগাণাং নামতো নাস্তি স্থিতিঃ ? ইত্যাশঙ্ক্যাহ - - - - স এব কুপিতো দোষঃ সমুত্থানবিশেষতঃ| স্থানান্তরাণি চ প্রাপ্য বিকারান্ কুরুতে বহূন্||৬৫|| তস্মাদ্বিকারপ্রকৃতীরধিষ্ঠানান্তরাণি চ| বুদ্ধ্বা হেতুবিশেষাংশ্চ শীঘ্হ্রং কুর্যাদুপক্রমম্||৬৬||

স০-যস্মাত্সঃ-এক এব, দোষো-বাতাদ্যন্যতমঃ, সমুত্থানবিশেষতো-হেতুভেদাত্, তথা স্থানান্তরাণি-স্বস্থানং হিত্বা পরাণি স্থানানি, প্রাপ্য-গত্বা, বহূন্-অনন্তান্, বিকারান্ কুরুতে| তথা চোক্তং তন্ত্রান্তরে-"যো দোষঃ শরীরসন্ধীনাবিশতি, তেন জৃম্ভা জ্বরশ্চোপজাযতে| যস্ত্বামাশযমভ্যুপৈতি, তেন রোগা ভবন্ত্যুরসি, অরোচকশ্চ| যঃ কণ্ঠমভিপ্রপদ্যতে কণ্ঠস্ততো ধ্বংসতে স্বরশ্চাবসীদতি| যঃ প্রাণবহানি স্রোতাংস্যাস্যাদীনি উপৈতি, শ্বাসঃ প্রতিশ্যাযশ্চ তেনোপজাযতে|" ইতি| বিকারস্য-জ্বরাদেঃ, প্রকৃতযঃ-উপাদানকারণানি বাতাদিদোষাঃ, তা বিকারপ্রকৃতী:-রোগহেতুবিশেষান্, বুদ্ধ্বা,- জ্ঞাত্বা, তথাঽধিষ্ঠানান্তরাণি স্থানবিশেষাংশ্চ, বুদ্ধ্বা,তথা হেতুবিশেষান্-নিদানভেদাংশ্চ, বুদ্ধ্বা-যথা কিমযং কুপিতঃ পবনো রূক্ষেণ হেতুনা লঘুনা শীতেন বেত্যাদি জ্ঞাত্বা, শীঘ্হ্রমেবোপক্রমেত্-চিকিত্সেত্| ন তু বিকারানভিজ্ঞ ইতি ন চিকিত্সেত্|

Adhikarana dUShyAdij~jAne~avyabhicAricikitsA (67-68) · Śloka 68

ননু, বুদ্ধ্বাঽপি বিকারপ্রকৃত্যাদিকমুপক্রমং কুর্বন্তঃ কদাচিত্সিদ্ধিমাপ্নুবন্তো দৃশ্যন্তে ভিষজঃ কদাচিন্নেতি| তদত্র সংশযস্খলিতে কর্মণি কথং নিযুজ্যতে বৈদ্য ইতি কথমুক্তম্ ? "শীঘ্রং কুর্যাদুপক্রমম্" ইত্যাশঙ্ক্যাহ - - - - দূষ্যং দেশং বলং কালমনলং প্রকৃতিং বযঃ| সত্ত্বং সাত্ম্যং তথাঽঽহারমবস্থাশ্চ পৃথগ্বিধাঃ||৬৭|| সূক্ষ্মসূক্ষ্মাঃ সমীক্ষ্যৈষাং দোষৌষধনিরূপণে| যো বর্ততে চিকিত্সাযাং ন স স্খলতি জাতুচিত্||৬৮||

স০-দোষৌষধনিরূপণে সতি দূষ্যাদীন্ দশ সমীক্ষ্য সম্যগ্বিলোক্য, যশ্চিকিত্সাযাং বর্ততে-যত্নং করোতি, সঃ-বৈদ্যো, ন কদাচিত্ স্খলতি-নাপরাধী স্যাত্| দোষো-বাতাদিঃ, ঔষধং-হরীতক্যাদি, তযোর্নিরূপণং-পর্যালোচনম্, তস্মিন্ দোষৌষধনিরূপণে| দূষ্যাদীনাং সমস্তানামুপাদানং সর্বেষামেবাবগমে চিকিত্সাকরণং প্রতি যত্নাতিশযদ্যোতনার্থম্, ন পুনরেষাং দ্বৌ বা ত্রীন্ বা চতুরো বা পঞ্চ বা সমীক্ষ্য| কিং তার্হি ? সর্বানেতান্ সমীক্ষ্য,-সম্যগববুধ্যেতি| অথ দূষ্যাদীনেব সমীক্ষ্য ? নেত্যাহ- অবস্থাশ্চ পৃথগ্বিধাঃ| এষামেব দূষ্যাদীনামবস্থাঃ সূক্ষ্মসূক্ষ্মাঃ-অতিশযেন সূক্ষ্মাঃ, তাশ্চ সমীক্ষ্য-যথাবদ্বুদ্ধ্বেতি|

Adhikarana satvadehabale~avahinatvam (69) · Śloka 69

ন চ দূষ্যাদ্যেব পরীক্ষ্যম্| কিং তার্হি ? ব্যাধিরপি গুরুলঘুত্বেন এবং পরীক্ষ্য এবেত্যাহ - - - - গুর্বল্পব্যাধিসংস্থানং সত্ত্বদেহবলাবলাত্| দৃশ্যতেঽপ্যন্যথাকারং তস্মিন্নবহিতো ভবেত্||৬৯||

স০-গুরুশ্চাল্পশ্চ গুর্বল্পৌ, গুর্বল্পৌ চ তৌ ব্যাধী চ গুর্বল্পব্যাধী, তযোঃ সংস্থানং-আকৃতিঃ| অপিশব্দো ভিন্নক্রমে| তদ্গুর্বল্পব্যাধিসংস্থানমন্যথাকারমপি দৃশ্যতে-বিপরীতমিতি লক্ষ্যতে| অপিশব্দাত্ক্বচিত্ গুর্বল্পব্যাধিসংস্থানং যথাতত্ত্বং দৃশ্যতে ক্বচিন্নেতি ব্যাধিলক্ষণস্য গমকত্বাভাবঃ প্রসজ্যেত| ততশ্চ "রোগং নিদানপ্রাগ্রূপলক্ষণোপশযাপ্তিভিঃ|" (হৃ. সূ. অ. ১|২২) ইতি দূষ্যেত| তস্মাদপিশব্দোঽত্র গুর্বল্পসংস্থানস্য যথাতত্ত্ব দর্শনং ক্বচিদ্ভবত্যেবেতি সূচনার্থঃ কৃতঃ| কুতো হেতোঃ ? ইত্যাহ-সত্ত্বেত্যাদি| সত্ত্বং-ধৈর্যম্| দেহো-মহদল্পস্থূলকৃশাদিঃ| সত্ত্বং চ দেহশ্চ সত্ত্বদেহৌ| বলং চাবলং চ বলাবলে| তস্মাত্সত্ত্বদেহবলাবলাদ্ধেতোর্গুর্বল্পব্যাধিসংস্থানেঽবহিতো ভবেত্| অধিকসত্ত্বে তথোত্কৃষ্টদেহবলে চ গুরুঃ-মহানপি ব্যাধিরুত্পন্নোঽল্পসংস্থানো-হীনবল ইব লক্ষ্যতে, সত্ত্বদেহবলযোরুত্কৃষ্টত্বাত্| তথা, হীনসত্বে হীনদেহবলে চোত্পন্নো লঘুরপি মহানিব লক্ষ্যতে, হীনসত্ত্বদেহবলত্বাত্| তস্মাদ(ত্ত)স্মিন্-ব্যাধিসংস্থানেঽর্থে, দত্তাবধানেন ভাব্যম্|

Adhikarana anavahitatve doShaH (70) · Śloka 70

গুরুং লঘুমিতি ব্যাধিং কল্পযংস্তু ভিষগ্ব্রুবঃ| অল্পদোষাকলনযা পথ্যে বিপ্রতিপদ্যতে||৭০||

স০-গুরুং লঘুমিত্যাদি| যশ্চ ভিষগ্ব্রুবঃ-কুত্সিতো বৈদ্যঃ, স ব্যাধিসংস্থানমাত্রাবলোকনাত্ গুরুং ব্যাধিং লঘুমিতি কল্পযন্-নিশ্চিন্বন্, অল্পদোষাকলনযা-হীনমাত্রদোষনিশ্চযেন, পথ্যে বিপ্রতিপদ্যতে-চিকিত্সিতে মোহং গচ্ছতি, গুরুব্যাধাবল্পব্যাধিযোগ্যং ভেষজং দদাতি| এবং লঘুব্যাধিং গুরুমিতি কল্পযন্ বহুদোষাকলনযা পথ্যে বিপ্রতিপদ্যতে, ভিষগ্ব্রুবত্ত্বাত্| অন্যত্রাপি ব্রুবান্তস্য কুত্সিতত্বমেব প্রসিদ্ধম্| যথাঽঽহ মনুঃ (অ. ৮|২০) -"জাতিমাত্রোপজীবী বা কামং স্যাদ্ব্রাহ্মণব্রুবঃ| ধর্মপ্রবক্তা নৃপতের্ন তু শূদ্রঃ কথঞ্চন||" ইতি| কেচিত্ "ভিষগ্ধ্রুবম্" ইতি পেঠুঃ| ভিষক্-বৈদ্যো, গুরুং লঘুমিতি ব্যাধিং কল্পযন্ ধ্রুবং-নিশ্চিতং পথ্যে বিপ্রতিপদ্যত ইতি চ ব্যাচক্ষতে|

Adhikarana viparyayaj~jAne doShaH (71-72) · Śloka 72

যস্মাচ্চৈবম্ - - - - ততোঽঽল্পমল্পবীর্যং বা গুরুব্যাধৌ প্রযোজিতম্| উদীরযেত্তরাং রোগান্ সংশোধনমযোগতঃ||৭১|| শোধনং ত্বতিযোগেন বিপরীতং বিপর্যযে| ক্ষিণুযান্ন মলানেব কেবলং বপুরস্যতি||৭২||

স০-ততোঽল্পং-অল্পমাত্রম্, অল্পবীর্যং বা-অনুত্কৃষ্টশক্তিকং বা, ভেষজং গুরুব্যাধৌ প্রযোজিতং-দত্তং, সংশোধনং রোগানুদীরযেত্তরাং-অতিশযেনোত্ক্লেশযেত্| কুতঃ ? অযোগতঃ,,-হীনযোগাত্| অযোগো হি হীনযোগ উচ্যতে| যথা,-পুত্রকার্যাকরণাদপুত্র ইত্যুচ্যতে| বিপর্যযে চ-লঘুব্যাধৌ, বিপরীতং শোধনং তু প্রযোজিতম্, কস্মাদ্বিপরীতম্ ? অল্পবীর্যাত্সংশোধনাত্, অতিমাত্রমুত্কৃষ্টবীর্যং চ বহুদোষাকলনযা, অতিযোগেন প্রযোজিতং ন কেবলং মলান্ ক্ষিণুযাত্-ক্ষপযেত্, যাবদ্বপুরস্যতি-শরীরমপি হিংস্যাত্| অত্র চ সংশোধনং যত্ দৃষ্টান্তত্বেনোপন্যস্তং তদযোগাতিযোগাভ্যাং রোগোত্ক্লেশং শরীরক্ষপণং [চ] ঝটিতি নির্বর্তযতীতি| খরনাদেনাপ্যুক্তং চ-"অল্পমুত্ক্লেশযেদ্দোষং বহু প্রাণান্নিহন্তি চ| তস্মান্নিরূপ্য ভিষজা দেযং যুক্তং বিরেচনম্||" ইতি| তথা, জ্বরগুল্মাদীনাং চ তত্প্রতীকারার্থং যদ্দীযতে ভেষজং তত্রাপি মহারম্ভেঽল্পমল্পবীর্যং চৌষধং ন দেযম্, ইত্যস্মাদেব দৃষ্টান্তীভূতাদর্থাদবগন্তব্যম্|

Adhikarana abhiyuktaH san bhaiShajyaM yu~jjIta (73) · Śloka 73

অতোঽভিযুক্তঃ সততং সর্বমালোচ্য সর্বথা| তথা যুঞ্জীত ভৈষজ্যমারোগ্যায যথা ধ্রুবম্||৭৩||

স০-যস্মাচ্চৈবং রোগাণাং দুর্বিজ্ঞেযা গতিঃ, অতঃ-অস্মাদ্ধেতোঃ, সততমভিযুক্তঃ-সদাঽঽযুর্বেদপাঠাববোধানুষ্ঠানপরো বৈদ্যঃ, সর্বং-দূষ্যাদিবস্তুজাতম্, আলোচ্য সর্বথা-সর্বেণ প্রকারেণাঽঽযুর্বেদানুসারিণ্যা স্ববুদ্ধ্যা তদ্বিদ্যসম্ভাষাসম্ভবযা চ তথা কর্মাভ্যাসতোঽপি নিপুণং নিরূপ্য, তথা-তেন প্রকারেণ দোষদূষ্যদেশাদ্যনুগুণেন, ভৈষজ্যং যুঞ্জীত-ভেষজং যুঞ্জ্যাত্| যথাঽঽরোগ্যায ধ্রুবং-যেন প্রকারেণাঽঽরোগ্যার্থমবশ্যং স্যাত্|

Adhikarana doShasaMyogabhedAstriShaShTiH (74-78) · Śloka 78

পূর্বমুক্তম্ (শ্লো. ৩২) - "দোষা এব হি সর্বেষাং রোগাণামেককারণম্| " অতস্তানেব দোষান্ বৃদ্ধিক্ষযবিভেদেনাহ - - - - বক্ষ্যন্তেঽতঃপরং দোষা বৃদ্ধিক্ষযবিভেদতঃ| পৃথক্ ত্রীন্ বিদ্ধি সংসর্গভেদানধুনা বক্তি - - - - সংসর্গস্ত্রিধা, তত্র তু তান্নব||৭৪|| কথং নব ভেদান্ ? ইত্যাহ - - - - ত্রীনেব সমযা বৃদ্ধ্যা, ষডেকস্যাতিশাযনে| ত্রযোদশ সমস্তেষু কথম্ ? ইত্যাহ - - - - ষড্ দ্ব্যেকাতিশযেন তু||৭৫|| একং তুল্যাধিকৈঃ ষট্ চ তারতম্যবিকল্পনাত্| পঞ্চবিংশতিমিত্যেবং বৃদ্ধৈঃ ক্ষীণৈশ্চ তাবতঃ||৭৬|| একৈকবৃদ্ধিসমতাক্ষযৈঃ ষট্ তে পুনশ্চ ষট্| একক্ষযদ্বন্দ্ববৃদ্ধ্যা সবিপর্যযযাঽপি তে||৭৭|| ভেদা দ্বিষষ্টির্নির্দিষ্টাঃ ত্রিষষ্টঃ স্বাস্থ্যকারণম্| |৭৮|

স০-বৃদ্ধিশ্চ ক্ষযশ্চ বৃদ্ধিক্ষযৌ, বৃদ্ধিক্ষযযোর্বিভেদো বৃদ্ধিক্ষযবিভেদঃ, বিবিধো বিশিষ্টো ভেদো-বিভেদঃ, তস্মাদ্বৃদ্ধিক্ষযবিভেদতঃ| অতঃপরং-অতোঽনন্তরম্, দোষাঃ-বাতাদযো, বক্ষ্যন্তে-ভণিষ্যন্তে| স০-পৃথক্-ব্যস্তান্ স্বপ্রমাণাধিকান্, ত্রীন্ দোষান্ রোগহেতূন্, বিদ্ধি-অবেহি| বাতো বৃদ্ধঃ| ১| পিত্তং বৃদ্ধম্| ২| শ্লেষ্মা বৃদ্ধঃ| ৩| এবং ত্রযো দোষাঃ| স০-সংসর্গস্ত্রিধা-ত্রিপ্রকারঃ| তত্র-সংসর্গে, নব দোষভেদান্ স্বপ্রমাণাধিকান্, "বিদ্ধি" ইত্যেতদনুবৃত্তিকৃতেন সম্বন্ধেন সর্বত্র যোজ্যম্| স০-সমযা বৃদ্ধ্যা-তুল্যযা বৃধ্দ্যা, ত্রীনেব-অন্যূনাধিকান্, সংসর্গদোষভেদান্ বিদ্ধি| একো বাতপিত্তাভ্যামধিকাভ্যাম্, দ্বিতীযো বাতকফাভ্যামধিকাভ্যাম্, তৃতীযঃ পিত্তশ্লেষ্মভ্যামধিকাভ্যাম্, ইতি| সংসর্গস্থযোর্দোষযোরেকস্য দোষস্যাতিশাযনে-অধিকতরযা বৃদ্ধ্যা, ষট্ সংসর্গদোষভেদান্ বিদ্ধি| অতিশযো-অতিশাযনম্| অতিশাযনে "তমবিষ্ঠনৌ" ইতি নিপাতনাদ্দীর্ঘঃ| দোষদ্বযবৃদ্ধেশ্চিন্ত্যমানত্বাদপরদোষচিন্তানাস্ত্যত্র| বাতো বৃদ্ধঃ পিত্তং বৃদ্ধতরম্||১|| পিত্তং বৃদ্ধং বাতো বৃদ্ধতরঃ||২|| কফো বৃদ্ধঃ পিত্তং বৃদ্ধতরম্||৩|| পিত্তং বৃদ্ধং কফো বৃদ্ধতরঃ||৪|| কফো বৃদ্ধো, বাতো বৃদ্ধতরঃ||৫|| বাতো বৃদ্ধঃ কফো বৃদ্ধতরঃ||৬|| এবং ষট্ সংসর্গদোষভেদান্ বিদ্ধি| স০-সমস্তেষু-সন্নিপতিতেষু ত্রিষ্বপি দোষেষু বৃদ্ধেষু, ত্রযোদশ দোষভেদান্ বিদ্ধি| স০-দ্বৌ চৈকশ্চ দ্ব্যেকে, তেষাং দ্ব্যেকেষামতিশযো-অধিকত্বম্, তেন দ্ব্যেকাতিশযেন| ততো দ্বযাতিশযেন ত্রযো ভেদাঃ, তথা দোষৈকস্যাতিশযেন ত্রযঃ, ইতি ষট্ ভেদাঃ| যথা,-কফো বৃদ্ধো বাতপিত্তেঽধিকং বৃদ্ধে| ১| পিত্তং বৃদ্ধং বাতকফাবতিবৃদ্ধৌ| ২| বাতো বৃদ্ধঃ পিত্তকফাবতিবৃদ্ধৌ| ৩| পিত্তকফৌ বৃদ্ধৌ বাতোঽতিবৃদ্ধঃ| ৪| বাতকফৌ বৃদ্ধৌ পিত্তমতিবৃদ্ধম্| ৫| বাতপিত্তে বৃদ্ধে কফোঽতিবৃদ্ধঃ| ৬| ইতি ষড্ভেদান্ দ্ব্যেকাতিশযেন সন্নিপাতে বিদ্ধি| স০-তুল্যং কৃত্বা-সমং কৃত্বা, বৃদ্ধৈর্দোষৈরেকং সন্নিপাতদোষভেদং বিদ্ধি| স০-তরতমযোর্ভাবস্তারতম্যম্| কস্য তারতম্যম্ ? প্রকৃতত্বাত্সন্নিপাতস্থদোষাণাম্| তারতম্যস্য বিকল্পনং-ভেদঃ, তারতম্যবিকল্পনম্, তস্মাত্| সন্নিপাতস্থদোষাণাং বৃদ্ধিরূপাণাং ষড্ভেদান্ বিদ্ধি| যথা,-বাতো বৃদ্ধঃ পিত্তং বৃদ্ধতরং কফো বৃদ্ধতমঃ| ১| বাতো বৃদ্ধঃ কফো বৃদ্ধতরঃ পিত্তং বৃদ্ধতমম্| ২| পিত্তং বৃদ্ধং কফো বৃদ্ধতরো বাতো বৃদ্ধতমঃ| ৩| পিত্তং বৃদ্ধং বাতো বৃদ্ধতরঃ কফো বৃদ্ধতমঃ| ৪| কফো বৃদ্ধো বাতো বৃদ্ধতরঃ পিত্তং বৃদ্ধতমম্| ৫| কফো বৃদ্ধঃ পিত্তং বৃদ্ধতরং বাতো বৃদ্ধতমঃ| ৬| এতেষাং চ লক্ষণং মুনিরধ্যগীষ্ট| তথা চ তদ্গ্রন্থঃ (চ. চি. অ. ৩|৮৮)- "সন্নিপাতজ্বরস্যোর্ধ্বং ত্রযোদশবিধস্য হি| প্রাক্ সূত্রিতস্য বক্ষ্যামি লক্ষণং বৈ পৃথক্ পৃথক্|| ভ্রমঃ পিপাসা দাহশ্চ গৌরবং শিরসোঽতিরুক্| বাতপিত্তোল্বণে বিদ্যাল্লিঙ্গং মন্দকফে জ্বরে|| শৈত্যং কাসোঽরুচিস্তন্দ্রা পিপাসা দাহরুগ্ব্যথাঃ| বাতশ্লেষ্মোল্বণে ব্যাধৌ লিঙ্গং পিত্তাবরে বিদুঃ|| ছর্দিঃ শৈত্যং মুহুর্দাহস্তৃষ্ণা মোহোঽস্থিবেদনা| মন্দবাতে ব্যবস্যন্তি লিঙ্গং পিত্তকফোল্বণে|| সন্ধ্যস্থিশিরসঃ শূলং প্রলাপো গৌরবং ভ্রমঃ| বাতোল্বণে স্যাদ্ হ্যনুগে তৃষ্ণা কণ্ঠাস্যশুষ্কতা|| রক্তবিণ্মূত্রতা দাহঃ স্বেদস্তৃড্বলসঙ্ক্ষযঃ| মূর্চ্ছা চেতি ত্রিদোষে স্যাল্লিঙ্গং পিত্তগরীযসি|| আলস্যারুচিহৃল্লাসদাহবম্যরতিভ্রমৈঃ| কফোল্বণং সন্নিপাতং তন্দ্রাকাসেন চাদিশেত্|| সমং দোষৈস্ত্রিভির্বৃদ্ধৈঃ সন্নিপাতস্য লক্ষণম্| মুহুর্দাহো মুহুঃ শীতং কর্ণক্ষ্বেডনপার্শ্বরুক্|| মোহঃ চ্ছর্দির্দিবা নিদ্রা রাত্রৌ জাগরণং তথা| প্রতিশ্যা ছর্দিরালস্যাং তন্দ্রারুচ্যগ্নিমার্দবম্|| হীনবাতে পিত্তমধ্যে চিহ্নং শ্লেষ্মাধিকে মতম্| হারিদ্রমূত্রনেত্রত্বগ্দাহস্তৃষ্ণা ভ্রমোঽরুচিঃ|| হীনবাতে মধ্যকফে লিঙ্গং পিত্তাধিকে মতম্| শিরোরুগ্বেপথুঃ শ্বাসঃ প্রলাপঃ চ্ছর্দ্যরোচকৌ|| হীনপিত্তে মধ্যকফে লিঙ্গং বাতাধিকে মতম্| শীতকং গৌরবং তন্দ্রা প্রলাপোঽস্থিশিরোতিরুক্|| হীনপিত্তে বাতমধ্যে লিঙ্গং শ্লেষ্মাধিকে বিদুঃ| বর্চোভেদোঽগ্নিদৌর্বল্যং তৃষ্ণা দাহোঽরুচির্ভ্রমঃ|| কফহীনে বাতমধ্যে লিঙ্গং পিত্তাধিকে মতম্| শ্বাসঃ কাসঃ প্রতিশ্যাযো মুখশোষোঽতিপার্শ্বরুক্|| কফহীনে পিত্তমধ্যে লিঙ্গং বাতাধিকে স্মৃতম্|" ইতি| স০-এবং-পূর্বোক্তেন প্রকারেণ, পঞ্চবিংশতিসঙ্খ্যাপরিমাণান্ বৃদ্ধান্ দোষভেদান্ বৃদ্ধৈর্দোষৈর্বিদ্ধি| স০-ক্ষীণৈঃ-ক্ষযাবস্থৈর্দোষৈঃ, তাবতঃ-তত্পরিমাণান্ পঞ্চবিংশতিসঙ্খ্যাকান্ দোষভেদান্ বিদ্ধি| যথা,-বৃদ্ধৈঃ পৃথক্ ত্রীন্ দোষভেদান্, তথা ক্ষীণৈঃ| "পৃথক্ ত্রীন্" ইত্যাদিগ্রন্থে বৃদ্ধিশব্দস্থানে ক্ষীণশব্দে নিপাত্যঃ| তদ্যথা,-বাতঃ ক্ষীণঃ| ১| পিত্তং ক্ষীণম্| ২| কফঃ ক্ষীণঃ| ৩| তদেবং সংসর্গে নবদোষভেদান্ বিদ্ধি| কথম্ ? ত্রীনেব সমক্ষীণত্বেন,-ক্ষীণবাতপিত্তসংসর্গঃ| ১| ক্ষীণপিত্তকফসংসর্গঃ| ২| ক্ষীণবাতকফসংসর্গঃ| ৩| ষডেকস্যাতিশাযনে| অতিশাযনে-অন্যদোষাপেক্ষযা ক্ষীণত্বাতিরেকে,-বাতঃ ক্ষীণঃ পিত্তং ক্ষীণতরম্| ১| পিত্তং ক্ষীণং বাতঃ ক্ষীণতরঃ| ২| বাতঃ ক্ষীণঃ কফঃ ক্ষীণতরঃ| ৩| কফঃ ক্ষীণো বাতঃ ক্ষীণতরঃ| ৪| কফঃ ক্ষীণঃ পিত্তং ক্ষীণতরম্| ৫| পিত্তং ক্ষীণং কফঃ ক্ষীণতরঃ| ৬| এবং ষট্ দোষভেদান্ বিদ্ধি| ত্রযোদশ সমস্তেষু-সন্নিপতিতেষু ক্ষীণেষু দোষেষু দোষভেদাংস্ত্রযোদশ বিদ্ধি| কথম্ ? ষড্ দ্ব্যেকাতিশযেন তু| দোষদ্বযস্যাতিশযেন-অতিক্ষীণত্বেন, তথা দোষৈকশযেন তু| তথা দোষৈকস্যাতিক্ষীণত্বেন, পর্যাযতঃ ষট্ ক্ষীণসন্নিপাতদোষভেদান্ বিদ্ধি| যথা,-বাতঃ ক্ষীণঃ পিত্তকফাবতিক্ষীণৌ| ১| পিত্তং ক্ষীণং বাতকফাবতিক্ষীণৌ| ২| কফঃ ক্ষীণঃ পিত্তবাতাবতিক্ষীণৌ| ৩| বাতপিত্তে ক্ষীণে কফোঽতিক্ষীণঃ| ৪| পিত্তকফৌ ক্ষীণৌ বাতোঽতিক্ষীণঃ| ৫| বাতকফৌ ক্ষীণৌ পিত্তমতিক্ষীণম্| ৬| একং তুল্যক্ষীণৈর্ভেদং বিদ্ধি| ১| ষট্ চ তারতম্যবিকল্পনাত্,-কফঃ ক্ষীণঃ পিত্তং ক্ষীণতরং বাতঃ ক্ষীণতমঃ| ১| বাতঃ ক্ষীণঃ কফঃ ক্ষীণতরঃ পিত্তং ক্ষীণতমম্| ২| পিত্তং ক্ষীণং কফঃ ক্ষীণতরো বাতঃ ক্ষীণতমঃ| ৩| কফঃ ক্ষীণো বাতঃ ক্ষীণতরঃ পিত্তং ক্ষীণতমম্| ৪| বাতঃ ক্ষীণঃ পিত্তং ক্ষীণতরং কফঃ ক্ষীণতমঃ| ৫| পিত্তং ক্ষীণং বাতঃ ক্ষীণতরঃ কফঃ ক্ষীণতমঃ| ৬| এবং পঞ্চবিংশতিদোষভেদান্ ক্ষীণৈর্দোষৈর্বিদ্ধি| স০-তে-সন্নিপাতস্থদোষাস্ত্রযঃ, ষোঢা ভবন্তি| কথম্ ? ইত্যাহ-একৈকেত্যাদি| বৃদ্ধিশ্চ সমতা চ ক্ষযশ্চ বৃদ্ধিসমতাক্ষযাঃ| একৈকস্য-বাতাদ্যন্যতমস্য, বৃদ্ধিসমতাক্ষযা একৈকবৃদ্ধিসমতাক্ষযাঃ, তৈরেকৈকবৃদ্ধিসমতাক্ষযৈঃ ষট্| যথা,-বাতো বৃদ্ধঃ পিত্তং সমং কফঃ ক্ষীণঃ| ১| পিত্তং বৃদ্ধং বাতঃ সমঃ কফঃ ক্ষীণঃ| ২| কফো বৃদ্ধঃ পিত্তং সমং বাতঃ ক্ষীণঃ| ৩| কফো বৃদ্ধো বাতঃ সমঃ পিত্তং ক্ষীণম্| ৪| বাতো বৃদ্ধঃ কফঃ সমঃ পিত্তং ক্ষীণম্| ৫| পিত্তং বৃদ্ধং কফঃ সমো বাতঃ ক্ষীণঃ| ৬| এবমেকৈকবৃদ্ধিসমতাক্ষযৈঃ ষট্| স০-একস্য ক্ষয একক্ষযঃ, দ্বন্দ্বস্য বৃদ্ধির্দ্বন্দ্ববৃদ্ধিঃ, একক্ষযসহিতা দ্বন্দ্ববৃদ্ধিরেকক্ষযদ্বন্দ্ববৃদ্ধিঃ, তযা| কিম্ভূতযা ? সবিপর্যযযা,-সহ বিপর্যযেণ-বৈপরীত্যেন বর্ততে যা সৈবম্, তযা| একক্ষযদ্বন্দ্ববৃদ্ধ্যা পুনরেব ষট্ দোষভেদাঃ| বাতঃ ক্ষীণঃ পিত্তকফৌ বৃদ্ধৌ| ১| পিত্তং ক্ষীণং বাতকফৌ বৃদ্ধৌ| ২| কফঃ ক্ষীণো বাতপিত্তে বৃদ্ধে| ৩| এবমেকক্ষযদ্বন্দ্ববৃদ্ধ্যা ত্রযো ভেদাঃ| সবিপর্যযযা চ বৃদ্ধ্যা ত্রযো দোষভেদাঃ| দ্বন্দ্বক্ষযৈকদোষবৃদ্ধ্যা-দ্বন্দ্বক্ষযসহিতৈকদোষবৃদ্ধিঃ, তযা| যথা,-বাতপিত্তক্ষীণে শ্লেষ্মা বৃদ্ধঃ| ১| বাতকফৌ ক্ষীণৌ পিত্তং বৃদ্ধম্| ২| পিত্তকফৌ ক্ষীণৌ বাতো বৃদ্ধঃ| ৩| ইতি সবিপর্যযযা বৃদ্ধ্যা ত্রযো দোষভেদাঃ| এবং সন্নিপাতভেদা দ্বিরূপযা বৃদ্ধ্যা ষডেতে জ্ঞেযাঃ| স০-এবং ভেদগণনযা দোষাণাং ভেদা দ্বিষষ্টির্নির্দিষ্টাঃ-উক্তাঃ| স০-ত্রিষষ্টীনাং পূরণো যো দোষভেদঃ, স স্বাস্থ্যকারণং-আরোগ্যহেতুঃ, ধাতুসাম্যাত্| অত্র হি স্বপ্রমাণস্থা বাতপিত্তকফাঃ| যে চ দোষভেদা দ্বিষষ্টিঃ, তে চ রোগকারণমিত্যর্থাদুক্তং ভবতি| অত্র চ রোগহেতুত্বে দোষবৈষম্যং কারণম্| ত্রিষষ্ট ইতি " তস্য পূরণে ডট্" ইতি ডট্|

Adhikarana doShabhedAnAM rasAdisaMyogAdAnantyam (12) · Śloka 12

অধুনা রসাদিভেদাদানন্ত্যং দোষভেদানাং দর্শযন্নাহ - - - - | সংসর্গাদ্রসরুধিরাদিভিস্তথৈষাং দোষাংস্তু ক্ষযসমতাবিবৃদ্ধিভেদৈঃ||৭৮|| আনন্ত্যং তরতমযোগতশ্চ যাতান্ জানীযাদবহিতমানসো যথাস্বম্| ৭৮ -১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দোষভেদীযো নাম দ্বাদশোঽধ্যাযঃ||১২||

স০-ন কেবলং দ্বিষষ্টিভেদভিন্নান্ দোষান্ জানীযাত্| আনন্ত্যং চ গতান্ বিদ্যাত্| কথমানন্ত্যম্ ? ইত্যাহ-এষাং দোষভেদানাং, যথাস্বং-রসরক্তাদিভির্ধাতুভিঃ সংযোগাত্, তথৈষামেব ক্ষযাদিভেদৈস্তরতমযোগাচ্চানন্ত্যং গতান্ বিদ্যাত্| তত্র দিঙ্মাত্রং শিষ্যব্যুত্পত্তযে প্রদর্শযতে| তত্র রসে বাতপিত্তকফানাং পৃথক্ ত্রযো ভেদা ভবন্তি, "পৃথক্ ত্রীন্ বিদ্ধি" ইত্যনুসারেণ| সংসর্গস্ত্রিধা| "তত্র তু তান্" রসমেবাধিকৃত্য নব বিদ্ধি| কথম্ ? পূর্ববত্ "ত্রীনেব সমযা বৃদ্ধ্যা ষডেকস্যাতিশাযেনে|" এবং পূর্বোক্তন্যাযেন রসমধিকৃত্য সংসর্গং যোজযিত্বা সন্নিপাতো যোজনীযঃ| যথা,-ত্রযোদশ সমস্তেষু| কথম্ ? "ষড্দ্ব্যেকাতিশযেন তু| একং তুল্যাধিকৈঃ ষট্ চ তারতম্যবিকল্পনাত্||" ইতি সমানং পূর্বেণ, রসাখ্যং স্থানং কেবলমধিকম্| "পঞ্চবিংশতিমিত্যেবং বৃদ্ধৈঃ ক্ষীণৈশ্চ তাবতঃ|" রসমধিকৃত্য ভেদান্ বিদ্ধি| ইত্যেবং রুধিরমাংসাদিভির্যোজ্যম্| একৈকোপক্রমেণেত্যেবং দ্বিষষ্টিভেদভিন্নানাং দোষাণাং রসাদিভিঃ সপ্তভিঃ সংযোগাত্ চত্বারি শতান্যেকচত্বারিংশদধিকানি স্যুঃ| শকৃদাদিসংসর্গাত্ ক্ষীণতরক্ষীণতমাদিভেদৈর্বৃদ্ধতরবৃদ্ধতমাদিভেদৈশ্চ চিন্ত্যমানা দোষা আনন্ত্যং যান্তীতি| রসভেদে দোষভেদে চাবগতে বৈদ্যস্য হেতুলক্ষণোপক্রমেষু মোহো ন ভবতি| তথা চ মুনিঃ (চ. সূ. অ. ২৬|২৫)- "যঃ স্যাদ্রসবিকল্পজ্ঞঃ স্যাচ্চ দোষবিকল্পবিত্| ন স মুহ্যেদ্বিকারাণাং হেতুলিঙ্গোপপত্তিষু||" ইতি| ম্নৌজ্রৌগস্ত্রিদশভবাপ্রহর্ষিণী স্যাত্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দোষভেদীযাধ্যাযো দ্বাদশঃ সমাপ্তঃ|| ১২||